Hangoluan

Surat Latin

ᯅᯖᯂ᯲

Marragam rumang ni ngolu di sada harang

Hangoluan i ma materi na adong proses biologisna, songon na mangalehon siknal dohot hagogoon laho mangampini diri. Sasara deskriptipna, hangoluan boi dilapati hagogoonna mambahen homeostasis, organisasi, metabolisme, hasimburon, adaptasi, mananggapi rangsang, dohot reproduksi. Sude hangoluan ujungna sahat tu hamatean, jala ndang adong na manongtong. Godang do pangantusion risa taringot tu sistim hangoluan naung diusulhon, misalna hangoluan i ma sistim na mangatur dirina sandiri. Mangalapati hangoluan lam rumit ala hamaradongon pirus, na marreplikasi holan di bagasan sel inangna, dohot kemungkinan hangoluan di hajanghajang, na boi mansai marasing sian hangoluan di Bumi. Hangoluan adong di sandok Bumi, i ma di alogo, aek, dohot tano, jala godang do ekosistem na mambaen biosper. Adong do sian i humaliang na jogal na diingani holan organisme ekstremofil. Hangoluan di sada ekosistem tartontu didok ma i biota.

Hangoluan nunga diparsiajari sian tingki na jolo, raphon sian teori-teori songon materialisme ni Empedokles na mandok molo hangoluan tardiri sian opat unsur na tongtong, dohot hilomorpisme ni Aristoteles na mandok molo namanggulmit mangarihon tondi jala boi pamahason rupa dohot materi. Hangoluan marmula saotikna sian 3,5 miliar taon na salpu, na mamparbuehon sada sijolojolo tubu na sarupa di liat portibi on. Sijolojolo tubu on marhembang gabe sude spesies na adong nuaeng on, marhite godang spesies na nunga ripur, adong do sian nasida na manadinghon jojak na mangrupa fosil. Pambahenan laho mangklasipikasihon angka namanggulmit nunga dipungka sian Aristoteles, alai klasipikasi na moderen dipungka sian sistem nomenklatur binomial ni Carl Linnaeus sian taon 1740-an.

Na manggolu (i ma namanggulmit) tardiri sian molekul biokimia, na godanganna tartompa sian piga-piga unsur kimia inti. Sude na mangolu marisi dua ragam makromolekul, i ma protein dohot asam nukleat (na somalna mangrupa DNA dohot RNA). Asam nukleat on ma na mamboan surirang na diporluhon di ganup spesies, padohot tudutudu laho mambahen ganup jenis protein. Protein pe ma gabe masin na mangulahon godang proses kimia di hangoluan. Sel i ma unit struktural dohot fungsional ni hangoluan. Organisme na ummetmet, padohot prokariota (bakteri dohot arkea), tardiri sian sasada sel na metmet. Alai organisme na umbalga, tarlumobi eukariota, boi do tardiri sian sada sel manang marsel na gok dohot struktur na lobi kompleks. Hangoluan holan diboto do adong di Bumi, alai hangoluan di duru ni Bumi didiphon betak. Saonari, hangoluan na dibahenan boi do disimulasi jala dijalahi angka napistar dohot insinyur .