Naipospos
Naipospos (surat Batak : ᯉᯤᯇᯘᯬ᯲ᯇᯘᯬ᯲ ) i ma sada marga Batak Toba na umpompar sian si Raja Naipospos. Ia anak ni si Raja Naipospos 5 (lima) do, na umpompar muse 7 (pitu) marga. On do na umbahen digoari pinompar ni Raja Naipospos i ma Naipospos silima saama pitu marga (pinompar ni Naipospos, lima na marhahamaranggi, pitu marga pinomparna).
Turiturian ni Raja Naipospos dohot Pinomparna
[patota | patota mualna]Turiturian ni Naipospos
[patota | patota mualna]Mangihuthon turiturian ni natuatua sijolojolo tubu dohot raja adat marga Naipospos na maringanan di luat Dolok Imun, Hutaraja dohot Sipoholon songon bona pasogit huta mula ni Naipospos, didok nasida do ianggo anak ni si Raja Naipospos 5 (lima) halak do alai tubu sian 2 (dua) ina na marpariban boru Pasaribu. [1]
Sanga do ngolngolan leleng si Raja Naipospos paima gabegabean ripe na parjolo nialapna. Ala ni do umbahen marbunibuni ibana mambuat ripena na paduahon na tong boru Pasaribu. Di na so panagaman, rap gabegabean ma ripe na parjolo dohot paduahon.
Ia na jumolo sorang i ma tubu ni ina na parjolo. Laos digoari ma anakna i Donda Hopol, asa anggiat anak panggoaran buha bajuna on manghopol tondi ni angka anggina. [2]
Dungi, ditubuhon ina paduahon i ma sada anak di Raja Naipospos jala dibahen ma goarna Marbun.
Ia ina na parjolo ditubuhon do muse 3 (tolu) nari anak di Raja Naipospos, i ma na digoari: Donda Ujung, Ujung Tinumpak, dohot Jamita Mangaraja .
Anak sian ina na paduahon holan Marbun do, alai mamungka sian taon 1983 adong manang piga sian pinompar ni Naipospos na sai mandok Marbun do anak sihahaan. Hombar tu hasomalon di adat Batak, ndang anak sihahaan ianggo Marbun, alai siampudan do, ai tubu ni ripe paduahon do ibana jala ndang parjolo tubu sian angka anak ni Raja Naipospos. [3]
Jadi, anak ni Raja Naipospos 5 (lima) halak do, i ma:
- Donda Hopol, i ma na umpompar marga Sibagariang
- Donda Ujung, i ma na umpompar marga Hutauruk
- Ujung Tinumpak, i ma na umpompar marga Simanungkalit
- Jamita Mangaraja, i ma na umpompar marga Situmeang
- Marbun, na umpompar muse 3 (tolu) anak, i ma na gabe marga:
- Marbun Lumban Batu
- Marbun Banjar Nahor
- Marbun Lumban Gaol
Goar Tulut Martuasame
[patota | patota mualna]Martuasame goar tulut ni si Raja Naipospos do. [4]
Adong do sada inganan parsombaonan najolo jonok aek rangat di Sipoholon margoar Sombaon Same, na ampit marpardomuan tu goar tulut Martuasame on. [5]
Dolok Imun
[patota | patota mualna]Dolok Imun, Huta Raja, Kecamatan Sipoholon, Kabupaten Tapanuli Utara i ma sada luat huta na parjolo pinungka ni Raja Naipospos. [6]
Di Dolok Imun ma inganan hatubuan dohot magodang ni anak dohot boru ni Raja Naipospos, jala sian inganan on ma marserak pomparan ni Raja Naipospos tu luat na asing.
Ragam Pandapot
[patota | patota mualna]Toga Sipoholon
[patota | patota mualna]Goar Toga Sipoholon jotjot do dipangke gabe goar punguan parsadaan ni angka marga pinompar ni si Raja Naipospos sian ripena na parjolo, i ma: Sibagariang, Hutauruk, Simanungkalit, dohot Situmeang . Adong na deba mandok ia anak ni si Raja Naipospos 2 (dua) halak do na tubu sian 2 (dua) ripena. Ripe na parjolo ma na manubuhon sada anak na margoar Sipoholon, jala ripe na paduahon manubuhon sada anak na margoar Marbun. [7]
Alai anggo mangihuthon turiturian sian angka natuatua sijolojolo tubu dohot raja adat Naipospos, na maringanan di luat Sipoholon, dijua situtu do goar Toga Sipoholon on gabe goar anak ni si Raja Naipospos . [8] Didok angka natuatua, ndang tutu 2 (dua) anak ni Raja Naipospos, ima: Toga Sipoholon dohot Toga Marbun . Pandapot on didok, marmula sian taon 1921 . [9]
Hatorangan na jotjot dipasahat angka natuatua dohot raja adat marga Naipospos na adong di luat Sipoholon, songon on ma:. [10]
- Ndang hea dope Sipoholon i dipangke gabe marga, hape ianggo Naipospos dohot Marbun nunga dipangke gabe marga i sian narobi.
- Ndang adong na umboto jala boi tangkas paboahon barita jujur ngolu ni Sipoholon, dohot inganan tanda parhutaanna najolo.
- Sude natuatua dohot raja adat Naipospos na adong di Dolok Imun, Huta Raja, Kecamatan Sipoholon, songon huta mula bona pasogit ni Naipospos, satolop mandok ndang adong anak ni Raja Naipospos na margoar Sipoholon.
- Sahat tu tingki on, ndang boi tarpatupa Parsadaan Toga Sipoholon gabe punguan parsadaan ni marga Sibagariang, Hutauruk, Simanungkalit dohot Situmeang, di bona pasogit Sipoholon, ala dialo angka natuatua dohot raja adat Naipospos na adong di Sipoholon, laos i do umbahen ndang adong jongjong batu partanda tugu ni Toga Sipoholon.
Anak Sihahaan
[patota | patota mualna]Mangihuthon na nidok ni angka natuatua dohot raja adat Naipospos na maringanan di Dolok Imun, Hutaraja dohot Sipoholon, na parjolo tubu sian 5 (lima) anak ni Raja Naipospos i ma Donda Hopol . On ma goar na nilehon ni si Raja Naipospos tu buha bajuna anakna sihahaan mardongan panghirimon dohot tangiang anggiat boi ibana manghopol tondi ni angka anggina. Donda Hopol on ma na umpompar marga Sibagariang . [11]
Alai, di angka na mandok 2 (dua) do anak ni Raja Naipospos, jotjot do masa parsalisian taringot tu ise do siangkangan anak sihahaan: Sipoholon manang Marbun . Ai nang pe Sipoholon tubu sian ripe na parjolo, na dihaporseai na parjolo tubu Marbun do.
Tutur Pomparan ni Naipospos
[patota | patota mualna]Indada holan taringot piga halak do sasintongna anak ni si Raja Naipospos, partording tutur di angka marga pinompar ni Raja Naipospos pe jotjot do gabe parsoalan di tongatonga ni pinompar ni Raja Naipospos uju martutur. Jotjot do adong manang piga na sai manjua ia marga Marbun gabe siampudan, ala Situmeang do na parpudi tubu sian pomparan ni Raja Naipospos. Hape hombar tu adat na somal di Tano Batak, sai jumolo do disurathon di tarombo tubu sian ripe parjolo, dung i pe sian ripe na paduahon, dohot ripe na asing, molo lobi sian sada ripe tubu pinomparna. [12]
Parsoalan on jotjot do ditongai angka natuatua dohot raja adat pomparan ni Naipospos marhite padan. Togu urat ni bulu, toguan urat ni padang; togu hata ni uhum, toguan hata ni padan. Di bagas padan ini diaturhon ma na gabe satarap ma marga Hutauruk dohot marga Marbun Lumbanbatu, gabe satarap ma marga Simanungkalit dohot Marbun Banjarnahor, jala gabe satarap ma muse marga Situmeang dohot Marbun Lumbangaol . Na so jadi masiolian ganup dongan marga na gabe satarap, jala ise na tamue gabe sianggian, na parjabu gabe sihahaan. Hinorhon ni padan on ma, ingkon jouon ni marga Simanungkalit dohot Situmeang ma haha doli tu marga Marbun Lumbanbatu ala nunga gabe satarap Hutauruk dohot Marbun Lumbanbatu . Marga Situmeang dohot Marbun Lumbangaol pe ingkon gabe rap siampudan ma. Alai ianggo tutur tu marga Sibagariang ingkon tong do gabe sihahaan manang siangkangan di sude marga pinompar ni Raja Naipospos, ala ibana do na parjolo tubu buha baju ni si Raja Naipospos [13]
Mual Barita
[patota | patota mualna]- ↑ "Si Raja Naipospos". BUKU SAKU MARGA BATAK, tulisan Doangsa P. L. Situmeang tahun 2009."Si Raja Naipospos". BUKU SAKU MARGA BATAK, sinurat ni Doangsa P. L. Situmeang taon 2009.
- ↑ "Tarombo dohot Turiturian ni si Raja Naipospos" (PDF). buku na sinurat ni Haran Sibagariang di taon 1953, Kepala Negeri Hutaraja nahinan (dalam bahasa Batak).
- ↑ "TAROMBO NAIPOSPOS". Kisah Raja Naipospos dan Keturunannya, sinurat ni Ricardo Parulian Sibagariang.
- ↑ "Martuasame adalah julukan (goar tulut) Naipospos". sinurat ni Ricardo Parulian Sibagariang.
- ↑ "Sombaon Same". HUTAURUK BONA, tulisan Leopold Parulian Sibagariang."Sombaon Same". HUTAURUK BONA, sinurat ni Leopold Parulian Sibagariang.
- ↑ "FORUM DIALOG TAROMBO NAIPOSPOS". website tarombo Naipospos.
- ↑ "SILSILAH NAIPOSPOS : Pomparan ni Raja Lumban Gaol". lumbangaol.org. Diarsipkan dari versi asli tanggal 2021-10-19.
- ↑ "Apa Benar Naipospos Menurunkan 7 Marga?". HUTAURUK BONA, tulisan Maridup Hutauruk."Apa Benar Naipospos Menurunkan 7 Marga?". HUTAURUK BONA, sinurat ni Maridup Hutauruk.
- ↑ "Toga Sipoholon bukanlah putera Naipospos". sinurat ni Ricardo Parulian Sibagariang.
- ↑ "TOLAK Toga Sipoholon sebagai nama anak Raja Naipospos". Alaman Facebook Tarombo Naipospos.
- ↑ "Media Komunikasi Marga Sibagariang". website marga Sibagariang.
- ↑ "BUKTI-BUKTI HAK SULUNG SIBAGARIANG". Donda Hopol (Sibagariang) adalah putera sulung (siangkangan ni) Raja Naipospos, sinurat ni Ricardo Parulian Sibagariang.
- ↑ "Mampukah Keturunan Naipospos Bertutursapa?". HUTAURUK BONA, tulisan Maridup Hutauruk."Mampukah Keturunan Naipospos Bertutursapa?". HUTAURUK BONA, sinurat ni Maridup Hutauruk.