Jump to content

Buku 1 Petrus

Sian Wikipedia

1 Petrus ᯇᯩᯖ᯲ᯒᯘᯮ᯲ 1[patota | patota mualna]

1:1 Ahu surat ni si Petrus, apostel ni Jesus Kristus, mandapothon angka paisolat, naung tarpillit, na marserak di Pontus, Galatia, Kappadosia, Asia dohot Bitinia, ᯀᯂᯮ ᯘᯮᯒᯖ᯲ ᯉᯪ ᯘᯪ ᯇᯩᯖ᯲ᯒᯘᯮ᯲ ᯀᯇᯘᯬ᯲ᯖᯞᯩ᯲ ᯉᯪ ᯐᯩᯘᯘᯮ᯲ ᯄ᯦᯲ᯒᯘᯪ᯲ᯖᯘᯮ᯲ ᯔᯉ᯲ᯑᯇᯖᯬ᯲ᯂᯉᯬ᯲ ᯀᯰᯄ᯦ ᯇᯤᯘᯬᯞᯖ᯲ ᯉᯀᯮᯰ ᯖᯒ᯲ᯇᯞᯪ᯲ᯞᯖᯪ᯲ ᯉ ᯔᯒ᯲ᯘᯩᯒᯄ᯦᯲ ᯑᯪ ᯇᯉᯬ᯲ᯖᯪᯀᯘᯮ᯲ ᯎᯞᯖᯪᯀ ᯄ᯦ᯇ᯲ᯇᯑᯬᯘᯪᯀ ᯀᯘᯪᯀ ᯑᯬᯂᯖᯬ᯲ ᯅᯪᯖᯪᯉᯪᯀ

1:2 marguru tu panandaon ni Debata Ama hian, di bagasan Tondi na pabadiahon, tu pangoloion dohot pangurasion ni mudar ni Jesus Kristus: Singkop ma di hamu asi ni roha dohot dame! ᯔᯒ᯲ᯎᯮᯒᯮ ᯖᯮ ᯇᯉᯉ᯲ᯑᯀᯉᯬ᯲ ᯉᯪ ᯑᯩᯅᯖ ᯀᯔ ᯂᯪᯀᯉ᯲ ᯑᯪ ᯅᯎᯘᯉ᯲ ᯖᯉᯬ᯲ᯑᯪ ᯉ ᯇᯅᯑᯪᯀᯂᯉᯬ᯲ ᯖᯮ ᯇᯝᯬᯞᯬᯤᯀᯉᯬ᯲ ᯑᯬᯂᯖᯬ᯲ ᯇᯝᯮᯒᯘᯪᯀᯉᯬ᯲ ᯉᯪ ᯔᯮᯑᯒ᯲ ᯉᯪ ᯐᯩᯘᯘᯮ᯲ ᯄ᯦᯲ᯒᯘᯪ᯲ᯖᯘᯮ᯲ ᯘᯰᯪᯄ᯦ᯇᯬ᯲ ᯔ ᯑᯪ ᯂᯔᯮ ᯀᯘᯪ ᯉᯪ ᯒᯪᯂ ᯑᯬᯂᯖᯬ᯲ ᯑᯔᯩ

1:3 Pinuji ma Debata, Ama ni Tuha HBOnta Jesus Kristus, naung manubuhon hita paduahalihon, sian godang ni asi ni rohana, marhitehite haheheon ni Jesus Kristus sian angka na mate, asa marpangkirimon na mangolu hita. ᯇᯪᯉᯮᯐᯪ ᯔ ᯑᯩᯅᯖ ᯀᯔ ᯉᯪ ᯖᯮᯂᯉ᯲ᯖ ᯐᯩᯘᯘᯮ᯲ ᯄ᯦᯲ᯒᯘᯪ᯲ᯖᯘᯮ᯲ ᯉᯀᯮᯰ ᯔᯉᯮᯅᯮᯂᯉᯬ᯲ ᯂᯪᯖ ᯇᯑᯮᯀᯂᯞᯪᯂᯉᯬ᯲ ᯘᯪᯀᯉ᯲ ᯎᯬᯑᯰ ᯉᯪ ᯀᯘᯪ ᯉᯪ ᯒᯬᯂ ᯔᯒ᯲ᯂᯪᯖᯩᯂᯪᯖᯩ ᯂᯂᯩᯂᯩᯀᯉᯬ᯲ ᯉᯪ ᯐᯩᯘᯘᯮ᯲ ᯄ᯦᯲ᯒᯘᯪ᯲ᯖᯘᯮ᯲ ᯘᯪᯀᯉ᯲ ᯀᯰᯄ᯦ ᯉ ᯔᯖᯩ ᯀᯘ ᯔᯒ᯲ᯇᯰᯄ᯦ᯪᯒᯪᯔᯉᯬ᯲ ᯉ ᯔᯝᯬᯞᯮ ᯂᯪᯖ

1:4 Di siteanon na manongtong, na so marlindang, na so ra malos, na sinimpan di banua ginjang di hamu. ᯑᯪ ᯘᯪᯖᯩᯀᯉᯉᯬ᯲ ᯉ ᯔᯉᯉᯬ᯲ᯖᯰᯬ ᯉ ᯘᯬ ᯔᯒ᯲ᯞᯉᯪ᯲ᯑᯰ ᯉ ᯘᯬ ᯒ ᯔᯞᯘᯬ᯲ ᯉ ᯘᯪᯉᯔᯪ᯲ᯇᯉ᯲ ᯑᯪ ᯅᯉᯮᯀ ᯎᯉᯪ᯲ᯐᯰ ᯑᯪ ᯂᯔᯮ

1:5 Ai diramoti do hamu hinorhon ni gogo ni Debata marhitehite haporseaon, asa sahat tu haluaon, naung rade sipapataron di tingki na parpudi i. ᯀᯤ ᯑᯪᯒᯔᯬᯖᯪ ᯑᯪ ᯂᯔᯮ ᯂᯪᯉᯒᯬ᯲ᯂᯉᯬ᯲ ᯉᯪ ᯎᯬᯎᯬ ᯉᯪ ᯑᯩᯅᯖ ᯔᯒ᯲ᯂᯪᯖᯩ ᯂᯇᯒᯬ᯲ᯘᯩᯀᯀᯉᯬ᯲ ᯀᯘ ᯘᯂᯖ᯲ ᯖᯮ ᯂᯞᯮᯀᯀᯉᯬ᯲ ᯉᯀᯮᯰ ᯒᯑᯩ ᯘᯪᯇᯇᯖᯒᯉᯬ᯲ᯑᯪ ᯖᯰᯪᯄ᯦ᯪ ᯉ ᯇᯒ᯲ᯇᯮᯑᯪ ᯤ

1:6 I do dihalashon hamu, nang pe marsak hamu satongkin nuaeng, di bagasan ragam ni pangunjunan, molo tung ingkon i. ᯤ ᯑᯬ ᯑᯪᯂᯞᯘ᯲ᯂᯉᯬ᯲ ᯂᯔᯮ ᯉᯰ ᯇᯩ ᯔᯒ᯲ᯘᯄ᯦᯲ ᯂᯔᯮ ᯘᯖᯰᯬᯄ᯦ᯉᯪ᯲ ᯉᯮᯀᯀᯰᯩ ᯑᯪ ᯅᯎᯘᯉ᯲ ᯒᯎᯔ᯲ ᯉᯪ ᯇᯝᯉᯮ᯲ᯐᯮᯉᯉ᯲ ᯔᯬᯞᯬ ᯖᯮᯰ ᯀᯰᯪᯄ᯦ᯉᯬ᯲ ᯤ

1:7 Ai naeng jumpang do hatauon ni haporseaonmuna, na andul ummarga sian sere na so manahan, nang pe diuji api i, bahen pujipujian dohot hamuliaon dohot hasangapon, di hapapatar ni Jesus Kristus i. ᯀᯤ ᯉᯀᯰᯩ ᯐᯔᯮ᯲ᯇᯰ ᯑᯬ ᯂᯖᯮᯀᯀᯉᯬ᯲ ᯉᯪ ᯂᯇᯒᯬ᯲ᯘᯩᯀᯀᯉᯬ᯲ᯔᯮᯉ ᯉ ᯀᯉ᯲ᯑᯞᯮ᯲ ᯀᯔᯮ᯲ᯔᯒ᯲ᯎ ᯘᯪᯀᯉ᯲ ᯘᯩᯒᯩ ᯉ ᯘᯬ ᯔᯉᯂᯉ᯲ ᯉᯰ ᯇᯩ ᯑᯪᯥᯐᯪ ᯀᯇᯪ ᯤ ᯤ ᯅᯂᯉᯩ᯲ ᯇᯮᯐᯪᯇᯮᯐᯪᯀᯉ᯲ ᯑᯬᯂᯖᯬ᯲ ᯂᯔᯮᯞᯪᯀᯀᯉᯬ᯲ ᯑᯬᯂᯖᯬ᯲ ᯂᯘᯝᯇᯉᯬ᯲ ᯑᯪ ᯂᯇᯇᯖᯒ᯲ ᯉᯪ ᯐᯩᯘᯘᯮ᯲ ᯄ᯦᯲ᯒᯘᯪ᯲ᯖᯘᯮ᯲ ᯤ

1:8 Atik pe so dung diida hamu Ibana, dihaholongi hamu do Ibana, na hinaporseaanmuna, nang so diida hamu Ibana nuaeng, gabe mariaia do hamu, di bagasan halalas ni roha na so tarhatahon jala na tongam, ᯀᯖᯄ᯦ᯪ᯲ ᯇᯩ ᯘᯬ ᯑᯨᯮ. ᯑᯪᯤᯑ ᯂᯔᯮ ᯤᯅᯉ ᯑᯪᯂᯂᯬᯞᯬᯝᯪ ᯂᯔᯮ ᯑᯬ ᯤᯅᯉ ᯉ ᯂᯪᯉᯇᯒᯬ᯲ᯘᯩᯀᯀᯉ᯲ᯔᯮᯉ ᯉᯰ ᯘᯬ ᯑᯪᯤᯑ ᯂᯔᯮ ᯤᯅᯉ ᯉᯮᯀᯀᯰᯩ ᯎᯅᯩ ᯔᯒᯪᯀᯤᯀ ᯑᯬ ᯂᯔᯮ ᯑᯪ ᯅᯎᯘᯉ᯲ ᯂᯞᯞᯘ᯲ ᯉᯪ ᯒᯬᯂ ᯉ ᯘᯬ ᯖᯒ᯲ᯂᯖᯂᯉᯬ᯲ ᯐᯞ ᯉ ᯖᯬᯝᯔ᯲

1:9 gabe jaloonmuna do ujung ni haporseaonmuna, i ma haluaon ni tondimuna. ᯎᯅᯩ ᯐᯞᯬᯀᯉᯬ᯲ᯔᯮᯉ ᯑᯬ ᯥᯐᯮᯰ ᯉᯪ ᯂᯇᯒᯬ᯲ᯘᯩᯀᯀᯉᯬ᯲ᯔᯮᯉ ᯤ ᯂᯞᯮᯀᯀᯉᯬ᯲ ᯉᯪ ᯖᯉᯬ᯲ᯑᯪᯔᯮᯉ

1:10 I ma haluaon, na niluluan jala pinamanatmanat ni angka panurirang, naung manurirangkon asi ni roha na tu hamu i. ᯤ ᯔ ᯂᯞᯮᯀᯀᯉᯬ᯲ ᯉ ᯉᯪᯞᯮᯞᯮᯀᯉ᯲ ᯐᯞ ᯇᯪᯉᯔᯉᯖ᯲ᯔᯉᯖ᯲ ᯉᯪ ᯀᯰᯄ᯦ ᯇᯉᯮᯒᯪᯒᯰ ᯉᯀᯮᯰ. ᯔᯉᯮᯒᯪᯒᯰᯄ᯦ᯉᯬ᯲ ᯀᯘᯪ ᯉᯪ ᯒᯬᯂ ᯉ ᯖᯮ ᯂᯔᯮ ᯤ

1:11 On do dipamanatmanat nasida: Manang andigan jala manang sadihari tingkina dituduhon Tondi ni Kristus i, na di bagasan nasida, na mangkatindangkon hian angka haporsuhon, na naeng songgop tu Kristus i, ro di angka hasangapon na dipudi ni i. ᯀᯉᯬ᯲ ᯑᯬ ᯑᯪᯇᯔᯉᯖ᯲ᯔᯉᯖ᯲ ᯉᯘᯪᯑ ᯔᯉᯰ ᯀᯉ᯲ᯑᯪᯎᯉ᯲ ᯐᯞ ᯔᯉᯰ ᯘᯑᯪᯂᯒᯪ ᯖᯰᯂ᯦ᯪᯉ ᯑᯪᯖᯮᯑᯮᯂᯉᯬ᯲ ᯖᯉᯬ᯲ᯑᯪ ᯉᯪ ᯄ᯦᯲ᯒᯘᯪ᯲ᯖᯘᯮ᯲ ᯤ ᯉ ᯑᯪ ᯅᯎᯘᯉ᯲ ᯉᯘᯪᯑ ᯉ ᯔᯰᯄ᯦ᯖᯉᯪ᯲ᯑᯰᯄ᯦ᯉᯬ᯲ ᯂᯪᯀᯉ᯲ᯀᯰᯄ᯦ ᯂᯇᯒᯬ᯲ᯘᯮᯂᯉᯬ᯲ ᯉ ᯉᯀᯰᯩ ᯘᯰᯬᯎᯇᯬ᯲ ᯖᯮ ᯄ᯦᯲ᯒᯘᯪ᯲ᯖᯘᯮ᯲ ᯤ ᯒᯬ ᯑᯪ ᯀᯰᯄ᯦ ᯂᯘᯝᯇᯉᯬ᯲ ᯉ ᯑᯪᯇᯮᯑᯪ ᯉᯪ ᯤ

1:12 Dipapatar pe i tu nasida, ndada di nasida sandiri, di hamu do na niradotannasida i. Laos i do na pinaboa ni angka parbarita na uli nuaeng tu hamu marhitehite Tondi Parbadia, naung sinuruna sian banua ginjang. Masihol do angka pardisurgo mamereng tu bagasanna. ᯑᯪᯇᯇᯖᯒ᯲ ᯇᯩ ᯖᯮ ᯉᯘᯪᯑ ᯉ᯲ᯑᯑ ᯑᯪ ᯉᯘᯪᯑ ᯘᯉ᯲ᯑᯪᯒᯪ ᯑᯪ ᯂᯔᯮ ᯑᯬ ᯉ ᯉᯪᯒᯑᯬᯖᯉ᯲ᯉᯪ ᯉᯘᯑ ᯤ ᯞᯀᯘᯬ᯲ ᯤ ᯑᯬ ᯉ ᯇᯪᯉᯅᯬᯀ ᯉᯪ ᯀᯰᯄ᯦ ᯇᯒ᯲ᯅᯒᯪᯖ ᯉ ᯥᯞᯪ ᯉᯮᯀᯀᯰᯩ ᯖᯮ ᯂᯔᯮ ᯔᯒ᯲ᯂᯪᯖᯩᯂᯪᯖᯩ ᯖᯉᯬ᯲ᯑᯪ ᯇᯒ᯲ᯅᯑᯪᯀ ᯉᯀᯮᯰ ᯘᯪᯉᯮᯒᯮᯉ ᯘᯪᯀᯉ᯲ ᯅᯉᯮᯀ ᯎᯉᯪ᯲ᯐᯰ ᯔᯘᯪᯂᯞᯬ᯲ ᯑᯬ ᯀᯰᯂ᯦ ᯇᯒ᯲ᯑᯪᯘᯒᯮ᯲ᯎᯬ ᯔᯔᯩᯒᯰᯩ ᯖᯮ ᯅᯎᯘᯉ᯲ᯅᯉ

1:13 Dibahen i, hohosi hamu ma rohamuna; torang ma rohamuna; sandok mangkirim ma hamu di asi ni roha na tarboan tu hamu, di hapataron ni Jesus Kristus. ᯑᯪᯅᯂᯉᯩ᯲ ᯤ ᯂᯬᯂᯬᯘᯪ ᯂᯔᯮ ᯒᯬᯂᯔᯮᯉ ᯖᯬᯒᯰ ᯔ ᯒᯬᯂᯔᯮᯉ ᯘᯉ᯲ᯑᯄ᯦ᯬ᯲ ᯔᯰᯄ᯦ᯪᯒᯔᯪ᯲ ᯔ ᯂᯔᯮ ᯑᯪ ᯀᯘᯪ ᯉᯬ ᯒᯬᯂ ᯉ ᯖᯒ᯲ᯅᯬᯀᯉ᯲ ᯖᯮ ᯂᯔᯮ ᯑᯪ ᯂᯇᯖᯒᯉᯬ᯲ ᯉᯪ ᯐᯩᯘᯘᯮ᯲ ᯄ᯦᯲ᯒᯘᯪ᯲ᯖᯘᯮ᯲

1:14 Songon dakdanak sipangoloi ma hamu; unang ma paihutihut hamu be sangkapsangkap ni roha, uju di haotoonmuna najolo. ᯘᯬᯝᯉᯬ᯲ ᯑᯄ᯦᯲ᯑᯉᯄ᯦᯲ ᯘᯪᯇᯝᯬᯞᯬᯤ ᯔ ᯂᯔᯮ ᯥᯉᯰ ᯔ ᯇᯤᯂᯖᯮ᯲ᯤᯂᯖᯮ᯲ ᯂᯔᯮ ᯅᯩ ᯘᯰᯄ᯦ᯇ᯲ᯘᯰᯄ᯦ᯇ᯲ ᯉᯪ ᯒᯬᯂ ᯥᯐᯮ ᯑᯪ ᯂᯀᯬᯖᯬᯀᯉᯬ᯲ᯔᯮᯉ ᯉᯐᯬᯞᯬ

1:15 Alai mangihuthon Nabadia i, na manjou hamu, dohot ma hamu gabe badia di nasa parangemuna! ᯀᯞᯤ ᯔᯝᯪᯂᯖᯮ᯲ᯂᯉᯬ᯲ ᯉᯅᯑᯪᯀ ᯤ ᯉ ᯔᯉ᯲ᯐᯬᯥ ᯂᯔᯮ ᯑᯬᯂᯖᯬ᯲ ᯔ ᯂᯔᯮ ᯎᯅᯩ ᯅᯑᯪᯀ ᯑᯪ ᯉᯘ ᯇᯒᯝᯩᯔᯮᯉ

1:16 Ai na tarsurat do: "Badia ma hamu, ai na badia do Ahu!" ᯀᯤ ᯉ ᯖᯒ᯲ᯘᯮᯒᯖ᯲ ᯑᯬ ᯅᯑᯪᯀ ᯔ ᯂᯔᯮ ᯀᯤ ᯉ ᯅᯑᯪᯀ ᯑᯬ ᯀᯂᯮ

1:17 Molo Ama digoar hamu Ibana, na so marnida rupa, laho manguhumi nasa jolma marguru tu pambahenanna, marhatahuton ma hamu marparange di tingki paisolatanmuna! ᯔᯬᯞᯬ ᯀᯔ ᯑᯪᯎᯬᯀᯒ᯲ ᯂᯔᯮ ᯤᯅᯉ ᯉ ᯘᯬ ᯔᯒ᯲ᯉᯪᯑ ᯒᯮᯇ ᯞᯂᯬ ᯔᯝᯮᯂᯮᯔᯪ ᯉᯘ ᯐᯞᯬ᯲ᯔ ᯔᯒ᯲ᯎᯮᯒᯮ ᯖᯮ ᯇᯔ᯲ᯅᯂᯩᯉᯉ᯲ᯉ ᯔᯒ᯲ᯂᯖᯂᯮᯖᯉᯬ᯲ ᯔ ᯂᯔᯮ ᯔᯒ᯲ᯇᯒᯑᯩ ᯑᯪ ᯖᯰᯪᯄ᯦ᯪ ᯇᯤᯘᯬᯞᯖᯉᯬ᯲ᯔᯮᯉ

1:18 Ai diboto hamu do: Ndada binahen ni sere manang perak, angka na olo buruk, umbahen na malua hamu sian adatmuna na so marniula i, na tineanmuna sian angka amamuna; ᯀᯤ ᯑᯪᯅᯬᯖᯬ ᯂᯔᯮ ᯑᯬ ᯉ᯲ᯑᯑ ᯅᯪᯉᯂᯉᯩ᯲ ᯉᯪ ᯘᯩᯒᯩ ᯔᯉᯰ ᯇᯩᯒᯄ᯦᯲ ᯀᯰᯄ᯦ ᯉ ᯀᯬᯞᯬ ᯅᯮᯒᯄᯮ᯲ ᯀᯔᯮ᯲ᯅᯂᯉᯩ᯲ ᯉ ᯔᯞᯮᯀ ᯂᯔᯮ ᯘᯪᯀᯉ᯲ ᯀᯑᯖ᯲ᯔᯮᯉ ᯉ ᯘᯬ ᯔᯒ᯲ᯉᯪᯥᯞ ᯤ ᯉ ᯖᯪᯉᯩᯀᯉ᯲ᯔᯮᯉ ᯘᯪᯀᯉ᯲ ᯀᯰᯄ᯦ ᯀᯔᯔᯮᯉ

1:19 alai binahen ni mudar ni Kristus na arga i do, na songon mudar ni birubiru na so hasurahan, na so marlindang. ᯀᯞᯤ ᯅᯪᯉᯂᯉᯩ᯲ ᯉᯪ ᯔᯮᯑᯒ᯲ ᯉᯪ ᯄ᯦᯲ᯒᯘᯪ᯲ᯖᯘᯮ᯲ ᯉ ᯀᯒ᯲ᯎ ᯤ ᯑᯬ ᯉ ᯘᯬᯝᯉᯬ᯲ ᯔᯮᯑᯒ᯲ ᯉᯪ ᯅᯪᯒᯮᯅᯪᯒᯮ ᯉ ᯘᯬ ᯂᯘᯮᯒᯂᯉ᯲ ᯉ ᯘᯬ ᯔᯒ᯲ᯞᯉᯪ᯲ᯑᯰ

1:20 Naung ditodo do Ibana hian, tagan so ojak dope portibi on; alai dipapatar do di ujung ni angka tingki, ala ni hamu? ᯉᯀᯮᯰ ᯑᯪᯖᯬᯑᯬ ᯑᯬ ᯤᯅᯉ ᯂᯪᯀᯉ᯲ ᯖᯎᯉ᯲ ᯘᯬ ᯀᯬᯐᯄ᯦᯲ ᯑᯬᯇᯩ ᯇᯒᯬ᯲ᯖᯪᯅᯪ ᯀᯉᯬ᯲ ᯀᯞᯤ ᯑᯪᯇᯇᯖᯒ᯲ ᯑᯬ ᯑᯪ ᯥᯐᯮᯰ ᯉᯪ ᯀᯰᯄ᯦ ᯖᯰᯪᯄ᯦ᯪ ᯀᯞ ᯉᯪ ᯂᯔᯮ

1:21 Marhitehite Ibana do dihaporseai hamu Debata, na pahehehon Ibana sian angka naung mate, jala na mangalehon hasangapon tu Ibana, asa tu Debata haporseaon nang pangkirimonmuna. ᯔᯒ᯲ᯂᯪᯖᯩᯂᯪᯖᯩ ᯤᯅᯉ ᯑᯬ ᯑᯪᯂᯇᯒᯬ᯲ᯘᯩᯀᯤ ᯂᯔᯮ ᯑᯩᯅᯖ ᯉ ᯇᯂᯩᯂᯩᯂᯉᯬ᯲ ᯤᯅᯉ ᯘᯪᯀᯉ᯲ ᯀᯰᯂ᯦ ᯉᯀᯮᯰ ᯔᯖᯩ ᯐᯞ ᯉ ᯔᯝᯞᯩᯂᯉᯬ᯲ ᯂᯘᯝᯇᯉᯬ᯲ ᯖᯮ ᯤᯅᯉ ᯀᯘ ᯖᯮ ᯑᯩᯅᯖ ᯂᯇᯒᯬ᯲ᯘᯩᯀᯀᯉᯬ᯲ ᯉᯰ ᯇᯰᯄ᯦ᯪᯒᯪᯔᯉᯬ᯲ᯔᯮᯉ

1:22 Paias hamu ma rohamuna, marpangoloion di hasintongan, mangeahi haholongon na so marlaok di dongan, asa masihaholongan situtu hamu sian nasa roha. ᯇᯤᯀᯘ᯲ ᯂᯔᯮ ᯔ ᯒᯬᯂᯔᯮᯉ ᯔᯒ᯲ᯇᯝᯬᯞᯬᯤᯀᯉᯬ᯲ ᯑᯪ ᯂᯘᯉᯪ᯲ᯖᯬᯝᯉ᯲ ᯔᯝᯩᯀᯂᯪ ᯂᯂᯬᯞᯬᯝᯉᯬ᯲ ᯉ ᯘᯬ ᯔᯒ᯲ᯞᯀᯄ᯦ᯬ᯲ ᯑᯪ ᯑᯬᯝᯉ᯲ ᯀᯘ ᯔᯒ᯲ᯘᯪᯂᯂᯬᯞᯬᯝᯉ᯲ ᯘᯪᯖᯮᯖᯮ ᯂᯔᯮ ᯘᯪᯀᯉ᯲ ᯉᯘ ᯒᯬᯂ

1:23 Ai nunga mangulahi tubu hamu, ndada sian boni na olo basebasean, sian na manongtong do: Binahen ni hata na mangolu jala na mian i, na sian Debata. ᯀᯤ ᯉᯮᯝ ᯔᯝᯮᯞᯂᯪ ᯖᯮᯅᯮ ᯂᯔᯮ ᯉ᯲ᯑᯑ ᯘᯪᯀᯉ᯲ ᯅᯬᯉᯪ ᯉ ᯀᯬᯞᯬ ᯅᯘᯩᯅᯘᯩᯀᯉ᯲ ᯘᯪᯀᯉ᯲ ᯉ ᯔᯉᯉᯬ᯲ᯖᯰᯬ ᯑᯬ ᯅᯪᯉᯂᯉᯩ᯲ ᯉᯪ ᯂᯖ ᯉ ᯔᯝᯬᯞᯮ ᯐᯞ ᯉ ᯔᯪᯀᯉ᯲ ᯤ ᯉ ᯘᯪᯀᯉ᯲ ᯑᯩᯅᯖ

1:24 Ai "songon duhutduhut do nasa daging, songon bungabunga ni duhutduhut i do saluhut hasangaponna. Nunga malos duhutduhut i jala marurus bungabungana".ᯀᯤ ᯘᯬᯝᯉᯬ᯲ ᯑᯮᯂᯖᯮᯑᯮᯂᯖᯮ᯲ ᯑᯬ ᯉᯘ ᯑᯎᯰᯪ ᯘᯬᯝᯉᯬ᯲ ᯅᯮᯝᯅᯮᯝ ᯉᯪ ᯑᯮᯂᯖᯮ᯲ᯑᯮᯂᯖᯮ᯲ ᯤ ᯑᯬ ᯘᯞᯮᯂᯖᯮ᯲ ᯂᯘᯝᯇᯉᯬ᯲ᯉ ᯉᯮᯝ ᯔᯞᯘᯬ᯲ ᯑᯮᯂᯖᯮ᯲ᯑᯮᯂᯖᯮ᯲ ᯤ ᯐᯞ ᯔᯒᯮᯒᯘᯮ᯲ ᯅᯮᯝᯅᯮᯝᯉ

1:25 "Alai na mian do ro di salelenglelengna ia hata ni Tuhan i!" I do hata na binaritahon tu hamu. ᯀᯞᯤ ᯉ ᯔᯪᯀᯉ᯲ ᯑᯬ ᯒᯬ ᯑᯪ ᯘᯞᯩᯞᯰᯩᯞᯩᯞᯰᯩᯉ ᯤᯀ ᯂᯖ ᯉᯪ ᯖᯮᯂᯉ᯲ ᯤ ᯤ ᯑᯬ ᯂᯖ ᯉ ᯅᯪᯉᯒᯪᯖᯂᯉᯬ᯲ ᯖᯮ ᯂᯔᯮ

1 Petrus ᯇᯩᯖ᯲ᯒᯘᯮ᯲ 2[patota | patota mualna]

2:1 Antong, bolongkon hamu ma nasa hajahaton dohot nasa angkal dohot pangiburuon nang panihaion! ᯀᯉ᯲ᯖᯰᯬ ᯅᯬᯞᯰᯬᯄ᯦ᯉᯬ᯲ ᯂᯔᯮ ᯔ ᯉᯘ ᯂᯐᯂᯖᯉᯬ᯲ ᯑᯬᯂᯖᯬ᯲ ᯉᯘ ᯀᯰᯄ᯦᯲ ᯀᯰᯄ᯦ᯞ᯲ ᯑᯬᯂᯖᯬ᯲ ᯇᯝᯪᯅᯮᯒᯮᯀᯉᯬ᯲ ᯉᯰ ᯇᯉᯪᯂᯤᯀᯉᯬ᯲

2:2 Songon posoposo na imbaru tubu, uasan ma hamu di susu na tama, na so marlaok, asa lam magodang hamu, horhonon ni i, bahen haluaon, ᯘᯬᯝᯉᯬ᯲ ᯇᯬᯘᯬᯇᯬᯘᯬ ᯉ ᯀᯔᯪ᯲ᯅᯒᯮ ᯖᯮᯅᯮ ᯥᯀᯘᯉ᯲ ᯔ ᯂᯔᯮ ᯑᯪ ᯘᯮᯘᯮ ᯉ ᯖᯔ ᯉ ᯘᯬ ᯔᯒ᯲ᯞᯀᯄᯬ᯲ ᯀᯘ ᯞᯔ᯲ ᯔᯎᯬᯑᯰ ᯂᯔᯮ ᯂᯒᯬ᯲ᯂᯬᯉᯉᯬ᯲ ᯉᯪ ᯤ ᯅᯂᯉᯩ᯲ ᯂᯞᯮᯀᯀᯉᯬ᯲

2:3 molo tung naung didai hamu habasaron ni Tuhan i. ᯔᯬᯞᯬ ᯖᯮᯰ ᯉᯀᯮᯰ ᯑᯪᯑᯤ ᯂᯔᯮ ᯂᯅᯘᯒᯉᯬ᯲ ᯉᯪ ᯖᯮᯂᯉ᯲ ᯤ

2:4 Ai nunga didapothon hamu Ibana, na songon batu na mangolu, na binolongkon ni jolma; alai na pinillit jala na arga, ia di Debata. ᯀᯤ ᯉᯮᯝ ᯑᯪᯑᯇᯖᯬ᯲ᯂᯉᯬ᯲ ᯂᯔᯮ ᯤᯅᯉ ᯉ ᯘᯬᯝᯉᯬ᯲ ᯅᯖᯮ ᯉ ᯔᯝᯬᯞᯮ ᯉ ᯅᯪᯉᯬᯞᯰᯬᯄ᯦ᯉᯬ᯲ ᯉᯪ ᯐᯞᯬ᯲ᯔ ᯀᯞᯤ ᯉ ᯇᯪᯉᯞᯪ᯲ᯞᯖᯪ᯲ ᯐᯞ ᯉ ᯀᯒ᯲ᯎ ᯤᯀ ᯤᯅᯉ

2:5 Sai olo ma nang hamu paulion, songon angka batu na mangolu, gabe bagas partondion jala hamalimon na badia, laho mamboan angka pelean partondion, halomoan ni roha ni Debata, marhitehite Jesus Kristus. ᯘᯤ ᯀᯬᯞᯬ ᯔ ᯉᯰ ᯂᯔᯮ ᯇᯥᯞᯪᯀᯉᯬ᯲ ᯘᯬᯝᯉᯬ᯲ ᯀᯰᯄ᯦ ᯅᯖᯮ ᯉ ᯔᯝᯬᯞᯮ ᯎᯅᯩ ᯅᯎᯘ᯲ ᯇᯒ᯲ᯖᯉᯬ᯲ᯑᯪᯀᯉᯬ᯲ ᯐᯞ ᯂᯔᯞᯪᯔᯉᯬ᯲ ᯉ ᯅᯑᯪᯀ ᯞᯂᯬ ᯔᯔ᯲ᯅᯬᯀᯉ᯲ ᯀᯰᯄ᯦ ᯇᯩᯇᯩᯀᯉ᯲ ᯇᯒ᯲ᯖᯉᯬ᯲ᯑᯪᯀᯉᯬ᯲ ᯂᯞᯬᯔᯬᯀᯉ᯲ ᯉᯪ ᯒᯬᯂ ᯉᯪ ᯑᯩᯅᯖ ᯔᯒ᯲ᯂᯪᯖᯩᯂᯪᯖᯩ ᯐᯩᯘᯘᯮ᯲ ᯄ᯦᯲ᯒᯘᯪ᯲ᯖᯘᯮ᯲

2:6 Ai na tarsurat do di Surat i: "Hupeakhon do di bagasan Sion sada batu parsuhi, na marpili jala na arga; ndang na tarila na porsea di Ibana!". ᯀᯤ ᯉ ᯖᯒ᯲ᯘᯮᯒᯖ᯲ ᯑᯬ ᯑᯪ ᯘᯮᯒᯖ᯲ ᯤ ᯂᯮᯇᯩᯀᯂ᯲ᯂᯉᯬ᯲ ᯑᯬ ᯑᯪ ᯅᯎᯘᯉ᯲ ᯘᯪᯀᯉᯬ᯲ ᯘᯑ ᯅᯖᯮ ᯇᯒ᯲ᯘᯮᯂᯪ ᯉ ᯔᯒ᯲ᯇᯪᯞᯪ ᯐᯞ ᯉ ᯀᯒ᯲ᯎ ᯉ᯲ᯑᯰ ᯉ ᯖᯒᯪᯞ ᯉ ᯇᯒᯬ᯲ᯘᯩᯀ ᯑᯪ ᯤᯅᯉ

2:7 Arga do Ibana di hamu, angka na porsea; alai di angka na so porsea i: Batu na binolongkon ni angka pande bagas i, i ma gabe batu parsuhi, ᯀᯒ᯲ᯎ ᯑᯬ ᯤᯅᯉ ᯑᯪ ᯂᯔᯮ ᯀᯰᯄ᯦ ᯉ ᯇᯒᯬ᯲ᯘᯩᯀ ᯀᯞᯤ ᯑᯪ ᯀᯰᯄ᯦ ᯉ ᯇᯒᯬ᯲ᯘᯩᯀ ᯤ ᯅᯖᯮ ᯉ ᯅᯪᯉᯬᯞᯰᯬᯄ᯦ᯉᯬ᯲ ᯉᯪ ᯀᯰᯰᯄ᯦ ᯇᯉ᯲ᯑᯩ ᯅᯎᯘ᯲ ᯤ ᯤ ᯔ ᯎᯅᯩ ᯅᯖᯮ ᯇᯒ᯲ᯘᯮᯂᯪ

2:8 jala gabe batu partuktuhan jala batu pargasipan. Ai na tartuktuk do nasida disi, ala so dihaporseai nasida hata i; ai tusi do nasida dipadiri. ᯐᯞ ᯎᯅᯩ ᯅᯖᯮ ᯇᯒ᯲ᯖᯄ᯦ᯮ᯲ᯖᯮᯂᯉ᯲ ᯐᯞ ᯅᯖᯮ ᯇᯒ᯲ᯎᯘᯪᯇᯉ᯲ ᯀᯤ ᯉ ᯖᯒ᯲ᯖᯄ᯦ᯮ᯲ᯖᯄ᯦ᯮ᯲ ᯑᯬ ᯉᯘᯪᯑ ᯑᯪᯘᯪ ᯀᯞ ᯘᯬ ᯑᯪᯂᯇᯒᯬ᯲ᯘᯩᯀᯤ ᯉᯘᯪᯑ ᯂᯖ ᯤ ᯀᯤ ᯖᯮᯘᯪ ᯑᯬ ᯉᯘᯪᯑ ᯑᯪᯇᯑᯪᯒᯪ

2:9 Alai marga na pinillit do hamu, hamalimon na raja, bangso na badia, houm na ginomgomanna, asa tung dibaritahon hamu denggan ni harohaon ni Ibana, naung manjou hamu sian na holom tu hatiuronna halongangan i. ᯀᯞᯤ ᯔᯒ᯲ᯎ ᯉ ᯇᯪᯉᯞᯪ᯲ᯞᯖᯪ᯲ ᯑᯬ ᯂᯔᯮ ᯂᯔᯞᯪᯔᯉᯬ᯲ ᯉ ᯒᯐ ᯅᯰᯘᯬ ᯉ ᯅᯑᯪᯀ ᯂᯬᯀᯔᯮ᯲ ᯉ ᯎᯪᯉᯔᯬ᯲ᯎᯬᯔᯉ᯲ᯉ ᯀᯘ ᯖᯮᯰ ᯑᯪᯅᯒᯪᯖᯂᯉᯬ᯲ ᯂᯔᯮ ᯑᯰᯩᯎᯉ᯲ ᯉᯪ ᯂᯒᯬᯂᯀᯉᯬ᯲ ᯉᯪ ᯤᯅᯉ ᯉᯀᯮᯰ ᯔᯉ᯲ᯐᯬᯥ ᯂᯔᯮ ᯘᯪᯀᯉ᯲ ᯉ ᯂᯬᯞᯔᯬ᯲ ᯖᯮ ᯂᯖᯪᯥᯒᯉᯬ᯲ᯉ ᯂᯞᯬᯝᯝᯉ᯲ ᯤ

2:10 Hamu, angka na so bangso najolo, gabe bangso ni Debata nuaeng; angka na so niasian hamu najolo, gabe niasian do nuaeng. ᯂᯔᯮ ᯀᯰᯄ᯦ ᯉ ᯘᯬ ᯅᯰᯘᯬ ᯉ ᯐᯬᯞᯬ ᯎᯅᯩ ᯅᯰᯘᯬ ᯉᯪ ᯑᯩᯅᯖ ᯉᯮᯀᯀᯰᯩ ᯀᯰᯄ᯦ ᯉ ᯘᯬ ᯉᯪᯀᯘᯪᯀᯉ᯲ ᯂᯔᯮ ᯉ ᯐᯬᯞᯬ ᯎᯅᯩ ᯉᯪᯀᯘᯪᯀᯉ᯲ ᯑᯬ ᯉᯮᯀᯀᯰᯩ

2:11 Ale angka haholongan, huapoi ma hamu songon angka paisolat jala halak dagang: Orom hamu ma angka hisaphisap ni roha sibuk, na maralo dompak partondion! ᯀᯞᯩ ᯀᯰᯄ᯦ ᯂᯂᯬᯞᯬᯝᯉ᯲ ᯂᯮᯀᯇᯬᯤ ᯔ ᯂᯔᯮ ᯘᯬᯝᯉᯬ᯲ ᯀᯰᯄ᯦ ᯇᯤᯘᯬᯞᯖ᯲ ᯐᯞ ᯂᯞᯄ᯦᯲ ᯑᯎᯰ ᯀᯬᯒᯔᯬ᯲ ᯂᯔᯮ ᯔ ᯀᯰᯄ᯦ ᯂᯪᯘᯇ᯲ᯂᯪᯘᯇ᯲ ᯉᯪ ᯒᯬᯂ ᯘᯪᯅᯄ᯦ᯮ᯲ ᯉ ᯔᯒᯞᯬ ᯑᯔᯬ᯲ᯇᯄ᯦᯲ ᯇᯒ᯲ᯖᯉᯬ᯲ᯑᯪᯀᯉᯬ᯲

2:12 Marparange na denggan ma hamu di tongatonga ni angka parbegu, asa, ia adong na pahatahatahon hamu songon angka parjahat, gabe dipasangap nasida Debata di ari panuluhan i, dung diida denggan ni ulaonmuna. ᯔᯒ᯲ᯇᯒᯝᯩ ᯉ ᯑᯰᯩᯎᯉ᯲ ᯔ ᯑᯪ ᯖᯬᯝᯖᯬᯝ ᯉᯪ ᯀᯰᯰᯄ᯦ ᯇᯒ᯲ᯅᯩᯎᯮ ᯀᯘ ᯤᯀ ᯀᯑᯰᯬ ᯉ ᯇᯂᯖᯂᯖᯂᯉᯬ᯲ ᯂᯔᯮ ᯘᯬᯝᯉᯬ᯲ ᯀᯰᯄ᯦ ᯇᯒ᯲ᯐᯂᯖ᯲ ᯎᯅᯩ ᯑᯪᯇᯘᯝᯇ᯲ ᯉᯘᯪᯑ ᯑᯩᯅᯖ ᯑᯪ ᯀᯒᯪ ᯇᯉᯮᯞᯮᯂᯉ᯲ ᯤ ᯑᯮᯰ ᯑᯪᯤᯑ ᯑᯰᯩᯎᯉ᯲ ᯉᯪ ᯥᯞᯀᯉᯬ᯲ᯔᯮᯉ

2:13 Unduk ma hamu maradophon nasa uhum, na sinuan di hajolmaon, ala ni Tuhan i, nang maradophon raja parhuaso parginjang, ᯀᯉᯮ᯲ᯑᯄᯮ᯦ ᯔ ᯂᯔᯮ ᯔᯒᯑᯇᯬ᯲ᯂᯉᯬ᯲ ᯉᯘ ᯥᯂᯔᯮ᯲ ᯉ ᯘᯪᯉᯮᯀᯉ᯲ ᯑᯪ ᯂᯐᯞᯬ᯲ᯔᯀᯉᯬ᯲ ᯀᯞ ᯉᯪ ᯖᯮᯂᯉ᯲ ᯤ ᯉᯰ ᯔᯒᯑᯇᯬ᯲ᯂᯉᯬ᯲ ᯒᯐ ᯇᯒ᯲ᯂᯮᯀᯘᯬ ᯇᯒ᯲ᯎᯉᯪ᯲ᯐᯰ

2:14 nang maradophon panguhum, angka na sinuruna, maminsang angka sibahen na jahat, alai mamuji ia siula na denggan. ᯉᯰ ᯔᯒᯑᯇᯬ᯲ᯂᯉᯬ᯲ ᯇᯝᯮᯂᯔᯮ᯲ ᯀᯰᯄ᯦ ᯉ ᯘᯪᯉᯮᯒᯮᯉ ᯔᯔᯉᯪ᯲ᯘᯰ ᯀᯰᯄ᯦ ᯘᯪᯅᯂᯉᯩ᯲ ᯉ ᯐᯂᯖ᯲ ᯀᯞᯤ ᯔᯔᯮᯐᯪ ᯤᯀ ᯘᯪᯥᯞ ᯉ ᯑᯰᯩᯎᯉ᯲

2:15 Ai on do lomo ni roha ni Debata: Naeng ma marhite sian ulaon na denggan pompomanmuna haotoon ni halak na hurang roha. ᯀᯤ ᯀᯉᯬ᯲ ᯑᯬ ᯞᯬᯔᯬ ᯉᯪ ᯒᯬᯂ ᯉᯪ ᯑᯩᯅᯖ ᯉᯀᯰᯩ ᯔ ᯔᯒ᯲ᯂᯪᯖᯩ ᯘᯪᯀᯉ᯲ ᯥᯞᯀᯉᯬ᯲ ᯉ ᯑᯰᯩᯎᯉ᯲ ᯇᯔᯬ᯲ᯇᯬᯔᯉ᯲ᯔᯮᯉ ᯂᯀᯬᯖᯬᯀᯉᯬ᯲ ᯉᯪ ᯂᯞᯄ᯦᯲ ᯉ ᯂᯮᯒᯰ ᯒᯬᯂ

2:16 Ai angka naung malua do hamu; alai unang ma pinangke haluaon i mangondingi hajahaton; songon angka naposo ni Debata ma tahe! ᯀᯤ ᯀᯰᯄ᯦ ᯉᯀᯮᯰ ᯔᯞᯮᯀ ᯑᯬ ᯂᯔᯮ ᯀᯞᯤ ᯥᯉᯰ ᯔ ᯇᯪᯉᯰᯄᯩ ᯂᯞᯮᯀᯘᯉᯬ᯲ ᯤ ᯔᯝᯉᯬ᯲ᯑᯪᯝᯪ ᯂᯐᯂᯖᯉᯬ᯲ ᯘᯬᯝᯉᯬ᯲ ᯀᯰᯄ᯦ ᯉᯇᯬᯘᯬ ᯉᯪ ᯑᯩᯅᯖ ᯔ ᯖᯂᯩ

2:17 Marhapantunon ma hamu tu sasude; haholongi ma angka dongan; habiari ma Debata; pasangap ma raja! ᯔᯒ᯲ᯂᯇᯉ᯲ᯖᯮᯉᯉ᯲ ᯔ ᯂᯔᯮ ᯖᯮ ᯘᯘᯮᯑᯩ ᯂᯂᯬᯞᯬᯝᯪ ᯔ ᯀᯰᯄ᯦ ᯑᯬᯝᯉ᯲ ᯂᯅᯪᯀᯒᯪ ᯔ ᯑᯩᯅᯖ ᯇᯘᯝᯇ᯲ ᯔ ᯒᯐ

2:18 Unduk ma angka anak somang maradophon angka indukna, huhut ma sandok dihabiari; unang holan maradophon parroha na denggan jala na basar, ingkon dohot do maradophon parroha na jungking. ᯀᯉᯮ᯲ᯑᯄᯮ᯲ ᯔ ᯀᯰᯄ᯦ ᯀᯉᯄ᯦᯲ ᯘᯬᯔᯰ ᯔᯒᯑᯇᯬ᯲ᯂᯉᯬ᯲ ᯀᯰᯄ᯦ ᯀᯉᯪ᯲ᯑᯄ᯦ᯮ᯲ᯉ ᯂᯮᯂᯖᯮ᯲ ᯔ ᯘᯉ᯲ᯑᯄ᯦ᯬ᯲ ᯑᯪᯂᯅᯪᯀᯒᯪ ᯥᯉᯰ ᯂᯬᯞᯉ᯲ ᯔᯒᯑᯇᯬ᯲ᯂᯉᯬ᯲ ᯇᯒ᯲ᯒᯬᯂ ᯉ ᯑᯰᯩᯎᯉ᯲ ᯐᯞ ᯉ ᯅᯘᯒ᯲ ᯀᯰᯪᯄ᯦ᯉᯬ᯲ ᯑᯬᯂᯖᯬ᯲ ᯑᯬ ᯔᯒᯑᯇᯬ᯲ᯂᯉᯬ᯲ ᯇᯒ᯲ᯒᯬᯂ ᯉ ᯐᯮᯰᯄ᯦ᯪᯰ

2:19 Ai i do asi ni roha, molo ditaon halak arsak ni roha dohot pambahenan na so uhum, ala ingot ibana di Debata. ᯀᯤ ᯤ ᯑᯬ ᯀᯘᯪ ᯉᯪ ᯒᯬᯂ ᯔᯬᯞᯬ ᯑᯪᯖᯀᯉᯬ᯲ ᯂᯞᯄ᯦᯲ ᯀᯒ᯲ᯘᯄ᯦᯲ ᯉᯪ ᯒᯬᯂ ᯑᯬᯂᯖᯬ᯲ ᯇᯔ᯲ᯅᯂᯩᯉᯉ᯲ ᯉ ᯘᯬ ᯥᯂᯔᯮ᯲ ᯀᯞ ᯤᯝᯖᯬ᯲ ᯤᯅᯉ ᯑᯪ ᯑᯩᯅᯖ

2:20 Ai barita dia ma i, ia benget hamu manaon pangalinsingon, anggo tung ala ni dosamuna? Alai molo benget hamu manaon na porsuk, balos ni ulaonmuna na denggan, i do asiasi di roha ni Debata. ᯀᯤ ᯅᯒᯪᯖ ᯑᯪᯀ ᯔ ᯤ ᯤᯀ ᯅᯩᯝᯖᯩ᯲ ᯂᯔᯮ ᯔᯉᯀᯉᯬ᯲ ᯇᯝᯞᯉᯪ᯲ᯘᯪᯝᯉᯬ᯲ ᯀᯰᯎᯬ ᯖᯮᯰ ᯀᯞ ᯉᯪ ᯑᯬᯘᯔᯮᯉ ᯀᯞᯤ ᯔᯬᯞᯬ ᯅᯩᯝᯖᯩ᯲ ᯂᯔᯮ ᯔᯉᯀᯉᯬ᯲ ᯉ ᯇᯒᯬ᯲ᯘᯄ᯦ᯮ᯲ ᯅᯞᯘᯬ᯲ ᯉᯪ ᯥᯞᯀᯉᯬ᯲ᯔᯮᯉ ᯉ ᯑᯰᯩᯎᯉ᯲ ᯤ ᯑᯬ ᯀᯘᯪᯀᯘᯪ ᯑᯪ ᯒᯬᯂ ᯉᯪ ᯑᯩᯅᯖ

2:21 Ai tusi do hamu tarjou, ai dohot do Kristus manaon na porsuk humongkop hamu, tumadingkon tiruan di hamu, asa diihuthon hamu bogas ni patna: ᯀᯤ ᯖᯮᯘᯪ ᯑᯬ ᯂᯔᯮ ᯖᯒ᯲ᯐᯬᯥ ᯀᯤ ᯑᯬᯂᯖᯬ᯲ ᯑᯬ ᯄ᯦ᯒᯘᯪ᯲ᯖᯘᯮ᯲ ᯤ ᯔᯉᯀᯉᯬ᯲ ᯔ ᯇᯒᯬ᯲ᯘᯄ᯦ᯮ᯲ ᯂᯮᯔᯰᯬᯄ᯦ᯇᯬ᯲ ᯂᯔᯮ ᯖᯮᯔᯑᯰᯪᯄ᯦ᯉᯬ᯲ ᯖᯪᯒᯮᯀᯉ᯲ ᯑᯪ ᯂᯔᯮ ᯀᯘ ᯑᯪᯤᯂᯖᯮ᯲ᯂᯉᯬ᯲ ᯂᯔᯮ ᯅᯬᯎᯘ᯲ ᯉᯪ ᯇᯖ᯲ᯉ

2:22 "Ndang adong dosa diula Ibana; ndang jumpang angkal di bagasan pamanganna." ᯉ᯲ᯑᯰ ᯀᯑᯰᯬ ᯑᯬᯘ ᯑᯪᯥᯞ ᯤᯅᯉ ᯉ᯲ᯑᯰ ᯐᯔᯮ᯲ᯇᯰ ᯀᯰᯄ᯦ ᯤ ᯑᯪ ᯅᯎᯘᯉ᯲ ᯇᯔᯝᯉ᯲ᯉ

2:23 Ndang manginsahi Ibana, di na hona insak, ndang mangasupi, di na manaon na porsuk; alai dipasahat do tu Panguhum sitigor roha i. ᯉ᯲ᯑᯰ ᯔᯝᯉᯪ᯲ᯘᯂᯪ ᯤᯅᯉ ᯑᯪ ᯉ ᯂᯬᯉ ᯀᯉᯪ᯲ᯘᯄ᯦᯲ ᯉ᯲ᯑᯰ ᯔᯝᯘᯮᯇᯪ ᯑᯪ ᯉ ᯔᯉᯀᯉᯬ᯲ ᯉ ᯇᯒᯬ᯲ᯘᯄ᯦ᯮ᯲ ᯀᯞᯤ ᯑᯪᯇᯘᯂᯖ᯲ ᯑᯬ ᯖᯮ ᯇᯝᯮᯂᯔᯮ᯲ ᯘᯪ ᯖᯪᯎᯒᯬ᯲ ᯒᯬᯂ ᯤ

2:24 Diporsan Ibana do dosanta di bagasan dagingna tu hau i, asa malua hita sian dosa, gabe mangolu di hatigoran i: "Hinorhon ni bugangna i do gabe malum hamu." ᯑᯪᯇᯒᯬ᯲ᯘᯉ᯲ ᯤᯅᯉ ᯑᯬ ᯑᯬᯘᯉ᯲ᯖ ᯑᯪ ᯅᯎᯘᯉ᯲ ᯑᯎᯰᯪᯉ ᯖᯮ ᯂᯥ ᯤ ᯀᯘ ᯔᯞᯮᯀ ᯂᯪᯖ ᯘᯪᯀᯉ᯲ ᯑᯬᯘ ᯎᯅᯩ ᯔᯝᯬᯞᯮ ᯑᯪ ᯂᯖᯪᯎᯬᯒᯉ᯲ ᯤ ᯂᯪᯉᯒᯬ᯲ᯂᯉᯬ᯲ ᯉᯪ ᯅᯮᯎᯰᯉ ᯤ ᯑᯬ ᯎᯅᯩ ᯔᯞᯔᯮ᯲ ᯂᯔᯮ

2:25 Ai songon birubiru na lilu do hamu najolo; alai nunga didompakkon hamu nuaeng Parmahan i, na manganahon tondimuna. ᯀᯤ ᯘᯬᯝᯉᯬ᯲ ᯅᯪᯒᯮᯅᯪᯒᯮ ᯉ ᯞᯪᯞᯮ ᯑᯬ ᯂᯔᯮ ᯉᯐᯬᯞᯬ ᯀᯞᯤ ᯉᯮᯝ ᯑᯪᯑᯔᯬ᯲ᯇᯄ᯦᯲ᯂᯉᯬ᯲ ᯂᯔᯮ ᯉᯮᯀᯀᯰᯩ ᯇᯒ᯲ᯔᯂᯉ᯲ ᯤ ᯉ ᯔᯝᯉᯂᯉᯬ᯲ ᯖᯉᯬ᯲ᯑᯪᯔᯮᯉ

1 Petrus ᯇᯩᯖ᯲ᯒᯘᯮ᯲ 3[patota | patota mualna]

3:1 Songon i ma angka parompuan: Unduk ma nasida maradophon angka harajaanna be; asa molo so porsea deba di Hata i, gabe meol rohanasida, binahen ni parange ni parompuan i, so pola mardongan hata, ᯘᯬᯝᯉᯬ᯲ ᯤ ᯔ ᯀᯰᯄ᯦ ᯇᯒᯔᯬ᯲ᯇᯮᯀᯉ᯲ ᯀᯉᯮᯮ᯲ᯑᯄᯮ᯲ ᯔ ᯉᯘᯪᯑ ᯔᯒᯑᯇᯬ᯲ᯂᯉᯬ᯲ ᯀᯰᯄ᯦ ᯂᯒᯐᯀᯉ᯲ᯉ ᯅᯩ ᯀᯘ ᯔᯬᯞᯬ ᯘᯬ ᯇᯒᯬ᯲ᯘᯩᯀ ᯑᯩᯅ ᯑᯪ ᯂᯖ ᯤ ᯎᯅᯩ ᯔᯩᯀᯞᯬ᯲ ᯒᯬᯂᯉᯘᯪᯑ ᯅᯪᯉᯂᯉᯩ᯲ ᯉᯪ ᯇᯒᯝᯩ ᯉᯪ ᯇᯒᯔᯬ᯲ᯇᯮᯀᯉ᯲ ᯤ ᯘᯬ ᯇᯬᯞ ᯔᯒ᯲ᯑᯬᯝᯉ᯲ ᯂᯖ

3:2 molo dibereng nasida parangemuna na bontor, na marhatahuton. ᯔᯬᯞᯬ ᯑᯪᯅᯩᯒᯰᯩ ᯉᯘᯪᯝ ᯇᯒᯝᯩᯔᯮᯉ ᯉ ᯅᯉᯬ᯲ᯖᯒᯬ᯲ ᯉ ᯔᯒ᯲ᯂᯖᯂᯮᯖᯉᯬ᯲

3:3 Unang ma dipajagarjagar rupana sian duru, marhitehite na mandandani obuk manang marpangkean sere manang na mamangkemangke. ᯥᯉᯰ ᯔ ᯑᯪᯇᯐᯎᯒ᯲ᯐᯎᯒ᯲ ᯒᯮᯇᯉ ᯘᯪᯀᯉ᯲ ᯑᯮᯒᯮ ᯔᯒ᯲ᯂᯪᯖᯩᯂᯪᯖᯩ ᯉ ᯔᯉ᯲ᯑᯉ᯲ᯑᯉᯪ ᯀᯬᯅᯄ᯦ᯮ᯲ ᯔᯉᯰ ᯔᯒ᯲ᯇᯰᯄᯩᯀᯉ᯲ ᯘᯩᯒᯩ ᯔᯉᯰ ᯉ ᯔᯔᯰᯄᯩᯔᯰᯄᯩ

3:4 Alai jolma parbagasan na buni, na tongtong martondi na lambok jala na dame, i do na arga dietong Debata. ᯀᯞᯤ ᯐᯞᯬ᯲ᯔ ᯇᯒ᯲ᯅᯎᯘᯉ᯲ ᯉ ᯅᯮᯉᯪ ᯉ ᯖᯰᯬᯖᯰᯬ ᯔᯒ᯲ᯖᯉᯬ᯲ᯑᯪ ᯉ ᯞᯔ᯲ᯅᯄ᯦ᯬ᯲ ᯐᯞ ᯉ ᯑᯔᯩ ᯤ ᯑᯬ ᯉ ᯀᯒ᯲ᯎ ᯑᯪᯀᯩᯖᯰᯬ ᯑᯩᯅᯖ

3:5 I do najolo pangkean ni angka parompuan na badia i, angka na mangkirim tu Debata; unduk do rohanasida maradophon harajaanna. ᯤ ᯑᯬ ᯉᯐᯬᯞᯬ ᯇᯰᯄᯩᯀᯉ᯲ ᯉᯪ ᯀᯰᯄ᯦ ᯇᯒᯔᯬ᯲ᯇᯮᯀᯉ᯲ ᯉ ᯅᯑᯪᯀ ᯤ ᯀᯰᯄ᯦ ᯉ ᯔᯰᯄ᯦ᯪᯒᯔᯪ᯲ ᯖᯮ ᯑᯩᯅᯖ ᯀᯉᯮ᯲ᯑᯄᯮ᯦᯲ ᯑᯬ ᯒᯬᯂᯉᯘᯪᯑ ᯔᯒᯑᯇᯬ᯲ᯂᯉᯬ᯲ ᯂᯒᯐᯀᯉ᯲ᯉ

3:6 Songon si Sara, dioloi do si Abraham, digoar do ibana tuan. Na gabe angka boruna do hamu, molo diula hamu na denggan, so mabiar mida songgotsonggot. ᯘᯬᯝᯉᯬ᯲ ᯘᯪ ᯘᯒ ᯑᯪᯀᯬᯞᯬᯤ ᯑᯬ ᯘᯪ ᯀᯅ᯲ᯒᯂᯔ᯲ ᯑᯪᯎᯬᯀᯒ᯲ ᯑᯬ ᯤᯅᯉ ᯖᯮᯀᯉ᯲ ᯉ ᯎᯅᯩ ᯀᯰᯄ᯦ ᯅᯬᯒᯮᯉ ᯑᯬ ᯂᯔᯮ ᯔᯬᯞᯬ ᯑᯪᯥᯞ ᯂᯔᯮ ᯉ ᯑᯰᯩᯎᯉ᯲ ᯘᯬ ᯔᯅᯪᯀᯒ᯲ ᯔᯪᯑ ᯘᯰᯬᯎᯖᯬ᯲ᯘᯰᯬᯎᯖᯬ᯲

3:7 Angka baoa pe songon i ma; marroha ma hamu mangangkupi nasida, alaᯯ pardaging na gumale do ina i. Sangap ma bahen hamu nasida, ala dohot do nasida dongan panean di asiasi hangoluan, asa unang tarambat tangiangmuna. ᯀᯰᯄ᯦ ᯅᯀᯬᯀ ᯇᯩ ᯘᯬᯝᯉᯬ᯲ ᯤ ᯔ ᯔᯒ᯲ᯒᯬᯂ ᯔ ᯂᯔᯮ. ᯔᯝᯰᯄ᯦ᯮᯇᯪ ᯉᯘᯪᯑ ᯀᯞ ᯇᯒ᯲ᯑᯎᯰᯪ ᯉ ᯎᯮᯔᯞᯩ ᯑᯬ ᯤᯉ ᯤ ᯘᯝᯇ᯲ ᯔ ᯅᯂᯉᯩ᯲ ᯂᯔᯮ ᯉᯘᯪᯑ ᯀᯞ ᯑᯬᯂᯖᯬ᯲ ᯑᯬ ᯉᯘᯪᯑ ᯑᯬᯝᯉ᯲ ᯇᯉᯩᯀᯉ᯲ ᯑᯪ ᯀᯘᯪᯀᯘᯪ ᯂᯝᯬᯞᯮᯀᯉ᯲ ᯀᯘ ᯥᯉᯰ ᯖᯒᯔ᯲ᯅᯖ᯲ ᯖᯝᯪᯀᯰᯔᯮᯉ

3:8 Angkup ni i, saroha ma hamu saluhutna, sapangkilaan, angka na marholong ni roha di dongan, na marasi ni roha, na serep! ᯀᯰᯄ᯦ᯇᯮ᯲ ᯉᯪ ᯤ ᯘᯒᯬᯂ ᯔ ᯂᯔᯮ ᯘᯞᯮᯂᯖᯮ᯲ᯉ ᯘᯇᯰᯄ᯦ᯪᯞᯀᯉ᯲ ᯀᯰᯄ᯦ ᯉ ᯔᯒ᯲ᯂᯬᯞᯰᯬ ᯉᯪ ᯒᯬᯂ ᯑᯪ ᯑᯬᯝᯉ᯲ ᯉ ᯔᯒᯘᯪ ᯉᯪ ᯒᯬᯂ ᯉ ᯘᯩᯒᯇᯩ᯲

3:9 Unang ma baloshon hamu na jat alo ni na jat, panginsahion alo ni panginsahion; lam mamasumasu ma hamu, ai naeng teanonmuna do pasupasu, umbahen na tarjou hamu.

ᯥᯉᯰ ᯔ ᯅᯞᯘᯬ᯲ᯂᯉᯬ᯲ ᯂᯔᯮ ᯉ ᯐᯖ᯲ ᯀᯞᯬ ᯉᯪ ᯉ ᯐᯖ᯲, ᯇᯝᯉᯪ᯲ᯘᯂᯪᯀᯉᯬ᯲ ᯀᯞᯬ ᯉᯪ ᯇᯝᯉᯪ᯲ᯘᯂᯪᯀᯉᯬ᯲; ᯞᯔ᯲ ᯔᯔᯘᯮᯔᯘᯮ ᯔ ᯂᯔᯮ, ᯀᯤ ᯉᯀᯰᯩ ᯖᯩᯀᯉᯉᯬ᯲ᯔᯮᯉ ᯑᯬ ᯇᯘᯮᯇᯘᯮ, ᯀᯔᯮ᯲ᯅᯂᯉᯩ᯲ ᯉ ᯖᯒ᯲ᯐᯬᯥ ᯂᯔᯮ.

3:10 Ai "na holong roha di hosana jala na giot marnida ari na sonang, dipasohot ma dilana sian na roa, nang bibirna, asa unang dihatahon ansiansi." ᯀᯤ ᯉ ᯂᯬᯞᯰᯬ ᯒᯬᯂ ᯑᯪ ᯂᯬᯘᯉ ᯐᯞ ᯉ ᯎᯪᯀᯖᯬ᯲ ᯔᯒ᯲ᯉᯪᯑ ᯀᯒᯪ ᯉ ᯘᯬᯉᯰ ᯑᯪᯇᯘᯬᯂᯖᯬ᯲ ᯔ ᯑᯪᯞᯉ ᯘᯪᯀᯉ᯲ ᯉ ᯒᯬᯀ ᯉᯰ ᯅᯪᯅᯒᯪ᯲ᯉ ᯀᯘ ᯥᯉᯰ ᯑᯪᯂᯖᯂᯉᯬ᯲ ᯀᯉ᯲ᯘᯪᯀᯉ᯲ᯘᯪ

3:11 "Dipasiding ma hajahaton diulahon ma na denggan; dilului ma dame, i ma dieahi!" ᯑᯪᯇᯘᯪᯑᯰᯪ ᯔ ᯂᯐᯂᯖᯉᯬ᯲ ᯑᯪᯥᯞᯂᯉᯬ᯲ ᯔ ᯉ ᯑᯰᯩᯎᯉ᯲ ᯑᯪᯞᯮᯞᯮᯤ ᯔ ᯑᯔᯩ ᯤ ᯔ ᯑᯪᯀᯩᯀᯂᯪ

3:12 "Ai tu angka parroha na tigor do mata ni Tuhan; jala tu angka pangidoannasida do pinggolna; alai bohi ni Tuhan i do alo ni angka sibahen na jat!" ᯀᯤ ᯖᯮ ᯀᯰᯄ᯦ ᯇᯒ᯲ᯒᯬᯂ ᯉ ᯖᯪᯎᯒᯬ᯲ ᯑᯬ ᯔᯖ ᯉᯪ ᯖᯮᯂᯉ᯲ ᯐᯞ ᯖᯮ ᯀᯰᯄ᯦ ᯇᯝᯪᯑᯬᯀᯉ᯲ᯉᯘᯪᯑ ᯑᯬ ᯇᯰᯪᯎᯞᯬ᯲ᯉ ᯀᯞᯤ ᯅᯬᯂᯪ ᯉᯪ ᯖᯮᯂᯉ᯲ ᯤ ᯑᯬ ᯀᯞᯬ ᯉᯪ ᯀᯰᯄ᯦ ᯘᯪᯅᯂᯉᯩ᯲ ᯉ ᯐᯖ᯲

3:13 Jala ise do na manjahati hamu, molo diringkoti hamu na denggan! ᯐᯞ ᯤᯘᯩ ᯑᯬ ᯉ ᯔᯉ᯲ᯐᯂᯖᯪ ᯂᯔᯮ ᯔᯬᯞᯬ ᯑᯪᯒᯰᯪᯄ᯦ᯬᯖᯪ ᯂᯔᯮ ᯉ ᯑᯰᯩᯎᯉ᯲

3:14 Alai molo tung tumaon na porsuk hamu, ala ni hatigoran, na martua do hamu disi. Unang ma gaor rohamuna, bahenon ni biar ni roha mida nasida! ᯀᯞᯤ ᯔᯬᯞᯬ ᯖᯮᯰ ᯖᯮᯔᯀᯉᯬ᯲ ᯉ ᯇᯒᯬ᯲ᯘᯄ᯦ᯮ᯲ ᯂᯔᯮ ᯀᯞ ᯉᯪ ᯂᯖᯪᯎᯬᯒᯉ᯲ ᯉ ᯔᯒ᯲ᯖᯮᯀ ᯑᯬ ᯂᯔᯮ ᯑᯪᯘᯪ ᯥᯉᯰ ᯔ ᯎᯀᯒᯬ᯲ ᯒᯬᯂᯔᯮᯉ ᯅᯂᯩᯉᯉᯬ᯲ ᯉᯪ ᯅᯪᯀᯒ᯲ ᯉᯪ ᯒᯬᯂ ᯔᯪᯑ ᯉᯘᯪᯑ

3:15 Alai parbadiai hamu ma Kristus, Tuhan i, di bagasan rohamuna; tongtong ma hobas, mangalusi ganup na manungkun hamu taringot tu na hinirim ni rohamuna; alai mardongan lambok ni roha ma dohot biar! ᯀᯞᯤ ᯇᯒ᯲ᯅᯑᯪᯀᯤ ᯂᯔᯮᯔ ᯄ᯦᯲ᯒᯘᯪ᯲ᯖᯘᯮ᯲ ᯖᯮᯂᯉ᯲ ᯤ ᯑᯪ ᯅᯎᯘᯉ᯲ ᯒᯬᯂᯔᯮᯉ ᯖᯰᯬᯖᯰᯬ ᯔ ᯂᯬᯅᯘ᯲ ᯔᯝᯞᯮᯘᯪ ᯎᯉᯇᯮ᯲ ᯉ ᯔᯉᯮᯰᯄ᯦ᯉᯮ᯲ ᯂᯔᯮ ᯖᯒᯪᯝᯖᯬ᯲ ᯖᯮ ᯉ ᯂᯪᯉᯪᯒᯔᯪ᯲ ᯉᯪ ᯒᯬᯂᯔᯮᯉ ᯀᯞᯤ ᯔᯒ᯲ᯑᯬᯝᯉ᯲ ᯞᯔ᯲ᯅᯄ᯦ᯬ᯲ ᯉᯪ ᯒᯬᯂ ᯔ ᯑᯬᯂᯖᯬ᯲ ᯅᯪᯀᯒ᯲

3:16 Unang ma pola marlobok taroktokmuna, asa tarila nasida na manuhasnuhasi hamu, angka na manginsahi parangemuna na denggan, na di bagasan Kristus i. ᯥᯉᯰ ᯔ ᯇᯬᯞ ᯔᯒ᯲ᯞᯬᯅᯄ᯦ᯬ᯲ ᯖᯒᯉᯬ᯲ᯖᯄ᯦ᯬ᯲ᯔᯮᯉ ᯀᯘ ᯖᯒᯪᯞ ᯉᯘᯪᯑ ᯉ ᯔᯉᯮᯂᯘ᯲ᯉᯮᯂᯘᯪ ᯂᯔᯮ ᯀᯰᯄ᯦ ᯉ ᯔᯝᯉᯪ᯲ᯘᯂᯪ ᯇᯒᯝᯩᯔᯮᯉ ᯉ ᯑᯰᯩᯎᯉ᯲ ᯉ ᯑᯪ ᯅᯎᯘᯉ᯲ ᯄ᯦᯲ᯒᯘᯪ᯲ᯖᯘᯮ᯲ ᯤ

3:17 Ai tagonan do, hamu manaon haporsuhon ala ni ulaon na denggan, molo tung i lomo ni roha ni Debata; unang ma ala ni ulaon na roa! ᯀᯤ ᯖᯎᯬᯉᯉ᯲ ᯑᯬ ᯂᯔᯮ ᯔᯉᯀᯉᯬ᯲ ᯂᯇᯒᯬ᯲ᯘᯮᯂᯉᯬ᯲ ᯀᯞ ᯉᯪ ᯥᯞᯀᯉᯬ᯲ ᯉ ᯑᯰᯩᯎᯉ᯲ ᯔᯬᯞᯬ ᯖᯮᯰ ᯤ ᯞᯬᯔᯬ ᯉᯪ ᯒᯬᯂ ᯉᯪ ᯑᯩᯅᯖ ᯥᯉᯰ ᯔ ᯀᯞ ᯉᯪ ᯥᯞᯀᯉᯬ᯲ ᯉ ᯒᯬᯀ

3:18 Ai dohot do Kristus mate sahali ala ni angka dosa, na tigor i humongkop angka pargeduk, asa ditogihon hita tu Debata; na tarbunu do ia dagingna, alai dipangolu do anggo tondina. ᯀᯤ ᯑᯬᯂᯖᯬ᯲ ᯑᯬ ᯄ᯦᯲ᯒᯘᯪ᯲ᯖᯘᯮ᯲ ᯔᯖᯩ ᯘᯂᯞᯪ ᯀᯞ ᯉᯪ ᯀᯰᯄ᯦ ᯑᯬᯘ ᯉ ᯖᯪᯎᯒᯬ᯲ ᯤ ᯂᯮᯔᯰᯬᯄ᯦ᯇᯬ᯲ ᯀᯰᯄ᯦ ᯇᯒ᯲ᯎᯩᯑᯄ᯦ᯮ᯲ ᯀᯘ ᯑᯪᯖᯬᯎᯪᯂᯉᯬ᯲ ᯂᯪᯖ ᯖᯮ ᯑᯩᯅᯖ ᯉ ᯖᯒ᯲ᯅᯮᯉᯮ ᯑᯬ ᯤᯀ ᯑᯎᯰᯪᯉ ᯀᯞᯤ ᯑᯪᯇᯝᯬᯞᯮ ᯑᯬ ᯀᯰᯎᯬ ᯖᯉᯬ᯲ᯑᯪᯉ

3:19 Di bagasan tondi i do Ibana laho marjamita tu angka tondi na di bagasan hurungan i, ᯑᯪ ᯅᯎᯘᯉ᯲ ᯖᯉᯬ᯲ᯑᯪ ᯑᯬ ᯤᯅᯉ ᯞᯂᯬ ᯔᯒ᯲ᯐᯔᯪᯖ ᯖᯮ ᯀᯰᯄ᯦ ᯖᯉᯬ᯲ᯑᯪ ᯉ ᯑᯪ ᯅᯎᯘᯉ᯲ ᯂᯮᯒᯮᯝᯉ᯲ ᯤ

3:20 angka na so mangoloi najolo, di na maimaima lambas ni roha ni Debata, uju di angka ari ni si Noak, di na pinaulina parau na gabe haluaan ni na otik i, i ma na ualu halak, marhitehite aek i. ᯀᯰᯄ᯦ ᯉ ᯘᯬ ᯔᯝᯬᯞᯬᯤ ᯉᯐᯬᯞᯬ ᯑᯪ ᯉ ᯔᯤᯔᯤᯔ ᯞᯔ᯲ᯅᯘ᯲ ᯉᯪ ᯖᯬᯂ ᯉᯪ ᯑᯩᯅᯖ ᯥᯐᯮ ᯑᯪ ᯀᯰᯄ᯦ ᯀᯒᯪ ᯉᯪ ᯘᯪ ᯉᯬᯀᯄ᯦᯲ ᯑᯪ ᯉ ᯇᯪᯉᯥᯞᯪᯉ ᯇᯒᯥ ᯉ ᯎᯅᯩ ᯂᯞᯮᯀᯀᯉ᯲ ᯉᯪ ᯉ ᯀᯬᯖᯄ᯦ᯪ᯲ ᯤ ᯤ ᯔ ᯉ ᯥᯀᯞᯮ ᯂᯞᯄ᯦᯲ ᯔᯒ᯲ᯂᯪᯖᯩᯂᯪᯖᯩ ᯀᯀᯄᯩ᯲ ᯤ

3:21 I do tudosan ni pandidion i, na paluahon hamu nuaeng; ndada songon na mambolongkon na rotak sian pamatang, alai na tapangido do disi tu Debata panggora ni roha, na so olo manolsoli be, hinorhon ni haheheon ni Jesus Kristus. ᯤ ᯑᯬ ᯖᯮᯑᯬᯘᯉ᯲ ᯉᯪ ᯇᯉ᯲ᯑᯪᯑᯪᯀᯉᯬ᯲ ᯤ ᯉ ᯇᯞᯮᯀᯂᯉᯬ᯲ ᯂᯔᯮ ᯉᯮᯀᯀᯰᯩ ᯉ᯲ᯑᯑ ᯘᯬᯝᯉᯬ᯲ ᯉ ᯔᯔ᯲ᯅᯬᯞᯰᯬᯄ᯦ᯉᯬ᯲ ᯉ ᯒᯬᯖᯄ᯦᯲ ᯘᯪᯀᯉ᯲ ᯇᯔᯖᯰ ᯀᯞᯤ ᯉ ᯖᯇᯝᯪᯑᯬ ᯑᯬ ᯑᯪᯘᯪ ᯖᯮ ᯑᯩᯅᯖ ᯇᯰᯎᯬᯒ ᯉᯪ ᯒᯬᯂ ᯉ ᯘᯬ ᯀᯬᯞᯬ ᯔᯉᯞᯬ᯲ᯘᯬᯞᯪ ᯅᯩ ᯂᯪᯉᯒᯬ᯲ᯂᯉᯬ᯲ ᯉᯪ ᯂᯂᯩᯂᯩᯀᯉᯬ᯲ ᯉᯪ ᯐᯩᯘᯘᯮ᯲ ᯄ᯦᯲ᯒᯘᯪ᯲ᯖᯘᯮ᯲

3:22 Di siamun ni Debata do Ibana, dung laho tu banua ginjang, gabe marunduk do tu Ibana angka surusuruan, angka gomgoman dohot angka hagogoon. ᯑᯪ ᯘᯪᯀᯔᯉᯮ᯲ ᯉᯪ ᯑᯩᯅᯖ ᯑᯬ ᯤᯅᯉ ᯑᯮᯰ ᯞᯂᯬ ᯖᯮ ᯅᯉᯮᯀ ᯎᯉᯪ᯲ᯐᯰ ᯎᯅᯩ ᯔᯒᯉᯮ᯲ᯑᯄ᯦ᯮ᯲ ᯑᯬ ᯖᯮ ᯤᯅᯉ ᯀᯰᯄ᯦ ᯘᯮᯒᯮᯘᯮᯒᯮᯀᯉ᯲ ᯀᯰᯄ᯦ ᯎᯔᯬ᯲ᯎᯬᯔᯉ᯲ ᯑᯬᯂᯖᯬ᯲ ᯀᯰᯄ᯦ ᯂᯎᯬᯎᯬᯀᯉᯬ᯲

1 Petrus ᯇᯩᯖ᯲ᯒᯘᯮ᯲ 4[patota | patota mualna]

4:1 Antong, ala naung marsitaonon Kristus di dagingna, roha sisongon i ma gabe sinjata nang di hamu, ai na mansohot mardosa do halak, na mangahap di dagingna; ᯀᯉ᯲ᯖᯰᯬ ᯀᯞ ᯉᯀᯮᯰ ᯔᯒ᯲ᯘᯪᯖᯀᯬᯉᯉᯬ᯲ ᯄ᯦᯲ᯒᯘᯪ᯲ᯖᯘᯮ᯲ ᯑᯪ ᯑᯎᯰᯪᯉ ᯒᯬᯂ ᯘᯪᯘᯬᯝᯉᯬ᯲ ᯤ ᯔ ᯎᯅᯩ ᯘᯉᯪ᯲ᯐᯖ ᯉᯰ ᯑᯪ ᯂᯔᯮ ᯀᯤ ᯉ ᯔᯉ᯲ᯘᯬᯂᯖᯬ᯲ ᯔᯒ᯲ᯑᯬᯘ ᯑᯬ ᯂᯞᯄ᯦᯲ ᯉ ᯔᯝᯂᯇ᯲ ᯑᯎᯰᯪᯉ

4:2 asa manang piga ari nari ariarina di ngolu on, tu lomo ni roha ni Debata ma i; unang ma tu hisaphisap ni roha hajolmaon! ᯀᯘ ᯔᯉᯰ ᯇᯪᯎ ᯀᯒᯪ ᯉᯒᯪ ᯀᯒᯪᯀᯒᯪᯉ ᯑᯪ ᯝᯬᯞᯮ ᯀᯉᯬ᯲ ᯖᯮ ᯞᯬᯔᯬ ᯉᯪ ᯒᯬᯂ ᯉᯪ ᯑᯩᯅᯖ ᯲ ᯤ ᯥᯉᯰ ᯔ ᯖᯮ ᯂᯪᯘᯇ᯲ᯂᯪᯘᯇ᯲ ᯉᯪ ᯒᯬᯂ ᯂᯐᯞᯬ᯲ᯔᯀᯉᯬ᯲

4:3 Ai sae ma, antong angka ari naung salpu i, di na niulahonmuna roha hasipelebeguon, ai diulahon hamu do disi harorangon, hahisapon, parmabuhon, parmanganon, parminumon dohot pangoloion di ajiajian na so uhum i. ᯀᯤ ᯘᯀᯩ ᯔ ᯀᯉ᯲ᯖᯰᯬ ᯀᯰᯄ᯦ ᯀᯒᯪ ᯉᯀᯮᯰ ᯘᯞ᯲ᯇᯮ ᯤ ᯑᯪ ᯉ ᯉᯪᯥᯞᯂᯉᯬ᯲ᯔᯮᯉ ᯒᯬᯂ ᯂᯘᯪᯇᯩᯞᯩᯅᯩᯎᯮᯀᯉᯬ᯲ ᯀᯤ ᯑᯪᯥᯞᯂᯉᯬ᯲ ᯂᯔᯮ ᯑᯬ ᯑᯪᯘᯪ ᯂᯒᯬᯒᯑᯉᯬ᯲ ᯂᯂᯪᯘᯇᯉᯬ᯲ ᯇᯒ᯲ᯔᯅᯮᯂᯉᯬ᯲ ᯇᯒ᯲ᯔᯝᯉᯉᯬ᯲ ᯇᯒ᯲ᯔᯪᯉᯮᯔᯉᯬ᯲ ᯑᯬᯂᯖᯬ᯲ ᯇᯝᯬᯞᯬᯤᯀᯉᯬ᯲ ᯑᯪ ᯀᯐᯪᯀᯐᯪᯀᯉ᯲ ᯉ ᯘᯬ ᯥᯂᯔᯮ᯲ ᯤ

4:4 Na jaluk do i di rohanasida, na so dohot i be hamu marlojong tu pusat hamagoan i, gabe manginsahi nasida. ᯉ ᯐᯞᯄ᯦ᯮ᯲ ᯑᯬ ᯤ ᯑᯪ ᯒᯬᯂᯉᯘᯪᯑ ᯉ ᯘᯬ ᯑᯬᯂᯖᯬ᯲ ᯤ ᯅᯩ ᯂᯔᯮ ᯔᯒ᯲ᯞᯬᯐᯰᯬ ᯖᯮ ᯇᯮᯘᯖ᯲ ᯂᯔᯎᯬᯀᯉ᯲ ᯤ ᯎᯅᯩ ᯔᯝᯉᯪ᯲ᯘᯂᯪ ᯉᯘᯪᯑ

4:5 Alusannasida do sogot Ibana, na hobas manguhumi angka na mangolu nang angka naung mate. ᯀᯞᯮᯘᯉ᯲ᯉᯘᯪᯑ ᯑᯬ ᯘᯬᯎᯖᯬ᯲ ᯤᯅᯉ ᯉ ᯂᯬᯅᯘ᯲ ᯔᯝᯮᯂᯮᯔᯪ ᯀᯰᯄ᯦ ᯉ ᯔᯝᯬᯞᯮ ᯉᯰ ᯀᯰᯄ᯦ ᯉᯀᯮᯰ ᯔᯖᯩ

4:6 Ai umbahen na dipaboa barita na uli nang tu angka naung mate, anggiat mangolu nasida di tondina, marguru tu Debata, nang pe hona uhum di dagingna, marguru tu hajolmaonna. ᯀᯤ ᯀᯔᯮ᯲ᯅᯂᯉᯩ᯲ ᯉ ᯑᯪᯇᯅᯬᯀ ᯅᯒᯪᯖ ᯉ ᯥᯞᯪ ᯉᯰ ᯖᯮ ᯀᯰᯄ᯦ ᯉᯀᯮᯰ ᯔᯖᯩ ᯀᯰᯎᯪᯀᯖ᯲ ᯔᯝᯬᯞᯮ ᯉᯘᯪᯑ ᯑᯪ ᯖᯉᯬ᯲ᯑᯪᯉ ᯔᯒ᯲ᯎᯮᯒᯮ ᯖᯮ ᯑᯩᯅᯖ ᯉᯰ ᯇᯩ ᯂᯬᯉ ᯥᯂᯔᯮ᯲ ᯑᯪ ᯑᯎᯰᯪᯉ ᯔᯒ᯲ᯎᯮᯒᯮ ᯖᯮ ᯂᯐᯞᯬ᯲ᯔᯀᯉᯬ᯲ᯉ

4:7 Alai nunga jonok ujung ni saluhutna! Antong, marroha ma hamu, jala manangkas ma rohamuna tu tangiang! ᯀᯞᯤ ᯉᯮᯝ ᯐᯬᯉᯄ᯦ᯬ᯲ ᯥᯐᯮᯰ ᯉᯪ ᯘᯞᯮᯂᯖᯮ᯲ᯉ ᯀᯉ᯲ᯖᯰᯬ ᯔᯒ᯲ᯒᯬᯂ ᯔ ᯂᯔᯮ ᯐᯞ ᯔᯉᯰᯄ᯦ᯘ᯲ ᯔ ᯒᯬᯂᯔᯮᯉ ᯖᯮ ᯖᯝᯪᯀᯰ

4:8 Alai di jolo ni saluhutna, masihaholongan situtu ma hamu, ai dihungkupi haholongon ni roha i do godang dosa. ᯀᯞᯤ ᯑᯪ ᯐᯬᯞᯬ ᯉᯪ ᯘᯞᯮᯂᯖᯮ᯲ᯉ ᯔᯘᯪᯂᯂᯬᯞᯬᯝᯉ᯲ ᯘᯪᯖᯮᯖᯮ ᯔ ᯂᯔᯮ ᯀᯤ ᯑᯪᯂᯮᯰᯄ᯦ᯮᯇᯪ ᯂᯂᯬᯞᯬᯝᯉᯬ᯲ ᯉᯪ ᯒᯬᯂ ᯤ ᯑᯬ ᯎᯬᯑᯰ ᯑᯬᯘ

4:9 Ringkot ma rohamuna masitamuean; unang marungutungut! ᯒᯰᯪᯄ᯦ᯖᯬ᯲ ᯔ ᯒᯬᯂᯔᯮᯉ ᯔᯘᯪᯖᯔᯮᯀᯩᯀᯉ᯲ ᯥᯉᯰ ᯔᯒᯮᯝᯖᯮ᯲ᯥᯝᯖᯮ᯲

4:10 Masipatureturean ma hamu, ganup marguru tu asiasi na jinalona, songon angka juara bagas na burju di ragamragaman ni asiasi ni Debata. ᯔᯘᯪᯇᯖᯮᯒᯩᯀᯉ᯲ ᯔ ᯂᯔᯮ ᯎᯉᯇᯮ᯲ ᯔᯒ᯲ᯎᯮᯒᯮ ᯖᯮ ᯀᯘᯪᯀᯘᯪ ᯉ ᯐᯪᯉᯞᯬᯉ ᯘᯬᯝᯉᯬ᯲ ᯀᯰᯄ᯦ ᯐᯮᯀᯒ ᯅᯎᯘ᯲ ᯉ ᯅᯒᯮ᯲ᯐᯮ ᯑᯪ ᯒᯎᯔ᯲ᯒᯎᯔᯉ᯲ ᯉᯪ ᯀᯘᯪᯀᯘᯪ ᯉᯪ ᯑᯩᯅᯖ

4:11 Ia adong na marjamita, naeng ma songon angka pandohan ni Debata; ia adong na marhobas, naeng ma sian hagogoon na nilehon ni Debata, asa di saluhutna i marsangap Debata, marhitehite Jesus Kristus. Di Ibana ma hasangapon ro di salelenglelengna i! Amen. ᯤᯀ ᯀᯑᯰᯬ ᯉ ᯔᯒ᯲ᯐᯔᯪᯖ ᯉᯀᯰᯩ ᯔ ᯘᯬᯝᯉᯬ᯲ ᯀᯰᯄ᯦ ᯇᯉ᯲ᯑᯬᯂᯉ᯲ ᯉᯪ ᯑᯩᯅᯖ ᯤᯀ ᯀᯑᯰᯬ ᯉ ᯔᯒ᯲ᯂᯬᯅᯘ᯲ ᯉᯀᯰᯩ ᯔ ᯘᯪᯀᯉ᯲ ᯂᯎᯬᯎᯬᯀᯉᯬ᯲ ᯉ ᯉᯪᯞᯩᯂᯉᯬ᯲ ᯉᯪ ᯑᯩᯅᯖ ᯀᯘ ᯑᯪᯘᯞᯮᯂᯖᯮ᯲ᯉ ᯤ ᯔᯒ᯲ᯘᯝᯇ᯲ ᯑᯩᯅᯖ ᯔᯒ᯲ᯂᯪᯖᯩᯂᯪᯖᯩ ᯐᯩᯘᯘᯮ᯲ ᯄ᯦᯲ᯒᯘᯪ᯲ᯖᯘᯮ᯲ ᯑᯪ ᯤᯅᯉ ᯔ ᯂᯘᯝᯇᯉᯬ᯲ ᯒᯬ ᯑᯪ ᯘᯞᯩᯞᯰᯩᯞᯩᯞᯰᯩᯉ ᯀᯔᯉᯩ᯲

4:12 Ale angka haholongan, unang ma jaluk di rohamuna hamohopon i, na ro manguji hamu; unang ma songon na sambar i di rohamuna! ᯀᯞᯩ ᯀᯰᯄ᯦ ᯂᯂᯬᯞᯬᯝᯉ᯲ ᯥᯉᯰ ᯔ ᯐᯞᯄ᯦ᯮ᯲ ᯑᯪ ᯒᯬᯂᯔᯮᯉ ᯂᯔᯬᯂᯬᯇᯉᯬ᯲ ᯤ ᯉ ᯒᯬ ᯔᯝᯮᯝᯪ ᯂᯔᯮ ᯥᯉᯰ ᯔ ᯘᯬᯝᯉᯬ᯲ ᯉ ᯘᯔ᯲ᯅᯒ᯲ ᯤ ᯑᯪ ᯒᯬᯂᯔᯮᯉ

4:13 Marlas ni roha ma hamu, marguru tu saormuna di angka haporsuhon na tinaon ni Kristus i, asa dohot hamu marlas ni roha jala mariaia, di na gabe patar hasangaponna i. ᯔᯒ᯲ᯞᯘ᯲ ᯉᯪ ᯒᯬᯂ ᯔ ᯂᯔᯮ ᯔᯒ᯲ᯎᯮᯒᯮ ᯖᯮ ᯘᯀᯒᯬ᯲ᯔᯮᯉ ᯑᯪ ᯀᯰᯄ᯦ ᯂᯇᯒᯬ᯲ᯘᯮᯂᯉᯬ᯲ ᯉ ᯖᯪᯉᯀᯉᯬ᯲ ᯉᯪ ᯄ᯦᯲ᯒᯘᯪ᯲ᯖᯘᯮ᯲ ᯤ ᯀᯘ ᯑᯬᯂᯖᯬ᯲ ᯂᯔᯮ ᯔᯒ᯲ᯞᯘ᯲ ᯉᯪ ᯒᯬᯂ ᯐᯞ ᯔᯒᯪᯀᯤᯀ ᯑᯪ ᯉ ᯎᯅᯩ ᯇᯖᯒ᯲ ᯂᯘᯝᯇᯉᯬ᯲ᯉ ᯤ

4:14 Martua do hamu, molo hona insak hamu ala ni Goar ni Kristus, ala songgop tu hamu Tondi hasangapon na sian Debata. ᯔᯒ᯲ᯖᯮᯀ ᯑᯬ ᯂᯔᯮ ᯔᯬᯞᯬ ᯂᯬᯉ ᯀᯉᯪ᯲ᯘᯄ᯦᯲ ᯂᯔᯮ ᯀᯞ ᯉᯪ ᯎᯬᯀᯒ᯲ ᯉᯪ ᯄ᯦᯲ᯒᯘᯪ᯲ᯖᯘᯮ᯲ ᯀᯞ ᯘᯰᯬᯎᯇᯬ᯲ ᯖᯮ ᯂᯔᯮ ᯖᯉᯬ᯲ᯑᯪ ᯂᯘᯝᯇᯉᯬ᯲ ᯉ ᯘᯪᯀᯉ᯲ ᯑᯩᯅᯖ

4:15 Unang ma adong sian hamu manaon na porsuk, ala mambunu, manang manangko manang marjahat ibana, manang ala diantoi na so ulaonna! ᯥᯉᯰ ᯔ ᯀᯑᯰᯬ ᯘᯪᯀᯉ᯲ ᯂᯔᯮ ᯔᯉᯀᯉᯬ᯲ ᯉ ᯇᯒᯬ᯲ᯘᯄ᯦ᯮ᯲ ᯀᯞ ᯔᯔ᯲ᯅᯮᯉᯮ ᯔᯉᯰ ᯔᯉᯰᯄ᯦ᯬ ᯔᯉᯰ ᯔᯒ᯲ᯐᯂᯖ᯲ ᯤᯅᯉ ᯔᯉᯰ ᯀᯞ ᯑᯪᯀᯉ᯲ᯖᯬᯤ ᯉ ᯘᯬ ᯥᯞᯀᯉᯬ᯲ᯉ

4:16 Alai molo adong na manaon na porsuk, ala halak Kristen ibana, unang ma hansit rohana; alai dipasangap ma Debata, manjujung Goar i. ᯀᯞᯤ ᯔᯬᯞᯬ ᯀᯑᯰᯬ ᯉ ᯔᯉᯀᯉᯬ᯲ ᯉ ᯇᯒᯬ᯲ᯘᯄ᯦ᯮ᯲ ᯀᯞ ᯂᯞᯄ᯦᯲ ᯄ᯦᯲ᯒᯘᯪ᯲ᯖᯉᯩ᯲ ᯤᯅᯉ ᯥᯉᯰ ᯔ ᯂᯉ᯲ᯘᯖᯪ᯲ ᯒᯬᯂᯉ ᯀᯞᯤ ᯑᯪᯇᯘᯝᯇ᯲ ᯔ ᯑᯩᯅᯖ ᯔᯉ᯲ᯐᯮᯐᯮᯰ ᯎᯬᯀᯒ᯲ ᯤ

4:17 Ai nunga jumpang tingki ni uhum madabu, mamungka sian bagas ni Debata. Alai molo jumolo tu hita, dia ma ujung ni angka na so mangoloi barita na uli na sian Debata? ᯀᯤ ᯉᯮᯝ ᯐᯔᯮ᯲ᯇᯰ ᯖᯰᯪᯄ᯦ᯪ ᯉᯪ ᯥᯂᯔᯮ᯲ ᯔᯑᯅᯮ ᯔᯔᯮᯰᯄ᯦ ᯘᯪᯀᯉ᯲ ᯅᯎᯘ᯲ ᯉᯪ ᯑᯩᯅᯖ ᯀᯞᯤ ᯔᯬᯞᯬ ᯐᯮᯔᯬᯞᯬ ᯖᯮ ᯂᯪᯖ ᯑᯪᯀ ᯔ ᯥᯐᯮᯰ ᯉᯪ ᯀᯰᯄ᯦ ᯉ ᯘᯬ ᯔᯝᯬᯞᯬᯤ ᯅᯒᯪᯖ ᯉ ᯥᯞᯪ ᯉ ᯘᯪᯀᯉ᯲ ᯑᯩᯅᯖ

4:18 Jala molo sihol so malua partigor i, tudia ma tagamon halak na so daulat jala sipardosa i? ᯐᯞ ᯔᯬᯞᯬ ᯘᯪᯂᯞᯬ᯲ ᯘᯬ ᯔᯞᯮᯀ ᯇᯒ᯲ᯖᯪᯎᯒᯬ᯲ ᯤ ᯖᯮᯑᯪᯀ ᯔ ᯖᯎᯔᯉᯬ᯲ ᯂᯞᯄ᯦᯲ ᯉ ᯘᯬ ᯑᯥᯞᯖ᯲ ᯐᯞ ᯘᯪᯇᯒ᯲ᯑᯬᯘ ᯤ

4:19 Dibahen i, angka na marhaporsuhon mangihuthon roha ni Debata, dipasahat ma tondina tu Panompa haposan i, marhitehite na mangulahon na denggan. ᯑᯪᯅᯂᯉᯩ᯲ ᯤ ᯀᯰᯄ᯦ ᯉ ᯔᯒ᯲ᯂᯇᯬᯒᯮᯘᯉᯬ᯲ ᯔᯝᯪᯂᯖᯮ᯲ᯂᯉᯬ᯲ ᯒᯬᯂ ᯉᯪ ᯑᯩᯅᯖ ᯑᯪᯇᯘᯂᯖ᯲ ᯔ ᯖᯉᯬ᯲ᯑᯪᯉ ᯖᯮ ᯇᯉᯔᯬ᯲ᯇ ᯂᯇᯬᯘᯉ᯲ ᯤ ᯔᯒ᯲ᯂᯪᯖᯩᯂᯪᯖᯩ ᯉ ᯔᯝᯮᯞᯂᯉᯬ᯲ ᯉ ᯑᯰᯩᯎᯉ᯲

1 Petrus ᯇᯩᯖ᯲ᯒᯘᯮ᯲ 5[patota | patota mualna]

5:1 Hupaingot ma angka sintua na di tongatongamuna, ahu dongan sintua jala sitindangi di angka haporsuhon na tinaon ni Kristus, huhut partohap di hasangapon sipapataron sogot: ᯂᯮᯇᯤᯝᯖᯬ᯲ ᯔ ᯀᯰᯄ᯦ ᯘᯉᯪ᯲ᯖᯮᯀ ᯉ ᯑᯪ ᯖᯬᯝᯖᯬᯝᯔᯮᯉ ᯀᯂᯮ ᯑᯬᯝᯉ᯲ ᯘᯉᯪ᯲ᯖᯮᯀ ᯐᯞ ᯘᯪᯖᯉᯪ᯲ᯑᯝᯪ ᯑᯪ ᯀᯰᯄ᯦ ᯂᯇᯒᯬ᯲ᯘᯮᯂᯉᯬ᯲ ᯉ ᯖᯪᯉᯀᯉᯬ᯲ ᯉᯪ ᯄ᯦᯲ᯒᯘᯪ᯲ᯖᯘᯮ᯲ ᯂᯮᯂᯖᯮ᯲ ᯇᯒ᯲ᯖᯬᯂᯇ᯲ ᯑᯪ ᯂᯘᯝᯇᯉᯬ᯲ ᯘᯪᯇᯇᯖᯒᯉᯬ᯲ ᯘᯬᯎᯖᯬ᯲

5:2 Parmahan i hamu ma punguan ni Debata na di hamu, unang songon na pinaksa, sian las ni roha ma mangihuthon Debata; unang ala ni pangomoan hailaon, sian ringkot ni roha ma! ᯇᯒ᯲ᯔᯂᯉ᯲ ᯤ ᯂᯔᯮ ᯔ ᯇᯮᯝᯮᯀᯉ᯲ ᯉᯪ ᯑᯩᯅᯖ ᯉ ᯑᯪ ᯂᯔᯮ ᯥᯉᯰ ᯘᯬᯝᯉᯬ᯲ ᯉ ᯇᯪᯉᯄ᯦᯲ᯘ ᯘᯪᯀᯉ᯲ ᯞᯘ᯲ ᯉᯪ ᯒᯬᯂ ᯔ ᯔᯝᯪᯂᯖᯮ᯲ᯂᯉᯬ᯲ ᯑᯩᯅᯖ ᯥᯉᯰ ᯀᯞ ᯉᯪ ᯇᯝᯬᯔᯬᯀᯉ᯲ ᯂᯤᯞᯀᯉᯬ᯲ ᯘᯪᯀᯉ᯲ ᯒᯰᯪᯄ᯦ᯖᯬ᯲ ᯉᯪ ᯒᯬᯂ ᯔ

5:3 Unang ma songon angka na mamaksa natorop; alai gabe tiruan ma hamu di angka na pinarmahan! ᯥᯉᯰ ᯔ ᯘᯬᯝᯉᯬ᯲ ᯀᯰᯄ᯦ ᯉ ᯔᯔᯄ᯦᯲ᯘ ᯉᯖᯬᯒᯇᯬ᯲ ᯀᯞᯤ ᯎᯅᯩ ᯖᯪᯒᯮᯀ᯲ ᯔ ᯂᯔᯮ ᯑᯪ ᯀᯰᯄ᯦ ᯉ ᯇᯪᯉᯒ᯲ᯔᯂᯉ᯲

5:4 Molo i, jaloonmuna ma tumpal hasangapon na so ra malos i, ia dung gabe patar Parmahan na bolon i. ᯔᯬᯞᯬ ᯤ ᯐᯞᯬᯀᯉᯬ᯲ᯔᯮᯉ ᯔ ᯖᯔᯮ᯲ᯇᯞ᯲ ᯂᯘᯝᯇᯉᯬ᯲ ᯉ ᯅᯬᯞᯉᯬ᯲ ᯤ ᯤᯀ ᯑᯮᯰ ᯎᯅᯩ ᯇᯖᯒ᯲ ᯇᯒ᯲ᯔᯂᯉ᯲ ᯉ ᯅᯬᯞᯉᯬ᯲ ᯤ

5:5 Laos songon i ma hamu, angka na umposo, unduk ma hamu di angka na tumunggane! Alai saluhutna ma hamu manolukkon haserepon sama hamu, ai dialo Debata do angka na ginjang roha, alai dilehon do asiasi tu angka na serep marroha. ᯞᯀᯘᯬ᯲ ᯘᯬᯝᯉᯬ᯲ ᯤ ᯔ ᯂᯔᯮ ᯀᯰᯄ᯦ ᯉ ᯀᯔᯮ᯲ᯇᯬᯘᯬ ᯀᯉᯮ᯲ᯑᯄ᯦ᯮ᯲ ᯔ ᯂᯔᯮ ᯑᯪ ᯀᯰᯄ᯦ ᯉ ᯖᯮᯔᯮᯰᯎᯉᯩ ᯀᯞᯤ ᯘᯞᯮᯂᯖᯮ᯲ᯉ ᯔ ᯂᯔᯮ ᯔᯉᯬᯞᯄ᯦ᯮ᯲ᯄ᯦ᯉᯬ᯲ ᯂᯘᯩᯒᯩᯇᯉᯬ᯲ ᯘᯔ ᯂᯔᯮ ᯀᯞᯤ ᯑᯪᯀᯞᯬ ᯑᯩᯅᯖ ᯑᯬ ᯀᯰᯄ᯦ ᯉ ᯎᯉᯪ᯲ᯐᯰ ᯒᯬᯂ ᯀᯞᯤ ᯑᯪᯞᯩᯂᯉᯬ᯲ ᯑᯬ ᯀᯘᯪᯀᯘᯪ ᯖᯮ ᯀᯰᯄ᯦ ᯉ ᯘᯩᯒᯇᯩ᯲ ᯔᯒ᯲ᯒᯬᯂ

5:6 Antong, patutoru hamu ma dirimuna tutoru ni tangan ni Debata na gogo i, asa dipatimbo hamu di tingkina i! ᯀᯉ᯲ᯖᯰᯬ ᯇᯖᯮᯖᯬᯒᯮ ᯂᯔᯮ ᯔ ᯑᯪᯒᯪᯔᯮᯉ ᯖᯮᯖᯬᯒᯮ ᯉᯪ ᯖᯝᯉ᯲ ᯉᯪ ᯑᯩᯅᯖ ᯉ ᯎᯬᯎᯬ ᯤ ᯀᯘ ᯑᯪᯇᯖᯔᯪ᯲ᯅᯬ ᯂᯔᯮ ᯑᯪ ᯖᯰᯪᯄ᯦ᯪᯉ

5:7 Tinggangkon hamu ma nasa na hinolsohon ni rohamuna tu Ibana, ai disarihon do hamu! ᯖᯰᯪᯎᯰᯄᯉᯬ᯲ ᯂᯔᯮ ᯔ ᯉᯘ ᯉ ᯂᯪᯉᯞᯬ᯲ᯘᯬᯂᯉᯬ᯲ ᯉᯪ ᯒᯬᯂᯔᯮᯉ ᯖᯮ ᯤᯅᯉ ᯀᯤ ᯑᯪᯘᯒᯪᯂᯉᯬ᯲ ᯑᯬ ᯂᯔᯮ

5:8 Torang ma rohamuna, dungo ma hamu; na maotaot do alomuna, sibolis i, songon babiat na marauang, mangalului sibondutonna. ᯖᯬᯒᯰ ᯔ ᯒᯬᯂᯔᯮᯉ ᯑᯮᯝᯬ ᯔ ᯂᯔᯮ ᯉ ᯔᯀᯖᯬ᯲ᯀᯀᯖᯬ᯲ ᯑᯬ ᯀᯞᯬᯔᯮᯉ ᯘᯪᯅᯬᯞᯘᯪ᯲ ᯤ ᯘᯬᯝᯉᯬ᯲ ᯅᯅᯪᯀᯖ᯲ ᯉ ᯔᯒᯥᯀᯰ ᯔᯝᯞᯮᯞᯮᯤ ᯘᯪᯅᯉᯬ᯲ᯑᯮᯖᯉᯬ᯲ᯉ

5:9 Gomos ma hamu mangalo ibana marhitehite haporseaon; ingot hamu ma: Ndang tarbahen so songgop angka haporsuhon sisongon i, nang tu angka hahaanggimuna na di portibi on. ᯎᯬᯔᯘᯬ᯲ ᯔ ᯂᯔᯮ ᯔᯝᯞᯬ ᯤᯅᯉ ᯔᯒ᯲ᯂᯪᯖᯩᯂᯪᯖᯩ ᯂᯇᯒᯬ᯲ᯘᯩᯀᯀᯉᯬ᯲ ᯤᯝᯖᯬ᯲ ᯂᯔᯮ ᯔ ᯉ᯲ᯑᯰ ᯖᯒ᯲ᯅᯂᯉᯩ᯲ ᯘᯬ ᯘᯰᯬᯎᯇᯬ᯲ ᯀᯰᯄ᯦ ᯂᯇᯒᯬ᯲ᯘᯮᯂᯉᯬ᯲ ᯘᯪ ᯘᯬᯝᯉᯬ᯲ ᯤ ᯉᯰ ᯖᯮ ᯀᯰᯄ᯦ ᯂᯂᯀᯰᯎᯪᯔᯮᯉ ᯉ ᯑᯪ ᯇᯒᯬ᯲ᯖᯪᯅᯪ ᯀᯉᯬ᯲

5:10 Alai anggo Debata, nampuna saluhut asi ni roha, naung manjou hamu tu hasangaponna na manongtong i di bagasan Kristus, pauliulionna, pahotonna jala patoguonna do hamu, dung jolo ditaon hamu satongkin haporsuhon i. ᯀᯞᯤ ᯀᯰᯎᯬ ᯑᯩᯅᯖ ᯉᯔ᯲ᯇᯮᯉ ᯘᯞᯮᯂᯖᯮᯮ᯲ ᯀᯘᯪ ᯉᯪ ᯒᯬᯂ ᯉᯀᯮᯰ ᯔᯉ᯲ᯐᯬᯥ ᯂᯔᯮ ᯖᯮ ᯂᯘᯝᯇᯉᯬ᯲ᯉ ᯉ ᯔᯉᯉᯬ᯲ᯖᯰᯬ ᯤ ᯑᯪ ᯅᯎᯘᯉ᯲ ᯄ᯦᯲ᯒᯘᯪ᯲ᯖᯘᯮ᯲ ᯇᯥᯞᯪᯥᯞᯪᯀᯉᯬ᯲ᯉ ᯇᯂᯬᯖᯉᯬ᯲ᯉ ᯐᯞ ᯇᯖᯬᯎᯮᯀᯉᯬ᯲ᯉ ᯑᯬ ᯂᯔᯮ ᯑᯮᯰ ᯐᯬᯞᯬ ᯑᯪᯖᯀᯉᯬ᯲ ᯂᯔᯮ ᯘᯖᯰᯬᯄᯉᯪ᯲ ᯂᯇᯒᯬ᯲ᯘᯮᯂᯉᯬ᯲ ᯤ

5:11 Di Ibana ma hagogoon ro di salelenglelengna! Amen. ᯑᯪ ᯤᯅᯉ ᯔ ᯂᯎᯬᯎᯬᯀᯉᯬ᯲ ᯒᯬ ᯑᯪ ᯘᯞᯩᯞᯰᯩᯞᯩᯞᯰᯩᯉ ᯀᯔᯉᯩ᯲

5:12 Marhite sian si Silwanus, dongan haposan i, di rohangku, hubahen surat na saotik on tu hamu, mangapoi jala mangkatindangkon, i do sintong asi ni roha ni Debata, hajongjonganmuna. ᯔᯒ᯲ᯂᯪᯖᯩ ᯘᯪᯀᯉ᯲ ᯘᯪ ᯘᯞᯪ᯲ᯋᯉᯘᯮ᯲ ᯑᯬᯝᯉ᯲ ᯂᯇᯬᯘᯉ᯲ ᯤ ᯑᯪ ᯒᯬᯂᯰᯄ᯦ᯮ ᯂᯮᯅᯂᯉᯩ᯲ ᯘᯮᯒᯖ᯲ ᯉ ᯘᯀᯬᯖᯄ᯦ᯪ᯲ ᯀᯉᯬ᯲ ᯖᯮ ᯂᯔᯮ ᯔᯝᯇᯬᯤ ᯐᯞ ᯔᯰᯄ᯦ᯖᯉᯪ᯲ᯑᯰᯄ᯦ᯉᯬ᯲ ᯤ ᯑᯬ ᯘᯉᯪ᯲ᯖᯰᯬ ᯀᯘᯪ ᯉᯪ ᯒᯬᯂ ᯉᯪ ᯑᯩᯅᯖ ᯂᯐᯰᯬᯐᯬᯝᯉ᯲ᯔᯮᯉ

5:13 Na mandok tabi tu hamu huria na di Babel, na tarpillit rap dohot hita, angkup ni si Markus, anakki. ᯉ ᯔᯉ᯲ᯑᯄ᯦ᯬ᯲ ᯖᯅᯪ ᯖᯮ ᯂᯔᯮ ᯂᯮᯒᯪᯀ ᯉ ᯑᯪ ᯅᯅᯞᯩ᯲ ᯉ ᯖᯒ᯲ᯇᯞᯪ᯲ᯞᯖᯪ᯲ ᯒᯇ᯲ ᯑᯬᯂᯖᯬ᯲ ᯂᯪᯖ ᯀᯰᯄ᯦ᯇᯮ᯲ ᯉᯪ ᯘᯪ ᯔᯒ᯲ᯄ᯦ᯘᯮ᯲ ᯀᯉᯄ᯦᯦᯲ᯄ᯦ᯪ

5:14 Masitabian ma hamu huhut masiummaan di bagasan holong ni roha. Dame ma di saluhut hamu, angka na di bagasan Kristus! ᯔᯘᯪᯖᯅᯪᯀᯉ᯲ ᯔ ᯂᯔᯮ ᯂᯮᯂᯖᯮ᯲ ᯔᯘᯪᯀᯔᯮ᯲ᯔᯀᯉ᯲ ᯑᯪ ᯅᯎᯘᯉ᯲ ᯂᯬᯞᯰᯬ ᯉᯪ ᯒᯬᯂ ᯑᯔᯩ ᯔ ᯑᯪ ᯘᯞᯮᯂᯖᯮ᯲ ᯂᯔᯮ ᯀᯰᯄ᯦ ᯉ ᯑᯪ ᯅᯎᯘᯉ᯲ ᯄ᯦᯲ᯒᯘᯪ᯲ᯖᯘᯮ᯲