Jump to content

Buku 2 Petrus

Sian Wikipedia

2 Petrus ᯇᯩᯖ᯲ᯒᯘᯮ᯲ 1[patota | patota mualna]

1:1 Ahu surat ni si Simon Petrus, naposo jala apostel ni Jesus Kristus, mandapothon angka naung manjalo haporseaon na arga, rap dohot hami, marhitehite hatigoran ni Debatanta dohot Jesus Kristus, Sipalua i: ᯀᯂᯮ ᯘᯮᯒᯖᯉᯪ᯲ ᯘᯪ ᯘᯪᯔᯉᯬ᯲ ᯇᯩᯖ᯲ᯒᯘᯮ᯲ ᯉᯇᯬᯘᯬ ᯐᯞ ᯀᯇᯘᯬ᯲ᯖᯞᯩ᯲ ᯉᯪ ᯐᯩᯘᯘᯮ᯲ ᯄ᯦᯲ᯒᯘᯪ᯲ᯖᯘᯮ᯲ ᯔᯉ᯲ᯑᯇᯖᯬ᯲ᯂᯉᯬ᯲ ᯀᯰᯄ᯦ ᯉᯀᯮᯰ ᯔᯉ᯲ᯐᯞᯬ ᯂᯇᯒᯬ᯲ᯘᯩᯀᯀᯉᯬ᯲ ᯉ ᯀᯒ᯲ᯎ ᯒᯇ᯲ ᯑᯬᯂᯖᯬ᯲ ᯂᯔᯪ ᯔᯒ᯲ᯂᯪᯖᯩᯂᯪᯖᯩ ᯂᯖᯪᯎᯬᯒᯉ᯲ ᯉᯪ ᯑᯩᯅᯖᯉ᯲ᯖ ᯑᯬᯂᯖᯬ᯲ ᯐᯩᯘᯘᯮ᯲ ᯄ᯦᯲ᯒᯘᯪ᯲ᯖᯘᯮ᯲ ᯘᯪᯇᯞᯮᯀ ᯤ

1:2 Singkop ma di hamu asi ni roha dohot dame, marhitehite panandaonmuna di Debata dohot di Jesus, Tuhanta i! ᯘᯰᯪᯄᯇᯬ᯲ ᯔ ᯑᯪ ᯂᯔᯮ ᯀᯘᯪ ᯉᯪ ᯒᯬᯂ ᯑᯬᯂᯖᯬ᯲ ᯑᯔᯩ ᯔᯒ᯲ᯂᯪᯖᯩᯂᯪᯖᯩ ᯇᯉᯉ᯲ᯑᯀᯉᯬ᯲ᯔᯮᯉ ᯑᯪ ᯑᯩᯅᯖ ᯑᯬᯂᯖᯬ᯲ ᯑᯪ ᯐᯩᯘᯘᯮ᯲ ᯖᯮᯐᯉ᯲ᯖ ᯤ

1:3 Dilehon hagogoon ni hadebataonna i do tu hita nasa na tau hangoluan dohot hadaulaton marhite sian naung tatanda Ibana, na manjou hita, hinorhon ni hasangaponna dohot hadengganonna sandiri.ᯑᯪᯞᯩᯂᯉᯬ᯲ ᯂᯎᯬᯎᯬᯀᯉᯬ᯲ ᯉᯪ ᯂᯑᯩᯅᯖᯀᯉᯬ᯲ᯉ ᯤ ᯑᯬ ᯖᯮ ᯂᯪᯖ ᯉᯘ ᯉ ᯖᯥ ᯂᯝᯬᯞᯮᯀᯉ᯲ ᯑᯬᯂᯖᯬ᯲ ᯂᯑᯥᯞᯖᯉᯬ᯲ ᯔᯒ᯲ᯂᯪᯖᯩ ᯘᯪᯀᯉ᯲ ᯉᯀᯮᯰ ᯖᯖᯉ᯲ᯑ ᯤᯅᯉ ᯉ ᯔᯉ᯲ᯐᯬᯥ ᯂᯪᯖ ᯂᯪᯉᯒᯬ᯲ᯂᯉᯬ᯲ ᯉᯪ ᯂᯘᯝᯇᯉᯬ᯲ᯉ ᯑᯬᯂᯖᯬ᯲ ᯂᯑᯰᯩᯎᯉᯉᯬ᯲ᯉ ᯘᯉ᯲ᯑᯪᯒᯪ

1:4 Marhite sian i do dilehon tu hita bagabagana angka na arga jala na balga situtu, asa hinorhon ni i gabe partohap hamu di hadebataon, dung sanga maporus hamu sian hamagoan, na di bagasan hahisapon na di portibi on. ᯔᯒ᯲ᯂᯪᯖᯩ ᯘᯪᯀᯉ᯲ ᯤ ᯑᯬ ᯑᯪᯞᯩᯂᯉᯬ᯲ ᯖᯮ ᯂᯪᯖ ᯅᯎᯅᯎᯉ ᯀᯄ᯦ ᯉ ᯀᯒ᯲ᯎ ᯐᯞ ᯉ ᯅᯞ᯲ᯎ ᯘᯪᯖᯮᯖᯮ ᯀᯘ ᯂᯪᯉᯒᯬ᯲ᯂᯉᯬ᯲ ᯉᯪ ᯤ ᯎᯅᯩ ᯇᯒ᯲ᯖᯬᯂᯇ᯲ ᯂᯔᯮ ᯑᯪ ᯂᯑᯩᯅᯖᯀᯉᯬ᯲ ᯑᯮᯰ ᯘᯝ ᯔᯇᯬᯒᯘᯮ᯲ ᯂᯔᯮ ᯘᯪᯀᯉ᯲ ᯂᯔᯎᯬᯀᯉ᯲ ᯉ ᯑᯪ ᯅᯎᯘᯉ᯲ ᯂᯂᯪᯘᯇᯉᯬ᯲ ᯉ ᯑᯪ ᯇᯒᯬ᯲ᯖᯪᯅᯪ ᯀᯉᯬ᯲

1:5 Dibahen i, haringgashon hamu ma sian nasa gogo, manurdukkon denggan ni parange di bagasan haporseaon i, dung i habisuhon ma di bagasan parange na denggan i; ᯑᯪᯅᯂᯉᯩ᯲ ᯤ ᯂᯒᯰᯪᯎᯘ᯲ᯂᯉᯬ᯲ ᯂᯔᯮ ᯔ ᯘᯪᯀᯉ᯲ ᯉᯘ ᯎᯬᯎᯬ ᯔᯉᯉᯮ᯲ᯑᯄᯮ᯦᯲ᯄ᯦ᯉᯬ᯲ ᯑᯰ᯲ᯎᯉ᯲ ᯉᯪ ᯇᯒᯝᯩ ᯑᯪ ᯅᯎᯘᯉ᯲ ᯂᯇᯒᯬ᯲ᯘᯩᯀᯀᯉᯬ᯲ ᯤ ᯑᯮᯰ ᯤ ᯂᯅᯪᯘᯮᯐᯉᯬ᯲ ᯔ ᯑᯪ ᯅᯎᯘᯉ᯲ ᯇᯒᯝᯩ ᯉ ᯑᯰᯩᯎᯉ᯲ ᯤ

1:6 dung i pangarajaion diri ma di bagasan habisuhon i, dung i habengeton ma di bagasan pangarajaion diri i, dung i hadaulaton ma di bagasan habengeton i: ᯑᯮᯰ ᯤ ᯇᯝᯒᯐᯤᯀᯉᯬ᯲ ᯑᯪᯒᯪ ᯔ ᯑᯪ ᯅᯎᯘᯉ᯲ ᯂᯅᯪᯘᯮᯂᯉᯬ᯲ ᯤ ᯑᯮᯰ ᯤ ᯂᯅᯩᯝᯩᯖᯉᯬ᯲ ᯔ ᯑᯪ ᯅᯎᯘᯉ᯲ ᯇᯝᯒᯐᯤᯘᯉᯬ᯲ ᯑᯪᯒᯪ ᯤ ᯑᯮᯰ ᯤ ᯂᯑᯥᯞᯖᯉᯬ᯲ ᯔ ᯑᯪ ᯅᯎᯘᯉ᯲ ᯂᯅᯩᯝᯩᯖᯉᯬ᯲ ᯤ

1:7 Dung i holong ni roha di dongan ma di bagasan hadaulaton i, dung i holong ni roha di na saluhutna ma di bagasan holong ni roha di dongan i! ᯑᯮᯰ ᯤ ᯂᯬᯞᯰᯬ ᯉᯪ ᯒᯬᯂ ᯑᯪ ᯑᯬᯝᯉ᯲ ᯔ ᯑᯪ ᯅᯎᯘᯉ᯲ ᯂᯑᯥᯞᯖᯉᯬ᯲ ᯤ ᯑᯮᯰ ᯤ ᯂᯬᯞᯰᯬ ᯉᯪ ᯒᯬᯂ ᯑᯪ ᯉ ᯘᯞᯮᯂᯖᯮ᯲ᯉ ᯔ ᯑᯪ ᯅᯎᯘᯉ᯲ ᯂᯬᯞᯰᯬ ᯉᯪ ᯒᯬᯂ ᯑᯪ ᯑᯬᯝᯉ᯲ ᯤ

1:8 Ai molo jumpang angka i di hamu jala ganda, ndada loasonna hamu losok jala so marparbue, laho mananda Jesus Kristus, Tuhanta i. ᯀᯤ ᯔᯬᯞᯬ ᯐᯔᯮ᯲ᯇᯰ ᯀᯰᯄ᯦ ᯤ ᯑᯪ ᯂᯔᯮ ᯐᯞ ᯎᯉ᯲ᯑ ᯉ᯲ᯑᯑ ᯞᯬᯀᯘᯉᯬ᯲ᯉ ᯂᯔᯮ ᯞᯬᯘᯄᯬ᯲ ᯐᯞ ᯘᯬ ᯔᯒ᯲ᯇᯒ᯲ᯅᯮᯀᯩ ᯞᯂᯬ ᯔᯉᯉ᯲ᯑ ᯐᯩᯘᯘᯮ᯲ ᯄ᯦᯲ᯒᯘᯪ᯲ᯖᯘᯮ᯲ ᯖᯮᯂᯉ᯲ᯖ ᯤ

1:9 Alai molo so dapot i di na deba, halak na mapitung ma i, parmata na jonok, naung lupa di haiason sian dosa, na di ibana najolo. ᯀᯞᯤ ᯔᯬᯞᯬ ᯘᯬ ᯑᯇᯖᯬ᯲ ᯤ ᯑᯪ ᯉ ᯑᯩᯅ ᯂᯞᯄ᯦᯲ ᯉ ᯔᯇᯪᯖᯮᯰ ᯔ ᯤ ᯇᯒ᯲ᯔᯖ ᯉ ᯐᯬᯉᯄ᯦ᯬ᯲ ᯉᯀᯮᯰ. ᯞᯮᯇ ᯑᯪ ᯂᯤᯀᯘᯉᯬ᯲ ᯘᯪᯀᯉ᯲ ᯑᯬᯘ ᯉ ᯑᯪ ᯤᯅᯉ ᯉᯐᯬᯞᯬ

1:10 Dibahen i, ale angka dongan, lam ringgas ma hamu pahothon panjouonna dohot pamillitonna di hamu; ai molo diulahon hamu i, ndang olo be hamu tinggang. ᯑᯪᯅᯂᯉᯩ᯲ ᯤ ᯀᯖᯩ ᯀᯰᯄ᯦ ᯑᯬᯝᯉ᯲ ᯞᯔ᯲ ᯒᯰᯪᯎᯘ᯲ ᯔ ᯂᯔᯮ ᯇᯂᯖᯬ᯲ᯂᯉᯬ᯲ ᯇᯉ᯲ᯐᯬᯥᯀᯉᯬ᯲ᯉ ᯑᯬᯂᯖᯬ᯲ ᯇᯔᯞᯪ᯲ᯞᯪᯖᯉᯬ᯲ᯉ ᯑᯪ ᯂᯔᯮ ᯀᯤ ᯔᯬᯞᯬ ᯑᯪᯥᯞᯂᯉᯬ᯲ ᯂᯔᯮ ᯤ ᯉ᯲ᯑᯰ ᯀᯬᯞᯬ ᯅᯩ ᯂᯔᯮ ᯖᯰᯪᯎᯰ

1:11 Songon i ma buas lehononna tu hamu hamasuhon tu bagasan, harajaon salelenglelengna, na di Tuhanta Jesus Kristus, Sipalua i. ᯘᯬᯝᯉᯬ᯲ ᯤ ᯔ ᯅᯮᯀᯘ᯲ ᯞᯩᯂᯬᯉᯉᯬ᯲ᯉ ᯖᯮ ᯂᯔᯮ ᯂᯔᯘᯮᯂᯉᯬ᯲ ᯖᯮ ᯅᯎᯘᯉ᯲ ᯂᯒᯐᯀᯉᯬ᯲ ᯘᯞᯩᯞᯰᯩᯞᯩᯞᯰᯩᯉ ᯉ ᯑᯪ ᯖᯮᯂᯉ᯲ᯖ ᯐᯩᯘᯘᯮ᯲ ᯄ᯦᯲ᯒᯘᯪ᯲ᯖᯘᯮ᯲ ᯘᯪᯇᯞᯮᯀ ᯤ

1:12 Dibahen i, tongtong do hupaingothon angka i tu hamu, atik pe naung diboto hamu i jala naung togu rohamuna di bagasan hasintongan, na di hamu nuaeng. ᯑᯪᯅᯂᯉᯩ᯲ ᯤ ᯖᯰᯬᯖᯰᯬ ᯑᯬ ᯑᯪᯇᯤᯝᯖᯬ᯲ᯂᯉᯬ᯲ ᯀᯰᯄ᯦ ᯤ ᯖᯮ ᯂᯔᯮ ᯀᯖᯄ᯦ᯪ᯲ ᯇᯩ ᯉᯀᯮᯰ ᯑᯪᯅᯬᯖᯬ ᯂᯔᯮ ᯤ ᯐᯞ ᯉᯀᯮᯰ ᯖᯬᯎᯮ ᯒᯬᯂᯔᯮᯉ ᯑᯪ ᯅᯎᯘᯉ᯲ ᯂᯘᯉᯪ᯲ᯖᯬᯝᯉ᯲ ᯉ ᯑᯪ ᯂᯔᯮ ᯉᯮᯀᯀᯰᯩ

1:13 Alai tama do, didok rohangku, ahu manungguli hamu marhitehite hata sipaingot, saleleng di bagasan balebale on dope ahu. ᯀᯞᯤ ᯖᯔ ᯑᯬ ᯑᯪᯑᯄ᯦ᯬ᯲ ᯒᯬᯂᯏᯄ᯦ᯮ ᯀᯂᯮ ᯔᯉᯮᯰᯎᯮᯞᯪ ᯂᯔᯮ ᯔᯒ᯲ᯂᯪᯖᯩᯂᯪᯖᯩ ᯂᯖ ᯘᯪᯇᯤᯝᯖᯬ᯲ ᯘᯞᯩᯞᯰᯩ ᯑᯪ ᯅᯎᯘᯉ᯲ ᯅᯞᯩᯅᯞᯩ ᯀᯉᯬ᯲ ᯑᯬᯇᯩ ᯀᯂᯮ

1:14 Ai huboto, tibu nama tadingkononku balebalengkon, songon naung pinabotohon ni Tuhanta Jesus Kristus tu ahu. ᯀᯤ ᯂᯮᯅᯬᯖᯬ ᯖᯪᯅᯮ ᯉᯔ ᯖᯑᯰᯪ᯲ᯄ᯦ᯬᯉᯉᯬ᯲ᯄ᯦ᯮ ᯅᯞᯩᯅᯞᯰᯩᯄ᯦ᯉᯬ᯲ ᯘᯬᯝᯉᯬ᯲ ᯉᯀᯮᯰ ᯇᯪᯉᯅᯬᯖᯬᯂᯉᯬ᯲ ᯉᯪ ᯖᯮᯂᯉ᯲ᯖ ᯐᯩᯘᯘᯮ᯲ ᯄ᯦᯲ᯒᯘᯪ᯲ᯖᯘᯮ᯲ ᯖᯮ ᯀᯂᯮ

1:15 Alai huharingkothon do, asa tongtong tarbahen hamu marningot i, dung borhat ahu. ᯀᯞᯤ ᯂᯮᯂᯒᯰᯪᯄ᯦ᯖᯬ᯲ᯂᯉᯬ᯲ ᯑᯬ ᯀᯘ ᯖᯰᯬᯖᯰᯬ ᯖᯒ᯲ᯅᯂᯉᯩ᯲ ᯂᯔᯮ ᯔᯒ᯲ᯉᯪᯝᯖᯬ᯲ ᯤ ᯑᯮᯰ ᯅᯒᯬ᯲ᯂᯖ᯲ ᯀᯂᯮ

1:16 Ai ndada huihuthon hami angka turiturian na piningkir ni na bisuk, di na hupabotohon hami tu hamu hagogoon dohot haroro ni Tuhanta Jesus Kristus; tung diida matanami do hatongamonna i.ᯀᯤ ᯉ᯲ᯑᯑ ᯂᯮᯤᯂᯖᯮ᯲ᯂᯉᯬ᯲ ᯂᯔᯪ ᯀᯰᯄ᯦. ᯖᯮᯒᯪᯖᯮᯒᯪᯀᯉ᯲ ᯉ ᯇᯪᯉᯰᯪᯄ᯦ᯒᯪ᯲ ᯉᯪ ᯉ ᯅᯪᯘᯄ᯦ᯮ᯲ ᯑᯪ ᯉ ᯂᯮᯇᯅᯬᯖᯬᯂᯉᯬ᯲ ᯂᯔᯪ ᯖᯮ ᯂᯔᯮ ᯂᯎᯬᯎᯬᯀᯉᯬ᯲ ᯑᯬᯂᯖᯬ᯲ ᯂᯒᯬᯒᯬ ᯉᯪ ᯖᯮᯂᯉ᯲ᯖ ᯐᯩᯘᯘᯮ᯲ ᯄ᯦᯲ᯒᯘᯪ᯲ᯖᯘᯮ᯲ ᯖᯮᯰ ᯑᯪᯤᯑ ᯔᯖᯉᯔᯪ ᯑᯬ ᯂᯖᯬᯝᯔᯉᯬ᯲ᯉ ᯤ

1:17 Ai dijalo do hamuliaon dohot hasangapon sian Debata Ama, di na masa tu Ibana sian hasangapon na tongam i soara on: "On do Anakku, haholongan ni rohangku; na lomo do rohangku di Ibana!" ᯀᯤ ᯑᯪ ᯐᯞᯬ ᯑᯬ ᯂᯔᯮᯞᯪᯀᯀᯉᯬ᯲ ᯑᯬᯂᯖᯬ᯲ ᯂᯘᯝᯇᯉᯬ᯲ ᯘᯪᯀᯉ᯲ ᯑᯩᯅᯖ ᯀᯔ ᯑᯪ ᯉ ᯔᯘ ᯖᯮ ᯤᯅᯉ ᯘᯪᯀᯉ᯲ ᯂᯘᯝᯇᯉᯬ᯲ ᯉ ᯖᯬᯝᯔ᯲ ᯤ ᯘᯬᯀᯒ ᯀᯉᯬ᯲ ᯀᯉᯬ᯲ ᯑᯬ ᯀᯉᯄ᯦᯲ᯄᯮ ᯂᯂᯬᯞᯬᯝᯉ᯲ ᯉᯪ ᯒᯬᯂᯰᯄ᯦ᯮ

1:18 I ma soara, na hubege hami ro sian banua ginjang i, uju rap hami dohot Ibana di dolok na badia i. ᯤ ᯔ ᯘᯬᯀᯒ ᯉ ᯂᯮᯅᯩᯎᯩ ᯂᯔᯪ ᯒᯬ ᯘᯪᯀᯉ᯲ ᯅᯉᯮᯀ ᯎᯉᯪ᯲ᯐᯰᯤ ᯥᯐᯮ ᯒᯇ᯲ ᯂᯔᯪ ᯑᯬᯂᯖᯬ᯲ ᯤᯅᯉ ᯑᯪ ᯑᯬᯞᯂᯬ᯲ ᯉ ᯅᯑᯪᯀ ᯤ

1:19 Jadi lam hot ma, antong, hata panurirangon i di hami; jala tama marsitiopan tusi ma hamu, songon na tu palito na marsinondang di inganan na holom, paima tarida siulubalang ari i, jala binsar siboan hatiuron di bagasan rohamuna. ᯐᯑᯪ ᯞᯔ᯲ ᯂᯖᯬ᯲ ᯔ ᯀᯉ᯲ᯖᯰᯬ ᯂᯖ ᯇᯉᯮᯒᯪᯒᯝᯉᯬ᯲ ᯤ ᯑᯪ ᯂᯔᯪ ᯐᯞ ᯖᯔ ᯔᯒ᯲ᯘᯪᯖᯪᯀᯬᯇᯉ᯲ ᯖᯮᯘᯪ ᯔ ᯂᯔᯮ ᯘᯬᯝᯉᯬ᯲ ᯉ ᯖᯮ ᯇᯞᯪᯖᯬ ᯉ ᯔᯒ᯲ᯘᯪᯉᯉᯬ᯲ᯑᯰ ᯑᯪ ᯤᯝᯉᯉ᯲ ᯉ ᯂᯬᯞᯔᯬ᯲ ᯇᯤᯔ ᯖᯒᯪᯑ ᯘᯪᯥᯞᯮᯅᯞᯰ ᯀᯒᯪ ᯐᯞ ᯅᯉᯪ᯲ᯘᯒ᯲ ᯘᯪᯅᯬᯀᯉ᯲ ᯂᯖᯪᯥᯒᯉᯬ᯲ ᯑᯪ ᯅᯎᯘᯉ᯲ ᯒᯬᯂᯔᯮᯉ

1:20 On ma parjolo boto hamu: Ndang dapot hatorangan ni nasa panurirangon na tarsurat, anggo sian roha ni jolma. ᯀᯉᯬ᯲ ᯔ ᯇᯒ᯲ᯐᯬᯞᯬ ᯅᯬᯖᯬ ᯂᯔᯮ ᯉ᯲ᯑᯰ ᯑᯇᯖᯬ᯲ ᯂᯖᯬᯒᯝᯉ᯲ ᯉᯪ ᯉᯘ ᯇᯉᯮᯒᯪᯒᯝᯉᯬ᯲ ᯉ ᯖᯒ᯲ᯘᯮᯒᯖ᯲ ᯀᯰᯎᯬ ᯘᯪᯀᯉ᯲ ᯒᯬᯂ ᯉᯪ ᯐᯞᯬ᯲ᯔ

1:21 Ai ndang dung sian tahi ni jolma haroroan ni panurirangon; alai tinogihon ni Tondi Parbadia do, umbahen na marsoara angka jolma, disuru Debata. ᯀᯤ ᯉ᯲ᯑᯰ ᯑᯮᯰ ᯘᯪᯀᯉ᯲ ᯖᯂᯪ ᯉᯪ ᯐᯞᯬ᯲ᯔ ᯂᯒᯬᯒᯬᯀᯉ᯲ ᯉᯪ ᯇᯉᯮᯒᯪᯒᯝᯉᯬ᯲ ᯀᯞᯤ ᯖᯪᯉᯬᯎᯪᯂᯉᯬ᯲ ᯉᯪ ᯖᯉᯬ᯲ᯑᯪ ᯇᯒ᯲ᯅᯝᯪᯀ ᯑᯬ ᯀᯔᯮ᯲ᯅᯂᯉᯩ᯲ ᯉ ᯔᯒ᯲ᯘᯬᯀᯒ ᯀᯰᯄ᯦ ᯐᯞᯬ᯲ᯔ ᯑᯪᯘᯮᯒᯮ ᯑᯩᯅᯖ

2 Petrus ᯇᯩᯖ᯲ᯒᯘᯮ᯲ 2[patota | patota mualna]

2:1 Alai hehe do nang najolo angka panurirang pargapgap di tongatonga ni natorop; songon i nang nuaeng ro tu tongatongamuna angka guru pargapgap, siboan parsirangan hamagoan, pola do soadahononna Tuhan na manobus nasida, gabe lingkup do tu dirinasida hamagoan, diaithon nasida.ᯀᯞᯤ ᯂᯩᯂᯩ ᯑᯬ ᯉᯰ ᯉᯐᯬᯞᯬ ᯀᯰᯄ᯦ ᯇᯉᯮᯒᯪᯒᯰ ᯇᯒ᯲ᯎᯇ᯲ᯎᯇ᯲ ᯑᯪ ᯖᯬᯝᯖᯬᯝ ᯉᯪ ᯉ ᯖᯬᯒᯇᯬ᯲ ᯘᯬᯝᯉᯬ᯲ ᯤ ᯉᯰ ᯉᯮᯀᯀᯰᯩ ᯒᯬ ᯖᯮ ᯖᯬᯝᯖᯬᯝᯔᯮᯉ ᯀᯰᯄ᯦ ᯎᯮᯒᯮ ᯇᯒ᯲ᯎᯇ᯲ᯎᯇ᯲ ᯘᯪᯅᯬᯀᯉ᯲ ᯇᯒ᯲ᯘᯪᯒᯝᯉ᯲ ᯂᯔᯎᯬᯀᯉ᯲ ᯇᯬᯞ ᯑᯬ ᯘᯬᯀᯑᯂᯬᯉᯉᯬ᯲ᯉ ᯖᯮᯂᯉ᯲ ᯉ ᯔᯉᯬᯅᯘᯮ᯲ ᯉᯘᯪᯑ ᯎᯅᯩ ᯞᯰᯪᯄ᯦ᯇᯮ᯲ ᯑᯬ ᯖᯮ ᯑᯪᯒᯪᯉᯘᯪᯑ ᯂᯔᯎᯬᯀᯉ᯲ ᯑᯪᯀᯀᯖᯪ᯲ᯂᯉᯬ᯲ ᯉᯘᯪᯑ

2:2 Torop na mangihuthon pansuasaehonnasida; ala ni nasida gabe hona insak do agama hasintongan i. ᯖᯬᯒᯇᯬ᯲ ᯉ ᯔᯝᯪᯂᯖᯮ᯲ᯂᯉᯬ᯲ ᯇᯉ᯲ᯘᯮᯀᯘᯀᯩᯂᯉᯬ᯲ᯉᯘᯪᯑ ᯀᯞ ᯉᯪ ᯉᯘᯪᯑ ᯎᯅᯩ ᯂᯬᯉ ᯀᯉᯪ᯲ᯘᯄ᯦᯲ ᯑᯬ ᯀᯎᯔ

2:3 Sian roha na marpambuat parlabahononna do hamu marhitehite hata sipaotooto. Sian nahinan dope ndang sulon uhum na tu nasida, jala ndang tarlalap hamagoan di nasida. ᯘᯪᯀᯉ᯲ ᯒᯬᯂ ᯉ ᯔᯒ᯲ᯇᯔ᯲ᯅᯮᯀᯖ᯲ ᯇᯒ᯲ᯞᯅᯂᯬᯉᯉᯬ᯲ᯉ ᯑᯬ ᯂᯔᯮ ᯔᯒ᯲ᯂᯪᯖᯩᯂᯪᯖᯩ ᯂᯖ ᯘᯪᯇᯀᯬᯖᯬᯀᯬᯖᯬ ᯘᯪᯀᯉ᯲ ᯉᯂᯪᯉᯉ᯲ ᯑᯬᯇᯩ ᯉ᯲ᯑᯰ ᯘᯮᯞᯉᯬ᯲ ᯥᯂᯔᯮ᯲ ᯉ ᯖᯮ ᯉᯘᯪᯑ ᯐᯞ ᯉ᯲ᯑᯰ ᯖᯒ᯲ᯞᯞᯇ᯲ ᯂᯔᯎᯬᯀᯉ᯲ ᯑᯪ ᯉᯘᯪᯑ

2:4 Ai gari angka surusuruan na mardosa, ndang diolani Debata: Na didabu do nasida tu banua toru, tu lung haholomon, paramothon nasida tu uhum. ᯀᯤ ᯎᯒᯪ ᯀᯰᯄ᯦ ᯘᯮᯒᯮᯘᯮᯒᯮᯀᯉ᯲ ᯉ ᯔᯒ᯲ᯑᯬᯘ ᯉ᯲ᯑᯰ ᯑᯪᯀᯬᯞᯉᯪ ᯑᯩᯅᯖ ᯉ ᯑᯪᯑᯅᯮ ᯑᯬ ᯉᯘᯪᯑ ᯖᯮ ᯅᯉᯮᯀ ᯖᯬᯒᯮ ᯖᯮ ᯞᯮᯰ ᯂᯂᯬᯞᯬᯔᯉᯬ᯲ ᯇᯒᯔᯖᯬ᯲ᯂᯉᯬ᯲ ᯉᯘᯪᯑ ᯖᯮ ᯥᯂᯔᯮ᯲

2:5 Nang hasiangan na robi i, ndang diolani Ibana; alai diramoti do paualu si Noak, parjamita hatigoran i, di na tinongosna aek na sumar i mangkungkupi portibi na jahat i. ᯉᯰ ᯂᯘᯪᯀᯝᯉ᯲ᯉ ᯒᯬᯅᯪ ᯤ ᯉ᯲ᯑᯰ ᯑᯪᯀᯬᯞᯉᯪ ᯤᯅᯉ ᯀᯞᯤ ᯑᯪᯒᯔᯬᯖᯪ ᯑᯬ ᯇᯥᯀᯞᯮ ᯘᯪᯉᯬᯀᯄ᯦᯲ ᯇᯒ᯲ᯐᯔᯪᯖ ᯂᯖᯪᯎᯬᯒᯉ᯲ ᯤ ᯑᯪ ᯉ ᯖᯪᯉᯬᯝᯘᯬ᯲ᯉ ᯀᯀᯄᯩ᯲ ᯉ ᯘᯮᯔᯒ᯲ ᯤ ᯔᯰᯄ᯦ᯮᯄ᯦ᯮᯇᯪ ᯇᯒᯬ᯲ᯖᯪᯅᯪ ᯉ ᯐᯂᯖ᯲ ᯤ

2:6 Nang huta Sodom dohot Gumora, diparsiragongi do, laho manguhumi, pajongjong lumbalumba taringot tu na masa sogot tu angka na tois. ᯉᯰ ᯂᯮᯖ ᯘᯬᯑᯔᯬ᯲ ᯑᯬᯂᯖᯬ᯲ ᯎᯮᯔᯬᯒᯑᯪᯇᯒ᯲ᯘᯪᯒᯝᯬᯝᯪ ᯑᯬ ᯞᯂᯬ ᯔᯝᯮᯂᯮᯔᯪ ᯇᯐᯰᯬᯐᯰᯬ ᯞᯔᯮ᯲ᯅᯞᯔᯮ᯲ᯅ ᯖᯒᯪᯝᯖᯬ᯲ ᯖᯮ ᯉ ᯔᯘ ᯘᯬᯎᯖᯬ᯲ ᯖᯮ ᯀᯰᯄ᯦ ᯉ ᯖᯬᯀᯘᯪ᯲

2:7 Alai dipalua do si Lot na tigor i, na niarsahan ni angka na so maruhum i marhitehite harorangon na niulanasida. ᯀᯞᯤ ᯑᯪᯇᯞᯮᯀ ᯑᯬ ᯘᯪ ᯞᯖᯬ᯲ ᯉ ᯖᯪᯎᯒᯬ᯲ ᯤ ᯉ ᯉᯪᯀᯒ᯲ᯘᯂᯉ᯲ ᯉᯪ ᯀᯰᯄ᯦ ᯔ ᯘᯬ ᯔᯒᯮᯂᯔᯮ᯲ ᯤ ᯔᯒ᯲ᯂᯪᯖᯩᯂᯪᯖᯩ ᯂᯒᯬᯒᯝᯉᯬ᯲ ᯉ ᯉᯪᯥᯞᯉᯘᯪᯑ

2:8 Ai marhite sian na niidana dohot na binegena ariari diarsakkon tondi ni partigor i do pambahenannasida na so maruhum i, di na maringanan ibana di tongatonganasida. ᯀᯤ ᯔᯒ᯲ᯂᯪᯖᯩ ᯘᯪᯀᯉ᯲ ᯉ ᯉᯪᯤᯑ ᯑᯪᯂᯖᯬ᯲ ᯉ ᯅᯪᯉᯩᯎᯩᯉ ᯀᯒᯪᯀᯒᯪ ᯑᯪᯀᯒ᯲ᯘᯄ᯦᯲ᯄ᯦ᯉᯬ᯲ ᯖᯉᯬ᯲ᯑᯪ ᯉᯪ ᯇᯒ᯲ᯖᯪᯎᯒᯬ᯲ ᯤ ᯑᯬ ᯇᯔ᯲ᯅᯂᯩᯉᯉ᯲ᯉᯘᯪᯑ ᯉ ᯘᯬ ᯔᯒᯮᯂᯔᯮ᯲ ᯤ ᯑᯪ ᯉ ᯔᯒᯪᯝᯉᯉ᯲ ᯤᯅᯉ ᯑᯪ ᯖᯬᯝᯖᯬᯝᯉᯘᯪᯑ

2:9 Diboto Tuhan i do, paluahon angka na daulat sian pangunjunan dohot pajagahon angka pargeduk, asa hona pinsang nasida di ari uhum i. ᯑᯪᯅᯬᯖᯬ ᯖᯮᯂᯉ᯲ ᯤ ᯑᯬ ᯇᯞᯮᯀᯂᯉᯬ᯲ ᯀᯰᯄ᯦ ᯉ ᯑᯥᯞᯖ᯲ ᯘᯪᯀᯉ᯲ ᯇᯝᯉᯮ᯲ᯐᯮᯉᯉ᯲ ᯑᯬᯂᯖᯬ᯲ ᯇᯐᯎᯂᯉᯬ᯲ ᯀᯰᯄ᯦ ᯇᯒ᯲ᯎᯩᯑᯄ᯦ᯮ᯲ ᯀᯘ ᯂᯬᯉ ᯇᯉᯪ᯲ᯘᯰ ᯉᯘᯪᯑ ᯑᯪ ᯀᯒᯪ ᯥᯐᯔᯮ᯲ ᯤ

2:10 Gumodang ma angka sipaolooloi sibuk, siulahon hahisapon na pahodarhon, angka parhu ni roha di panggomgomion; angka na garang do nasida jala na tois, na so mabiar manginsahi angka parhasangapon. ᯎᯮᯔᯬᯑᯰ ᯔ ᯀᯰᯄ᯦ ᯘᯪᯇᯀᯬᯞᯬᯀᯬᯞᯬᯤ ᯘᯪᯅᯄ᯦ᯮ᯲ ᯘᯪᯥᯞᯂᯉᯬ᯲ ᯂᯂᯪᯘᯇᯉᯬ᯲ ᯉ ᯇᯂᯬᯑᯒ᯲ᯂᯉᯬ᯲ ᯀᯰᯄ᯦ ᯇᯒ᯲ᯂᯮᯉᯪ ᯒᯬᯂ ᯑᯪ ᯇᯰᯎᯔᯬ᯲ᯎᯬᯔᯪᯀᯉᯬ᯲ ᯀᯰᯄ᯦ ᯉ ᯎᯒᯰ ᯑᯬ ᯉᯘᯪᯑ ᯐᯞ ᯉ ᯖᯬᯀᯘᯪ᯲ ᯉ ᯘᯬ ᯔᯅᯪᯀᯒ᯲ ᯔᯝᯉᯪ᯲ᯘᯂᯪ ᯀᯰᯄ᯦ ᯇᯒ᯲ᯂᯘᯝᯇᯉᯬ᯲

2:11 Gari angka surusuruan, atik pe sumurung hagogoon dohot huasonasida, gari so mandabuhon uhum paminsangon dompak nasida di jolo ni Tuhan i. ᯎᯒᯪ ᯀᯰᯄ᯦ ᯘᯮᯒᯮᯘᯮᯩᯮᯒᯮᯀᯉ᯲ ᯀᯖᯄ᯦ᯪ᯲ ᯇᯩ ᯘᯮᯔᯮᯒᯮᯰ ᯂᯎᯬᯎᯬᯀᯉᯬ᯲ ᯑᯬᯂᯖᯬ᯲ ᯂᯮᯀᯘᯬᯉᯘᯪᯑ ᯎᯒᯪ ᯘᯬ ᯔᯉ᯲ᯝᯅᯮᯂᯉᯬ᯲ ᯥᯂᯔᯮ᯲ ᯇᯔᯉᯪ᯲ᯘᯝᯉᯬ᯲ ᯑᯔᯬ᯲ᯇᯄ᯦᯲ ᯉᯘᯪᯑ ᯑᯪ ᯐᯬᯞᯬ ᯉᯪ ᯖᯮᯂᯉ᯲ ᯤ

2:12 Alai songon binatang na so marroha do nasida, angka sitangkupon jala sibunuon hian, umbahen na tubu; na manginsahi do nasida di na so binotonasida, gabe mago ma di hamagoannasida. ᯀᯞᯤ ᯘᯬᯝᯉᯬ᯲ ᯅᯪᯉᯖᯰ ᯉ ᯘᯬ ᯔᯒ᯲ᯒᯬᯂ ᯑᯬ ᯉᯘᯪᯑ ᯀᯰᯄ᯦ ᯘᯪᯖᯰᯄᯮ᯦ᯇᯉᯬ᯲ ᯐᯞ ᯘᯪᯅᯮᯉᯮᯀᯉᯬ᯲ ᯂᯪᯀᯉ᯲ ᯀᯔᯮ᯲ᯅᯂᯉᯩ᯲ ᯉ ᯖᯮᯅᯮ ᯉ ᯔᯝᯉᯪ᯲ᯘᯂᯪ ᯑᯬ ᯉᯘᯪᯑ ᯑᯪ ᯉ ᯘᯬ ᯅᯪᯉᯬᯖᯬᯉᯘᯪᯑ ᯎᯅᯩ ᯔᯎᯬ ᯔ ᯑᯪ ᯂᯔᯎᯬᯀᯉ᯲ᯉᯘᯪᯑ

2:13 Upa hageduhon i do diluahon nasida; halalas ni roha do dijujur nasida pargadombuson ariari; sap angka hahodaron dohot hagigian do nasida, na ripe mansuasaehon di bagasan hahisaponnasida, di na rap mangan nasida dohot hamu. ᯥᯇ ᯂᯎᯩᯑᯮᯂᯉᯬ᯲ ᯤ ᯑᯬ ᯑᯪᯞᯮᯀᯂᯉᯬ᯲ ᯉᯘᯪᯑ ᯂᯞᯞᯘ᯲ ᯉᯪ ᯒᯬᯂ ᯑᯬ ᯑᯪᯐᯮᯐᯒᯮ᯲ ᯉᯘᯪᯑ ᯇᯒ᯲ᯎᯑᯔᯬ᯲ᯅᯮᯘᯉᯬ᯲ ᯀᯒᯪᯀᯒᯪ ᯘᯇ᯲ ᯀᯰᯄ᯦ ᯂᯂᯬᯑᯒᯉᯬ᯲ ᯑᯬᯂᯖᯬ᯲ ᯂᯎᯪᯎᯪᯀᯉ᯲ ᯑᯬ ᯉᯘᯪᯑ ᯉ ᯒᯪᯇᯩ ᯔᯉ᯲ᯘᯮᯀᯘᯀᯩᯂᯉᯬ᯲ ᯑᯪ ᯅᯎᯘᯉ᯲ ᯂᯂᯪᯘᯇᯉᯬ᯲ᯉᯘᯪᯑ ᯑᯪ ᯉ ᯒᯇ᯲ ᯔᯝᯉ᯲ ᯉᯘᯪᯑ ᯑᯬᯂᯖᯬ᯲ ᯂᯔᯮ

2:14 Gok pangalangkupon do matanasida; na so mansadi nasida mardosa, diellemellem do roha ni angka na hurang togu, dipasomalsomal do rohana tu pangahution: Angka anak jea do nasida. ᯎᯄ᯦ᯬ᯲ ᯇᯝᯞᯰᯄ᯦ᯮᯇᯉᯬ᯲ ᯑᯬ ᯔᯖᯉᯘᯪᯑ ᯉ ᯘᯬ ᯔᯉ᯲ᯘᯑᯪ ᯉᯘᯪᯑ ᯔᯒ᯲ᯑᯬᯘ ᯑᯪᯀᯞᯩ᯲ᯞᯔᯩ᯲ᯀᯞᯩ᯲ᯞᯔᯩ᯲ ᯑᯬ ᯒᯬᯂ ᯉᯪ ᯀᯰᯄ᯦ ᯉ ᯂᯮᯒᯰ ᯖᯬᯎᯮ ᯑᯪᯇᯘᯬᯔᯞ᯲ᯘᯬᯔᯞ᯲ ᯑᯬ ᯒᯬᯂᯉ ᯖᯮ ᯇᯝᯂᯮᯖᯪᯀᯉᯬ᯲ ᯀᯰᯄ᯦ ᯀᯉᯄ᯦᯲ ᯐᯩᯀ ᯑᯬ ᯔᯘᯪᯑ

2:15 Ditadingkon do dalan na tigor i, gabe lilu, mangihuthon dalan ni si Bileam, anak ni si Beor, na holong roha di upa hageduhon i. ᯑᯪᯖᯑᯰᯪᯄ᯦ᯉᯬ᯲ ᯑᯬ ᯑᯞᯉ᯲ ᯉ ᯖᯪᯎᯒᯬ᯲ ᯤ ᯎᯅᯩ ᯞᯪᯞᯮ ᯔᯝᯪᯂᯖᯮ᯲ᯂᯉᯬ᯲ ᯑᯞᯉ᯲ ᯉᯪ ᯘᯪ ᯅᯪᯞᯩᯀᯔ᯲ ᯀᯉᯄ᯦᯲ ᯉᯪ ᯘᯪ ᯅᯩᯀᯒᯬ᯲ ᯉ ᯂᯬᯞᯰᯬ ᯒᯬᯂ ᯑᯪ ᯥᯇ ᯂᯎᯩᯑᯮᯂᯉᯬ᯲ ᯤ

2:16 Alai hona ajar do ibana di pangalaosionna i, ai dorbia na tarrante, na so parsoara hian, i do gabe mangkuling marsoara jolma, mangalo lalaen ni panurirang i. ᯀᯞᯤ ᯂᯬᯉ ᯀᯐᯒ᯲ ᯑᯬ ᯤᯅᯉ ᯑᯪ ᯇᯝᯞᯀᯬᯘᯪᯀᯉᯬ᯲ᯉ ᯤ ᯀᯤ ᯑᯒᯬ᯲ᯅᯪᯀ ᯖᯒ᯲ᯒᯉ᯲ᯖᯩ ᯉ ᯘᯬ ᯇᯒ᯲ᯘᯬᯀᯒ ᯂᯪᯀᯉ᯲

2:17 Angka mual na so maraek do nasida, angka ombun na niullus ni halisungsung; holom ni na holom do dipadiri di nasida. ᯀᯰᯄ᯦ ᯔᯮᯀᯞ᯲ ᯉ ᯘᯬ ᯔᯒᯀᯄᯩ᯲ ᯑᯬ ᯉᯘᯪᯑ ᯀᯰᯄ᯦ ᯀᯔᯬ᯲ᯅᯉᯮ᯲ ᯉ ᯉᯪᯀᯞᯮ᯲ᯞᯘᯮ᯲ ᯉᯪ ᯂᯞᯪᯘᯮᯰᯘᯰ ᯂᯬᯞᯔᯬ᯲ ᯉᯪ ᯉ ᯂᯬᯞᯔᯬ᯲ ᯑᯬ ᯑᯪᯇᯑᯪᯒᯪ ᯑᯪ ᯉᯘᯪᯑ

2:18 Ai dihatahon nasida do haotoon na tarlobi burnang, laho mangeleala, marhitehite hisaphisap ni sibuk dohot pargadombuson, dongan na imbaru maporus dope, tumadingkon angka pardalan na di bagasan haliluon. ᯀᯤ ᯑᯪᯂᯖᯂᯉᯬ᯲ ᯉᯘᯪᯑ ᯑᯬ ᯂᯀᯬᯖᯬᯀᯉᯬ᯲ ᯉ ᯖᯒ᯲ᯞᯬᯅᯪ ᯅᯒᯮ᯲ᯉᯰ ᯞᯂᯬ ᯔᯝᯩᯞᯀᯩᯞ ᯔᯒ᯲ᯂᯪᯖᯩᯂᯪᯖᯩ ᯂᯪᯘᯇ᯲ᯂᯪᯘᯇ᯲ ᯉᯪ ᯘᯪᯅᯄᯮ᯦᯲ ᯑᯬᯂᯖᯬ᯲ ᯇᯒ᯲ᯎᯑᯔᯬ᯲ᯅᯮᯘᯉᯬ᯲ ᯑᯬᯝᯉ᯲ ᯉ ᯀᯔᯪ᯲ᯅᯒᯮ ᯔᯇᯬᯒᯘᯮ᯲ ᯑᯬᯇᯩ ᯖᯮᯔᯑᯰᯪᯄ᯦ᯉᯬ᯲ ᯀᯰᯄ᯦ ᯇᯒ᯲ᯑᯞᯉ᯲ ᯉ ᯑᯪ ᯅᯎᯘᯉ᯲ ᯂᯞᯪᯞᯮᯀᯉᯬ᯲

2:19 Dibagabagahon nasida do haluaon, atik pe hatoban ni hamagoan i nasida; ai ia i na patunduk halak, hatoban ni i do ibana. ᯑᯪᯅᯎᯅᯎᯂᯉᯬ᯲ ᯉᯘᯪᯑ ᯑᯬᯂᯞᯮᯀᯀᯉᯬ᯲ ᯀᯖᯄ᯦ᯪ᯲ ᯇᯩ ᯂᯖᯬᯅᯉ᯲ ᯉᯪ ᯂᯔᯎᯬᯀᯉ᯲ ᯤ ᯉᯘᯪᯑ ᯀᯞ ᯤᯀ ᯤ ᯉ ᯇᯖᯉᯮ᯲ᯑᯄ᯦ᯮ᯲ ᯂᯞᯄ᯦᯲ ᯂᯖᯬᯅᯉ᯲ ᯉᯪ ᯤ ᯑᯬ ᯤᯅᯉ

2:20 Ai angka naung maporus pasidingkon hahodaron ni portibi on, di na tinandanasida Tuhan Jesus Kristus, Sipalua i: Anggo mangulahi taralit jala talu, gabe jumorbut ma ujungna sian bonana. ᯀᯤ ᯀᯰᯂ᯦ ᯉᯀᯮᯰ ᯔᯇᯪᯒᯘᯮ᯲ ᯇᯘᯪᯑᯰᯪᯄ᯦ ᯉᯬ᯲ ᯂᯂᯬᯑᯒᯉᯬ᯲ ᯉᯪ ᯇᯒᯬ᯲ᯖᯪᯅᯪ ᯀᯉᯬ᯲ ᯼ᯪ ᯉ ᯖᯪᯉᯉ᯲ᯑᯉᯘᯪᯑ ᯖᯮᯂᯉ᯲ ᯐᯩᯘᯘᯮ᯲

221 Ai dumenggan do di nasida, aut unang ditanda nasida dalan hatigoran i, sian na tumundalhon uhum na badia, naung sahat tu nasida, naung tinandanasida i. ᯀᯤ ᯑᯮᯔᯰᯩᯎᯉ᯲ ᯑᯬ ᯑᯪᯉᯘᯪᯑ ᯀᯀᯖᯮ᯲ ᯥᯉᯰ ᯑᯪᯖᯉ᯲ᯑ ᯉᯘᯪᯑ ᯑᯞᯉ᯲ ᯂᯖᯪᯎᯬᯒᯉ᯲ ᯤ ᯘᯪᯀᯉ᯲ ᯉ ᯖᯮᯔᯉᯮ᯲ᯑᯞ᯲ᯂᯉᯬ᯲ ᯥᯂᯔᯮ᯲ ᯉ ᯅᯑᯪᯀ ᯉᯀᯮᯰ ᯘᯂᯖ᯲ ᯖᯮ ᯉᯘᯪᯑ ᯉᯀᯮᯰ ᯖᯪᯉᯉ᯲ᯑᯉᯘᯪᯑ ᯤ

2:22 Jumpang do di nasida hata ni umpama na sintong on: Na mulak do biang tu utautana, jala na margulu do babi di na rotakna, dung mangarembe. ᯐᯔᯮ᯲ᯇᯰ ᯑᯬ ᯑᯪ ᯉᯘᯪᯑ ᯂᯖ ᯉᯪ ᯀᯔ᯲ᯇᯔ ᯉ ᯘᯉᯪ᯲ᯖᯰᯬ ᯀᯉᯬ᯲ ᯉ ᯔᯮᯞᯄ᯦᯲ ᯑᯬ ᯅᯪᯀᯰ ᯖᯮ ᯥᯖᯥᯖᯉ ᯐᯞ ᯉ ᯔᯒ᯲ᯎᯮᯞᯮ ᯑᯬ ᯅᯅᯪ ᯑᯪ ᯉ ᯒᯬᯖᯄ᯦᯲ᯉ

2 Petrus ᯇᯩᯖ᯲ᯒᯘᯮ᯲ 3[patota | patota mualna]

3:1 On ma surat na paduahon, na husurat tu hamu, angka haholongan, manungguli bontor ni roha di hamu, marhitehite hata sipaingot, ᯀᯉᯬ᯲ ᯔ ᯘᯮᯒᯖ᯲ ᯉ ᯇᯑᯮᯀᯂᯉᯬ᯲ ᯉ ᯂᯮᯘᯮᯒᯖ᯲ ᯖᯮ ᯂᯔᯮ ᯀᯰᯄ᯦ ᯂᯂᯬᯞᯬᯝᯉ᯲ ᯔᯉᯮᯰᯎᯮᯞᯪ ᯅᯉᯬ᯲ᯖᯒᯬ᯲ ᯉᯪ ᯒᯬᯂ ᯑᯪ ᯂᯔᯮ ᯔᯒ᯲ᯂᯪᯖᯩᯂᯪᯖᯩ ᯂᯖ ᯘᯪᯇᯤᯝᯖᯬ᯲

3:2 asa diingot hamu hata angka naung hinatahon ni angka panurirang na badia i, nang patik ni Tuhan jala Sipalua i, na binaritahon ni angka apostelmuna. ᯀᯘ ᯑᯪᯤᯝᯖᯬ᯲ ᯂᯔᯮ ᯂᯖ ᯀᯰᯄ᯦ ᯉᯀᯮᯰ ᯂᯪᯉᯖᯂᯉᯬ᯲ ᯉᯪ ᯀᯰᯄ᯦ ᯇᯉᯮᯒᯪᯒᯰ ᯉ ᯅᯑᯪᯀ ᯤ ᯉᯰ ᯇᯖᯄ᯦ᯪ᯲ ᯉᯪ ᯖᯮᯂᯉ᯲ ᯝᯞ ᯘᯪᯇᯞᯮᯀ ᯤ ᯉ ᯅᯪᯉᯒᯪᯖᯂᯉᯬ᯲ ᯉᯪ ᯀᯰᯄ᯦ ᯀᯇᯘᯬ᯲ᯖᯞᯩ᯲ᯔᯮᯉ

3:3 On ma na rumingkot botoonmuna: Na ro ma di angka ari parpudi angka pangalensem,( parhata insahinsak, na mangoloi angka hisapna sandiri; ᯀᯉᯬ᯲ ᯔ ᯉ ᯒᯮᯔᯰᯪᯄ᯦ᯖᯬ᯲ ᯅᯬᯖᯬᯀᯉᯬ᯲ᯔᯮᯉ. ᯉ ᯒᯬ ᯔ ᯑᯪ ᯀᯰᯄ᯦ ᯀᯒᯪ ᯇᯒ᯲ᯇᯮᯑᯪ ᯀᯰᯄ᯦᯲ ᯇᯝᯞᯉᯩ᯲ᯘᯔᯩ᯲ ᯇᯒ᯲ᯂᯖ᯲ ᯀᯉᯪ᯲ᯘᯄ᯦᯲ᯀᯉᯪ᯲ᯘᯄ᯦᯲ ᯉ ᯔᯝᯬᯞᯬᯤ ᯀᯰᯄ᯦ ᯂᯪᯘᯇ᯲ᯉ ᯘᯉ᯲ᯑᯪᯒᯪ

3:4 angka na mandok: Didia do harorona, na pinarbagabaga i? Ai dung monding angka amanta, hot do saluhutna songon i, sian mula ni hasiangan on! ᯀᯰᯄ᯦ ᯉ ᯔᯉ᯲ᯑᯄ᯦ᯬ᯲ ᯑᯪᯑᯪᯀ ᯑᯬ ᯂᯒᯬᯒᯬᯉ ᯉ ᯇᯪᯉᯒ᯲ᯅᯎᯅᯎ ᯤ ᯀᯤ ᯑᯮᯰ ᯔᯉᯬ᯲ᯑᯰᯪ ᯀᯰᯄ᯦ ᯀᯔᯉ᯲ᯖ ᯂᯖᯬ᯲ ᯑᯬ ᯘᯞᯮᯂᯖᯮ᯲ᯉ ᯘᯬᯝᯉᯬ᯲ ᯤ ᯘᯪᯀᯉ᯲ ᯔᯮᯞ ᯉᯪ ᯂᯘᯪᯀᯝᯉ᯲ ᯀᯉᯬ᯲

3:5 Laho mandok songon i, ndang manganto rohanasida, naung sian aek do langit nang tano, jala marhitehite aek do hajajadina hinorhon ni hata ni Debata. ᯞᯂᯬ ᯔᯉ᯲ᯑᯄ᯦ᯬ᯲ ᯘᯬᯝᯉᯬ᯲ ᯤ ᯉ᯲ᯑᯰ ᯔᯝᯉ᯲ᯖᯬ ᯒᯬᯂᯉᯘᯪᯑ ᯉᯀᯮᯰ ᯘᯪᯀᯉ᯲ ᯀᯀᯄᯩ᯲ ᯑᯬ ᯞᯝᯖᯪ᯲ ᯉᯰ ᯖᯉᯬ ᯐᯞ ᯔᯒ᯲ᯂᯪᯖᯩᯂᯪᯖᯩ ᯀᯀᯄᯩ᯲ ᯑᯬ ᯂᯐᯐᯑᯪᯉ ᯂᯪᯉᯒᯬ᯲ᯂᯉᯬ᯲ ᯉᯪ ᯂᯖ ᯉᯪ ᯑᯩᯅᯖ

3:6 Laos marhitehite aek i do mago uju i tano on, dilantaphon aek i. ᯞᯀᯘᯬ᯲ ᯔᯒ᯲ᯂᯪᯖᯩᯂᯪᯖᯩ ᯀᯀᯄᯩ᯲ ᯤ ᯑᯬ ᯔᯎᯬ ᯥᯐᯮ ᯤ ᯖᯉᯬ ᯀᯉᯬ᯲ ᯑᯪᯞᯉ᯲ᯖᯇ᯲ᯂᯉᯬ᯲ ᯀᯀᯄᯩ᯲ ᯤ

3:7 Jala marhite sian hata i do diramoti Ibana langit dohot tano nuaeng; dipeop do, asa tu api di ari paruhuman jala hamagaon ni jolma angka na jahat. ᯐᯞ ᯔᯒ᯲ᯂᯪᯖᯩ ᯘᯪᯀᯉ᯲ ᯂᯖ ᯤ ᯑᯬ ᯑᯪᯒᯔᯬᯖᯪ ᯤᯅᯉ ᯞᯝᯖᯪ᯲ ᯑᯬᯂᯖᯬ᯲ ᯖᯉᯬ ᯉᯮᯀᯀᯰᯩ ᯑᯪᯇᯩᯀᯇᯬ᯲ ᯑᯬ ᯀᯘ ᯖᯮ ᯀᯇᯪ ᯑᯪ ᯀᯒᯪ ᯇᯒᯮᯂᯮᯔᯉ᯲ ᯐᯞ ᯂᯔᯎᯬᯀᯉ᯲ ᯉᯪ ᯐᯞᯬ᯲ᯔ ᯀᯰᯃ᯦ ᯉ ᯐᯂᯖ᯲

3:8 Alai tangkas ma ingot hamu, angka haholongan: Sada ari do di Tuhan i songon saribu taon, jala saribu taon songon sada ari! ᯀᯞᯤ ᯖᯰᯄ᯦ᯘ᯲ ᯔ ᯤᯝᯖᯬ᯲ ᯂᯔᯮ ᯀᯰᯄ᯦ ᯂᯂᯬᯞᯬᯝᯉ᯲ ᯘᯑ ᯀᯒᯪ ᯑᯬ ᯑᯪ ᯖᯮᯂᯉ᯲ ᯤ ᯘᯬᯝᯉᯬ᯲ ᯘᯒᯪᯅᯮ ᯖᯀᯉᯬ᯲ ᯐᯞ ᯘᯒᯪᯅᯮ ᯖᯀᯉᯬ᯲ ᯘᯬᯝᯉᯬ᯲ ᯘᯑ ᯀᯒᯪ

3:9 Ndang dipagele Tuhan i bagabaga i, songon na nidok ni roha ni na deba; alai lambas do rohana mida hamu, ai dipangido rohana, naeng unang ma nian mago agia ise, naeng ma tahe saluhutna sahat tu hamubaon ni roha. ᯉ᯲ᯑᯰ ᯑᯪᯇᯎᯩᯞᯩ ᯖᯮᯂᯉ᯲ ᯤ ᯅᯎᯅᯎ ᯤ ᯘᯬᯝᯉᯬ᯲ ᯉ ᯉᯪᯑᯄ᯦ᯬ᯲ ᯉᯪ ᯒᯬᯂ ᯉᯪ ᯉ ᯑᯩᯅ ᯀᯞ ᯞᯔ᯲ᯅᯘ᯲ ᯑᯬ ᯒᯬᯂᯉ ᯔᯪᯑ ᯂᯔᯮ ᯀᯤ ᯑᯪᯇᯝᯪᯑᯬ ᯒᯬᯂᯉ ᯉᯀᯰᯩ ᯥᯉᯰ ᯔ ᯉᯪᯀᯉ᯲ ᯔᯎᯬ ᯀᯎᯪᯀ ᯤᯘᯩ ᯉᯀᯰᯩ ᯔ ᯖᯂᯩ ᯘᯞᯮᯂᯖᯮ᯲ᯉ ᯘᯂᯖ᯲ ᯖᯮ ᯂᯔᯮᯅᯀᯉᯬ᯲ ᯉᯪ ᯒᯬᯂ

3:10 Alai na ro ma ari ni Tuhan i, songon panangko; mardorop ma disi langit i, laho sega; masarsar ma sisiasia ni tano on bahenon ni api; songon i nang tano i, ro di sude ulaon na di atasna, masoksok ma. ᯀᯞᯤ ᯉ ᯒᯬ ᯔ ᯀᯒᯪ ᯉᯪ ᯖᯮᯂᯉ᯲ ᯤ ᯘᯬᯝᯉᯬ᯲ ᯇᯉᯰᯄᯬ ᯔᯒ᯲ᯑᯬᯒᯇᯬ᯲ ᯔ ᯑᯪᯘᯪ ᯞᯝᯖᯪ᯲ ᯤ ᯞᯂᯬ ᯘᯩᯎ ᯔᯒ᯲ᯘᯘᯒ᯲ ᯔ ᯘᯪᯘᯪᯀᯘᯪᯀ ᯉᯪ ᯖᯉᯬ ᯀᯉᯬ᯲ ᯅᯂᯩᯉᯉᯬ᯲ ᯉᯪ ᯀᯇᯪ ᯘᯬᯝᯉᯬ᯲ ᯤ ᯉᯰ ᯖᯉᯬ ᯤ ᯒᯬ ᯑᯪ ᯘᯮᯑᯩ ᯥᯞᯀᯉᯬ᯲ ᯉ ᯑᯪ ᯀᯖᯘ᯲ᯉ ᯔᯘᯄ᯦ᯬ᯲ᯘᯄ᯦ᯬ᯲ ᯔ

3:11 Antong, anggo masarsar do hape saluhutna on, nda lam sumurung ma parange na badia dohot hadaulaton ᯀᯉ᯲ᯖᯰᯬ ᯀᯰᯎᯬ ᯔᯘᯒ᯲ᯘᯒ᯲ ᯑᯬ ᯂᯇᯩ ᯘᯞᯮᯂᯖᯮ᯲ᯉ ᯀᯉᯬ᯲ ᯉ᯲ᯑ ᯞᯔ᯲ ᯘᯮᯔᯮᯒᯮᯰ ᯔ ᯇᯒᯝᯩ ᯉ ᯅᯑᯪᯀ ᯑᯬᯂᯖᯬ᯲ ᯂᯑᯥᯞᯖᯉᯬ᯲

3:12 ni angka na paimaimahon jala mangkasiholi haroro ni ari ni Debata, di na masarsar langit i disoksohi, jala malala tartutung do angka sisiasiana! ᯉᯪ ᯀᯰᯄ᯦ ᯉ ᯇᯤᯔᯤᯔᯂᯉᯬ᯲ ᯐᯞ ᯔᯰᯄ᯦ᯘᯪᯂᯬᯞᯪ ᯂᯒᯬᯒᯬ ᯉᯪ ᯀᯒᯪ ᯉᯪ ᯑᯩᯅᯖ ᯑᯪ ᯉ ᯔᯘᯒ᯲ᯘᯒ᯲ ᯞᯝᯖᯪ᯲ ᯤ ᯑᯪᯘᯄ᯦ᯬ᯲ᯘᯬᯂᯪ ᯐᯞ ᯔᯞᯞ ᯖᯒ᯲ᯖᯮᯖᯮᯰ ᯑᯬ ᯀᯰᯄ᯦ ᯘᯪᯘᯪᯀᯘᯪᯀᯉ

3:13 Alai na maimaima do hita di langit na imbaru dohot di tano na imbaru, inganan ni hatigoran i, hombar tu bagabagana. ᯀᯞᯤ ᯉ ᯔᯤᯔᯤᯔ ᯑᯬ ᯂᯪᯖ ᯑᯪ ᯞᯝᯖᯪ᯲ ᯉ ᯀᯔᯪ᯲ᯅᯒᯮ ᯑᯬᯂᯖᯬ᯲ ᯑᯪ ᯖᯉᯬ ᯉ ᯀᯔᯪ᯲ᯅᯒᯮ ᯤᯝᯉᯉ᯲ ᯉᯪ ᯂᯖᯪᯎᯬᯒᯉ᯲ ᯤ ᯂᯔᯬ᯲ᯅᯒ᯲ ᯖᯮ ᯅᯎᯅᯎᯉ

3:14 Dibahen i, hamu angka haholongan, anggo i dipaimaima hamu, ringkoti hamu ma, asa didapot Ibana hamu so martihas, so hasurahan, di bagasan dame! ᯑᯪᯅᯂᯉᯩ᯲ ᯤ ᯂᯔᯮ ᯀᯰᯄ᯦ ᯂᯂᯬᯞᯬᯝᯉ᯲ ᯀᯰᯎᯬ ᯤ ᯑᯪᯇᯤᯔᯤᯔ ᯂᯔᯮ ᯒᯰᯪᯂᯬᯖᯪ ᯂᯔᯮ ᯔ ᯀᯘ ᯑᯪᯑᯇᯖᯬ᯲ ᯤᯅᯉ ᯂᯔᯮ ᯘᯬ ᯔᯒ᯲ᯖᯪᯂᯘ᯲ ᯘᯬ ᯂᯘᯮᯒᯂᯉ᯲ ᯑᯪ ᯅᯎᯘᯉ᯲ ᯑᯔᯩ

3:15 Rajumi hamu ma lambas ni roha ni Tuhanta haluaonmuna, songon naung manurat tu hamu dongan haholonganta, si Paulus i, marguru tu parbinotoan, naung dilehon tu ibana. ᯒᯐᯮᯔᯪ ᯂᯔᯮ ᯔ ᯞᯔ᯲ᯅᯘ᯲ ᯉᯪ ᯒᯬᯂ ᯉᯪ ᯖᯮᯂᯉ᯲ᯖ ᯂᯞᯮᯀᯀᯉᯬ᯲ᯔᯮᯉ ᯘᯬᯝᯉᯬ᯲ ᯉᯀᯮᯰ ᯔᯉᯮᯒᯖ᯲ ᯖᯮ ᯂᯔᯮ ᯑᯬᯝᯉ᯲ ᯂᯂᯬᯞᯬᯝᯉ᯲ᯖ ᯘᯪ ᯇᯥᯞᯘᯮ᯲ ᯤ ᯔᯒ᯲ᯎᯮᯒᯮ ᯖᯮ ᯇᯒ᯲ᯅᯪᯉᯬᯖᯬᯀᯉ᯲ ᯉᯀᯮᯰ ᯑᯪᯞᯩᯂᯉᯬ᯲ ᯖᯮ ᯤᯅᯉ

3:16 Songon i di saluhut angka suratna, i dipatorang; adong do deba disi na maol antusan, i ma dipalipe angka na so marroha jala na so togu rohana, nang di surat na asing pe, bahen hamagoannasida sandiri. ᯘᯬᯝᯉᯬ᯲ ᯤ ᯘᯞᯮᯂᯖᯮ᯲ ᯀᯰᯄ᯦ ᯘᯮᯒᯖ᯲ᯉ ᯤ ᯑᯪᯇᯖᯬᯒᯰ ᯀᯑᯰᯬ ᯑᯬ ᯑᯩᯅ ᯑᯪᯘᯪ ᯉ ᯔᯀᯞᯬ᯲ ᯀᯉ᯲ᯖᯮᯘᯉ᯲ ᯤ ᯔ ᯑᯪᯇᯞᯪᯇᯩ ᯀᯰᯄ᯦ ᯉ ᯘᯬ ᯔᯒ᯲ᯒᯬᯂ ᯐᯞ ᯉ ᯘᯬ ᯖᯬᯎᯮ ᯒᯬᯂᯉ ᯉᯰ ᯑᯪ ᯘᯮᯒᯖ᯲ ᯉ ᯀᯘᯰᯪ ᯇᯩ ᯅᯂᯉᯩ᯲ ᯂᯔᯎᯬᯀᯉ᯲ᯉᯘᯪᯑ ᯘᯉ᯲ᯑᯪᯒᯪ

3:17 Antong, hamu angka haholongan, ala naung diboto hamu i hian, jaga ma, unang tarela hamu, dibahen haliluon ni angka na so maruhum i, gabe madabu hamu maon sian haojahanmuna. ᯀᯉ᯲ᯖᯰᯬ ᯂᯔᯮ ᯀᯰᯄ᯦ ᯂᯂᯬᯞᯬᯝᯉ᯲ ᯀᯞ ᯉᯀᯮᯰ ᯑᯪᯅᯬᯖᯬ ᯂᯔᯮ ᯂᯪᯀᯉ᯲ ᯐᯎ ᯔ ᯥᯉᯰ ᯖᯒᯩᯞ ᯂᯔᯮ ᯑᯪᯅᯂᯉᯩ᯲ ᯂᯞᯪᯞᯮᯀᯉᯬ᯲ ᯉᯪ ᯀᯰᯄ᯦ ᯉ ᯘᯬ ᯔᯒᯮᯂᯔᯮ᯲ ᯤ ᯎᯅᯩ ᯔᯑᯅᯮ ᯂᯔᯮ ᯔᯀᯉᯬ᯲ ᯘᯪᯀᯉ᯲ ᯂᯀᯬᯐᯂᯉ᯲ᯔᯮᯉ

3:18 Alai lam ganda ma di hamu asi ni roha dohot panandaon di Tuhanta Jesus Kristus, Sipalua i! Di Ibana ma hasangapon, nang nuaeng, nang ro di salelenglelengna! ᯀᯞᯤ ᯞᯔ᯲ ᯎᯉ᯲ᯑ ᯔ ᯑᯪ ᯂᯔᯮ ᯀᯘᯪ ᯉᯪ ᯒᯬᯂ ᯑᯬᯂᯖᯬ᯲ ᯇᯉᯉ᯲ᯑᯀᯉᯬ᯲ ᯑᯪ ᯖᯮᯂᯉ᯲ᯖ ᯐᯩᯘᯘᯮ᯲ ᯄ᯦᯲ᯒᯘᯪ᯲ᯖᯘᯮ᯲ ᯘᯪᯇᯞᯮᯀ ᯤ ᯑᯪ ᯤᯅᯉ ᯔ ᯂᯘᯝᯇᯉᯬ᯲ ᯉᯰ ᯉᯮᯀᯀᯰᯩ ᯉᯰ ᯒᯬ ᯑᯪ ᯘᯞᯩᯞᯰᯩᯞᯩᯞᯰᯩᯉ