Buku 2 Raja-Raja

2 Raja-raja ᯒᯐᯒᯐ 1

1:1 Jadi dung mate si Ahab, marbalik ma halak Moab sian Israel. ᯐᯑᯪ ᯑᯮᯰ ᯔᯖᯩ ᯘᯪ ᯀᯂᯅ᯲ ᯔᯖ᯲ᯅᯞᯄ᯦ᯪ᯲ ᯔ ᯂᯞᯄ᯦᯲ ᯔᯬᯀᯅ᯲ ᯘᯪᯀᯉ᯲ ᯀᯘᯪ᯲ᯒᯀᯞᯩ᯲

1:2 Dung i madabu ma si Ahasia sian pandiloan ni bilutna parginjang di Samaria, pola hansit. Dung i disuru ma suruanna, ninna ma tu nasida: Laho ma hamu manungkunhon tu Baal Zebub, ajiajian di Ekron, manang na leak malum hilalaonku sian sahithon.

1:3 Alai nunga marboaboa hian suruan ni Jahowa tu si Elia, halak Tisbi: Borhat ma ho mangambat angka suruan ni raja sian Samaria, jala dok ma tu nasida: Tung na so adong be huroha Debata di Israel, umbahen laho hamu manungkunhon tu Baal Zebub, debata di Ekron?

1:4 Dibahen i songon on do hata ni Jahowa: Ndang jadi be ho morot sian podoman hapeahanmu nuaeng, ingkon mate na ma ho. Dung i laho ma si Elia.

1:5 Jadi dung mulak angka suruani tu rajai, ninna ibana ma tu nasida: Boasa tung mulak hamu?

1:6 Dung i didok nasida ma tu ibana: Ro do sahalak nangkok mangambat hami, didok ma tu hami: Laho ma hamu mulak tu raja, na marsuru hamu, dok hamu ma tu ibana: Songon on do hata ni Jahowa: Tung na so adong be huroha Debata di halak Israel umbahen marsuru ho manungkunhon tu Baal Zebub, debata di Ekron? Dibahen i ndang jadi be ho morot sian podomanmon, ingkon mate na ma ho!

1:7 Dung i didok rajai ma tu nasida: Songon dia do rupa ni baoa i na ro nangkok mangambat hamu dohot paboahon angka hata i tu hamu?

1:8 Jadi ninna nasida ma tu rajai: Baoa na marsampesampe na marimbulu do ibana, jala hohos sian hulingkuling di gontingna. Dung i ninna rajai ma: Si Elia, halak Tisbi do i.

1:9 Dung i disuru rajai ma tu ibana sada partogi ni parangan manguluhon limapulu paranganna. Jadi dung nangkok ibana sahat tu lambungna, ida ma, tongon juguk ibana di punsu ni dolok i, gabe didok ma tu ibana: Ho ale halak ni Debata, didok rajai ingkon tuat ho!

1:10 Dung i ro ma alus ni si Elia mandok tu partogi ni parangan silimapulu halak i: Molo tutu halak ni Debata ahu, ingkon madabu ma api sian banua ginjang jala suda panganonna ho dohot paranganmu silimapulu halak i! Jadi madabu ma api sian banua ginjang, jala suda ibana dipangan dohot paranganna silimapulu i.

1:11 Dung i diulahi rajai marsuru tu ibana sada partogi na asing rap dohot paranganna na limapulu i, didok ma tu ibana: Ho ale halak ni Debata, songon on do hata ni rajai: Ingkon gira ho tuat!

1:12 Dung i ro ma alus ni si Elia mandok tu nasida: Molo halak ni Debata ahu, ingkon madabu ma api sian banua ginjang jala suda panganonna ho dohot paranganmu silimapulu i. Jadi madabu ma api ni Debata sian banua ginjang, jala suda ibana dipangan dohot paranganna na limapulu i.

1:13 Dung i diulahi rajai marsuru sada partogi patoluhalihon rap dohot paranganna limapulu halak. Jadi dung sahat tu ginjang partogi patoluhon i, marsinggang ma ibana di jolo ni si Elia huhut marsomba tu ibana, ninna ma mandok ibana: Ale halak ni Debata, sai diparhamaol roham ma hosangkon dohot hosa ni angka naposongkon na limapulu halak i!

1:14 Ida ma, nunga madabu api sian banua ginjang, jala nunga suda dipangan na dua partogi parjolo i rap dohot paranganna na limapulu halak i, alai sai mararga ma anggo hosangkon di roham.

1:15 Dung i ro ma hata ni suruan ni Jahowa tu si Elia: Tuat ma ho rap dohot ibana, unang pola mabiar ho mida ibana. Dung i borhat ma ibana jala tuat rap dohot partogi i mandapothon rajai.

1:16 Dung i ninna si Elia ma mandok rajai: Songon on do hata ni Jahowa: Ala naung marsuru suruan ho manungkunhon tu Baal Zebub, debata di Ekron, hira na so adong be huroha Debata di Israel na dapot sungkunon hatana, dibahen i ndang jadi be morot ho sian podomanmon, ingkon mate na ma ho.

1:17 Jadi mate ma rajai, hombar tu hata ni Jahowa, naung nilumbahon ni si Elia hian; jadi bangkit raja ma anggina si Joram singkatna paduataonhon dung raja di Juda si Joram, anak ni si Josapat, ai ndang adong anakna.

1:18 Jamita na tinggal i dope sian si Ahasia dohot na binahenna, nda tarsurat do i di bagasan buku jamita ni angka raja sian Israel?

2 Raja-raja 2

2:1 Dung i uju naeng alapon ni Jahowa si Elia tu banua ginjang marhite sian habahaba, mardalan ma si Elia rap dohot si Elia sian Gilgal. ᯑᯮᯊ᯲ᯎ᯲ ᯤ ᯥᯐᯮ ᯊᯤᯊ᯲ᯎ᯲ ᯀᯞᯇᯬᯊ᯲ ᯊᯪ ᯐᯄᯬwᯀ ᯚᯪ ᯤᯞᯪᯀ ᯖᯮ ᯅᯊᯮᯀ ᯎᯪᯊ᯲ᯐᯊ᯲ᯎ᯲ ᯔᯒ᯲ᯄᯪᯖᯩ ᯚᯪᯀᯊ᯲ ᯄᯅᯄᯅ, ᯔᯒ᯲ᯑᯞᯊ᯲ ᯔ ᯚᯪ ᯤᯞᯪᯀ ᯒᯇ᯲ ᯑᯬᯄᯬᯖ᯲ ᯚᯪ ᯤᯞᯪᯀ ᯚᯪᯀᯊ᯲ ᯎᯪᯞ᯲ᯎᯞ᯲

2:2 Dung i didok si Elia ma mandok si Elisa: Ua tinggal dison ma ho, ai nunga disuru Jahowa ahu laho tu Betel. Alai ninna si Elisa ma: Songon sintongna mangolu Jahowa, mangolu dohot hosam, na so tupa tadingkononku ho! Jadi rap tuat ma nasida tu Betel.

2:3 Dung i ruar ma sisean ni panurirang, angka na di Betel, mandapothon si Elisa, didok nasida ma tu ibana: Atehe diboto ho do na naeng boanon ni Jahowa tuanmu sadarion sian lambungmu? Dung i ninna ibana ma: Ahu pe nunga huboto, sip ma hamu!

2:4 Dung i ninna si Elia muse tu ibana: Ua tinggal dison ma ho, ale Elisa, ai nunga disuru Jahowa ahu tu Jeriko. Alai ninna si Elisa ma: Songon sintongna mangolu Jahowa, mangolu dohot hosam, na so tupa tadingkononku ho! Jadi rap sahat ma nasida tu Jeriko.

2:5 Dung i ro ma sisean ni panurirang, angka na di Jeriko mandapothon si Elisa, ninna nasida ma tu ibana: Atehe diboto ho do na naeng boanon ni Jahowa tuanmu sadarion sian lambungmu? Dung i ninna ibana ma: Ahu pe nunga huboto, sip ma hamu!

2:6 Dung i ninna si Elia muse tu ibana: Ua tinggal dison ma ho, ai nunga disuru Jahowa ahu tu Jordan. Alai ninna si Elisa ma: Songon sintongna mangolu Jahowa, mangolu dohot hosam, na so tupa tadingkononku ho! Jadi rap mardalan ma nasida na dua.

2:7 Alai limapulu halak sian angka sisean ni panurirang mardalani huhut jongjong mandaodao, na dua panurirang i pe jongjong do di topi ni Jordan.

2:8 Dung i dibuat si Elia ma sampesampena, disorpi ma i jala dilibashon tu aek, jadi tolak ma i tu jae tu julu, laos ditaripari nasida na dua ma i mardalan di na mahiang.

2:9 Jadi dung taripar nasida, ninna si Elia ma tu si Elisa: Haru pangido ma sian ahu manang aha lomo ni roham bahenonku tu ho, tagan so ro dope na mangalap ahu sian lambungmu. Dung i ninna si Elisa ma: Ingkon silompit dua nian sian tondim songgop tu ahu!

2:10 Dung i ninna si Elia ma: Na dokdok situtu do nian pinangidomi; alai molo diida ho ahu tarboan sian lambungmu, sai na songgop do songon i tu ho; alai molo so idaonmu, ndang songgop.

2:11 Jadi andorang mardalan dope nasida huhut mangkatai, ida ma, ro ma sada hureta api dohot angka hoda api manirang nasida na dua, manaek tu banua ginjang ma ia si Elia marhite sian habahaba.

2:12 Alai dung diida si Elisa songon i, joujou ma ibana: O damang, damang! Hureta ni Israel dohot angka jolma parsihundulna do ho! Dung i ndang be diida ibana. Laos dibuat ma ulosna jala diribahi bola dua.

2:13 Dung i dijomput ma sampesampe ni si Elia na madekdeki sian ibana, laos mulak ibana, jongjong suang tu topi ni aek Jordan.

2:14 Dung i dibuat ma sampesampe ni si Elia na madekdehi sian ibana jala dilibashon tu aek, ninna ma: Didia do nuaeng Jahowa, Debata ni si Elia, ibana tahe? Jadi dung dilibas ibana aek i tolak ma i tu jae tu julu, laos taripar ma si Elisa.

2:15 Jadi dung diida sisean ni panurirang angka na di Jeriko ibana sian bariba i, ninna nasida ma: Nunga songgop hape tondi ni si Elia tu si Elisa, dung i ro ma nasida manomunomu ibana, laos manungkap tu tano marsomba ibana.

2:16 Dung i ninna nasida ma tu si Elisa: Ida ma, adong do dongan ni angka naposomon limapulu halak angka na bontis, ua tasuru ma angka nasida laho mangalului tuanmu, atek tung diboan Tondi ni Jahowa ibana, jala didekdekkon ibana muse tu atas sada dolok manang tu sada rura. Alai ninna si Elisa ma: Unang suru hamu nasida.

2:17 Alai sai disosoi nasida do ibana maradu maila ibana, laos didok ma: Antong suru hamu tusi. Jadi disuru nasida ma limapulu halak angka na mangalului ibana tolu ari lelengna, alai ndang jumpang nasida ibana.

2:18 Dung i mulak ma nasida tu si Elisa, ai tinggal di Jeriko dope ibana; jadi didok ibana ma tu nasida: Nda nunga hudok hian tu hamu, unang hamu laho?

2:19 Dung i ninna angka baoa isi ni huta i ma tu si Elisa: Ida ma, denggan do nian inganan di huta on, songon na niida ni tuanku; alai na paet, asom do anggo tapian, jala mareme na bibi isi ni tano i dibahen.

2:20 Dung i ninna si Elisa ma: Boan hamu tu ahu sada saoan na imbaru, jala bahen hamu sira tusi. Jadi diboan nasida ma saoan i tu ibana.

2:21 Dung i ruar ma si Elisa manopot mual i, jala diusehon sira i tusi, huhut didok: Songon on do hata ni Jahowa: Nunga denggan tarinum aek on hubahen, ndang jadi be horhononna hamatean manang na mareme na bibi!

2:22 Jadi denggan ma aek i tarinum rasirasa sadarion, hombar tu hata na nidok ni si Elisa.

2:23 Dung i nangkok ma si Elisa sian i laho tu Betel, jadi di dalan laho nangkok tu huta i ibana, ruar ma sian huta i angka dakdanak mangarehe ibana, angka didok ma: Manaek ma ho, ale palpal ulu! Manaek ma ho, ale palpal ulu!

2:24 Dung i humusor ma si Elisa; jadi dung diida nasida, diburai ma nasida marhite sian Goar ni Jahowa. Dung i ruar ma dua gompul sian harangan, disoroi ma sian nasida opatpulu dua halak dakdanak.

2:25 Dung i laho ma ibana sian i tu dolok Karmel, jala mulak sian i tu Samaria.

2 Raja-raja 3

3:1 Ia si Joram, anak ni si Ahab bangkit raja gumomgom Israel di Samaria pasampuluualutaonhon dung raja si Josapat di Juda, jala sampulu dua taon lelengna ibana mangarajai.

3:2 Jala diulahon do sogo ni roha ni Jahowa, alai ndada songon amana dohot inana; ai dipadao do ganaganaan Baal, na pinauli ni amana nahinan.

3:3 Alai atik pe songon i marsilohot do rohana mangihutihut dosa ni si Jerobeam, anak ni si Nebat, na mangela Israel mambahen dosa, ndang sumurut ibana anggo sian i.

3:4 Alai anggo si Mesa, raja sian Moab, halak pardorbia godang do ibana, jala digarar sohe tu raja sian Israel, i ma imbulu ni saratus ribu anak ni birubiru dohot imbulu ni saratus ribu birubiru tunggal.

3:5 Alai dung mate si Ahab, marbalik ma raja ni halak Moab sian raja ni Israel.

3:6 Ala ni ruar ma uju i raja Joram sian Samaria, laho mamilangi sandok halak Israel.

3:7 Dung i disuru rajai ma suruanna manopot si Josapat, raja sian Juda, mandok tu ibana: Nunga marbalik raja ni halak Moab sian ahu; atehe olo do ho haraonku laho marmusu dompak Moab? Dung i ninna ibana ma: Ro pe ahu nangkok, ia songon i ho, songon i do ahu, ia songon i bangsomi, songon i do bangsongki, ia songon i angka hodam, songon i do angka hodangku.

3:8 Dung i ninna si Joram ma: Sian dalan dia do hita nangkok tusi? Sian dalan na di halongonan Edom do, ninna si Josapat.

3:9 Jadi mardalan ma raja sian Israel dohot raja sian Juda dohot raja sian Edom. Jadi dung pitu ari lelengna nasida mangaliat, hurangan aek ma angka parangan i ro di pinahan na mangihut tu nasida.

3:10 Dung i ninna raja sian Israel ma: Iale suang! Nunga dipapungu Jahowa hape na tolu raja on laho pasahathon nasida tu bagasan tangan ni Moab!

3:11 Alai ninna si Josapat ma: Atehe, ndang adong dison panurirang ni Jahowa, asa marsungkun tu Jahowa hita marhite sian ibana? Jadi ro ma alus ni sahalak sian angka naposo ni raja di Israel, ninna ma: Dison do si Elisa, anak ni si Sapat, na mangusehon na jolo aek pamuri tu tangan ni si Elia.

3:12 Dung i ninna si Josapat ma: Sintong do hata ni Jahowa di ibana. Jadi rap tuat ma manopot ibana raja sian Israel dohot si Josapat dohot raja sian Edom.

3:13 Alai ninna si Elisa ma tu raja sian Israel: Aha ma parsaoranku tu ho? Laho ma ho manopot angka panurirang ni amangmu dohot inangmu! Alai ninna raja sian Israel ma tu ibana: Unang songon i! Ai nunga pola dipapungu Jahowa na tolu raja on laho pasahathon nasida tu bagasan tangan ni Moab.

3:14 Dung i ninna si Elisa ma: Songon sintongna mangolu Jahowa Zebaot, jala ahu jongjong marhalado di jolona, aut unang marpanatap ahu mida bohi ni si Josapat, raja sian Juda, ndang tagamon tataponku manang berengonku anggo ho!

3:15 On pe, boan hamu ma tu ahu sada jolma na pande mamiltik hasapi! Jadi andorang mamiltik tali ni hasapi jolma pamiltik i, songgop ma tangan ni Jahowa tu atasna!

3:16 Jadi didok ma: Songon on do hata ni Jahowa: Hali hamu ma di rura on angka bondar marbarisbaris.

3:17 Ai songon on do hata ni Jahowa: Ndang idaonmuna ro alogo manang udan, hape ingkon gok aek rura on, asa minum hamu ro di pinahanmuna dohot angka hodamuna parhuli.

3:18 Jala maotikku dope anggo i di roha ni Jahowa, pasahatonna nang halak Moab tu bagasan tanganmuna i.

3:19 Tunduk do bahenonmuna saluhut huta na gonting dohot saluhut huta angka na pinillit, jala tabaonmuna do saluhut hau angka na marparbue jala polpolonmuna ma saluhut mual jala tarulang ma bahenonmuna sandok hauma angka na dumenggan marhite sian batu.

3:20 Tole manogotna i jumpang tingki pamelehon di pelean sipanganon, ida ma, marroan aek sian dalan laho tu Edom, mangalantap tano i dohot aek.

3:21 Alai dung dibege sandok halak Moab barita i naung nangkok angka rajai laho marporang dompak nasida, santi balatuk ma nasida saluhutna ro di jolma sandangan podang balgana dohot na tumua sian i, jala patutur nasida jongjong di partalpahan.

3:22 Jadi dung dipasogot nasida manogotna i hehe jala binsar mata ni ari marsinondang tu aek i, jadi marrara ma aek i songon mudar, diida halak Moab di jolona.

3:23 Laos didok nasida ma: Mudar do i! Nunga rupa masilengsean angka rajai laos masibunuan sama nasida. On pe, hamu ale halak Moab tahopi hamu ma tabantaban i.

3:24 Hape dung sahat nasida tu parsaroan ni halak Israel, hehe ma halak Israel i jala ditaluhon halak Moab, gabe maporus maradophon nasida; laos disoluk halak Israel ma tanona, jala marragean halak Moab dibahen.

3:25 Dung i dipanepnep nasida ma angka huta i, jala ganup sian nasida mandanggurhon batu sada be tu saluhut hauma tano bosar, gabe gok batu do i, jala dipolpol saluhut mual, jala ditaba saluhut hau angka na marparbue, holan di huta Kir Hareset tinggal angka batu; ro muse angka jolma pangambalang mangkaliangi huta jala dibunui angka pangisina.

3:26 Alai dung diida raja sian Moab, ndang leak manahan ibana di parporangan i, di arahon ma pitu ratus halak angka parpodang sintak bahen donganna naeng martahop dompak raja sian Edom, hape ndang tolapsa.

3:27 Jadi dibuat ma anak buhabajuna na bangkit raja hian singkatna, jala dipelehon ibana bahen pelean situtungon di atas parik. Jadi parohon parpiarpiar ni muruk godang do i tu Israel, gabe sumurut nasida sian ibana jala mulak be tu tanona.

2 Raja-raja 4

4:1 Dung i ro ma sada parompuan sian angka jolma ni angka sisean ni panurirang mangalualu tu si Elisa, ninna ma: Nunga mate anggo naposom sinondukki, jala diboto ho do na marhabiaran do naposom tu Jahowa. Hape ro nuaeng sahalak parutangan naeng mamboan anakku na dua i bahen naposona.

4:2 Dung i ninna si Elisa ma tu nasida: Aha do sibahenonku tu ho? Paboa di ahu manang aha na pineopmu di bagasan jabum? Dung i ninna nasida ma: Sandok na so adong do dipeop naposom boruboru di bagasan jabuna, nda holan sada guriguri marisi miak.

4:3 Dung i ninna si Elisa ma: Laho ma ho tu balian manginjam hudon angka na rumar sian hombar bagasmu, jala unang maotikku.

4:4 Dung i masuk ma ho tu jabum rap dohot anakmu jala hinsu i pintu i sian pudimuna jala usehon ma miak i tu bagasan saluhut angka hudon on, ia dung gok sadasada bahen tu lambung.

4:5 Dung i laho ma parompuan i sian lambungna, jala dihinsu pintu i sian pudina dohot sian pudi ni anakna na dua i, angka na manarehon hudon i tu ibana sadasada, jadi parompuan i ma mangusehon.

4:6 Jadi dung gok angka hudon i, ninna ma mandok anakna: Haru lehon tu ahu hudon i sadanari! Alai ninna anakna i ma mandok inana: Ndang adong be hudon nanggo sada. Jadi montok ma miak i.

4:7 Dung i laho ma parompuan i paboahon hata i tu halak ni Debata. Jadi didok ibana ma: Laho ma ho, gadisi ma miak i jala garar utangmi; na lobi i ma bahen hangoluanmu dohot hangoluan ni angka anakmu.

4:8 Dung i di na sada ari laho ma si Elisa taripar tu huta Sunem; adong ma disi sada parompuan na mora na mangarahon ibana mangan sagusagu. Manang piga hali dibolus ibana huta i, sai tuli do ibana tu parompuan i laho mangan sagusagu.

4:9 Dung i ro ma hata ni parompuan i tu sinondukna: Ida ma, nunga tangkas hutanda halak ni Debata na badia do ibana na tongtong tuli tu hita.

4:10 Ua itabahen ma di ibana sada bilut na metmet di ginjang mardorpi papan, tapamasuk huhut tusi sada podoman dohot sada hundulan dohot sada palito, asa ia tuli ibana sian hita maringan tusi ibana.

4:11 Dung i di na sadari ro muse ibana tusi, laos maringan tu bilut parginjang i jala modom disi.

4:12 Dung i didok ma mandok si Gehasi naposona i: Jou ma ne parompuan sian Sunem i. Jadi dung dijou jongjong ma nasida di adopanna.

4:13 Nunga adong hian hata ni si Elisa tu naposona: Ua paboa ma tu nasida, ida ma, nunga na sai godang denggan ni uhummu pasarisari hami, aha do ulaning tarbahen ahu balos ni tu ho? Adong do hata siondihononhon di ho tu rajai manang tu partogi ni angka parangan? Jadi ninna nasida ma: Maringan di tongatonga ni bangsongku do ahu.

4:14 Dung i ninna ibana ma: Antong aha do tama bahenon tu nasida? Jadi ninna si Gehasi ma: Ndang adong anakna, jala nunga matua ia sinondukna.

4:15 Jadi ninna si Elisa ma: Haru jou ma nasida! Jadi dung dijou, ro ma nasida jongjong di pintu i.

4:16 Dung i didok si Elisa ma: Suang songon on taon i adong ma anakmu sipahedokhedohonmu. Dung i ninna parompuan i ma: Unang, ale tuan halak ni Debata, unang tutu gabusi naposom boruboru.

4:17 Dung i gabegabean ma parompuan i jala ditubuhon sada anak tongon boho sataon, songon naung nidok ni si Elisa hian tu nasida.

4:18 Alai dung magodang dakdanak i, ruar ma ibana di na sadari mandapothon amana tu panggotilan.

4:19 Dung i didok ma mandok amana i: Ulungku, ulungku hansitnai! Dung i didok amana i ma tu sahalak naposo: Boan ma ibana tu inana.

4:20 Jadi diompa ma ibana mamboan tu inana, jadi hundul ma dakdanak i di ampuanna sahat ro di hos ni ari, laos mate ibana.

4:21 Dung i manaek ma parompuan i tu ginjang, diampehon ma anakna i tu podoman ni halak ni Debata, laos dihinsu pintu i sian pudina laho tu ruar.

4:22 Dung i dijou ma sinondukna, ninna ma: Ua suru tu ahu sahalak sian angka naposo i angkup ni sada halode boruboru naeng hatop ahu laho manopot halak ni Debata, dung i mulak ahu.

4:23 Dung i ninna sinondukna i ma: Boasa naeng laho ho sadarion manopot ibana, so manang poltak ni bulan manang ari Sabbat sadarion? Alai ninna nasida ma: Pasonang ma roham disi!

4:24 Dung i dipalanoi nasida ma halode boruboru i huhut didok mandok naposona i: Haru hudus ma mardalan, unang sulonsulonon ahu marsihundul, nda ahu mandok tu ho.

4:25 Jadi mardalan ma nasida jala sahat tu halak ni Debata di atas dolok Karmel. Jadi dung ditatap halak ni Debata nasida ro mandapothon ibana, ninna ma tu si Gehasi naposona i: Ida ma ndian, nunga ro parompuan sian Sunem!

4:26 On pe, ua marlojong ma ho manjumpangkon nasida, jala dok ma tu nasida: Atehe sonang do ho? Sonang dohot sinondukmu? Sonang dohot anakmi? Jadi ninna nasida ma: Sonang do!

4:27 Alai dung sahat nasida tu halak ni Debata di atas dolok i, dihaol ma patna; alai ro ma si Gehasi jumonok naeng onjaronna nasida. Alai ninna halak ni Debata ma: Pasombu ma nasida, ai na marsak situtu do rohana jala diporso Jahowa do i sian ahu, ndang marboaboa Ibana tu ahu.

4:28 Dung i ninna parompuan i ma: Atehe, nandigan dung hupangido sada anak sian tuanku? Nda hudok hian do: Unang ahu paotooto?

4:29 Dung i ninna si Elisa ma tu si Gehasi: Hohos i ma gontingmu jala tiop ma tungkothu di bagasan tanganmu, laho ma ho tusi! Molo tung pajumpang ho dohot halak unang tabe ibana, jala molo ditabi halak ho, unang alusi ibana, jala ampehon ma tungkothu tu atas bohi ni dakdanak i.

4:30 Alai ninna ina ni dakdanak i ma: Songon sintongna mangolu Jahowa, mangolu dohot hosam, ndang tagamon tadingkononku ho Jadi borhat ma si Elisa mangihuthon nasida.

4:31 Alai di joloan i si Gehasi ma nasida na dua mardalan, jala diampehon tungkot i tu atas bohi ni dakdanak i; alai ndang adong soara manang pananginangion. Dung i mulak ma ibana manjumpangkon si Elisa jala dipaboa tu ibana, ninna ma: Ndang olo ngot dakdanak i.

4:32 Jadi dung masuk si Elisa tu jabu i, ida ma, peak do dakdanak i mate di atas podomanna.

4:33 Dung i masuk ma ibana jala dihinsu pintu i sian pudi ni nasida na dua, dung i martangiang ma ibana tu Jahowa.

4:34 Dung i manaek ma si Elisa jala dipabustang ibana tu atas ni dakdanak i, diampehon pamanganna tu atas pamangan ni dakdanak i, matana tu atas matana, jala tanganna tu atas tanganna, jala manungkap songon i tu atasna, asa diangor bangke ni dakdanak i.

4:35 Dung i hehe ibana muse huhut mardalandalan di jabu i mulakulak, dung i manaek ibana muse jala dipatungkap ibana tu atasna. Jadi barsibarsion ma dakdanak i pola pitu hali, dung i dipabidok ma matana.

4:36 Dung i dijou si Elisa ma si Gehasi, ninna ma: Haru jou ma ne parompuan sian Sunem i. Jadi dung dijou ro ma nasida manopot ibana, gabe didok si Elisa ma: Na, buat ma anakmon!

4:37 Jadi ro ma nasida manungkap tu patna marsomba pola dais tu tano; dung i dibuat ma anakna laos ruar.

4:38 Dung i mulak ma si Elisa muse tu Gilgal; alai tongon masa haleon potir di luat i, jala hundulhundul angka sisean ni panurirang di adopanna. Dung i ninna ibana ma tu naposona: Hodohon hudon na bolon i tu api jala lomuk ingkau di angka sisean ni panurirang.

4:39 Dung i ruar ma sahalak tu ladang naeng mansalong ingkau rata, gabe jumpangsa ma andor ni ansimun harangan, jala diputikkon sian i angka ansimun harangan gok ulosna; jadi dung mulak ibana diirisi ma i tu bagasan hudon pangalomuhan, ai ndang ditanda nasida na so sipanganon do i.

4:40 Dung i disonduhi nasida ma i panganon ni angka baoa i; jadi dung dipangan nasida sian ingkau na nilomuk i, mangangguhi ma nasida, ninna ma: Hamatean do hape di bagasan hudon on, ale halak ni Debata! Laos so tarpangan nasida do i.

4:41 Alai ninna si Elisa ma: Boan tuson itak! Jadi disirsirhon ma i tu bagasan hudon i laos ninna ma: Usehon ma i nuaeng di situan na toropon, asa mangan nasida. Jadi ndang adong be tau parmaraan di bagasan hudon i.

4:42 Dung i ro ma sada halak sian Baal-Salisa na mamboan di halak ni Debata angka sagusagu patumonaan duapulu sagusagu sian eme siansimun dohot itak sian dahanon na binolgang di bagasan hadanghadanganna. Dung i ninna si Elisa ma: Lehon ma i di situan na torop i asa mangan nasida.

4:43 Dung i ninna naposona i ma: Beha ma pangalehonku mangganupi saratus halak? Alai ninna si Elisa ma: Sai lehon ma i di situan na torop i, asa mangan nasida; ai songon on do hata ni Jahowa: Ingkon mangan angka jolma i jala ingkon adong dope teba.

4:44 Dung i diparade ma i di jolonasida, gabe mangan nasida, jala adong dope teba, hombar tu hata ni Jahowa.

2 Raja-raja 5

5:1 Ia si Naaman, partogi ni parangan ni raja sian Ram, jolma na sangap do ibana di adopan ni tuanna jala marmulia situtu; ai marhite sian ibana ditumpakkon Jahowa hamonangan tu halak Ram, jala ulubalang na tarbarita do ibana, alai puruon.

5:2 Dung i borhat sahali halak Ram marrongkanrongkan marbajoi gabe diboan nasida ma sian tano Israel sada boruboru na metmet, dibahen ma i gabe sisuruon ni jolma ni si Naaman.

5:3 Dung i ro ma hatana tu soranganna: Aut ni di adopan ni panurirang na di Samaria tuanki, sai na paluaonna do ibana sian puruna i.

5:4 Dung i ro ma si Naaman pabotohon barita i tu tuanna, ninna ma: Songon on, songon on hata ni boruboru na sian tano Israel i.

5:5 Jadi ninna raja sian Ram ma: Antong borhat ma ho, hutongos pe sada surat tu raja sian Israel. Dung i borhat ma ibana diboan huhut sampulu talenta perak dohot onom ribu sekkel sere dohot sampulu salinan pangkean na marhadohoan.

5:6 Dung i dipasahat ma surat i tu raja sian Israel, songon on do hatana: Molo sahat suraton tu ho, ida ma, naung husuru do manopot ho naposongku si Naaman, asa paluaonmu ibana sian puruna.

5:7 Jadi dung dijaha raja sian Israel surat i, diribahi ma pangkeanna huhut didok: Tung Debata ma ahu, tarbahen ahu mambunu dohot pangoluhon jolma, umbahen marsuru rajai tu ahu paluahon baoa i sian puruna? Dibahen i ua tanda jala ida hamu ma, na masisindir do ibana tu ahu.

5:8 Alai dung dibege si Elisa, halak ni Debata, naung diribahi raja sian Israel pangkeanna, disuru ma suruanna tu rajai mandok tu ibana: Boasa tung pola ribahanmu pangkeanmu? Ua ro nian ibana tu ahu, asa tung diboto, na adong do sada panurirang di Israel.

5:9 Jadi ro ma si Naaman mardongan hodana dohot huretana, laos mangulon di jolo pintu ni jabu ni si Elisa.

5:10 Dung i disuru si Elisa ma suruanna mandok tu ibana: Laho ma ho maridi pitu hali di bagasan Jordan, gabe sumuang ma sibukmu hian tu ho, jala ias.

5:11 Jadi tarrimas situtu ma si Naaman mangaruntus mardalan huhut didok: Ida ma, na hurimpu do ruar ibana mandapothon ahu jala jongjong huhut manjoujou Goar ni Jahowa, Debatana, huhut jamahononna tanganna tu sahit i laho paluahon ahu sian puru i.

5:12 Nda dumenggan do sunge Abana dohot Parpar, angka na di Damaskus sian saluhut aek di Israel? Ndang tarbahen ahu huroha maridi disi asa malum hilalaonku? Jadi marsiulak ma ibana mangaruntus mardalan piripirion situtu.

5:13 Dung i ro ma jumonok angka naposona, didok ma mandok ibana: Ale amang, tung sura hata na dokdok didokkon panurirang i patupaonmu, nda patupaonmu do i? Lam nuaeng ma dung didok tu ho: Maridi ma ho, asa ias!

5:14 Jadi tuat ma ibana jala mangungkor di bagasan Jordan pitu hali, hombar tu hata ni halak ni Debata, jadi sumuang ma sibukna, songon sibuk ni sada dakdanak, gabe ias ma.

5:15 Dung i mulak ma ibana tu halak ni Debata, ibana rap dohot sandok paranganna, dung sahat, jongjong ma ibana di adopanna, ninna ma: Ida ma, nuaeng pe asa huboto na so adong Debata di sandok tano on, dungkon ni di Israel. On pe, ua jalo ma sada silehonlehon sian naposomon.

5:16 Alai ninna si Elisa ma: Songon sintongna mangolu Jahowa jala ahu jongjong marhalado di jolona, na so tupa jaloonku anggo i. Dung i sai disosoi nian ibana, asa jaloonna, alai sai manjua do ibana.

5:17 Dung i ninna si Naaman ma: Molo so jadi hape, ua laos ma lehonon tu naposomon tano sorat dua hoda na marsahe mangusung! Ai ndang olo be naposomon mamelehon pelean situtungon manang sipotongon tu angka debata sileban, nda holan tu Jahowa.

5:18 Holan taringot tu hata on, sai marpamuati ma roha ni Jahowa mida naposomon: Molo masuk tuanku tu bagasan joro ni Rimmon laho marsomba tusi jala martungkolhon botohonku ibana laos marsinggang dohot ahu di bagasan joro ni Rimmon, sai marpamuati ma roha ni Jahowa mida naposomon taringot tu na marsinggang i ahu.

5:19 Dung i ninna si Elisa ma tu ibana: Laho ma ho mardamedame. Jadi dung mardalan ibana sian lambungna arga sapaal daona.

5:20 Ninna roha ni si Gehasi, naposo ni si Elisa, halak ni Debatai ma: Ida ma, nunga diolani tuanku si Naaman halak Ram i, ndang adong dijalo sian tanganna manang aha naung binoanna i nian; songon sintongna mangolu Jahowa hueaki na ma ibana, asa hujalo sian ibana manang aha.

5:21 Jadi dieahi si Gehasi i ma si Naaman; jadi dung diida si Naaman, ibana do hape na nieahanna, manimbung ma ibana sian huretana manjumpangkon ibana huhut didok: Beha sonang do?

5:22 Jadi ninna ibana ma mangajuk: Sonang do! Na disuru tuanku do ahu mandok tu ho: Ida ma, apala ipe ro mangalualu tu ahu dua dolidoli sian angka sisean ni panurirang, sian dolok Epraim, ua lehon ma tu nasida sapikkul perak dohot dua salin pangkean na marhadohoan.

5:23 Dung i ninna si Naaman ma: Molo lomo roham, jalo ma dua talenta; pola disosoi ibana jala ditimpus dua talenta perak di bagasan dua puro dohot dua salin pangkean na marhadohoan, jala dipasahat tu naposona dua halak, asa diusung di jolona.

5:24 Jadi dung sahat si Gehasi tu robean ni dolok i, dibuat ma barang i sian tangannasida jala dipajop di bagasan sada jabu, dipamuli ma anggo angka baoa i, gabe laho ma nasida.

5:25 Dung i ro ibana muse laos jongjong di adopan ni tuanna. Jadi ninna si Elisa ma mandok ibana: Sian dia do ho, ale Gehasi? Jadi ninna ibana ma: Ndang manang sian dia naposomon mardalan.

5:26 Alai ninna si Elisa ma mandok ibana: Nda mardalani rohangku rap dohot ho uju mijur baoa i sian huretana mulak manjumpangkon ho? Tung tingki panjaloan perak do i huroha di roham, manang manjalo pangkean manang hau jetun dohot porlak anggur, manang birubiru dohot lombu, manang naposo baoa dohot boruboru?

5:27 Dibahen i anggo puru ni si Naaman, ingkon lohot di ho ma ro di pinomparmu salelenglelengna. Dung i ruar ma si Gehasi sian adopanna, pintor mamontar ma puru i songon hapur.

2 Raja-raja 6

6:1 Dung i ro ma hata ni angka sisean ni panurirang mandok tu si Elisa: Ua ida ma, ianggo inganan hundulannami di adopanmi, nunga masompithu di hami.

6:2 Ua loas ma hami laho tu Jordan manoktok tiang sada be, asa hupauli hami disi sada inganan bahen hundulannami di adopanmu. Dung i ninna ibana ma: Antong laho ma hamu.

6:3 Dung i ro ma hata ni na sahalak: Ua dohot ma tuani mardalan rap dohot angka naposomon. Jadi ninna ibana ma: Dohot pe ahu.

6:4 Jadi mardalan ma ibana rap dohot nasida. Jadi dung sahat nasida tu Jordan, ditoktok nasida ma angka hau.

6:5 Jadi uju manaba hau na bolon na sahalak pinsir ma mata ni tangke tu aek, gabe mangangguhi ibana ninna ma: Iale tuan niinjam do i!

6:6 Alai ninna halak ni Debata ma: Tudia do i madekdek? Jadi dung dipatuduhon hadekdekanna, dihorot ibana ma sada hau jala ditimpalhon tusi, gabe mumbang bosi i.

6:7 Dung i ninna ma: Jomput ma i di ho! Jadi disurdukkon ma tanganna laho manjomput.

6:8 Dung i marmusu ma raja sian Ram dompak Israel, jadi martuptup ma ibana dohot naposona, ninna ma: Di adui ma bahen hamu parbonjoran ni paranganku.

6:9 Alai disuru halak ni Debata ma suruanna palumba raja sian Israel, ninna ma: Jaga dirim, so tung mamolus ho sian inganan adui, ai nunga marsaro halak Ram disi.

6:10 Dung i disuru raja sian Israel ma suruanna tu inganan na pinaboa ni halak ni Debata tu ibana palumbahonsa, muba do panjagana disi, ndada holan sahali manang dua hali songon i.

6:11 Jadi gunsang ma roha ni raja sian Ram ala ni, dijou ma angka naposona, ninna ma mandok nasida: Ndang rupa olo hamu, pabotohon tu ahu, manang ise sian hita on bali tu raja sian Israel?

6:12 Dung i ro ma hata ni sahalak sian angka naposona mandok: Ndang adong na bali ale rajanami, panurirang Elisa tahe na di Israel, i do pabotohon tu raja sian Israel luhut hata angka na pinaboam di bagasan bilut podomanmu.

6:13 Dung i ninna rajai ma: Antong laho ma hamu diori hamu ma manang didia ibana, asa husuru halak mangalap ibana. Dung i adong ma halak na pabotohon tu rajai: Ida ma, di Dotan do ibana, ninna.

6:14 Dung i dipaborhat rajai ma tusi angka hoda dohot hureta dohot torop parangan. Jadi dung sahat nasida bornginna i, dihaliangi nasida ma huta i.

6:15 Dung i dipasogot parhalado ni halak ni Debata ma hehe manogotna i naeng laho tu balian nian; hape ida ma, torop angka parangan mardongan hoda dohot hureta humaliang huta i. Jadi ninna naposona i ma tu ibana: Iale tuanku, aha nama sibahenonta?

6:16 Jadi ninna ibana ma: Unang ho mabiar, ai na tumorop do na mandongani hita sian na mandongani nasida.

6:17 Dung i martangiang ma si Elisa, ninna ma: Ale Jahowa, sai patonggor ma mata ni naposongkon, asa tangkas marnida! Jadi dipatonggor Jahowa ma mata ni naposo i, gabe marnida; dung i ida ma, dolok i gok angka hoda dohot hureta na songon api humaliang si Elisa.

6:18 Jadi dung tuat nasida mandapothon ibana, martangiang ma si Elisa tu Jahowa, ninna ma: Ua bahen ma mata ni bangso on pangalelaon! Jadi pangalelaon ma matanasida dibahen Jahowa, hombar tu hata ni si Elisa.

6:19 Dung i ninna si Elisa ma tu nasida: Ndada on dalan i, jala ndada on huta i, ihuthon hamu ma ahu, asa hutogihon hamu tu baoa na niluluanmuna i. Jadi ditogihon ma nasida tu huta Samaria.

6:20 Jadi dung sahat nasida tu Samaria, ninna si Elisa ma: Ale Jahowa, pasuang ma parnidaan ni halak on, asa marnida nasida. Jadi dipasuang Jahowa ma parnidaannasida i, asa marnida, hape ida ma, di tongatonga ni Samaria do nasida.

6:21 Jadi dung diida raja sian Israel nasida, ninna ma tu si Elisa: Beha jadi do bunuonku nasida, ale amang?

6:22 Alai ninna ibana ma: Ndang jadi bunuonmu nasida; tung tagamon ma bunuonmu dope halak naung dapot tartangkup marhite sian podangmu dohot siormu? Parade tagonan sagusagu dohot aek tu jolonasida, asa mangan nasida jala minum, asa muli nasida mandapothon tuannasida i.

6:23 Dung i diparade rajai ma di nasida panggalangon bolon, gabe mangan nasida jala minum, dung i dipamuli ma nasida, asa mulak tu tuannasida i. Olat ni ndang adong be ro parbajo sian halak Ram manola tano Israel.

6:24 Dung i di laonlaon ni ari didokkon si Benhadad, raja sian Ram ma santibalatuk sandok paranganna, laos nangkok nasida martungkum Samaria.

6:25 Jadi masa ma haleon potir di Samaria, ai ida ma, sai diendel nasida do huta i, paima mararga sada ulu ni halode ualupulu rupia, jala saparopat solup kacang goreng mararga lima rupia.

6:26 Jadi uju mardalandalan sahali raja sian Israel di atas parik, mangangguhi ma sada parompuan mandok tu rajai: Sai tolongi ma ahu, ale rajanami.

6:27 Dung i ninna rajai ma: Molo so Jahowa manolongi ho, sian dia ma tarbahen ahu manolongi ho? Sian pardegean ulaning, manang sian pangilangan anggur?

6:28 Angkup ni didok rajai ma tu nasida: Aha di ho? Jadi ninna nasida ma: Ro do hata ni parompuan on mandok tu ahu: Lehon anakmi asa itapangan ibana sadarion, marsogot pe panganonta anggo anakku.

6:29 Dibahen i nunga hulompa hami anggo anakku, jala suda hupangan hami; dung i ningku ma marsogotna i tu ibana: Antong lehon ma anakmi, asa itapangan ibana; hape nunga ditabunihon ibana ia anakna.

6:30 Jadi dung dibege rajai hata ni parompuan i, disansani ma pangkeanna, tongon ibana mardalandalan di atas parik. Jadi longang ma halak situan na torop i marnida daging ni rajai marpangkean tangki hapengani.

6:31 Dung i ninna rajai ma: Ingkon songon i bahenon ni Debata tu ahu, jala patambaonna dope songon i, molo so tarpisik sadarion ulu ni si Elisa, anak ni si Sapat.

6:32 Alai hundulhundul di bagasan jabuna do anggo si Elisa, jala angka sintua i hundul di lambungna. Dung i disuru rajai ma sada halak patujolona; alai tagan so sahat dope suruani tu si Elisa, nunga didok ibana hian tu angka sintua i: Atehe ndang diida hamu, nunga pola marsuru suruanna anak ni partodoson mandokkon mamisikkon ulungku? Antong ingot hamu ma, molo ro suruanna i, hinsu hamu ma pintu i, laos onjar hamu ibana marhite sian hinsuhinsu i; nda nunga tarbege soara ni pat ni tuanna sian pudina?

6:33 Uju mangkatai dope ibana dohot nasida, ida ma, nunga ro tuat suruani mandapothon ibana, gabe didok rajai ma; ida ma, marharoroan sian Jahowa do jea on, aha be labana marhaposan tu Jahowa ahu?

2 Raja-raja 7

7:1 Dung i ninna si Elisa ma: Tangihon hamu ma hata ni Jahowa! Songon on do hata ni Jahowa: Marsogot songon on mararga sarupia ma sajual dahanon simetmet, mararga sarupia huhut dua jual dahanon siansimun di harbangan ni Samaria.

7:2 Jadi ro ma alus ni sahalak parsihundul, pangarabinan ni tangan ni rajai, mandok tu halak ni Debata: Ida ma, tung sura pe dibahen Jahowa angka pandiloan di langit i, beha ma pambahenna saut na nidokmi? Dung i ninna si Elisa ma: Ida ma, sanga do i nian anggo idaon ni matam, alai ndang dohot ho manganhon sian i.

7:3 Dung i adong ma opat halak na puruon di lambung bahal ni huta i, masipandohan ma nasida ganup tu donganna: Aha gunana tinggal hita dison paima mate.

7:4 Tung sura pe didok rohanta masuk hita tu bagasan huta, haleon potir do di bagasan huta i, mate do hita nang disi; alai tung sura hita tinggal dison, laos mate do hita; dibahen i beta hita bali tu parbonjoran ni halak Ram Molo dipangolu nasida hita, ba mangolu taho; molo dibunu nasida hita, ba mate hita tusi.

7:5 Tole dung rambon ari hehe ma nasida laho mandapothon parbonjoran ni halak Ram, jadi dung sahat nasida tu partalpahan ni parbonjoran ni halak Ram, ida ma, ndang adong disi nanggo sahalak!

7:6 Ai nunga dipatubegehon Tuhan i tu parbonjoran ni halak Ram pardorom ni torop hureta dohot hoda dohot parangan, gabe masipandohan ma nasida ganup tu donganna: Ida ma, nunga marhara raja sian Israel tu angka raja ni halak Het, dohot tu angka raja ni halak Misir bahen alonta, asa ro nasida mandopang hita.

7:7 Dibahen i borhat ma nasida laos maporus di rambon ni ari, ditadingkon nasida ma angka undungundung nasida dohot hodana dohot halodena ro di sandok parbonjoran i, jala maporus be laho paluahon hosanasida sandiri.

7:8 Jadi dung sahat halak na puruon i tu partalpahan ni parbonjoran i, dimasuhi nasida ma sada undungundung i, laos mangan minum nasida, jala dibuat sian perak, sere dohot angka pangkean, laos laho nasida manabunihonsa; mulak muse nasida masuk tu bagasan undungundung na sadanari, sian i pe dibuat do angka ugasan i, laho muse nasida manabunihonsa.

7:9 Alai masipandohan ma nasida ganup tu donganna: Ndang patut songon i bahenonta, ai ari on do ari barita hatuaon; molo laos sip hita paimaimahon sahat ro di torang ni ari, sala hita maon tardapot. Dibahen i, beta ma hita mamboan barita i tu bagasan bagas ni rajai.

7:10 Jadi dung sahat nasida tu huta i, joujou ma nasida tu sijaga bahal ni huta i, dibaritahon ma tu nasida hata i, ninna ma: Nunga sahat hami tu parbonjoran ni halak Ram, hape ida ma, ndang adong jolma disi nanggo sada, soara ni jolma pe ndang tarbege, asal tartambat boti angka hoda dohot halode dapot hami ro di angka undungundung i, songon na somal.

7:11 Jadi joujou ma angka sijaga bahal mandokkon paboaonna barita i tu bagasan jabu ni rajai.

7:12 Jadi hehe ma rajai bornginna i, jala didok ma tu angka naposona: Pabotohononku ma tu hamu pingkiran na naeng pamasaon ni halak Ram tu hita: Diboto nasida do naung haleon on do hita, alani umbahen ruar nasida sian parbonjoranna i, laho martabuni di ladang, ai ninna rohanasida do: Ia dung ruar nasida sian huta i, itatangkup ma nasida songon i mangolu, asa hita masuk tu bagasan huta i.

7:13 Jadi ro ma alus ni sahalak sian angka naposona i mandok: Ua binuat ma lima hoda, sian hoda angka na tinggal i dope di bagasan huta; ida ma, ai so manang dumenggan nasida sian sandok halak Israel angka na tinggal i dope disi manang sian sandok halak Israel angka naung marragean; antong angka i ma itasuru tusi laho maningkir.

7:14 Jadi dibuat nasida ma dua pasang hoda, laos disuru rajai ma nasida mangeahi parangan ni halak Ram, ninna ma: Laho ma hamu manangkasi!

7:15 Jadi dung dieahi nasida angka parangan i sahat ro di Jordan, ida ma, sandok dalan i gok pangkean dohot ulaula, angka na binolongkon ni halak Ram di na maporus i nasida. Dung i mulak ma angka suruani paboahon barita i tu rajai.

7:16 Jadi ruar ma bangso i ditaban duduk ma parbonjoran ni halak Ram; jadi saut ma sajual dahanon simetmet mararga sarupia, songon i dohot dua jual dahanon siansimun, hombar tu hata ni Jahowa.

7:17 Nunga disuru rajai hian na sahalak parsihundul pangarabinan ni tanganna marjaga di bahal i, hape didegedegei halak ibana di bagasan harbangan pola mate ibana, hombar tu hata ni halak ni Debata, na nilumbahonna hian, uju na tuat rajai mandapothon ibana.

7:18 Jadi masa ma tutu hombar tu hata ni halak ni Debata, na nilumbahonna hian tu rajai: Dua jual dahanon siansimun mararga sarupia, songon i nang sajual dahanon simetmet marsogot songon on di harbangan ni Samaria.

7:19 Uju na nidok ni halak parsihundul i mangalusi halak ni Debata: Ida ma, tung sura pe dibahen Jahowa angka pandiloan di langit i, beha ma pambahenna saut na nidokmi? Alai ninna si Elisa ma: Ida ma, sanga do i nian ianggo idaon ni matam, alai ndang dohot ho manganhon sian i.

7:20 Jadi masa ma songon i tu ibana, didegedegei halak situan na torop i ma ibana di bagasan harbangan pola mate ibana.

2 Raja-raja 8

8:1 Alai nunga mangkatai hian si Elisa tu parompuan, paranak naung pinangoluna i, songon on: Hehe ma ho jala bungkas rap dohot isi ni jabum, jala manginsua ma ho songon halak dagang manang didia, ai nunga didokkon Jahowa ro haleon potir; saut do i ro antong tu tano i, pola pitu taon lelengna.

8:2 Jadi borhat ma parompuan i jala dibahen hombar tu hata ni halak ni Debata, bungkas ma nasida, rap dohot isi ni bagasna, jala maisolat di tano ni halak Palistim pitu taon lelengna.

8:3 Alai dung salpu na pitu taon i, mulak ma parompuan i sian tano ni halak Palistim, laos ruar ma nasida mangalualu tu rajai mangido mulak bagasna dohot haumana.

8:4 Alai tongon rajai mangkatai dohot si Gehasi, naposo ni halak ni Debata na jolo, ninna ma: Pajojor ma tu ahu saluhut ulaon habalgaon, angka na binahen ni si Elisa.

8:5 Alai andorang pajojorhon ibana tu rajai, na pinangoluna i sada halak naung mate, ro ma tongon parompuan, paranak na pinangoluna i mangalualu tu rajai, mangidohon mulak bagasna dohot haumana. Jadi ninna si Gehasi ma: Ale rajanami, on ma parompuan i, jala on do anakna, na pinangolu ni si Elisa.

8:6 Jadi dipamanat rajai ma hata i tu parompuan i, gabe dipajojor nasida ma i tu ibana. Dung i disuru rajai ma sada halak siramoti bagasna dongannasida, ninna ma: Pasuang ma tu nasida saluhut ugasanna hian, angkup ni sandok gogo ni hauma i olat ni ari habubungkasna sian tano on rasirasa nuaeng.

8:7 Dung i sahat ma si Elisa tu Damaskus, tongon marsahit si Benhadad, raja sian Ram didapot, gabe dibaritahon halak tu rajai, songon on: Nunga ro halak ni Debata tu huta on.

8:8 Jadi ninna rajai ma tu si Hasael: Boan ma sada silehonlehon di bagasan tanganmu, jala laho ma ho manjumpangkon halak ni Debata, jala marsungkun tu Jahowa ma ho marhite sian ibana, songon on: Beha leak malum dope sahithon hilalaonku?

8:9 Jadi laho ma si Hasael manjumpangkon ibana, diboan dohot sada silehonlehon di bagasan tanganna sian saluhut ugasan na arga di Damaskus, pola sorat opatpulu unto; jadi dung sahat ibana tu jolo ni si Elisa, ninna ma: Disuru anakmu si Benhadad, raja sian Ram ahu mandapothon ho, mandok tu ho: Beha leak malum dope sahithon hilalaonku?

8:10 Dung i didok si Elisa ma mandok ibana: Laho ma ho, paboa ma tu ibana: Malum do nian hilalaonmu; alai nunga dipapatar Jahowa tu ahu, ingkon mate do ibana.

8:11 Angkup ni sai dinolnol mata ni si Elisa ibana, pola maradu maila ibana, huhut sai tumatangis halak ni Debata.

8:12 Jadi ninna si Hasael ma: Boasa tung tumatangis tuanki? Jadi ninna ibana ma: Ala naung huboto jea sibahenonmu tu halak Israel: Ia hutanasida na gonting i surbuonmu do dohot api, jala dolidoli sian nasida bunuonmu do marhitehite podang, jala posoposonasida ropuhanmu do, jala parompuannasida na marhangoluan lapaonmu do.

8:13 Dung i ninna si Hasael ma: Ise ma pola ahu naposomon, biang nian dohonon, tung bahenonna ma hata na balga sisongon i? Alai ninna si Elisa ma: Nunga dipataridahon Jahowa tu ahu, ho bangkit raja gumomgom Ram.

8:14 Dung i marsantabi ma ibana laho sian lambung ni si Elisa, jala sahat ibana tu tuanna, na mandok tu ibana: Dia do hata ni si Elisa tu ho? Jadi ninna ibana ma: Malum do nian hilalaonmu, ninna mandok ahu.

8:15 Alai tole marsogotna i dibuat si Hasael ma bulusan i, jala disornophon tu bagasan aek laos dihungkuphon tu bohina gabe mate mogap. Jadi si Hasael ma bangkit raja singkatna.

8:16 Palimataonhon dung bangkit raja sian Israel si Joram, anak ni si Ahab (uju si Josapat raja di Juda) bangkit raja di Juda ma si Joram, anak ni si Josapat.

8:17 Marumur tolupulu dua taon ibana di na bangkit raja, jala ualu taon lelengna ibana mangarajai di Jerusalem.

8:18 Jala dalan ni angka raja sian Israel diihutihut, suang songon na binahen ni pinompar ni si Ahab, ai boru ni si Ahab gabe jolmana, jala diulahon do sogo ni roha ni Jahowa.

8:19 Alai ndang olo Jahowa anggo mangago Juda ala si Daud naposona i, songon naung pinarbagana hian tu ibana, lehononna tongtong tu ibana sada palito di tongatonga ni angka anakna.

8:20 Uju di angka arina marbalik huhut halak Edom sian gomgoman Juda, laos dipabangkit sada raja gumomgom, nasida.

8:21 Jadi taripar ma si Joram tu Sair rap dohot saluhut huretana; dung i hehe ma ibana bornginna i mangarampok halak Edom, angka na humaliang ibana, ro di angka induk panahatan ni hureta porang, gabe maporus situan na torop i tu undungundungna be.

8:22 Alai atik pe songon i laos bali do halak Edom sian gomgoman Juda rasirasa sadarion. Bali huhut uju i ia Libna.

8:23 Jamita angka tinggal i dope sian si Joram ro di nasa na niulana, nda tarsurat do i di bagasan buku jamita ni angka raja sian Juda?

8:24 Dung i monding ma si Joram gabe top dohot angka ompuna, jala tartanom di lambung ni angka ompuna di huta ni si Daud; jadi si Ahasia, anakna i bangkit raja singkatna.

8:25 Pasampuluduataonhon dung bangkit raja sian Israel si Joram, anak ni si Ahab, bangkit raja sian Juda ma si Ahasia, anak ni si Joram.

8:26 Marumur duapulu dua taon si Ahasia di na bangkit raja ibana, jala sataon lelengna mangarajai di Jerusalem. Ia goar ni inana, i ma si Atalia, boru ni si Omri, raja sian Israel.

8:27 Dung i sai dalan ni pinompar ni si Ahab do diihutihut ibana, jala diulahon sogo ni roha ni Jahowa, suang songon pinompar ni si Ahab, ai martondong do ibana tu pinompar ni si Ahab.

8:28 Dung i borhat ma ibana rap dohot si Joram, anak ni si Ahab, laho marporang dompak si Hasael, raja sian Ram mardonokkon Ramot di Gilead; alai ditaluhon halak Ram do si Joram i.

8:29 Dung i mulak ma raja Joram tu Jisreel, laho padaonhon bugangna, angka na binahen ni halak Ram di Ramot, uju marporang ibana dompak si Hasael, raja sian Ram. Dung i tuat ma si Ahasia, anak ni si Joram, raja sian Juda, naeng maningkir si Joram, anak ni si Ahab di Jisreel, ai na marsahit do ibana.

2 Raja-raja 9

9:1 Alai dijou panurirang Elisa ma sahalak sian sisean ni panurirang, ninna ma mandok ibana: Hohos i ma gontingmu, jala boan guriguri on na marisi miak di bagasan tanganmu, jala laho ma ho tu Ramot di Gilead.

9:2 Ia dung sahat ho tusi diori ma disi si Jehu, anak ni si Josapat, anak ni si Nimsi. Dung i bongot i ma jabu ingananna i jala dokkon ibana hehe sian tongatonga ni angka donganna, jala togihon ibana tu bilut parbagasan i.

9:3 Dung i buat ma guriguri na marisi miak jala usehon tu uluna, huhut dohononmu: Songon on do hata ni Jahowa: Nunga humiahi ho bahen raja gumomgom Israel. Dung i ungkap ma pintu i laos maporus ma ho, na so tupa sulonsulonon.

9:4 Dung i mardalan ma dolidoli i, sisean ni panurirang i, sahat tu Ramot di Gilead.

9:5 Jadi dung sahat ibana tusi, ida ma hundulhundul disi angka partogi ni parangan didapot, laos ninna ma: Adong do hata sidohononku tu ho, ale partogi! Dung i ninna si Jehu ma: Tu ise sian hami on sudena? Dung i ninna ibana ma: Tu ho, ale partogi!

9:6 Jadi hehe ma ibana jala masuk tu bagasan jabu i; dung i diusehon naposo i ma miahi tu uluna, huhut didok mandok ibana: Songon on do hata ni Jahowa, Debata ni Israel: Nunga Ahu pabangkit ho bahen raja gumomgom bangso ni Jahowa, i ma Israel.

9:7 Ingkon ripur bahenonmu pinompar ni si Ahab, tuanmu, asa hutubolhon mudar ni angka naposongku, angka panurirang i dohot mudar ni saluhut naposo ni Jahowa tu si Izebel.

9:8 Asa tung ripur sandok pinompar ni si Ahab; ripashononku ma sian si Ahab nasa baoa na bajar dohot na tang.

9:9 Tung ripur do bahenonku pinompar ni si Ahab, suang songon pinompar ni si Jerobeam, anak ni si Nebat dohot songon pinompar ni si Baesa, anak ni si Ahia.

9:10 Jala si Izebel ingkon suda panganon ni biang di ladang tu Jisreel, jala ndang jadi tanomon ni manang ise ibana. Dung i diungkap ma pintu i laos maporus ibana.

9:11 Dung i ruar ma si Jehu mandapothon angka naposo ni tuanna, angka na mandok tu ibana: Beha hasonangan do? Ala ni aha umbahen ro jolma na lalaen on manopot ho? Dung i ninna ibana ma tu nasida: Hamu pe ditanda hamu do baoa i dohot salinna marpangalaho.

9:12 Alai ninna nasida ma: Hata sipaotooto do i! Bulus paboa tu hami. Dung i ninna ibana ma: Songon on songon on do hatana tu ahu, ninna do: Songon on do hata ni Jahowa: Nunga Ahu mamiahi ho bahen raja gumomgom Israel.

9:13 Dung i hapogan ma nasida ganup mambuat pangkeanna be jala dipahembang tu toruna bahen tutup ni habangsa pinanaekna i, huhut umpalu sarunena be, jala ninna do: Nunga bangkit raja si Jehu!

9:14 Jadi mambahen parbulanan ma si Jehu, anak ni si Josapat, anak ni si Nimsi, mangalo si Joram. Alai anggo si Joram ro di sandok halak Israel martaon di parik ni huta Ramot di Gilead maralohon si Hasael, raja sian Ram.

9:15 Alai nunga mulak hian anggo raja Joram tu Jisreel laho padaonhon bugangna, angka na binahen ni halak Ram uju marmusu ibana dompak si Hasael, raja sian Ram. Dung i ninna si Jehu ma: Molo sada pingkiran ni rohamuna unang italoas ruar malua sian huta i nanggo sahalak, asa unang laho ibana mamboan barita i tu Jisreel.

9:16 Dung i marsihundul ma si Jehu laho tu Jisreel, ai peak disi do si Joram, si Ahasia raja sian Juda pe, nunga tuat tusi maningkir si Joram.

9:17 Alai anggo parjaga na jongjong di atas tungkup di Jisreel, dung diida ro parduaan na niuluhon ni si Jehu, ninna ma: Nunga huida ro sada parduaan. Dung i ninna si Joram ma: Buat ma sahalak parsihundul jala suru ibana manjumpangkon nasida manungkun: Atehe dame do?

9:18 Jadi borhat ma jolma parsihundul i di hoda i manjumpangkon ibana, jala didok ma: Songon on do hata ni rajai: Atehe dame do? Alai ninna si Jehu ma: Aha pardulim di dame i? Laho ma ho tu pudingku! Dung i dipaboa parjaga i ma barita i, ninna do: Nunga nian sahat suruani tu nasida, hape ndang mulak.

9:19 Dung i disuru ma sahalak na asing parsihundul di hoda; dung sahat ibana tu nasida, ninna ma: Songon on do hata ni rajai: Atehe dame do? Alai ninna si Jehu ma: Aha pardulim di dame i? Laho ma ho tu pudingku!

9:20 Ro muse parjaga i paboahon barita i, ninna do: Nunga nian sahat suruani tu nasida, hape ndang mulak ibana. Alai anggo pangenjakna songon pangenjak ni si Jehu, anak ni si Nimsi do, ai songon pangenjak ni halak na lalaen do pangenjakna.

9:21 Dung i ninna si Joram ma: Pasang ma hoda! Jadi dipasang jolma i ma hoda i tu huretana; jadi borhat ma si Joram, raja sian Israel dohot si Ahasia, raja sian Juda, ganup di huretana be, ruar ma nasida manjumpangkon si Jehu, gabe pajumpang nasida dohot ibana di ladang ni si Nabot, halak Jisreel.

9:22 Jadi dung diida si Joram si Jehu, ninna ma: Atehe dame do, ale Jehu? Alai ninna ibana ma: Pinabotoboto dame i saleleng didatdati si Izebel inamu mangulahon parmainanon dohot ujarujaran godang?

9:23 Jadi dihosing si Joram ma huretai laho maporus nian, jala didok do tu si Ahasia: Jehejehe do i, ale Ahasia!

9:24 Alai disintak si Jehu ma siorna, gabe disior ma si Joram gabe hona holangholang ni sasapna, pola ditorusi sumbia i pusupusuna, jala gadap ibana di bagasan huretana.

9:25 Dung i ninna si Jehu ma mandok si Bidkar naposona i: Hindat ma ibana jala reongkon tu hauma ni si Nabot, halak Jisreel; sai ingot ma na marsihundul i hita tampak ahu dohot ho mangihuthon si Ahab amana i, uju dilumbahon Jahowa hian toruna on dompak ibana.

9:26 Tongon tahe nunga maungaung hubege nantoari mudar ni si Nabot dohot mudar ni angka anakna i, ninna Jahowa; ingkon tubolhononku do i tu ho di haumaon, ninna Jahowa! On pe hindat ma ibana jala reongkon tu hauma i, hombar tu hata ni Jahowa.

9:27 Jadi dung songon i diida si Ahasia, raja sian Juda, maporus ma ibana sian dalan, laho tu jabu paranginanginan. Alai sai dieak si Jehu do ibana, jala ninna ma: Ibana pe ingkon bunuonmuna do! Jadi dibunu nasida ma ibana di atas huretana di nangkohan Gur, na mardonokkon Ibleam; jadi maporus ma rajai sahat tu Megiddo, mate disi ma ibana.

9:28 Dung i diboan angka naposona ma ibana di bagasan hureta tu Jerusalem, jala dibandahon ibana di parbandaanna i sandiri di lambung ni angka ompuna di huta ni si Daud.

9:29 Pasampulusadataonhon dung gabe raja si Joram, anak ni si Ahab, bangkit raja ma si Ahasia gumomgom Juda.

9:30 Jadi sahat ma si Jehu tu Jisreel. Dung tarbege barita i tu si Izebel, marpangir ma ibana jala mandulo sian pandiloan.

9:31 Jadi dung dimasuhi si Jehu harbangan i, ninna si Izebel ma: Atehe dame do, ale Simri, sitodos tuanna?

9:32 Dung i manaili ma si Jehu dompak pandiloani, ninna ma: Ise do donganku? Ise tutu? Jadi adong ma dua manang tolu halak naposona mamereng dompak ibana.

9:33 Dung i didok si Jehu ma: Tunggalingkon ma nasida sian i tu toru! Jadi ditunggalingkon nasida ma, pola mamirsak sian mudarna i tu dorpi dohot tu angka hoda i, jala dipasombu degedegean ni hoda.

9:34 Jadi dung masuk ibana tu huta i, jala dung mangan minum, ninna ma: Ua tingkir hamu ma boruboru naung tinoruan ni Debata, jala tanom hamu nasida, ai boru ni raja do ibana nian.

9:35 Alai dung laho nasida naeng mananom nian, hape ndang adong jumpangsa sian bangkena, nda holan tangkurakna dohot bulang ni patna dohot tanganna.

9:36 Jadi mulak ma nasida mamaritahon barita i tu si Jehu. Alai ninna ibana ma: I ma hata ni Jahowa hian, naung nilumbahonna hian marhite sian naposona si Elia, halak Tisbi, uju na nidokna: Ingkon di atas hauma ni Jisreel suda panganon ni biang sibuk ni si Izebel.

9:37 Ia bangke ni si Izebel i, ingkon hira gabe napa di ladang Jisreel, pola ndang tarpaboa halak be: On do si Izebel!

2 Raja-raja 10

10:1 Alai adong do pitupulu halak angka anak ni si Ahab di Samaria. Dung i disuru si Jehu ma angka surat jala dipantongoshon tu Samaria, tu angka induk sian Jesreel, tu angka sintua dohot tu angka guru panahatan ni angka anak ni si Ahab, songon on:

10:2 Ia dung sahat suraton tu hamu, molo adong di hamu angka anak ni tuanmuna, angka hureta dohot hoda dohot sada huta na gonting, ro di angka sinjata marragamragam.

10:3 Ingkon pillit hamu jolma na dumenggan jala na sumintong marroha di tongatonga ni angka anak ni tuanmuna, jala pahundul hamu ibana tu atas habangsa ni amana, laos marporang ma hamu humongkop pinompar ni tuanmuna!

10:4 Alai mabiar situtu ma nasida, angka ninna do: Ida ma, gari dua raja ndang manahan jongjong di adopanna lam beha ma ia panahanta?

10:5 Dung i marsuru suruanna ma halak induk ni bagas dohot induk ni huta i, ro di angka sintua dohot guru manopot si Jehu, mandok tu ibana: Angka naposom do hami, jala nasa sidohononmu tu hami, ingkon bahenonnami do; ndang olo hami pabangkithon manang ise gabe raja; manang aha na denggan di bagasan roham, i ma bahen.

10:6 Dung i disurathon si Jehu ma suratna paduahon tu nasida, songon on: Molo tutu donganku hamu, jala olo hamu tumangihon soarangku, buat hamu ma ulu ni angka baoa i, angka anak ni tuanmuna jala boan hamu tu ahu tu Jisreel marsogot songon on. Alai angka anak ni rajai, pitupulu halak toropna rap dohot halak na sangap di huta i, angka na pagodanggodang nasida.

10:7 Jadi dung sahat surat i tu nasida, dibuat nasida ma angka anak ni rajai jala dipotongi, pitupulu halak toropna, jala dipampeakkon ulunasida i tu bagasan angka hirang, jala ditongoshon tu si Jehu tu Jisreel.

10:8 Jadi dung ro suruani paboahon barita i tu ibana, ninna do: Nunga diboan nasida angka ulu ni angka anak ni rajai, gabe didok si Jehu ma: Pampeakkon hamu ma angka i bahen dua timbunan di lambung pintu harbangan paima marsogot.

10:9 Dung i marsogotna i, ruar ma ibana, laos jongjong mandok tu sandok situan na torop i: Na lidang do anggo hamu! Ida ma, ianggo ahu nunga hubahen parbulanon mangalo tuanku, jala nunga hubunu ibana; alai ise ulaning mambunu sude angka nasida on?

10:10 Antong boto hamu ma, na so madabu boti tu tano nanggo sada sian hata ni Jahowa, naung nilumbahon ni Jahowa hian dompak pinompar ni si Ahab; nunga tahe dipasaut Jahowa naung nilumbahonna hian marhite sian si Elia naposona i.

10:11 Jadi dibunu si Jehu ma sude jolma angka na tinggal i dope sian pinompar ni si Ahab di Jisreel, ro di sude jolma angka na pinasangapna dohot angka alealena dohot angka panuturina haposan ni rohana, nanggo sahalak ndang ditebahon di ibana.

10:12 Dung i borhat ma si Jehu mardalan sahat tu Samaria. Jadi dung sahat ibana tu soposopo panisioan ni angka parmahan di tongan dalan.

10:13 Pajumpang ma si Jehu dohot angka anggi ni si Ahasia, raja sian Juda, ninna ma: Ise do hamu? Jadi didok nasida ma: Angka anggi ni si Ahasia do hami, jala tuat do hami masipasaoran dame tu angka anak ni rajai dohot tu angka anak ni inana.

10:14 Alai ninna si Jehu ma: Tangkupi hamu nasida songon i mangolu! Jadi ditangkupi ma nasida songon i mangolu, jala dipotongi nasida mardonokkon sumur di lambung soposopo panisioan ni angka parmahan, opatpulu dua halak toropna, jala ndang adong na malua sian nasida nanggo sahalak.

10:15 Jadi dung mardalan ibana sian i, pajumpang ma ibana dohot si Jonadab, anak ni si Rekab, na manomunomu dohot mamasumasu ibana, gabe didok si Jehu ma mandok ibana: Atehe bonar do roham tu ahu, suang songon rohangki tu roham? Dung i didok si Jonadab ma: Songon i do! Antong molo songon i, lehon ma tanganmu tu ahu; jadi dilehon ma tanganna tu ibana. Dung i didokkon ma manaek tu huretana, hundul tu lambungna.

10:16 Dung i didok si Jehu ma: Sai rap ma hita mardalan, asa idaonmu murukku humongkop ulaon ni Jahowa. Jadi tampak ma nasida marsihundul di huretana i.

10:17 Jadi dung sahat ibana tu Samaria, dibunui ma saluhut halak angka na tinggal dope sian si Ahab di Samaria, paima sun siap dibahen, hombar tu hata ni Jahowa, naung nilumbahonna hian tu si Elia.

10:18 Dung i dipaluhut si Jehu ma sude situan na torop i, jala ninna ma tu nasida: Humurang dope anggo pangoloi ni si Ahab di Baal, umburju dope anggo si Jehu mangoloi.

10:19 Dibahen i martingting ma hamu paluhuthon tu lambungku sude angka panurirang ni Baal, saluhut angka parhaladona ro di sude angka malimna, ndang jadi tinggal nanggo sahalak, ai pelean na bolon naeng pasahatonku tu Baal; manang ise na so disi, ingkon marutang hosa ibana. Alai pangela ni si Jehu do i, asa pungu dapotsa bunuonna angka parhalado ni Baal i.

10:20 Dung i didok si Jehu ma: Parbadiai hamu ma di Baal sada hariburon raja! Jadi ditingtingkon nasida ma i.

10:21 Pola disuru si Jehu angka suruanna tu sandok Israel, mandokkon ro be sude angka parhalado ni Baal ndang tinggal nanggo sahalak na so ro tusi. Jadi marpungu ma nasida tu joro ni Baal, pola gok joro ni Baal sian jabu bona sahat ro di jolojolo.

10:22 Dung i didok si Jehu ma tu jolma panahatan ni bagas parpeopan ni pangkean: Paruar ma pangkean di sude parhalado ni Baal. Jadi diparuar ma di nasida angka pangkean i.

10:23 Dung i ro ma si Jehu rap dohot si Jonadab, anak ni si Rekab masuk tu joro ni Baal, laos didok ma tu angka parhalado ni Baal i: Patangkas hamu ma marnida, unang tung adong saor tu hamu sian angka naposo ni Jahowa, ingkon holan angka parhalado ni Baal i sambing disi.

10:24 Jadi dung ro angka nasida naeng mamelehon angka pelean sipotongon dohot pelean situtungon, dipadiri si Jehu hian di ibana di balian ualupulu halak, laos ninna ma: Molo tung malua nanggo sahalak sian baoa angka na hupasahat tu tanganmuna, ingkon hosamu sahalak singkat ni hosana.

10:25 Jadi dung sun dihobas nasida pelean situtungon i, ninna si Jehu ma tu angka parangan dohot tu angka partogina: Masuk ma hamu tu bagasan jala bunu hamu nasida, na so tupa malua nanggo sahalak! Jadi dibunu ma nasida luhut marhite sian podang. Dung i direongkon angka parangan dohot partogina ma nasida tu balian, asa mangonjar nasida sahat tu bagasan joro ni Baal i.

10:26 Diparuar nasida huhut angka ganaganaan sian joro ni Baal, laos dimosokkon do i.

10:27 Diropuhi nasida huhut ganaganaan Baal jala dilohai joro ni Baal i, dibahen do i gabe panduduran ni na rotak rasirasa sadarion.

10:28 Jadi siap ma Baal i sian Israel dibahen si Jehu.

10:29 Holan angka dosa ni si Jerobeam, anak ni si Nebat, na mangela Israel mambahen dosa, ndang ditundalhon roha ni si Jehu, i ma angka lombu sere na di Betel dohot na di Dan.

10:30 Dung i ninna Jahowa ma tu si Jehu: Ala na denggan pambahenanmu mangulahon lomo ni rohangku mambahen tu pinompar ni si Ahab, hombar tu sandok na sinangkap ni rohangku, ingkon anakmu ro di sundut paopathon hundul di atas habangsa ni Israel.

10:31 Alai ndang marsihohot roha ni si Jehu mangaradoti patik ni Jahowa, Debata ni Israel, sian nasa rohana; ai ndang ditundalhon anggo angka dosa ni si Jerobeam na mangela Israel mambahen dosa.

10:32 Olat ni angka ari i ma dipungka Jahowa pametmet Israel, ai talu onjar ma nasida dibahen si Hasael di sandok partalpahan ni Israel.

10:33 Olat ni Jordan sambola tungkan habinsaran, sandok tano Gilead, tano ni halak Gad, Ruben dohot Manasse, olat ni Aroer na martopihon sunge Arnon, ro di Gilead dohot Basan.

10:34 Alai jamita na tinggal i dope sian si Jehu ro di sude na binahenna dohot habeguonna, nda tarsurat do i di bagasan buku jamita ni angka raja sian Israel?

10:35 Dung i monding ma si Jehu gabe top dohot angka ompuna jala tartanom ibana di Samaria, jala si Joahas anakna i bangkit raja singkatna.

10:36 Alai anggo lelengna si Jehu mangarajai gumomgom Israel di Samaria, duapulu ualu taon do.

2 Raja-raja 11

11:1 Alai anggo si Atalia, ina ni si Ahasia, dung diida naung mate anakna i, hehe ma ibana jala dibunui sandok pinompar ni rajai.

11:2 Alai dibuat si Joseba, boru ni raja Joram, iboto ni si Ahasia ma si Joas, anak ni si Ahasia, jala diluahon ibana sian tongatonga ni angka anak ni rajai, angka sibunuon hian, jala dibahen ibana tu bilut podoman rap dohot parorotna, manabunihon ibana maradophon si Atalia, asa unang bunuonna.

11:3 Jadi rap martabuni nasida di bagasan joro ni Jahowa, pola onom taon lelengna. Alai si Atalia do mangarajai di tano i.

11:4 Tole papitutaonhon disuru si Joiada ma mangalapi angka partogi ni parangan sirajai saratus dohot angka malim mandokkon nasida masuk tu joro ni Jahowa manopot ibana, dung i marpadan ma ibana dohot nasida, pola dipatolon nasida di bagasan joro ni Jahowa, jala dipatuduhon tu nasida anak ni rajai.

11:5 Dung i martona ma ibana tu nasida, ninna ma: On do hata sibahenonmuna: Sapartolu sian hamu, angka na masuk gansi di ari Sabbat, ingkon marjaga di bagasan jabu ni rajai.

11:6 Jala sapartolu ingkon marjaga di lambung bahal Sur, jala na sapartolu muse, ingkon di lambung bahal na di pudi ni angka parangan; ingkon marjaga hamu di lambung bagas joro manulakkon angka na ro.

11:7 Alai anggo dua rongkanan sian hamu, sude jolma tahe angka na malua di ari Sabbat, ingkon marjaga nasida di bagasan joro ni Jahowa jonok di lambung ni rajai.

11:8 Jala ingkon halianganmuna do rajai, ganup marsinjata di bagasan tanganna; jala manang ise na manoluk angka odoran i ingkon marutang hosa; asa ingkon sai dongan ni rajai hamu, molo ruar ibana manang masuk.

11:9 Jadi dibahen angka partogi ni parangan sisaratus ma hombar tu sandok na tinonahon ni malim Joiada, diarahon be ma donganna angka na masuk gansi di ari Sabbat rap dohot angka na malua di ari Sabbat, laos ro nasida manopot malim Joiada.

11:10 Dung i diparlehon malim i ma tu angka partogi ni parangan sisaratus, angka hujur dohot lombulombu angka na sian raja Daud nahinan, jala na pineop di bagasan joro ni Jahowa.

11:11 Dung i jongjong be ma angka parangan i ganup patioptiop sinjatana di bagasan tanganna dingkan siamun ni joro i sahat ro di hambirang ni joro i, di holangholang ni langgatan dohot joro i, humaliang rajai.

11:12 Dung i ditogihon ma anak ni rajai tu ruar jala dibahen tumpal i tu atas uluna jala dilehon buku patik i tu bagasan tanganna jala dipabangkit nasida ibana bahen raja, laos dimiahi ibana, huhut martopaptopap tanganna be mangolophon, ninna do: Horas ma rajai!

11:13 Jadi dung dibege si Atalia soara olopolop ni angka parangan dohot situan na torop i, ro ma ibana manopot situan na torop i tu joro ni Jahowa.

11:14 Jadi dung dipamanat pangalahona, ida ma, jongjong do rajai mangunsande di tiang hajongjongan ni raja, songon somalna hian, jala angka partogi dohot parsarune di lambung ni rajai, jala marlas ni roha be sandok situan na torop isi ni luat i, huhut mamalui sarune. Alai diribahi si Atalia ma pangkeanna huhut joujou: Masa do jehejehe!

11:15 Alai didokkon malim Joiada ma angka partogi ni parangan sisaratus, angka na manguluhon parangan i, ninna ma mandok nasida: Togihon hamu nasida ruar sian holangholang ni angka odoran, jala manang ise na mangihuthon nasida, ingkon mate bunuon do ibana marhite sian podang! Ai nunga pola didok malim i: Ndang jadi mate nasida di bagasan joro ni Jahowa.

11:16 Dung i ditangkup nasida ma ibana jala mardalan nasida sian dalan habongotan ni angka hoda tu bagas ni rajai, laos disi nasida dibunu.

11:17 Dung i dibahen si Joiada ma sada parjanjian tu Jahowa dohot tu rajai ro di halak situan na torop i, paboa ingkon bangso ni Jahowa nasida; dibahen huhut sada parjanjian di holangholang ni rajai dohot situan na torop i.

11:18 Dung i bongot ma sude situan na torop ni luat i tu bagasan joro ni Baal jala dilohai do i; ia angka langgatanna dohot ganaganaanna, tung diropuhi situtu do angka i, jala si Matan, malim ni Baal i dibunu nasida do ibana mate di adopan ni angka langgatan. Dung i dipabangkit malim i ma halak na marjujungan parenta joro ni Jahowa.

11:19 Dibuat ma angka partogi ni parangan sisaratus dohot angka parjaga di jabu ni rajai ro di parangan dohot sandok isi ni luat i, laos ditogihon nasida rajai tuat sian joro ni Jahowa jala ro nasida sian dalan pamolusan ni angka parangan sahat tu bagas ni rajai, jala hundul ibana tu atas habangsa harajaon.

11:20 Jadi marlas ni roha be ma sandok bangso isi ni luat i jala sonang be isi ni huta i. Alai nunga dibunu nasida anggo si Atalia marhite sian podang di bagasan bagas ni rajai.

2 Raja-raja 12

12:1 Marumur pitu taon do si Joas, uju na bangkit raja ibana.

12:2 Papitutaonhon dung raja si Jehu, bangkit raja ma si Joas, jala opatpulu taon lelengna ibana mangarajai di Jerusalem; ia goar ni inana i ma si Zibia sian Berseba.

12:3 Dung i diulahon si Joas ma lomo ni roha ni Jahowa saleleng mangolu ibana, saleleng diajari malim Joiada ibana.

12:4 Holan angka tambak tahe ndang dilohai, sai mamele dope dohot manutung daupa halak situan na torop i di atas angka tambak i.

12:5 Dung i ninna si Joas ma tu angka malim: Sandok perak naung niuras, na somal binoan ni halak masuk tu joro ni Jahowa, i ma perak na nilehon ni halak bahen tobus ni hosa, saluhut perak na nilehon ni ganup sian ringgas ni rohana mamboan tu joro ni Jahowa.

12:6 I ma sibuaton ni angka malim di nasida, ganup sian sihasolhotanna; ingkon pangkeonna do i pauliuli na sega di joro i, manang aha pe tahe na sega jumpangsa disi paulionna do.

12:7 Alai nunga pola duapulu tolu taon dung raja si Joas, laos so adong dope dipauli angka malim i na sega di joro i.

12:8 Jadi dijou raja Joas ma malim Joiada rap dohot angka malim na asing, ninna ma mandok nasida: Boasa so dipauli hamu dope na sega di joro i? Nuaeng pe ndang jadi be buatonmuna perak sian sihasolhotanmuna i, ingkon lehononmuna do i laho paulihon na sega di joro i.

12:9 Jadi dioloi angka malim i ma hata i, ndang be dibuat perak sian halak situan na torop i, jala ndang be nasida paulihon na sega di joro i.

12:10 Dung i dibuat malim Joiada ma sada poti, jala dituhak ma langkopna i, jala dipeakkon poti i dingkan siamun ni langgatan laho masuk jolma i tu joro ni Jahowa; jadi malim angka na marjaga di lambung lobulobu mandekdekkon sandok perak na binoan ni halak tu joro ni Jahowa.

12:11 Ia dung diida nasida naung godang perak i di bagasan poti i, ro ma sahalak juaratulis ni rajai rap dohot sintua ni malim i, ditimpus ma perak i tu bagasan puro, dung dibilang na dapotsa di bagasan joro ni Jahowa.

12:12 Jadi dung didasing nasida perak i, dipasahat ma i tu tangan ni halak panahatan ni ulaon, angka na parenta joro ni Debata, asa nasida muse mangalehon upa tu angka tukang hau dohot pande, angka na mangula di joro ni Jahowa.

12:13 Tole angka tukang dohot halak pandakdak batu, huhut manuhor parhau dohot batu naung nidakdak laho paulihon na sega di joro ni Jahowa, tole sandok harugian laho pauli joro ni Jahowa, nasida paturehon.

12:14 Alai tahe ndang dipauli sian i di joro ni Jahowa angka pinggan perak manang raut manang mangkuk parburian manang sarune, manang dia tahe ulaula sere dohot perak anggo sian perak na binoan tu joro ni Jahowa.

12:15 Ingkon dilehon do i tu halak pangula, asa dipauli nasida marhite sian i na sega di joro ni Jahowa.

12:16 Jala ndang pola masietongan nasida dohot baoa panahatan ni perak i, asa lehononna tu halak pangula, ai masihaposan do nasida.

12:17 Alai anggo perak sian pelean hasalaan dohot perak sian pelean pardosaon, ndang diboan anggo i tu joro ni Jahowa, di angka malim do i.

12:18 Uju i ma nangkok si Hasael, raja sian Ram laho marporang dompak Gat laos dipapatu do i. Dung i dipatohom si Hasael ma bohina laho nangkok tu Jerusalem.

12:19 Jadi dibuat si Joas raja sian Juda ma nasa ugasan na pinarbadiaan, na pinarbadia ni angka ompuna si Josapat, si Joram dohot si Ahasia, angka raja sian Juda dohot na pinarbadiana sandiri ro di nasa sere na jumpang di tongatonga ni arta, angka na pineop di joro ni Jahowa dohot di bagas ni rajai, jala ditongoshon do i tu si Hasael, raja sian Ram; gabe mundar ma ibana sian Jerusalem.

12:20 Jamita na tinggal i dope sian si Joas ro di sude na niulana, nda tarsurat do i di bagasan buku jamita ni angka raja sian Juda?

12:21 Jadi hehe ma angka naposona mambahen parbulanan mangalo ibana, laos dibunu nasida si Joas i di bagasan jabu Milo, laho tuat tu Sila.

12:22 Ai ditodos si Jozakar, anak ni si Simeat dohot si Josabad, anak ni si Somor, naposona i ibana gabe mate; jadi tartanom ma ibana di lambung ni angka ompuna di huta ni si Daud, jala si Amasia anakna i bangkit raja singkatna.

2 Raja-raja 13

13:1 Paduapulutolutaonhon dung gabe raja sian Juda si Joas, anak ni si Ahasia, bangkit raja ma si Joahas, anak ni si Jehu gumomgom Israel di Samaria, sampulu pitu taon lelengna.

13:2 Jala diulahon do sogo ni roha ni Jahowa, ai diihuthon do angka dosa ni si Jerobeam, anak ni si Nebat, na mangela Israel mambahen dosa, jala ndang dipasurut rohana sian i.

13:3 Dibahen i marsigorgor ma rimas ni Jahowa mida Israel, jala dipasahat nasida tu bagasan tangan ni si Hasael, raja sian Ram dohot tu bagasan tangan ni si Benhadad, anak ni si Hasael i saleleng mangolu nasida.

13:4 Jadi mangido asi ni roha ma si Joahas sian Jahowa, jala ditangihon Jahowa ibana, ai ditatap rohana do haporsuhon ni Israel, na pinaporsukporsuk ni raja sian Ram i nasida.

13:5 Dung i dilehon Jahowa ma tu Israel sada halak sipalua, gabe malua nasida sian tangan ni halak Ram, jala maringan halak Israel di bagasan undungundungnasida be songon na sai laon.

13:6 Alai marisuang, ndang sumurut nasida sian angka dosa ni pinompar ni si Jerobeam, na mangela Israel mambahen dosa, laos diihuthon do tusi; nang sombaon Asera tinggal do i jongjong di Samaria.

13:7 Ai ndang adong be parangan ni si Joahas ditinggalhon Jahowa, nda holan limapulu halak parsihundul dohot sampulu hureta dohot sampulu ribu halak parhantarhantar; ai nunga rendep nasida dibahen raja sian Ram, jala nunga diluntakluntak nasida songon orbuk.

13:8 Jamita na tinggal i dope sian si Joahas ro di sude na niulana dohot habeguonna, nda tarsurat do i di bagasan buku jamita ni angka raja sian Israel?

13:9 Dung i monding ma si Joahas gabe top dohot angka ompuna, jala tartanom ibana di Samaria, jadi si Joas anakna i bangkit raja singkatna.

13:10 Patolupulupitutaonhon dung gabe raja sian Juda si Joas, bangkit raja ma si Joas, anak ni si Joahas gumomgom Israel di Samaria, sampulu onom taon lelengna.

13:11 Jala diulahon do sogo ni roha ni Jahowa, ndang dipasurut rohana sian saluhut dosa ni si Jerobeam, anak ni si Nebat, na mangela Israel mambahen dosa, laos diihuthon disi.

13:12 Jamita na tinggal i dope sian si Joas, ro di sude na niulana dohot habeguonna uju marmusu ibana dompak si Amasia, raja sian Juda, nda tarsurat do i di bagasan buku jamita ni angka raja sian Israel?

13:13 Dung i monding ma si Joas gabe top dohot angka ompuna, jala si Jerobeam hundul tu atas habangsana. Jadi tartanom ma si Joas di Samaria di lambung ni angka raja sian Israel.

13:14 Dung i tubu ma sahit ni si Elisa, laos i do mamboan ibana. Jadi tuat ma si Joas raja sian Israel maningkir ibana, laos tangis di jolona, ninna ma: O damang, damang! Hureta ni Israel dohot angka jolma parsihundulna do ho.

13:15 Dung i ninna si Elisa ma tu ibana: Buat ma sior dohot angka sumbia i! Jadi dung dibuat sior i tu ibana rap dohot angka sumbia i.

13:16 Ninna si Elisa muse tu raja sian Israel: Tanganmu sandiri ma manangging sior i! Jadi ditangging ma. Dung i diampehon si Elisa ma tanganna tu atas tangan ni rajai.

13:17 Laos didok ma: Ungkap ma pandiloan dingkan habinsaran! Jadi diungkap ma i. Dung i ninna si Elisa ma: Siorhon ma! Jadi disiorhon ma. Jadi ninna si Elisa muse ma: I ma sumbia hatuaon sian Jahowa dohot sumbia haluaon sian halak Ram! Ai taluhononmu do halak Ram di Apek, maradu siap nasida bahenonmu.

13:18 Dung i didok muse ma: Buat ma angka sumbia i! Jadi dung dibuat, ro muse hatana mandok tu raja sian Israel: Lipathon ma angka i tu tano! Jadi dilipathon ma tolu hali, dung i mansohot ma.

13:19 Dung i tarrimas ma halak ni Debata mida ibana, ninna ma: Aut ni lima manang onom hali nian dilipathon ho, talu ma halak Ram bahenonmu maradu siap; alai anggo nuaeng holan tolu hali taluhononmu halak Ram.

13:20 Dung i mate ma si Elisa jala ditanom halak ibana. Jadi ro ma parbajo marrongkanrongkan sian halak Moab sumola tano i di bona ni taon.

13:21 Tongon mananom sada halak na mate nasida, jadi dung diida nasida halak parbajo i, gabe hapogan nasida manimpalhon halak na mate tu bagasan tanoman ni si Elisa. Hape dung sahat halak na mate tu bagasan jala dolos tu bangke ni si Elisa, mulak mangolu ma ibana, laos hehe mangojakkon patna.

13:22 Sai dipasosaksosak si Hasael, raja sian Ram do halak Israel saleleng mangolu si Joahas.

13:23 Alai marpangulahi do roha ni Jahowa mida nasida jala diasii, jala marpanatap tu nasida ala ni padan na binahenna i tu si Abraham, si Isak dohot si Jakkob, jala ndang lomo rohana mida hamagoannasida manang mambolongkon nasida sian adopanna rasirasa nuaeng.

13:24 Dung i mate ma si Hasael, raja sian Ram, gabe si Benhadad anakna i bangkit raja singkatna.

13:25 Alai dirampas si Joas, anak ni si Joahas ma muse sian gomgoman ni si Benhadad, anak ni si Hasael, huta angka na nilaumna sian gomgoman ni si Joahas amana i di hamusuon; pola tolu hali talu tongtang ibana dibahen si Joas, gabe mulak ma angka huta i tu Israel dibahen.

2 Raja-raja 14

14:1 Paduataonhon dung gabe raja sian Israel si Joas, anak ni si Joahas, bangkit raja ma si Amasia, anak ni si Joas, raja di Juda.

14:2 Marumur duapulu lima taon ibana di na bangkit raja, jala duapulu sia taon lelengna ibana mangarajai di Jerusalem; ia goar ni inana i ma Nai Joadan sian Jerusalem.

14:3 Jala diulahon ibana do lomo ni roha ni Jahowa, alai ndada songon si Daud ompuna i; suman tahe pambahenna tu sandok pambahenan ni si Joas amana i.

14:4 Holan angka tambak i ndang dilohai, sai tole dope halak situan na torop i mamele dohot manutung daupa di atas ni angka tambak i.

14:5 Jadi dung lam hot harajaon i di bagasan tanganna, dibunu ibana ma naposona, angka na manodos raja nahinan, amana i.

14:6 Alai anggo angka anak ni partodos i, ndang dibunu, hombar tu hata ni Jahowa na tarsurat di bagasan buku patik na binahen ni si Musa, songon on: Ndang jadi mate amaama ala angka anakna, jala ndang jadi mate angka anak i ala amana, alai ganup ingkon mate ala ni dosana sandiri.

14:7 Ditaluhon ibana huhut halak Edom di bagasan rura parsiraan, saloksa halak toropnasida mate, disoluk huhut huta Sela di hamusuon, jala dibahen do goarna Joktel rasirasa sadarion.

14:8 Uju i ma disuru si Amasia angka suruanna manopot si Joas, anak ni si Joahas, tubu ni si Jehu, raja sian Israel, mandok tu ibana: Tole ma hita masiujian.

14:9 Alai disuru si Joas, raja sian Israel ma suruanna manopot si Amasia, raja sian Juda, mandok hata alingalingan: Hau unak na di Libanon marsuru pangaririt manopot hau Ares na di Libanon, mandok songon on: Ua lehon ma borum bahen jolma ni anakku; hape ro ma binatang angka na di atas Libanon ditondong ma hau unak i laos didegedegei.

14:10 Nunga tutu ditaluhon ho halak Edom, gabe dipaginjang ho roham. Denggan paingotingot baritam jala tinggal ho di bagasan jabum! Boasa tagonan tahopanmu hamagoan, asa marjea ho rap dohot halak Juda.

14:11 Alai ndang ditangihon si Amasia hata umpamana i. Jadi nangkok ma si Joas, raja sian Israel gabe masiujian ma nasida, ibana dohot si Amasia, raja sian Juda di Betsemes na di tano Juda.

14:12 Alai talu ma halak Juda maradophon halak Israel, gabe maporus nasida ganup tu undungundungna be.

14:13 Dapot tartangkup ma di Betsemes anggo si Amasia, raja sian Juda, anak ni si Joas, tubu ni si Ahasia dibahen si Joas, raja sian Israel, laos diboan ibana tu Jerusalem, jala dilohai parik ni Jerusalem olat ni bahal Epraim sahat tu bahal parsuhisuhi, pola opat ratus asta ganjangna.

14:14 Dibuat huhut nasa sere dohot perak ro di sude ulaula angka na jumpang di bagasan joro ni Jahowa dohot di bagasan bilut parpeopan arta na di bagas ni rajai, tole angka jolma tahan joratna, dung i mulak ma ibana tu Samaria.

14:15 Jamita na tinggal i dope sian si Joas ro di sude na binahenna i dohot habeguonna uju marmusu ibana dompak si Amasia, raja sian Juda, nda tarsurat do i di bagasan buku jamita ni angka raja sian Israel?

14:16 Dung i monding ma si Joas gabe top dohot angka ompuna, jala tartanom di Samaria, di lambung ni angka raja sian Israel. Jadi si Jerobeam anakna i bangkit raja singkatna.

14:17 Alai anggo si Amasia, anak ni si Joas, raja sian Juda, mangolu dope sampulu lima taonnari dung mate si Joas, anak ni si Joahas, raja sian Israel.

14:18 Jamita na tinggal i dope sian si Amasia, nda tarsurat do i di bagasan buku jamita ni angka raja sian Juda?

14:19 Dung i dibahen halak ma parbulanon mangalo ibana di Jerusalem; alai maporus do rajai tu Lakis; jadi disuru nasida ma halak mangihuthon ibana tu Lakis, asa bunuonna ibana disi.

14:20 Dung i diboan nasida ma ibana di atas ni angka hoda, gabe tartanom ibana di Jerusalem, di lambung ni angka ompuna di bagasan huta ni si Daud.

14:21 Dung i ro ma sandok bangso Juda mambuat si Azaria, na marumur sampulu onom taon dope, jala dipabangkit ibana gabe raja singkat ni si Amasia, amana i.

14:22 Ibana do i na patoguhon huta Elat, jala mulak tu Juda dipasuang, dung monding rajai rap dohot angka ompuna.

14:23 Pasampululimataonhon dung bangkit raja sian Juda si Amasia, anak ni si Joas, bangkit raja ma si Jerobeam, anak ni si Joas, gumomgom Israel di Samaria, opatpulu sada taon lelengna.

14:24 Alai diulahon ibana do sogo ni roha ni Jahowa, ndang dipasurut rohana sian angka dosa ni si Jerobeam, anak ni si Nebat, na mangela Israel mambahen dosa.

14:25 Ibana tahe pasuangkon muse angka partalpahan ni Israel, olat ni haroroan tu Hamat sahat ro di laut na di adaran, hombar tu hata ni Jahowa, Debata ni Israel, naung pinarbagana hian marhite sian naposona si Jona, anak ni si Amittai, i ma panurirang na sian huta Gat Heper.

14:26 Ai nunga marpanatap roha ni Jahowa mida pardangolan ni Israel na sapot situtu, nunga pola siap baoa na bajar dohot na tang, jala ndang adong tinggal nanggo sahalak tau panolongi di Israel.

14:27 Alai ndang dung marlumba Jahowa hian naeng siaphononna goar ni Israel sian hasiangan on, alani umbahen manolongi Ibana di nasida marhite sian tangan ni si Jerobeam, anak ni si Joas.

14:28 Jamita na tinggal i dope sian si Jerobeam, ro di sude na niulana dohot habeguonna, uju marmusu ibana dohot pasuangkon Damaskus nang Hamat, na masuk tu Juda hian, mulak tu Israel, nda tarsurat do i di bagasan buku jamita ni angka raja sian Israel?

14:29 Dung i monding ma si Jerobeam gabe top dohot angka ompuna, i ma angka raja sian Israel, jadi si Sakaria anakna i bangkit raja singkatna.

2 Raja-raja 15

15:1 Paduapulupitutaonhon dung gabe raja sian Israel si Jerobeam, bangkit raja sian Juda ma si Azaria, anak ni si Amasia.

15:2 Marumur sampulu onom taon ibana di na bangkit raja, jala limapulu dua taon lelengna ibana mangarajai di Jerusalem; ia goar ni inana, i ma Nai Jekolia sian Jerusalem.

15:3 Dung i diulahon ibana ma lomo ni roha ni Jahowa, sandok songon na binahen ni si Amasia, amana i.

15:4 Holan angka tambak i ndang dilohai; sai tole dope halak situan na torop i mamele dohot manutung daupa di atas angka tambak i.

15:5 Jadi ditorui Jahowa ma rajai, gabe puruon ibana sahat ro di ari hamamatena, gabe punjung ibana maringan di bagasan sada jabu. Alai anggo si Jotam, anak ni rajai, mangarajai bagasna i dohot manguhum bangso isi ni luat i.

15:6 Jamita na tinggal i dope sian si Azaria ro di sude na niulana, nda tarsurat do i di bagasan buku jamita ni angka raja sian Juda?

15:7 Dung i monding ma si Azaria gabe top dohot angka ompuna, jala tartanom ibana di lambung ni angka ompuna di huta ni si Daud, jadi si Jotam anakna i bangkit raja singkatna.

15:8 Patolupuluualutaonhon dung gabe raja sian Juda si Azaria bangkit raja ma si Sakaria, anak ni si Jerobeam gumomgom Israel di Samaria, onom bulan lelengna.

15:9 Dung i diulahon ibana ma sogo ni roha ni Jahowa, suang songon na binahen ni angka ompuna. Ndang dipasurut rohana sian angka dosa ni si Jerobeam, anak ni si Nebat, na mangela Israel mambahen dosa.

15:10 Dung i mambahen parbulanon ma si Sallum, anak ni si Jabes, mangalo ibana, laos dibunu ma rajai di adopan ni situan na torop i gabe mate, jadi ibana ma bangkit raja singkatna.

15:11 Jamita na tinggal i dope sian si Sakaria, ida ma, tarsurat do i di bagasan buku jamita ni angka raja sian Israel.

15:12 Jala on do hata na nilumbahon ni Jahowa hian tu si Jehu, uju na nidokna: Ingkon anakmu ro di sundut paopathon hundul di atas habangsa ni Israel; jadi saut ma songon i.

15:13 Patolupulusiataonhon dung gabe raja sian Juda si Usia, bangkit raja ma si Sallum anak ni si Jabes, jala holan sabulan lelengna ibana mangarajai di Samaria.

15:14 Ai nangkok ma si Menahem, anak ni si Gaddi, sian Tirza, jala sahat ibana tu Samaria, jala ditodos ma si Sallum, anak ni si Jabes di Samaria, gabe mate, jadi ibana bangkit raja singkatna.

15:15 Jamita na tinggal i dope sian si Sallum ro di parbulanon na binahenna i, ida ma tarsurat do i di bagasan buku jamita ni angka raja sian Israel.

15:16 Uju i ma ditaban si Menahem huta Tirza jala dibunu sude pangisina ro di isi ni partalpahanna olat ni Tirza; ala so olo nasida mangungkap harbangan mangoloi patu umbahen dibunui nasida, jala dilapa sude parompuan na marhangoluan.

15:17 Patolupulusiataonhon dung gabe raja sian Juda si Azaria, bangkit raja ma si Menahem, anak ni si Gaddi gumomgom Israel di Samaria sampulu taon lelengna.

15:18 Jala diulahon ibana do sogo ni roha ni Jahowa; ndang dipasurut rohana saleleng mangolu ibana sian angka dosa ni si Jerobeam, anak ni si Nebat, na mangela Israel mambahen dosa.

15:19 Dung i ro ma si Pul, raja sian Assur manola tano i. Jadi dilehon si Menahem ma tu si Pul saribu talenta perak, asa ditolongi ibana pahothon harajaon i di bagasan tanganna.

15:20 Ia perak i didokkon si Menahem do guguon ni halak Israel, sude halak paradongan tahe margugu, limapulu sekkel perak sasahalak lehononna tu raja sian Assur, jadi muli ma raja sian Assur, ndang tinggal ibana di bagasan luat i.

15:21 Jamita na tinggal i dope sian si Menahem ro di sude na niulana, nda tarsurat do i di bagasan buku jamita ni angka raja sian Israel?

15:22 Dung i monding ma si Menahem gabe top dohot angka ompuna, jadi si Pekahia anakna i bangkit raja singkatna.

15:23 Palimapulutaonhon dung gabe raja sian Juda si Azaria, bangkit raja ma si Pekahia, anak ni si Menahem gumomgom Israel di Samaria, dua taon lelengna.

15:24 Jala diulahon ibana do sogo ni roha ni Jahowa, ndang dipasurut rohana sian angka dosa ni si Jerobeam, anak ni si Nebat, na mangela Israel mambahen dosa.

15:25 Dung i marbulan ma si Peka, anak ni si Remalia, ulubalangna i mangalo ibana, laos ditodos ma ibana di Samaria di bagasan jabu ni rajai rap dohot si Argob dohot si Arje angkup ni limapulu halak isi ni Gilead donganna; dung dibunu rajai gabe ibana bangkit raja singkatna.

15:26 Jamita na tinggal i dope sian si Pekahia ro di sude na niulana, ida ma, tarsurat do i di bagasan buku jamita ni angka raja sian Israel.

15:27 Palimapuluduataonhon dung gabe raja sian Juda si Azaria, bangkit raja ma si Peka, anak ni si Remalia gumomgom Israel di Samaria, duapulu taon lelengna.

15:28 Jala diulahon ibana do sogo ni roha ni Jahowa; ndang dipasurut rohana sian angka dosa ni si Jerobeam, anak ni si Nebat, na mangela Israel mambahen dosa.

15:29 Uju di tingki ni si Peka, raja sian Israel, ro ma si Tiglat-Pilesar, raja sian Assur, ditaban ma huta Ijon, Abel Betmaaka, Janoa, Kedes, Hazor, Gilead, Galilea ro di sude tano Naptali, jala dibuangkon angka pangisina i tu Assur.

15:30 Dung i marbulan ma si Hosea, anak ni si Ela mangalo si Peka, anak ni si Remalia, jala ditodos ibana gabe mate, jadi ibana bangkit raja singkatna paduapulu taonhon hinarajahon ni si Jotam, anak ni si Usia.

15:31 Jamita na tinggal i dope sian si Peka ro di sude na niulana, ida ma tarsurat do i di bagasan buku jamita ni angka raja sian Israel.

15:32 Paduataonhon dung gabe raja sian Israel si Peka, anak ni si Remalia, bangkit raja sian Juda ma si Jotam, anak ni si Usia.

15:33 Marumur duapulu lima taon ibana di na bangkit raja, jala sampulu onom taon lelengna ibana mangarajai di Jerusalem; ia goar ni inana, i ma Nai Jerusa, boru ni si Sadok.

15:34 Jala diulahon ibana do lomo ni roha ni Jahowa, sandok songon na binahen ni si Usia amana i.

15:35 Holan angka tambak i ndang dilohai, sai tole dope halak situan na torop i mamele dohot manutung daupa di atas angka tambak i. Ibana huhut pauli pintu harbangan parjulu di joro ni Jahowa.

15:36 Jamita na tinggal i dope sian si Jotam ro di sude na niulana, nda tarsurat do i di bagasan buku jamita ni angka raja sian Juda?

15:37 Di tingki uju i ma dipungka Jahowa marsuru si Resin, raja sian Ram dohot si Peka, anak ni si Remalia mangalo Juda.

15:38 Dung i monding ma si Jotam gabe top dohot angka ompuna, jala tartanom di lambung ni angka ompuna di huta ni si Daud ompuna i. Jadi si Ahas, anakna i bangkit raja singkatna.

2 Raja-raja 16

16:1 Pasampulupitutaonhon dung gabe raja si Peka, anak ni si Remalia, bangkit raja sian Juda ma si Ahas, anak ni si Jotam.

16:2 Marumur duapulu taon si Ahas di na bangkit raja ibana, jala sampulu onom taon lelengna ibana mangarajai di Jerusalem, jala ndang diulahon lomo ni roha ni Jahowa, Debatana, songon ompuna si Daud.

16:3 Ai diihutihut ibana do dalan ni angka raja sian Israel, gari anakna sandiri dipabolushon do sian api mangihuthon biasbias na niulahon ni halak kapir, angka na pinabali ni Jahowa maradophon halak Israel.

16:4 Angkup ni mamele do ibana dohot manutung daupa di atas angka tambak dohot di atas ni angka dolokdolok dohot di toru ni saluhut hau na rugun.

16:5 Uju i ma nangkok si Resin, raja sian Ram dohot si Peka, anak ni si Remalia, raja sian Israel, laho marporang dompak Jerusalem, jala ditungkum si Ahas, alai ndang tarpapatu nasida anggo huta i.

16:6 Di tingki uju i dilaum si Resin, raja sian Ram ma si Elat pamasukkon tu Ram, jala dipabali halak Juda sian Elat, gabe ro halak Ram tu Elat laos maringan disi rasirasa sadarion.

16:7 Alai disuru si Ahas ma angka suruanna manopot Tiglat-Pilesar, raja sian Assur mandok tu ibana: Naposom dohot anakmu do ahu; antong sai nangkok ma ho paluahon ahu sian tangan ni raja sian Ram dohot sian tangan ni raja sian Israel, angka na hehe naeng mangalo ahu.

16:8 Dung i dibuat si Ahas ma perak dohot sere, na jumpang di bagasan joro ni Jahowa dohot di bagasan bilut parpeopan arta na di bagas ni rajai, jala ditongoshon do i bahen silua tu raja sian Assur.

16:9 Jadi dioloi raja sian Assur ma pangidoanna i, nangkok ma raja sian Assur marporang dompak Damaskus laos patu dibahen, jala pangisina i dibuangkon tu Kir, jala dibunu ia si Resin.

16:10 Dung i mardalan ma raja Ahas manjumpangkon Tiglat-Pilesar, raja sian Assur, tu Damaskus. Jadi dung diida sada langgatan di Damaskus, ditongoshon raja Ahas ma sada sumansuman ni langgatan i dohot singana ro di sandok jadijadianna tu malim Uria.

16:11 Jadi dipauli malim Uria ma sada langgatan, sandok suman tu na tinongoshon ni raja Ahas sian Damaskus, songon i do dibahen malim Uria, paima ro raja Ahas sian Damaskus.

16:12 Jadi dung ro rajai sian Damaskus jala diida langgatan i, laos dipajonok rajai ma tu langgatan i jala mamele di atasna.

16:13 Jala ditutung di atasna peleanna situtungon dohot peleanna sipanganon, jala diusehon peleanna siinumon, jala dipistikkon mudar ni angka peleanna hamauliateon tu langgatan i.

16:14 Alai anggo langgatan sian tombaga na di adopan ni Jahowa, dipaorot do i sian hajongjonganna di adopan ni joro i, gabe ndang be jongjong di holangholang ni langgatan dohot joro ni Jahowa, dipaunsat do i tu lambung ni langgatan tungkan utara.

16:15 Dung i didok raja Ahas ma tu malim Uria: Ingkon di atas langgatan na bolon i do tutungonmu pelean situtungon manogotna i dohot pelean sipanganon bodarina i, ro di angka pelean situtungon ni rajai dohot peleanna sipanganon, ro di pelean situtungon ni sandok bangso isi ni tano i dohot pelean sipanganon dohot pelean siinumon di nasida, jala pistikkononmu do tu atasna sandok mudar ni pelean situtungon dohot pelean sipotongon; anggo taringot tu langgatan tombaga i marpingkir dope ahu.

16:16 Jadi dibahen malim Uria ma sandok hombar tu na nidokkon ni raja Ahas.

16:17 Diloha raja Ahas huhut angka topi ni hajongjongan ni parburian, jala dipaunsat angka parburian i sian atasna, dipaijur huhut tobat i sian atas ni angka lombu tombaga, angka na di toruna, jala dibahen do pantar batu hajongjonganna.

16:18 Angkup ni, emper pardalanan di ari Sabbat, na pinauli ni halak di joro i dohot pintu habongotan ni raja sian ruar, dipaunsat do i sian joro ni Jahowa mambuat roha ni raja sian Assur.

16:19 Jamita na tinggal i dope sian si Ahas ro di na niulana, nda tarsurat do i di bagasan buku jamita ni angka raja sian Juda?

16:20 Dung i monding ma si Ahas gabe top dohot angka ompuna, jala tartanom di lambung ni angka ompuna di huta ni si Daud, jadi si Hiskia, anakna i, bangkit raja singkatna.

2 Raja-raja 17

17:1 Pasampuluduataonhon dung bangkit raja sian Juda si Ahas, bangkit raja ma si Hosea, anak ni si Ela, gumomgom Israel di Samaria, sia taon lelengna.

17:2 Jala diulahon do sogo ni roha ni Jahowa, alai ndada songon raja sian Israel, angka na jumolo sian ibana.

17:3 Dung i nangkok ma si Salmanaser, raja sian Assur marporang dompak ibana, gabe dioloi si Hosea ma patu tu ibana dohot mangalehon sohe tu ibana.

17:4 Alai dung didapot raja sian Assur si Hosea mambahen parbulanon, nunga pola disuru angka suruanna manopot raja So sian Misir, jala ndang be diboan sohe tu raja sian Assur, songon na somal ganup taon. Jadi dihurungkon raja sian Assur ma ibana, jala dirante ibana di bagasan hurungan.

17:5 Dung i dilaum raja sian Assur ma sandok tano i sahat ibana dohot tu Samaria jala ditungkum do i tolu taon lelengna.

17:6 Pasiataonhon hinarajahon ni si Hosea, patu ma Samaria dibahen raja sian Assur, jala dibuangkon halak Israel tu Assur, jala didokkon nasida maringan di Hala dohot di Habor martopihon batang aek Gozan dohot tu angka huta ni halak Madai.

17:7 Masa pe songon i, ala naung mardosa halak Israel dompak Jahowa, Debatanasida i, na manogihon nasida nangkok sian tano Misir, paluahon sian gomgoman ni si Firaun raja sian Misir, huhut ala marsomba nasida tu Debata sileban.

17:8 Jala diihuthon nasida hasomalan ni halak parbegu, angka naung nionjar ni Jahowa nian maradophon halak Israel, dohot hasomalan angka na pinungkapungka ni angka raja sian Israel.

17:9 Ala marsibuni huhut halak Israel marparangehon parange angka na so tama maradophon Jahowa, Debatanasida i, dipauli tahe di nasida angka tambak di bagasan saluhut hutanasida i, olat ni tungkup parhalan sahat ro di huta na gonting.

17:10 Dipajongjong huhut di nasida angka tiang panombanombaan dohot sombaon di atas ni saluhut robean na timbo dohot di toru ni saluhut hau na rugun.

17:11 Huhut manutung daupa nasida disi di atas ni saluhut tambak maniru pambahenan ni halak kapir, angka naung pinabali ni Jahowa nian maradophon nasida, jala diulahon nasida angka hajahaton, asa pahehe muruk ni Jahowa dompak nasida.

17:12 Huhut ala marsomba nasida tu angka ganaganaan, atik pe naung marlumba Jahowa tu nasida: Ndang jadi ulahononmuna sisongon i.

17:13 Pola marpanindangion muse Jahowa di Israel dohot di Juda marhite sian pamangan ni saluhut angka panurirangna dohot saluhut jolma parpangungkapon mandok tu nasida: Pauba hamu ma rohamuna sian dalanmuna angka na roa i, jala radoti hamu angka tonangku dohot aturanku, hombar tu sandok patik naung hupatikkon tu angka ompumuna jala naung hutongoshon tu hamu marhite sian angka naposongku, i ma angka panurirang i.

17:14 Hape ndang ditangihon nasida, lam ditangkangi do tangkuhuknasida, suang songon tangkuhuk ni ompunasida, angka na so porsea di Jahowa, Debatanasida i.

17:15 Jala ditoishon rohanasida do angka patikna dohot padan na binahenna i tu ompunasida ro di panindangionna angka na hinatindangkonna tu nasida, jala diihuthon nasida ganaganaan angka na so hasea gabe so hasea dohot nasida, jala marparange nasida songon bangso parbegu angka na humaliang nasida, atik pe naung pola martona Jahowa tu nasida, ndang jadi nasida marparange songon angka bangso parbegu i.

17:16 Alai ditadingkon rohanasida do saluhut tona ni Jahowa, Debatanasida i, jala dibahen di nasida ganaganaan tuangan, i ma lombu na dua i, jala dibahen di nasida angka sombaon, pola marsinggang nasida huhut marsomba tu saluhut parangan na di langit i, jala marsomba nasida tu Baal.

17:17 Huhut dipabolushon nasida angka anakna dohot boruna sian api, diulahon nasida huhut pangarundingon dohot partondungon, jala digadishon dirina laho mangulahon sogo ni roha ni Jahowa, asa pahehe murukna.

17:18 Jadi tarrimas situtu ma Jahowa mida Israel, jala dipaholang nasida sian adopanna, ndang adong na tinggal, nda holan sasada marga Juda.

17:19 Alai tahe nang halak Juda ndang diradoti angka tona ni Jahowa, Debatanasida i, nasida pe diihuthon do hasomalan angka na binahen ni Israel.

17:20 Ala ni dibolongkon Jahowa ma sandok pinompar ni Israel jala tarjimput nasida dibahen, jala dipasahat nasida tu bagasan tangan ni halak partaban, paima Ibana mambolongkon nasida situtu sian adopanna.

17:21 Ai nunga mamulik Israel sian pinompar ni si Daud, jala diparaja nasida si Jerobeam, anak ni si Nebat, jala diela si Jerobeam Israel marbalik sian Jahowa mangulahon dosa na dokdok situtu.

17:22 Jadi diihuthon halak Israel ma tu saluhut dosa ni si Jerobeam, angka na binahenna i, jala ndang sumurut nasida sian i.

17:23 Paima dipaholang Jahowa Israel sian adopanna, songon naung nilumbahonna hian marhite sian saluhut angka naposona, i ma angka panurirang i. Ala ni do umbahen tarbuang Israel sian tanona tu Assur rasirasa sadarion.

17:24 Alai ro ma raja sian Assur disolukkon ma halak sian Babel dohot sian Kuta dohot sian Awa dohot sian Hamat dohot sian Separwaim mandokkon nasida maringan di angka huta ni Samaria singkat ni halak Israel; jadi disoluk nasida ma Samaria jala maringan di bagasan angka hutana.

17:25 Alai anggo di mulana nasida maringan disi ndang marhabiaran nasida tu Jahowa, gabe ditongos Jahowa ma angka singa tu tongatonganasida, angka na mambunu nasida.

17:26 Dung i ninna nasida ma tu raja sian Assur songon on: Bangso parbegu angka naung sinolukkonmi jala nidokkonmi maringan di bagasan angka huta ni Samaria, ndang diboto nasida sambutonna uhum ni Debata pandingini ni tano i, gabe ditongos Ibana angka singa tu tongatonganasida; jala ida ma, nunga dibunui angka nasida, ala so diboto nasida sambutonna uhum ni Debata pandingini ni tano i.

17:27 Dung i ro ma hata ni raja sian Assur mandokkon: Togihon hamu ma tusi sahalak sian malim angka naung binuangkonmuna sian i, asa nasida laho maringan tusi, asa diajarhon tu nasida uhum ni Debata pandingini ni tano i.

17:28 Dung i ro ma sahalak sian malim angka na binuangkon sian Samaria, jala maringan ibana di Betel, jala diajarhon tu nasida parturena marhabiaran tu Jahowa.

17:29 Hape ganup bangso masibahen debatana be jala dipampeakkon tu bagasan joro parsantian, angka na binahen ni halak Samaria, ganup bangso di bagasan huta, angka na niingananna be.

17:30 Ai halak Babel marsomba tu Sukot-Benot, jala halak Kuta marsomba tu Nergal, jala halak Hamat marsomba tu Asima.

17:31 Jala halak Awa marsomba tu Nibhas dohot tu Tartak, jala halak Separwaim manutungi angka anakna di bagasan api marsomba tu Adramelek dohot tu Anamelek, i ma angka debata ni halak Separwaim.

17:32 Adong do huhut sian nasida marsomba tu Jahowa, laos dipabangkit ma sian tongatonganasida halak bahen angka malim di joro parsantian, angka na marhalado di bagasan angka joro parsantian.

17:33 Marhabiaran do nian nasida tu Jahowa, alai huhut nasida marsomba tu angka debata sileban di nasida be, hombar tu hasomalan ni ganup bangso parbegu, haroroannasida i.

17:34 Rasirasa sadarion sai dijujur nasida do hasomalannasida najolo; ndang marhabiaran nasida tu Jahowa, jala ndang haru dijujur nasida hombar tu ruhut dohot hasomalannasida hian, manang hombar tu patik dohot tona, na tinonahon ni Jahowa tu pinompar ni si Jakkob, na marimbang goar Israel binahenna i.

17:35 Pola marpadan Jahowa dohot nasida, jala ditonahon tu nasida songon on: Unang marhabiaran hamu tu angka debata sileban, jala unang marsomba hamu tusi, jala unang hamu marpangoloion tusi, jala unang hamu mamele tusi.

17:36 Holan tu Jahowa, na manogihon hamu ruar sian Misir marhite sian hagogoon godang dohot marhite sian tangan na toltol hamu tama marhabiaran, jala marsomba tu Ibana, jala mamele tu Ibana.

17:37 Angka aturanna pe dohot uhum dohot patik dohot tona, angka naung sinurathonna tu hamu, tama ingkon radotanmuna laho mangulahon tongtong, jala unang hamu marhabiaran tu angka debata sileban!

17:38 Padan na hubahen i pe tu hamu, ndang jadi halupahononmuna, asa unang hamu marhabiaran tu debata sileban.

17:39 Ingkon marhabiaran tu Jahowa, Debatamuna i hamu, asa Ibana paluahon hamu sian tangan ni saluhut musumuna.

17:40 Alai ndang ditangihon nasida, sai diulahon nasida do hombar tu hasomalannasida na jolo.

17:41 Asa tole angka bangso on marhabiaran tu Jahowa, tole huhut marsomba tu angka ganaganaannasida nang anaknasida, nang pahompunasida, laos songon i do dibahen, maniru pambahen ni amanasida rasirasa sadarion.

2 Raja-raja 18

18:1 Patolutaonhon dung gabe raja sian Israel si Hosea, anak ni si Ela, bangkit raja sian Juda ma si Hiskia, anak ni si Ahas.

18:2 Marumur duapulu lima taon ibana di na bangkit raja; jala duapulu sia taon lelengna ibana mangarajai di Jerusalem; ia goar ni inana, i ma si Abia, boru ni si Sakaria.

18:3 Jala diulahon ibana do lomo ni roha ni Jahowa, sandok songon na binahen ni si Daud, ompuna i.

18:4 Dilohai ibana huhut angka tambak jala dibolai angka ganaganaan, jala dipansingkon angka sombaon Asera, jala dirosahi ulok tombaga na binahen ni si Musa; ai rasirasa tingki uju i, sai manutungi daupa halak Israel tusi, jala digoar do i Nehustan.

18:5 Marhaposan tu Jahowa, Debata ni Israel do ibana, jala sian nasa raja di Juda angka na umpudi sian ibana, ndang adong tudoshon ibana marroha, nang sian angka raja na jumolo sian ibana.

18:6 Sai marsilohot do rohana tu Jahowa, ndang dipasurut rohana sian Ibana jala diradoti tonana, angka na tinonahon ni Jahowa tu si Musa.

18:7 Dibahen i, sai didongani Jahowa do ibana, manang tudia pe ibana mangalangka, sai na manjadi do i. Laos mamulik ibana huhut sian raja di Assur, ndang be mangunduk tusi.

18:8 Dipapatu ibana huhut halak Palistim sahat ro di Gaza dohot partalpahannasida, olat ni tungkup parhalan sahat ro di huta na gonting.

18:9 Paopattaonhon dung gabe raja si Hiskia, i ma taon papituhon dung gabe raja sian Israel si Hosea, anak ni si Ela, nangkok ma si Salmanaser, raja sian Assur marporang dompak Samaria, jala ditungkum do i.

18:10 Jala ditaban do i dung salpu tolu taon, i ma paonomtaonhon hinarajahon ni si Hiskia jala pasiataonhon hinarajahon ni si Hosea, raja sian Israel, disi ma tartaban Samaria.

18:11 Jala dibuangkon raja sian Assur do halak Israel tu Assur, jala didokkon nasida maringan di Hala dohot di Habor martopihon batang aek Gozan dohot tu angka huta ni halak Madai.

18:12 Ala na so tinangihonnasida soara ni Jahowa, Debatanasida i, jala dilaosi nasida padan binahenna i dohot sude na tinonahon ni si Musa, naposo ni Jahowa; ndang ditangihon nasida jala ndang diulahon.

18:13 Alai pasampuluopattaonhon dung gabe raja si Hiskia, nangkok ma si Sanherib, raja sian Assur, marporang dompak sude huta ni Juda angka na gonting i, jala dipapatu do i.

18:14 Dung i disuru si Hiskia, raja sian Juda ma suruanna tu Lakis manopot raja sian Assur mandok tu ibana: Nunga mardosa ahu; sai sumurut ma ho sian ahu, manang sadia pe ampehononmu tu ahu jomba bahal, sai gararonku do i. Jadi diampehon raja sian Assur ma tu si Hiskia, raja sian Juda, tolu ratus talenta perak dohot tolupulu talenta sere.

18:15 Jadi dilehon si Hiskia ma sandok perak na jumpang di bagasan joro ni Jahowa dohot di bagasan bilut parpeopan arta di bagas ni rajai.

18:16 Di tingki uju i ma dilongkangi si Hiskia, raja sian Juda, nasa sere sian pintu ni joro ni Jahowa dohot sian tiang angka na nilampisanna sandiri, jala dilehon do i tu raja sian Assur.

18:17 Hape lam disuru raja sian Assur do si Tartan dohot si Rabsaris dohot si Rabsake mardongan parangan mansai torop sian Lakis tu Jerusalem manopot raja Hiskia. Jadi nangkok ma nasida; dung sahat nasida tu Jerusalem, mangulon ma nasida mardonokkon halian aek ni ambar parjulu i, na di lambung dalan na bolon ni ladang panunsian.

18:18 Dung i joujou ma nasida tu rajai. Jadi ruar ma manopot nasida si Eliakim, anak ni si Hilkia, siramoti bagas i dohot si Sebna, juaratulis i dohot si Joa, anak ni si Asap, panuturi i.

18:19 Dung i didok si Rabsake ma tu nasida: Ua paboa hamu ma tu si Hiskia: Songon on do hata ni raja na bolon, raja sian Assur: Tung aha ma pangatauan, na pinangasahonmu?

18:20 Nimmu do: Hatahata ni bibir sambing do i, adong dope tahi dohot hahuasoon tu hamusuon. On pe, tung tu ise ma ho marhaposan, umbahen tung hum roham naeng marbalik sian ahu?

18:21 Ida ma, rupa marhaposan do ho tu tolong na marosak on, i ma Misir, manang ise jolma na martungkothon ibana, tombukonna do tanganna. Songon i do si Firaun, raja sian Misir tu sude jolma na marhaposan tu ibana.

18:22 Alai tung sura naeng dohononmuna tu ahu: Marhaposan tu Jahowa, Debatanami do hami! Nda Ibana do nampuna sombaon dohot langgatan, angka na niloha ni si Hiskia, jala didok do tu Juda dohot tu Jerusalem: Di adopan ni langgatanon do hamu marsomba di Jerusalem.

18:23 On pe, ua martaru ma ho dohot tuanku, raja sian Assur, asa hulehon tu ho dua ribu hoda, manang tuk ma tarlehon ho jolma na mangkunduli?

18:24 Tung beha ma panahanmu mangalo nanggo bohi ni sahalak partogi sian angka naposo apala na ummetmet ni tuanku? Hape tung marhaposan do ho tu Misir, ala hureta dohot ala angka jolma parsihundul.

18:25 On pe, dirimpu ho na so mangasahon Jahowa ahu laho nangkok tu tano on asa husiaphon? Jahowa do tahe naung mandok tu ahu: Nangkok ma ho tu tano on jala siaphon ma i!

18:26 Dung i ninna si Eliakim, anak ni si Hilkia dohot si Sebna dohot si Joa ma tu si Rabsake: Ua hata Ram ma dok tu hami angka naposomon, ai huantusi hami do i, jala unang dok hata Jahudi tu hami di adopan ni situan na torop, na di atas parik.

18:27 Alai ninna si Rabsake ma tu nasida: Tung tu tuanmu huroha dohot tu ho disuru tuanku ahu mandok angka hata on? Nda huhut do tu baoa angka na hundul di atas parik, angka na manganhon ginagatnasida dohot manginum teposnasida rap dohot hamu?

18:28 Jadi hehe ma si Rabsake dipangiar ma soarana mandok di hata Jahudi: Tangihon hamu ma hata ni raja na bolon, raja sian Assur!

18:29 Songon on do hata ni rajai: Unang olo hamu paotootoon ni si Hiskia, ai ndang tarbahen ibana paluahon hamu sian tanganna.

18:30 Jala unang olo hamu paposon ni si Hiskia mangasahon Jahowa mandok: Sai na paluaon ni Jahowa do hita, ndang tagamon pasahatonna huta on tu bagasan tangan ni raja sian Assur.

18:31 Unang tangihon hamu hata ni si Hiskia, ai songon on do hata ni raja sian Assur: Lehon hamu ma jomba bahal tu ahu, jala ruar hamu mandapothon ahu, asa ganup hamu mangan sian hau anggurna dohot sian hau antajauna, jala minum tapian ganup sian sumurna.

18:32 Paima ro ahu jala hualap hamu tu tano na songon tanomuna i, tu tano hatubuan ni eme dohot anggur, tu tano na lobian di roti dohot di porlak anggur, tu tano na lobian di hau jetun dohot di situak ni loba, asa laos mangolu hamu jala unang mate. Sai unang tangihon hamu hata ni si Hiskia, ai na paotootohon hamu do ibana molo didok: Sai paluaon ni Jahowa do hita.

18:33 Atehe, nunga tung dipalua debata ni angka bangso parbegu ganup luatna be, sian tangan ni raja sian Assur?

18:34 Didia do nuaeng angka debata sian Hemat dohot sian Arpad? Didia do angka debata sian Separwaim, Hena dohot Iwa? Tung adong ma na paluahon Samaria sian tanganku?

18:35 Tung ise ma sian sude debata ni angka luat ondeng na tuk paluahon tanonasida sian tanganku, umbahen muba huroha ia Jerusalem paluaon ni Jahowa sian tanganku?

18:36 Jadi sip be ma situan na torop i, jala ndang adong na mangalusi ibana nanggo sandok, ai songon i do tona ni rajai: Unang alusi hamu ibana!

18:37 Dung i ro ma si Eliakim, anak ni si Hilkia, panahatan ni bagas i dohot si Sebna, juaratulis i dohot si Joa, anak ni si Asap panuturi i manopot si Hiskia, marulos na maribak, laho paboahon tu ibana angka hata ni si Rabsake.

2 Raja-raja 19

19:1 Jadi dung dibege raja Hiskia hata i, diribahi ma pangkeanna jala marulos tangki ibana laho manopot joro ni Jahowa.

19:2 Dung i disuru ma si Eliakim, panahatan ni bagasna i dohot si Sebna, juaratulis i rap dohot malim angka na tumua i, rap marulos tangki be manopot panurirang Jesaya, anak ni si Amos.

19:3 Asa dohononnasida tu ibana: Songon on do hata ni si Hiskia: Ari hagogotan dohot paminsangon dohot haurahon do ari on, ai nunga jumpang nian hasasanga ni posoposo tubu, hape ndang adong gogo laho manubuhon.

19:4 Anggiat tung dibege Jahowa, Debatam hata ni si Rabsake, angka na tinonahon ni raja sian Assur tuanna i, laho manginsahi Debata na mangolu i, anggiat ditorui ibana ala ni hata angka naung binege ni Jahowa, Debatam; antong patolhas ma tangiangmi mangondihon pasipasi na jumpang i.

19:5 Jadi dung sahat angka naposo ni raja Hiskia tu si Jesaya.

19:6 Ro ma hata ni Jesaya tu nasida mandok: Songon on do dohononmuna tu tuanmuna i: Songon on do hata ni Jahowa: Unang ho mabiar maradophon hata angka naung binegem, angka naung niinsakkon ni angka naposo ni raja sian Assur, palea Ahu.

19:7 Ida ma, Ahu ma mangalehon tu bagasan rohana sada tondi, asa begeonna barita jala mulak tu tanona, asa Ahu mangaragehon ibana marhitehite podang di bagasan tanona sandiri.

19:8 Dung i mulak ma si Rabsake, gabe marmusu dompak Libna raja ni Assur i didapot; ai nunga tarbortik hian tu pinggolna naung borhat ibana sian Lakis.

19:9 Jala dibege barita taringot tu si Tirhaka, raja sian Kus didok halak: Ida ma, nunga borhat ibana laho marmusu dompak ho! Jadi diulahi ma marsuru angka suruanna manopot si Hiskia mandok:

19:10 Songon on ma dok hamu tu si Hiskia, raja sian Juda: Unang olo ho paotootoon ni Debatam, na pinangasahonmu mandok: Ndang tagamon pasahatonna Jerusalem tu bagasan tangan ni raja sian Assur.

19:11 Ida ma, nunga dibege ho na binahen ni angka raja sian Assur tu sude angka luat laho mangarendephon angka i, ia ho hape, tung tagamon ma ho malua?

19:12 Tung adong ma angka debata ni bangso parbegu na tuk paluahon nasida, angka na siniaphon ni angka daompung, i ma Gozan, Haran, Resep dohot angka anak ni Eden, angka na maringan di Telasar?

19:13 Didia nuaeng raja sian Hamat dohot raja sian Arpad dohot raja sian huta Separwaim, Hena dohot Iwa?

19:14 Jadi dibuat si Hiskia ma surat i sian tangan ni angka suruani, jala dijaha, dung i nangkok ma ibana tu joro ni Jahowa, jala dipaherbang raja Hiskia ma surat i di adopan ni Jahowa.

19:15 Dung i martangiang ma si Hiskia tu Jahowa: Ale Jahowa, Debata ni Israel, na marhabangsahon angka kerubim, sasada Ho do Debata ni saluhut harajaon di tano on, Ho do na tumompa langit dohot tano on!

19:16 Sai paeleng ma pinggolmu, ale Jahowa, jala tangihon! Sai patonggor ma matam, ale Jahowa, jala ida, jala tangihon sude hata ni si Sanherib, angka na tinonahonna i laho mangarehei Debata na mangolu i.

19:17 Tongon tahe, ale Jahowa, nunga nian disiaphon angka raja sian Assur saluhut angka bangso parbegu dohot luatnasida i.

19:18 Jala nunga ditimpalhon tu api angka debatanasida i, ai ndang tongon debata angka i, jadijadian ni tangan ni jolma do tahe, hau dohot batu, umbahen disiaphon angka i.

19:19 On pe, ale Jahowa, Debatanami, sai palua ma hami sian tanganna, asa tung mananda saluhut harajaon di tano on, paboa sasada Ho do Debata, ale Jahowa!

19:20 Dung i marsuru suruanna ma si Jesaya, anak ni si Amos manopot si Hiskia mandok tu ibana: Songon on do hata ni Jahowa, Debata ni Israel: Anggo naung pinangidom sian Ahu taringot tu si Sanherib, raja sian Assur, nunga hutangihon.

19:21 On do hata na tinonahon ni Jahowa dompak ibana: Mamaus jala mangarehe mida ho do namarbaju boru Sion i, mangupir do ia ulu ni boru Jerusalem sian pudim.

19:22 Ise tahe naung nireheanmu jala nielesanmu? Jala dompak ise dipangiar ho soaram, jala mamaus matam dompak ginjang? Dompak na badia ni Israel do tahe!

19:23 Marhite sian pamangan ni angka naposom dielesi ho Tuhan i, jala nimmu do: Binahen ni hinadeak ni angka huretangku, ahu manaek tu ginjang ni angka dolok, tu partalpahan ni Libanon, asa hutaba angka hau Ares na timbo i, dohot angka marantina na dumenggan i, jala tolhas ahu tu punsuna, tu tombak hasoloanna.

19:24 Nunga huhali jala huinum aek na pulik, jala nunga huarsik marhitehite palak ni pathu sude sunge ni Misir.

19:25 Ndang dung dibege ho dope naung songon i hubahen sian na robi, di angka ari na galia hujadihon i? Nuaeng pe asa huparo, ingkon siap bahenonmu angka huta na gonting bahen timbunan batu.

19:26 Jala angka pangisina i partangan na so marnangon i, ingkon tarsonggot do jala tarurak; ingkon manjadi duhutduhut di ladang do nasida dohot ingkau rata, songon ri tu angka tarup, jala antinganoon eme tagan so bibi dope.

19:27 Nunga huboto hian hundulanmu dohot haruruarmu dohot habobongotmu dohot pangogaogaonmu dompak Ahu.

19:28 Ala na mangoga ho dompak Ahu, jala tolhas tu pinggolhu hajungkatonmu, jadi bahenonku ma harihir tu igungmu dohot kokang tu bibirmu, jala toguonku ma ho mulak sian dalan haroroanmi.

19:29 Jala on ma partinandaan di ho: Panganonmu ma sataon on eme sagak dohot di taon paduahon, alai anggo patolutaonhon manabur ma hamu jala manggotil jala manuan porlak anggur jala panganonmu parbuena.

19:30 Jala datdatan ni angka na malua sian pinompar ni Juda, angka pasipasina i ma marurat tu toru jala marparbuehon parbue tu ginjang.

19:31 Ai sian Jerusalem do ruar pasipasi dohot angka na malua sian dolok Sion. Hamuruhon ni Jahowa Zebaot patupahon songon i.

19:32 Dibahen i, songon on do hata ni Jahowa taringot tu raja sian Assur: Na so tupa ibana bongot tu huta on manang siorhononna tusi nanggo sada sumbia, manang dapothononna marlombulombu, manang bahenonna hubu humaliang huta i.

19:33 Ingkon sian dalan haroroanna ibana mulak, alai anggo tu huta on na so tupa ibana bongot, ninna Jahowa.

19:34 Ai ingkon Ahu mangondingi huta on laho paluahon, ala ni Ahu dohot ala ni naposongku si Daud.

19:35 Dung i laos di borngin na sasada i, ruar ma suruan ni Jahowa, jala dibunu di parsaroan ni Assur saratus ualupulu lima ribu halak. Jadi dung hehe nasida sogot manogotna i, ida ma, saluhut nasida nunga gabe bangke.

19:36 Jadi borhat ma si Sanherib, raja sian Assur laho mulak, laos maringan ibana di Ninive.

19:37 Jadi uju na marsomba ibana di bagasan joro ni Nisrok debatana i, ro ma si Adramelek dohot si Sar-Eser, angka anakna i mambunu ibana marhitehite podang, dung i maporus ma nasida tu tano Ararat. Jadi si Esarhaddon, anakna i, bangkit raja singkatna.

2 Raja-raja 20

20:1 Di angka ari uju i marsahit ma si Hiskia, pola matemate ne. Jadi ro ma manopot ibana panurirang Jesaya, anak ni si Amos, jala didok mandok ibana: Songon on do hata ni Jahowa: Pature ma bagasmu, ai na mate ma ho, ndang tagamon mangolu be.

20:2 Dung i dipahusor rajai ma bohina dompak dorpi, jala martangiang tu Jahowa songon on:

20:3 Oe ale Jahowa, sai marningot ma Ho na marpangalaho i ahu di adopanmu, di bagasan hasintongan dohot punia ni roha, jala na huulahon na denggan di adopan ni bohim, huhut tumatangis situtu si Hiskia.

20:4 Alai ndang dope ruar si Jesaya sian tongatonga ni huta i, nunga ro muse hata ni Jahowa tu ibana songon on:

20:5 Mulak ma ho, jala dok ma tu si Hiskia, partogi ni bangsongku: Songon on do hata ni Jahowa, Debata ni ompum si Daud: Nunga hutangihon tangiangmi, nunga huida partangisonmi; ida ma, pamalumonku ma ho, di ari patoluhon i tarbahen ho ma nangkok tu joro ni Jahowa!

20:6 Jala Ahu manambai tu angka ariarim sampulu lima taon nari, jala Ahu paluahon ho dohot huta on sian tangan ni raja di Assur, jala ondinganku do huta on ala Ahu dohot ala ni si Daud naposongki.

20:7 Dung i ninna si Jesaya ma: Boan hamu tuson hare sian antajau. Jadi diboan nasida ma i, jala dilanggumhon tu atas baro ni rajai, gabe malum dihilala.

20:8 Dung i ninna si Hiskia ma tu si Jesaya: Dia do partinandaan paboa na tutu pamalumon ni Jahowa ahu, jala tarbahen ahu patoluarihon nangkok tu joro ni Jahowa?

20:9 Dung i ninna si Jesaya ma: On ma partinandaan di ho sian Jahowa, paboa pasauton ni Jahowa do hata naung nidokna i: Ingkon dompak dia dohononku mardalan halinu ni angka gurat, na dompak jolo do manang na dompak pudi?

20:10 Jadi didok si Hiskia ma: Mura do halinu i anggo gistang tu jolo sampulu gurat, ndada i, ingkon mulak tu pudi do halinu i sampulu gurat.

20:11 Jadi joujou ma panurirang Jesaya tu Jahowa, gabe dipaulak Jahowa ma halinu ni gurat i angka naung mijur di jom ni si Ahas sampulu gurat tu pudi.

20:12 Di tingki uju i ma disuru Merodak-Baladan, anak ni si Baladan, raja sian Babel suruanna mamboan surat dohot silua tu si Hiskia, ai nunga tarbortik tu pinggolna na marsahit i si Hiskia.

20:13 Jadi las ma roha ni si Hiskia mida angka suruani, jala dipatuduhon tu nasida sandok bagas parpeopan ni artana, ro di perak dohot sere, ro di angka pamurpuri dohot miak na hushus, ro di nasa bagas parpeopan ni sinjata dohot sude na jumpang di angka bagas parpeopan ni artana; tung na so adong do nanggo sada na so pinatuduhon ni si Hiskia tu nasida tole di bagasan bagasna dohot di sandok harajaonna.

20:14 Dung i ro ma panurirang Jesaya tumopot raja Hiskia, jala didok ma tu ibana: Aha do didok angka baoa i, jala sian dia do nasida ro manopot ho? Jadi ninna si Hiskia ma: Sian luat na dao do nasida ro, sian Babel tahe.

20:15 Dung i ninna si Jesaya ma muse: Aha do na niidanasida di bagasan jabum? Dung i ninna si Hiskia ma: Nasa na di bagasan jabungku nunga diida nasida; nda tung adong nanggo sada di bagasan angka jabu parpeopan ni artangki, na so hupatuduhon i tu nasida.

20:16 Dung i ninna si Jesaya ma tu si Hiskia: Tangihon ma hata ni Jahowa!

20:17 Ida ma, na ro do angka ari sogot, tarboan ma disi nasa na di bagasan jabum dohot na sinamotsamot ni angka ompum rasirasa sadarion tu Babel; ndang adong teba nanggo sada, ninna Jahowa.

20:18 Jala sian anakmu, angka na marama tu ho, angka situbuhononmu dope, buatonnasida ma, asa gabe jolma suruanna di bagasan bagas ni raja sian Babel.

20:19 Dung i ninna si Hiskia ma tu si Jesaya: Denggan do hata ni Jahowa, na nidokmi. Angkup ni didok muse: Asal sonang jala mardemak saleleng mangolu ahu!

20:20 Jamita na tinggal i dope sian si Hiskia ro di sandok huasona dohot na binahenna i ambar dohot halian aek, asa manogunogu aek tu bagasan huta, nda tarsurat do i di bagasan buku jamita ni angka raja sian Juda?

20:21 Dung i monding ma si Hiskia, gabe top dohot angka ompuna, jala si Manasse, anakna i bangkit raja singkatna.

2 Raja-raja 21

21:1 Marumur sampulu dua taon dope si Manasse di na bangkit raja ibana, jala limapulu lima taon lelengna ibana mangarajai di Jerusalem; ia goar ni inana i ma Nai Hepsiba.

21:2 Dung i diulahon rajai na sogo ni roha ni Jahowa, hombar tu biasbias angka na niulahon ni bangso parbegu, angka naung pinabali ni Jahowa nian maradophon halak Israel.

21:3 Jala diulahi rajai paulihon joro parsantian, angka naung nilohaan ni si Hiskia, amana i, jala dipajongjong angka langgatan di Baal, jala dibahen sada sombaon Asera, suang songon na binahen ni si Ahab, raja sian Israel, jala marsomba ibana tu sandok parangan di langit, jala marpangoloion tusi.

21:4 Jala dipajongjong angka langgatan di bagasan joro ni Jahowa, taringot tusi nunga pola didok Jahowa hian: Di Jerusalem do pahotonku Goarhu.

21:5 Angkup ni, dipauli do angka langgatan di sandok parangan di langit di bagasan na dua alaman ni joro ni Jahowa.

21:6 Jala dipabolushon anakna sandiri sian bagasan api, diulahon do huhut pangarundingon dohot parsibalikmataon, jala dipabangkit angka jolma bahen hasandaran ni begu dohot partondung, tung na godang situtu do diulahon sogo ni roha ni Jahowa, asa pahehe rimasna.

21:7 Dipajongjong huhut ganaganaan Asera naung binahenna i tu bagasan joro, naung pola nian didok Jahowa hian tu si Daud dohot tu si Salomo anakna i songon on: Tu bagasan joro on dohot tu bagasan Jerusalem, naung hupilliti sian saluhut marga ni Israel, pahotonku Goarhu ro di salelenglelengna.

21:8 Jala ndang be paunsatonku pat ni Israel sian tano, naung hubasabasahon tu ompunasida i, asal diringkoti nasida laho mangulahon hombar tu saluhut naung hutonahon i tu nasida, jala diihuthon tu sandok patik naung tinonahon ni naposongku si Musa tu nasida.

21:9 Alai ndang ditangihon nasida hata i, ai dililuhon si Manasse do nasida laho mangulahon hajahaton, gumodang sian bangso parbegu, angka naung nirendephon ni Jahowa maradophon halak Israel.

21:10 Dung i marlumba ma Jahowa marhite sian pamangan ni angka naposona, i ma angka panurirang i, ninna ma:

21:11 Ala naung diulahon si Manasse, raja sian Juda biasbiason, angka na rumoa sian saluhut na niulahon ni halak Amori, angka na jumolo sian ibana, tole dohot Juda diela mangulahon dosa marhite sian angka ganaganaan binahenna i.

21:12 Dibahen i songon on do hata ni Jahowa, Debata ni Israel: Ida ma, paroonku ma jea tu Jerusalem dohot tu Juda, ganup na umbegesa pola tung marnginging pinggolna duansa.

21:13 Jala pagistangonku ma tu atas ni Jerusalem hotang pamalok ni Samaria dohot tali rambu ni pinompar ni si Ahab, jala buriapus Jerusalem bahenonku, songon pangapusi ni halak di pinggan, jala ia dung diapusi dipatungkap do i panepnephon.

21:14 Jala tadingkononku do pasipasi ni partalianku, jala pasahatonku nasida tu bagasan tangan ni musunasida, asa tabanon ni halak nasida jala ripe pupusan ni saluhut musuna.

21:15 Ala na niulahonnasida i sogo ni rohangku, jala dipahehe murukku, olat ni ari na hutogihon i ompunasida i ruar sian Misir rasirasa sadarion.

21:16 Angkup ni mansai godang situtu mudar na so marpipot didurushon si Manasse, pola tung gok Jerusalemi dibahen sian ujung na sada tu ujung na sadanari, di balik ni dosana na asing, na nielana i Juda mambahen dosa, laho mangulahon sogo ni roha ni Jahowa.

21:17 Jamita na tinggal i dope sian si Manasse ro di sude na niulana dohot dosana na binahenna i, nda tarsurat do i di bagasan buku jamita ni angka raja sian Juda?

21:18 Dung i monding ma si Manasse gabe top dohot angka ompuna, jala tartanom di bagasan porlak mardonokkon jabuna i, di bagasan porlak ni si Usa tahe, jala si Amon anakna i bangkit raja singkatna.

21:19 Marumur duapulu dua taon si Amon di na bangkit raja ibana, jala dua taon lelengna ibana mangarajai di Jerusalem; ia goar ni inana i ma si Mesulemet, boru ni si Harus sian Jotba.

21:20 Jala diulahon ibana do sogo ni roha ni Jahowa, suang songon na binahen ni si Manasse amana i.

21:21 Ai diihutihut ibana do sandok dalan na nidalanan ni amana i, jala dioloi do debata sileban, angka na nioloan ni amana i, jala marsomba do ibana tusi.

21:22 Jala ditadingkon do Jahowa, Debata ni angka ompuna, jala ndang marparange ibana di bagasan dalan ni Jahowa.

21:23 Dung i marbulan ma angka naposo ni si Amon mangalo ibana, jala dibunu rajai di bagasan jabuna.

21:24 Alai ro ma bangso isi ni luat i mambunu saluhut jolma angka na marbulani mangalo raja Amon. Jadi dipabangkit isi ni tano i ma si Josia anakna i, bahen raja singkatna.

21:25 Jamita na tinggal i dope sian si Amon ro di na niulana, nda tarsurat do i di bagasan buku jamita ni angka raja sian Juda?

21:26 Jadi tartanom ma ibana di bagasan tanomanna, di bagasan porlak ni si Usa tahe; jadi si Josia anakna i bangkit raja singkatna.

2 Raja-raja 22

22:1 Marumur ualu taon do si Josia di na bangkit raja ibana, jala tolupulu sada taon lelengna ibana mangarajai di Jerusalem; ia goar ni inana, i ma si Jedida, boru ni si Adaya sian Boskat.

22:2 Jala diulahon ibana do lomo ni roha ni Jahowa, jala diihutihut do sandok dalan ni si Daud ompuna i, jala ndang manimbil ibana tu siamun manang tu hambirang.

22:3 Jadi dung marumur sampulu ualu taon raja Josia, disuru rajai ma si Sapan, anak ni si Azalia, tubu ni si Mesulam, juaratulis i, tu joro ni Jahowa mandok:

22:4 Nangkok ma ho manopot sintua ni malim Hilkia mandok tu ibana, ingkon etonganna perak na binoan tu joro ni Jahowa, angka na pinapungu ni halak sijaga pintu sian na torop i.

22:5 Asa lehononna perak i tu bagasan tangan ni halak panahatan ni ulaon di bagasan joro ni Jahowa, asa nasida muse marsagihon tu halak pangula, angka na di bagasan joro ni Jahowa, asa patipakonna na sega di bagasan joro i.

22:6 I ma tu halak tungkang hau dohot tu angka pande maninga dohot tu angka tungkang batu dohot tu halak angka na manuhori parhau dohot batu na nidakdak laho patipak joro i.

22:7 Alai ndang pola masietongan nasida dohot baoa panahatan ni perak i, ai ingkon masihaposan do nasida.

22:8 Dung i didok sintua ni malim Hilkia ma tu si Sapan juaratulis i: Nunga jumpang ahu buku patik i di bagasan joro ni Jahowa. Jadi dilehon si Hilkia ma buku i tu si Sapan, asa jahaonna.

22:9 Dung i ro ma muse si Sapan juaratulis i tu jolo ni rajai, asa mamboan barita tu rajai, ninna ma: Nunga diusehon angka naposom perak na jumpang i di bagasan joro ni Jahowa, jala dilehon do i tu halak panahatan ni ulaon di bagasan joro ni Jahowa.

22:10 Angkup ni dibaritahon si Sapan, juaratulis i tu rajai, ninna ma: Nunga dilehon malim Hilkia sada buku tu ahu. Jadi dijaha si Sapan ma buku i di adopan ni rajai.

22:11 Alai dung dibege rajai angka hata ni buku patik i, disansani rajai ma pangkeanna.

22:12 Dung i ro ma hata ni rajai mandokkon malim Hilkia dohot si Ahikam, anak ni si Sapan dohot si Akbor, anak ni si Mikha dohot si Sapan, juaratulis i dohot si Asaya, parhalado ni rajai, ninna ma.

22:13 Laho ma hamu manungkunhon tu Jahowa taringot tu ahu dohot taringot tu bangso i dohot taringot tu sandok Juda, ala ni hata ni angka buku on na jumpang i, ai tung na balga situtu do rimas ni Jahowa, na marsigorgor mida hita, ala so ditangihon ompunta i angka hata ni buku on mangulahon nian luhut na tarsurat tu hita disi.

22:14 Dung i laho ma malim Hilkia, si Ahikam, si Akbor, si Sapan dohot si Asaya manopot panurirang Nai Hulda, jolma ni si Sallum, anak ni si Tikwa, anak ni si Harhas, siramoti pangkean Alai maringan do Nai Hulda di Jerusalem partoruan, gabe mangkatai nasida dohot ibana.

22:15 Dung i ninna Nai Hulda ma tu nasida: Songon on do hata ni Jahowa, Debata ni Israel: Paboa hamu ma tu baoa na marsuru hamu manopot ahu.

22:16 Songon on do hata ni Jahowa: Ida ma, paroonku ma jea tu huta on dohot tu jolma isina i, hombar tu saluhut hata ni buku i, angka naung jinaha ni raja sian Juda.

22:17 Ala naung tinadingkonnasida i Ahu jala manutung daupa nasida tu angka debata sileban, asa pahehe rimashu marhite sian sude pambahenan ni tanganna, gabe ingkon marsigorgor rimashu mida inganan on, jala ndang be haintopan.

22:18 Alai anggo tu raja sian Juda, na marsuru hamu laho manungkunhon tu Jahowa, ingkon songon on do dohononmuna tu ibana: Songon on do hata ni Jahowa, Debata ni Israel, anggo taringot tu hata angka naung binegem i:

22:19 Ala naung mangilala roham, jala dipaunduk ho dirim di adopan ni Jahowa, dung dibege ho hata angka na hulumbahon i dompak huta on, dohot dompak jolma pangisina i, ingkon gabe halongonan do i jala sipulaspulason ni halak; ala naung diribahi ho pangkeanmu huhut tumatangis di adopan ni Bohingku, Ahu pe nunga hutangihon ho, ninna Jahowa.

22:20 Dibahen i, ida ma, Ahu sandiri papunguhon ho tu angka ompum, asa marsonangsonang ho papunguonna tu bagasan tanomanmu, asa unang sanga idaon ni matami saluhut jea na naeng paroonku tu atas ni huta on. Jadi diboan nasida ma hata i tu rajai.

2 Raja-raja 23

23:1 Dung i disuru rajai ma suruanna asa paluhuthon tu jolona saluhut sintua sian Juda dohot Jerusalem.

23:2 Dung i nangkok ma rajai tu joro ni Jahowa rap dohot sude baoa sian Juda dohot sude pangisi ni Jerusalem ro di angka malim dohot panurirang dohot sandok situan na torop i, tole angka na metmet ro di na magodang, laos didokkon ma manjaha tu pinggolnasida saluhut hata ni buku parjanjian na jumpang i di bagasan joro ni Jahowa.

23:3 Dung i jongjong ma rajai tu lambung tiang i laho mambahen parpadanan di adopan ni Jahowa, ingkon naeng magihuthon tu Jahowa dohot mangaradoti angka tonana dohot panindangionna dohot aturanna sian nasa rohana dohot sian nasa ateatena laho pahothon hata ni padan on, angka na tarsurat di bagasan buku on. Jadi sandok bangso i mangundukkon padani.

23:4 Dung i didokkon rajai ma sintua ni malim Hilkia dohot angka malim paidua dohot angka sijaga pintu, asa paruaronna sian joro ni Jahowa sude ulaula angka na pinauli di Baal dohot di sombaon Asera dohot di sandok parangan di langit, laos ditutung ibana ma luhutna i di balian ni Jerusalem, di angka ladang martopihon sunge Kidron, jala sirabunna i didokkon do boanon tu Betel.

23:5 Dung i dipaijur rajai ma halak malimmalim, angka na pinabangkit ni angka raja sian Juda, asa manutung daupa nasida di atas tambak angka na di bagasan huta ni Juda dohot humaliang Jerusalem; tole huhut angka jolma na manutung daupa di Baal, di mata ni ari, di bulan dohot di sude bintang, i ma sandok parangan di langit.

23:6 Didokkon rajai huhut paruaron ganaganaan Asera sian joro ni Jahowa tu balian ni Jerusalem, tu rura ni sunge Kidron, laos ditutung do i di rura ni Kidron, jala digopui gabe sirabun, jala sirabunna i disaburhon do tu tanoman ni halak situan na torop i.

23:7 Angkup ni dilohai do angka bagas ni baoa angka na marjolmahon baoa, angka na mardonokkon joro ni Jahowa, inganan ni parompuan angka na martonun abit undungundung di sombaon Asera.

23:8 Dung i didokkon ma ro sude malim sian angka huta ni Juda, jala diramuni angka tambak, panutungan ni angka malim di daupa, olat ni Geba sahat ro di Beerseba, jala dilohai do angka tambak di partungkoan, tole tambak di haroroan tu bahal ni si Josua, induk ni huta i, na di hambirang ni ganup jolma na masuk tu bahal ni huta i.

23:9 Alai anggo angka malim ni tambak, ndang jadi mamele di atas ni langgatan ni Jahowa na di Jerusalem, asal mangan sagusagu na so niasoman nasida di tongatonga ni angka hahaanggina.

23:10 Diramuni ibana huhut Topet na di rura ni angka anak ni si Hinnom, asa unang tarbahen manang ise be pabolushon anakna manang boruna sian api laho mamele tu Molok.

23:11 Dipaholang do huhut hoda, angka na niapus ni angka raja sian Juda pasahathon tu mata ni ari sian lambung pintu laho bongot tu joro ni Jahowa tungkan bilut panganan ni Netan-Melek ni halak parhalado na maringan di angka alaman, alai anggo hureta ni mata ni ari ditutung do i di bagasan api.

23:12 Dilohai raja huhut langgatan angka na di atas tarup ni bilut parginjang ni si Ahas, angka na pinauli ni angka raja sian Juda; tole langgatan angka na pinauli ni si Manasse di na dua alaman ni joro ni Jahowa, ndang adong tinggal disi nanggo sada, jala sirabunna i disirsirhon do tu sunge Kidron.

23:13 Tole tambak angka na di adopan ni Jerusalem, tungkan siamun ni dolok hamagoan, angka na pinauli ni si Salomo raja sian Israel di sombaon Astarot, biasbias ni halak Sidon dohot di Kamos, biasbias ni halak Moab dohot di Milkom, biasbias ni halak Amon, luhutna i diramuni rajai do.

23:14 Diponggolhon huhut angka tiang panombanombaon jala ditaba angka sombaon Asera, jala digohi hajongjonganna i dohot holiholi ni halak na mate.

23:15 Tole muse langgatan na di Betel, dohot tambak na pinauli ni si Jerobeam, anak ni si Nebat, na mangela Israel mambahen dosa, langgatan na sasada i dohot tambak i dilohai rajai do jala ditutung do ia tambak i jala disirabuni, disurbu dohot sombaon Asera.

23:16 Dung i dibereng si Josia ma humaliang, gabe diida tanoman angka na disi di atas dolok, jala disuru suruanna mangongkal angka holiholi sian angka tanoman i jala ditutung do i di atas langgatan i laho paramunhon, hombar tu hata ni Jahowa, naung jinouhon ni halak ni Debata hian na palumbahon angka hata on.

23:17 Dung i ninna rajai ma muse: Hinambor ni ise do i na huida on? Jadi ninna angka baoa isi ni huta i ma tu ibana: Hinambor ni halak ni Debata do i, na ro sian Juda jala na manjouhon angka hata i na binahenmi nuaeng tu langgatan na di Betel.

23:18 Dung i ninna raja ma: Pasombu hamu ma ibana modom, ndang jadi haoran ni manang ise holiholina! Jadi diolani nasida ma holiholina i rap dohot holiholi ni panurirang na ro sian Samaria.

23:19 Angkup ni, dilohai si Josia huhut saluhut joro parsantian, angka na di bagasan huta ni Samaria, angka na pinauli ni angka raja sian Israel, pahehe rimas ni Jahowa, jala dibahen tusi sandok songon na binahenna i di Betel.

23:20 Dung i diseati ma saluhut malim ni joro parsantian, angka na disi, di atas ni angka langgatan, jala ditutungi holiholi ni jolma di atasna, dung i mulak ma ibana tu Jerusalem.

23:21 Dung i didok rajai ma tu sandok situan na torop i songon on: Marulaon Paska ma hamu di Jahowa, Debatamuna i, songon na tarsurat di bagasan buku parpadanan on.

23:22 Ai ndang dung marulaon Paska nasida songon sahalion, olat ni tingki ni panguhum, angka na parenta halak Israel ro di sandok tingki ni angka raja sian Israel dohot sian Juda.

23:23 Pasampuluualutaonhon hinarajahon ni si Josia marulaon Paska nasida tu Jahowa di Jerusalem.

23:24 Dipaholang raja Josia huhut saluhut halak hasandaran ni begu dohot partondung dohot terapim dohot ganaganaan ro di sude biasbias angka na dapot idaon di tano Juda dohot di Jerusalem, asa pahothon hata ni patik i ibana, angka na tarsurat di bagasan buku na jumpang malim Hilkia di bagasan joro ni Jahowa.

23:25 Jala tudoshon ibana ndang adong nanggo sada sian angka raja na jumolo sian ibana, na paubahon rohana tu Jahowa sian nasa rohana dohot sian nasa ateatena dohot sian nasa gogona, hombar tu sandok patik ni si Musa, jala sian pudina pe ndang adong hehe raja songon ibana marroha.

23:26 Alai atik pe songon i ndang marpangulahi roha ni Jahowa sian parpiarpiar ni rimasna na godang i, sai marsigorgor do rimasna mida Juda ala saluhut pinggilpinggil na binahen ni si Manasse pahehe murukna i.

23:27 Dung i ninna Jahowa ma: Nang Juda paholangonku do sian adopan ni Bohingku, songon naung hupaholangi Israel, jala bolongkononku ma huta on naung hupilliti, i ma Jerusalem, dohot joro naung pola hudok nian: Ingkon disi maringan Goarhu!

23:28 Jamita na tinggal i dope sian si Josia ro di sude na niulana, nda tarsurat do i di bagasan buku jamita ni angka raja sian Juda?

23:29 Uju di tingki ni rajai, nangkok ma Firaun-Neko, raja sian Misir laho marporang dompak raja sian Assur sahat ro di sunge Euprat; gabe ro raja Josia mangambat ibana, hape disi tole martongtang nasida dibunu Firaun do ibana di Megiddo.

23:30 Dung i diboan angka naposona ma bangke ni rajai di atas hureta, sian Megiddo tu Jerusalem, jala ditanom ibana di bagasan tanomanna. Dung i ro ma bangso isi ni tano i dibuat ma si Joahas, anak ni si Josia, jala dimiahi ibana pabangkithon gabe raja singkat ni amana i.

23:31 Marumur duapulu tolu taon do si Joahas di na bangkit raja ibana jala tolu bulan lelengna ibana mangarajai di Jerusalem; ia goar ni inana, i ma si Humuntal, boru ni si Jeremia, sian Libna.

23:32 Jala diulahon ibana do sogo ni roha ni Jahowa, sandok songon na binahen ni angka ompuna.

23:33 Dung i didokkon Firaun-Neko rante on ibana di Ribla di tano Hamat, asa unang be ibana mangarajai di Jerusalem, jala hona dando isi ni tano i dibahen saratus talenta perak dohot satalenta sere.

23:34 Dung i dipabangkit Firaun-Neko ma si Eliakim, anak ni si Josia bahen raja singkat ni amana i, jala dipaimbar goarna gabe si Joiakim; alai anggo si Joahas diboan do tu Misir laos mate disi do ibana.

23:35 Ia perak dohot sere i tu Firaun do dilehon si Joiakim, alai didokkon do isi ni tano i margugu perak silehononna nidokkon ni Firaun, ganup isi ni tano i marguru tu gogona be margugu perak dohot sere i silehonon tu Firaun-Neko.

23:36 Marumur duapulu lima taon si Joiakim di na bangkit raja, jala sampulu sada taon lelengna ibana mangarajai di Jerusalem; ia goar ni inana i ma si Zebida, boru ni si Pedaya sian Ruma.

23:37 Jala diulahon ibana do sogo ni roha ni Jahowa, sandok songon na binahen ni angka ompuna.

2 Raja-raja 24

24:1 Uju di tingki ni si Joiakim, nangkok ma si Nebukadnesar, raja sian Babel, jadi mangoloi patu si Joiakim tu ibana tolu taon lelengna dung i marbalik ibana muse jala mangalo dompak si Nebukadnesar.

24:2 Dung i disuru Jahowa ma angka parduaan ni parangan sian halak Kasdim, Ram, Moab dohot Amon mangalo ibana, disuru nasida asa solaonna Juda jala agoonna, hombar tu hata ni Jahowa naung nilumbahonna hian marhite sian angka panurirang, naposona i.

24:3 Masa pe songon i tu halak Juda, hombar tu hata ni Jahowa hian, asa paholangonna nasida sian adopan ni bohina, ala ni angka dosa ni si Manasse, hombar tu sude na niulana i.

24:4 Dohot ala ni mudar na so marpipot na ni durushonna, pola gok mudar na so marpipot Jerusalemi dibahen, dibahen i ndang olo be marpamuati roha ni Jahowa.

24:5 Jamita na tinggal i dope sian si Joiakim ro di sandok na niulana, nda tarsurat do i di bagasan buku jamita ni angka raja sian Juda?

24:6 Dung i monding ma si Joiakim gabe top dohot angka ompuna, jala si Joiakin anakna i bangkit raja singkatna.

24:7 Jadi olat ni ndang be morot raja ni Misir sian tanona, ai nunga dipapatu raja sian Babel saluhut tano na masuk tu gomgoman ni raja sian Misir na sai laon, olat ni sunge Misir sahat tu sunge Euprat.

24:8 Marumur sampulu ualu taon si Joiakin di na bangkit raja, jala tolu bulan lelengna ibana mangarajai di Jerusalem; ia goar ni inana i ma Nehusta, boru ni si Elnatan, sian Jerusalem.

24:9 Jala diulahon ibana do sogo ni roha ni Jahowa, sandok songon na binahen ni amana.

24:10 Di tingki uju i nangkok ma angka parangan ni si Nebukadnesar raja sian Babel dompak Jerusalem, laos dihubu ma huta i.

24:11 Ro huhut si Nebukadnesar sandiri, raja sian Babel marporang dompak huta i, naung tinungkum ni angka paranganna hian.

24:12 Dung i ruar ma si Joiakin, raja sian Juda mandapothon raja sian Babel rap dohot inana dohot angka parhaladona dohot angka partogi ni paranganna dohot angka siramoti bagasna; laos diboan raja sian Babel ma ibana paualu taonhon hinarajaonna i.

24:13 Diboan huhut sian i saluhut arta na di joro ni Jahowa dohot arta angka na di bagas ni rajai, jala dilongkangi sere i sian saluhut ulaula angka na pinauli ni si Salomo, raja sian Israel di bagasan joro ni Jahowa, songon naung nilumbahon ni Jahowa hian.

24:14 Jala diboan tu habuangan sandok isi ni Jerusalem dohot sude angka induk dohot sude halak na marhuaso, sampulu ribu halak tarbuang, tole sude angka tungkang hau dohot tungkang bosi, ndang adong tinggal nanggo sahalak, nda holan halak na so mardihadiha sian bangso ni luat i.

24:15 Jadi dibuangkon ma si Joiakin tu Babel rap dohot ina ni rajai dohot angka jolma ni rajai ro di sude siramoti bagasna dohot halak na marhuaso di luat i, tarboan sian Jerusalem tu Babel.

24:16 Dohot sude halak sialo musu, pitu ribu halak toropna, tole angka tungkang hau dohot tungkang bosi, saribu halak toropna ro di sude angka ulubalang na gogo, saluhutna i diboan raja sian Babel mambuangkon tu Babel.

24:17 Dung i dipabangkit raja sian Babel ma si Matania, amangudana i gabe raja singkatna, jala dipauba goarna gabe Sedekia.

24:18 Marumur duapulu sada taon si Sedekia di na bangkit raja ibana, jala sampulu sada taon lelengna ibana mangarajai di Jerusalem; ia goar ni inana, i ma si Humuntal, boru ni si Jeremia, sian Libna.

24:19 Jala diulahon ibana do sogo ni roha ni Jahowa, sandok songon na binahen ni si Joiakim.

24:20 Ai ala rimas ni Jahowa umbahen masa songon i di Jerusalem dohot di Juda, paima ambolongkononna nasida sian adopan ni Bohina. Dung i marbalik ma si Sedekia mangalo dompak raja sian Babel.

2 Raja-raja 25

25:1 Tole pasiataonhon hinarajaonna i di bulan sipaha sampulu di ari sampulu, ro ma si Nebukadnesar, raja sian Babel manguluhon sandok paranganna laho marporang dompak Jerusalem, marsaro di adopan ni huta i, dibahen huhut angka partanobatoan humaliang.

25:2 Jadi tartungkum ma huta i sahat ro di pasampulusadataonhon hinarajahon ni si Sedekia.

25:3 Alai di ari sia bulan sipaha opat masa ma haleon potir di bagasan huta i, pola ndang adong be sagusagu panganon ni bangso isi ni luat i.

25:4 Dung i dirampok ma huta i, jala saluhut baoa sialo musu maporus bornginna i sian dalan tu bahal na di holangholang ni na dua parik mardonokkon porlak ni rajai. Alai nunga ditungkum halak Kasdim huta i tuk humaliang, gabe mardalan rajai sian dalan tu adaran.

25:5 Alai dieak parangan ni halak Kasdim do rajai, jala dapot nasida ibana di angka adaran sian Jeriko, gabe marserak sandok paranganna sian lambungna.

25:6 Dung i ditangkup nasida ma rajai, jala diboan ibana nangkok tu adopan ni raja sian Babel tu Ribla, asa diputus uhumna tu ibana.

25:7 Ianggo angka anak ni si Sedekia diseati do di adopan ni matana, jala dipitungi do ia mata ni si Sedekia duansa, jala dirante ibana dohot dua rante tombaga laho mamboan ibana tu Babel.

25:8 Tole papituarihon di bulan sipaha lima, i ma pasampulusiataonhon dung Nebukadnesar bangkit raja sian Babel, ro ma Nebusaradan, induk ni angka parangan, parhalado ni raja sian Babel tu Jerusalem.

25:9 Dung i disurbu ma joro ni Jahowa dohot bagas ni rajai ro di sude bagas di Jerusalem, sude bagas na bolon tahe disurbu do dohot api.

25:10 Ia parik humaliang Jerusalem dilohai sandok parangan ni halak Kasdim, angka na rap dohot induk ni parangan i.

25:11 Alai anggo pasipasi ni bangso i, angka na tinggal di bagasan huta, ro di halak angka na bali mandapoti raja sian Babel, ro di pasipasi ni halak situan na torop, luhutna i dibuangkon si Nebusaradan, induk ni angka parangan i do.

25:12 Alai anggo sian halak na so mardihadiha di luat i ditinggalhon sintua ni parangan do deba bahen pangula di porlak anggur halak parumauma.

25:13 Angkup ni angka tiang tombaga, angka na masuk tu joro ni Jahowa ro di angka ojahan dohot tobat tombaga na di bagasan joro ni Jahowa, dipamponggolhon halak Kasdim do, jala tombaga i diboan do tu Babel.

25:14 Tole angka hudon, sonduk, raut, mangkuk ro di sude ulaula tombaga, angka na pinangke marulaon di bagasan joro i, dibuat nasida sude.

25:15 Dibuat induk ni angka parangan i do huhut angka seret panutungan daupa dohot mangkuk pamispisan, angka na sian sere dohot sian perak.

25:16 Tole tiang na dua i ro di tobat na sasada i dohot hajongjonganna, angka na pinauli ni si Salomo di joro ni Jahowa; tung na so dapot timbangon do godang ni tombaga sian saluhut angka parhohasi.

25:17 Sampulu ualu elak do timbo ni tiang na sada, ulu ni tiang di atasna pe tombaga do, jala timbo ni ulu ni tiang i tolu elak do, tole handanghandangna dohot parbue ni dalimo humaliang ulu ni tiang i, tombaga do i sude; laos songon i do di tiang paduahon ro di handanghandangna.

25:18 Dung i dibuat induk ni angka parangan i ma sintua ni malim Seraia dohot si Sepania, malim paidua dohot na tolu halak sijaga pintu.

25:19 Dibuat huhut sian bagasan huta i sahalak siramoti bagasna, na pinabangkit parentahon halak sialo musu; tole lima halak sian halak angka na somal marhalado di adopan ni rajai, angka na jumpang di bagasan huta; tole muse juaratulis ni partogi ni parangan, na somal manurati situan na torop i angka na masuk soldadu, tole muse onompulu halak sian bangso ni luat i, angka na jumpang di bagasan huta.

25:20 I ma angka na binoan ni si Nebusaradan, induk ni angka parangan, jala ditogihon nasida tu adopan ni raja sian Babel tu Ribla.

25:21 Dung i didokkon raja sian Babel ma bunuon nasida di Ribla na di tano Hamat. I ma habubuang ni Juda sian tanona.

25:22 Alai bangso na tinggal i dope di luat Juda, na tininggalhon ni si Nebukadnesar, raja sian Babel, dipabangkit ma di nasida si Gedalia, anak ni si Ahikam, anak ni si Sapan.

25:23 Jadi dung dibege sude induk ni angka parduaan ni parangan ro di angka baoa, naung dipabangkit raja sian Babel si Gedalia, ro be ma nasida manopot si Gedalia tu Mispa, i ma si Ismael, anak ni si Netania dohot si Johanan, anak ni si Karea, dohot si Seraia, anak ni si Tanhumet, halak Netopa i, dohot si Jasanya, anak ni halak Maaka i rap dohot angka baoa dongannasidai.

25:24 Dung i marbulan ma si Gedalia tu nasida dohot tu angka baoa dongannasidai, ninna ma mandok nasida: Unang hamu mabiar maradophon angka naposo ni halak Kasdim; tinggal ma hamu di luat i jala oloi hamu rodi ni raja sian Babel, jadi marsonangsonang ma hamu.

25:25 Alai tole papitubulanhon ro ma si Ismael, anak ni si Netania, anak ni si Elisama sian pinompar ni rajai, jala sampulu halak donganna, gabe ditodos nasida si Gedalia, pola mate rap dohot halak Jahudi dohot halak Kasdim, angka na rap dohot ibana di Mispa.

25:26 Dung i hehe ma sandok bangso i, tole na metmet ro di na magodang rap dohot angka induk ni parangan, maporus ma nasida tu Misir, ai mabiar do nasida maradophon halak Kasdim.

25:27 Alai tole patolupulupitutaonhon dung tarbuang si Joiakin, raja sian Juda, di ari duapulu pitu bulan hurung dipabangkit Epilmerodak, raja sian Babel, i ma taon parjolo hababangkit ni Epilmerodak gabe raja sian Babel, dipahehe rajai ma ulu ni si Joiakin, raja ni halak Juda sian bagasan hurungan.

25:28 Jala basar pangkulingna tu ibana, jala tumimbo dibahen habangsana sian habangsa ni raja angka na rap dohot ibana di Babel.

25:29 Jala disalin rajai do angka pangkeanna pinangkena di hurungan, jala sapanganan ibana tongtong dohot rajai saleleng mangolu ibana.

25:30 Jala ariari dilehon rajai tongtong bohalna na binuhul saleleng mangolu ibana.