Jump to content

Buku 2 Samuel

Sian Wikipedia

2 Samuel ᯘᯔᯮᯀᯞᯩ᯲ 1[patota | patota mualna]

1:1 Jadi dung mate si Saul, mulak ia si Daud sian tongtangan dompak halak Amalek, sanga dua ari si Daud maringan di Ziklag. ᯐᯑᯪ ᯑᯮᯰ ᯔᯖᯩ ᯘᯪ ᯘᯀᯞᯮ᯲ ᯔᯮᯞᯄ᯦᯲ ᯤᯀ ᯘᯪ ᯑᯀᯑᯮ᯲ ᯘᯪᯀᯉ᯲ ᯖᯉᯬ᯲ᯖᯝᯉ᯲ ᯑᯔᯬ᯲ᯇᯄ᯦᯲ ᯂᯞᯄ᯦᯲ ᯀᯔᯞᯄᯩ᯲ ᯘᯝ ᯑᯮᯀ ᯀᯒᯪ ᯘᯪ ᯑᯀᯑᯮ᯲ ᯔᯒᯪᯝᯉ᯲ ᯑᯪ ᯐᯄ᯦ᯪ᯲ᯞᯎ᯲

1:2 Tole patoluarihon, ida ma, ro sada halak sian parangan ni si Saul, maribak pangkeanna jala tano di atas uluna. Jadi dung sahat ibana tu si Daud manungkap ma ibana tu tano jala marsomba. ᯖᯬᯞᯩ ᯇᯖᯬᯞᯮᯀᯒᯪᯂᯉᯬ᯲, ᯤᯑ ᯔ, ᯒᯬ ᯘᯑ ᯂᯞᯄ᯦᯲ ᯘᯪᯀᯉ᯲ ᯇᯒᯝᯉ᯲ ᯉᯪ ᯘᯪ ᯘᯀᯞᯮ᯲ ᯔᯒᯪᯅᯄ᯦᯲ ᯇᯰᯂᯩᯀᯉ᯲ᯉ ᯐᯞ ᯖᯉᯬ ᯑᯪ ᯀᯖᯘ᯲ ᯥᯞᯉ. ᯐᯑᯪ ᯑᯮᯰ ᯘᯂᯖ᯲ ᯤᯅᯉ ᯖᯮ ᯘᯪ ᯑᯀᯑᯮ᯲ ᯔᯉᯮᯰᯂ᯦ᯇ᯲ ᯔ ᯤᯅᯉ ᯖᯮ ᯖᯉᯬ ᯐᯞ ᯔᯒ᯲ᯘᯔᯬ᯲ᯅ

1:3 Dung i ninna si Daud ma mandok ibana; sian dia ho ro? Jadi ninna ibana ma: Maporus do ahu sian parangan ni Israel, palua diringku.

1:4 Dung i ninna si Daud ma mandok ibana: Aha huroha na masa? Ua baritahon tu ahu! Jadi ninna ibana ma: Nunga maporus angka porangan i sian tongtangan, angkup ni mansai torop marragean jala mate sian bangso i, mate nang si Saul, dohot si Jonatan anakna i.

1:5 Dung i didok si Daud ma tu dolidoli na mamboan barita i tu ibana: Sian dia diboto ho naung mate si Saul dohot si Jonatan anakna i?

1:6 Jadi ninna dolidoli na mamboan barita i ma tu ibana: Tardempar ahu tu atas dolok Gilboa, gabe ida ma si Saul mangunsande tu hujurna, tole hureta dohot angka parsihundul mangaromrom ibana.

1:7 Dung i humusor ibana dompak pudi, gabe diida ahu, laos dijouhon tu ahu, gabe hudok: Dison do ahu.

1:8 Dung i didok ma mandok ahu: Ise do ho? Jadi hudok ma tu ibana: Halak Amalek do ahu.

1:9 Dung i didok ma tu ahu: Ua pajonok tu ahu jala bunu ahu, ai nunga mangampir huhilala, di bagasan ahu dope nian anggo sandok hosangku.

1:10 Jadi hupajonok ma tu ibana, laos hubunu ibana, ai tangkas do huboto na so tagamon mangolu be ibana anggo dung sapala runggang. Dung i hubuat ma tumpal na di atas uluna dohot rutas na di botohonna, angka i ma na huboan nuaeng tu tuanki.

1:11 Dung i ditiop si Daud ma pangkeanna sandiri, laos disansani ma i, suang songon i dibahen sude baoa angka na rap dohot ibana.

1:12 Dung i mangandungi ma nasida mananangisi huhut marpuasa sahat ro di bodari ala ni si Saul dohot si Jonatan anakna i dohot ala ni bangso i ni Jahowa, dohot ala ni pinompar ni Israel angka naung marragean dibahen podang.

1:13 Dung i didok si Daud ma tu dolidoli na mamboan barita i tu ibana: Sian dia do ho? Gabe didok ibana ma: Anak ni sada halak na pulik marga do ahu, halak Amalek tahe.

1:14 Dung i didok si Daud ma tu ibana: Tung so mabiar do ho, mangalaluhon tanganmu laho mangago na miniahan ni Jahowa?

1:15 Dung i digora si Daud ma sada halak sian angka dolidoli, ninna ma: Pajonok tu on, jala bunu ibana tusi! Gabe dibunu ma ibana laos mate.

1:16 Dung i didok si Daud ma mandok ibana: Marsapata tu ho mudarmi! Ai nunga pamanganmi gabe saksi dompak ho, nimmu do: Ahu do mambunu na miniahan ni Jahowa.

1:17 Dung i diandungkon si Daud ma ende andung on, mananangisi si Saul dohot si Jonatan anakna i.

1:18 Laos didokkon ingkon ajarhononhon do i tu halak Juda ende andung taringot tu sior; ida ma, tarsurat do i di bagasan pustaha ni halak na bonar.

1:19 Oe ale hamuliaon ni Israel! Nunga mate tartullang hamu di atas ni angka robeanmu! Magoponai, tung marragean angka ulubalang!

1:20 Unang nian dipaboa barita i di Gat, unang ma nian dibaritahon di angka alaman ni Askelon, asa unang marlas ni roha angka boru Palistim, unang marolopolop angka boru ni halak parhulup.

1:21 Hamu ale dolok Gilboa! Sai unang ma nian adong nambur manetek tu hamu manang udan madabu, manang hauma patumonaan; ai disi do hadekdekan ni lombulombu ni angka ulubalang bolon, lombulombu ni si Saul, hira na so miniahan marhitehite miak.

1:22 Na so dung mulak nian sior ni si Jonatan so martubol sian mudar ni angka na marragean, sian tabotabo ni angka ulubalang; podang ni si Saul pe ndang dung mulak boti so martubol.

1:23 Oe ale Saul dohot Jonatan, angka na hinaholongan jala hasudungan ni roha tagan di ngolunasida, jala dihamatean nasida pe ndang sirang nasida; dumoras do nasida sian pidong raja ualu, jala gumogo sian singa.

1:24 Hamu ale boru Israel, tatangisi hamu ma si Saul na maruloshon tu hamu angka ulos surta, na mambahen pangkeanmuna marjagarjagar sian sere.

1:25 Magoponai! Tung marragean angka ulubalang di tongatonga ni tongtangan! Nunga tung mate tartullang si Jonatan di atas robeanmi!

1:26 Iale Jonatan, ale anggia. Mansai marsak rohangku pasarisari panadingmi! Tung hasudungan ni rohangku situtu do ho, lomoan do rohangku mida holong ni roham di ahu, asa mida holong ni roha ni parompuan.

1:27 Magoponai! Tung marragean angka ulubalang jala mago angka parhohas tu hamusuon!

2 Samuel 2[patota | patota mualna]

2:1 Jadi dung salpu angka i, marsungkun ma si Daud tu Jahowa, ninna ma: Jadi do ahu nangkok tu sada sian angka huta di Juda? Dung i ninna Jahowa ma tu ibana: Nangkok ma ho. Dung i ninna si Daud muse: Tu huta dia do ahu nangkok? Dung i ninna Ibana ma: Tu Hebron do.

2:2 Jadi nangkok ma si Daud tusi rap dohot jolmana na dua i, si Ahinoam, boru Jesreel dohot si Abigail, jolma ni si Nabal nahinan sian Karmel.

2:3 Angkup ni diarahon si Daud ma donganna, angka na nangkok rap dohot ibana, ganup dohot isi ni bagasna be, jadi maringan ma nasida di angka huta na humaliang Hebron.

2:4 Dung i ro ma halak Juda, mamiahi si Daud disi bahen raja gumomgom pinompar ni Juda. Dung i dibaritahon halak ma tu si Daud: Naung binandahon ni halak Jabes di Gilead si Saul.

2:5 Jadi disuru si Daud ma angka suruanna tu halak Jabes di Gilead, mandok tu nasida: Dapotan pasupasu ma hamu sian Jahowa ala na binahenmuna asi ni roha tu tuanmuna, tu si Saul, ala naung dibandahon hamu ibana.

2:6 On pe sai dibahen Jahowa ma tu hamu asi ni roha dohot habonaron, ahu pe bahenonku do denggan basa tu hamu ala naung dibahen hamu songon i.

2:7 Antong margogo ma tanganmuna gabe parangan na begu; ai nunga mate nian anggo si Saul tuanmuna i, alai nunga dimiahi pinompar ni Juda ahu bahen raja gumomgom nasida.

2:8 Alai ro ma si Abner, anak ni si Ner, partogi ni parangan ni si Saul, dibuat ma si Isboset, anak ni si Saul, jala ditogihon ibana taripar tu Mahanaim.

2:9 Jala dipabangkit ibana gabe raja gumomgom Gilead dohot halak Aser i dohot Jisreel dohot Epraim dohot Benjamin ro di sandok Israel.

2:10 Marumur opatpulu taon si Isboset, anak ni si Saul di hababangkitna gabe raja gumomgom Israel, jala dua taon lelengna ibana mangarajai. Holan pinompar ni Juda do mangihuthon tu si Daud.

2:11 Ia leleng ni si Daud raja di Hebron gumomgom pinompar ni Juda pitu taon onom bulan do.

2:12 Dung i borhat ma si Abner, anak ni si Ner rap dohot angka naposo ni si Isboset, anak ni si Saul, sian Mahanaim tu Gibeon.

2:13 Borhat dohot si Joab, anak ni Nai Seruia rap dohot angka naposo ni si Daud; gabe pajumpang ma nasida di lambung ambar Gibeon; jadi marsaro ma nasida di baribaan ni ambar i, jala alona i di baribaon ni ambar i.

2:14 Dung i ninna si Abner ma mandok si Joab: Ua hehe ma angka dolidoli i, asa masijonapan nasida di adopanta! Antong hehe be ma nasida, ninna si Joab.

2:15 Jadi borhat be ma nasida mandapothon, sampulu dua bilanganna sian Benjamin, parangan ni si Isboset, anak ni si Saul, jala sampulu dua halak sian angka naposo ni si Daud.

2:16 Dung i ganup nasida manoro ulu ni alona, jala ditihamhon podangna tu andora ni alona, gabe rap rage nasida. Alani targoar inganan i: Helkat-Hasurim mardonokkon Gibeon.

2:17 Laos sobu situtu ma nasida tongtang sadarina i, talu ma si Abner dohot halak Israel maralohon naposo ni si Daud.

2:18 Alai adong disi tolu anak ni Nai Seruia, si Joab, si Abisai dohot si Asahel. Mansai gompis mardalan anggo si Asahel songon sada hije na di ladang.

2:19 Jadi sai dilotongi si Asahel do si Abner, ndang olo manimbil tu siamun manang tu hambirang sian pudi ni si Abner.

2:20 Dung i manaili dompak pudi ma si Abner, ninna ma: Atehe si Asahel do ho? Ahu ma tutu, ninna.

2:21 Dung i ninna si Abner ma mandok ibana: Pasimbil ho tu siamunmu manang tu hambirangmu, jala tangkup di ho sahalak sian angka dolidoli i, jala buat di ho pangkeanna. Alai ndang olo si Asahel sumurut sian pudina.

2:22 Dung i diulahi si Abner muse mandok tu si Asahel: Pasurut ho sian pudingku! Boasa tagonan manungkap tu tano ho bunuonku? Jala beha ma pambahenku tung sura mandompakkon bohi ni si Joab, hahami?

2:23 Alai manjua do ibana sumurut, jadi ditullangkon si Abner ma suhul ni hujur i tu butuhana, pola puas hujur i sian tanggurungna, gabe tinggang ibana disi, laos mate tongkinnai. Dung i manang ise na sahat tu tano hapeahan ni si Asahel i, sulon do disi.

2:24 Alai sai didatdati si Joab dohot si Abisai do mangeak si Abner i. Jadi dung mate mata ni ari sahat na nasida tu robean Amma, tondong ni Gia, di dalan laho tu halongonan Gibeon.

2:25 Dung i marpungu ma halak Benjamin mangihuthon si Abner, gabe sada parduaan, jadi sulon nasida jongjong di punsu ni sada robean.

2:26 Dung i mangua ma si Abner mandok tu si Joab; tung sai datdatan ni podang i do marraserasehon? Ndang diboto ho, lam gabe musu tihus do i di laonlaon ni ari? Sadia leleng on so dohononmu situan na torop i mansohot mangalele angka hahaanggina.

2:27 Dung i ninna si Joab ma: Songon sintongna mangolu Debata, aut unang didok ho hatam pajujuhon, nunga nasogot mansohot na torop i sian na mangalele donganna be.

2:28 Dung i dipalu si Joab ma sarune gabe sulon sude na torop i, ndang be didatdati mangalele Israel, jala ndang be didatdati tongtang.

2:29 Alai anggo si Abner dohot angka paranganna i mardalan umbolus adaran i manipat sabornginna i, laos ditaripari nasida ma Jordan i, jala dibolus nasida sandok luat Biteron, gabe sahat nasida tu Mahanaim.

2:30 Mulak dohot si Joab sian na mangalele si Abner, jala dipapungu sude na torop i. Jadi hurang sian angka naposo ni si Daud i sampulu sia halak angkup ni si Asahel.

2:31 Alai nunga dibunu angka naposo ni si Daud sian Benjamin, sian parangan ni si Abner tolu ratus onompulu halak, angka na mate.

2:32 Dung i dihindat nasida ma si Asahel, jala dibandahon ibana tu bagasan tanoman ni amana na di Betlehem. Dung i mardalan ma si Joab dohot angka paranganna i manipat sabornginna i mamungka buha siang ari sahat ma nasida tu Hebron.

2 Samuel 3[patota | patota mualna]

3:1 Dung i sai toltol do hamusuon ni pinompar ni si Saul dompak pinompar ni si Daud; alai lam leleng, lam marhuaso ma anggo si Daud, lam tu galena ma ianggo pinompar ni si Saul.

3:2 Dung i tubuan anak ma si Daud di Hebron. Ia buhabajuna si Amnon do, tubu ni si Ahinoam, boru Jisreel.

3:3 Ia anakna paidua si Kileab do, tubu ni si Abigail, jolma ni si Nabal nahinan, sian Karmel; ia anakna paitolu si Absalom do, tubu ni si Maaka, boru ni si Talmai, raja sian Gesur.

3:4 Ia anakna paiopat si Adonia do, tubu ni Nai Haggit; ia anakna pailima si Sepatia do, tubu ni si Abital.

3:5 Ia anakna paionom si Itream do, tubu ni si Egla, jolma ni si Daud. I ma angka na tinubuhon ni si Daud di Hebron.

3:6 Dung i saleleng masa hamusuon ni pinompar ni si Saul dompak pinompar ni si Daud, lam marhuaso ma si Abner manumpak pinompar ni si Saul.

3:7 Alai adong ma di si Saul nahinan sada boruboru pinarjolmana, na margoar si Rispa, boru ni si Aia. Dung i ninna si Isboset ma tu si Abner: Boasa tung topotonmu jolma ni damang nahinan?

3:8 Jadi tarrimas situtu ma si Abner umbege hata ni si Isboset i, ninna ma: Tung parulu anjing ahu huroha, na marsatahi dohot Juda? Rasirasa sadarion hubahen do asi ni roha tu pinompar ni si Saul, amami, tu angka hahaanggina dohot tu angka alealena, umbahen so hupasahat pe ho tu bagasan tangan ni si Daud; hape naeng jujuronmu tu ahu sadarion hageduhon ala ni parompuan sada?

3:9 Ingkon songon i bahenon ni Debata tu si Abner jala patambaonna dope songon i tu ibana, molo so hubahen songon na niuarihon ni Jahowa tu si Daud, tongon tahe ingkon songon i bahenonku tu ibana!

3:10 Laho paunsathon harajaon sian pinompar ni si Saul, asa pajongjongkon habangsa ni si Daud gumomgom Israel dohot Juda olat ni Dan ro di Berseba.

3:11 Jadi ndang tarbahen si Isboset mangulak nanggo sahata tu si Abner, dibahen biarna mida ibana.

3:12 Dung i disuru si Abner ma angka suruanna singkatna manopot si Daud patolhas hatana: Ise hian nampuna tano i? Didok muse: Marpadan ma ho dohot ahu, jala ida ma, sai donganan ni tanganku do ho laho manogihon sandok Israel bali tu ho.

3:13 Dung i ninna rajai ma: Denggan do i, olo do ahu marpadan dohot ho; holan hata sada na hupangido sian ho: Na so tupa idaonmu bohingku, nda jolo mulak tu ahu boanonmu si Mikhal, boru ni si Saul, molo ro ho naeng marnida bohingku.

3:14 Angkupni disuru si Daud do angka suruanna manopot si Isboset, anak ni si Saul, mandok tu ibana: Lehon ma tu ahu jolmangku, si Mikhal i, naung huoro bahen jolmangku marhite sian saratus sibursibur ni halak Palistim.

3:15 Dung i disuru si Isboset ma laho mambuat parompuan i sian baoana, sian si Paltiel, anak ni si Lais.

3:16 Laos dipataru baoa ibana, huhut tumatangis sian pudina sahat ro di Bahurim. Dung i didok si Abner ma tu ibana: Laho ma ho mulak, jadi muli ma ibana.

3:17 Dung i marhata ma si Abner dohot angka sintua sian Israel ninna ma: Nunga leleng, dipangido rohamu si Daud bahen raja gumomgom hamu.

3:18 Antong patulus hamu ma nuaeng, ai nunga pola didok Jahowa taringot tu si Daud songon on: Marhitehite tangan ni si Daud, naposongku paluaonku bangsongku Israel sian tangan ni halak Palistim dohot sian tangan ni saluhut musunasida.

3:19 Suang songon i didok si Abner tu pinggol ni halak Benjamin; laho muse si Abner patolhas hata tu pinggol ni si Daud di Hebron nasa tau lomo ni roha ni Israel ro di sandok pinompar ni Benjamin.

3:20 Jadi dung sahat si Abner tu jolo ni si Daud di Hebron udur dohot duapulu halak donganna, dibahen si Daud ma sada panggalangon di si Abner dohot di halak angka na rap dohot ibana.

3:21 Dung i ninna si Abner ma tu si Daud: Borhat ma ahu laho papunguhon tu tuanku, rajai, sandok Israel, asa marpadan nasida dohot ho asa bangkit raja ho gumomgom saluhutna hombar tu lomo ni roham. Jadi didokkon si Daud ma laho si Abner, gabe mardalan ibana mardamedame.

3:22 Dung i ida ma, ro angka naposo ni si Daud dohot si Joab sian parbajoan, jala diboan nasida godang tabantaban. Alai ndang be di lambung ni si Daud di Hebron anggo si Abner i, ai nunga didokkon ibana laho mardamedame.

3:23 Jadi dung sahat si Joab rap dohot sandok parangan donganna i, dibaritahon halak ma tu si Joab songon on: Nunga ro si Abner, anak ni si Ner tu adopan ni rajai, jala nunga didokkon ibana muse laho mardamedame.

3:24 Dung i ditopot si Joab ma rajai, ninna ma: Aha do na binahenmu? Ida ma, nunga ro hape si Abner tu jolom; boasa tung paluaonmu ibana laho manopot lomo ni rohana?

3:25 Nunga ditanda ho roha ni si Abner, anak ni si Ner, laho manaon sambil di ho do ibana umbahen na ro, naeng botoonna haruruarmu dohot habobongotmu, naeng botoonna saluhut na binahenmi.

3:26 Dung i ruar ma si Joab sian adopan ni si Daud, jala disuru angka suruanna mangeahi si Abner, gabe mulak ibana diboan nasida sian sumur Sira. Alai ndang parbinoto anggo si Daud.

3:27 Jadi dung mulak si Abner tu Hebron, ditogihon si Joab ma ibana manirpang tu tongatonga ni harbangan, naeng masihusipan dohot ibana paduadua dipaula, hape ditiham ibana disi, hona butuhana, laos mate, martubolhon mudar ni si Asahel anggina i.

3:28 Jadi dung tarbortik barita i tu si Daud, ninna ma: Lias do anggo ahu dohot harajaonki, maradophon Jahowa ro di salelenglelengna sian mudar ni si Abner, anak ni si Ner.

3:29 Ingkon manginona tu ulu ni si Joab do i dohot tu sandok pinompar ni amana, unang holang adong nian sian pinompar ni si Joab na rojanon dohot na puruon, na marsingkorsingkor dohot na mate binahen ni podang jala na mate anturaparon.

3:30 Alai songon i pe pamunu ni si Joab dohot si Abisai, anggina i di si Abner, ala na binununa i si Asahel angginasida i di Gibeon uju marmusu.

3:31 Dung i ninna si Daud ma tu si Joab dohot tu sude halak donganna i: Sansani hamu ma ulosmuna be, jala hohoshon hamu ma abit tangki laho mangandungi, di adopan ni si Abner. Raja Daud sandiri pe mangihuthon sian pudi ni angka na mangkallung.

3:32 Jadi laho mananom si Abner i nasida di Hebron, dipangiar rajai ma soarana tumatangis di lambung tanoman ni si Abner; tumatangis dohot sude natorop i.

3:33 Dung i dipungka rajai ma sada ende andung, ninna ma: Tung patut ma songon halak na oto mate si Abner i?

3:34 So dung hona ihot ia tanganmu, so dung hona rante ia patmu. Tinggang do ho hapengani songon jolma na tinodos ni halak parjahat! Jadi lam manggogo ma sude situan natorop i mananangisi ibana.

3:35 Dung i ro ma sude situan natorop i manosoi si Daud mangan sagusagu di na tiur dope ari, alai pola disumpahon si Daud: Sai dibahen Debata ma songon i tu ahu, jala ditambai dope molo tung daionku roti manang dia na asing, nda jolo mate mata ni ari.

3:36 Jadi sude situan natorop i mananda disi, jala denggan rohanasida disi; lomo do tahe roha ni sandok natorop i mida sude na binahen ni rajai.

3:37 Jadi mamoto ma sandok natorop i ro di sandok Israel sadarina i, na so botobotoan ni rajai na hona todos si Abner i, anak ni si Ner.

3:38 Dung i didok rajai ma mandok angka naposona: Ndang diboto hamu halak na raja jala na bolon tahe mate sadarion di Israel?

3:39 Alai bajar dope anggo ahu, jala nambura miniahan gabe raja. Alai anggo halak on, angka anak ni Nai Seruia gumogo do sian ahu. Sai baloson ni Jahowa do tu halak sibahen hajahaton, hombar tu hajahatonna i!

2 Samuel 4[patota | patota mualna]

4:1 Jadi dung tarbortik tu anak ni si Saul, naung mate si Abner di Hebron, daukdauk ma tanganna, tarsonggot huhut roha ni sandok Israel.

4:2 Alai adong ma di anak ni si Saul dua halak, partogi ni angka parangan, goar ni na sada si Baana, goar ni na sadanari si Rekab, duansa do anak ni si Rimmon, halak Beerot i sian pinompar ni Benjamin; ai Beerot pe masuk tu Benjamin do etongan.

4:3 Maporus tu Gitaim do najolo ia halak Beerot, laos gabe paisolat nasida disi rasirasa sadarion.

4:4 Angkup ni adong do di si Jonatan, anak ni si Saul, sada anak, na pangpang patna duansa. Lima taon umurna uju na ro barita taringot tu si Saul dohot si Jonatan sian Jisreel. Jadi dihindat parorotna ibana laho maporus nian, hape di na hapogan nasida laho maporus, gabe madabu ibana laos pangpang; ia goarna si Mepiboset do.

4:5 Dung i laho ma na dua anak ni si Rimmon halak Beerot i, si Rekab dohot si Baana tahe, gabe bongot ma nasida marhira hos ari tu bagasan jabu ni si Isboset, tongon modom ibana didapot.

4:6 Jadi dung sahat nasida ro di parsitongaan ni bagas i, paulahon mangalap eme, gabe ditiham nasida butuhana, dung i maporus ma si Rekab dohot si Baana anggina i.

4:7 Ai dung masuk nasida tu jabu i, tongon modom ibana di atas podomanna di bagasan bilut podomanna, gabe ditiham nasida ibana, laos mate, jala ditipul uluna i, laos diboan ma uluna i laho mardalan nasida manulus dalan na di adaran i manipat sabornginna i.

4:8 Dung i diboan nasida ma ulu ni si Isboset tu si Daud di Hebron, ninna nasida ma mandok rajai: Ida ma, indi do ulu ni si Isboset, anak ni si Saul, musumi, na paburuburu hosam. Jahowa tahe mangalehon tu tuanku rajai sadarion partubolon maralohon si Saul dohot pinomparna i.

4:9 Alai ninna si Daud ma mangalusi si Rekab dohot si Baana, anggina i, angka anak ni si Rimmon, halak Beerot i. Songon sintongna mangolu Jahowa naung paluahon tondingku sian nasa hagogotan!

4:10 Husoro do halak na mamboan barita tu ahu mandok songon on: Ida ma, nunga mate si Saul! Disurasura rohana parbarita na uli ibana, gari hubunu ibana di Ziklag, atik pe diarop rohana maruli upa ibana nian sian ahu.

4:11 Lam halak parjahat i, angka na manodos sahalak na bonar di bagasan jabuna di atas podomanna, lam so patut luluhononku mudarna sian tanganmuna dohot pasiaphon hamu sian tano on?

4:12 Dung i didokkon si Daud ma angka naposona, asa dibunu nasida, jala digotapi tangannasida dohot patna jala digantung nasida mardonokkon ambar di Hebron. Alai anggo ulu ni si Isboset dibuat nasida do jala ditanom di bagasan tanoman ni si Abner di Hebron.

2 Samuel 5[patota | patota mualna]

5:1 Dung i ro be ma sude marga ni Israel manopot si Daud di Hebron, angka ninna ma: Ida ma, sisada holiholi dohot sibuk hian do hami dohot ho.

5:2 Angkup ni nang na sai laon, uju si Saul dope raja gumomgom hami, nunga ho hian manogihon Israel ruar dohot masuk. Jala nunga didok Jahowa hian mandok ho: Ingkon ho marmahan bangsongku Israel, jala ingkon ho gabe partogi di halak Israel.

5:3 Jadi ro be ma sude sintua ni Israel manopot rajai di Hebron. Dung i marpadan ma raja Daud tu nasida di Hebron di adopan ni Jahowa, jadi dimiahi nasida ma si Daud bahen raja gumomgom Israel.

5:4 Marumur tolupulu taon do si Daud di na bangkit raja ibana, jala opatpulu taon lelengna ibana mangarajai.

5:5 Di Hebron ibana mangarajai Juda pitu taon onom bulan lelengna, jala di Jerusalem ibana mangarajai sandok Israel dohot Juda tolupulu tolu taon lelengna.

5:6 Dung i borhat ma rajai rap dohot paranganna tu Jerusalem mandopang halak Jebusi, na mangingani tano i. Dung i didok angka nasida ma mandok si Daud: Ndang tagamon masuk ho tuson, ingkon paundaron ni halak na mapitung dohot angka na pangpang do ho, lapatanna: Ndang tagamon masuk si Daud tuson.

5:7 Hape dipapatu si Daud do benteng Sion, i ma huta ni si Daud.

5:8 Ai nunga didok si Daud hian di na sadari i: Manang ise na manaluhon halak Jebusi, ingkon dabuonna tu sampuran do angka na pangpang dohot na mapitung angka na hinagigihon ni roha ni si Daud. Alani umbahen didok halak: Anggo halak na mapitung dohot na pangpang, ndang jadi masuk tu bagasan joro.

5:9 Jadi maringan ma si Daud di bagasan benteng i, jala digoar do i huta ni si Daud. Dung i dipauli si Daud ma partanobatoan humaliang, olat ni Milo sahat ro di bagasan.

5:10 Dung i lam leleng, lam naek ma hatimbulon ni si Daud, ai didongani Jahowa, Debata Zebaot do ibana.

5:11 Dung i disuru si Hiram, raja sian Tirus ma angka suruanna manopot si Daud, angka na mamboan hau Ares, tole pande hau dohot tukang mandakdak batu, angka na mamandei bagas ni si Daud.

5:12 Jadi mananda ma si Daud naung pinahot ni Jahowa ibana bahen raja di Israel, jala naung pinatimbulna harajaonna ala ni bangsona Israel.

5:13 Dung i ditambai si Daud dope angka parompuan di Jerusalem bahen jolmana, dung ro ibana sian Hebron, jadi tubu dope di si Daud angka anak dohot boru.

5:14 Jala on do goargoar ni angka tubuna di Jerusalem: Si Samua, si Sobab, si Natan dohot si Salomo.

5:15 Si Ibar, si Elisua, si Nepeg dohot si Japia.

5:16 Si Elisama, si Eliada dohot si Elipelet.

5:17 Alai dung dibege halak Palistim, naung miniahan si Daud bahen raja gumomgom Israel, nangkok ma sude halak Palistim naeng marburu si Daud. Jadi dung dibege si Daud barita i, tuat ma ibana tu benteng i.

5:18 Alai marroan ma halak Palistim, jala marserak nasida di rura Repaim.

5:19 Dung i marsungkun ma si Daud tu Jahowa ninna ma: Na jadi lo ahu nangkok mangalo halak Palistim, jala pasahatonmu do nasida tu bagasan tanganku? Jadi didok Jahowa ma mandok si Daud: Nangkok ma ho, ai sai na pasahatonku do halak Palistim i tu bagasan tanganmu!

5:20 Dung i sahat ma si Daud tu Baal Perazim, jala ditaluhon si Daud nasida disi, ninna huhut: Nunga dipaserak Jahowa angka musungku di jolongku, songon parserak ni aek magodang; alani umbahen digoar ibana inganan i Baal Perazim (huta parserahan).

5:21 Dung i ditinggalhon nasida disi angka ajiajiannasida, gabe dijomput si Daud dohot paranganna angka i.

5:22 Alai diulahi halak Palistim muse ma nangkok, jala marserak muse di rura Repaim.

5:23 Dung i marsungkun muse ma si Daud tu Jahowa, na mandok: Ndang jadi ho nangkok, ingkon lompitonmu nasida sian pudinasida, asa pajumpang ho dohot nasida tondong ni angka hau balsam.

5:24 Ia dung dibege ho pardorom ni halak pardalan di punsu ni angka hau balsam, rampok ma nasida disi, ai disi ma ruar Jahowa mardalan di jolom laho papatuhon parangan ni halak Palistim.

5:25 Jadi dibahen si Daud ma songon i, hombar tu tona ni Jahowa tu ibana, gabe dipapatu ma halak Palistim olat ni Geba sahat ro di Gezer.

2 Samuel 6[patota | patota mualna]

6:1 Dung i diulahi si Daud muse papunguhon sude halak angka na pinillit di Israel, tolupulu ribu halak toropna.

6:2 Dung i borhat ma si Daud manguluhon luhut halak donganna sauduran laho tu Baala-Juda, asa diboan nangkok sian i poti parpadanan ni Debata, disi do dijou halak Goar ni Jahowa Zebaot, na marhabangsahon kerubim.

6:3 Dung i dihindat nasida ma poti ni Debata tu sada hureta naimbaru, asa diboan nian sian jabu ni si Abinadab, na di atas robean i. Alai anggo si Usa dohot si Ahio, angka anak ni si Abinadab i manogu hureta naimbaru i.

6:4 Jadi uju tinoguna i huretai sian jabu ni si Abinadab na di atas robean i rap dohot poti ni Debata mardalan di jolo ni poti ni Debata ia si Ahio i.

6:5 Ianggo si Daud ro di sandok pinompar ni Israel manontori di adopan ni Jahowa, huhut umpalu parhinaloan marragamragam, mardongan sarune dohot arbab, dohot sordam, ogung panggora dohot ogung panonggahi.

6:6 Jadi dung sahat nasida tu pardegean Nakon, ditangkup si Usa

6:7 Jadi tarrimas situtu ma Jahowa mida si Usa, laos dibunu Debata ibana disi ala jerjerna, gabe mate ibana disi mardonokkon poti ni Debata.

6:8 Jadi marsak ma si Daud ala parsirangan binahen ni Jahowa tu si Usa, gabe digoar ma inganan i Peres-Usa (parsirangan ni si Usa) rasirasa sadarion.

6:9 Dung i mabiar ma si Daud mida Jahowa di na sadari i, ninna ma: Beha ma pambahenna sahat poti ni Jahowa tu ahu?

6:10 Dung i ndang olo si Daud mangaloas boanon poti ni Jahowa tu ibana, tu bagasan huta ni si Daud, didokkon si Daud do pataruon poti i tu bagas ni si Obed-Edom, halak Gat.

6:11 Jadi dung tinggal poti ni Jahowa di jabu ni si Obed-Edom halak Gat, tolu bulan lelengna, gabe dipasupasu Jahowa ma si Obed-Edom ro di isi ni bagasna sudena.

6:12 Dung i dibaritahon halak ma tu raja Daud, naung pinasupasu ni Jahowa bagas ni si Obed-Edom ro di sude na di ibana, ala poti ni Debata. Jadi laho ma si Daud mamboan poti ni Debata nangkok sian bagas ni si Obed-Edom tu huta ni si Daud mardongan las ni roha.

6:13 Jadi dung mangalangka jolma angka siusung poti ni Jahowa onom langka daona, dipelehon ma sada lombu dohot sada birubiru na pinamokmok.

6:14 Mangasa gogo huhut anggo si Daud marhujingjang di adopan ni Jahowa; jala marpangkean baju epod sian haen na bontar do si Daud.

6:15 Songon i ma pamboan ni si Daud ro di sandok pinompar ni Israel di poti ni Jahowa mardongan olopolop dohot soara ni sarune.

6:16 Jadi dung sahat poti ni Jahowa tu bagasan huta ni si Daud, gabe mandulo ma si Mikhal, boru ni si Saul sian pandiloan, jala i diida ma raja Daud marhajingjang dohot manontori di adopan ni Jahowa, gabe hu rohana mida ibana.

6:17 Alai dung masuk diboan poti ni Jahowa, dipajongjong ma i di ingananna, di tongatonga ni undungundung i naung pinajongjong ni si Daud hian tusi. Dung i dipelehon si Daud ma angka pelean situtungon dohot hamauliateon di adopan ni Jahowa.

6:18 Jadi dung tolhas dipelehon si Daud angka pelean situtungon dohot hamauliateon, dipasupasu ma situan natorop i marhitehite Goar ni Jahowa Zebaot.

6:19 Dung i diganupi ma sandok situan natorop i dohot sude halak Israel painondur, nang baoa nang parompuan, sagusagu sada be dohot juhut sangkimpal dohot anggur sapeles be. Dung i muli ma sude situan natorop i ganup tu jabuna be.

6:20 Alai dung muli si Daud naeng mamasumasu isi ni bagasna nian, ruar ma si Mikhal, boru ni si Saul manomunomu si Daud, jala ninna ma manulliti: Tung marmulia ma sadarion raja ni Israel, na patutoru dirina sadarion di adopan ni boru ni angka naposona, songon sada halak na so umboto haurahon!

6:21 Alai ninna si Daud ma mandok si Mikhal: Di adopan ni Jahowa, naung umpillit ahu bahen ganti ni amangmu sian sandok pinomparna, asa mandokkon ahu gabe induk ni bangso ni Jahowa, gumomgom Israel, di adopan ni Jahowa do ahu manontori.

6:22 Angkup ni ganda sian i dope patutoruonku diringku, jala pasereponku rohangku, asa marmulia ahu rap dohot boruboru angka na tinullitanmi.

6:23 Alai anggo si Mikhal, boru ni si Saul, laos so tanggal do bajubajuna sahat ro di ari hamamatena.

2 Samuel 7[patota | patota mualna]

7:1 Dung i uju hundul rajai sahali di bagasan jabuna, jala naung marhasonangan rohana dibahen Jahowa maradophon nasa musuna humaliang.

7:2 Jadi ro ma hata ni rajai mandok panurirang Natan: Ua ida ma, maringan di bagasan jabu na sian hau Ares do ia ahu, ia poti ni Debata maringan do di tongatonga ni rimberimbe.

7:3 Dung i ninna si Natan ma mandok rajai: Antong laho ma ho! Nasa na sinangkap ni roham di bagasan, patupa ma i, ai Jahowa do donganmu.

7:4 Alai bornginna i ro ma hata ni Jahowa tu si Natan mandok songon on:

7:5 Laho ma ho, hatahon ma tu naposongku si Daud: Songon on do hata ni Jahowa: Tung tarbahen ho ma paulihon di Ahu sada bagas bahen ingananku?

7:6 Ai ndang dung maringan Ahu di bagasan jabu, olat ni ari dung huboan halak Israel nangkok sian Misir rasirasa sadarion, tongtong do Ahu mardalandalan, maringanan di bagasan undungundung.

7:7 Saleleng Ahu mardalandalan rap dohot sude halak Israel, tung dung ma Ahu mandok nanggo sada hata tu sahalak sian angka marga ni Israel, angka na hudokkon nian marmahan bangsongku Israel, songon on: Boasa so dipauli hamu di Ahu sada joro sian hau Ares?

7:8 On pe songon on ma dohononmu tu naposongku si Daud: Boti hata ni Jahowa Zebaot: Nunga Ahu mambuat ho sian parmahanan, sian na mangadu angka birubiru, asa bangkit ho gabe induk gumomgom bangsongku Israel.

7:9 Sai hudongani ho na sai laon, manang dompak dia ho mangalangka jala nunga husiaphon sude angka musum maradophon ho, jala hubahen goarmu marbarita situtu, songon goar ni halak na bolon, angka na di tano on.

7:10 Angkup ni, nunga hubasabasahon sada inganan tu bangsongku Israel, jala nunga hulopokkon ibana, asa maringanan ibana disi, asa unang be tarhutiksa, jala unang be didatdati angka anak ni hageduhon manosaknosak ibana, songon uju di mulana.

7:11 Jala olat ni ari, dung hupabangkit angka panguhum parenta bangsongku Israel, Ahu do mangalehon hasonangan tu ho maradophon sude musum. Angkup ni marbagabaga muse Jahowa tu ho, paboa pahoton ni Jahowa pinomparmu sogot.

7:12 Ia dung jumpang tingkim mate, marpungu ho tu angka ompum, patindangonku ma pinomparmu dipudim, na ruar sian butuham, tu Ibana ma pahotonku harajaon.

7:13 Ingkon Ibana pauli sada bagas di Goarhu, jala Ahu pahothon habangsa ni harajaonna ro di salelenglelengna.

7:14 Ahu gabe Amana, jala Ibana gabe Anakku. Molo tung mambahen dosa Ibana, linsinglinsing ni jolma pangkeonku mangalinsingi Ibana.

7:15 Alai ndang unsatonku sian Ibana anggo asi ni rohangku, songon na huunsati sian si Saul, naung hupaijur di jolomi.

7:16 Alai ingkon hot do anggo pinomparmi dohot harajaonmu ro di salelenglelengna di jolom, habangsam pe ingkon hot do ro di salelenglelengna.

7:17 Hombar tu saluhut angka hata ondeng, jala hombar tu sandok pangungkapon i mangkatai si Natan tu si Daud.

7:18 Dung i masuk ma raja Daud, laos hundul ma ibana di adopan ni Jahowa, ninna ma: Tung ise ma ahu pola, ale Tuhan Jahowa? Jala tung ise ma pola anggo pinomparhu, umbahen tung diboan Ho ahu sahat ro tuson?

7:19 Angkup ni maotikku dope i di roham, ale Tuhan Jahowa! Pola huhut marbagabaga Ho taringot tu pinompar ni naposom, taringot tu na masa sogot; uhum ni jolma do i, ale Tuhan Jahowa!

7:20 Tung aha dope angkup ni sidohonon ni si Daud tu Ho? Ai ditanda Ho do naposomon, ale Tuhan Jahowa.

7:21 Ala ni hatam, jala hombar tu roham dibahen Ho saluhut halongangan na bolon on, laho pabotohon angka i tu naposomon.

7:22 Ala ni umbahen timbul Ho, ale Jahowa Debata! Ai ndang adong jumpang songon Ho, jala ndang adong Debata dungkon ni Ho, hombar tu saluhut naung binege ni pinggolnami.

7:23 Jala tung didia ma adong jumpang sada bangso tudoshon bangsomu, songon Israel tahe di atas tano on? Tung Debata sandiri borhat laho manobus asa mangain bahen bangsona sandiri dohot mambahen barita di dirina, asa mambahen tu hamu halongangan bolon dohot na songkal humongkop tanomi di jolo ni bangsom, na tinobusmu di Ho sian Misir, sian angka parbegu dohot sian debatanasida.

7:24 Jala nunga dipadiri Ho di Ho bangsom Israel, bahen bangsom ro di salelenglelengna, jala Ho ale Jahowa, gabe Debatanasida.

7:25 Antong ale Debata Jahowa! Sai pahot ma hata naung pinarbagabagami taringot tu naposom dohot taringot tu pinomparna sahat ro di salelenglelengna, jala bahen ma hombar tu bagabagami.

7:26 Asa timbul Goarmu ro di salelenglelengna, asa dohonon ni halak songon on: Jahowa Zebaot do Debata ni Israel, jala hot ia pinompar ni naposom si Daud di jolomi.

7:27 Ai Ho, ale Jahowa Zebaot, Debata ni Israel, nunga dipapatar Ho tu pinggol ni naposomon hata on: Ahu pajongjongkon di ho sada bagas. Ala ni umbahen naung marhasonangan roha ni naposomon manangiangkon tu Ho tangiang on.

7:28 On pe, ale Tuhan Jahowa! Ho sandiri do Debata, jala hasintongan do angka hatam, jala nunga diparbagabaga Ho tu naposomon hata na denggan on.

7:29 Antong pungka ma nuaeng mamasumasu pinompar ni naposomon, asa hot di adopanmu nasida ro di salelenglelengna; ai Ho sandiri, ale Jahowa marbagabagahon, jala marhite sian pasupasum dapotan pasupasu pinompar ni naposomon ro di salelenglelengna.

2 Samuel 8[patota | patota mualna]

8:1 Jadi dung salpu angka i ditaluhon si Daud ma halak Palistim, tung tarjepol situtu nasida dibahen; dirampas si Daud huhut huta angka na masuk tu gomgoman ni huta sabungan Gat sian halak Palistim.

8:2 Ditaluhon muse halak Moab, jala disuhati nasida dohot tali, tung didokkon nasida manungkap tu tano, duadua tali disuhathon laho bunuon, jala boho satali laho pangoluon. Jadi mangoloi patu ma halak Moab, gabe naposo ni si Daud, manggarar sohe.

8:3 Ditaluhon si Daud huhut si Hadadeser, anak ni si Rehob, raja sian Zoba, uju na laho ibana pabidang gomgomanna sahat ro di batang aek Euprat.

8:4 Dung i dilaum si Daud ma sian ibana saribu pitu ratus halak parsihundul jala duapulu ribu paranganna parhantarhantar, jala ditallik si Daud do doldol ni saluhut hoda sitait hureta, saratus pasang sambing sian i di tinggalhon.

8:5 Alai ro ma halak Ram sian Damaskus naing manolongi si Hadadeser, rajai sian Zoba, gabe mate halak Ram i duapulu dua ribu halak, dibunu si Daud.

8:6 Dung i dipajongjong si Daud ma angka benteng di Ram humaliang Damaskus. Jadi mangoloi patu ma halak Ram gabe naposo ni si Daud, manggarar sohe; ai sai ditumpak Jahowa do si Daud monang manang dompak dia ibana mangalangka.

8:7 Dung i dibuat si Daud ma lombulombu sere, angka na pinaboanboan ni naposo ni si Hadadeser, ditaruhon angka i tu Jerusalem.

8:8 Dibuat raja Daud huhut sian Beta dohot sian Berotai, angka huta ni si Hadadeser, mansai godang tombaga.

8:9 Alai dung dibege si Tou, raja sian Hamat, naung tinaluhon ni si Daud sandok parangan ni si Hadadeser.

8:10 Disuru si Tou ma anakna si Joram manopot raja Daud manangkasi sonangna dohot mamasumasu ibana, ala naung pinorangan si Hadadeser, jala naung tinaluhonna ibana; ai marmusu tihus hian do si Tou dompak Hadadeser; diboan huhut di bagasan tanganna angka ulaula perak, sere dohot tombaga.

8:11 Angka i pe diparbadiai raja Daud do laho pasahathon tu Jahowa rap dohot perak dohot sere, naung pinarbadiaanna sian saluhut bangso parbegu angka naung pinapatuna i:

8:12 Sian Ram dohot sian Moab dohot sian halak Amon, sian halak Palistim dohot sian Amalek dohot sian tabantaban angka na dapot sian Hadadeser, anak ni si Rehob, raja sian Zoba.

8:13 Jadi marbarita goarna dibahen si Daud, uju mulak ibana dung pinapatuna halak Ram, jala binununa halak Edom di rura parsiraan, saribu ualu ratus halak toropna.

8:14 Dung i dipambahen ma angka benteng di Edom, tung di sandok Edom angka benteng i dipambahen, gabe mangoloi patu sandok Edom tu si Daud; ai ditumpak Jahowa do si Daud monang manang dompak dia ibana mangalangka.

8:15 Jadi bangkit raja ma si Daud gumomgom sandok Israel, sai dihajongjongkon si Daud do uhum dohot hatigoran tu sandok bangsona i.

8:16 Alai anggo si Joab, anak ni Nai Seruia manguluhon angka parangan, jala si Josapat, anak ni si Ahilud do panuturi.

8:17 Jala si Sadok, anak ni si Ahitub dohot si Ahimelek, anak ni si Abiatar, i ma angka malim, jala si Seraia do jurutulis.

8:18 Jala si Benaia, anak ni si Joiada, panahatan ni angka hupas dohot rundo. Alai anggo angka anak ni si Daud angka panuturi do nasida.

2 Samuel 9[patota | patota mualna]

9:1 Dung i ninna si Daud ma manangkasi: Adong dope ulaning jolma tadingtadingan ni raja Saul, asa hubahen asi ni roha tu ibana, ala si Jonatan?

9:2 Jadi adong ma sada naposo isi ni bagas ni si Saul nahinan, na margoar si Siba, gabe tarjou ibana tu jolo ni si Daud. Dung i ninna rajai ma mandok ibana: Atehe ho do si Siba? Naposom do ahu, ninna ibana.

9:3 Dung i didok rajai ma: Atehe adong dope jolma tadingtadingan ni si Saul, asa hubahen tu ibana asi ni roha sian Debata? Jadi ninna si Siba ma mandok rajai: Adong dope sada anak ni si Jonatan, pangpang patna duansa.

9:4 Dung i ninna rajai ma mandok ibana: Didia ibana? Gabe didok si Siba mandok rajai: Ida ma, di Lodebar do ibana, sorang tu si Mahir, anak ni si Ammiel.

9:5 Dung i disuru raja Daud suruanna mangalap ibana sian bagas ni si Mahir, anak ni si Ammiel di Lodebar.

9:6 Jadi dung sahat si Mepiboset, anak ni si Jonatan, tubu ni si Saul, tu jolo ni si Daud, manungkap ma ibana tu tano marsomba. Alai ninna si Daud ma: Ale Mepiboset! Gabe didok ibana ma: Dison do ahu naposom.

9:7 Dung i didok si Daud muse tu ibana: Unang ho mabiar, ai ingkon bahenonku tu ho asi ni roha, ala ni si Jonatan amangmu, ingkon paulahonku tu ho sude golat ni si Saul, ompumi, jala ingkon tongtong ho sapanganan dohot ahu.

9:8 Jadi marsomba ma ibana, huhut didok: Tung ise ma pola ahu naposom, umbahen pola dompakkononmu biang na mate songon ahu on?

9:9 Jadi dijou rajai ma si Siba, naposo ni si Saul, jala didok ma mandok ibana: Nasa na di si Saul dohot di sandok pinomparna najolo, nunga hulehon tu anak ni tuanmu.

9:10 Dibahen i ingkon ulaonmu tano i di ibana, ho dohot angka anakmu ro di angka naposom ingkon papunguonmu do gogona i, asa adong hangoluan ni anak ni tuanmu; alai anggo si Mepiboset, anak ni tuanmu, ingkon tongtong do ibana donganku sapanganan. Ia si Siba, sampulu lima do anakna jala duapulu angka naposona.

9:11 Dung i ninna si Siba ma mandok rajai: Hombar tu sude na nidokkon ni tuanku, rajai tu naposona, ingkon songon i bahenon ni naposom. Alai anggo si Mepiboset ingkon donganku sapanganan do i, songon sada sian angka anak ni rajai.

9:12 Dung i adong ma si Mepiboset sada anakna na metmet, na margoar si Mika. Alai luhut isi ni bagas ni si Siba, angka naposo ni si Mepiboset do.

9:13 Asa maringan di Jerusalem do si Mepiboset, ai tongtong do ibana sapanganan dohot rajai; alai pangpang do anggo patna duansa.

2 Samuel 10[patota | patota mualna]

10:1 Jadi dung salpu angka i, mate ma raja ni halak Amon, jadi si Hanun anakna i bangkit raja singkatna.

10:2 Dung i ninna si Daud ma: Naeng ahu marasi ni roha si Hanun, anak ni si Nahas, songon amana nahinan na marasi ni roha tu ahu; jadi disuru si Daud ma suruanna laho mangapuli ibana marhitehite angka naposona ala panading ni amana i. Hape dung sahat angka naposo ni si Daud tu luat ni halak Amon.

10:3 Ro ma hata ni angka induk ni halak Amon mandok tu si Hanun, tuannasida i: Tung pasangaphon amangmu ma tagamon si Daud, nang di roham, umbahen disuru tu ho angka pangapul? Nda na laho manangkasi huta on dohot mangkahapisa, asa agoonna umbahen disuru si Daud angka naposona manopot ho?

10:4 Dung i ditangkup si Hanun ma angka naposo ni si Daud, jala didokkon nabungon janggutnasida sambariba, jala horoton ulosnasida sahat ro di hundulanna, gabe songon i nasida dipamuli.

10:5 Jadi dung tarbortik barita i tu si Daud, disuru ma angka suruanna manjumpangkon nasida, ai tung na tarurak situtu do angka baoa i dibahen. Ia tona ni rajai tu nasida: Tinggal ma hamu jolo di Jeriko, paima martumbur muse janggutmuna i, dung i pe asa mulak hamu.

10:6 Alai dung diida halak Amon naung bau roha ni si Daud mida nasida, gabe disuru halak Amon ma suruanna laho mangupai halak Ram sian Betrehob dohot halak Ram sian Zoba, arga duapulu ribu halak parhantarhantar, jala sian raja Maaka saribu halak, angkup ni sampulu dua ribu halak sian Tob.

10:7 Jadi dung tarbortik barita i tu si Daud, gabe disuru ma si Joab manguluhon sandok paranganna angka na begu i.

10:8 Jadi ruar ma halak Amon, marodor laho tu tongtangan mardonokkon bahal ni huta i. Alai anggo halak Ram sian Zoba, dohot sian Rehob ro di baoa angka sian Tob dohot sian Maaka pulik jongjong di ladang.

10:9 Jadi dung diida si Joab, sai ibana do hape ditumpur angka musu i, sian jolo dohot sian pudi, gabe dipillit ma sian saluhut dolidoli di Israel, jala dipaodor laho mandopang halak Ram.

10:10 Alai anggo pasipasi ni parangan i tu tangan ni si Abisai anggina i dipasahat, jala baris dipajongjong laho mandopang halak Amon.

10:11 Jala didok do: Molo tung talu onjar ahu bahenon ni halak Ram, ingkon ro ho mangurupi ahu; ai molo tung talu onjar ho bahenon ni halak Amon, ro pe ahu mangurupi ho.

10:12 Antong pir ma tondim, itaseahon ma dirinta humongkop bangsonta, humongkop dohot angka huta ni Debatanta; alai sai dipasaut Jahowa ma lomo ni rohana.

10:13 Dung i martahop ma si Joab rap dohot angka parangan donganna i laho mandopang halak Ram, gabe maporus nasida maradophon ibana.

10:14 Jadi dung diida halak Amon, naung maporus hape halak Ram, maporus ma dohot nasida maradophon Abisai, jala masuk tu bagasan huta i. Dung i mulak ma si Joab sian na mandopang halak Amon, jala tolhas ibana tu Jerusalem.

10:15 Jadi dung diida halak Ram naung talu nasida dibahen halak Israel, santi balatuk ma nasida.

10:16 Dung i disuru si Hadadeser ma suruanna marhara tu halak Ram angka na di bariba ni batang aek i, gabe sahat nasida tu Helam, jala si Zoba, partogi ni parangan ni si Hadadeser manguluhon nasida.

10:17 Jadi dung tarbortik barita i tu si Daud, gabe dipaluhut ibana ma sandok Israel, jala ditaripari batang aek Jordan, gabe sahat ibana tu Helam, jadi marodor ma halak Ram laho mandopang si Daud marmusu.

10:18 Alai maporus ma halak Ram maradophon Israel, jala dibunu si Daud ma sian halak Ram pitu ratus halak parmusu di hureta dohot opatpulu ribu halak parsihundul, dibunu dohot si Zoba partogi ni paranganna i, laos mate disi ibana.

10:19 Alai dung diida sude raja, angka na marpandapotan tu si Hadadeser, naung talu nasida dibahen halak Israel, gabe mardemak nasida tu Israel, jala mangoloi patu tu nasida. Jadi mabiar ma halak Ram anggo tung haraon ni halak Amon nasida muse.

2 Samuel 11[patota | patota mualna]

11:1 Jadi dung salpu sataon, jumpang muse tingki haboborhat ni angka raja, gabe disuru si Daud ma si Joab dohot angka naposona bahen donganna ro di sandok Israel, asa disiaphon nasida halak Amon jala di tungkum huta Rabba. Alai tinggal di Jerusalem do anggo si Daud.

11:2 Dung i marhira bodari, hehe ma si Daud sian podomanna jala mardalandalan di atas tarup ni bagas ni rajai, gabe diida ma sian atas tarup i sada parompuan na maridi, uli situtu do rupa ni parompuan i.

11:3 Dung i disuru si Daud ma suruanna asa ditangkasi pangalaho ni parompuan i, gabe didok halak ma: Nda si Batseba do i, boru ni si Eliam, jolma ni si Uria, marga Het i?

11:4 Jadi disuru si Daud ma suruanna mangalap nasida; jadi dung sahat nasida tu jolona, laos diangkupi ma nasida modom. Alai dung manguras nasida sian haramunonna, muli ma nasida tu jabuna.

11:5 Hape dung gabegabean parompuan i, disuru ma suruanna pabotohonsa tu si Daud, ninna ma: Nunga gabegabean ahu.

11:6 Dung i disuru si Daud ma suruanna manonahon tu si Joab: Suru tu ahu si Uria, marga Het i. Jadi disuru si Joab ma si Uria manopot si Daud.

11:7 Jadi dung sahat si Uria tu jolona disungkuni si Daud ma ibana taringot tu sonang ni si Joab dohot taringot tu sonang ni angka parangan i, dohot taringot tu sonang ni humusuon i?

11:8 Dung i didok si Daud ma tu si Uria: Tuat ma ho laho muli tu jabum jala buri patmu. Jadi dung ruar si Uria sian jabu ni rajai, ihut ma sian pudina silehonlehon sian rajai.

11:9 Hape modom do si Uria di lambung pintu ni bagas ni rajai rap dohot saluhut naposo ni tuanna, jala ndang tuat ibana muli tu jabuna.

11:10 Jadi dibaritahon halak ma tu si Daud songon on: Ndang tuat si Uria laho muli tu jabuna. Dung i didok si Daud ma tu si Uria: Nda nambura ho ro sian pardalanan? Boasa so tuat ho laho muli tu jabum?

11:11 Alai ninna si Uria ma mandok si Daud: Gari poti parpadanan i, tole Israel dohot Juda maringan di bagasan angka undungundung, jala tuanku si Joab ro di angka naposo ni tuanku marsaro manangkas di ladang, tung olo ma ahu masuk tu jabungku laho mangan dohot minum jala modom rap dohot jolmangku? Songon sintongna mangolu ho, mangolu dohot tondim, molo tung olo ahu mambahen songon i!

11:12 Dung i ninna si Daud ma mandok si Uria: Tinggal dison dope ho nang sadarion, marsogot pe husuru ho mulak. Jadi tinggal ma si Uria di Jerusalem di na sadari i dohot marsogotna i.

11:13 Dung i diontang si Daud ma ibana, asa mangan di adopanna jala minum, pola mabuk ibana dibahen. Alai bodarina i ruar ma ibana laho modom tu podomanna rap dohot angka naposo ni tuanna, jala ndang tuat ibana laho muli tu jabuna.

11:14 Tole manogotna i muse disurat si Daud ma sada surat tu si Joab, jala si Uria panongosanna dibahen.

11:15 Ia hata ni suratna i on do: Patongon hamu ma si Uria tungkan na sumobu marporang, jala lumindak hamu sian pudina, asa hona ibana laos mate.

11:16 Jadi laho martahop si Joab dompak huta i, dipatongon ma si Uria tu hajongjongan naung binotona hian adong disi parangan angka na umbegu.

11:17 Dung i ruar ma angka baoa ni huta i, asa masijonapan dohot si Joab, gabe tinggang deba sian natorop i, sian angka naposo ni si Daud, mate ma dohot si Uria marga Het i.

11:18 Dung i disuru si Joab ma suruanna mamboan barita tu si Daud taringot tu sandok pangalaho ni parporangan i.

11:19 Ditonahon ma tu suruani mandok songon on: Ia dung tolhas sandok pangalaho ni parporangan i dipaboa ho tu rajai.

11:20 Tung sura hehe rimas ni rajai diida ho, gabe didok mandok ho: Boasa tung manorpanorpa hamu tu huta i laho marporang? Nda diboto hamu hian, ingkon mamodili nasida sian parik?

11:21 Ise do mambunu najolo si Abimelek, anak ni si Jerubbeset? Nda sada parompuan mandekdekkon santopik batu pandudaan sian parik i tu ibana, gabe mate ibana di Tebes? Boasa tung manorpanorpa hamu tu parik i? Jadi dohononmu ma: Nunga mate nang naposom si Uria marga Het i.

11:22 Jadi mardalan ma suruani jala sahat paboahon tu si Daud saluhut na tinonahon ni si Joab i tu ibana.

11:23 Dung i ninna suruani ma mandok si Daud: Ala tumang angka baoa i sian hami, gabe ruar nasida mandapothon hami tu adaran, hape hudopang hami nasida sahat ro di pintu harbangan.

11:24 Jadi mamodili angka partembahi dompak angka naposom sian parik i, gabe mate deba sian angka naposo ni rajai, mate dohot naposom si Uria, marga Het i.

11:25 Dung i ninna si Daud ma mandok suruani: Songon on ma dohononmu tu si Joab: Unang pola gondok roham ala hata i, ai bangkona do i tole sadaon tole sadaan dipangan podang. Sai gogo hamu ma pandopangmu dompak huta i, jala lohai hamu. Antong papir ma tondina i!

11:26 Jadi dung dibege jolma ni si Uria nahinan naung mate sinondukna i, gabe ditatangisi ma harajaanna i.

11:27 Alai dung pasae tujung ibana disuru si Daud ma suruanna mangalap nasida tu jabuna, laos gabe jolmana, jala ditubuhon di ibana sada anak. Alai sogo situtu roha ni Jahowa mida pambahenan ni si Daud i.

2 Samuel 12[patota | patota mualna]

12:1 Dung i disuru Jahowa ma si Natan manopot si Daud. Jadi dung sahat ibana tu jolona, ninna ma mandok ibana: Adong ma dua halak di na sahuta, sada na mora, sadanari na pogos.

12:2 Ia di na mora i mansai torop do birubiru dohot lombu.

12:3 Alai anggo di na pogos i ndang adong dungkon ni sada anak ni birubiru, na tinuhorna, jala dipadimundimun, asa balga di lambungna rap dohot anakna i muse; dipahan do i tu pangananna jala dipasobur tu panginumanna, dipapodompodom tu ampuanna, hira doshon boruna dibahen.

12:4 Dung i ro ma sahalak pardalandalan tuli sian na mora i, gabe diolani anggo mambuat sian birubiru na, dohot sian lombuna, laho marhobas sipanganon tu halak pardalandalan na ro manopot ibana; tung dibuat do anak ni birubiru ni halak na pogos i jala dihobas di baoa na ro manopot ibana.

12:5 Jadi marpiarpiar ma rimas ni si Daud mida baoa i, ninna ma mandok si Natan: Songon sintongna mangolu Jahowa, ingkon marutang hosa baoa na mambahen songon i.

12:6 Angkup ni ingkon lompit opat hali gararonna anak ni birubiru i ala binahenna songon i, ala so alang rohana.

12:7 Dung i ninna si Natan ma mandok si Daud: Ho do baoa i! Songon on do hata ni Jahowa, Debata ni Israel: Nunga Ahu mamiahi ho bahen raja gumomgom Israel, jala nunga Ahu paluahon ho sian tangan ni si Saul.

12:8 Nunga pola hubasabasahon tu ho dohot isi ni bagas ni tuanmu, ro di angka jolma ni tuanmu tu bagasan ampuanmu, jala nunga hulehon tu ho pinompar ni Israel dohot Juda, jala tung sura maotikku dope i tambaanku dope nian tu ho manang sadianari.

12:9 Boasa tung parhamudaonmu hata ni Jahowa laho mangulahon sogo ni rohana? Ia si Uria marga Het i, nunga dibunu ho marhitehite podang, jala jolmana i nunga dibuat ho bahen jolmam; alai anggo ibana nunga dibunu ho marhitehite podang ni halak Amon.

12:10 On pe ndang be sumurut podang i sian jabum ro di salelenglelengna, ala naung ditoisi ho Ahu, jala dibuat ho jolma ni si Uria, marga Het i bahen jolmam.

12:11 Songon on do hata ni Jahowa: Ida ma, Ahu sandiri pahehehon dompak ho jea sian pinomparmu sandiri, jala buatonku angka jolmam sian jolo ni matam, jala lehononku angka i tu pedanmu, asa diangkupi angka jolmam modom di adopan ni mata ni ari on.

12:12 Ai na niulahonmi di na holip, papataronku ma i di adopan ni sandok Israel dohot di adopan ni mata ni ari.

12:13 Dung i ninna si Daud ma mandok si Natan: Nunga mardosa ahu dompak Jahowa! Jadi ninna si Natan ma mandok si Daud: Antong nunga disesa Jahowa dosami, ndang be mate anggo ho.

12:14 Alai tahe ala naung manginsahi situtu angka musu i di Jahowa dibahen ho marhite sian hata on, ingkon mate anggo na tubu di ho.

12:15 Dung i muli ma anggo si Natan tu jabuna. Alai disahiti Jahowa ma posoposo i, na tinubuhon ni jolma ni si Uria di si Daud, gabe matemate ne.

12:16 Dung i diparhurajai si Daud ma Debata ala posoposo i, huhut marpuasa si Daud, jala masuk tu bilutna, laos peak di tano manipat sabornginna i.

12:17 Dung i hehe ma angka sintua ni jabuna manopot ibana, naeng pahehehon ibana nian sian tano i; alai ndang olo ibana, jala ndang olo ibana mangan sipanganon rap dohot nasida.

12:18 Tole muse papituarihon, mate ma posoposo i. Jadi mabiar ma angka naposo ni si Daud paboahon tu ibana naung mate posoposo i, ai ninna rohanasida do: Ida ma, uju mangolu dope posoposo i hupangkulingi hami ibana, hape ndang ditangihon soaranami; nda lam maningkotningkot ma ibana molo hudok hami tu ibana: Nunga mate posoposo i.

12:19 Jadi dung diida si Daud masihusipan angka naposona i, mamoto ma ibana naung mate posoposo i, gabe didok si Daud ma mandok angka naposona i: Atehe nunga mate posoposo i? Jadi didok nasida ma: Nunga mate tutu.

12:20 Dung i hehe ma si Daud sian tano i jala marsuap huhut marpangir jala disalin pangkeanna, jala masuk ibana tu bagas ni Jahowa, asa martangiang. Jadi dung mulak ibana tu jabuna, didokkon ma padirihon sipanganon di ibana, laos mangan ibana.

12:21 Jadi ninna angka naposona ma mandok ibana: Dia do i na binahenmon? Uju mangolu dope posoposo i, marpuasa do ho jala tumatangis, alai ia dung mate posoposo i, hehe do ho jala mangan sipanganon.

12:22 Dung i ninna rajai ma: Uju mangolu dope posoposo i, marpuasa do ahu tutu jala tumatangis, ai ninna rohangku do: Ise umbotosa, atik tung marpangulahi roha ni Jahowa mida ahu, anggiat laos mangolu posoposo i.

12:23 Alai anggo dung mate nuaeng aha gunana marpuasa ahu? Tung tarbahen ahu be mangalap ibana mulak? Ahu nama mandapothon ibana, alai anggo ibana ndang tagamon be mulak tu ahu.

12:24 Jadi dung diapuli si Daud roha ni si Batseba jolmana i, ditopot ma nasida, laos rap modom. Jadi tubuan anak ma nasida muse, dibahen ma goarna si Salomo. Holong roha ni Jahowa anggo mida ibana.

12:25 Dung i dipaguruhon ma ibana tu panurirang Natan, na manggoar ibana Jedija, ala hasudungan ni Jahowa ibana.

12:26 Sai marmusu anggo si Joab dompak Rabba ni halak Amon, laos tartaban huta hundulan ni harajaon i.

12:27 Dung i disuru si Joab ma angka suruanna manopot si Daud huhut mandok: Nunga patu hubahen Rabba, nunga hutaban huhut huta di topi ni aek.

12:28 Antong haru papungu ma pasipasi ni parangan i jala tungkum huta i, laos papatu, asa unang ahu papatu huta i, jala unang apala goarhu tarjou tusi.

12:29 Jadi dipapungu si Daud ma sude parangan i jala borhat dompak Rabba, asa marporang dompak huta i, laos dipapatu.

12:30 Dung i dibuat ma tumpal ni rajanasida sian uluna, ia boratna sada talenta sere padohot angka mata intan, jadi dibahen ma i tu ulu ni si Daud, diboan huhut mansai godang tabantaban sian huta i.

12:31 Diparuar huhut situan natorop, isi ni huta i, jala dipampeakkon nasida tu toru ni gargaji dohot tu toru ni angka hureta bosi pardegean dohot tu toru ni angka tangke bosi jala dimosokkon nasida tu Molok i. Suang songon i dibahen tu saluhut huta ni halak Amon. Dung i mulak ma si Daud dohot sandok parangan i tu Jerusalem.

2 Samuel 13[patota | patota mualna]

13:1 Jadi dung salpu angka i, adong ma di si Absalom, anak ni si Daud, sada iboto na uli rupa, na margoar si Tamar, gabe solo roha ni si Amnon, anak ni si Daud, mida nasida.

13:2 Jadi hagogotan ma roha ni si Amnon, pola tung dapotan sahitna ala si Tamar, ibotona i; ai namarbaju do nasida, mansai sungka di roha ni si Amnon mambahen agia aha tu nasida.

13:3 Alai adong ma di si Amnon sada aleale, na margoar si Jonadab, anak ni si Simea, haha ni si Daud; halak na bisuk situtu do si Jonadab i.

13:4 Ro ma hatana tu si Amnon: Mahua ho, umbahen sai lam ganda niangmu, ho ale anak ni raja, sian sadari tu manogotna i! Atehe ndang tarpaboa ho alana tu ahu? Dung i ninna si Amnon ma mandok ibana: Si Tamar, iboto ni si Absalom, anggingki nian dihasolohon rohangku.

13:5 Jadi ninna si Jonadab ma mandok ibana: Modom ma ho tu podomanmu, jala paula ho marsahit. Ia dung ro amangmu maningkir ho, dohononmu ma tu ibana: Ua dokkon nian ro si Tamar, ibotongki mangalehon ahu mangan sagusagu dohot marhobas sipanganon di jolongku, asa hupaidaida, jala mangan ahu sian tanganna.

13:6 Dung i laho modom ma si Amnon, dipaula ibana marsahit. Jadi dung ro rajai maningkir ibana, ninna si Amnon ma mandok rajai: Aut ro nian si Tamar, ibotongku, asa dipauli dua sagusagu di jolongku, jala mangan ahu sian tanganna.

13:7 Dung i disuru si Daud ma suruanna mangalapi si Tamar tu jabu, ninna ma: Ua laho ho tu jabu ni si Amnon, ibotom, jala hobas di ibana sipanganon.

13:8 Dung i laho ma si Tamar tu jabu ni si Amnon, ibotona i. Alai peak di podomanna do ibana didapot. Jadi dibuat ma itak na niudi, jala didogildogil ma i, asa mambahen sagusagu di jolona, laos dilompa ma angka sagusagu i.

13:9 Dung i dihindat ma balanga i laos diusehon di jolona; alai manjua do ibana mangan. Dung i ninna si Amnon ma: Dokkon ma ruar sude jolma i sian lambungku, jadi ruar ma sude jolma i sian lambungna.

13:10 Dung i ninna si Amnon ma mandok si Tamar: Boan ma ale ito, sipanganon i tu bilut, asa mangan ahu sian tanganmu! Jadi dibuat si Tamar ma angka sagusagu na pinaulina i, jala diboan tu si Amnon, ibotona i tu bagasan bilut.

13:11 Jadi dung diboan jonok tu lambungna, asa mangan ibana, disoro ma nasida, jala ninna ma mandok nasida: Ro ma ho ale ito, modom tu lambungkon!

13:12 Alai ninna nasida ma mandok ibana: Unang songon i ale ito! Unang parsoada ahu, ai ndang jadi ulahononhon songon i di Israel. Unang ulahon haurahon sisongon i!

13:13 Ia ahu, tung tudia ma boanonku haurahonku? Ia ho gabe tudoshon sahalak sian angka na oto di Israel. Ua pangkulingi tagonan rajai, ai ndang tagamon juaonna mangalehon ahu tu ho.

13:14 Alai ndang olo ibana manangihon soaranasida, tung digogoi do nasida, jala diparsoada, laos diangkupi nasida modom.

13:15 Dung i magigi situtu ma si Amnon mida nasida, umbalga gigina mida nasida, sian holongna na jolo; pola didok si Amnon mandok nasida: Hehe ma ho, laho ma ne ho!

13:16 Alai ninna nasida ma mandok ibana: Sitongka songon i, umbalga do hajahaton on, sian na asing, na binahenmi tu ahu, tung palaholahoonmu ahu. Alai ndang olo ibana tumangihon nasida.

13:17 Pola dijou naposona, parhaladona, jala ninna ma: Ua pabali parompuan on sian lambungkon tu balian, jala hinsu pintu i sian pudina!

13:18 Alai salumbung sampuborna na ganjang alit tu nasida, ai songon i do somal angka boru ni raja, angka namarbaju, marpangkean salumbung do. Jadi dung dionjaronjar pahaladona i nasida tu balian, jala dihinsu pintu i sian pudina.

13:19 Dibahen si Tamar ma sirabun tu uluna, jala disansani salumbung sampuborna i na ganjang i, na alit tu nasida, jala dibahen tanganna tu uluna, laos hatop mardalan huhut mangangguhi.

13:20 Dung i ninna si Absalom, ibotona i ma mandok nasida: Atehe ndatung ditopot si Amnon ibotomi ho? Antong, ale ito, sip ma ho, ibotom do ibana; unang pola arsakkon tu roham hata on! Alai mago marsak boti ma si Tamar tading di jabu ni si Absalom, ibotona i.

13:21 Jadi dung dibege si Daud angka hata i sudena, tarrimas situtu ma ibana.

13:22 Alai ndang masipangkulingan si Absalom dohot si Amnon nang taringot tu na jat, manang na denggan; ai dihosom si Absalom do si Amnon, ala ginogoanna si Tamar, ibotona i.

13:23 Jadi dung salpu arga dua taon, uju adong di si Absalom angka sigusting imput ni birubiruna di Baal-Hazor, mardonokkon Epraim, dipio si Absalom ma huhut angka anak ni rajai.

13:24 Dung i ditopot si Absalom ma rajai, ninna ma: Ua ida ma, adong angka sigusting imput ni birubiru di naposomon, aut olo nian rajai rap dohot angka naposona mardalan sauduran dohot naposomon.

13:25 Alai ninna rajai ma mandok si Absalom: Ndang pola, ale anaha! Unang pola luhut hami ro, asa unang pola susa ho bahenonnami. Sai disosoi do nian ibana, alai laos so olo rajai laho, asal dipasupasu ibana.

13:26 Dung i ninna si Absalom ma: Molo so pola dohot rajai, ua loas ma si Amnon dahahang i mardalan rap dohot hami. Alai ninna rajai ma tu ibana: Boasa pola dohot ibana mardalan rap dohot ho?

13:27 Alai sai didatdati si Absalom do manosoi ibana, asa diloas rajai si Amnon laho rap dohot sude anak ni rajai.

13:28 Dung i martona ma si Absalom tu angka naposona songon on: Ua matahon hamu ma, molo mamungka las roha ni si Amnon binahen ni anggur, jala hudok mandok hamu: Bunu hamu ma si Amnon, ingkon bunuonmuna ibana mate! Unang ma mabiar hamu, ai ahu do mandokkon hamu. Antong pir ma tondimuna jala angka na todos di ari!

13:29 Jadi dibahen angka naposo ni si Absalom ma tu si Amnon, songon na tinonahon ni si Absalom i. Jadi hehe ma sude anak ni rajai jala marsihundul ganup di halodena be na marsahe asa maporus.

13:30 Jadi di tongan dalan dope nasida, nunga sahat barita i tu si Daud, didok halak ma: Nunga dibunu si Absalom sude anak ni rajai, ndang adong teba sian nasida nanggo sahalak.

13:31 Dung i hehe ma rajai, jala disansani angka pangkeanna, laos manungkap tu tano, jala saluhut naposona jongjong humaliang ibana marpangkean angka na sinansanan.

13:32 Dung i ro ma hata ni si Jonadab, anak ni si Simea, haha ni si Daud, ninna ma: Unang ma didok roha ni tuanku: Luhut dolidoli, angka anak ni rajai naung mate, sasada si Amnon do na mate; ai tibu hian do i ditahi roha ni si Absalom, olat ni ari dung ginogoan ni si Amnon tahe si Tamar, ibotona i.

13:33 On pe unang ma pola diarsakkon rajai hata i tu rohana, pola dirimpu saluhut anak ni rajai naung mate, ai sasada si Amnon i do na mate.

13:34 Alai maporus ma anggo si Absalom. Dung i manatapnatap ma dolidoli parjaga i, gabe diida ma torop halak ro sian dalan dipudi na, mangoriori dolok.

13:35 Dung i ninna si Jonadab ma mandok rajai: Ida ma, nunga ro angka anak ni rajai; songon na nidok ni naposomon, songon i do masa.

13:36 Jadi dung tolhas hatana i didok, ida ma, nunga ro angka anak ni rajai, angka dipangiar be ma soarana tumatangis; rajai pe ro di naposona sudena manggogo be tumatangis.

13:37 Alai anggo si Absalom nunga maporus laho mandapothon si Talmai, anak ni si Amihud, raja sian Gesur. Alai sai gondok do anggo roha ni si Daud paingotingot anakna i saleleng mangolu ibana.

13:38 Asa dung maporus si Absalom laho tu Gesur, gabe tinggal disi ibana tolu taon lelengna.

13:39 Dung i di laonlaon ni ari masihol ma roha ni raja Daud naeng borhat mandapothon si Absalom, ai nunga sabam rohana mida si Amnon naung mate i.

2 Samuel 14[patota | patota mualna]

14:1 Jadi dung mamoto si Joab, anak ni Nai Seruia naung masihol roha ni rajai mida si Absalom.

14:2 Jadi disuru si Joab ma suruanna tu Tekoa mangalapi sian i sada parompuan na bisuk, ninna ma mandok nasida: Ua paula ho marsak jala tujungkon ulosmi jala unang marpangir ho, jala paula songon sada parompuan naung leleng marhinamagohon jolma na mate.

14:3 Dung i topot ma rajai jala aluhon tu ibana hombar tu hata on. Dung i diaturhon si Joab ma hata angka sidohononna.

14:4 Tole laho mangalualu nian parompuan sian Tekoa tu rajai manungkap ma ibana tu tano jala marsomba, ninna ma: Tolongi ahu, ale rajanami!

14:5 Dung i ninna rajai ma mandok nasida: Aha huroha di ho? Jadi ninna nasida ma: Iale rajanami, parompuan na mabalu do ahu, nunga mate sinondukku.

14:6 Jala adong di naposom boruboru dua anak, pagulut nasida na dua di ladang jala ndang adong nanggo sahalak manolai nasida, gabe dibunu na sahalak na sahalaknari laos mate ibana.

14:7 Dung i ida ma, nunga hehe sandok margai dompak naposom boruboru, angka ninna ma: Boan tuson jolma sibunu anggina i, asa hubunu hami ibana bahen abul ni anggina i, naung binununa i, asa husiaphon hami nang panean i. Asa naeng intopannasida do anakku na sampisik na tinggal i, asa unang tinggal di sinondukku goar, manang pinompar di atas tano on.

14:8 Dung i didok rajai ma mandok parompuan i: Laho ma ho muli tu jabum, hulehon pe parenta taringot tu ho.

14:9 Dung i ninna parompuan sian Tekoa i ma mandok rajai, iale rajanami: Manginona tu ahu dohot tu pinompar ni damang hajahaton i; alai lias ma anggo rajai dohot habangsana.

14:10 Dung i ninna rajai ma: Molo adong manang ise na mandok boha tu ho, boan ma ibana tu jolongku, asa unang be didatdati pasusasusa ho.

14:11 Dung i ninna parompuan i ma: Sai marningot ma rajai di Jahowa Debatam, asa unang dipatamba parlulu i hinamago, jala unang diago nasida anakki! Alai ninna rajai ma: Songon sintongna mangolu Jahowa, na so tupa marurus nanggo sada sian obuk ni anakmu tu tano.

14:12 Dung i ninna parompuan i ma: Santabi ale rajanami, sai loas ma naposom boruboru mandok hata sisandok tu tuanku! Dung i ninna rajai ma: Antong hatahon ma!

14:13 Dung i ninna parompuan i ma: Boasa tung songon i sangkap ni roham dompak bangso ni Debata? Olat ni dung didok rajai hata ondeng, doshon halak parsala ibana, ala so mulak diloas rajai jolma na pinabalina.

14:14 Ai ingkon mate do hita, jala songon aek do hita na niusehon tu tano, na so tarpapungu be, jala ndang dibuat Debata hosa ni halak, sai marsangkap do rohana, asa unang laos dipabali sian ibana jolma naung bali hian.

14:15 Nuaeng pe, umbahen na ro ahu mandok hatangkon tu rajai, ala dipambibiari halak ahu; jadi ninna roha ni naposom boruboru: Ua mangalualu ahu tu rajai, anggiat tung diturut rajai hata ni naposona boruboru.

14:16 Olo tahe, sai tangihonon ni rajai do laho paluahon naposona boruboru sian tangan ni baoa na naeng mangago ahu rap dohot anakki sian partalian ni Debata.

14:17 Angkup ni ninna roha ni naposom boruboru do: Anggiat tung hata ni tuanku, pasonang roha; ai songon sada surusuruan ni Debata, songon i do tuanku rajai tumangihon na denggan dohot na jat; sai didongani Jahowa Debatam ma ho!

14:18 Dung i ro ma alus ni rajai mandok tu parompuan i: Unang tung porso tu ahu hata na naeng sungkunhononku tu ho. Jadi ninna parompuan i ma: Didok tuanku ma hatana!

14:19 Dung i ninna rajai ma: Atehe, nda tangan ni si Joab mandongani ho di saluhutna i? Jadi ninna parompuan i ma mangalusi: Songon sintongna mangolu hosam, ale rajanami molo tung adong na lipe tungkan siamun manang tungkan hambirang, sian saluhut na nidok ni tuanku, ai naposom si Joab, ibana tahe manonai ahu, jala ibana mangaturhon saluhut hata i tu pamangan ni naposom boruboru.

14:20 Mambahen marpangaliatan pe hata i, laos binahen ni naposom si Joab do; alai na pistar do anggo tuanku, songon hapistaran ni sada suruan ni Debata, tung diboto do saluhut na masa di tano on.

14:21 Dung i didok rajai ma mandok si Joab: Ida ma, nunga hubahen hombar tu hatamon; antong laho ma ho, boan ma mulak dolidoli si Absalom i.

14:22 Jadi manungkap ma si Joab tu tano marsomba, jala dipasupasu rajai, ninna ma: Apala sadarion ma mamoto naposom, naung dapotan asi ni roha ahu di adopanmu, ale rajanami, ala dibahen rajai hombar tu hata ni naposona.

14:23 Jadi borhat ma si Joab laho tu Gesur, jala diboan si Absalom tu Jerusalem.

14:24 Alai ninna rajai ma: Mulak ma ibana jolo tu jabuna, ndang dope idaonna anggo bohingku. Jadi mulak ma si Absalom tu jabuna, alai anggo bohi ni rajai ndang dope diida.

14:25 Alai ndang adong di sandok Israel nanggo sahalak songon uli ni si Absalom, pola tarbarita situtu. Sian palak ni patna sahat ro di pakpak uluna, ndang adong tihasna.

14:26 Ia uju digusting obuk ni uluna (disimburi do i somal di ujung ni gonop taon, ai madokdokhu do i di ibana, jadi ingkon manimburi ibana) jadi borat ni obuk ni uluna dua ratus sekkel do nidasing di hatian ni raja.

14:27 Dung i tubu ma di si Absalom tolu anak jala sada boru, na margoar si Tamar; i ma sada parompuan na uli rupa.

14:28 Asa boho dua taon lelengna tinggal si Absalom di Jerusalem, laos so diida do anggo bohi ni rajai.

14:29 Jadi disuru si Absalom ma suruanna manopot si Joab, naeng suruonna ibana manopot rajai; hape ndang olo ro si Joab. Dung i disuru muse paduahalihon, alai laos so olo ibana ro.

14:30 Jadi ninna si Absalom ma mandok angka naposona: Ida hamu ma hauma ni si Joab di lambung haumangku, hatubuan ni eme! Laho ma hamu, jala surbu hamu ma i dohot api! Jadi disurbu angka naposo ni si Absalom ma na santurpuk i dohot api.

14:31 Jadi borhat ma si Joab manopot si Absalom tu jabu, ninna ma mandok ibana: Boasa tung disurbu angka naposom haumangku na santurpuk i dohot api?

14:32 Dung i ninna si Absalom ma mandok si Joab: Ida ma, nunga pola husuru suruanku manopot ho, mandok: Sai ro ma ho tuson, asa husuru ho manopot rajai, mandok tu ibana, boasa ro ahu ulaning sian Gesur? Tagonan di rohangku disi dope ahu. On pe sai naing idaonku bohi ni rajai. Alai molo tung adong dope salangku, dibunu rajai nian ahu!

14:33 Dung i ditopot si Joab ma rajai, jala dipasahat hata i tu ibana. Dung i didokkon rajai ma si Absalom ro tu jolona, gabe disomba ibana, pola tung manungkap tu tano di adopan ni rajai, jadi diumma rajai ma si Absalom.

2 Samuel 15[patota | patota mualna]

15:1 Dung salpu angka i, didokkon si Absalom ma padirion di ibana hureta dohot angka hoda, angkupni limapulu halak, angka na paihutihut ibana.

15:2 Hehe huhut sogot ganup manogot si Absalom laho jongjong tu lambung dalan tungkan bahal. Jadi ia adong ro halak na marparkaro laho manopot rajai mangido uhum, gabe dipangkulingi si Absalom, ibana, ninna ma: Sian huta dia do ho? Ia didok ibana: Sian sada huta di angka marga ni Israel do naposomon.

15:3 Jadi didok si Absalom ma tu ibana: Ida ma, tingkos do nian parkarom jala bonar, alai ndang tagamon adong nanggo sahalak na manangihon alualum di jolo ni rajai.

15:4 Angkup ni didok si Absalom ma: Iale inang, aut ahu ma nian dipabangkit halak gabe panguhum di tano on, asa ro tu jolongku ganup jolma na marparsalisian manang marparkaro, patingkosonku ma nian uhum tu ibana!

15:5 Dung i molo adong jolma jumonok, naeng marsomba tu ibana, pintor disurdukkon tanganna manogu ibana huhut diumma.

15:6 Sai songon i pangalahona dibahen si Absalom tu sandok Israel, angka na ro mangido uhum tu rajai; gabe songon i ditangko si Absalom roha ni halak Israel.

15:7 Jadi dung salpu opat taon, ninna si Absalom ma mandok rajai: Ua loas ma ahu laho tu Hebron, asa hugarar bagabagangku, naung hubagabagahon tu Jahowa.

15:8 Ai nunga marbagabaga hian naposomon uju maringan dope ahu di Gesur, di luat Ram, ningku do: Molo tung sonang ahu mulak togihonon ni Jahowa tu Jerusalem pasahatonku ma sada pelean tu Jahowa.

15:9 Dung i ninna rajai ma mandok ibana: Antong laho ma ho mardamedame! Jadi borhat ma ibana laho tu Hebron.

15:10 Alai nunga disuru si Absalom hian halak pangkahap tu saluhut marga ni Israel, maningtingkon: Molo dibege hamu soara ni sarune, dok hamu ma: Nunga bangkit raja si Absalom di Hebron!

15:11 Alai dua ratus halak sian Jerusalem, angka na ginokkon hian sauduran dohot si Absalom sian tobok ni rohanasida, ai ndang dipabotoboto nasida agia aha taringot tu hata i.

15:12 Nunga digokkon si Absalom hian nang si Ahitopel, halak Gilo i, panuturi ni si Daud, ro sian huta Gilo laho pasahathon angka pelean i. Jadi lam gomos ma parbulanon i halak situan natorop pe, lam torop do ro mandapothon si Absalom.

15:13 Dung i ro ma sahalak siboan barita tu si Daud, ninna ma: Roha ni ganup halak Israel paihuthon tahi ni si Absalom.

15:14 Dung i didok si Daud ma mandok naposona sudena, angka na rap dohot ibana di Jerusalem: Beta ma hita maporus, ai ndang tagamon adong haluaon di hita maradophon si Absalom. Hatop ma hita laho, asa unang rampohonna hita dison, jala marhinamago hita bahenonna, tabanonna dohot huta on marhitehite podang.

15:15 Dung i ninna angka naposo ni rajai ma mandok ibana: Manang aha na pinangido ni roha ni rajai patupaon ni hami angka naposomon do!

15:16 Dung i ruar ma rajai udur dohot sude isi ni bagasna, mardalan pat. Alai ditinggalhon rajai do sampulu parompuan pinarjolmana mangaramoti bagas i.

15:17 Jadi dung ruar rajai dohot sude na torop i mardalan pat, sulon ma nasida di lambung bagas haroroan.

15:18 Dung i saluhut naposona mamolus sian lambungna, ro di sude angka hupas dohot rundo dohot sude halak Gat, onom ratus halak toropna, angka na ro sian Gat mardalan pat, angka na mamolus sian adopan ni rajai.

15:19 Dung i ninna rajai ma mandok si Ittai, halak Gat i: Boasa pola dohot ho mardalan udur dohot hami? Mulak ma anggo ho jala tinggal di lambung ni rajai, ai halak na pulik marga do ho, angkupni nambura bungkas ho sian ingananmu hian.

15:20 Nantoari dope ho ro, tung patut ma togihononku ho sadarion maotaot rap dohot hami? Alai anggo ahu laho ma ahu manang dompak dia tarbahen ahu mardalan. Mulak ma anggo ho jala togihon mulak angka hahaanggim. Sai didongani asi ni roha dohot habonaron ma ho!

15:21 Alai ninna si Ittai ma mangalusi rajai: Songon sintongna mangolu Jahowa mangolu dohot tuanku: Manang di inganan dia tuanku, nang laho mate, nang laho mangolu, ingkon disi do dohot naposomon.

15:22 Dung i ninna si Daud ma mandok si Ittai: Antong beta ma mardalan rap dohot ahu! Jadi dohot ma si Ittai halak Gat, mardalan rap dohot sude halakna dohot sude anakkonna, angka na rap dohot ibana.

15:23 Dung i sandok isi ni tano i masipangiar soarana be tumatangis, uju mamolus sude situan na torop i. Dung i ditaripari rajai ma sunge Kidron, taripar ma dohot sude situan na torop i manulus dalan na laho tu halongonan.

15:24 Jadi ida ma, dohot do si Sadok ro di sude halak Lepi donganna, angka na mangusung poti parpadanan ni Debata, laos dipajongjong disi. Dung i dipelehon si Abiatar ma angka pelean situtungon, paima timpas sude situan na torop i ruar sian huta i.

15:25 Alai ninna rajai ma mandok si Sadok: Boan ma mulak anggo poti ni Debata tu huta i! Molo tung jumpangan asi ni roha ahu maradophon Jahowa, sai togihononna do ahu mulak, asa pataridahon Ibana dohot inganan parmiananna tu ahu muse.

15:26 Alai molo tung songon on hatana: Ndang lomo rohangku mida ho: Ida ma dison do ahu, sai dibahen ma tu ahu, hombar tu lomo ni rohana!

15:27 Dung i didok rajai ma mandok malim Sadok: Nda paralatan do ho? Antong mulak ma ho tu huta i mardamedame rap dohot si Ahimas, anakmu dohot si Jonatan, anak ni si Abiatar; anakmuna na dua i ma donganmuna.

15:28 Ida hamu ma, maimaima ma anggo ahu di hatariparan angka na laho tu halongonan, paima ro barita sian hamu laho palumba ahu.

15:29 Jadi diboan si Sadok dohot si Abiatar ma poti ni Debata mulak tu Jerusalem, laos tinggal disi nasida.

15:30 Dung i nangkok ma anggo si Daud tu dolok Jetun, nangkok huhut tumatangis jala martujung ibana, jala ndang marsarung patna; jala sandok na torop i na rap dohot ibana martujung be do laho nangkok huhut tumatangis.

15:31 Jadi dung tarbortik tu si Daud didok halak: Dohot do si Ahitopel dongan ni halak angka na marbulan rap dohot si Absalom, ninna si Daud ma: Iale Jahowa sai sundati ma tahi ni si Ahitopel.

15:32 Jadi dung sahat si Daud ro di punsu ni dolok i, marsomba ibana disi tu Debata, ida ma, ro ma si Husai halak Arki manomunomu ibana, marpangkean na sinansanan jala tano di atas uluna.

15:33 Jadi ninna si Daud ma mandok ibana: Molo ho donganku mardalan paganda dokdokna di ahu do ho.

15:34 Alai molo mulak ho tu huta i, jala dohononmu tu si Absalom: Naposom ma ahu, ale rajanami! Naposo ni amangmu do ahu anggo na sai laon, alai anggo nuaeng gabe naposom ma ahu, jadi tarselak ma bahenonmu tahi ni si Ahitopel dompak ahu.

15:35 Angkup ni, nda si Sadok dohot si Abiatar, malim na dua i donganmu disi? Asa saluhut hata na binegem sian bagas ni rajai, ingkon paboaonmu tu malim Sadok dohot Abiatar.

15:36 Ida ma, disi do rap dohot nasida anaknasida na dua i, Ahimas anak ni si Sadok dohot si Jonatan, anak ni si Abiatar; marhite sian nasida tarpaboaboa hamu tu ahu luhut hata na binegemuna i.

15:37 Jadi sahat ma si Husai, aleale ni si Daud tu huta i, si Absalom pe ro do tu Jerusalem.

2 Samuel 16[patota | patota mualna]

16:1 Jadi dung tuat si Daud saotik sian punsu ni dolok i, ida ma, ro ma si Siba, naposo ni si Mepiboset manomunomu ibana mardongan sapasang halode na marpalano, sorat mamboan duaratus roti dohot saratus sagusagu marsaor parbue ni anggur dohot saratus lampet na ginulean angkup ni anggur gok sada panuhuhan bobak.

16:2 Dung i ninna rajai ma mandok si Siba: Tu aha do angka i bahenonmu? Jadi ninna si Siba ma: Ia angka holodei di isi ni bagas ni rajai do bahen hundulan, ia roti i dohot angka parbue ni anggur bahen panganon ni angka naposo, ia anggur i bahen inumon ni angka na mandate di halongonan.

16:3 Dung i ninna rajai ma: Didia do anak ni tuanmu huroha? Jadi ninna si Siba ma mandok rajai: Ida ma, na tinggal di Jerusalem do ibana, ai ninna do sadarion ma tagamon paulahon ni pinompar ni Israel harajaon ni damang i tu ahu.

16:4 Dung i ninna rajai ma mandok si Siba: Ida ma, ho ma nampuna nasa na di si Mepiboset i! Dung i ninna si Siba ma: Manomba ujung manomba huasi ma ahu, molo maruli asi ni roha ahu maradophon ho ale rajanami!

16:5 Alai dung sahat raja Daud tu Bahurim, ida ma, ruar ma sian i sada halak sian marga ni pinompar ni si Saul, na margoar si Simei, anak ni si Gera, mardalandalan ibana huhut mamburai.

16:6 Jala didanggurhon batu dompak si Daud dohot dompak sude naposo ni raja Daud, atik pe sude situan na torop i dohot sude angka ulubalang di siamun dohot di hambirang ni rajai.

16:7 Alai songon on do hata bura ni si Simei: Bali hian ma ho, ale jolma sisopsop mudar dohot baoa parroha na roa situtu.

16:8 Nunga manginona tu ho dibahen Jahowa sandok mudar ni pinompar ni si Saul, na sinolukmi bangkit raja, jala nunga dipasahat Jahowa harajaon i tu tangan ni si Absalom, anakmi, jadi ida ma, nunga tung manginsombut tu ho jea binahenmi, ai baoa sisopsop mudar hian do ho!

16:9 Dung i ninna si Abisai, anak ni Nai Seruia mandok rajai: Boasa tung buraan ni anjing na mateon tuanku, ua laos ma ahu mandapothon ibana, asa hupisikhon uluna.

16:10 Alai ninna rajai ma: Aha do parsaoranku tu hamu, ale anak ni Nai Seruia? Pasombu ibana mamburai! Ai Jahowa do mandok tu ibana: Bura i ma si Daud! Tung ise ma hum mandok: Boasa tung bahenonmu songon i?

16:11 Angkupni didok si Daud ma tu si Abisai dohot tu sude angka naposona: Ida ma, gari anakku, na ruar sian butuhangku sandiri, tumahi hosangku! Lam anak ni marga Benjamin ma nuaeng? Pasombu hamu ibana mamburai, ai Jahowa mandokkon ibana.

16:12 Anggiat tung marpamuati roha ni Jahowa mida salangki, jala baloshonon ni Jahowa tu ahu na denggan singkat ni burana i sadarion.

16:13 Jadi ditulus si Daud dohot angka donganna ma dalanna. Alai anggo si Simei, mardalan mangoriori dolok patondong dohot ibana huhut didatdati mamburai dohot mandanggurhon batu dompak ibana dohot manampakhon orbuk.

16:14 Dung i bongot huta ma rajai ro di sude na torop i angka na rap dohot ibana, angka na loja be, asa pahosahon disi.

16:15 Alai anggo si Absalom ro di sude na torop i sian halak Israel sahat tu huta Jerusalem, jala si Ahitopel donganna.

16:16 Alai dung ro si Husai, halak Arki, aleale ni si Daud, tu jolo ni si Absalom, ninna si Husai ma mandok si Absalom: Sai horas ma rajai! Sai horas ma rajai!

16:17 Alai ninna si Absalom ma mangelak si Husai: Tung songon i ma panatapmu tu alealem? Boasa tung so udur ho dohot alealem.

16:18 Dung i ninna si Husai ma mandok si Absalom: Ndada manang ise, ai na pinillit ni Jahowa dohot situan na toropon ro di sude halak Israel, ibana nampuna ahu, jala ibana paihutihutonku.

16:19 Angkup ni, tung tu ise ma ahu tama mangunduk? Nda tu anak ni rajai? Ia songon i pangoloionku di adopan ni amangmu na sai laon, suang songon i nuaeng di adopanmu.

16:20 Dung i ninna si Absalom ma mandok si Ahitopel: Aturhon hamu ma manang aha sibahenonta.

16:21 Dung i ninna si Ahitopel ma mandok si Absalom: Topot ma parompuan angka na pinarjolma ni amangmu, angka na tininggalhonna mangaramoti bagas, asa sar dibege sandok Israel naung bau be ho dohot amanta, asa lam marsigomos roha ni sude angka na rap dohot ho.

16:22 Dung i dipahembang nasida ma sada undungundung di si Absalom di atas tarup. Jadi ditopot si Absalom ma parompuan, angka na pinarjolma ni amana di adopan ni sandok Israel.

16:23 Ia aturan na niaturhon ni si Ahitopel di angka ari uju i, hira doshon na marsungkun tu hata ni Debata; songon i sude aturan ni si Ahitopel, nang di roha ni si Daud, nang di roha ni si Absalom.

2 Samuel 17[patota | patota mualna]

17:1 Dung i ro ma hata ni si Ahitopel tu si Absalom: Ua loas ma ahu mamillit sampulu dua ribu halak, asa borhat ahu mangeak si Daud borngin on.

17:2 Asa hurampok ibana binsan loja dope jala daukdauk tanganna, asa godoron ibana hubahen, gabe maporus sandok situan na torop angka na rap dohot ibana, laos bunuonku ma rajai sasadasa.

17:3 Dung i togihononku ma sude na torop i mulak tu ho. Ia dung mulak sude jolma i, jumpang ma songon na pinangido ni roham, mardame ma sandok na torop i.

17:4 Jadi lomo ma roha ni si Absalom di hata i, lomo dohot roha ni sude sintua ni Israel.

17:5 Alai ninna si Absalom ma: Ua jinou ma dohot si Husai, halak Arki, asa itatangi manang beha dohononna taringot tusi.

17:6 Jadi dung ro si Husai tu jolo ni si Absalom, ninna si Absalom ma mandok ibana: Songon on do hata ni si Ahitopel; atehe patulusonta do hatana i, manang ndang? Ia ho beha dohononmu?

17:7 Jadi ninna si Husai ma mandok si Absalom: Ndang denggan aturan na niaturhon ni si Ahitopel anggo sahalion.

17:8 Angkup ni ninna si Husai: Ditanda ho do roha ni amangmu dohot roha ni halakna, ai angka na begu do nasida jala na todos be di ari, songon gompul di ladang tahe na agoan anak. Angkup ni baoa na somal marmusu hian amangmu, ndang tagamon marborngin ibana rap dohot na torop i.

17:9 Ida ma, ra tung martabuni ibana nuaeng di sada barungbung, manang di sada inganan na asing. Jadi tung sura tinggang deba mate sian nasida di mulana on, gabe dibege na umbegesa, dohononna ma: Nunga talu halak na torop angka na mangihuthon tu si Absalom.

17:10 Tung sura pe ulubalang manang ise, jala parateate songon singa, godoron situtu do ateatena; ai sandok Israel umbotosa ulubalang do amanta, jala halak na begu do angka donganna i.

17:11 Dibahen i anggo ahu mangaturhon, ingkon jolo papunguonmu tu lambungmu sandok Israel, olat ni Dan sahat ro di Beerseba, songon horsik di topi ni laut toropna, jala ho sandiri manguluhon tu tongtangan.

17:12 Dung i sahali ro hita mandopang ibana di sada inganan manang didia jumpang hita ibana, asa itarongom ibana songon hadadabu ni nambur tu tano, jadi ndang tagamon adong teba sian ibana dohot sian sude halak angka na rap dohot ibana, nanggo sahalak.

17:13 Alai tung sura manginsurut ibana tu sada huta, ingkon bahenon ni sandok Israel tu huta i angka jorat, laho mangarumpakkon huta i sahat ro di batang aek, paima so adong be jumpang disi nanggo sada batu metmet.

17:14 Dung i ninna si Absalom dohot sude halak Israel ma: Dumenggan do aturan ni si Husai, halak Arki, sian aturan ni si Ahitopel. Alai tahe marharoroan sian Jahowa do hata i laho manundati tahi ni si Ahitopel na denggan i nian, asa diparo Jahowa hamagoan tu si Absalom.

17:15 Dung i ninna si Husai ma tu si Sadok dohot tu si Abiatar, malim na dua i: Songon on songon on diaturhon si Ahitopel tu si Absalom dohot tu angka sintua ni Israel, alai songon on songon on anggo ahu mangaturhon.

17:16 On pe, hatop ma suru hamu halak mamboan barita i tu si Daud mangalumbahon: Unang ho marborngin di angka hatariparan laho tu halongonan: Hatop ma ho taripar tagonan, asa unang tarbondut rajai ro di sandok situan natorop angka na rap dohot ibana.

17:17 Alai anggo si Jonatan dohot si Ahimas jongjong do di lambung sumur Enrogel. Dung i laho ma sada naposo boruboru pasahathon barita i tu nasida, asa laho nasida paboahon barita i tu raja Daud; ai ndang jadi mullop nasida laho masuk tu huta i.

17:18 Hape diida sada dakdanak nasida, gabe dipaboa tu si Absalom. Alai hatop do nasida na dua mardalan, gabe masuk nasida tu jabu ni sada halak di Bahurim; adong di ibana sada sumur di alamanna, gabe mijur nasida tusi.

17:19 Dung i dibuat parompuan i ma tutupna i jala di paherbang di atas baba ni sumur i, laos disirsirhon tusi monis, asa unang mamoto halak disi.

17:20 Dung i ro ma angka naposo ni si Absalom mandapothon parompuan i tu jabu, angka ninna ma: Didia do si Ahimas dohot si Jonatan? Alai ninna parompuan i ma mandok nasida: Nunga ditaripari nasida sunge na metmetan! Jadi dung mutu rohanasida mangalului, hape ndang jumpangsa, gabe mulak nasida tu Jerusalem.

17:21 Jadi dung laho angka jolma i manaek ma nasida sian sumur i, laos mardalan mamboan barita i tu raja Daud, angka ninna nasida ma mandok si Daud: Hehe borhat ma hamu jala hatop taripari hamu sunge i, ai songon on do diaturhon si Ahitopel mangalo hamu.

17:22 Jadi borhat ma si Daud ro di sude na torop i angka na rap dohot ibana, jala ditaripari nasida batang aek Jordan; tole torang ari manogotna i, ndang adong be teba nanggo sada, na so manaripari Jordan i.

17:23 Alai dung diida si Ahitopel na so tulus aturanna i, dipalanoi ma halodena, laos borhat ibana laho muli tu jabuna di hutana i; dung martona ibana tu isi ni bagasna, maningkot ma ibana laos mate, gabe ditanom halak ibana di bagasan tanoman ni amana.

17:24 Ianggo si Daud sahat ma tu Mahanaim; alai anggo si Absalom ditaripari ma Jordan, ibana ro di sude halak Israel donganna i.

17:25 Dung i dipabangkit si Absalom ma si Amasa bahen partogi ni parangan, singkat ni si Joab. Alai anggo si Amasa, anak ni sada baoa na margoar si Jeter halak Ismael, na marjolmahon si Abigail, boru ni si Nahas, anggi ni Nai Seruia, ina ni si Joab.

17:26 Dung i marsaro ma Israel dohot si Absalom di tano Gilead.

17:27 Jadi dung sahat si Daud tu Mahanaim, ro ma si Sobi, anak ni si Nahas, sian Rabba ni halak Amon, dohot si Mahir, anak ni si Ammiel sian Lodebar, dohot si Barsilai halak Gilead sian Regolim.

17:28 Angka na mamboan bantal, balanga, mangkuk tano tangko, dahanon sipulut dohot dahanon hian, itak omping, dalidali, hadio dohot dahanon na sinaok.

17:29 Tole muse situak ni loba dohot mantega dohot birubiru dohot susu ni lombu na nialhotan mangalehon tu si Daud dohot tu na torop, angka donganna i panganonnasida; ai ninna rohanasida: Nunga male na torop i, jala galegale jala mauas di halongonan.

2 Samuel 18[patota | patota mualna]

18:1 Dung i dipaodor si Daud ma na torop i angka na rap dohot ibana, jala dipabangkit di nasida induk ni sisaribu dohot induk ni sisaratus.

18:2 Dung i dipaborhat si Daud ma situan na torop i, sapartolu niuluhon ni si Joab, jala sapartolu niuluhon ni si Abisai, anak ni Nai Seruia, anggi ni si Joab, jala sapartolu niuluhon ni si Ittai, halak Gat. Dung i didok rajai ma mandok na torop i: Ingkon borhat do ahu rap dohot hamu.

18:3 Alai ninna na torop i ma: Ndang jadi ho borhat; ai tung sura pe maporus hami, ndang pola pardulinasida anggo hami, ai sobokkon saloksa do anggo ho. Asa tagonan do ro ho sian huta laho manolongi hami.

18:4 Dung i ninna rajai ma mandok nasida: Manang dia lomo ni rohamuna, i do bahenonku! Dung i jongjong ma rajai tu lambung bahal, ruar ma anggo sude na torop i marratusratus dohot marriburibu.

18:5 Dung i martona ma rajai tu si Joab dohot tu si Abisai dohot tu si Ittai, songon on: Maol bahen hamu tu dolidoli si Absalom! Pola dohot na torop i umbegesa, uju martona rajai tu sude angka induk taringot tu si Absalom.

18:6 Jadi dung ruar na torop i tu adaran mandapothon Israel, tongtang ma nasida di tombak Epraim.

18:7 Jadi talu ma disi halak Israel dibahen angka naposo ni si Daud tung hataluan godang masa disi di na sadari i, pola mate duapulu ribu halak.

18:8 Tung na ragat situtu do na martongtang i, disampak do sandok tano i, jala andul toropna parangan i mago dipangan tombak sian na pinangan ni podang sadarina i.

18:9 Dung i pajumpang ma si Absalom dohot angka naposo ni si Daud; mangkunduli halode na marsahe do anggo si Absalom. Jadi dung tolhas halode na marsahe i mamolus sian toru ni dangka ni hariara na bolon, alit ma obukna tu hariara i, gabe gaunggaung ibana di holangholang ni langit dohot tano, laos laho do anggo halode na marsahe i sian toruna.

18:10 Jadi dung diida sahalak ibana, dipaboa ma barita i tu si Joab, ninna ma: Ida ma, nunga huida si Absalom gaunggaung di sada hau hariara.

18:11 Dung i ninna si Joab ma tu baoa na mamboan barita i tu ibana: Ida ma, nunga diida ho ibana, boasa tung so bunuonmu ibana disi marbabap tu tano? Ingkon mangalehon ahu nian tu ho sampulu rupia dohot hohos sada.

18:12 Alai ninna baoa i ma mandok si Joab: Nang tung sura didasing ho saribu rupia tu bagasan tanganku, ndang tagamon mangonai tangan ahu tu anak ni rajai, ai apala tu pinggolta martona rajai tu ho dohot tu si Abisai dohot si Ittai, ninna do: Ingkon maol bahen hamu dolidoli si Absalom i!

18:13 Tung sura hubahen sipaotooto umbunu hosana i, manang hata dia tahe ndang tarporso maradophon rajai, ho sandiri tagamon hehe gabe alongku.

18:14 Dung i ninna si Joab ma: Ndang tarbahen ahu songon i leleng maimaima di jolomi! Jadi dibuat ma tolu mundimundi di bagasan tanganna jala ditullangkon tu bagasan parpusupusuan ni si Absalom, uju mangolu dope ibana di tongatonga ni hariara i.

18:15 Dung i ro ma sampulu dolidoli, angka siusung sinjata ni si Joab, mangkaliangi ibana, laos dibunu nasida ma si Absalom, asa mate ibana.

18:16 Dung i didokkon si Joab ma umpalu sarune asa mulak na torop i, unang be didatdati mangalele Israel; ai naeng olanan ni si Joab do na torop i.

18:17 Dung i dibuat nasida ma bangke ni si Absalom jala dibolongkon ibana di tombak, tu bagasan sada godung na bolon, jala ditimbuni di atasna sada timbunan batu na godang situtu. Alai anggo sandok Israel maporus do ganup tu undungundungna be.

18:18 Alai anggo si Absalom, nunga dibuat hian sada tiang jala dipatindang di dirina, tagan di ngoluna dope, jongjong do i di rura ni raja; ai ninna do: Ndang adong anakku, na mambahen parningotan di goarhu; dung i dibahen ma goar ni tiang i mangihuthon goarna sandiri, laos targoar do i partinandaan ni si Absalom rasirasa sadarion.

18:19 Dung i ro ma hata ni si Ahimas, anak ni si Sadok: Ua marlojong ma ahu mamboan barita i tu rajai, ala naung dipintori Jahowa ibana sian tangan ni musuna.

18:20 Alai ninna si Joab ma mandok ibana: Ndada baoa siboan barita na uli ho sadarion, di ari na asing pe baritahononmu, alai anggo sadarion ndang baritahononmu, ala naung mate anak ni rajai.

18:21 Alai didok si Joab ma anggo tu halak Etiopia: Laho ma ho, paboa ma tu rajai naung niidam! Dung i marsomba ma halak Etiopia tu si Joab, laos marlojong.

18:22 Alai diulahi si Ahimas, anak ni si Sadok muse mandok tu si Joab: Manang beha pe, marlojong ma dohot ahu mangihuthon halak Etiopia. Jadi ninna si Joab ma: Boasa tung marlojong ho, ala anaha? Ndang tagamon maruli upa siboan barita ho!

18:23 Manang beha pe, sai laho do ahu. Jadi ninna si Joab ma mandok ibana: Antong lojong ma! Jadi marlojong ma si Ahimas manulus dalan sian tobing (ni Jordan), gabe dijoloani ma halak Etiopia.

18:24 Alai hundul di holangholang ni na dua pintu harbangan do anggo si Daud, sai mardalandalan do parjaga i di atas tarup ni harbangan mardonokkon parik manatapnatap humaliang, gabe diida ma sada halak marlojong sasadasa.

18:25 Jadi joujou ma parjaga i paboahon barita i tu rajai. Alai ninna rajai ma: Molo sasadasa, barita na uli ma di bagasan pamanganna. Jadi dung sai didatdati mardalan lam jonok ma ibana.

18:26 Dung i diida parjaga i ma sada halak na asing marlojong gabe joujou parjaga i dompak sijaga bahal, ninna ma: Ida ma, marlojong muse sada halak sasadasa. Jadi ninna rajai ma: Ibana pe siboan barita na uli do.

18:27 Dung i ninna parjaga i ma: Huida parlojong ni parjolo i, songon parlojong ni si Ahimas, anak ni si Sadok. Jadi ninna rajai ma: Baoa na denggan roha do ibana, jala barita na uli do na binoanna!

18:28 Dung i joujou ma si Ahimas, ninna ma mandok rajai: Nunga demak! Laos marsomba di jolo ni rajai, pola manungkap tu tano jala ninna ma: Pinuji ma Jahowa, Debatam, na patundukkon baoa angka na manggunturi dompak tuanku.

18:29 Alai ninna rajai ma: Beha horas do dolidoli si Absalom i? Dung i ninna si Ahimas ma: Hagunturon bolon do nian na huida, uju na sinuru ni si Joab naposo ni rajai dohot ahu naposomon alai ndang huboto manang aha i.

18:30 Dung i ninna rajai ma: Sumurut ma ho jongjong tusi. Jadi sumurut ma ibana, laos jongjong disi.

18:31 Jadi ida ma, nunga ro halak Etiopia, laos didok ma: Barita na uli na huboan i ale rajanami! Ai nunga dipintori Jahowa ho sadarion sian tangan ni sude halak angka na hehe mangalo dompak ho.

18:32 Alai ninna rajai ma mandok halak Etiopia: Beha horas do dolidoli si Absalom i? Jadi ninna halak Etiopia ma: Ingkon songon tu dolidoli ma nian songgop tu angka musu ni tuanku dohot tu sude halak angka na hehe mangalo dompak ho laho mangago!

2 Samuel 19[patota | patota mualna]

19:1 Jadi margudompong situtu ma roha ni rajai, jala nangkok tu bilut parginjang ni harbangan huhut tumatangis; songon on ma didok huhut mardalandalan ibana: Iale anaha Absalom! Ale anaha! Ale anaha Absalom! Aut ahu nian mate singkatmi! Ale Absalom, ale anaha, ale anaha!

19:2 Dung i dibaritahon halak ma tu si Joab: Ida ma, sai tumatangis do rajai jala mangandungi ala si Absalom.

19:3 Asa antu hamonangan di na sadari i manjadi arsak ni roha di sandok bangso i; ai sar dibege bangso i hata ni halak di na sadari i: Marsak do roha ni rajai ala anakna.

19:4 Jadi marsibuni ma na torop i di na sadari i laho bongot tu huta, songon parsibuni ni halak angka na tarurak, ala naung maporus nasida sian tongtangan.

19:5 Pola tung dihungkupi rajai bohina, jala dipangiar soarana mangandungi: Iale anaha Absalom! Absalom, ale anaha, ale anaha!

19:6 Dung i ro ma si Joab mandapothon rajai tu jabu, jala ninna ma: Murak ma sadarion dibahen ho bohi ni sude naposom, angka na paluahon hosam sadarion dohot hosa ni angka anakmu dohot borum dohot hosa ni angka jolmam dohot hosa ni parompuan, angka na pinarjolmami.

19:7 Ala na hinaholonganmu jolma angka na mangkagigihon ho, jala dihagigihon ho jolma angka na mangkaholongi ho; ai diandarhon ho do sadarion, hira na so pola pardulim angka partogi dohot angka naposo; ai tangkas do hutanda sadarion, asal mangolu nian si Absalom, nang luhut hami mate sadarion, i ma na tongon di bagasan roham.

19:8 On pe, hehe ma ho, ruar ma ho, paboa ma hata tau papir tondi ni angka naposom; ai tung husumpahon ma tu Jahowa: Molo so ruar ho annon, ndang tagamon marborngin saborngin on nanggo sahalak donganmu, gabe jea na umbalga do i di ho, sian sandok jea naung mandatang tu ho, olat ni sidakdanakonmu rasirasa nuaeng.

19:9 Jadi hehe ma rajai laho hundul tu harbangan. Dung i tarbortik ma tu sandok situan na torop i: Ida ma, hundul do rajai di pintu harbangan! Jadi ro be ma sandok situan na torop i tu jolo ni rajai, alai anggo halak Israel nunga maporus, ganup tu undungundungna be.

19:10 Dung i masisolsolan ma sandok na torop i di saluhut marga ni Israel, angka ninna ma: Nunga dipalua rajai hita sian tangan ni angka musunta, ibana huhut paluahon hita sian tangan ni halak Palistim; hape ia nuaeng, ingkon pola maporus ibana sian tano on maralohon si Absalom.

19:11 Ia si Absalom, naung itamiahi nian mangarajai hita, nunga mate di tongtangan; nuaeng pe, boasa sai hohom boti hamu, mangalapi rajai nian mulak?

19:12 Dung i disuru raja Daud ma suruanna manopot si Sadok dohot si Abiatar, malim na dua i mandok tu nasida: Pangkulingi hamu ma angka sintua ni Juda, mandok tu nasida: Boasa hamu apala parpudi laho mangalapi rajai mulak tu jabuna? Ai nunga pola sahat hatahata ni sandok Israel tu rajai dohot tu jolma isi ni bagasna i.

19:13 Angka hahaanggingku do hamu, sisada sibuk dohot mudar hamu dohot ahu. Antong boasa apala hamu parpudi mangalapi rajai mulak?

19:14 Ia tu si Amasa dok hamu ma: Nda sisada sibuk dohot mudar ho dohot ahu? Ingkon songon i bahenon ni Debata tu ahu jala patambaonna dope songon i, molo so ingkon ho gabe partogi ni parangan di jolongku saleleng ho mangolu, singkat ni si Joab.

19:15 Jadi melok ma roha ni saluhut halak Juda, saroha ma nasida marsuru manopot rajai, mandok: Sai mulak ma ho ro di sude angka naposom.

19:16 Dung i mulak ma rajai. Jadi dung sahat ibana tu Jordan, nunga ro hian halak Juda tu Gilgal laho manomunomu rajai, naeng manogihon rajai manaripari Jordan.

19:17 Jadi hapogan ma si Simei, anak ni si Gera, halak Benjamin sian Bahurim, asa tuat ibana rap dohot halak Juda manomunomu raja Daud.

19:18 Jala saribu halak donganna sian Benjamin; angkup ni si Siba, naposo ni pinompar ni si Saul, rap dohot anakna sampulu lima halak dohot naposona duapulu halak, gabe ditaripari nasida Jordan i di jolo ni rajai.

19:19 Jadi dung taripar rakit i laho patariparhon isi ni bagas ni rajai, asa mambahen lomo ni rohana, ro ma si Simei, anak ni si Gera, marsinggang di jolo ni rajai, tongon uju taripar ibana di Jordan.

19:20 Huhut didok mandok rajai: Sai unang dijujur tuanku tu ahu hajahaton i, jala unang dipaingotingot rohana hageduhon na niula ni naposomon, uju di ari haruruar ni tuanku sian Jerusalem, unang pola dipagagathon rajai hata i tu rohana.

19:21 Ai nunga tangkas ditanda naposomon, naung mardosa ahu uju i; jala ida ma, anggo sadarion ahu do apala parjolo ro sian sandok pinompar ni si Josep laho tuat manomunomu tuanku.

19:22 Dung i ro ma hata ni si Abisai, anak ni Nai Seruia mangalusi: Tung so tama marutang hosa si Simei ala ni on, ai nunga pola diburai ibana jolma na miniahan ni Jahowa!

19:23 Alai ninna si Daud ma: Aha do parsaoranku tu hamu, ale angka anak ni Nai Seruia, umbahen naeng gabe Sibolis hamu di ahu sadarion? Tung jadi ma adong mate sadarion baoa di Israel? Ai nda huboto do apala sadarion ahu bangkit raja gumomgom Israel?

19:24 Dung i ninna rajai ma mandok si Simei: Ndang jadi ho mate! Pola disumpahon rajai tu ibana.

19:25 Si Mepiboset pe, anak ni si Saul tuat do manomunomu rajai, ndang dipahe ibana patna manang misena, jala ndang disunci pangkeanna, olat ni ari hapoporus ni rajai, sahat ro di ari hamumulakna mardamedame.

19:26 Jadi dung sahat ibana tu Jerusalem, laho manomunomu rajai, gabe didok rajai ma mandok ibana: Boasa tung so dongananmu ahu na jolo, ale Mepiboset?

19:27 Jadi ninna ibana ma: Iale rajanami, nunga dipaotooto naposongku ahu; ai ninna roha ni naposomon do nian: Palanoanku ma halode sada bahen hundulanku, asa laho ahu manopot rajai, ai na pangpang do naposomon.

19:28 Angkup ni, nunga disuan ibana gasa ni naposomon di adopan ni tuanku. Alai anggo tuanku tudoshon surusuruan ni Debata sada! Antong bahen ma manang aha lomo ni roham.

19:29 Ai tung dia ma nian sandok pinompar ni damang, nda baoa angka na patut nian marutang hosa di jolo ni tuanku; hape lam dipatop ho naposomon hundul tu tongatonga ni halak angka na sapanganan dohot ho. Aha ma gunana tahe pintoranku dope diringku manang mangalu dope tu rajai?

19:30 Dung i ninna rajai ma mandok ibana: Aha labana sai datdatanmu mandok hatam? Nunga putus hatangku: Ingkon ho dohot si Siba marbagi tano i.

19:31 Dung i ninna si Mepiboset ma mandok rajai: Luhut pe dibuat ibana tusi, asal dung mulak tuanku tu jabuna mardamedame!

19:32 Si Barsilai pe, halak Gilead i tuat do sian Regolim, jala ditaripari Jordan rap dohot rajai, pataruhon ibana tu bariba ni Jordan.

19:33 Alai nunga tung matua situtu si Barsilai, ualupulu taon tahe umurna, jala ibana marmudu rajai, uju maringan ibana di Mahanaim, ai baoa ma mora jong do ibana.

19:34 Jadi didok rajai ma mandok si Barsilai: Ingkon ho donganku taripar, asa huparmudu ho di lambungku di Jerusalem.

19:35 Alai ninna si Barsilai ma mandok rajai: Pola piga ari nari ahu tagamon mangolu, umbahen ingkon nangkok ahu rap dohot rajai tu Jerusalem?

19:36 Boho marumur ualupulu taon ahu sadarion, tung beha ma pambahenku manirang na denggan sian na jat? Tung tarbahen naposomon be mandai manang aha na hupangan manang na huinum? Tung tarpatangitangi ahu be soara ni angka parende baoa dohot parompuan? Angkup ni boasa tung bahenon ni naposomon hasusaan tu tuanku di laonlaon ni ari?

19:37 Asal otik pataruon ni naposomon rajai tu bariba ni Jordan. Alai boasa pola pamaloson sisongon i baloshonon ni rajai tu ahu?

19:38 Ua loas ma naposomon mulak, asa mate ahu di bagasan hutangku, di lambung tanoman ni damang dohot dainang. Alai tahe ida ma, disi do naposom si Kim Kana, ibana ma tagonan taripar rap dohot tuanku, jala bahen ma tu ibana manang aha lomo ni roham!

19:39 Jadi ninna rajai ma: Antong si Kim Kana ma donganku taripar, asa hubahen tu ibana manang aha lomo ni roham; jala nasa na pinangidom sian ahu, bahenonku do tu ho.

19:40 Jadi dung ditaripari sude na torop i batang aek Jordan, taripar dohot rajai, diumma rajai ma si Barsilai jala dipasupasu ibana, dung i mulak ibana tu ingananna.

19:41 Dung i ditulus rajai ma dalanna tu Gilgal, jala si Kim Kana donganna. Jadi dung dipataru sandok bangso Juda rajai taripar, ro di satonga ni bangso Israel.

19:42 Jadi ida ma, ro be ma sandok baoa ni Israel manopot rajai, angka ninna ma mandok rajai: Boasa tung olo ho tangkoon ni angginami, halak Juda i, jala pataruonnasida rajai dohot isi ni bagasna tu bariba ni Jordan, ro di sude naposo ni si Daud donganna?

19:43 Jadi ro ma alus ni sude halak Juda mandok tu halak Israel: Ala sumolhot rajai tu hami. Jala boasa tung mangiburu hamu alani? Hea adong hupangan hami sian rajai, manang adong silehonlehonna tu hami?

19:44 Alai ro ma alus ni halak Israel mandok tu halak Juda: Sampulu bagian di hami maradophon rajai; angkup ni tumorop hami dirajai si Daud sian hamu. Boasa tung parhamudaon ni rohamuna hami, so hatanami jumolo paimaonmu mandokkon mangalap mulak rajanta i? Alai tahe kumoras do hata ni halak Juda sian hata ni halak Israel.

2 Samuel 20[patota | patota mualna]

20:1 Dung i adong ma disi so pangkiriman sada halak parroha na jahat, na margoar si Seba, anak ni si Bikri, halak Benjamin, na umpalu sarune huhut mandok: Ndang parjambar hita hapengani di si Daud, jala ndang parhuaonta ia anak ni si Isai! Antong ale Israel, mulak be ma hita tu undungundungta be!

20:2 Jadi marbalik ma nasa baoa ni Israel sian si Daud laho mangihuthon tu si Seba, anak ni si Bikri. Alai anggo angka baoa sian Juda marsilohot rohanasida di rajanasida, olat ni Jordan sahat tu Jerusalem.

20:3 Alai dung sahat si Daud tu jabuna di Jerusalem, dibuat rajai ma na sampulu parompuan, angka na tininggalhonna na jolo mangaramoti bagas i, dibahen ma nasida tu bagas parjagaan, jala diparmudu nasida, alai ndang be ditopot nasida; jadi tarhurung ma nasida disi sahat ro di ari hamamatenasida, hira parompuan na mabalu nasida saleleng mangolu.

20:4 Dung i didok rajai ma tu si Amasa: Martingting ma ho papungu halak Juda tu lambungku di bagasan tolu ari on, ho pe ingkon mangulahi jongjong dison.

20:5 Jadi laho ma si Amasa martingting papungu Juda, hape mangerngerhu ibana, pola salpu tingki na tiniti tu ibana.

20:6 Dung i ninna si Daud ma tu si Abisai: Ra tung gumodang jea tu hita bahenon ni si Seba, anak ni si Bikri, sian na binahen ni si Absalom. Antong ho ma mangarahon angka naposo ni tuanmu, jala eahi ibana, asa unang sanga dapotsa huta angka na gonting, gabe tarholip sian matanta.

20:7 Jadi borhat ma angka parangan ni si Joab mangeahi ibana ro di hupas dohot rundo, ro di sude ulubalang; borhat be nasida sian Jerusalem mangeahi si Seba, anak ni si Bikri.

20:8 Alai dung sahat nasida tu batu na bolon mardonokkon Gibeon, ro ma si Amasa manjumpangkon nasida. Ia si Joab marpangkean baju parmusu, alit tusi hohos ni podang na gampit di gontingna di bagasan sarungna, hape peut do i gabe mumpat podang i.

20:9 Dung i ninna si Joab ma tu si Amasa: Beha sonang do ho, ale anggia? Laos disoro tangan siamun ni si Joab do janggut ni si Amasa mangondam mangumma ibana.

20:10 Alai ndang marjaga si Amasa di podang na di tangan hambirang ni si Joab, gabe ditihamhon ma i tu butuhana, pola use raoanna tu tano, ndang pola dipaduahali maniham ai nunga mate ibana. Alai anggo si Joab dohot si Abisai anggina i mangeahi si Seba, anak ni si Bikri.

20:11 Dung i sulon ma sada baoa sian angka naposo ni si Joab jongjong di lambungna, ninna ma: Manang ise na holong roha mida si Joab, jala manang ise na marraja tu si Daud, diihuthon ma tu si Joab.

20:12 Alai marguluhon mudarna anggo si Amasa di tongatonga ni dalan na bolon. Jadi dung diida baoa i sulon sude na torop i disi, gabe disarat ma si Amasa sian dalan na bolon tu ladang, jala di tinggangkon ulos tu ibana ala diida ganup na ro jongjong di lambungna.

20:13 Jadi dung dipaholang ibana sian dalan na bolon, mamolus ma sude baoa mangihuthon si Joab laho mangalele si Seba, anak ni si Bikri.

20:14 Jadi dibolus ibana ma sude marga ni Israel sahat tu huta Abel dohot Abel Betmaaka ro di sandok Bikri. Jadi lam torop nasida marpungu huhut mangihuthon ibana.

20:15 Jadi ro ma nasida martungkum ibana di huta Abel dohot Maaka. Dibahen nasida huhut hubu humaliang huta i, dionjar ma i sahat ro di parik. Dung i martahop ma sandok na torop i, angka na niuluhon ni si Joab, naeng manggargari parik i.

20:16 Jadi joujou ma sada parompuan na bisuk sian huta i: Ua tangihon hamu ma hatangkon jala pasahat hamu tu si Joab: Pajonok ma tuson, adong dohononku tu ho.

20:17 Jadi dung jumonok ibana tu nasida, didok parompuan i ma: Atehe ho do si Joab? Ahu ma tutu, ninna. Dung i ninna nasida ma tu ibana: Sai tangihon ma pangkataion ni naposom boruboru! Hubege do, ninna ibana.

20:18 Dung i ninna parompuan i ma muse: Ianggo di na robi somal didok halak songon on: Ingkon marpanungkun jolo di Abel, jadi pul ma tahi.

20:19 Ahu do sada huta parsindak, pamonari di Israel, hape ditahi roham naeng mangago sada huta sabungan di Israel? Boasa ma tung bondutonmu partohapan ni Jahowa?

20:20 Dung i ninna si Joab ma mangalusi: Dao ma i, dao ma i tahe sian ahu anggo tung ahu mamondut manang mangago!

20:21 Ndang songon i pangalahona, adong do tahe sada baoa sian tor Epraim, na margoar si Seba, anak ni si Bikri, manggunturi ibana dompak raja Daud. Lehon hamu ibana sasadasa, asa muli ahu sian huta i. Jadi ninna parompuan i ma mandok si Joab: Ida ma, ingkon reongkononhon do uluna i tu ho tu bariba ni parik.

20:22 Dung i masuk ma parompuan i tu parluhutan ni sandok situan na torop pajojorhon habisukonna. Jadi dilobong nasida ma ulu ni si Seba, anak ni si Bikri, jala direongkon tu si Joab. Dung i didokkon ma paluon sarune gabe marserak ma nasida sian huta i, ganup mulak tu undungundungna be. Alai anggo si Joab mulak tu Jerusalem manopot rajai.

20:23 Jadi si Joab ma partogi ni sandok parangan ni Israel, jala si Benaia, anak ni si Joiada mandur ni angka hupas dohot rundo.

20:24 Ia si Adoniram mandur ni angka parhuli, jala si Josapat, anak ni si Ahilud do panuturi.

20:25 Ia si Sepa juaratulis, jala si Sadok dohot si Abiatar malim.

20:26 Angkup ni si Ira, halak Jair i, panuturi haposan ni si Daud.

2 Samuel 21[patota | patota mualna]

21:1 Dung i masa ma haleon potir uju hinarajahon ni si Daud tolu taon padodot. Jadi dilului si Daud ma bohi ni Jahowa. Dung i ninna Jahowa ma: Ala ni si Saul do i dohot ala ni sapata ni mudar nidurushon ni pinomparna, ala naung binununa halak Gibeon.

21:2 Jadi didokkon rajai ma jouon halak Gibeon, ninna ma mandok nasida: (Alai anggo halak Gibeon i ndang sian pinompar ni Israel, pasipasi sian halak Amori do nasida, alai nunga marjanji halak Israel tu nasida pola disumpahon, hape ditahi roha ni si Saul naeng maniaphon nasida dibahen pangaluluhonna di halak Israel dohot Juda).

21:3 Jadi ninna si Daud ma tu halak Gibeon: Aha do bahenonku tubolmuna? Jala aha do pardengganan bahenonku, asa pasupasuonmuna partohapan ni Jahowa?

21:4 Dung i ninna halak Gibeon ma tu ibana: Ndada tarpangido hami perak manang sere sian si Saul dohot sian pinomparna, jala ndada dipangido rohanami naeng bunuon manang ise sian Israel. Antong aha do dohononmuna bahenonku tubolmuna, ninna rajai?

21:5 Jadi ninna nasida ma mandok rajai: Ia baoa naung maniaphon hami, jala naung mangaripurhon hami, pola tung naung rendep hami, so adong be teba di sandok parbalohan ni Israel.

21:6 Ingkon lehonon nian tu hami pitu halak sian pinomparna, asa hugantung hami nasida di adopan ni Jahowa di Gibea-Saul, na pinillit ni Jahowa. Jadi ninna rajai ma: Hulehon pe nasida.

21:7 Alai diolani rajai do si Mepiboset, anak ni si Jonatan, tubu ni si Saul, ala ni uari tu Jahowa, na niuarihon ni si Daud tu si Jonatan, anak ni si Saul.

21:8 Alai dibuat rajai do anggo na dua anak ni si Rispa, boru ni si Aia, na tinubuhonna di si Saul, i ma si Armoni dohot si Mepiboset; angkup ni na lima anak ni si Merab, boru ni si Saul na tinubuhonna di si Adriel, anak ni si Barsilai, halak Mehola i.

21:9 Jala dipasahat nasida tu tangan ni halak Gibeon, angka na manggantungkon nasida di atas dolok di adopan ni Jahowa. Jadi sahali mate ma nasida na pitu i, jala tarbunu nasida di tingki ni panggotilan patumonaan, parmulaan ni gotilon eme saba.

21:10 Dung i dibuat si Rispa boru ni si Aia ma tujung hori, jala dipahembang do i di atas dolok batu sian parmulaan ni gotilon sahat ro di na manetehi aek sian langit tu nasida, jala ndang diloas angka pidong na di toru ni langit songgop tu nasida arian, manang binatang ni harangan bornginna i.

21:11 Jadi tarbortik ma barita i tu si Daud taringot tu na binahen ni si Rispa, boru ni si Aia, parompuan pinarjolma ni si Saul nahinan.

21:12 Dung i laho ma si Daud mambuat holiholi ni si Saul dohot holiholi ni si Jonatan anakna i, sian isi ni Jabes di Gilead, angka na tinangkonasida sian partungkoan ni Betsean, ai tusi do i digantungkon halak Palistim, uju di ari na tinaluhon ni halak Palistim si Saul di dolok Gilboa.

21:13 Dung i diboan ma sian i holiholi ni si Saul dohot holiholi ni si Jonatan, anakna i, jala dipapungu do i tu holiholi ni angka na targantung.

21:14 Jadi ditanom nasida ma holiholi ni si Saul dohot si Jonatan, anakna i di Sela di luat Benjamin, di bagasan tanoman ni si Kis amana i, gabe dipatupa nasida ma sude na tinonahon ni rajai. Jadi dung songon i marpangulahi ma roha ni Debata mida tano i.

21:15 Alai tubu ma muse hamusuon ni halak Palistim dompak halak Israel. Jadi tuat ma si Daud rap dohot naposona, tole ma nasida marporang dompak halak Palistim, pola tung loja si Daud.

21:16 Jadi ro ma si Isbibenob, sada sian angka anak ni si Repaim, ia dokdok ni hujurna tolu ratus sekkel tombaga do, jala disandang do podang na imbaru, diondam rohana do naeng mambunu i si Daud.

21:17 Alai ro ma si Abisai, anak ni Nai Seruia, mangurupi ibana, dibunu ma halak Palistim i mate. Uju i pola disumpahon angka naposo ni si Daud tu ibana, angka ninna ma: Ndang jadi be ho borhat udur dohot hami tu parporangan, asa unang intopanmu palito ni Israel.

21:18 Jadi dung salpu i tubu muse hamusuon di Gob dompak halak Palistim. Uju i dibunu si Sebekkai, halak Husa i ma si Sep, laos pinompar ni si Repaim ibana.

21:19 Dung i tubu muse hamusuon di Gob dompak halak Palistim, gabe dibunu si Elihanan, anak ni Jare Oregim, halak Betlehem i ma si Goliat, halak Gat, ia suhul ni hujurna na saumban do.

21:20 Dung i tubu muse hamusuon di Gat; adong ma disi sada baoa na ganjang, onom be jarijari ni tanganna dohot patna, gabe duapulu opat bilanganna, ibana pe pinompar ni si Repaim do.

21:21 Jadi dung niasapanna halak Israel, gabe dibunu si Jonatan, anak ni si Simea, haha ni si Daud ma ibana.

21:22 Na opat halak i do tubu ni si Repaim di Gat, gabe mate nasida dibunu si Daud dohot angka na posona i.

2 Samuel 22[patota | patota mualna]

22:1 Dung i dihatahon si Daud ma tu Jahowa angka hata ni ende on, di ari dung na pinalua ni Jahowa ibana sian tangan ni saluhut musuna dohot sian tangan ni si Saul.

22:2 Ninna ma: Jahowa do dolok batu di ahu dohot haporusanku, jala sipalua ahu.

22:3 Debata do partanobatoanku, marhaposan tu ibana do ahu, lombulombungku dohot tanduk ni partuaonku, parondingondinganku dohot haporusanku, sipartumpak di ahu, Ibana palua ahu sian uhum gogo.

22:4 Sai hupajoujou do Jahowa, na tama sipujion i, jadi malua ma ahu sian angka musungku.

22:5 Nunga pola dihaliangi angka ombak ni hamatean ahu, angka sunge ni hajahaton manonggoti ahu.

22:6 Nunga pola dihaliangi angka rante ni banua toru ahu, dilungkupi angka jorgong ni hamateani ahu.

22:7 Jadi di na targogot i ahu, hujou do Jahowa, jala hupangiar anggukku tu Debatangku, jadi ditangihon Ibana soarangki sian jorona, jala tolhas angguk i tu pinggolna.

22:8 Jadi humuntalhuntal ma tano on, lalolalo angka ojahan ni langit, jala humuturhutur, ala tarrimas Ibana.

22:9 Martimpul do timus sian igungna, jala ruar api na mandilatdilat sian pamanganna, gara ni api angka na marnalanala ruar sian Ibana.

22:10 Dung i dipajomba Ibana ma angka langit, gabe tuat Ibana, jala holom marimpotimpot di toru ni patna.

22:11 Marsihundul di kerubim ma Ibana huhut habang, jala mangareapreap Ibana di atas habong ni alogo.

22:12 Haholomoni do dibahen undungundungna humaliang Ibana, parhobot ni udan dohot ombun do lapelapena.

22:13 Sian sondang di adopanna marsijembur angka gara ni api.

22:14 Mangkuling ronggur sian angka langit dibahen Jahowa, jala dipatubegehon Natumimbul i soarana.

22:15 Dung i disiorhon Ibana angka sumbiana, jala dipaserak angka musu, sumiksaksiksak hilapna, asa manggaori nasida.

22:16 Jadi tarida ma angka lubuk ni laut, gabe mullop angka ojahan ni portibi on maradophon pangasupim, ale Jahowa, maradophon pangunsong ni hosa ni igungna.

22:17 Disurdukkon Ibana tanganna sian ginjang manangkup ahu, mangenet ahu sian angka aek magodang.

22:18 Ibana paluahon ahu sian musungku na gogo i, sian angka na mangkosom ahu, ala gumogo nasida sian ahu.

22:19 Dirampok nasida do ahu di ari hinamagongku, alai Jahowa do pangunsandeanku.

22:20 Jala Ibana manogihon ahu tu halambason, Ibana paluahon ahu, ai lomo do rohana mida ahu.

22:21 Dibaloshon Jahowa tu ahu hombar tu hatigoranku, hombar tu habontoron ni tanganku tahe dipasuang tu ahu.

22:22 Ai hujujur do angka dalan ni Jahowa, jala ndang manjahati ahu marbalik sian Debatangku.

22:23 Ai sai tongtong di jolongku sude angka uhumna, jala ndang hupaholang angka patikna i sian ahu.

22:24 Sai sun do lidang ni rohangku maradophon Ibana, jala sai hujaga do diringku maradophon hajahatonku.

22:25 Jadi dibaloshon Jahowa tu ahu hombar tu hatigoranku, hombar tu halidangonku, na niidana i.

22:26 Asi do roham tu na asi roha i, tobok do Ho maradophon halak na tobok i.

22:27 Bontor do ho dompak na bontor roha i, jala pulos do roham tu pargeduk i.

22:28 Ai ditumpahi Ho do jolma na dangol i, alai dialo matam do angka na ginjang roha, jala dipajimput Ho nasida.

22:29 Ai Ho do, ale Jahowa parpalitoanku! Jala dipatiur Jahowa do holom ni parnidaanku.

22:30 Ai mardonganhon Ho tartondong ahu do parduaan ni parangan, jala mangasahon Debatangku tartimbung ahu do parik.

22:31 Sun denggan do dalan ni Debata, pita do hata ni Jahowa, Ibana do lombulombu ni sude halak na marhaposan tu Ibana.

ᯘᯉᯮ᯲ ᯑᯰᯩᯎᯉ᯲ ᯑᯬ ᯑᯞᯉ᯲ ᯉᯪ ᯑᯩᯅᯖ, ᯇᯪᯖ ᯑᯬ ᯂᯖ ᯉᯪ ᯐᯂᯬᯋ, ᯤᯅᯉ ᯑᯬ ᯞᯔᯬ᯲ᯅᯮᯞᯔᯬ᯲ᯅᯮ ᯉᯪ ᯘᯮᯑᯩ ᯂᯞᯂ᯲ ᯉ ᯔᯒ᯲ᯂᯇᯬᯘᯉ᯲ ᯖᯮ ᯤᯅᯉ.

22:32 Ai tung ise ma Debata, dungkon ni Jahowa, jala tung ise tau partanobatoan, dungkon ni Debatanta.

22:33 Debata do haporusanku na gonting, jala dipatiur do dalanku.

22:34 Ibana mambahen pathu doshon doras ni tini, jala dipajongjong ahu tu angka habuntulonku.

22:35 Ibana mangajari tanganku mangula hamusuon, asa tarbahen botohonku manintak sior haksa.

22:36 Jala dilehon Ho tu ahu lombulombu ni hatuaonmi, jala habasaonmu do patimbul ahu.

22:37 Dipalumbang Ho do langkangku, jadi ndang tarbaliksu mata ni ari ni tothu.

22:38 Sai hulotongi do angka musungku, laos husiaphon nasida, jala ndang mulak ahu, paima sun nasida hurendephon.

22:39 Huropuhi jala hurendephon nasida, jadi ndang tarbahen nasida be hehe, marragean do nasida tu toru ni tothu.

22:40 Dihohoshon Ho do pargogo tu ahu mangula hamusuon, dipapatu Ho do angka alongku tu ahu.

22:41 Jala nunga dipaundar Ho angka musungku, gabe siap hubahen angka na mangkosom ahu.

22:42 Sai manatapnatap nasida humaliang, hape ndang adong sipalua nanggo sahalak, tu Jahowa pe, hape ndang olo Ibana mangalusi nasida.

22:43 Jadi hulamoti ma nasida songon orbuk na di tano i, hulutluti nasida songon gambo di alaman.

22:44 Angkup ni nunga dipalua Ho ahu sian parbadaan ni bangsongku, nunga dipabangkit Ho ahu gabe ihutan ni angka bangso parbegu, gari bangso na so hutanda mangoloi ahu.

22:45 Gari halak na pulik marga mangalesemlesem ahu, guru dokku do dioloi nasida.

22:46 Merus do angka anak ni na pulik marga, jala angka hitir do nasida ruar sian partanobatoannasida.

22:47 Mangolu do Jahowa, jala tama do papujipujion partanobatoanki, jala timbul do Debata ni hatuaonku.

22:48 Debata do silehon angka partubolon tu ahu dohot papatuhon angka bangso tu ahu.

22:49 Ibana sipalua ahu sian angka musungku, Ho do tongon patimbul ahu maralohon angka alongku, nunga dipalua Ho ahu sian jolma sibahen gogo.

22:50 Dibahen i pujionku ma Ho ale Jahowa, di tongatonga ni angka bangso parbegu, jala endehononku ma Goarmu.

22:51 Ibana sipatimbul angka hatuaon ni rajana, jala Ibana mambahen asi ni roha tu jolma naung miniahanna i, tu si Daud dohot tu pinomparna i ro di salelenglelengna.