Jump to content

Buku Daniel

Sian Wikipedia

Daniel ᯑᯉᯪᯀᯞᯩ 1[patota | patota mualna]

1:1 Patolutaonhon hinarajahon ni si Joiakim raja sian Juda, ro ma si Nebukadnesar, raja sian Babel tu Jerusalem, laos di tungkum huta i. ᯇᯖᯬᯞᯮᯖᯀᯉᯬ᯲ᯂᯉᯬ᯲ ᯂᯪᯉᯒᯐᯂᯉᯬ᯲ ᯉᯪ ᯘᯪ ᯐᯬᯤᯀᯄ᯦ᯔᯪ᯲ ᯒᯐ ᯘᯪᯀᯉ᯲ ᯐᯮᯑ ᯒᯬ ᯔ ᯘᯪ ᯉᯩᯅᯮᯄ᯦ᯑ᯲ᯉᯩᯘᯒ᯲ ᯒᯐ ᯘᯪᯀᯉ᯲ ᯅᯅᯞᯩ᯲ ᯖᯮ ᯐᯩᯒᯮᯘᯞᯔᯩ᯲ ᯞᯀᯘᯬ᯲ ᯑᯪᯖᯮᯰᯂᯔᯮ᯲ ᯂᯮᯖ ᯤ

1:2 Jadi dipasahat Tuhan i ma tu bagasan tanganna si Joiakim, raja sian Juda dohot deba angka ulaula sian joro ni Debata, jala diboan do i tu tano Sinear, tu bagas ni angka debatana, jala dipamasuk angka ulaula i tu bagas parartaan ni angka debatana i.

1:3 Dung i martona ma rajai tu si Aspenas, sintua ni angka naposona di jabuna boanonna deba sian halak Israel, angka pinompar ni raja dohot sian halak na sangap.

1:4 Dolidoli angka na so adong tihasna, angka na uli rupa, angka na pantas di sandok hapistaran, angka parhapistaran godang, angka na marroha, jala angka na tau marhalado di bagasan jabu ni rajai, asa ajarhononna tu nasida surat dohot hata ni halak Kasdim.

1:5 Dung i diboho rajai ma tu nasida bohal siganup ari sian sipanganon ni rajai, sian anggur siinumonna sandiri, jala ajaran nasida tolu taon lelengna, asa dung salpu i, ingkon marhalado nasida di jolo ni rajai.

1:6 Jala di tongatonganasida ma adong sian pinompar ni si Juda: Si Daniel, si Hanania, si Misael dohot si Azaria.

1:7 Alai marimbang goar ma nasida dibahen sintua ni angka naposo i dibahen ma goar ni si Daniel: Si Beltsasar, jala si Hanania: Si Sadrak, jala si Misael: Si Mesak, jala si Azaria: Si Abednego.

1:8 Alai anggo si Daniel nunga marsangkap hian di bagasan rohana, asa unang ramunanna dirina, marhite sian sipanganon ni rajai dohot marhite sian anggur siinumonna; jadi dipangido ma sian sintua ni angka naposo i, asa unang ingkon ramunanna dirina.

1:9 Jadi dilehon Debata ma tu si Daniel dapotan habasaon dohot asi ni roha ibana maradophon induk ni angka naposo i.

1:10 Jadi ninna sintua ni angka naposo i ma tu si Daniel: Mabiar do ahu mida tuangku, rajai, naung tumiti sipanganonmuna dohot siinumonmuna; boasa tung idaonna bohimuna humurang sian bohi ni angka dolidoli donganmuna magodang, gabe marutang hosa ahu maon bahenon ni rajai humongkop hamu?

1:11 Alai ninna si Daniel ma tu na pande sipanganon, naung pinabangkit ni induk ni angka naposo i marhaladoi si Daniel, si Hanania, si Misael dohot si Azaria:

1:12 Ua unjuni ma angka naposom sampulu ari on, asa lehon tu hami sian angka ingkau rata panganonnami, jala aek do inumonnami.

1:13 Dung i tingkiron ma nian di jolomi rupanami, dohot rupa ni dolidoli angka na manganhon sian sipanganon ni rajai, jadi hombar tu parnidam bahen tu angka naposom.

1:14 Jadi dioloi, ibana ma hatanasida i, jala diunjuni nasida sampulu ari lelengna.

1:15 Jadi dung marujung na sampulu ari i, jadi dumenggan ma rupanasida idaon, jala ummokmok nasida sian saluhut dolidoli, angka na manganhon sian sipanganon ni rajai.

1:16 Jadi ditait pande sipanganon i ma sipanganonnasida dohot anggur siinumonnasida na sai laon, jala dilehon ma tu nasida angka ingkau rata.

1:17 Jadi dibasabasahon Debata ma tu na opat dolidoli i parbinotoan dohot hapantason di saluhut surat dohot hapistaran. Ia si Daniel marbinoto do huhut di saluhut alatan dohot angka nipi.

1:18 Jadi dung marujung ariari angka na tiniti ni rajai boanon nasida, gabe diboan sintua ni angka naposo i ma nasida di jolo ni si Nebukadnesar.

1:19 Dung i diuji rajai ma nasida, gabe ndang adong jumpang sian nasida sude tudoshon si Daniel, si Hanania, si Misael, dohot si Azaria marroha, jadi marhalado ma nasida di jolo ni rajai.

1:20 Jadi taringot tu saluhut hata dohot hapistaran ni hapantason na niusoan ni rajai tu nasida, lompit sampulu hali umpistar nasida didapot sian saluhut angka partondung dohot sijujur parhalaan di sandok gomgomanna.

1:21 Dung i mian disi ma si Daniel sahat ro di * taon parjolo ni raja Sirus.

Daniel 2[patota | patota mualna]

2:1 Dung i paduataonhon hinarajahon ni si Nebukadnesar, marnipi ma si Nebukadnesar, gabe tarsonggot situtu tondina, jala ndang be tarnono matana.

2:2 Jadi didokkon rajai ma jouon halak partondung sijujur parhalaan, parsibalik mata dohot halak Kasdim, asa dipabotohon tu rajai angka nipina i. Jadi ro ma nasida, jala jongjong di jolo ni rajai.

2:3 Dung i ninna rajai ma tu nasida: Nunga huipi sada nipi, gabe tarsonggot situtu rohangku, naeng nian botoon nipi i.

2:4 Jadi ninna halak Kasdim ma tu rajai, marhata Ram: * Sai mangolu ma ho; ale rajanami ro di salelenglelengna! Sai pajojor ma nipi i tu angka naposom, asa hujujur hami lapatanna.

2:5 Jadi ninna rajai ma mangalusi halak Kasdim: Nunga pola ruar parentangku! Molo so dipabotohon hamu tu ahu nipi i, dohot jujurna, ingkon tanggoan hamu, jala bagasmuna i gabe partangkalan bahenon.

2:6 Alai molo dipabotohon hamu nipi i ro di jujurna i, ingkon jaloonmuna sian ahu angka silehonlehon dohot denggan basa dohot arta angka na mauliutus. Dibahen i paboa hamu ma tu ahu nipi i ro di jujurna!

2:7 Dung i ninna nasida ma mangalusi paduahalihon: Sai dipaboa rajai ma nipi i tu angka naposomon, asa hujujur hami.

2:8 Jadi ro ma alus ni rajai, ninna ma: Tangkas do nuaeng huboto mangkatihati tingki do hamu naeng, ala naung diida hamu nunga pola lalu hatangku.

2:9 Alai molo tung so dipabotohon hamu nipi i tu ahu, uhum naung binuhul hian madabu tu hamu sude, ala naung disangkap rohamuna mangkatahon hata gabus dohot sipaotooto di jolongku, paima muba tingki di rohamu! Dibahen i sai paboa hamu nipi i tu ahu, asa tung hutanda, tarbahen hamu pajojorhon dohot lapatanna.

2:10 Jadi ninna halak Kasdim ma maralus di jolo ni rajai: Nda tung adong dapot jolma nanggo sada di liat portibi on, na tarbahen pajojorhon hata ni rajai, ala na so dung antong, manang ise raja na timbul, jala marhuaso mangido hata sisongon i sian manang ise partondung, parsibalik mata, manang halak Kasdim.

2:11 Ai hata na pinangido ni rajai na mamaolhu do i, ndang adong dapot nanggo sahalak na tarbahen pajojorhonsa di jolo ni rajai; dungkon ni debata, angka na so maringan di tongatonga ni jolma.

2:12 Ala ni tarrimas jala muruk situtu rajai, jala didokkon bunuon saluhut halak na pistar, angka na di Babel.

2:13 Jadi ruar ma parenta i, ingkon bunuon halak na pistar i; jadi dilului nasida ma dohot si Daniel ro di angka alealena i naeng bunuonna nasida.

2:14 Jadi ro ma alus ni si Daniel * sian parsihohot dohot sian pantas ni rohana mandok tu * si Ariok, sintua ni angka parangan ni rajai, naung borhat nian laho mambunu halak angka na pistar di Babel.

2:15 Dung i maralus ma ibana tu si Ariok, panglima ni rajai, ninna ma: Boasa tung ruar patik na sai horas sian rajai? Jadi dipabotohon si Ariok i ma pangalahona tu si Daniel.

2:16 Dung i bongot ma si Daniel mangido tu rajai palelengonna janjina tu ibana, asa pabotohononna jujur ni nipi i tu rajai.

2:17 Dung i mulak ma si Daniel tu jabuna, jala dipabotohon ma barita i tu si Hanania, si Misael do si Azaria angka alealena i.

2:18 Asa mangido asi ni roha sian Debata, na di surgo i, taringot tu hahomion on, asa unang tarbunu si Daniel dohot angka alealena i rap dohot halak na pistar, angka na asing di Babel.

2:19 Jadi * pinapatar ma hahomion i tu si Daniel marhitehite alatan bornginna i. Dung i dipuji si Daniel ma Debata na di surgo i.

2:20 Dung i ro ma alus ni si Daniel, ninna ma: Pinuji ma Goar ni Debata sian salelengna sahat ro di salelenglelengna, ai ibana do nampunasa hapistaran dohot hagogoon.

2:21 Ibana do paimbarhon angka taon dohot jom, ibana * paijurhon angka raja dohot pabangkithon, ibana marbasabasahon * hapistaran tu halak na pistar dohot roha hapantason tu halak parroha.

2:22 Ibana do papatarhon na bagas dohot na simuk, ibana do umboto manang aha na masa di bagasan haholomon, jala mian di lambungna do hatiuron i.

2:23 Mauliate ma ahu tu ho ale Debata ni angka daompung, jala hupuji ma ho, ala naung nilehonmu tu ahu hapistaran dohot hagogoon. Jala dipapatar ho nuaeng muse tu ahu na hupangido hami sian ho; ai nunga dipabotohon ho tu hami hata ni rajai.

2:24 Dibahen i laho ma si Daniel mandapothon * si Ariok, naung nidokkon ni rajai, bunuonna halak angka na pistar di Babel. Dung sahat ibana songon on ma hatana tu ibana: Unang ma bunu halak angka na pistar di Babel! Boan ma ahu tahe tu jolo ni rajai, asa hupajojor jujur ni nipina i tu rajai.

2:25 Jadi hatop ma si Ariok mamboan si Daniel tu jolo ni rajai, jadi ninna ma tu ibana: Nunga jumpang ahu sada halak Jahudi sian halak na tarbuang, ibana ma pabotohon jujur ni nipi i tu rajai.

2:26 Dung i ro ma alus ni rajai, ninna ma tu si Daniel, na marimbang goar si Beltsasar: Atehe, tarbahen ho do pabotohon tu ahu nipi alatan naung huida i ro di jujurna?

2:27 Dung i ro ma alus ni si Daniel di jolo ni rajai, ninna ma: Ia hahomion i na niusoan ni rajai, ndang tarpapatar manang ise tu rajai, nang halak na pistar, nang parsibalik mata, nang partondung manang sijujur parhalaan pe.

2:28 Alai tahe adong do Debata di surgo, sipapatar hahomion; ibana do pabotohon tu raja Nebukadnesar, manang aha na masa sogotsogot ni ari. Nipimi dohot alatan na niidam di atas podomanmu on do:

2:29 Dipingkirpingkiri roham do, ale rajanami, di atas podomanmu taringot tu na masa sogot; jadi ro ma ibana * na papatar angka hahomion pabotohon tu ho, manang aha na masa sogot.

2:30 Jadi tu ahu ma dipabotohon hahomion i, * ndada ala hapistaran na di bagasan ahu sandiri, gumodang sian tu angka na mangolu na asing, ala na naeng pabotohononhon panjujuron tu rajai, jala asa diboto ho angka pingkiran ni roham.

2:31 Maralatan do ho, ale rajanami, gabe ida ma, adong gombaran sada apala na bolon tung na timbo sahali do gombaran i, jala sillamna tung na mauliutus do, jongjong di adopanmi, jala rupana mansai songkal.

2:32 Ia ulu ni gombaran i sian sere palangki, andorana dohot botohonna sian perak, butuhana dohot haehaena sian tombaga.

2:33 Bitisna sian bosi, patna deba sian bosi, deba sian tano liat.

2:34 I do na niidam maralatan, paima mungkit sada batu sian ginjang, alai ndada niungkit ni tangan, laos ditipa ma gombaran i di patna na sian bosi marsaor tano liat, laos maropuk dibahen.

2:35 Jadi rap maropuk ma bosi, tano liat, tombaga, perak dohot sere, jala gabe tudoshon hurangkam, na hinabangkon ni alogo sian pardegean, sandok tung na so jumpang be ingananna. * Ia batu na manipa gombaran i manjadi dolok batu na bolon, jala digohi liat portibi on.

2:36 I ma nipi i, jujurna pe paboaonnami ma nuaeng di jolo ni rajai.

2:37 Ia ho ale rajanami! * Raja ni angka raja do ho nunga dilehon Debata na di surgo i tu ho harajaon, hagogoon, huaso dohot hamuliaon.

2:38 Manang didia pe maringan jolma manisia ro di * binatang di ladang dohot pidong na martongatonga langit, nunga dipasahat ibana tu bagasan tanganmu, jala dipabangkit ho bahen panggomgomi di nasida luhutna: Ho do tahe ulu sere i!

2:39 Alai dung salpu ho, soluk ma harajaon na asing sada, na moru sian ho; soluk muse harajaon na asing, i ma patoluhon i, na sian tombaga, gomgomanna ma sandok tano on.

2:40 Ia harajaon paopathon i, togu do songon bosi; ai suang songon bosi mangaropuhi dohot mangarosahi luhutna, ingkon songon i ropuhanna, jala rosahanna luhutna i.

2:41 Alai na niidam angka pat dohot jarijari ni pat, deba sian tano liat, jala deba sian bosi, boaboa ni harajaon na binagi do i; alai tading do di bagasanna hatoguon ni bosi, sandok songon na niidam bosi marsaor tano liat.

2:42 Ia jarijari ni pat i deba sian bosi, jala deba sian tano liat; marboaboa togap ni na sabagian harajaon i, getes na sabagiannari.

2:43 Alai songon na niidam bosi marsaor tano liat, boaboa ni na masialian angka jolma pangisina i, alai ndang olo sada situtu, songon bosi na so tarpasada tu tano liat.

2:44 Alai di tingki hinarajahon ni angka rajai, padirion ni Debata, na di surgo i, sada harajaon na so tarpapatu * ro di salelenglelengna, gomgomanna pe ndang pasahatonna tu bangso na asing; * ropuhanna do tahe sogot saluhut angka harajaon i, jala pansingkononna, alai hot do anggo na sasada i ro di saleleng ni lelengna.

2:45 Sandok songon na niidam niungkit sada * batu sian dolok i, so niungkit ni tangan ni jolma, jala diropuhi bosi, tombaga, tano liat, perak dohot sere. Debata na mamunjung do pabotohon tu rajai manang aha pamasaonna sogotsogot ni ari; i do sintong nipi i, sintong dohot jujurna.

2:46 Dung i manungkap ma raja Nebukadnesar marsomba tu si Daniel, jala didokkon boanon pelean sipanganon dohot angka na hushus bahen sombasomba tu ibana.

2:47 Dung i ninna raja ma mangalusi si Daniel: Tongon do tahe, Debatamuna do * Debata ni angka Debata, jala Tuhan ni angka raja, jala sipapatar angka hahomion ala dapot ho papataronmu hahomion on.

2:48 Dung i dipatimbul rajai ma si Daniel, jala dilehon tu ibana torop silehonlehon angka na balga, jala * dipabangkit ibana gabe pangarajai di sandok luat Babel, jala sintua ni saluhut halak na pistar angka na di Babel i.

2:49 Dung i dipangidohon si Daniel ma sian rajai, * pabangkitonna si Sadrak, si Mesak dohot si Abednego bahen wakilna, parenta luat Babel; tongtong do anggo si Daniel di bagasan jabu ni raja.

Daniel 3[patota | patota mualna]

3:1 Dung i dipatungkangkon raja Nebukadnesar ma sada ganaganaan sian sere, timbona onompulu elak, bidangna onom elak; didokkon ma i pajongjongon di rura Dura, di luat Babel.

3:2 Dung i disuru raja Nebukadnesar ma suruanna papunguhon angka pangarajai, partogi dohot induk ro di angka panglima, angka siramoti arta, angka siboto patik, angka siboto uhum ro di sude halak sitiop parenta, di angka luat humaliang, asa ro be nasida mangontongkon ganaganaan i, naung pinajongjong ni raja Nebukadnesar.

3:3 Jadi marpungu ma angka pangarajai dohot angka partogi, angka induk ro di angka panglima, angka siramoti arta, angka siboto patik, angka siboto uhum ro di sude angka sitiop parenta di angka luat humaliang, laho mangontongkon ganaganaan i, naung pinajongjong ni raja Nebukadnesar. Jadi dung jongjong nasida di jolo ni ganaganaan i naung pinajongjong ni si Nebukadnesar.

3:4 Jala dipangiar partingting ma suarana martingting: O hamu angka bangso, angka houm dohot parpangkuling marragamragam, tangihon hamu ma tingtingkon:

3:5 Molo dibege hamu suara ni sarune, tulila, hasapi, arbab, sordam, gondang ro di saluhut ragamragam ni parhinaloan: Ingkon marsinggang ma hamu marsomba tu ganaganaan sere i, naung pinajongjong ni raja Nebukadnesar.

3:6 Dung i manang ise na so marsinggang jala marsomba, ingkon timpalhononhon ibana di na satongkin i tu liang pamurunan, na marnalanala.

3:7 Dibahen i dung dibege saluhut angka bangso uju i suara ni sarune, tulila, hasapi, arbab, sordam ro di sandok ragamragam ni parhinaloan: Marsinggang be ma saluhut angka bangso, angka houm dohot parpangkuling marragamragam marsomba tu ganaganaan sere i, naung pinajongjong ni raja Nebukadnesar.

3:8 Dung i ro ma uju i jumonok deba baoa halak Kasdim, angka na mangasungi halak Jahudi.

3:9 Angka ninna nasida ma mangalualu tu raja Nebukadnesar: Ale rajanami, sai mangolu ma ho ro di saleleng ni lelengna!

3:10 Nunga dibahen ho * patik, ale rajanami, ganup jolma na umbege suara ni sarune, tulila, hasapi, arbab, sordam, gondang ro di sandok ragamragam ni parhinaloan, ingkon marsinggang ibana, jala marsomba tu ganaganaan sere i.

3:11 Jala manang ise na so marsinggang, jala marsomba, ingkon timpalhononhon ibana tu bagasan liang pamurunan na marnalanala.

3:12 Adong do nuaeng deba halak Jahudi, * angka naung pinabangkitmi bahen sitiop parenta di luat Babel, i ma si Sadrak, si Mesak dohot si Abednego; angka baoa ondeng, ndang parduli di patikmi, ale rajanami; tu angka debatami ndang mamele nasida, jala tu ganaganaan sere naung pinajongjongmi ndang marsomba nasida!

3:13 Dung i piripirion jala muruk situtu ma si Nebukadnesar mandokkon ingkon boanon si Sadrak, si Mesak dohot si Abednego tu jolona. Jadi tarboan ma na tolu halak i tu jolo ni rajai.

3:14 Dung i ninna si Nebukadnesar ma mandok nasida: Atehe, tongon do, ale Sadrak, Mesak dohot Abednego, ndang olo hamu mamele tu debatangku, jala ndang olo hamu marsomba tu ganaganaan sere naung hupajongjong i?

3:15 On pe molo olo hamu nuaeng, disi dibege hamu suara ni sarune, tulila, hasapi, arbab, sordam, gondang dohot sandok ragamragam ni parhinaloan, marsinggang jala marsomba tu ganaganaan naung hupauli i? Alai molo so olo hamu marsomba, ingkon tongkinnai hamu timpalhononhon tu liang pamurunan na marnalanala! Dung i idaon ma manang * Debata dia na tuk paluahon hamu sian tanganku!

3:16 Jadi ro ma alus ni si Sadrak, si Mesak dohot si Abednego mandok tu rajai: Ale Nebukadnesar, ndang pola alusannami ho, anggo taringot tu na nidokmi.

3:17 Molo lomo roha ni Debatanami, na huoloi hami, sai paluaonna do hami * sian liang pamurunan na marnalanala i dohot sian tanganmu, ale rajanami.

3:18 Alai nang so lomo rohana, ingkon botoonmu do, ale rajanami, na so olo hami mamele tu angka debatamu manang marsomba tu ganaganaan sere, naung pinajongjongmi.

3:19 Jadi piripirion situtu ma si Nebukadnesar, pola rupi bohina dompak si Sadrak, si Mesak dohot si Abednego; jala didokkon ingkon lompit pitu hali ummohop liang pamurunan i bahenon sian na somal.

3:20 Didokkon ma huhut deba paranganna, angka na gumogo manali si Sadrak, si Mesak dohot si Abednego, asa tinimpalhon nasida tu bagasan liang pamurunan na marnalanala i.

3:21 Dung i di tali ma na tolu halak i songon i marmandar, marsaraoal, martalitali ro di sandok pangkeanna, laos ditimpalhon tu bagasan liang pamurunan na marnalanala i.

3:22 Jadi ala horas ni patik ni rajai, jala ala naung mohop sahali liang pamurunan i, gabe dibunu nala ni pamurunan i ma baoa angka na mangampehon si Sadrak, si Mesak dohot si Abednego tu atasna.

3:23 Alai anggo na tolu halak i si Sadrak, si Mesak dohot si Abednego madabu do songon i tinali tu bagasan liang pamurunan na marnalanala i.

3:24 Jadi marseto ma roha ni raja Nebukadnesar, jala tompu ibana hehe, huhut didok tu angka panuturina: Atehe, nda tolu baoa na itatali laho manimpalhon tu bagasan api i? Jadi ninna nasida ma mangalusi rajai: I ma tutu, ale rajanami!

3:25 Dung i ninna ibana ma mangalusi: Ida ma, opat halak huida harhar talina mardalandalan * di bagasan api, ndang manang mahua nasida, jala rupa ni na paopathon i, tudos do tu * anak ni angka debata.

3:26 Dung i didapothon si Nebukadnesar ma pintu ni liang pamurunan na marnalanala i, huhut ma didok: Hamu ale Sadrak, Mesak dohot Abednego, angka naposo ni Debata na mamunjung, ruar ma hamu jala ro tuson! Jadi ruar ma si Sadrak, si Mesak dohot si Abednego sian api i.

3:27 Dung i marpungu ma angka pangarajai, partogi, induk dohot angka panuturi ni rajai, naeng marnida angka baoa i, angka na so tarhahua api dagingnasida i, gari obuk ni ulunasida ndang muap api, jala pangkeannasida ndang muba, nanggo uap ni api, ndang dais tu nasida.

3:28 Jadi ro ma hata ni si Nebukadnesar: Pinuji ma Debata ni si Sadrak, si Mesak dohot si Abednego, naung marsuru * suruanna, asa paluahon naposona, angka na marhaposan tu ibana, gabe ndang dioloi patik ni harajaon, tung diseahon do dagingnasida, asal unang mangoloi manang marsomba tu debata sileban, dungkon ni tu Debatana.

3:29 Dibahen i mambahen patik ma ahu nuaeng: Manang ise sian angka bangso, houm dohot parpangkuling marragamragam mandok hata insahinsak dompak Debata ni si Sadrak, si Mesak dohot si Abednego: Ingkon * tanggoan ibana, jala bagasna gabe partangkalan bahenon, ai * ndang adong debata na asing na tuk paluahon, songon ibana.

3:30 Jadi naek ma dibahen rajai tohonan ni si Sadrak, si Mesak dohot si Abednego di luat Babel.

3:31 Ahu surat tinongos ni raja Nebukadnesar tu sandok bangso, houm dohot parpangkuling angka na maringan di liat portibi on: Tua ma di hamu godanggodang!

3:32 Tanda dohot halongangan, angka na binahen ni Debata na mamunjungi tu ahu; dipangido rohangku naeng pabotohononku tu hamu.

3:33 Ai tung na balga sahali do angka tanda binahenna i, jala tung na songkal do halongangan angka na pinamasana i. * Ia harajaonna harajaon saleleng ni lelengna do, jala gomgomanna marsundutsundut.

Daniel 4[patota | patota mualna]

4:1 Ia ahu Nebukadnesar, marsonangsonang do di bagasan jabungku, jala mardohar di bagashu na bolon i.

4:2 Dung i adong ma nipingku na manonggoti ahu, tole angka pingkiranku di atas podomanku, tole angka alatan ni ulungku manggunsang rohangku.

4:3 Dung i mambahen patik ma ahu, ingkon boanon tu jolongku saluhut halak na pistar, angka na di Babel, asa dipabotohon nasida tu ahu jujur ni nipi i.

4:4 Jadi ro be ma mandapothon ahu angka siboto surat, angka partondung, halak Kasdim dohot angka sijujur parhalaan, gabe hupajojor nipingku tu pinggolnasida; alai ndang dipabotohon nasida tu ahu jujurna.

4:5 Paima ro muse tu jolongku si Daniel, na marimbang goar si Beltsasar, mangihuthon goar ni debatangku, jala di bagasan ibana do * Tondi ni Debata angka na badia i, gabe hupajojor nipi i tu pinggolna.

4:6 Ho ale Beltsasar, sintua ni angka siboto surat, nunga tangkas huboto maringan di bagasan roham do Tondi ni Debata angka na badia i, jala ndang diboto ho * jut ni roha taringot tu sandok hahomion: Sai paboa ma tu ahu lapatan ni alatan ni nipingku, angka na huida i.

4:7 On do nian angka alatan ni ulungku di atas podomanku: Maralatan ahu gabe huida jongjong sada hau di parsitongaan ni tano on, tung na timbo sahali do.

4:8 Dung i lam tu balgana dohot tu bolonna hau i, jala timbona sahat ro di langit, jala tarida do sahat ro di ujung ni liat portibi on.

4:9 Uli ia dangkana, jala ramos parbuena, jala singkop di ibana sipanganon marmudu saluhutna; marlinggomlinggom tu ibana do sandok binatang di harangan, jala marasar di dangkadangkana do * angka pidong na martongatonga langit, jala mangolu sian ibana do nasa sibuk.

4:10 Dung i maralatan muse ahu di bagasan alatan ni ulungku di atas podomanku, gabe ida ma: Tuat sian banua ginjang sada halak parjaga, jala na badia.

4:11 Na pangiar suarana joujou songon on: * Taba ma hau on jala ranting i, horus ma huhut bulungna, jala panserakkon angka parbuena! Ingkon maporus ma angka binatang sian toruna, jala marhabangan angka pidong sian dangkadangkana.

4:12 Alai anggo pangkalna na marurati pasombu ma di bagasan tano i, alai ingkon tarrante sian bosi dohot tombaga ibana, peakpeak di tongatonga ni jampalan marudan marari, jala mangan duhutduhut di tano i rap dohot angka pinahan.

4:13 Ingkon buaton huhut sian ibana roha jolma, jala lehonon tu ibana roha pinahan, paima salpu * pitu taon on.

4:14 Marharoroan sian * parluhutan ni angka parjaga do tuptupan on, jala binahen ni pangkataion ni angka na badia sahat pangidoani tu jolo ni Debata, asa tung ditanda nasa na mangolu, * saguru di Debata do harajaon ni jolma manisia, jala dibasabasahon tu manang ise lomo ni rohana, jala tarbahensa do gabe jujungan jolma apala na lumea sahali.

4:15 I ma nipi i, na huida maralatan, ninna raja Nebukadnesar. Alai anggo ho, ale Beltsasar, ingkon paboaonmu jujurna! Ai saluhut na pistar angka na di harajaonku, ndang tarpajojorsa jujurna tu ahu; alai anggo ho tarbahen ho do, ai Tondi ni Debata angka na badia i do na maringanan di bagasan ho.

4:16 Jadi tarhalomong ma si Daniel na marimbang goar si Beltsasar, arga sajom lelengna; jala pingkiranna mambahen mallobuk taroktokna. Dung i ro ma alus ni rajai songon on: Ale Beltsasar, unang pola mallobuk roham bahenon ni nipi i dohot jujurna! Jadi ninna si Daniel ma mangalusi: Iale tuangku, aut ni tu angka musum songgop nipi i, jala jujurna tu angka alom nian.

4:17 Ia hau, na niidami, lam tu balgana dohot bolonna, ianggo pala timbona sahat ro di langit, jala tarida do i di liat portibi on;

4:18 Jala uli dangkadangkana, jala ramos parbuena, singkop panganon marmudu saluhutna, jala marlinggomlinggom angka binatang na di harangan di toruna, jala marasari angka pidong na martongatonga langit di dangkadangkana:

4:19 Ho do i, ale rajanami, naung manjadi balga ho jala margogo, jala naung timbul hatongamonmu, pola tung sahat ro di langit, jala gomgomanmu sahat ro di ujung ni tano on.

4:20 Alai na niida ni rajai sada parjaga dohot na badia tuat sian banua ginjang, jala na nidokna i: Taba ma hau i, jala ago ibana, alai anggo pangkalna ingkon pasombu di bagasan tano i, jala marrante bosi dohot tombaga ibana bustang di duhutduhut ni ladang i, jala marudan marari ibana, jala sabagian ibana dohot angka binatang di harangan, paima salpu pitu taon di atasna:

4:21 On do lapatanna, ale rajanami, jala on do sinangkap ni na tumimbul, na pinasonggopna tu ho, ale tuangku, rajanami:

4:22 Pabalion ni halak ma ho sian tongatonga ni jolma, gabe sisada inganan ho dohot binatang di harangan, jala lehononna ho mangan duhutduhut songon lombu, jala pasombuonna ho marudan marari, pola pitu taon lelengna, songon i masa tu ho, paima diparhatopot roham saguru di * Debata na tumimbul do angka harajaon ni jolma, jala dibasabasahon tu manang ise lomo ni rohana.

4:23 Jala na nidokna i, ingkon tadingkononhon pangkal ni hau i ro di uratna, lapatanna: Ingkon hot muse harajaonmi di ho, dung diparhatopot roham saguru di Debata na di surgo i do luhutna i.

4:24 Dibahen i, ale rajanami, sai halomohon ma sipaingothu tu ho, jala tostosi ma dirim sian angka dosam marhite sian hatigoran, jala palua dirim sian hajahatonmu marhitehite * denggan basa tu angka na pogos, ia naeng lumeleng hadoharonmu dipangido roham.

4:25 Luhutna i songgop do tahe tu raja Nebukadnesar.

4:26 Dung salpu sampulu dua bulan mardalandalan ma rajai di atas tarup ni bagasna di huta Babel.

4:27 Jadi ro ma hata ni rajai songon on: Nda on do Babel na bolon i, naung hupauli bahen hundulan ni harajaon marhitehite gogo ni hasangaponku, bahen hamuliaon ni hatongamonku?

4:28 Laos di bagasan pamangan ni rajai dope hata i, ro ma sada suara sian banua ginjang: Boaboa tu ho, ale raja Nebukadnesar, ia harajaonmi nunga munsat sian ho.

4:29 Ingkon pabalion ni halak ma ho sian tongatonga ni jolma, jala sisada inganan do ho dohot binatang di harangan; jala lehononna ho mangan duhutduhut songon lombu, pola pitu taon lelengna masa tu ho, paima dung * diparhatopot roham saguru di Debata na tumimbul i do harajaon ni manisia, jala dibasabasahon tu manang ise lomo ni rohana;

4:30 Laos di na sangombas i sintong ma hata i songgop tu si Nebukadnesar, ai dipabali halak ma ibana, jala manjampal duhutduhut ibana songon lombu, jala marudan marari dagingna, pola tung tubu obukna songon imput ni pidong raja ualu ganjangna, jala sisilonna nasa ganjang ni sisilon ni pidong.

4:31 Alai di ujung ni angka ari i manaili ma ahu, Nebukadnesar i dompak banua ginjang, gabe mulak marroha ma ahu muse, jala hupuji Debata na tumimbul i, hupasangap huhut jala marmulia hubahen Debata na mangolu ro di saleleng ni lelengna, * gomgomanna pe ro di saleleng ni lelengna do, jala harajaonna marsundutsundut.

4:32 * Saluhut isi ni tano on pe hira na soada do bilangan martimbangkon ibana; jala guru lomo ni rohana do dibahen tu parangan angka na lohot di langit dohot tu isi ni tano on; jala ndang adong nanggo sada halak na * tuk manampar tanganna manang mandok tu ibana: Aha do na binahenmi?

4:33 Dung i uju i mulak marroha ma ahu, mulak muse dohot hamuliaon ni jujunganku, habalgaonku dohot hatongamonku, ro muse angka panuturingku hian dohot jolma angka na sangap mangalului ahu, dipajujungkon muse tu ahu harajaonku, jala tamba dope hamuliaonku.

4:34 Dibahen i ahu, Nebukadnesar, mamujimuji, patimbulhon dohot mangalehon hamuliaon tu raja na di surgo i; ai saluhut pambahenanna hasintongan do, jala angka lapangna hatigoran, jala tarbahensa do * pajepolhon manang ise na marpangalahohon hajungkaton.

Daniel 5[patota | patota mualna]

5:1 Dung i dipungka raja * Beltsasar ma * panggalangon bolon, sada di angka panuturina na saribu halak i, laos minum anggur do ibana di jolo ni na saribu halak i.

5:2 Jadi dung didai si Beltsasar anggur i, didokkon ma boanon angka ulaula sere dohot perak, angka na binoan ni amana si Nebukadnesar sian joro na di huta Jerusalem, asa minum sian i rajai dohot angka panuturina ro di angka jolmana dohot imbangna.

5:3 Jadi diboan halak ma ulaula sere, angka na binuat sian bagas joro ni Debata na di Jerusalem, gabe minum ma sian i rajai dohot angka panuturina, ro di jolmana dohot imbangna.

5:4 Minum anggur ma nasida huhut dipapujipuji angka debata sileban sian sere, perak, tombaga, bosi, hau dohot batu.

5:5 Laos di na sangombas i mullop angka jarijari ni tangan ni jolma sada, jala manurati tongon tondong ni parpalitoan i tu dorpi na hinapur ni bagas ni rajai, laos diida rajai do ujung ni tangan na manurati.

5:6 Jadi marlangan ma bohi ni rajai, jala mallobuk taroktokna, jala harhar ihotihot ni haehaena, gabe masiantuhan ulu ni totna.

5:7 Dung i dipangiar rajai ma suarana mandokkon * boanon angka parsibalik mata, halak Kasdim dohot angka partondung. Dung i ro ma hata ni rajai mandok tu halak na bisuk, angka na di Babel i: Manang ise jolma na umboto manjaha suraton dohot paboahon tu ahu lapatanna, ingkon marbaju dapdap ibana bahenon, jala horunghorung sere tu rungkungna, jala ingkon gabe raja paitolu ibana di harajaonku.

5:8 Jadi ro be ma luhut halak na bisuk ni rajai; alai ndang diboto nasida manjaha surat i; manang pabotohon lapatanna tu rajai.

5:9 Jadi muba ma parlobuk ni roha ni rajai, jala marlangan situtu bohina, tarsonggot situtu angka ulubalangna.

5:10 Jadi nangkok ma ina ni rajai tu bagasan bilut panggalangan i, ala ni pangkataion ni rajai dohot angka ulubalangna. Dung i ro ma hata ni ina ni rajai mandok songon on: Sai mangolu ma ho, ale rajanami ro di saleleng lelengna! Unang pola tarsonggot ho bahenon ni pingkiranmu, jala unang pola marlangan bohim.

5:11 Adong do sada halak di bagasan harajaonmu, * partondi sian Debata angka na badia i; jala di angka ari ni amam jumpang do sian ibana hatorangon, habisuhon dohot hapistaran, songon hapistaran ni angka Debata, gabe ro ma raja Nebukadnesar amami, pabangkithon ibana bahen sintua ni angka siboto surat, parsibalik mata, halak Kasdim dohot angka partondung, i ma tutu dibahen rajai, amami.

5:12 Ala na dapot di bagasan ibana tondi na sumurung dohot roha hapantason dohot hapistaran manjujur nipi, pajojor hulingkulingan dohot mangkarhari na pasebut, i ma si Daniel, na marimbang goar Beltsasar binahen ni rajai. Antong si Daniel i ma jinou, asa dipabotohon lapatanna.

5:13 Jadi tarboan ma si Daniel tu jolo ni rajai. Dung i ro ma hata ni rajai mandok tu si Daniel: Atehe, ho do si Daniel, sada sian halak Jahudi, angka na tarbuang i, angka na binoan ni damang, rajai, sian Juda tuson?

5:14 Nunga pola hubege baritam, maringan do di bagasan roham tondi ni angka debata, jala jumpang do di ho hatorangan, roha hapantason dohot hapistaran na sumurung.

5:15 Dung i tarboan tu jolongku halak, angka na pistar, angka parsibalik mata, asa dijaha nasida suraton, jala dipabotohon tu ahu lapatanna nian; hape ndang tarpabotohon nasida lapatan ni hata i.

5:16 Alai hubege do baritam, tarbahen ho do manjujur lapatan dohot mangkarhari na pudun. On pe molo tarjaha ho surat i, jala tarpajojor ho lapatanna tu ahu, ingkon marbaju dapdap ho bahenon, jala horunghorung sere tu rungkungmu, jala ingkon raja paitolu ho di harajaonki!

5:17 Dung i ro ma alus ni si Daniel mandok tu rajai: Ianggo angka silehonlehonmi tinggal di ho ma i, jala angka siluami tu halak na asing ma basabasahon! Alai anggo surat i sai jahaonku do di rajai, jala pajojoronku tu ibana lapatanna.

5:18 Ia ho, ale rajanami! Nunga nian dibasabasahon Debata na mamunjung * harajaon dohot huaso dohot hahormaton dohot hamuliaon tu si Nebukadnesar, amangmi.

5:19 Jala maradophon huaso na binasabasahonna tu ibana angka hitir do saluhut angka bangso dohot houm dohot halak parpangkuling marragamragam, jala tahuton nasida maradophon ibana. Ai guru lomo ni rohana do mambunu manang ise; jala guru lomo ni rohana do pangoluhon manang ise, jala guru lomo ni rohana do patimbulhon manang ise, jala guru lomo ni rohana do pajepolhon manang ise.

5:20 Alai dung dipatimbo ibana dirina, jala dipajogal rohana, maradu gabe jungkat: Taronjar ma ibana mijur sian habangsa ni harajaonna, jala pesan sian ibana hamuliaonna i;

5:21 Jala dipabali do ibana sian tongatonga ni jolma manisia, jala marroha pinahan do ibana, jala sainganan do ibana dohot angka halode harangan; dilehon do tu ibana duhutduhut panganonna songon lombu, jala marudan marari pamatangna, paima diparhatopot rohana * saguru di Debata na tumimbul i do angka harajaon ni manisia, jala guru lomo ni rohana pabangkithon manang ise manggomgomisa.

5:22 Ia ho, ale Beltsasar, anak ni rajai, laos so dipaserep ho roham, atik pe diboto ho saluhutna i;

5:23 Lam dipatimbul ho dirim mangalo Tuhan sigomgom langit, jala didokkon ho boanon * angka ulaula sian jorona tu jolomi, tole muse minum anggur ho sian i ro di angka ulubalangmu, angka jolmam dohot imbangna, jala dipapujipuji ho debata sileban, angka na sian perak, sere, tombaga, bosi, hau dohot batu, * angka na so marnida, manang marbinege, manang umboto manang aha; alai anggo Debata, pandapotan ni hosami dohot saluhut angka dalanmu, ndang dipasangap ho.

5:24 Dibahen i sian ibana do tartongos ujung ni tanganan, jala tarsurat angka suraton.

5:25 Ia hata ni surat na tarsurat disi on do: Mene Mene, Tekel, Uparsin!

5:26 Jala lapatan ni hata i on do Mene: Nunga dibilang Debata harajaonmi, jala dipesanhon.

5:27 Tekel: Nunga nidasing ho di bagasan timbangan, hape maneangku do ho didapot.

5:28 Peres: Nunga dibagi harajaonmi, jala dipasahat tu halak Madai dohot Persia.

5:29 Dung i ro ma hata ni si Beltsasar mandokkon manolukkon baju dapdap tu si Daniel, jala horunghorung sere tu rungkungna, jala tingtingkonon ni halak taringot tu ibana paboa ibana raja paitolu di bagasan harajaon i.

5:30 Laos di na saborngin i do mate si Beltsasar, raja ni halak Kasdim, dibunu halak.

Daniel 6[patota | patota mualna]

6:1 Dung i sahat ma harajaon i tu si Darius, * halak Madai, uju marumur ibana onompulu dua taon.

6:2 Dung i dihalomohon roha ni si Darius ma pabangkithon saratus duapulu induk parentahon harajaon i, angka na sinagihonna di sandok harajaon i.

6:3 Dipabangkit huhut tolu halak sintuanasida, si Daniel ma sada; asa mardabudabu angka induk i tu nasida, asa unang rajai marharugian.

6:4 Alai ditindi si Daniel ma angka sintua dohot angka induk i marroha, ai tondi na sumurung do di bagasan ibana. Jadi disangkap roha ni rajai ma pabangkithon ibana bahen palumean ni sandok harajaonna i.

6:5 Jadi mangalului sindir ma angka sintua dohot angka induk i dompak si Daniel taringot tu panggomgomina; alai ndang adong sindir jumpang nasida manang hajahaton nanggo sada, ai haposan do ibana, ndang adong jumpang sala manang hajahaton nanggo sada di ibana.

6:6 Dung i ninna angka baoa i ma: Ndang tagamon adong dapot hita sindir nanggo sada dompak si Daniel on, molo so jumpang hita marhite sian patik ni Debatana padapot ibana.

6:7 Dung i dirongom angka induk rap dohot angka sintua i ma rajai, angka didok nasida ma tu ibana songon on: * Sai mangolu ma ho, ale raja Darius ro di salelenglelengna!

6:8 Nunga martuptup saluhut angka induk ni harajaon i, angka pangarajai dohot sintua, angka panuturi dohot partogi, asa dibahen rajai sada patik, jala ditingtingkon oraora, paboa na so jadi manang ise di bagasan tolupulu ari on mangido manang aha, nang tu debata dia nang tu jolma, nda holan tu ho, ale rajanami, ingkon timpalhononhon ibana tu godung parbabiatan.

6:9 Dibahen i ale rajanami, ingkon pahotonmu oraora i jala bahenonmu sada surat, na so tarpauba, * hombar tu uhum ni halak Madai dohot Persia, na so jadi ubaon.

6:10 Dung i didokkon raja Darius ma sahap on surat patik dohot oraora i.

6:11 Ia si Daniel, dung dibege, naung tarsurat surat sisongon i, nangkok ma ibana tu bagasan jabuna, alai adong do jandela angka na talak * tungkan Jerusalem di bagasan bilutna parginjang; jadi * tolu hali di na sadari ibana mangalompit ulu ni totna, laho martangiang dohot mandok mauliate tu Debatana, sandok songon na somal binahenna na sai laon.

6:12 Jadi dirongom angka baoa i ma bagas i, tongon didapot nasida si Daniel martangiang dohot marsomba di jolo ni Debatana.

6:13 Dung i ro ma nasida jumonok, jala mangkatai di jolo ni rajai taringot tu surat oraora i, angka ninna ma: Ale rajanami, nda nunga pola tarsurat sada surat oraora dibahen ho, paboa manang ise na martangiang di bagasan na tolupulu ari on tu manang ise debata manang jolma, dungkon ni tu ho, ale rajanami, ingkon dabuhononhon ibana tu godung parbabiatan? Jadi ninna rajai ma mangalusi: Hot do hata i, hombar tu uhum ni halak Madai dohot Persia, na so jadi ubaon.

6:14 Dung i ninna nasida ma mangalusi rajai: Ia si Daniel, sahalak sian halak Jahudi angka na tarbuang i, ndang parduli ibana nang mida ho, ale rajanami, nang mida surat oraora na tiningtingkonmi; sai tong tolutolu hali di na sadari ibana martangiang.

6:15 Jadi dung dibege rajai hata i, marsak situtu ma rohana, mutu ma rohana mamingkiri taringot tu si Daniel naeng paluaonna ibana, pola ro di hasusundut ni mata ni ari ibana mamingkiri angkal, naeng paluahon ibana nian.

6:16 Dung i dirongom angka baoa i ma rajai, angka ninna ma mandok rajai: Ingkon boto ale rajanami, ia uhum ni halak Madai dohot Persia, molo adong surat oraora manang patik naung pinahot ni rajai, na so tupa be ubaon.

6:17 Dung i didokkon rajai ma boanon si Daniel, jala timpalhononhon tu bagasan godung parbabiatan. Alai ninna rajai huhut mandok si Daniel: Sai dipalua * Debatam na tongtong nioloanmi ma ho!

6:18 Angkupni diboan halak ma sada batu, jala dipeakkon tu baba ni godung i, laos * disahap rajai dohot tintinna, ro di tintin ni angka ulubalangna, asa unang adong na muba manang aha bahenon ni manang ise taringot tu si Daniel.

6:19 Dung i mulak ma rajai laho masuk tu bagasna, laos so mangan sabornginna i, jala ndang diloas piltihon parhinaloan, laos so tarnono do matana.

6:20 Dung i buha siang ari manogotna i, hehe ma rajai, jala hapogan laho mandapothon godung parbabiatan i.

6:21 Jadi dung jonok ibana tu godung i, lungun ma suarana manjou si Daniel; didok rajai ma mandok si Daniel: O Daniel, naposo ni Debata na mangolu i! Beha tarpalua Debata * na tongtong nioloanmi do ho sian angka singa i?

6:22 Dung i ninna si Daniel ma mangalusi rajai: Sai mangolu ma ho, ale rajanami ro di salelenglelengna!

6:23 Disuru Debatangku do * surusuruanna na mangkuntam baba ni * singa i, asa unang ahu dihahua, ala na lidang ahu jumpang di adopanna; di jolomi pe, ale rajanami, ndang huulahon hajahaton nanggo sada.

6:24 Jadi las situtu ma roha ni rajai alani, didokkon ma taiton si Daniel tu ginjang sian bagasan godung i. Jadi ditait halak ma si Daniel tu ginjang sian bagasan godung i gabe * ndang adong mahua agia aha jumpang di ibana, ala marhaposan ibana tu Debatana.

6:25 Dung i didokkon rajai ma, ingkon boanon baoa angka na mangasungkon si Daniel; jadi ditimpalhon ma nasida tu bagasan godung parbabiatan i, ro di anaknasida dohot jolmanasida.Ndang dope tolhas nasida tu pantar ni godung i, nunga ditimbung singa nasida, jala diropuhi saluhut holiholinasida.

6:26 Dung i manongos surat ma raja Darius tu saluhut angka bangso, houm dohot halak parpangkuling marragamragam, angka na maringan di sandok tano on, songon on do hatana: Sai martamba ma di hamu tua!

6:27 Ia tonangku di hamu on do: Ingkon saluhut halak na masuk tu Debata ni si Daniel, ai ibana do Debata na mangolu i jala na tongtong ro di salelenglelengna, harajaonna pe ndang tagamon pesan, jala pamarentana hot do ro di salelenglelengna!

6:28 Ibana do sipalua dohot sipangurupi, jala ibana mambahen tanda dohot halongangan di banua ginjang dohot di atas tano on. Ibana do paluahon si Daniel sian huaso ni singa i.

6:29 Jadi lam marmulia ma si Daniel di bagasan harajaon ni si Darius dohot di bagasan harajaon ni * si Sirus, halak Persia.

Daniel 7[patota | patota mualna]

7:1 Dung i di taon parjolo hinarajahon ni * si Beltsasar, raja sian Babel, diida si Daniel ma nipi sada, mardongan angka pangungkapon ni uluna * di atas podomanna; laos disurathon si Daniel nipi i, dipaboa huhut pangarimpunan ni hatana.

7:2 Dung i ro ma hata ni si Daniel, ninna ma: Tongon ahu marnida bornginna i di bagasan angka pangungkapon, gabe ida ma, borhat masitahaan ma na opat angin ni langit i di atas ni * laut godang.

7:3 Jadi naek ma sian bagasan laut i opat binatang apala na bolon, angka na tandi be marpangalaho.

7:4 Na parjolo i * tudos tu singa, jala marhabong songon pidong raja ualu; sai hupanotnoti do i paima hona butbut angka hatir ni habongna, jala tarhinsat sian tano on, jala diojakkon patna songon jolma, jala dilehon tu ibana * roha jolma.

7:5 Dung i ida ma, binatang na asing, * na paduahon i, tudos do tu sada gompul, jala jongjong di na sambariba, jala tolu rusuk di bagasan babana di holangholang ni ngingina. Dung i ro ma hata ni halak mandok tu ibana songon on: Borhat ma ho, sohali ma juhut i godang!

7:6 Dung i huida muse, gabe ida ma, sada binatang na asing tudos tu babiat rupana, maropat habong ni pidong di atas tanggurungna, jala maropat ulu do binatang i, jala sahat do tu ibana parenta dilehon.

7:7 Dung i huida ma di bagasan angka pangungkapon bornginna i, gabe ida ma, binatang * na paopathon i, mansai jorbut, jala na songkal, jala na gogo sahali, marngingi bosi apala na bolon manohali dohot mangaropropi, jala na teba i diluntakluntak dohot patna. Asing do i huhut sian saluhut binatang angka na di jolona i, jala sampulu tandukna.

7:8 Dung i uju hupanotnoti angka tanduki, gabe ida ma, tubu ma sada tanduk na metmet di holangholangna, gabe mumpat ma binahenna tolu sian angka tanduk parjolo i; jala ida ma, marmata do tanduki songon mata ni jolma, jala marpamangan, na * mangkatahon angka hata jungkat.

7:9 Sai hupanotnoti do i paima * dipajongjong angka habangsa, jala hundul tusi ** ibana na so suda arina. Ia pangkeanna saksak do songon itak, jala obuk ni uluna, songon hapas na binusur, ia habangsana songon jillamjillam ni api, jala * angka rodana songon api na marnalanala.

7:10 * Ruar do sada sunge api, jala mabaor sian adopanna ** marriburibu angka na marsomba tu ibana, jala marloksaloksa tindang di jolona marhaladoi. Dung i tarpansang ma loloan jala * tarbungka angka buku.

7:11 Jadi sai hupanotnoti ma gumodang alani soara ni angka hata na jungkat, angka na hinatahon ni tanduki; sai hubereng i paima tarbunu binatang i, jala pidom pamatangna, jala dipasahat asa purunon tu api.

7:12 Jala tarrampas huhut parenta sian binatang angka na tinggal i, ai nunga * dibuhul tingki dohot jom ni ajalnasida.

7:13 Dung i huida muse di bagasan angka pangungkapon borngin, gabe ida ma, ro sahalak marhitehite ombun di langit i, songon * anak ni jolma, jala sahat ibana tu ibana na so suda arina, jala tarboan ibana tu jolona.

7:14 Jala dibasabasahon ma tu ibana pamarentaon dohot hamuliaon dohot harajaon, jala saluhut bangso, houm dohot halak parpangkuling marragamragam marsomba tu ibana. Ro di salelenglelengna do pamarentaonna, na so tupa munsat sian ibana, harajaonna pe na so tupa pesan do.

7:15 Ia ahu, si Daniel marsak situtu rohangku di bagasan, jala disonggoti angka pangungkapon ni ulungku do ahu.

7:16 Dung i jumonok ma ahu tu * sahalak sian angka na tindang disi, laos hupangido paboaonna tu ahu sintong hahonaan ni saluhutna i. Jadi ninna ibana ma tu ahu, laho pabotohon tu ahu lapatan ni angka hata i:

7:17 Ia binatang na opat i angka na bolon situtu: Opat raja do i, angka na hehe sian tano on sogot.

7:18 Alai anggo harajaon i * angka na badia ni na tumimbul do panahatanna muse, jala hot do di nasida harajaon i ro di salelenglelengna, tongon do ro di salelenglelengna.

7:19 Dung i mangido ma ahu naeng botoongku sintong hahonaan ni binatang na * paopathon i, na tandi martimbangkon donganna sudena, jala na songkal sahali, parngingi bosi, jala parsisilon tombaga, na mamolgahi dohot mangaropuhi, jala pasipasina i diluntakluntak dohot patna.

7:20 Nang taringot tu tanduk na sampulu, angka na di atas uluna, dohot tanduk na sada, na tubu, gabe mumpat tolu tanduk dibahen; dohot taringot tu tanduk na marmata, jala na marpamangan na mangkatahon hata hajungkaton, jala andul do balga ni rupana sian angka donganna i.

7:21 Dung i huida ma * tanduk na sadai mamungka marmusu dompak angka na badia i, jala tunduk nasida dibahen.

7:22 Paima ro ibana na so suda arina, gabe sahat ma panguhumon tu angka nabadia ni na tumimbul, ro dohot tingki paneanan ni angka na badia i di harajaon.

7:23 Dung i ro ma hatana muse mandok songon on: Ia binatang na paopathon i, i ma harajaon paopathon di atas tano on sogot, na tandi marpangalaho martimbangkon saluhut angka harajaon i, jala bondutonna do sandok tano i jala luntakluntahanna, jala pangaropukhononna.

7:24 Ia lapatan ni * tanduk na sampulu i: Hehe do sian harajaon na sasada i sogot sampulu raja; jala di pudi nasida hehe muse sada na asing, na tandi marpangalaho sian angka parjolo i, jala tarjepol do bahenonna tolu raja.

7:25 Jala bursikkononna hatahatana * dompak na tumimbul i, jala rupaanna do angka na badia ni na tumimbul i, jala sangkap on ni rohana paubahon angka tingki dohot uhum; jala sahat tu tanganna nasida, paima salpu * sada tingki dohot dua tingki dohot satonga tingki.

7:26 Dung i tarpansang ma luhutan paruhuman, gabe tarrampas ma huasona, laho mamesanhon dohot mangarotongkon sahat ro di ujung.

7:27 Alai anggo harajaon i dohot parenta on dohot hatimbulon ni harajaon angka na di toru ni sandok langit i, sahat do sogot tu bangso ni angka na badia ni na tumimbul i; harajaon salelenglelengna do harajaonna i, jala saluhut gomgoman, ingkon marsomba dohot mangihuthon tu ibana.

7:28 Sahat ro disi do ujung ni pangkataionna. Ia ahu Daniel, tung na susa situtu huhilala dibahen angka pingkiranku, jala muba situtu rupa ni bohingku, jala hupajop pangkataion i di bagasan rohangku.

Daniel 8[patota | patota mualna]

8:1 Patolutaonhon hinarajahon ni raja Beltsasar, dipapatar muse tu ahu, si Daniel, sada pangungkapon, dung salpu pangungkapon na huida parjolo i.

8:2 Jadi huida ma di bagasan pangungkapon i, uju na tarhinsat tondingku, di huta Susan, na di luat Elam. Dung i huida muse di bagasan pangungkapon i, ahu di topi ni sunge i Ulai.

8:3 Dung i manaili ma matangku, gabe huida ma adong sada birubiru tunggal jongjong di lambung ni sunge i, jala dua do tandukna, jala timbo do angka tanduki, alai tumimbo do na sada sian donganna, jala na tumimbo i tubu parpudi.

8:4 Dung i huida ma birubiru tunggal i manambingi dompak hasundutan, dompak utara dohot dompak dangsina, jala ndang tardopang binatang nanggo sada ibana, manang jolma pe ndang tarpaluasa dirina sian tanganna, jala guru lomo ni rohana do dibahen, gabe dipatimbul dirina.

8:5 Dung i uju ahu mamingkiri pangalahona i, gabe ida ma, ro sada hambing tunggal sian hasundutan manggohi sandok tano on, ndang pola dais anggo patna tu tano; jala martanduk na tongam do hambing tunggal i di holangholang ni matana.

8:6 Dung i sahat ma ibana mandapothon birubiru tunggal i na mardua tanduki, na huida na jolo jongjong di lambung ni sunge i, laos di dorong ma ibana mangasahon parpiarpiar ni hagogoonna i.

8:7 Dung i huida ma ibana sahat tu lambung ni birubiru tunggal i, jala sobu situtu ibana maralo tusi, laos ditambingi birubiru tunggal i, jala diupokkon tandukna duansa; jala ndang be margogo birubiru tunggal i mandopang ibana, laos ditimpalhon ibana tu tano, jala diluntakluntak, jala ndang adong nanggo sahalak na tarbahen paluahon birubiru tunggal i sian tanganna.

8:8 Dung i timbul sahali ma hambing tunggal i. Jadi dung sungkot hatimbulonna i, upok ma tanduk na balga i, gabe tubu ma muse apala di haupohanna * opat tanduk angka na tongam, tungkan na opat desa ni langit i.

8:9 Jala sian sada angka tanduki, ruar * sada tanduk na metmet, na manjadi balga, tungkan dangsina dohot tungkan habinsaran dohot * tungkan tano na badia i.

8:10 Jadi lam timbul do i sahat ro di parangan angka na di langit, jala direongkon tu tano deba sian parangan i dohot sian angka bintang, laos diluntakluntak do i.

8:11 Pola tung sahat ro di * induk ni parangan i dirinai dipatimbo, jala * dirampas sian ibana pelean ariari, jala inganan ni habadiaonna diparobo do.

8:12 Pola sahat tu tanganna parangan i mangalo pelean ariari marhitehite pambahenan na sogir, jala ditimpalhon hasintongan i tu tano, dibahen pe songon i laos marantu do ibana.

8:13 Dung i hubege ma mangkuling sahalak na badia, jala didok sahalak na badia na asing tu ibana na mangkulingi: Sahat ro di sadia leleng do pangungkapon i taringot tu pelean ariari dohot taringot tu pambahenan na sogir na mangago, tung pola dipasahat inganan na badia i dohot parangan i, asa diluntakluntak halak?

8:14 Jadi ninna ibana ma tu ahu: Pola do gok dua ribu tolu ratus ari, dung salpu i urason ma muse inganan na badia i.

8:15 Jadi uju ahu, Daniel, marnida pangungkapon i dohot mangalului lapatanna, gabe ida ma, jongjong di jolongku sada songon rupa ni baoa idaon.

8:16 Dung i hubege ma suara ni jolma sian bariba ni sunge Ulai na joujou mandok: Ale * Gabariel! Pajojor ma lapatan ni pangungkapon i tu halak on!

8:17 Dung i ro ma ibana jongjong tu lambungku, jadi di na ro ibana tarsonggot ma ahu laos * manungkap tu tano Dung i ninna ibana ma tu ahu: Tangkas ma parateatehon, ho ale anak ni jolma i, ai marhahonaan tu tingki di ujung do pangungkapon i.

8:18 Dung i uju mangkatai ibana dohot ahu gonggong ma ahu manungkap tu tano. Jadi dijama ibana ma ahu, laos dipajongjong ahu muse di hajongjonganki hian.

8:19 Dung i ninna ibana ma: Ida ma, ahu naeng pabotohon tu ho, manang aha na masa sogot, di ujung ni parpiarpiar ni rimas i, ai marhahonaan tu tingki di ujung do pangungkapon i.

8:20 Ia birubiru tunggal na niidam, partanduk siduadua i, i ma angka raja ni Madai dohot Persia.

8:21 Ia hambing tunggal na marimbulu i, i ma raja sian tano Junani; jala tanduk na bolon na di holangholang ni matana na dua i, i ma raja parjolo.

8:22 Alai na upok i tanduki, jala jongjong muse opat singkatna, i ma opat harajaon na tubu sian bangso i, alai ndang songon gogo ni parjolo i.

8:23 Jala di ujung ni harajaonnasida i, molo sun lamun halak parjahat, hehe ma sada raja parbohi na horas, jala na pantas marhulingkulingan.

8:24 Tung na timbul do gogona, alai ndada marhitehite gogona sandiri; tung na sumalin do pangagona, jala marantu ibana di na binahenna i; jala agoonna do jolma angka na marhuaso dohot bangso ni angka na badia.

8:25 Jala marhitehite angkalna manjadi do sipaotooto binahen ni tanganna i; jala patimbotimboonna dirina di bagasan rohana, jala torop halak agoonna * so pangkirimanna. Hehe ibana huhut mangalo raja ni angka raja; hape pidom do ibana muse, ndang marhitehite tangan.

8:26 Ia pangungkapon taringot tu bodari manogot naung taringoti, hasintongan do i; ia ho * sahapi ma pangungkapon i, ai * marhahonaan tu sogotsogot ni ari do i.

8:27 Ia ahu Daniel mandate jala marsahit pola nania leleng. Dung i hehe ma ahu muse, jala huula ulaon ni rajai, alai tarhalomong do ahu taringot tu pangungkapon i, jala ndang adong manang ise na pajojorhon.

Daniel 9[patota | patota mualna]

9:1 Di taon parjolo hinarajahon ni * si Darius, anak ni si Serses, sian pinompar ni halak Madai, na bangkit raja gumomgom harajaon ni halak Kasdim.

9:2 Di taon parjolo hinarajaonna i dapot ahu, Daniel, ma di bagasan angka surat bilangan ni taon, angka na nilumbahon ni Jahowa tu panurirang Jeremia: Ingkon * boho pitupulu taon lelengna Jerusalem tarulang.

9:3 Dung i manaili ma ahu tu Tuhan Debata laho marsombahon tangiang dohot parhurajaion, mardongan parpuasaon marpangkean tangki dohot sirabun.

9:4 Dung i martangiang ma ahu tu Jahowa Debatangku, ningku ma manopoti dosa: Iale Tuhan, ho do Debata na tumimbul, jala na songkal * na mangkajongjongkon parjanjian dohot asi ni roha tu angka na holong roha mida ho dohot tu angka na mangaradoti angka uhummu.

9:5 Nunga mardosa hami, jala nunga marsala hami, nunga manjahati hami huhut manggunturi, nunga manimbil hami sian angka patikmu dohot sian angka uhummu.

9:6 Jala ndang hutangihon hami naposom, angka panurirang i, angka na marsipaingot marhitehite goarmu tu angka rajanami, angka induknami, angka ompunami dohot tu sandok bangso ni luaton.

9:7 Ho do, ale Tuhan, nampuna hatigoran, alai anggo di hami hailaon ni bohi do rasirasa sadarion, di angka baoa sian Juda dohot di pangisi ni Jerusalem dohot di sandok Israel, angka na jonok dohot angka na holang, di saluhut luat haambolongannasida binahenmi, ala ni hajahatonnasida, na manjahati i nasida dompak ho.

9:8 Iale Tuhan! Na tama do hami marhaurahon, angka rajanami pe, angka induknami dohot * ompunami, ala naung mardosa hami dompak ho.

9:9 Alai anggo * ho Tuhan Debatanami, ho do nampuna asi ni roha dohot angka pamuation, ai nunga manggunturi hami dompak ho.

9:10 Jala ndang hutangihon hami suara ni Jahowa Debatanami, asa marparange nian di bagasan patikna, angka na pinatolhasna tu hami marhitehite pamangan ni angka panurirang, naposona i.

9:11 Tongon tahe, tung sandok Israel nunga mangalaosi patikmu jala marbalik, ndang ditangihon suarami, jadi manginona ma tu hami torutoru dohot uari na tarsurat di bagasan * patik ni si Musa, naposo ni Debata, ala naung mardosa hami dompak ibana.

9:12 Dung i dihajongjongkon ibana ma hatana angka na nilumbahonna tu hami dohot tu panguhum, angka na manguhum hami, parohon tu hami jea bolon na so dung dumatang di toru ni sandok langit, songon na masa nuaeng tu Jerusalem.

9:13 Hombar tu na tarsurat di bagasan patik ni si Musa, songgop saluhut jea i tu hami. Hape laos so martangiang hami mamuati muruk ni bohi ni Jahowa Debatanami, laho paubahon rohanami sian hajahatonnami nian, dohot marateatehon hasintonganmi.

9:14 Dibahen i * dungo do Jahowa taringot tu jea i, jala dipasonggop tu hami, ai na tigor do Jahowa Debatanami, taringot tu saluhut pambahenanna, angka na binahenna, hape laos so hutangihon hami suarana.

9:15 Ia nuaeng, ale Tuhan Debatanami, ho do naung manogihon ruar bangsom na jolo sian tano Misir marhitehite tangan na gogo, dohot mambahen barita di goarmu rasirasa sadarion, mardosa do anggo hami, jala manjahati.

9:16 Iale Tuhan, ala ni saluhut hatigoranmu, sai pasurut ma rimasmu dohot parpiarpiar ni murukmu sian Jerusalem hutam i, dolok habadiaonmu, ai binahen ni dosanami dohot binahen ni hajahaton ni angka ompunami, umbahen manjadi haurahon Jerusalem dohot bangsomi di saluhut halak na humaliang hami.

9:17 On pe ale Debatanami! Sai tangihon ma tangiang ni naposom dohot hoihoina i, jala * bahen ma marsinondang bohim di atas ni inganan habadiaonmu naung tarulang i, ala ni Tuhan i.

9:18 Sai paeleng ma pinggolmu, ale Debatangku, jala tangihon, sai tonggor ma matam jala ida ma hamamagonami dohot huta i naung targoar tu goarmu! Ai ndada * mangasahon hatigorannami hami, marsombahon hoihoinami tu jolo ni bohim, mangasahon asi ni roham angka na godang i do.

9:19 Ale Tuhan, sai tangihon ma! Ale Tuhan, sai marpamuati ma roham! Ale Tuhan, sai parateatehon ma i, jala patupa, unang pangernger ala ni dirim, ale Debatangku, ale naung targoar * goarmu di atas ni hutam dohot bangsom.

9:20 Jadi uju mangkatai dope ahu dohot martangiang dohot manopoti dosangku, nang dosa ni bangsongku Israel, jala marsombahon sombasombangku tu jolo ni Jahowa Debatangku mangondihon dolok habadiaon ni Debatangku.

9:21 Tongon uju mangkatai dope ahu di bagasan tangiang, ro baoa na huida na jolo di bagasan pangungkapon i, i ma * Gabariel, habang mansai doras mandapothon ahu marhira tingki pelean bodari.

9:22 Dung i mangkuling ma ibana mangajari ahu, ninna ma: Ale si Daniel, apala ipe ahu borhat pabotohon tu ho pangantusion!

9:23 * Di mula ni partangiangonmi ruar hata pangungkapon i, pola ro ahu pabotohonsa tu ho, ala jolma hasudungan ni roha ho. Antong timbangi ma hata i, jala parateatehon pangungkapon i.

9:24 Nunga pola binuhul pitupulu taon minggu taringot tu bangsom, dohot taringot tu hutam na badia i, laho pasunhon hajahaton dohot manggohi angka dosa, asa mambahen pardengganan taringot tu hajahaton, jala parohon hatigoran salelenglelengna, jala tarsahap pangungkapon dohot panurirangon, jala na miniahan na badia i sahali.

9:25 Antong boto ma i, jala parateatehon: Olat ni na ruar i hata i, ingkon ulahan paulion Jerusalem, sahat ro di na miniahan, pangarajai i, pitu minggu dohot onompulu dua minggu lelengna; suang ma ulahan paulion huta i maralaman jala marlombang humaliang, atik pe angka tingki hagogotan situtu.

9:26 Jadi dung salpu na onompulu dua minggu i, marutang hosa ma na miniahan, alai ndada ala dirina. Dung i ro ma bangso ni sada raja mangago huta i dohot inganan na badia i, gabe ujungna di bagasan pasang naek; jala sahat ro di ujungna sai masa do

9:27 Dung i patoguonna ma parjanjian tu torop halak leleng ni na saminggu; jala satonga minggu i pasohotonna ma pelean sipotongon dohot pelean sipanganon, jala masa * hinasingkop ni na so uhum di inganan na badia i, dipamasa angka sipangago, paima taruse hasiapon dohot hamagoan tu sipangago i.

Daniel 10[patota | patota mualna]

10:1 Patolutaonhon hinarajahon ni * si Sirus, raja sian Persia, ro sada hata pangungkapon tu si Daniel na marimbang goar * si Beltsasar, jala hasintongan do hata pangungkapon i, jala boaboa ni parporangan bolon do i. Jadi diparateatehon ibana ma hata i, jala dapot rohana lapatan ni pangungkapon i.

10:2 Di angka ari uju i, sai marhohondo si Daniel, pola tolu minggu lelengna.

10:3 Ndang hupangan sagusagu hasudungan, lompan pe dohot anggur, ndang apus tu pamanganku, ndang dung humiahi ahu, paima gok ari ni na tolu minggu i.

10:4 Tole muse paduapuluopatarihon di bulan sipaha sada, uju ahu di topi ni aek godang, i ma batang aek * Hidekel.

10:5 Jadi manaili ma matangku, gabe huida ma * sada baoa na marpangkean hori, jala marhohos sere sian Upas di gontingna.

10:6 Ia dagingna songon mata intan tarsis, jala bohina songon rupa ni hilap, jala matana songon api na marnalanala, jala botohonna dohot patna songon sillam ni tombaga na ginarahon, jala suara ni hatana songon pardorom ni ronggur.

10:7 Alai sasada ahu, si Daniel, marnida pangungkapon i; ianggo baoa angka na di lambungku, ndang diida nasida pangungkapon i, panonggoti bolon do madabu tu atasnasida, gabe maporus nasida laos martabuni.

10:8 Alai tading do anggo sasada ahu, huhut paberengbereng pangungkapon godang i, pola ndang adong be tading gogo di bagasan ahu huhilala, jala mimbar do saudarangku, gabe marlangan, jala ndang be margogo ahu.

10:9 Dung i hubege ma suara ni hatana, jadi dung hubege suara ni hatana i, * gabe gonggong ahu laos manungkap tu tano.

10:10 Jadi ida ma, adong sada tangan manjama ahu, jala dihutoli ahu pahehe ahu mangondolhon ulu ni tothu dohot palak ni tanganku duansa.

10:11 Dung i ro ma hatana tu ahu: Ale Daniel, * baoa hasudungan ni roha! Sai parateatehon ma hata angka sipaboaonku tu ho, jala jongjong ma ho di hajongjonganmi! Ai apala ipe ahu disuru manopot ho. Jadi uju dihatahon hata i tu ahu, angka dotdot do ahu jongjong.

10:12 Dung i ro muse ma hatana tu ahu: Unang ho mabiar, ale Daniel! Ai olat ni ari parjolo uju marsangkap roham naeng antusanmu, jala dipaunduk ho roham di adopan ni Debatam, nunga ditangihon angka hatami, jala ala ni angka hatami do umbahen na ro ahu.

10:13 Hape ro ma induk ni harajaon Persia mandopang ahu, pola duapulu sada ari lelengna. Jadi ida ma, ro ma Mikhael, sada sian angka induk parjolo manolongi ahu; jadi monang ma ahu maradophon angka raja ni Persia.

10:14 Ro pe ahu nuaeng, naeng * mangajari ho do taringot tu na masa sogot, di ujung ni angka ari tu bangsom; ai * marhapatean tu angka ari sogot do pangungkapon i.

10:15 Jadi uju dihatahon ibana angka hata i tu ahu, manungki ma bohingku tu tano huhut hohom ahu.

10:16 Dung i ida ma, sada halak tudos tu rupa ni jolma * manjama bibirhu, laos hubuha ma pamanganku, jala hudok tu halak na jongjong di jolongku: Ale tuan, binahen ni pangungkapon i gabe tubu sahithu, jala ndang be margogo ahu.

10:17 Jadi tung beha ma pambahen ni naposo ni tuangku mangkatai dohot tuangku! Ia ahu tung na so adong be gogongku olat nion, jala ndang adong be hosa tading di bagasan ahu.

10:18 Dung i diulahi ibana, na tudos tu rupa ni jolma idaon manjama ahu, jala dipargogoi ahu.

10:19 Ro huhut hatana mandok: * Unang ho mabiar, ale baoa hasudungan! Dame ma di ho! Pos ma roham, pir ma tondim! Jadi uju mangkatai ibana tu ahu, dapotan gogo ma ahu, laos hudok ma: Antong didok tuangku ma hatana, ai nunga dipargogoi ho ahu.

10:20 Dung i ninna ibana ma: Atehe, diboto ho do manang aha na huharohon nuaeng manopot ho? On pe mulak ma ahu laho marporang tu * induk sian Persia; ia dung borhat ahu, ida ma, ro ma soluk induk sian halak Junani.

10:21 Alai tahe pabotohononku ma tu ho angka na tarsurat di bagasan buku hasintongan. Hape ndang adong nanggo sahalak donganku mangalo dompak angka nasida i, nda holan Mikhael, indukmuna i.

Daniel 11[patota | patota mualna]

11:1 Di taon parjolo hinarajahon ni si Darius sian Madai pe, laos ahu do donganna laho margogoihon dohot mambahen marsihohot rohana.

11:2 Nuaeng pe, hata hasintongan ma * paboaonku tu ho: Ida ma, hehe dope tolunari raja di Persia, jala na paopathon i maruli hamoraon godang situtu tumindi saluhutna. Alai ia dung marhuaso ibana binahen ni hamoraonna i, patubionna ma saluhutna mandopang harajaon ni halak Junani.

11:3 Dung i hehe ma sada raja na begu, jala na gomos situtu marpangarajaion, jala guru lomo ni rohana di bahenonna.

11:4 Alai ia dung manimbukbuk sangapna mabola ma harajaonna i * bagi opat, mangihuthon na opat desa ni langit i; alai ndada tu pinomparna, jala ndada tudos tu harajaonna manang panggomgomina, tung butbutanna do harajaonna i, jala sahat tu halak na asing, papulik nasida.

11:5 Dung i lam naek sorga ma raja di dangsina; alai gumogo muse sahalak sian angka wakilna, asa laos ibana soluk mangarajai, tung harajaon bolon do gomgomanna i.

11:6 Alai di laonlaon ni ari martondong ma nasida, ai ro ma boru ni raja sian dangsina manopot raja di utara, asa mambahen hasunan nian. Alai ndang tartogarsa gogo ni botohon, jala ndang manahan jongjong nang amana dohot huasona i; tung ibana sandiri do sahat tu hamatean ro di angka na pataru nasida, ro di ama pangintubu di nasida dohot ibana na pasangaphon nasida na sai laon.

11:7 Dung i hehe ma sada halak sian tumbur ni uratna manoluk ingananna; jadi ro ma ibana mardongan parangan, pola soluhonna huta na gonting ni raja sian utara, jala dopangonna nasida, laos papatuaonna.

11:8 Nang angka ajiajiannasida, rap dohot ganaganaannasida angka na tinompa ro di angka ulaula, hasudungan ni rohanasida, sian perak dohot sian sere, tarboan do tu Misir; dung i nania leleng ibana manahan jongjong mandopang raja sian utara.

11:9 Ia dung disola ibana harajaon ni raja sian dangsina, ingkon mulak boti ibana tu tanona.

11:10 Alai anggo angka anakna mangkontas tu hamusuon dohot papunguhon torop angka parangan marhoronhoron. Dung i ro ma sahalak sian nasida mangalantap songon aek magodang dohot mandorongi; mulak muse ibana, laos marporang nasida sahat ro di hutana na gonting i.

11:11 Dung i manggusar ma raja sian dangsina, laos borhat jala tole marmusu dompak ibana, dompak raja sian utara; paheheonna ma deak parangan marhoronhoron, gabe sahat tu tanganna do angka parangan ondeng.

11:12 Ia dung borhat angka parangan i, ganda ma habeguonna, gabe marloksaloksa halak marragean dibahen, alai ndang tamba ni antuna.

11:13 Ai ulahan ni raja sian utara ma pahehe sada parduaan parangan, tumorop sian parjolo i; dung i marhira dapot ujung ni angka tingki, ulahanna ro ganup taon, mardongan parduaan parangan bolon dohot parhohas godang tu hamusuon.

11:14 Alai di angka tingki uju i, hehe ma torop halak dompak raja sian dangsina, anak ni bangsom pe, angka na jungkat marroha, manggunturi do naeng pasintong alatan, hape tardapot do nasida.

11:15 Dung i ro ma raja sian utara, jala bahenonna hubu martungkum dohot papatu huta sada na gonting. Botohon ni raja sian dangsina pe, ndang manahan, ro di bangso angka na pinillitna, tung na so margogo do mangalo.

11:16 Jadi bahenon ni na ro dompak ibana ma guru lomolomo ni rohana, jala ndang adong nanggo sahalak manahan maradophon ibana. Solaonna ma dohot * tano bagabaga i, jala sun siap do i bahenon ni tanganna.

11:17 Dung i diondam rohana ma naeng ro manguluhon huaso ni sandok harajaonna, jala dipaula naeng mambahen parjanjian tu ibana dohot mangalehon boruna bahen jolmana laho mangago nian; alai ndang tulus manang manjadi tahina i.

11:18 Dung i tujuon ni bohina ma dompak angka pulo, jala torop papatuonna disi, alai pasohoton ni sada ulubalang ma insahinsakna, tung marsibalik tu ibana do insahinsaknai bahenonna.

11:19 Dung i tujuon ni bohina muse dompak huta angka na gonting i ndang be jumpang ibana.

11:20 Dung i hehe ma sada halak singkatna, na paborhat sada halak sipapungu guguan mangasahon hamuliaon ni harajaonna i, alai ndang piga dan suda ajalna i; ndada binahen hamuruhon manang hamusuon.

11:21 Dung i bangkit ma sada halak gambalgambal singkatna, ndang nian pinampe tu ibana jujungan harajaon i, gabe ro ibana so pangkiriman mangalaum harajaon i marhitehite elaela.

11:22 Jadi mabaor ma maradophon ibana parangan angka na mangalantapi, laos dipidomhon do, nang sahalak induk ni parjanjian i.

11:23 Dung i olat ni parjanjian i tu ibana bahenonna ma sipaotooto; laos nangkok do ibana, jala monang marhitehite otik jolma.

11:24 Tung na so pangkiriman do dirampok bagian ni tano apala na lunak i, jala bahenonna na so dung binahen ni amana, manang ompuna, reongkononna do tabantaban dohot sintahan dohot sinamot tu tongatonganasida, jala dompak angka huta na gonting do sangkapsangkap ni rohana, sahat ro di tingki naung binuhul hian.

11:25 Dung i paheheonna ma paranganna dohot rohana marporang dompak raja sian dangsina mardongan parduaan ni parangan mansai godang. Raja sian dangsina pe antong manggusar do tu hamusuon mardongan parangan mansai torop, jala na begu situtu. Alai ndang tagamon manahan ibana, ai sangkap jehejehe disangkapi nasida dompak ibana.

11:26 Gari halak na manganhon indahanna padapot ibana, gabe lumindak paranganna, jala marragean mansai torop.

11:27 Jala roha ni raja na dua i, rap marsatahi mambahen hajahaton, jala rap di lambung ni sada meja nasida mangkatahon gabus; alai ndang tagamon manjadi, ai anggo hasunan i tu tingki na asing dope binuhul.

11:28 Dung i mulak ma ibana tu tanona mamboan arta mansai godang, jala rohana mangalo dompak parjanjian na badia i; dung saut dipatulus, mulak ma ibana tu tanona.

11:29 Jumpang muse tingki na binuhul i, mangulahi ibana muse borhat dompak dangsina, alai ndang songon antuna di na borhat parjolo borhatna parpudi i.

11:30 Ai ro do angka hopal sian * Kitim mangalo ibana, gabe godoron ibana laos mulak; jadi dipapuas ma murukna dompak parjanjian na badia i, jala dilaluhon; dung i muli ma ibana, jala marsatahi dohot halak angka na manadingkon parjanjian na badia i.

11:31 Dung i hehe ma sian paranganna, angka na paramun inganan na badia i dohot huta na gonting i, laos pasohotonna ma dohot pelean ariari, jala patindangonna * hasogiron ni sipangago i.

11:32 Jala halak na manjahati dompak parjanjian i, apoanna do marbalik marhite sian hata elaela; alai anggo bangso angka na tumanda Debatana, patodosonna ma rohana laos marsihohot.

11:33 Jala * halak angka na pantas marroha sian bangso i, marrohaihon torop halak; alai marragean do nasida binahen podang dohot jilam ni api, binahen ni hurungan dohot pamupusion manang piga ari lelengna.

11:34 Jala di hararagenasida maruli panolongion siotihotik nasida; alai torop halak marpangansi paihuthon nasida.

11:35 Nang sian halak angka na pantas marroha, marragean do deba, manguji rohanasida, papitahon dohot paiashon sahat ro di tingki panimpuli. Ai ingkon masa dope songon i ro di tingki naung binuhul hian.

11:36 Jala guru lomo ni rohana bahenon ni rajai, jala * patimbotimboonna dirina, mangastaasta dompak luhut angka debata. Gari dompak Debata ni angka debata, * dohononna do hata jungkat mangasapasapi, jala marantu do ibana paima sun tolhas rimas i; ai manang aha naung binuhul hian, ingkon saut do.

11:37 Ndang pardulina nang debata ni angka ompuna; * hinauli ni angka parompuan pe, manang debata dia pe ndang pardulina tung saluhutna do diastaasta rohana.

11:38 Alai anggo * debata pandingini di huta, angka na gonting pasangaponna do di hajongjonganna, jala debata na so tinanda ni ompuna pasangaponna do marhitehite sere, perak, batu intan dohot angka arta hasudungan ni roha marragamragam.

11:39 Jala bahenonna do tu huta angka na gonting i, suang songon na binahenna tu debata sileban i: Manang ise na mangolophon ibana pagandaonna ma hamuliaon tusi, jala pabangkitonna nasida mangarajai torop halak, jala bagihononna tano i bahen upanasida.

11:40 Alai anggo di tingki marhira jumpang ujungna, masijonapan ma ibana dohot raja sian dangsina. Jadi dorongon ni raja sian utara ma ibana marhitehite hureta, angka jolma parsihundul dohot torop angka hopal, laos solaonna ma angka luat i, jala lantapanna laos binsat.

11:41 Tolhas muse ibana tu * tano bagabaga na marmulia i, jala marloksaloksa halak marragean bahenonna; alai malua do sian tanganna ianggo angka on: Edom dohot Moab dohot angka parjolo ni halak Amon.

11:42 Dung i surdukkononna ma tanganna tu angka luat, tano Misir pe ndang tagamon malua.

11:43 Jala guru dok na do angka arta sian sere dohot sian perak, ro di saluhut arta hasudungan ni Misir; halak Kub pe dohot Kus mangihuthon angka bogasna.

11:44 Alai tarsonggot do ibana bahenon ni barita angin, angka sian habinsaran dohot sian utara; jadi borhat ma ibana marmurukmuruk situtu naeng mangago dohot mangarendephon torop halak.

11:45 Dung i pagohononna ma angka undungundung ni harajaonna di holangkolang ni dua laut, mardonokkon dolok inganan ni habadiaon na marmulia i; hape jumpang ma ajalna, jala ndang adong nanggo sahalak mangurupi ibana.

Daniel 12[patota | patota mualna]

12:1 Dung i di tingki uju i, hehe ma * Mikhael, induk na balga i, na hehe humongkop angka anak ni bangsom. ** Jadi masa ma tingki hagogotan na so dung dumatangi, olat ni dung adong bangso sahat ro di tingki panimpuli; alai apala di tingki na sasada i ma malua bangsom, luhut angka na jumpang * tarsurat di bagasan pustaha hangoluan.

12:2 Jala torop sian halak na modom di bagasan orbuk ni tano i, tarsunggul sogot: * Na deba tu hangoluan salelenglelengna, na deba tu haurahon marragamragam, gabe biasbias salelenglelengna.

12:3 Jala halak angka na pantas marroha, * marsinondang sogot songon sondang ni langit, jala * nasida angka na manogunogu torop halak tu hatigoran, marsinondang sogot songon bintang ro di salelenglelengna.

12:4 Ia ho, ale Daniel! Tabunihon ma angka hata i, jala * sahapi pustaha i, paima jumpang tingki panimpuli; jadi torop halak manulingkit hata i, gabe tamba situtu parbinotoanna.

12:5 Dung i marnida ma ahu, Daniel, gabe ida ma, jongjong disi dua halak na asing, na sada di baribaon ni batang aek i, na sadanari di baribana i.

12:6 Dung i ro ma hata ni na sada mandok tu baoa * na marpangkean hori, na jongjong di atas aek ni batang aek i; sadia leleng on asa jumpang ujung ni angka halongangan on?

12:7 Dung i hubege ma suara ni baoa na marpangkean hori, na jongjong di atas aek ni batang aek i, laos * dipatoltol ma tanganna siamun dohot hambirang dompak banua ginjang, asa marmangmang ibana tu ibana na mangolu salelenglelengna: Ingkon jolo salpu * sada tingki, dua tingki dohot satonga tingki naung binuhul hian, jala dung pe sohot parserahan ni pasipasi sian bangso na badia i, ipe asa marujung saluhutna i.

12:8 Jadi hubege do nian hata i, alai ndang dapot rohangku, gabe ningku ma: Ale tuangku, aha do apala ujung ni saluhutna i?

12:9 Alai ninna ibana ma: Laho ma ho, ale Daniel! Ai ingkon buni jala tarsahap angka hata i sahat ro di tingki panimpuli.

12:10 Ingkon torop halak taruras sogot, jala na pinapita jala angka na niuji. Tongtong do manjahati anggo halak parjahat hian, jala ndang dapotan roha luhut halak parjahat i; alai anggo halak na marroha i antusanna ma i.

12:11 Jala olat ni tingki pansadian ni pelean ariari sahat ro di tingki pajongjongonna * hasogiron ni sipangago i saribu duaratus siapulu ari do.

12:12 Martua ma manang ise na manaonnaon, jala sanga dieak salpu ni saribu toluratus tolupulu lima ari.

12:13 Alai anggo ho, ale Daniel! Laho ma ho, marroha pangkirimon di ujung, jala maradian ma ho, asa hehe ho muse manjalo partohapanmu di ujung ni angka ari!