Buku Haggai

Haggai ᯂᯎ᯲ᯎᯤ 1

1:1 Paduataonhon dung bangkit raja si Darius, di artia di bulan sipahaonom ro ma hata ni Jahowa marhite sian pamangan ni panurirang Haggai tu si Serubabel, anak ni si Sealtiel pangarajai di Juda, dohot tu sintua ni malim, Josua anak ni si Josadak, songon on: ᯇᯑᯮᯀᯖᯀᯉᯬ᯲ᯂᯉᯬ᯲ ᯑᯮᯰ ᯅᯰᯄ᯦ᯖᯪ᯲ ᯒᯐ ᯘᯪ ᯑᯒᯪᯀᯘᯮ᯲ ᯑᯪ ᯀᯒ᯲ᯖᯪᯀ ᯑᯪ ᯅᯮᯞᯉ᯲ ᯘᯪᯇᯂ ᯀᯬᯉᯔᯬ᯲ ᯒᯬ ᯔ ᯂᯖ ᯉᯪ ᯐᯂᯬᯋ ᯔᯒ᯲ᯂᯪᯖᯩ ᯘᯪᯀᯉ᯲ ᯇᯔᯝᯉ᯲ ᯉᯪ ᯇᯉᯮᯒᯪᯒᯰ ᯂᯎ᯲ᯎᯤ ᯖᯮ ᯘᯪ ᯘᯩᯒᯮᯅᯅᯞᯩ᯲ ᯀᯉᯄ᯦᯲ ᯉᯪ ᯘᯪ ᯘᯩᯀᯞ᯲ᯖᯪᯀᯞᯩ᯲ ᯇᯝᯒᯐᯤ ᯑᯪ ᯐᯮᯑ ᯑᯬᯂᯖᯬ᯲ ᯖᯮ ᯘᯉᯪ᯲ᯖᯮᯀ ᯉᯪ ᯔᯞᯔᯪ᯲ ᯐᯬᯘᯮᯀ ᯀᯉᯄ᯦᯲ ᯉᯪ ᯘᯪ ᯐᯬᯘᯑᯄ᯲ ᯘᯬᯝᯉᯬ᯲ ᯀᯉᯬ᯲

1:2 Boti do hata ni Jahowa Zebaot: Bangso on mandok: Ndang dope ro tingkina, asa paulion joro ni Jahowa.

1:3 Dung i ro ma hata ni Jahowa marhite sian pamangan ni panurirang Haggai songon on:

1:4 Alai nunga jumpang huroha anggo tingkimuna mangingani bagasmuna, angka na ginorga, hape anggo joro on tarulang do dipasombu hamu?

1:5 On pe songon on do hata ni Jahowa Zebaot: Parateatehon hamu ma dalanmuna nasailaon.

1:6 * Godang do disabur hamu, alai otik do parbuena; mangan do nian hamu, alai ndang bosur; minum do nian hamu, alai ndang sombu uasmu, marulos do nian hamu, alai ndang las dagingmu; mangomo pe manang ise, mangomo tu puro na matombuk do.

1:7 Dibahen i songon on do hata ni Jahowa Zebaot: Parateatehon hamu ma dalanmuna nasailaon i.

1:8 Nangkohi hamu ma dolok jala manaru hau ma hamu, jala pauli hamu joro i, asa marlomo ni roha ahu disi, jala marsangap ahu, ninna Jahowa.

1:9 Godang do dirambang rohamuna, hape ida ma, gabe i do paotikkon, diboan hamu do i nian masuk tu jabu, hape hupurpurhon do i. Ala ni aha umbahen songon i ninna Jahowa Zebaot: Ala ni jorongku na tarulang do i, hape ganup hamu mansiluhon bagasna be.

1:10 Ala ni umbahen * ditiopi langit i nambur di atas hamu, jala tano i maniopi gogona.

1:11 Jadi * nunga hudokkon logo ni ari sinanggarnanggar ro tu tano on dohot tu angka dolok dohot tu eme dohot tu tuak dohot tu miak dohot tu nasa na tinubuhon ni tano i, dohot tu jolma dohot tu pinahan dohot tu nasa na niungkit ni tangan.

1:12 Jadi ditangihon si Serubabel, anak ni si Sealtiel dohot sintua ni malim Josua, anak ni si Josadak dohot sandok pasipasi ni bangso i soara ni Jahowa Debatanasida i, ditangihon dohot hata ni panurirang Haggai, hombar tu parsuru ni Jahowa Debatanasida i di ibana, jadi mabiar ma bangso i maradophon Jahowa.

1:13 Dung i didok si Haggai, * suruan ni Jahowa patolhashon tona ni Jahowa tu bangso i, songon on: * Ahu do donganmuna, ninna Jahowa.

1:14 Jadi disunggul Jahowa ma tondi ni si Serubabel anak ni si Sealtiel, pangarajai sian Juda dohot tondi ni sintua ni malim Josua, anak ni si Josadak, dohot tondi ni sandok pasipasi ni bangso i, gabe ro be nasida mangaradoti ulaon di bagas ni Jahowa Zebaot, Debatanasida i.

1:15 Di anggara ni mate di bulan paionom, paduataonhon dung bangkit raja si Darius.

Haggai 2

2:1 Paduapulu sada arihon di bulan sipaha pitu, ro ma hata ni Jahowa marhite sian panurirang si Haggai, songon on:

2:2 Ua dok ma tu si Serubabel, anak ni si Sealtiel, pangarajai sian Juda dohot tu sintua ni malim Josua, anak ni si Josadak, dohot tu pasipasi ni bangso i, songon on:

2:3 Ise dope sian hamu na mangolu, angka na sanga marnida joro on di * hamuliaonna parjolo i? Hape aha diida hamu disi anggo nuaeng? Nda hira na soada do dietong rohamuna martimbangkon parjolo i.

2:4 On pe, ale Serubabel, pir ma tondim ninna Jahowa; pir ma dohot tondim ale sintua ni malim Josua, anak ni si Josadak; pir ma dohot tondim sandok bangso ni tano i, ninna Jahowa, jala datdati hamu mangula, ai ahu do donganmuna, ninna Jahowa Zebaot.

2:5 I ma * hata na hupadanhon i tu hamu di haruruarmuna sian Misir, nang: * Tondingku marsihohot do jongjong di tongatongamuna; unang hamu mabiar!

2:6 Ai songon on do hata ni Jahowa Zebaot: Saotiknari nama * ulahanku ma mangkuturi langit dohot tano dohot laut ro di darat.

2:7 Huturonku ma dohot saluhut angka bangso parbegu, jadi ro ma hasudungan ni roha ni saluhut angka bangso parbegu, jala gohanku ma joro on hamuliaon, ninna Jahowa Zebaot.

2:8 Ahu do nampuna perak, jala ahu nampuna sere, ninna Jahowa Zebaot.

2:9 Jadi gumodang ma hamuliaon ni joro parpudi on sian parjolo i, ninna Jahowa Zebaot, jala di hajongjongan on lehononku do hadameon, ninna Jahowa Zebaot.

2:10 Paduapulu opat arihon, dibulan sipaha sia paduataonhon hinarajahon ni si Darius, ro ma hata ni Jahowa marhite sian panurirang Haggai, songon on:

2:11 Boti hata ni Jahowa Zebaot: Ua usoi ma angka malim taringot tu patik i, songon on:

2:12 Ida ma, tung sura diboan manang ise juhut na badia di bagasan suhi ni ulosna, dung i dolos suhi ni ulosna tu sagusagu manang tu lompan, manang tu anggur, manang tu miak, manang tu sipanganon dia pe, tung badia ma i binahen ni? Jadi didok angka malim i ma mangalusi: Ndangana.

2:13 Dung i ninna si Haggai ma: Tung sura dijama manang ise na ramun * binahen ni bangke saluhutna ondeng, tung ramun ma angka i? Jadi didok angka malim i ma mangalusi: Ramun ma i tutu.

2:14 Dung i ninna si Haggai ma mangalusi: Laos songon i do bangso na sansundut on maradophon ahu, ninna Jahowa, laos songon i do saluhut jadijadian ni tangannasida ro di na pinelehonnasida disi: Sai na ramun do i.

2:15 On pe, ua parateatehon hamu ma i, olat ni ari on tu ginjang, tagan so ditindihon dope batu di joro ni Jahowa.

2:16 Tagan so dibahen nasida songon i ro iba * tu bunbunan siduapulu tuhukan hian, hape holan sampulu disi; ro iba tu pangilangan anggur naeng manahui limapulu hudon nian hape holan duapulu disi.

2:17 Nunga hupasonggop tu hamu antingano dohot sirara dohot ambolas, mangago saluhut jadijadian ni tanganmuna, laos so didompakkon hamu ahu, ninna Jahowa.

2:18 Ua manimbang ma rohamuna, olat ni ari on tu ginjang, olat ni ari duapulu opat, dibulan sipaha sia, olat ni ari haoojak ni joro ni Jahowa; sai parateatehon hamu ma i.

2:19 Tung adong dope jumpang boni di bagasan sopo? Hau anggur pe dohot antajau dohot hau dalimo ro di hau jetun, ndang dope marparbue sahat ro di nuaeng. Anggo olat ni ari on mamasumasu ma ahu.

2:20 Dung i ro ma hata ni Jahowa paduahalihon tu si Haggai di ari duapulu opat laos di na sabulan i, songon on:

2:21 Dok ma tu si Serubabel, pangarajai sian Juda songon on: * Ahu do mangkutur langit dohot tano on sogot.

2:22 Jala ahu mangonggalhon sogot habangsa ni angka harajaon, jala siaphononku hagogoan ni angka harajaon ni angka bangso parbegu, onggalhononku ma angka hureta ro di jolma ma mangkunduli gabe pesan angka hoda ro di jolma na mangkunduli, * ganup binahen ni podang ni donganna.

2:23 Di ari na sasada i ninna Jahowa Zebaot, buatonku ma ho, ale * Serubabel, anak ni si Sealtiel, naposongki, ninna Jahowa, jala bahenonku ho * gabe tintin rongkom. Ai nunga ahu mamillit, ninna Jahowa Zebaot.