Buku Jakobus

Jakobus ᯐᯄ᯦ᯬᯅᯘᯮ᯲ 1

1:1 Ahu surat ni si Jakobus, naposo ni Debata dohot Tuhan Jesus Kristus, mandapothon na sampuludua marga, na di parserahan: Tabi ma di hamu! ᯀᯂᯮ ᯘᯮᯒᯖ᯲ ᯉᯪ ᯘᯪ ᯐᯄ᯦ᯬᯅᯘᯮ᯲ ᯉᯇᯬᯘᯬ ᯉᯪ ᯑᯩᯅᯖ ᯑᯬᯂᯖᯬ᯲ ᯖᯮᯂᯉ᯲ ᯐᯩᯘᯘᯮ᯲ ᯄ᯦᯲ᯒᯘᯪ᯲ᯖᯘᯮ᯲ ᯔᯉ᯲ᯑᯇᯖᯬ᯲ᯂᯉᯬ᯲ ᯉ ᯘᯔ᯲ᯇᯮᯞᯮᯑᯮᯀ ᯔᯒ᯲ᯎ ᯉ ᯑᯪ ᯇᯒ᯲ᯘᯩᯒᯂᯉ᯲ ᯖᯅᯪ ᯔ ᯑᯪ ᯂᯔᯮ

1:2 Ale angka donganku, las ni roha sambing ma rajumi hamu i, anggo madabu hamu tu bagasan ragam ni pangunjunan. ᯀᯞᯩ ᯀᯰᯄ᯦ ᯑᯬᯝᯉ᯲ᯄ᯦ᯮ ᯞᯘ᯲ ᯉᯪ ᯒᯬᯂ ᯘᯔ᯲ᯅᯰᯪ ᯔ ᯒᯐᯮᯔᯪ ᯂᯔᯮ ᯤ ᯀᯰᯎᯬ ᯔᯑᯅᯮ ᯂᯔᯮ ᯖᯮ ᯅᯎᯘᯉ᯲ ᯒᯎᯔ᯲ ᯉᯪ ᯇᯝᯉᯮ᯲ᯐᯮᯉᯉ᯲

1:3 Boto hamu ma: Na mangkorhon habengeton do pangunjunan na tu haporseaonmuna. ᯅᯬᯖᯬ ᯂᯔᯮ ᯔ ᯉ ᯔᯰᯄ᯦ᯒᯬ᯲ᯂᯉᯬ᯲ ᯂᯅᯩᯝᯩᯖᯉᯬ᯲ ᯑᯬ ᯇᯝᯉᯮ᯲ᯐᯮᯉᯉ᯲ ᯉ ᯖᯮ ᯂᯇᯒᯬ᯲ᯘᯩᯀᯀᯉᯬ᯲ᯔᯮᯉ

1:4 Alai ingkon dihorhon habengeton i do ulaon na sun denggan, asa gabe rimpas hamu, angka na so marlindang, na so marnahurang. ᯀᯞᯤ ᯀᯰᯪᯄ᯦ᯉᯬ᯲ ᯑᯪᯂᯒᯬ᯲ᯂᯉᯬ᯲ ᯂᯅᯩᯝᯩᯖᯉᯬ᯲ ᯤ ᯑᯬ ᯥᯞᯀᯉᯬ᯲ ᯉ ᯘᯉᯮ᯲ ᯑᯰᯩᯎᯉ᯲ ᯀᯘ ᯎᯅᯩ ᯒᯔᯪ᯲ᯇᯘ᯲ ᯂᯔᯮ ᯀᯰᯄ᯦ ᯉ ᯘᯬ ᯔᯒ᯲ᯞᯉᯪ᯲ᯑᯰ ᯉ ᯘᯬ ᯔᯒ᯲ᯉᯂᯮᯒᯰ

1:5 Ai molo adong di tongatongamuna na hurangan bisuk, dipangido ma tu Debata, na bulus mangalehon di saluhut jala ndang marpangea, dung i lehononna ma tu ibana. ᯀᯤ ᯔᯬᯞᯬ ᯀᯑᯰᯬ ᯑᯪ ᯖᯬᯝᯖᯬᯝᯔᯮᯉ ᯉ ᯂᯮᯒᯝᯉ᯲ ᯅᯪᯘᯄ᯦ᯮ ᯑᯪᯇᯝᯪᯑᯬ ᯔ ᯖᯮ ᯑᯩᯅᯖ ᯉ ᯅᯮᯞᯘᯮ᯲ᯅ ᯔᯝᯞᯩᯂᯉᯬ᯲ᯑᯪ ᯘᯞᯮᯂᯖᯮ᯲ ᯐᯞ ᯉ᯲ᯑᯰ ᯔᯒ᯲ᯇᯝᯩᯀ ᯑᯮᯰ ᯤ ᯞᯩᯂᯬᯉᯉᯬ᯲ᯉ ᯔ ᯖᯮ ᯤᯅᯉ

1:6 Alai di bagasan haporseaon ma ibana mangido, unang marganggu ni roha; ai na ganggu roha i, tudos do tu galumbang ni laut, na pinahuturhutur jala na pinalindaklindak ni alogo. ᯀᯞᯤ ᯑᯪ ᯅᯎᯘᯉ᯲ ᯂᯇᯒᯬ᯲ᯘᯩᯀᯀᯉᯬ᯲ ᯔ ᯤᯅᯉ ᯔᯝᯪᯑᯬ ᯥᯉᯰ ᯔᯒ᯲ᯎᯰᯎᯮ ᯉᯪ ᯒᯬᯂ ᯀᯤ ᯉ ᯎᯰᯎᯮ ᯒᯬᯂ ᯤ ᯖᯮᯑᯘᯬ᯲ ᯑᯬ ᯖᯮ ᯎᯞᯔᯮ᯲ᯅᯰ ᯉᯪ ᯞᯀᯖᯮ᯲ ᯉ ᯇᯪᯉᯂᯮᯖᯒᯮ᯲ᯂᯮᯖᯒᯮ᯲ ᯐᯞ ᯉ ᯇᯪᯉᯞᯉᯪ᯲ᯑᯄ᯦᯲ᯞᯉᯪ᯲ᯑᯄ᯦᯲ ᯉᯪ ᯀᯞᯬᯎᯬ

1:7 Unang ma diparbaga roha ni halak i, jaloonna agia aha sian Tuhan i! ᯥᯉᯰ ᯔ ᯑᯪᯇᯒ᯲ᯅᯎ ᯒᯬᯂ ᯉᯪ ᯂᯞᯄ᯦᯲ ᯤ ᯐᯞᯬᯀᯉᯬ᯲ᯉ ᯀᯎᯪᯀ ᯀᯂ ᯘᯪᯀᯉ᯲ ᯖᯮᯂᯉ᯲ ᯤ

1:8 Ai halak na mardua roha, na gaor do i di saluhut angka dalanna. ᯀᯤ ᯂᯞᯄ᯦᯲ ᯉ ᯔᯒ᯲ᯑᯮᯀ ᯒᯬᯂ ᯉ ᯎᯀᯒᯬ᯲ ᯑᯬ ᯤ ᯑᯪ ᯘᯞᯮᯂᯖᯮ᯲ ᯀᯰᯄ᯦ ᯑᯞᯉ᯲ᯉ

1:9 Alai dipuji dongan na toruk i ma dirina siala timbona i! ᯀᯞᯤ ᯑᯪᯇᯮᯐᯪ ᯑᯬᯝᯉ᯲ ᯉ ᯖᯬᯒᯄ᯦ᯮ᯲ ᯤ ᯔ ᯑᯪᯒᯪᯉ ᯘᯪᯀᯞ ᯖᯔᯪ᯲ᯅᯬᯉ ᯤ

1:10 Songon i na mora i, siala hatoruhonna; ai na laho salpu ma ibana songon bungabunga na di ladang i. ᯘᯬᯝᯉᯬ᯲ ᯤ ᯉ ᯔᯬᯒ ᯤ ᯘᯪᯀᯞ ᯂᯖᯬᯒᯮᯂᯉᯬ᯲ᯉ ᯀᯤ ᯉ ᯞᯂᯬ ᯘᯞ᯲ᯇᯮ ᯔ ᯤᯅᯉ ᯘᯬᯝᯉᯬ᯲ ᯅᯮᯝᯅᯮᯝ ᯉ ᯑᯪ ᯞᯑᯰ ᯤ

1:11 Ai binsar ma mata ni ari dohot mohopna, jadi rahar ma duhut i, marurus ma bungana, mago ma rupana na jengkar i. Songon i ma laho malos na mora i di bagasan angka dalanna. ᯀᯤ ᯅᯉᯪ᯲ᯘᯒ᯲ ᯔ ᯔᯖ ᯉᯪ ᯀᯒᯪ ᯑᯬᯂᯖᯬ᯲ ᯔᯬᯂᯇᯬ᯲ᯉ ᯐᯑᯪ ᯒᯂᯒ᯲ ᯔᯑᯮᯂᯖᯮ᯲ ᯤ ᯔᯒᯮᯒᯘᯮ᯲ ᯔ ᯅᯮᯝᯉ ᯔᯎᯬ ᯔ ᯒᯮᯇᯉ ᯉ ᯐᯰᯩᯄ᯦ᯒ᯲ ᯤ ᯘᯬᯝᯉᯬ᯲ ᯤ ᯔ ᯞᯂᯬ ᯔᯞᯘᯬ᯲ ᯉ ᯔᯬᯒ ᯤ ᯑᯪ ᯅᯎᯘᯉ᯲ ᯀᯰᯄ᯦ ᯑᯞᯉ᯲ᯉ

1:12 Martua do halak na manaon di pangunjunan i: Ai dung tau ibana, jaloonna ma tumpal hangoluan, naung diparbagabaga tu angka na holong roha di Ibana. ᯔᯒ᯲ᯖᯮᯀ ᯑᯬ ᯂᯞᯄ᯦᯲ ᯉ ᯔᯉᯀᯉᯬ᯲ ᯑᯪ ᯇᯝᯉᯮ᯲ᯐᯮᯉᯉ᯲ ᯤ ᯀᯤ ᯑᯮᯰ ᯖᯥ ᯤᯅᯉ ᯐᯞᯬᯀᯉᯬ᯲ᯉ ᯔ ᯖᯔᯮ᯲ᯇᯞ᯲ ᯂᯝᯬᯞᯮᯀᯉ᯲ ᯉᯀᯮᯰ ᯑᯪᯇᯒ᯲ᯅᯎᯅᯎ ᯖᯮ ᯀᯰᯄ᯦ ᯉ ᯂᯬᯞᯰᯬ ᯒᯬᯂ ᯑᯪ ᯤᯅᯉ

1:13 Unang ma didok manang ise, jumpa tarunjun ibana: Na tarunjun do ahu sian Debata! Ai ndang masa di Debata pangunjunan tu hajahaton; ndang diunjuni Ibana manang ise. ᯥᯉᯰ ᯔ ᯑᯪᯑᯄ᯦ᯬ᯲ ᯔᯉᯰ ᯤᯘᯩ ᯐᯔᯮ᯲ᯇ ᯖᯒᯉᯮ᯲ᯐᯉᯮ᯲ ᯤᯅᯉ ᯉ ᯖᯒᯉᯮ᯲ᯐᯉᯮ᯲ ᯑᯬ ᯀᯂᯮ ᯘᯪᯀᯉ᯲ ᯑᯩᯅᯖ. ᯀᯤ ᯉ᯲ᯑᯰ ᯔᯘ ᯑᯪ ᯑᯩᯅᯖ ᯇᯝᯉᯮ᯲ᯐᯮᯉᯉ᯲ ᯖᯮ ᯂᯐᯂᯖᯉᯬ᯲ ᯉ᯲ᯑᯰ ᯑᯪᯀᯉᯮ᯲ᯐᯮᯉᯪ ᯤᯅᯉ ᯔᯉᯰ ᯤᯘᯩ

1:14 Alai ditaiti jala dipaelaela sangkapsangkap ni rohana sandiri do ganup, umbahen na tarunjun. ᯀᯞᯤ ᯑᯪᯖᯤᯖᯪ ᯐᯞ ᯑᯪᯇᯀᯩᯞᯀᯩᯞ ᯘᯰᯄ᯦ᯇ᯲ᯘᯰᯄ᯦ᯇ᯲ ᯉᯪ ᯒᯬᯂᯉ ᯘᯉ᯲ᯑᯪᯒᯪ ᯑᯬ ᯎᯉᯇᯮ᯲ ᯀᯔᯮ᯲ᯅᯂᯉᯩ᯲ ᯉ ᯖᯒᯉᯮ᯲ᯐᯉᯮ᯲

1:15 Jadi dung manjangkon sangkapsangkap ni roha i, ditubuhon ma dosa; alai dung gok dosa i, ditubuhon ma hamatean. ᯐᯑᯪ ᯑᯮᯰ ᯔᯉ᯲ᯐᯰᯄᯉᯬ᯲ ᯘᯰᯄ᯦ᯇ᯲ᯘᯰᯄ᯦ᯇ᯲ ᯉᯪ ᯒᯬᯂ ᯤ ᯑᯪᯖᯮᯅᯮᯂᯉᯬ᯲ ᯔ ᯑᯬᯘ ᯀᯞᯤ ᯑᯮᯰ ᯎᯄ᯦ᯬ᯲ ᯑᯬᯘ ᯤ ᯑᯪᯖᯮᯅᯮᯂᯉᯬ᯲ ᯔ ᯂᯔᯖᯩᯀᯉ᯲

1:16 Unang ma hamu lilu, angka donganku na hinaholongan! ᯥᯉᯰ ᯔ ᯂᯔᯮ ᯞᯪᯞᯮ ᯀᯰᯄ᯦ ᯑᯬᯝᯉ᯲ᯄ᯦ᯮ ᯉ ᯂᯪᯉᯂᯬᯞᯬᯝᯉ᯲

1:17 Saluhutna silehonlehon na denggan, nasa ulibasa na mauliutus, i ma na ro sian ginjang, sian Ama ni na tiur, na so olo muba, na so umboto agia halinu ni hamimimbar. ᯘᯞᯮᯂᯖᯮ᯲ᯉ ᯘᯪᯞᯩᯂᯉᯬ᯲ᯞᯩᯂᯉᯬ᯲ ᯉ ᯑᯰᯩᯎᯉ᯲ ᯉᯘ ᯥᯞᯪᯅᯘ ᯉ ᯔᯥᯞᯪᯥᯖᯘᯮ᯲ ᯤ ᯔ ᯉ ᯘᯬ ᯒᯬ ᯘᯪᯀᯉ᯲ ᯎᯉᯪ᯲ᯐᯰ ᯘᯪᯀᯉ᯲ ᯀᯔ ᯉᯪ ᯉ ᯖᯪᯀᯒᯮ᯲ ᯉ ᯘᯬ ᯀᯬᯞᯬ ᯔᯮᯅ ᯉ ᯘᯬ ᯀᯔᯮ᯲ᯅᯬᯖᯬ ᯀᯎᯪᯀ ᯂᯞᯪᯉᯮ ᯉᯪ ᯂᯔᯪᯔᯔᯪ᯲ᯅᯒ᯲

1:18 Sian tahi ni rohana do ditubuhon Ibana hita marhitehite hata hasintongan i, asa hita hira patumonaan sian angka na tinompana i. ᯘᯪᯀᯉ᯲ ᯖᯂᯪ ᯉᯪ ᯒᯬᯂᯉ ᯑᯬ ᯑᯪᯖᯮᯅᯮᯂᯉᯬ᯲ ᯤᯅᯉ ᯂᯪᯖ ᯔᯒ᯲ᯂᯪᯖᯩᯂᯪᯖᯩ ᯂᯖ ᯂᯘᯉᯪ᯲ᯖᯬᯝᯉ᯲ ᯤ ᯀᯘ ᯂᯪᯖ ᯂᯪᯒ ᯇᯖᯮᯔᯬᯉᯀᯀᯉ᯲ ᯘᯪᯀᯉ᯲ ᯀᯰᯄ᯦ ᯉ ᯖᯪᯉᯔᯬ᯲ᯇᯉ ᯤ

1:19 Ingot hamu ma, angka donganku na hinaholongan: Ganup jolma, girgir ma ibana mananginangi, bangkol ma ibana mangkatai, bangkol ma tarrimas! ᯤᯝᯖᯬ᯲ ᯂᯔᯮ ᯔ ᯀᯰᯄ᯦ ᯑᯬᯝᯉ᯲ᯄᯮ᯲ ᯉ ᯂᯪᯉᯂᯬᯞᯬᯝᯉ᯲ ᯎᯉᯇᯮ᯲ ᯐᯞᯬ᯲ᯔ ᯎᯒᯪ᯲ᯎᯒᯪ᯲ ᯔ ᯤᯅᯉ ᯔᯉᯝᯪᯉᯝᯪ ᯅᯰᯄ᯦ᯞᯬ᯲ ᯤᯅᯉ ᯔᯰᯄ᯦ᯖᯤ ᯅᯰᯄ᯦ᯞᯬ᯲ ᯔ ᯖᯒ᯲ᯒᯪᯔᯘ᯲

1:20 Ai ndang diulahon rimas ni jolma hatigoran ni Debata. ᯀᯤ ᯉ᯲ᯑᯰ ᯑᯪᯥᯞᯂᯉᯬ᯲ ᯒᯪᯔᯘ᯲ ᯉᯪ ᯐᯞᯬ᯲ᯔ ᯂᯖᯪᯎᯬᯒᯉ᯲ ᯉᯪ ᯑᯩᯅᯖ

1:21 Dibahen i, bolongkon hamu ma nasa na roa ro di hajahaton na lohot i; marlambok ni roha ma hamu manjalo hata na sinuan tu bagasan rohamuna, na tarbahen paluahon tondimuna. ᯑᯪᯅᯂᯉᯩ᯲ ᯤ ᯅᯬᯞᯰᯬᯄ᯦ᯉᯬ᯲ ᯂᯔᯮ ᯲ ᯉᯘ ᯉ ᯒᯬᯀ ᯒᯬ ᯑᯪ ᯂᯐᯂᯖᯉᯬ᯲ ᯉ ᯞᯬᯂᯖᯬ᯲ ᯤ ᯔᯒ᯲ᯞᯔ᯲ᯅᯄ᯦ᯬ᯲ ᯉᯪ ᯒᯬᯂ ᯔ ᯂᯔᯮ ᯔᯉ᯲ᯐᯞᯬ ᯂᯖ ᯉ ᯘᯪᯉᯮᯀᯉ᯲ ᯖᯮ ᯅᯎᯘᯉ᯲ ᯒᯬᯂᯔᯮᯉ ᯉ ᯖᯒ᯲ᯅᯂᯉᯩ᯲ ᯇᯞᯮᯀᯂᯉᯬ᯲ ᯖᯉᯬ᯲ᯑᯪᯔᯮᯉ

1:22 Alai gabe siulahon Hata i ma hamu, unang holan pananginangi, angka na paotootohon dirina! ᯀᯞᯤ ᯎᯅᯩ ᯘᯪᯥᯞᯂᯉᯬ᯲ ᯂᯖ ᯤ ᯔ ᯂᯔᯮ ᯥᯉᯰ ᯂᯬᯞᯉ᯲ ᯇᯉᯝᯪᯉᯝᯪ ᯀᯰᯄ᯦ ᯉ ᯇᯀᯬᯖᯬᯀᯬᯖᯬᯂᯉᯬ᯲ ᯑᯪᯒᯪᯉ

1:23 Ai pananginangi di hata i, anggo so diulahon, tudos ma i tu halak na paberengbereng rupa ni bohina di sorminan. ᯀᯤ ᯇᯉᯝᯪᯉᯝᯪ ᯑᯪ ᯂᯖ ᯤ ᯀᯰᯎᯬ ᯘᯬ ᯑᯪᯥᯞᯂᯉᯬ᯲ ᯖᯮᯑᯘᯬ᯲ ᯔ ᯤ ᯖᯮ ᯂᯞᯄ᯦᯲ ᯉ ᯇᯅᯩᯒᯰᯩᯅᯩᯒᯰᯩ ᯒᯮᯇ ᯉᯪ ᯅᯬᯂᯪᯉ ᯑᯪ ᯘᯒᯬ᯲ᯔᯪᯉᯉ᯲

1:24 Ai dibereng do dirina, dung i laho ma ibana, gabe ndang diboto be rupana. ᯀᯐ ᯑᯪᯅᯩᯒᯰᯩ ᯑᯬ ᯑᯪᯒᯪᯉ ᯑᯮᯰ ᯤ ᯞᯂᯬ ᯔ ᯤᯅᯉ ᯎᯅᯩ ᯉ᯲ᯑᯰ ᯑᯪᯅᯬᯖᯬ ᯅᯩ ᯒᯮᯇᯉ

1:25 Alai na mamereng torus tu bagasan uhum haluaon na sun denggan i jala mian disi, i ma na martua marhite sian pangulaonna i, anggo so pananginangi na mangkalupahon, siula ulaon i tahe ibana. ᯀᯞᯤ ᯉ ᯔᯔᯩᯒᯰᯩ ᯖᯬᯒᯘᯮ᯲ ᯖᯮ ᯅᯎᯘᯉ᯲ ᯥᯂᯔᯮ᯲ ᯂᯞᯮᯀᯀᯉᯬ᯲ ᯉ ᯘᯉᯮ᯲ ᯑᯰᯩᯎᯉ᯲ ᯤ ᯐᯞ ᯔᯪᯀᯉ᯲ ᯑᯪᯘᯪ ᯤ ᯔ ᯉ ᯔᯒ᯲ᯖᯮᯀ ᯔᯒ᯲ᯂᯪᯖᯩ ᯘᯪᯀᯉ᯲ ᯇᯝᯮᯞᯀᯉᯬ᯲ᯉ ᯤ ᯀᯰᯎᯬ ᯘᯬ ᯇᯉᯑᯪ ᯝᯪ ᯉ ᯔᯰᯄ᯦ᯞᯮᯇᯂᯉᯬ᯲ ᯘᯪᯥᯞ ᯥᯞᯀᯉᯬ᯲ ᯤ ᯖᯂᯩ ᯤᯅᯉ

1:26 Molo adong na mandok di bagasan rohana, na daulat ibana, hape ndang dirantei dilana, diansi do tahe rohana: Na magopo ma hadaulatonna i. ᯔᯬᯞᯬ ᯀᯑᯰᯬ ᯉ ᯔᯉ᯲ᯑᯄ᯦ᯬ᯲ ᯑᯪ ᯅᯎᯘᯉ᯲ ᯒᯬᯂᯉ ᯉ ᯑᯥᯞᯖ᯲ ᯤᯅᯉ ᯂᯇᯩ ᯉ᯲ᯑᯰ ᯑᯪᯒᯉ᯲ᯖᯩᯤ ᯑᯪᯞᯉ ᯑᯪᯀᯉ᯲ᯘᯪ ᯑᯬ ᯖᯂᯩ ᯒᯬᯂᯉ ᯉ ᯔᯎᯬᯇᯬ ᯔ ᯂᯑᯥᯞᯖᯉᯬ᯲ᯉ ᯤ

1:27 On do hadaulaton na ias jala na so marlindang, di roha ni Debata Ama: Mandulo angka na so marama, so marina dohot angka na mabalu di haporsuhonnasida, huhut mangaramoti diriniba maralohon portibi on, unang marlindang. ᯀᯉᯬ᯲ ᯑᯬ ᯂᯑᯥᯞᯖᯉᯬ᯲ ᯉ ᯤᯀᯘ᯲ ᯐᯞ ᯉ ᯘᯬ ᯔᯒ᯲ᯞᯉᯪ᯲ᯑᯰ ᯑᯪ ᯒᯬᯂ ᯉᯪ ᯑᯩᯅᯖ ᯀᯔ ᯔᯉ᯲ᯑᯮᯞᯬ ᯀᯰᯄ᯦ ᯉ ᯘᯬ ᯔᯒᯔ ᯘᯬ ᯔᯒᯪᯉ ᯑᯬᯂᯖᯬ᯲ ᯀᯰᯄ᯦ ᯉ ᯔᯅᯞᯮ ᯑᯪ ᯂᯇᯒᯬ᯲ᯘᯮᯂᯉᯬ᯲ᯉᯘᯪᯑ ᯂᯮᯂᯖᯮ᯲ ᯔᯝᯒᯔᯬᯖᯪ ᯑᯪᯒᯪᯉᯪᯅ ᯔᯒᯞᯬᯂᯉᯬ᯲ ᯇᯒᯬ᯲ᯖᯪᯅᯪ ᯀᯉᯬ᯲ ᯥᯉᯰ ᯔᯒ᯲ᯞᯉᯪ᯲ᯑᯰ

Jakobus ᯐᯄ᯦ᯬᯅᯘᯮ᯲ 2

2:1 Ale angka donganku, unang ma siidaida bohi hamu, angka na porsea di Tuhanta Jesus Kristus na marsangap i! ᯀᯞᯩ ᯀᯰᯄ᯦ ᯑᯬᯝᯉ᯲ᯄ᯦ᯮ ᯥᯉᯰ ᯔ ᯘᯪᯤᯑᯤᯑ ᯅᯬᯂᯪ ᯂᯔᯮ ᯀᯰᯄ᯦ ᯉ ᯇᯒᯬ᯲ᯘᯩᯀ ᯑᯪ ᯖᯮᯂᯉ᯲ᯖ ᯐᯩᯘᯘᯮ᯲ ᯄ᯦᯲ᯒᯘᯪ᯲ᯖᯘᯮ᯲ ᯉ ᯔᯒ᯲ᯘᯎᯇ᯲ ᯤ

2:2 Ai adong ma ro tu bagasan parguruanmuna sahalak partintin sere jala parulos na arga, ro ma huhut sahalak na pogos, marabit na humurang. ᯀᯤ ᯀᯑᯰᯬ ᯔ ᯒᯬ ᯖᯮ ᯅᯎᯘᯉ᯲ ᯇᯒ᯲ᯎᯮᯒᯮᯀᯉ᯲ᯔᯮᯉ ᯘᯂᯞᯄ᯦᯲ ᯇᯒ᯲ᯖᯉᯪ᯲ᯖᯉᯪ᯲ ᯘᯩᯒᯩ ᯐᯞ ᯇᯒᯮᯞᯘᯬ᯲ ᯉ ᯀᯒ᯲ᯎ ᯒᯬ ᯔ ᯂᯮᯂᯖᯮ᯲ ᯘᯂᯞᯄ᯦᯲ ᯉ ᯇᯬᯎᯘᯬ᯲ ᯔᯒᯅᯖᯪ᯲ ᯉ ᯂᯮᯔᯮᯒᯰ

2:3 Jadi dibereng hamu ma na marabit na denggan, didok hamu ma: Denggan ma ho juguk dison; alai tu na pogos i didok hamu: Disan ma ho jongjong, manang hundul ma ho tu na hudege on! ᯐᯑᯪ ᯑᯪᯅᯩᯒᯰᯩ ᯂᯔᯮ ᯔ ᯉ ᯔᯒᯅᯖᯪ᯲ ᯉ ᯑᯰᯩᯎᯉ᯲ ᯑᯪᯑᯄ᯦ᯬ᯲ ᯂᯔᯮ ᯔ ᯑᯰᯩᯎᯉ᯲ ᯔ ᯂᯬ ᯐᯮᯎᯄ᯦ᯮ᯲ ᯑᯪᯘᯉᯬ᯲ ᯀᯞᯤ ᯖᯮ ᯉ ᯇᯬᯎᯘᯬ᯲ ᯤ ᯑᯪᯑᯄ᯦ᯬ᯲ ᯂᯔᯮ ᯑᯪᯘᯉ᯲ ᯔ ᯂᯬ ᯐᯰᯬᯐᯰᯬ ᯔᯉᯰ ᯂᯉᯮ᯲ᯑᯞᯮ᯲ ᯔ ᯂᯬ ᯖᯮ ᯉ ᯂᯮᯑᯩᯎᯩ ᯀᯉᯬ᯲

2:4 Nda nunga marbagi dua rohamu disi; nda nunga manguhumi hamu mangihuthon pingkiran na jahat? ᯉ᯲ᯑ ᯉᯮᯝ ᯔᯒ᯲ᯅᯎᯪ ᯑᯮᯀ ᯒᯬᯂᯔᯮ ᯑᯪᯘᯪ ᯉ᯲ᯑ ᯉᯮᯝ ᯔᯝᯮᯂᯮᯔᯪ ᯂᯔᯮ ᯔᯝᯪᯂᯖᯮ᯲ᯂᯉᯬ᯲ ᯇᯰᯪᯄ᯦ᯪᯒᯉ᯲ ᯉ ᯐᯂᯖ᯲

2:5 Tangihon hamu ma, ale angka donganku na hinaholongan: Nda dipillit Debata angka na pogos di portibi on, asa mamora nasida marhitehite haporseaon jala panean di harajaon, na pinarbagabagana tu angka na holong roha di Ibana? ᯖᯝᯪᯂᯉᯬ᯲ ᯂᯔᯮ ᯔ ᯀᯞᯩ ᯀᯰᯄ᯦ ᯑᯬᯝᯉ᯲ᯄ᯦ᯮ ᯉ ᯂᯪᯉᯂᯬᯞᯬᯝᯉ᯲ ᯉ᯲ᯑ ᯑᯪᯇᯞᯪ᯲ᯞᯖᯪ᯲ ᯑᯩᯅᯖ ᯀᯰᯄ᯦ ᯉ ᯇᯬᯎᯘᯬ᯲ ᯑᯪ ᯇᯒᯬ᯲ᯖᯪᯅᯪ ᯀᯉᯬ᯲ ᯀᯘ ᯔᯔᯬᯒ ᯉᯘᯪᯑ ᯔᯒᯂᯪᯖᯩᯂᯪᯖᯩ ᯂᯇᯒᯬ᯲ᯘᯩᯀᯘᯉᯬ᯲ ᯐᯞ ᯇᯉᯩᯀᯉ᯲ ᯑᯪ ᯂᯒᯐᯀᯉᯬ᯲ ᯉ ᯇᯪᯉᯒ᯲ᯅᯎᯅᯎᯉ ᯖᯮ ᯀᯰᯄ᯦ ᯉ ᯂᯬᯞᯰᯬ ᯒᯬᯂ ᯑᯪ ᯤᯅᯉ

2:6 Alai dileai hamu do na pogos i. Nda angka na mora i na paporsukporsukkon hamu jala manaratnarat hamu tu paruhuman? ᯀᯞᯤ ᯑᯪᯞᯩᯀᯤ ᯂᯔᯮ ᯑᯬ ᯉ ᯇᯬᯎᯘᯬ᯲ ᯤ ᯉ᯲ᯑ ᯀᯰᯄ᯦ ᯉ ᯔᯬᯒ ᯤ ᯉ ᯇᯇᯒᯬ᯲ᯘᯄ᯦ᯮ᯲ᯇᯒᯬ᯲ᯘᯄ᯦᯲ᯂᯉᯬ᯲ ᯂᯔᯮ ᯐᯞ ᯔᯉᯒᯖ᯲ᯉᯒᯖ᯲ ᯂᯔᯮ ᯖᯮ ᯇᯒᯮᯂᯮᯔᯉ᯲

2:7 Nda nasida do na manginsahi Goar na denggan i, naung digoarhon tu hamu? ᯉ᯲ᯑ ᯉᯘᯪᯑ ᯑᯬ ᯉ ᯔᯝᯉᯪ᯲ᯘᯂᯪ ᯎᯬᯀᯒ᯲ ᯉ ᯑᯰᯩᯂᯉ᯲ ᯤ ᯉᯀᯮᯰ ᯑᯪᯎᯬᯀᯒ᯲ᯂᯉᯬ᯲ ᯖᯮ ᯂᯔᯮ

2:8 Sibahen na denggan do hamu, antong, molo marguru tu Surat i diulahon hamu patik raja on: "Haholongi donganmi songon dirim!" ᯘᯪᯅᯂᯉᯩ᯲ ᯉ ᯑᯰᯩᯎᯉ᯲ ᯑᯬ ᯂᯔᯮ ᯀᯉ᯲ᯖᯰᯬ ᯔᯬᯞᯬ ᯔᯒ᯲ᯎᯮᯒᯮ ᯖᯮ ᯘᯮᯒᯖ᯲ ᯤ ᯑᯪᯥᯞᯂᯉᯬ᯲ ᯂᯔᯮ ᯇᯖᯄ᯦ᯪ᯲ ᯒᯐ ᯀᯉᯬ᯲ ᯂᯂᯬᯞᯬᯝᯪ ᯑᯬᯝᯉ᯲ᯔᯪ ᯘᯬᯝᯉᯬ᯲ ᯑᯪᯒᯔᯪ᯲

2:9 Alai molo siida bohi hamu, na mangulahon dosa do hamu disi, gabe diuhumi patik i hamu songon pangalaosi. ᯀᯞᯤ ᯔᯬᯞᯬ ᯘᯪᯤᯑ ᯅᯬᯂᯪ ᯂᯔᯮ ᯉ ᯔᯝᯮᯞᯂᯉᯬ᯲ ᯑᯬᯘ ᯑᯬ ᯂᯔᯮ ᯑᯪᯘᯪ ᯎᯅᯩ ᯑᯪᯥᯂᯮᯔᯪ ᯇᯖᯄ᯦ᯪ᯲ ᯤ ᯂᯔᯮ ᯘᯬᯝᯉᯬ᯲ ᯇᯝᯞᯀᯬᯘᯪ

2:10 Ai aut sura diradoti jolma saluhut patik i, alai tinggang di na sada, nunga gabe parsala ibana di saluhutna. ᯀᯤ ᯀᯀᯖᯮ᯲ ᯘᯮᯒ ᯑᯪᯒᯑᯬᯖᯪ ᯐᯞᯬ᯲ᯔ ᯘᯞᯮᯂᯖᯮ᯲ ᯇᯖᯄᯪ᯲ ᯤ ᯀᯞᯤ ᯖᯰᯪᯎᯰ ᯑᯪ ᯉ ᯘᯑ ᯉᯮᯝ ᯎᯅᯩ ᯇᯒ᯲ᯘᯞ ᯤᯅᯉ ᯑᯪ ᯘᯞᯮᯂᯖᯮ᯲ᯉ

2:11 Ai Ibana na mandok: "Unang ma ho mangalangkup!," laos Ibana do mandok: "Unang ho mambunu!" Asa molo so mangalangkup ho, alai mambunu do, tong do ho pangalaosi di patik! ᯀᯤ ᯤᯅᯉ ᯉ ᯔᯉ᯲ᯑᯄ᯦ᯬ᯲ ᯥᯉᯰ ᯔ ᯂᯬ ᯔᯝᯞᯰᯄ᯦ᯇᯮ᯲ ᯞᯀᯘᯬ᯲ ᯤᯅᯉ ᯑᯬ ᯔᯉ᯲ᯑᯄ᯦ᯬ᯲ ᯥᯉᯰ ᯂᯬ ᯔᯔ᯲ᯅᯮᯉᯮ ᯀᯘ ᯔᯬᯞᯬ ᯘᯬ ᯔᯝᯞᯰᯄ᯦ᯇᯮ᯲ ᯂᯬ ᯀᯞᯤ ᯔᯔ᯲ᯅᯮᯉᯮ ᯑᯬ ᯖᯰᯬ ᯑᯬ ᯂᯬ ᯇᯝᯞᯀᯬᯘᯪ ᯑᯪ ᯇᯖᯄ᯦ᯪ᯲

2:12 Di nasa hata dohot ulaonmuna ingot hamu ma: Siuhumon do hamu, bahenon ni patik haluaon i! ᯑᯪ ᯉᯘ ᯂᯖ ᯑᯬᯂᯖᯬ᯲ ᯥᯞᯀᯉᯬ᯲ᯔᯮ ᯤᯝᯖᯬ᯲ ᯂᯔᯮ ᯔ ᯘᯪᯥᯂᯮᯔᯉᯬ᯲ ᯑᯬ ᯂᯔᯮ ᯅᯂᯩᯉᯉᯬ᯲ ᯉᯪ ᯇᯖᯄ᯦ᯪ᯲ ᯂᯞᯮᯀᯉᯬ᯲ ᯤ

2:13 Ai uhum na so marasi ni roha ma tu na so mangulahon asi ni roha; na monang do asi ni roha maralohon uhum. ᯀᯤ ᯥᯂᯔᯮ᯲ ᯉ ᯘᯬ ᯔᯒᯘᯪ ᯉᯪ ᯒᯬᯂ ᯔ ᯖᯮ ᯉ ᯘᯬ ᯔᯝᯮᯞᯂᯉᯬ᯲ ᯀᯘᯪ ᯉᯪ ᯒᯬᯂ ᯉ ᯔᯬᯉᯰ ᯑᯬ ᯀᯘᯪ ᯉᯪ ᯒᯬᯂ ᯔᯒᯞᯬᯂᯉᯬ᯲ ᯥᯂᯔᯮ᯲

2:14 Aha ma gunana, ale angka donganku, molo didok halak, di ibana do haporseaon; alai ndang adong di ibana pangulaon. Tarbahen do haporseaon i paluahon ibana? ᯀᯂ ᯔ ᯎᯮᯉᯉ ᯀᯞᯩ ᯀᯰᯄ ᯑᯬᯝᯉ᯲ᯄᯮ᯦ ᯔᯬᯞᯬ ᯑᯪᯑᯄ᯦ᯬ᯲ ᯂᯞᯄ᯦᯲ ᯑᯪ ᯤᯅᯉ ᯑᯬ ᯂᯇᯒᯬ᯲ᯘᯩᯀᯀᯉᯬ᯲ ᯀᯞᯤ ᯉ᯲ᯑᯰ ᯀᯑᯰᯬ ᯑᯪ ᯤᯅᯉ ᯇᯝᯮᯞᯀᯉᯬ᯲ ᯖᯒ᯲ᯅᯂᯉᯩ᯲ ᯑᯬ ᯂᯇᯒᯬ᯲ᯘᯩᯀᯀᯉᯬ᯲ ᯤ ᯇᯞᯮᯀᯂᯉᯬ᯲ ᯤᯅᯉ

2:15 Molo adong dongan baoa manang boruboru, na marsaemara jala hurangan di sipanganon siap ari, ᯔᯬᯞᯬ ᯀᯑᯰᯬ ᯑᯬᯝᯉ᯲ ᯅᯀᯬᯀ ᯔᯉᯰ ᯅᯬᯒᯮᯉᯬᯒᯮ ᯉ ᯔᯒ᯲ᯘᯀᯩᯔᯒ ᯐᯞ ᯂᯮᯒᯝᯉ᯲ ᯑᯪ ᯘᯪᯇᯝᯉᯉᯬ᯲ ᯘᯪᯀᯇᯒᯪ

2:16 gabe adong na mandok sian tongatongamuna: Laho ma hamu mardamedame, las ma hamu, bosur ma hamu; alai ndang dilehon hamu tu nasida na ringkot di daging, aha ma gunana? ᯎᯅᯩ ᯀᯑᯰᯬ ᯉ ᯔᯉ᯲ᯑᯄ᯦ᯬ᯲ ᯘᯪᯀᯉ᯲ ᯖᯬᯝᯖᯬᯝᯔᯮᯉ ᯞᯂᯬ ᯔ ᯂᯔᯮ ᯔᯒ᯲ᯑᯔᯩᯝᯔᯩ ᯞᯘ᯲ ᯔ ᯂᯔᯮ ᯅᯬᯘᯒᯮ᯲ ᯔ ᯂᯔᯮ ᯀᯞᯤ ᯉ᯲ᯑᯰ ᯑᯪᯞᯩᯂᯉᯬ᯲ ᯂᯔᯮ ᯖᯮ ᯉᯘᯪᯑ ᯉ ᯒᯰᯪᯄ᯦ᯖᯬ᯲ ᯑᯪ ᯑᯎᯰᯪ ᯀᯂ ᯔ ᯎᯮᯉᯉ

2:17 Haporseaon i pe songon i do: Anggo so adong pangulaonna, naung mate do hadirionna. ᯂᯇᯒᯬ᯲ᯘᯩᯀᯀᯉᯬ᯲ ᯤ ᯇᯩ ᯘᯬᯝᯉᯬ᯲ ᯤ ᯑᯬ ᯀᯰᯎᯬ ᯘᯬ ᯀᯑᯰᯬ ᯇᯝᯮᯞᯀᯉᯬ᯲ᯉ ᯉᯀᯮᯰ ᯔᯖᯩ ᯑᯬ ᯂᯑᯪᯒᯪᯀᯉᯬ᯲ᯉ

2:18 Alai adong ma na mandok: Di ho do haporseaon; di ahu do pangulaon! Patuduhon ma di ahu haporseaonmu so padohot angka pangulaon, asa ahu patuduhon tu ho haporseaon sian angka pangulaonku. ᯀᯞᯤ ᯀᯑᯰᯬ ᯔ ᯉ ᯔᯉ᯲ᯑᯄ᯦ᯬ᯲ ᯑᯪ ᯂᯬ ᯑᯬ ᯂᯇᯒᯬ᯲ᯘᯩᯀᯀᯉᯬ᯲ ᯑᯪ ᯀᯂᯮ ᯑᯬ ᯇᯝᯮᯞᯀᯉᯬ᯲. ᯇᯖᯮᯑᯮᯂᯉᯬ᯲ ᯔ ᯑᯪ ᯀᯂᯮ ᯂᯇᯒᯬ᯲ᯘᯩᯀᯀᯉᯬ᯲ᯔᯮ ᯘᯬ ᯇᯑᯬᯂᯖᯬ᯲ ᯀᯰᯄ᯦ ᯇᯝᯮᯞᯀᯉᯬ᯲ ᯀᯘ ᯀᯂᯮ ᯇᯖᯮᯑᯮᯂᯉᯬ᯲ ᯖᯮ ᯂᯬ ᯂᯇᯒᯬ᯲ᯘᯩᯀᯀᯉᯬ᯲ ᯘᯪᯀᯉ᯲ ᯀᯰᯄ᯦ ᯇᯝᯮᯞᯀᯀᯉᯬᯔᯄ᯦ᯮ

2:19 Na porsea do ho, adong Debata sisadasada. Taho ma i; dohot do angka sibolis porsea disi, jala angka dotdot! ᯉ ᯇᯒᯬ᯲ᯘᯩᯀ ᯑᯬ ᯂᯬ ᯀᯑᯰᯬ ᯑᯩᯅᯖ ᯘᯪᯘᯑᯘᯑ ᯖᯂᯬ ᯔ ᯤ ᯑᯬᯂᯖᯬ᯲ ᯑᯬ ᯀᯰᯄ᯦ ᯘᯪᯅᯬᯞᯘᯪ᯲ ᯇᯒᯬ᯲ᯘᯩᯀ ᯑᯪ ᯘᯪ ᯐᯞ ᯀᯰᯄ᯦ ᯑᯖᯬᯑᯖᯬ᯲

2:20 Alai ho, ale jolma na rumar, naeng botoonmu, na so marguna haporseaon, anggo so marulaon? ᯀᯞᯤ ᯂᯬ ᯀᯞᯩ ᯐᯞᯬ᯲ᯔ ᯉ ᯒᯮᯔᯒ᯲ ᯉᯀᯰᯩ ᯅᯬᯖᯬᯀᯉᯬ᯲ᯔᯮ ᯉ ᯘᯬ ᯔᯒ᯲ᯎᯮᯉ ᯂᯇᯒᯬ᯲ᯘᯩᯀᯀᯉᯬ᯲ ᯀᯰᯎᯬ ᯘᯬ ᯔᯒᯮᯞᯀᯉᯬ᯲

2:21 Nda gabe tigor si Abraham, amanta i, marhite sian ulaon, di na binoanna i si Isak, anakna i, tu pamelean? ᯉ᯲ᯑ ᯎᯅᯩ ᯖᯪᯎᯒᯬ᯲ ᯘᯪ ᯀᯅ᯲ᯒᯂᯔ᯲ ᯀᯔᯉ᯲ᯖ ᯤ ᯔᯒ᯲ᯂᯪᯖᯩ ᯘᯪᯀᯉ᯲ ᯥᯞᯀᯉᯬ᯲ ᯑᯪ ᯉ ᯅᯪᯉᯬᯀᯉ᯲ᯉ ᯘᯪ ᯤᯘᯄ᯦᯲ ᯀᯉᯄ᯦᯲ᯉ ᯤ ᯖᯮ ᯇᯔᯩᯞᯩᯀᯉ᯲

2:22 Diida ho disi, manumpak do haporseaon i tu angka ulaonna, jala sian angka ulaon i gabe rimpas haporseaon i. ᯑᯪᯤᯑ ᯂᯬ ᯑᯪᯘᯪ ᯔᯉᯔᯮ᯲ᯇᯄ᯦᯲ ᯑᯬ ᯂᯇᯒᯬ᯲ᯘᯩᯀᯀᯉᯬ᯲ ᯖᯮ ᯀᯰᯄ᯦ ᯥᯞᯀᯉᯬ᯲ᯉ ᯐᯞ ᯘᯪᯀᯉ᯲ ᯀᯰᯄ᯦ ᯥᯞᯀᯉᯬ᯲ ᯤ ᯎᯅᯩ ᯒᯔᯪ᯲ᯇᯘ᯲ ᯂᯇᯒᯬ᯲ᯘᯩᯘᯀᯉᯬ᯲ ᯤ

2:23 Jadi jumpang ma na nidok ni Surat i: "Dihaporseai si Abraham do Debata, jala i do dirajumi tu ibana gabe hatigoranna" jala targoar do ibana "aleale ni Debata." ᯐᯑᯪ ᯐᯔᯮ᯲ᯇᯰ ᯔ ᯉ ᯉᯪᯑᯄ᯦ᯬ᯲ ᯉᯪ ᯘᯮᯒᯖ᯲ ᯤ ᯑᯪᯂᯇᯒᯬ᯲ᯘᯩᯀᯤ ᯘᯪ ᯀᯅ᯲ᯒᯂᯔ᯲ ᯑᯬ ᯑᯩᯅᯖ ᯐᯞ ᯤ ᯑᯬ ᯑᯪᯒᯐᯮᯔᯪ ᯖᯮ ᯤᯅᯉ ᯎᯅᯩ ᯂᯖᯪᯎᯬᯒᯉ᯲ᯉ ᯐᯞ ᯖᯒ᯲ᯎᯬᯀᯒ᯲ ᯑᯬ ᯤᯅᯉ ᯀᯞᯩᯀᯞᯩ ᯉᯪ ᯑᯩᯅᯖ

2:24 Asa diida hamu do: Sian angka pangulaon i do gabe tigor jolma, ndada holan sian haporseaon? ᯀᯘ ᯑᯪᯤᯑ ᯂᯔᯮ ᯑᯬ ᯘᯪᯀᯉ᯲ ᯀᯰᯄ᯦ ᯇᯝᯮᯞᯀᯉᯬ᯲ ᯤ ᯑᯬ ᯎᯅᯩ ᯖᯪᯎᯒᯬ᯲ ᯐᯞᯬ᯲ᯔ ᯉ᯲ᯑᯑ ᯂᯬᯞᯉ᯲ ᯘᯪᯀᯉ᯲ ᯂᯇᯒᯬ᯲ᯘᯩᯀᯀᯉᯬ᯲

2:25 Songon i do nang si Rahab boruboru na jahat i; nda sian angka pangulaon do ibana gabe tigor, di na jinangkonna i angka suruan jala dipalua do nasida sian dalan na asing? ᯘᯬᯝᯉᯬ᯲ ᯤ ᯑᯬ ᯉᯰ ᯘᯪ ᯒᯂᯅ᯲ ᯅᯬᯒᯮᯅᯒᯮ ᯉ ᯐᯂᯖ᯲ ᯤ ᯉ᯲ᯑ ᯘᯪᯀᯉ᯲ ᯀᯰᯄ᯦ ᯇᯝᯮᯞᯀᯉᯬ᯲ ᯑᯬ ᯤᯅᯉ ᯎᯅᯩ ᯖᯪᯎᯒᯬ᯲ ᯑᯪ ᯉ ᯐᯪᯉᯰᯄ᯦ᯉᯬ᯲ᯉ ᯤ ᯀᯰᯄ᯦ ᯘᯮᯒᯮᯀᯉ᯲ ᯐᯞ ᯑᯪᯇᯞᯮᯀ ᯑᯬ ᯉᯘᯪᯑ ᯘᯪᯀᯉ᯲ ᯑᯞᯉ᯲ ᯉ ᯀᯘᯰᯪ

2:26 Ai songon daging i na mate, anggo so martondi; songon i do mate haporseaon na so marulaon. ᯦᯦ᯀᯤ ᯘᯬᯝᯉᯬ᯲ ᯑᯎᯰᯪ ᯤ ᯉ ᯔᯖᯩ ᯀᯰᯎᯬ ᯘᯬ ᯔᯒ᯲ᯖᯉᯬ᯲ᯑᯪ ᯘᯬᯝᯉᯬ᯲ ᯤ ᯑᯬ ᯔᯖᯩ ᯂᯇᯒᯬ᯲ᯘᯩᯀᯀᯉᯬ᯲ ᯉ ᯘᯬ ᯔᯒᯮᯞᯀᯉᯬ᯲

Jakobus ᯐᯂ᯦ᯬᯅᯘᯮ᯲ 3

3:1 Ale angka donganku, unang deak hamu gabe guru; ai taboto do, dumokdok do uhum sijaloonta. ᯀᯞᯩ ᯀᯰᯄ᯦ ᯑᯬᯝᯉ᯲ᯄ᯦ᯮ ᯥᯉᯰ ᯑᯩᯀᯄ᯦᯲ ᯂᯔᯮ ᯎᯅᯩ ᯎᯮᯒᯮ ᯀᯤ ᯖᯅᯬᯖᯬ ᯑᯬ ᯑᯮᯔᯄ᯦ᯬᯑᯄ᯦ᯬ᯲ ᯑᯬ ᯥᯂᯔᯮ᯲ ᯘᯪᯐᯞᯬᯀᯉᯬ᯲ᯖ

3:2 Ai saluhut hita jotjot marsala; molo adong na so sala di hata, i ma halak na rimpas, na tarbahen mangarantei saluhut dagingna i. ᯀᯤ ᯘᯞᯮᯂᯖᯮ᯲ ᯂᯪᯖ ᯐᯖᯬ᯲ᯐᯖᯬ᯲ ᯔᯒ᯲ᯘᯞ ᯔᯬᯞᯬ ᯀᯝᯰᯬ ᯉ ᯘᯬ ᯘᯞ ᯑᯪ ᯂᯖ ᯤ ᯔ ᯂᯞᯄ᯦᯲ ᯉ ᯒᯔᯪ᯲ᯇᯘ᯲ ᯉ ᯖᯒ᯲ᯅᯂᯉᯩ᯲ ᯔᯝᯒᯉ᯲ᯖᯩ ᯘᯞᯮᯂᯖᯮ᯲ ᯑᯎᯰᯪᯉ ᯤ

3:3 Molo tabahen rante tu baba ni angka hoda, asa dioloi hita, tatogutogu do sandok dagingna i. ᯔᯬᯞᯬ ᯖᯅᯂᯉᯩ᯲ ᯒᯉ᯲ᯖᯩ ᯖᯮ ᯅᯅ ᯉᯪ ᯀᯰᯄ᯦ ᯂᯬᯑ ᯀᯘ ᯑᯪᯀᯬᯞᯬᯤ ᯂᯪᯖ ᯖᯖᯬᯎᯮᯖᯬᯎᯮ ᯑᯬ ᯘᯉ᯲ᯑᯄ᯦ᯬ᯲ ᯑᯎᯰᯪᯉ ᯤ

3:4 Angka hopal i pe, atik pe na sai balga jala nionjar ni angka alogo na gogo, dipatongontongon do marhitehite amudi na metmet tungkan lomo ni roha ni juaramudi i. ᯀᯰᯄ᯦ ᯂᯬᯇᯞ᯲ ᯤ ᯇᯩ ᯀᯖᯄ᯦ᯪ᯲ ᯇᯩ ᯉ ᯘᯤ ᯅᯞ᯲ᯎ ᯐᯞ ᯉᯪᯀᯉᯬ᯲ᯐᯒ᯲ ᯉᯪ ᯀᯰᯄ᯦ ᯀᯞᯬᯎᯬ ᯉ ᯎᯬᯎᯬ ᯑᯪᯇᯖᯬᯝᯉᯬ᯲ᯖᯬᯝᯉᯬ᯲ ᯑᯬ ᯔᯒ᯲ᯂᯪᯖᯩᯂᯪᯖᯩ ᯀᯔᯮᯑᯪ ᯉ ᯔᯖᯩ᯲ᯔᯖᯩ᯲ ᯖᯄ᯦ᯮ᯲ᯄ᯦ᯉ᯲ ᯞᯬᯔᯬ ᯉᯪ ᯒᯬᯂ ᯉᯪ ᯐᯮᯀᯒᯔᯮᯑᯪ ᯤ

3:5 Songon i do nang dila i: Ruas na metmet do i, alai godang do hatahatana; metmet pe api i, digalahi do tombak na sai balga! ᯘᯬᯝᯉᯬ᯲ ᯤ ᯑᯬ ᯉᯰ ᯑᯪᯞ ᯤ ᯒᯮᯀᯘ᯲ ᯉ ᯔᯖᯩ᯲ᯔᯖᯩ᯲ ᯑᯬ ᯤ ᯀᯞᯤ ᯎᯬᯑᯰ ᯑᯬ ᯂᯖᯂᯖᯉ ᯔᯖᯩ᯲ᯔᯖᯩ᯲ ᯇᯩ ᯀᯇᯪ ᯤ ᯑᯪᯂᯞᯂᯪ ᯑᯬ ᯖᯔᯬ᯲ᯅᯄ᯦᯲ ᯉ ᯘᯤ ᯅᯞ᯲ᯎ

3:6 Api do nang dila i, portibi hageduhon; songon i do pangalaho ni dila di tongatonga ni angka ruas ni dagingta, dipahodar do sandok daging i jala dipagalak do panggulmiton ni ngolunta i, dung galak dibahen na roko. ᯀᯇᯪ ᯑᯬ ᯉᯰ ᯑᯪᯞ ᯤ ᯇᯒᯬ᯲ᯖᯪᯅᯪ ᯂᯎᯩᯑᯮᯂᯉᯬ᯲ ᯘᯬᯝᯉᯬ᯲ ᯤ ᯑᯬ ᯇᯝᯞᯂᯬ ᯉᯪ ᯑᯪᯞ ᯑᯪ ᯖᯬᯝᯖᯬᯝ ᯉᯪ ᯀᯰᯄ᯦ ᯒᯮᯀᯘ᯲ ᯉᯪ ᯑᯎᯰᯪᯖ ᯑᯪᯇᯂᯬᯑᯒ᯲ ᯑᯬ ᯘᯉ᯲ᯑᯄ᯦ᯬ᯲ ᯑᯎᯰᯪ ᯤ ᯐᯞ ᯑᯪᯇᯎᯞᯄ᯦᯲ ᯑᯬ ᯇᯰᯎᯞᯮ᯲ᯔᯪᯖᯉᯬ᯲ ᯉᯪ ᯝᯬᯞᯉᯮ᯲ᯖ ᯤ ᯑᯮᯰ ᯎᯞᯄ᯦᯲ ᯑᯪᯅᯂᯉᯩ᯲ ᯉ ᯒᯬᯂ᯦ᯬ

3:7 Ai nasa ragam ni binatang, angka pidong, ulok ro di dengke tarpatunduk do, gabe tunduk dibahen hajolmaon. ᯀᯤ ᯉᯘ ᯒᯎᯔ᯲ ᯉᯪ ᯅᯪᯉᯖᯰ ᯀᯰᯄ᯦ ᯇᯪᯑᯰᯬ ᯥᯞᯂ᯦᯦ᯬ᯲ ᯒᯬ ᯑᯪ ᯑᯰᯩᯄᯩ ᯖᯒ᯲ᯇᯖᯉᯮ᯲ᯑᯄ᯦ᯮ᯲ ᯑᯬ ᯎᯅᯩ ᯖᯉᯮ᯲ᯑᯄ᯦ᯮ᯲ ᯑᯪᯅᯂᯉᯩ᯲ ᯂᯐᯞᯬ᯲ᯔᯀᯉᯬ᯲

3:8 Alai ndang tarpatunduk jolma anggo dila i; panjahati na so marpansadian do i, gok bisa hamatean. ᯀᯞᯤ ᯉ᯲ᯑᯰ ᯖᯒ᯲ᯇᯖᯉᯮ᯲ᯑᯄ᯦ᯮ᯲ ᯐᯞᯬ᯲ᯔ ᯀᯰᯎᯬ ᯑᯪᯞ ᯤ ᯇᯉ᯲ᯐᯂᯖᯪ ᯉ ᯘᯬ ᯔᯒ᯲ᯇᯉ᯲ᯘᯑᯪᯀᯉ᯲ ᯑᯬ ᯤ ᯎᯄ᯦ᯬ᯲ ᯅᯪᯘ ᯂᯔᯖᯩᯀᯉ᯲

3:9 I do ulaulanta mamuji Tuhan i, Amanta; laos i do tapangke mambuburahon jolma, na tinompa marguru tu rupa ni Debata. ᯤ ᯑᯬ ᯥᯞᯥᯞᯉ᯲ᯖ ᯔᯔᯮᯐᯪ ᯖᯮᯂᯉ᯲ ᯤ ᯀᯔᯉ᯲ᯖ ᯞᯀᯘᯬ᯲ ᯤ ᯑᯬ ᯖᯇᯰᯄᯩ ᯔᯔ᯲ᯅᯮᯅᯮᯒᯂᯉᯬ᯲ ᯐᯞᯬ᯲ᯔ ᯉ ᯖᯪᯉᯔᯬ᯲ᯇ ᯔᯒ᯲ᯎᯮᯒᯮ ᯖᯮ ᯒᯮᯇ ᯉᯪ ᯑᯩᯅᯖ

3:10 Sian sada pamangan do ruar pamujion dohot pamuraion. Ale angka donganku, ndang tama masa songon i! ᯘᯪᯀᯉ᯲ ᯘᯑ ᯇᯔᯝᯉ᯲ ᯑᯬ ᯒᯮᯀᯒ᯲ ᯇᯔᯮᯐᯪᯀᯉᯬ᯲ ᯑᯬᯂᯖᯬ᯲ ᯇᯔᯮᯒᯤᯀᯉᯬ᯲ ᯀᯞᯩ ᯀᯰᯄ᯦ ᯑᯬᯝᯉ᯲ᯄ᯦ᯮ ᯉ᯲ᯑᯰ ᯖᯔ ᯔᯘ ᯘᯬᯝᯉᯬ᯲ ᯤ

3:11 Tung adong ma baba ni mual sada, na marbullakkon na tonggi dohot na paet? ᯖᯮᯰ ᯀᯑᯰᯬ ᯔ ᯅᯅ ᯉᯪ ᯔᯮᯀᯞ᯲ ᯘᯑ ᯉ ᯔᯒ᯲ᯅᯞᯮ᯲ᯞᯄ᯦᯲ᯄ᯦ᯉᯬ᯲ ᯉ ᯖᯰᯬᯎᯪ ᯑᯬᯂᯖᯬ᯲ ᯉ ᯇᯀᯖᯩ᯲

3:12 Ale angka donganku, tung tarparbuehon antajau ma unte, manang tubu antajau sian hau anggur? Ndang tarpapuas mual na ansim tapian na uli. ᯀᯞᯩ ᯀᯰᯄ᯦ ᯑᯬᯝᯉ᯲ᯄ᯦ᯮ ᯖᯮᯰ ᯖᯒ᯲ᯇᯒ᯲ᯅᯮᯀᯩᯂᯉᯬ᯲ ᯀᯉ᯲ᯖᯐᯥ ᯔ ᯀᯉᯮ᯲ᯖᯩ ᯔᯉᯰ ᯖᯮᯅᯮ ᯀᯉ᯲ᯖᯐᯥ ᯘᯪᯀᯉ᯲ ᯂᯥ ᯀᯰᯎᯒᯮ᯲ ᯉ᯲ᯑᯰ ᯖᯒ᯲ᯇᯇᯮᯀᯘ᯲ ᯔᯮᯀᯞ᯲ ᯉ ᯀᯉ᯲ᯘᯔᯪ᯲ ᯖᯇᯪᯀᯉ᯲ ᯉ ᯥᯞᯪ

3:13 Ise hamu na bisuk jala na pantas marroha? Sian denggan ni parangena ma dipataridahon ibana angka ulaonna marhitehite halambohon ni habisuhon! ᯤᯘᯩ ᯂᯔᯮ ᯉ ᯅᯪᯘᯄ᯦ᯮ᯲ ᯐᯞ ᯉ ᯇᯉ᯲ᯖᯘ᯲ ᯔᯒ᯲ᯒᯬᯂ ᯘᯪᯀᯉ᯲ ᯑᯰᯩᯎᯉ᯲ ᯉᯪ ᯇᯒᯝᯩᯉ ᯔ ᯑᯪᯇᯖᯒᯪᯑᯂᯉᯬ᯲ ᯤᯅᯉ ᯀᯰᯄ᯦ ᯥᯞᯀᯉᯬ᯲ᯉ ᯔᯒ᯲ᯂᯪᯖᯩᯂᯪᯖᯩ ᯂᯞᯔ᯲ᯅᯬᯂᯉᯬ᯲ ᯉᯪ ᯂᯅᯪᯘᯮᯂᯉᯬ᯲

3:14 Alai molo ditiop hamu pangiburuon na paet dohot hatongkaron di bagasan rohamuna, unang ma puji hamu dirimuna maralohon hasintongan, huhut margabus! ᯀᯞᯤ ᯔᯬᯞᯬ ᯑᯪᯖᯪᯀᯇᯬ᯲ ᯂᯔᯮ ᯇᯝᯪᯅᯮᯒᯮᯀᯉᯬ᯲ ᯉ ᯇᯀᯖᯩ᯲ ᯑᯬᯂᯖᯬ᯲ ᯂᯖᯰᯬᯄ᯦ᯒᯉᯬ᯲ ᯑᯪ ᯅᯎᯘᯉ᯲ ᯒᯬᯂᯔᯮᯉ ᯥᯉᯰ ᯔ ᯇᯮᯐᯪ ᯂᯔᯮ ᯑᯪᯒᯪᯔᯮᯉ ᯔᯒᯞᯬᯂᯉᯬ᯲ ᯂᯘᯉᯪ᯲ᯖᯬᯝᯉ᯲ ᯂᯮᯂᯖᯮ᯲ ᯔᯒ᯲ᯎᯅᯘᯮ᯲

3:15 Ndada i habisuhon na ro sian ginjang; na sian tano do i, sian roha ni jolma, sian sibolis. ᯉ᯲ᯑᯑ ᯤ ᯂᯅᯪᯘᯮᯂᯉᯬ᯲ ᯉ ᯒᯬ ᯘᯪᯀᯉ᯲ ᯎᯉᯪ᯲ᯐᯰ ᯉ ᯘᯪᯀᯉ᯲ ᯖᯉᯬ ᯑᯬ ᯤ ᯘᯪᯀᯉ᯲ ᯒᯬᯂ ᯉᯪ ᯐᯞᯬ᯲ᯔ ᯘᯪᯀᯉ᯲ ᯘᯪᯅᯬᯞᯘᯪ᯲

3:16 Ai ia disi pangiburuon dohot hatongkaron, disi ma hagaoron dohot sandok ulaon hajahaton. ᯀᯤ ᯤᯀ ᯑᯪᯘᯪ ᯇᯝᯪᯅᯮᯒᯮᯀᯉᯬ᯲ ᯑᯬᯂᯖᯬ᯲ ᯂᯖᯰᯬᯄ᯦ᯒᯉᯬ᯲ ᯑᯪᯘᯪ ᯔ ᯂᯎᯀᯬᯒᯉᯬ᯲ ᯑᯬᯂᯖᯬ᯲ ᯘᯉ᯲ᯑᯄᯬ᯲ ᯥᯞᯀᯉᯬ᯲ ᯂᯐᯂᯖᯉᯬ᯲

3:17 Alai anggo habisuhon na sian ginjang i, sandok na bontor do i, olo mardame, lambok, pangoloi, gok asi ni roha dohot parbue hadengganon, dao sian hagangguon nang pangansion. ᯀᯞᯤ ᯀᯰᯎᯬ ᯂᯅᯪᯘᯮᯂᯉᯬ᯲ ᯉ ᯘᯪᯀᯉ᯲ ᯎᯉᯪ᯲ᯐᯰ ᯤ ᯘᯉ᯲ᯑᯄ᯦ᯬ᯲ ᯉ ᯅᯉᯬ᯲ᯖᯒᯬ᯲ ᯑᯬ ᯤ ᯀᯬᯞᯬ ᯔᯒ᯲ᯑᯔᯩ ᯞᯔ᯲ᯅᯄ᯦ᯬ᯲ ᯇᯝᯬᯞᯬᯤ ᯎᯄ᯦ᯬ᯲ ᯀᯘᯪ ᯉᯪ ᯒᯬᯂ ᯑᯬᯂᯖᯬ᯲ ᯇᯒ᯲ᯅᯮᯀᯩ ᯂᯑᯰᯩᯎᯉᯉᯬ᯲ ᯑᯀᯬ ᯘᯪᯀᯉ᯲ ᯉᯰ ᯇᯝᯉ᯲ᯘᯪᯀᯉᯬ᯲

3:18 Alai di bagasan dame do disaburhon parbue hatigoran di angka na mangulahon dame i. ᯀᯞᯤ ᯑᯪ ᯅᯎᯘᯉ᯲ ᯑᯔᯩ ᯑᯬ ᯑᯪᯘᯅᯒᯮ᯲ᯂᯉᯬ᯲ ᯇᯒ᯲ᯅᯮᯀᯩ ᯂᯖᯪᯎᯬᯒᯉ᯲ ᯑᯪ ᯀᯰᯄ᯦ ᯉ ᯔᯝᯮᯞᯂᯉᯬ᯲ ᯑᯔᯩ ᯤ

Jakobus ᯐᯄ᯦ᯬᯅᯘᯮ᯲ 4

4:1 Sian dia do angka parbadaon dohot parmusuon na di hamu? Nda sian hisaphisap, angka na maralo di bagasan angka ruasmuna! ᯘᯪᯀᯉ᯲ ᯑᯪᯀ ᯑᯬ ᯀᯰᯄ᯦ ᯇᯒ᯲ᯅᯑᯀᯉᯬ᯲ ᯑᯬᯂᯖᯬ᯲ ᯇᯒ᯲ᯔᯮᯘᯮᯀᯉᯬ᯲ ᯉ ᯑᯪ ᯂᯔᯮ ᯉ᯲ᯑ ᯘᯪᯀᯉ᯲ ᯂᯪᯘᯇ᯲ᯂᯪᯘᯇ᯲ ᯀᯰᯄ᯦ ᯉ ᯔᯒᯞᯬ ᯑᯪ ᯅᯎᯘᯉ᯲ ᯀᯰᯄ᯦ ᯒᯮᯀᯘ᯲ᯔᯮᯉ

4:2 Na marsangkapi do rohamuna, alai ndang dapotan; na mambunu do hamu jala mangiburu, laos so taruli hamu. Na masialoan do hamu jala marmusu, so adong di hamu, ala so martangiang hamu. ᯉ ᯔᯒ᯲ᯘᯰᯄ᯦ᯇᯪ ᯑᯬ ᯒᯬᯂᯔᯮᯉ ᯀᯞᯤ ᯉ᯲ᯑᯰ ᯑᯇᯬᯖᯉ᯲ ᯉ ᯔᯔ᯲ᯅᯮᯉᯮ ᯑᯬ ᯂᯔᯮ ᯐᯞ ᯔᯝᯪᯅᯮᯒᯮ ᯞᯀᯘᯬ᯲ ᯘᯬ ᯖᯒᯮᯞᯪ ᯂᯔᯮ ᯉ ᯔᯘᯪᯀᯞᯬᯀᯉ᯲ ᯑᯬ ᯂᯔᯮ ᯐᯞ ᯔᯒ᯲ᯔᯮᯘᯮ ᯘᯬ ᯀᯑᯰᯬ ᯑᯪ ᯂᯔᯮ ᯀᯞ ᯘᯬ ᯔᯒ᯲ᯖᯝᯪᯀᯰ ᯂᯔᯮ

4:3 Na martangiang do hamu nian; alai ndang manjalo, ala sala tangiangmuna, ai naeng pansuasaehononmuna do i di bagasan hahisaponmuna. ᯉ ᯔᯒ᯲ᯖᯝᯪᯀᯰ ᯑᯬ ᯂᯔᯮ ᯉᯪᯀᯉ᯲ ᯀᯞᯤ ᯉ᯲ᯑᯰ ᯔᯉ᯲ᯐᯞᯬ ᯀᯞ ᯘᯞ ᯖᯝᯪᯀᯰᯔᯮᯉ ᯀᯤ ᯉᯀᯰᯩ ᯇᯉ᯲ᯘᯮᯀᯘᯀᯩᯂᯪᯉᯉᯬ᯲ᯔᯮᯉ ᯑᯬ ᯤ ᯑᯪ ᯅᯎᯘᯉ᯲ ᯂᯂᯪᯘᯇᯉᯬ᯲ᯔᯮᯉ

4:4 Hamu angka pangalangkup, ndang diboto hamu, hamusuon dompak Debata do paralealeon dohot portibi on? Asa, na naeng aleale ni portibi on, dipajongjong do dirina, gabe alo ni Debata. ᯂᯔᯮ ᯀᯰᯄ᯦ ᯇᯝᯞᯰᯄ᯦ᯇᯮ᯲ ᯉ᯲ᯑᯰ ᯑᯪᯅᯬᯖᯬ ᯂᯔᯮ ᯂᯔᯮᯘᯮᯀᯉᯬ᯲ ᯑᯔᯬ᯲ᯇᯄ᯦᯲ ᯑᯩᯅᯖ ᯑᯬ ᯇᯒᯞᯩᯀᯞᯩᯀᯉᯬ᯲ ᯑᯬᯂᯖᯬ᯲ ᯇᯒᯬ᯲ᯖᯪᯅᯪ ᯀᯉᯬ᯲ ᯀᯘ ᯉ ᯉᯀᯰᯩ ᯀᯞᯩᯀᯞᯩ ᯉᯪ ᯇᯒᯬ᯲ᯖᯪᯅᯪ ᯀᯉᯬ᯲ᯀᯉᯬ᯲ ᯑᯪᯇᯐᯰᯬᯐᯰᯬ ᯑᯬ ᯑᯪᯒᯪᯉ ᯎᯅᯩ ᯀᯞᯬ ᯉᯪ ᯑᯩᯅᯖ

4:5 Manang ninna rohamuna, gait do na nidok ni Surat i? Pangiburu do Tondi i, naung dipadiri di bagasan hamu. ᯔᯉᯰ ᯉᯉᯪ᯲ᯉ ᯒᯬᯂᯔᯮᯉ ᯎᯀᯖᯪ᯲ ᯑᯬ ᯉ ᯉᯪᯑᯄ᯦ᯬ᯲ ᯉᯪ ᯘᯮᯒᯖ᯲ ᯤ ᯇᯝᯪᯅᯮᯒᯮ ᯑᯬ ᯖᯉᯬ᯲ᯑᯪ ᯤ ᯉᯀᯮᯰ ᯑᯪᯇᯑᯪᯒᯪ ᯑᯪ ᯅᯎᯘᯉ᯲ ᯂᯔᯮ

4:6 Alai lam gumodang do asi ni roha dilehon; ala ni i do didok: "Dialo Debata do angka na ginjang roha, alai dilehon do asi ni roha tu angka na serep marroha!" ᯀᯞᯤ ᯞᯔ᯲ ᯎᯮᯔᯬᯑᯰ ᯑᯬ ᯀᯘᯪ ᯉᯪ ᯒᯬᯂ ᯑᯪᯞᯩᯂᯉᯬ᯲ ᯀᯞ ᯉᯪ ᯤ ᯑᯪᯑᯄ᯦ᯬ᯲ ᯑᯪᯀᯞᯬ ᯑᯩᯅᯖ ᯑᯬ ᯀᯰᯄ᯦ ᯉ ᯎᯉᯪ᯲ᯝᯰ ᯒᯬᯂ ᯀᯞᯤ ᯑᯪᯞᯩᯂᯉᯬ᯲ ᯑᯬ ᯀᯘᯪ ᯉᯪ ᯒᯬᯂ ᯖᯮ ᯀᯰᯄ᯦ ᯉ ᯘᯩᯒᯇᯩ᯲ ᯔᯒ᯲ᯒᯬᯂ

4:7 Antong, oloi hamu ma Debata; alo hamu ma sibolis i, dung i maporus ma ibana sian hamu. ᯀᯉ᯲ᯖᯰᯬ ᯀᯬᯞᯬᯤ ᯂᯔᯮ ᯔ ᯑᯩᯅᯖ ᯀᯞᯬ ᯂᯔᯮ ᯔ ᯘᯪᯅᯬᯞᯘᯪ᯲ ᯤ ᯑᯮᯰ ᯤ ᯔᯇᯬᯒᯘᯮ᯲ ᯔ ᯤᯅᯉ ᯘᯪᯀᯉ᯲ ᯂᯔᯮ

4:8 Pajonok hamu ma tu Debata, dung i pajonohonna ma tu hamu! Paias ma tanganmuna, hamu angka pardosa, jala pabontor ma rohamuna hamu angka na mardua roha! ᯇᯐᯬᯉᯄ᯦ᯬ᯲ ᯂᯔᯮ ᯔ ᯖᯮ ᯑᯩᯅᯖ ᯑᯮᯰ ᯤ ᯇᯐᯬᯉᯬᯂᯉᯬ᯲ᯉ ᯔ ᯖᯮ ᯂᯔᯮ ᯇᯤᯀᯘ᯲ ᯔ ᯖᯝᯉ᯲ᯔᯮᯉ ᯂᯔᯮ ᯀᯰᯄ᯦ ᯇᯒ᯲ᯑᯬᯘ ᯐᯞ ᯇᯅᯉᯬ᯲ᯖᯒᯬ᯲ ᯔ ᯒᯬᯂᯔᯮᯉ ᯂᯔᯮ ᯀᯰᯄ᯦ ᯉ ᯔᯒ᯲ᯑᯮᯀ ᯒᯬᯂ

4:9 Arsakkon hamu ma jeamuna; mangangguhi jala tumatangis ma hamu; muba ma parengkelonmuna gabe partangison, nang halalas ni roha gabe arsak ni roha! ᯀᯒ᯲ᯘᯄ᯦᯲ᯂᯉᯬ᯲ ᯂᯔᯮ ᯔ ᯐᯩᯀᯔᯮᯉ ᯔᯝᯰᯎᯮᯂᯪ ᯐᯞ ᯖᯮᯔᯖᯝᯘᯪ᯲ ᯔ ᯂᯔᯮ ᯔᯮᯅ ᯔ ᯇᯒᯰᯩᯄᯩᯞᯉᯬ᯲ᯔᯮᯉ ᯎᯅᯩ ᯇᯒ᯲ᯖᯝᯪᯘᯉᯬ᯲ ᯉᯰ ᯂᯞᯞᯘ᯲ ᯉᯪ ᯒᯬᯂ ᯎᯅᯩ ᯀᯒ᯲ᯘᯄ᯦᯲ ᯉᯪ ᯒᯬᯂ

4:10 Paserep hamu ma rohamuna maradophon Tuhan i, dung i patimboonna ma hamu. ᯇᯘᯩᯒᯇᯩ᯲ ᯂᯔᯮ ᯔ ᯒᯬᯂᯔᯮᯉ ᯔᯒᯑᯇᯬ᯲ᯂᯉᯬ᯲ ᯖᯮᯂᯉ᯲ ᯤ ᯑᯮᯰ ᯤ ᯇᯖᯔᯪ᯲ᯅᯬᯀᯉᯬ᯲ᯉ ᯔ ᯂᯔᯮ

4:11 Unang ma hamu masipahatahataan, ale angka dongan; na mangkatahata jala manguhumuhumi donganna, mangkatahata jala manguhumuhumi patik do i. Alai molo diuhumi ho patik i, panguhum do ho, ndada siula na nidok ni patik i. ᯥᯉᯰ ᯔ ᯂᯔᯮ ᯔᯘᯪᯇᯂᯖᯂᯖᯀᯉ᯲ ᯀᯞᯩ ᯀᯰᯄ᯦ ᯑᯬᯝᯉ᯲ ᯉ ᯔᯰᯄ᯦ᯖᯂᯖ ᯐᯞ ᯔᯝᯮᯂᯔᯮ᯲ᯥᯂᯮᯔᯪ ᯑᯬᯝᯉ᯲ᯉ ᯔᯰᯄ᯦ᯖᯂᯖ ᯐᯞ ᯔᯝᯮᯂᯔᯮ᯲ᯥᯂᯮᯔᯪ ᯇᯖᯄ᯦ᯪ᯲ ᯑᯬ ᯤ ᯀᯞᯤ ᯔᯬᯞᯬ ᯑᯪᯥᯂᯮᯔᯪ ᯂᯬ ᯇᯖᯄ᯦ᯪ᯲ ᯤ ᯇᯝᯮᯂᯔᯮ᯲ ᯑᯬ ᯂᯬ ᯉ᯲ᯑᯑ ᯘᯪᯥᯞ ᯉ ᯉᯪᯑᯄ᯦ᯬ᯲ ᯉᯪ ᯇᯖᯄ᯦ᯪ᯲ ᯤ

4:12 Sada do Sipajongjong patik jala Panguhum; i do na tarbahen paluahon dohot mangagohon. Alai ho, ise do ho, umbahen na diuhumi ho donganmu? ᯘᯑ ᯑᯬ ᯘᯪᯇᯐᯰᯬᯐᯰᯬ ᯇᯖᯄ᯦ᯪ᯲ ᯐᯞ ᯇᯝᯮᯂᯔᯮ᯲ ᯤ ᯑᯬ ᯉ ᯖᯒ᯲ᯅᯂᯉᯩ᯲ ᯇᯞᯮᯀᯂᯉᯬ᯲ ᯑᯬᯂᯖᯬ᯲ ᯔᯝᯎᯬᯂᯉᯬ᯲ ᯀᯞᯤ ᯂᯬ ᯤᯘᯩ ᯑᯬ ᯂᯬ ᯀᯔᯮ᯲ᯅᯂᯉᯩ᯲ ᯉ ᯑᯪᯥᯂᯮᯔᯪ ᯂᯬ ᯑᯬᯝᯉ᯲ᯔᯮ

4:13 E hamu, didok hamu do: Sadari on manang marsogot laho ma hami tu huta adui, asa disi hami sataon martigatiga jala mangomoomo. ᯀᯩ ᯂᯔᯮ ᯑᯪᯑᯄ᯦ᯬ᯲ ᯂᯔᯮ ᯑᯬ ᯘᯑᯒᯪ ᯀᯉᯬ᯲ ᯔᯉᯰ ᯔᯒ᯲ᯘᯬᯎᯖᯬ᯲ ᯞᯂᯬ ᯔ ᯂᯔᯪ ᯖᯮ ᯂᯮᯖ ᯀᯑᯮᯤ ᯀᯘ ᯑᯪᯘᯪ ᯂᯔᯪ ᯘᯖᯀᯉᯬ᯲ ᯔᯒ᯲ᯖᯪᯎᯖᯪᯎ ᯐᯞ ᯔᯝᯬᯔᯬᯀᯬᯔᯬ

4:14 So adong diboto hamu na masa marsogot; ai aha do hosamuna! Suman ma hamu tu timus, na tarida satongkin, dung i gabe so haidaan be. ᯘᯬ ᯀᯑᯰᯬ ᯑᯪᯅᯬᯖᯬ ᯂᯔᯮ ᯉ ᯔᯘ ᯔᯒ᯲ᯘᯬᯎᯖᯬ᯲ ᯀᯤ ᯀᯂ ᯑᯬ ᯂᯬᯘᯔᯮᯉ ᯘᯮᯔᯉ᯲ ᯔ ᯂᯔᯮ ᯖᯮ ᯖᯪᯔᯘᯮ᯲ ᯉ ᯖᯒᯪᯑ ᯘᯖᯰᯬᯄ᯦ᯉᯪ᯲ ᯑᯰᯮ ᯤ ᯎᯅᯩ ᯘᯬ ᯂᯤᯑᯀᯉ᯲ ᯅᯩ

4:15 Singkat ni i ma nian dohononmuna: Molo na lomo roha ni Tuhan i, mangolu ma hami, jala bahenonnami ma on dohot an. ᯘᯰᯪᯄ᯦ᯖ᯲ ᯉᯪ ᯤ ᯔ ᯉᯪᯀᯉ᯲ ᯑᯬᯂᯬᯉᯉᯬ᯲ᯔᯮᯉ ᯔᯬᯞᯬ ᯉ ᯞᯬᯔᯬ ᯒᯬᯂ ᯉᯪ ᯖᯮᯂᯉ᯲ ᯤ ᯔᯝᯬᯞᯮ ᯔ ᯂᯔᯪ ᯐᯞ ᯅᯂᯩᯉᯉᯬ᯲ᯉᯔᯪ ᯔ ᯀᯉᯬ᯲ ᯑᯬᯂᯖᯬ᯲ ᯀᯉ᯲

4:16 Hape ditengatengahon hamu do hata manggang muna; na jahat do nasa panenganengahon sisongon i. ᯂᯇᯩ ᯑᯪᯖᯩᯝᯖᯩᯝᯂᯉᯬ᯲ ᯂᯔᯮ ᯑᯬ ᯂᯖ ᯔᯰᯎᯰ ᯔᯮᯉ ᯉ ᯐᯂᯖ᯲ ᯑᯬ ᯉᯘ ᯇᯉᯩᯝᯉᯩᯝᯂᯉᯬ᯲ ᯘᯪᯘᯬᯝᯉᯬ᯲ ᯤ

4:17 Antong, na umboto mambahen na denggan, gabe ndang diulahon, na mardosa ma ibana disi. ᯀᯉ᯲ᯖᯰᯬ ᯉ ᯀᯔᯮ᯲ᯅᯬᯖᯬ ᯔᯔ᯲ᯅᯂᯉᯩ᯲ ᯉ ᯑᯰᯩᯎᯉ᯲ ᯎᯅᯩ ᯉ᯲ᯑᯰ ᯑᯪᯥᯞᯂᯉᯬ᯲ ᯉ ᯔᯒ᯲ᯑᯬᯘ ᯔ ᯤᯅᯉ ᯑᯪᯘᯪ

Jakobus ᯐᯄ᯦ᯬᯅᯘᯮ᯲ 5

5:1 E hamu angka na mora, tumatangis ma hamu jala mangangguhi managam haporsuhon, na naeng songgop tu hamu. ᯀᯩ ᯂᯔᯮ ᯀᯰᯄ᯦ ᯑᯬᯝᯉ᯲ ᯉ ᯔᯬᯒ ᯖᯮᯔᯖᯝᯘᯪ᯲ ᯔ ᯂᯔᯮ ᯐᯞ ᯔᯝᯰᯎᯮᯂᯪ ᯔᯉᯎᯔ᯲ ᯂᯇᯒᯬ᯲ᯘᯮᯂᯉᯬ᯲ ᯉ ᯉᯀᯰᯩ ᯘᯰᯬᯎᯇᯬ᯲ ᯖᯮ ᯂᯔᯮ

5:2 Nunga busuk hamoraonmuna, nunga ngitngiton ulosmuna. ᯉᯮᯝ ᯅᯮᯘᯄ᯦ᯮ᯲ ᯂᯔᯬᯒᯀᯉᯬ᯲ᯔᯮᯉ ᯉᯮᯝ ᯝᯖᯪ᯲ᯝᯪᯖᯉᯬ᯲ ᯥᯞᯘᯬ᯲ᯔᯮᯉ

5:3 Naung tasihon do sere dohot perakmuna, jala sitindangi dompak hamu do tasik i, na manggagat tu sibukmuna songon api. Dipapungu hamu do arta di angka ari na parpudi. ᯉᯀᯮᯰ ᯖᯘᯪᯂᯉᯬ᯲ ᯑᯬ ᯘᯩᯒᯩ ᯑᯬᯂᯖᯬ᯲ ᯇᯩᯒᯄ᯦᯲ᯔᯮᯉ ᯐᯞ ᯘᯪᯖᯉᯪ᯲ᯑᯝᯪ ᯑᯔᯬ᯲ᯇᯄ᯦᯲ ᯂᯔᯮ ᯑᯬ ᯖᯘᯄ᯦ᯪ᯲ ᯤ ᯉ ᯔᯰᯎᯎᯖ᯲ ᯖᯮ ᯘᯪᯅᯄ᯦ᯮ᯲ᯔᯮᯉ ᯘᯬᯝᯉᯬ᯲ ᯀᯇᯪ ᯑᯪᯇᯇᯮᯝᯮ ᯂᯔᯮ ᯑᯬ ᯀᯒ᯲ᯖ ᯑᯪ ᯀᯰᯄ᯦ ᯀᯒᯪ ᯉ ᯇᯒ᯲ᯇᯮᯑᯪ

5:4 Na maungaung do na nidobomuna, i ma upa ni angka pangula na manggotil angka haumamuna, jala panjouon ni angka panabi, nunga sahat tu pinggol ni Tuhan Sebaot! ᯉ ᯔᯀᯮᯰᯀᯀᯮᯰ ᯑᯬ ᯉ ᯉᯪᯑᯬᯅᯬᯔᯮᯉ ᯤ ᯔ ᯥᯇ ᯉᯪ ᯀᯰᯄ᯦ ᯂᯥᯔᯔᯮᯉ ᯐᯞ ᯇᯉ᯲ᯐᯬᯥᯘᯉᯬ᯲ ᯉᯪ ᯀᯰᯄ᯦ ᯇᯉᯅᯪ ᯉᯮᯝ ᯘᯂᯖ᯲ ᯖᯮ ᯇᯰᯪᯎᯞᯬ᯲ ᯉᯪ ᯖᯮᯂᯉ᯲ ᯘᯩᯅᯀᯖᯬ᯲

5:5 Tarlobi do pargadombusonmuna di tano on, dipamokmok hamu do dirimuna di ari pamotongan. ᯖᯒ᯲ᯞᯬᯅᯪ ᯑᯬ ᯇᯒ᯲ᯎᯑᯔᯬ᯲ᯅᯮᯘᯉᯬ᯲ᯔᯮᯉ ᯑᯪ ᯖᯉᯬ ᯀᯉᯬ᯲ ᯑᯪᯇᯔᯄ᯦ᯬ᯲ᯔᯄ᯦ᯬ᯲ ᯂᯔᯮ ᯑᯬ ᯑᯪᯒᯪᯔᯮᯉ ᯑᯪ ᯀᯒᯪ ᯇᯔᯬᯖᯬᯝᯉ᯲

5:6 Diuhumi dibunu hamu do Partigor i; ndang dialo Ibana hamu! ᯑᯪᯥᯂᯮᯔᯪ ᯑᯪᯅᯮᯉᯮ ᯂᯔᯮ ᯑᯬ ᯇᯒ᯲ᯖᯪᯎᯒᯬ᯲ ᯤ ᯉ᯲ᯑᯰ ᯑᯪᯀᯞᯬ ᯤᯅᯉ ᯂᯔᯮ

5:7 Antong, pabenget hamu ma rohamuna, ale angka dongan, sahat ro di haroro ni Tuhan i! Ai parhauma i pe, dipaimaima do parbue na arga, na sian tano i, jala dihabengethon do, paima dijalo udan manogot nang bodari. ᯀᯉ᯲ᯖᯰᯬ ᯇᯅᯩᯝᯖᯩ᯲ ᯂᯔᯮ ᯔ ᯒᯬᯂᯔᯮᯉ ᯀᯞᯩ ᯀᯰᯄ ᯑᯬᯝᯉ᯲ ᯘᯂᯖ᯲ ᯒᯬ ᯑᯪ ᯂᯒᯬᯒᯬ ᯉᯪ ᯖᯮᯂᯉ᯲ ᯤ ᯀᯤ ᯇᯒ᯲ᯂᯥᯔ ᯤ ᯇᯩ ᯑᯪᯇᯤᯔᯤᯔ ᯑᯬ ᯇᯒ᯲ᯅᯮᯀᯩ ᯉ ᯀᯒ᯲ᯎ ᯉ ᯘᯪᯀᯉ᯲ ᯖᯉᯬ ᯤ ᯐᯞ ᯑᯪᯂᯅᯩᯝᯖᯩ᯲ᯂᯉᯬ᯲ ᯑᯬ ᯇᯤᯔ ᯑᯪᯐᯞᯬ ᯥᯑᯉ᯲ ᯔᯉᯬᯎᯖᯬ᯲ ᯉᯰ ᯅᯬᯑᯒᯪ

5:8 Hamu pe, marbenget ni roha ma, patogu hamu ma rohamuna, ai donok do haroro ni Tuhan i. ᯂᯔᯮ ᯇᯩ ᯔᯒ᯲ᯅᯩᯝᯖᯩ᯲ ᯉᯪ ᯒᯬᯂ ᯔ ᯇᯖᯬᯎᯮ ᯂᯔᯮ ᯔ ᯒᯬᯂᯔᯮᯉ ᯀᯤ ᯑᯬᯉᯄ᯦ᯬ᯲ ᯑᯬ ᯂᯒᯬᯒᯬ ᯉᯪ ᯖᯮᯂᯉ᯲ ᯤ

5:9 Unang marhoi hamu maralohon hamu, ale angka dongan, asa unang hona uhum hamu. Nunga jongjong di pintu i Panguhum i! ᯥᯉᯰ ᯔᯒ᯲ᯂᯬᯤ ᯂᯔᯮ ᯔᯒᯞᯬᯂᯉᯬ᯲ ᯂᯔᯮ ᯀᯞᯩ ᯀᯰᯄ᯦ ᯑᯬᯝᯉ᯲ ᯀᯘ ᯥᯉᯰ ᯂᯬᯉ ᯥᯂᯔᯮ᯲ ᯂᯔᯮ ᯉᯮᯝ ᯐᯰᯬᯐᯰᯬ ᯑᯪ ᯇᯉᯪ᯲ᯖᯮ ᯤ ᯇᯝᯮᯂᯔᯮ᯲ ᯤ

5:10 Ale angka dongan; angka panurirang, na marjamita marhitehite Goar ni Tuhan i, ma tiru hamu di haporsuhon dohot di habengeton. ᯀᯞᯩ ᯀᯰᯄ᯦ ᯑᯬᯝᯉ᯲ ᯀᯰᯄ᯦ ᯇᯉᯮᯒᯪᯒ᯦ ᯉ ᯔᯒ᯲ᯐᯔᯪᯖ ᯔᯒ᯲ᯂᯪᯖᯩᯂᯪᯖᯩ ᯎᯬᯀᯒ᯲ ᯉᯪ ᯖᯮᯂᯉ᯲ ᯤ ᯔ ᯖᯪᯒᯮ ᯂᯔᯮ ᯑᯪ ᯂᯇᯒᯬ᯲ᯘᯮᯂᯉᯬ᯲ ᯑᯬᯂᯖᯬ᯲ ᯑᯪ ᯂᯅᯩᯝᯩᯖᯉᯬ᯲

5:11 Taparhatua do angka naung marhabengeton. Dibege hamu do habengeton ni si Job, jala diida hamu do ujung na binahen ni Tuhan i; ai parasiroha bolon do Tuhan i jala partalup ni roha. ᯖᯇᯒ᯲ᯂᯖᯮᯀ ᯑᯬ ᯀᯰᯄ᯦ ᯉᯀᯮᯰ ᯔᯒ᯲ᯂᯅᯩᯝᯩᯖᯉᯬ᯲ ᯑᯪᯅᯩᯎᯩ ᯂᯔᯮ ᯑᯬ ᯂᯅᯩᯝᯩᯖᯉᯬ᯲ ᯉᯪ ᯘᯪ ᯐᯅᯬ᯲ ᯐᯞ ᯑᯪᯤᯑ ᯂᯔᯮ ᯑᯬ ᯥᯐᯮᯰ ᯉ ᯅᯪᯉᯂᯉᯩ᯲ ᯉᯪ ᯖᯮᯂᯉ᯲ ᯤ ᯀᯤ ᯇᯒᯘᯪᯒᯬᯂ ᯅᯬᯞᯉᯬ᯲ ᯑᯬ ᯖᯮᯂᯉ᯲ ᯤ ᯀᯤ ᯇᯒᯘᯪᯒᯬᯂ ᯅᯬᯞᯉᯬ᯲ ᯑᯬ ᯖᯮᯂᯔ᯲ ᯤ ᯐᯞ ᯇᯒ᯲ᯖᯞᯇᯮ᯲ ᯉᯪ ᯒᯬᯂ

5:12 Alai parjolo ni saluhutna, ale angka donganku, unang hamu manolonnolon manang tu parlangitan, manang tu tano on, manang tu panolonan na asing pe; alai hatamuna: Olo, hot ma i olo, ia hata: Ndang hot ma ndang, asa unang madabu hamu tu bagasan uhum. ᯀᯞᯤ ᯇᯒ᯲ᯐᯬᯞᯬ ᯉᯪ ᯘᯞᯮᯂᯖᯮ᯲ᯉ ᯀᯞᯩ ᯀᯰᯄ᯦ ᯑᯬᯝᯉ᯲ᯄ᯦ᯮ ᯥᯉᯰ ᯂᯔᯮ ᯔᯉᯬᯞᯉᯬ᯲ᯉᯬᯞᯉᯬ᯲ ᯔᯉᯰ ᯖᯮ ᯇᯒ᯲ᯞᯝᯪᯖᯉ᯲ ᯔᯉᯰ ᯖᯮ ᯖᯉᯬ ᯀᯉᯬ᯲ ᯔᯉᯰ ᯖᯮ ᯇᯉᯬᯞᯬᯉᯉ᯲ ᯉ ᯀᯘᯰᯪ ᯇᯩ ᯀᯞᯤ ᯂᯖᯔᯮᯉ ᯀᯬᯞᯬ ᯂᯖᯬ᯲ ᯔ ᯤ ᯀᯬᯞᯬ ᯤᯀ ᯂᯖ ᯉ᯲ᯑᯰ ᯂᯖᯬ᯲ ᯔ ᯉ᯲ᯑᯰ ᯀᯘ ᯥᯉᯰ ᯔᯑᯅᯮ ᯂᯔᯮ ᯖᯮ ᯅᯎᯘᯉ᯲ ᯥᯂᯔᯮ᯲

5:13 Molo adong di tongatongamuna na tumaon na porsuk, martangiang ma ibana; molo adong na marlas ni roha, marende ma ibana. ᯔᯬᯞᯬ ᯀᯑᯰᯬ ᯑᯪ ᯖᯬᯝᯖᯬᯝᯔᯮᯉ ᯉ ᯖᯮᯔᯀᯉᯬ᯲ ᯉ ᯇᯒᯬ᯲ᯘᯄ᯦ᯮ᯲ ᯔᯒ᯲ᯖᯝᯪᯀᯰ ᯔ ᯤᯅᯉ ᯔᯬᯞᯬ ᯀᯑᯰᯬ ᯉ ᯔᯒ᯲ᯞᯘ᯲ ᯉᯪ ᯒᯬᯂ ᯔᯒᯉᯩ᯲ᯑᯩ ᯔ ᯤᯅᯉ

5:14 Molo adong na marsahit di hamu, dijou ma angka sintua ni huria i; asa ditangiangkon ibana; didampol ma ibana dohot miak marhitehite Goar ni Tuhan i. ᯔᯬᯞᯬ ᯀᯑᯰᯬ ᯉ ᯔᯒ᯲ᯘᯂᯖᯪ᯲ ᯑᯪ ᯂᯔᯮ ᯑᯪᯐᯬᯥ ᯔ ᯀᯰᯄ᯦ ᯘᯉᯪ᯲ᯖᯮᯀ ᯉᯪ ᯂᯮᯒᯪᯀ ᯤ ᯀᯘ ᯑᯪᯖᯝᯪᯀᯰᯄᯉᯬ᯲ ᯤᯅᯉ ᯑᯪᯑᯔ᯲ᯇᯞᯬ᯲ ᯔ ᯤᯅᯉ ᯑᯬᯂᯖᯬ᯲ ᯔᯪᯀᯄ᯦᯲ ᯔᯒ᯲ᯂᯪᯖᯩᯂᯪᯖᯩ ᯎᯬᯀᯒ᯲ ᯉᯪ ᯖᯮᯂᯉ᯲

5:15 Dung i pangoluon ni tangiang haporseaon i ma na marsahit i, jala paheheon ni Tuhan i ma ibana; sesa ma nang dosana, molo tung adong diulahon. ᯑᯰᯮ ᯤ ᯇᯝᯬᯞᯮᯀᯉᯬ᯲ ᯉᯪ ᯖᯝᯪᯀᯰ ᯂᯇᯒᯬ᯲ᯘᯩᯀᯀᯉᯬ᯲ ᯤ ᯔ ᯉ ᯔᯒ᯲ᯘᯂᯖᯪ᯲ ᯤ ᯐᯞ ᯇᯂᯩᯂᯩᯀᯉᯬ᯲ ᯉᯪ ᯖᯮᯂᯉ᯲ ᯤ ᯔ ᯤᯅᯉ ᯘᯩᯘ ᯔ ᯉᯰ ᯑᯬᯘᯉ ᯔᯬᯞᯬ ᯖᯮᯰ ᯀᯑᯰᯬ ᯑᯪᯥᯞᯂᯉᯬ᯲

5:16 Antong, masitopotan dosa ma hamu dohot masitangiangan, asa malum hamu. Na margogo situtu do tangiang ni partigor, molo dihaburjuhon. ᯀᯉ᯲ᯖᯰᯬ ᯔᯘᯪᯖᯬᯇᯬᯖᯉ᯲ ᯑᯬᯘ ᯔ ᯂᯔᯮ ᯑᯬᯂᯖᯬ᯲ ᯔᯘᯪᯖᯝᯪᯀᯝᯉ᯲ ᯀᯘ ᯔᯞᯔᯮ᯲ ᯂᯔᯮ ᯉ ᯔᯒ᯲ᯎᯬᯎᯬ ᯘᯪᯖᯮᯖᯮ ᯑᯬ ᯖᯝᯪᯀᯰ ᯉᯪ ᯇᯒ᯲ᯖᯪᯎᯒᯬ᯲ ᯔᯬᯞᯬ ᯑᯪᯂᯅᯒᯮ᯲ᯐᯮᯂᯉᯬ᯲

5:17 Jolma do si Elia, sabangko dohot hita; gogo do ibana martangiang, unang jolo ro udan; jala ndang ro udan di tano i, tolu taon onom bulan lelengna. ᯐᯞᯬ᯲ᯔ ᯑᯬ ᯘᯪ ᯀᯩᯞᯪᯀ ᯘᯅᯰᯄ᯦ᯬ ᯑᯬᯂᯖᯬ᯲ ᯂᯪᯖ ᯎᯬᯎᯬ ᯑᯬ ᯤᯅᯉ ᯔᯒ᯲ᯖᯝᯪᯀᯰ ᯥᯉᯰ ᯐᯬᯞᯬ ᯒᯬ ᯥᯑᯉ᯲ ᯐᯞ ᯉ᯲ᯑᯰ ᯒᯬ ᯥᯝᯉ᯲ ᯑᯪ ᯖᯉᯬ ᯤ ᯖᯬᯞᯮ ᯖᯀᯉᯬ᯲ ᯀᯬᯉᯔᯬ᯲ ᯅᯮᯞᯉ᯲ ᯞᯞᯰᯩ᯲ᯉ

5:18 Dung i diulahi ma martangiang, jala dilehon langit i ma udan; dung i dipantubuhon tano i ma parbuena. ᯑᯮᯰ ᯤ ᯑᯪᯥᯞᯂᯪ ᯔ ᯔᯒ᯲ᯖᯝᯪᯀᯰ ᯐᯞ ᯑᯪᯞᯩᯂᯉᯬ᯲ ᯞᯝᯖᯪ᯲ ᯤ ᯔ ᯥᯑᯉ᯲ ᯑᯮᯰ ᯤ ᯑᯪᯇᯉ᯲ᯖᯮᯅᯮᯂᯉᯬ᯲ ᯖᯉᯬ ᯤ ᯔ ᯇᯒ᯲ᯅᯮᯀᯩᯉ

5:19 Ale angka donganku, molo adong di hamu naung lilu sian hasintongan, gabe adong na manogihon ibana mulak, ᯀᯞᯩ ᯀᯰᯄ᯦ ᯑᯬᯝᯉ᯲ᯄ᯦ᯮ ᯔᯬᯞᯬ ᯀᯑᯰᯬ ᯑᯪ ᯂᯔᯮ ᯉᯀᯮᯰ ᯞᯪᯞᯮ ᯘᯪᯀᯉ᯲ ᯂᯘᯉᯪ᯲ᯖᯬᯝᯉ᯲ ᯎᯅᯩ ᯀᯑᯰᯬ ᯉ ᯔᯉᯬᯎᯪᯂᯉᯬ᯲ ᯤᯅᯉ ᯔᯮᯞᯄ᯦᯲

5:20 diboto ma: Na paluahon tondina sian hamatean jala mangkungkupi godang dosa do halak, na manogihon pardosa mulak sian haliluonna i. ᯑᯪᯅᯬᯖᯬ ᯔ ᯉ ᯇᯞᯮᯀᯂᯉᯬ᯲ ᯖᯉᯬ᯲ᯑᯪᯉ ᯘᯪᯀᯉ᯲ ᯂᯔᯖᯩᯀᯉ᯲ ᯐᯞ ᯔᯰᯄ᯦ᯮᯄ᯦ᯮᯇᯪ ᯎᯬᯑᯰ ᯑᯬᯘ ᯑᯬ ᯂᯞᯄ᯦᯲ ᯉ ᯔᯉᯬᯎᯪᯂᯉᯬ᯲ ᯇᯒ᯲ᯑᯬᯘ ᯔᯮᯞᯄ᯦᯲ ᯘᯪᯀᯉ᯲ ᯂᯞᯪᯞᯮᯀᯉᯬ᯲ᯉ