Buku Jesaya

Jesaya ᯐᯩᯘᯛ 1

1:1 On do pangungkapon tu si Jesaya, anak ni si Amos, na niidana taringot tu Juda dohot Jerusalem, uju di ngolu ni si Usia, si Jotam, si Ahas, si Hiskia, angka raja ni Juda. ᯀᯉᯬ᯲ ᯑᯬ ᯇᯝᯮᯰᯄ᯦ᯇᯉᯬ᯲ ᯖᯮ ᯘᯪ ᯐᯩᯘᯛ ᯀᯉᯄ᯦᯲ ᯉᯪ ᯘᯪ ᯀᯔᯘᯬ᯲ ᯉ ᯉᯪᯤᯑᯉ ᯖᯒᯪᯝᯖᯬ᯲ ᯖᯮ ᯐᯮᯑ ᯑᯬᯂᯖᯬ᯲ ᯐᯩᯒᯮᯘᯞᯔᯩ᯲ ᯥᯐᯮ ᯑᯪ ᯝᯬᯞᯮ ᯉᯪ ᯘᯪ ᯥᯘᯪᯀ ᯘᯪ ᯐᯬᯖᯉ᯲ ᯘᯪ ᯀᯂᯘ᯲ ᯘᯪ ᯂᯘᯪ᯲ᯄ᯦ᯪᯀ ᯀᯰᯄ᯦ ᯒᯐ ᯉᯪ ᯐᯮᯑ

1:2 Tangihon, hamu ale angka langit, jala pinggol, ale tano on! Ai mangkuling ma Jahowa: Hupagodanggodang do angka anak, jala hupatimbul, hape marbalik do nasida sian ahu.

1:3 Ditanda jonggi do nampuna ibana, jala diboto halode panggagatan binahen ni tuanna. Alai anggo Israel ndang tumanda ahu, jala ndang marroha bangsongku.

1:4 Marjea ma bangso na mardosai, na sun marhajahaton! Pinompar ni angka parjahat, angka anak jea, angka na tumadingkon Jahowa, angka na mangaleai na badia ni Israel, angka na sumurut tu pudi.

1:5 Tu aha i sai * datdatan linsingan hamu? Sai ditambai hamu do panundalion. Ganup ulu marsahit do, jala ganup roha bebenesan.

1:6 Sian * palak ni pat sahat ro di ulu, ndang adong na hisar di ibana, holan bugang do jala pangalilitan, jala marsalaon nambura; ndang manang dipuntari jala ndang dililiti, jala ndang dipalambok marhitehite miak.

1:7 Tarulang do ia tanomuna, masoksok ia hutamuna dibahen api dipangan halak sileban do haumamuna di jolomuna, gabe halongonan do i, songon na siniaphon ni halak sileban.

1:8 Jala tarpunjung do boru Sion, songon soposopo di porlak anggur, songon undungundung di parjelohan, songon huta na tartungkum.

1:9 Tung sura so * ditebahon Jahowa Zebaot boni di hita otik, siol doshon * Sodom dohot Gumora hita.

1:10 Tangihon hata ni Jahowa, hamu ale angka * partogi ni Sodom! Pinggol hamu, ale bangso Gumora patik ni Debatanta.

1:11 Tudihangku do hinadeak ni peleanmu? ninna Jahowa. Nunga mahap rohangku di angka pelean situtungon sian birubiru tunggal dohot di tabotabo ni lombu angka na pinamokmok, jala ndang dihalomohon rohangku mudar ni angka lombu dohot birubiru dohot hambing tunggal.

1:12 Molo ro hamu manopot tu jolongku, tung ise ma mangido i sian tanganmuna, luntahonmuna alamanku.

1:13 Unang be datdati hamu mamboan pelean sipanganon so marniula, daupa hinabiashon ni rohangku. Poltak ni bulan dohot ari Sabbat, tingting palumba ari raya, ndang tudihangku hajahaton dohot luhutan ari raya.

1:14 Dihagigihon rohangku do angka poltak ni bulan dohot angka tingki pararirayaonmuna; bebenesan do Ahu dibahen, ndang tartaon rohangku be.

1:15 Jala nang dipaherbang hamu tanganmuna, padaoonku do matangku maradophon hamu; jala nang dijotjoti hamu martangiang, ndang tagamon tangihononku hamu; ai gok mudar do tanganmuna i.

1:16 Marburi ma hamu, urasi hamu dirimuna, paholang hamu ma hinaroa ni pambahenanmuna sian jolo ni matangku, pasohot hamu ma manjahati.

1:17 Guruhon hamu ma mambahen na denggan, lulu i hamu ma uhum, pintori hamu na nirupa, patingkos hamu ma uhum tu nasopot so marama, ondingi hamu angka na mabalu.

1:18 Dung i sai ro ma hamu, asa mardabudabu hita, ninna Jahowa. Tung sura rara dosamuna songon abit bunga dapdap, * bontar do bahenonku songon itak; nang pe rara songon abit hasumba, gabe songon hapas do muse.

1:19 Molo ringgas hamu tumangihon dohot mangihuthon, sai panganonmuna do hinadenggan ni gogo ni tano i.

1:20 Alai molo manjua hamu jala mangalo, sai na panganon ni podang do hamu sogot, ai pamangan ni Jahowa do palumbahon.

1:21 Tung beha pambahenna, huta na burju i gabe sibabijalang, gok uhum na sintong ia najolo hatigoran mian di bagasan ibana, hape anggo nuaeng gok angka * partodos.

1:22 Perakmi do muba gabe air, pinamindo ni aek do anggurmi.

1:23 Angka sintuam gabe panggunturi dohot dongan ni angka panangko. Saluhut nasida mangapian di sisip, jala dilului angka silehonlehon; ndang dipatingkos nasida uhum tu na sopot so marama, jala parbadaan ni na mabalu, ndang ro tu jolonasida.

1:24 Dibahen i ninna Jahowa Zebaot na marhuaso di Israel: Oe, sai pasabamonku do rohangku maradophon angka alongku, jala sudolhononku tu angka musungku.

1:25 Jadi ingkon mangulahi ma tanganku mangonai tu ho, jala papitaonku * airmi, songon na sinabun, jala pasurutonku ma nasa simborami.

1:26 Jala pasuangonku ma angka siuhum ho, songon di na robi dohot angka panuturim songon di mulana. * Dung i targoar ma ho huta ni hatigoran, huta na bonar.

1:27 Tartobus do sogot Sion marhitehite habonaron, jala angka na mulak tu ibana marhitehite hatigoran.

1:28 Alai hinamago ni angka pangalaosi dohot pardosa sahali ro do, jala siap do sogot angka na manadingkon Jahowa.

1:29 Ai ingkon tarurak nasida sogot maradophon angka hariara, angka na hinalomohonmuna na sai laon, jala ingkon maila hamu maradophon porlak, angka na pinillitmuna.

1:30 Ai doshon hariara i na marurus bulungna do hamu sogot, jala songon porlak na so adong aek di bagasan.

1:31 Jadi doshon hori na so hasea ma parhuaso hian, jala jadijadianna gabe gurasa, gabe rap gor duansa, jala ndang adong na tuk mangintopi.

Jesaya 2

2:1 On do hata na niida ni si Jesaya, anak ni si Amos taringot tu Juda dohot Jerusalem.

2:2 Masa do sogot, di ujung ni angka ari: Hot disi dipaojak dolok ni bagas ni Jahowa di punsu ni angka dolok, jala huminsat sian angka robean, jadi marrongoman ma tusi sude angka parbegu.

2:3 Jala torop angka bangso mandapothon tusi angka na mandok: Beta hita tanangkohi ma dolok ni Jahowa, tu bagas ni Debata ni si Jakkob, asa diajarhon tu hita angka dalanna, jala mardalani hita di angka lapangna. Ai marharoroan sian Sion do sogot patik i, jala sian Jerusalem hata ni Jahowa.

2:4 Jadi manguhum ma ibana di tongatonga ni angka parbegu, jala toruanna torop angka bangso. Jadi patopahononnasida ma podangnasida bahen gigi, jala hujurnasida bahen angka sasabi; ndang be sintahon ni bangso dompak bangso podang i jala ndang be guruhononnasida parmusuon.

2:5 Beta hamu, ale pinompar ni si Jakkob! Mardalani ma hita di hatiuron ni Jahowa.

2:6 Ai nunga diambolongkon ho bangsom, pinompar ni si Jakkob, ala gok roha utiutian sian habinsaran do nasida, jala angka parsibalik mata, songon halak Palistim, jala marsatahi nasida tu anak ni na pulik marga.

2:7 Jala gok perak dohot sere tanonasida i, jala ndang tarlilit artanasida i; jala gok angka * hoda tanonasida, jala ndang habilangan angka huretanasida.

2:8 Jala gok angka ajiajian tanonasida; marsomba do nasida tu jadijadian ni tanganna, tu bahenbahenan ni jarijarina.

2:9 Jadi tarjimput ma jolma i, jala tarurak baoa, jala ndang tagamon marpamuati roham di nasida.

2:10 Suruk hamu ma dolok batu, jala martabuni ma hamu di bagasan orbuk maradophon panonggoti ni Jahowa, dohot maradophon hamuliaon ni hasangaponna.

2:11 Angka * mata ni haginjangon ni jolma patutoruonna, jala tarjimput bahenonna hatimboon ni baoa, jadi sasada Jahowa timbul di ari na sasada i.

2:12 Ai nunga dibuhul Jahowa Zebaot sada ari dompak nasa na ginjang, jala na timbo marroha, dohot dompak nasa na patimbotimbo dirina, asa pajimputonna.

2:13 Nang dompak sude hau ares di Libanon, angka na timbo, jala na rimpur dohot dompak sude hariara di Basan.

2:14 Dohot dompak sude dolok angka na hinsat dohot dompak sude robean na timbo.

2:15 Dohot dompak sude palaspalas angka na timbo, dohot dompak sude parik na gonting.

2:16 Dohot dompak sude angka parau Tarsis, dohot dompak sude ajiajian angka na arga.

2:17 Asa tarjepol haginjangon ni jolma. Jala tarjimput hatimboon ni baoa, jadi sasada Jahowa timbul di ari na sasada i.

2:18 Alai siap situtu ma angka ajiajian.

2:19 Dung i suruhon ni halak ma angka liang dohot ronggang ni tano i maradophon panonggoti ni Jahowa dohot maradophon hamuliaon ni hasangaponna, di na hehe ibana manonggoti sude isi ni tano on.

2:20 Di ari na sasada i ma pandanggurhonon ni jolma ma angka ajiajianna perak dohot sere, angka na pinaulina be bahen sisombasombaonna, tu angka naitoru dohot lompong.

2:21 Jadi suruhonnasida ma angka liang dohot ronggang di dolok batu * maradophon panonggoti ni Jahowa, maradophon hamuliaon ni hasangaponna, di na hehei ibana manonggoti isi ni tano on.

2:22 Dibahen i unang hamu marhaposan tu jolma, na marhosa di bagasan igungna, ai tung pola aha ibana rajuman?

Jesaya 3

3:1 Ai ida ma, unsaton ni Tuhan Jahowa Zebaot ma sian Jerusalem dohot sian Juda * tungkot dohot panungkoli, nasa togong ni roti dohot nasa togong ni aek.

3:2 Jolma na begu dohot baoa parmusu, panguhum dohot panurirang, pangarunding dohot sintua.

3:3 Pangarajai silimapulu dohot na sangap, panuturi dohot parhapandean na pistar, ro di sihapodea.

3:4 Jala lehononku dakdanak bahen rajanasida, jala dakdanak parentahonnasida.

3:5 Jala targogot do bangso i, masirupaan sama nasida; elesan ni dakdanak do na tuatua, jala halak na lea mangelesi na sangap.

3:6 Jadi tangkupon ni baoa ma anggina di jabu ni amana, dohononna ma: Marmandar do ho! Ho ma partoginami, mandapot di ho ma angka pasipasi on.

3:7 Dung i pagogoonna ma soarana di na sadari i, mandok: Ndang tarbahen ahu pandaoni, jala ndang adong roti manang parabiton di jabungku; unang pabangkit hamu ahu bahen partogi ni bangso i.

3:8 Ai mandate do Jerusalem jala tinggang ia Juda, ala mangalo Jahowa dila dohot pambahenannasida manggitihi mata ni hamuliaonna.

3:9 Parrupaon ni bohinasida manindangi dompak nasida, jala nasida sandiri paboaboahon dosanasida i, * songon isi ni Sodom ndang dihailahon. Marjea ma tondinasida i! Ai laos nasida sandiri do * manggalas hinamago tu nasida.

3:10 Paboa hamu ma tu partigor i, sai na sonang do nasida, ai panganonnasida do parbue ni angka na niulana.

3:11 Marjea ma ianggo parjahat i, ai hombar tu na jat na niula ni tanganna do pamaloson tu ibana.

3:12 Dakdanak do partogi ni bangsongku, jala boruboru mangarajaisa. Mangaliluhon ho do angka partogim, ale bangsongku, jala diago nasida do dalan sibolusonmu.

3:13 Jongjong do Jahowa laho manguhum, jala hehe do ibana mandabu uhum tu angka bangso.

3:14 Ro do Jahowa mandabu uhum tu angka sintua ni bangsona dohot tu partoginasida: Ianggo hamu nunga diago hamu porlak anggur i, di bagasan jabumuna do dapot tabantaban sian na dangol.

3:15 Na mahua do hamu umbahen sai rupaonmuna bangsongku, jala dipastapi hamu bohi ni angka na dangol, ninna Jahowa Zebaot.

3:16 Dung i ninna Jahowa ma: Ala marhatuiton angka boru Sion, jala dipagakgak uluna, jala marmata manuruk, jala manetsenetse patnasida mardalan.

3:17 Ala ni papalpalon ni Tuhan i ma sisigatan ni boru Sion, jala pasalangon ni Jahowa ma na niabitannasida.

3:18 Di ari na sasada i unsaton ni Tuhan i ma jagarjagar ni angka tapaktapak na arga, ro di angka simata borgok.

3:19 Angka sibong dohot leang dohot sanggul.

3:20 Angka tumpal, angka leang di pat, angka hohos ro di angka galas marisi miak arun ro di talitali di tangan.

3:21 Angka tintin di tangan dohot di igung.

3:22 Angka ulos parhadohoan, angka bintang maratur, angka salendang dohot angka hajut.

3:23 Angka sorminan dohot angka kameja, angka bulangbulang dohot salendang godang.

3:24 Dung i gabe nana ma miak na hushus i, jala rante singkat ni hohos i, jala hapalpalon singkat ni jengjeng buhit i, jala tangki singkat ni salendang i, jala tihas singkat ni hinauli nasailaon.

3:25 Marragean ma baoa pangisim panganon ni podang, jala paranganmi siap dibahen hamusuon.

3:26 Dung i marngeuk jala mangandungi angka harbanganna i, marsangkot bulung nasida jugukjuguk di tano.

Jesaya 4

4:1 Jadi di ari na sasada i soroon ni pitu boruboru ma sada baoa, huhut mandok: Mangan indahannami pe hami, jala hami pasarisari parulosonnami, asal marpanggoarhon goarmu hami; sai buati ma * haurahonnami!

4:2 Di ari na sasada i sogot, uli jala marmulia ma * tunas ni Jahowa, gabe huhut uli parbue ni tano i di angka ma malua sian Israel.

4:3 Jala targoar na badia sogot angka na teba di Sion dohot di Jerusalem, nasa na * tarsurat goarna di Jerusalem dapotan hangoluan.

4:4 Ia dung * diburi Tuhan i taktak ni angka boru Sion, jala diaup angka utang mudar ni Jerusalem, sian tongatongana marhitehite * tondi ni uhum dohot marhitehite tondi ni parsegeon.

4:5 Jadi tompaon ni Jahowa ma di atas ni saluhut inganan ni dolok Sion dohot di atas ni parluhutanna sada * ombun arian dohot timus ro di sondang ni api na marsigorgor borngin, ai linggomanna ma saluhut hamuliaon.

4:6 Jala adong sogot * parlapelapean bahen parlinggoman arian maradophon parngiar ni ari, jala haporusan dohot panisioan maradophon ari dohot udan na por.

Jesaya 5

5:1 Marende ma ahu nuaeng taringot tu hasianku, sada ende ni haholonganku taringot tu * porlak anggurna: Marporlak anggur do hasianku di punsu ni sada dolok na napu.

5:2 Jala dipangkuri, jala dijomputi angka batu sian i, jala disuanhon lopok na denggan tusi, jala dipauli sada tungkup di tongatongana, jala dihali sada pangilangan di bagasan, paimahon parbue na tonggi, hape na asom ditubuhon.

5:3 Antong hamu isi ni Jerusalem, jala hamu baoa sian Juda, ua uhum hamu ahu dohot porlak anggurhu.

5:4 Tung aha dope sibahenon nian tu porlak anggurhu, na so hubahen tusi? Boasa sai hupaimaima parbuehononna parbue na tonggi, hape na asom do diparbuehon.

5:5 On pe pabotohononku ma tu hamu sibahenonku tu porlak anggurhu: Umpatonku ma handangna, asa suda digagat binatang, lohaonku ma parikna, asa diluntak.

5:6 Bahenonku ma ibana gabe halongonan, asa unang dirantingi manang dipangkuri, asa tubuan suga dohot sihupi, jala dohononku angka ombun, asa unang mangalehon udan tu ibana.

5:7 Alai porlak anggur ni Jahowa Zebaot, i ma pinompar ni Israel dohot angka baoa sian Juda, suansuanan hasudunganna. Sai dipaimaima uhum, hape ida ma pangarupaon do, hatigoran hape ida ma angguhangguk do.

5:8 Marjea ma jolma angka na parinterinte angka bagas, diparapet hauma tu hauma, paima soada be hasiatan, jala holan hamu sandiri maringan di tongatonga ni tano i.

5:9 Nunga dibortikkon Jahowa Zebaot tu pinggolhu: Ingkon tarulang sogot bagas na torop i, angka na bolon dohot nauli, gabe so marisi.

5:10 Ai sampulu turpuk porlak anggur margogo sada bat, jala sada tuhukan boni margogo sada ampang sambing.

5:11 Marjea ma jolma angka nasogot hehe manogot nai mangeahi siinumon na pang; angka na leleng hundul di na holom, asa diohopi anggur i nasida.

5:12 * Umpalu parhinaloan nasida huhut ngomngom anggur siinumon di nasida, alai * ndang dipardulihon nasida anggo ulaon ni Jahowa, jala ndang ditangkasi jadijadian ni tanganna.

5:13 Dibahen i tarbuang ma bangsongki so pamotoanna, jala anturaparon angka na sangap sian nasida, jala matemate hauason angka na torop.

5:14 Ala ni i dipaganda banuatoru hisaphisapna, jala dipangangang babana so marpansohotan, gabe turun tusi hamuliaonna dohot hatoroponna dohot hariburonna rap dohot jolma angka na marolopolop.

5:15 Jadi tarjepol ma jolma i, jala tarjimput baoa i, jala tungki panaili ni angka na ginjang marroha.

5:16 Alai timbul situtu ma anggo Jahowa Zebaot marhite sian uhum, jala pinarbadiaan ma Debata nabadia i marhitehite hatigoran.

5:17 Jadi manjampali ma angka anak ni birubiru, guru lomona di jampalannasida, jala halak na buro manganhon pasipasi ni angka na mokmok.

5:18 Marjea ma jolma angka na mangaithon hajahaton marhitehite tali ni gabus, jala dosa i marhitehite jorat.

5:19 Angka na somal mandok: * Haru hatop ma ibana, haru dihapogani nian jadijadianna, asa itaida, haru jumonok jala ro nian sangkap ni na badia ni Israel, asa itatanda Ibana.

5:20 Marjea ma jolma angka na mandok tu na jat denggan do i, jala tu na denggan na jat do i, angka na mambahen haholomon gabe hatorangan, jala hatorangan gabe haholomon, angka na mambahen na paet gabe tonggi, jala na tonggi gabe paet.

5:21 Marjea ma jolma angka na bisuk di bagasan rohana, jala marroha ibana diparbaga rohana.

5:22 Marjea ma jolma angka na begu manobur anggur, angka baoa parhuaso manaor raru tu siinumon.

5:23 Angka na patingkos uhum tu parjahat ala sisip, jala dipadao hatigoran ni partigor.

5:24 Dibahen i songon papangan ni dila ni api di durame, jala maheu rambaramba dibahen jilam ni api, uratnasida pe songon sirabun sogot, jala bunganasida martimpul songon orbuk, ala dihagarishon rohana patik ni Jahowa Zebaot, jala diinsahi hata ni na badia ni Israel.

5:25 Ala ni umbahen marsigorgor rimas ni Jahowa dompak bangsona, jala dipatoltol tanganna dompak nasida, jala dilinsingi nasida, pola humuntal angka dolok, jala marpeahan bangkenasida, songon rapanrapan di tongatonga ni alaman. Songon i pe luhutna i, * laos so sumurut dope rimasna, sai toltol dope tanganna.

5:26 Jadi patindangonna ma sada partonggol di angka parbegu sian na dao, asa dielaela tu Ibana sian ujung ni tano on; jala ida ma doras haop nasida ro.

5:27 Ndang adong na loja manang tarsulandit di tongatonganasida, ndang adong na mondokondok manang na modom, jala ndang harhar hohos sian gonting nasida, manang tos tali ni sipatuna.

5:28 Na niugam do angka sumbianasida, jala tangging saluhut siornasida, doshon batu peo tambirik ni angka hodana, jala galapang ni huretana sobokkon habahaba.

5:29 Patungoromon do nasida songon singa boruboru, songon anak ni singa, jala patungaor nasida huhut manintahi tabantaban, na niluahonna, soada na paluahon.

5:30 Songon pandorung ni laut pandorungna dompak nasida di ari na sasada i, jadi tungki ma pamerengna tu tano, gabe ida ma haholomon ni hagogotan, pola mangkolom hatiuron marhitehite ombunna.

Jesaya 6

6:1 Di taon hamamate ni raja Usia, huida Tuhan i hundul di atas habangsa na timbo, jala na marmulia, jala angka rambu ni pangkeanna manggohi bagas joro.

6:2 Jongjong di atasna surusuruan Serapim, angka na marhabong onom be, dua manghungkupi bohinasida, dua manghungkupi patnasida, dua mangkabangkon nasida.

6:3 Jala * marsijouan ma nasida songon on: Na badia, na badia, na badia do Jahowa Zebaot, * gok hamuliaonna liat portibi on.

6:4 Jadi humuntal ma angka ojahan ni tiang sian soara ni na manjou, jala * gok timus joro i.

6:5 Dung i hudok ma: Marjea ma ahu! Nunga mago ahu, ai jolma parbibir na ramun do ahu, jala di tongatonga ni bangso parbibir na ramun ahu maringan, ai nunga diida angka matangku Raja Jahowa Zebaot.

6:6 Dung i habang ma sada sian angka surusuruan Serapim mandapothon ahu, jala di tanganna sada batu arang na gara, na binuatna sian langgatan dohot gansip.

6:7 Jadi * dijama ma pamanganku, jala didok: Ida ma, on do na manjama bibir ni pamanganmu, paboa naung niunsat utangmu, jala naung * hinungkupan dosam.

6:8 Dung i hubege ma soara ni Tuhan i, na mandok: Ise do suruhononku, jala ise pardalannami? Jadi ningku ma: Dison do ahu, suru ma ahu!

6:9 Jadi didok ibana ma: Laho ma ho, jala dok ma tu bangso on: Sai mananginangi ma hamu, alai unang antusi hamu; sai ida hamu ma, alai unang mananda hamu!

6:10 Patangkang ma roha ni bangso on, jala mingori pinggolnasida, jala pitungi matanasida, asa unang marnida matanasida, manang marbinege pinggolnasida, manang mangantusi rohanasida, jala unang muba manang malum hilalaonna.

6:11 Jadi ningku ma: Sadia leleng on ale Tuhan? Jadi ninna ma: Paima tarulang angka huta, soada marisi, jala angka bagas so marisi jolma, jala tarulang tano i gabe halongonan.

6:12 Ai padaoon ni Jahowa ma angka jolma i, gabe langa situtu parsitongaan ni tano i.

6:13 Alai tading dope di bagasan saparsampulu, nang angka i siaphononna do, songon hau tusam, jala songon hariara na martungko di hatatabana; * boni nabadia do tungkona i.

Jesaya 7

7:1 Dung i masa ma di angka ari ni si Ahas, anak ni si Jotam, anak ni si Usia, raja ni Juda, * nangkok ma si Resin, raja sian Ram dohot si Peka, anak ni si Remalia, raja sian Israel, tu Jerusalem naeng marmusu dompak huta i, alai ndang tarpapatusa.

7:2 Jadi dung tarbortik barita i tu pinompar ni si Daud: Nunga marsaro halak Ram di Epraim! Jadi bukbak ma roha ni rajai dohot roha ni bangsona, songon hau di tombak angka na humutur binahen ni alogo.

7:3 Dung i ninna Jahowa ma tu si Jesaya: Ruar ma ho manjumpangkon si Ahas, ho dohot si Sear-Jasub anakmu, tu ujung ni pamalian aek ni ambar parjolo, tu dalan ni hauma paninaron.

7:4 Jala dok tu ibana: Dungo ho, jala * sonang! Unang ho mabiar, jala unang biahaton roham maradophon tampahan ni na dua tulbu na martimus on, i ma parpiar ni muruk ni si Resin dohot halak Ram, nang anak ni si Remalia.

7:5 Ala na jat sangkap ni halak Ram, Epraim dohot anak ni si Remalia dompak ho songon on:

7:6 Nangkok ma hita dompak Juda, asa itagunturi, jala mangalaum tu hita, jala tapabangkit anak ni si Tabeel bahen raja di tongatonganasida.

7:7 Dibahen i songon on do hata ni Tuhan Jahowa: Na so tupa do i tulus manang masa!

7:8 Ai sabungan ni Ram do ia Damaskus, jala pandapotan ni Damaskus do si Resin; jala di bagasan onompulu lima taon on dope ingkon siap Epraim, ndang be masuk bangso etongon.

7:9 Jala sabungan ni Epraim do Samaria, jala pandapotan ni Samaria do anak ni si Remalia. * Molo so porsea hamu, ndang tagamon hot hamu.

7:10 Angkup ni didok Jahowa ma mandok si Ahas, songon on:

7:11 Pangido sada tanda di ho sian Jahowa Debatam, pangido sian banua toru, manang sian banua ginjang sahali.

7:12 Jadi ninna si Ahas ma: Ndang olo ahu mangido, asa unang huunjuni Jahowa.

7:13 Jadi ninna si Jesaya ma: Ua tangihon hamu ma, ale pinompar ni si Daud! Ndang dope sae hamu pauruuruhon jolma, dohot do Debatangku naeng lojaanmuna.

7:14 Dibahen i apala Tuhan i sandiri ma mangalehon sada * tanda di hamu: ** Ida ma, gabegabean ma sada namarbaju, jala tumubuhon sada anak, jala bahenonna ma goarna: * Immanuel.

7:15 Mantega dohot situak ni loba panganonna, paima diboto mambolongkon na jat, jala mamillit na denggan.

7:16 Ai * tagan so diboto dakdanak i dope mambolongkon na jat, jala mamillit na denggan, * tarulang ma tano i na nirajaan ni na dua raja hinabiaranmu i.

7:17 Paroon ni Jahowa ma tu ho dohot tu bangsom dohot tu pinompar ni amam angka ari na so dung ro, olat ni ari hababali ni Epraim sian Juda, * bahenon ni raja ni Assur.

7:18 Ai masa ma di ari na sasada i, paheheon ni Jahowa ma lanok angka na di ujung ni angka sunge ni Misir dohot loba angka na di tano Assur.

7:19 Jadi ro be ma nasida jala songgop saluhutna tu angka sunge dohot tu angka rura dohot tu angka liang ni dolok batu dohot tu sude angka tadatada, ro di sude angka panjampalan.

7:20 Di ari na sasada i gorbangon ni Tuhan i ma marhitehite raut parnabung na sineoana di bariba ni batang aek i ma marhitehite raja ni Assur, obuk ni ulu dohot imbulu ni pat ro di sandok mise.

7:21 Di ari na sasada i paodongon ni sada baoa ma sada anak ni lombu dohot dua birubiru.

7:22 Jadi bahenonna ma sian susu na godang i mantega panganonna: Ai mangan mantega dohot situak ni loba nasa na tading di parsitongaan ni tano i.

7:23 Ai masa ma di ari na sasada i: Nasa hajongjongan ni saribu kambona hau anggur najolo na mararga saribu rupia, gabe hatubuan ni duriduri dohot sihupi muse.

7:24 Ingkon marsumbia jala marsior iba laho tusi, ai duriduri jala sihupi nama masa di sandok tano i.

7:25 Jala saluhut dolok, angka pangguan najolo, ndang be tartopot sian biar mida angka duriduri dohot sihupi, bahen jampalan ni angka lombu nama, jala luntahan ni angka birubiru.

Jesaya 8

8:1 Dung i ninna Jahowa ma mandok ahu: Buat di ho sada batu na balga sisuraton, jala surathon tusi dohot panurat ni jolma: Hatop martaban, tibu mamupusi.

8:2 Jadi hubuat ma di ahu angka sitindangi na sintong: Malim * Uria dohot Sakaria, anak ni si Jeberekia.

8:3 Dung i sampur ma ahu tu panurirang boruboru i, jadi gabegabean ma ibana, jala manubuhon sada anak. Dung i ninna Jahowa ma mandok ahu: Bahen ma goarna: Si hotop martaban, tibu mamupusi.

8:4 Ai tagan so diboto dakdanak i dope * manjou ale amang manang ale inang, tarboan ma hamoraon ni Damaskus dohot tabantaban ni Samaria tu jolo ni raja sian Assur.

8:5 Dung i diulahi Jahowa dope mandok tu ahu songon on:

8:6 Ala * marhu ni roha bangso on di aek Siloam, angka na * ngernger mardalan, jala marlas ni roha mida si Resin dohot mida anak ni si Remalia.

8:7 Dibahen i, ida ma, sai panangkohon ni Tuhan i dompak nasida batang aek angka na doras, jala na balga: I ma raja sian Assur ro di nasa hamuliaonna. Salpuanna ma sude angka bondarna, jala binsat ma sude pasirna.

8:8 Jadi tolhas ma ibana ro di Juda, binsat ma ibana, jala sumar ro di rungkung, jala tutupon ni tampahan ni habongna sandok tanomi, ale * Immanuel.

8:9 Ogaoga ma hamu, ale angka bangso, huhut angka hitir, jala tangihon ma, sude hamu sian luat na dao! Mangkontas ma hamu, huhut angka hitir, mangkontas ma hamu tutu huhut angka hitir.

8:10 Martuptup ma hamu, hape sundat do tuptupanmuna i, marsahata ma hamu, hape ndang tulus, ai * Debata do dongannami.

8:11 Ai songon on do hata ni Jahowa tu ahu, pola disoro tanganna ahu, palumbahon ahu, asa unang hudalani dalan ni bangso on, ninna do:

8:12 Unang paihut hamu mandok jehe, ala jehe diehet bangso on, jala unang hatahuthon hamu hatahutonna i, jala unang tarsonggot hamu!

8:13 Tagonan * Jahowa Zebaot parbadiai hamu, jala * ibana ma habiaranmuna, ibana ma hatondithon hamu.

8:14 Ai ibana manjadi habadiaon dohot * batu partuktuhan dohot batu partinggangan tu na dua bagas ni Israel, jala jaring dohot jorgong tu isi ni Jerusalem.

8:15 Jadi torop sian nasida tartuktuk, jala tinggang, jala maropuk, jala tarjaring, jala tartangkup.

8:16 Rahuti ma panindangion i, * sahapi ma patik i di bagasan roha ni angka siseanku!

8:17 Alai anggo ahu marpangkirimon tu Jahowa do naung manabunihon bohina maradophon pinompar ni si Jakkob, jala huhalungunhon ibana.

8:18 * Ida ma, ahu dohot * dakdanak, angka na nilehon ni Jahowa tu ahu, bahen angka tanda dohot halongangan di tongatonga ni Israel, sian Jahowa Zebaot do i na marhabangsa di dolok Sion.

8:19 Dibahen i molo didok nasida mandok hamu: Sungkunhon hamu tu angka pangarunding dohot tu angka hasandaran, angka na marhata i dohot marhusipi. * Tung so tu Debatana sandiri nian bangso i marpanungkunan? Tung tu na mate ma sungkunon parsorion ni na mangolu i?

8:20 Bahen patik dohot panindangion ma i! Molo so hombar tu hata on didok nasida, ndang tagamon idaonna buha siang ari.

8:21 Jadi sai maotaot nasida di tano i mardok ni roha, jala haleonon, ia dung haleonon piripirion ma ibana jala * diburai rajana dohot Debatana! Jala dibereng dompak ginjang.

8:22 Jala dibereng dompak tano, jala ida ma hagogotan dohot * haholomon, holom parnidaanna, jala borngin marimpotimpot manongtong diida.

8:23 Alai ndang sai tongtong holom parnidaan ni tano na targogot i. Songon na pinajimputna i di tingki parjolo tano * Zebulon dohot Naptali, suang songon i pasangaponna sogot dalan ni laut di bariba ni Jordan, luat hinaliangan ni angka bangso parbegu.

Jesaya 9

9:1 Bangso na mardalani di bagasan haholomon marnida sada panondang na bolon. Binsar do sada panondang di angka na mangingani tano linggoman ni hamatean.

9:2 Nunga dipatorop ho bangso i. Nunga dipadiri ho di ibana halalas ni roha na bolon: Marlas ni roha nasida di jolo ni bohim, songon las ni roha di gotilon, songon parolopolopon di na marbagi tabantaban.

9:3 Ai nunga diponggolhon ho auga na ampe tu ibana, dohot batahi ni abarana dohot linsinglinsing ni na mangadu ibana, songon * uju di ari Midian.

9:4 Ai masoksok do sogot nasa sinjata ni parsinjata di hatuturtar ni tongtangan, ro di ulos na marsapu mudar, gabe sipanganon ni api.

9:5 Ai nunga tubu di hita * sada posoposo dilehon tu hita sada Anak, pampe tu ** abarana do sogot harajaon, jala bahenonna goarna: Sipartahi * Halongangan, ** siulubalang ni Debata, Ama saleleng ni lelengna, Raja ni hadameon.

9:6 Bahen hagaganda ni harajaon dohot * hadameon na so marujung di * habangsa ni si Daud dohot di harajaonna i, pahothon dohot patoguhon marhitehite patik dohot hatigoran, olat nion ro di salelenglelengna. Hamuruhon ni Jahowa Zebaot patupahon songon i.

9:7 Nunga ditongos Tuhan i sada hata tu si Jakkob, jala nunga songgop tu Israel.

9:8 Asa tung diboto sandok bangso i, Epraim dohot isi ni Samaria di haginjangon dohot hajungkaton ni rohana, angka na mandok:

9:9 Nunga matompas angka tano takko, jadi angka batu parbue pajongjongonta; nunga tartaba angka hau antajau, jadi angka hau ares solukkononta.

9:10 Alai patimbulon ni Jahowa ma angka musu ni si Resin dompak Epraim, jala pajujuonna angka musuna.

9:11 Ram sian jolo, jala halak Palistim sian pudi, gabe suda Israel disohali. * Songon i pe i sudena, laos so sombu dope murukna, jala sai toltol dope tanganna.

9:12 Alai laos so mulak roha ni bangso i tu na mangalinsingi ibana, jala ndang dilului nasida Jahowa Zebaot.

9:13 Dibahen i * gotapon ni Jahowa ma sian Israel ulu dohot lailai, dangka ni harambir ro di tolong di na sadari.

9:14 Angka sintua dohot na sangap do ulu i, jala panurirang na mangajarhon sipaotooto, i ma lailai i.

9:15 Ai angka partogi ni bangso on mangaliluhon nasida, jala tu hamagoan do angka na tinogihonna i.

9:16 Dibahen i ndang marlas ni roha Tuhan i mida angka dolidolinasida, jala ndang asi rohana di angka na sopot so marama, dohot angka na mabalu di nasida, ai saluhut do nasida na ramun, jala na jahat, jala nasa pamangan mandok hata haotoan. * Songon i pe i sudena, laos so sombu dope murukna, jala sai toltol dope tanganna.

9:17 Ai marsigorgor do hajahaton i songon api; panganonna do duriduri dohot sihupi, jala galak angka tombak longolongo, gabe martimpul tu ginjang timusna.

9:18 Marhitehite parpiar ni rimas ni Jahowa Zebaot holom tano i, jala doshon sipanganon ni api bangso i, ndang masiolanan na martinodohon.

9:19 Manabi sahalak tu siamun, gabe haleon on ibana; mangan ibana tu hambirang, jadi ndang butong nasida, ganup manganhon sibuk ni botohonna.

9:20 Manasse manganhon Epraim, jala Epraim Manasse, rap nasida muse dompak Juda. * Songon i pe i sudena, laos so sombu dope murukna, jala sai toltol dope tanganna.

Jesaya 10

10:1 Marjea ma sude jolma sibahen angka patik hageduhon dohot angka juaratulis, na manurathon pangarupaon.

10:2 Asa dipapeol uhum tu angka na pogos, jala agoan uhum angka na dangol di bangsongku, angka na mabalu gabe tabantabannasida, jala dipupusi nasida angka na sopot so marama.

10:3 Aha do sibahenonmuna di ari pamaloson dohot hatataban na ro sian na dao? Tung tu ise hamu marhaporusan mangido panumpahion, jala didia tadingkononmuna hasangaponmuna i?

10:4 Molo so dipaunduk ibana rohana di tongatonga ni na tarbuang i, ingkon rage ibana di tongatonga ni na rage; * songon i pe i sudena, laos so sombu dope murukna, jala sai toltol dope tanganna.

10:5 Marjea ma Assur, * batahi ni rimashu, jala linsinglinsing ni parpiar ni murukku di tanganna!

10:6 Dompak bangso na ramun ibana husuru, jala dompak bangso panginonaan ni rimashu ibana hudokkon, asa ditaban situtu, jala dipupusi, jala diluntak, songon bustak di alaman.

10:7 Alai ndang songon i anggo pingkiranna, jala ndang songon i sangkapna, sai roha martaban dohot maniaphon torop angka bangso do rohana i.

10:8 Ai ninna do: Nda raja do sude angka wakilhu?

10:9 Nda doshon Karkemis do Kalno? Nda doshon Arpad do Hamat? Manang Samaria doshon Damaskus?

10:10 Songon pangonai ni tanganku tu angka harajaon ni parbegu, atik pe dumenggan ajiajiannasida, sian angka na di Jerusalem dohot di Samaria.

10:11 Tung so bahenonku tu Jerusalem dohot tu angka ajiajiannai, songon na hubahen i tu Samaria dohot tu angka ajiajiannai?

10:12 Jadi ia dung dipaujung Tuhan i nasa jadijadianna di dolok Sion dohot di Jerusalem, * luluhononku ma parbue ni haginjangon ni roha ni raja sian Assur dohot hinasonge ni matana na momar i.

10:13 Ai ninna do: Marhitehite gogo ni tanganku sandiri hubaen i, jala marhitehite habisukonku, ai na pistar do ahu. Jala hupaorot angka parbalohan ni angka bangso, jala hupupusi angka artanasida, jala hupaijur angka na marhabangsa, songon ulubalang.

10:14 Jala jumpang tanganku do hamoraon ni angka bangso, songon asar ni pidong, jala songon panjomputiniba di pira na tinadingkon, hujomputi sude angka luat, jala ndang adong na hum mangheparhon habong, manang pangangang tuktuk, manang mangkuling.

10:15 Tung maneleng ma tangke dompak jolma na manallikhon? Manang manenga gargaji dompak jolma na manait? Hira na dilibas * batahi do jolma angka na mangalibashon; manang hira na dijomput tungkot do jolma na martungkothon.

10:16 Dibahen i tongoson ni Tuhan Jahowa Zebaot ma tiarap tu angka na pinamokmokna i, jala songon parsigorgor ni api do parsigorgor ni hasangaponna i.

10:17 Jala manjadi api do hatiuron ni Israel, jala na badiana gabe jilam ni api, jadi gor ma jala suda panganonna duridurina dohot sihupina di bagasan sadari.

10:18 Jadi siaphononna ma hatongamon ni tombakna dohot haumana, nang hosana ro di sibukna, jala songon parmerus ni na marsahit parmerusna.

10:19 Jala angka hau pasipasi ni tombakna, otik nama dapot suraton ni dakdanak do bilanganna.

10:20 Di ari na sasada i, ndang be marpangunsandean pasipasi ni Israel, dohot angka na malua sian pinompar ni si Jakkob, tu na mangalinsingi nasida, tu Jahowa na badia ni Israel nama nasida marpangunsandean di bagasan hasintongan.

10:21 Mulak ma roha ni pasipasina i, pasipasi ni Jakkob, tu Debata na sun hinagogo.

10:22 Ai tung * sura pe doshon horsik di topi laut bangsom, ale Israel, holan pasipasina i do na muba tu Debata. Ai nunga disangkap hasiapon marhitehite habibinsat ni hatigoranna.

10:23 Ai saut do bahenon ni * Tuhan Jahowa Zebaot hasiaponna sinangkapna i di tongatonga ni sandok tano on.

10:24 Dibahen i songon on didok Tuhan Jahowa Zebaot: Unang ho mabiar, ale bangsongku, na maringanan di Sion maradophon Assur, na mangalinsingi ho dohot batahi, jala na mangondamhon tungkotna dompak ho songon uju di Misir.

10:25 Ai otik nari situtu nama, sombu ma rimashu, jala marbalik murukku gabe hasiapannasida.

10:26 Jadi sintahon ni Tuhan Jahowa Zebaot ma sada linsinglinsing dompak ibana, songon na nilinsingna i * Midian uju di dolok batu Oreb; jala songon na pinatoltolna i * tungkotna i di atas laut uju di dalan ro sian Misir.

10:27 Di ari na sasada i munsat ma rodina sian abaram, jala augana sian tangkuhukmu, jala maponggol auga i maradophon na miniahan i.

10:28 Ro do ibana tungkan Ayat, mamolus sian Migron; di Mikhmas do diparose angka parhohasna.

10:29 Dibolus nasida * hatariparani: Geba ma parmalamanta, godor ma Rama, maporus ma * Gibea-Saul.

10:30 Mangangguhi ma ho ale boru * Gallim, sai manangi ma ho ale Laisia! Ngalutmi ale Anatot.

10:31 Maporus ia Madmena, malua do ianggo isi ni Gebim.

10:32 Ngongong dope ibana sadarina i di * Nob. Diondamhon ma muse tanganna dompak dolok ni boru Sion, dompak robean ni Jerusalem.

10:33 Alai ida ma, mangasahon gogo ma Tuhan Jahowa Zebaot manultuli angka dangka, tallihanna ma angka na manggakgak, jala pajempehonna ma angka na ginjang marroha.

10:34 Jala rabionna ma anggo tombak longolongo marhitehite bosi, jala matompas Libanon marhitehite Nasunhinagogo i.

Jesaya 11

11:1 Dung i * ruar ma sada tunas sian tungko ni si Isai, jala marparbue sada tubis na tubu sian uratna.

11:2 Jadi songgop ma tu ibana * Tondi ni Jahowa, Tondi ni habisuhon dohot hapistaran, Tondi ni panuturion dohot hagogoon, Tondi ni parbinotoan dohot biar maradophon Jahowa.

11:3 Jala halomohononna do hadaulaton maradophon Debata, jala ndang manguhum ibana marguru tu parnida ni matana, jala ndang manguhum ibana marguru tu na binege ni pinggolna.

11:4 Marhitehite * hatigoran tahe uhumonna angka na pogos, jala marhitehite hasintongan patingkosonna uhum tu angka na dangol di tano on, jala marhitehite * batahi ni pamanganna libasonna tano on, jala marhitehite tondi ni bibirna bunuonna halak parjahat i.

11:5 Jala hatigoran do hohos ni gontingna, jala habonaron hohos ni akna.

11:6 Disi ma * maringan gompul di lambung ni birubiru, jala manggompang babiat di lambung ni hambing, jala tampak do anak ni lombu, babiat dohot pinahan na pinamokmok, jala dakdanak na metmet marmahan nasida.

11:7 Rap manjampal ma lombu dohot babiat, jala tampak modom angka anakna be, jala panganon ni singa duhutduhut songon dorbia.

11:8 Jala posoposo marmeameam di lambung ruang ni ulok dari, jala dakdanak nambura sirang susu mangarorohon tanganna tu ruang ni libe.

11:9 Ndang be manjahati manang mangago nasida di sandok dolok habadiaonku, ai * gok parbinotoan di Jahowa tano on sogot, songon aek ni laut mangalungkupi tondolanna.

11:10 Jadi masa ma di na sadari i: Usouso ma angka parbegu di * urat ni si Isai, na pinatindang bahen partonggol ni angka bangso, jala pangulonanna do hamuliaon.

11:11 Dung i di na sadari i: Ulahan ni Tuhan i ma paduahalihon patoltol tanganna tumobus pasipasi ni bangsona, na teba sian Assur dohot sian Misir dohot sian Patros dohot sian Kus dohot sian Elam dohot Sinear dohot sian Hamat dohot sian angka pulo na di laut.

11:12 Dung i patindangonna ma sada partonggol di tongatonga ni angka parbegu, jala papunguonna angka na nilele sian Israel dohot angka na mampar sian Juda, papunguonna sian na opat desa ni tano on.

11:13 Jadi sohot ma pangiburuon ni Epraim, jala siap angka na manosak Juda. Ndang be iburuon ni Epraim Juda, jala ndang be sosahan ni Juda Epraim.

11:14 Alai rap habang do nasida tu abara ni halak Palistim tungkan hasundutan, tampak do nasida muse mamupusi angka anak tungkan habinsaran, papatuon ni tanganna Edom dohot Moab, jala pinompar ni Amon marpandapotan tu nasida.

11:15 Jala hona toru ni Jahowa solok ni laut Misir, jala ondamhononna tanganna dompak batang aek i marhitehite parpiar ni murukna, jala bagionna gabe pitu sunge, asa dapot hatariparan marhitehite sipatu.

11:16 Jadi adong ma dalan na bolon sada di pasipasi ni bangsona na teba sian Assur, songon di * Israel uju di ari haruruarna sian tano Misir.

Jesaya 12

12:1 Jadi dohononmu ma di ari na sasada i: Mauliate ma ahu tu ho, ale Jahowa, ala dirimasi ho ahu, alai nunga marpamuati rimasmu, jala nunga diapuli ho ahu.

12:2 Ida ma, Debata do hatuaonku, Ibana huhaposi, jadi * ndang mabiar ahu, ai * Tuhan Jahowa do hagogoonku dohot pujipujianku dohot manjadi hatuaon di ahu.

12:3 Jadi marlas ni roha hamu manahui aek sian * mual ni hatuaon.

12:4 Jadi dohononmuna ma di ari na sasada i: * Puji hamu ma Jahowa, jala jou hamu ma goarna, pabotohon hamu angka jadijadianna di tongatonga ni angka bangso, jamitahon hamu goarna na timbul i.

12:5 Endehon hamu ende pujipujian tu Jahowa, ai nunga dijadihon halongangan, sibotoon ni liat portibi on sogot.

12:6 Marolopolop jala mariaia ma ho, ale isi ni Sion, ai timbul do di parsitongaanmi na badia ni Israel.

Jesaya 13

13:1 On ma pangungkapon taringot tu uhum madabu tu * Babel na niida ni si Jesaya, anak ni si Amos.

13:2 Di atas dolok na sae ma patindang hamu partonggol, pangiar hamu ma soara * mandok tu nasida, hiraphon hamu ma tangan, asa dibongoti nasida bahal ni raja angka na marhuaso.

13:3 Nunga hutonai angka na huparbadiai, nunga hujou huhut angka ulubalangku, angka na ro marolopolophon hatimbulonku pasonggophon rimashu.

13:4 Tarbege do soara ni hariburon di atas ni angka dolok, songon soara ni bangso na balga; soara ni hagunturon ni angka harajaon ni parbegu na marluhut i; Jahowa Zebaot maningkir parangan tu hamusuon.

13:5 Angka na ro sian luat na dao, sian ujung ni langit, Jahowa udur dohot angka parhobas ni murukna laho maniaphon sandok luat i.

13:6 Mangangguhi ma hamu, * ai nunga jonok ari ni Jahowa; ro do ibana songon hasiapon sian pargogo na so hatudosan.

13:7 Dibahen i mandate ma saluhut tangan, jala malala ateate ni sandok jolma.

13:8 Jadi tarsonggot ma nasida, songgop ma tu nasida hagogotan dohot pambebeon, angka hitir do nasida, songon boruboru na tumiop siraraisan; sai masipanotnotan do nasida, songon gara do bohinasida i.

13:9 Ida ma, sogir situtu do haroro ni ari ni Jahowa, jala marpiarpiar rimasna mambahen halongonan tano i, jala siaphononna sian i angka pardosa.

13:10 Ai angka bintang di langit ro di bintang * poriama ndang be marsinondang, holom do * mata ni ari di habibinsarna, jala ndang be marsinondang ia bulan.

13:11 Jadi luluhononku ma tu isi ni portibi on hajahatonna dohot tu angka parjahat hageduhonna. Pasohotonku ma haginjangon ni angka na ginjang marroha, jala tarjepol bahenonku hajungkaton ni siulahon gogo.

13:12 Ummahal bahenonku sada jolma sian sere palangki, jala ummahal sada jolma sian sere na sian * Opir.

13:13 Dibahen i hutolonku ma langit i, asa munsat tano i sian ingananna marhitehite parpiar ni muruk ni Jahowa Zebaot dohot marhitehite ari panomboon ni rimasna.

13:14 Jala songon ursa na binuru nasida, jala songon birubiru na so marparmahan. Ganup nasida mulak tu bangsona be, jala maporus be tu luatna.

13:15 Nasa na dapotsa tullangonna; jala nasa na dapot tartangkup, tihamonna marhitehite podang.

13:16 Jala * rosahanna posoposonasida di adopannasida, pupusanna angka bagasnasida, jala bahenonna na so uhum tu jolmanasida.

13:17 Ida ma, paheheonku ma dompak nasida halak Madai, angka na so parduli di perak, jala na so mangapian di sere.

13:18 Angka siornasida mangaragehon dolidoli, jala ndang maralang rohanasida di inaina na marhangoluan, ndang diolani matanasida angka dakdanak.

13:19 Jadi doshon paniaphon ni Debata di * Sodom dohot Gumora paniaphonna di Babel, bungaran ni angka harajaon, hasangapon dohot hamuliaon ni halak Kasdim.

13:20 Ndang be hainganan jolma salelenglelengna, jala ndang be ebatanna marsundutsundut, jala ndang be marundungundung disi halak Arab, manang marsaro disi angka parmahan.

13:21 Manggompang ma disi angka binatang sian halongonan, jala gok angka sipauk jabunasida, jala maringan disi angka pidong unto, jala marembas disi angka begu nurnur.

13:22 Jala marauang angka gompul di bagas simagodangnasida, jala ulok naga di bagasan jabu parsantiannasida. Jala * jonok nama tingkinasida, jala ndang be tarpaganjang ariarinasida.

Jesaya 14

14:1 Ai marpamuati di roha ni Jahowa mida Jakkob, jala ulahanna * mamillit Israel, pasonang nasida di tanonasida. Sauduran do halak na buro dohot nasida laho marpungu tu pinompar ni si Jakkob.

14:2 Jala * boanonnasida ma angka bangso tu inganannasida, gabe pinompar ni Israel nampuna nasida di tano ni Jahowa, bahen angka naposo baoa dohot boruboru; jadi tioponna di habuangan jolma angka na mambuangkon nasida jala rajaanna angka sibahen gogo tu nasida.

14:3 Dung i di ari hasonanganmi binahen ni Jahowa sian hangaluton niaemi dohot sian hasusaanmi dohot sian parhianduan na posi, na pinarhatobanna i ho.

14:4 Dohononmu ma umpama on taringot tu raja ni Babel: Muba ma sonang ni sibahen gogo i, sohot ma nuaeng pangarupaon.

14:5 Nunga diponggolhon Jahowa tungkot ni angka parjahat, tungkot ni angka raja.

14:6 Ibana na marpiarpiar mangalinsingi angka bangso, so marpansohotan; na mangaluntak angka parbegu di bagasan rimas marhitehite pangaleleon na so marpansadian.

14:7 * Sonang jala mangulon nuaeng isi ni liat portibi on, marolopolop do nasida.

14:8 Marlas ni roha huhut mida ho angka hau sampinur dohot ares na di Libanon: Olat ni na tunduk i ho, ndang adong be nangkok sitaba hami, ninna.

14:9 Pola guntur banuatoru mida ho manjumpangkon ho di harorom. Disunggul dompak ho angka halinu, * nasa hambing * tunggal ni tano on dipahehe sian habangsanasida, sude raja ni angka parbegu.

14:10 Saluhut nasida mangalusi, jala mandok tu ho: Dohot do ho hape margale, songon hami, naung doshon hami do ho hape!

14:11 * Tuat tu banuatoru do hape hamuliaonmu, hariburon ni parhinaloanmu; gulokgulok hape marpeahan di lagem, jala gulokgulok bulusanmu.

14:12 Beha do hadadabum sian banuaginjang, ho ale bintang sidongdong, ho ale anak ni sibuha siang ari! Nunga tartaba hape ho marobo tu tano, ho ale sipatunduk angka bangso.

14:13 Ianggo hatahata ni roham di bagasan mandok: Nangkok ma ahu tu banuaginjang, * patimbulonku ma habangsangku di ginjang ni angka bintang ni Debata, jala hundul ma ahu tu * dolok parluhutan tungkan utara sahali.

14:14 Nangkok ma ahu tu atas ni angka ombun, gabe tudoshon na tumimbul sahali ahu.

14:15 Hape tuat tu banuatoru do ho, tu godung na marimpotimpot.

14:16 Longang do angka na marnida ho, notnotanna ma ho huhut mandok: On do hape baoa na manggunturi tano on, na manggoari angka harajaon?

14:17 Naung mambahen liat portibi on gabe halongonan, jala ditabani angka hutana, jala ndang diloas muli angka na tartaban i.

14:18 Nasa raja ni angka parbegu marpeahan tutup di hamuliaon di bagasan jabuna be.

14:19 Alai anggo ho tartimpal do dao sian tanomanmu, songon ranting na marambolongan; songon ulos ni angka na rage, angka na tiniham dohot podang, angka na tuat tu godung batu songon bangke na nilutlut.

14:20 Ndang tagamon saparbandaan ho rap dohot nasida, ai nunga diago ho luatmu, jala dibunu ho bangsom. Ndang taringot be salelenglelengna anggo pinompar ni angka parjahat.

14:21 Hobas i hamu ma sada * pamotongan di angka anakna * ala ni hajahaton ni amanasida; tung na so tupa suheonna manang teanonna tano i, manang patoroponna huta paribur portibi on.

14:22 Ai hehe ma ahu mandopang nasida, ninna Jahowa Zebaot, jala siaphononku sian Babel barita dohot pasipasi, nini dohot nono, ninna Jahowa.

14:23 Jala bahenonku huta i gabe abalan ni andurian dohot lintonglintong, jala saraonku marhitehite sarasara hasiapon, ninna Jahowa Zebaot.

14:24 Nunga pola maruari Jahowa Zebaot, ninna: Sai na pasautonku do, songon na husangkap, jala sai na songgop do bahenonku, songon na hutahi.

14:25 Sai na segaanku do Assur di tanongku, jala luntahanku ibana di atas ni angka dolokku, asa tanggal augana sian nasida, jala munsat rodina sian abarana.

14:26 I do sangkap naung sinangkapna tu sandok tano i, jala i do tangan na toltol dompak sude angka bangso.

14:27 Ai naung sinangkap ni Jahowa Zebaot, tung ise ma na tuk manundati? Jala tanganna na toltoli, tung ise ma na tuk manulakkon?

14:28 Di taon hamamate ni raja Ahas ro lumbalumbaon:

14:29 Unang tung marlas ni roha ho, ale sandok isi ni * Palistim, ala naung maponggol linsinglinsing na * mangalinsingi ho, ai ruar do sada libe sian urat ni ulok, jala parbuena gabe naga na habang.

14:30 Jadi singkop sipanganon jumpang angka buhabaju ni na pogos, jala marsonangsonang angka na so marparbuaton hian. Alai anggo uratmi bunuonku do marhitehite haleon, asa marragean angka pasipasim.

14:31 Mangangguhi ma ho ale pargumbangan! Pangiar ma soaram ale huta! Malala ma ho sandok Palistim! Ai ro do sian utara timus, jala ndang adong na pinjil sian parduaannasida i.

14:32 Jala tung aha ma alusna tu angka suruan ni bangso parbegu? Nunga pola dipahot Jahowa Sion, asa marhaporusan tusi do angka na dangol ni bangsona.

Jesaya 15

15:1 Uhum madabu tu * Moab. Tongon do borngin i do ditaban Ar-Moab, tung siap do. Tongon do borngin i do ditaban Kir-Moab, tung siap do.

15:2 Nangkok ma tutu jolma tu joro dohot tu Dibon, huhut tumatangis tumopot sombaon i; mangangguhi do Moab di atas ni Nebo dohot Medeba; * saluhut ulunasida targorbang, jala saluhut mise digansipi.

15:3 Marulos tangki nasida mardalan di alamanna, mangangguhi be do angka na mijur sian * tarup dohot sian bonggarbonggar, huhut tumatangis.

15:4 Jala mangangguhi Hesbon dohot Eleale, tolhas ro di Jahas tarbege soaranasida. Dibahen i mangandungi angka parangan ni Moab, ai maras do rohana.

15:5 * Mangangguhi do rohangku taringot tu Moab, tolhas ro di * Soar, lombu sitolutaon, angka na maporus sian nasida, ai sai tumatangis manangkohi nangkohan Luhit, ai di dalan tu Horonaim tarbortik do angguhangguk ni hasiapon.

15:6 Ai nunga marsik angka batang aek sian Nimra, nunga malos duhutduhut, siap suansuanan, ndang adong be ingkau rata.

15:7 Dibahen i tagirtagir ni na niomonasida dohot ugasan na pinajopna tu bariba ni batang aek, parbalohan tungkan Moab ditaruhon.

15:8 Ai humaliang sandok Moab tarbege soara angguk, tolhas ro di Eglaim dohot Beerelim tarbege partangisnasida i.

15:9 Ai gok mudar angka aek Dibon, ganda sian i dope uhum bahenonku tu Dimon, angka na malua sian Moab, singa i manganhon, ro di pasipasina isi ni tano i.

Jesaya 16

16:1 Tongos hamu * guguan birubiru di pangarajai ni luat sian * Sela, mamolus sian halongonan, sahat tu dolok ni boru Sian.

16:2 Jadi doshon pidong na marheparhepar, doshon asar na sinegaan do angka boru ni Moab sogot di hatariparan Arnon.

16:3 Boan hamu tahi, dabu hamu uhum, bahen parlinggomanmu di hos ni ari, songon bornginna i; tabunihon angka na nilelean, unang jehehon na maporus!

16:4 Sai sorang tu ho ma angka na marserak sian ahu; ho ma haporusanna, ale Moab maradophon partaban! Ai nunga siap pangarupa, marujung ia hasiapon, nunga lengse pangaluntak sian tano i.

16:5 Jadi hot ma sada habangsa marhitehite asi ni roha, jala marhabangsa di atasna di bagasan hasintongan di undungundung ni si Daud, ibana na mandabu uhum dohot na mangalului uhum dohot na manilu hatigoran.

16:6 Nunga hubege hami haginjangon ni Moab, na torbang situtu haginjangonna, hajengkelonna dohot hajungkatonna, hata tealna pe angka na so marnosan.

16:7 Dibahen i laos Moab sama Moab masitangisan, saluhut nasida tumatangis taringot tu angka turanggong ni huta Kir Hareset, tongon tahe nunga tarjimput nasida.

16:8 Ai nunga tarulang angka ladang di Hesbon, nang hau anggur di Sibma, mabuk do angka raja ni parbegu dibahen parbuena, angka na tolhas ro di Jaser, lilu tu halongonan manginsir do rantingna, pola taripar laut.

16:9 Dibahen i * tumatangis ahu songon partangison ni Jaser, ala ni hau anggur di Sibma; pabornohonku do ho dohot ilungku, ale Hesbon dohot Eleale, ai * toletole ni hamusuon madabu tongon di gotilon parbue ni hau anggur dohot eme.

16:10 Jadi sohot ma las ni roha dohot olopolop sian hauma sigotilon i, jala ndang marlas ni roha manang marolopolop di angka porlak anggur. Ndang adong jolma pangilang, angka na mangilang anggur di angka pangilangan, nunga hupasohot angka suraksurak.

16:11 Dibahen i sai patugorok do butuhangku taringot tu Moab, songon soara ni hasapi, nang rohangku di bagasan taringot tu Kir Hareset.

16:12 Jadi ia dung patar hamamaras ni Moab di angka robean, jala ditopot habadiaonna laho martangiang nian, * hape ndang marniula.

16:13 On do hata na nilumbahon ni Jahowa tu Moab sian nahinan dope.

16:14 Alai anggo nuaeng songon on do didok Jahowa: Di bagasan tolu taon on, * songon taon ni sipangan gaji, marlea ma hamuliaon ni Moab ro di hinatoropna situtu, jadi pasipasina na metmet nama na tading i ndang margogo.

Jesaya 17

17:1 Uhum madabu tu * Damaskus. Ida ma, sai na meser do Damaskus sian tongatonga ni angka huta, gabe timbunan batu.

17:2 Tarulang ma angka huta Aroer, asa angka dorbia nampunasa, angka na marudam disi, so adong na mangalele.

17:3 Jadi pesan ma benteng sian Epraim dohot harajaon sian * Damaskus, jala pasipasi ni Ram doshon hamuliaon ni halak Israel, ninna Jahowa Zebaot.

17:4 Pesan ma di ari na sasada i hamuliaon ni Jakkob, jala merus hinamokmok ni dagingna.

17:5 Jala songon pangalaho ni halak na papungu eme na jongjong di gotilon, jala tanganna manggotil angka biur, jala songon na manjomputi biur di rura Repaim.

17:6 Jala tading disi angka turiang, songon na mangkutur parbue ni hau jetun, dua tolu saludang apala di punsuna sahali, opat lima di dangka ni hau na marparbue i, ninna Jahowa, Debata ni Israel.

17:7 Di ari na sasada i ma tailihonon ni jolma ma sitompa ibana, jala berengon ni matana ma na badia ni Israel.

17:8 Jala ndang be tailihononna angka langgatan, jadijadian ni tanganna, jala ndang be berengonna angka sombaon manang ganaganaan na pinauli ni jarijarina.

17:9 Di ari na sasada i ma hutanasida angka na gonting i doshon ladang dohot doshon tombak na tinadingkon ni halak maradophon halak Israel manjadi halongonan sambing.

17:10 Ai nunga dihalupahon ho Debata ni hatuaonmu, jala ndang diingot ho * dolok batu haporusanmu na gonting i. Dibahen i nunga disuan ho angka porlak hasoloan, jala dilopokkon ho angka ranting na pulik marga tusi.

17:11 Di ari pangalopokkonmu manjadi do nian dibahen ho, jala manogotna i marmutihi suansuananmu dibahen ho, hape di ari gotilon jea dohot haporsuhon martibalan jambarmu.

17:12 Jea ni hariburon ni torop angka bangso! Songon parhasak ni angka laut pardoromnasida! Jala parhasak ni angka bangso, songon pardorom ni angka batang aek na doras pardoromnasida i.

17:13 Tongon do, songon pardorom ni angka aek magodang, pardorom ni angka bangso; alai mangonai hata ibana tusi, jadi dao ibana maporus, jala * mapurpur, songon rapanrapan ni angka dolok maradophon alogo, jala songon halisungsung maradophon habahaba siappalautus.

17:14 * Marhira bodari, ida ma, masa hasonggoton, ndang dope torang ari, hape ndang adong be disi, i ma jambar ni angka na mandobo hita, jala parsorion ni angka na mamupusi hita.

Jesaya 18

18:1 Marjea ma ho, ale tano na marlinggoman pahebaheba, na di bariba ni angka batang aek Kus.

18:2 Na paborhat angka suruan tu laut di bagasan solu hotang di atas aek jala mandok: Laho ma ne hamu angka suruan na pantas tu bangso pardaging na ganjang jala na pinupusan, tu bangso na sumogir marbarita tu na dao, i ma bangso sigodang adat, jala guru dokna angka batangaek mangalantap di tanona.

18:3 Sude hamu ale isi ni portibi on dohot isi ni tano on, molo dipatindang tonggol di atas ni angka dolok, sai bereng hamu ma i! Jala molo dipalu sarune, sai tangihon hamu ma i!

18:4 Ai songon on hata ni Jahowa tu ahu: Sai hohom Ahu huhut paidaidahon di bagasan ingananku, songon parngiar ni ari uju di logona, songon ombun manorop di hinamohop ni gotilon.

18:5 Ai di jolo ni gotilon, molo sun marurus bungana, jala gabe biur maraek susu bunga i, disi ma sabionna angka lailai dohot sasabi, jala tallihanna angka rantingna, laos bolongkononna do.

18:6 Rap tartading do i di pidong angka na di dolok dohot di pinahan ni tano on, asa mansusuari disi angka pidong panoro, jala marudam disi nasa dorbia ni tano on.

18:7 Di tingki na sasada i ma tarboan angka * silehonlehon tu Jahowa Zebaot, sian bangso pardaging na ganjang jala na pinupusan; sian bangso na sumogir marbarita tu na dao, bangso sigodang adat jala guru dokna, angka batang aek mangalantap di tanona, taruhononna tu inganan ni goar ni Jahowa Zebaot, tu dolok Sion.

Jesaya 19

19:1 Uhum madabu tu * Misir: Ida ma, Jahowa marhureta di atas sada ombun na doras laho manopot Misir, jadi maporus ma angka ajiajian ni Misir maradophon ibana, jala malala roha ni halak Misir di bagasan.

19:2 Jadi patubionku ma Misir dompak Misir, asa laos nasida sama nasida marmusu, na mardongan dohot na maraleale, huta dompak huta, harajaon dompak harajaon.

19:3 Jala rumar bahenonku tondi ni halak Misir di bagasan, jala muntul tahina i bahenonku, jadi usouso ma nasida tu angka ganaganaan, parsibalik mata, hasandaran dohot pangarunding.

19:4 Pasahatonku ma huhut halak Misir tu tangan ni tuan na posi maruhum, jala raja na murhing mangarajai nasida, ninna Tuhan Jahowa Zebaot.

19:5 Jadi marsik ma angka aek sian laut, marsik dohot batang aek i gabe mahiang.

19:6 Jadi angir ma angka sunge, rejet jala mahiang angka batang aek di Misir, malos ma angka arung dohot tolong.

19:7 Hasang ma angka jampalan martopihon batang aek, jala nasa panaburan boni di topi ni batang aek i malos do, rahar jala ndang gabeak.

19:8 Jadi marhoi ma angka pardengke, jala marsak sude angka na mandanggurhon hailna tu batang aek i, jala halak angka na manampakhon jalana tu laut, maras do.

19:9 Tarurak ma jolma angka na martonun hori na sinuri dohot dagangan na bontar.

19:10 Jadi marponggolan ma angka tiang ojahan di nasida, tarjimput situtu ma roha ni sude jolma sipangan gaji.

19:11 Tung angka na oto sambing do angka raja di * Zoan, angka panuturi na bisuk ni raja Firaun pe, tung na oto do tahina i. Beha ma partorang ni pandokmuna tu raja Firaun: Anak ni halak na bisuk do ahu, anak ni raja sian na robi.

19:12 Didia do nuaeng angka na bisukmu, asa dipabotohon nasida nian tu ho manang aha sangkap ni Jahowa Zebaot dompak Misir.

19:13 Nunga manjadi na oto angka pangarajai di Zoan, nunga tarpaoto angka pangarajai sian Nob, jala lilu sandok Misir dibahen jujungan ni angka margana.

19:14 Nunga diusehon Jahowa tu bagasan nasida sada * tondi ni hageduhon, asa dililuhon nasida sandok Misir di nasa jadijadianna, songon siparmabuk na manggalumangi utautana.

19:15 Jadi ndang adong be manjadi ulaon di Misir, na pinauli * marulu manang marihur, marranting ni harambir, manang marlili.

19:16 Di ari na sasada i doshon inaina halak Misir, angka hitir jala tahuton maradophon pangondam ni tangan ni Jahowa Zebaot, na niondamhonna dompak nasida.

19:17 Jala panonditnonditon Misir mida tano Juda, nasa na marningot disi tarsonggot alani, dibahen sangkap ni Jahowa Zebaot naung sinangkapna dompak nasida.

19:18 Di ari na sasada i marpangkuling Kanaan ma lima huta di tano Misir, jala * marmangmang tu Jahowa Zebaot; huta nasada targoar Ir Heres.

19:19 Di ari na sasada i adong sada langgatan di Jahowa di tongatonga ni tano Misir, jala sada * tiang parningotan di Jahowa mardonokkon partalpahanna.

19:20 I ma gabe tanda dohot sitindangi di Jahowa Zebaot di tano Misir, ai mangangguhi ma nasida tu Jahowa maradophon angka pangarupa, jadi tongosonna ma di nasida sada sipalua dohot partogi, asa dipalua nasida.

19:21 Jadi papataron ni Jahowa ma dirina tu halak Misir, jala tandaon ni halak Misir Jahowa di ari na sasada i, jala pelehononnasida angka pelean sipotongon dohot sipanganon, jala marbagabaga nasida tu Jahowa, jala gararonna do.

19:22 Jadi posi pe paminsang ni Jahowa di halak Misir, alai pamalumonna muse; jadi mulak ma nasida tu Jahowa, gabe marpamuati rohana tu nasida, jala pamalumonna nasida.

19:23 Adong ma di ari na sasada i sada dalan balobung sian Misir tu Assur, jadi ro ma halak Assur tu Misir, jala halak Misir tu Assur, rap marsomba ma halak Misir dohot halak Assur tu Jahowa.

19:24 Jadi patoluhon ma halak Israel di ari na sasada i rap dohot halak Misir dohot halak Assur gabe pasupasu diparsitongaan ni tano on.

19:25 Ai pasupasuon ni Jahowa Zebaot ma nasida, dohononna ma: Pinasupasu ma hamu ale halak Misir bangsongku, jala jadijadian ni tanganku, hamu ale halak Assur, jala parjambaranku anggo hamu ale halak Israel.

Jesaya 20

20:1 Di taon haroro ni * si Tartan tu Asdod, sinuru ni si Sargon, raja sian Assur, asa dimusui jala dipapatu Asdod.

20:2 Hata ni Jahowa uju i marhitehite Jesaya, anak ni si Amos, songon on: Laho ma ho, jala tanggali ma abit tangki sian gontingmu, jala tanggali ma sipatum sian patmu! Jadi dibahen ma songon i, laos mardalan marsaemara, jala ndang marsipatu.

20:3 Jadi ninna Jahowa ma: Songon pardalan ni naposongku Jesaya marsaemara, jala ndang marsipatu, pola tolu taon lelengna, bahen tanda dohot halongangan do i taringot tu na masa sogot tu Misir dohot tu Kus.

20:4 Songon i ma onjaronjaron ni raja sian Assur angka na tinangkup sian Misir dohot angka na tarbuang sian Kus, angka dolidoli dohot angka na ubanon marsaemara, jala ndang marsipatu, jala manangkas ombaombana, gabe haurahon ni halak Misir.

20:5 Jadi tarsonggot ma nasida, jala maila maradophon Kus haposannasida dohot maradophon Misir asangasangnasida.

20:6 Jadi dohonon ni isi ni pulopulo ma di ari na sasada i: Ida ma, songon i do hape pangalaho ni jolma haposanta, haporusanta nasailaon, mangido panumpahion nian, asa malua hita maradophon raja ni Assur; jala songon dia ma tarbahen hita malua?

Jesaya 21

21:1 Uhum madabu tu halongonan martopihon laut. Songon pansedai ni habahaba di dangsina, harorona sian halongonan sian luat na sogir.

21:2 Sada pangungkapon na dokdok dipapatar tu ahu: Mandobo pandobo i, martaban partaban i! Nangkok ma ho, ale Elam! Manosak ma ho, ale Madai! Pasohotonku ma sude hoihoi.

21:3 Dibahen i gok haberniton do angka gontingku, mangae do ahu, songon pangae ni boruboru na naeng mangintubu; mangirput ahu umbegesa, angka hitir ahu marnidasa.

21:4 Bukbak ateatengku, pola angka hitir ahu sian songgotna, borngin hariburonku gabe jeangku dibahen.

21:5 Pinadiri ma sada meja, marhal ma parhali, mangan minum ma! Hehe ma hamu angka raja, hapuri hamu ma lombulombu.

21:6 Ai songon on didok Tuhan i mandok ahu: Laho ma ho, dokkon ma parhal, asa dipaboa na niidana.

21:7 Jadi diida ma sahoron baoa parsihundul marduadua, sahoron halode, sahoron unto, mansai tangkas situtu ma ibana mananginangi.

21:8 Dung i joujou ibana songon singa: Sai * jongjong di parhalan do ahu ale Tuhan manipat ari, jala sai tindang di gansingku do ahu manipat borngin.

21:9 Jadi ida ma, ro do sahoron baoa, parsihundul marduadua, na mangalusi, mandok: * Nunga tartaban, nunga tartaban Babel; jala nunga diparumpak sude angka ajiajian pinardebatanasida i.

21:10 Oe ho na hudegedege, jala anak ni pardegeanku naung hubege sian Jahowa Zebaot, Debata ni Israel, i do na hubaritahon tu hamu.

21:11 Uhum madabu tu * Duma: Joujou do sian * Seir tu Ahu: Ale parjaga, nunga beha borngin i? Ale parjaga, nunga beha borngin i?

21:12 Ninna parjaga i ma: Nunga torang ari, huhut dope borngin. Molo sapala manangkasi hamu, tangkasi hamu ma, dung i mulak ma hamu tuson.

21:13 Uhum madabu tu Arab: Di bagasan tombak ni Arab ma marmalam hamu, ale angka partigatiga pansar sian halak Dedan i.

21:14 Jumpangkon hamu aek tu na mauas, hamu isi ni luat Tema! Tomutomuhon hamu ma roti tu halak na maporus i.

21:15 Ai maradophon angka podangnasida maporus, maradophon podang na sinintak, dohot maradophon sior na tinangging, dohot maradophon parmusuon na sobu.

21:16 Ai songon on didok Tuhan i tu ahu: Di bagasan sataon dope, * songon angka taon ni anak gajian, pesan ma sandok hamuliaon ni * Kedar.

21:17 Jala lam tu otikna di bilangan ni pasipasi ni angka pande manior, angka anak na begu sian Kedar, ai Jahowa, Debata ni Israel mandok songon i.

Jesaya 22

22:1 Uhum madabu tu rura paralatan: Aha di ho umbahen tung manaek sandok ho, tu angka * tarup?

22:2 Ho ale huta na gok hariburon, na rame, benteng parolopolop! Ndang manang tinampul ni podang, manang mate tongtang angka na matem.

22:3 Luhut angka partogim rap maporus do, nunga mangoloi rante on nasida so marsior; saluhut angka na dapot sian ho rap tarrante do, dao do nasida maporus.

22:4 Dibahen i hudok: Padao hamu pamerengmu sian ahu, asa tumatangis situtu ahu; unang datdati hamu mangapuli ahu taringot tu hasisiap ni boru ni bangsongku.

22:5 Ai ari hagunturon, hasiapon dohot hasonggoton do na pinamasa ni Tuhan Jahowa Zebaot di rura paralatan; dilohai parik, gabe marsaringar angguhangguk sian dolok.

22:6 Nunga pola disintak Elam parsumbiaan mardongan hureta dohot jolma parhantarhantar nang angka parsihundul, jala nunga pola mamontar lombulombu ni Kir.

22:7 Jadi gok hureta ma ruram, angka na dumenggan i, jala dirongom angka parsihundul do bahal i.

22:8 Jadi dipatait halak ma partanobatoan ni Juda gabe mangaranapi ho di ari na sasada i dompak angka sinjata di bagasan * bagas parsinjataan na di tombak.

22:9 Jadi diida hamu angka rigat ni * huta ni si Daud, ai torop do angka i, gabe dipapungu hamu angka aek ni * ambar partoru.

22:10 Dung i dibilangi hamu angka bagas di Jerusalem, jala * diloha hamu angka bagas i laho pagontingkon parik i.

22:11 Jadi dibahen hamu sada lintong di holangholang ni parik na dua i bahen parpeopan ni angka aek sian ambar nahinan Alai ndang manaili hamu dompak ibana na mambahensa, jala ndang dibereng hamu ibana na jumadihon sian narobi.

22:12 Jadi joujou ma Tuhan Jahowa Zebaot di ari na sasada i mambahen partangison dohot parangguhon dohot hapalpalon dohot parhohoson tangki.

22:13 Hape ida ma, ianggo nuaeng: Holan las ni roha dohot parolopolopon masa mamotongi lombu dohot manamboli birubiru, mangan juhut dohot * minum anggur, lam ninna dope: * Mangan jala minum ma hita, ai marsogot do hita mate.

22:14 Alai nunga dibortikkon Tuhan Jahowa Zebaot hian tu pinggolhu: Tung na so tupa sesaon hajahatonmunaon, paima mate hamu, ninna Tuhan Jahowa Zebaot.

22:15 Songon on do didok Tuhan Jahowa Zebaot: Laho ma ho mandapothon wakil on, i ma * si Sebna pangaramoti ni bagas i dok ma tu ibana.

22:16 Aha di ho dison, jala ise pinangasahonmu dison umbahen dituhil ho dison tanomanmu? Tung tama ma ho manuhil tanomanmu di ginjang, mangaruangi ingananmu di bagasan dolok batu.

22:17 Ida ma sampathonon ni Jahowa ma ho, songon panampathon ni halak na gogo jala panguspangusonna ma ho.

22:18 Lulunonna ma ho tutu, songon rago tongon ragohononna ho tu tano na dao, jala na so marparbalohan, disi ma ho mate, jala disi ma angka hureta hatongamonmu, ho ale haurahon ni bagas ni tuanmu.

22:19 Dung i onjarhononku ma ho sian tohonanmu, jala tulingkononna ho sian hajongjonganmu.

22:20 Jadi jouonku ma di ari na sasada i naposongku * si Eliakim, anak ni si Hilkia.

22:21 Jala alithononku ma tu ibana pangkeanmu, jala hohoshononku tu ibana hohosmi, jala pasahatonku pangarajaionmu tu tanganna, asa ibana gabe ama di isi ni Jerusalem dohot di bagas ni Juda.

22:22 Jala ampehononku anakkinsu ni bagas ni si Daud tu abarana, asa ibana * mangungkap, jala ndang adong na tuk mangkinsu, jala ibana mangkinsu, gabe ndang adong na tuk mangungkap.

22:23 Jala pantikhononku ibana songon labang di inganan na hot, asa gabe habangsa hamuliaon ibana di bagasan bagas ni amana.

22:24 Asa hot dijujung ibana saluhut hasangapon ni bagas ni amana, angka dangka dohot tunas, saluhut ulaula metmet, sian ulaula panginuman ro di sude ulaula parhinaloan.

22:25 Di ari na sasada i, ninna Tuhan Jahowa Zebaot ingkon buaton ma labang na pantihi di inganan na hot, jala umpaton jala madekdek; jala siap ma angka na mangihut tu ibana, ai Jahowa do mandok.

Jesaya 23

23:1 Uhum madabu tu * Tirus: Mangangguhi ma hamu, ale angka isi ni parau Tarsis, ai nunga siap huta i, ndang adong be labuan hamulian! Sian tano ni halak Kitim tarbortik barita i tu nasida.

23:2 Hohom ma hamu ale isi ni pulo! Angka partigatiga sian Sidon na marparau di laut mangisi ho.

23:3 Ai marhitehite laut godang tarboan tu ho boni ni Nil dohot eme na ginotil martopihon sunge, jadi ho hira onan ni angka bangso.

23:4 Maila ma ho ale Sidon, ai ninna laut i, * huta na gonting di laut i songon on: Ndang mangae posoposo ahu, jala ndang manubuhon ahu, manang pagodanggodang dolidoli manang namarbaju.

23:5 Molo tolhas barita i tu Misir, tarsonggot ma nasida umbege barita sian Tirus.

23:6 Taripar ma hamu tu Tarsis, mangangguhi ma hamu ala isi ni pulo i!

23:7 Tung i do hutamuna na marhariburon i, na marmula di angka ari narobi? Boanon ni patnasida sandiri do nasida maisolat tu na dao.

23:8 Ise naung sumangkap songon i taringot tu Tirus, sisagi tumpal * raja do angka saudagar disi, jala partigatigana angka na sumangap di tano on.

23:9 Jahowa Zebaot tahe sumangkapi songon i, asa mangaramuni nasa hinauli ni haginjangon, laho pajimputhon nasa halak na sangap di tano on.

23:10 Pabinsat ma tanomi, songon batang aek Nil, ho ale boru Tarsis! Ndang adong be disi * hohos.

23:11 Nunga dipatoltol ibana tanganna tu atas laut, mangkutol angka harajaon, nunga martona Jahowa taringot tu Kanaan naeng maniaphon angka bentengna.

23:12 Jala ninna do: Ndang be marolopolop ho tu joloan on, ho ale boru * Sidon na nirupa! Hehe ma ho laho taripar tu Kitim! Disi pe, ndang tagamon sonang ho.

23:13 Ida ma, tano ni halak Kasdim, i ma bangso na so adong hian, na pinaojak ni Assur di angka isi ni halongonan. Pajongjong palaspalas bahen parhalanna nasida, diloha nasida do bagasnasida na bolon i mambahen parturanggongan sian i.

23:14 Mangangguhi ma hamu ale angka parau Tarsis, ai nunga siap bentengmuna i.

23:15 Dung i di ari na sasada i lupa ma Tirus pitupulu taon, songon leleng ni ariari ni sada raja. Alai dung salpu na pitupulu taon i songgop ma tu Tirus hombar tu ende ni sibabijalang.

23:16 Sintak ma hasapi, liati ma huta i ale sibabijalang naung hinalupahon! Padenggan ma pamiltikmu jala padeak ende, asa diingot halak ho muse.

23:17 Ai dung marujung sipitupulu taon i, ebatan ni Tuhan Jahowa ma Tirus i, asa mulak tu ibana upa sibabijalang i, gabe maruhum na jat tu saluhut harajaon ni tano on, angka na di sandok portibi on.

23:18 Alai * badia di Jahowa do parboniagaonna dohot labana sian tigatiga, ndang pagukguhonna manang tabunihononna, angka na maringanan di jolo ni Tuhan Jahowa nampuna labanasida bahen sipanganon maradu mahapan, jala maruli pangkean na jagar.

Jesaya 24

24:1 Ida ma, palangaon jala pasiapon ni Jahowa ma tano i, jala balikkononna ma sisikna, pasiaphon angka pangisina.

24:2 Jala doshon halak natorop ma malim, doshon naposo tuanna, doshon boruboru sonduhan soranganna, doshon panuhor panggadis, doshon parsambut parsambutan, doshon pangurang pangurangan.

24:3 Langa situtu ma tano i jala pinupusan, ai Jahowa do mandok hata on.

24:4 Majal jala tarulang ma tano i, majal jala tarulang liat portibi on; maras ma dohot angka na timbul sian bangso i di tano on.

24:5 Jala ramun tano i dibahen pangisina, ai nunga dilaosi nasida angka patik, jala diuba hasomalan, jala diose padan na salelenglelengna.

24:6 Dibahen i siap do tano i gagaton ni torutoru jala manginona tu angka pangisina; dibahen i masoksok angka isi ni tano i, jala otik nama jolma teba.

24:7 Marsik do tuak anggur, malos ia hau anggur, marhoi be sude angka na las roha na sai laon.

24:8 Mansohot do las ni roha binahen ni arbab! Mansadi hariburon ni angka parolopolop; mansohot las ni roha binahen ni hasapi.

24:9 Ndang be marende nasida uju minum anggur, paet do tuak na pang di roha ni halak na manginumsa.

24:10 Nunga maloha huta na langa i, hinsu be sude angka bagas, ndang be habongotan.

24:11 Masa angguhangguk di angka alaman ala hurangan anggur; nunga pesan nasa las ni roha, nunga mapurpur nasa las ni roha ni tano on.

24:12 Turanggong nama teba di huta i, jala tahaonna ma angka pargumbangan i.

24:13 Ai masa ma di parsitongaan ni tano i, di tongatonga ni angka bangso, songon pangkuturon di hau jetun, songon pamutihon, ia dung salpu gotilon.

24:14 Ianggo nasida, pangiaronnasida ma soaranasida, marolopolop mida hamuliaon ni Jahowa, marolopolop ma angka nasida sian laut.

24:15 Dibahen i pasangap ma Jahowa, hamu angka isi ni tano, habinsaran, hamu angka isi ni pulo di laut goar ni Jahowa, Debata ni Israel.

24:16 Sian ujung ni tano on hubege hami angka ende pujipujian: Hamuliaon ma di partigor! Jadi ningku ma: Ngalutna i di ahu, ngalutna i di ahu! Jea tonahon! Manjehehon angka parjehe, tongon manjehehon angka parjehe.

24:17 Hasogiron dohot godung dohot jorgong songgop tu ho ale isi ni tano i!

24:18 Ai tung sura maporus manang ise maradophon soara ni hasogiron, madabu do ibana tu godung; jala manang ise na manaek sian godung, dapot do ibana di jorgong. Ai nunga buha angka pandiloan di langit jala humuntal angka ojahan ni tano on.

24:19 Marsidomdom situtu ma ianggo tano i jala angka rigat situtu, gunsang situtu ma tano i.

24:20 Lalolalo situtu ma tano i, * songon halak na mabuk, jala mambalambal songon geanggeang, ai manginona tu ibana pangalaosina, gabe tinggang, jala ndang tarbahensa be hehe.

24:21 Jadi di ari na sasada i marlulu ma Jahowa dompak * parangan angka na ginjang marroha di haginjangonna dohot dompak angka raja ni tano on di atas tano on.

24:22 Rap paluhutonna ma nasida tarrante tu bagasan godung, jala hurungkononna nasida tu bagasan hurungan, dung i * di laonlaon ni ari marlulu muse ibana dompak nasida.

24:23 Jadi * maila ma bulan, jala tarurak mata ni ari, ai * Jahowa Zebaot Raja di dolok Sion dohot di Jerusalem, jala hamuliaon do di adopan ni angka sintuana.

Jesaya 25

25:1 Ale Jahowa, ho do Debatangku, sai patimbulonku do ho, pujionku do goarmu, ai nunga mambahen halongangan ho; angka sangkapmu sian narobi pe na bonar jala na sintong do.

25:2 Ai nunga gabe pantil batu huta i dibahen ho, huta na gonting i gabe maloha; bagas bolon ni angka paisolat malua sian huta i, na so sipaulion be salelenglelengna.

25:3 Dibahen i ingkon pasangapon ni bangso na marhuaso i ho, jala ingkon habiaran ni huta ni angka bangso pandobo ho.

25:4 Ai ho do partanobatoan ni na dangol, partanobatoan ni na pogos di hagogotanna; * haporusan maradophon udan tipotipo, * parlinggoman maradophon ari na marngiarngiar, ai doshon udan tipotipo tu dorpi parlongos ni muruk ni halak sibahen gogo.

25:5 Songon ari na marngiarngiar di tano bangkalbangkal dipaonjap ho hariburon ni halak na buro; morpo do ari na marngiarngiar marhitehite linggom ni ombun, ingkon songon i pasohotonmu ende olopolop ni angka sigostang botohon.

25:6 Jadi padirion ni Jahowa Zebaot ma di saluhut bangso sada haroan di dolok on, * haroan na talmis, haroan sian tuak anggur naung leleng, sian sipanganon na hojal, sian angka anggur na galia na pita.

25:7 Dung i pasisionna ma di dolok on hirehire na hinungkuphon tu saluhut angka bangso dohot pangkuphupi na hinungkuphon tu saluhut angka parbegu.

25:8 * Bondutonna ma hamatean salelenglelengna jala * apusan ni Tuhan Jahowa ma iluilu sian nasa bohi, jala padaoonna ma haurahon ni bangsona di sandok tano on, ai nunga Jahowa mandok i.

25:9 Jadi dohonon ni halak ma di ari na sasada i: Ida ma on do Debatanta, na itahaposi, na mangurupi hita, dison do Jahowa na itahaposi. Marolopolop ma hita jala marlas ni roha mida hatuaonna i.

25:10 Ai maradian di dolok on ma tangan ni Jahowa, alai anggo Moab degedegeonna ma tu toru ni patna, songon durame na niluntak tu partangkalan.

25:11 Jadi pahembangonna ma tanganna tu tongatonganasida, songon pangerbang ni tangan ni parlange laho marlange. Alai anggo ibana pajimputonna ma haginjangonnasida ro di sipaotooto angka na binahen ni tanganna.

25:12 Panepneponna ma partanobatoanmu dohot angka parik na gonting, pajepolonna do nasida mangonjarhon tu tano, pola tung marguluhon orbuk.

Jesaya 26

26:1 Di ari na sasada i endehonon ni halak ma ende on di luat Juda: Adong do huta na gonting di hita, hatuaon do dibahen parik dohot partanobatoan.

26:2 Ungkap hamu ma angka harbangan, asa bongot bangso na tigor, na marsihohot maniopi haburjuon.

26:3 Hombar tu sangkap na ojak do dipaian ho dame, dame ma tutu, ai marnalom ni roha mida ho do ibana.

26:4 * Marhaposan tu Jahowa ma hamu tongtong, ai Tuhan Jahowa do * dolok batu ro di salelenglelengna.

26:5 Ai ibana pajimput angka isi ni habuntulon, dipajepol do huta na hinsat i, ditimpalhon do i tu tano, direongkon tu orbuk.

26:6 Asa diluntakluntak pat, angka pat ni halak na dangol dohot langka ni halak na pogos.

26:7 Dalan ni halak na tigor do angka hatigoran, sai tigor do dasingonmu dalan ni partigor i.

26:8 Nang di dalan ni angka uhummu, sai marhaposan tu ho do hami, ale Jahowa! * Marlas ni roha hami mida goarmi dohot mida pujipujian tu ho.

26:9 Sai dihalungunhon rohangku do ho bornginna i, tondingku di bagasan pe sogot do ho dilului. Ai disi mangonai angka uhummu tu tano i, gumuruhon hatigoran ma isi ni portibi on.

26:10 Nang jumpangan asi ni roha parjahat i, ndang gumuruhon hatigoran ibana; sai manjahati ibana di tano habonaron, jala ndang ditailihon hamuliaon ni Jahowa.

26:11 Ale Jahowa, nunga timbul nian tanganmu, hape ndang diida nasida; idaonnasida do sogot hamuruhonmu humongkop bangsom jala tarurak; nang api panganonna do angka alom.

26:12 Alai anggo di hami, ale Jahowa hadameon do paradeonmu, ai nasa ulaonnami pe, ho do mangulahon di hami.

26:13 Ale Jahowa Debatanami, atik pe angka tuan na asing mangarajai hami di balik ni ho, sai baritahononnami: Do goarmu marhitehite ho.

26:14 Ndang mulak mangolu angka na mate, ndang hehe angka halinu, ala marlulu ho laho maniaphon nasida, jala dipidomhon ho do nasa parningotan di nasida.

26:15 Nunga ditambai ho bangso i, ale Jahowa, nunga ditambai ho bangso i, nunga marmulia ho, nunga dipalantas ho nasa parbalohan ni tano i.

26:16 Ale Jahowa, jumpa hagogotan dilului nasida ho, ia mangonai pinsangpinsangmu tu nasida, ubitubit ma nasida martangiang.

26:17 * Songon parompuan na gabegabean, nunga jonok hasasangana mangae posoposona, mangangguhi ma ibana di habernitonna i, laos songon i do hadadaonami sian bohim ale Jahowa.

26:18 * Gabegabean do nang hami, mangae posoposo do hami, hape hira alogo do na hutubuhon hami; ndang tarpatupa hami hatuaon di tano i, jala dung sahat hutubuhon hami isi ni portibi on.

26:19 * Mangolu do ianggo angka na matem, hehe do muse bangkengku. Ngot ma hamu jala marolopolop hamu angka isi ni orbuk? Ai * nambur ni angka panondang do namburmu, jala paruaron ni tano i muse angka naung mate.

26:20 Laho ma ho ale bangsongku, bongot i ma angka bilutmu jala hinsu ma pintumi di pudim. Martamonding ma ho satongkin * paima salpu rimas i.

26:21 Ai ida ma, sai * na ruar do Jahowa sian ingananna laho mangaluluhon hajahaton tu isi ni portibi on; jala papataron ni tano on do utang mudarna, jala ndang be hungkupanna angka na mate tartodos.

Jesaya 27

27:1 Di ari na sasada i marlulu ma Jahowa marhitehite podangna na niugam, na balga jala na sinopu dompak Leviatan i ma ulok na mangarpe dohot dompak Leviatan, i ma ulok na marlegotlegot, jala bunuonna ma naga na di laut i.

27:2 Di ari na sasada i adong ma sada * porlak anggur hasudungan, marende taripar ma hamu taringot tusi songon on.

27:3 Ahu Jahowa sandiri mangaramoti ibana, ganup tongkin hubornoki ibana, sai huramoti ibana borngin dohot arian asa unang adong na manegai dompak ibana.

27:4 Rimas na marpiarpiar ndang adong di ahu; tung ise ma mangalehon suga dohot sihupi tu ahu di hamusuon, sai tahoponku do i, tung rap suda do i surbuonku.

27:5 Manang ia tung ditangkup nasida partanobatoanku, mardame ma nasida tu ahu, mardame ma nasida tongon tu ahu.

27:6 Sai marurat do Jakkob di angka ari na ro sogot, marbunga jala martumbur ma Israel, jadi gok parbuena ma liat portibi on.

27:7 Tung songon pamungkul ni sipungkul ibana ma pamungkulna di nasida? Manang tung songon pamunuon ni sibunu ibana pamununa di nasida?

27:8 * Marpangantan tahe marhite sian habuangan dipinsang ho nasida; nunga tung dihiaphon ibana nasida marhite sian * anginna na pur i ma di ari angin habinsaran.

27:9 Dibahen i marhite sian i salesehononna ma * dosa ni Jakkob, jala on do nasa parbue ni pamuation di dosana: Molo tung doshon batu hapur na niduda nasa batu langgatan dibahen, asa unang be tinggal angka ganaganaan ni * Astarte dohot Baal.

27:10 Ai tarpunjung do * huta na gonting i, inganan na tarulang jala na tinadingkon, songon halongonan; disi do manjampal anak ni lombu jala disi do marmodoman, jala palpalanna do angka dangkana.

27:11 Molo ranggason angka dangkana, marponggolan ma, jala ro do angka boruboru manutungi angka i. Ai bangso na so marparbinotoan do on, dibahen i ndang marpamuati roha ni sitompa ibana, jala ndang marasi ni roha Sijadi ibana.

27:12 Di ari na sasada i: Degeon ni Jahowa ma nasa biur, olat ni batang aek Euprat sahat ro di sunge Misir. Jadi jomputon ma hamu ale anak ni Israel sadasada.

27:13 Di ari na sasada i paluonna ma sangka bolon, jadi ro ma nasida naung mago di luat Assur dohot nasida angka na tardempar di luat Misir, jadi marsomba ma nasida tu Jahowa di atas dolok na badia i di Jerusalem.

Jesaya 28

28:1 Marjea ma * tumpal haginjangon ni halak Epraim angka na mabuk dohot bunga na malos, hajagaron ni hasangaponna, na di ulu ni rura na napu, angka na mandaon sian anggur.

28:2 Ida ma, adong do di Tuhan i sada na gogo jala na todos: Songon habahaba mardongan ambolas, habahaba siappalautus na mangago, songon parnangkat ni aek na doras mardalan ibana manimpalhon nasida tu tano marhitehite tanganna.

28:3 Luntahanna ma marhitehite pat tumpal haginjangon ni halak Epraim angka na mabuk.

28:4 Jala bunga na malos, hajagaron ni hasangaponna na di ulu ni rura na napu doshon antajau patumonaan di jolo ni ari logo, na niida ni na marnida, ndang dope tolhas tu tanganna nunga dibondut.

28:5 Di ari na sasada i Jahowa Zebaot gabe tumpal hasangapon dohot sanggul hamuliaon di pasipasi ni bangsona.

28:6 Huhut gabe tondi ni uhum tu halak na hundul maruhum, jala hagogoon di halak na paundar hamusuon sahat ro di bahal.

28:7 Alai nang nasida lilu do binahen ni anggur, jala moror diida binahen ni siinumon na pang; tole malim tole panurirang rabatrabat mardalan binahen ni siinumon na pang, dibondut anggur i nasida, moror diida sian siinumon na pang, lilu nasida di bagasan pangungkapon, bohabohaon nasida mandabu uhum.

28:8 Ai sude meja gok utauta na barjit, sap do sudena.

28:9 Tung tu ise ma ajarhononna parbinotoan? Tung tu ise ma pabotohononna jamita? Dakdanak angka nambura sirang susu ulaning, angka nambura pinaholang sian bagot ni inaina ulaning?

28:10 Ari mardapotdapot angka tona; mardapotdapot angka oraora, dison saotik, disi saotik.

28:11 Dibahen i marhitehite bibir pangeleson, dohot marhite dila na pulik ibana mangkatai sogot tu bangso on.

28:12 Ala naung ibana mandok tu angka nasida: On do * hasonangan: Pasonang hamu halak na loja, jala i do dalan tu hasonangan: Hape ndang ditangihon nasida.

28:13 Jadi songgop ma tu nasida hata ni Jahowa: Sai mardapotdapot angka tona, sai mardapotdapot angka oraora, dison saotik, disi saotik, asa mardalan nasida jala maninggalak jala marimpong jala tarjail jala tartangkup.

28:14 Dibahen i tangihon ma hata ni Tuhan Jahowa, hamu ale jolma pangelesi, hamu ale pangarajai ni bangso on na di Jerusalem.

28:15 Ai didok hamu do songon on: Nunga marpadan hami dohot hamatean, jala nunga marjanji hami dohot banuatoru, nang ro linsinglinsing hamagoan parsangean, ndang tagamon tolhas ianggo tu hita; ai nunga marhaporusan tu gabus hita, jala sipaotooto mangondingi hita.

28:16 Dibahen i songon on do hata ni Tuhan Jahowa: Ida ma, * ahu paojakkon di Sion sada batu, batu na niuji, sada batu parsuhi na arga bahen ojahan na hot; manang ise na porsea di ibana, ndang tagamon maporus.

28:17 Jala nunga hubahen uhum gabe tali rambu, jala hatigoran gabe tali pandodo, jala aupon ni ambolas ma haporusan gabusi, jala umbangon ni aek partabunianna i.

28:18 Asa tos padanmuna dohot hamatean, jala unang hot janjimuna dohot banuatoru. Molo ro linsinglinsing ni hamagoan parsangean, luntahonna ma hamu.

28:19 Manang piga hali pe ibana ro, sai na luahononna do hamu, ai ganup sogot do ibana ro, arian dohot borngin tahe, jala * hagogotan sambing mambahen antusan hata na binege.

28:20 Ai majempekku do podoman, ndang tarbahen jolma mangihortang disi, jala magogothu bulusan ndang tarborhoshon.

28:21 Ai hehe ma Jahowa songon uju di dolok * Perosim jala marsigorgor rimasna songon uju di rura * Gibeon, asa diula ulaonna, salin do nian ulaonna i, jala diradoti parhaladoonna, asing do nian parhaladoonna i.

28:22 On pe, unang datdati hamu mangarehe, asa unang lam momos ihotmuna i; ai nunga hubege sian Tuhan Jahowa Zebaot * hasiapon dohot torutoru tu sandok tano on.

28:23 Patinggil hamu pinggolmuna jala tangihon hamu soarangki, paeleng hamu pinggolmuna, jala tangihon hamu hatangkon!

28:24 Tung ganup ari ma paninggala maninggalai laho manabur? Tung sai didatdati ma manggole dohot manisir haumana?

28:25 Nda songon on do ia dung digagati sisikna, disaburhon longa manang juragi manang diordangkon manang diemehon manang daua manang singkoru eme marguru tu pamalohina.

28:26 Dung i didege ma i hombar tu uhum na niajarhon ni Debatana tu ibana.

28:27 Ai ndada marhitehite padati pardege didege halak longa, jala ndang digiling galapang ni padati tu juragi, marhitehite lotaklotak do longa i didege halak, jala patna didegehon tu eme.

28:28 Diduda pe eme i, ndada sai didatdati maradu magopu, ndada sai dibasbas galapang ni padatina dohot hodana, ndang tahe digopui.

28:29 Nang i marharoroan sian Jahowa Zebaot do i: Na sumurung do tahina, jala dipagodang panumpahina.

Jesaya 29

29:1 Marjea ma ho, ale * tataring ni Debata, tataring ni Debata! Huta parhabangsaan ni si Daud! Sai ambai hamu ma sataon tu sataon, jala marliat ma angka pesta.

29:2 Dung i sosakhononku ma tataring ni Debata, gabe masa angguhangguk dohot partangison, jala gabe songon tataring ni Debata, ibana di ahu tongon.

29:3 Ai tungkumonku ma ho tuk humaliang jala sosahonku ho marhitehite hubu, jala paheheonku angka salosap mangalo ho.

29:4 Jadi tungki ma ho mandok hatam sian bagasan tano i, jala sian bagasan orbuk inggohononmu hatam, jala songon soara ni parsibalik mata soaram sian bagasan tano i, jala marhusip pangkataionmu sian bagasan orbuk.

29:5 Alai doshon orbuk na neang ma disi hinadeak ni musum, jala songon hurangkam na hinabangkon do hinadeak ni angka pangarupa, jala tompu do i masa so pangkiriman.

29:6 Ai marlulu ma Jahowa Zebaot marhitehite ronggur dohot lalo dohot porhas manoro, halisungsung dohot habahaba dohot marhitehite * jilam ni api na manganhon.

29:7 Jadi doshon nipi alatan borngin ma disi hinadeak ni nasa bangso, angka na marporang dompak tataring ni Debata dohot sude na marmusu mangalo ibana dohot partanobatoanna ro di angka namanosak ibana.

29:8 Jadi masa ma disi songon halak na male, mangan ibana diipi, hape dung tarsunggul, laos rapar dope butuhana; manang songon halak na mauas, minum ibana diipi, hape ia dung ngot, laos mandate dope ibana jala mauas; suman tusi do hinadeak ni sude bangso, angka na marporang dompak dolok Sion.

29:9 Marseto ma hamu jala longang masiberengan ma hamu huhut longang! Mabuk do nasida, alai ndang binahen ni anggur, rabatrabat do nasida, alai ndang binahen ni siinumon na horas.

29:10 Ai nunga diusehon Jahowa tu hamu sada tondi na redem, jala marpanutupi matamuna, i ma angka panurirang i dibahen, jala partogimuna i ma angka paralatan i dipitungi.

29:11 Dibahen i nasa pangungkapon di hamu, songon on hata ni buku na tarsahap, na nilehon tu halak naumboto manjaha surat i, huhut didok: Na jaha ma on! Gabe didok ibana: Ndang tarbahen ahu ai na tarsahap do i.

29:12 Manang nilehon buku i tu halak na so umboto manjaha surat, huhut didok: Na jaha ma on! Gabe didok: Ndang huboto manjaha surat.

29:13 Jadi didok Tuhan i ma: Ala na jumonok bangso on tu ahu * marhitehite pamanganna dohot marhitehite bibirna pasangap ahu, hape anggo rohana holang do sian ahu, jala hadaulatonnasida maradophon ahu patikpatik ni jolma na ginuruhon sambing do i.

29:14 Dibahen i, ida ma, salin ma pambahenku tu joloan on tu bangso on, salin situtu ma, asa huagohon habisuhon ni angka na bisukna, jala hubolongkon roha ni angka parroha sian nasida.

29:15 Marjea ma angka na martamondingkon mansai bagas sangkap ni rohanasida maradophon Jahowa, jala diulahon jadijadiannasida di bagasan haholomon, didok muse dope: * Tung ise ma marnida hami, jala tung ise ma tumanda hami?

29:16 Oe sambar ni pangalahomuna i! Tung doshon sitopa hudon ma * tano liat tinopana i, manang tung dohonon ni jadijadian ma mandok na jumadihon ibana: Ndang ibana jumadihon ahu, manang tung dohonon ni ganaganaan ma tu na manggana: Ndang malo ibana?

29:17 Nda otiknari situtu nama, jadi muba ma Libanon, gabe * hauma na lunak jala hauma na lunak i gabe tombak dietong.

29:18 Dung i di nasadari i begeon ni angka na nengel ma angka hata ni buku na badia i jala marnida ma * mata ni halak na mapitung sian haholomon dohot sian hagolapon.

29:19 Jadi mardapotdapot ma las ni roha ni halak na dangol mida Jahowa, jala marolopolop ma angka jolma na pogos mida ibana na sun badia ni Israel.

29:20 Ai pidom ma disi halak pangarupa, jala siap pangarehe jala pesan sude jolma angka na marsangkap hajahaton.

29:21 Angka na mambahen mardosa jolma i marhitehite hata dohot manaon jorgong tu * halak na mandok hata sintong di bahal, jala dipadapot halak na tigor i marhitehite sipaoto.

29:22 Dibahen i songon on do hata ni Jahowa, na palua si Abraham, tu pinompar ni si Jakkob: Jala ndang be jadi tarurak si Jakkob ndang be langan bohina!

29:23 Ai molo diida angka anakna jadijadian ni tanganku di tongatonganasida, parbadiaannasida ma goarhu, parbadiaannasida ma dohot na badia ni si Jakkob, jala habiarannasida ma Debata ni Israel.

29:24 Jadi dapotan roha ma jolma partondi na lilu hian, jala gumuruhon poda ma halak parmungutmungut.

Jesaya 30

30:1 Marjea ma * anak angka na marbalik ninna Jahowa, angka na mambahen tahi so marhite sian ahu, jala mambahen janji so marhite sian tondingku, asa pagukguk dosa tu dosa.

30:2 Angka na laho tuat tu Misir, hape ndang jolo marpanungkun tu pamanganku, naeng marhara tu hagogoon ni Firaun, jala marhaporusan tu linggom ni Misir.

30:3 Hape ingkon gabe haurahonmuna do hagogoon ni Firaun jala gabe haelesonmuna do haporusan tu linggom ni Misir.

30:4 Ai sahat tu * Zoan angka rajanasida, jala tolhas ro di Hanes angka suruannasida.

30:5 Saluhut do nasida tarurak ala ni bangso na so marguna di nasida, na so marpanumpahion manang marguna, ai gabe haurahon do i dohot haeleson.

30:6 Uhum madabu tu angka pinahan ni tano pardangsina: Di tano hagogotan dohot hasosahan, haroroan ni singa boruboru dohot jantan, haroroan ni libe dohot naga na habang ditaruhon nasida di atas tanggurung ni halode artanasida, jala di atas tanggurung na bungkuk ni unto sinamotnasida tu sada bangso na so marguna.

30:7 Ai alogo sambing do panumpahion ni Misir, dibahen i hugoar do i: * Rahab, hape sai so do nasida.

30:8 Antong ro ma ho, uhirhon ma i tu sada batu di jolonasida jala surathon ma i tu bagasan sada buku, asa tongtong dipeop tu ari sogot ro di salelenglelengna.

30:9 Ai bangso na tangkang do nasida, angka anak pargabus, angka anak na so olo manangihon patik ni Jahowa.

30:10 Angka na mandok tu halak paralatan: Unang hamu maralatan! Dohot tu angka panurirang: Unang surirangkon hamu tu hami hasintongan! Lomo ni rohanami ma tagonan paboa hamu, jala angka sipaotooto surirangkon hamu.

30:11 Manginsurut ma hamu sian dalan i, manimbil ma hamu sian dalan na bolon, padao hamu ma sian jolonami ibana na badia ni Israel.

30:12 Dibahen i songon on do hata ni na badia ni Israel: Ala dibolongkon hata on, jala marhaposan hamu tu pangarupaon dohot tu panimbilon jala marpangunsandean tusi.

30:13 Dibahen i hajahaton on gabe doshon rigatrigat na gistang di hamu, nunga pola duruk di dorpi na timbo, ganup tongkin do ibana panagamnagamon di hatotompasna.

30:14 Jala taporanna nasida, songon hatatapor ni hudon tano, na tinaporan so maralangalang, ndang adong jumpang sian taportaporna i tau ngarngar pangalapan gara ni api sian tataring, manang manahui aek sian sumur.

30:15 Ai songon on do hata ni Tuhan Jahowa, na badia ni Israel! Marhitehite hamulakon dohot * hahohomon jumpangan hatuaon hamu; marhitehite hasabamon dohot marhitehite nalom ni roha maruli hagogoon hamu. Alai ndang olo hamu.

30:16 Lam didok hamu do: Ndangana, tagonan hami mangkunduli hoda laho maporus, dibahen i ingkon maporus hamu tutu; tagonan hami marsihundul tu na doras mardalan, dibahen i lam marenjak ma halak na mangalele hamu.

30:17 * Saribu halak sian hamu maporus maradophon ogaoga ni sada halak, maradophon ogaoga ni na lima halak maporus do hamu sude paima pasipasimuna, songon hau na rimpur di punsu ni dolok, jala songon tonggol di robean.

30:18 Dibahen i sai maimaima Jahowa, naeng marpangulahi rohana tu hamu; laos alani borhat ibana asa asianna hamu, ai Jahowa do Debata ni uhum. * Martua ma sude na mangkaposi ibana.

30:19 Ho ale bangso na maringan di Sion, di Jerusalem, na so tupa be tama tangis hamu! Asi ma rohana di ho, disi * begeonna soara ni angguhanggukmu, alusanna ma ho.

30:20 Jala nang dilehon Tuhan i tu hamu roti hagogotan dohot aek pangarupaon, alai ndang be martabuni anggo angka gurum, idaon ni matam ma tongtong angka gurami.

30:21 Jala apala pinggolmu umbege hata ni na mandok sian pudim: On do dalan i, i ma dalan i! * Unang manimbil hamu tu siamun manang tu hambirang!

30:22 Jadi * ramunanmuna ma disi ganaganaanmu angka na nilampis dohot perak, ro di ulos angka na marhadohoan, gombaranmu na tinompa sian sere pe, sirsirhononmu ma angka i songon napu, misir ma ho, i ma dohononmu tu ibana.

30:23 Jadi ibana ma mangalehon udan tu bonim naung sinaburhonmu tu haumam, dohot roti gogo ni hauma i, togong ma i huhut marmiak bahenonna, manjampal ma ia pinahanmu di ari na sasada i di panjampalan na bidang.

30:24 Tole angka jonggi dohot halode, angka na maninggalai tano i, panganonna ma gagaton na togong saor sira, naung sinege marhitehite durungdurung dohot anduri.

30:25 Jadi adong ma di atas ni saluhut dolok angka na timbo dohot rahisrahis na hinsat, angka sunge angka halian aek di ari tongtangan godang, molo marumpak angka palaspalas.

30:26 Jadi * tiur ni bulan ma disi songon tiur ni mata ni ari, jala silompit pitu hali ganda tiur ni mata ni ari i, doshon hatiuron ni pitu ari tahe, di ari uju liliton ni Jahowa bugang ni bangsona, jala * pamalumonna holiholi na magas binahen ni paminsangna?

30:27 Ida ma, ro ma goar ni Jahowa sian na dao, marsigorgor ia rimasna, martimpul ma timus i, ia bibir ni pamanganna gok rimas na marpiarpiar, jala dilanai doshon api na mandilatdilati do.

30:28 Jala hosana doshon aek magodang * tolhas ro di rungkung, mamiari angka bangso parbegu marhitehite anduri hasiapon, jala * kokang haliluon ampe tu osangosang ni angka bangso.

30:29 Alai anggo di hamu masa ende pujipujian songon uju di borngin parhontasan tu pesta dohot halalas ni roha songon halak na martulila laho manopot dolok ni Jahowa, tu dolok batu ni Israel.

30:30 Alai patubegehonon ni Jahowa ma soarana na marmulia i jala pataridahononna tanganna na mangondam marhitehite parpiar ni muruk dohot * jilam ni api na maniaphon marhitehite aek na sumar, udan tipotipo dohot batu ambolas.

30:31 Ai tarsonggot ma Assur maradophon soara ni Jahowa, na mangalipat ibana marhitehite tungkot.

30:32 Jala nasa pamolusan ni tungkot paminsangon i sipasonggopon ni Jahowa tu ibana, masa do i marhitehite pamaluon hasarhasar dohot hasapi dohot marhitehite angka hamusuon na sobu aloonna ibana.

30:33 Ai nunga tibu hian * diparade pamurunan i di nasida dohot di rajai dipadiri, bagas jala lambas do i dibahen; godang situtu do api dohot hau di pamurunanna i, na pinagalak ni hosa ni Jahowa, doshon sunge barerang do godangna.

Jesaya 31

31:1 Marjea ma angka * na tuat tu Misir mangido pangurupion jala * mangasahon angka hoda, jala marpos ni roha di angka hureta, ala toropna dohot tu angka jolma parsihundul, ala marhuaso situtu nasida; alai ndang manaili nasida anggo tu na badia ni Israel, jala ndang dilului nasida Jahowa.

31:2 Alai ibana pe na pistar do jala * diparo hinamago, jala ndang * diuba hatana, sai hehe do ibana mangalo pinompar ni halak parjahat dohot mangalo panumpahion ni halak sibahen hajahaton.

31:3 Ai jolma do nang halak Misir ndada Debata, hodanasida i pe * sibuk do, ndada tondi; jadi patoltolon ni Jahowa ma tanganna, siap ma nasida sude.

31:4 Ai songon on do hata ni Jahowa tu ahu: Songon sada singa manang anak ni singa na patungoromon mida soroanna nang pe pinaimpi dompak ibana sasude angka parmahan ndang olo tarsonggot maradophon soaranasida i, jala ndang olo tunduk maradophon hagunturonnasida i, suang songon i do hatutuat ni Jahowa Zebaot laho marmusu humongkop dohot Sion dohot robeanna i.

31:5 Songon pidong na mangkurmuk anakna, suang songon i do pangondingi ni Jahowa Zebaot di Jerusalem, ondinganna jala paluaonna, olananna jala pangoluonna.

31:6 Mulak ma hamu, ale anak ni Israel, tu ibana na tinundalanmuna situtu na sai laon.

31:7 Ai di ari na sasada i ambolongkonon ni * ganup jolma ma ajiajianna angka na sian perak dohot sere, angka na binahen ni tanganmuna di hamu mambahen mardosa.

31:8 Jadi marragean ma Assur marhitehite podang, ndada * podang ni baoa manang podang ni jolma manganhon ibana; gabe maporus ibana maradophon podang jala gabe hatoban angka dolidolina i.

31:9 Jadi salpuanna ma * partanobatoanna i sian biar ni rohana, jala raion angka ulubalangna so mardongan tonggol, ninna Jahowa nampuna api di Sion jala nampuna pamurunan di Jerusalem.

Jesaya 32

32:1 Ida ma, hombar tu hatigoran do Rajai mangarajai sogot, jala hombar tu uhum angka induk manggomgomi.

32:2 Jadi marhaporusan tu ibana ganup jolma maradophon alogo, jala marpanisioan maradophon ari, tudoshon sunge di halongonan, tudoshon parlinggoman ni dolok batu bolon di tano na marsilopak.

32:3 Jala ndang mamereng dompak pudi mata ni jolma na marnida, jala pinggol ni jolma na marbinege manangihon disi.

32:4 Jala roha ni jolma na bodo marpanimbangon jala tiar marpangkuling * dila ni jolma angka na hapot hian.

32:5 Ndang be targoar raja halak na oto i, manang targoar namoranami halak parjahat i.

32:6 Ai mangkatahon haotoon do halak na oto i, jala marsangkap hajahaton do rohana laho mangulahon haramunon, jala mandok poda haliluon dompak Jahowa asa mangarapari roha ni jolma na male, jala mangarampas siinumon ni na mauas.

32:7 Jala marparulaonna jahat do halak parjahat i sai angkal ditahi roha laho mangago halak na tarjepol marhitehite hata gabus, nang pe hata uhum didok na pogos.

32:8 Alai anggo halak parlidang i, angka halidangon do ditahi rohana, jala marsihohot ibana mangulahon angka halidangon.

32:9 Hamu inaina angka na marpangatauan, hehe ma hamu tumangihon soarangki! Hamu boruboru angka na nalom roha, tangihon hamu ma hatangkon!

32:10 Di laonlaon ni ari angka dotdot ma hamu angka na nalom roha i, ai nunga sun pamutihon di parbue ni hau anggur, ndang ro be gotilon ni parbue ni hau.

32:11 Angka hitir ma hamu inaina angka na marpangatauan, angka dotdot ma hamu angka na nalom roha! Ai nunga tanggal pangkeanmu, marsaemara hamu jala marabit tangki gontingmuna.

32:12 Masitompuk andorana be nasida, ala ni hauma hasoloan, ala ni porlak anggur na marparbue.

32:13 Tubu do di hauma ni bangsongku angka sihupi, tongon tahe nang di atas ni sude bagas hariburon ni huta na ribur i.

32:14 Ala naung tarulang bagas bolon, jala naung mansohot hariburon ni huta i, batarbatar jala parhalan gabe liang salelenglelengna, lomolomo ni angka binatang, panjampalan ni angka dorbia.

32:15 Paima * diusehon tu hita Tondi sian ginjang, jala manjadi tano bosar * halongonan hian, alai anggo tano bosar hian gabe tombak dirajum.

32:16 Jadi disi ma nian uhum di halongonan, jala marhabangsa hatigoran di tano bosar.

32:17 Jadi hadameon ma upa ni hatigoran, jala pangkorhon ni hatigoran hademakon dohot hasonangan salelenglelengna.

32:18 Jadi mian ma bangsongku di bagasan undungundung hadameon dohot di bagasan angka bagas nalom ni roha dohot di pangulonan hasonangan.

32:19 Alai ro ma ambolas di halelengse ni tombak, jala marhajimputan situtu huta i laho pesan.

32:20 Martua ma anggo hamu angka na manabur di lambung ni saluhut batang aek, angka na patula pat ni jonggi dohot halode.

Jesaya 33

33:1 Marjea ma ho partaban, ho na so hona taban dope! Ho pangarupa na so dung nirupa! Ia dung sun ho martaban, tabanon ma ho; ia dung sun ho mangarupa, rupaon ma ho.

33:2 Ale Jahowa asi roham di hami! Marhaposan tu ho do hami. Sai ho ma tangan mangurupi nasida ganup sogot! Pangurupinami tongon di tingki hagogotan.

33:3 Sai maporus ma angka * bangso maradophon parngongos ni suara, marserak ma angka parbegu maradophon hatimbulonmu.

33:4 Jadi gomahan ni halak ma tabantabanmuna, songon panggagat ni tamponok, songon panahopi ni sihapor panahopi ni halak di nasida.

33:5 Nunga timbul Jahowa, ai marhabangsa di ginjang do ibana, nunga gok uhum dohot hatigoran Sion i dibahen.

33:6 Jadi masa ma di tingkim haporseaon, hinagok ni angka hatuaon, hapistaran dohot parbinotoan, biar mida Jahowa pangalapan arta di ibana.

33:7 Ida ma joujou do * halak na begu sian nasida di balian, sai tumatangis do angka suruan hadameon.

33:8 Nunga tarulang angka dalan balobung, sohot do pardalan; nunga diose padani marhu ni roha ibana di angka huta, ndang disarihon ia jolma.

33:9 Majal jala malos tano i, rae do Libanon gabe tardas, doshon halongonan ia Saron jala doshon Karmel do Basan marulam.

33:10 On pe hehe ma ahu ninna Jahowa, timbul jala timbo ahu bahenonku nuaeng.

33:11 Marhangoluan panabian hamu, gabe durame tubumuna, habeguonmuna sandiri gabe api na manganhon hamu.

33:12 Jadi dusdusonna ma angka bangso songon batu hapur, songon * suga naung tinallik surbuonmu nasida marhitehite api.

33:13 Tangihon hamu ale angka na dao naung hubahen i jala tandai hagogoonku, hamu ale angka na jonok.

33:14 Angka dotdot do Sion halak pardosa, tarsonggot situtu halak na marsipalensem angka na mandok: Tung ise ma hita maisolat di lambung * api na manganhon? Tung ise ma sian hita maisolat di lambung pamurunan salelenglelengna?

33:15 Halak na marpangalahohon hatigoran jala dihatahon hasintongan; na mangkabiashon laba sian pangarupaon, na patait tanganna manjalo sisip, na sumongsong pinggolna asa unang dibege durusdurus di mudar, na papitpit matana, asa unang diida hajahaton.

33:16 I ma na maringan di ginjang, angka partanobatoan di dolok batu gabe haporusanna, sai na maruli sagusagu ibana dohot aek siinumon angka na tangkas.

33:17 Idaon ni matam ma * rajai di bagasan hinaulina, tatapon nasida ma sada tano na lambas.

33:18 Marhusari ma roham mida hasonggotan i dohononmu ma: Didia do juaratulis i? Didia do pandasing? Didia do sisurati angka palaspalas?

33:19 Ndang be idaonmu bangso na jungkat i, bangsona * haloat marpangkuling, marbibir na so dapot antusan.

33:20 Sai berengi ma Sion, huta parpestaanta! Idaon ni matam ma Jerusalem, inganan haposan, undungundung na so tupa munsatunsat, na so tupa umpaton tiangna salelenglelengna, jala na so tupa rapu nasa pangarahutina.

33:21 Ai marhamuliaon Jahowa disi, rap dohot hita haroroan ni angka batang aek, angka sunge na bidang pahebaheba; tung na so tupa boluson ni solu sidayungon manang kopal na balga.

33:22 Ai Jahowa do siuhum hita, Jahowa do silehon patik tu hita, Jahowa do Rajanta, ibana silehon tua di hita.

33:23 Hondur do angka pangarahutim, ndang tagamon rogangonna tiang layarna, manang tarpahiresa mandera. Dung i bagion ma tabantaban mansai godang gari halak na pangpang maruli tabantaban.

33:24 Jala na so tupa be dohonon ni pangisina: * Na gale do ahu, ai bangso na maringan disi nunga maruli hasesaan ni dosa.

Jesaya 34

34:1 Jumonok ma hamu angka parbegu mananginangi dohot hamu angka bangso patinggil hamu pinggolmuna! Mananginangi ma ho ale tano on ro di isina, ho ale portibi on ro di nasa na tubu disi.

34:2 Ai marsigorgor do rimas ni Jahowa mangonai tu sude angka parbegu, jala marpiarpiar murukna dompak sude parangannasida. Nunga tung ditorui ibana nasida, nunga dipasahat nasida tu pamotongan.

34:3 Jadi marragean ma angka na mate tongtang sian nasida jala manongap tu ginjang bau ni bangkenasida i, pola malala angka dolok dibahen mudarnasida.

34:4 Malala ma dohot saluhut parangan ni langit, jala * balunonna ma angka langit i songon pustaha, jala saluhut parangannasida malos, marurus songon bulung ni hau anggur jala songon harururus ni parbue ni antajau.

34:5 Ala naung mabuk podangku di banuaginjang, ida ma, tuat ma i tu * Edom dohot tu bangso naung hupadiri tu uhum:

34:6 Gok mudar do podang ni Jahowa, marlinolino sian tabotabo, sian mudar ni angka anak ni birubiru dohot hambing tunggal, sian sigumangi piapia ni angka birubiru tunggal; ai masa do pelean sipotongon di Jahowa di Bosra, jala pamotongan godang di tano Edom.

34:7 Jadi marunggal ma angka horbo rap dohot nasida ro di lombu dohot jonggi gabe mabuk ma luatnasida i sian mudar jala marmiak orbuknasida i sian tabotabo.

34:8 Ai masa ma * ari partubolan di Jahowa, taon pamalosan laho martubolhon Sion.

34:9 Jadi muba ma angka sungenasida gabe puli, jala orbuknasida gabe barerang, gari tanona i gabe damar na marsigorgor.

34:10 Borngin dohot arian ndang mintop, ro di salelenglelengna do martimpul timusna i; sian * sundut tu sundut tarulang, ndang adong be jolma pamolus disi salelenglelengna.

34:11 Jadi soluhon ni siboru tasik dohot sulandak ma i, maringan ma disi sipauk dohot sigak jala sintahan ni Debata ma tusi pamalok hasiapon dohot batu hatarulangon.

34:12 Ndang adong be disi angka jolma na sangap i, angka na tau mamegang harajaon, jala saluhut pangarajaina pesan do.

34:13 Jadi tubuan tadatada ma angka bagasna na bolon, latong dohot siarum horsik di bagasan hutana angka na gonting, gabe * inganan ni angka naga, jala panjampalan ni angka pidong unto naposo.

34:14 Jadi pajumpang ma disi angka binatang adaran dohot biang jalang, jala marsijouan angka begu nurnur naeng mangulon disi nang begu borngin, hape ndang jumpangsa pangulonanna.

34:15 Marasar do disi ulok dari, jala ia dung marpira diporpori do, jala dipapungu angka anakna tu parlinggomanna, marpungu do huhut disi lali sombop mardapotdapot.

34:16 Diori hamu ma buku ni Jahowa jala jaha hamu! Nanggo sada sian angka i ndang tartading, ndang adong hurang sada manang dua. Ai apala pamanganku do mandokkon jala apala Tondina papungupunguhon.

34:17 Jala apala ibana sandiri mandabu partalian tu nasida, jala tanganna marbagi di nasida marhitehite hotang pamalok; ro di salelenglelengna nasida tumeansa, sian sundut tu sundut nasida maringan disi.

Jesaya 35

35:1 Marlas ni roha ma halongonan dohot tano bangkalbangkal jala marolopolop ma adaran jala marbunga songon bunga pansur.

35:2 Marbunga situtu ma i jala marolopolop, masa ma tutu parolopolopon dohot pariaiaon. Hamuliaon ni Libanon dibasabasahon tusi rap dohot hinauli ni Karmel dohot Saron. Idaonnasida ma hamuliaon ni Jahowa, hatongamon ni Debatanta.

35:3 Pargogoi hamu ma tangan angka na dauk jala pahot hamu angka pat na telluktelluk.

35:4 Dok hamu ma tu angka parroha na tahuton: Pir ma tondimuna, unang hamu mabiar! Ida ma Debatamuna i ro martubolhon dohot mamaloshon! Ho do ibana tongon paluahon hamu.

ᯑᯂᯬ᯲ ᯂᯔᯮ ᯔ ᯖᯮ ᯀᯰᯂ ᯇᯒ᯲ᯒᯬᯂ ᯉ ᯖᯂᯮᯖᯉᯬ᯲: ᯇᯒᯪ᯲ ᯔ ᯖᯉᯬ᯲ᯑᯪᯔᯮᯉ, ᯥᯉᯰ ᯂᯔᯮ ᯔᯅᯪᯀᯒ᯲ ᯤᯑ ᯔ ᯑᯩᯅᯖᯔᯮᯉ ᯤ ᯒᯬ ᯔᯒ᯲ᯖᯮᯅᯞᯬ᯲ᯂᯉᯬ᯲ ᯑᯬᯂᯖᯬ᯲ ᯔᯔᯞᯘᯬ᯲ᯂᯉᯬ᯲ ᯂᯬ ᯑᯬ ᯤᯅᯉ ᯖᯬᯝᯉᯬ᯲ ᯇᯞᯮᯀᯂᯉᯬ᯲ ᯂᯔᯮ.

35:5 Buhaanna ma disi mata ni halak na mapitung jala marbinege bahenonna pinggol ni angka na nengel.

35:6 Marhajingjang ma disi halak na pangpang songon ursa, jala mariaia dila ni halak na ngungu, ai marbuhalbuhal ma angka aek di halongonan jala sunge di adaran.

35:7 Jala tano hasang situtu gabe tao, jala tano bangkalbangkal gabe parmualan aek. Di inganan pangulonan ni naga na sai laon tubu arung dohot tolong.

35:8 Adong huhut disi * dalan balobung dohot dalan na bolon, na targoar: Dalan na badia. Ndang jadi mamolus sian i halak na ramun, jala nasida nampunasa; manang ise * na mandalani dalan i, gari angka na oto ndang tagamon lilu.

35:9 Ndang adong disi singa jala na so tupa boluson ni binatang panoro, manang jumpang disi; jolma angka na pinalua mardalan disi.

35:10 Jadi mulak ma sogot halak angka na pinalua ni Jahowa, jala mariaia ro tu Sion; jala halalas ni roha salelenglelengna di atas ulunasida, dapotan hilas dohot las ni roha nasida, alai maporus ma anggo arsak dohot hoihoi.

Jesaya 36

36:1 Pasampulu opat taonhon dung raja si Hiskia, nangkok ma si Sanherib raja sian Assur dompak saluhut huta ni Juda angka na gonting jala dipapatu.

36:2 Jadi disuru raja sian Assur ma si Rabsake sian Lakis tu Jerusalem manopot raja Hiskia mardongan torop parangan. Jadi jongjong ma ibana di * pamalian aek ni ambar parjulu, di lambung dalan ni hauma ni panubari.

36:3 Dung i ruar ma manopot ibana * si Eliakim, anak ni si Hilkia, panahatan ni bagas i dohot si Sebna juaratulis i dohot si Joa anak ni si Asap, sisurat jamita ni harajaon.

36:4 Dung i ninna si Rabsake ma mandok nasida: Ua paboa hamu ma tu si Hiskia: Songon on do hata ni * raja na bolon, raja sian Assur: Tung aha ma pangatauanon na pinangasahonmu?

36:5 Ianggo di rohangku: Hatahata ni bibir sambing do on: Tahi dohot hahuasoon tu hamusuon. On pe tung ise ma hinaposanmu, umbahen tung hum do naeng mangalo?

36:6 Ida ma, dihaposi ho do * tolong na marosak on, i ma Misir, manang ise jolma na martungkothon ibana, tombusonna do tanganna. Songon i do Firaun, raja sian Misir tu sude angka na marhaposan tu ibana.

36:7 Jala tung sura didok ho tu ahu: Marhaposan tu Jahowa Debatanami do hami, nda ibana do nampuna sombaon dohot langgatan, angka na niloha ni si Hiskia, jala didok tu Juda dohot tu Jerusalem: Di jolo ni langgatanon do hamu marsomba?

36:8 On pe, na martaru ma ho dohot tuangku, raja sian Assur, asa hulehon di ho duaribu hoda manang tuk ma lehononmu jolma na manghunduli i.

36:9 Tung beha ma panahanmu di bohi ni sada partogi sian angka naposo apala na ummetmet ni tuangku? Hape tung marhaposan do ho tu Misir ala hureta dohot angka parsihundul.

36:10 On pe dirimpu ho na so mangasahon Jahowa ahu laho nangkok tu tano on asa husiaphon? Jahowa do mandok tu ahu; nangkok ma ho tu tano on jala siaphon!

36:11 Jadi ninna si Eliakim dohot si Sebna dohot si Joa tu si Rabsake, ua hata Ram ma dok tu hami naposom, ai huantusi hami do, jala unang dok hata Jahudi tu hami di adopan ni situan natorop, na di atas parik.

36:12 Dung i didok si Rabsake ma: Tung tu tuanmu huroha dohot tu ho disuru tuangku ahu mandok angka hata on? Nda tu baoa angka na hundul di atas parik, angka na manganhon ginagatnasida dohot manginum teposnasida rap dohot hamu.

36:13 Jadi hehe ma si Rabsake, dipangiar ma soarana mandok di hata Jahudi: Tangihon hamu ma angka hata ni * raja bolon, raja sian Assur!

36:14 Songon on do hata ni rajai: Unang olo hamu paotootoon ni si Hiskia, ai ndang tarpalua ibana hamu.

36:15 Jala unang olo hamu paposon ni si Hiskia tu Jahowa mandok: Sai paluaon ni Jahowa do hita, ndang tagamon lehononna huta on tu bagasan tangan ni rajai sian Assur.

36:16 Unang tangihon hamu si Hiskia, ai songon on ninna raja sian Assur: Lehon hamu ma jomba bahal tu ahu, jala dapothon hamu ahu, asa mangan be sian * hau anggurna dohot sian hau antajauna, jala manginum tapian sian sumurna be.

36:17 Paima ro ahu jala hualap hamu tu tano na songon tanomuna, tu tano hatubuan ni eme dohot anggur, tu tano na lobian di roti dohot di porlak anggur.

36:18 So tung olo hamu gitihan ni si Hiskia ia didok: Sai paluaon ni Jahowa do hita! Nunga tung dipalua * debata ni angka parbegu ma luatnasida be sian tangan ni raja sian Assur huroha?

36:19 Didia nuaeng angka debata sian Hemat dohot sian Arpad? Didia angka debata sian Separwaim? Tung adong ma na paluahon Samaria sian tanganku?

36:20 Tung ise ma sian sude debata ni angka luat ondeng, na tuk paluahon tano nasida sian tanganku umbahen muba Jerusalem paluaon ni Jahowa sian tanganku huroha?

36:21 Jadi sip ma nasida jala ndang adong na mangalusi ibana nanggo sandok, ai songon i do tona ni rajai: Unang alusi hamu ibana.

36:22 Dung i ro ma si Eliakim anak ni si Hilkia panahatan ni bagas i dohot si Sebna, juaratulis i, dohot si Joa anak ni si Asap, sisurat jamita ni harajaon manopot si Hiskia, marulos na maribak laho pabotohon tu ibana angka hata ni si Rabsake.

Jesaya 37

37:1 Jadi dung dibege raja Hiskia hata i, * diribahi ma ulosna jala marulos hori ibana laho manopot bagas ni Jahowa.

37:2 Jadi disuru ma si Eliakim, panahatan ni bagas i dohot si Sebna, juaratulis i rap dohot angka sintua ni malim, rap marulos hori be manopot panurirang Jesaya, anak ni si Amos.

37:3 Asa didok nasida tu ibana: Songon on do hata ni si Hiskia: Ari hagogotan dohot paminsangon dohot haurahon do ari on; ai nunga jumpang nian hasasanga ni posoposo, hape ndang adong gogo manubuhon.

37:4 Anggiat tung dibege Jahowa Debatamu hata ni si Rabsake, angka na tinonahon ni raja sian Assur tuanna i, manginsahi Debata na mangolu i, jala ditorui ibana ala ni hata angka naung binege ni Jahowa Debatam; asa patolhas ma tangiang i mangondihon pasipasi na jumpang i.

37:5 Dung i ro ma angka naposo ni raja Hiskia manopot si Jesaya.

37:6 Jadi didok si Jesaya tu nasida; songon on ma dohononmuna tu tuanmuna: Songon on do hata ni Jahowa: Unang ho mabiar maradophon hata angka naeng binegem, angka na niinsakkon ni naposo ni raja sian Assur palea ahu.

37:7 Ida ma, lehononku ma tu bagasan rohana sada tondi, asa begeonna barita jala mulak tu tanona, asa huragehon ibana marhitehite podang di bagasan tanona.

37:8 Dung i mulak ma si Rabsake, gabe marmusu dompak Libna raja ni Assur i didapot, ai nunga tarbortik tu pinggolna naung borhat ibana sian Lakis.

37:9 Jala dibege barita taringot tu si Tirhaka raja sian Kus didok halak: Nunga borhat ibana laho marmusu dompak ho. Jadi dung dibege hata i, disuru ma angka suruanna tu si Hiskia mandok:

37:10 Songon on ma dok hamu tu si Hiskia, raja sian Juda: Unang olo ho paotootoon ni Debatam, na pinangasahonmu mandok: Ndang tagamon lehononna huta Jerusalem tu tangan ni raja sian Assur.

37:11 Ida ma, nunga dibege ho, na binahen ni angka raja sian Assur tu sude angka luat laho mangarendephon nasida, ia ho hape tung tagamon malua ma?

37:12 Tung adong ma angka debata ni bangso parbegu na tuk paluahonnasida, angka na siniaphon ni angka daompung? I ma Gozan dohot Haran dohot Resep dohot angka anak ni Eden, angka na maringan di Telasar.

37:13 Didia nuaeng raja sian Hamat dohot raja sian Arpad dohot raja ni huta Separwaim dohot Hena dohot Iwa?

37:14 Jadi dibuat si Hiskia ma angka surat i sian tangan ni angka suruani jala dijaha, dung i nangkok ma ibana tu bagas ni Jahowa, jala dipahembang surat i di adopan ni Jahowa.

37:15 Dung i martangiang ma si Hiskia tu Jahowa songon on:

37:16 Ale Jahowa Zebaot, Debata ni Israel, na marhabangsahon angka kerubim, sasada ho do Debata ni saluhut harajaon di tano on! Ho do tumompa langit dohot tano on!

37:17 Sai paeleng ma pinggolmu ale Jahowa, jala tangihon, sai patonggor ma matam ale Jahowa jala ida, jala tangihon sude hata ni si Sanherib, angka na tinonahonna mangarehei Debata na mangolu i.

37:18 Tongon tahe ale Jahowa, nunga disiaphon angka raja sian Assur saluhut angka bangso dohot luatnasida i.

37:19 Jala nunga ditimpalhon tu api angka debatanasida, ai ndang tongon Debata angka i, jadijadian ni tangan ni jolma do, hau dohot batu, gabe disiaphon angka i.

37:20 Onpe ale Jahowa Debatanami, sai palua ma hami sian tanganna, asa * mananda saluhut harajaon di tano on, paboa sasada ho do Debata, ale Jahowa!

37:21 Dung i marsuru ma si Jesaya, anak ni si Amos, tu si Hiskia mandok: Songon on do hata ni Jahowa, Debata ni Israel: Anggo na pinangidom tu ahu, taringot tu si Sanherib raja sian Assur, nunga hutangihon.

37:22 On do hata na tinonahon ni Jahowa dompak ibana: Mamaus jala mangarehe mida ho do namarbaju, boru Sion i; mangupir do ulu ni boru Jerusalem sian pudim.

37:23 Ise tahe naung nireheanmu jala nielesanmu, jala dompak ise dipangiar ho soaram jala mamaus matam dompak ginjang? Dompak na badia ni Israel do tahe!

37:24 Marhite sian tangan ni angka naposom dielesi ho Tuhan i jala nimmu do: Binahen ni hinadeak ni angka huretangku ahu manaek tu ginjang ni angka dolok, tu partalpahan ni Libanon jala tabaonku ma angka * hau aresna na timbo i dohot angka marantina na dumenggan i, jala tolhas ahu tu punsuna tu tombak hasoloanna.

37:25 Nunga huhali jala huinum angka aek i jala huarsik marhitehite palak ni pathu sude angka batang aek Misir.

37:26 Ndang dung dibege ho, naung hubahen songon i sian na robi, di angka ari na galia hujadihon i? Nuaeng pe huparo; ingkon siap bahenonmu angka huta na gonting bahen timbunan batu.

37:27 Jala angka pangisina i partangan na so marnangan tarsonggot do jala tarurak; manjadi duhutduhut di ladang do nasida dohot ingkau rata, songon ri tu angka tarup jala antinganoon eme tagan so bibi dope.

37:28 Nunga huboto hian hundulanmu, haruruarmu dohot habobongotmu dohot pangogaogaonmu dompak ahu.

37:29 Ala na mangoga ho dompak ahu, jala tolhas tu pinggolhu * hajungkatonmu, jala bahenonku ma harihir tu igungmu dohot kokang tu bibirmu jala toguonku ma ho mulak sian dalan haroroanmi.

37:30 Jala on ma partinandaan di ho: Panganonmu ma sataon on eme sagak, dohot di taon paduahon, alai anggo patolu taonhon manabur ma hamu jala manggotil jala manuan porlak anggur, jala panganonmu parbuena.

37:31 Jala datdatan ni angka na malua sian pinompar ni Juda, angka pasipasina i * marurat tu toru jala marparbuehon parbue tu ginjang.

37:32 Ai ruar do sian Jerusalem pasipasi dohot angka na malua sian dolok Sion. Hamuruhon ni Jahowa Zebaot patupahon songon i.

37:33 Dibahen i songon on do hata ni Jahowa taringot tu raja sian Assur: Na so tupa ibana bongot tu huta on, manang siorhononna tusi nanggo sada sumbia manang dapothononna marlombulombu, manang bahenonna hubu humaliang huta i.

37:34 Ingkon marhite sian dalan haroroanna ibana mulak, alai anggo tu huta on na so tupa ibana bongot, ninna Jahowa.

37:35 Ai ondinganku do huta on laho paluahon, ala ni ahu dohot ala ni naposongku si Daud.

37:36 Dung i ruar ma suruan ni Jahowa, jala dibunu di parsaroan ni Assur saratus ualupulu lima ribu halak. Jadi dung hehe nasida sogot manogotna i, ida ma, saluhut nasida nunga gabe bangke.

37:37 Jadi borhat ma si Sanherib, raja sian Assur laho mulak, laos maringan ibana di Ninive.

37:38 Jadi uju na marsomba ibana di joro ni Nisrok debatana i, ro ma si Adramelek dohot si Sar-Eser, angka anakna i mambunu ibana marhitehite podang, dung i maporus ma nasida tu tano Ararat. Jadi si Esarhaddon anakna i bangkit raja singkatna.

Jesaya 38

38:1 Di angka ari uju i marsahit ma si Hiskia matemate ne. Jadi ro ma manopot ibana panurirang Jesaya, anak ni si Amos, jala didok mandok ibana: Songon on do hata ni Jahowa: Pature ma bogasmu, ai na mate ma ho, ndang tagamon mangolu be.

38:2 Dung i dipahusor si Hiskia ma bohina dompak dorpi jala martangiang tu Jahowa.

38:3 Jala didok ma: O ale Jahowa, sai ingot ma na marpangalaho i ahu di jolom di bagasan hasintongan dohot di * punia ni roha, jala hubahen na denggan di adopan ni bohim, huhut tumatangis situtu si Hiskia.

38:4 Jadi ro ma hata ni Jahowa tu si Jesaya songon on:

38:5 Laho ma ho jala dok tu si Hiskia, songon on do hata ni Jahowa Debata ni si Daud ompumi: Nunga hutangihon tangiangmi, nunga huida partangisonmi. Ida ma, ambaanku ma tu angka ariarim sampululima taonnari.

38:6 Jala paluaonku ma ho dohot huta on sian tangan ni raja ni Assur, jala ondinganku do huta on.

38:7 Jala on ma partinandaan di ho sian Jahowa, paboa pasauton ni Jahowa hata naung nidokna i.

38:8 Ida ma, paulahonku ma halinu ni angka gurat, naung mijur di jom ni si Ahas, binahen ni mata ni ari tu pudi sampulu gurat. Jadi mulak ma halinu ni mata ni ari sampulu gurat di tudutudu naung mijur i.

38:9 On do surat pujipujian ni si Hiskia, raja sian Juda, dung na marsahit ibana gabe malum muse sian sahitna i.

38:10 Ningku do di parsitongaan ni angka ariaringku: Na laho ma ahu tumopot angka bahal ni banuatoru; nunga diorui pasipasi ni taontaonku.

38:11 Ningku do, ndang be idaonku Jahowa di * tano ni halak na mangolu i, ndang be tailihononku jolma rap dohot angka isi ni portibi on.

38:12 Nunga maloha ingananku, jala munsat sian ahu songon undungundung ni parmahan; nunga hutostos ngolungku songon halak partonun, nunga digotap ibana ahu sian tali; sun ma adamhu dibahen ho sadari saborngin.

38:13 Mangkirim ahu sahat ro di manogotna i; hape * songon singa do ibana mamonggolhon nasa holiholingku; sun do adamhu dibahen ho sadari saborngin.

38:14 Songon leangleang ahu marngingikngingik, marlangak songon onggang, * marturtu songon anduhur, sai nolnol do matangku dompak ginjang: Ale Jahowa targogot situtu do ahu sai ondingi ahu.

38:15 Aha dope dohononku? Nunga mangalumba ibana tu ahu, jala nunga dipasaut. Sai padondaonku do rohangku marpangalaho saleleng ahu mangolu, ala ni arsak ni rohangku.

38:16 Ale Tuhan marojahan disi mangolu iba jala sandok mandapot disi do ngolu ni tondingku, jala ho do mangkorasi dohot pangolu ahu.

38:17 Ida ma, manjadi hasonangan di ahu sapot ni parniahapanki, jala nunga dihaol ho tondingku, jala nunga dienet ho sian godung ni hasiapon, ai nunga * ditimpalhon ho nasa dosangku tu pudi ni tanggurungmu.

38:18 Ai ndang dipuji banuatoru i ho, manang dipasangap hamateani ho; jala ndang marhaposan di hasintonganmi angka na tuat tu godung.

38:19 Halak na mangolu i, na mangolu i tongon, i ma mamuji ho songon na hubahen nuaeng. Ama i pabotohon hasintonganmi tu angka anakna.

38:20 Sai paluaon ni Jahowa do ahu, ala ni piltihonta ma hasapinta, nasa ariari ni ngolunta di bagasan joro ni Jahowa.

38:21 Dung i ninna Jesaya ma: Binahen ma hare sian antajau, jala nilanggumhon tu baro i, asa mangolu ibana.

38:22 Jadi ninna si Hiskia ma: Dia do tanda paboa na nangkok ahu masuk tu joro ni Jahowa?

Jesaya 39

39:1 Uju i disuru si Merodak-Baladan, anak ni si Baladan, raja sian Babel suruanna mamboan surat dohot silua tu si Hiskia, ai nunga tarbortik tu pinggolna marsahit rajai gabe hisar muse.

39:2 Jadi las ma roha ni si Hiskia mida nasida, jala dipatuduhon tu nasida bagas parartaanna, perak dohot sere ro di angka pamurpuri dohot miak na hushus ro di nasa bagas parpeopan ni sinjata dohot sude na jumpang di angka parartaanna i. Tung na so adong do nanggo sada na so pinatuduhon ni si Hiskia tu nasida di bagasna dohot di sandok ginomgomanna.

39:3 Dung i ro ma panurirang Jesaya tumopot raja Hiskia jala didok ma tu ibana: Aha do didok angka baoa i, jala sian dia nasida ro manopot ho? Jadi ninna si Hiskia ma: Sian luat na dao, sian Babel nasida ro manopot ahu.

39:4 Alai ninna si Jesaya ma: Aha diida nasida di jabum? Jadi ninna si Hiskia ma: Nasa na di bagashu diida nasida, nda tung adong nanggo sada di angka parartaanki na so hupatuduhon tu nasida.

39:5 Dung i ninna si Jesaya ma mandok si Hiskia: Tangihon ma hata ni Jahowa Zebaot!

39:6 Ida ma, na ro do angka ari sogot, tarboan ma disi nasa na di jabum dohot na sinamotsamot ni angka ompum rasirasa nuaeng tu Babel, ndang adong teba nanggo sada, ninna Jahowa.

39:7 Jala sian angka anakmu, na marama tu ho, angka situbuhononmu buatonnasida ma, asa gabe jolma parhalado di bagas ni raja sian Babel.

39:8 Dung i ninna si Hiskia ma mandok si Jesaya: Denggan do hata ni Jahowa na nidokmi, huhut didok: Asal sonang jala mardemak di angka ariaringku.

Jesaya 40

40:1 Apuli, apuli hamu bangsongki, ninna Debatamuna.

40:2 * Hata apulapul ma dok hamu tu roha ni isi ni Jerusalem, jala jouhon hamu ma tu nasida: Nunga marujung parungkilonna, ai nunga salese dosana i, ai nunga dijalo sian tangan ni Jahowa * silompit dua singkat ni saluhut dosana.

40:3 Soara ni na joujou di halongonan: Pauli hamu dalan di Jahowa; patigor hamu di adaran dalan balobung di Debatanta.

40:4 Ingkon gohan do nasa rura, jala parejeton nasa dolok dohot buntulbuntul, jala gabe na hornop do na marnangkok tuat, jala gabe rura tanggurung ni dolok.

40:5 Jadi patar ma hamuliaon ni Jahowa, jala sange nasa sibuk marnidasa, ai pamangan ni Jahowa do mandok.

40:6 Adong sada soara na mandok: Joujou ma ho! Jadi dohononna ma: Aha do Jouhononku? * Duhutduhut do nasa sibuk, jala doshon bunga pansur hinadengganna i sudena.

40:7 Nunga malos duhutduhut i, nunga marurus bunga i, ai nunga mangombus Tondi ni Jahowa tusi. Tongon tahe duhutduhut do bangso i.

40:8 Nunga malos duhutduhut i, nunga marurus bunga i, alai anggo * hata ni Debatanta sai hot do ro di salelenglelengna.

40:9 Tu dolok na timbo ma ho nangkok, ale Sion parbarita nauli i! Pangiar ma soaram ale Jerusalem parbarita nauli i, sai pangiar ma, unang ho mabiar! Dok ma tu angka huta ni Juda: Ida ma, disi do Debatamuna i.

40:10 Ida ma, marhuaso do ro Tuhan Jahowa, jala tanganna gumomgom ibana; ida ma ihut tu ibana upana jala di jolona pamalosonna.

40:11 * Parmahanonna ma punguanna songon parmahan, papunguonna ma angka anak ni birubiru tu tanganna jala usungonna di ampuanna, lambok do pangaduna di angka panusuan.

40:12 Tung ise naung manuhati angka aek manggim, jala dijongkali angka langit, jala dibalei nasa orbuk ni tano on? Jala didasing angka dolok marhitehite timbangan jala angka buntulbuntul marhitehite hatian?

40:13 Tung ise ma na tuk mandodo Tondi ni Jahowa, manang panuturi na manurgasi Ibana?

40:14 Tung tu ise ma ibana mangalap roha, asa diparrohai ibana jala diajarhon tu ibana lapang ni uhum, jala diajarhon tu ibana parbinotoan, jala dipabotohon tu ibana lapang ni hapistaran?

40:15 Ida ma, doshon santetek aek di panguhatan do angka bangso, jala doshon orbuk na nipis di timbangan do nasida dirajum. Ida ma, doshon orbuk angka pulo i dibonggal.

40:16 Gari hau di Libanon ndang singkop tutungonna, jala angka binatang ndang singkop bahen pelean situtungon.

40:17 Doshon na soada sude angka bangso di jolona, moru tahe sian na soada nasida dietong ibana.

40:18 Tung tu ise ma naeng patudosonmuna Debata? Manang sumansuman dia naeng paradeonmuna di ibana?

40:19 Tungkang i manompa ganaganaan i, na nililitan ni panopa dohot sere jala marduri perak dibahen.

40:20 Manang ise na hurang parbohalon, dipillit ma sada hau na maol busuk, dilului ma sada tungkang na pistar di ibana laho paulihon sada ganaganaan na so tarhutik.

40:21 Tung so mamoto hamu? Tung so dibege hamu ma i? Tung so pinaboaan tu hamu sian mulamula? Tung so ditimbangi hamu ma angka ojahan ni tano on?

40:22 Marhabangsa ibana di atas ni liat portibi on, jala doshon sihapor angka pangisina i. Ibana * pahembang angka langit songon dagangan na halus, dipahire nasida songon abit undungundung bahen inganan.

40:23 Ibana pasahathon angka panggomgom gabe soada, angka panguhum di tano on gabe marlea dibahen.

40:24 Ipe nasida disuan, ipe nasida disaburhon, ipe marurat pangkalnasida di tano i, asal mangombus ibana dompak nasida, nunga malos, gabe dihabangkon habahaba i nasida songon rapanrapan.

40:25 Tung tu ise ma patudosonmu ahu, paboa suman ahu tusi ninna na badia i.

40:26 Manaili ma matamuna dompak ginjang, jala ida hamu, tung ise ma na manompa angka i? Tung ise ma paruar parangannasida marbilangan? Ibana tahe * manjou luhutna i di goarna be, marguru tu hinagodang ni gogona, jala ibana do na sun hinagogo, ndang tagamon lilis nanggo sada.

40:27 Boasa ma dohononmu ale Jakkob, jala didok ho ale Israel: Buni do dalanku maradophon Jahowa, jala ndang maruli uhum ahu sian Debatangku.

40:28 Atehe, ndang diboto ho, manang ndang dung dibege ho? Debata salelenglelengna do Jahowa, * sitompa angka ujung ni tano on, ndang olo loja manang mandate ibana, jala ndang * hadodoan pingkiranna i.

40:29 Ibana balik mangalehon gogo tu na loja, jala dipargogoi situtu angka na so margellok.

40:30 Loja pe angka dolidoli jala mandate, jala tarsulandit angka na mardaging na tambos.

40:31 Alai angka na marhaposan tu Jahowa maruli hagogoon mardapotdapot, gabe marhabong ni * lali laho manaek. Marlojongi nasida ndang olo loja, mardalani nasida ndang olo mandate.

Jesaya 41

41:1 Hohom ma hamu ale angka pulo mandapothon Ahu, jala ingkon maruli gogo mardapotdapot angka bangso! Jumonok ma angka nasida, dung pe i, asa dohononna: Rap ma hita mandapothon paruhuman!

41:2 Ise do sumunggul hatigoran sian habinsaran? Ise manjou ibana asa ihuthononna langkana? Ise pasahathon angka bangso parbegu di jolona, jala marpandapotan tu ibana dibahen angka raja? Doshon orbuk dibahen ia podangna, jala doshon hurangkam na pinurpurhon ia siorna.

41:3 Ibana mangeak nasida, mardamedame ibana umbolus dalan na so dung nidege ni patna.

41:4 Tung ise ma patupahon angka i dohot mambahensa? Ibana manjou angka sundut sian mulamula: Ahu Jahowa * na parjolo, jala laos ahu dope rap dohot angka parpudi.

41:5 Diida angka pulo do i gabe mabiar jala raion angka ujung ni tano on, ro be angka nasida jumonok jala marpungupungu.

41:6 Marsiurupan nasida jala didok mandok donganna: Pir ma tondimu ale dongan.

41:7 Pandakdak margogoihon panopa, pangananggari margogoihon panopa, didok ma taringot tu pamijoron i: Denggan do i, dung i dipantik ma i dohot angka labang, unang ruhotruhot.

41:8 Alai anggo ho ale * Israel, naposongki, ho ale Jakkob naung hupilliti, ale pinompar ni si Abraham * hasudunganku!

41:9 Naung hualapi sian ujung ni tano on jala naung hujou sian angka partalpahanna, jala hudok mandok ho: Naposongku ma ho, nunga hupillit ho, jala ndang be bolongkononku.

41:10 Unang ho mabiar, ai ahu do donganmu! Unang biahaton ho, ai ahu do Debatam: Ahu margogoihon ho huhut mangurupi ho, huhut maniopi ho marhitehite siamun ni hatigoranku.

41:11 Ida ma, ingkon maila jala tarurak sude angka na marsomor ni roha mida ho, gabe doshon na soada nasida, jala siap baoa angka na mambadai ho.

41:12 Usouso ho di nasida, hape ndang jumpang be baoa angka na mangalo ho, gabe doshon na soada, jala doshon hasiapon baoa angka na mamusui ho.

41:13 Ai ahu do Jahowa Debatam, na maniop tanganmu siamun, jala na mandok tu ho: Unang ho mabiar, ahu do mangurupi ho.

41:14 Unang ho mabiar, ale gea Jakkob, hamu jolma siotihotik sian Israel! * Ahu do mangurupi ho, ninna Jahowa dohot siluluhon ho, na badia ni Israel.

41:15 Ida ma, nunga hubahen ho gabe hureta pardege na tajom, naimbaru, sidua baba, asa diluntak ho angka dolok, jala digopui ho, jala doshon rapanrapan angka buntulbuntul bahenonmu.

41:16 Piaranmu ma nasida gabe luahonon ni alogo jala paserahon ni habahaba nasida, alai marolopolop ma anggo ho mida Jahowa jala mamujimuji di bagasan na badia ni Israel.

41:17 Jolma angka na dangol dohot na pogos mangalului aek, hape ndang adong, mahiang ia dilanasida dibahen uasna! Ahu Jahowa mangalusi nasida, ahu Debata ni Israel, ndang tadingkononku nasida.

41:18 Bungkaonku ma angka sunge di atas robean na saesae nang angka mual di parsitongaan ni rura, bahenonku ma halongonan i gabe tao, jala tano bangkalbangkal gabe haroroan ni aek.

41:19 Patubuonku ma di halongonan hau ares, sampinur tusam dohot hau jarak, suanonku ma di adaran hariara jabijabi rap dohot bintatar.

41:20 Asa rap marnida dohot mananda dohot manimbangi dohot marateatehon, mangundukkon tangan ni Jahowa na mambahensa, jala na badia ni Israel tumompasa.

41:21 Boan hamu tu jolongku parbadaanmuna, ninna Jahowa, pajojor hamu ma pollungmuna, ninna raja ni Jakkob.

41:22 Loas ma jumonok nasida, asa dipaboa tu hita na masa sogot; paboa hamu ma tu hami manang aha na masa di mulamulana, asa diparateatehon rohanami, jala hutanda hami ujungna, manang patubegehon hamu tu hami na ro sogot.

41:23 Paboa hamu ma tu angka na ro muse, asa tung hutanda hami angka debata hamu tutu. Tongon tahe bahen hamu ma na denggan manang na jat, asa huhalongangkon hami jala rap marnida.

41:24 Ida ma, moru sian na soada do hamu ro di jadijadianmuna i, sihabiashononhon do manang ise jolma na mamillit hamu.

41:25 Sunggulonku ma sian utara sada halak, gabe ro ibana sian habinsaran, pajoujouonna ma goarhu, jala degedegeonna ma angka pangarajai songon tano liat, jala luntahonna nasida songon pangaluntak ni sitopa hudon di tano hudon.

41:26 Ise do na paboahonsa sian mulamula, asa tung huboto hami manang disurirangi hian? Asa hudok hami: Tongon do tahe! Alai ndang adong nanggo sahalak na paboahon, manang na patubegehonsa, manang na umbege hatamuna nanggo sada.

41:27 Ahu do parjolo na mandok tu Sion: Ida ma, nunga disi nasida! Jala * hulehon tu Jerusalem sada halak parbarita na uli.

41:28 Alai molo huranap humaliang, hape ndang adong manang ise, jala ndang adong sian nasida nanggo sahalak na tau panuturi, husungkun nasida, gabe ndang adong na mangalusi nanggo sandok.

41:29 Ida ma, saluhut do nasida na soada, na soada do nang angka jadijadiannasida i, alogo sambing do tahe jala na so marnosan angka * ganaganaannasida i.

Jesaya 42

42:1 Ida ma * naposongki na hutogu; na hupilliti * hasudungan ni rohangku! Nunga huampehon Tondingku tu ibana: Tariashononna ma uhum tu angka bangso parbegu.

42:2 Ndang joujou ibana manang pangiaronna soarana, jala ndang patubegehononna soarana di alaman.

42:3 Arung naung marosahi, ndang laos ponggolhononna, jala sumbu na marnehetnehet i, ndang laos intopanna, hombar tu hasintongan tariashononna uhum.

42:4 Ndang olo loja ibana manang mandate, paima dipahot uhum di tano on, jala angka pulopulo mangkalungunhon patikna.

42:5 Songon on do hata ni Debata Jahowa, sitompa langit, dohot na paherbangkonsa, na pajarar tano on ro di angka suansuananna, na mangalehon hosa tu bangso na maringan di atasna dohot tondi tu angka na mardalani disi.

42:6 Ahu, Jahowa na manjou ho marhitehite hatigoran, jala ahu manogu tanganku; sai ramotanku do ho jala lehononku do ho bahen bangso parjanjian, bahen panondang di angka parbegu.

42:7 Mambungka angka mata ni halak na mapitung, paruarhon sian hurungan halak na tarhurung, sian bagas hurungan halak na maringan di haholomon.

42:8 * Ahu do Jahowa, i ma goarhu! Jala * ndang lehononku hasangaponku tu na asing manang hamuliaonku tu angka ganaganaan.

42:9 Panurirangon angka sian na robi, ida ma, nunga ro, jala angka nambura ahu do paboahon; tagan so martumbur dope nunga hupatubegehon tu hamu.

42:10 Endehon hamu ma sada ende na imbaru di Jahowa, hamuliaonna sian ujung ni tano on, tole hamu angka na tuat tu laut ro di isina i, tole hamu angka pulo ro di isina i.

42:11 Pangiar ma soaram ho ale halongonan ro di angka hutana, nang angka pagaran na niinganan ni Kedar! Marolopolop ma halak isi ni dolok batu, sian punsu ni angka dolok ma nasida mariaia.

42:12 Ingkon lehononnasida hamuliaon di Jahowa jala baritahononna hatongamonna di angka pulo.

42:13 Borhat ma Jahowa songon ulubalang, sunggulonna ma hamuruhon songon jolma parmusu; pagogoonna ma soarana huhut marsurak dompak musuna angka na pinatundukna i.

42:14 Sai sip do ahu sian na robi, sai hohom ahu manganjuanju; alai anggo nuaeng mangangguhi ma ahu, songon parompuan na mangae posoposona jala marngongosngongos hosangku sian murukku dompak saluhutna.

42:15 Tarulang bahenonku angka dolok dohot robean, jala pahasangonku ma saluhut duhutduhut disi, jala bahenonku ma angka batang aek gabe pulopulo, jala arsihanku ma angka lintong.

42:16 Jala toguonku ma halak na mapitung di dalan na so binotonasida i, padalanonku nasida di angka dalan balobung na so tinandanasida i; bahenonku ma haholomon di jolonasida gabe hatiuron, jala dalan angka na marlegotlegot gabe hahornopon. I ma angka sibahenonku, jala ndang tadingkononku nasida.

42:17 Ingkon sumurut tu pudi, jala tarurak situtu halak na marpos ni roha di ganaganaan na niuhir halak na mandok tu ganaganaan na tinompa: Hamu do debatanami!

42:18 Tangihon ma, hamu ale angka na nengel, jala manaili ma, hamu ale angka na mapitung asa marnida.

42:19 Tung ise ma na mapitung, molo so naposongku? Manang na nengel songon suruanku na husuru i? Tung ise ma mapitung songon hasahatan ni dame i, jala mapitung songon naposo ni Jahowa?

42:20 Godang do nian diida ho alai ndang diradoti roham; dibungka pe pinggolna duansa, alai ndang ditangihon.

42:21 Dihalomohon Jahowa do patimbulon dohot pasangapon patikna ala ni hatigoranna.

42:22 Alai anggo nuaeng bangso na pinupusan dohot na tinaban do nasida, marhoihoi di angka godung do nasida sude, jala martamonding di angka bagas hurungan; gabe tabantaban do nasida, jala ndang adong nanggo sahalak na paluahon, gabe sintahan tahe jala ndang adong na mandok: Paulak ma i!

42:23 Ise ma sian hamu na umpinggol hata i, laos diparateatehon jala ditangihon na masa sogot?

42:24 Tung ise ma naung mangalehon Jakkob gabe sintahan dohot Israel tu halak partaban? Nda Jahowa do i ala dompak ibana hita mardosa? Jala ndang olo nasida mardalan di angka dalanna i manang tumangihon patikna i!

42:25 Dibahen i diusehon ibana ma tu nasida parpiar ni rimasna dohot hamusuon na sobu situtu, jala disurbu nasida humaliang, hape laos so mananda nasida jala disoksohi, hape laos so diparateatehon nasida!

Jesaya 43

43:1 Alai anggo nuaeng, songon on do hata ni Jahowa, sitompa ho ale Jakkob, jala Sijadi ho ale Israel: Unang ho mabiar, ai Ahu do siluluhon ho; nunga pola hujou goarmu, ahu nampuna ho.

43:2 Ai molo dibolus ho aek, donganmu do ahu, manang ditaripari ho angka batang aek, ndang umbanganna ho. Tung sura pe mardalan ho di bagasan api, ndang mosokkononna ho, jala ndang gor ho bahenon ni dila ni api.

43:3 Ai ahu do Jahowa Debatam, na badia ni Israel, sipalua ho. Nunga pola * hulehon Misir bahen pardenggananmu, Kus dohot Seba * singkatmu.

43:4 Dibahen na arga do ho huida, marmulia jala ahu mangkaholongi ho, jadi hulehon jolma singkatmu, jala angka bangso singkat ni tondim.

43:5 * Unang ho mabiar ai donganmu do ahu! Paroonku ma pinomparmu sian habinsaran, jala papunguonku ho sian hasundutan.

43:6 Dohononku ma tu utara: Paulak! Dohot tu dangsina: Unang tiopi! Togihonma angka anakku sian na dao dohot angka borungku sian ujung ni tano on.

43:7 Ganup jolma naung * marpanggoarhon goarhu, jala naung hutompa bahen hasangaponku naung hujadihon ro di naung hubahen.

43:8 Togihon tu on bangso na mapitung, atik pe marmata, dohot angka na nengel, atik pe marpinggol nasida.

43:9 Marluhut ma saluhut angka bangso parbegu jala marpungu angka bangso! * Tung ise ma sian nasida mamaritahon sisongon i, jala di patubegehon tu hita angka na masa na jolo? Dipatindang nasida ma angka sitindanginasida i, asa dipintori dirina, jala dibege halak huhut didok: Hasintongan do i!

43:10 Hamu do angka sitindangingku, ninna Jahowa, dohot do * naposongku naung hupilliti, asa ditanda jala dihaporseai hamu ahu, jala mangantusi rohamuna, paboa ahu ibana! Jumolo * sian ahu ndang adong tarjadi Debata, dipudingku pe ndang tagamon adong!

43:11 Ahu tutu, ahu do Jahowa, jala ndang adong silehon tua dungkon ni ahu.

43:12 Nunga ahu paboahon, jala ahu paluahon, jala ahu patubegehonsa, jala ndang adong debata sileban di tongatongamuna. Alai * hamu do angka sitindangingku, ninna Jahowa, jala ahu do Debata.

43:13 Nang tu joloan on sai laos ahu do ibana, jala ndang adong sipalua sian tanganku. Ahu do mambahen, tung ise na manundatisa?

43:14 Songon on do hata ni Jahowa, sipalua hamu, na badia ni Israel: Ala hamu do marsuru ahu tu Babel, jala hupatuat angka na maporus sudena, dohot halak Kasdim tu angka parau parolopoloponnasida i.

43:15 Ahu do Jahowa, na badiamuna i, sitompa Israel rajamuna i.

43:16 Songon on do hata ni Jahowa, naung * mangalehon dalan di laut, jala dalan balobung di bagasan angka aek na doras.

43:17 Naung paruarhon hureta dohot hoda, parangan dohot parhohas: Rap marpeahan nasida, ndang tarbahensa be hehe, pidom do nasida, songon sumbu naung mintop.

43:18 Unang be paingotingot hamu angka na masa najolo, jala unang be pingkiri hamu angka na robi:

43:19 Ida ma: Bahenonku ma na imbaru, nunga pola martumbur nuaeng; tung so tandaonmuna ma i? Songon do tahe, bahenonku ma dalan di halongonan, angka * batang aek di tano bangkalbangkal.

43:20 Pasangapon ni angka binatang di ladang ma ahu, angka gompul dohot angka pidong unto, ai lehononku ma aek di halongonan, angka batang aek di tano bakkalbakkal, mangalehon minum bangsongku na hupilliti.

43:21 I ma bangso na hujadihon i di ahu, mamaritahon hamuliaonku sogot.

43:22 Alai ndang dipajoujou ho ahu, ale Jakkob, ai nunga mahap roham mida ahu, ale Israel!

43:23 Ndang diboan ho di ahu birubiru bahen peleanmu situtungon, jala ndang dipasangap ho ahu marhite sian angka peleanmu sipotongon; ndang na huparhatoban ho marhitehite pelean sipanganon, jala ndang hupalojaloja ho marhitehite daupa.

43:24 Ndang dituhor ho di ahu marhitehite perak tobu na hushus jala ndang dipangusehon ho tu ahu miak ni peleanmi situtungon. Alai anggo ho nunga diparhatoban ho ahu, marhite sian angka dosam, jala nunga dilojai ho ahu marhite sian angka hajahatonmu.

43:25 Ahu tutu; ahu sandiri manalesei angka pangalaosim, ala ni ahu, jala ndang be hupaingotingot angka dosam.

43:26 Paingot ahu, asa mardabudabu hita! Ho ma pajojorhon, mamintori dirim.

43:27 Ia amam parjolo i nunga mardosa, jala angka pangondianmi, nunga manjahati dompak ahu.

43:28 Dibahen i nunga huparamun angka induk ni habadiaon i, jala hupasahat si Jakkob bahen sipulasan, jala Israel bahen panginsahion.

Jesaya 44

44:1 Alai anggo nuaeng, tangihon ma ale Jakkob, naposongki dohot ho ale Israel naung hupilliti?

44:2 Songon on do hata ni Jahowa na tumompa jala na jumadihon ho, na mangurupi ho sian hatutubum: Unang ho mabiar ale Jakkob, naposongki dohot ho ale bangso na tigor naung hupilliti.

44:3 Ai usehononku ma aek tu jolma na mauas dohot angka sunge tu na mahiang. Usehononku ma tutu Tondingku tu pinomparmu nuaeng, jala pasupasungku tu pinomparmu sogot.

44:4 Asa martumbur nasida di holangholang ni duhutduhut, songon arung di topi ni angka sunge.

44:5 Sadaon mandok: Jahowa nampuna ahu! Jala sadaan marpanggoarhon goar ni si Jakkob, jala na asing muse manurathon dohot tanganna: Jahowa do nampuna ahu, huhut mangasahon goar ni Israel.

44:6 Songon on do hata ni Jahowa, raja ni Israel dohot sipalua ibana, Jahowa Zebaot: * Ahu do parjolo jala ahu do parpudi, jala ndang adong Debata * dungkon ni ahu.

44:7 Jala tung ise ma tudoshon ahu manjou, dipaboa ma i, jala dipajojor di ahu, olat ni na hupatindang bangso salelenglelengnai? Dohot angka na masa sogot dipaboa hian ma.

44:8 Unang hamu tahuton, jala unang manonditnondit! Nda nunga sian nahinan ahu patubegehon tu ho jala hupaboa? Alai hamu do angka sitindangingku: * Ndang adong Debata dungkon ni ahu, jala ndang haporusan na asing, ndang adong anggo na huboto.

44:9 Angka halak na manggana ajiajian ndang hasea sudena jala ndang marguna angka hapandean hasudungan ni rohanasida i, laos angka i gabe sitindangi dompak nasida, ala so adong diida jala ndang adong diboto, umbahen tarurak nasida.

44:10 Tung ise ma na tuk jumadihon Debata, manang manumpa ajiajian na so marguna i.

44:11 Ida ma, sude angka donganna tarurak do, ai parhapandean sian jolma hian nasida, marluhut pe nasida sude jongjong be do tarhatotong jala tarurak.

44:12 Tungkang bosi mambahen sada tangke, jala dipauli jumpa gara, jala dibahen rupana marhitehite nanggar, jala dipauli marhitehite tanganna na gogo, huhut male maradu so margogo be, ndang minum aek ibana, gabe mandate.

44:13 Ia pande hau manintak rambu, jala dibahen tandana marhitehite agong, diuhir jala diampolas gabe songon suman ni baoa, songon hinauli ni jolma laho mangingani bagas i.

44:14 Ditaba muse di ibana angka hau ares, jala dibuat hau maranti dohot hoting balanga pola marpili di angka hau ni tombak; disuan sada hau ares, gabe udan pabalgahon.

44:15 Jadi hasea ma i di jolma bahen soban, gabe dibuat ma sian i bahen pansusuduan, huhut bahen gara laho mangalompa roti, huhut dibahen sian i sada debata hidup jala disomba; dibahen do i gabe ganaganaan jala marsinggang di jolona.

44:16 Satongana ditutung di bagasan api, di lambung ni na satonganari mangan juhut ibana, digoreng na deba sanga bosuran ibana huhut mansisudu gabe didok: Ha, nunga las ahu, nunga huhilala api.

44:17 Alai tebatebana i dibahen gabe debata hidup pasombasombaanna. Marsinggang ibana di jolona jala marsomba jala martonggo tusi ninna ma: Sai palua ma ahu, ai ho do debatangku.

44:18 Ndang mananda nasida jala ndang mamoto, ai hona panutupi matanasida i, asa unang marnida rohanasida pe, asa unang mangantusi.

44:19 Jala ndang adong sian nasida nanggo sada na pasuang rohana tu bagasan, manang marparbinotoan manang marhapistaran mangetongi mandok: Satongana nunga hututung di bagasan api jala hulompa roti marhite sian garana, jala hugoreng juhut laos hupangan; ia tebatebana i tung bahenonku hape gabe parbiasan, tung marsinggang ma ahu hape di jolo ni hau sallobong.

44:20 Rohana na tarpaoto pasabam dirina marhite sian sirabun, huhut pasimbil ibana, jadi ndang tagamon paluaonna tondina, manang dohononna: Nda sipaotooto do di tangan siamunhon.

44:21 Sai parateatehon ma on ale Jakkob dohot ho ale Israel, ai * naposongku do ho! * Ahu do jumadihon ho, naposongku do ho! Ale Israel ndang tagamon halupahononku ho.

44:22 Nunga pola * hupasisi songon ombun angka pangalaosim, jala songon ombun manorop angka dosam. Sai mulak ma ho tu ahu, ai ahu do sipalua ho.

44:23 Marolopolop ma hamu angka langit, ai nunga Jahowa mambahen songon i. Marsurak ma hamu angka pusat ni tano on. Mariaia ma hamu ale angka dolok nang tombak ro di sude hau na di bagasanna, ai nunga dipalua Jahowa Jakkob jala marmulia ibana di Israel.

44:24 Songon on do hata ni Jahowa sipalua ho jala na jumadihon ho sian bortian dope: Ahu, Jahowa do na mambahen saluhutna, ahu sandiri pahembang angka langit, ahu sandiri paherbang tano on.

44:25 Ahu manulak angka tanda ni halak pargabus, jala ahu mangalalaeni angka pangarunding; ahu pamonang halak na bisuk jala parbinotoannasida gabe haotoon.

44:26 Ahu do mangkajongjongkon hata ni naposona dohot pasintong panindangion ni suruanna; na mandok tu Jerusalem: Ingkon inganan do ho ulahan, jala tu angka huta ni Juda: Ingkon paulion do hamu jala patindangonku muse angka batunasida i.

44:27 Ahu do na mandok tu pusat samudora: Marsik ma ho jala angka sungemi arsihanku ma.

44:28 Na mandok tu si * Sirus ibana parmahanku, jala ibana pasauthon nasa lomo ni rohangku jala dohononna ma tu Jerusalem: Ingkon paulion ma ho! Jala tu bagas joro ingkon ojak ho bahenon!

Jesaya 45

45:1 Songon on do hata ni Jahowa tu na miniahanna tu * si Sirus, na hutiop di tanganna siamun papatuhon angka bangso parbegu di jolona, jala mangkarhari sinjata sian gonting ni angka raja, mangungkap di jolona angka pintu dohot bahal, unang hinsu di dapot.

45:2 Ahu mardalan di jolom jala pahornophon angka buntulbuntul; ropuhanku ma angka pintu tombaga jala segaanku angka sordak bosi.

45:3 Jala lehononku ma di ho arta angka na di haholomon dohot homitan angka na tinabunihon, asa ditanda ho ahu do Jahowa, Debata ni Israel na manjou goarmu.

45:4 Ala ni Jakkob * naposongki dohot ala ni Israel na hupilliti umbahen na hujou ho di goarmu, pola marsahala goarmu hubahen tagan so ditanda ho dope ahu.

45:5 Ahu do * Jahowa, jala ndang adong be Debata dungkon ni ahu; huhohosi do ho tagan so ditanda ho dope ahu.

45:6 Asa ditanda halak angka na sian habinsaran dohot sian hasundutan na soadong Debata dungkon ni ahu; ahu do Jahowa, jala dungkon ni ahu ndang adong.

45:7 Ahu * Sijadi hatiuron dohot sitompa haholomon; sibahen hadameon dohot sitompa hamagoan. Ahu do Jahowa, sibahen saluhutna i.

45:8 Manetehi ma hamu angka langit sian ginjang, jala diusehon angka ombun ma udan hatigoran! Buha ma tano on jala diparbuehon hatuaon dohot hatigoran, rap martumbur ma i! Ahu Jahowa do sitompasa.

45:9 Marjea ma manang ise na mambadai sitompa ibana, ngarngar nian sian angka ngarngar ni tano on! Tung dohonon ni * tano liat ma tu sitopa ibana: Aha do na binahenmu? Manang jadijadianmu mandok: Ndang martangan ibana.

45:10 Marjea ma manang ise na mandok tu amana: Aha tinubuhonmu? Manang tu inana: Boasa tung manubuhon ho?

45:11 Songon on do hata ni Jahowa, na badia ni Israel jala sitompasa: Taringot tu angka na masa sogot nian sungkun hamu ahu; taringot tu angka anakku dohot taringot tu jadijadian ni tanganku nian tona i hamu ahu!

45:12 Ahu do na mambahen tano on jala na tumompa jolma di atasna; tanganku sandiri paherbang angka langit jala guru dokku do angka paranganna saluhutna.

45:13 Ahu patindang ibana marhite sian hatigoran jala pahornoponku ma saluhut angka dalanna. * Ibana ma pauli hutangku jala paluaonna ma bangsongku na tarbuang i, ndada binahen ni upa manang silehonlehon, ninna Jahowa Zebaot.

45:14 Songon on do hata ni Jahowa: Na niomo ni halak Misir, jala laba ni halak Kus dohot halak Seba jolma pardaging na ganjang i bali tu ho, gabe ho nampunasa; ihuthononnasida do ho, pola marrante nasida mardalan; jala marsomba nasida tu ho, jala marhuraja tu ho: Holan di bagasan ho do tutu Debata jala * ndang adong be Debata na asing.

45:15 Tongon tahe, na simuk do ho marhadirion ale Debata, Debata ni Israel sipangolu i.

45:16 Maila huhut tarurak nasida sudena; rap mardalan di haurahon angka sipandei ganaganaan.

45:17 Alai anggo Israel dapotan tua marhite sian Jahowa tung tua salelenglelengna do. Ndang tagamon maila manang tarurak hamu ro di salelenglelengna.

45:18 Ai songon on do hata ni Jahowa, sitompa angka langit, ibana do Debata, Sijadi tano on jala pasunhon; ibana do paojakkonsa ndada laos rumar umbahen ditompa, bahen inganan ni jolma i do umbahen dijadihon: Ahu do Jahowa jala dungkon ni ahu ndang adong be.

45:19 Ndang dung hudok hatangku di sihabunian, manang di inganan na holom di tano i; ndang dung hudok tu pinompar ni si Jakkob: Ndang marguna pangaluluimuna di ahu! Ahu do Jahowa na mandok hatigoran, na mamaritahon hasintongan.

45:20 Marluhut ma hamu jala rap ro ma hamu tu lambungkon, hamu ale angka naung malua sian bangso parbegu! Ndang adong diboto nasida angka na mangusung hau bahen ganaganaannasida, jala angka na marsomba tu Debata, na so tarbahen paluahon.

45:21 * Marboaboa ma hamu, jala ro jumonok martuptup sama hamu! Tung ise ma naung patubegehon i sian na robi manang mamaritahonsa? Nda ahu do Jahowa jala ndang adong Debata, dungkon ni ahu, Debata na bonar jala silehon tua, ndang adong Debata dungkon ni ahu.

45:22 Dompakkon hamu ma ahu, asa martua hamu nasa ujung ni tano on! Ai ahu do Debata, jala ndang adong dungkon ni ahu.

45:23 Nunga pola marmangmang ahu tu diringku, jala ruar sada hata hatigoran sian pamanganku na so tupa mulak: Ingkon * lompit sogot nasa ulu ni tot marsomba tu ahu, jala marmangmang tu ahu saluhut dila.

45:24 Mandok: Holan di bagasan Jahowa do angka * hatigoranku dohot hagogoonku. Ro be do tu ibana, alai maila sude angka na hehe mangalo ibana.

45:25 Di bagasan Jahowa dapotan hapintoran jala marolopolop sandok pinompar ni Israel.

Jesaya 46

46:1 Nunga manungki Bel, nunga jomba Nebo; tu binatang dohot tu pinahan dipampe angka ganaganaannasida, pola sorat nasida mangusung maradu magege.

46:2 Rap tinggang jala manungki nasida, ndang tarpaluasa na niusungnasida i, gari nasida sandiri ingkon laho do tu habuangan.

46:3 Tangihon ma ahu ho ale pinompar ni si Jakkob dohot nasa pasipasi ni pinompar ni si Israel, angka na huompa sian bortian dope, angka na huabing sian hatutubuna.

46:4 Sahat ro di hatutuamu sai tongtong do ahu, jala ro di * na ubanon sai ahu do mangusung hamu. Ahu do mambahensa na sai laon, ahu do mangompa, ahu do mangabing jala ahu paluahon nuaeng.

46:5 Tung tu ise ma pasumanonmu ahu, manang patudosonmu ahu, manang pasobohonmu ahu, paboa suman ahu tusi?

46:6 Dirunggirhon nasida do sere sia puntalan jala martimbangan nasida mandasing perak i; diupai nasida sada panopa, asa dibahen sian i sada debata, marsinggang tusi nasida bahen panombaannasida.

46:7 Dipampe nasida ibana tu abara, diusung ibana jala dipajongjong tu hajongjonganna, gabe hot jongjong di hajongjonganna, ndang tarbahensa morot; * joujou pe manang ise tu ibana, ndang dialusi, jala ndang tarbahensa paluahon sian hagogotanna.

46:8 Sai parateatehon hamu ma i jala pir ma tondimuna! Sai pasuang hamu ma rohamuna tu bagasan, hamu angka pangalaosi!

46:9 Sai parateatehon hamu ma angka na masa na jolo sian mulamula, ai ahu do Debata, jala dungkon ni ahu ndang adong be Debata, manang na tudos tu ahu.

46:10 Ahu palumbahon hian sian mulamula ujungna sogot, ahu marboaboa sian na robi na so masa dope; laos ahu mandok: Sai hot do sangkaphu jala bahenonku ma nasa lomo ni rohangku.

46:11 Nunga hujou sada pidong raja wali sian habinsaran; sian tano na dao sada baoa na pasauthon sangkaphu. Nunga pola hudok, sai na paroonku do; nunga pola hurumang, sai na pasautonku do.

46:12 Tangihon ma ahu hamu ale angka na tangkang marroha, hamu angka na holang sian hatigoran.

46:13 Nunga pola hupajonok hatigoranku, ndang be mandaodao, jala ndang marbenda hatuaonku, jala lehononku do di Sion hatuaon, jala hamuliaonku di Israel.

Jesaya 47

47:1 * Mijur ma, jala hundul tu sirabun ho ale namarbaju, boru Babel! Hundul ma tu tano, unang be marhabangsa ho, ale boru Kasdim! Ai ndang be goaron ni halak ho: * Parompuan na lambok jala hasoloan.

47:2 Buat ma pandudaan, jala duda itak! Pasisi ma pangkuphupi ni bohim, sintak ma arbearbe ni obukmu, marsabuk ma ho, taripari ma angka batang aek!

47:3 * Andar ma hapantanganmu, huhut tarida haurahonmu; marlulu ma ahu dompak ho, jala ndang adong jolma olanangku.

47:4 Ia goar ni sipalua hita, i ma Jahowa Zebaot na badia ni Israel.

47:5 Hohom ma ho hundul, jala topot ma haholomon ho ale boru Kasdim, ai ndang be goaron ni halak ho: Boru jujungan ni angka harajaon.

47:6 Tarrimas ahu mida bangsongku, nunga pola huparamun parjambaranku, jala hupasahat nasida tu tanganmu hape ndang maralangalang roham mida nasida, lam dipadokdok ho situtu augam, nang tu halak na tuatua.

47:7 Gabe didok ho: Salelenglelengna do ahu boru jujungan, laos so diparateatehon ho hata i; jala ndang disarihon roham pangapudian sogot.

47:8 Dibahen i tangihon ma hatangkon ho ale boru hasian, na hundul marsonangsonang, jala * na mandok di bagasan rohana: Ahu ma bongka i, jala ndang adong halak na songon ahu on; ndang tagamon juguk ahu mabalu, jala ndang tagamon tandaonku hapunuon.

47:9 Alai ro do na dua i tu ho sogot: Hapunuon dohot habaluon di na sadari so pangkirimanmu, sintong situtu do harorona tu ho, atik pe mansai lan utiutianmu, atik pe torop situtu angka tabasmu.

47:10 Ai marhaposan tu hinajahatmu do ho, nimmu do: Ndang adong manang ise na marnida ahu. Habisukonmu dohot parbinotoanmu, i do mangaliluhon ho, gabe didok ho di bagasan roham: * Ahu ma bongka i, jala ndang adong songon ahu on.

47:11 Hape songgop do tu ho hinamago, ndang botoonmu hinasogotna; jala maninggang tu ho jea, ndang tarpatupa ho pardenggananna; jala ro do tahop tu ho hasiapon so hirimhirimmu so pamatoanmu.

47:12 Ua datdati patindang angka utiutianmu dohot * hinadeak ni tabasmu, na pinaulasulasmu sian sietehetehonmu; anggiat tung tarpatupa ho pangurupion; anggiat tung jumpangan gogo ho mangalo.

47:13 Nunga pola magege ho dibahen hinadeak ni angka sangkapmu. Ua hehe ma nuaeng nasida angka sijujur parhalaan, angka sitilik bintang, angka na martondung sian bulan paluahon ho nian taringot tu na ro sogot tu ho.

47:14 Ida ma, doshon rapanrapan do nasida, suda do nasida panganon ni api; ndang tarpalua nasida tondinasida i sian tangan ni jilam ni api, ai ndada gara ni api pamasak rotinasida, manang bahen pansusuduanna.

47:15 Suman tusi do halak parutiutian angka na palojaloja ho, angka partigatiga na niangkupanmu sian sietehetehonmu; masitondong dalan haliluonna be do, ndang adong na paluahon ho nanggo sada.

Jesaya 48

48:1 Tangihon ma on, ho ale pinompar ni si Jakkob, angka na marpanggoarhon Israel, jala marharoroan sian * mual ni Juda, angka na * marmangmang tu goar ni Jahowa, jala angka na papujipuji Debata ni Israel, alai ndang di bagasan hasintongan manang hatigoran.

48:2 Ai marpanggoarhon huta na badia i do nian nasida, jala marpangunsandean nian di Debata ni Israel, Jahowa Zebaot do goarna.

48:3 Angka na masa parjolo i nunga tibu hian hupalumba, jala sian pamanganku do i ruar, jala hupatubegehon tu nasida. Tompu do i hubahen gabe saut ro.

48:4 Ala naung huboto hian * na jogal do ho marroha jala marurat bosi tangkuhukmu, jala tombaga pardompahanmu.

48:5 Dibahen i hupalumba hian tu ho sian na robi: Tagan so ro dope nunga hupatubegehon hian tu ho, asa unang tardok ho; ajiajianku do na mambaheni jala ganaganaan na huuhir dohot na hutompa do na mandokkoni.

48:6 Nunga dibege ho hian, parateatehon ma saluhutna i. Beha ia hamu nda hatindangkononmu sintongna? Nunga hupatubegehon tu ho olat ni on angka na imbaru dohot angka na simuk, na so binotom na sai laon.

48:7 Nuaeng pe tartompa nasida, ndada nahinan, jala di jolo ni ari parbinegeanmu, asa unang tardok ho: Ida ma, nunga huboto hian.

48:8 Ndang dung dibege manang diboto ho hian, manang tarbortik tu pinggolmu uju i; ai huboto do simeoleol situtu ho, jala pangalaosi do ho targoar sian bortian ni inangmu.

48:9 Ala ni goarhu sambing umbahen hupalambat rimashu, jala ala ni hamuliaonku hupaombun ahu mangolani ho umbahen so siap ho hubahen.

48:10 Ida ma, nunga hupapita ho, alai ndada songon perak; ingkon di bagasan pamurunan ni pardangolan ahu manguji ho.

ᯤᯑ ᯔ, ᯉᯮᯝ ᯂᯮᯇᯇᯪᯖ ᯂᯬ, ᯀᯞᯤ ᯉ᯲ᯑᯑ ᯘᯬᯝᯉᯬ᯲ ᯇᯩᯒᯂ᯲; ᯀᯰᯪᯂᯉᯬ᯲ ᯑᯪ ᯅᯎᯘᯉ᯲ ᯇᯔᯮᯒᯮᯉᯉ᯲ ᯉᯪ ᯇᯒ᯲ᯑᯝᯬᯞᯉ᯲ ᯀᯂᯮ ᯔᯝᯮᯐᯪ ᯂᯬ.

48:11 Ala ni ahu, ala ni goarhu tutu nunga hubahen songon i, ai tung beha ma pangaramunna disi? Jala * ndang lehononku hamuliaonku tu na asing.

48:12 Tangihon ma ahu, ale Jakkob, dohot ho ale Israel naung hujou! Sai * tongtong do ahu, * ahu do parjolo, ahu do huhut parpudi!

48:13 Tanganku do huhut naung paojak tano on, jala siamunhu paherbang angka langit. Joujou do ahu di nasida, mamintor rap jongjong do.

48:14 Marluhut ma hamu sudena jala tangihon hamu! Tung ise ma sian nasida paboahon angka sisongon i? Jahowa do mangkaholongi * ibana; bahenonna ma lomo ni rohana tu Babel, jala tanganna mangalo halak Kasdim.

48:15 Ahu, ahu ma tutu naung mandok i; ahu huhut manjou ibana; ahu parohon ibana, jadi ingkon tulus dalanna i.

48:16 Ro ma hamu jumonok tu ahu, tangihon hamu ma on! Sian mulamula dope * ndang dung hudok di sihabunian. Olat ni tingki hajadianna, nunga disi hian ahu; alai anggo nuaeng * disuru Tuhan Jahowa dohot Tondina i ahu.

48:17 Songon on do hata ni Jahowa sipalua ho, na badia ni Israel: Ahu do Jahowa Debatam, na mangajarhon tu ho bahen hatuaonmu, na manogu ho di dalan sidalananmu.

48:18 * Aut na diradoti roham angka patikki, jala doshon batang aek hasonanganmu, jala hatigoranmu doshon galumbang ni laut.

48:19 Jala doshon horsik di topi laut pinomparmu toropna, jala angka tubum songon rihit di topi ni batang aek; ndang tagamon ripur manang mago goarna maradophon ahu.

48:20 * Ruar ma hamu sian Babel, maporus ma hamu sian Kasdim! Marsoara olopolop ma hamu paboahon, patubegehon hata i! Pasar hamu ma i ro di ujung ni tano on, dok hamu ma: Nunga dipalua Jahowa naposona si Jakkob.

48:21 Jadi ndang mauas nasida di angka halongonan, uju i tinogihonna i nasida; mabaor do aek sian dolok batu di nasida dibahen ibana jala dibolahon batu i gabe mabaor aek sian bagasan.

48:22 Alai anggo di halak parjahat ndang adong hasonangan, ninna Jahowa.

Jesaya 49

49:1 Tangihon ma ahu, hamu ale angka pulo, jala patinggil ma pinggolmu hamu ale angka bangso di na dao! Jahowa do manjou ahu sian bortian dope, sian butuha ni dainang, nunga ditaringoti goarhu.

49:2 Jala dibahen * pamanganku songon podang na tajom; diondingi do ahu marhite sian * pangalinggom ni tanganna, jala dibahen ahu gabe sumbia na niugam, ditabunihon do ahu di bagasan siorna.

49:3 Jala ninna do mandok ahu: Naposongku do ho, ale Israel marhite sian ho do ahu marmulia.

49:4 Alai anggo ahu, ninna rohangku do: Ndang marguna na ngalutan i ahu magopo sambing do gogongku hupasudasuda; hape Jahowa * patingkostingkos uhum tu ahu, jala upangku di lambung ni Debatangku do.

ᯀᯞᯤ ᯀᯰᯎᯬ ᯀᯂᯮ, ᯉᯉᯪ᯲ᯉ ᯒᯬᯂᯰᯂᯮ ᯑᯬ: ᯉ᯲ᯑᯰ ᯔᯒ᯲ᯎᯮᯉ ᯉ ᯝᯞᯮᯖᯉ᯲ ᯤ ᯀᯂᯮ ᯔᯎᯬᯇᯬ ᯘᯔ᯲ᯅᯪᯰ ᯑᯬ ᯎᯬᯎᯬᯰᯂᯮ ᯂᯮᯇᯘᯮᯑᯘᯮᯑ; ᯂᯇᯩ ᯐᯂᯬᯋ ᯇᯖᯰᯪᯂᯘᯬ᯲ᯖᯰᯪᯂᯘᯬ᯲ ᯥᯂᯔᯮ᯲ ᯖᯮ ᯀᯂᯮ, ᯐᯞ ᯥᯇᯰᯂᯮ ᯑᯪ ᯞᯔ᯲ᯅᯮᯰ ᯉᯪ ᯑᯩᯅᯖᯰᯂᯮ ᯑᯬ.

49:5 Ia nuaeng hata ni Jahowa na jumadihon ahu sian bortian dope bahen naposona, asa ahu paulakkon Jakkob tu ibana dohot papunguhon Israel, jadi marmulia ma ahu diida Jahowa, jala Debatangku gabe hagogoonku.

49:6 Jala ninna do: Hametmeton do i anggo tung holan naposongku ho patindang angka marga ni Jakkob dohot manogihon mulak angka pasipasi sian Israel; nunga hulehon ho huhut bahen * panondang di angka parbegu, gabe parhitean ni hatuaonku ho ro di ujung ni tano on.

49:7 Songon on do hata ni Jahowa, Sipalua Israel na badiana tu ibana na hinabiashon ni roha ni halak, tu bangso hagigian, tu naposo ni angka pangarajai: Ingkon idaon ni angka raja do ho jala hehe, jala marsomba angka pangarajai ala ni Jahowa na bonar, dohot ala ni na badia ni Israel, na mamillit ho.

49:8 Songon on do hata ni Jahowa: * Di tingki parasian ahu mangalusi ho, jala di ari hatuaon ahu mangurupi ho, jala ahu mangaramoti ho, jala ahu mambahen ho gabe bangso * parjanjian, pahehehon tano i martalihon angka partalian na tarulang.

49:9 Mandok tu angka na tarrante: Ruar ma hamu! Tu angka na di haholomon: Ro ma hamu tu hatorangan! Marsonangsonang nasida diparmahan di angka dalan, jala jumpang nasida hangoluanna di saluhut angka robean.

49:10 Ndang male, manang mauas nasida, ndang mangonai na mohop manang las ni ari tu nasida, ai parasi roha do nasida manogihon nasida, jala ditogutogu nasida tu lambung aek mual.

49:11 Jala bahenonku ma saluhut angka dolokku gabe dalan na hornop, jala patimboonku ma angka dalanku.

49:12 Ida ma, na deba ro sian na dao, jala ida ma, na deba ro sian utara dohot sian laut, jala na deba sian tano Sinim.

49:13 Marolopolop ma hamu ale angka langit, jala mariaia ma ho ale tano on! Pangiar ma soaram marolopolop, hamu ale angka dolok! Ai nunga diapul Jahowa bangsona jala nunga asi rohana di angka na dangolna.

49:14 Alai ninna Sion do: Nunga ditadingkon Jahowa ahu jala nunga dihalupahon Tuhan i ahu.

49:15 Tung * tarhalupahon inaina ma posoposona, so asi rohana mida anak tinubuhonna i? Tung sura pe tarhalupahon nasida, ianggo * ahu laos so halupahononku do ho.

49:16 Ida ma, nunga pola ahu manguhirhon ho tu bagasan tanganku duansa, tongtong do angka parikmu di jolongku.

49:17 Humalaput ma angka anakmu mandapothon ho; alai anggo halak pangaloha i dohot partaban di ho, ingkon ruar sian ho.

49:18 * Mangaranap ma matam humaliang, jala ida: Saluhut nasida pungu ro mandapothon ho. Songon sintongna mangolu ahu, ninna Jahowa, ingkon alithononmu do nasida sude, hira pangkean oroan jala ingkon pangkeonmu dirim marhite sian nasida songon boru oroan.

49:19 Ai tanom naung tarulang, tartaban jala siniaphon nuaeng magogothu do anggo sogot bahen inganan, ia dung mandao halak sibondut ho.

49:20 Angkup ni, ho ale na hol na sai laon marhusip dope sogot tu pinggolmu angka anakmu: Magogothu do inganan on di ahu, palambas di ahu, asa hainganan ahu.

49:21 Jadi dohononmu ma di bagasan roham: Ise ulaning naung manubuhon angka anakkon di ahu, ahu na hol hian, jala na punjung, na tarbuang jala na pinaulak? Jala ise ulaning naung pagodanggodang angka nasida di ahu? Ida ma, na punjung hian do ahu, didia do angka nasida on uju i?

49:22 Songon on do hata ni Tuhan Jahowa: Ida ma, patoltolonku ma tanganku tu angka bangso parbegu, jala patindangonku ma tonggolhu tu angka bangso, jadi ingkon boanonnasida ma angka * anakmu di bagasan ampuan, jala usungonna angka borum di abarana.

49:23 Ai ingkon * angka raja gabe parorotmu, jala jolma ni angka raja gabe panusuanmu; pola ingkon * manungkap tu tano nasida marsomba tu ho, jala orbuk ni patmu dilatonnasida, jadi botoonmu ma, ahu do Jahowa, ndang tagamon tarurak manang ise na marhaposan tu ahu.

49:24 Tung tarrampas ma tabantaban sian halak na gogo? Manang tung malua ma na tarhurung sian uhum madabu?

49:25 Alai songon on do hata ni Jahowa: Ianggo nuaeng * rampason ma tutu halak na tarbuang sian na gogo, jala malua tabantaban sian halak pangarupa, ai ahu mambadai angka na mambadai ho, jala ahu paluahon angka anakmu.

49:26 Jala halak na mangarupa ho, lehononku manganhon sibukna sandiri, jala inumonna mudarna sandiri maradu mabuk songon sian tuak na pang, jadi botoon ni nasa sibuk ma, ahu do Jahowa, silehon tua, jala sipalua ho, na sun hinagogo manumpak Jakkob.

Jesaya 50

50:1 Songon on do hata ni Jahowa: Didia do * surat parsirangan ni inamuna, paboa naung hupaulak Ibana? Manang tung ise ma parutanganku, * panggadisanku di hamu? Ida ma, ala ni hajahatonmuna do hamu targadis, jala binahen ni pangalaosionmuna pinaulak inamuna i.

50:2 Boasa tung ro ahu, hape ndang adong manang ise hudapot? Joujou ahu, hape ndang adong na mangalusi? Tung * na majempekku do huroha tanganku mambahen haluaon? Manang tung na so margogo ahu huroha paluahon? Ida ma, marhitehite pangasupingku * huarsik do laut, hubahen do angka batang aek gabe halongonan, gabe bau do angka dengke di bagasan, sian na soada aek, jala marmatean dibahen uas.

50:3 Marulos haholomon hubahen angka langit, jala hori hubahen bulusanna.

50:4 Nunga dilehon Tuhan Jahowa tu ahu * dila sisean, asa huboto pasabam roha ni na loja marhite sian hata i. Sai disungguli do ahu ganup sogot, dipatinggil pinggolhu marbinege, songon sisean.

50:5 Nunga * dibungka Tuhan Jahowa pinggolhu, jala ndang manjengkeljengkel ahu, ndang sumurut ahu tu pudi.

50:6 Hutarehon do balik tanggurungku tu halak na mangalinsingi ahu dohot hurumhu tu halak na mamastapi, ndang hutabunihon bohingku maradophon haurahon dohot tijur.

50:7 Alai Tuhan Jahowa do mangurupi ahu, dibahen i ndang tarurak ahu; ala ni hubahen do bohingku songon batu ping; ai huboto hian na so tagamon tarurak ahu.

50:8 Jonok do ibana * na mamintori Ahu; ise naeng maruhum dohot ahu? Antong marluhut ma hita, ise suhut alongku maruhum? Dipajonok ma tu ahu.

50:9 Ida ma, sai urupan ni Tuhan Jahowa do ahu, tung ise ma na tuk manorui ahu? Ida ma, sude do nasida matua songon ulos, ngitngit manganhon nasida.

50:10 Ise ma sian hamu na mabiar mida Jahowa, na tumangihon soara ni naposona, na mardalani di angka haholomon, jala ndang adong hatiuron di ibana? Dihaposi ma goar ni Jahowa jala marparsigantungan ibana tu Debatana.

50:11 Ida ma, sude hamu angka na pagalak api, angka na marhampilhon sumbia na ginarahon, laho ma hamu tu bagasan apimuna na marjillamjillam i dohot tu angka sumbia na ginarahon, angka na pinagalakmuna. Sian tanganku masa songon i tu hamu; peak di bagasan angka haporsuhon do anggo hamu.

Jesaya 51

51:1 Tangihon ma ahu hamu angka na mangeahi hatigoran, angka na mangalului Jahowa! Paberengbereng hamu ma dolok batu hapultahanmuna dohot * godung parsumuran na hinali, haruaranmuna i.

51:2 Paberengbereng hamu ma * si Abraham, ompumuna dohot si Sara na manubuhon hamu; ai * punjung sasadasa do uju na hujou, asa hupasupasu ibana jala hupatorop.

51:3 Ai asi do roha ni Jahowa mida Sion, asi do tutu rohana mida sude ingananna na tarulang, jala doshon Eden dibahen halongonanna jala tanona bakkalbakkal songon porlak ni Jahowa; jumpang ma disi las ni roha dohot hariburon, hamauliateon dohot soara pujipujian.

51:4 Patinggil ma pinggolmu ale bangsongku tumangihon ahu, jala tangihon ahu hamu ale angka naposongku! Ai sian ahu haroroan ni patik, jala patindangonku uhumhu bahen panondang di angka bangso.

51:5 Nunga jonok hatigoranku, nunga borhat hatuaonku, ingkon uhumon ni tanganku do angka bangso. Marhaposan tu ahu ma angka pulo jala marhanalomhon tanganku do nasida.

51:6 Manaili ma matamuna dompak ginjang, jala mamereng ma hamu dompak tano i; ai * laho salpu do angka langit songon ombun, jala laho matua sogot tano on songon ulos, jala pangisina i marmatean songon i; alai anggo hatuaonku ro di salelenglelengna do, jala hatigoranku ndang olo muba.

51:7 Tangihon ahu, hamu ale angka sitanda hatigoran, ho ale bangso na umpeop patikku di bagasan rohana! * Unang tung habiari hamu pangeleson ni jolma na gale i, jala unang tung tahuton hamu mida panginsahionnasida i.

51:8 Ai ingkon suda nasida panganon ni ngitngit, songon ulos jala ingkon panganon ni gulokgulok nasida songon imput ni birubiru; alai anggo hatigoranku hot do ro di salelenglelengna, jala hatuaonku marsundutsundut.

51:9 Ngot ma ho, ngot ma ho! Solukkon ma hagogoon, ho ale tangan ni Jahowa! Ngot ma ho, songon di * angka ari na robi, di angka sundut mulamula! Nda ho do i na * patunduk Rahab, naung manullang buea?

51:10 Nda ho do i na mangarsik laut i pasuruthon angka pusat godang? Na mambahen angka tondolan ni laut gabe dalan, asa taripar sian i angka na pinaluam.

51:11 Suang songon i ma mulak angka na tinobus ni Jahowa asa sahat tu Sion mardongan olopolop dohot las ni roha salelenglelengna di atas ulunasida. Jumpangan hahinsaon jala hahilason nasida, alai maporus ma anggo arsakarsak dohot hoihoi.

51:12 Ahu, ahu sandiri tutu na mangapuli hamu. Tung ise ma ho, pola * habiaranmu jolma na olo mate, manang anak ni jolma na tudoshon duhutduhut? ᯀᯂᯮ, ᯀᯂᯮ ᯘᯉ᯲ᯑᯪᯒᯪ ᯖᯮᯖᯮ ᯉ ᯔᯝᯇᯮᯞᯪ ᯂᯔᯮ. ᯖᯮᯰ ᯤᯘᯩ ᯔ ᯂᯬ, ᯇᯬᯞ ᯂᯅᯪᯀᯒᯉ᯲ᯔᯮ ᯐᯞᯬ᯲ᯔ ᯉ ᯀᯬᯞᯬ ᯔᯖᯩ, ᯔᯉᯰ ᯀᯉᯂ᯲ ᯉᯪ ᯐᯞᯬ᯲ᯔ ᯉ ᯖᯮᯑᯘᯬ᯲ᯂᯉᯬ᯲ ᯑᯮᯂᯖᯮ᯲ᯑᯮᯂᯖᯮ᯲

51:13 Gabe dihalupahon ho Jahowa sitompa ho, sipaherbang angka manipat ari maradophon hamuruhon ni pangarupa, molo mangkontas ibana laho mangago? Hape didia do nuaeng hamuruhon ni pangarupa?

51:14 Hatop do dapotan haluaon jolma na tarjepol i, asa unang mate ibana di godung, jala unang hurangan roti ibana.

51:15 Ahu do antong Jahowa, Debatam, na manggunsang laut, gabe marhasak angka galumbangna; Jahowa Zebaot do goarna.

51:16 Ampehononku do huhut angka hatangku tu bagasan pamanganmu, jala * tabunihononku ho marhite sian pangalinggom ni tanganku, laho manuan angka langit jala paojak tano on, huhut mandok tu Sion: Bangsongku do ho! ᯀᯔ᯲ᯇᯩᯂᯬᯉᯉᯬ᯲ᯂᯮ ᯑᯬ ᯂᯮᯂᯖᯮ᯲ ᯀᯰᯂ ᯂᯖᯰᯂᯮ ᯖᯮ ᯅᯎᯘᯉ᯲ ᯇᯔᯝᯉ᯲ᯔᯮ, ᯐᯞ ᯖᯅᯮᯉᯪᯂᯬᯉᯉᯬ᯲ᯂᯮ ᯂᯬ ᯔᯒ᯲ᯂᯪᯖᯩ ᯘᯪᯀᯉ᯲ ᯇᯝᯞᯰᯪᯎᯔᯬ᯲ ᯉᯪ ᯖᯝᯉ᯲ᯂᯮ, ᯞᯂᯬ ᯔᯉᯮᯀᯉ᯲ ᯀᯰᯂ ᯞᯝᯖᯪ᯲ ᯐᯞ ᯇᯀᯬᯐᯂ᯲ ᯖᯉᯬ ᯀᯉᯬ᯲, ᯂᯮᯂᯖᯮ᯲ ᯔᯉ᯲ᯑᯂᯬ᯲ ᯖᯮ ᯘᯪᯀᯉᯬ᯲: "ᯅᯰᯘᯬᯰᯂᯮ ᯑᯬ ᯂᯬ! "

51:17 Ngot ma ho, ngot ma ho! Hehe ma ho ale Jerusalem, naung manjalo sian tangan ni Jahowa minum sian panginuman ni hamuruhonna; nunga suda diinum ho * panginuman parmabuhon, pola didilati ho.

51:18 Ndang adong manang ise sian nasa anak tinubuhonna i na manogihon ibana jala ndang adong manang ise sian nasa anak pinagodanggodangna i manangkup tanganna.

51:19 * Na dua ragam on songgop tu ho; tung ise ma marhabot ni roha mida ho? Hatataban dohot hauulang, haraparon dohot podang; tung ise ma mangapuli ho?

51:20 Nunga pola * mandate angka anakmu, marpeahan do nasida di suhi ni saluhut angka alaman, songon ursa na dapot aring, angka na mabuk binahen ni hamuruhon ni Jahowa, pangasupion ni Debatam.

51:21 Dibahen i, ua tangihon ma on, ho ale na dangol, jala na mabuk, alai ndada sian anggur.

51:22 Songon on do hata ni Tuhanmu, Jahowa jala Debatam, na martubolhon bangsona: Ida ma, buatonku ma sian tanganmu * panginuman parmabuhon, panginuman ni hamuruhonku, ndang be inumonmu sian i.

51:23 Lehononku ma ibana tu bagasan tangan ni * halak na pasipal ho, angka na mandok tu tondim: * Paunduk ma ho, asa hudegedege hami ho; gabe dipabustang ho tanggurungmu, songon tano, jala songon alaman di jolma angka na mamolus sian i.

Jesaya 52

52:1 Ngot ma ho, ngot ma ho! Solukkon ma hagogoonmu, ale Sion! Solukkon ma angka ulos hamuliaonmu, ale Jerusalem, huta na badia i! Ai ndang be masuk tu ho tu joloan on nanggo sahalak na so marsunat, manang na ramun.

52:2 Paspas ma orbuk sian ho, hehe ma ho, marhabangsa ma ho, ale Jerusalem! Harhari ma angka ihot ni rungkungmu, ho ale boru Sion na tarbuang.

52:3 Ai songon on do hata ni Jahowa: Nunga targadis hamu soada utang, jadi ndang marhitehite perak hamu tobuson.

52:4 Ai songon on do hata ni Tuhan Jahowa: Tuat do di na robi bangsongku tu Misir, asa manginsua disi; dung i dirupa Assur nasida, soada alana.

52:5 Alai anggo nuaeng, aha patut bahenonku dison! Ninna Jahowa, ai nunga tarboan bangsongku, soada alana. Sai mariaia do angka panggomgomina, ninna Jahowa, jala tongtong manipat ari * diinsahi goarhu.

52:6 Dibahen i, ingkon tandaon ni bangsongku goarhu, dibahen i tandaonna ma tutu di ari na sasada i, ahu do i na mandok: Ida ma, dison do ahu.

52:7 * Lehetna i di atas ni angka dolok angka pat ni parbarita na uli, na patubegehon hadameon, na mamaritahon barita na uli, na patubegehon hatuaon, na mandok tu Sion: * Debatam do bangkit Raja.

52:8 Soara ni * jolma parhalmu, angka dipangiar be soarana rap marolopolop, ai adop bohi be diida nasida, molo mulak Jahowa tu Sion.

52:9 Pangiar ma soaramuna rap marolopolop ma hamu, ale angka pasipasi ni Jerusalem, ai nunga marpangulahi roha ni Jahowa mida bangsona, nunga dipalua Jerusalem.

52:10 Nunga pola dipatoltol Jahowa tanganna na badia i di adopan ni saluhut bangso parbegu, jadi saluhut ujung ni tano on marnida hatuaon ni Debatanta.

52:11 Ruar, ruar, borhat ma hamu sian i, unang jama hamu na ramun! Ruar ma hamu sian tongatonganasida! Manguras ma hamu, ale angka na mangusung ulaula ni Jahowa.

52:12 Ai ndang pola * humalaput hamu laho ruar, manang marlojong songon halak na maporus, ai * Jahowa do manguluhon hamu, jala Debata ni Israel mangiringiring hamu sian pudi.

52:13 Ida ma, pistar do pambahen ni naposongku; tarhinsat do ibana jala dipatimbo, gabe timbul situtu sogot.

52:14 Ia songon i songgot ni roha ni torop halak mida ibana dibahen hinaroa ni rupana dibahen tandina sian jolma hian, rupana pe maradophon jolma.

52:15 Songon i do * urasonna torop angka bangso parbegu sogot, hohom be do angka raja maradophon ibana, ai * halak na so dung panahatan ni barita i, nasida do marnida, jala halak na so dung umbegesa, i do mangantusi sogot.

Jesaya 53

53:1 * Tung ise ma nuaeng porsea di jamitanami? Jala * tangan ni Jahowa, tung ise ma naung tumandasa?

53:2 Ai simbur do ibana tubu * songon tumbur di adopan ni bohina, jala songon tunas sian tano na mahiang. Ndang adong hinauli ni rupana manang hamuliaonna; ia huida hami ibana, ndang adong rupana umbahen sihalomohononhon ibana.

53:3 * Dileai jala dipasiding jolma do ibana, baoa na somal mangae pardangolan dohot sahit ibana, pola * ditabunihon halak bohina maradophon ibana, dibahen leana, jadi ndang pola hurajumi hami ibana.

53:4 Tongon do angka sahitta * diusung ibana, jala angka pardangolanta diporsan; alai anggo rohanta mandok: * Debata do maminsang, mamungkul dohot pasipal ibana.

53:5 Hape ala ni pangalaosinta ibana tartullang, binahen ni hajahatonta ibana mabugang. Ampe tu ibana pinsangpinsang parhitean ni hasonanganta, jala binahen ni bugangna malum itahilala.

53:6 Luhut do hita * lilu songon birubiru, ** ganup masitondong dalanna be, alai hajahaton ni hita sudena * dihonahon Jahowa tu ibana.

53:7 Dipasipal pe ibana, sai manaonnaon do anggo ibana, ndang manang mangkuling pamanganna, songon birubiru do ibana na tinogu tu pamotongan, jala songon anak ni birubiru na hohom maradophon jolma sigusting ibana, tung na so dibungka do pamanganna.

53:8 Dung malua ibana sian pardangolan dohot sian uhum, tung ise ma na tuk * manjujur sundutna i? Ai * sirang pe ibana sian tano ni halak na mangolu, binahen ni pangalaosion ni bangsongku do mangonai pinsangpinsang i tu ibana.

53:9 Rap dohot halak * parjahat hian tanomanna dilehon, hape rap dohot halak na mora ibana dung mate, ala na so * adong na so uhum diula jala ndang adong sipaotooto di bagasan pamanganna.

53:10 Alai dihalomohon Jahowa do parsipalna mangae sahit! Ia dung * dilehon hosana bahen pelean pardengganan, idaonna ma * boni jala paganjangonna ariarina, jala manjadi ma lomo ni roha ni Jahowa marhitehite tanganna.

53:11 Dung malua rohana sian halojaon, idaonna ma na pasabam rohana; torop ma halak * pintoran ni naposongku na tigor i marhitehite parbinotoanna, jala * porsanonna ma hajahatonnasida i.

53:12 Dibahen i torop halak * lehononku bahen jambarna, jala marbagi tabantaban ibana rap dohot halak na marhuaso, ala naung ** sineahonna i hosana tu hamatean, jala * tarrajum ibana tu halak parjahat; ala naung ibana mangusung dosa ni torop halak, jala ** diondihon halak parjahat.

Jesaya 54

54:1 Mariaia ma ho, ale na hol na so dung tubuan anak! Pangiar ma soaram marsuraksurak, jala marolopolop ma ho na so dung mangae posoposo! Ai tumorop situtu do anak ni na punjung, sian anak ni na marharajaan, ninna Jahowa.

54:2 Palambas ma hajongjongan ni undungundungmu, jala paherbang ma angka rimberimbe ni ingananmu. Unang orai! Paganjang ma angka talim jala pahot angka tiangmu.

54:3 Ai manerak ma ho tu siamun dohot tu hambirang, jala soluhon ni pinomparmu ma angka bangso parbegu, jala ingananna ma angka huta na tarulang.

54:4 Unang ho mabiar, ai ndang tagamon tarurak ho; unang ho maila, ai ndang tagamon mangirput ho. Ai * halupahononmu ma hailaon ni parnaposoonmu, jala ndang be paingotingotonmu haurahon ni habaluonmu.

54:5 Ai sitompa ho, i do * harajaanmi, Jahowa Zebaot do goarna jala na badia ni Israel do sipalua ho, targoar do ibana Debata ni liat portibi on.

54:6 Ai nunga diulahi Jahowa manjou ho, songon inaina na tinadingkon, jala na habot roha situtu; jala songon pardihuta * na binolongkon tagan poso dope, ninna Debatam.

54:7 Satakkarisap lelengna hutadingkon ho alai papungupunguonku do ho muse marhitehite angka asi ni roha godang!

54:8 Tagan di parpiar ni murukku hutabunihon bohingku satongkin maradophon ho, alai marhitehite denggan basa salelenglelengna asianku ho, ninna Jahowa sipalua ho.

54:9 Ai songon aek na sumar uju di ngolu ni si Noak do on di ahu: * Pola maruari ahu, na so tupa be boluson ni aek na sumar songon uju di ngolu ni si Noak tano on, suang songon i ahu nuaeng maruari: Na so tupa be rimasanku ho, manang asupanku ho.

54:10 Ai munsat pe angka dolok, jala humuntal angka robean, alai anggo asiasingku na so tupa munsat sian ho, jala * padan ni hadameonku na so tupa humordit, ninna Jahowa siasii ho.

54:11 Ho ale na parir, na pinaburuburu, na so tarapul, ida ma, peakkononku ma angka batum di bagasan ampang na arga, jala ojakkonongku ma ho marhitehite intan sapir.

54:12 Bahenonku ma angka bungkulanmu sian humala rubin, jala angka bahalmu sian mata intan humala, jala sandok parbalohanmu sian angka batu hasudungan ni roha.

54:13 Jala sude anakmu angka * na pinodaan ni Jahowa, jala * marhasonangan godang angka anakmu.

54:14 Ingkon marhite sian hatigoran do ho pahoton sogot; dao ma sian ho pangarupaon, ai ndang be adong habiaranmu, jala dao sian ho hasonggoton, ai ndang hajonohansa ho.

54:15 Ida ma, nang pe marluhutluhut nasida, ndada sian ahu; manang ise pe na martahi ho, sai paihutonna do ho muse.

54:16 Ida ma, ahu do na manompa tukang bosi, na mandusdus arang di bagasan api, jala na paruarhon sada sinjata bahen jadijadianna; ahu huhut manompa sipangago i laho mangago.

54:17 Nasa sinjata na jinadihon mangalo ho, ndang manjadi; jala nasa dila, na hehe mangalo ho di paruhuman ingkon toruanmu do. I do parjambaran ni angka naposo ni Jahowa, jala hatigorannasida sian ahu, ninna Jahowa.

Jesaya 55

55:1 O sude hamu angka na mauas, ro ma hamu tu aek on! Jala hamu angka na so marhepeng, ro ma hamu manuhor, mamonggoli dohot manganhon! Sai ro ma hamu manuhor anggur dohot susu, unang pola marhepeng manang marpanuhor.

55:2 Boasa tung mandasing hepeng hamu tu na so tau hangoluhononhon, jala na niomomuna tuhor ni na so tau pasonang hamu? Sai tangihon hamu ma ahu, asa panganonmuna na tabo i, jala bosuran rohamuna di tabotabo.

55:3 Tarehon hamu ma pinggolmuna, jala ro ma hamu tu ahu! Tangihon hamu ma, asa mangolu tondimuna i! Jadi bahenonku ma tu hamu * padan salelenglelengna: I ma * padan parasian na sintong i tu si Daud na so tupa muba.

55:4 Ida ma, sitindangi tu angka bangso ibana hulehon, bahen partogi dohot silehon patik tu angka bangso.

55:5 Ida ma, bangso na so tinandam hian ingkon jouonmu do, jala bangso na so tumanda ho ro manahopi ho ala ni Jahowa Debatam dohot ala ni na badia ni Israel, ai nunga marmulia ho dibahen.

55:6 Sai lulu i hamu ma Jahowa, binsan tarbahen dope jumpang ibana; jou hamu ma ibana, binsan jonok dope ibana.

55:7 Sai * ditadingkon halak parjahat i ma dalanna, jala jolma pargeduk i, angka sangkapna, sai mulak ma ibana tu Jahowa, asa marpangulahi rohana mida ibana; dohot tu Debatanta, ai * buas do rohana manalesei.

55:8 Ai ndada pingkiranku pingkiranmuna i, jala ndada dalanmuna angka dalanku, ninna Jahowa.

55:9 Ai songon timbo ni angka langit sian tano on, songon i do tumimbo angka dalanku sian dalanmuna i, jala angka * pingkiranku sian pingkiranmuna i.

55:10 Ai songon hadadabu ni udan dohot ambolas sian langit, jala ndada mulak boti tusi, nda jolo dibornohi tano i jala dipagabe, asa martumburi, jala dilehon boni tu halak panabur dohot roti tu halak na manganhon.

55:11 Ingkon songon i do hatangki na ruar sian pamanganku: Ndang mulak boti tu ahu, ingkon bahenonna do lomo ni rohangku, jala manjadi tu na hutongos.

55:12 Ai ingkon di bagasan * las ni roha hamu borhat, jala di bagasan hadameon hamu pataruon; pangiaron ni angka * dolok dohot robean soarana marolopolop di jolomuna, jala nasa hau di ladang martopaptopap tangan.

55:13 Singkat ni tadatada tubu ma sampinur, jala singkat ni latong tubu ma bunga na hushus; i ma bahen barita di goar ni Jahowa, bahen tanda salelenglelengna, na so olo hambar.

Jesaya 56

56:1 Songon on do hata ni Jahowa: Radoti hamu ma uhum, jala ulahon hamu hatigoran, ai jonok na ma asa ro hatuaonku, jala papataron hatigoranku.

56:2 Martua ma jolma na mangulahon songon i dohot anak ni jolma na marsihohot mangulahon sisongon i, na ingot di * ari Sabbat, asa unang diramuni, jala na mangaramoti tanganna unang diulahon manang aha na jat.

56:3 Jala ndang jadi dohonon ni * halak dagang, na marsilohot tu Jahowa: Nunga tung dipapulik Jahowa ahu sian bangsona, jala ndang jadi dohonon ni * halak na pinangkis: Ida ma, hau na masak do anggo ahu.

56:4 Ai songon on do hata ni Jahowa tu halak na pinangkis, angka na manjujur ari Sabbathu, jala dipillit lomo ni rohangku, jala marsihohot marningot padanhu:

56:5 Sai lehononku ma tu nasida di bagasan jorongku dohot di bagasan angka parikku sada parjambaran dohot goar na dumenggan sian goar ni angka anak dohot boru. Goar salelenglelengna lehononku tu nasida, na so tupa mago.

56:6 Jala * halak dagang, angka na marsilohot tu Jahowa, mangoloi ibana, dohot mangkaholongi goar ni Jahowa, jala mangido gabe naposona; ganup tahe na marningot ari Sabbat, unang diramuni, jala marsihohot marningot padanhu.

56:7 Sai na patolhasonku do nasida tu dolok habadiaonku, jala palasonku rohanasida di bagasan joro partangiangan tu Ahu. Halomohononku ma peleannasida situtungon dohot peleannasida sipotongon di atas langgatanku, ai targoar * bagas partangiangan do bagashu di saluhut angka bangso.

56:8 On do hata ni Tuhan Jahowa, na papungu angka naung marserak sian Israel: Papunguonku dope tu ibana halak na asing lobi sian angka naung pinapungu tu ibana.

56:9 Nasa binatang di ladang, dohot nasa binatang di tombak sai ro be ma hamu mangan!

56:10 Angka parjaganasida mapitung do sude, ndang marparbinotoan saluhutna; angka biang na mangungu do nasida na so malo mangorong; angka na mungkor marpeahan, angka na lomo roha modom.

56:11 Alai biang, angka na gogo mangoloi hisaphisapna na so habutongan do nasida. Hape nasida do angka parmahan angka na so umboto roha, masitondong dalanna be nasida saluhutna, * ganup mangihutihut pangomoanna na roa i.

56:12 Ninna do: Sai ro ma hamu buatonku ma anggur, asa itasobur, tuak na pang, ia songon i sadarion, laos songon i sadari marsogot, * gumodang situtu dope tahe.

Jesaya 57

57:1 * Mago do ia halak partigor i, hape ndang adong manang ise na marateatehon; jala lam marpungu angka jolma na daulat, hape ndang adong na dapotan roha binahen ni. Alai unang sanga diida ro hinamago umbahen * tarboan halak partigor i.

57:2 Bongot tu hasonangan, * maradian nasida di angka podomanna halak na marparangehon habonaronna.

57:3 Alai anggo hamu, angka anak ni boru parsibalik mata pajonok hamu tuson! Ho pinompar ni * pangalangkup dohot sibabijalang!

57:4 Mida ise hamu naeng mareles ni roha? Dompak ise ma pangangangonmuna pamanganmuna jala pahureonmuna dilamuna? Nda hamu do tubu ni pangalaosion, pinompar ni sibahen sipaotooto?

57:5 * Marsigorgor do hisaphisapmuna binahen ni ajiajian angka na * di toru ni nasa hau na rata; dipotongi hamu do angka anakmuna di bagasan angka rura, di bagasan jaringjing ni angka dolok batu.

57:6 Di lambung ni angka pasir ni sunge na saesae do parjambaranmu; i do tutu partalianmu; nunga pola diusehon ho di ajiajian tuak tangkasan, jala dipelehon ho tusi pelean sipanganon. Tung so marlulu ahu disi?

57:7 Dipadiri ho do podomanmu di atas dolok na timbo jala na hinsat; nunga pola manaek ho tusi mamotongi pelean sipotongon.

57:8 Jala di pudi ni pintu dohot tiangna dibahen ho parningotanmu, ai tundal sian ahu dipasalang ho dirim tu na asing; nunga pola manaek ho, dipalumbang ho podomanmu jala digoar ho hian gajim sian nasida; dihaholongi ho do podomannasida manatap pangkirapna.

57:9 Jala laho do ho manopot rajai mantat miak, jala dipagodang ho do miak na hushus; jala disuru ho do suruanmu tu na dao, pola tuat ho sahat ro di banuatoru.

57:10 Loja ma ho dibahen hinadeak ni dalanmu, ndang dung didok ho: Ngalutna i di ahu! Ala margogo dope tanganmu di hilala ho, umbahen so dihasahithon roham.

57:11 Alai tahe mida ise do ho biahaton, manang tahuton, sai margabusi do ho jala ndang diingot ho ahu, ndang mangilala roham? * Nda sai hohom do anggo ahu sian narobi dope? Alai ndang dihabiari ho ahu.

57:12 Ianggo ahu ingkon baritahononku do hatigoranmu dohot parulaonmu alai ndang adong labam sian i.

57:13 Molo angguhangguk ho, ajiajian angka na pinapungupungumi ma nian paluahon ho; hape luahonon ni alogo do sasudena, jala ombuson ni hosa do. Alai manang ise na marhaposan tu ahu, * teanonna do tano on, jala ibana nampuna dolok habadiaonku.

57:14 Jadi dohonon ni halak ma disi: Horsik i, horsik i, pahornop ma dalan i! Padao hamu ma partuktuhan sian dalan ni bangsongku.

57:15 Ai songon on * do hata ni na sun timbul dohot na sun marmulia, na marhabangsa salelenglelengna, jala ** pargoar na badia: Di banua ginjang dohot di habadiaon do ahu maringan, alai huhut di lambung ni halak * na magopu jala na serep martondi, asa pangoluhon tondi ni halak na serep marroha dohot pangoluhon halak parroha na magopu.

57:16 Ai * ndang ro di salelenglelengna ahu mambadai, jala ndang tongtong ahu mangarimasi! Atik tung mandate maon tondina sian jolongku dohot roha angka na hujadihon i.

57:17 Mida hajahaton ni pangomoanna do ahu marronirimas, jala hulinsingi nasida, martabuni ahu jala marmurukmuruk; alai atik pe songon i sai didatdati do mangihutihut dalan lomo ni rohana sandiri.

57:18 Nunga huida angka dalanna, alai pamalumonku ma ibana, jala ahu manogunogu ibana, jala maruli apulapul ibana bahenonku, ro di angka na mangkabothon ibana.

57:19 Ahu do na manompa parbue ni bibir angka na mamaritahon dame, dame di angka na dao dohot di angka na jonok, ninna Jahowa! Jala ahu pamalum nasida.

57:20 Alai anggo halak parjahat i songon laut na gunsang do, ai ndang tarbahen so; sai na disampakkon galumbangna do burta dohot rampokrampok.

57:21 Ndang marhasonangan ianggo halak parjahat i, ninna Debatangku.

Jesaya 58

58:1 Mangasa gogo ma ho joujou, unang paontok! Pangiar ma soaram songon sarune jala pabotohon tu * bangsongku pangalaosionnasida dohot tu pinompar ni si Jakkob dosanasida i.

58:2 Sai dilului nasida do ahu nian ariari, jala dihalomohon parbinotoan di angka dalanku, hira bangso na mangulahon hatigoran, jala na so dung tumadingkon uhum ni Debatana, lam dipangido nasida muse sian ahu angka * uhum hatigoran, jala dihalomohon hajojonok ni Debata.

58:3 Ninna do: Boasa tung marpuasa hami, hape ndang diida ho? Hupasipal hami dagingnami, hape ndang dipardulihon roham? Ida ma di ari parpuasaonmuna, apala disi ma disubut hamu rohamu, jala disosaksosak hamu do pangulamuna.

58:4 Ida ma, marpuasa pe hamu asa mambahen bada dohot parsalisian huhut mamastapi mangasahon gostong ni botohon. Unang datdati hamu marpuasa songon nuaeng, ai ndang tarbahen sahat soaramuna tu banua ginjang.

58:5 Tung * parpuasaon na tarhalomohon ahu ma i, sadari dionsit jolma i rohana, dipatungki uluna songon arung, marpeahan di hori dohot di sirabun? Tung parpuasaon ma i goaron, jala ari lomo ni roha ni Jahowa?

58:6 Nda on do parpuasaon na huhalomohon: Harhari angka ihotihot ni hajahaton, palua angka tali ni auga; jala palua halak na nirupa, jala ropuhi nasa auga?

58:7 Nda on do, molo * diponggoli ho rotim tu halak na male, jala ditogihon ho tu jabum halak na dangol dohot panangkarnangkar? Molo diida ho halak na marsaemara, gabe diabiti ho ibana, jala ndang martabuni ho maradophon sibukmu.

58:8 Jadi tompu ma * binsar hatiuronmu songon buha siang ari, jala hatop martumbur hahisaronmu, jala mardalan di jolom * hatigoranmu, hamuliaon ni Jahowa manimpuli sian pudim.

58:9 Dung i * joujou ma ho, jadi alusan ni Jahowa ma ho; molo angguhangguk ho, gabe dohononna ma: Ida ma, dison do ahu! Molo dipaholang ho sian tongatongam pangarupaon, tudutudu ni jarijari dohot pangkuling hajahaton.

58:10 Jala dilehon ho asi ni roham tu na male, jala dipasabam ho roha ni na dangol, jadi binsar ma hatiuronmu di bagasan haholomon, jala hagolaponmu tudoshon hos ni ari.

58:11 Jadi sai tongtong ma togutoguon ni Jahowa ho jala pasabamonna roham di angka inganan na rahar, jala papironna holiholim, gabe tudoshon * porlak na siniram do ho, jala songon mual, na so dung marsik.

58:12 Jadi paulion ni angka anakmu ma angka pasipasi sian narobi, patindangonmu ma angka ojahan marsundutsundut, jala goaron ni halak ma ho: Sipauli angka riga, sitotas angka dalan balobung asa hainganan.

58:13 Molo tung ditait ho patmu sian * ari Sabbat mangulahon lomo ni roham di ari habadiaonku, jala digoar ho ari Sabbat: Ari hasoloan, marmulia di angka jolma na badia ni Jahowa; jala dipasangap ho ibana, unang diulahon ho angka dalanmu, unang diihutihut ho lomo ni roham manang marhata rari.

58:14 Jadi marlas ni roha ma ho mida Jahowa, jala * ahu manogunogu ho di atas ni angka buntulbuntul ni tano on, jala parmudumuduonku ma ho marhitehite parjambaran ni Jakkob ompumuna i, ai pamangan ni Jahowa do mandok songon i.

Jesaya 59

59:1 Ida ma, ndada na hurang ganjang tangan ni Jahowa laho mangurupi hamu; jala ndada marhapal pinggolna, so marbinege.

59:2 Angka hajahatonmuna tahe sumirang hamu sian Debatamuna, jala angka dosamuna mangondingi bohina maradophon hamu, umbahen so ditangihon ibana hamu.

59:3 Ai * marsapu mudar do tanganmuna jala marsapu hajahaton jarijarimuna; bibirmuna; mangkatahon gabus, dilamuna mamingkiri hajungkaton.

59:4 Ndang adong nanggo sahalak na joujou di bagasan hatigoran, jala ndang adong na manguhum di bagasan hasintongan; ganup marhaposan tu na soada, jala dihatahon na so hasea; * marhangoluan hinamago nasida, gabe ditubuhon jea.

59:5 Pira ni ulok dari diporpori nasida, jala diganti * rambangrambang ni babibabi: Manang ise na mangan sian piranasida i ingkon mate do, alai ia dipuntari ruar do sada ulok dari.

59:6 Ndang hasea gantigantiannasida gabe ulos, jala ndang tarparulos jadijadiannasida i; jadijadian hajahaton do jadijadiannasida i jala uhum sigostang botohon di tangannasida i.

59:7 Marlojong patnasida i laho mangulahon hajahaton jala humalaput nasida mandurushon mudar na so marpipot; sangkap hajahaton do sangkap nasida i, partabanon dohot hamagoan di angka dalannasida i.

59:8 Ia dalan hadameon ndang ditanda nasida, jala ndang adong uhum hasintongan di angka dalannasida i; laos nasida palehulehu dalannasida i, manang ise na mardalan disi, ndang tagamon tandaonna hasonangan.

59:9 Dibahen i mandao do uhum sian hita, jala ndang tolhas tu hita hatigoran. Sai maimaima hita di hatiuron, hape ida ma, tong do haholomon; maimaima di hatorangan, hape sai di bagasan hagolapon hita mardalan.

59:10 Sai dadapdadap hita tu dorpi songon halak na mapitung, jala jamajama hita songon halak na so marmata. Sai martuktuhan hita di hos ni ari, songon di rambon ni ari; di angka jampalan na lomak hita songon halak na mate.

59:11 Patungoromon do hita sude, songon angka gompul, jala sai * margogokgogok songon darapati; sai maimaima hita di uhum hasintongan, hape ndang adong; maimaima di hatuaon, hape sai mandao do i sian hita.

59:12 Ai godang do pangalaosionnami di jolom, jala dosanami manindangi dompak hami; ai sai ngongom do pangalaosionnami, jala hutanda hami do hajahatonnami.

59:13 Marbalik jala mangose do hami dompak Jahowa, jala nunga hutundali hami Debatanami, mangkatahon pangarupaon dohot panundalion, manubunubui hata gabus sian rohanami.

59:14 Dibahen i nunga manginsurut tu pudi uhum hasintongan jala jongjong mandaodao ia hatigoran, ai tartuktuk di partungkoan do hasintongan, jala ndang tarbahen ro jumonok habonaron.

59:15 Jadi lam pesan hasintongan, jala manang ise na manginsurut sian hajahaton hona pupus do. Diida Jahowa ma i, jadi rupi ma panailina, ala soada be uhum hasintongan.

59:16 Diida ibana huhut ndang adong nanggo sada jolma, gabe longang rohana ala soada na mangondihon. Jadi tanganna sandiri manumpahi ibana monang, jala hatigoranna manungkol ibana.

59:17 Jala diparulos hatigoran, songon baju partahanan, jala talitali hatuaon di atas uluna, jala diparulos angka ulos partubolan, jala diparsampesampe hamuruhon songon mandar.

59:18 Marguru sian angka pambahenan ibana mamaloshon sogot: Harimason tu angka alona pamalosan tu angka musuna, sai gararonna do pamaloson tu angka pulo.

59:19 Asa dihabiari halak goar ni Jahowa sian hasundutan dohot hamuliaonna sian habinsaran, ai na ro ma musu i songon aek na mangalantap, na siniaphon ni Tondi ni Jahowa.

59:20 Dung i ro ma tu Sion sada sipalua dohot tu halak na mulak sian hajahaton di Jakkob, ninna Jahowa.

59:21 Ianggo ahu, on do padanhu tu nasida, ninna Jahowa: Tondingki na songgop tu ho dohot * hatangki angka naung hupampe tu bagasan pamanganmu, tung na so tupa do morot sian pamanganmu, manang sian pamangan ni pinomparmu, manang sian pamangan ni pinompar ni pinomparmu, ninna Jahowa, olat ni on ro di salelenglelengna.

Jesaya 60

60:1 Hehe ma ho! Marsinondang ma ho! Ai na ro ma panondangmu, jala hamuliaon ni Jahowa binsar di atasmu.

60:2 Ai ida ma, haholomon do manghungkupi tano on, jala hagolapon angka bangso; alai na binsar ne ma Jahowa di atasmu, jala marsinondang hamuliaonna di atasmu.

60:3 Jadi dapothonon ni angka bangso parbegu ma panondangmu dohot angka raja mandapothon sinondang naung binsar di ho. ᯐᯑᯪ ᯑᯇᯖᯬ᯲ᯂᯬᯉᯉᯬ᯲ ᯉᯪ ᯀᯰᯂ ᯅᯰᯘᯬ ᯇᯒ᯲ᯅᯩᯎᯮ ᯔ ᯇᯉᯉᯬ᯲ᯑᯰᯔᯮ ᯑᯬᯂᯖᯬ᯲ ᯀᯰᯂ ᯒᯐ ᯔᯉ᯲ᯑᯇᯖᯬ᯲ᯂᯉᯬ᯲ ᯘᯪᯉᯉᯬ᯲ᯑᯰ ᯉᯀᯰᯮ ᯅᯉᯪ᯲ᯘᯒ᯲ ᯑᯪ ᯂᯬ

60:4 Patonggor matam mamereng humaliang! Luhut ma nasida marrongoman ro mandapothon ho. Angka anakmu ro sian na dao, dohot angka borum abingabingonna.

60:5 Ia dung diida ho nasida marroan sihar ma panailim, jala hinsa jala lumbang roham hilalaonmu, ai turun ma tu ho hamoraon ni laut dohot hinagok ni angka parbegu ro tu ho.

60:6 Tutupon ni angka parduaan ni unto ma tanom, angka hoda parhuli sian Midian dohot Epah, saluhut nasida ro sian * Seba, mangusung sere dohot daupa, jala angka pujipujian ni Jahowa baritahononnasida.

60:7 Saluhut dorbia sian Kedar marpungu tu ho, angka birubiru tunggal sian Nabaiot mangoloi ho; manaek nasida tu langgatanku bahen pelean lomo ni roha, jala marmulia bahenonku joro ni hamuliaonku.

60:8 Ise do angka nasida, na ro marhulalan songon ombun, jala songon darapati, angka na manahopi pintu ni asarna.

60:9 Ai mangkalungunhon ahu do angka pulo, angka parau Tarsis apala parjolo naeng mamboan angka anakmu sian na dao, rap dohot perak dohot serenasida di goar ni Jahowa Debatam dohot di na badia ni Israel, ai nunga marmulia ho dibahen.

60:10 Jadi ingkon paulion ni halak sileban muse angka parikmu, jala angka rajanasida marhaladoi ho; ai * di bagasan rimashu do ho hulinsingi na sai laon, jala di bagasan talup ni rohangku nunga huasi i ho nuaeng.

60:11 Jadi tongtong ma talak angka bahalmu, arian dohot borngin ndang jadi hinsuon, asa tarboan tu ho parangan ni angka bangso parbegu, jala ditogutogu angka rajanasida.

60:12 Ai bangso manang harajaon na so mangoloi ho, ingkon mago do, jala angka bangso parbegu ingkon siap situtu do.

60:13 * Hatongamon ni Libanon pe, pinasa, maranti dohot sampinur rap ro manopot ho pajagarhon habadiaonku dohot ojahan ni pathu marmulia bahenonku.

60:14 Ro do huhut tu ho sombasomba * angka anak ni halak na pasipal ho na jolo, jala marsomba tu palak ni patmu sude angka na mangelesi ho, jala goaronna ho: Huta ni Jahowa, Sion ni na badia ni Israel.

60:15 Ali ni na tinadingkon jala na hinosom ho na sai laon, pola dipasiding halak pamolus ho, bahenonku ma ho gabe hamuliaon salelenglelengna, gabe las ni roha marsundutsundut.

60:16 Onsoponmu ma disi susu ni angka parbegu jala * jolma ni angka raja gabe panusuanmu; jadi tandaonmu ma, ahu do Jahowa * sipalua dohot siuluhon ho; ulubalang ni Jakkob.

60:17 Singkat ni tombaga boanonku ma sere, jala singkat ni bosi boanonku ma perak, jala singkat ni angka hau tombaga, jala singkat ni angka batu bosi, jala bahenonku ma angka partogim gok * hadameon jala hatigoran gabe pangondianmu.

60:18 Ndang be tarbege uhum sigostang botohon di tanom, manang partabanon dohot hamagoan di parbalohanmu, ingkon goaranmu ma * angka parikmu: Hatuaon jala angka bahalmu pujipujian.

60:19 Ndang be adong di ho * mata ni ari bahen panondang arian, jala ndang be manondangi di ho rondang ni bulan, Jahowa na ma gabe panondangmu salelenglelengna, jala Debatam gabe hamuliaonmu.

60:20 Ndang be sundut mata ni arim, manang surut ia bulanmu; ai Jahowa gabe panondangmu salelenglelengna, jala nunga salpu angka ari parniahapanmu.

60:21 Ia bangsom, saluhut do nasida gabe halak partigor, ro di saleleng ni lelengna do teanonnasida tano on, nasida do tumbur ni naung ahu sandiri manuan, * jadijadian ni tanganku bahen pujipujian di ahu.

60:22 Na ummetmet i gabe saribu, jala na so piga gabe bangso na bolon. Ahu Jahowa mambahensa gira di tingkina i.

Jesaya 61

61:1 Songgop do tu ahu tondi ni Tuhan Jahowa, ala naung miniahan ni Jahowa ahu mamaritahon barita na uli tu halak na dangol, marsuru ahu pauliuli halak parroha na bojok, maningtingkon haluaon tu halak na tarhurung dohot tu halak na tarrante buha ni hurungan.

61:2 Maningtingkon * taon parasinirohaon sian Jahowa, dohot ari partubolan ni Debatanta * mangapuli saluhut halak na marsak roha.

61:3 Laho pahinsahon roha ni halak na marsak di Sion, mangalehon tu nasida tumpal singkat ni sirabun, miak las ni roha singkat ni arsak ni roha, ulos na marhadohoan singkat ni tondi na tahuton, gabe targoar nasida: Hariara hatigoran, suansuanan bahen pujipujian di Jahowa.

61:4 Jadi nasida ma paulihon angka naung leleng tarulang, angka naung tartaban di na robi, nasida muse pajongjongkon dohot paimbaruhon huta na tartaban, angka naung tarulang marsundutsundut.

61:5 Jadi halak ruar jongjong marmahan dorbiamuna, jala angka anak ni halak sileban pangulamuna dohot tukang porlak anggurmuna.

61:6 Alai anggo hamu targoar * angka malim ni Jahowa, parhalado ni Debatanta dohononna tu hamu. Sinamot ni angka bangso parbegu panganonmuna, jala hasangaponnasida do soluhonmuna.

61:7 Singkat ni haurahonmuna na sai laon, jaloonmu silompit, jala ali ni haeleson marolopolop nasida di partaliannasida. Dibahen i silompit do teanonnasida di tanonasida i! Ingkon maruli las ni roha salelenglelengna di nasida.

61:8 Ai ahu do Jahowa, na holong roha di hatigoran, alai na magigi mida tabantaban pangarupaon; sai lehononku do upanasida di bagasan hasintongan, jala pahotonku tu nasida * padan salelenglelengna.

61:9 Jala tarbarita di angka bangso parbegu pinomparnasida i, jala anaknasida di tongatonga ni angka bangso. Sude halak na marnida nasida tandaonna ma, nasida do pinompar ni na pinasupasu ni Jahowa.

61:10 Marlas ni roha situtu do ahu di bagasan Jahowa, marolopolop do tondingku di bagasan Debatangku; ai nunga disolukkon tu ahu * angka ulos hatuaon, baju hatigoran dihohoshon tu ahu, songon pangoli, na marbulangbulang mangaradoti hamalimon jala songon oroan naung hinohosan.

61:11 Ai songon tano na manubuhon suansuanan, jala songon porlak na pasimbur tubu boni na sinaburhon tusi ingkon songon i do patubuon ni Jahowa hatigoran dohot pujipujian di adopan ni sandok angka parbegu.

Jesaya 62

62:1 Ala ni Sion ndang tarbahen ahu sip, jala ala ni Jerusalem ndang olo ahu pompoman, paima binsar hatigoranna songon sondang ni mata ni ari, jala hatuaonna songon sulusulu na marsigorgor.

62:2 Jadi idaon ni angka bangso parbegu ma hatigoranmu, jala saluhut angka raja hamuliaonmu, jala ingkon margoarhon * goar na imbaru ho, sipaboaon ni pamangan ni Jahowa.

62:3 Jadi gabe tumpal hamuliaon ma ho di tangan ni Jahowa, jala tumpal harajaon di tangan ni Debatam.

62:4 Ndang be goaron ni halak ho: * Na tinadingkon, jala ndang be dohononna tu tanom: Halongonan; ai goaronna ma ho: Hasoloan ni rohangku do ibana, jala tanomi: Naung marharajaan do ho! Ai * lomo do roha ni Jahowa mida do, jala marharajaan tanomi.

62:5 Ai songon ringkot ni dolidoli mangaririt namarbaju, songon i do ringkot ni angka anakmu mangalului ho; jala songon las ni roha ni pangoli mida na niolina, songon i do las ni roha ni Debatam mida ho.

62:6 Nunga hudokkon tu atas parikmu, ale Jerusalem, angka parjaga manipat ari manipat borngin, tongtong ndang olo sip nasida. Hamu ale angka na pasingothon Sion tu Jahowa, unang tung marpansadian hamu.

62:7 Ibana pe, unang tung marpansadian laos hamu, paima dipahot Jerusalem jala dibahen marbarita di tano on.

62:8 Nunga pola maruari Jahowa tu siamunna dohot tu tangan ni hagogoonna: Na so tupa be lehononku emem panganon ni angka musum, jala na so tupa be inumon ni halak sileban tuak anggurmu, naung hinangaluthonmu.

62:9 Ingkon laos halak na papungupunguhon manganhon eme i, huhut mamuji Jahowa, jala laos halak na manjantarhon manginum tuak anggur i di angka alaman ni habadiaonku.

62:10 Ruar ma hamu, ruar ma hamu sian angka harbangan! Sai pahornop hamu dalan di bangso i! * Palentes, palentes hamu dalan balobung i, paduru hamu angka batu, patindang hamu ma partonggol di tongatonga ni angka bangso.

62:11 Ida ma, nunga pola martingting Jahowa ro di ujung ni tano on: * Paboa hamu ma tu boru Sion: Ida ma, nunga ro hatuaonmi! Ida ma, ihut tu ibana do * upana, jala pamaloshonna di jolona.

62:12 Jadi goaron ni halak ma nasida: Bangso na badia, * angka na pinalua ni Jahowa; jala ho targoar na hinaholongan, huta na so sitadingkononhon be.

Jesaya 63

63:1 Ise do ibana na ro sian * Edom, na ro marulos na rara sian Bosra? ** Na marpangkean na marhadohoan, jala na mangalangka di hinagodang ni gogona? Ahu do i * sihatahon hatigoran jala na margogo mangalehon tua.

63:2 Boasa tung marrara pangkeanmu, songon abit ni halak na mardege parbue ni anggur di bagasan pangilangan.

63:3 Sasada ahu do dumege pangilangan i, jala sian angka bangso ndang adong manang ise donganku! Jala nunga huluntak nasida di bagasan rimashu, jala nunga hugopui nasida di parpiar ni murukku, pola marbirsak mudarnasida tu angka uloshu, gabe sap saluhut abithu.

63:4 Ai nunga dipingkir rohangku hian ari partubolan, jala nunga jumpang taon haluaon di angka naung huhophop.

63:5 Jadi sai mangaranapi ahu humaliang, hape ndang adong nanggo sahalak na paluahon; jala tarhalomong ahu, hape ndang adong na tau donganku. Jadi tanganku sandiri nama patupahon hamonangan di ahu, jala parpiar ni murukku i ma mandongani ahu.

63:6 Dibahen i nunga hugopui angka bangso di bagasan rimashu, jala * mabuk nasida hubahen di bagasan parpiar ni murukku, jala hudurushon tu tano mudarnasida i.

63:7 Sai baritahononku do angka denggan basa ni Jahowa, angka pujipujian ni Jahowa, ai ido na tama marningot sude na binahen ni Jahowa tu hita, dohot ala ni godang ni denggan basana tu pinompar ni Israel, na binahenna tu nasida hombar tu angka asi ni rohana dohot tu godang ni denggan ni basana.

63:8 Ai ninna do: Tongon do, bangsongku do nasida, * anak angka na so olo paotootohon. Jadi dung songon i ibana ma sipalua nasida.

63:9 Di nasa hagogotannasida, dohot ibana targogot, jala * suruan ni bohina i paluahon nasida; sian holong ni rohana dohot sian pangolanina ibana paluahon nasida, jala dihindat nasida, jala * diompa ganup ari, sian na robi dope.

63:10 Alai manggunturi do anggo nasida, jala diarsahi Tondina na badia i; dibahen i marbalik ibana gabe musunasida, jala ibana sandiri marporang dompak nasida.

63:11 Alai sai tongtong do anggo ibana marningot di bangsona uju di ngolu ni si Musa di angka ari na robi, alai anggo naung didok nasida: Didia do ibana naung mamboan nasida, nangkok sian * laut rap dohot parmahan ni parduaan ni birubiruna? Didia ibana na * marsagihon Tondina na badia i tu tongatonganasida?

63:12 Ise ibana na manogu si Musa marhite sian tangan hamuliaonna naung patolak aek di jolonasida laho mambahen baritana salelenglelengna.

63:13 Ibana na manogu nasida mamolus angka pusat, songon hoda di adaran, ndang dung tartuktuk?

63:14 Songon pinahan na tuat tu rura, ditogihon Tondi ni Jahowa nasida tu hasonangan; songon i pe ditogihon ho bangsom asa mambahen goarmu marmulia.

63:15 Sai * tatap ma sian banuaginjang, jala ida sian ingananmu na badia, jala na marmulia! Didia do nuaeng hamuruhonmu dohot hagogoonmu? Parsigorgor ni holong dohot asi ni roham? Sai mandao sian ahu.

63:16 Ai sai ho do * amanami, ai ndang ditanda ianggo si Abraham hami, jala ndang dipabotoboto si Israel hami. Ho do ale Jahowa amanami; sipalua hami do goarmu sian nahinan.

63:17 Boasa tung diloas ho hami lilu sian angka dalanmu, ale Jahowa? Boasa tung dipatangkang ho rohanami, unang huhabiari hami ho? Sai marpangulahi ma roham ala ni naposom tu angka marga ni parjambaranmu.

63:18 Satongkin sambing bangsom na badia i manean habadiaonmi, anggo nuaeng nunga diluntakluntak alonami.

63:19 Nunga hami songon halak na so dung ginomgomanmu sian na robi, na so dung marpanggoarhon goarmu.

Jesaya 64

64:1 Aut ni haru diribahi ho angka langit i jala tuat ho, asa malala angka dolok maradophon ho! Songon pangalammauashon ni api di arsam, jala panggurguri ni api di aek laho pabotohon goarmu tu angka alom, asa angka hitir angka bangso parbegu maradophon ho.

64:2 Mida halongangan angka na binahenmi, angka na so hinirimhirim ni rohanami tuat ho gabe malala angka dolok maradophon ho.

64:3 Na so dung binege ni halak sian na robi, manang tarbortik, manang diida mata adong Debata, dungkon ni ho, na mambahen halongangan tu angka na marhaposan di ibana.

64:4 Ditomutomu ho do halak na hilas roha mambahen hatigoran, angka na paingotingot ho di angka dalanmu. Ida ma, nunga tutu tarrimas ho ala na mardosa hami, jala mansai leleng hami di bagasan angka dosa i; alai aut ni dipalua hami nian anggo nuaeng!

64:5 Jala doshon halak na ramun do hami sude, jala songon ulos na marsapu darodaro sude hatigorannami. Dibahen i malos do hami sude songon bulung, jala diluahon hajahatonnami do hami songon na niluahon ni alogo.

64:6 Jala ndang adong nanggo sahalak na pajoujou goarmu, manang hehe marsitiopan tu ho, ala ni nunga ditabunihon ho bohim maradophon hami, jala malampot ateatenami ala ni hajahatonnami.

64:7 Alai nuaeng ale Jahowa. Ho do * amanami! * Tano do ianggo hami, jala ho do sitompa hami, jala jadijadian ni tanganmu do hami sudena.

64:8 Sai unang ma marimashu ho, ale Jahowa, jala unang tongtong paingotingot hajahatonnami! Ua ida jala tatap hami, ai bangsom do hami sude!

64:9 Nunga pola gabe halongonan angka huta ni habadiaonmu, Sion pe, gabe halongonan do jala tarulang ia Jerusalem.

64:10 Joro habadiaonnami dohot hamuliaonnami, inganan pamujimujian ni ompunami di ho, gabe parturanggongan, jala saluhut hasudungan ni rohanami nunga gabe halongonan.

64:11 Tung hatiopan ho ma ateatem disi ale Jahowa? Tung laos hasiphononmu ma i asa pajimputhon hami situtu?

Jesaya 65

65:1 * Angka na so usouso di ahu na sai laon i do mangalului ahu nuaeng, jala halak na so mangalului ahu na sai laon nunga jumpangsa ahu. Ningku do tu bangso, na so pajoujou goarhu na sai laon: Dison do ahu, dison do ahu.

65:2 Sai * hupaherbang do tanganku duansa manipat ari tu bangso na jungking, angka na mandalani dalan na so denggan, mangihuthon * pingkiran lomo ni rohanasida sandiri.

65:3 Tu bangso na tongtong pahehe rimashu di adopanku, angka na mamele di bagasan angka porlak, jala manutung daupa di atas ni angka batu na minasak.

65:4 Angka na hundul di angka parbandaan, jala marmalam di angka liang; angka na manganhon * juhut babi, jala marisi huahua habiason angka saoannasida i.

65:5 Lam didok nasida dope: Disi ma ho, unang jumonok ho tu ahu, ai na badia do ahu martimbangkon ho. Ingkon gabe timus di bagasan igungku do angka nasida, jala gabe api na marsigorgor manipat ari.

65:6 Ida ma, tarsurat do di jolongku: Ndang tagamon sip ahu nda jolo hubaloshon, sai baloshononku do tutu tu ampuannasida.

65:7 Hajahatonmuna sandiri rap dohot hajahaton ni angka ompumuna, ninna Jahowa, angka na manutung daupa di punsu ni angka dolok, jala direhei ahu di atas ni angka robean; dibahen i suhathononku ma upa ni pambahenannasida na jolo tu ampuannasida i.

65:8 Songon on do hata ni Jahowa: Songon tuak nambura binuat jumpang di taguk na baso, gabe didok: Unang ago, ai adong do pasupasu di bagasanna! Suang songon i bahenonku * ala ni angka naposongku, * nda tung saluhut nasida agoonku.

65:9 Jala ahu parohon sian Jakkob boni, jala sian Juda sahalak sitean angka dolokku, ai ingkon jolma na hupillit i manean tano i jala angka naposongku maringanan disi.

65:10 Ia Saron ingkon gabe panjampalan ni birubiru, jala rura * Akor gabe parudaman ni angka lombu di bangsongku, na mangalului ahu.

65:11 Alai anggo hamu, angka na tumadingkon Jahowa, angka na mangkalupahon dolokku na badia i angka na padiri di sorigabe sada meja, jala diusehon tuak tangkasi tu sorimago.

65:12 Ida ma, ahu sandiri pasahathon hamu panganon ni podang, gabe marsinggang ma hamu sude tu pamotongan, ala * joujou ahu, hape ndang mangalusi anggo hamu, mangkuling ahu hape ndang ditangihon hamu, jala diulahon hamu do sogo ni rohangku, jala na so huhalomohon dipillit hamu.

65:13 Dibahen i songon on do hata ni Tuhan Jahowa: Ida ma, mangan do sogot anggo angka naposongku, alai anggo hamu anturaparon do: Ida ma, * minum do sogot anggo angka naposongku, alai anggo hamu uasan do; ida ma, marlas ni roha do sogot anggo angka naposongku, alai anggo hamu ingkon tarurak do.

65:14 Ida ma, marolopolop sogot anggo angka naposongku sian sonang ni rohana, alai anggo hamu mangangguhi do binahen ni gondok ni roha, jala maroinang hamu sian jepol ni roha.

65:15 Jala tadingkononmuna goarmuna * bahen panolonan sipatondit di halak na hupillit. Alai bunuon ni Tuhan Jahowa ma anggo ho, jala * margoar na imbaru bahenonna angka naposona.

65:16 Asa manang ise na mamasumasu dirina di tano on, pasupasuonna ma dirina marhitehite Debata sihaposan jala manang ise na marmangmang di tano on, marmangmang tu * Debata sihaposan ai nunga lupa sian roha angka hagogotan na jolo, jala nunga buni tutu sian matangku.

65:17 Ai ida ma, ahu ma manompa langit na imbaru dohot tano na imbaru, jala ndang be ingoton angka na parjolo i manang tarsunggul tu roha.

65:18 Ingkon marlas ni roha ma hamu jala marolopolop ro di salelenglelengna ala ahu manompa angka i! Ai ida ma, ahu manompa Jerusalem bahen parolopolopon, jala bangso isina i bahen las ni roha.

65:19 Ahu sandiri pe marolopolop do mida Jerusalem, jala marlas ni roha ahu mida bangsongku, jala * ndang be tarbege disi soara partangison manang soara angguhangguk.

65:20 Ndang adong be disi posoposo siotik ari, manang na ubanon na so gok ariarina; ai dolidoli dope na marumur saratus taon laho mate, jala pardosa sisaratus taon hona bura.

65:21 Jala paulionnasida ma angka bagas, laos inganannasida, suanonnasida ma hau anggur jala panganonnasida parbuena.

65:22 Ndang tagamon nasida * paulihon bagas, gabe halak na asing mangingani, ndang tagamon nasida manuan, gabe halak na asing manganhon; ai songon ariari ni hau, songon i do ariari ni bangsongku, jala jadijadian ni tangannasida ingkon halak na hupillit marsaulihonsa.

65:23 Ndang tagamon loja so marniula nasida, manang manubuhon anak, asa tilahahononna tibu, ai pinompar ni na pinasupasu ni Jahowa do nasida ro di tubunasida i.

65:24 Jala masa huhut: Tagan so manjou dope nasida, nunga mangalusi ahu, mangkatai dope nasida, nunga manangihon ahu.

65:25 * Gompul dohot anak ni birubiru marsaroha manjampal, jala singa manggagat panabian songon lombu, jala ulok na mangkangoluhon orbuk, ndang be manjahati manang mangago di sandok dolokku na badia i ninna Jahowa.

Jesaya 66

66:1 Songon on do hata ni Jahowa: * Angka langit do habangsangku jala tano on sidegedegean ni pathu. Tung songon dia ma joro, na naeng paulionmuna di ahu? Manang inganan bahen pangulonanku?

66:2 Nda jadijadian ni tanganku sandiri do angka on sasudena, uju na hujadihon sasudena i, ninna Jahowa. Alai huhut do ahu * marpanatap tu halak na dangol, jala na

66:3 Manang ise na mamotong sada jonggi, * doshon sibunu baoa do ibana disi; manang ise na mamelehon birubiru, doshon halak na mamonggolhon rungkung ni biang ibana disi; manang ise na mamelehon pelean sipanganon, doshon na mamelehon mudar ni babi ibana disi; manang ise na manutung daupa, doshon na mamuji ganaganaan ibana disi. Masitondong dalan lomo ni rohana be do nasida, jala dihalomohon rohanasida do pambahenannasida na sogir i.

ᯔᯉᯰ ᯤᯘᯩ ᯉ ᯔᯔᯬᯖᯰᯬ ᯘᯑ ᯐᯰᯬᯎᯪ, ᯑᯘᯬ᯲ᯂᯉᯬ᯲ ᯘᯪᯅᯮᯉᯮ ᯅᯀᯬᯀ ᯑᯬ ᯤᯅᯉ ᯑᯪᯘᯪ; ᯔᯉᯰ ᯤᯘᯩ ᯉ ᯔᯔᯩᯞᯩᯂᯉᯬ᯲ ᯅᯪᯒᯮᯅᯪᯒᯮ, ᯑᯘᯬ᯲ᯂᯉᯬ᯲ ᯂᯞᯂ᯲ ᯉ ᯔᯔᯰᯬᯎᯞᯬ᯲ᯂᯉᯬ᯲ ᯒᯮᯰᯂᯮᯰ ᯉᯪ ᯅᯪᯀᯰ ᯤᯅᯉ ᯑᯪᯘᯪ; ᯔᯉᯰ ᯤᯘᯩ ᯉ ᯔᯔᯩᯞᯩᯂᯉᯬ᯲ ᯇᯩᯞᯩᯀᯉ᯲ ᯘᯪᯇᯝᯉᯉᯬ᯲, ᯑᯘᯬ᯲ᯂᯉᯬ᯲ ᯉ ᯔᯔᯩᯞᯩᯂᯉᯬ᯲ ᯔᯮᯑᯒ᯲ ᯉᯪ ᯅᯅᯪ ᯤᯅᯉ ᯑᯪᯘᯪ; ᯔᯉᯰ ᯤᯘᯩ ᯉ ᯔᯉᯮᯖᯮᯰ ᯑᯥᯇ, ᯑᯘᯬ᯲ᯂᯉᯬ᯲ ᯉ ᯔᯔᯮᯐᯪ ᯎᯉᯎᯉᯀᯉ᯲ ᯤᯅᯉ ᯑᯪᯘᯪ. ᯔᯘᯪᯖᯉᯬ᯲ᯑᯰᯬ ᯑᯞᯉ᯲ ᯞᯬᯔᯬ ᯉᯪ ᯒᯬᯂᯉ ᯅᯩ ᯑᯬ ᯉᯘᯪᯑ, ᯐᯞ ᯑᯪᯂᯞᯬᯔᯬᯂᯉᯬ᯲ ᯒᯬᯂᯉᯘᯪᯑ ᯑᯬ ᯇᯔ᯲ᯅᯂᯩᯉᯉ᯲ᯉᯘᯪᯑ ᯉ ᯘᯬᯎᯒᯪ᯲ ᯤ.

66:4 Ahu pe antong pillitonku ma hinamagonasida, jala paroonku tu nasida hinabiaran ni rohanasida i, ala * joujou ahu, hape ndang adong na mangalusi; mandok soara ahu, hape ndang ditangihon nasida, lam dibahen nasida do na jat di jolongku, jala dipillit nasida do na so lomo ni rohangku.

66:5 Tangihon ma hata ni Jahowa, hamu ale angka na manonditnondit mida hatana! Didok angka hahaanggimuna, angka na mangkosom hamu, angka na * pabali hamu ala ni goarhu: Marmulia ma nian Jahowa, asa huida hami las ni rohamuna i! Hape sai tarurak do nasida sogot.

66:6 Tarbege do soara hagunturon sian huta, soara toletole sian bagas joro, soara ni Jahowa, na mamaloshon pambahenan tu angka musuna.

66:7 Tagan so diae dope posoposo, nunga ditubuhon anak; tagan so ro dope rianna, nunga ditubuhon baoa.

66:8 Tung ise ma dung umbege songon i? Tung ise ma dung marnida sisongon i? Tung tarbahen ma marparbue sada luat di bagasan sadari, manang tarbahen tubu sada bangso di na satongkin, ai anggo Sion i, ipe mangae pintor manubuhon angka anakna huhut.

66:9 Tung manggabei ma ahu di halak na asing, hape ndang manubuhon anggo ahu sandiri? Ninna Jahowa. Tung patut ma ahu, manumpak halak maranak, hape ia ahu sandiri tinggal punjung? Ninna Debatam.

66:10 * Marlas ni roha ma hamu rap dohot Jerusalem, jala marolopolop mida ibana sude hamu ale angka na holong roha di ibana! Marlas ni roha situtu ma rap dohot ibana sude hamu ale angka na marsak roha mida ibana na sai laon!

66:11 Asa * manusu hamu, jala mahapan sian bagot ni angka apulapulna i; asa marsobur hamu, jala marsabam ni roha sian hinagodang ni hamuliaonna i.

66:12 Ai songon on do hata ni Jahowa: Ida ma, ahu patongonhon tu ibana hadameon, songon batang aek godangna, jala songon sunge na sirnip hamuliaon ni angka bangso parbegu, asa manusu hamu; ingkon abingabingonna hamu jala didengdidengonna hamu diampuanna.

66:13 Songon baoa, na niapul ni inana, songon i do ahu mangapuli hamu, tongon tahe di bagasan Jerusalem do hamu tarapul sogot.

66:14 Jala ia dung diida hamu songon i gabe las ma rohamuna, jala martumbur holiholimuna songon ingkau rata, gabe patar tartanda tangan ni Jahowa tu angka naposona, jala rimasna tu angka musuna.

66:15 Ai ida ma, na ro do sogot Jahowa marhite sian api, jala tudoshon habahaba poting baliung angka huretana i, asa marlulu ibana di bagasan parpiar ni rimasna jala pangasupina di bagasan api na marjillamjillam.

66:16 Ai marhitehite api dohot marhitehite podangna Jahowa manguhum sogot sandok sibuk, jadi torop ma angka na binunu ni Jahowa.

66:17 I ma halak angka na pabadiahon dohot angka na manguras dirina di bagasan angka porlak sombaon mangihuthon sada malim diparsitongaanna halak * angka sipangan juhut babi, hagigion marragamragam dohot monsi, rap siap do nasida, ninna Jahowa.

66:18 Alai anggo ahu, sai ro do maningkir jadijadian dohot sangkapnasida i, laho papunguhon nasa bangso parbegu dohot dila, gabe ro nasida, jala idaonna hamuliaonku.

66:19 Jala patindangonku di nasida sada tanda parasian jala paborhatonku sian nasida angka naung malua tu angka bangso parbegu: Tu Tarsis, Pul dohot tu Lud halak sisintak sior, tu Tubal dohot Javan, tu pulopulo angka na holang, angka na so dung umbege baritangku, jala na so dung marnida hamuliaonku, gabe baritahononnasida ma hamuliaonku di tongatonga ni angka bangso parbegu.

66:20 Jadi nasida ma manogihon nasa hahaanggimuna sian saluhut angka bangso parbegu, gabe pelean tu Jahowa, marsihundul di angka hoda, hureta, ruarua, halode dohot unto sahat tu dolok habadiaonku, tu Jerusalem, ninna Jahowa, suang songon na binoan ni angka halak Israel pelean sipanganon di bagasan ulaula na badia, tu bagasan joro ni Jahowa.

66:21 Jadi dohot sian nasida pabangkitonku deba bahen malim, bahen halak Lepi, ninna Jahowa.

66:22 Ai songon angka * langit na imbaru dohot tano na imbaru, sibahenonku, angka na hot tongtong jongjong di jolongku, ninna Jahowa, suang songon i jongjong pinomparmuna dohot goarmuna.

66:23 Jadi masa ma: Sian poltak ni bulan tu poltak ni bulan, jala sian ari Sabbat tu ari Sabbat ro ma tongtong nasa manisia marsomba tu adopan ni bohingku, ninna Jahowa.

66:24 Jadi ruar ma nasida, gabe paidaidaonnasida ma angka bangke ni halak angka na manjahati dompak ahu; ai * ndang tagamon mate tungkolnasida, jala ndang tagamon mintop apinasida i, gabe hagigian nasida di nasa manisia.