Jump to content

Buku Job

Sian Wikipedia

Job ᯐᯅᯬ᯲ 1[patota | patota mualna]

1:1 Adong do na jolo di tano * Us, sada baoa, na margoar ** si Job; na * daulat jala na burju do roha ni baoa i jala mabiar mida Debata, jala dipadao rohana sian hajahaton. ᯀᯑᯰᯬ ᯑᯬ ᯉ ᯐᯬᯞᯬ ᯑᯪ ᯖᯉᯬ ᯀᯘᯮ᯲ ᯘᯑ ᯅᯀᯬᯀ ᯉ ᯔᯒ᯲ᯎᯬᯀᯒ᯲ ᯘᯪ ᯐᯅᯬ᯲ ᯉ ᯑᯥᯞᯖ᯲ ᯐᯞ ᯉ ᯅᯒᯮ᯲ᯐᯮ ᯑᯬ ᯒᯬᯂ ᯉᯪ ᯅᯀᯬᯀ ᯤ ᯐᯞ ᯔᯅᯪᯀᯒ᯲ ᯔᯪᯑ ᯑᯩᯅᯖ ᯐᯞ ᯑᯪᯇᯑᯀᯪ ᯒᯬᯂᯉ ᯘᯪᯀᯉ᯲ ᯂᯐᯂᯖᯉᯬ᯲

1:2 Ditubuhon ibana do pitu anak dohot tolu boru.

1:3 Ia torop ni pinahanna pitu ribu birubiruna, jala tolu ribu untona, jala lima ratus pasang horbona, jala lima ratus halodena boruboru, angkup ni mansai torop naposona; sumangap do ibana tahe sian saluhut halak * na di habinsaran.

1:4 Alai laholaho do anggo angka anakna mambaheni panggalangon, ganup di bagasan jabuna dohot di ari hatutubuna be; disuru huhut mamio ibotona na tolu i, asa mangan dohot minum rap dohot nasida.

1:5 Ia dung marliat angka ari panggalangan i, disuru si Job ma mangalapi nasida, asa * diuras nasida; dipasogot ma hehe manogotna i; jala dipelehon angka pelean situtungon, marguru tu toropnasida sudena. Ai ninna roha ni si Job do: Atik tung naung mardosa angka anakkonku, jala naung * ditundali rohana di bagasan maon Debata. Sai songon i dibahen si Job ganup ari.

1:6 Alai jumpang ma di na sadari, ro be ma angka * anak ni Debata jongjong di jolo ni Jahowa, tung ro ma dohot sibolis tu tongatonganasida.

1:7 Dung i didok Jahowa ma tu sibolis i: Sian dia do ho ro? Jadi ninna sibolis i ma mangalusi Jahowa: Sian * paraotaotan do ahu mangkahapi tano on.

1:8 Dung i ninna Jahowa ma tu sibolis i: Atehe, nunga tung diiburu roham naposongku si Job? Ai ndang adong baoa tudoshon ibana marroha di tano i, * daulatna, tigorna, biarna mida Debata, jala dipadao rohana sian hajahaton.

1:9 Dung i ninna * sibolis i ma mangalusi Jahowa: Nda na * marpambuat do biar ni si Jobi mida Debata?

1:10 Nda diramoti Ho ibana dohot jabuna humaliang ro di nasa na di ibana? Ulaon ni tanganna pe nunga * ditumpak Ho manjadi, jala ditutup pinahanna do tano i.

1:11 Alai tung sura disurdukkon Ho tanganmu mambuat saluhut na di ibana, manang so * buraan na ma Ho di hapataron.

1:12 Dung i ninna Jahowa ma tu Sibolis i: Ida ma, sahat tu tanganmu ma nasa na di ibana, alai ndang jadi dais tanganmu anggo tu ibana sandiri. Dung i ruar ma Sibolis i sian adopan ni Jahowa.

1:13 Dung i jumpang ma di na sadari, tongon * mangan dohot minum anggur angka anak ni si Job dohot boruna di bagasan jabu ni sihahaannasida.

1:14 Jadi ro ma sada suruan manopot si Job, ninna ma: Maninggala nangkin angka horbo, jala angka halode boruboru manjampal di lambungna.

1:15 Dung i ro halak sian * Seba mangalaum, ianggo angka naposo i ditampuli do dohot podang, holan sasada ahu na ma malua, mamboan barita tu ho.

1:16 Andorang mangkatahon dope ibana, ro ma soluk jolma na asing mandok: Madabu * api ni Debata sian langit, jadi suda dipangan api i angka birubiru dohot angka naposo i, holan sasada ahu na ma malua mamboan barita i tu ho.

1:17 Andorang mangkatahon dope ibana, ro ma soluk jolma na asing mandok: Ro do halak * Kasdim mambahen * tolu panggungan, mangalaum angka unto laos diboan do, ianggo angka naposo i ditampuli do dohot podang, holan sasada ahu na ma malua mamboan barita tu ho.

1:18 Andorang mangkatahon dope ibana, ro ma soluk jolma na asing mandok: Tongon mangan dohot minum anggur angka anakmu dohot borum di jabu ni sihahaannasida.

1:19 Jadi ida ma, ro * halisungsung na marpiupiu sian halongonan manondong dompak na opat suhi ni bagas i, gabe mate angka anakkonmu ditipa, holan sasada ahu na ma malua mamboan barita i tu ho.

1:20 Dung i hehe ma si Job * disansani ma angka ulosna jala * dinabung obuk ni uluna, jala manungkap ibana tu tano huhut martangiang.

1:21 Jala didok ma: * Na marsaemara do ahu ruar sian butuha ni dainang, jala marsaemara do ahu mulak tusi. Jahowa do na mangalehonsa, Jahowa do muse mambuatsa * pinuji ma Goar ni Jahowa!

1:22 Di bagasan saluhut parsorionna i, ndang mardosa si Job, jala ndang manarita rohana dompak Debata.

Job 2[patota | patota mualna]

2:1 Alai jumpang muse ma di na sadari, ro be angka anak ni Debata laho jongjong di jolo ni Jahowa, tung ro do dohot sibolis i di tongatonganasida jongjong di jolo ni Jahowa.

2:2 Dung i didok Jahowa ma tu sibolis i: Sian dia do ho ro? Jadi ninna sibolis i ma mangalusi Jahowa: Sian paraotaotan do ahu mangaliati tano i.

2:3 Dung i ninna Jahowa ma tu sibolis i: Atehe, nunga tung diiburu roham naposongku si Job? Si ndang adong baoa tudoshon ibana marroha di tano i, * daulatna, tigorna, biarna mida Debata, jala dipadao rohana sian hajahaton; sai tong dope ** marsihohot rohana di hadaulatonna, atik pe dipinggil ho Ahu dompak ibana laho mangago * soada alana.

2:4 Dung i ninna sibolis i ma mangalusi Jahowa: Hulingkuling singkat ni hulingkuling, ro di nasa na di ibana dilehon jolma i do i singkat ni hosana.

2:5 Alai tung sura disurdukkon Ho tanganmu manjama holiholina dohot sibukna, manang so * buraanna ma. Ho di hapataron.

2:6 Dung i ninna Jahowa ma tu Sibolis i: Ida ma, * sahat tu tanganmu ma ibana, asal diolani ho hosana.

2:7 Dung i ruar ma sibolis i sian adopan ni Jahowa, gabe * hona puru godang ma si Jobi dibahen sian palak ni patna ro di pakpak uluna.

2:8 Dung i dibuat si Job ma santopik ngarngar mangkoisi dagingna, laos * hundulhundul di bagasan sirabun.

2:9 Dung i didok * jolmana ma tu ibana: Sai tong dope ** marsihohot roham di hadaulatonmu? * Bura i na ma Debata asa mate ho!

2:10 Alai ninna ibana ma tu jolmana i: Songon hata ni sada boruboru na riting do pangkulingmi. Nunga itajalo na tonggi sian Debata, * nda jaloonta dohot na paet? Di bagasan saluhutna i * ndang mardosa si Job marhite sian pangkulingna.

2:11 Jadi dung sar barita ni sandok hinamago ni si Job tu na tolu halak alealena, ro be ma nasida ganup sian ingananna be, i ma si Elipas sian * Teman dohot si Bildad sian ** Sua, dohot si Sopar sian * Naama. Ai mardos ni roha do nasida rap ro maningkir dohot mangapuli ibana.

2:12 Jadi dung ditatap nasida ibana sian na * dao, ndang be ditanda nasida ibana, gabe dipangiar suarana be tumatangis, jala ganup ** manansani ulosna jala * dipirpirhon orbuk tu atas ulunasida dompak langit.

2:13 Dung i rap * hundul ma nasida manangkas di tano * pitu ari pitu borngin lelengna, agia ise ndang mandok nanggo sada hata tu ibana, ala diida nasida mansai bernit sahitna i diae.

Job 3[patota | patota mualna]

3:1 Dung songon i dibungka si Job ma pamanganna jala * diburai * ari hatutubuna.

3:2 Dipungka si Job ma mandok hatana:

3:3 Ua tung mago ma nian * ari hatutubungki dohot borngin na manggora: Nunga dijangkon bortian sada posoposo baoa.

3:4 Ingkon gabe haholomon nian ari na sasada i, unang nian usouso Debata disi * sian ginjang, jala unang nian marsinondang hatiuron disi!

3:5 Ingkon mulak nian ari i tungguon ni haholomon dohot linggoman ni hamatean, ingkon ombun mangitom nian songgop tusi, ingkon samon arian nian manonggoti ari i!

3:6 Ingkon haholomon marimpotimpot nian tongtong nampuna borngin na sasada i, unang nian marlas ni roha di tongatonga ni angka ari ni na sataon, jala unang nian masuk etongan tu bilangan ni angka bulan.

3:7 Ida ma, unang ma nian marhagabeon borngin na sasada i, jala unang adong masa disi olopolop.

3:8 Ingkon pulasan ni * angka parsibalik mata, angka na malo * manungguli naga nian borngin na sasada i.

3:9 Ingkon mangkolom ma nian angka bintangna andostorang, sai maimaima di hatiuron, hape matua so ro, unang nian sanga idaonna * imbulu ni sibalik hunik.

3:10 Ala so ditutup * pintu ni bortian ni dainang, manabunihon nian hinamago on sian matangku.

3:11 Boasa tung so mate hian ahu sian bortian, pintor tos nian hosangku dung ruar sian butuha ni dainang.

3:12 Boasa tung pintor rade * ampuan manjangkon ahu, dohot bagot pangonsopangku?

3:13 Aut unang i nian peak do ahu nuaeng jala maradian, jala modom ahu disi marsonangsonang.

3:14 Rap dohot angka raja dohot panuturi ni luat i, angka na pauli * tambak di dirina.

3:15 Manang rap dohot halak na sangap, angka parsere na godang, angka na * manggohi jabunasida dohot perak.

3:16 Manang songon * silumaksa ijur na pinanguspangus ahu nian, gabe soada be, songon posoposo na so sanga mida hasiangan.

3:17 Mansohot ma disi angka * parjahat ogaoga, maradian huhut disi angka na mandate ala hurangan gogo.

3:18 Rap moradian disi luhut angka na tarrante, ndang be dibege nasida suara ni pandasdas.

3:19 Marsada do disi pangkilalaan ni na metmet dohot na balga, hatoban pe malua do sian indukna.

3:20 Boasa tung lehononna hatiuron tu halak na marhinamago, dohot hangoluan tu halak na marsak situtu marroha.

3:21 Angka na mangkalungunhon hamatean nian, hape matua so ro, pola dipatumorosi rohana gumodang sian arta godang.

3:22 Angka na marlas ni roha, pola tung marolopolop, mariaia ma tutu tung sura jumpangsa tanoman.

3:23 Tudia na ma baoa na holom marparnidaan, na * nirungga ni Debata dalanna tuk humaliang.

3:24 Ai singkat ni sipanganonku ro do hoihoingku, jala mabaor songon aek do angguhanggukku.

3:25 Ai na hinatondithon ni rohangku, i do na songgop tu ahu, jala na hinolsohon ni rohangku, i do na ro tu ahu.

3:26 Nda marhadoharon hian do ahu? Nda marhasonangan hian do ahu? Nda marnalom ni roha hian ahu? Hape ro do hinamago ia nuaeng.

Job 4[patota | patota mualna]

5:1 Ua joujou ma ho! Manang tung adong ma na mangalusi ho? Tung tu ise ma sian * angka na badia i tarbahen ho mangalualu?

5:2 Lam bunuon ni gusarna do tahe anggo halak na oto, jala piripirina sandiri mambunu halak na bodo.

5:3 Apala ahu sandiri tahe marnida sada halak na oto manjarar uratna, alai tongkinnari huburai ingananna.

5:4 Mandaodao do angka anakna sian hatuaon, jala dirupa halak nasida di * pintu paruhuman, jala ndang adong na paluahon.

5:5 Tung suda do eme na ginotilna dipangan halak na rapar, gari sian * tongatonga ni rungga diroro do, jala halak panamun mangonsop sinamotna.

5:6 Ai ndada na ruar boti hinamago sian orbuk, jala ndada martumbur boti pardangolan sian tano i.

5:7 Ai tinubuhon hian jolma i tu hinamago, songon balontung ni api na habang dompak ginjang.

5:8 Alai tung sura ahu ho, tu Debata do ahu mangalualu, tu Debata do pasahatonku tangiangki.

5:9 Ibana mambahen habalgaon, angka na so dapot sulingkiton, dohot halongangan angka na so dapot habilangan.

5:10 Ibana mangalehon udan tu sisik ni tano i, Ibana patongonhon aek tu adaran.

5:11 Ibana patimbulhon halak na tarjepol dohot patimbulhon hatuaon tu halak na marsak marroha.

5:12 Ibana papurpurhon angka pingkiran ni halak na bisuk, gabe ndang manjadi na niula ni tangannasida.

5:13 Ibana manangkup angka na bisuk di bagasan angkalnasida sandiri, jala diagohon pingkiran ni halak na marpangansi.

5:14 Tinggangon ni haholomon nasida arian, jala dadapdadap nasida di hos ni ari suang songon bornginna i.

5:15 Alai anggo halak na pogos dipalua Ibana do sian podang ni pamangannasida, dohot sian tangan ni pangarupa.

5:16 Jadi adong ma muse arop ni roha di halak na dangol, tarhuntam do ianggo pamangan ni hajahaton.

5:17 Ida ma, martua ma jolma na niajar ni Debata, dibahen i unang ma toishon pinsangpinsang ni Nasunhinagogo i.

5:18 Ai Ibana mambugangi, laos Ibana mangaliliti, Ibana manggopui laos tanganna pamalumhon muse.

5:19 Onom hali ho hagogotan, Ibana paluahon ho, tole papituhalihon ndang tagamon loasonna mangonai hinamago tu ho.

5:20 Jumpa haraparon, paluaonna do ho sian hamatean, jumpa di hamusuon sian podang.

5:21 Ondinganna do ho anggo maradophon lipatlipat ni dila, jala ndang pola habiaranmu hamagoan tung sura ro.

5:22 Tarbahen ho do mengkel mida hamagoan dohot haleon, jala ndang pola habiaranmu binatang ni luat i.

5:23 Ai marjambar do ho dohot batu angka na di ladang, binatang di harangan mardame do tu ho.

5:24 Jadi tandaonmu ma marhasonangan undungundungmu, ia dibilang ho isi ni jabum, gabe ndang adong na malua nanggo sada.

5:25 Tandaonmu huhut lam tu soparna * pinomparmu, angka tunasmu songon suansuanan di tano.

5:26 Ingkon jolo sanga sarimatua * ho asa suruhonmu tanoman, songon tibalan na binunbunhon di hajujumpang ni tingkina.

5:27 Ida ma, songon i ma pangalahona, nunga tung ditimbang rohanami! Sai tangihon ma i jala parateatehon!

Job 6[patota | patota mualna]

6:1 Dung i ninna si Job ma mangalusi:

6:2 Aut tangkas ma nian nidasing gusarhu * dohot hinamagongku rap dipeakkon nian tu timbangan!

6:3 Ai umborat do angka i nuaeng sian horsik di pasir ni laut; ala ni umbahen hata oto angka pangkataionku.

6:4 Ai angka sumbia * ni Nasunhinagogo i pantik di bagasan ahu, nunga pola manggagat bisana tu tondingku, jala angka * hasonggoton sian Debata marudur mangalo ahu.

6:5 Tung tagamon marlingik ma halode harangan, molo singkop duhutduhut jampalonna? Manang tung marumbe ma lombu, molo singkop gagatonna?

6:6 Tung tarpangan jolma ma sipanganon na so mardai, na so siniraan; manang tung mardai ma na bontar ni pira ni manuk?

6:7 Ginegine do rohangku nanggo manjama, hape i do gabe sipanganonku songon indahan na baribari.

6:8 Ise nian sumubut pangidoanku, aut dilehon Debata nian na hinalungunhon ni rohangku.

6:9 Aut lomo nian roha ni Debata manorbuk ahu, aut dipatoltol Debata nian tanganna manostosi hosangku!

6:10 Sabam ma antong rohangku, jala mirjahirjak dope ahu di bagasan pardangolan na so moralangalang, ala so dung husoadahon hata ni Nabadia.

6:11 Tung aha be gogongku umbahen mangkirim dope ahu? Jala tung aha be ajalhu, umbahen pabengetonku rohangku manaonnaon?

6:12 Manang tung songon togu ni angka batu gogongku? Manang tung sian tombaga sibukku?

6:13 Tung na so adong be huroha pangurupion di ahu, jala dalan haluaon maporus sian ahu.

6:14 Tama nian marpangkaehe alealena mida na marsingkor, nang tung sura naung ditallushon rohana sian biar mida Nasunhinagogo i.

6:15 Hape gari angka hahaanggingku * marpangansi do songon anak ni sunge, songon sunge tutu pola mangalantap tobingna.

6:16 Litok do angka i dibahen tangkuju, mabaor tusi tahe tangkuju i.

6:17 Hape marsik do angka i anggo di partaonan logo ni ari, molo mohop ari tung mahiang do ingananna.

6:18 Marlegotlegot do pardalananna, manaek uapna tu aoangaoang, laos mago boti.

6:19 Manatapnatap nian angka pangallung sian Tema * tusi, jala mangkirim disi angka saudagar sian * Seba.

6:20 Hape tarhirim do nasida ala marhaposan tusi, ai dung sahat nasida tusi tarurak ma nasida.

6:21 Suang songon i do hamu nuaeng, tung na so marguna di ahu, dung diida hamu hasonggoton, gabe tarhatotong hamu.

6:22 Hea dung hudok tu hamu lehononmu tu ahu manang aha, manang boanonmuna silua tu ahu sian artamuna.

6:23 Manang paluahon ahu sian tangan ni pangarupa, manang tumobus ahu sian tangan ni halak sibahen gogo?

6:24 Ajari hamu ahu, asa sip ahu, jala tudu hamu manang taringot tu aha ahu lilu!

6:25 Tung na marsorop * situtu do anggo hata hasintongan! Alai aha ma guna ni hata paminsangon anggo sian hamu?

6:26 Rupa marjarum sina hamu naeng manulingkit angka hatangku? Hape gabe alogo * do anggo pangkataion ni jolma na marpandelean?

6:27 Rupa olo do hamu marruji laho mangkilang dakdanak na tading di lampin, dohot manggadisjauhon alealemuna.

6:28 On pe, ua bereng hamu bohingkon, tung olo ma ahu manggabusi hamu adop bohi be?

6:29 Ua mulak ma hamu, asa unang mambahen na so uhum hamu! Mulak ma hamu tutu, sai tong dope marsihohot hatigoranku.

6:30 Tung adong ma hageduhon di atas dilangku? Tung na so diboto pamanganku * be manirang angka hinamago?

Job 7[patota | patota mualna]

7:1 Nda ulaon porang do ulaon ni jolma saleleng di tano on? Jala nda songon ari ni anak gajian do ariarina?

7:2 Songon hatoban tahe na mangido marlinggomlinggom, jala songon anak gajian na paimaimahon gajina:

7:3 Suang songon i diturpukkon tu ahu angka bulan hinamago, jala dipadiri tu ahu angka borngin na marhangaluton.

7:4 Molo laho modom ahu, ningku do: Andigan pe tarbahen ahu hehe? Alai borngin pe * mansai ngolngol do, jala loja ahu margilinggiling sahat ro di andostorang.

7:5 Marsapu gulokgulok dohot orbuk do dagingku; tongkin maripos ngolu hulingkulingku, tongkinnari malala muse.

7:6 Tumibu ariaringku laho salpu sian turak, jala magomago boti soada adong sihirimon.

7:7 Sai ingot ma, alogo sambing do * ngolungku, jala ndang tagamon mulak matangku marnida hadoharon.

7:8 Nang mata ni na maningkir ahu, ndang be idaonna ahu; molo dilului matam ahu, hape ndang be disi ahu.

7:9 Habang boti do ombun laho salpu, suang songon i turun manisia tu parbeguan, ndang tarbahensa be nangkok sian i.

7:10 Ndang tagamon * mulak be ibana tu jabuna hian, jala ndang be tandaon ni * sambulona ibana.

7:11 Ahu pe antong ndang olo ahu mangontok pamanganku, alualuhononku ma hagogotan ni tondingku, jala andungkononku ma hinaponjot ni rohangku.

7:12 Apala laut ahu manang ihan lumbalumba, umbahen pajongjongonmu parhal jumaga ahu?

7:13 Molo didok rohangku: Paratengku ma mangapuli ahu, podomanku mamuati orongorongku.

7:14 Jadi disonggoti Ho ahu marhitehite nipi, pola angka hitir ahu dibahen Ho marhitehite alatan.

7:15 Jadi patahitahi paningkoton do rohangku jala holiholingku mangido hamatean.

7:16 Nunga * biasan ahu, ndang ahu naeng mangolu salelenglelengna; palua ma ahu, ai * alogo sambing do ariaringku.

7:17 Tung aha ma nian jolma i umbahen pola patimbulonmu ibana, jala pola tiroan ni roham ibana?

7:18 Sai diebati Ho ibana ganup sogot, jala ganup tongkin diunjuni Ho ibana?

7:19 Sadia leleng on so padaoonmu * pamerengmu sian ahu? So paluaonmu asa sanga ahu nian mamondut ijurhu?

7:20 Molo naung mardosa ahu, tung aha ma * tarbahen ahu dompak Ho, ale ** Sijaga jolma manisia? Boasa tung ahu bahenonmu * panonjolanmu, gabe ahu sandiri padokdok sitaononku?

7:21 Boasa so marpamuati roham mida pangalaosingku, jala boasa so dibolus roham hajahatonku? Ai laho modom ma ahu nuaeng tu bagasan orbuk, molo dilului Ho ahu manogot, ndang be disi ahu dapotonmu!

Job 8[patota | patota mualna]

8:1 Dung i ninna si Bildad sian Sua ma mangalusi:

8:2 Sadia leleng on datdatanmu songon i hatahatam, jala tudoshon habahaba na doras pangkataion ni pamanganmu?

8:3 Tung olo ma Debata papeol uhum? Manang tung olo ma Nasunhinagogo papeol habonaron?

8:4 Atik tung naung mardosa angka anakmu dompak Ibana, jadi Ibana manginonahon tu nasida hajahatonnasida i.

8:5 Molo burju anggo ho mangalului Debata dohot mangido asi ni roha sian Nasunhinagogo.

8:6 Molo pita jala bonar anggo ho, sai * tarsunggul do Ibana manatap ho, jala patipakonna muse * inganan ni hatigoranmu.

8:7 Marmetmet pe parmulaanmu, ganda situtu do hadoharonmu di ujung.

8:8 Ua marsungkun nian ho tu sundut na robi, jala parateatehon poda na dapot angka ompu na jolo.

8:9 Ai na tubu nantoari do anggo hita, jala ndang agia aha na itaboto, ai * halinu sambing do ariarinta di atas tano on.

8:10 Nda nasida mangajari ho, nasida paboahon tu ho, jala nasida paruarhon angka hata poda * sian rohanasida?

8:11 Tung tagamon tubu ma ansising, anggo so di gambo? Tung tagamon ma simbur tubu arung, anggo so di berneberne?

8:12 Molo martumbur dope, ndang dirambas, hape ingkon malos do i jumolo sian nasa duhutduhut sileban.

8:13 Suang songon i do pangalaho ni sude jolma na mangkalupahon Debata, ingkon pesan do pangkirimon ni halak parjahat.

8:14 Ingkon mago do pangatauan ni rohana, jala tudoshon rambangrambang ni babibabi na hinaposan ni rohana.

8:15 Mangunsande ibana tu jabuna, hape ndang manahan jongjong marsitiopan ibana tusi, hape ndang hot.

8:16 Margota do nian ibana nang di las ni ari, jala marjurambak uratna manutup sandok porlakna.

8:17 Manjirir huhut angka andorna tu timbunan batu, pola dijangkit tu bagasan bagas batu.

8:18 Alai molo dung niruntun ibana sian ingananna, soadahonon ni do ibana, dohononna do: Ndang dung huida ho.

8:19 Ida ma, i ma halomoan ni dalanna, gabe martumbur na asing sian orbukna.

8:20 Ida ma, ndang tagamon bolongkonon ni Debata jolma na daulat marroha, jala ndang tagamon tumpahanna tangan ni parjahat.

8:21 Alai anggo pamanganmu gok parengkelon sogot bahenonna, jala bibirmu gok parolopolopon.

8:22 Angka na mangkosom ho, ingkon * maruloshon haurahon, jala undungundung ni parjahat ingkon siap do.

Job 9[patota | patota mualna]

9:1 Dung i ninna si Job ma mangalusi:

9:2 Tangkas do huboto sintong do songon i; tung tarbahen ma tigor jolma na gale anggo moradophon Debata?

9:3 Tung sura olo Ibana manjujur dompak jolma i, ndang haalusansa nanggo sada sian saribu.

9:4 Parroha na sun pistar Ibana jala Nasunhinagogo, tung ise ma manangkangi rohana maralohon Ibana laos marsonangsonang?

9:5 Ibana * paunsathon angka dolok so pangkirimanna, Ibana pabalikkon angka i di bagasan rimasna.

9:6 Ibana mangkutol tano on sian ingananna, pola reberebe angka tiang partunggulna.

9:7 Ibana mandok tu mata ni ari, gabe ndang olo binsar, jala Ibana mansahapi angka bintang humaliang.

9:8 Sasada Ibana * paherbang angka langit, jala Ibana mardalan di atas galumbang ni laut.

9:9 Ibana manjadihon * bintang poriama, bintang sidongdong dohot hala ro di bintang angka na di langit pardangsina.

9:10 Ibana mambahen habalgaon angka na so dapot sulingkiton, dohot halongangan, angka na so dapot bilangan.

9:11 Ida ma, Ibana mardalan di lambungku, hape ndang huida, Ibana mamolus sian jolongku, hape ndang pamotoanku.

9:12 Ida ma, Ibana tarsulandit, tung ise ma na tuk manogang Ibana? Tung ise ma na hum mandok tu Ibana: Aha do na binahenmi?

9:13 Ndang olo Debata pasuruthon rimasna; nunga pola tunduk dibahen angka na hinara ni * Rahab.

9:14 Lam ahu ma, tung haalusan ahu ma Ibana, hapillitan ahu ma hata angka na taralushon ahu tu Ibana?

9:15 Nang tung sura parpintor ahu, ndang haalusan ahu Ibana, ingkon mangido asi ni roha ahu sian Siuhum ahu.

9:16 Molo joujou ahu, jala Ibana mangalusi ahu, laos so pahatopoton ni rohangku dope, tung Ibana manangihon suarangku.

9:17 Ibana mangaropuhi ahu marhitehite habahaba, jala dipatorop bugangku, soada alana.

9:18 Ndang diloas Ibana ahu humosa, lam dipagodang do angka soro ni aringku.

9:19 Tung sura naeng mangasahon gogo iba, gumogo do Ibana; tung sura mangasahon uhum iba, tung ise ma mangaluhon Ibana?

9:20 Nang tung sura hapintoran ahu diringku, pamanganku sandiri manorui ahu; nang tung sura bontor rohangku, pargeduk do ahu anggo tuduonna.

9:21 Bontor do ahu tutu, ndang huholsohon hosangku, nunga biasan rohangku di hangoluan on.

9:22 Sada do pangarimpunanna, ala ni do umbahen hudok: Rap diago Debata do jolma na daulat dohot na jahat marroha.

9:23 Molo tompu Ibana mambunu marhite sian begu antuk, mengkel do Ibana mida pandelean ni jolma na so marpipot.

9:24 Nunga dipasahat Ibana luat i tu tangan ni halak parjahat, nunga dipapitung Ibana bohi ni panguhum ni luat i; * tung ise ma mambahensa, molo so Ibana?

9:25 Dumoras do ariaringku laho salpu sian halak na doras marlojong, luhutna i nunga habang so sanga marnida hadoharon.

9:26 Luhutna i nunga salpu songon * solu hotang dorasna, songon * lali piuan laho manoro sisoroon.

9:27 Molo didok rohangku: Naeng ahu mangkalupahon pardangolanku, naeng manadingkon surbot ni bohingku, jala naeng pasiharonku:

9:28 Jadi bajogiton muse rohangku mida sude pardangolanku, ala huboto hian * ndang tagamon lias ahu dohononmu.

9:29 Antong, ingkon parjahat na ma ahu, aha gunana sai datdatanku marporsukporsuk?

9:30 Tung sura pe huparidi aek ni ambolas jala hupaias tanganku dohot aek ni sabun.

9:31 Sai na gunomhononmu do ahu tu bagasan lupaklupak, gabe magigi pangkeanhu mida ahu.

9:32 Ai ndada baoa Ibana songon ahu on, umbahen so haalusan ahu Ibana, tung sura rap tarboan tu paruhuman.

9:33 Angkup ni ndang adong panolai di tongatonga ni hami na dua, na mambahen tanganna tu hami padua.

9:34 Sai dipaholang ma nian sian ahu batahina, jala unang hinasongkalna manonggoti ahu.

9:35 Asa hudok nian hatangku jala unang mabiar ahu mida Ibana, ai ndang parsala ahu huhilala.

Job 10[patota | patota mualna]

10:1 Nunga biasan rohangku di hangoluan on, antong guru lomo ni rohangku na ma mandatdati andungku, naeng mangandungkon hinaponjot ni rohangku.

10:2 Dohononku ma tu Debata: Unang torui ahu! Sai pabotohon ma tu ahu manang ala ni aha umbahen badaanmu ahu!

10:3 Tung tama ma i di roham Ho mangarupa, dohot mambolongkon jadijadian ni tanganmu, hape manumpak marmulia do Ho ianggo di luhutan ni halak parjahat?

10:4 Tung marmata sian sibuk ma Ho? Tung songon parnida ni jolma parnidam?

10:5 Tung songon ariari ni jolma na gale i ma ariarim? Manang angka taonmu, songon taon ni sada baoa?

10:6 Umbahen songon i risihanmu hajahatonku, jala dioranmu dosangku?

10:7 Ala naung * diboto Ho nian na so parjahat ahu, jala na so adong jolma na tuk * paluahon ahu sian tanganmu.

10:8 Nunga pola loja * tanganmu manjadihon dohot manompa ahu tipak tuk humaliang, hape naeng polgahonmu ahu ia nuaeng?

10:9 Sai ingot ma naung ginanami ahu songon * tano liat, hape mulak tu orbuk ahu naeng pasuangonmu!

10:10 Nda nunga diusehon Ho ahu songon susu, jala pola ahu dibahen Ho songon susu na nialhotan?

10:11 Nunga marpahean hulingkuling dohot sibuk ahu dibahen Ho, jala nunga disirat Ho holiholi dohot hurador tu bagasan ahu.

10:12 Nunga dibasabasahon Ho tu ahu hangoluan dohot asi ni roha, jala panatapmu mangaramoti hosangku.

10:13 Hape naung ditabunihon Ho angka on di bagasan roham; tangkas do huboto tibu hian songon i sangkap ni roham.

10:14 Molo tung mardosa ahu, nunga dapot Ho ahu tutu, jala ndang tagamon lias ahu paluaonmu sian hajahatonku.

10:15 Marjea ma ahu tutu molo tung halak parjahat ahu; alai tung sura pe pintor ahu, laos so hum do ahu * padirgak ulungku, ahu on naung gok haurahon jala mahap marnida pardangolanku.

10:16 Tung sura pe hupadirgak, ponsaonmu do ahu songon * singa panoro, jala ulahanmu do mambahen gogo tu ahu.

10:17 Mardapotdapot angka sitindangim dipatindang Ho dompak ahu, jala dipaganda Ho rimasmu dompak ahu; margantiganti tongon angka parangan haporsuhon manahopi ahu.

10:18 Boasa tung paruaronmu ahu sian bortian? Denggan nian pintor tos hosangku, gabe unang sanga nanggo sada mata marnida ahu.

10:19 Jadi hira na so tubu ahu etongan nuaeng, pintor sian butuha ni dainang ahu boanonna tu tanoman.

10:20 Nda otik do angka ariaringku? Dibahen i dipasohot Ibana nian jala dipasombu ahu, asa hupahosa nian nanggo satongkin.

10:21 Tagan so laho dope ahu tu luat na holom marimpotimpot dohot linggoman ni hamatean, na so tarbahen mulak sian i.

10:22 Tu tano haholomon marimpotimpot, songon haholomon linggoman ni hamatean, na so maraturan, sobokkon haholomon marimpotimpot do hatiuron disi.

Job 11[patota | patota mualna]

11:1 Dung i ninna si Sopar halak Naemai ma mangalusi:

11:2 Tung so alusan ma hatahata ni sihapodea, manang tung tagamon pintor halak siduatdait?

11:3 Tung * teal ni pangkulingmu ma tama pasiphon halak; sai didatdati ho do mangelak, hape soada adong nanggo sahalak na paurak ho.

11:4 Sai nimmu do: Pita do podangku, jala lias do ahu nang moradophon matam, ale Debata.

11:5 Alai tahe aut ni olo Debata mangkuling, jala dibungka pamanganna dompak ho.

11:6 Jala dipabotohon tu ho angka * hahomion ni habisukonna, ai tung marlompitlompit do hasintonganna jadi botoonmu ma marpamuati dope roha ni Debata mida ho taringot tu hajahatonmu.

11:7 Tung dirimpu roham dapot hadodoan ho parmulaan ni sangkap ni Debata, manang tung jumpang ho ma sun ni hinadenggan ni Pargogo na so hatudosan.

11:8 Tumimbo do i sian angka langit, tung aha ma bahenonmu? Umbagas do i sian banua toru, tung aha ma dipabotoboto ho?

11:9 Gumanjang do suhatsuhatna sian tano on, jala umbidang sian laut.

11:10 Tung sura mamolus Ibana dohot mangkurungkon dohot mamboan tu paruhuman, tung ise ma na tuk manogang Ibana?

11:11 Ai Ibana do mananda halak pangansi, jala diida hajahaton, ndang pola loja rohana mangarisik.

11:12 Gari baoa na oto sahali marroha dibahen, jala anak ni halode harangan tarbahensa mangulahi tubu gabe jolma.

11:13 Alai molo * marsihohot roham, jala * dipaherbang ho tanganmu tu Ibana.

11:14 Molo tung adong * hajahaton di bagasan tanganmu, paholang ma i, asa unang mian hageduhon di bagasan * undungundungmu.

11:15 Disi ma tarbahen ho * padirgak bohim, malua sian haurahon, gabe marsihohot roham marojahan, ndang be marhabiaran.

11:16 Ai disi ma halupahononmu * parsorionmu, songon aek naung salpu mabaor, parningotmu disi.

11:17 Jadi tumiur ma parnidaanmu tu joloan on sian tiurna di hos ni ari; soluk pe sipata na holom i, songon tiurna manogotna i do i.

11:18 Jadi marnalom ni roha ma ho, ai adong do sihirimonmu, jala ranapanmu luhutna humaliang, jala * marsonangsonang ho laho modom.

11:19 * Sonang ho papeahonmu, jala ndang adong nanggo sahalak na manonggoti ho, jala * torop halak papujipuji ho adop bohi be.

11:20 Alai rondaron do anggo * mata ni halak parjahat i, mago do ia pangatauan ni rohana, jala * marpangkirimon tu hatotos ni hosana na ma ibana.

Job 12[patota | patota mualna]

12:1 Dung i ninna si Job ma mangalusi:

12:2 Tongon tahe, hombal hamu do jolma, mate do habisukon i rap dohot hamu!

12:3 Ahu pe marroha do, suang songon hamu, ndang pola talu ahu martimbangkon hamu, tung ise ma na so umboto mandok angka sisongon i?

12:4 Ingkon gabe sirehereheon ni alealena sandiri do anggo ahu on, ahu na joujou tu Debata, jala na nialusanna antong, sireherehean do tongon ahu jolma na bonar jala na daulat marroha.

12:5 Marro ni lea do tutu halak na dohar mida halak na

12:6 * Marhasonangan do undungundung ni halak pandobo, jala marpangatauan tu debata na binoanna di bagasan * tanganna do halak angka na pauruuru Debata.

12:7 Ua marpanungkun ma ho nian tu angka pinahan, asa nasida mangajari ho; tu pidong angka na di toru ni langit, asa nasida pabotohon tu ho.

12:8 Pangkulingi nian tano on, asa i ma mangajari ho, dengke angka na di bagasan laut nian pajojorhonsa tu ho.

12:9 Tung ise nian na so umbotosa taringot tu saluhutna i, paboa tangan ni Jahowa manjadihon luhutna i.

12:10 Di bagasan tanganna do hosa ni nasa na mangolu dohot tondi ni nasa daging ni jolma.

12:11 Nda pinggol do tumanda hata, jala pamangan umboto dai ni sipanganon?

12:12 Matua di halak na tuatua nian luluan habisuhon, jala halak sigodang umur panungkunan poda.

12:13 Mandapot di Ibana habisuhon dohot hagogoon, di Ibana do panuturion dohot panimbangon.

12:14 Ida ma, Ibana mangarumpakkon, * gabe ndang be dapot paulion, Ibana * mangkurungkon sada baoa, gabe ndang adong na tuk paluahon.

12:15 Ida ma, * Ibana maniopi aek gabe marsik luhutna i, Ibana muse * palungkashon, gabe marbalik tano on dibahen.

12:16 Mandapot di Ibana do hagogoon dohot hapantason, guru di Ibana jolma na lilu dohot na mangaliluhon.

12:17 Ibana manogihon angka panuturi hira tabantaban, jala maoto angka panguhumi dibahen.

12:18 Ibana mangkarhari uhum roharoha ni angka raja, jala dihohoshon rante tu gontingnasida.

12:19 Ibana manogihon angka malim bahen tabantaban, jala ditinggangkon tu tano halak na marhuaso.

12:20 Ibana mangunsat pamollungon sian halak na pir tahak, jala dibuat panuturion sian halak na tuatua.

12:21 Ibana mangusehon * haleaon tu angka raja, jala * dipahondur hohos ni halak na begu.

12:22 Ibana papatarhon angka na buni sian haholomon, jala diboan do tu hatiuron linggoman ni hamatean.

12:23 Ibana patimbulhon angka bangso, jala diago muse; Ibana pararathon angka bangso jala dipaundar muse.

12:24 Ibana mangunsat roha sian angka partogi ni bangso di tano on, jala dililuhon nasida di halongonan soada dalan.

12:25 Jadi dadapdadap nasida di haholomon so marhatiuron, jala rabatrabat nasida dibahen songon halak na mabuk.

Job 13[patota | patota mualna]

13:1 Ida ma, luhutna i nunga diida matangku, nunga dibege pinggolhon jala diantusi.

13:2 Suang songon botomuna do botongku huhut, ndang talu ahu martimbangkon hamu.

13:3 Alai atik pe songon i, naeng ahu mandok suara tu Nasunhinagogo i, jala dipangido rohangku naeng masialusan dohot Debata.

13:4 Ai siulasulas gabus do anggo hamu, jala pandaoni angka na so marguna do hamu sude.

13:5 Tagonan mangiman boti nian hamu, i ma tanda ni habisuhon di hamu dohonon ni halak.

13:6 Antong tangihon hamu ma poralusonku, jala parateatehon hamu panariason ni bibirhon.

13:7 Tung hageduhon naeng hatahononmuna mangampini Debata? Naeng dohononmuna sipaotooto mangamini Ibana?

13:8 Tung hamu naeng mandingkani Ibana? Manang tung hamu gabe pangondian ni Debata?

13:9 Tung tagamon ma sonang hamu, tung sura Ibana manulingkit hamu? Manang tung dirimpu hamu dapot ansionmu Ibana, songon jolma na gale na dapot ansion?

13:10 Tongon tahe, Ibana sandiri manggogo maminsang hamu, molo marroha di bagasan hamu mangampini Ibana.

13:11 Tung so hamuliaonna manonggoti hamu, jala hatahuton mida Ibana maninggangi hamu?

13:12 Angka sipaingotmuna gabe nonang sian sirabun na so marimpola, jala panariasonmuna gabe partanobatoan sian tano liat.

13:13 Antong sip ma anggo hamu, jala loas hamu ahu mandok suara, rohana do manang aha pamasaonna tu ahu.

13:14 Tung ahai sai usungonku sibukku di holangkolang ni ngingingku, manang tondingku di bagasan tanganku?

13:15 Ida ma, sai na bunuonna na ma ahu, ndang adong be sihirimonku, alai anggo angka dalanku, sai naeng tariashononku di jolona.

13:16 Nang on tarbahen do i gabe hatuaonku, na so niloasna masuk tu jolona anggo halak parjahat.

13:17 Dibahen i, tangkas ma tangihon hamu panopotionku, jala dijangkon pinggolmuna panariasonku.

13:18 Ida ma, nunga huaturhon pangaluan, jala huboto hian ingkon * pintoranna ahu.

13:19 Tung ise ibana na tuk mangaluhon ahu, asa sip ahu nian nuaeng jala tos hosangku antong.

13:20 Asal unang na dua on dibahen Ho tu ahu, jadi ndang tabunihononku diringku maradophon bohim.

13:21 Sai paholang ma sian ahu torutorum, jala unang hinasongkalmu manonggoti ahu.

13:22 Dung i joujou ma ho, sai na alusanku do, manang ahu tahe jumolo mandok asa balosonmu.

13:23 Tung sadia godang do huroha hajahatonku dohot dosangku? Sai pabotohon ma tu ahu panundalionku dohot dosangku.

13:24 Ala ni aha umbahen tabunihononmu bohim, jala etongonmu ahu hira musum?

13:25 Tung sada bulung na mapirapir huroha naeng songgotanmu, jala gala ni eme sada naung masak naeng leleanmu?

13:26 Umbahen songon i godang uhum na posi surathononmu tu ahu, jala manginona tu ahu bahenonmu angka * hajahaton ni haposoonku.

13:27 Jala bahenonmu pathu tu bagasan * beangan jala ** ranapanmu dalanku sudena, gari bogas ni pathu * dihampungi Ho do.

13:28 Atik pe ruhap on iba songon hau na tandetandeon, jala songon * ulos na pinangan ni ngitngit.

Job 14[patota | patota mualna]

14:1 Ia jolma na tinubuhon ni parompuan, otik do ariarina, jala mahapan di hangaluton.

14:2 * Mangerbang do ibana songon bungabunga dung i malos, jala manilu ibana laho salpu songon * halinu na so leleng manahan.

14:3 Hape pola ma tung ranapan ni matam jolma sisongon i, jala pola boanonmu ahu tu paruhuman di adopanmu?

14:4 Tung ise ma tarbahen mambahen sada jolma na ias sian na ramun? Ianggo sada ndang adong.

14:5 Molo naung dibuhul Ho ariari ni manisia, bilangan ni angka * bulanna, naung dibahen Ho * parbalohanna, na so tupa laosanna.

14:6 Padao nian pamerengmu sian ibana, asa sonang ibana satongkin, asa sombu rohana di ujung ni ariarina, * songon anak gajian.

14:7 Ai adong dope sihirimon anggo di hau, nang tung sura ditaba, tarbahensa dope martumbur, jala ndang mansohot martunas.

14:8 Nang tung sura matua uratna di bagasan tano, jala mate pangkalna di bagasan orbuk.

14:9 Asal diangor aek ulahanna do martunas, jala marranting songon suansuanan nambura sinuan.

14:10 Alai anggo baoa ia dung mate, laos bustang boti, jala ia dung tos hosa ni jolma tudia be ibana?

14:11 Suda do aek mabaor sian tao, jala olo marsik ia sunge gabe mahiang.

14:12 Alai anggo jolma i dung sapala bustang, ndang tarbahensa be hehe; saleleng adong dope langit, ndang hehe nasida, jala ndang tarsunggul sian na modom.

14:13 Aut olo ma Ho nian * manabunihon ahu di bagasan parbeguan; diondingi Ho nian ahu disi, paima mombun rimasmu, jala dibahen Ho nian buhulna di ahu, dung i marpangulahi nian roham mida ahu.

14:14 Ia dung mate baoa i, tung tagamon ma ulahanna mangolu? Tung di saluhut ariari ni * parporangonku nian ahu mangkirim, paima ro ari haluaonku.

14:15 Disi Ho joujou di ahu, pintor alusanku do Ho, halungunhononmu tahe jadijadian ni tanganmu.

14:16 Alai anggo nuaeng dibilangi Ho do langkalangkangku, jala ndang marpamuati roham mida dosangku.

14:17 Nunga tarsahap panundalionku di bagasan parningotanmu, lam ganda dope hajahatonku dijujur Ho.

14:18 Alai gari dolok tupa matompas do laos magargar, jala dolok batu tupa munsat sian ingananna.

14:19 Angka batu peo pe malala do dibahen aek, jala tangkujuna mamburburhon orbuk ni tano i; suang songon i diago Ho pangkirimon ni jolma na gale.

14:20 Dipatunduk Ho do ibana ro di saleleng ni lelengna, gabe laho salpu ibana; Ho huhut paubahon bohina, dung i dipalaho Ho ibana.

14:21 Marmulia pe angka anakna, ndang dipabotoboto, marlea pe nasida ndang pardulina.

14:22 Alai ripe mangae na bernit na ma dagingna i, jala ripe marsak ia tondina.

Job 15[patota | patota mualna]

15:1 Dung i ninna si Elipas sian Teman mangalusi:

15:2 Tung ture ma halak na pistar mangalushon * parbinotoan angin? Manang tung paburnangonna rohana dohot alogo sian purba?

15:3 Ndang marguna anggo paminsangon marhite sian hata sambing, jala ndang adong labana hatahata sambing marpoda.

15:4 Tongon tahe mansoadahon biar mida Debata do ho, jala diorui ho do tangiang moradophon Debata.

15:5 Ai hajahatonmu sandiri tahe mamodahon tu pamanganmu mandok songon i halak na mangkalushon salana pinangasahonmu.

15:6 Pamanganmi sandiri tutu manguhumi ho, ndada ahu, jala bibirmu manindangi dompak ho.

15:7 Tung ho ma di roham jolma na parjolo tubu? Manang jumolo ho tarjadi sian angka dolok batu?

15:8 Nunga tung dibege ho huroha hahomion ni Debata, jala diduduk roham sandok hapistaran?

15:9 Tung aha ma na binotom, so dohot hami umbotosa? Tung aha ma na niantusanmu, so dohot hami mangantusi?

15:10 Nang di tongatonganami adong do halak na ubanon, naung sarimatua situtu, angka na tumua tahe sian amanta.

15:11 Tung na so pola do huroha anggo di roham angka * pangapulon sian Debata dohot hata na lambok na hudok hami tu ho?

15:12 Boasa tung pangaruntuson roham, jala boasa tung * songe pamerengmu?

15:13 Tung hum ho marmurukmuruk dompak Debata dohot paruarhon hata teal sian pamanganmu?

15:14 Tung beha ma pambahen ni jolma na gale gabe na ias ibana? Manang jolma tubu ni parompuan gabe bonar ibana?

15:15 Ida ma, gari mida angka na badiana ndang pos rohana, gari angka langit i ndang pita anggo moradophon Ibana.

15:16 Lam beha ma jolma parroha mago dohot na busuk, jolma na manobur hajahaton songon aek!

15:17 Naeng tariashononku tu ho, antong tangihon ma ahu, jala manang aha naung huida naeng pajojoronku tu ho.

15:18 Manang aha naung binaritahon ni halak na pistar so marpamorso sian ompunasida.

15:19 Tu nasida sandiri tahe tano i dipasahat, jala ndang adong na jumonok tusi anggo halak na buro.

15:20 Saleleng mangolu halak * parjahat i sai mangae na porsuk do ibana, jala nunga binuhul hian bilangan ni angka taon di halak siulahon gogo.

15:21 Suara hasonggoton marsaringar tongtong di bagasan pinggolna, apala di tingki hadoharonna ro pangago so pangkirimanna.

15:22 Ndang be dihirim rohana tarbahensa dope malua sian haholomon, ripe panganon ni podang na ma ibana diparbaga rohana.

15:23 Sai madoado do ibana mangalului sipanganon, nunga diboto hian naung jonok pinadiri di ibana ari haholomon.

15:24 Pusok hosana binahen ni hasusaan dohot hagogotan, angka na manahopi ibana, songon raja na hobas manahopi parporangon.

15:25 Ala pinatoltolna tanganna naeng mangalo Debata, jala ogaoga ibana dompak Nasunhinagogo.

15:26 Tung dipagakgak do rungkungna marlojong manahopi Ibana, marondingonding tu lombulombuna angka na baris.

15:27 Ala naung hinungkupan ni mokmokna bohina, pola marhorothorot haehaena dibahen mokmokna.

15:28 Jadi maringan ibana di bagasan huta, angka naung niulang, di bagasan jabu, angka na so jadi inganan nian, angka naung pinadiri hian bahen timbunan batu.

15:29 Ndang tagamon mamora ibana, jala ndang tagamon tongtong sinamotna i, jala ndang tagamon tu gandana artana di tano on.

15:30 Ndang tagamon malua ibana sian haholomon, angka tumburna pe malos do dibahen jilam ni api, jala purpur do ibana binahen ni parngongos ni hosa ni Debata.

15:31 Unang ma marhaposan ibana tu ugasan na laho salpu, na paotootohon dirina ibana disi, ai hamagoan do upana di ujung.

15:32 Ndang dope gok arina, nunga jumpang ajalna, jala ndang be rata marbulung dangkana.

15:33 Mosu ibana bahenon ni Debata songon parbue ni hau anggur, jala marurus ibana bahenonna songon bunga ni hau jetun.

15:34 Ai ingkon ripur do pinompar ni parjahat, jala ingkon suda panganon ni api angka undungundung ni halak na olo manjalo sisip.

15:35 Marbortianhon hangaluton nasida, gabe ditubuhon pardangolan, jala butuhanasida mangarade sipaotooto.

Job 16[patota | patota mualna]

16:1 Dung i ninna si Job ma mangalusi:

16:2 Nunga godang pangkataion sisongon i hubege, angka pangapul sipaganda hinamago do hamu sude.

16:3 Sadihari pe marujung angka hobar angin? Aha ulaning pasugal roham umbahen sai datdatanmu maralus?

16:4 Ahu pe, tarbahen ahu do marhatahata songon hamu, tung sura ditaon hamu songon na hutaon on; sai datdatanku mangalage hatahata mangalo hamu, jala * paseolseolonku ulungku mida hamu.

16:5 Tongon tahe papironhu ma tondimuna marhitehite hata ni pamanganku, jala apulapul ni bibirhu pasohothon parniahapanmuna.

16:6 Molo marhata i ahu, ndang tagamon mansohot parniahapanku; molo hohom ahu, ndang tagamon tu oruna.

16:7 Tutu anggo nuaeng, nunga suda gogongku dibahen Ibana, nunga tung ripur angka isi ni bagashu dibahen Ho.

16:8 Nunga tung disoro Ho ahu, gabe sitindangi do i dompak ahu, jala nunga hehe niangku mangalo ahu, jala mangalualuhon ahu adop bohi be.

16:9 Rimasna marsurage dohot mangalo ahu, * patungoripon Ibana dompak ahu, alongku patajom pamerengna dompak ahu.

16:10 Dipangangang * nasida pamanganna be dompak ahu, dipastapi nasida hurumhu marhite sian hata reherehe, * marsitampak nasida mangalo ahu.

16:11 Nunga dipasahat Debata ahu tu halak pargeduk, jala nunga ditinggangkon ahu tu bagasan tangan ni halak parjahat.

16:12 Marsonangsonang ahu nian, gabe Ibana manggopui ahu, disoro do tangkuhukku jala digosagosa ahu, jala dipajongjong ahu bahen * panonjolanna.

16:13 Marngeos angka sumbiana humaliang ahu, dibola Ibana piangku so moralangalang, jala diusehon pogungku tu tano.

16:14 Mardapotdapot angka bugangku dibahen, didorong do ahu songon pandorong ni ulubalang na begu.

16:15 Nunga hualithon * abit takki tu hulingkuling ni dagingku, jala nunga huguluhon ulungku tu bagasan orbuk.

16:16 Marbosol do bohingku binahen ni partangison, jala ampe tu langkop ni matangku linggoman ni hamatean.

16:17 Atik pe so adong lohot * pangarupaon di tanganku, jala tongtong pita tangiangku.

16:18 Sai unang ma dionsop tano i mudarhu, jala unang jumpangan pangulonan angguhanggukki.

16:19 Gari nuaeng, ida ma, di bagasan surgo i do Sitindangingku, jala Pangondianku do di * angka banua ginjang.

16:20 Manginsahi pe angka alealengku mida ahu, dumarede do iluilu ni matangku marpangatauan tu Debata.

16:21 Asa ditolai mangondihon baoa i moradophon Debata, jala dipintori anak ni jolma maralohon alealena.

16:22 Ai otik na ma bilangan ni angka taonhu, jonok na ma ajalhu, bolusonku ma * dalan na so haulahan do.

Job 17[patota | patota mualna]

17:1 Nunga mandate tondingku, nunga mintop angka ariaringku, nunga rade tanoman i di ahu.

17:2 Hape tong dope angka reherehe humaliang ahu, nang bornginna i ingkon taon on ni matangku angka pamadaionnasida.

17:3 Ua bahen ma * parhangkungan, Ho ma tahe mangampu ahu! Tung ise ma dungkon ni Ho na olo martopak tangan dohot ahu.

17:4 Ai nunga ditamondingkon Ho panimbangon sian rohanasida, dibahen i ndang tagamon pamonangonmu anggo nasida.

17:5 Manang ise na manjehehon angka alealena tabanon ni halak, * ingkon rondar mata ni angka anakna.

17:6 Nunga dibahen Ibana ahu gabe * sirehereheon ni halak situan na torop, pola luhut halak * mamursihi bohingku.

17:7 Dibahen i pola * lotop matangku dibahen hinamago, jala saluhutna ruashu songon halinu sambing.

17:8 Pola marseto alani roha ni halak partigor, jala mangiburu halak na so marpipot mida halak parjahat.

17:9 Alai tahe tong do * marsihohot roha ni partigor i mangihutihut dalanna, lam tamba tahe gogo ni halak na ias tangan.

17:10 Alai luhut hamu, datdati hamu ma mulahulak ro tu ahu, ndang tagamon jumpang ahu na marroha di tongatongamuna nanggo sahalak.

17:11 Nunga salpu angka ariaringku, nunga pesan angka sangkaphu, angka pangidoan ni rohangku.

17:12 Borngin i gabe arian dibahen nasida, jonok na ma hatiuron i didok, atik pe ngomngom dope haholomon.

17:13 Tung sura marpangkirimon disi ahu, tong do parbeguan gabe jabungku, jala hupahembang lagengku di bagasan haholomon.

17:14 Joujou pe ahu mandok tu tanoman i: Damang do ho! Tu angka * gulokgulok: Dainang dohot angka ibotongku do hamu!

17:15 Didia be adong tagamon sihirimonku, jala ise tagamon pataridahon tu ahu na huhirim i?

17:16 Turun do i tu pargumbangan ni parbeguan, molo rap moradian di bagasan orbuk.

Job 18[patota | patota mualna]

18:1 Dung i ninna si Bildad sian Sua ma mangalusi:

18:2 Sadia leleng on sai palagelageonmuna hatahata? Sai olo ma hamu parrohaon, dung pe i asa mangkatai hita!

18:3 Boasa tung dietong roham hami songon pinahan? Boasa tung songon na maoto hami di roham?

18:4 Tung ho sandiri do tahe marsuragehon roham di bagasan dibahen gusarmu; tung tagamon tarulang ma tano on ala ho, manang tung munsat dolok batu sian ingananna?

18:5 Tongon tahe, ingkon mintop do palito ni halak parjahat, jala unang be marsinondang nalanala ni apina.

18:6 Hatiuron i pe, ingkon gabe haholomon di bagasan undungundungna, jala palitona ingkon mintop di atasna.

18:7 Ingkon lam * targogot langkalangka ni hagogoonna, jala * sangkapsangkapna manginona tu ibana sandiri.

18:8 Ai patna sandiri padapot ibana di bagasan aring, jala mardalani ibana di bagasan tali na rundut.

18:9 Sai na taralit do tambihulna di bagasan jorgong, jala lingkup tu ibana rambang.

18:10 Marsibuni di bagasan tano aringna ditaon, jala bostangna di dalan na bolon.

18:11 Angka hinamago manonggoti ibana humaliang, jala dihampungi angka bogas ni patna.

18:12 Hisapan hinamagona i pasudasuda ibana, jala ngomngom di lambungna hamagoan i.

18:13 Nunga suda dipangan uraturat ni dagingna, nunga pola suda tahe angka ruasna dipangan anak buhabaju ni hamatean.

18:14 Tarsarat do ibana sian undungundungna, * haposan ni rohana hian, jala ingkon langkahononna mandapothon * raja ni hasonggoton.

18:15 Halak na pulik marga na ma maringan di bagasan undungundungna, ala so adong tadingtadinganna; tung disirsirhon do * barerang tu ingananna i.

18:16 Malos do angka uratna sian toru, jala ditultuli dangkana sian ginjang.

18:17 Pesan do baritana sian tano on, jala ndang be targoar ibana di angka alaman.

18:18 Dionjarhon halak do ibana sian hatiuron tu haholomon, pola dipabali ibana sian tano on.

18:19 Ndang teba di ibana anak manang pahompu di tongatonga ni bangsona, tung na so adong pasipasina tinggal di ingananna.

18:20 Tung tarsonggot situtu do halak di pudina mida * ari hinamagona, jala panonditnonditon disi halak na robi.

18:21 Sai songon i do parsorion ni isi ni jabu ni halak pargeduk, jala songon i do inganan ni halak angka na so tumanda Debata.

Job 19[patota | patota mualna]

19:1 Dung i ninna si Job ma mangalusi:

19:2 Sadia leleng on sai arsahanmuna rohangku? Jala pasipalsipalonmuna ahu marhite sian hatahata?

19:3 Nunga pola sampulu hali hamu manginsahi ahu, ndang maila hamu mangalojai ahu.

19:4 Tung sura pe naung tutu ahu sala, ahu do mandapot salangku.

19:5 Tongon tahe, sai naeng manenganenga hamu dompak ahu, lam mangonai hata muse hamu dompak ahu patamba haurahonku.

19:6 Antong boto hamu ma, nunga dipajepol Debata ahu, jala nunga lingkup tu ahu rambangna.

19:7 Ida ma, huanggukkon pe pangarupaon! Hape ndang adong na mangalusi; sai marhuraja ahu mangido pangurupion, hape ndang adong na mamintori ahu.

19:8 Nunga dirungga Ibana dalanku, gabe ndang tarbolus ahu; jala nunga gabe haholomon angka dalanku dibahen Ibana.

19:9 Nunga diosari Ibana hamuliaonku sian ahu, jala nunga dirampas tumpalhu sian ulungku.

19:10 Nunga tung diparumpak Ibana ahu tuk humaliang asa tung mate ahu; jala nunga diborgati arop ni rohangku songon hau.

19:11 Nunga marsigorgor rimasna dompak ahu, jala * hira musuna ahu dietongi.

19:12 Nunga isi angka parduan ni paranganna ro mangarampok ahu; nunga dipalendes nasida dalanna laho mangalo ahu, jala ditungkum undungku tuk humaliang.

19:13 Nunga dipaholang Ibana angka hahaanggingku sian ahu, jala banding tu ahu angka donganku magodang.

19:14 Nunga ditadingkon angka tondongku ahu, jala nunga dihalupahon angka alealengku ahu.

19:15 Halak isi ni bagashu pe ro di angka naposongku mangetongi ahu doshon halak ruar, hira halak na pulik luat do ahu di rohanasida.

19:16 Ia hujou naposongku, gabe ndang mangalusi ibana, maradu huparrajarajai ibana dohot pamanganku.

19:17 Nunga biasan * jolmangku manganggo hosangku, nang angka pahompungku manganggo mongkushu.

19:18 Gari angka dakdanak na tuit mangaleai ahu; molo huondam hehe, gabe mambebeati nasida dompak ahu.

19:19 Marbiasbias do mida ahu saluhut aleale hasudungan ni rohangku na sai laon, jala halak na huhaholongi nunga marbalik mangalo ahu.

19:20 Tandos tu holiholingku na ma hulingkulingku dohot sibukku, holan sisik ni suratanku na ma na so hona.

19:21 Sai asi ma rohamu mida ahu, asi ma tutu rohamu mida ahu, hamu ale angka alealengku, ai nunga mangonai * tangan ni Jahowa tu ahu.

19:22 Boasa tung leleanmuna ahu songon pangalele ni Debata? Ndang dope mahap rohamu pasipalsipal dagingku?

19:23 Aut ni tarsurat nian angka hatangku, aut taruhir nian di bagasan sada pustaha!

19:24 Aut dilontik nian dohot panurat bosi dohot simbora tu dolok batu, bahen parningotan salelenglelengna.

19:25 Ai tangkas do * huboto mangolu do ** Sipangolu ahu, jala Ibana * parpudi jongjong di atas orbuk.

19:26 Jala ia dung malangke hulingkulingkon, jala malua ahu sian * sibukkon, * idaonku ma Debata.

19:27 Ahu sandiri ma tutu marnida Ibana gabe hatuaonku, apala matangkon marnida Ibana, jala ndada anggo * sileban; pola tung suda * piangku dibahen sihol ni rohangku di bagasan.

19:28 Molo tung didok rohamuna dope: Beha bahenonta mangalele ibana? Angkup ni: Parbonsiran ni hata i dapot do di bagasan ahu.

19:29 Sai mabiar ma hamu mida podang partubolon, ai rimas i do podang mangonai tu angka hajahaton, asa tung diboto hamu adong do uhum partubolon sogot.

Job 20[patota | patota mualna]

20:1 Dung i ninna si Sopar na sian Naema ma mangalusi:

20:2 Sai masirapusan angka pingkiranku mangalusi hatahatam, pola gunsang rohangku di bagasan ala ni.

20:3 Ingkon pabegebegeonku hape pangajaran bahen haurahonku, alai tondi i manariashon paralusan tu ahu di bagasan rohangku.

20:4 Ndang diboto ho hapengani hata on sian na robi sahali dope, olat ni dung adong dipaojak jolma di atas tano on.

20:5 Satongkin sambing do suraksurak ni halak parjahat, jala las ni roha ni halak pangarupa sangkidop mata do lelengna.

20:6 Nang pe manaek sahat ro di langit hajungkatonna pola mandolos uluna tu ombun di rohana.

20:7 Ingkon buriapus ibana songon * ginagatna sandiri ro di salelenglelengna, pola dohonon ni halak na marnida ibana na jolo: Didia ibana ulaning?

20:8 Songon doras ni nipi ibana habang, ndang be jumpang halak ibana, hiap do ibana songon alatan borngin.

20:9 Mata naung marnida ibana, ndang be idaonna ibana, jala ingananna hian pe, ndang umbolanna be.

20:10 Angka anakna pe ingkon manehenehe tu halak angka naung pinapogosna, jala tanganna sandiri paulakkon arta na nidobona.

20:11 Manggagat tu holiholina do dosa angka na niulana di sibunian, peak di bagasan * orbuk do i rap dohot ibana.

20:12 Nang pe tonggi hajahaton i didai pamanganna, jala diongom ibana do i di toru ni dilana.

20:13 Lomo rohana paianianhon, ndang olo mambolongkon, tung dipaongomongom do i di bagasan pamanganna.

20:14 Hape muba do roti pinanganna gabe rasun dung ro di butuhana, gabe * bisa ni ulok dari di bagasan ibana.

20:15 Sinamot naung binondutannai, ingkon utahononna muse, Debata sandiri tahe paruarhon i sian butuhana.

20:16 Nunga disopsop ibana bisa ni ulok dari, gabe * dila ni ulok dari mambunu ibana.

20:17 Tung na so jadi be idaonna mabaor angka sunge sian situak ni loba dohot miak susu.

20:18 Ingkon paulahonna naung nilaumna, ndang jadi parsaulihononna; ndang tagamon las rohana mida hamoraon na nilahanganna i.

20:19 Ala naung dirupa ibana halak na pogos, jala dipupusi, jala nunga dilaum bagas, angka na so pinaulina.

20:20 Ai ndang olo sombu hisap ni butuhana, manang aha na pinangido ni hisapna i, ndang tagamon malua.

20:21 Nanggo sada ndang malua dibahen papanganna, dibahen i ndang tagamon ganda sinamotna.

20:22 Atik pe na mora jong hian ibana, gabe marpogospogos do, tung marsitampak do angka jea i mangonai tu ibana.

20:23 Jadi asa tung gok butuhana, tongoson ni Debata ma parpiarpiar ni rimasna tu ibana, jala * diudanhon do i tu ibana bahen sipanganonna.

20:24 Ia sanga pe ibana malua moradophon sinjata bosi, garsang ma ibana bahenon ni sior haksa.

20:25 Ia dienet sumbia i, jadi ruar do nian sian dagingna, songon i nang podang sumillamsillam sian poguna, alai songgop do tu ibana songgotsonggot hamatean.

20:26 Nasa haholomon marsibuni di bagasan * sinamotna, suda do i * panganon ni api na so niombus ni jolma, ia adong pe teba di bagasan undungundungna, ingkon mago marambolongan do i.

20:27 Langit i huhut papatarhon hajahatonna, jala ia tano on hehe mangalo ibana.

20:28 Ingkon tarboan tu habuangan do sinamot na di bagasan jabuna, jala maup di ari pangarimasanna.

20:29 I ma jambar na pinatongon ni Debata tu jolma parjahat, jala teanteanan na pinatontu ni Debata tu ibana.

Job 21[patota | patota mualna]

21:1 Dung i ninna si Job ma mangalusi:

21:2 Sai tangihon hamu ma panariasonku, i ma nian singkat ni pangapulonmuna i.

21:3 Hasiati hamu ahu, asa hudok hatangkon, ia dung tolhas hudok, tole pe hamu manginsahi.

21:4 Tung tu jolma ma ahu marpangalualuan, * leak ma marsak tondingku tung sura.

21:5 Dompakkon hamu ma ahu, asa tarhalomong hamu, jala mangampehon tangan tu pamangan.

21:6 Ai molo sapala marningot ahu disi, angka hitir do ahu jala manindang imbulu ni dagingku.

21:7 Boasa tung laos mangolu halak parjahat i, pola sanga sarimatua, jala lam tamba sinamotna?

21:8 Pinomparnasida marsonangsonang do di jolonasida, jala simbur magodang angka pahompuna dipaidaida matana.

21:9 Bagasnasida pe marhasonangan do ndang dung marhabiaran, jala ndang dung mangonai * batahi ni Debata tu nasida.

21:10 Marbaringin lombuna jala ndang sala, rodot do lombuna maranak jala ndang dung habangan.

21:11 Disuru nasida anakkonna tu balian songon sada punguan birubiru, jala panihalnihalon angka anakna.

21:12 Marioho suaranasida mardongan gondang dohot hasapi, jala marlas ni roha nasida umbege suara ni tulila.

21:13 Dipasudasuda nasida ariarina marhariburon, hape tompu nasida lonong tu banua toru so pangkirimanna.

21:14 Lam didok muse dope tu Debata: Paholang ma sian hami, ai ndang lomo rohanami umboto angka dalanmu.

21:15 Pinabotoboto Ibana Nasunhinagogo i, umbahen tung oloannami Ibana? Jala tung aha ma gunana hami martangiang tu Ibana?

21:16 Ida ma, ndada guru di nasida hadoharonna i. Sai mandao ma sian ahu * pingkiran ni halak parjahat!

21:17 Anggo piga hali do mintop * palito ni halak parjahat jala songgop * hamagoan tu nasida? Piga hali diturpukkon Ibana hinamago tu nasida di bagasan rimasna?

21:18 Jala piga hali nasida tudoshon durame moradophon alogo, jala tudoshon * hurangkam pinurpurhon ni habahaba?

21:19 Tu * pinomparna disimpan Debata torutoruna; tu ibana sandiri nian diluluhon Ibana, asa mananda nian rohana disi!

21:20 Matana sandiri nian sanga marnida hamagoanna; ibana sandiri nian minum sian * rimas ni Nasunhinagogo.

21:21 Ai ndang disarihon rohana pinomparna, dung mate ibana, anggo dung gok bilangan ni bulan angka naung binuhul hian tu ibana.

21:22 Tung jolma ma mangajarhon parbinotoan tu Debata, Ibana balik manguhumi angka isi ni banua ginjang.

21:23 Sadaon mate apala di haroro ni gogona, uju di sun ni hadoharonna jala marhasonangan situtu dope ibana.

21:24 Uju gok horbo siporoan barana, jala gok utohutok dope holiholina.

21:25 Jala sadaan mate margondok ni roha situtu, jala ndang dung didai hasonangan.

21:26 Hape rap nasida modom di bagasan orbuk jala marsapu * gulokgulok nasida duansa.

21:27 Ida hamu ma, tangkas do hutanda pingkiranmuna i dohot getegete ni rohamuna mangarupa ahu.

21:28 Ai didok hamu do: Didia do bagas ni halak sibahen gogo, jala didia do undungundung inganan ni halak parjahat?

21:29 Beha, ndang dung disungkun hamu halak pardalan pansar, jala ndang mananda hamu di partinandaannasida on?

21:30 Ai di ari * hamagoan ndang marmara anggo * halak parjahat, jala di ari gombunggombung ni tahi diiringiring halak do nasida.

21:31 Tung ise ma na hum patumpolhon tu ibana harohaonna adop bohi be, jala tung ise ma na hum mamaloshon tu ibana hombar tu na binahenna?

21:32 Lam dipataru halak dope ibana tu tanoman pasangaphonsa, jala marjaga dope di atas hinamborna.

21:33 Lambok marpeahan di atasna angka galogat ni rura i, jala luhut jolma naeng * maniru pambahenna i, jala ndang habilangan toropna angka na mambahen songon i jumolo sian ibana.

21:34 Dibahen i boasa sai datdatanmuna mangapuli ahu so marguna; pangarimpunan ni sude alusmuna i, holan dosa do.

Job 22[patota | patota mualna]

22:1 Dung i ninna si Elipas sian Teman ma mangalusi:

22:2 Tung tarbahen baoa ma manumpak Debata? Ndada manumpak tu dirina sambing do halak na marroha i.

22:3 Tung adong ma tagamon gunana di Debata Nasunhinagogo, molo dipintori ho dirim? Manang tung adong ma untungna sian i molo dipadaulat ho pangalahom?

22:4 Tung tagamon ma pinsangonna ho anggo ala ni hadaulatonmu, laos Ibana mamboan ho tu paruhuman?

22:5 Nda ala ni godang ni hajahatonmu do i dohot ala ni dosam angka na so marpansadian?

22:6 Ai nunga dibuat ho singkoram sian donganmu soada alana, jala disoro ho do ulos ni halak na marsangkot bulung hian.

22:7 Ndang dilehon ho aek inumon ni halak na mandate, jala dihomolhomol ho indahan paidaida halak na rapar.

22:8 Jala halak sigostang botohon nampuna tano i, jala na sangap maringan disi ditumpak ho.

22:9 Rumar boti angka na mabalu dipalaho ho, jala botohon ni halak na tading di lampin diropuhi ho do.

22:10 Alani umbahen ditaon angka jorgong tuk humaliang ho, jala ro songgotsonggot tu ho so pangkirimanmu.

22:11 Manang tung so tama hian ma holom parnidaanmu, jala so hungkupan ni aek na sumar i ho?

22:12 Nda maringan do Debata di langit apala parginjang sahali? Jala tailihon ma angka bintang, timbona i tu ginjang!

22:13 Hape dohononmu dope: Aha ma dipabotoboto Debata? Tung tagamon ma manguhum Ibana sian pudi ni haholomon?

22:14 Angka ombun do partabunianna, umbahen so marnida Ibana, jala diliati Ibana do langit ni langitan!

22:15 Naeng do huroha jujuronmu dalan ni halak sian na robi, dalan na nidalanan ni halak parjahat!

22:16 Angka na redep so panagaman ni rohana, aek na sumar i mangumbang ojahannasida sandiri.

22:17 Angka na mandok tu Debata: Paholang ma sian hami! Tung aha ma bahenon ni Nasunhinagogo i tu nasida!

22:18 Hape nian, nunga Ibana manggohi bagasnasida dohot denggan basa. Sai mandao ma sian ahu pingkiran ni halak parjahat!

22:19 Idaon ni halak partigor ma i, huhut marlas ni roha, jala halak na so marpipot mangarehe nasida songon on:

22:20 Nunga ripur hapengani angka alonta, jala nunga suda hamuliaonna dipangan api!

22:21 Ua mardenggan ma ho dohot Ibana, asa mardame ho, asa marhite sian i ro hatuaon tu ho.

22:22 Sai jalo ma pangajaran sian pamanganna, jala parateatehon ma angka hatana!

22:23 Molo mulak roham tu Ibana Nasunhinagogo i, mangulahi mardohar do ho bahenonna, molo dipaholang ho hageduhon sian undungundungmu.

22:24 Reongkon ma sere i tu orbuk, jala * sere sian Opir tu tongatonga ni batu rese di sunge.

22:25 Jadi Ibana Nasunhinagogo i ma gabe seremi, dohot perak margugungugun di ho.

22:26 Jadi disi ma ho * marlas ni roha mida Nasunhinagogo i, jala padirgahonmu bohim tu Debata.

22:27 Martangiang ho tu Ibana, jadi tangihononna ma ho, jala gararonmu angka bagabagam.

22:28 Molo disangkap roham manang aha, sai na saut do i tumpahanna, jala * marhatiuron angka dalanmu sondanganna.

22:29 Molo * dipajepol halak ho, jadi dohononmu ma: Hatimbulon do i! Jala manang ise na * serep marpanaili, martua do bahenonna.

22:30 Paluaonna ma sian salana nang halak na so lias hian, paluaonna ma tutu marhite sian habontoron ni tanganmu.

Job 23[patota | patota mualna]

23:1 Dung i ninna si Job ma mangalusi:

23:2 Nang sadarion sugal dope alualungku; ndang tarantan ahu tanganku dibahen orongku.

23:3 Aut ni huboto nian manang didia jumpang ahu Ibana, aut tarbahen ahu nian sahat tu habangsana!

23:4 Naeng nian pajojoronku panariasonku tu jolona, jala gok paraluson pamanganku bahenonku.

23:5 Botoonku nian hata sialushononna tu ahu, jala antusanku manang aha sidohononna tu ahu.

23:6 Tung tagamon ma mangasahon hinagodang ni gogona Ibana laho manorui ahu? Ndang tahe, sai na tiroanna do ahu.

23:7 Tanda ma disi antong halak partigor masialusan dohot Ibana, gabe malua ahu sian Siuhum ahu ro di salelenglelengna.

23:8 Alai ida ma, tung sura laho ahu dompak habinsaran, ndang disi Ibana, mulak ahu muse tu hasundutan, ndang dapot ahu Ibana disi.

23:9 Molo mangula Ibana tungkan utara, ndang dapot tataponku Ibana, molo martabuni Ibana tungkan dangsina, gabe ndang idaonku.

23:10 Alai anggo ibana, diboto do dalanku, tung sura diuji Ibana ahu, songon sere na pita ma ahu ruar.

23:11 Sai marsihohot do pathu manjujur bogasna, sai huihutihut do dalanna, * ndang dung manimbil ahu.

23:12 Ndang dung hulaosi tona na ruar sian pamanganna, gumodang do huradoti hata angka na ruar sian pamanganna, asa hangoluanku sandiri.

23:13 Alai tahe, parhata sada do anggo Ibana, tung ise ma na tuk manogang Ibana? * Jala guru lomo ni rohana do dipasaut.

23:14 Sai na paujungonna do sangkap ni rohana hian taringot tu ahu, jala tung na marragam do angka sisongon i di bagasan rohana.

23:15 I ma alana umbahen tung tarsonggot ahu moradophon bohina; molo sapala hupingkiri, angka hitir do ahu mida Ibana.

23:16 Nunga Debata mambiarbiari rohangku, jala Nasunhinagogo i mambukbahi ahu.

23:17 Ai ndang nian mago rohangku anggo mida holom ni parnidaanku, manang mida ahu sandiri pe na hinungkupan ni haholomon nuaeng.

Job 24[patota | patota mualna]

24:1 Boasa ulaning so dibuhul Ibana Nasunhinagogo i angka tingki partubolon, asa diida angka na tumanda Ibana nian angka * ari pamalosanna.

24:2 Sai * dipaorot halak parjahat parbalohan, jala dilaum angka parduan birubiru, laos diparmahan do.

24:3 Diolat nasida halode ni angka na tading di lampin, dibuat ia lombu ni na mabalu bahen singkoram.

24:4 Dionjar ia halak na pogos sian dalan; ingkon mamolngit be isi ni tano angka na dangol i dibahen nasida.

24:5 Ida ma, tudoshon halode harangan di halongonan ruar nasida tumopot ulaonna; ingkon sogot nasida hehe magalului sisoroonna; ingkon paraotaotan na ma mangalehon sipanganon tu nasida dohot tu ianakhonna.

24:6 Ingkon di ladang nasida mansalong gagatonna, jala ingkon putihanna parbue na tading di bagasan porlak anggur ni parjahat.

24:7 Marsaemara nasida modom bornginna i so marulos, jala ndang marbulusan di panangkihik ni ari.

24:8 Marudan marari nasida di atas ni angka dolok, ala soada panisioanna gabe dolok batu dihaolhaol.

24:9 Tung dirapus parjahat i do posoposo sian bagot ni inana, jala disoro dope na alit di halak na pogos bahen gade.

24:10 Marsangkot bulung halak na pogos dipalaholaho nasida, so marbaju dibahen, jala halak na manarui tibalanna rapar do dipalaho.

24:11 Ingkon di holangkolang ni parikna nasida mamoro miak, * ingkon mauas dipasombu nasida halak na mardege pangilangan anggurna.

24:12 Ingkon pola morongorong tarbege sian huta i angka na laho mate, jala maungaung suara ni halak na mabugang, alai ndang ditudu Debata na so uhum binahenna i.

24:13 Di tongatonga ni halak angka na mangalo hatiuron do nasida, ndang olo nasida mananda angka dalanna, jala ndang dijujur nasida angka bogasna.

24:14 Andos torang dope ari nunga hehe sibunu jolma laho mambunu halak na dangol dohot na pogos, jala bornginna i madoado ibana songon panangko.

24:15 Mata ni pangalangkup paimahon rambon ni ari, ai ninna rohana do: Ndang adong na marnida ahu nanggo sahalak, jala patinda rupa ibana.

24:16 Ia dung holom mangarut nasida tu angka jabu, mangkurung do nasida ia arian, ndang dihalomohon nasida hatiuron.

24:17 Ai tiur ni ari manogotna i tudoshon linggoman ni hamatean di nasida luhutna, ai somal do nasida mangae songgotsonggot mida hamatean.

24:18 Doras do parjahat i * diumbang aek, hona bura partalianna di tano on, ndang be diumboli dalan laho tu angka porlak anggurna.

24:19 Songon panintak ni logo ni ari marngiarngiar di aek udan, songon i do panompu ni parbeguan di halak na mardosa.

24:20 Gari bortian ni inana mangkalupahon ibana, jala suda ibana dijepjep angka gulok, ndang be diingot halak ibana, jala marobur do halak parjahat i songon hau na tinaba.

24:21 Dipupusi halak parjahat do parompuan na hol, na so dung marianakkon, jala ndang maruhum na denggan ibana tu parompuan na mabalu.

24:22 Alai tahe sai diudut Debata do ngolu ni halak pangarupa marhite sian gogona; hehe do nian ibana muse naung tarsosak rohana di ngoluna.

24:23 Sanga marhasonangan ibana dibahen Debata, pola dipangatauanhon, alai sai diranapi matana do angka dalannasida i.

24:24 Sanga dope nasida timbul, hape tongkin nari nunga lonong; mate do nasida songon halak na asing, jala digotil do nasida songon eme di hatotorasna.

24:25 Alai tung sura so songon i, tung ise ma na tuk manudu gabushu, jala mansoadahon panariasonku?

Job 25[patota | patota mualna]

25:1 Dung i ninna si Bildad na sian Sua ma mangalusi:

25:2 Saguru di Debata do panggomgomon dohot hasongkalon, Ibana mambahen hadameon di bagasan ingananna angka na timbo i.

25:3 * Tung habilangan ma torop ni angka paranganna? Jala * tung ise ma na so hona sondangna?

25:4 Tung beha ma pambahenna tigor jolma na gale i anggo moradophon Debata? Jala beha ma pambahenna bontor tubu ni parompuan?

25:5 Ida ma, gari bulan ndang marhatiuron, angka bintang pe ndang ias anggo moradophon ibana.

25:6 Lam jolma na gale, na songon gulok i ma; jala anak ni jolma, na songon gea i!

Job 26[patota | patota mualna]

26:1 Dung i ninna si Job ma mangalusi:

26:2 Jagar ma ho manolongi halak na so margogo, jala ditumpak ho botohon na so marnangon!

26:3 Jagar ma ho manuturi halak na so marbisuk, jala nunga tung godang pingkiran dipabotohon ho!

26:4 Mangonai tu ise ulaning hatahata angka naung pinaboam, jala tondi ni ise ulaning naung ruar sian ho?

26:5 Gari begu ni halak na mate angka hitir do nang halak isi ni lung.

26:6 Tedek do parbeguan i di jolona, jala ndang martutup banua toru.

26:7 Ibana pahembang langit parutara i di atas ni lung, Ibana manggantungkon tano on tu atas ni na soada.

26:8 Ibana manimpus aek di bagasan ombunna, jala ndang olo mapuntas angka ombun i dibahen.

26:9 Ibana manghungkupi bohi ni habangsana, jala dipaherbang ombunna bahen rimberimbena.

26:10 Ibana umpajok parbalohan ni angka aek humaliang, sahat ro di partomuan ni hatiuron dohot haholomon.

26:11 Pola tung humuturhutur angka tiang ni langit jala tarsonggot moradophon pangasupina.

26:12 Pola gunsang laut i binahen ni hagogoonna, jala marhite sian hapistaranna dipatunduk Ibana Rahab.

26:13 Marhite sian hosana minar angka langit i dibahen, jala tanganna manjadihon * ulok na marlegotlegot.

26:14 Ida ma, i ma angka ujung ni dalanna dope, asal pistik hata husiphusip na itabege taringot tusi! Tung ise ma na manahan anggo umbege suara ronggur ni hagogoonna?

Job 27[patota | patota mualna]

27:1 Dung i didatdati si Job ma angka panariasonna, ninna ma:

27:2 Songon sintongna mangolu Debata naung * padaohon sian ahu hatigoranku, mangolu dohot Nasunhinagogo i naung mambahen margudompong rohangku.

27:3 Ai saleleng simpan dope hosangku di bagasan ahu, jala hosa na sian Debata di bagasan igungku.

27:4 Na so tupa bibir ni pamanganku mangkatahon hageduhon manang dilangku paboahon sipaotooto.

27:5 Dao ma sian ahu tung tolopanku hatamuna; rasirasa tos hosangku, ndang tagamon sumurut sian ahu habontoronku.

27:6 Sai marsitiopan do ahu di hatigoranku, jala ndang paluaonku; ndang pola marlobok taroktokku taringot tu ariaringku nanggo sada.

27:7 Ingkon musungku nian balik tartudu songon halak parjahat, jala songon halak pargeduk ia alongku.

27:8 Ai tung aha ma sihirimon ni halak parjahat, nang pe dipagukguk artana, molo ditait Debata hosana?

27:9 Tung tagamon tangihonon ni Debata ma angguhanggukna, molo ro hagogotan tu ibana?

27:10 Tung tarbahensa ma marlas ni roha mida Nasunhinagogo i, manang martangiang tongtong tu Debata?

27:11 Ahu ma nuaeng mangajari hamu taringot tu pambahenan ni Debata, ndang porsoonku tu hamu sangkap ni Nasunhinagogo i.

27:12 Hamu sandiri pe, nunga nian diida hamu luhutna i, boasa sai datdatanmuna mamingkiri na so marguna?

27:13 I ma jambar na pinatongon ni Debata tu jolma parjahat, jala teanteanan na pinatontu ni Nasunhinagogo i tu halak pangarupa.

27:14 Molo tamba torop ni angka anakna, sude do i panganon ni podang, jala pahompuna hurangan sipanganon.

27:15 Ia pasipasina na teba i, i ma bonduton ni begu antuk, jala ndang mananangisi parompuan angka na mangkabaluhon ibana.

27:16 Nang pe dipagukguk ibana perak songon orbuk godangna, jala diparade pangkeanna songon tano liat godangna.

27:17 Na ripe paulina do di ibana, alai * halak partigor do maruloshon, jala halak na so marpipot marbagi perakna.

27:18 Dipauli pe bagasna songon ngitngit, jala songon pondokpondok na pinauli ni halak parladang.

27:19 Mamora ibana laho modom, hape ndang be ulahanna; molo dipabidok matana, hape ndang disi be ibana.

27:20 Songgotsonggot ni hamatean manahopi ibana songon aek magodang, jala luahonon ni habahaba poting haliung ibana bornginna i.

27:21 Boanon ni * habahaba sian purba ibana, jala purpurhononna ibana dao sian ingananna.

27:22 Debata manginonahon luhutna i tu ibana, jala ndang moralangalang, ingkon maporus ibana moradophon tanganna.

27:23 Jadi martilla ni roha ma halak mida ibana, pola martopaktopak tangan jala diasingkon ibana sian ingananna.

Job 28[patota | patota mualna]

28:1 Adong do panombangan di perak jala pangaragaan anggo di sere.

28:2 Bosi pe sian tano do binuat, jala dilala ia batu gabe tombaga.

28:3 Gari haholomoni marujung do dibahen jolma i, sahat ro di sude tampahanna disulingkit rohana do, nang batu haholomon dohot linggoman ni hamatean.

28:4 Marbuhalbuhal disi sada sunge sian tano na so dung niumbolan ni pat ni jolma, tartantan nasida tusi, gaunggaung holang sian jolma.

28:5 Sada do tano i, sian sisikna do ruar sipanganon, hape anggo partorunai marbalik do dibahen api.

28:6 Jumpang do disi batu na marisi mata intan Sapir, huhut marisi sere marhimpalhimpal.

28:7 Ndang dipabotoboto pidong panoro dalan laho tusi, jala ndang dapot mata ni lali piuan idaonna.

28:8 Ndang dung diumboli pat ni * binatang ingananna, jala ndang dung dibolus singa.

28:9 Mangonai tanganna tu dolok batu, jala marbalik ojahan ni angka dolok dibahen.

28:10 Tolpus do dituhil angka dolok batu bahen dalan ni aek, luhut arta na arga dapot diida matana do.

28:11 Ditambak do angka sunge, asa unang mimir nanggo santetek, jala na buni sahali diparuar tu hatiuron.

28:12 Alai anggo hapistaran i, sian dia ulaning jumpang? Jala didia do ulaning inganan pangalapan parbinotoan?

28:13 Ndang diboto jolma na gale i asamna, jala ndang tagamon jumpang di bagasan * luat ni halak na mangolu on.

28:14 * Lung i mandok: Ndang di bagasan ahu ibana; jala laut i mandok: Ndang di lambungku ibana.

28:15 Ndang dapot tuhoron ibana, nang marhite sian sere na pita, jala asam na i ndang dapot timbangon marhite sian perak.

28:16 Ndang tartimbang ibana dohot * sere sian Opir, manang mutiha na arga, manang mata intan pe.

28:17 Ndang tartimbang ibana dohot sere manang simata landus pe, jala ndang tartungkar nang marhitehite ulaula sian sere.

28:18 Ndang pola etongon humala dohot mata intan na songkal martimbangkon ibana; molo maruli hapistaran manang ise ummarga do i sian * mutiha.

28:19 Ndang tartimbang tusi nang * mata intan Topas sian Kus, jala * sere na pita pe ndang tartimbang tusi.

28:20 Antong marharoroan sian dia ulaning hapistaran i? Jala didia ulaning jumpang inganan ni parbinotoan?

28:21 Ai holip do i sian mata ni saluhut na mangolu, jala buni do i nang moradophon pidong angka na martongatonga langit.

28:22 Banua toru dohot hamatean mandok: Nunga nian dibege pinggolnami lingona.

28:23 Debata sambing tahe mangantusi dalanna, jala Ibana umboto ingananna.

28:24 Ai Ibana manatap sahat ro di angka ujung ni tano on, Ibana marnida saluhut na di toru ni langit.

28:25 Uju na binahenna timbangan ni alogo, jala dipaojak * parbalohan ni angka aek.

28:26 Uju na binahenna patik di udan, dohot dalan di porhas.

28:27 Uju i nunga Ibana martiruan tusi, jala dipapatar, jala dipadiri ojahanna huhut * disulingkit.

28:28 Alai anggo tu jolma i songon on do hatana: Ida ma, * biar mida Jahowa, i do hapistaran, jala * sumurut sian hajahaton, i do parbinotoan.

Job 29[patota | patota mualna]

29:1 Dung i didatdati si Job muse mandok hatana songon on:

29:2 Ise ulaning pasuang tu ahu songon di angka bulan na jolo, songon di angka ari, uju Debata mangaramoti ahu!

29:3 Uju na marsinondang dope palitona di atas ulungku, uju na nidonganan ni hatiuronna ahu manondang haholomon.

29:4 Songon uju di angka ari haposoonku, uju * paralealeon ni Debata dope di undungundungku.

29:5 Uju didongani Nasunhinagogo i dope ahu, jala * angka anakku humaliang ahu.

29:6 Uju huburi pathu di bagasan miak susu, jala dolok batu mambaorhon di ahu angka sunge miak.

29:7 Uju na ruar ahu tu bahal ni huta i, jala hupajongjong hundulanku tu partungkoan.

29:8 Jadi disi diida angka dolidoli ahu, pintor martabuni nasida, angka na ubanon pe * hehe do laos jongjong.

29:9 Pola sulon angka raja mandok hatana, jala * diampehon tanganna tu pamanganna.

29:10 Pola sundat angka na sangap mandok suarana, jala * dilana lohot di langitlangit ni pamanganna.

29:11 Ai pinggol na umbege hatangku * marhatuahon ahu, jala mata na marnida ahu manolopi hatangku.

29:12 Ai hupalua do halak na dangol na mangalualu dohot na tading di lampin, nang halak na so adong pangalualuanna.

29:13 Jadi pasupasu ni halak na siol mago hian songgop tu ahu, jala roha ni parompuan na mabalu marolopolop hubahen.

29:14 Nunga huparuloshon habonaron, gabe pangkean ni diringku do i, tudoshon ulos dohot bulangbulang di ahu uhum na hudabui.

29:15 Manjadi mata do ahu di halak na mapitung, jala pat di halak na pangpang.

29:16 * Ama do ahu di halak na pogos, jala parkaro ni halak na so hutanda pe husulingkit do.

29:17 Huropangi do ipon ni halak pangarupa, jala hurampas do sian holangkolang ni iponna ugasan naung nilaumna.

29:18 Jadi ninna rohangku ma: Rap dohot asarhu pe ahu mate, jala patoroponku ariaringku songon horsik toropna.

29:19 Manjarar tu lambung aek do ia urathu, jala nambur i marborngin di atas ni angka rantingku.

29:20 Sai rata do di ahu hamuliaonku jala ganda do * gogo ni siorhu di bagasan tanganku.

29:21 Sai ditangihon halak do hatangku, jala hohom be do paimaimahon panuturionku.

29:22 Ia dung hudok hatangku, ndang adong be na hum mangkuling, jala * lambok manetehi tu nasida pangkataionku.

29:23 Sai maimaima nasida di ahu songon di udan, jala dipangangang be pamanganna songon saba langit mangkalungunhon * udan.

29:24 Basar ahu tu nasida, jumpa bohabohaon rohanasida, jala sihar ni panailingku ndang tarpasurbot nasida.

29:25 Lomo do rohangku sauduran dohot nasida, jala hundul di julu on ahu, jala marhabangsa ahu di luhutannasida songon raja, songon halak na mangapuli angka na marsak roha.

Job 30[patota | patota mualna]

30:1 Hape anggo nuaeng halak na umposo sian ahu marengkelihon ahu, ianggo amanasida nian na jolo maleahu huetong bahen dongan ni biang angka na mangadu birubirungku.

30:2 Aha ma gunana di ahu nang gogo di tangannasida i, ai ndang sanga nasida sarimatua.

30:3 Nasida angka na marniang binahen ni hahurangan dohot haraparon, pola laho manggagat tu tano bangkalbangkal, tu tano halongonan dohot na niulang sian na robi dope.

30:4 Nasida angka na mansalong siarum horsik di holangkolang ni ramba, jala mangalului siarumpepe bahen panganonnasida.

30:5 Tarliplip do nasida sian tongatonga ni jolma, jala disurakkon do nasida songon halak panangko.

30:6 Ingkon maringan nasida di bagasan lombang sapsap bire, di bagasan liang ni tano i dohot di bagasan jaringjing ni dolok batu.

30:7 Disi do nasida morongorong di holangkolang ni romporompo, jala manggompang nasida di toru ni tadatada.

30:8 Angka anak ni halak na oto do nasida, huhut angka anak ni lapaslapas, pola batahi dibahen pabali nasida sian tano i.

30:9 Hape anggo nuaeng gabe ende aling ahu di nasida, jala sirehereheonna.

30:10 Marbiasbias nasida mida ahu, pola dipaholang dirina sian ahu, jala ndang moralangalang nasida mamursihi bohingku.

30:11 Ala naung dipahondur Ibana * tali ni siorhu, jala tarjepol ahu dibahen, gabe dibuang nasida kokang na di jolongku.

30:12 Di * siamunhu hehe do angka halak gambalgambal jala dionjar pathu, jala dibungbungi * dalan hamagoan dompak ahu.

30:13 Dilohai nasida do dalanku laho pagandahon hamagoanku, ndang pola adong na mangurupi nasida.

30:14 Hira sian bungbung na ruak nasida ro manahopi ahu, pola mardorop pangarongomna.

30:15 Angka hinamago manahopi ahu humaliang, nunga dipurpurhon hasonanganku hira marhite sian habahaba, jala nunga salpu mamolus hadoharonku * songon ombun.

30:16 Ala ni * malampot do ateatengku di bagasan huhilala, nunga tung ditangkup angka ari pardangolanku ahu.

30:17 Bornginna i ditura do holiholingku, hira dihishis sibukku huhilala, jala ndang mansohot panggirikna.

30:18 Binahen ni panggagat ni sahithu mubauba do parsisikku hira pangkeanhu, jala disongkik ringkorang i ahu songon parrungkungan ni bajubaju.

30:19 Nunga disampathon Ibana ahu tu bagasan gambo, gabe samak ahu tu orbuk dohot tu sirabun idaon.

30:20 * Mangangguhi ahu nian tu Ho, hape ndang dialusi Ho ahu, tongtong ahu jongjong di jolomi, jala dipanotnoti Ho ahu.

30:21 Nunga tung marbalik Ho gabe musu na songe di ahu, mangasahon gogo ni tanganmu do Ho mangalo ahu.

30:22 Nunga tung dihindat Ho ahu laho papurpurhon tu alogo, tung didugudugu Ho do hadirionku.

30:23 Ai nunga huboto hian naeng boanonmu ahu tu hamatean, tu * bagas partumpuan ni nasa na mangolu.

30:24 Alai tahe, laho ompas jolma i nda diojakkon dope tanganna, manang ia ro hinamagona nda mangangguhi do?

30:25 Nda tangis do ahu mida halak na marhinamagoi? Nda maras do rohangku mida halak na pogos?

30:26 Ai sai maimaima do ahu di na denggan, hape jea do na ro; * mangkirim ahu di hatiuron, hape haholomon do na ro.

30:27 Sai hira gara do butuhangku huhilala, ndang olo marpasadian, nunga tung dirampok angka ari hinamago ahu.

30:28 Pola marbirong dagingku ahu mardalani, alai ndada binahen ni parngiar ni mata ni ari; hehe do ahu humasungsang di bagasan luhutan ni halak, huhut mangangguhi.

30:29 Nunga tung gabe dongan ni ulok naga ahu, gabe aleale ni pidong unto.

30:30 Marbirong do sisikku pola angka luak, jala mosok holiholingku dibahen mohopna di bagasan.

30:31 Ala ni muba suara ni hasapingku gabe andung, jala suara ni tulilangku gabe suara partatangison.

Job 31[patota | patota mualna]

31:1 Nunga huhomat matangku, tung na so tupa mamereng tu boruboru na marbaju.

31:2 Jadi ninna rohangku, aha ulaning tohaphu lehonon ni Debata sian ginjang, manang partalianku bahenon ni Nasunhinagogo sian banua ginjang?

31:3 Tung so tama ma mangonai hamagoan tu halak pargeduk, manang hinamago tu halak siula hajahaton?

31:4 Tung na so diida Debata ulaning angka dalanku, jala na so dibilangi ulaning sude langkalangkangku?

31:5 Tung sura naung marpangansi pangalahongku, jala pathu manilu manahopi, sipaotooto.

31:6 Ibana nian * mandasing ahu di bagasan timbangan na sintong, asa Debata mananda habontoronku.

31:7 Tung sura naung * manimbil langkangku sian dalan hasintongan, jala dipaihut rohangku lomolomo ni matangku, jala lohot di tanganku haurahon:

31:8 * Ahu pe manabur, ingkon halak na asing manganhon, jala suansuananku, ingkon butbutonna do rap dohot uratna.

31:9 Tung sura naung tarpaoto rohangku olo ahu elaelaon ni jolma ni halak sileban, jala mangonggop ahu di lambung pintu ni alealengku:

31:10 Jadi ingkon jolmangku manduda di halak na asing, jala halak na asing mangalangkup nasida.

31:11 Binoto ma i haurahon do i antong, jala hajahaton na patut uhumon ni panguhum.

31:12 Ai api do i na manggagat sahat ro di banua toru, jala saluhut na huomo mosokkononna tama.

31:13 Tung sura naung hupametmet uhum tu naposongku baoa manang boruboru, jumpa marsalisi nasida dohot ahu:

31:14 Tung aha ma bahenonku tung sura hehe Debata, tung sura marlulu Ibana, aha ma tagamon alushu tu Ibana?

31:15 Nda laos Sitompa ahu di bagasan butuha ni dainang, manjadihon nang ibana? Nda laos Sasadasa do manjadihon hami duansa di bagasan bortian?

31:16 Tung sura naung hujua pangidoan ni halak na pogos, jala lotop hubahen mata ni parompuan na mabalu.

31:17 Jala sasada ahu manganhon rotingku, so dohot dakdanak na tading di lampin manganhon sian i.

31:18 Ai olat ni haposoonku magodang ibana rap dohot ahu, * hira sisada ama, jala sian butuha ni dainang ahu mangiringiring na mabalu i.

31:19 Tung sura naung huida halak mago marsangkot bulung, manang halak na pogos so marbulusan.

31:20 Tung sura so gontingna * mamasumasu ahu ala so pinalas dagingna sian imput ni birubirungku.

31:21 Tung sura naung mangonai tanganku tu dakdanak na tading di lampin, ala mangasahon panolongion ahu di partungkoan.

31:22 Ingkon tanggal abarangku sian sasapna, jala tanganku sirang sian ringringna!

31:23 Ai matua ahu, sai huhabiari do torutoru ni Debata, jala ndang manahan ahu moradophon hatongamonna.

31:24 Tung sura sere hubahen haposan ni rohangku, jala hudok tu * sere palangki: Ho do arop ni rohangku!

31:25 Tung sura mangapian rohangku naeng marsinamot godang ahu, jala naeng jumpangan pangomoan godang tanganku.

31:26 Tung sura naung dung hutailihon mata ni ari jumpa marsinondang arian, manang bulan jumpa di rondangna situtu mardalan.

31:27 Manang tung dung tarpaoto rohangku di sibunian, tung olo ahu maniop * tanganku manombahon tusi:

31:28 Binoto ma i hajahaton na tama * uhumon ni Panguhum do nang i, ala mansoadahon * Debata na di ginjang i do ahu disi.

31:29 Tung sura naung martilla ahu mida hinamago ni musungku, manang marolopolop ahu molo marjea ibana.

31:30 Alai tahe gari langitlangit ni pamanganku, ndang dung huloas mardosa, mangidohon mate hosana marhite sian bura.

31:31 Balik do jolma isi ni undungundungku mandok: Didia do adong jolma na so dung bosur mangan lompan binahenmi!

31:32 Halak dagang pe, ndang dung hupasombu marmalam di alaman, sai talak do pintu ni jabungku didapot halak pardalandalan.

31:33 Tung sura naung huhungkupi pangalaosionku, mangihuthon pangalaho ni jolma, manang hutabunihon hajahatonku, di bagasan andorangku.

31:34 Ala na mabiar ahu mida situan na torop i, jala tahuton ahu mida haleaon ni halak marompuompu, umbahen mauhom ahu, jala ndang ruar sian jabungku.

31:35 Aut adong ma nian sahalak na olo pangalualuanku! Na ida ma, tanda tanganhon; sai na alusan ni Nasunhinagogo i do ahu! Aut di ahu nian surat pangaluan na sinurat ni alongku!

31:36 Tongon tahe pampehononku do i tu abarangku, jala talitalihononku do i songon bulangbulang.

31:37 Papataronku ma tu Ibana bilangan ni langkalangkangku, jala marpangalaho raja ahu mandapothon Ibana.

31:38 Tung sura maungaung tanongku dompak ahu, manang rap tumatangis angka baruranna.

31:39 Tung sura naung hupangan gogo na so magargar, manang naung dung hupangan mudar ni anak gajian.

31:40 Denggan ma tubu di ahu sihupi singkat ni eme, jala unak singkat ni jagung! -- Marujung ma hata panariason ni si Job.

Job 32[patota | patota mualna]

32:1 Dung i mansohot ma sitolu halak i masisualan dohot si Job, ala sai dipintori ibana dirina.

32:2 Jadi marpiarpiar ma rimas ni si Elihu, anak ni si Barakel, marga * Bus i, marompu tu si Ram; marsigorgor rimasna mida si Job, ala sai * dipintori dirina moradophon Debata.

32:3 Marro ni rimas ibana huhut mida alealena sitolu halak i, ala so haalusan nasida si Job, hape * ditorui do ibana.

32:4 Ai nunga ngolngolan hian si Elihu naeng mandok hatana tu si Job, ala tumua sitolu halak i sian ibana.

32:5 Alai dung diida si Elihu, ndang haalusan sitolu halak i si Jobi, tarrimas situtu ma ibana.

32:6 Dung i ro ma hata ni si Elihu, anak ni si Barakel, marga Bus i mangalusi: Bajar dope nian anggo ahu, alai nunga pola ubanon ia hamu; dibahen i alang rohangku jala mabiar ahu papatarhon * parbinotoanku tu hamu.

32:7 Ai ninna rohangku do: Angka na * tuatua ma jumolo mandok hatana, jala halak siginjang umur pabotohon habisuhon.

32:8 Alai tongon tahe, * Tondi na di bagasan jolma na gale i dohot pangombushon ni Nasunhinagogo i marrohaihon jolma i.

32:9 Ndada sai tardok halak siginjang umur pangalapan bisuk, jala ndada sai tardok halak na tuatua umboto manimbang uhum.

32:10 Ala ni umbahen hudok: Tangihon hamu ma ahu, asa dohot ahu pabotohon parbinotoan ni rohangku.

32:11 Ida ma nunga sanga ngolngolan ahu paimaima hatamuna, sai hupatangitangi sipaingotmuna paima sun dirisik hamu hata na humona dohononmuna.

32:12 Sai ditimbangi rohangku do nian hatamuna, hape ida ma, ndang adong sian hamu nanggo sahalak patundukkon si Job, manang na torang mangalusi hatahatana.

32:13 Dibahen i unang ma tung dok hamu: Nunga jumpang hami habisuhon, Debata do na manorui ibana, ndada jolma.

32:14 Alai tahe, ndada ahu pininggil ni hatahatana, jadi ndada alusanku ibana hombar tu hatamuna i.

32:15 Nunga tung tarhatotong anggo nasida, ndang be tarbahensa maralus, nunga tung jut nasida mandok hatana.

32:16 Tung sai ngolngolan ahu, umbahen na so mangkuling nasida, ala sai tarhatotong boti nasida jongjong, jala ndang diboto be maralus?

32:17 Antong ahu ma huhut mandok alushu, ahu pe naeng papatarhon * pingkiran ni rohangku.

32:18 Ai nunga gok hata ahu huhilala, sai disosak Tondi na di bagasan rohangku do ahu.

32:19 Ida ma, tudoshon anggur na so binungka do andorangku, tudoshon tuhukan bobak na imbaru do naeng mapuntas.

32:20 Dibahen i naeng mangkuling ahu asa lumbang huhilala, naeng bungkaonku pamanganku, huhut mangalusi.

32:21 Dao ma sian ahu anggo tung marnida bohi mandingkani manang ise.

32:22 Ai ndang huboto marsipalensem, atik tung beha tompu ahu ripurhonon ni Sitompa ahu.

Job 33[patota | patota mualna]

33:1 Santabi ale Job, sai tangihon ma hatangkon, jala pinggol ma sude pangkataionku.

33:2 Ida ma, nunga sapala hubuha pamanganku, nunga mangkuling dilangku di bagasan pamanganku.

33:3 Sian burju ni rohangku hudok angka hatangkon, jala torang paboaon ni bibirhu parbinotoan.

33:4 Tondi ni Debata do naung manjadihon ahu, jala pangombus ni Nasunhinagogo pangoluhon ahu.

33:5 Molo tung tarbahen ho, denggan alusanmu ahu, marhobas ma ho mangalo ahu adop bohi be.

33:6 Ida ma, Debata do nampuna ahu suang songon ho, nang ahu sian sanggumul * tano liat dijadihon.

33:7 Ida ma, unang pola hinasongkalhu manonggoti ho, jala unang * hinatongam ni tanganku maninggang ho.

33:8 Antong nunga dipaboa ho, apala pinggolhon umbegesa, jala nunga hubege suara ni hatam:

33:9 Na bontor do ahu nimmu, ndang marpipot, na daulat do ahu, jala ndang marhajahaton.

33:10 Ida ma, na * mangalului sindir do Ibana dompak ahu, dietong * rohana ahu hira musuna.

33:11 Dibahen do pathu tu bagasan beangan, dirigopi do nasa dalanku.

33:12 Ida ma, apala disi ma ndang haampinan ho, i ma alushu tu ho, ai umbalga situtu do Debata sian jolma na gale i.

33:13 Boasa ma tung manarita ho dompak Ibana, ala so nialusanna ho taringot tu pambahenanna sudena?

33:14 Ai gari Debata sahali, dua hali pe Ibana mangkuling, hape ndang diparateatehon jolma.

33:15 Marhite sian nipi alatan bornginna i, uju renge modom angka jolma i, uju tarlalap modom di podomanna:

33:16 Disi do dipatinggil Ibana pinggol ni jolma, jala disahap pinsangpinsangna tu nasida.

33:17 Naeng pasuruthon jolma i sian pambahenanna na jahat i, dohot manjora baoa unang marhajungkaton.

33:18 Naeng paluahon tondina sian hamagoan, dohot ngoluna unang tompu disoro hamatean.

33:19 Huhut ibana ditorui marhite sian parsahiton di atas podomanna, pasang situtu * panggagatna nang tu holiholina.

33:20 Pola gialan ngoluna mida sipanganon, ginegine nang rohana mida sipanganon hasudunganna na sai laon.

33:21 Sanga merus situtu sibuk ni dagingna, maras roha marnida, pola panggal holiholina angka na so dapot idaon na sai laon.

33:22 Nunga jonok hosana tu godung, jala ngoluna tu surusuruan angka na mambunu.

33:23 Tung sura adong donganna sada * surusuruan, ** pangondian, * sahalak sian tongatonga ni na saribu mangondihon ibana, laho pabotohon tu jolma hatigoran ni Debata.

33:24 Jadi asiasianna ibana, jala dohononna ma: Tobus ma ibana asa unang turun ibana tu * godung, ai nunga jumpang Ahu * pardengganan.

33:25 Jadi suang hisar dagingna, songon uju di haposoonna, jala mulak poso ibana.

33:26 Molo martangiang ibana tu Debata, jadi asiasianna ma ibana, jala pataridahononna Bohina tu ibana mardongan olopolop, jala * pasuangonna tu jolma na gale i hatigoranna.

33:27 Dung i mamujimuji ma ibana di jolo ni jolma manisia, dohononna ma: Nunga mardosa ahu nian, jala nunga hupapeol uhum hatigoran, alai ndang dibaloshon Ibana tu ahu hombar tu pambahenanku.

33:28 Balik Ibana paluahon hosangku, asa unang turun tu bagasan hamagoan, jala marlas ni roha ngolungku marnida hatiuron.

33:29 Ida ma, luhutna i dibahen Debata dua manang tolu hali tu manisia.

33:30 Naeng manogihon tondina mulak sian hamagoan, asa dipatiur rohana marhite sian hatiuron ni hangoluan.

33:31 Sai parateatehon ma on ale Job, jala tangihon ahu! Sip ma anggo ho asa hudatdati mandok hatangkon.

33:32 Alai molo tung adong dope sulam sialushononmu tu ahu, haru hatahon ma i, ai * dipangido rohangku naeng mamintori ho.

33:33 Alai molo so adong be, ho ma antong manangihon ahu, sip ma ho, asa hupodahon tu ho habisuhon.

Job 34[patota | patota mualna]

34:1 Dung i didok si Elihu muse ma mangalusi:

34:2 Tangihon ma hatangkon, hamu ale angka na bisuk, jala tarehon ma pinggolmuna tu ahu, hamu ale angka na marparbinotoan godang!

34:3 Ai pinggol do tumanda hata, jala pamangan umboto dai ni sipanganon.

34:4 Uhum hasintongan ma itapillit di hita, rap mananda ma hita di manang aha na denggan.

34:5 Ai nunga pola didok si Job: Na pintor do ahu nian, alai * Debata do padaohon sian ahu hatigoranku.

34:6 Ala marhatigoran ahu hudok, hira na * margabus do ahu disi; targisik do bugangku dibahen * sumbia na pantik di bagasan ahu, atik pe so mardosa ahu.

34:7 Tung ise ma baoa songon si Job, na manobur reherehe songon aek?

34:8 Sauduran do ibana dohot halak siula hajahaton, jala rosu ibana tu halak parjahat?

34:9 Ai nunga pola didok ibana: Ndang adong labana di baoa, sian parsaoranna tu Debata!

34:10 Dibahen i, hamu ale angka baoa na marroha! Tangihon hamu ma hatangkon: Dao ma sian Debata anggo hajahaton, jala dao sian Nasunhinagogo i uhum hageduhon!

34:11 Ibana tahe balik mamaloshon tu ganup jolma hombar tu pambahenanna, jala ganup mandapot dalanna be.

34:12 Tongon tahe, tung na so tupa do Debata mambahen hajahaton, jala ndang olo Nasunhinagogo i * papeol uhum hasintongan.

34:13 Ise ulaning palumehon tu Ibana tano on? Jala ise paojakkon liat portibi on?

34:14 Tung sura tubu rohana mangalo jolma i, mambuat muse * tondina dohot hosana.

34:15 Tongkinnai rap monding ma nasa sibuk, jala mulak tu orbuk hian jolma i!

34:16 Molo tung marroha ho, sai tangihon ma on, jala pinggol ma suara ni angka hatangkon.

34:17 Tung tarbahen raja na mangkagigihon uhum ma mangarajai? Tung tarbahen ho ma manorui Ibana Nasuntigor dohot Nasunhinagogo?

34:18 Tung patut ma dohonon tu raja hian: Ho sisoada! Manang tu halak na sangap: Ho halak parjahat!

34:19 Lam tu Ibana ma na so marnida bohi ni jolma na sangap, jala na so mandingkani halak na mora moradophon halak na pogos, ai luhut nasida jadijadian ni tanganna do.

34:20 Tupa mate satongkin nasida tongatonga borngin, pola tarsonggot angka donganna sabangso mandok: Tibunai laho salpu ibana! Tarboan do nang na gogo, hape so binoan ni tangan.

34:21 Ai tongtong do diranapi matana angka dalan ni ganup jolma, jala nasa langkalangkana diida Ibana do.

34:22 Ndang adong haholomon manang linggoman ni hamatean tau partabunian ni halak siula hajahaton.

34:23 Ndang pola leleng risihonna pangalaho ni jolma, asa tarboan ibana tu paruhuman di jolo ni Debata.

34:24 Ibana mangaripuhi jolma angka na marhuaso, ndang pola marpangarisihon, jala dipabangkit halak na asing bahen singkatna.

34:25 Ai tangkas hian ditanda Ibana angka pambahenannasida, * bornginna i nasida dipabalik jala digopui.

34:26 Diragehon do nasida songon halak parjahat apala di tongatonga ni mangajana.

34:27 Ala naung marbalik nasida sian Ibana, jala ndang diparateatehon sude angka dalanna i.

34:28 Asa manginonahon tu nasida angguhangguk ni halak na pogos, asa ditangihon Ibana angguhangguk ni halak na dangol.

34:29 Molo Ibana pasonangkon, tung ise ma na tuk manorui? Molo Ibana manamondingkon Bohina, tung ise ma na tuk paombun rohana? Nang sasabangso, nang sasahalak, tung rap do.

34:30 Asa unang jolma parjahat i mangarajai, gabe * jorgong di bangso i!

34:31 Ai tung tardok jolma ma tu Debata songon on: Huae pe songon on, nda tung sian salangku.

34:32 Ia adong dapot ho na so huida, ho ma manggorahon tu ahu! Molo tung naung huulahon hageduhon, unang be hudatdati.

34:33 Ingkon hombar tu hatam huroha Debata mamaloshon tu ho, ala naung manarita ho? Ingkon ho huroha mamillit, ndada Ahu? Tung aha ma diboto ho? Haru hatahon nian!

34:34 Anggo halak na marroha dohot baoa na marbisuk, na umbege hatangku, tolopanna do i mandok:

34:35 Ndang marparbinotoan pangkataion ni si Job, jala ndang marpanimbangaon hatahatana i.

34:36 Denggan nian tongtong tarunjun si Job sahat ro di ujung, ala maralus ibana songon halak parjahat.

34:37 Ala ditambai dope hajungkaton tu dosana hian, pola mangelak hatana di tongatonganta, jala dipadeak hatahatana dompak Debata.

Job 35[patota | patota mualna]

35:1 Dung i didok si Elihu muse ma mangalusi:

35:2 Tung hombar tu uhum hasintongan ma di roham na nidokmu: Marhatigoran do ahu anggo moradophon Debata?

35:3 Ai didok ho do: Aha gunana di ahu, molo lias ahu sian dosa? Aha ulingku sian i gumodang sian dosangku?

35:4 Antong ahu ma nuaeng mangalushon hata tu ho dohot tu alealem na rap dohot ho.

35:5 Manaili ma ho dompak langit i, jala ida ma, jala bereng angka ombun parginjang, andul do i tumimbo sian ho.

35:6 Molo mardosa ho, pola aha bahenonmu tu Ibana? Molo dipatorop ho angka pangalaosim, pola hahuaonmu Ibana huroha?

35:7 Molo tung pintor ho, aha ulina sian i lehononmu? Manang tung aha ma jaloonna sian tanganmu?

35:8 Tu jolma songon ho sambing manginona hajahatonmu, jala tu ho anak ni jolma marguna ia hatigoranmu.

35:9 Mangangguhi do nian halak na nirupa ala godang ni pangarupaon, mangandungi do nasida nian ala ni uhum sigostang botohon binahen ni halak na sangap.

35:10 Alai ndang adong nanggo sahalak na mandok: Didia do Debata Sitompa ahu, Ibana na mangalehon tu ahu * ende Psalmen bornginna i?

35:11 Ibana na mamodai hita gumodang sian * pinahan di ladang, jala na pabisuk hita gumodang sian * pidong na martongatonga langit.

35:12 Disi do nasida mangangguhi ala ni hajungkaton ni halak parjahat, hape ndang mangalusi anggo Ibana.

35:13 Leak ma antong, ai ndang olo Debata * manangihon anggo tangiang na so marguna, jala ndang manaili Nasunhinagogo i tusi.

35:14 Lam didok * ho dope: Ndang dapot ho Ibana idaonmu, nunga sahat tu jolona * pangalualuanmu, antong unang ngolngolan ho paimaimahon Ibana.

35:15 Alai ala so marlulu dope Debata di bagasan rimasna, tung so tangkas situtu ma tandaonna roha hajungkaton?

35:16 Alai anggo si Job nunga pola dibungka pamanganna mandok hata na teal so marguna, jala dipadeak hatahatana so marparbinotoan.

Job 36[patota | patota mualna]

36:1 Dung i diulahi si Elihu muse hatana mandok:

36:2 Paima ahu satongkinnari, asa huajari ho, ai adong dope hata sido sidohononku mamintori Debata.

36:3 Sian na dao ma alaponku * parbinotoanku laho manariashon habonaron ni Sitompa ahu.

36:4 Tongon tahe, ndada sipaotooto angka hatangkon, ai halak * na sun marparbinotoan donganmu mangkatai.

36:5 Ida ma, Nasunhinagogo do nian Debata, alai ndang ditulak Ibana manang ise, na songkal sahali Ibana marhite sian gogo ni hapistaranna.

36:6 Ndang leleng pangoluonna anggo halak parjahat i, alai patingkosonna do uhum tu halak na dangol.

36:7 Ndang padaoonna * matana sian halak na bonar, lam dipahundul do nasida tahe tu habangsa rampak dohot * angka raja ro di salelenglelengna, asa tung timbul nasida.

36:8 Alai tung sura tarihot nasida dohot rante, jala tarhurung di bagasan rante pardangolan.

36:9 Jala dipabotohon tu nasida pambahenanna na jahat i dohot angka dosanasida i, ala naung pinatimbotimbona dirina.

36:10 Asa Ibana * patinggilhon pinggolnasida tumangihon pangajaran, mandokkon nasida paubaonna rohana sian * hajahaton.

36:11 Molo tung ditangihon nasida pinsangpinsangna, jala * dipaunduk rohana, jadi rasirasa matua nasida sai marhasonangan nasida bahenonna, jala marlas ni roha.

36:12 Alai molo so ditangihon nasida, * mate garsang nasida bahenon ni podang, jala tos hosanasida * so sanga dapotan roha.

36:13 Alai marrimas anggo halak na marroha pangansion, ndang marhuraja nasida, molo Ibana mangarante nasida.

36:14 Jadi ingkon tos hosanasida i tagan di * haposoonna dope, jala ngolunasida di tongatonga ni halak pangalangkup.

36:15 Alai dipalua Ibana do anggo halak na * dangol sian pardangolanna, jala dipatinggil * pinggolnasida marhite sian hagogotan.

36:16 Suang songon i paluaonna nang ho sian godung hagogotan, taripar tu * halambason na tongtong, jala paradeonna ** mejam gok dohot * sipanganon na tabo.

36:17 Alai molo tung gok roham panguhumon ni halak parjahat, jadi laos uhum dohot torutoru manginona tu ho.

36:18 Unang tung taiton ni rimas ma ho tu * hajunghaton, jala unang dipaotooto roham ho, tung tarpalua ho dirim marhite sian * godang ni partobus.

36:19 Tung angguhanggukmi ma tagamon paluahon ho sian hagogotan, manang hinajugulmu mangasahon gogom sandiri.

36:20 Dibahen i unang ma halungunhon haroro ni borngin, na papurpurhon angka bangso sian ingananna hian.

36:21 Jaga ma dirim, asa unang laho roham tu pingkiran na so marguna; tung tagonan ma mate ho pangidoonmu, sian na pataontaon pardangolan!

36:22 Ida ma, * timbul do Debata di bagasan hagogoonna! Tung ise ma * Pangajari tudoshon Ibana?

36:23 Tung ise ma mangaturhon tu Ibana dalan sidalananna? Jala tung ise ma na hum mandok tu Ibana: Hageduhon do i na binahenmu?

36:24 Tagonan ingotonmu parturena patimbulhon pambahenanna na pinapujipuji ni halak.

36:25 Luhut jolma manisia marlomo ni roha marnidasa, pola ingkon mandaodao jolma na gale i manatap tusi.

36:26 Ida ma, na timbul sahali do Debata, ndang dapot dongdongan ni rohanta, bilangan ni angka taonna pe, ndang tarsulingkit hita.

36:27 Ai Ibana manait tu ginjang uap ni angka aek, na marpungu muse gabe udan, na manetehi sian ombunna.

36:28 Manetehi tutu sian angka ombun parginjang marsagihon tu torop jolma.

36:29 Lam parsarak ni ombun dohot pardorom ni suara di bagasan undungundungna ma dapot jolma tagamon antusanna?

36:30 Ida ma, hira marrimberimbehon hilap Ibana, jala * dihungkupi Ibana dirina marhite sian lung ni laut.

36:31 Ai marhite angka i Ibana manguhumi angka bangso, huhut mangalehon sipanganon marlobilobi.

36:32 Ibana mamegang hilapi marhite sian tanganna, duansa, jala dipaborhat do i manoro angka alona.

36:33 Suara ni ronggurna palumbahon harorona, gari angka pinahan marboaboa do taringot tu harorona.

Job 37[patota | patota mualna]

37:1 Tongon tahe pola marlobok taroktokku taringot tusi, jala ndang di ingananna rohangki.

37:2 Ndi hamu ale, tangihon hamu ma pardorom ni ronggurna dohot suara na ruar sian pamanganna.

37:3 Tung tu toru ni sandok langit i margilinggiling suarana, jala sillam ni hilapna sahat tu angka ujung ni tano on.

37:4 Ihut tu hilapi mardorom ronggur i, mangkuling Ibana marhite sian suara ni hatongamonna, jala laos so mansohot angka hilapna nang pe tarbege suarana.

37:5 Mangkuling Debata marhite sian ronggurna na * songkal situtu, Ibana patupa habalgaon, angka na * so dapot hita antusanta.

37:6 Ai Ibana mandok tu * ambolas i: Turun ma ho tu tano i! * Ibana huhut marsuru udan na por dohot udan tipotipo angka na doras situtu.

37:7 Jadi disi ma hona sahap tangan ni saluhut jolma dibahen Ibana, asa tung mananda sude jolma, * angka na tinompana i.

37:8 Angka binatang pe masuk do tu bagasan pangaropanna be, jala manggompang di bagasan angka liangna.

37:9 Sian bilut na buni ro habahaba, jala alogo sian purba mamboan ngali ni ari.

37:10 Marhite sian pangombus ni Debata ro ambolas, jadi pola tartutup aek na lambas i marhimpalhimpal.

37:11 Ibana huhut pasorat ombun i dohot udan, Ibana muse paserakkon ombun na marisi hilap.

37:12 Ibana huhut pahusorhon angka ombun i guru panoguna, manang aha na tinonahonna dipatupa nasida do tu liat portibi on.

37:13 Manang bahen * linsinglinsing, molo tung i haseana tu tanona, manang bahen * tanda ni basana pangonaina i.

37:14 Tangihon ma i, ale Job, jongjong ma ho, jala parateatehon halongangan angka na binahen ni Debata.

37:15 Tung tagamon botoonmu ma parture ni pandokkon ni Debata di nasida! Dohot alana umbahen marsinondang ombunna marhite sian hilap?

37:16 Tung tagamon ma botoonmu pangantanna di ombun, ro di sude halongangan, angka na binahen ni Parbinotonasun?

37:17 Manang botoonmu tagamon parturena umbahen gabe mohop angka pangkeanmu, molo Ibana mamohopi tano i hinorhon ni alogo sian dangsina?

37:18 Tung ho ma donganna pahembang langit parginjang i, asa hira songon sorminan na tinuang idaon?

37:19 Ho ma huroha mamodahon tu hami manang aha sidohononnami tu Ibana; ai ndang tarpajojor anggo hami dibahen haholomon ni rohanami!

37:20 Adong do ulaning na palumbahon tu Ibana molo naeng mangkuling ahu? Manang tung adong ma jolma na mangido naeng mago ibana?

37:21 Ianggo nuaeng tutu, ndang dapot jolma i idaonna sondang ni mata ni ari, atik pe marsinondang di langit i, alai hinungkupan ni ombun do, hape ia ro alogo pasisihon, marsinondang ulahanna.

37:22 Sian purba do i binsar hira songon sere idaon -- humaliang Debata do tongtong hamuliaon na songkal sahali.

37:23 Ianggo Ibana Nasunhinagogo i, ndang tagamon dapot hita, ai na songkal sahali do hagogoonna: Alai anggo uhum dohot hinagodang ni hatigoranna, ndang tagamon rupaonna.

37:24 Dibahen i tama ingkon dihabiari jolma Ibana, ai ndang marnida bohi ni saluhut jolma angka na bisuk Ibana.

Job 38[patota | patota mualna]

38:1 Dung i ro ma * alus ni Jahowa tu si Job marhite sian habahaba, ninna ma.

38:2 Ise do ibana, na naeng paholom tuptupan marhite sian pangkataion na so marpanimbangaon?

38:3 Ua hohos i ma gontingmu songon baoa! Ai dung do na naeng sungkunhononku tu ho, asa ho nian mangajari Ahu!

38:4 Didia do ho, uju Ahu paojakkon tano on? Paboa ma i, molo tung singkop panimbangan ni roham!

38:5 Ise ulaning mambahen suhatsuhatna na jolo? Peak botoonmu do i, manang ise ulaning pagistang hotang pamalok di atasna?

38:6 Di atas ni aha ulaning ditanom hajongjongan ni angka tiangna partunggul? Ise ulaning mameakkon batu parsuhina?

38:7 Uju rap mamujimuji Ahu angka bintang sidongdong, jala marolopolop sude anak ni Debata?

38:8 Ise ulaning manutup laut marhite sian angka pintu, uju di gunsangna ruar sian bortian?

38:9 Uju Ahu manjadihon ombun bahen pangkeanna, dohot haholomon bahen lilitna.

38:10 Uju Ahu mambuhul * parbalohanna di atasna, jala hupahot di ibana ransangransang dohot pintu.

38:11 Laos hudok ma: Intap ni on do ho jadi ro, jala ndang jadi salpuanmu! Ingkon dison do sulon gunsanggunsang ni angka galumbangmu.

38:12 Dung do ho saleleng di ngolum mandokkon binsar ari? Manang pabotohon tu sibalik hunik ingananna?

38:13 Asa disoro angka ujung ni tano on, jala dipabali sian i halak parjahat?

38:14 Asa muba rupana, songon damar sahap, jala andar tarida luhutna i songon pangkean.

38:15 Jala ditait sian halak parjahat * hatiuronnasida, jala diponggolhon * botohon naung hitirhitir hian.

38:16 Nunga dung turun ho sahat ro di angka pusat ni laut? Nunga dung didalani ho tondolan ni lung i?

38:17 Nunga dung dipatalak tu ho angka harbangan ni hamatean? Nunga dung diida ho angka harbangan linggoman ni hamatean?

38:18 Nunga dung torang ditatap ho sahat ro di bohang ni tano on? Antong hatahon ma, molo tung diboto ho luhutna i! III

38:19 Didia do dalan laho tu inganan ni hatiuron? Jala didia do inganan ni haholomon?

38:20 Asa tung boanonmu do i tu parbalohanna be, manang tung botoonmu ma angka lapang laho tu jabuna?

38:21 Rupa diboto ho do i, ai uju i ho tubu huroha, jala torop do bilangan ni ariarim!

38:22 Nunga tung sahat ho huroha ro di parpeopan ni ambolas na lamot? Jala nunga tung diida ho huroha parpeopan ni ambolas hian?

38:23 Angka na hutiopi paimahon tingki hagogotan, dohot ari tongtangan laho mangalo musu.

38:24 Didia do dalan parsirangan ni hatiuron dohot parserahan ni alogo sian habinsaran tu tano on?

38:25 Ise ulaning mambahen patik marsagihon aek udan dohot mambahen dalan di porhas?

38:26 Asa dipaudanudan tano i na so marisi jolma, ro di halongonan na so niinganan ni jolma?

38:27 Laho pasombu uas ni tano bangkalbangkal dohot na niulang, dohot mambahen martumbur duhutduhut na rata?

38:28 Beha na marama do ulaning udan i? Jala ise ulaning manubuhon angka tetek ni nambur?

38:29 Sian bortian ni ise ulaning ruar udan ambolas? Jala ise ulaning manubuhon * nambur aris?

38:30 Jadi marhimpal angka aek i pir songon batu, jala sisik ni lung i tartutup do.

38:31 Tung dapot ho ma pudunonmu angka ihot ni bintang hala, manang tarbahen ho mangkarhari angka ihot ni bintang poriama?

38:32 Tung dapot ho ma paruaronmu angka binatang na marhillohillo di tingkina be? Jala dapot ho togutoguonmu bintang gompul ro di angka anakna?

38:33 Tung diboto ho ma * patikpatik ni langit, manang tung ho * pahothon parentana di atas tano on?

38:34 Tung tarpangiar ho ma suaram sahat ro di ombun, asa parohon udan tipotipo manghungkupi ho?

38:35 Tung tarsuru ho ma angka hilap asa sumiksaksiksak angka i, jala didok mandok ho: Ida ma, guru dokmu do hami!

38:36 Ise ulaning mameakkon hapistaran tu bagasan na holom? Jala ise ulaning mangalehon panimbangon tu bagasan ombun?

38:37 Ise ulaning tarbahen mamilangi angka ombun marhitehite hapistaran? Jala ise ulaning tarbahen mangusehon angka hajo ni langit?

38:38 Asa marhimpalhimpal orbuk i songon na niudi angka na lohot be tu donganna?

38:39 Tung dapot ho ma buruonmu soroan di singa boruboru manang pasombu hisap ni angka anak ni singa?

38:40 Molo mangunsimpu nasida di bagasan angka liangna, jala mangonggop di bagasan ramba poso pangaropanna i?

38:41 Ise ulaning padirihon bangke panganon ni pidong sigak molo sioksiok angka anakna tu Debata jala monsong manerepnerep ala soada panganonna?

Job 39[patota | patota mualna]

39:1 Tung diboto ho ma tingki ni hije maranak poso? Nunga tung dung dipamanat ho ursa tini laho mangae anakna?

39:2 Nunga tung dietongi ho angka bulan hasasangana maranak poso, jala nunga tung diboto ho tingkina mangintubu?

39:3 Uju marsinggang nasida laho mangintubu, laho mambolongkon pusokna na niaena i.

39:4 Dung i lam margogo ma angka anakna jala magodang di ramba, ruar nasida laos so mulak be tu inana.

39:5 Ise ulaning pajalang halode jalang i mardalan guru lomo ni rohana? Jala ise ulaning mangkarhari angka tali tambatan ni halode jalang i?

39:6 Nunga pola Hulehon halongonan bahen jabuna, jala tano na niulang bahen ingananna.

39:7 Pola diparengkeli angka hariburon na masa di bagasan huta, jala ndang dibege suara songgak ni jolma pandasdas.

39:8 Sai diaotaoti do angka dolok mangalului gagatonna jala sai diihutihut do sandok tumbur ni duhutduhut.

39:9 Tung tagamon olo badak i pajinahonmu mangoloi ho? Tung tagamon olo ma ibana marudam di lambung ni panggagatan binahenmi?

39:10 Tung tagamon tarpampe ho ma tali tompi tu tangkuhuk ni badak asa ditait ninggala? Manang tung tagamon ma ihuthononna ho manisir di angka rura?

39:11 Tung tarbahen ho ma marhaposan tusi ala panimbukbuk ni gogona? Manang tung tarpasahat ho ma ulaonmu tusi?

39:12 Tung pos ma roham disi boanonna muli gogo ni na niulam, manang papunguonna eme i tu bagasan sopom?

39:13 Denggan do nian mamerper anggo habong ni pidong unto; alai nda tung taratup habongna habong ni sibarung.

39:14 Hape dipirahon do pirana i tu tano, laos dipasombu do horsik na mohop i mamorpori.

39:15 Laos lupa rohana atik tung mabola bahenon ni pat, jala mapisar degeon ni binatang di ladang.

39:16 Sai pangaritingon do ibana dompak angka anakna, hira na so ibana nampunasa, ndang dihaborihon rohana atik tung beha mangago hangalutonna i.

39:17 Ala naung diunsati Debata habisuhon sian ibana jala ndang marjambar dibahen di panimbangon.

39:18 Alai anggo uju dipaspas habongna laho marlojong, diparengkeli do nang hoda ro di jolma parsihundulna.

39:19 Tung ho ma huroha naung mangalehon gogo tu hoda? Tung ho ma mamangke tangkuhukna dohot jumbak na janggejanggeon?

39:20 Tung tarpaakkathon ho ma i songon sihapor? Pola tarsonggot jolma binahen ni parlongos ni pariheiheonna?

39:21 Ia tambirikna sai mangkaishaisi tano i do sian las ni rohana di gogona, tole borhat ditahopi do musu na tang marsinjata.

39:22 Eles rohana anggo mida habiaran, jala ndang olo humordit, jala ndang olo lumindak bahenon ni podang.

39:23 Patuseok pe nangkat di atasna, sumillamsillam ia mundimundi dohot hujur.

39:24 Pangarimason jala pangaritingon do i mangkaishaisi tano i, jala ndang be hatogangan, molo dibege suara ni sangka.

39:25 Disi mangkuling sangka i, mariheihe ma i, diteshon ma langkana, sian na dao dope nunga dianggo uap ni parporangan, ro di suara porioho ni partogi dohot suraksurak ni parangan.

39:26 Beha do, binahen ni parentam ulaning habang pidong lali tu ginjang, jala meapeap habongna tungkan dangsina?

39:27 Beha do, binahen ni parentam ulaning habang pidong raja ualu dompak ginjang, jala dibahen asarna di inganan na timbo sahali?

39:28 Dolok batu do diingani, laos meat ibana di punsu ni dolok batu dohot di jaringjingna.

39:29 Sian i do diranapi sisoroonna, mansai dao ditatap matana.

39:30 Jala angka anakna mudar sambing do disopsop; jala ia * disi adong bangke disi do ibana.

Job 40[patota | patota mualna]

40:1 Angkup ni didok Jahowa ma tu si Job songon on:

40:2 Antong beha ma pamadai ni jolma na manarita di Ibana Nasunhinagogo i? Jolma na naeng mangajari Debata, i ma nian mangalusi angka sungkunsungkunna i?

40:3 Dung i ninna si Job ma mangalusi Jahowa:

40:4 Ida ma, mametmethu do ahu, tung aha ma dohononku balosna tu Ho? * Huampehon na ma tagonan tanganku tu pamanganku.

40:5 Nunga sahali tarsor hatangku, ndang be ulahanku, manang dua hali pe, na so tupa be datdatanku.

40:6 Dung i ro ma alus ni Jahowa tu si Job marhite sian habahaba ninna ma.

40:7 Ua hohos i ma gontingmu songon baoa, adong do naeng sungkunhononku tu ho, asa ho nian mangajari Ahu!

40:8 Tung naeng do segaanmu uhumhu? Tung naeng salahononmu Ahu, asa mamintori dirim ho?

40:9 Manang tung dos ma gogo ni botohonmu songon * botohon ni Debata? Tung tarbahen ho ma * marsuara ronggur songon Ibana!

40:10 Ua pajagar ma dirim marhite sian habalgaon dohot hatimbulon, jala bahen ma hatongamon dohot hamuliaon pangkeanmu!

40:11 Tingting i ma parpiarpiar ni rimasmu, jala ranapi ma saluhut halak na ginjang marroha, angka i ma jolo paserep.

40:12 Tailihon ma saluhut halak na jungkat marroha, angka i ma jolo patunduk, jala dugudugu ma halak parjahat i di ingananna.

40:13 Rap panguspangus ma nasida tu bagasan orbuk, tambathon ma bohinasida i tu bagasan haholomon.

40:14 Jadi dohot ma Ahu mamuji ho, ala * tanganmu siamun sandiri manolongi ho.

40:15 Ua ida ma binatang hoda aek naung hujadihon rap dohot ho, duhutduhut do digagat suang songon lombu.

40:16 Ua ida ma, di bagasan gontingna do hagogoonna, jala di bagasan angka urat ni butuhana do hapuragaonna.

40:17 Dipaegolegol do ihurna songon hau Ares, jala masidandanan do angka urat ni haehaena.

40:18 Holiholina do songon ponot tombaga, ia angka ruasna songon tiang bosi.

40:19 Ibana do situan ni jadijadian ni Debata, Sitompasa huhut mangalehon tangkena.

40:20 Angka dolok gabe panjampalanna; laos disi do marmeammeam saluhut binatang di harangan.

40:21 Lomo rohana marlinggomlinggom tu toru ni hau ampolu, jala modom tu arung dohot ansising.

40:22 Di linggom ni hau ampolu i ibana marlinggomlinggom, jala angka bulung ni ansising manghungkupi ibana.

40:23 Munsat pe batang aek i ndang pola humordit ibana, ndang pola tahuton ibana nang pe nasa balga ni Jordan masuk tu babana.

40:24 Tung tagamon ma dapot jolma jailonna dohot jorat songon i mangolu manang mangkarihiri igungna? IV

40:25 Tung dapot ho ma tagamon toguonmu buea marhite sian hail, manang mangampot dilana dohot tali?

40:26 Tung dapot ho ma tagamon harihiranmu igungna dohot hotang manang turaonmu hurumna dohot hail bosi?

40:27 Tung tagamon ma pagodangonna elehelekna tu ho, manang manomba huasi tu ho?

40:28 Tung tagamon ma olo ibana marpadanpadan dohot ho, mangido jaloonmu ibana bahen naposom salelenglelengna?

40:29 Tung tagamon dapot ho ma ibana parmeammeamonmu songon pidong? Manang tambatonmu bahen meammeam ni angka borum?

40:30 Tung tagamon olo ma angka pardengke marboniagahon ibana? Manang olo halak partigatiga marbagi disi?

40:31 Tung dapot ho ma tagamon gohanmu sisikna dohot tampuning, manang uluna dohot turatura?

40:32 Tole ampehon ma tanganmu tu ibana, ndang tagamon sangkaponmu marporang dohot ibana paduahalihon.

Job 41[patota | patota mualna]

41:1 Ida ma, ingkon tarhirim jolma i di aropna, asal diida rupana, nunga runggang ala tarmali tondi ibana.

41:2 Ndang adong na hum nanggo sahalak manunggul ibana; tung ise ma manahan jongjong di adopan ni Bohingku?

41:3 Tung ise ma jumolo * mangalehon manang aha tu Ahu, asa balosonku tu ibana? * Saluhut na di toru ni langit i, Ahu do nampunasa.

41:4 Naeng dope Ahu mandok sada hata taringot tu ruasruas ni buea i, taringot tu gogona dohot hinauli ni rupana pe.

41:5 Tung ise ma jolma na hum mangosari pangkeanna parduru? Tung ise ma jolma na hum mangaroro tu bagasan ngingina sidua rinte i?

41:6 Tung ise ma jolma na hum pabuha osangosangna? Jorbut do ngingina baris humaliang.

41:7 Tongam situtu do parinse angka na togu marbarisan, marrapetrapet songon na nirongket.

41:8 Masirainan ma tutu na sada tu donganna, gari alogo ndang tarbahen masuk sian holangkolangna.

41:9 Masirainan ma tutu ganup tu donganna, marsilohot pola ndang tarsirang manang ise.

41:10 Barsibarsina pola marsinondang, jala matana songon imbulu ni sibalik hunik manogotna i.

41:11 Sian babana ruar huathuat, jala marjillamjillam api sian i.

41:12 Sian bungbung ni igungna ruar timus hira sian hudon na gurgur na ginorgoran dohot arsam.

41:13 Hosana tarbahen pagalak arang, jala nala ni api ruar sian babana.

41:14 Maringan di bagasan tangkuhukna do hagogoonna, jala di jolona maringkat hatahuton.

41:15 Marsada do na bulot ni sibukna hira haksa na tinuang do masirainan, tung na so tarhutik do.

41:16 Pir do ateatena songon batu, pir tahe songon batu pandudaan partoru.

41:17 Molo hehe ibana, raion ma halak angka na begu, laos maporus binahen ni songgotna.

41:18 Molo ro halak mandapothon ibana marpodang manang marhujur manang marmundimundi manang marlembing, rap so belut do.

41:19 Hira gala ni eme do anggo bosi dietong rohana, jala hira hau na ondapondapon do anggo tombaga.

41:20 Ndang pola maporus ibana binahen ni anak ni sior, hira gabe durame do anggo batu ni ambalang di ibana.

41:21 Hira gala ni eme anggo antukantuk dietong rohana, jala diengkelengkel do parngingis ni hujur.

41:22 Di toruna marpeahan ngarngar angka na tajom, jala hira hureta pardege do pamolusanna di atas gambo.

41:23 Marbuhalbuhal liang i dibahen ibana hira aek na gurgur di bagasan hudon, jala laut i hira pangalompaan ni halak sipauli daon.

41:24 Marsinondang dalanna sian pudina dibahen, jala doshon uban sisik ni aek i idaon.

41:25 Ndang adong tudosanna anggo di darat, tartompa pe ibana asa unang tahuton.

41:26 Hu rohana mida saluhut na timbul, ibana do raja gumomgom saluhut binatang panoro.

Job 42[patota | patota mualna]

42:1 Dung i ninna si Job ma mangalusi Jahowa:

42:2 Nuaeng pe asa huboto, tung * guru dokmu do luhutna, jala ndang hasundatan sangkap ni roham nanggo sada.

42:3 * Ise do ibana na paholom tuptupan so marpanimbangaon? ** Tongon tahe, nunga huhatahon tutu na so huantusi; halongangan do angka i, * salpu sian rohangku jala na so huboto.

42:4 Ua tangihon ma, naeng ahu mangkatai; adong do naeng sungkunonku tu Ho, asa Ho pabotohon tu ahu.

42:5 Nunga nian dibege pinggolhon lingona taringot tu Ho, alai anggo nuaeng nunga dohot * matangku marnida Ho.

42:6 Dibahen i jora ma ahu jala husolsoli dagingku hundul di bagasan orbuk dohot sirabun.

42:7 Jadi dung sun dihatahon Jahowa angka hata ondeng tu si Job, ninna Jahowa ma mandok si Elipas sian Teman: Nunga tung marsigorgor rimashu mida ho dohot mida alealem sidua halak i; ai ndang hata sintong dipaboa hamu taringot tu Ahu, songon na pinaboa ni * naposongku si Job i?

42:8 Nuaeng pe, buat hamu ma di hamu * pitu lombu tombur dohot pitu birubiru tunggal, jala laho ma hamu manopot naposongku si Job, asa dipelehon hamu sada pelean situtungon manguras hamu, jala ** ditangiangkon naposongku si Jobi hamu. Jadi tataponku ma ibana, gabe ndang bahenonku tu hamu hombar tu haotoon binahenmuna i, ai ndang hata sintong dipaboa hamu taringot tu Ahu, songon na pinaboa ni naposongku si Jobi.

42:9 Dung i laho ma si Elipas sian Teman dohot si Bildad sian Sua dohot si Sopar sian Naema, jala dibahen nasida ma hombar tu hata ni Jahowa tu nasida. Jadi marpamuati ma roha ni Jahowa ala si Job. III

42:10 Dung i humosing ma dibahen Jahowa * parsorion ni si Job, uju na martangiang ibana mangondihon alealena, jala nasa arta na di si Job na jolo * silompit dua ditambai Jahowa.

42:11 Dung i ro be ma * sude hahaanggina dohot angka ibotona ro di sude donganna magodang manopot ibana, laos ** mangan sagusagu rap dohot ibana di bagasan jabuna, jala didok hata sipir ni tondina, huhut diapulapuli ibana taringot tu saluhut hinamago na pinaro ni Jahowa tu ibana, jala dilehon be tu ibana * sakesita dohot tintin sere sada be.

42:12 Dung i gumodang dipasupasu Jahowa si Job di ujungna sian na di mulana; ai sampulu opat ribu birubiruna, onom ribu untona, saribu pasang horbona, jala saribu halodena boruboru.

42:13 Tubu muse pitu anakna dohot tolu boruna.

42:14 Goar ni boruna sihahaan, i ma si Jemima, ia goar ni paidua si Kesia, ia goar ni paitolu si Keren-Hapuk.

42:15 Dung i di sandok tano i ndang adong jumpang parompuan songon hinauli ni boru ni si Job i, jala dilehon amanasida tu nasida hauma bangunan di tongatonga ni angka ibotonasida.

42:16 Dung i mangolu dope si Job i saratus opatpulu taonnari, gabe sanga dope diida pahompuna dohot ninina pola opat sundut.

42:17 Dung i mate sarimatua ma si Job i jala mahap rohana di hangoluan on.