Jump to content

Buku Judas

Sian Wikipedia

Judas ᯐᯮᯑᯘ᯲ 1[patota | patota mualna]

1:1 Ahu surat ni si Judas, naposo ni Jesus Kristus, anggi ni si Jakobus, mandapothon angka na marpili, angka haholongan di bagasan Debata Ama, jala niramotan di Jesus Kristus: ᯀᯂᯮ ᯘᯮᯒᯖ᯲ ᯉᯪ ᯘᯪ ᯐᯮᯑᯘ᯲ ᯉᯇᯬᯘᯬ ᯉᯪ ᯐᯩᯘᯘᯮ᯲ ᯄ᯦᯲ᯒᯘᯪ᯲ᯖᯘᯮ᯲ ᯀᯰᯎᯪ ᯉᯪ ᯑᯪ ᯐᯄ᯦ᯬᯅᯘᯮ᯲ ᯔᯉ᯲ᯑᯇᯖᯬ᯲ᯂᯉᯬ᯲ ᯀᯰᯄ᯦ ᯉ ᯔᯒ᯲ᯇᯪᯞᯪ ᯀᯰᯄ᯦ ᯂᯂᯬᯞᯬᯝᯉ᯲ ᯑᯪ ᯅᯎᯘᯉ᯲ ᯑᯩᯅᯖ ᯀᯔ ᯐᯞ ᯉᯪᯒᯔᯬᯖᯉ᯲ ᯉᯪ ᯐᯮᯘᯘᯮ᯲ ᯄ᯦᯲ ᯒᯘᯪ᯲ᯖᯮᯘᯮ.

1:2 Singkop ma di hamu asi ni roha dohot dame dohot haholongon ni roha! ᯘᯰᯪ᯲ᯄᯇᯬ᯲ ᯔ ᯑᯪ ᯂᯔᯮ ᯀᯘᯪ ᯉᯪ ᯒᯬᯂ ᯑᯬᯂᯖᯬ᯲ ᯑᯔᯩ ᯑᯬᯂᯖᯬ᯲ ᯂᯂᯬᯞᯬᯝᯉᯬ᯲ ᯉᯪ ᯒᯬᯂ

1:3 Hamu angka haholongan, ringkot situtu do rohangku, mambahen surat tu hamu taringot tu haluaon hatopan i; ndang tarjua ahu so suratonku tu hamu hata mangapoi hamu, marungkil humongkop haporseaon, naung tolhas dipasahat tu angka na badia. ᯂᯔᯮ ᯀᯰᯄ᯦ ᯂᯂᯬᯞᯬᯝᯉ᯲ ᯒᯰᯪᯄᯖᯬ᯲ ᯘᯪᯖᯮᯖᯮ ᯑᯬ ᯒᯬᯂᯰᯄ᯦ᯮ ᯔᯔ᯲ᯅᯂᯉᯩ᯲ ᯘᯮᯒᯖ᯲ ᯖᯮ ᯂᯔᯮ ᯖᯒᯪᯝᯖᯬ᯲ ᯖᯮ ᯂᯞᯮᯀᯀᯉᯬ᯲ ᯂᯖᯬᯇᯉ᯲ ᯤ ᯉ᯲ᯑᯰ ᯖᯒ᯲ᯐᯮᯀ ᯀᯂᯮ ᯘᯬ ᯘᯮᯒᯖᯉᯬ᯲ᯄ᯦ᯮ ᯖᯮ ᯂᯔᯮ ᯂᯖ ᯔᯝᯇᯬᯤ ᯂᯔᯮ ᯔᯒᯮᯰᯄ᯦ᯞᯪ᯲ ᯂᯮᯔᯰᯬᯄ᯦ᯇᯬ᯲ ᯂᯇᯒᯬ᯲ᯘᯩᯀᯀᯉᯬ᯲ ᯉᯀᯮᯰ ᯖᯞᯬ᯲ᯂᯘ᯲ ᯑᯪᯇᯘᯂᯖ᯲ ᯖᯮ ᯀᯰᯄ᯦ ᯉ ᯅᯑᯪᯀ

1:4 Ai adong do deba halak, naung manisipi bongot, mangonai do tu nasida uhum on, naung tarsurat hian: Angka na so daulat, angka na pabalikkon asi ni roha ni Debata tu pargadombuson, gabe disoadahon nasida do Raja i dohot Tuhanta na sasada i, Jesus Kristus i. ᯀᯤ ᯀᯑᯰᯬ ᯑᯬ ᯑᯩᯅ ᯂᯞᯄ᯦᯲ ᯉᯀᯮᯰ ᯔᯉᯪᯘᯪᯇᯪ ᯅᯬᯝᯖᯬ᯲ ᯔᯝᯬᯉᯤ ᯑᯬ ᯖᯮ ᯉᯘᯪᯑ ᯥᯂᯔᯮ᯲ ᯀᯉᯬ᯲ ᯉᯀᯮᯰ ᯖᯒ᯲ᯘᯮᯒᯖ᯲ ᯂᯪᯀᯉ᯲ ᯀᯰᯄ ᯉ ᯘᯬ ᯑᯥᯞᯖ᯲ ᯀᯰᯄ᯦ ᯉ ᯇᯅᯞᯄ᯦ᯪ᯲ᯄᯉᯬ᯲ ᯀᯘᯪ ᯉᯪ ᯒᯬᯂ ᯉᯪ ᯑᯩᯅᯖ ᯖᯮ ᯇᯒ᯲ᯎᯑᯔᯬ᯲ᯅᯮᯘᯉᯬ᯲ ᯎᯅᯩ ᯑᯪᯘᯬᯀᯑᯂᯉᯬ᯲ ᯉᯘᯪᯑ ᯑᯬ ᯒᯐ ᯤ ᯑᯬᯂᯖᯬ᯲ ᯖᯮᯂᯉ᯲ᯖ ᯉ ᯘᯘᯑ ᯤ ᯐᯩᯘᯘᯮ᯲ ᯄ᯦᯲ᯒᯘᯪ᯲ᯖᯘᯮ᯲ ᯤ

1:5 Alai na naeng paingotonku do hamu, angka na tangkas umboto saluhutna: Dipalua Tuhan i do nian bangsona sian tano Misir; alai dilengsehon do musengani angka na so porsea. ᯀᯞᯤ ᯉ ᯉᯀᯰᯩ ᯇᯤᯝᯪᯖᯉᯬ᯲ᯄᯮ ᯑᯬ ᯂᯔᯮ ᯀᯰᯄ ᯉ ᯖᯰᯄᯘ᯲ ᯀᯔᯮ᯲ᯅᯬᯖᯬ ᯘᯞᯮᯂᯖᯮ᯲ᯉ ᯑᯪᯇᯞᯮᯀ ᯖᯮᯂᯉ᯲ ᯤ ᯑᯬ ᯉᯪᯀᯉ᯲ ᯅᯰᯘᯬᯉ ᯘᯪᯀᯉ᯲ ᯖᯉᯬ ᯔᯪᯘᯒᯪ᯲ ᯀᯞᯤ ᯑᯪᯞᯰᯩᯘᯩᯂᯉᯬ᯲ ᯑᯬ ᯔᯮᯘᯩᯝᯉᯪ ᯀᯰᯄ᯦ ᯉ ᯘᯬ ᯇᯒᯬ᯲ᯘᯩᯀ

1:6 Angka surusuruan pe, na so mangaramoti panggomgomionna, angka na manadingkon inganannasida hian, diparamothon do tubagasan haholomon marhitehite rante na manongtong, sahat ro di ari uhum na balga i. ᯀᯰᯄ᯦ ᯘᯮᯒᯮᯘᯮᯒᯮᯘᯉ᯲ ᯇᯩ ᯉ ᯘᯬ ᯔᯝᯒᯔᯬᯖᯪ ᯇᯰᯎᯔᯬ᯲ᯎᯬᯔᯪᯀᯉᯬ᯲ᯉ ᯀᯰᯄ᯦ ᯉ ᯔᯉᯑᯰᯪᯄ᯦ᯉᯬ᯲ ᯤᯝᯉᯉ᯲ᯉᯘᯪᯑ ᯂᯪᯀᯉ᯲ ᯑᯪᯇᯒᯔᯖᯬ᯲ᯂᯉᯬ᯲ ᯑᯬ ᯖᯮ ᯅᯎᯘᯉ᯲ ᯂᯂᯬᯞᯬᯔᯉᯬ᯲ ᯔᯒ᯲ᯂᯪᯖᯩᯂᯪᯖᯩ ᯒᯉ᯲ᯖᯩ ᯉ ᯔᯉᯰᯬᯖᯰᯬ ᯘᯂᯖ᯲ ᯒᯬ ᯑᯪ ᯀᯒᯪ ᯥᯂᯔᯮ᯲ ᯉ ᯅᯞ᯲ᯎ ᯤ

1:7 Songon Sodom dohot Gumora ro di angka huta na humaliang i, angka na marharorangon suman tu nasida, paihutihut daging na leban, gabe tudosan na solpa, taringot tu api paruhuman na salelenglelengna. ᯘᯬᯝᯉᯬ᯲ ᯘᯬᯑᯔᯬ᯲ ᯑᯬᯂᯖᯬ᯲ ᯎᯮᯔᯬᯒ ᯒᯬ ᯑᯪ ᯀᯰᯄ᯦ ᯂᯮᯖ ᯉ ᯂᯮᯔᯞᯪᯀᯰ ᯤ ᯀᯰᯄ᯦ ᯉ ᯔᯒ᯲ᯂᯒᯬᯒᯝᯉᯬ᯲ ᯘᯮᯔᯉ᯲ ᯖᯮ ᯉᯘᯪᯑ ᯇᯤᯂᯖᯮ᯲ᯤᯂᯖᯮ᯲ ᯑᯎᯰᯪ ᯉ ᯞᯩᯅᯉ᯲ ᯎᯅᯩ ᯖᯮᯑᯬᯘᯉ᯲ ᯉ ᯘᯞᯬ᯲ᯇ ᯖᯒᯪᯝᯖᯬ᯲ ᯖᯮ ᯀᯇᯪ ᯇᯒᯮᯂᯮᯔᯉ᯲ ᯉ ᯘᯞᯩᯞᯰᯩᯞᯩᯞᯰᯩᯉ

1:8 Suang songon i ma antong nang nasida na tarpedem on, diramuni do sibukna, hu rohanasida di panggomgomion, diinsahi do angka parhasangapon. ᯘᯮᯀᯰ ᯘᯬᯝᯉᯬ᯲ ᯤ ᯔ ᯀᯉ᯲ᯖᯰᯬ ᯉᯰ ᯉᯘᯪᯑ ᯉ ᯖᯒ᯲ᯇᯩᯑᯔᯩ᯲ ᯀᯉᯬ᯲ ᯑᯪᯒᯔᯮᯉᯪ ᯑᯬ ᯘᯪᯅᯄ᯦ᯮ᯲ᯉ ᯂᯮ ᯒᯬᯂᯉᯘᯪᯑ ᯑᯪ ᯇᯰᯎᯔᯬ᯲ᯎᯬᯔᯪᯀᯉᯬ᯲ ᯑᯪᯀᯉᯪ᯲ᯘᯂᯪ ᯑᯬ ᯀᯰᯄ᯦ ᯇᯒ᯲ᯂᯘᯝᯇᯉᯬ᯲

1:9 Alai di na marbada Mikhael, sintua ni surusuruan i, dohot sibolis i siala bangke ni si Musa, ndang hum rohana mandabu uhum paminsangon dompak sibolis i; alai didok: Dipinsang Tuhan ma ho! ᯀᯞᯤ ᯑᯪ ᯉ ᯔᯒ᯲ᯅᯑ ᯔᯪᯄ᯦᯲ᯂᯀᯞᯩ᯲ ᯘᯉᯪ᯲ᯖᯮᯀ ᯉᯪ ᯘᯮᯒᯮᯘᯮᯒᯮᯀᯉ᯲ ᯤ ᯑᯬᯂᯖᯬ᯲ ᯘᯪᯅᯬᯞᯘᯪ᯲ ᯤ ᯘᯪᯀᯞ ᯅᯰᯄᯩ ᯉᯪ ᯘᯪ ᯔᯮᯘ ᯉ᯲ᯑᯰ ᯂᯔᯮ᯲ ᯒᯬᯂᯉ ᯔᯉ᯲ᯑᯅᯮ ᯥᯂᯔᯮ᯲ ᯇᯔᯉᯪ᯲ᯘᯝᯉᯬ᯲ ᯑᯔᯬ᯲ᯇᯄ᯦᯲ ᯘᯪᯅᯬᯞᯘᯪ᯲ ᯤ ᯀᯞᯤ ᯑᯪᯑᯄᯬ᯲ ᯑᯪᯇᯉᯪ᯲ᯘᯰ ᯖᯮᯂᯉ᯲ ᯔ ᯂᯬ

1:10 Alai anggo nasida, diinsahi do nasa na so binotona; alai na binotonasida sian bangkona hian songon di binatang na so marroha i, i do na mangago nasida. ᯀᯞᯤ ᯀᯰᯎᯬ ᯉᯘᯪᯑ ᯑᯪᯀᯉᯪ᯲ᯘᯂᯪ ᯑᯬ ᯉᯘ ᯉ ᯘᯬ ᯅᯪᯉᯬᯖᯬᯉ ᯀᯞᯤ ᯉ ᯅᯪᯉᯬᯖᯬᯉᯘᯪᯑ ᯘᯪᯀᯉ᯲ ᯅᯰᯄ᯦ᯬᯉ ᯂᯪᯀᯉ᯲ ᯘᯬᯝᯉᯬ᯲ ᯑᯪ ᯅᯪᯉᯖᯰ ᯉ ᯘᯬ ᯔᯒ᯲ᯒᯬᯂ ᯤ ᯤ ᯑᯬ ᯉ ᯔᯝᯎᯬ ᯉᯘᯪᯑ

1:11 Marjea ma nasida, ai didalani do dalan ni si Kain, gabe tarboan do nasida binahen ni upa sipaotooto ni si Bileam, jala mago dibahen paraloon ni si Kora. ᯔᯒ᯲ᯐᯩᯀ ᯔ ᯉᯘᯪᯑ ᯀᯤ ᯑᯪᯑᯞᯉᯪ ᯑᯬ ᯑᯞᯉ᯲ ᯉᯪ ᯘᯪ ᯄ᯦ᯀᯉᯪ᯲ ᯎᯅᯩ ᯖᯒ᯲ᯅᯬᯀᯉ᯲ ᯑᯬ ᯉᯘᯪᯑ ᯅᯪᯉᯂᯉᯩ᯲ ᯉᯪ ᯥᯇ ᯘᯪᯇᯀᯬᯖᯬᯀᯬᯖᯬ ᯉᯪ ᯘᯪ ᯅᯪᯞᯩᯀᯔ᯲ ᯐᯞ ᯔᯎᯬ ᯑᯪᯅᯂᯉᯩ᯲ ᯇᯒᯞᯬᯀᯉᯬ᯲ ᯉᯪ ᯘᯪ ᯄ᯦ᯬᯒ

1:12 Angka tihas do nasida, di na marsipanganon na badia hamu, angka na so mabiar gabe donganmuna sapanganan, angka na pamokmokkon dirina, angka ombun na so maraek, na niullus ni alogo, angka hau na rahar, na so marparbue, naung dua hali mate, angka naung maborgat; ᯀᯰᯄ᯦ ᯖᯪᯂᯘ᯲ ᯑᯬ ᯉᯘᯪᯑ ᯑᯪ ᯉ ᯔᯒ᯲ᯘᯪᯇᯝᯉᯉᯬ᯲ ᯉ ᯅᯑᯪᯀ ᯂᯔᯮ ᯀᯰᯄ᯦ ᯉ ᯘᯬ ᯔᯅᯪᯀᯒ᯲ ᯎᯅᯩ ᯑᯬᯝᯉ᯲ᯔᯮᯉ ᯘᯇᯝᯉᯉ᯲ ᯀᯰᯄ᯦ ᯉ ᯇᯔᯄ᯦ᯬ᯲ᯔᯄ᯦ᯬ᯲ᯂᯉᯬ᯲ ᯑᯪᯒᯪᯉ ᯀᯰᯄ᯦ ᯀᯔᯬ᯲ᯅᯉᯮ᯲ ᯉ ᯘᯬ ᯔᯒᯀᯄᯩ᯲ ᯉ ᯉᯪᯀᯞᯮ᯲ᯞᯘᯮ᯲ ᯉᯪ ᯀᯞᯬᯎᯬ ᯀᯰᯄ᯦ ᯂᯥ ᯉ ᯒᯂᯒ᯲ ᯉ ᯘᯬ ᯔᯒ᯲ᯇᯒ᯲ᯅᯮᯀᯩ ᯉᯀᯮᯰ ᯑᯮᯀ ᯂᯞᯪ ᯔᯖᯩ ᯀᯰᯄ᯦ ᯉᯀᯮᯰ ᯔᯅᯒᯬ᯲ᯎᯖ᯲

1:13 angka galumbang laut na riar, na margumogumohon hailaonna sandiri, angka bintang na lilu; holom ni na holom do dipadiri di nasida ro di salelenglelengna. ᯀᯰᯄ᯦ ᯎᯞᯔᯮ᯲ᯅᯰ ᯞᯀᯖᯮ᯲ ᯉ ᯒᯪᯀᯒ᯲ ᯉ ᯔᯒ᯲ᯎᯮᯔᯬᯎᯮᯔᯬᯂᯉᯬ᯲ ᯂᯤᯞᯀᯉᯬ᯲ᯉ ᯘᯉ᯲ᯑᯪᯒᯪ ᯀᯰᯄ᯦ ᯅᯉᯪ᯲ᯖᯰ ᯉ ᯞᯪᯞᯮ ᯂᯬᯞᯔᯬ᯲ ᯉᯪ ᯉ ᯂᯬᯞᯔᯬ᯲ ᯑᯬ ᯑᯇᯑᯪᯒᯪ ᯑᯪ ᯉᯘᯪᯑ ᯒᯬ ᯑᯪ ᯘᯞᯩᯞᯰᯩᯞᯩᯞᯰᯩᯉ

1:14 Nunga manurirangi taringot tu nasida Henok, papitusunduthon sian si Adam, ninna do: Nunga ro Tuhan i mardongan angka na badiana, na marloksaloksa, ᯉᯮᯝ ᯔᯉᯮᯒᯪᯒᯝᯪ ᯖᯒᯪᯝᯖᯬ᯲ ᯖᯮ ᯉᯘᯪᯑ ᯂᯩᯉᯄ᯦ᯬ᯲ ᯇᯇᯪᯖᯮᯘᯉᯮ᯲ᯑᯖᯮ᯲ᯂᯉᯬ᯲ ᯘᯪᯀᯉ᯲ ᯘᯪ ᯀᯑᯔ᯲ ᯉᯉᯪ᯲ᯉ ᯑᯬ ᯉᯮᯝ ᯒᯬ ᯖᯮᯂᯉ᯲ ᯤ ᯔᯒ᯲ᯝᯬᯝᯉ᯲ ᯀᯰᯄ᯦ ᯉ ᯅᯑᯪᯀᯉ ᯉ ᯔᯒ᯲ᯞᯄ᯦ᯬ᯲ᯘᯞᯄ᯦ᯬ᯲ᯘ

1:15 manguhumi saluhutna dohot maminsang saluhut parjahat, ala ni nasa ulaonnasida na jahat na binahennasida dohot ala ni saluhut hatanasida na tois, na hinatahon ni angka parjahat dompak Ibana. ᯔᯝᯮᯂᯮᯔᯪ ᯘᯞᯮᯂᯖᯮ᯲ᯉ ᯑᯬᯂᯖᯬ᯲ ᯔᯔᯉᯪ᯲ᯘᯰ ᯘᯞᯮᯂᯖᯮ᯲ ᯇᯒ᯲ᯐᯂᯖ᯲ ᯀᯞ ᯉᯪ ᯉᯘ ᯥᯞᯀᯉᯬ᯲ᯉᯘᯪᯑ ᯉ ᯐᯂᯖ᯲ ᯉ ᯅᯪᯉᯂᯉᯩ᯲ᯉᯘᯪᯑ ᯑᯬᯂᯖᯬ᯲ ᯀᯞ ᯉᯪ ᯘᯞᯮᯂᯖᯮ᯲ ᯂᯖᯉᯘᯪᯑ ᯉ ᯖᯬᯀᯘᯪ᯲ ᯉ ᯂᯪᯉᯖᯂᯉᯬ᯲ ᯉᯪ ᯀᯰᯄ᯦ ᯇᯒ᯲ᯐᯂᯖ᯲ ᯑᯔᯬ᯲ᯇᯄ᯦᯲ ᯤᯅᯉ

1:16 I ma angka parmungutmungut, angka siburai soro ni arina, alai huhut diulahon hahisaponnasida, dihatahon pamangannasida do hata manggang, jumpa mangellemellem marhata dompak, mambuat laba sian i. ᯤ ᯔ ᯀᯰᯄ᯦ ᯇᯒ᯲ᯔᯮᯝᯖᯮᯔᯮᯝᯖᯮ᯲ ᯀᯰᯄ᯦ ᯘᯪᯅᯮᯒᯤ ᯘᯬᯒᯬ ᯉᯪ ᯀᯒᯪᯉ ᯀᯞᯤ ᯂᯮᯂᯖᯮ᯲ ᯑᯪᯥᯞᯂᯉᯬ᯲ ᯂᯂᯪᯘᯇᯉᯬ᯲ᯉᯘᯪᯑ ᯑᯪᯂᯖᯂᯉᯬ᯲ ᯇᯔᯝᯉ᯲ᯉᯘᯪᯑ ᯑᯬ ᯂᯖ ᯔᯰᯎᯰ ᯐᯔᯮ᯲ᯇ ᯔᯝᯞᯩ᯲ᯞᯔᯩ᯲ᯀᯞᯩ᯲ᯞᯔᯩ᯲ ᯔᯒ᯲ᯂᯖ ᯑᯔᯬ᯲ᯇᯄ᯦᯲ ᯔᯔ᯲ᯅᯮᯀᯖ᯲ ᯞᯅ ᯘᯪᯀᯉ᯲ ᯤ

1:17 Alai hamu angka haholongan, ingot hamu ma hata angka naung nilumbahon ni angka apostel ni Tuhanta Jesus Kristus! ᯀᯞᯤ ᯂᯔᯮ ᯀᯰᯄ᯦ ᯂᯂᯬᯞᯬᯝᯉ᯲ ᯤᯝᯖᯬ᯲ ᯂᯔᯮ ᯂᯖ ᯀᯰᯄ᯦ ᯉᯀᯮᯰ ᯉᯪᯞᯔᯮ᯲ᯅᯂᯉᯬ᯲ ᯉᯪ ᯀᯰᯄ᯦ ᯀᯇᯘᯬ᯲ᯖᯞᯩ᯲ ᯉᯪ ᯖᯮᯂᯉ᯲ᯖ ᯐᯩᯘᯘᯮ᯲ ᯄ᯦᯲ᯒᯘᯪ᯲ᯖᯘᯮ᯲

1:18 Ai didok nasida do tu hamu: Di angka ari parpudi ro ma angka sipanginsahi, angka na mangulahon hahisapon, hajahaton ni rohanasida be. ᯀᯤ ᯑᯪᯑᯄ᯦ᯬ᯲ ᯉᯘᯪᯑ ᯑᯬ ᯖᯮ ᯂᯔᯮ ᯑᯪ ᯀᯰᯄ᯦ ᯀᯒᯪ ᯇᯒ᯲ᯇᯮᯑᯪ ᯒᯬ ᯔ ᯀᯰᯄ᯦ ᯘᯪᯇᯝᯉᯪ᯲ᯘᯂᯪ ᯀᯰᯄ᯦ ᯉ ᯔᯝᯮᯞᯂᯉᯬ᯲ ᯂᯂᯪᯘᯇᯉᯬ᯲ ᯂᯐᯂᯖᯉᯬ᯲ ᯉᯪ ᯒᯬᯂᯉᯘᯪᯑ ᯅᯩ

1:19 I ma angka pamolamola; mangolu do nian, alai ndang martondi. ᯤ ᯔ ᯀᯰᯄ᯦ ᯇᯔᯬᯞᯔᯬᯞ ᯔᯝᯬᯞᯮ ᯑᯬ ᯉᯪᯀᯉ᯲ ᯀᯞᯤ ᯉ᯲ᯑᯰ ᯔᯒ᯲ᯖᯉᯬ᯲ᯑᯪ

1:20 Alai hamu, angka haholongan, pauliuli hamu ma dirimuna di atas haporseaonmuna na badia situtu, jala martangiang di bagasan Tondi Parbadia! ᯀᯞᯤ ᯂᯔᯮ ᯀᯰᯄ᯦ ᯂᯂᯬᯞᯬᯝᯉ᯲ ᯇᯥᯞᯪᯥᯞᯪ ᯂᯔᯮ ᯔ ᯑᯪᯒᯮᯔᯮᯉ ᯑᯪ ᯀᯖᯘ᯲ ᯂᯇᯒᯬ᯲ᯘᯩᯀᯀᯉᯬ᯲ᯔᯮᯉ ᯉ ᯅᯑᯪᯀ ᯘᯪᯖᯮᯖᯮ ᯐᯞ ᯔᯒ᯲ᯖᯝᯪᯀᯰ ᯑᯪ ᯅᯎᯘᯉ᯲ ᯖᯉᯬ᯲ᯑᯪ ᯇᯒ᯲ᯅᯑᯪᯀ

1:21 Ramoti hamu ma dirimuna di bagasan holong ni roha ni Debata! Maimaima ma hamu di asi ni roha ni Tuhanta Jesus Kristus, asa sahat hamu tu hangoluan salelenglelengna. ᯒᯔᯬᯖᯪ ᯂᯔᯮ ᯔ ᯝᯪᯒᯪᯔᯮᯉ ᯑᯪ ᯅᯎᯘᯉ᯲ ᯂᯬᯞᯰᯬ ᯉᯪ ᯒᯬᯂ ᯉᯪ ᯑᯩᯅᯖ ᯔᯤᯔᯤᯔ ᯔ ᯂᯔᯮ ᯑᯪ ᯀᯘᯪ ᯉᯪ ᯒᯬᯂ ᯉᯪ ᯖᯮᯂᯉ᯲ᯖ ᯐᯩᯘᯘᯮ᯲ ᯄ᯦᯲ᯒᯘᯪ᯲ᯖᯘᯮ᯲ ᯀᯘ ᯘᯂᯖ᯲ ᯂᯔᯮ ᯖᯮ ᯂᯝᯬᯞᯮᯀᯉ᯲ ᯘᯞᯩᯞᯰᯩᯞᯩᯞᯰᯩᯉ

1:22 Ajari hamu ma angka na ganggu roha i! ᯀᯐᯒᯪ ᯂᯔᯮ ᯔ ᯀᯰᯄ᯦ ᯉ ᯎᯰᯎᯮ ᯒᯬᯂ ᯤ

1:23 Palua hamu ma nasida, rampas hamu ma nasida sian api; marasi ni roha ma hamu di na deba, huhut mabiar, hagigihon hamu ma nang abitna, naung niramunan ni sibukna. ᯇᯞᯮᯀ ᯂᯔᯮ ᯔ ᯉᯘᯪᯑ ᯒᯔ᯲ᯇᯘ᯲ ᯂᯔᯮ ᯔ ᯉᯘᯪᯑ ᯘᯪᯀᯉ ᯀᯇᯪ ᯔᯒᯘᯪ ᯉᯪ ᯒᯬᯂ ᯔ ᯂᯔᯮ ᯑᯪ ᯉ ᯑᯩᯅ ᯂᯮᯂᯖᯮ᯲ ᯔᯅᯪᯀᯒ᯲ ᯂᯎᯪᯎᯪᯂᯉᯬ᯲ ᯂᯔᯮ ᯔ ᯉᯰ ᯀᯅᯖᯪ᯲ᯉ ᯉᯀᯮᯰ ᯉᯪ ᯒᯔᯮᯉᯉ᯲ ᯉᯪ ᯘᯪᯅᯄ᯦ᯮ᯲ᯉ

1:24 Alai hasangapon ma di Ibana na margogo mangaramoti hamu, unang tinggang, jala pajongjongkon hamu marolopolop, so martihas, tu adopan ni hasangaponna! ᯀᯞᯤ ᯂᯘᯝᯇᯉᯬ᯲ ᯔ ᯑᯪ ᯤᯅᯉ ᯉ ᯔᯒ᯲ᯎᯬᯎᯬ ᯔᯝᯒᯔᯬᯖᯪ ᯂᯔᯮ ᯥᯉᯰ ᯖᯰᯪᯎᯰ ᯐᯞ ᯇᯐᯰᯬᯐᯰᯬᯄ᯦ᯉᯬ᯲ ᯂᯔᯮ ᯔᯒᯬᯞᯇᯬ᯲ᯀᯬᯞᯇᯬ᯲ ᯘᯬ ᯔᯒ᯲ᯖᯪᯂᯘ᯲ ᯖᯮ ᯀᯑᯬᯇᯉ᯲ ᯉᯪ ᯎᯘᯝᯇᯉᯬ᯲ᯉ

1:25 Di Debata na sasada i, na paluahon hita marhitehite Jesus Kristus, Tuhanta i, di Ibana ma hasangapon, hamuliaon, hagogoon dohot parhuasoon sian mula ni mulana, nang nuaeng, nang ro di salelenglelengna! Amen. ᯑᯪ ᯑᯩᯅᯖ ᯉ ᯘᯘᯑ ᯤ ᯉ ᯇᯞᯮᯀᯂᯉᯬ᯲ ᯂᯪᯖ ᯔᯒ᯲ᯂᯪᯖᯩᯂᯪᯖᯩ ᯐᯩᯘᯘᯮ᯲ ᯄ᯦᯲ᯒᯘᯪ᯲ᯖᯘᯮ᯲ ᯖᯮᯂᯉ᯲ᯖ ᯤ ᯑᯪ ᯤᯅᯉ ᯔ ᯂᯘᯝᯇᯉᯬ᯲ ᯂᯔᯮᯞᯪᯀᯀᯉᯬ᯲ ᯂᯎᯬᯎᯬᯀᯉᯬ᯲ ᯑᯬᯂᯖᯬ᯲ ᯇᯒ᯲ᯂᯮᯀᯘᯬᯀᯉᯬ᯲ ᯘᯪᯀᯉ᯲ ᯔᯮᯞ ᯉᯪ ᯔᯮᯞᯉ ᯉᯰ ᯉᯮᯀᯀᯰᯩ ᯉᯰ ᯒᯬ ᯑᯪ ᯘᯞᯩᯞᯰᯩᯞᯩᯞᯰᯩᯉ ᯀᯔᯉᯩ᯲