Buku Nehemia

Nehemia ᯉᯩᯂᯩᯔᯪᯀ 1

1:1 On ma angka jamita sian si Nehemia, anak ni si Hakalia. Masa do di bulan sipahasia paduapulutaonhon, tongon ahu di huta Susan, di bagasan jabu ni rajai. ᯀᯉᯬ᯲ ᯔ ᯀᯰᯄ᯦ ᯐᯔᯪᯖ ᯘᯪᯀᯉ᯲ ᯘᯪ ᯉᯩᯂᯩᯔᯪᯀ ᯀᯉᯄ᯦᯲ ᯉᯪ ᯘᯪ ᯂᯄ᯦ᯞᯪᯀ ᯔᯘ ᯑᯬ ᯑᯪ ᯅᯮᯞᯉ᯲ ᯘᯪᯇᯂᯘᯪᯀ ᯇᯑᯮᯀᯇᯮᯞᯮᯖᯀᯉᯬ᯲ᯂᯉᯬ᯲ ᯖᯬᯝᯉᯬ᯲ ᯀᯂᯮ ᯑᯪ ᯂᯮᯖ ᯘᯮᯘᯉ᯲ ᯑᯪ ᯅᯎᯘᯉ᯲ ᯐᯅᯮ ᯉᯪ ᯒᯐᯤ

1:2 Jadi ro ma si Hanani, sada sian hahaanggingku rap dohot deba baoa sian Juda, gabe hupauso tu nasida pangalaho ni halak Jahudi, angka na malua, angka na teba sian halak na tarbuang dohot pangalaho ni Jerusalem.

1:3 Dung i ninna nasida ma tu ahu: Pasipasi ni jolma, angka na tinggal sian halak na tarbuang, marpardangolan godang nasida di luat i, jala marhaurahon, ai nunga marbungbungan angka parik ni Jerusalem, jala pintu harbanganna nunga ditutung dohot api.

1:4 Jadi dung hubege barita i, hundul ma ahu laos tumatangis, margudompong ahu pola nania leleng, jala marpuasa ahu dohot martangiang di adopan ni bohi ni Debata na di surgo.

1:5 Ningku ma: Iale Jahowa, Debata na di surgo, Ho do Debata na timbul jala na songkal, na tongtong marningot padan dohot asi ni roha tu halak na mangkaholongi Ibana, jala na mangaradoti angka tonana!

1:6 Sai patinggil ma pinggolmu jala tonggor matam tumangihon tangiang ni naposomon, na hutangiangkon nuaeng di adopanmi borngin dohot arian mangondihon halak Israel, angka naposomi, huhut ahu manopoti angka dosa ni halak Israel, angka na hubahen hami dompak Ho. Nang ahu, nang pinompar ni damang, nunga mardosa hami.

1:7 Tung na marroha mago situtu hami marparulaon dompak Ho, ala so huradoti hami tona, aturan dohot uhum angka na tinonahonmu tu si Musa naposom.

1:8 Alai sai ingot ma hata na tinonahonmu tu si Musa naposom, uju na nidokmu: Molo dituntun hamu mardosa, paserahonku ma hamu tu tongatonga ni angka bangso.

1:9 Alai molo mulak rohamuna tu Ahu, jala diradoti dohot diulahon hamu angka tonangku, nang tung sura naung ambolong hamu sahat ro di ujung ni langit, sai papunguonku do hamu sian i, jala mulak hamu boanonku tu inganan naung hupillit bahen inganan ni Goarhu.

1:10 Angka naposom do nasida tongon jala bangsom, naung pinaluam i marhitehite hagogoon godang dohot marhitehite tanganmu na gogo sahali.

1:11 Iale Tuhan! Sai patinggil ma pinggolmu tumangihon tangiang ni naposomon dohot tangiang ni naposom, angka na lomo roha marhabiaran tu Goarmu, sai manumpak ma Ho di langka ni naposomon sadarion, asa jumpangan asi ni roha ahu di adopan ni rajai! Ai sitahu anggur ni rajai do ahu.

Nehemia 2

2:1 Alai masa ma di bulan Nisan, paduapulutaonhon hinarajahon ni raja Artasasta, tongon adong anggur di adopanna, gabe hubuat ma anggur i jala hulehon tu rajai; ndang dung surbot panailingku di adopanna anggo na sai laonna i.

2:2 Dung i ninna rajai ma tu ahu: Boasa songon i surbot panailim? Nda tung adong sahitmu? Ndang tahe rupa adong do arsak ni roham! Jadi mabiar situtu ma ahu.

2:3 Ningku ma mandok rajai: Sai mangolu ma rajai ro di salelenglelengna! Boasa so surbot panailingku? Ia huta bagas parbandaan ni angka daompung, nunga tarulang, jala nunga masurbu pintu harbanganna dohot api.

2:4 Dung i ninna rajai ma tu ahu: Apala nuaeng pinangidom? Jadi martangiang ma rohangku di bagasan tu Debata na di surgo!

2:5 Dung i ningku ma mandok rajai: Molo tung denggan di roha ni rajai jala lomo roham ahu naposomon di adopanmu, sai suruhon ma ahu tu tano Juda, tu huta parbandaan ni angka daompung, asa hupauli.

2:6 Dung i ninna rajai ma tu ahu, nang jolma ni rajai na marhabangsa di lambungna: Sadia laon tagamon pardalanonmu, jala andigan ho mulak? Jadi denggan ma di roha ni rajai marsuru ahu dung hubuhul janjina.

2:7 Alai ningku ma mandok rajai: Molo tung denggan di roha ni rajai, dilehon ma nian tu ahu angka surat boanonku tu pangarajai ni luat di bariba ni batang aek i, asa dipataru nasida ahu, paima sahat tu tano Juda.

2:8 Angkup ni sada surat tu Asap, sijaga porlak ni rajai, asa dilehon tu ahu hau bahen gulanggulang ni pintu harbangan ni huta i mardonokkon joro i dohot bahen parik ni huta i dohot bahen parhau ni bagas siingananku. Dung i dilehon rajai ma surat i tu ahu, hombar tu panogunoguon ni tangan ni Debata na basa i di ahu.

2:9 Jadi dung sahat ahu tu angka pangarajai ni luat na di bariba ni batang aek i, hupasahat ma tu nasida angka surat tinongos ni rajai. Mardongan partogi ni parangan dohot jolma parsihundul ahu hian dibahen rajai.

2:10 Alai dung dibege Sambalat, halak Horon i dohot Tobia naposo i sian halak Amon barita i, sogo situtu ma rohanasida disi, ala adong ro sahalak mangalului hasonangan ni halak Israel.

2:11 Jadi dung sahat ahu tu Jerusalem, jala dung tinggal ahu disi tolu ari lelengna.

2:12 Hehe ma ahu bornginna i rap dohot deba angka baoa; alai ndang hupaboa tu manang ise jolma manang aha naung niaturhon ni Debatangku tu bagasan rohangku, na naeng bahenonku di Jerusalem; jala ndang mardongan hoda parhuli ahu nanggo sada, dungkon ni na huhunduli.

2:13 Dung i ruar ma ahu bornginna i sian bahal rura tole muse sian jolo ni sumur naga, boti tu bahal partangkalan; dung i hutangkasi ma angka parik ni Jerusalem, naung marbungbungan dohot pintu harbanganna naung matutung dibahen api.

2:14 Dung i taripar ma ahu tu bahal parmualan dohot tu tobat ni rajai, alai tahe sungkot do hoda i mardalan anggo di atasna ahu.

2:15 Laos bornginna i ahu nangkok sian rura i asa hutangkasi parik i, dung i mulak ahu jala masuk sian bahal rura laho muli.

2:16 Alai anggo angka induk ni huta i ndang diboto manang dompak dia ahu mardalan, jala manang aha na naeng bahenonku, ai rasirasa nuaeng ndang marboaboa ahu tu halak Jahudi, tu angka malim pe, tu halak na sangap, tu angka induk pe, ro di halak na asing, angka na mangula ulaon i.

2:17 Dung i ningku ma mandok nasida: Nunga diida hamu hinamago na songgop tu hita, naung tarulang i Jerusalem jala masurbu pintu harbanganna dibahen api; tole ma hita mangulahi pajongjong parik ni Jerusalem, asa unang be marhaurahon hita!

2:18 Dung i hubaritahon ma tu nasida panogunoguon ni tangan ni Debata, na basa i di ahu; angkup ni hata ni rajai angka na pinaboana i tu ahu. Dung i ninna nasida ma: Hehe ma hita tutu manolehon pajongjongkon muse! Jadi manggogo ma tangannasida mangaringkoti ulaon na denggan i.

2:19 Alai dung dibege Sambalat, halak Horon i dohot Tobia naposo i, sian halak Amon dohot Gesem halak Arab, barita i, mangelak ma nasida di hami, jala marro ni lea, angka didok ma hata dia do on na binahenmuna i? Naeng ulahanmuna manggunturi dompak rajai?

2:20 Alai ningku ma mangalusi nasida: Debata na di surgo i, Ibana manumpak ulaonnami saut, ala ni umbahen hehe muse anggo hami naposona i pajongjongkon; alai anggo hamu ndang martohap manang nampuna hatigoran dohot parningotan di Jerusalem.

Nehemia 3

3:1 Dung i hehe ma sintua ni malim Eliasib rap dohot angka malim hahaanggina i, pajongjongkon bahal birubiru, laos diparbadiai ma i jala dipajongjong angka pintuna, diparbadiai nasida ma i sahat ro di palaspalas Mea, sahat ro di palaspalas Hananel.

3:2 Di lambungnasida muse mangula halak Jeriko, di lambung ni muse mangula si Sakur, anak ni si Imri.

3:3 Alai anggo bahal pardengkean, pinompar ni si Sena pajongjongkon; dibahen nasida ma gulanggulangna, dipajongjong dohot angka pintuna ro di panggomalna dohot ransangransangna dipauli.

3:4 Di lambungnasida muse mangumban si Meremot, anak ni si Uria, anak ni si Hakos; di lambungnasida muse mangumban si Mesulam, anak ni si Berekia, anak ni si Mesezabeel: Di lambungnasida muse mangumban si Sadok, anak ni si Baana.

3:5 Di lambungnasida muse mangumban halak Tekoa, alai anggo halak na sangap sian nasida ndang ditarehon tangkuhukna mangunduk ulaon ni tuanna i.

3:6 Ia harbangan ni huta bagasan diumban si Joiada, anak ni si Pasea dohot si Mesulam, anak ni si Besodeia; digulanggulang nasida do i jala dipajongjong angka pintuna, ro di panggomalna dohot ransangransangna.

3:7 Di lambungnasida muse mangumban si Melaja halak Gibeon i dohot si Jalon, halak Meronot i rap dohot angka baoa sian Gibeon dohot Mispa sahat ro di habangsa paruhuman ni pangarajai di bariba ni batang aek i.

3:8 Di lambungna muse mangumban si Usiel, anak ni si Harhaia rap dohot halak panopa; di lambungna muse mangumban si Hanania, anak ni sada pande pauli miak na hushus; alai songon i dipasombu nasida Jerusalem sahat ro di parik na lambas.

3:9 Di lambungnasida muse mangumban si Repaia, anak ni si Hur, induk ni satonga bagian Jerusalem.

3:10 Di lambungnasida muse mangumban si Jedaia, anak ni si Harumap, tondong ni jabuna; di lambungna muse mangumban si Hantus, anak ni si Hasabneya.

3:11 Alai dua talian do anggo diumban si Malkia, anak ni si Harim, dohot si Hasub, anak ni si Pahat-Moab, tole muse palaspalas pamurunan.

3:12 Di lambungna muse mangumban si Sallum, anak ni si Hallohes, induk ni satonga bagian Jerusalem, ibana rap dohot angka boruna.

3:13 Ia bahal rura diumban si Hanun dohot jolma isi ni Sanoa; dipajongjong nasida do i ro di pintuna, panggomalna dohot ransangransangna, pola saribu asta olat ni parik i sahat ro di bahal partangkalan.

3:14 Alai anggo bahal partangkalan diumban si Malkia, anak ni si Rekab, induk ni bagian Bethakkerem; ibana pajongjongkon ro di pintuna panggomalna dohot ransangransangna.

3:15 Ia bahal parmualan diumban si Sallum, anak ni si Kalhose, induk ni bagian Mispa; ibana pajongjongkonsa, manggulanggulangi, mambahen angka pintuna, panggomalna dohot ransangransangna; tole muse parik ni ambar Siloam mardonokkon porlak ni rajai, sahat ro di tagahambing angka na tuat sian huta ni si Daud.

3:16 Dung ibana mangumban si Nehemia, anak ni si Asbuk, induk ni satonga bagian Betzur, sahat tu tondong ni parbandaan ni si Daud, sahat muse tu ambar na pinauli, sahat muse tu bagas ni angka ulubalang.

3:17 Dung ibana mangumban halak Lepi, si Rehum, anak ni si Bani; di lambungna muse mangumban si Hasabya, induk ni satonga bagian Keila, bagianna i.

3:18 Dung ibana mangumban angka hahaanggina si Baoa i, anak ni si Henadad, induk ni satonga bagian nari sian Keila.

3:19 Di lambungna muse mangumban si Eser, anak ni si Jesua, induk di Mispa dua talianna patondong be laho nangkok tu bagas parsinjataan tungkan suhisuhi.

3:20 Dung ibana mangumban mansai jugul si Baruk; anak ni si Sabai dua talianna sian suhisuhi sahat ro di pintu bagas ni sintua ni malim Eliasib.

3:21 Dung ibana mangumban si Meremot, anak ni si Uria, tubu ni si Hakos dua talianna sian pintu jabu ni si Eliasib sahat ro di ujung ni jabu ni si Eliasib.

3:22 Dung ibana mangumban malim, angka na maringan di tano adaran.

3:23 Dung nasida mangumban si Benjamin dohot si Hasub tondong ni bagasna; dung nasida mangumban si Azaria, anak ni si Maaseia, tubu ni si Anania di lambung jabuna sandiri.

3:24 Dung ibana mangumban si Binnui, anak ni si Henadad, dua talianna, olat ni jabu ni si Azaria, sahat ro di ujung ni suhisuhi.

3:25 Ia si Palal, anak ni si Usai mangumban tondong ni suhisuhi dohot palaspalas, na tumimbo sian jabu ni rajai, mardonokkon alaman ni hurungan; dung ibana si Pedaya, anak ni si Paras.

3:26 (Alai anggo halak Netinim maringan do di Opel sahat ro ditondong ni bahal partuaehan tungkan hasundutan, sahat ro di palaspalas na timbo.)

3:27 Dung nasida mangumban halak Tekoa, dua talianna, olat ni palaspalas na timbo i sahat ro di parik Opel.

3:28 Olat ni bahal hoda mangumban angka malim, ganup tondong ni jabuna be.

3:29 Dung ibana mangumban si Sadok, anak ni si Immer tondong ni jabuna; dung ibana mangumban si Semaya, anak ni si Sekania, sijaga bahal habinsaran.

3:30 Dung ibana mangumban si Hanania, anak ni si Selemia dohot si Hanun, anak ni si Salap paionom dua talianna. Dung ibana mangumban si Mesulam, anak ni si Berekia, tondong ni bilutna.

3:31 Dung ibana mangumban si Malkia, anak ni panopa i sahat ro di jabu ni halak Netinim dohot partigatiga, tondong ni bahal parhalan, sahat tu bilut parginjang di suhisuhi.

3:32 Anggo di holangholang ni bilut parginjang di suhisuhi dohot bahal birubiru mangumban angka panopa dohot partigatiga.

3:33 Alai dung dibege si Sambalat, tole hita hape pauli parik i, marsigorgor ma rimasna jala gusar situtu jala mangelak ma ibana di halak Jahudi.

3:34 Ninna ma di adopan ni hahaanggina dohot angka parangan di Samaria, didok ma: Aha do ulaning na binahen ni halak Jahudi, angka na malasi? Pasombuonta nasida ulaning? Saut do ulaning nasida mamele? Marujung do i ulaning bahenonna manang andigan? Huaranna muse ulaning angka batu sian timbunan, angka naung minosokkon?

3:35 Alai di lambungna do anggo si Tobia, halak Amoni, jala ninna ma: Loas didatdati nasida pauliulihon, sada pe antuasu manimbung parik batu i, pintor magargar do bahenonna.

3:36 Iale Debatanami! Sai tangihon ma pangaleaina i di hami, jala baloshon tu ulunasida leanasida i, jala pasahat nasida ripe pupuson di bagasan tano habuangan!

3:37 Jala unang ma marpangulahi roham mida hajahatonnasida i, jala unang nian sesa dosanasida i sian adopanmu! Ai nunga dipahehe nasida rimasmu di adopan ni halak na mangula.

3:38 Alai sai hudatdati hami do pajongjongkon parik i, nunga pola mardomu sandok parik i satonga timbona, ai lam dihamurukkon situan na torop i ulaon i.

Nehemia 4

4:1 Alai dung dibege si Sambalat, si Tobia, halak Arab, halak Amoni dohot halak Asdodi, lam simpan hape angka parik ni Jerusalem, nunga pola mamungka tutup angka bungbungna na sai laon, gabe tarrimas situtu nasida.

4:2 Rap marbulan ma nasida sude mangondam ro marporang dompak Jerusalem, asa manggaori huta i nian.

4:3 Alai martangiang do anggo hami tu Debatanami jala hupajongjong hami angka parhal mangalo nasida arian dohot borngin, asa unang dirampok nasida hami.

4:4 Dung i didok halak Juda ma: Nunga surut gogo ni halak parhuli jala godang dope turanggong i, dibahen i ndang tarbahen hita pasunhon parik i.

4:5 Alai roha ni angka alonta mandok: Ndang jadi botoonnasida, jala ndang jadi idaonna manang aha, paima sahat hita tu tongatonganasida, asa mangaragehon nasida jala manundati ulaonnasida i.

4:6 Alai dung ro deba halak Jahudi, angka na maringan di lambungnasida i, palumba hami pola sampulu hali taringot tu saluhut inganan, haroroan ni musu dompak hami.

4:7 Jadi hupajongjong hami ma halak situan na torop mangihuthon partubuna bahen parjaga di inganan angka na rumodop, di pudi ni parik i huhut patioptiop podang, hujur dohot sior.

4:8 Jadi dung hutangkasi, hehe ma ahu, huhut mandok tu halak na sangap dohot tu angka induk dohot tu pasipasi ni halak situan na torop: Unang hamu mabiar mida nasida, sai paingotingot hamu ma Tuhan i na timbul jala na songkal sahali, jala marporang ma hamu humongkop hahaanggimuna, angka anakmuna dohot borumuna, jolmamuna dohot bagasmuna.

4:9 Alai dung tarbortik dibege angka musunami naung huboto hami hape luhutna i, jala naung disundati Debata tahinasida i, mulak ma hami sude manahopi parik i, ganup tu ulaonna be.

4:10 Jadi olat ni ari na sasada i marsatonga nama angka naposongku mangula ulaon i, anggo na satonganari nasida patioptiop hujur, lombulombu, sior, jala marbaju partahanan; jala angka induk i jongjong di pudi ni sandok pinompar ni Juda.

4:11 Ia halak angka na pajongjong parik i dohot halak na mangkuli tano dohot halak na pausungkon, tanganna na sada dipangke mulaulaon, jala tanganna na sadanari patioptiop sinjata.

4:12 Ai sude halak na tole mulaulaon manandang be podangna, laos songon i mangula; jala halak na mamalu sangka jongjong di lambungku.

4:13 Ai ningku ma tu halak na sangap dohot tu angka induk dohot tu pasipasi ni na torop i: Godang do ulaon i jala lambas jala mampar di atas parik i do hita, ganup holang sian donganna.

4:14 Manang sian inganan dia dibege hamu soara ni sangka i, ingkon tusi ma hamu marpungu mandapothon hami! Debatanta i do anggo marporang humongkop hita!

4:15 Antong tole be ma hita mangaringkoti ulaon i. Jadi satonga sian nasida patioptiop hujur sian andos torang sahat ro di na mullop angka bintang.

4:16 Angkup ni hudok uju i tu situan na torop i: Ingkon ganup hita marborngin di Jerusalem rap dohot naposona be, asa marhal hita ia bornginna i, jala mangaringkoti ulaon ia arian.

4:17 Alai nang ahu, nang angka hahaanggingku, nang angka naposongku, nang angka baoa parhal, angka na mangihuthon tu ahu, ndang dung hutanggali hami ulosnami; ganup patioptiop sinjatana laho haduru.

Nehemia 5

5:1 Dung i mangangguk badar ma situan na torop i ro di jolmanasida dompak hahaangginasida, halak Jahudi:

5:2 Ai adong do deba na mandok: Torop do hami, nang anaknami dohot borunami, salionnami ma eme, asa mangan hami jala mangolu.

5:3 Alai anggo na deba mandok: Ingkon lehononnami na ma haumanami, porlak anggurnami dohot bagasnami bahen singkoram, asa tarbahen hami manuhor eme managam haleon.

5:4 Adong muse deba angka na mandok: Nunga huurang hami hepeng bahen garar ni rundo tu rajai, haumanami dohot porlak anggurnami singkoramna.

5:5 Nuaeng pe, ia songon i sibuk ni hahaangginami, songon i do sibuknami, angka anaknami pe laos songon anaknasida do; hape ida ma, ingkon lehononnami nama anaknami dohot borunami bahen hatoban, nunga pola mangadop deba sian borunami, jala marhagogoon Debata tangannami; haumanami pe dohot porlak anggurnami nunga sahat tu halak na asing.

5:6 Jadi tarrimas situtu ma ahu, dung hubege angguhangguknasida dohot alualunasida i.

5:7 Jadi marpingkir ma rohangku di bagasan, laos mangonai hata ma ahu tu halak na sangap dohot tu angka induk, ningku ma mandok nasida: Nunga manjalo bunga ni hepeng hamu hape ganup sian hahaanggina? Jadi hupaluhut ma sada luhutan na balga mangalo nasida.

5:8 Dung i ningku ma mandok nasida: Nunga pola hita manobus hahaangginta, halak Jahudi, angka naung targadis tu halak parbegu, hombar tu gogonta be; dohot hamu naeng manggadis hahaanggimuna i, laos manggadis tu hita tahe? Jadi sip be ma nasida ndang haalusansa.

5:9 Dung i ningku ma: Ndang denggan pambahenanmuna i! Nda ingkon marhabiaran tu Debatanta hita nian tama marparange ala ni panginsahion ni halak parbegu musunta i?

5:10 Nang ahu, nang hahaanggingku dohot angka naposongku, nunga hupasali hami nasida perak dohot eme; ua itasalesehon ma utangon.

5:11 Ua paulak hamu ma tu nasida sadarion haumanasida, porlak anggurnasida, porlak Jetun nasida dohot bagasnasida, ro di bunga ni hepeng, eme, anggur dohot miak, naung tinunggumuna sian nasida.

5:12 Dung i ninna nasida ma: Olo ma hami paulakkon, jala ndang be tungguonnami sian nasida, bahenonnami ma songon na nidokmi. Dung i hujou ma angka malim, laos hupatolon ma nasida, asa bahenonna hombar tu hata i.

5:13 Angkup ni hupaspas ma parandoraan ni bajungku huhut hudok: Sai songon i ma paspason ni Debata ganup jolma na so mangkajongjongkon hata on, sian jabuna dohot sian artana, ingkon songon i ibana tarpaspas, jala luangan. Dung i sandok luhutan i mandok: Amen! Jala dipuji nasida Jahowa; halak situan na torop i pe diulahon do hombar tu hata i.

5:14 Angkup ni olat ni ari na pinabangkit ni rajai ahu gabe pangarajai di tano Juda sian taon duapulu sahat ro di taon tolupulu dua, hinarajahon ni raja Artasasta, pola sampulu dua taon lelengna, ndang dung hupangan upa jambar ni pangarajai hian, angka hahaanggingku pe songon i.

5:15 Ai pangarajai angka na jumolo sian ahu pasiaksiak situan na torop i, ai dijaloi do sian nasida sipanganon dohot anggur, angkup ni opatpulu sekkel perak; tole angka naposonasida roharohana do mangarupa situan na torop i; alai anggo ahu ndang songon i hubahen, ala ni biar mida Debata.

5:16 Lam dohot do ahu manggogo ulaon mangumban parik on, ndang adong hutuhor hami hauma nanggo santurpuk; sude tahe dolidoli angka naposongki marpungu disi mangaringkoti ulaon.

5:17 Balik ahu marmudumudu halak Jahudi dohot angka induk, pola saratus limapulu halak toropna, ro di baoa angka na ro mandapothon hami sian bangso parbegu, angka na humaliang hami.

5:18 Suda do dihobas di ahu ganup ari: Sada jonggi, onom birubiru, angka na pinamokmok, tole angka pidong dihobas di ahu, tole ganup sampulu ari anggur marragamragam mansai godang; alai atik pe songon i ndang hupangido upa, jambar ni pangarajai hian, ai dokdok do ulaon rodi hian di situan na torop i.

5:19 Sai ingot ma, ale Debatangku, manumpakkon na denggan tu ahu, bahen balos ni sude na hubahen i tu situan na toropon.

Nehemia 6

6:1 Jadi dung tarbortik tu si Sambalat, si Tobia dohot si Gesem, halak Arab i, tarbortik dohot tu musunami angka na asing, barita ni naung sun hupauli angka parik i, jala ndang adong be bungbungna nanggo sada tinggal disi, alai tutu ndang dope sanga anggo hinsuhinsu ni pintu harbangan pinamasuk.

6:2 Disuru si Sambalat dohot si Gesem ma suruanna mandok tu ahu: Ro ho jolo asa rap martuptup hita di bagasan huta angka na di rura Ono; alai anggo sangkap ni rohanasida naeng mambahen na so uhum tu ahu.

6:3 Alai suruanku ma husuru mandok tu nasida: Mansai rosros ulaon godang na huula on, dibahen i ndang tarbahen ahu tuat; boasa tagonan sulon ulaon on, molo hutadingkon i, jala tuat mandapothon hamu?

6:4 Alai pola opat hali padodot songon i disuru nasida suruanna tu ahu, sai songon i do alushu tu nasida.

6:5 Dung i disuru si Sambalat ma palimahalihon songon i tu ahu naposona patioptiop di bagasan tanganna sada surat na ungkap.

6:6 Tarsurat do di bagasan i songon on: Mehet do barita di tongatonga ni angka parbegu, jala si Gesem, paboahon, ho dohot halak Jahudi ninna marsangkap naeng marbalik, ala ni umbahen dipajongjong ho parik i, jala ho bangkit rajanasida, ninna barita i.

6:7 Nunga pola dipabangkit ho angka panurirang, asa nasida martingting di Jerusalem taringot tu ho songon on: Ibana ma raja di Juda! Nuaeng pe sai na sahat do barita i tu rajai, dibahen i ro ma ho, asa rap martuptup hita.

6:8 Alai husuru muse suruanku mandok tu ibana: Ndang na tutu hatahata ni barita i, na tinuhashonmu, na tubu di bagasan roham sambing do hatahata i.

6:9 Ai sude nasida naeng mambiarbiari hami, ninna rohanasida: Pasohoton ni tangannasida ma ulaon i gabe unang saut diulahon. Dibahen i, ale Tuhan, sai lam pargogoi ma tanganku!

6:10 Dung i sahat ma ahu tu bagasan jabu ni si Semaya, anak ni si Delaia, anak ni si Mehetabel, hape tarhurung ibana, ninna ma: Marpungu ma hita tu joro ni Debata, apala tu tongatonga ni joro i, jala hinsuonta ma angka pintu ni joro i, ai na ro ma nasida naeng manodos ho, bornginna i tahe nasida ro naeng manodos ho.

6:11 Alai ningku ma: Tung maporus ma baoa songon ahu on, jala tung ise ma songon ahu on masuk tu bagasan joro, laos mangolu tarbahensa? Ndang olo ahu masuk tusi.

6:12 Ai ditanda rohangku do, ndada rupa Debata marsuru ibana, didok pe hata panurirangon i palumba ahu, ala naung diupai si Tobia dohot si Sambalat ibana.

6:13 Ala ni do umbahen na niupaan ibana, asa mabiar ahu di rohana, laos hubahen songon na nidokna i, asa mardosa ahu, asa pabaubau goarhu, asa insahanna ahu.

6:14 Ale Debatangku, sai baloshon ma tu si Tobia dohot tu si Sambalat, hombar tu angka pambahenannaon, nang tu boruboru panurirang Noaja dohot tu panurirang na asing, angka na naeng mambiarbiari ahu!

6:15 Jadi sidung ma parik i di ari duapulu lima bulan Elul, di bagasan limapulu dua borngin.

6:16 Jadi dung dibege saluhut musunami barita i, jala diida sude bangso parbegu, angka na humaliang hami, margudompong situtu ma rohanasida, ai mananda be ma nasida, Debatanta do hape manumpak saut ulaon on.

6:17 Manongos surat huhut uju i torop halak Jahudi, angka na umboto surat angka na mandapothon si Tobia dohot surat angka na ro sian si Tobia mandapothon nasida.

6:18 Ai torop halak Juda saparbulanan dohot ibana, ala marsimatua ibana tu Sekania, anak ni si Ara jala si Johanan anakna i mambuat boru ni si Mesulam, anak ni si Berekia.

6:19 Angkup ni sai dipapujipuji nasida pangalaho na denggan sian ibana di jolongku, jala angka hatangku dipasahat nasida tu ibana; manongos surat huhut si Tobia naeng mambiarbiari ahu.

Nehemia 7

7:1 Jadi dung sidung pinauli parik i, hupamasuk ma huhut pintu harbangan, jala pinarose huhut angka sijaga pintu, parende dohot halak Lepi.

7:2 Dung i hupasahat ma tu si Hanani, anggingki dohot tu si Hanania induk ni benteng i, asa parentaonna Jerusalem, ai halak na marroha hasintongan do ibana, jala mabiar mida Debata gumodang sian torop halak.

7:3 Dung i ningku ma mandok nasida: Ndang jadi ungkapon pintu harbangan ni Jerusalem, nda jolo las ari; jala andorang disi dope jongjong angka parhali, ingkon hinsuon angka pintu harbangan i, jala momos sordahon; jala pajongjongon angka parhal sian halak isi ni Jerusalem, ganup jongjong di parhalanna, jala ganup tondong ni jabuna be.

7:4 Alai mansai lambas huta i tu lambung be, jala bolon; alai otik do anggo jolma pangisina, jala ndang adong dope dipauli angka jabu.

7:5 Dung i dipatubu Debatangku ma tu bagasan rohangku papunguhon halak na sangap dohot angka induk dohot situan na torop i manurathon nasida mangihuthon partubuna, gabe jumpang ahu ma sada buku aturan ni partubu ni angka na nangkok parjolo, jala jumpang ahu tarsurat disi:

7:6 On ma angka jolma marluatluat, angka naung nangkok sian habuangan, angka na binuangkon ni si Nebukadnesar, raja sian Babel, gabe mulak nasida tu Jerusalem dohot tu Juda, ganup tu hutana be.

7:7 Angka na ro rap dohot si Serubabel, si Josua, si Nehemia, si Azaria, si Raamya, si Nahamani, si Mordahai, si Bilsan, si Misperet, si Bigpai, si Nehum dohot si Baana. On do bilangan ni angka baoa sian bangso Israel:

7:8 Pinompar ni si Paras dua ribu saratus pitupulu dua halak.

7:9 Pinompar ni si Sepatia tolu ratus pitupulu dua halak.

7:10 Pinompar ni si Ara onom ratus limapulu dua halak.

7:11 Pinompar ni si Pahat-Moab, sian pinompar ni si Jesua dohot si Joab dua ribu ualu ratus sampulu ualu halak.

7:12 Pinompar ni si Elam saribu dua ratus limapulu opat halak.

7:13 Pinompar ni si Jattu ualu ratus opatpulu lima halak.

7:14 Pinompar ni si Sakai pitu ratus onompulu halak.

7:15 Pinompar ni si Binnui onom ratus opatpulu ualu halak.

7:16 Pinompar ni si Bebai onom ratus duapulu ualu halak.

7:17 Pinompar ni si Asgad dua ribu tolu ratus duapulu dua halak.

7:18 Pinompar ni si Adonikam onom ratus onompulu pitu halak.

7:19 Pinompar ni si Bigpai dua ribu onompulu pitu halak.

7:20 Pinompar ni si Adin onom ratus limapulu lima halak.

7:21 Pinompar ni si Ater sian si Hiskia siapulu ualu halak.

7:22 Pinompar ni si Hasum tolu ratus duapulu ualu halak.

7:23 Pinompar ni si Bisia tolu ratus duapulu opat halak.

7:24 Pinompar ni si Harip saratus sampulu dua halak.

7:25 Pinompar ni si Gibeon siapulu lima halak.

7:26 Angka baoa sian Betlehem dohot Netopa saratus ualupulu ualu halak.

7:27 Angka baoa sian Anatot saratus duapulu ualu halak.

7:28 Angka baoa sian Bet Asmapet opatpulu dua halak.

7:29 Angka baoa sian Kiriat Jearim, Kepira dohot Beerot, pitu ratus opatpulu tolu halak.

7:30 Angka baoa sian Rama dohot Geba onom ratus duapulu sada halak.

7:31 Angka baoa sian Mikhmas saratus duapulu dua halak.

7:32 Angka baoa sian Betel dohot Ai saratus duapulu halak.

7:33 Angka baoa sian Nebo paduahon limapulu dua halak.

7:34 Pinompar ni si Elam paduahon saribu dua ratus limapulu opat halak.

7:35 Pinompar ni si Harim tolu ratus duapulu halak.

7:36 Pinompar sian Jeriko tolu ratus opatpulu lima halak.

7:37 Pinompar sian Lod, Hadid dohot Ono pitu ratus duapulu sada halak.

7:38 Pinompar sian Sena tolu ribu sia ratus tolupulu halak.

7:39 Angka malim: Pinompar ni si Jedaia sian pinompar ni si Jesua sia ratus pitupulu tolu halak.

7:40 Pinompar ni si Immer saribu limapulu dua halak.

7:41 Pinompar ni si Pashur saribu dua ratus opatpulu pitu halak.

7:42 Pinompar ni si Harim saribu sampulu pitu halak.

7:43 Halak Lepi: Pinompar ni si Jesua dohot si Kadmiel sian pinompar ni si Hodapia pitupulu opat halak.

7:44 Angka parende: Pinompar ni si Asap saratus opatpulu ualu halak.

7:45 Angka sijaga pintu: Pinompar ni si Sallum, pinompar ni si Ater, pinompar ni si Talmon, pinompar ni si Akkub, pinompar ni si Hatita, pinompar ni si Sobai saratus tolupulu ualu halak.

7:46 Angka Netinim: Pinompar ni si Siha, pinompar ni si Hasupa, pinompar ni si Tabaot.

7:47 Pinompar ni si Keros, pinompar ni si Siaha, pinompar ni si Padon.

7:48 Pinompar ni si Lebana, pinompar ni si Hagaba, pinompar ni si Salmai.

7:49 Pinompar ni si Hanan, pinompar ni si Gidel, pinompar ni si Gohar.

7:50 Pinompar ni si Reia, pinompar ni si Resin, pinompar ni si Nekoda.

7:51 Pinompar ni si Gasam, pinompar ni si Usa, pinompar ni si Pasea.

7:52 Pinompar ni si Bisia, pinompar ni si Meunim, pinompar ni si Nepusim.

7:53 Pinompar ni si Bakbuk, pinompar ni si Hakupa, pinompar ni si Harhur.

7:54 Pinompar ni si Baslut, pinompar ni si Mehida, pinompar ni si Harsa.

7:55 Pinompar ni si Barkos, pinompar ni si Sisera, pinompar ni si Tama.

7:56 Pinompar ni si Nesia, pinompar ni si Hatipa.

7:57 Pinompar ni angka naposo ni si Salomo, pinompar ni si Sotai, pinompar ni si Soperet, pinompar ni si Perida.

7:58 Pinompar ni si Jaala, pinompar ni si Darkon, pinompar ni si Gidel.

7:59 Pinompar ni si Sepatia, pinompar ni si Hatil, pinompar ni si Rokeret Hasebaim, pinompar ni si Amon.

7:60 Luhut halak Netinim dohot pinompar ni angka naposo ni si Salomo tolu ratus siapulu dua halak.

7:61 Jala on do halak angka na nangkok sia Tel-Mela, Tel-Harsa, Kerub, Addon dohot Immer, alai ndang tarpajojor nasida pinompar ni ompunasida i, nang pinomparnasida sandiri, manang tutu nasida sian Israel.

7:62 Pinompar ni si Delaia, pinompar ni si Tobia, pinompar ni si Nekoda, onom ratus opatpulu dua halak.

7:63 Jala sian angka malim: Pinompar ni si Habai, pinompar ni si Hakos, pinompar ni si Barsilai na mambuat sada boru ni si Barsilai, halak Gilead i bahen jolmana, laos dipanggoarhon goarnasida i.

7:64 Angka nasida ma mandiori surat aturan ni partubunasida, alai ndang jumpangsa, jadi ramun nasida dietong, laos dipabali nasida sian hamalimon.

7:65 Dung i ro ma hata ni pangarajai mandok tu nasida: Tung na so jadi do nasida mangan sian na badia sahali, paima adong hehe malim sada mangkajongjongkon Urim dohot Tummum.

7:66 Sandok luhutan i hira sahalak do opatpulu dua ribu tolu ratus onompulu halak toropna.

7:67 So padohot angka naposonasida baoa dohot parompuan pitu ribu tolu ratus tolupulu pitu halak toropna; mangihut tu nasida do halak parende baoa dohot parompuan dua ratus opatpulu lima halak toropna.

7:68 Ia hodanasida pitu ratus tolupulu onom, ia hodanasida angka na marsahe dua ratus opatpulu lima.

7:69 Ia untonasida opat ratus tolupulu lima, ia halodenasida onom ribu pitu ratus duapulu.

7:70 Deba sian angka induk marompuompu huhut mangalehon tumpakna tu ulaon i: Pangarajai mangalehon tu parartaan i saribu dirham sere, limapulu saoan dohot lima ratus tolupulu pangkean malim.

7:71 Deba sian angka induk marompuompu mangalehon tu parartaan i manumpak ulaon i duapulu ribu dirham sere dohot dua ribu dua ratus Mina perak.

7:72 Ia pasipasi ni situan na torop i mangalehon duapulu ribu dirham sere dohot dua ribu Mina perak dohot onompulu pitu pangkean malim.

7:73 Dung i maringan di bagasan hutanasida be ma angka malim, halak Lepi, angka sijaga pintu, angka parende, dohot deba sian na torop i, halak Netinim ro di sandok Israel. Jadi dung jumpang bulan sipaha pitu sahat ma halak Israel di bagasan hutanasida be.

Nehemia 8

8:1 Dung i marluhut ma sandok bangso i hira sahalak do tu alaman na di adopan ni bahal partuaehan, angka didok nasida ma tu si Esra, siboto surat i, asa diboan buku patik ni si Musa, naung tinonahon ni Jahowa tu halak Israel.

8:2 Jadi diboan malim Esra ma patik i tu adopan ni luhutan i, tu adopan ni baoa dohot parompuan, ro di sude halak angka na marroha manimbangi di artia bulan sipaha pitu.

8:3 Jadi manjaha ma ibana sian i di adopan ni alaman mardonokkon bahal partuaehan sian buha siang ari sahat ro di hos ni ari di adopan ni angka baoa dohot parompuan dohot halak angka na marroha, jadi pinggol ni sandok situan na torop i mananginangi tu hata ni buku patik i.

8:4 Alai anggo si Esra, siboto surat i, jongjong do di atas parjamitaan sian hau, naung binahenna hian tu ulaon on, jala jongjong di lambungna do Matitia, Sema, Anaya, Uria, Hilkia, dohot Maaseia, di siamunna, jala di hambirangna: Pedaya, Misael, Malkia, Hasum, Hasbadana, Sakaria dohot Mesulam.

8:5 Dung i dipaherbang si Esra ma pustaha i di adopan ni mata ni sandok situan na torop i, ai tumimbo do ibana jongjong sian sandok situan na torop i. Jadi di na pinaherbangna i pustaha i, jongjong ma sandok bangso i.

8:6 Dung i dipuji si Esra ma Jahowa, Debata na sun timbul i; jadi sandok bangso i mangalusi mandok: Amin, Amin! Toltol ia tangannasida dompak ginjang, laos songon i nasida marsomba, jala martangiang tu Jahowa, pola manungkap bohinasida dais tu tano.

8:7 Nang si Jesua, si Bani, si Serebia, si Jamin, si Akkub, si Sabetai, si Hodia, si Maaseia, si Kelita, si Azaria, si Josabad, si Hanan, si Pelaia dohot halak Lepi mangapoi bangso i mamparateatehon patik i, laos jongjong anggo bangso i di hajongjonganna.

8:8 Nasida pe torang do manjaha di bagasan buku patik ni Debata, jala dipajojor lapatanna, asa dapot nasida antusanna na jinahana i.

8:9 Dung i ro ma hata ni Nehemia, i ma pangarajai, dohot malim Esra, siboto surat i, dohot halak Lepi, angka na mangapoapoi situan na torop i, ninna ma tu sandok situan na torop i: Na badia do ari sadarion di Jahowa, Debatamuna i! Dibahen i unang gondok rohamuna, jala unang tumatangis hamu! Ai tumatangis be sandok bangso i, dung dibege nasida hata ni patik i.

8:10 Ala ni huhut umbahen didok tu nasida: Laho ma hamu, pangan hamu ma sipanganon na talmis, jala inum hamu tuak na tonggi i, tongoshon hamu huhut parjambaran tu dongan, angka na so adong hobasonna di ibana; ai na badia do ari sadarion di Tuhanta i; dibahen i unang holsoan hamu, ai las ni roha mida Jahowa, i do haroroan ni gogo tu hamu.

8:11 Jadi dipasonangsonang halak Lepi ma sandok bangso i, ninna ma: Hohom be ma hamu, ai na badia do ari sadarion, dibahen i unang holsoan hamu!

8:12 Dung i laho ma sandok bangso i, asa mangan dohot minum, huhut manongoshon angka parjambaran laho mambahen las ni roha godang; nunga tangkas diantusi nasida hata angka naung pinabotohon tu nasida.

8:13 Tole paduaarihon marluhut ma angka induk marompuompu di sandok bangso i, rap dohot angka malim dohot halak Lepi tu si Esra, siboto surat i, asa tumangkas dope pajojoronna tu nasida angka hata ni patik i.

8:14 Jadi jumpang nasida ma tarsurat di bagasan patik naung tinonahon ni Jahowa marhite sian si Musa, ingkon maringanan halak Israel di bagasan angka parlapelapean di ari raya di bulan sipaha pitu.

8:15 Jala ingkon lumbahononna do i, pola tingtingkononna tu sandok hutanasida i dohot tu Jerusalem dohononna tahe: Borhat ma hamu tu tombak mangalap sian i rantingranting ni hau Jetun dohot rantingranting ni hau jarak harangan dohot rantingranting ni hau sampinur dohot maremare ni bagot dohot rantingranting ni hau na rugun, asa mambahen parlapelapean, songon na tarsurat i.

8:16 Dung i ruar ma bangso i tu balian mamboan rantingranting, jala dipambahen angka parlapelapean di nasida, ganup di atas tarup ni jabuna dohot di angka alamannasida dohot di alaman ni joro ni Debata dohot di alaman ni bahal partuaehan dohot di alaman ni bahal Epraim.

8:17 Jadi sandok luhutan ni halak, angka naung mulak sian habuangan mambahen angka parlapelapean, jala maringan di bagasan angka parlapelapean, ai olat ni tingki ni si Josua, anak ni si Nun rasirasa sadarion ndang dung songon i dibahen halak Israel, jadi muba ma godang ni las ni rohanasida disi.

8:18 Ariari nasida tole manjaha di bagasan buku patik ni Debata, sian ari parjolo ro di ari panimpuli, pola pitu ari padodot nasida marari raya, tole paualuarihon mata ni ari raya i, hombar tu patik i.

Nehemia 9

9:1 Tole paduapuluopatarihon di bulan i marluhut ma halak Israel, asa marpuasa jala maruloshon tangki huhut mambahen tano tu atas ulunasida.

9:2 Nunga dipapulik hian anggo pinompar ni Israel sian sandok halak sileban, laos jongjong nasida huhut manopoti dosanasida sandiri dohot hajahaton angka na niula ni ompunasida i.

9:3 Dung i hehe ma nasida jongjong di hajongjongannasidai, huhut manjaha nasida di bagasan buku patik ni Jahowa, Debatanasida i, pola sansuhi ari lelengna jala sansuhi ari nari sai didatdati nasida manopoti dosana dohot martangiang tu Jahowa, Debatanasida i.

9:4 Dung i hehe ma laho jongjong tu hajongjongan ni halak Lepi: Si Jesua, si Bani, si Kadmiel, si Sebania, si Buni, si Serebia, si Bani dohot si Hanani, marsoara na gogo ma nasida mangangguhi tu Jahowa, Debatanasida i.

9:5 Ro muse hata ni halak Lepi: Si Jesua, si Kadmiel, si Bani, si Hasabneya, si Serebia, si Hodia, si Sebania dohot si Petahia mandok: Hehe ma hamu, puji hamu ma Jahowa, Debatamuna i sian salelenglelengna, ro di salelenglelengna! Ingkon pujion ni halak ma Goar ni hamuliaonmu, na tumimbul tahe sian nasa parendeon dohot pujipujian ni halak.

9:6 Sasada Ho do Debata, ale Jahowa! Nunga ditompa Ho langit ni langitan, rap dohot sandok paranganna, nang tano on ro di nasa na di atasna, tole laut ro di nasa isina; laos Ho do pangoluhon saluhutna i, jala sandok parangan di langit i marsomba tu Ho.

9:7 Ho do Debata, ale Jahowa, naung mamillit si Abraham, jala naung manogihon ibana ruar sian Ur di Kasdim, jala nunga dibahen Ho goarna si Abraham.

9:8 Jala nunga jumpang Ho rohana marsihohot di adopanmi jala nunga marpadan Ho dohot ibana, lehononmu tano ni halak Kanaan, Het i, Amori, Perisi, Jebusi, Girgasi marbasabasahon tu pinomparna; jala nunga dipasintong Ho angka bagabagami, ai na bonar do Ho.

9:9 Jala nunga marpanatap roham mida pardangolan na niae ni ompunami di Misir, jala nunga ditangihon Ho angguhangguknasida di lambung laut arung.

9:10 Jala nunga dipatupa Ho angka tanda dohot halongangan mangalo Firaun dohot sude angka naposona ro di sandok bangso isi ni tanona; ai nunga ditanda Ho jungkatna dompak nasida, gabe tarbarita Goarmu dibahen Ho, songon na andar sadarion.

9:11 Nunga dipatolak Ho laut i di adopannasida, asa taripar nasida mardalan di na mahiang di tongatonga ni laut i, alai anggo halak na mangeahi nasida nunga disampathon Ho tu bagasan lung, hira sada batu tu bagasan aek angka na doras.

9:12 Jala nunga ditogihon Ho nasida marhite sian ombun na marsijongjong ia arian, jala marhite sian api na marsijongjong ia bornginna i, asa manulu dalan sidalanannasida i.

9:13 Nunga turun Ho tu atas dolok Sinai, jala nunga mangkatai Ho dohot nasida sian banua ginjang, jala nunga dilehon Ho tu nasida uhum angka na tigor dohot angka patik hasintongan, aturan dohot tona, angka na denggan i.

9:14 Jala nunga dipabotohon Ho tu nasida ari Sabbatmu na badia i, jala nunga ditonahon Ho tu nasida angka tona, aturan dohot patik marhite sian pamangan ni si Musa naposom.

9:15 Jala nunga dilehon Ho tu nasida sagusagu sian banua ginjang, uju anturaparon nasida; jala nunga diparuar Ho aek sian dolok batu pasombu uasnasida i, jala nunga marbagabaga Ho tu nasida, asa bongot nasida manean tano i, nunga pola dipatoltol Ho tanganmu maruari, ingkon lehononmu tano i tu nasida.

9:16 Alai marisuang marroha hajungkaton do ompunami jala dipajogal tangkuhukna, jala ndang ditangihon nasida angka tonami.

9:17 Lam dijua nasida do manangihon, jala ndang diingot nasida halongangan angka naung binahenmu tu nasida, dipajogal nasida tangkuhukna, pola dipabangkit sahalak ihutan naeng mulak uju manggunturi nasida tu parhatobanannasida i. Alai anggo Ho, ale Debata, marpamuati do roham, parasi roha jala pardengganbasa do Ho, lambat tarrimas jala parasi roha godang, jala ndang ditadingkon Ho nasida.

9:18 Atik pe dibahen nasida di nasida sada lombu tuangan, huhut didok: On do Debatam, naung manogihon ho ruar sian Misir, asa mambahen gasip godang.

9:19 Alai laos so olo anggo Ho manadingkon nasida di halongonan sian asi ni roham angka na godang i; ia ombun na marsijongjong ndang meret sian lambungnasida arian, laho manogihon nasida di tongan dalan; api na marsijongjong pe songon i bornginna i, manulu dalan sidalanannasida i.

9:20 Angkup ni nunga dibasabasahon Ho tu nasida Tondim na denggan i, marrohaihon nasida, jala ndang diontok Ho mannamu sian pamangannasida, jala nunga dilehon Ho tu nasida aek pasombu uasnasida i.

9:21 Pola opatpulu taon lelengna diparmudumudu Ho nasida di halongonan, asa unang hurangan nasida; ulosnasida pe ndang olo buruk jala patnasida ndang olo marpurapura.

9:22 Jala nunga dibasabasahon Ho tu nasida angka harajaon dohot bangso, jala nunga disagisagihon Ho tu nasida angka i sahat ro di partalpahan, asa nasida manoluk tano ni si Sihon dohot tano ni raja sian Hesbon dohot tano ni si Og, raja sian Basan.

9:23 Jala nunga dipatorop Ho anaknasida, songon bintang angka na di langit, jala nunga diboan Ho nasida sahat tu tano naung pinarbagabagami hian tu angka ompunasida, ingkon bongotanna jala teanonna.

9:24 Jadi nunga bongot angka anaknasida i tu tano i, jala nunga ditean nasida; jala nunga dipatunduk Ho maradophon nasida halak isi ni tano i, halak Kanaan i, jala nunga dipasahat Ho nasida tu bagasan tangannasida i, nang rajanasida, nang angka bangso ni tano i, asa bahenonna tu nasida guru lomo ni rohanasida.

9:25 Nunga dipapatu nasida huta angka na gonting i dohot tano bosar, jala disoluk bagas angka na gok arta marragamragam, tole sumur angka na nidakdak, porlak anggur, porlak ni hau jetun dohot hau na marparbue, tau sipanganon mansai godang, gabe mangan nasida maradu bosur jala mokmok, gabe mangolooloi hisapna nasida marhite sian denggan ni basam na godang i.

9:26 Hape lam jungkat nasida jala manggunturi mangalo Ho jala dibolongkon patikmi tu pudi ni tanggurungnasida, lam dibunui muse panurirangmu, angka na manindangi dompak nasida, naeng manogihon nasida mulak nian tu Ho, asa mambahen angka gasip godang.

9:27 Ala ni nunga dipasahat Ho nasida tu bagasan tangan ni musuna, angka na pasipalsipal nasida. Alai ia dung hagogotan nasida mangangguhi ma nasida tu Ho, gabe ditangihon Ho nasida sian banua ginjang, jala hombar tu asi ni roham angka na godang i dilehon Ho tu nasida halak silehon tua, angka na paluahon nasida sian tangan ni musuna.

9:28 Alai ia dung marhasonangan nasida, mangulahi muse nasida mangulahon sogo ni roham, gabe dipasombu Ho nasida di bagasan tangan ni musunasida, asa diparhatoban nasida. Dung i mulak muse rohanasida i, ma nasida tu Ho, gabe ditangihon Ho jadi ditangihon Ho nasida sian banua ginjang, jala dipalua Ho nasida hombar tu asi ni roham angka na godang i mansai jotjot.

9:29 Dung i disuru Ho muse suruanmu mangapoapoi nasida, asa mulak rohanasida tu patikmu. Alai lam jungkat nasida marroha jala ndang ditangihon angka tonami, sai didatdati do mardosa dompak patikmi, angka na tama patupaon ni jolma nian, asa mangolu ibana; hape lam dipaholang nasida abaranasida i, jala dipajogal tangkuhukna, jala ndang olo nasida manangihon.

9:30 Hape pola leleng situtu sai dipaanjuanju Ho nasida, jala marsipaingot Ho tu nasida marhitehite Tondim, marhite sian pamangan ni angka panurirangmu; alai ndang diparateatehon nasida. Ala ni do umbahen dipasahat Ho nasida tu bagasan tangan ni angka bangso marluatluat.

9:31 Alai binahen ni asi ni roham angka na godang i, ndang laos sun siap nasida dibahen Ho, jala ndang ditadingkon Ho nasida. Ai Debata parasi roha jala pardengganbasa do Ho!

9:32 Nuaeng pe, ale Debatanami! Ho do Debata na timbul sahali, na sun hinagogo, jala na songkal, na tongtong marningot parjanjian dohot asi ni roha! Unang lea roham mida sude pardangolan, angka na mangonai tu hami, tu rajanami, tu induknami, tu malimnami, tu panurirangnami, tu ompunami dohot tu sandok bangsom, olat ni tingki ni angka raja sian Assur rasirasa sadarion.

9:33 Alai tutu na bonar do anggo Ho, taringot tu sude naung mangonai tu hami, ai na mangulahon hasintongan do anggo Ho, alai na mangulahon hajahaton do anggo hami.

9:34 Angka rajanami pe dohot induknami, malimnami dohot ompunami ndang diulahon angka patikmi, jala ndang diparateatehon nasida angka tonami dohot panindangionmi, angka naung hinatindangkonmu tu nasida.

9:35 Hape anggo nasida ndang marpangoloion tu Ho di bagasan harajaonnasida i dohot di denggan ni basam na godang i, naung nilehonmu tu nasida dohot di bagasan tano na lambas dohot na lunak, naung nilehonmu tu nasida, jala ndang dipauba nasida rohanasida i sian parulaonnasida angka na roa i.

9:36 Ida ma, ala ni hatoban do hami nuaeng di bagasan tano, naung binasabasahonmu tu ompunami, asa panganonna nian parbuena dohot gogona, hape ida ma, hatoban do hami balik disi.

9:37 Jala gogo ni tano i ganda do di raja, angka naung pinabangkitmu gumomgom hami ala ni dosanami, jadi guru lomo ni rohanasida do gumomgom dagingnami dohot dorbianami, tung na marhagogotan godang do hami.

Nehemia 10

10:1 Jadi dung salpu saluhutna i marsihohot rohanami paratahon padan na hot, pola tarsurat jala disahap angka induknami, halak Lepi dohot malimnami.

10:2 On do goargoar ni jolma angka na mambahen sahapna: Pangarajai si Nehemia, anak ni si Hakalia dohot si Sedekia.

10:3 Si Seraia, si Azaria, si Jeremia.

10:4 Si Pashur, si Amaria, si Malkia.

10:5 Si Hantus, si Sebania, si Malluk.

10:6 Si Harim, si Meremot, si Obaja.

10:7 Si Daniel, si Gineton, si Baruk.

10:8 Si Mesulam, si Abia, si Mijamin.

10:9 Si Maseia, Bilgai dohot si Semaya; malim do luhutna i.

10:10 Alai anggo halak Lepi on do: Si Jesua, anak ni si Azanya, si Binnui sian angka anak ni si Henadad dohot si Kadmiel.

10:11 Ia hahaangginasida on do: Si Sebania, si Hodia, si Kelita, si Pelaia, si Hanan.

10:12 Si Mika, si Rehob, si Hasabya.

10:13 Si Sakur, si Serebia, si Sebania.

10:14 Si Hodia, si Bani, si Beninu.

10:15 Angka induk ni bangso i on do: Si Paras, si Pahat-Moab, si Elam, si Jattu, si Bani.

10:16 Si Buni, si Asgad, si Bebai.

10:17 Si Adonia, si Bigpai, si Adin.

10:18 Si Ater, si Hiskia, si Assur.

10:19 Si Hodia, si Hasum, si Bisia.

10:20 Si Harip, si Anatot, si Nebai.

10:21 Si Magpias, si Mesulam, si Hesir.

10:22 Si Mesezabeel, si Sadok, si Jadua.

10:23 Si Pelatia, si Hanan, si Anaya.

10:24 Si Hosea, si Hanania, si Hasub.

10:25 Si Halohes, si Pilha, si Sobek.

10:26 Si Rehum, si Hasabna, si Maseia.

10:27 Si Ahia, si Hanan, si Anan.

10:28 Si Malluk, si Harim dohot si Baana.

10:29 Tole muse pasipasi ni bangso i, angka malim, halak Lepi, angka sijaga pintu, angka parende, angka Netinim, ro di sude halak na pulik dirina sian angka bangso marluatluat, naeng mangihuthon tu patik ni Debata rap dohot jolmanasida, anaknasida dohot borunasida, sude tahe angka na umboto mangantusi patik i.

10:30 Sude nasida marsahata dohot hahaangginasida i, angka na sangap i, rap ro nasida pola marbulan jala maruari, ingkon marparange nasida di bagasan patik ni Debata, naung nilehonna marhite sian pamangan ni si Musa, naposo ni Debata, jala ingkon radotan jala ulahononnasida sude tona ni Jahowa, Tuhanta i, angka uhumna pe dohot aturanna.

10:31 Jala na so tupa be lehononnami borunami tu angka bangso ni tano i, manang buaton ni anaknami borunasida i.

10:32 Jala tung sura dipamboan angka bangso ni luat i boniagana dohot tuhortuhoran marragamragam di ari Sabbat naeng gadisonna, na so tupa buatonnami sian nasida anggo di ari Sabbat manang di ari na badia pe; tole papitutaonhon ingkon taon haluaon do i, na so tupa hamu martunggu utang anggo disi.

10:33 Angkup ni laos hami sandiri mambahen angka patik tu hami, ingkon lehononnami ganup taon sapartolu sekkel manumpak ulaon di joro ni Debatanta.

10:34 Pangkeon do i tu roti na marhadohoan, tu pelean sipanganon ariari dohot tu pelean situtungon ariari, di ari Sabbat, di poltak ni bulan, di angka ari raya dohot tu ulaon na badia angka na asing dohot tu pelean pardosaon bahen pardengganan di Israel, ro di sude ulaon di bagasan joro ni Debatanta i tumpahanna.

10:35 Angkup ni mandabu tondung do hami taringot tu soban silehonlehon ni angka malim, halak Lepi dohot situan na torop i, asa huboan hami do i tu joro ni Debatanta, mangihuthon partubunami marompuompu, di tingki angka na binuhul ganup taon, laho tutungon di atas langgatan ni Jahowa, Debatanta i songon na tarsurat di bagasan buku patik.

10:36 Tole muse ingkon boanonnami ganup taon patumonaan ni haumanami, dohot patumonaan ni nasa parbue ni hau ganup taon, tu joro ni Jahowa.

10:37 Tole muse angka anak buhabajunami dohot buhabaju ni pinahannami, songon na tarsurat di bagasan buku patik; tole muse angka buhabaju ni lombunami dohot birubirunami, ingkon boanonnami do i tu joro ni Debatanta, tu malim angka na marhalado di bagasan joro ni Debatanta.

10:38 Ingkon boanonnami huhut patumonaan sian itaknami dohot sian peleannami sitatingan dohot sian sude parbue ni hau, sian anggur dohot sian miak tu angka malim, tu bagasan angka bilut di joro ni Debatanta, tole muse saparsampulu sian gogo ni haumanami tu halak Lepi, alai ingkon halak Lepi sandiri papungupunguhon parsampuluan i di saluhut huta parhaumaannami.

10:39 Malim pe, pinompar ni si Aron, ingkon dongan ni halak Lepi, molo laho halak Lepi mangido parsampuluan i, jala ingkon boanon ni halak Lepi muse saparsampulu sian parsampuluan i nangkok tu joro ni Debatanta, tu bagasan angka bilut ni bagas parpeopan arta.

10:40 Ai ingkon tu bagasan angka bilut i boanon ni halak Israel dohot halak Lepi angka pelean tatingan sian eme, anggur dohot miak; ai disi do angka ulaula na badia i dohot malim angka na marulaon, tole angka sijaga pintu dohot angka parende; jala na so tupa tadingkononnami joro ni Debatanta i.

Nehemia 11

11:1 Alai maringan di Jerusalem do anggo angka induk ni bangso i; mandabu todung ma anggo pasipasi ni bangso i, ingkon boanon saripe sian sampulu, asa maringan di Jerusalem, huta na badia i, jala na sia ripenari di bagasan huta angka na asing.

11:2 Jadi dipasupasu bangso i ma sude baoa, angka na ringgas sian lomona maringan di Jerusalem.

11:3 On do angka induk ni luat i, angka na maringan di Jerusalem, nang angka na maringan di angka huta ni Juda, ganup di partalianna be, di angka hutanasida i; halak Israel, angka malim dohot halak Lepi, angka Netinim dohot pinompar ni angka naposo ni si Salomo.

11:4 Alai anggo di Jerusalem maringan deba sian pinompar ni si Juda, jala deba sian pinompar ni si Benjamin. Angka sian pinompar ni si Juda, on do: Si Ataya, anak ni si Usia, i ma anak ni si Sakaria, i ma anak ni si Amaria, i ma anak ni si Sepatia, i ma anak ni si Mahalaleel, sian pinompar ni si Peres.

11:5 Tole muse si Maseia, anak ni si Baruk i ma anak ni si Kalhose, i ma anak ni si Hazaia, i ma anak ni si Adaya, i ma anak ni si Johaiarib, i ma anak ni si Sakarya, i ma anak ni si Siela.

11:6 Sandok pinompar ni si Peres, angka na maringan di Jerusalem opat ratus onompulu ualu halak, angka na marhuaso.

11:7 On do pinompar ni si Benjamin: Si Sallu, anak ni si Mesulam, i ma anak ni si Joed, i ma anak ni si Pedaya, i ma anak ni si Kolaia, i ma anak ni si Maseia, i ma anak ni si Itiel, i ma anak ni si Jesaya.

11:8 Jala dung ibana: Si Gabbai, si Sallai, sia ratus duapulu ualu halak.

11:9 Jala si Joel, anak ni si Sikri, induk nasida; jala si Juda, anak ni si Hassenua, induk paidua parenta huta i.

11:10 Sian angka malim: Si Jedaia, anak ni si Johaiarib, dohot si Jakin.

11:11 Si Seraia, anak ni si Hilkia, i ma anak ni si Mesulam, i ma anak ni si Sadok, i ma anak ni si Merayot, i ma anak ni si Ahitub, induk di joro ni Debata.

11:12 Tole muse hahaangginasida, angka na mangaradoti ulaon di bagasan joro i, ualu ratus duapulu dua halak do. Tole muse si Adaya, anak ni si Jeroham, i ma anak ni si Pelaia, i ma anak ni si Amzi, i ma anak ni si Sakaria, i ma anak ni si Pashur, i ma anak ni si Malkia.

11:13 Tole muse hahaanggina, angka induk marompuompu dua ratus opatpulu dua halak. Angkup ni si Amasa i, anak ni si Azarel, i ma anak ni si Aksai, i ma anak ni si Mesilemot, i ma anak ni si Immer.

11:14 Ro di hahaangginasida, angka jolma na marhuaso saratus duapulu ualu halak, jala induknasida si Sabdiel, anak ni si Gedolim.

11:15 Sian halak Lepi: Si Semaya, anak ni si Hasub, i ma anak ni si Asrikam, i ma anak ni si Hasabya, i ma anak ni si Buni.

11:16 Nang si Sabetai dohot si Josabad sian induk ni halak Lepi, angka na parenta ulaon ruar di joro ni Debata.

11:17 Tole si Matania, anak ni si Mika, i ma anak ni si Sabdi, i ma anak ni si Asap, ibana induk manguluhon pujipujian laho martangiang; tole muse si Bakbukya, induk paidua sian hahaanggina; tole muse si Abda, anak ni si Samua, i ma anak ni si Galal, i ma anak ni si Jedutun.

11:18 Saluhut halak Lepi angka na di huta na badia i dua ratus ualupulu opat halak.

11:19 Angka sijaga pintu: Si Akkub, si Talmon rap dohot hahaangginasida, angka na marjaga angka bahal saratus pitupulu dua halak.

11:20 Alai halak Israel na tinggal i ro di angka malim dohot halak Lepi, maringan di angka huta ni Juda do, ganup di partalianna be.

11:21 Ia halak Netinim maringan do di Opel; jala si Siha dohot si Gispa parenta halak Netinim.

11:22 Alai anggo induk ni halak Lepi di Jerusalem, i ma: Si Usi, anak ni si Bani, i ma anak ni si Hasabya, i ma anak ni si Matania, i ma anak ni si Mika. Sian pinompar ni si Asap do angka parende mangaradoti ulaon di joro ni Debata.

11:23 Ai adong do huhut parenta ni rajai taringot tu nasida, umbuhul bohal sijaloon ni angka parende ganup ari.

11:24 Ia si Petahia, anak ni si Mesezabeel, sian pinompar ni si Jara, anak ni si Juda, wakil ni rajai di saluhut hata tu situan na torop i.

11:25 Angkup ni sian pinompar ni si Juda, adong deba maringan di huta pagaran dohot di ladangnasida mardonokkon Kiryat-Arba ro di pagaran na masuk tusi; di Dibon ro di pagaran na masuk tusi; di Jekabseel ro di pagaran na masuk tusi.

11:26 Di Jesua, di Molada, di Betpelet.

11:27 Di Hasar-Sual, di Berseba dohot di pagaran na masuk tusi.

11:28 Di Ziklag, di Mekona dohot di pagaran na masuk tusi.

11:29 Di En-Rimmon, di Zora, di Jarmut.

11:30 Di Sanoa, di Adullam ro di sosorna; di Lakis ro di ladangna; di Azeka ro di pagaranna. Jadi marsaro ma nasida olat ni Berseba sahat ro di rura Hinnom.

11:31 Alai anggo pinompar ni si Benjamin maringan do olat ni Geba di Mikhmas, Haya, Betel ro di angka pagaranna.

11:32 Di Anatot, Nob, Anania.

11:33 Hazor, Rama, Gitaim.

11:34 Hadid, Zeboim, Naballat.

11:35 Lod halak Ono ro di rura ni angka tungkang hau.

11:36 Sian halak Lepi pe satonga maringan di Juda, na satonganari di Benjamin.

Nehemia 12

12:1 On do goargoar ni angka malim dohot halak Lepi, angka naung nangkok rap dohot si Serubabel, anak ni si Sealtiel dohot si Josua, si Seraia, si Jeremia, si Esra.

12:2 Si Amaria, si Malluk, si Hantus.

12:3 Si Sekania, si Rehum, si Meremot.

12:4 Si Ido, si Ginnetoi, si Abia.

12:5 Si Mijamin, si Maadia, si Bilga.

12:6 Si Semaya, si Johaiarib, si Jedaia.

12:7 Si Sallu, si Amok, si Hilkia dohot si Jedaia. I ma angka induk ni malim dohot hahaangginasida di tingki ni si Josua.

12:8 Alai anggo halak Lepi on do: Si Josua, si Binnui. Si Kadmiel, si Serebia, si Juda dohot si Matania manguluhon pujipujian rap dohot hahaanggina.

12:9 Tole si Bakbukya dohot si Uni, hahaangginasida i, patondong dohot nasida marrongkanrongkan.

12:10 Alai si Josua manubuhon si Joiakim, ma manubuhon si Eliasib, anak ni muse si Joiada.

12:11 Si Joiada manubuhon si Jonatan, si Jonatan manubuhon si Jadua.

12:12 Uju di tingki ni si Joiakim angka on do induk ni angka malim marompuompu: Sian gansi si Seraia do si Meraya, sian si Jeremia do si Hanania.

12:13 Sian si Esra do si Mesulam, sian si Amaria do si Johanan.

12:14 Sian si Melihu do si Jonatan, sian si Sebania do si Josep.

12:15 Sian si Harim do si Adna, sian si Merayot do si Helkai.

12:16 Sian si Ido do si Sakaria, sian si Gineton do si Mesulam.

12:17 Sian si Abia do si Sikri, sian si Minyamin dohot si Moaja do si Piltai.

12:18 Sian si Bilga do si Samua, sian si Semaya do si Jonatan.

12:19 Sian si Johaiarib do si Matenai, sian si Jedaia do si Usi.

12:20 Sian si Salai do si Kallai, sian si Amok do si Heber.

12:21 Sian si Hilkia do si Hasabya sian si Jedaia do si Netaneel.

12:22 Uju di tingki ni si Eliasib, si Joiada, si Johanan dohot si Jadua tarsurat do angka induk ni halak Lepi dohot malim marompuompu sahat ro di harajaon ni si Darius, raja sian Persia.

12:23 Angka induk ni halak Lepi marompuompu tarsurat do di bagasan buku jamita sahat ro di tingki ni si Johanan, anak ni si Eliasib.

12:24 Angka induk ni halak Lepi on do: Si Hasabya, si Serebia, dohot si Josua, anak ni si Kadmiel ro di hahaangginasida i, patondong dohot nasida laho mamujimuji dohot mandok mauliate, hombar tu parenta ni si Daud, halak ni Debata marrongkanrongkan.

12:25 Ianggo si Matania, si Bakbukya, si Obaja, si Mesulam, si Talmon dohot si Akkub, i ma angka sijaga pintu harbangan marhal di lambung ni angka bilut parpeopan arta di lambung bahal.

12:26 I ma angka induk uju di tingki ni si Joiakim, anak ni si Josua, i ma anak ni si Josadak dohot uju di tingki ni si Nehemia, pangarajai ni luat i dohot malim Esra, siboto surat i.

12:27 Alai laho mangompoi parik ni Jerusalem dilului nasida ma halak Lepi sian sude inganannasida i, asa boanonna nasida tu Jerusalem, asa marari raya haompoan mardongan las ni roha dohot angka ende pujipujian, mardongan arbab, sordam dohot hasapi.

12:28 Jadi marpungu ma pinompar ni halak parende, nang sian tano adaran humaliang Jerusalem, nang sian angka pagaran ni halak Netopa i.

12:29 Nang sian pagaran Gilgal, nang sian ladang Geba dohot Asmapet; ai pauli angka pagaran do halak parende humaliang Jerusalem.

12:30 Dung i manguras dirina be ma angka malim dohot halak Lepi, diuras nasida huhut situan na torop i, angka pintu harbangan dohot parik.

12:31 Dung i hudokkon ma angka induk ni Juda manaek tu parik, laos hupajongjong ma dua rongkanan bolon halak na mamujimuji angka na marudurudur di atas parik tungkan siamun dompak bahal partangkalan.

12:32 Jala ihut tu nasida do: Si Hosaya dohot satonga ni angka induk ni Juda.

12:33 Nang si Azaria, si Esra, si Mesulam.

12:34 Si Juda, si Benjamin, si Semaya dohot si Jeremia.

12:35 Nang deba sian angka anak ni malim mardongan sarune: Si Sakaria, anak ni si Jonatan, i ma anak ni si Semaya, i ma anak ni si Matania, i ma anak ni si Mikha, i ma anak ni si Sakur, i ma anak ni si Asap.

12:36 Nang hahaanggina: Si Semaya, si Asarel; si Milalai, si Gilalai, si Mai, si Netaneel, si Juda dohot si Hanani rap dohot parhinaloan ni si Daud, halak ni Debata dohot si Esra, siboto surat i manguluhon nasida.

12:37 Tole muse dompak bahal partuaehan tondongnasida i manaek nasida muse mangihutihut tangga ni huta ni si Daud tu atas parik na tumimbo, sian bagas ni si Daud sahat ro di bahal partuaehan tungkan habinsaran.

12:38 Ia rongkanan paduahon ni halak na mamujimuji mardalan do tungkan hambirang, ihut tu nasida do ahu dohot satonga halak situan na torop i di atas parik tungkan julu ni palaspalas pamurunan sahat ro di parik na lambas i.

12:39 Tole muse tungkan julu ni bahal Epraim, boti tu bahal na matua i, boti tu bahal pardengkean, boti tu palaspalas Hananel, boti tu palaspalas Mea sahat ro di bahal birubiru, ngongong nasida muse di bahal hurungan.

12:40 Jadi jongjong ma na dua rongkanan ni halak na mamujimuji di bagasan joro ni Debata, nang ahu dohot satonga ni angka induk donganku.

12:41 Alai anggo angka malim: Si Eliakim, si Maaseia, si Minyamin, si Mikha, si Eleonai, si Sakaria dohot si Hanania mardongan sarune do.

12:42 Tole muse si Maaseia, si Semaya, si Eleasar, si Usi, si Johanan, si Malkia, si Elam dohot si Eser; ro di angka parende mangasa gogo marendei, jala si Israhia indukna manguluhon.

12:43 Jala di ari na sasada i dipelehon nasida angka pelean bolon, jala marlas ni roha nasida; ai nunga dipalas Debata rohanasida i marhite sian las ni roha godang; marlas ni roha nang jolmanasida dohot ianakhonnasida, pola tarbege tu na dao las ni roha ni isi ni Jerusalem.

12:44 Laos di ari na sasada i huhut dipabangkit nasida angka baoa mangaramoti angka bilut parpeopan arta, angka pelean tatingan, angka patumonaan dohot parsampuluan, asa papunguonna tusi gogo ni tano i humaliang angka huta bahen parjambaran naung binuhul ni patik hian di angka malim dohot di halak Lepi; ai marlas ni roha do halak Juda di ulaon na niradotan ni angka malim dohot halak Lepi.

12:45 Jadi diradoti nasida ma ulaon di Debatanasida i dohot ulaon pangurasion; nang angka parende dohot sijaga pintu, hombar tu parenta binahen ni si Daud dohot si Salomo anakna i.

12:46 Ai sian na robi dope, olat ni tingki ni si Daud, sai pinompar ni si Asap do angka induk ni parende manguluhon ende pujipujian dohot hamauliateon tu Debata.

12:47 Dibahen i uju di tingki ni Serubabel dohot Nehemia, sandok Israel mangalehon parjambaran tu halak parende dohot sijaga pintu bahen bohalna siganup ari, jala diparbadiai nasida do i di halak Lepi, jala halak Lepi muse pabadiahon angka i di pinompar ni si Aron.

Nehemia 13

13:1 Laos di ari na sasada i dijaha nasida buku patik ni si Musa tu pinggol ni situan na torop i, gabe jumpang nasida tarsurat disi, na so tupa masuk halak Amon dohot Moab tu bagasan luhutan ni Debata ro di salelenglelengna.

13:2 Ala so ditomutomuhon nasida halak Israel mamboan sagusagu dohot aek, lam diupai nasida tahe si Bileam mangalo halak Israel, asa palasanna nasida, hape dihosing Debata do bura i manjadi pasupasu.

13:3 Jadi dung dibege nasida hata ni patik i, dipapulik nasida ma sandok halak sileban sian Israel.

13:4 Alai tahe jumolo sian tingki on sahat tu malim Eliasib sada bilut di joro ni Debatanta, gabe martondong ibana tu si Tobia, jala nunga dibahen di ibana sada bilut na bolon.

13:5 Jadi tusi do dipamasuk halak na jolo angka pelean sipanganon, daupa, angka ulaula ro di parsampuluan sian eme, anggur dohot miak, naung pinatik hian tu halak Lepi, angka parende dohot sijaga pintu, angkup ni pelean tatingan tu angka malim.

13:6 Alai uju masa saluhutna i ndang ahu di Jerusalem; ai patolupuluduataonhon hinarajahon ni si Artasasta, raja sian Babel, ro ahu mulak tu rajai, jadi dung salpu deba ari mangido muse ahu tu rajai, loasonna ahu laho.

13:7 Jadi dung sahat ahu tu Jerusalem, pintor mamoto ahu di jea naung binahen ni si Eliasib manatap si Tobia, naung binahenna i di ibana sada bilut di alaman ni joro ni Debata.

13:8 Jadi piripirion situtu ma ahu, pola hureongkon luhut ulaula sian jabu ni si Tobia tu balian sian bilut i.

13:9 Dung i hudokkon ma asa urasanna angka bilut i; dung i hupasuang muse tusi angka ulaula tu joro ni Debata, pelean sipanganon dohot daupa.

13:10 Dung i tarbortik huhut tu ahu na so nilehonna angka parjambaran tu halak Lepi; dibahen i nunga pola maporus halak Lepi dohot angka parende, angka na mangaradoti ulaon i nian, ganup tu ladangna be.

13:11 Jadi mangonai hata ma ahu tu angka induk i, ningku ma: Boasa naung tarulang joro ni Debata? Dung i hupaluhut ma nasida, jala hupasuang nasida muse tu tohonanna hian.

13:12 Jadi sandok halak Juda muse mamboan parsampuluan sian eme, anggur dohot miak tu bagasan bilut parpeopan arta.

13:13 Dung i hupabangkit ma bahen induk siramoti angka arta malim Selemia dohot si Sadok, juaratulis i, jala sian halak Lepi: Si Pedaya, jala marpandapotan tu nasida si Hanan, anak ni si Sakur, i ma anak ni Matania; ai haposan do nasida dirajumi, jala ulaonnasida ingkon sagihononna tu angka hahaanggina.

13:14 Sai ingot ma i, ale Debatangku, manumpakkon na denggan tu ahu balosna, jala unang sesa uhumhu na denggan i, angka na hubahen tu joro ni Debatangku mangaradoti ulaon na masuk tusi.

13:15 Di angka ari uju i, huida huhut deba halak Juda, angka na mardege pangilangan di ari Sabbat dohot mamboan angka tibalan, jala diampehon tu angka halode, nang anggur, parbue ni anggur dohot parbue ni hau ara dohot ragamragam siboanon, asa boanonna masuk tu Jerusalem di ari Sabbat. Jadi huorai ma nasida gadisonna sipanganon di ari na sasada i.

13:16 Alai maringan huhut disi halak Tirus, angka na mamboan dengke dohot tuhortuhoran marragamragam, asa gadisonna di ari Sabbat tu halak Juda, angka na di Jerusalem.

13:17 Jadi mangonai hata ma ahu tu halak Juda, angka na sangap, ningku ma mandok nasida: Pambahenan na roa dia do i na binahenmuna on, asa mangaramuni ari Sabbat?

13:18 Nda laos songon i do binahen ai ompumuna i, gabe diparo Debatanta luhut jea on tu hita dohot tu hutanta on? Hape lam ditambai hamu muse torutoru tu Israel, ala naung niramunanmuna ari Sabbat i.

13:19 Jadi disi mamungka rambon ari di jolo ni ari Sabbat, hudokkon ma hinsuon angka pintu harbangan ni Jerusalem, jala hupatikkon ma na so tupa ungkapon ni halak, nda jolo salpu ari Sabbat i; hupajongjong huhut deba sian angka naposongku marjaga di angka harbangan, asa unang adong na mamboan siboanon tu bagasan huta i di ari Sabbat.

13:20 Jadi marmalam di balian ni Jerusalem ma sahali manang dua hali saudagar, angka na manggadis boniaga marragamragam.

13:21 Jadi hupalumba ma nasida, ningku ma mandok nasida: Boasa tung marmalam hamu di balian ni parik? Molo sahalinari dibahen hamu songon i, ingkon tangkupon do hamu! Jadi olat ni ari i ndang dung be ro nasida di ari Sabbat.

13:22 Dung i ningku ma mandok halak Lepi, ingkon urasanna dirina, asa ro nasida mangaramoti angka pintu harbangan laho pabadiahon ari Sabbat i. Ale Debatangku, ingot ma dohot i manumpakkon na denggan tu ahu balosna, jala olani ahu hombar tu hinagodang ni asi ni roham.

13:23 Angkup ni huida huhut di angka ari uju i deba halak Jahudi, angka na marjolmahon parompuan sian Asdod, Amon dohot Moab.

13:24 Dibahen i anakkonasida pe mamangke satonga hata Asdod, ai ndang diboto nasida hata Jahudi, dibuat do tahe pangkuling ni ganup bangso.

13:25 Jadi mangonai hata ma ahu tu nasida, pola huburai nasida, jala hulombuti deba baoa sian nasida, jala hujanggejangge obuknasida, pola hupatolon nasida tu Debata: Na so tupa lehononmuna borumuna tu anaknasida i, jala na so tupa buatonmuna borunasida bahen jolma ni anakmuna, manang bahen jolmamuna sandiri.

13:26 Nda nunga mardosa taringot tusi si Salomo, raja ni Israel? Hape nian di tongatonga ni torop bangso parbegu ndang adong raja nanggo sahalak tudoshon ibana, na hinaholongan ni Debatana nian, pola dipabangkit Debata ibana gabe raja gumomgom sandok Israel; ibana garina mardosa dielaela angka parompuan sileban.

13:27 Tung lomomuna ma tama paihutonnami, asa mangulahon jea on na sai balga, asa mardosa tu Debatanta, laho marjolmahon parompuan sileban?

13:28 Jadi sada sian angka anak ni si Joiada, anak ni sintua ni malim Eliasib, marsimatua tu si Sambalat halak Horon i, gabe hulele ibana sian lambungku.

13:29 Ale Debatangku sai ingot ma tu nasida naung niramunanna hamalimon dohot parjanjian ni angka malim dohot halak Lepi!

13:30 Dung i huuras ma nasida sian nasa ruhut ni halak sileban, jala hupahot muse pargansion di angka malim dohot halak Lepi, ganup mangaradoti ulaonna be.

13:31 Tole dohot panaruon soban di tingki angka na binuhul, tole huhut angku patumonaan. Ale Debatangku, ingot ma i manumpakkon na denggan tu ahu balosna.