Jump to content

Buku Panguhum

Sian Wikipedia

Panguhuman ᯇᯝᯮᯂᯮᯔᯉ᯲ 1[patota | patota mualna]

1:1 Jadi dung mate si Josua, manungkun ma halak Israel tu Jahowa, angka ninna ma: Ise do sian hami jumolo nangkok marmusu dompak halak Kanaan? ᯐᯑᯪ ᯑᯮᯰ ᯔᯖᯩ ᯘᯪ ᯐᯬᯘᯮᯀ ᯔᯉᯮᯰᯄ᯦ᯉᯮ᯲ ᯔ ᯂᯞᯄ᯦᯲ ᯀᯘᯪ᯲ᯒᯀᯞᯩ᯲ ᯖᯮ ᯐᯂᯬᯋ ᯀᯰᯄ᯦ ᯉᯉᯪ᯲ᯉ ᯔ ᯤᯘᯩ ᯑᯬ ᯘᯪᯀᯉ᯲ ᯂᯔᯪ ᯐᯮᯔᯬᯞᯬ ᯉᯰᯄ᯦ᯄ᯦ᯬ᯲ ᯔᯔᯮᯘᯮ ᯑᯔᯬ᯲ᯇᯄ᯦᯲ ᯂᯞᯄ᯦᯲ ᯄ᯦ᯉᯀᯉ᯲

1:2 Jadi ninna Jahowa ma: Ingkon Juda nangkok; ida ma, nunga hupasahat tano i tu tanganna.

1:3 Dung i ninna Juda ma tu Simeon, hahana i: Nangkok ma ho donganku tu partalianki, asa marmusu hita dompak halak Kanaan; asa hudongani ho huhut laho tu partalianmi; jadi didongani Simeon ma ibana.

1:4 Dung i nangkok ma Juda, jadi dipasahat Jahowa ma halak Kanaan dohot Perisi tu tangannasida, gabe diragehon nasida sampuluribu halak mardonokkon Besek.

1:5 Dung i pajumpang ma nasida dohot si Adonibezek di Besek, jala marmusu dompak ibana, jala ditaluhon halak Kanaan dohot Perisi.

1:6 Alai maporus ma ianggo si Adonibezek, gabe dilele nasida ibana, jala ditangkup, jala digotapi ina ni tanganna dohot totna.

1:7 Jadi ninna si Adonibezek ma: Pitupulu raja, angka na ginotapan ina ni tanganna dohot totna, manjomputi na marpisikpisik di toru ni mejangki; suang le songon na hubahen i dibaloshon Debata tu ahu! Dung i tarboan ibana tu Jerusalem, laos mate disi.

1:8 Alai marmusu ma anggo pinompar ni Juda dompak Jerusalem, laos dipapatu, jala sun ditampuli pangisina dohot podang, jala disurbu ia huta i.

1:9 Dung i tuat ma pinompar ni Juda, laho marmusu dompak halak Kanaan, angka na maringan di dolok dohot tungkan dangsina, dohot di angka rura.

1:10 Dung i borhat ma halak Juda dompak halak Kanaan, angka na maringan di Hebron (ia goar ni Hebron di na robi Kiryat-Arba), gabe ditaluhon nasida ma si Sesai dohot si Ahiman dohot si Talmai.

1:11 Dung i borhat nasida sian i dompak isi ni Debir; ia goar ni Debir di na robi Kiriat Seper do.

1:12 Jadi ninna si Kaleb ma: Manang ise na papatu Kiriat Seper, jala ditaban, lehononku ma tu ibana si Aksa, borungki, bahen jolmana.

1:13 Jadi ditaban si Otniel, anak ni si Kenas, anggi ni si Kaleb huta i, gabe dilehon si Kaleb tu ibana si Aksa, boruna i, bahen jolmana.

1:14 Dung i di na bongot i nasida, dihata i ma ibana mangido hauma santurpuk sian amana; laos mijur ma ibana sian halode, gabe didok si Kaleb ma tu ibana: Aha di ho?

1:15 Jadi didok nasida ma tu ibana: Sai lehon ma di ahu pasupasu sada; ai nunga dilehon ho tu ahu tano na hasang, ba lehon huhut di ahu angka mual. Jadi dilehon si Kaleb ma tu nasida angka mual di julu dohot di toruan.

1:16 Dung i nangkok ma angka anak ni si Keni, simatua doli ni si Musa, sian huta parharambiran rap dohot pinompar ni Juda tu halongonan Juda, na tungkan dangsina ni Arad, gabe bungkas nasida, laos maringan di tongatonga ni bangso i.

1:17 Dung i borhat ma Juda rap dohot Simeon, hahana i, gabe dipapatu nasida ma halak Kanaan, angka na maringan di Zepat, laos diharomhon nasida do, jala dibahen goar ni huta i Horma.

1:18 Ditaban Juda huhut Gaza ro di luatna humaliang, dohot Askelon ro di luatna humaliang, dohot Ekron ro di luatna humaliang.

1:19 Jala sai didongani Jahowa do Juda, gabe dipapatu isi ni dolok i, ai ndang taronjarsa ianggo isi ni rura i, ala marhureta bosi nasida.

1:20 Dung i dilehon nasida ma Hebron tu si Kaleb, songon na tinonahon ni si Musa hian, gabe dionjar sian i na tolu anak ni si Enak.

1:21 Alai anggo halak Jebusi, angka na maringan di Jerusalem, ndang dionjar pinompar ni si Benjamin, laos maringan di Jerusalem do halak Jebusi, tampak dohot pinompar ni si Benjamin rasirasa sadarion.

1:22 Nangkok do huhut pinompar ni si Josep tu Betel, jala Jahowa do dongannasida.

1:23 Dung i didokkon pinompar ni si Josep ma mangkahapi Betel; ia goar ni huta i di na robi Lus do.

1:24 Jadi diida pangkahap i ma sada halak ruar sian huta i, gabe didok nasida tu ibana: Ua patuduhon di hami haroroan tu huta, mardenggan basa basa pe hami tu ho.

1:25 Jadi dipatuduhon ma tu nasida haroroan tu huta, gabe sun ditampuli nasida isi ni huta i dohot podang; alai anggo baoa i ro di donganna saompu sudena dipalua do.

1:26 Jadi bungkas ma baoa i tu tano ni halak Het, jala dipungka sada huta, dibahen ma goarna Lus, laos i do goarna rasirasa sadarion.

1:27 Ia Manasse ndang dionjar anggo isi ni Betsean ro di huta angka na ginomgomanna, dohot Taanak ro di huta angka na ginomgomanna dohot isi ni Dor ro di huta angka na ginomgomanna dohot isi ni Ibleam ro di huta angka na ginomgomanna, dohot isi ni Megiddo ro di huta angka na ginomgomanna, ai ditenggeng roha ni halak Kanaan maringan di tano i.

1:28 Alai dung lam marhuaso Israel, dipampe ma rodi tu halak Kanaan, ndang anggo dionjar.

1:29 Epraim pe ndang dionjar halak Kanaan, angka na maringan di Gezer, laos maringan di tongatongana di Gezer, halak Kanaan.

1:30 Zebulon pe ndang dionjar isi ni Kitron ro di isi ni Nahalol, laos maringan di tongatongana halak Kanaan mangoloi rodi.

1:31 Aser pe ndang dionjar isi ni Akko, ro di isi ni Sidon dohot Ahlab, Aksib, Helba, Apek dohot Rehob.

1:32 Laos maringan halak Aser di tongatonga ni halak Kanaan, isi ni tano i hian, ai ndang dionjar nasida.

1:33 Naptali pe ndang dionjar isi ni Betsemes, ro di isi ni Bet-Anat, laos maringan ibana di tongatonga ni halak Kanaan, isi ni tano i hian, alai mangoloi rodinasida do isi ni Betsemes dohot Bet-Anat.

1:34 Dung i dionjaronjar halak Amori ma pinompar ni si Dan tu dolok, ai ndang diloas nasida tuat tu rura.

1:35 Dung i digogohon halak Amori ma maringan di dolok Heres, di Aialon dohot di Salabim; alai marmulia anggo tangan ni pinompar ni si Josep, gabe hona rodi nasida dibahen.

1:36 Alai anggo parbalohan ni halak Amori, olat ni robean Akrabim sian dolok batu, boti tu julu.

Panguhuman 2[patota | patota mualna]

2:1 Dung i nangkok ma suruan ni Jahowa sian Gilgal tu Bokim, jala ninna ma: Nunga hutogihon hamu ruar sian Misir, jala nunga hupatolhas hamu tu tano, na huuarihon tu ompumuna, jala hudok: Tung na so tupa ubaonku padan na hubahen i dohot hamu ro di salelenglelengna.

2:2 Alai hamu pe antong, ndang jadi mambahen parjanjian tu isi ni tano on, ingkon lohaonmuna do angka langgatannasida; alai ndang ditangihon hamu soarangki. Boasa tung songon i bahenonmuna?

2:3 Jadi ningku ma antong: Ndang onjaronku nasida sian jolomuna, ingkon gabe alomuna situtu nasida, jala debatanasida gabe jorgong di hamu.

2:4 Jadi dung tolhas dihatahon suruan ni Jahowa angka hata i tu sandok halak Israel, dipangiar bangso i ma suaranasida be tumatangis.

2:5 Dung i dibahen nasida ma goar ni hajongjongan i Bokim, laos disi nasida mamele tu Jahowa.

2:6 Jadi dung dipamuli si Josua bangso i, gabe laho ma halak Israel ganup tu partalianna be, laho manean tano i.

2:7 Sai dioloi bangso i ma Jahowa saleleng mangolu si Josua, saleleng mangolu dohot sintua angka na di pudi ni si Josua, angka na sanga marnida saluhut halongangan na godang i, angka na binahen ni Jahowa tu halak Israel.

2:8 Dung i mate ma si Josua, anak ni si Nun, naposo ni Jahowa, marumur saratus sampulu taon.

2:9 Jadi ditanom nasida ibana di parbalohan ni partalianna, di Timnat-Heres, di dolok Epraim, tungkan utara sian dolok Gaas.

2:10 Alai dung marpungu sandok jolma na sansundut i tu angka ompuna, hehe ma sundut na asing di pudinasida, angka na so tumanda Jahowa, manang pambahenan, angka na binahenna i tu Israel.

2:11 Dung i dibahen halak Israel ma sogo ni roha ni Jahowa, jala marsomba nasida tu angka Baal i.

2:12 Laos ditadingkon nasida Jahowa, Debata ni ompunasida i, na paruar nasida sian tano Misir, gabe diihuthon nasida angka debata sileban, i ma debata ni bangso angka na maringan humaliang nasida, jala marsomba tusi mangalap rimas ni Jahowa.

2:13 Ala tinadingkonnasida Jahowa, gabe marsomba tu Baal dohot tu Astarot.

2:14 Jadi marsigorgor ma rimas ni Jahowa tu Israel, gabe dipasahat ma nasida tu tangan ni angka panamun, asa disamuni nasida, jala digadishon nasida tu tangan ni musunasida humaliang, gabe ndang be manahan nasida jongjong maradophon musunasida i.

2:15 Manang tudia pe nasida borhat, sai tangan ni Jahowa alonasida tu hamagoan, songon na nilumbahon ni Jahowa hian, jala songon na niuarihon ni Jahowa tu nasida, gabe hagogotan situtu nasida.

2:16 Dung i dipahehe Jahowa ma panguhum angka na paluahon nasida sian tangan ni angka na manamuni nasida.

2:17 Alai ndang ditangihon nasida, nang angka panguhumnasida, ai sai dipaganjang nasida rohana mangihuthon angka debata sileban, jala marsomba tusi, jala tibu nasida manimbil sian dalan na nidalanan ni ompunasida laho mangoloi angka tona ni Jahowa, ndang dibahen nasida songon i.

2:18 Ia dung dipahehe Jahowa di nasida angka panguhum, gabe dongan ni panguhumi Jahowa paluahon nasida sian tangan ni musunasida, saleleng mangolu panguhumi; ai marpangulahi muse roha ni Jahowa dibahen angguhangguknasida maradophon angka na mangarupa dohot na manosak nasida.

2:19 Alai ia dung mate panguhumi, marbalik muse nasida, gabe jumahat sian angka ompunasida i laho mangihuthon tu angka debata sileban mangoloi nasida, jala marsomba tusi; ndang dipasohot nasida pambahenannasida manang harohaonna na tangkangi.

2:20 Jadi marsigorgor ma rimas ni Jahowa dompak Israel pola didok: Ala na nilaosan ni bangso on padanhu, naung hutonahon tu angka ompunasida, jala ndang ditangihon suarangku.

2:21 Ahu pe antong ndang be datdatanku mangonjar nanggo sahalak maradophon nasida sian bangso parbegu, angka na teba binahen ni si Josua di hamamatena i.

2:22 Asa mangunjuni Israel Ahu marhitehite nasida, manang na olo nasida manurut dalan ni Jahowa, jala mandalanisa hombar tu pangaradoti ni angka ompunasida, manang ndang.

2:23 Jadi dipasombu Jahowa ma angka bangso parbegu, ndang tibu nasida dionjar sian partalianna, jala ndang dope dipasahat nasida tu tangan ni si Josua.

Panguhuman 3[patota | patota mualna]

3:1 Alai angka on do bangso parbegu, angka na pinasombu ni Jahowa mangunjuni Israel marhitehite nasida, gumodang luhut Israel angka na so parbotoboto hamusuon dompak Kanaan.

3:2 Asa tung mamoto angka marga ni halak Israel, jala marsiajar di ruhut hamusuon, angka na so pinabotobotonasida na jolo.

3:3 Na lima raja ni halak Palistim ro di saluhut halak Kanaan, halak Sidon dohot Hevi, angka na maringan di dolok Libanon, olat ni dolok Baal-Hermon sahat ro di Hamat.

3:4 I ma angka nasida bahen pangunjunan tu Israel, asa tung botoon, manang na tangihononnasida patik ni Jahowa, angka na tinonahonna tu ompunasida, marhite sian tangan ni si Musa.

3:5 Jadi dung maringan halak Israel di tongatonga ni halak Kanaan, Het i, Amori, Perisi, Hevi dohot Jebusi.

3:6 Gabe dibuat ma borunasida bahen jolmanasida, jala dilehon borunasida tu anaknasida, jala disomba angka debatanasida.

3:7 Dung i diulahon halak Israel ma sogo ni roha ni Jahowa, jala dihalupahon Jahowa, Debatanasida i, jala marsomba nasida tu angka Baal dohot tu angka sombaon.

3:8 Jadi marsigorgor ma rimas ni Jahowa dompak Israel, gabe digadishon nasida tu tangan ni Kusan-Risataim, raja sian Mesopotamia, gabe marpandapotan halak Israel tu Kusan-Risataim ualu taon lelengna.

3:9 Dung i mangangguhi ma halak Israel tu Jahowa, gabe dipahehe Jahowa ma sada sipalua di Israel, paluahon nasida, i ma si Otniel, anak ni si Kenas, anggi ni si Kaleb.

3:10 Jadi songgop ma tu ibana Tondi ni Jahowa, gabe panguhum di Israel, jala borhat ibana marporang; jadi dipasahat Jahowa tu tanganna Kusan-Risataim, raja ni Ram, gabe dipapatu tanganna ma Kusan-Risataim.

3:11 Jadi marhasonangan ma tano i opatpulu taon lelengna, dung i mate ma si Otniel, anak ni si Kenas.

3:12 Alai diulahi halak Israel muse mambahen sogo ni roha ni Jahowa, gabe dipargogoi Jahowa ma si Eglon, raja sian Moab, mangalo Israel, ala diulahon nasida sogo ni roha ni Jahowa.

3:13 Jadi marhara ibana tu halak Amon dohot tu halak Amalek, dung i borhat ibana, jala dipapatu Israel, jala disoluk nasida huta parharambiran.

3:14 Jadi marpandapotan halak Israel tu si Eglon, raja sian Moab, sampulu ualu taon lelengna.

3:15 Jadi mangangguhi ma halak Israel tu Jahowa, gabe dipahehe Jahowa di nasida sada sipalua, i ma si Ehud, anak ni si Gera, marga Benjamin, mate ia tanganna siamun. Dung i disuru halak Israel ma ibana mamboan silua tu si Eglon, raja sian Moab.

3:16 Dung i dibahen si Ehud di ibana sada podang siduababa, saasta ganjangna, jala dihohoshon tu toru ni abitna di gontingna siamun.

3:17 Jadi ibana manaruhon silua i tu si Eglon, raja sian Moab; jolma na mokmok situtu do ianggo si Eglon i.

3:18 Jadi dung tolhas disombahon silua i, dipalaho ma jolma angka na mangusung silua i.

3:19 Mulak ma anggo ibana sian ganaganaan, angka na mardonokkon Gilgal, jala ninna ma: Adong do hata sibunianku tu ho, ale rajanami; alai ninna rajai do: Sip ma! Dung i ruar ma sude angka na jongjong di lambungna.

3:20 Dung i didapothon si Ehud ma rajai, na hundul di bilut paranginanginan parginjang hapunjunganna i; jadi ninna si Ehud ma: Adong do di ahu tona ni Debata tu ho. Jadi hehe ma rajai sian karosina.

3:21 Mamintor dipatoltol si Ehud tanganna sihambirang, diumpat ma podangna sian gontingna siamun i, jala ditihamhon tu butuhana.

3:22 Jadi ihut tu mata ni podang i masuk dohot suhulna, laos dihungkupi tabotabo i do mata ni podang i, ai ndang diumpat sian butuhana, laos ruar do ginagatna.

3:23 Dung i ruar ma si Ehud tu bilut haroroan, jala dihinsu angka pintu ni bilut parginjang i, laos disordak do.

3:24 Jadi dung ruar ibana, ro ma angka naposo ni rajai, hape sordak do angka pintu i didapot nasida, gabe didok ma: Ra tung patna do hinungkupanna di bilut paranginan i.

3:25 Ia dung leleng nasida paimaimahon, maradu maila, hape ndang adong manang ise na mangungkap hinsuhinsu ni bilut parginjang i, gabe dibuat nasida ma anak hinsu, laos diungkap pintu i, jadi ida ma, tuannasida i nunga bustang di tano i mate.

3:26 Alai nunga sanga maporus ianggo si Ehud, saleleng paimaimahon nasida, nunga pola dilaosi ibana angka ganaganaan i, jala malua ibana sahat tu Seira.

3:27 Jadi dung sahat ibana tusi, dipalu ma sarune di dolok Epraim, jadi tuat ma halak Israel rap dohot ibana sian dolok i, ibana manguluhon nasida.

3:28 Dung i didok ma tu nasida: Tole ihuthon hamu ahu, ai nunga dipasahat Jahowa halak Moab, musumuna i tu tanganmuna, jadi tuat ma nasida mangihuthon tu ibana, gabe dapot nasida angka hatariparan ni Jordan, tondong ni Moab, jala ndang diloas taripar nanggo sahalak.

3:29 Jadi dibunu nasida ma uju i halak Moab arga sampuluribu halak, luhutna i halak na tambos jala parmusu na begu, jala ndang malua nanggo sahalak.

3:30 Jadi tunduk ma Moab di ari na sasada i, marpandapotan tu Israel, gabe marhasonangan tano i ualupulu taon lelengna.

3:31 Di pudina muse ro si Samgar, anak ni si Anat, na mambunu halak Palistim onom ratus halak marhitehite sada batahi, asa dohot do ibana paluahon Israel.

Panguhuman 4[patota | patota mualna]

4:1 Alai dung mate si Ehud, diulahi halak Israel muse mangulahon sogo ni roha ni Debata.

4:2 Dibahen i digadishon Jahowa ma nasida tu tangan ni si Jabin, raja ni halak Kanaan, na mangarajai di Hazor, jala partogi ni paranganna, i ma si Sisera, na maringan di Haroset ni angka parbegu.

4:3 Dung i mangangguhi ma halak Israel tu Jahowa, ai tung siaratus hureta bosi di rajai, jala dirupa halak Israel mambahen uhum gogo tu nasida, duapulu taon lelengna.

4:4 Uju i ma si Debora, sada panurirang boruboru, jolma ni si Lappido, panguhum di Israel.

4:5 Maringan do ibana di toru ni harambir Debora, di parholangan ni Rama dohot Betel, di dolok Epraim, gabe nangkok ma halak Israel mandapothon ibana laho maruhum.

4:6 Dung i disuru si Debora ma suruanna marhara tu si Barak, anak ni si Abinoam sian Kades di Naptali, jala didok tu ibana: Nda nunga martona Jahowa, Debata ni Israel, songon on: Borhat ma ho, laho tu dolok Tabor, jala uluhon ma sampuluribu halak sian pinompar ni Naptali dohot Zebulon.

4:7 Jala Ahu manjumpangkon tu ho, tu batang aek Kison, si Sisera partogi ni parangan ni si Jabin, ro di huretana dohot paranganna, jala Ahu pasahathon ibana tu tanganmi.

4:8 Dung i ninna si Barak ma tu ibana: Molo didongani ho ahu, ba laho ahu; alai molo so ho mandongani ahu, ndang laho ahu.

4:9 Jadi ninna si Debora ma: Hudongani pe ho, alai ndada ho marbarita di dalan sidalananmu, ai tu tangan ni sada parompuan pasahaton ni Jahowa si Sisera. Jadi borhat ma si Debora, jala mardalan rap dohot si Barak tu Kedes.

4:10 Dung i dipaluhut si Barak ma halak Zebulon dohot Naptali tu Kedes, gabe nangkok ibana mardalan pat udur dohot sampuluribu halak; nangkok dohot si Debora rap dohot ibana.

4:11 Alai anggo si Heber, marga Keni, nunga mamulik hian sian halak Keni, sian pinompar ni si Hobab, simatua doli ni si Musa, jala nunga dipajongjong undungundungna sahat ro di hau ara di Zaannim marjonokkon Kedes.

4:12 Jadi tarbortik ma tu si Sisera, nunga nangkok si Barak, anak ni si Abinoam, tu dolok Tabor.

4:13 Dung i dipaluhut si Sisera ma nasa huretana, siaratus hureta bosi, ro di saluhut paranganna niuluhonna sian Haroset ni angka parbegu tu batang aek Kison.

4:14 Alai ninna si Debora ma tu si Barak: Borhat ma ho, ai laos di ari on do pasahaton ni Jahowa si Sisera tu tanganmu, nda Jahowa sandiri do borhat manguluhon ho? Jadi tuat ma si Barak sian dolok Tabor, jala sampuluribu halak mangihuthon tu ibana.

4:15 Jadi ditaluhon Jahowa ma si Sisera, ro di saluhut huretana dohot sandok paranganna marhitehite podang ni si Barak, laos mijur si Sisera sian huretana, gabe maporus mardalan pat.

4:16 Dung i dieak si Barak ma huretai dohot sandok parangan i sahat ro di Haroset ni angka parbegu, jadi marragean ma sandok parangan ni si Sisera dibahen podang, ndang adong teba nanggo sada halak.

4:17 Alai maporus do ianggo si Sisera mardalan pat tu undungundung ni si Jael, jolma ni si Heber, marga Keni, ai mardemak do si Jabin, raja sian Hazor tu pinompar ni si Heber, marga Keni.

4:18 Jadi ruar ma si Jael manomunomu si Sisera, jala didok ma tu ibana: Sai tuli ma ho, ale rajanami sian jabungku, unang ho mabiar, jadi tuli ibana masuk tu undungundungna i, laos dibulusani ibana dohot hain panas.

4:19 Dung i ninna si Sisera ma tu nasida: Nia inang aek i otik inumonku, ai mauas do ahu. Jadi dibungka nasida ma isian ni susu, jala dilehon ibana minum, laos dibulusani muse.

4:20 Dung i ninna si Sisera tu nasida: Jongjong ma ho tu pintu ni undungundung i, dung i molo tung ro baoa usouso tu ho: Adong do jolma disi? Gabe dohononmu ma: Ndang adong manang ise.

4:21 Dung i dibuat si Jael ma, jolma ni si Heber, marga Keni, labang ni undungundung i sada, dibuat dohot nanggar sada di tanganna, jala disisipi ibana, dung i dilabangkon ma labangi tu bagasan parsontinganna, laos pajal tu tano i, laos derem anggo si Sisera dibahen lojana, jadi mate ibana.

4:22 Alai di na mangeak si Barak di si Sisera i, ruar ma si Jael manjumpangkon ibana, laos ninna tu ibana: Ro ma ho, asa hupatuduhon tu ho baoa na niluluanmi. Jadi dung masuk ibana tu undungundung i, ida ma bustang ia si Sisera mate, jala labangi di bagasan parsontinganna.

4:23 Asa dipajimput Debata ma si Jabin, raja sian Kanaan di ari na sasada i, diadopan ni halak Israel.

4:24 Dung i lam leleng, lam posi ma uhum ni halak Israel tu si Jabin, raja sian Kanaan, paima rendep si Jabin, raja sian Kanaan dibahen nasida.


Panguhuman 5[patota | patota mualna]

5:1 Dung i marende ma si Debora dohot si Barak, anak ni si Abinoam, di ari na sasada i, songon on:

5:2 Pinuji ma Jahowa, ala adong partogi manguluhon Israel, ala girgir roha ni bangso i sumeahon dirina.

5:3 Tangihon ma, hamu angka raja, jala tarehon pinggolmu, hamu angka partogi! Ahu sandiri tahe naeng marende, umpuji Jahowa, ahu naeng mamiltik parhinaloan di Jahowa, Debata ni Israel.

5:4 Ale Jahowa, uju na ruar i Ho sian Seir, uju mamolus Ho sian luat Edom, humuntal tano i, manetehi huhut angka langit dohot angka ombun manetekkon aek.

5:5 Malala angka dolok moradophon Jahowa, laos songon i dolok Sinai moradophon Jahowa, Debata ni Israel.

5:6 Uju di angka ari ni si Samgar, anak ni si Anat, uju di angka ari ni si Jael, tarulang angka dalan na bolon, jala jolma pardalandalan mardalan sian dalan pangaliatan.

5:7 Hurangan partogi di Israel, hurangan tongon, paima hehe ahu si Debora, hehe ahu gabe ina ni Israel.

5:8 Umpillit debata angka na imbaru do Israel, jadi masa ma hamusuon di harbangannasida; hape ndang adong jumpang idaon lombulombu, manang hujur di tongatonga ni opatpuluribu halak Israel!

5:9 Lomo do rohangku mida angka siparenta Israel, dohot mida halak natorop i, angka na girgir sumeahon dirina sian lomona. Puji hamu ma Jahowa!

5:10 Hamu angka na mangkunduli halode sihapaspili, hamu angka na mangkunduli palano na uli, jala hamu angka na mardalan pat marende ma hamu!

5:11 Singkat ni suara ni angka na pagulut di lambung partuaehan, diendehon boruboru nuaeng disi angka denggan basa ni Jahowa, denggan basa ni partogi di Israel, uju na tuat laho muli tu bahalna be bangso ni Jahowa marsonangsonang.

5:12 Tole, tole ale Debora! Tole, tole endehon ma sada ende! Hehe ma ho, ale Barak, jala togihon angka na tartaban binahenmi, ale anak ni si Abinoam!

5:13 Jadi martahop ma punguan na metmet dompak jolma angka na marhuaso, bangso ni Jahowa martahop rap dohot ahu dompak jolma angka na begu.

5:14 Sian Epraim adong angka na marurat di Amalek, mangihut tu ho do Benjamin di tongatonga ni angka bangsomi, sian Mahir tuat angka partogi, jala sian Zebulon angka sitiop tungkan ni partogi on.

5:15 Angka induk di Isasar pe rap dohot si Debora, jala Isasar do songon si Barak: Mardalan pat ibana martahop tu rura; martopihon angka sunge ni Ruben tading angka sideak pingkiran.

5:16 Boasa tung ngongong boti ho di holangholang ni angka parsoburan, patangitangi parmehetmehet ni parduan birubiru; martopihon sunge ni Ruben tongon tading angka sideak pingkiran.

5:17 Ngongong boti di bariba ni Jordan ia Gilead, alai anggo Dan, boasa tung tinggal ibana di bagasan angka parauna? Ia Aser maringan do di topi ni laut, jala marsonangsonang di solok pangarantoanna.

5:18 Alai anggo Zebulon, i ma bangso na olo sumeahon hosana tu hamatean; suang songon i Naptali di angka adaran na timbo.

5:19 Marrongoman ro angka raja marporang, marporang uju i angka raja sian Kanaan marjonokkon Taanak, martopihon batang aek Megiddo. Hepeng perak ndang adong pardalananna dompak si Sisera.

5:20 Sian langit huhut marporang, marmusu tahe angka bintang sian pardalananna dompak si Sisera.

5:21 Batang aek Kison mangaup nasida, batang aek sian na robi do batang aek Kison i. Padoras langkam, ale tondingku, marhagogoon!

5:22 Uju marsidomdom tambirik ni hoda dibahen pangenjak ni angka ulubalangna, laho maporus.

5:23 Pulasi hamu ma huta Meros, ninna suruan ni Jahowa, tung pulasi hamu pangisina, ala so ro nasida manolongi Jahowa, manolongi Jahowa dompak parangan angka na begu.

5:24 Sumurung ma pasupasu tu si Jael, jolma ni si Heber, marga Keni, sian na tu sude angka parompuan; sumurung tahe pasupasu tu ibana sian na tu luhut parompuan, angka na maringan di undungundung.

5:25 Mangido aek si Sisera, gabe susu dilehon nasida, di bagasan saoan na arga i binoanna miak susu.

5:26 Tanganna sihambirang mambuat labang, jala siamunna maniop nanggar apala na dokdok mampasak si Sisera manombuhi uluna, jala dirosahi, jala ditombuk parsontinganna.

5:27 Dung i jomjam ma ibana tu holangholang ni patna, margallogallo, jomjam tu holangholang ni patna, laos tinggang, laos mate jomjam boti.

5:28 Mandulo sian pandiloan ia ina ni si Sisera, jala mangandungi sian jandela: Boasa tung songon i ngolngol huretana so ro? Mahua ulaning songon i ngernger langkalangka ni hureta hinundulanna i?

5:29 Mangalusi ma jolma ni panuturina, angka na umbisuk, ibana sandiri pe mangalusi do songon on:

5:30 Nda ingkon jumpangan tabantaban nasida sibagionna! Duadua na marbaju di ganup baoa! Angka ulos ragidup tabantaban di si Sisera, ulos angka na niangit angkupangkup, alit di rungkung ni boruboru angka na tarboan!

5:31 Ingkon songon i ma nian hamamago ni saluhut angka musum, ale Jahowa! Alai anggo jolma, angka na mangkaholongi Ho, ingkon marsinondang do songon habibinsar ni mata ni ari di hagogoanna. Dung i marhasonangan ma tano i opatpulu taon lelengna.

Panguhuman 6[patota | patota mualna]

6:1 Dung i diulahon halak Israel muse ma sogo ni roha ni Jahowa, gabe dipasahat Jahowa nasida tu tangan ni Midian, pitu taon lelengna.

6:2 Jadi dung mangarupa tangan ni Midian tu Israel, dipambahen halak Israel ma di nasida jaringjing angka di dolok dohot liang dohot huta na gonting, bahen haporusanna moradophon Midian.

6:3 Ai disi adong disabur halak Israel, mamintor ro halak Midian, Amalek dohot halak habinsaran mangaromrom nasida.

6:4 Jala dibahen parsaroanna manosak nasida laho mangago parbue ni tano i, sahat ro di Gaza, jala ndang adong ditebahon hangoluan di Israel, nang birubiru, nang lombu, nang halode.

6:5 Ai nangkok do nasida rap dohot pinahannasida dohot undungundungna, songon haroro ni sihapor dibahen deakna, jala ndang habilangan torop ni jolma dohot untonasida, disola nasida ma tano i laho mamansingkon.

6:6 Jadi tarjepol situtu ma Israel maradophon Midian, gabe mangangguhi halak Israel tu Jahowa.

6:7 Jadi dung mangangguhi halak Israel tu Jahowa ala Midian.

6:8 Jadi disuru Jahowa ma sada halak panurirang manopot halak Israel, jala didok ma tu nasida: Boti hata ni Jahowa, Debata ni Israel: Nunga hupanangkok hamu sian Misir, jala huparuar hamu sian bagas parhatobanon.

6:9 Jala hupalua hamu sian tangan ni halak Misir, sian tangan ni saluhut angka na mangarupa hamu, jala hupabali nasida moradophon hamu, jala hubasabasahon tu hamu tanonasida.

6:10 Jala ningku do mandok hamu: Ahu do Jahowa, Debatamuna, unang habiari hamu debata ni halak Amori, nampuna tano na niingananmuna, hape ndang ditangihon hamu suarangku.

6:11 Dung i ro ma suruan ni Jahowa, jala marlinggomlinggom di toru ni hariara na di Opra, si Joas pinompar ni si Abieser nampunasa, mardege eme do anggo si Gidion, anakna i di pardegean, laho mangkaporushon maradophon halak Midian.

6:12 Jadi diida ibana ma suruan ni Jahowa na mandok tu ibana: Didongani Jahowa ma ho, ale ulubalang na gogo!

6:13 Alai ninna si Gidion ma tu ibana: Santabi ale Tuhan! Aut na Jahowa tutu dongannami, boasa tung masa saluhutna on tu hami? Jala didia do saluhut halongangan, angka na binahenna, angka na binaritahon ni ompunami tu hami, songon on: Nda Jahowa do na panangkok hami sian Misir? Hape anggo nuaeng, nunga ditadingkon Jahowa hami, jala nunga dipasahat hami tu tangan ni halak Midian.

6:14 Dung i didompakkon Jahowa ma ibana, huhut didok: Laho ma ho di hagogoonmon, ingkon ho paluahon Israel sian tangan ni halak Midian; nda Ahu do na marsuru ho?

6:15 Alai ninna si Gidion tu Ibana: Santabi ale Tuhan! Tung marhitehite aha ma ahu paluahon Israel? Ida ma, hami na saompu do na ummetmet di marga Manasse, jala ahu do apala siampudan pinompar ni damang.

6:16 Alai ninna Jahowa ma tu ibana: Ala Ahu mandongani ho, jadi tunduk bahenonmu halak Midian, songon jolma sada.

6:17 Dung i ninna si Gidion ma tu Ibana: Molo tung maruli asi ni roha ahu di jolomi, sai bahen ma tu ahu tanda sada, paboa Ho na mangkatai dohot ahu.

6:18 Santabi, unang ma Ho morot sian on, paima ro ahu mulak tu Ho, asa hualap pelean sipelehononku di jolomu; gabe ninna Ibana ma: Tinggal pe Ahu, paima mulak ho.

6:19 Dung i masuk ma si Gidion, jala dihobas anak ni hambing sada, dohot sagusagu na so niigaran sian sasolup itak; dibahen do juhut i tu bagasan sada ampang, jala huahuana dibahen tu bagasan mangkuk, jala ditaruhon tu Ibana, tu toru ni hariara i, jala diparade.

6:20 Dung i ninna suruan ni Debata ma tu ibana: Buat ma juhut i dohot sagusagu na so niigaran, jala peakkon tu atas dolok batu on, usehon ma anggo huahuana tusi. Jadi dibahen ibana ma songon i.

6:21 Dung i ditullukkon suruan ni Jahowa ma ujung ni tungkot na di tanganna i, asa dais tu juhut dohot tu sagusagu na so niiasoman i, gabe ruar ma api sian dolok batu manganhon juhut i dohot sagusagu i, laos so dapot matana be anggo suruan ni Jahowa.

6:22 Jadi dung mamoto si Gidion, tung suruan ni Jahowa do Ibana hape, gabe didok ma: Mate ma ahu, ale Tuhan Jahowa! Ala naung huida hape suruan ni Jahowa adop bohi be.

6:23 Dung i ninna Jahowa ma tu ibana: Dame ma di ho! Unang ho mabiar, ndang mate ho ala ni.

6:24 Dung i dipauli si Gidion ma disi langgatan sada di Jahowa, jala dibahen goarna: Jahowa haroroan ni hatuaon! Rasirasa sadarion sai disi dope i di Opra, pinompar ni Abieser nampunasa.

6:25 Dung i bornginna i ninna Jahowa ma tu ibana: Buat ma sada anak ni lombu sian lombu ni amami dohot lombu paduahon na marumur pitu taon, jala lohai ma langgatan ni Baal ni amami, jala taba sombaon na di atasna.

6:26 Dung i paulionmu ma sada langgatan di Jahowa, Debatam, di punsu ni dolok batu on, di haroroan, dung i buat ma lombu paduahon i, jala pelehon sada pelean situtungon sian hau ni sombaon naung tinabami.

6:27 Jadi diarahon si Gidion ma sampulu halak sian angka naposona, jala dibahen ma songon na nidok ni Jahowa tu ibana; alai dibahen biarna mida pinompar ni amana dohot mida halak isi ni huta i mambahensa arian, gabe bornginna i dibahen.

6:28 Jadi dung dipasogot isi ni huta i hehe manogotna i, ida ma, nunga maloha langgatan ni Baal, jala nunga tartaba sombaon di atasna, jala lombu paduahon i, nunga dipelehon di atas langgatan nambura pinaulina i.

6:29 Dung i angka ninna be ma tu donganna: Ise ulaning mambahen haurahon on? Jadi dung disulingkit nasida, jala diusousoi nasida, gabe didok halak ma: Si Gidion, anak ni si Joas do mambahensa.

6:30 Jadi ninna isi ni huta i ma tu si Joas: Boan ma anakmu tu ruar, ingkon mate ibana bunuon, ala na nilohana i langgatan ni Baal, jala ala tinabanna i sombaon di atasna.

6:31 Alai ninna si Joas ma tu saluhut angka na jongjong di lambungna: Hamu do huroha naeng marlulu Baal, manang naeng manolongi ibana? Manang ise na naeng marlulu ibana, ingkon marutang hosa ibana; tapaima ma tu marsogot, molo tung na tutu ibana Debata, tutu ma laos ibana marlulu ibana ala maloha langgatanna i.

6:32 Jadi olat ni ari na sasada i, digoar halak ma ibana Jerubbaal, ai ninna do: Baal sandiri ma marlulu tu ibana, ala na nilohana langgatanna i.

6:33 Dung i marluhut ma sude halak Midian dohot Amalek dohot halak sian habinsaran, taripar ma nasida jala marsaro di rura Jesreel.

6:34 Jadi ro ma Tondi ni Jahowa songgop tu si Gidion, dipalu ma sarune, asa marhara tu pinompar ni si Abieser.

6:35 Dung i disuru ma suruanna tu sandok marga Manasse, laos dihara dohot nasida; disuru huhut suruanna manopot marga Aser, Zebulon dohot Naptali, gabe ro be nasida manjumpangkon ibana.

6:36 Dung i ninna si Gidion ma tu Debata: Molo tung tongon Ho paluahon Israel marhitehite tanganku, songon na nidokmi.

6:37 Ida ma, hupahembang ma bobak ni birubiru na marimbulu on di pardegean, molo tung holan bobak i marnambur, jala mahiang sandok tano i humaliang, jadi tandaonku ma sian i, paboa tutu Ho naeng paluahon halak Israel marhitehite tanganku, songon na nidokmi.

6:38 Dung i jumpang ma songon i; ai dung dipasogot ibana hehe manogotna i, diporo ma bobak i, gabe manetehi nambur sian bobak i gok sada saoan aek.

6:39 Dung i ninna si Gidion ma tu Debata: Unang tung marsigorgor rimasmu mida ahu, ala mangkuling ahu sahalinari sambing, ala huunjuni dope sahalinari marhitehite bobak on: Holan di bobak on mahiang, jala nambur di sandok tano i humaliang.

6:40 Dung i dibahen Debata ma songon i di na saborngin i, mahiang holan di bobak i, jala nambur di sandok tano i humaliang.

Panguhuman 7[patota | patota mualna]

7:1 Dung i dipasogot si Jerubbaal, i ma si Gidion, hehe rap dohot sandok bangso donganna i, gabe marsaro ma nasida di lambung mual Harod, jadi parangan ni Midian marsaro di jolona, di rura tungkan utara sian robean More.

7:2 Dung i ro ma hata ni Jahowa tu si Gidion: Matorophu halak donganmu, nda tung tarlehon Ahu halak Midian tu tangannasida, atik beha mamuji dirina halak Israel maon moradophon Ahu mandok: Tanganku sandiri do paluahon ahu.

7:3 On pe tingtingkon ma tu pinggol ni bangso i songon on: Manang ise na mabiar, jala na tahuton, mulak ma ibana sian dolok Gilead! Jadi mulak ma duapulu dua ribu halak, gabe tading nama sampuluribu.

7:4 Dung i ninna Jahowa muse tu si Gidion: Matorophu dope jolma i; togihon ma nasida tuat tu batang aek i, asa Ahu manguji nasida di ho disi, jadi manang ise na hudok tu ho, ingkon i ma donganmu laho, jala ganup na hudok tu ho, ndang jadi donganmu ibana laho, i ma na so jadi laho.

7:5 Dung i ditogihon ibana ma bangso i tuat tu batang aek i, gabe didok Jahowa tu si Gidion: Manang ise na manirup aek i sian tanganna, songon pandilati ni biang, pulik ibana pajongjong; suang le songon i sude na minum manunggam.

7:6 Jadi bilangan ni angka na manirup sian tanganna, tolu ratus halak do, jala sandok bangso na teba i manunggam do laho minum aek.

7:7 Dung i ninna Jahowa ma tu si Gidion: Marhitehite na toluratus halak angka naung manirup sian tanganna Ahu paluahon hamu, jala lehononku Midian tu tanganmu; alai sandok bangso i dungkon i, muli be ma tu ingananna.

7:8 Dung i dibuat nasida ma bohal i sian na torop i dohot angka sarunenasida di bagasan tangannasida, dipamuli ma luhut halak Israel na asing ganup tu undungundungna be; alai ditiopi do anggo na tolu ratus halak i ianggo parangan ni halak Midian, marsaro do di jolona, tungkan toruan di rura i.

7:9 Laos bornginna i didok Jahowa tu ibana: Hehe ma ho! Tuat ma ho tu parsaroan ni parangan i, ai nunga hupasahat nasida tu tanganmu.

7:10 Molo tung mabiar ho laho tuat, ingkon tuat ma ho rap dohot si Pura parhaladom tu parsaroan i.

7:11 Jadi begeonmu ma manang aha na tinaringotannasida, gabe dapotan gogo ma tanganmu mandopang parsaroan i. Jadi tuat ma ibana rap dohot si Pura parhaladona i, tu partalpahan ni angka parhal di parsaroan i.

7:12 Ia halak Midian dohot Amalek dohot sude halak habinsaran marpeahan di rura i, songon sihapor dibahen toropna; jala untonasida songon horsik na di pasir ni laut, ndang habilangan dibahen deakna.

7:13 Jadi dung ro si Gidion, ida ma, tongon sada baoa pajojorhon tu donganna nipina, ninna do: Ida ma, marnipi ahu songon on: Tung magulang do sada roti na tingko tu tongatonga ni parangan ni halak Midian, tung tolhas do tu angka undungundung i, jala ditondong, gabe marumpak, pola tung balik tu ginjang, gabe marpeahan angka undungundung i.

7:14 Dung i ninna donganna i ma mangalusi: Ndang manang dia lapatanna, nda podang ni si Gidion, anak ni si Joas, halak Israel, nunga dilehon Debata halak Midian dohot sandok paranganna tu bagasan tanganna.

7:15 Jadi dung dibege si Gidion hata ni nipi i dohot lapatanna, laos marsomba ma nasida, jala mulak ibana tu parsaroan ni Israel, ninna ma: Borhat ma hamu, ai nunga dipasahat Jahowa tu tanganmuna parsaroan ni parangan ni Midian.

7:16 Dung i disagi si Gidion ma na tolu ratus halak i bahen tolu panggungan, jala diganupi nasida sarune sada be dohot hudon na rumar sada be, na marisi sulu damar.

7:17 Jala didok tu nasida: Maniru sian ahu ma hamu, bahen hamu ma songon na hubahen! Ida ma, molo sahat ahu tu partalpahan ni parsaroan i, songon i hubahen, ingkon songon i do bahenonmuna.

7:18 Molo hupalu sarune i, ahu ro di sude angka donganku, dohot ma hamu mamalu sarunena be humaliang sandok parsaroan i, jala surakkononmuna ma: Podang ni Jahowa dohot podang ni si Gidion!

7:19 Jadi dung sahat si Gidion udur dohot na saratus halak, angka donganna i tu partalpahan ni parsaroan i, mamungka gansi ni parhal tonga borngin, apala ipe dipatutur angka parhali, gabe dipalu nasida ma sarunenasida, jala ditaporhon ma hudon, angka na di tangannasida i.

7:20 Jadi rap mamalu sarunenasida ma na tolu panggungan i, ditaporhon dohot hudonnasida i, jala ditiop di bagasan tangannasida hambirang angka sulu, jala tanganna siamun maniop angka sarune i laho mamalu, huhut marsuraksurakkon: Podang ni Jahowa dohot podang ni si Gidion!

7:21 Dung i jongjong ma nasida di hajongjonganna be humaliang parsaroan i; jadi guntur ma sandok parsaroan i, huhut mangangguhi jala maporus.

7:22 Jadi uju mamalu sarunena be na tolu panggungan i, dipatongon Jahowa ma podang ni ganup dompak donganna dohot dompak sandok parsaroan i, gabe maporus sandok parangan i sahat ro di Betsitta boti tu Zaretan, tolhas ro di partalpahan sian Abel Mehola, marjonokkon Tabbat.

7:23 Jadi marpungu ma halak Israel sian Naptali dohot sian Aser dohot sian sandok Manasse, asa dieak halak Midian sian pudi.

7:24 Dung i disuru si Gidion ma suruanna tu sandok dolok Epraim, ninna ma: Haru tuat ma hamu manjumpangkon halak Midian, jala bajo hamu nasida di hatariparan aek marjonokkon Bet Bara na di Jordan; jadi marpungu ma sandok halak Epraim marbajo di angka hatariparan aek sahat ro di Bet Bara dohot Jordan.

7:25 Jadi ditangkup nasida ma dua raja ni Midian, si Oreb dohot si Seb, jala dibunu si Oreb di dolok batu Oreb, jala si Seb di bagasan pangilangan Seb, jala dieak sandok halak Midian; alai anggo ulu ni si Oreb dohot si Seb diboan nasida tu si Gidion, sian bariba ni Jordan.

Panguhuman 8[patota | patota mualna]

8:1 Dung i ninna halak Epraim ma tu ibana: Boasa tung songon i bahenonmu tu hami, na so hinarami hami laho marmusu dompak Midian? Pola balga badanasida tu ibana.

8:2 Alai ninna ibana ma tu nasida: Tung pola aha ma na hubahen i, molo pinatudos tu na binahenmuna? Nda dumenggan do ebaeba na pinutikkon ni Epraim do ebaeba na pinutikkon ni Epraim sian gotilon godang ni Abieser?

8:3 Tu tanganmuna do dipasahat Debata induk ni Midian, si Oreb dohot si Seb, jala didia ma tung tarbahen ahu patupahon, songon na binahenmuna i? Jadi dung didok songon i, mombun ma rimasnasida mida ibana.

8:4 Jadi dung sahat si Gidion tu Jordan, taripar ma ibana rap dohot na tolu ratus halak donganna i, angka na mandate, alai sai didatdati do mangeak.

8:5 Dung i ninna ibana ma tu halak isi ni huta Sukot: Ua lehon hamu deba sagusagu tu halak, angka na mangihuthon tu ahu, ai nunga mandate nasida, jala hudatdati hami mangalele si Seba dohot si Salmunna, angka raja ni Midian.

8:6 Hape ninna angka induk ni huta Sukot i ma: Nunga sahat tu tanganmu huroha tangan ni si Seba dohot si Salmunna, umbahen lehononnami sagusagu tu paranganmi?

8:7 Dung i ninna si Gidion ma: Antong ia dung dilehon Jahowa si Seba dohot si Salmunna tu bagasan tanganku, balbalonku ma dagingmunai dohot duri dohot angka tadatada sian halongonan.

8:8 Dung i nangkok ma ibana sian i tu Peniel, suang le ma songon i tu nasida didok, ala laos songon alus ni isi ni Sukot do alus ni isi ni Peniel.

8:9 Dung i ninna ibana ma tu isi ni Peniel i, songon on: Molo tung mulak ahu marsonangsonang, lohaonku ma tungkupon.

8:10 Alai anggo si Seba dohot si Salmunna di Korkor do rap dohot parangannasida, arga sampulu lima ribu halak toropna, i ma luhut angka na teba sian sandok parangan ni halak habinsaran, jala marragean do saratus duapulu ribu halak, angka parpodang sintak.

8:11 Dung i nangkok ma si Gidion sian dalan ni halak siingani undungundung tungkan habinsaran sian Nobah dohot Jogpeha, jala dirampok angka parangan i, so hinirim nasida.

8:12 Maporus ma ianggo si Seba dohot si Salmunna, alai dieak ibana do nasida, jala dapotsa do na dua raja ni Midian, si Seba dohot si Salmunna gabe patu ma sude parangan i.

8:13 Jadi dung mulak si Gidion, anak ni si Joas, sian parporangan i, tagan so binsar dope mata ni ari.

8:14 Ditangkup ma dakdanak sada sian isi ni Sukot, jala diusoi tu ibana, laos disurathon ibana goar ni angka induk ni Sukot, ro di sintuana pitupulu pitu halak toropna.

8:15 Dung i tolhas ma ibana tu angka isi ni Sukot, jala didok ma: Ida ma, indi on si Seba dohot si Salmunna, ala na niinsahanmuna ahu, pola didok hamu: Nunga tung sahat tu tanganmu tangan ni si Seba dohot Salmunna, umbahen lehononnami sagusagu tu paranganmu, angka na mandate i?

8:16 Dung i ditangkup ma angka sintua ni huta i, dibuat dohot duri sian halongonan dohot tadatada manjora nasida.

8:17 Diloha do ianggo tungkup sian Peniel, jala dibunu isi ni huta i.

8:18 Dung i ninna ma tu si Seba dohot tu si Salmunna: Songon dia rupa ni halak angka na binunumuna di Tabor? Jadi didok nasida ma: Suman tu ho do nasida, ganup songon rupa ni anak ni raja.

8:19 Dung i ninna si Gidion ma: Angka hahaanggingku, donganku saina nasida; songon sintongna mangolu Jahowa, aut na dipangolu hamu nasida, ndang bunuonku hamu.

8:20 Jadi didok ma tu si Jeter, anak buhabajuna i: Tole bunu ma nasida, alai ndang disintak dolidoli i podangna, mabiar do ibana, ai bajar dope ibana.

8:21 Dung i ninna si Seba dohot Salmunna ma: Ho sandiri ma nian hehe mambunu hami, ai ia songon i baoa, songon i do gogona. Jadi hehe ma si Gidion, jala dibunu si Seba dohot si Salmunna, jala dibuat jagarjagar angka na di rungkung ni untonasida i.

8:22 Dung i ninna halak Israel ma tu si Gidion: Rajai ma hami, songon i ho, ro di anakmu, nang pahompum, ai ho do paluahon hami sian tangan ni Midian.

8:23 Jadi ninna si Gidion ma tu nasida: Ndang ahu mangarajai hamu, jala ndang anakku mangarajai hamu, Jahowa do mangarajai hamu.

8:24 Angkup ni ninna si Gidion: Sada sambing do na hupangido sian hamu, ganup hamu nian mangalehon di ahu tintin pinggol sere sian tabanna, ai martintin sere do nasida, ala halak Ismael nasida.

8:25 Dung i ninna nasida ma: Hulehon hami pe. Jadi dipahembang ma sada ulos, jala direongkon be tusi tintin sere sian tabanna.

8:26 Ia borat ni tintin sere, angka na pinangidona i, saribu pitu ratus tail do, so padohot angka pangkean sere di bohi dohot di pinggol dohot ulos hasumba, angka naung pinangke ni raja ni Midian, so padohot pangkean angka na di rungkung ni untonasida i.

8:27 Dung i dipauli si Gidion ma sian i bahen baju epod, jala dipatindang do i di hutana di Opra, gabe marlangka pilit sandok Israel tusi; manjadi jorgong ma i di si Gidion dohot di pinomparna i.

8:28 Alai tarjepol situtu ma anggo Midian maradophon halak Israel, jala ndang tarbahen nasida be padirgak uluna, gabe sonang ma tano i opatpulu taon lelengna di angka ari ni si Gidion.

8:29 Dung i muli ma si Jerubbaal, anak ni si Joas, laos maringan di jabuna.

8:30 Jala pitupulu do anak ni si Gidion, angka na ruar sian gontingna, ai torop do jolmana.

8:31 Boruboru pinarjolmana di huta Sikem pe tumubuhon anak sada di ibana, jala dibahen goarna si Abimelek.

8:32 Dung i mate sarimatua ma si Gidion, anak ni si Joas, jala tartanom di parbandaan ni si Joas, amana i, di Opra ni halak Abieser.

8:33 Jadi dung mate si Gidion, marbalik ma halak Israel laho marlangka pilit mangihuthon tu Baal, jala Baal-Berit do dibahen debatanasida.

8:34 Jala ndang be dipaingotingot halak Israel Jahowa, Debatanasida i, na paluahon nasida sian tangan ni saluhut musunasida humaliang.

8:35 Jala ndang marasi ni roha nasida tu pinompar ni si Jerubbaal, i ma si Gidion, hombar tu saluhut uhum na denggan, na binahenna i tu Israel.

Panguhuman 9[patota | patota mualna]

9:1 Alai laho ma ianggo si Abimelek, anak ni si Jerubbaal, tu Sikem, tumopot angka iboto ni inana, jala ninna ma tu nasida dohot tu sandok marga pinompar ni ompu ni inana songon on:

9:2 Ua dok hamu ma suara tu pinggol ni sandok isi ni Sikem: Dia do tagonan di rohamu, pitupulu halak, anak ni si Jerubbaal luhutna i mangarajai hamu, manang holan sahalak mangarajaisa, jala ingot hamu holiholimuna jala sibukmuna do ahu.

9:3 Jadi dihatahon angka iboto ni inana ma sude hata i tu pinggol ni isi ni Sikem taringot tu ibana, gabe melok rohanasida mangihuthon si Abimelek, ai ninna nasida do: Angginta do ibana.

9:4 Dung i dilehon nasida ma tu ibana pitupulu ringgit sian joro ni Baal-Berit, asa diupai si Abimelek jolma, angka na neang jala na jungkat marroha mangihuthon tu ibana.

9:5 Dung i bongot ma ibana tu bagasan bagas ni amana di Opra, jala dibunu angka hahaanggina, anak ni si Jerubbaal, pitupulu halak toropna di atas ni sada batu, holan si Jotam, anak siampudan ni si Jerubbaal na teba, ai martabuni do ibana.

9:6 Dung i marluhut ma sandok isi ni Sikem dohot sandok pangisi ni Milo, jala laho nasida mamampe si Abimelek bahen raja, marjonokkon hariara parningotan na di Sikem.

9:7 Dung tarbortik barita i tu si Jotam, laho ma ibana jongjong di punsu ni dolok Gerizim, jala dipangiar suarana joujou, ninna ma tu nasida: Tangihon ahu, hamu ale isi ni huta Sikem! Asa ditangihon Debata hamu.

9:8 Laho do nasaingan angka hau naeng mamiahi di nasida sada raja, jadi dipangkulingi nasida ma hau Jetun; ho ma rajanami, ninna.

9:9 Alai ninna hau jetun i ma mangalusi: Tung tadingkononku ma miak na di ahu, pinapujipuji ni Debata dohot jolma, asa laho ahu parentarenta angka hau?

9:10 Dung i dipangkulingi angka hau i ma muse hau ara: Ro ma ho gabe rajanami!

9:11 Jadi ninna hau ara i ma tu nasida: Tung tadingkononku ma hamanisonku dohot parbuengku na denggan i, asa laho ahu parentarenta angka hau?

9:12 Dung i dipangkulingi angka hau i muse hau anggur: Ro ma ho gabe rajanami!

9:13 Jadi ninna hau anggur i ma tu nasida: Tung tadingkononku ma anggurhu, na palas roha ni Debata dohot jolma, asa laho ahu parentarenta angka hau?

9:14 Dung i dipangkulingi luhut angka hau i ma hau tadatada: Ro ma ho gabe rajanami.

9:15 Jadi ninna hau tadatada i ma tu angka hau i: Molo burjumuna i mamiahi ahu, gabe rajamuna, ba ro ma hamu marlinggomlinggom tu ahu; alai molo ndang, ruar ma api sian tadatada manganhon hau Ares di Libanon.

9:16 On pe, molo mardongan hasintongan dohot hapolinon pambahenmuna i marrajahon si Abimelek, jala molo na denggan pambahenmuna tu si Jerubbaal dohot tu pinomparna i, jala dibahen hamu tu ibana hombar tu pambahenan ni tanganna?

9:17 Ai marporang do damang humongkop hamu, jala diseahon hosana laho paluahon hamu sian tangan ni halak Midian.

9:18 Hape hehe do anggo hamu sadarion dompak pinompar ni damang, jala dibunu hamu anakna pitupulu halak di atas ni sada batu, jala dipampe hamu si Abimelek, tubu ni hatoban ni damang mangarajai isi ni Sikem, ala tuturmuna ibana.

9:19 Molo tung mardongan hasintongan dohot hapolinon pambahenmuna i sadarion tu si Jerubbaal dohot tu pinomparna i, marlas ni roha ma hamu mida si Abimelek, marlas ni roha nang ibana mida hamu.

9:20 Alai molo ndang, ingkon ruar ma api sian si Abimelek laho manganhon angka induk ni Sikem dohot isi ni Milo; ruar huhut api sian angka induk ni Sikem dohot sian pangisi ni Milo laho manganhon si Abimelek.

9:21 Dung i maporus ma si Jotam mangaruntus laho tu Beer, laos maringan disi, ala si Abimelek hahana i.

9:22 Jadi dung diparenta si Abimelek halak Israel tolu taon lelengna.

9:23 Ditongos Debata ma tondi parsalisian di tongatonga ni si Abimelek dohot isi ni huta Sikem, gabe marjehejehe ma isi ni Sikem dompak si Abimelek.

9:24 Manginonahon tu si Abimelek pangarupaon binahenna tu na pitupulu anak ni si Jerubbaal, hahaanggina i, dohot sapata ni mudarnasida, na binununa i nasida, manginona dohot tu isi ni Sikem, na margogoihon tanganna laho mambunu angka hahaanggina i.

9:25 Dung i dipaonggophon isi ni Sikem i ma angka parbajo umbajo ibana, di punsu ni angka dolok, jala dipupusi saluhut angka pamolus di dalan sian lambungnasida, jadi dibaritahon halak ma i tu si Abimelek.

9:26 Alai ro ma muse si Gaal, anak ni si Ebed dohot angka hahaanggina i, bongot tu huta Sikem, gabe marhaposan tu ibana do isi ni Sikem i.

9:27 Dung i ruar ma nasida tu ladang, asa diputihi angka parbue ni porlak anggurnasida, laos dipangilangi jala marhariburon, huhut dibongoti bagas ni debatanasida mangan jala minum do nasida, jala dipulasi ia si Abimelek.

9:28 Jadi didok si Gaal, anak ni si Ebed ma: Ise do si Abimelek, jala ise do Sikem, umbahen oloanta parentana? Nda anak ni si Jerubbaal do ibana jala si Zebul wakilna? Oloi hamu ma tagonan parenta ni halak Hemor, ama ni si Sikem, tung aha ma labanta marraja tu ibana?

9:29 Ise ulaning pasahat bangso on tu tanganku nian, asa hupamisir nian si Abimelek, jala ninna do anggo tu si Abimelek: Patorop ma paranganmu, jala ruar ma ho!

9:30 Alai dung dibege si Zebul, induk ni huta i, hatahata ni si Gaal, anak ni si Ebed, marsigorgor ma rimasna.

9:31 Jadi disuru ma suruanna marsibuni mandok tu si Abimelek: Ida ma, nunga ro si Gaal, anak ni si Ebed dohot angka anggina tu Sikem, jala digunturi nasida huta i dompak ho.

9:32 On pe, borhat ma ho bornginna i, ho dohot bangso na niuluhonmu, asa mambahen paronggopan di ladang.

9:33 Tole manogotna i, di habibinsar ni mata ni ari, pasogot ma mangarampok huta i; jadi ida, ruar ma ibana dohot bangso na niuluhonna i mandapothon ho, antong bahen ma tu ibana guru jumpang ni tanganmu.

9:34 Dung i borhat ma si Abimelek bornginna i rap dohot sandok bangso donganna i, mambahen paronggopan dompak Sikem opat panggungan.

9:35 Dung i ruar ma si Gaal, anak ni si Ebed, jala jongjong di haroroan tu pargumbangan ni huta i, jadi hehe ma si Abimelek dohot bangso donganna i sian paronggopan i.

9:36 Jadi dung diida si Gaal bangso i, gabe ninna ma tu si Zebul: Ida ma, torop ni halak angka na tuat sian punsu ni dolok an. Alai ninna si Zebul ma tu ibana: Halinu ni angka dolok do na niidam, songon jolma.

9:37 Alai ninna si Gaal ma muse: Ida ma, tuat do huhut sada bangso sian adaran ni tano i, jala panggungan na sada ro sian dalan ni hariara ni angka parsibalik mata.

9:38 Dung i ninna si Zebul ma tu ibana: Didia do nuaeng babamu, na nidokmu: Ise do si Abimelek, umbahen tung oloanta parenta ni? Rupa i do bangso na tinoisanmi, tole ruar ma ho nuaeng laho marmusu dompak ibana!

9:39 Jadi ruar ma si Gaal manguluhon induk ni Sikem laho marmusu dompak si Abimelek.

9:40 Alai dieak si Abimelek ma ibana, gabe maporus ibana sian jolona, jadi torop halak marragean sahat ro di pintu harbangan.

9:41 Dung i tading ma si Abimelek di Aruma; alai anggo si Zebul dionjar do si Gaal dohot angka hahaanggina i sian ingananna di Sikem.

9:42 Alai manogotna i ruar ma angka na torop i tu ladang, laos dibaritahon halak ma i tu si Abimelek.

9:43 Dung i diarahon ma angka naposona, jala disagi nasida bahen tolu panggungan, jala dibahen marparonggopan di ladang; jadi dung diida ruar halak na torop i sian huta, martahop ma ibana dompak nasida, laos dipatunduk nasida.

9:44 Ai si Abimelek dohot panggungan na rap dohot ibana mangarampok nasida, laos jongjong di pintu harbangan ni huta i nasida, ianggo na dua panggungan nari martahop do dompak sude angka na di ladang, laos dipatunduk nasida.

9:45 Ia si Abimelek marmusu dompak huta i manipat sadarina i, laos ditaban huta i, jala dibunu sude halak isi ni huta i, laos dipanepnep huta i, jala disirsirhon sira tusi.

9:46 Jadi dung dibege saluhut halak isi ni tungkup di Sikem barita i, masuk ma nasida tu benteng ni joro ni debata Berit.

9:47 Dung tarbortik barita i tu si Abimelek, naung marluhut jolma induk ni tungkup di Sikem.

9:48 Nangkok ma si Abimelek tu dolok Salmon, ibana dohot sude halak donganna i, dung i dibuat si Abimelek ma sada tangke di tanganna, asa manallik sada dangka ni hau, laos dihindat jala diampehon tu abarana, jala didok do tu halak donganna i: Manang aha na niidamuna, na hubahen i, siluhon hamu ma mambahen songon i.

9:49 Jadi luhut halak natorop i masitallik sada be dangka i, jala diihuthon si Abimelek, jala dipeakkon angka dangka i tu lambung ni benteng i, jala sun ditutung benteng i dohot api, gabe marmatean saluhut halak isi ni tungkup di Sikem, arga saribu halak, baoa dohot boruboru.

9:50 Dung i laho ma si Abimelek tu Tebes, jala ditungkum huta i laos ditaban.

9:51 Alai di tongatonga ni huta i adong sada tungkup na gonting; gabe tusi do maporus saluhut baoa dohot boruboru dohot sude isi ni huta i, laos dihinsu do di pudinasida, jala dipanaek nasida tarup ni tungkup i.

9:52 Jadi mangonjar ma si Abimelek sahat tu tungkup i, jala ditahop, laos didapothon sahat tu pintu ni tungkup i laho manutung nian dohot api.

9:53 Alai didekdekkon sada parompuan ma batu pandudaan sada, tongon tu ulu ni si Abimelek, gabe marosak pakpak uluna i.

9:54 Dung i pintor dijou si Abimelek ma dolidoli na mamboan sinjatana, jala didok tu ibana: Umpat ma podangmu, jala bunu ahu, asa unang didok halak taringot tu ahu: Tung inaina sada mambunu ibana. Jadi ditiham naposona i ibana, laos mate.

9:55 Alai dung diida halak Israel naung mate si Abimelek, muli be ma nasida tu ingananna be.

9:56 Jadi songon i pambahen ni Debata mamaloshon hajahaton ni si Abimelek, na binahenna i tu amana laho mambunu pitupulu halak hahaanggina.

9:57 Suang le songon i saluhut hajahaton ni halak Sikem, dipasuang Debata tu ulunasida, gabe manginona tu nasida pulas ni si Jotam, anak ni si Jerubbaal i.

Panguhuman 10[patota | patota mualna]

10:1 Jadi dung salpu si Abimelek, hehe ma muse si Tola, anak ni si Pua, anak ni si Dodo, sada halak sian marga Isasar paluahon halak Israel, jala maringan ibana di Samir, di dolok Epraim.

10:2 Jala diparenta ibana halak Israel duapulu tolu taon lelengna. Dung i mate ibana, jala tartanom di Samir.

10:3 Dung salpu ibana, hehe ma muse si Jair, halak Gilead, jala diparenta halak Israel duapulu dua taon lelengna.

10:4 Jala tolupulu do anakna, angka na marsihundul di tolupulu halode, laos tolupulu hutanasida, angka na targoar huta ni si Jair rasirasa sadarion, angka na di tano Gilead.

10:5 Dung i mate ma si Jair, jala tartanom di Kamon.

10:6 Dung i diulahi halak Israel muse mambahen sogo ni roha ni Jahowa, jala marsomba tu angka Baal dohot tu Astarot, dohot tu angka debata ni Ram, dohot tu angka debata ni Sidon, dohot tu angka debata ni Moab, dohot tu angka debata ni halak Amon, dohot tu angka debata ni halak Palistim, jala ditadingkon nasida Jahowa, jala ndang Ibana dioloi nasida.

10:7 Jadi marsigorgor ma rimas ni Jahowa mida Israel, laos digadishon nasida tu tangan ni halak Palistim dohot tu tangan ni halak Moab.

10:8 Jadi diparsipal, jala dirupa nasida ma halak Israel, mamungka di na sataon i boho sampulu ualu taon lelengna, luhut halak Israel angka na di bariba ni Jordan, di tano ni halak Amori, na di Gilead.

10:9 Angkupni ditaripari halak Amon do Jordan i, laho marmusu tandang huhut dompak Juda dohot dompak Benjamin dohot dompak pinompar ni Epraim, gabe targogot situtu Israel.

10:10 Jadi mangangguhi ma halak Israel tu Jahowa, angka ninna ma: Nunga mardosa hami dompak Ho, ala naung hutadingkon hami Debatanami, jala ala naung marsomba hami tu angka Baal.

10:11 Alai ninna Jahowa ma tu halak Israel: Nda hona pangarupaon hamu na jolo dibahen halak Misir, halak Amori, halak Amon dohot halak Palistim.

10:12 Dohot halak Sidon dohot halak Amalek dohot halak Maon? Dung i mangangguhi hamu tu Ahu, jadi Ahu paluahon hamu sian tangannasida.

10:13 Alai atik pe songon i, tung ditadingkon hamu Ahu, gabe marsomba hamu tu angka debata sileban; dibahen i ndang olo be Ahu paluahon hamu.

10:14 Laho ma hamu antong mangangguhi tu debata, angka na pinillitmuna i di hamu, nasida ma nian paluahon hamu di tingki hagogotanmunai.

10:15 Alai ninna halak Israel ma tu Jahowa: Nunga mardosa hami, Ho ma mambahen tu hami, hombar tu sandok lomo ni roham, asal dipalua Ho hami sadarion.

10:16 Jadi dipaholang nasida ma angka debata sileban sian tongatonganasida, jala marsomba nasida tu Jahowa, gabe ditostos rohana mida pardangolan ni Israel.

10:17 Dung i marpungupungu ma halak Amon, jala marsaro di Gilead, marpungu ma dohot halak Israel, jala marsaro di Mispa.

10:18 Dung i ninna sandok angka induk di Gilead ma ganup tu donganna: Manang ise na olo manguluhon laho marporang dompak halak Amon, i ma gabe jujungan ni sandok isi ni Gilead.

Panguhuman 11[patota | patota mualna]

11:1 Ia si Jepta, halak Gilead, ulubalang na begu nian, alai anak gampang do ibana, anak sinalong ni si Gilead do si Jepta i.

11:2 Alai dung ditubuhon jolma ni si Gilead angka anak di ibana, jala dung magodang angka anak ni tuanlaenna i, dipabali nasida ma si Jepta, angka ninna ma tu ibana: Ndang panean ho di bagas ni amanta, ai anak na pulik ina do ho.

11:3 Jadi maporus ma si Jepta maradophon angka anggina i, laos maringan di tano Tob. Dung i marpungu ma tu si Jepta jolma angka na neang marroha, angka na laho marbajo i udur dohot ibana.

11:4 Dung i di laonlaon ni ari marmusu ma halak Amon dohot halak Israel.

11:5 Jadi dung marmusu halak Amon dohot Israel, laho ma angka sintua ni Gilead mangalap si Jepta sian tano Tob.

11:6 Dung i ninna nasida ma tu si Jepta: Beta hita! Ho ma partoginami, asa marmusu hita dompak halak Amon.

11:7 Alai ninna si Jepta ma tu angka sintua sian Gilead: Nda hamu do na somor roha mida ahu, pola dipabali hamu ahu sian bagas ni damang? Boasa ro hamu mandapothon ahu ia nuaeng, dung hagogotan hamu?

11:8 Jadi ninna angka sintua sian Gilead i ma tu si Jepta: Apala ala ni do umbahen na ro hami nuaeng manopot ho, asa didongani ho hami marmusu dompak halak Amon, jala ho gabe partogi ni sude hami, isi ni Gilead.

11:9 Dung i ninna si Jepta ma mandok angka sintua sian Gilead: Molo mulak ahu dialapi hamu laho marmusu dompak halak Amon, jala dipasahat Jahowa nasida tu ahu, olo ma ahu gabe partogimuna!

11:10 Jadi ninna angka sintua sian Gilead ma tu si Jepta: Jahowa ma sibege hatantaon, molo so guru dokmu oloannami.

11:11 Jadi diihuthon si Jepta ma angka sintua sian Gilead, gabe dipampe bangso i ma ibana bahen jujungan dohot partoginasida, jala di adopan ni Jahowa do dipaboa si Jepta hatana i luhutna di Mispa.

11:12 Dung i disuru si Jepta ma suruanna tu raja ni halak Amon, mandok songon on: Pardulim ahu huroha, umbahen tung ro ho manopot ahu laho marmusu dompak tanongku?

11:13 Dung i ninna raja ni halak Amon ma mangalusi suruan ni i si Jepta: Ala na binuat ni Israel tanongku, uju di hananangkokna sian Misir, olat ni Arnon sahat ro di Jabok, sahat ro di Jordan. On pe paulak ma i tu ahu sian dengganna.

11:14 Dung i diulahi si Jepta dope pasurusuru suruanna tu raja ni halak Amon.

11:15 Angka na mandok tu ibana: Boti hata ni si Jepta: Ndang adong na binuat ni Israel tano ni halak Moab, nang tano ni halak Amon.

11:16 Ai uju di hananangkoknasida sian Misir, mardalan do Israel di halongonan sahat ro di laut arung, jala tolhas muse tu Kades.

11:17 Dung i disuru Israel ma suruanna tu raja ni Edom mandok: Ua loas ma ahu mamolus sian tanom; hape ndang ditangihon raja ni Edom; disuru muse tu raja ni Moab, hape ndang mangaloas ibana, gabe laos tinggal di Kades do Israel.

11:18 Jala mardalandalan nasida di halongonan, jala mangaliat sian tano ni Edom dohot sian tano ni Moab, boti tu habinsaran ni tano ni Moab, jala marsaro di bariba ni Arnon, jala ndang didege parbalohan ni tano Moab, ai Arnon do parbalohan ni tano Moab.

11:19 Dung i disuru Israel ma suruanna tu si Sihon, raja ni halak Amori, raja sian Hesbon, jala ninna Israel do tu ibana: Ua loas ma hami mamolus sian luatmu sahat ro di ingananku.

11:20 Alai ndang pos roha ni si Sihon mangaloas Israel mamolus sian parbalohanna, lam dipapungu si Sihon do sandok bangsona, jala marsaro di Jahaz, laos marmusu dohot Israel.

11:21 Alai dipasahat Jahowa, Debata ni Israel do si Sihon ro di sandok bangsona tu tangan Israel, laos dipatunduk nasida, gabe disoluk Israel sandok tano ni halak Amori, na maringan di tano i.

11:22 Dung i disoluk nasida ma sandok parbalohan ni halak Amori, olat ni Arnon sahat ro di Jabok, jala olat ni halongonan sahat ro di Jordan.

11:23 Antong anggo dung songon i pangonjar ni Jahowa, Debata ni Israel, di halak Amori moradophon bangsona Israel, hape naeng soluhonmu muse tano i?

11:24 Nda songon on do: Nasa na tinurpukkon ni Kamos, debatamu tu ho, i do soluhonmu. Antong nasa na tinurpukkon ni Jahowa, Debatanami tu hami, i do soluhonnami.

11:25 On pe, tung umburju ma ho di roham sian si Balas, anak ni si Zippor, raja sian Moab? Tung dung ma ibana marbada dohot Israel, manang tung dung marmusu dompak nasida?

11:26 Nunga pola tolu ratus taon lelengna Israel maringan di Hesbon, ro di sosorna humaliang dohot di Aroer ro di sosorna humaliang dohot di sude huta, angka na martopihon Arnon; boasa so dirampas hamu angka i na sai laon?

11:27 Ianggo ahu ndang adong dosangku tu ho, hape mambahen na so uhum ianggo ho tu ahu, laho marmusu dompak ahu, Jahowa do panguhum, Ibana ma manguhum halak Israel dohot halak Amon sadarion.

11:28 Alai ndang ditangihon raja ni halak Amon hata na tinonahon ni si Jepta tu ibana.

11:29 Dung i songgop ma tondi ni Jahowa tu si Jepta, gabe mamolus ibana sian Gilead dohot Manasse, mamolus muse sian Mispa na di Gilead, jala sian Mispa na di Gilead taripar ibana dompak halak Amon.

11:30 Dung i marbagabaga ma si Jepta tu Jahowa, ninna ma: Molo dipasahat Ho halak Amon tu bagasan tanganku:

11:31 Manang aha na ruar parjolo sian pintu ni bagashu manomunomu ahu, di na mulak ahu marsonangsonang sian halak Amon, ingkon Jahowa nampunasa, jala pelehononku do i bahen pelean situtungon.

11:32 Dung i taripar ma si Jepta dompak halak Amon laho marmusu dompak nasida, gabe dipasahat Jahowa nasida tu tanganna.

11:33 Jadi patu nasida dibahen, olat ni Aroer sahat ro di Minit, duapulu huta, jala sahat ro di Abel Keramim marhite sian hataluan na bolon situtu; gabe tarjepol situtu halak Amon moradophon halak Israel.

11:34 Jadi dung sahat si Jepta tu Mispa, jonok tu jabuna, ida ma ruar ma boruna manomunomu ibana, umpalu arbab huhut manortor haliang; sasada i do boruna, dungkon ni ndang adong anak manang boru di ibana.

11:35 Asa dung diida ibana boruna i, gabe disansani pangkeanna, jala didok ma: Oe ale boru hasian! Tarjepol situtu ma ahu dibahen ho, mambahen ahu margudompong; ai nunga huungkap pamanganku marbagabaga tu Jahowa, jala ndang tartait ahu be.

11:36 Alai ninna boruna i ma tu ibana: Ale amang, molo dung diungkap ho pamanganmu marbagabaga tu Jahowa, bahen ma tu ahu marguru tu hata na ruar sian pamanganmu, dung dibahen Jahowa tu ho partubolon moradophon musum, moradophon halak Amon.

11:37 Angkup ni ninna nasida ma tu amana: Oloi ma hata sisandok on tu ahu, loas ahu arga dua bulan lelengna, asa laho ahu mardalani di atas ni angka dolok, mananangisi disi habajuonku, ahu rap dohot angka alealengku.

11:38 Jadi ninna ibana ma: Antong laho ma ho! Diloas ma nasida laho dua bulan lelengna, gabe mardalani nasida rap dohot angka alealena tumatangis taringot tu habajuonna di atas ni angka dolok.

11:39 Jadi dung marujung na dua bulan i, mulak ma nasida tu amana, gabe dibahen ma tu nasida bagabagana, na binagabagahonna i, gabe ndang tumanda baoa nasida; laos i do gabe adat di Israel.

11:40 Laho do ganup taon angka boru ni Israel papujipuji boru ni si Jepta, halak Gilead i opatopat ari lelengna.

Panguhuman 12[patota | patota mualna]

12:1 Dung i marluhut ma halak Epraim, jala ditondong dompak utara, angka didok nasida ma tu si Jepta: Boasa tung borhat ho laho marmusu dompak halak Amon, so marhara ho di hami mandongani ho nian; tutungonnami ma bagasmu di atasmu dohot api.

12:2 Dung i ninna si Jepta ma tu nasida: Sobu situtu do ahu maralo dohot bangsongku dompak halak Amon, jala marhara ahu tu hamu nian, hape ndang olo hamu paluahon ahu sian tangannasida.

12:3 Jadi dung huida ndang ro pangurupi sian hamu, huseahon ma hosangku, jala borhat ahu dompak halak Amon, gabe dipasahat Jahowa nasida tu bagasan tanganku. Boasa ma tung nangkok hamu sadarion laho marmusu dompak ahu?

12:4 Dung i dipaluhut si Jepta ma sude baoa sian Gilead, asa marmusu dompak Epraim. Jadi ditaluhon halak Gilead ma halak Epraim, ala na nidoknasida: Angka na nieak ni Epraim do hamu isi ni Gilead, tung patut ma hamu di tongatonga ni Epraim dohot Manasse.

12:5 Dung i marbajo ma halak Gilead i di angka hatariparan ni Jordan, maralohon Epraim. Dung i molo didok angka na maporus sian Epraim: Loas ma ahu taripar, gabe didok halak Gilead ma tu ibana: Atehe halak Epraim do ho? Molo didok ibana ndang.

12:6 Gabe didok nasida ma tu ibana: Antong dok ma jolo Shibbolet; molo didok ibana Sibbolet, jala ndang tarbahensa mandok songon i, pintor ditangkup nasida ibana, jala dibunu di lambung ni angka hatariparan ni Jordan, gabe marragean uju i sian Epraim opatpulu duaribu halak.

12:7 Alai onom taon do lelengna si Jepta parentahon Israel, dung i mate ma si Jepta, halak Gilead i, jala tartanom ibana di bagasan sada huta angka na di Gilead.

12:8 Dung salpu ibana, soluk ma si Ebsan sian Betlehem manguhum Israel.

12:9 Tolupulu anakna, jala tolupulu boruna, angka na pinamulina tu halak ruar, jala tolupulu boruboru nialapna sian halak ruar di anakna, jala diparenta ibana halak Israel pitu taon lelengna.

12:10 Dung i mate ma si Ebsan, jala tartanom di Betlehem.

12:11 Dung salpu ibana, soluk ma si Elon, marga Zebulon manguhum Israel sampulu taon lelengna.

12:12 Dung i mate ma si Elon, marga Zebulon i, jala tartanom di Aialon, di tano Zebulon.

12:13 Dung salpu ibana, soluk ma si Abdon, anak ni si Hilel, sian Piraton manguhum Israel.

12:14 Opatpulu do anakna, jala tolupulu pahompuna baoa, angka na mangkunduli pitupulu halode, jala ibana manguhum Israel ualu taon lelengna.

12:15 Dung i mate ma si Abdon, anak ni si Hilel sian Piraton, jala tartanom ibana di Piraton di tano Epraim, di dolok ni halak Amalek.

Panguhuman 13[patota | patota mualna]

13:1 Dung i diulahi halak Israel ma mambahen sogo ni roha ni Jahowa, gabe dipasahat Jahowa nasida tu tangan ni halak Palistim opatpulu taon lelengna.

13:2 Jadi adong ma sada baoa sian Zora, sian marga Dan, na margoar si Manoa, jala hol do ianggo jolmana, ndang tubuan anak.

13:3 Dung i diida boruboru i ma suruan ni Jahowa, na mandok tu nasida: Ida ma, na hol do ho anggo nuaeng, jala ndang tubuan anak; alai gabegabean ma ho, jala tumubuhon anak sada.

13:4 On pe, ramoti ma dirim, ndang jadi inumonmu anggur, manang siinumon na koras, jala ndang jadi panganonmu manang aha na ramun.

13:5 Ai ida ma, gabegabean ma ho, jala tumubuhon anak sada, jala raut parnabung, ndang jadi dais tu uluna, ai gabe halak na pinapulik di Debata do dakdanak i sian bortian, jala ibana manungka paluahon Israel sian tangan ni halak Palistim.

13:6 Dung i ro ma boruboru i mangalualuhon hata i tu sinondukna, ninna do: Ro do tu ahu sada halak ni Debata, jala rupana songon rupa ni suruan ni Debata, na songkal situtu, gabe ndang husungkun manang sian dia ibana, goarna pe. Ndang dipaboa tu ahu.

13:7 Alai ninna do mandok ahu: Ida ma, gabegabean ma ho, jala tumubuhon anak sada, on pe ndang jadi inumonmu anggur, manang siinumon na koras, jala ndang jadi panganonmu manang aha na ramun, ai gabe halak na pinapulik di Debata do dakdanak i sian bortian sahat ro di hamamatena.

13:8 Dung i martangiang ma si Manoa tu Jahowa, ninna ma: Santabi, ale Tuhanku, sai ro ma nian sahalinari halak ni Debata, naung sinurum manopot hami, asa diajarhon tu hami manang aha sibahenonnami tu dakdanak situbuhononhon i.

13:9 Jadi ditangihon Debata ma suara ni si Manoa, gabe ro ma muse suruan ni Debata tu boruboru i, tongon juguk nasida di ladang, alai ndang di lambungna ianggo si Manoa.

13:10 Jadi manilu ma boruboru i marlojong paboahon tu sinondukna i, didok ma tu ibana: Ida ma, nunga huida muse baoa na ro tu ahu na imbaru on.

13:11 Dung i hehe ma si Manoa, jala diihuthon jolmana, gabe sahat ibana tu baoa i, jala didok tu ibana: Atehe ho do tutu baoa na mangkatai dohot boruboru on? Ahu ma tutu, ninna.

13:12 Dung i ninna si Manoa ma: Molo songgop hata na nidokmi, dia do uhum siingoton ni dakdanak i dohot bahenbahenanna?

13:13 Jadi ninna suruan ni Jahowa ma tu si Manoa: Luhut naung hupaboa tu parompuan i, ingkon oromonna do.

13:14 Ndang jadi panganonna sian saluhut na ruar sian hau anggur, anggur dohot siinumon na koras ndang jadi inumonna, jala ndang jadi panganonna manang aha na ramun, luhut naung hutonahon i tahe, ingkon parateatehononna do.

13:15 Dung i ninna si Manoa ma tu suruan ni Jahowa: Sai olo ma ho tiopannami, asa huhobas hami di jolomi anak ni hambing sada.

13:16 Jadi ninna suruan ni Jahowa ma tu si Manoa: Nang pe ditiopi ho ahu, ndang tagamon mangan ahu sian rotimu; alai molo naeng bahenonmu pelean situtungon sada, tu Jahowa ma pelehon, ai ndang diboto si Manoa, tung suruan ni Jahowa ibana.

13:17 Dung i ninna si Manoa ma tu suruan ni Jahowa: Ise do goarmu? Asa hupasangap hami ho, ia dung songgop hatami.

13:18 Alai ninna suruan ni Jahowa ma tu ibana: Boasa tung sungkunonmu goarhu, halongangan do i.

13:19 Dung i dibuat si Manoa ma sada anak ni hambing rap dohot pelean sipanganon, jala dipelehon do i tu Jahowa di atas ni dolok batu, dibahen suruani halongangan sada, dipaidaida si Manoa dohot jolmana.

13:20 Ai di na manaek nala ni api i sian langgatan i tu ginjang: Manaek ma dohot suruan ni Jahowa di bagasan nala ni api i na sian langgatan i, dipaidaida si Manoa dohot jolmana, gabe manungkap nasida na dua tu tano.

13:21 Jadi dung so mullop be suruan ni Jahowa dapot idaon ni si Manoa dohot jolmana i, ipe asa mamoto si Manoa, suruan ni Jahowa do Ibana hape.

13:22 Dung i ninna si Manoa ma tu jolmana: Ingkon mate nama hita, ala naung itaida Debata.

13:23 Alai ninna jolmana i ma mangalusi ibana: Aut na lomo roha ni Jahowa mambunu hita, ndang tagamon jaloonna sian tanganta pelean situtungon dohot pelean sipanganon, jala ndang pataridahononna luhutna i tu hita, jala ndang patubegehononna tu hita songon i nuaeng.

13:24 Dung i ditubuhon boruboru i ma anak sada, jala dibahen goarna si Simson. Dung i lam magodang ma dakdanak i, jala dipasupasu Jahowa ibana.

13:25 Dung i dipungka Tondi ni Jahowa ma mangonjaronjar ibana di parsaroan Dan, di holangholang ni Zora dohot Estaol.

Panguhuman 14[patota | patota mualna]

14:1 Dung i tuat ma si Simson tu Timna, gabe diida sada boruboru di Timna, sian boru ni halak Palistim.

14:2 Jadi nangkok ibana muse, asa dipaboa tu amana dohot tu inana, ninna do: Adong do huida sada boruboru di Timna sian boru ni halak Palistim; on pe sai buat hamu ma ibana bahen jolmangku.

14:3 Alai ninna amana dohot inana ma tu ibana: Ndang adong huroha di tongatonga ni boru ni hahaanggim manang di tongatonga ni sandok houmta bahen jolmam, umbahen tung laho ho mambuat boru sian halak Palistim, angka na marhulup? Jadi ninna si Simson ma tu amana: Ingkon ibana buatonmu di ahu, ai ibana do hasoloan ni rohangku.

14:4 Alai ndang diboto anggo natorasna, tung sian Jahowa do i, ai mangalului parbonsiran do ibana dompak halak Palistim, ai tongon gumomgom Israel do halak Palistim uju i.

14:5 Dung i tuat ma si Simson rap dohot natorasna tu Timna. Jadi dung sahat nasida ro di angka porlak anggur ni Timna, ida ma, ro ma anak ni singa sada patungoromon manjumpangkon ibana.

14:6 Jadi songgop ma tu si Simson Tondi ni Jahowa, gabe diparsisiga ma singa i, songon anak ni hambing, so agia aha di tanganna, jala ndang dipaboa tu natorasna, na binahenna i.

14:7 Jadi dung tuat, mangkatai ma ibana dohot parompuan i, jala apala hasoloan ni rohana do ibana.

14:8 Jadi dung salpu manang piga ari, mulak muse ibana laho mangalap parompuan i, gabe manimbil ibana, laho maningkir bangke ni singa i, hape ida ma, angka loba sapunguan di bagasan rangrang ni singa i, nunga pola marsituak.

14:9 Jadi dibuat sian i tu tanganna, laos dipangan huhut mardalan laho tu natorasna, jala dilehon tu nasida gabe dipangan nasida, alai ndang dipaboa anggo tu nasida, tung sian rangrang ni singa i binuatna situak ni loba i.

14:10 Jadi dung tuat amana i manopot parompuan i, jala dibahen si Simson disi sipanganon hasampuron, ai somal do songon i dibahen angka dolidoli i.

14:11 Jadi dung diida nasida ibana, dibuat nasida ma tolupulu halak, bahen pandonganina.

14:12 Dung i ninna si Simson ma tu nasida: Marhulingkulingan ma ahu tu hamu, molo tarpaboa hamu i di ahu di bagasan na pitu ari hasampuran on, jala dapot hamu lapatanna, lehononku ma tu hamu tolupulu kameja parbagasan dohot tolupulu salin abit.

14:13 Alai molo so tarpaboa hamu lapatanna tu ahu, ingkon hamu mangalehon tu ahu tolupulu kameja parbagasan dohot tolupulu salin abit. Jadi ninna nasida ma tu ibana: Antong paboa ma hulingkulinganmi, asa hubege hami!

14:14 Dung i ninna ibana ma tu nasida: Ruar do sipanganon sian sipangan mago, jala ruar do na tonggi sian na gogo. Hape ndang tarpaboa nasida lapatan ni hulingkulingan i di bagasan na tolu ari.

14:15 Tole muse papituarihon, ninna nasida ma tu jolma ni si Simson: Hata i ma sinondukmi, asa dipaboa tu hami lapatan ni umpama i, asa unang hututung hami ho, nang bagas ni amam dohot api. Nda tung naeng buatonmu artanami, umbahen dipio hamu hami ulaning?

14:16 Jadi sai tumatangis ma jolma ni si Simson di jolona, ninna ma: Rupa magigi do ho mida ahu, ndang dihaholongi roham ahu. Ai marhulingkulingan ho tu donganku sabangso, hape ndang dipaboa ho anggo tu ahu. Jadi ro ma alusna: Gari tu damang dohot tu dainang, ndang hupaboa, lam tu ho ma paboaonku?

14:17 Jadi sai tumatangis ibana di jolona di na pitu ari i, saleleng hasampuron rajai; tole papituarihon, dipaboa ma tu ibana, ai sai disulingkit do ibana, gabe dipaboa parompuan i ma lapatan ni umpama i tu donganna sabangso.

14:18 Dung i papituarihon, tagan so mate dope mata ni ari, ninna angka baoa ni huta i ma tu ibana: Tung aha ma na tumonggi sian situak ni loba, tung aha ma na gumogo sian singa? Alai ninna si Simson ma tu nasida: Aut unang maninggala hamu dohot anak ni lombungku, tung na so tagamon dapot hamu lapatan ni hulingkulinganki.

14:19 Dung i songgop ma tu ibana Tondi ni Jahowa, gabe tuat ibana tu Askelon, dibunu ma sian nasida tolupulu halak, jala dibuat pangkeannasida, jala dilehon pangkean i tu angka na jumpangan lapatan ni hulingkulinganna i; alai marsigorgor ma anggo rimasna, gabe nangkok ibana tu jabu ni amana.

14:20 Alai anggo jolma ni si Simson i tu sada halak pandonganina, na mandongani ibana dilehon.

Panguhuman 15[patota | patota mualna]

15:1 Alai di laonlaon ni ari, di hamamasa ni gotilon, ditopot si Simson ma muse jolmana, mamboan anak ni hambing sada, jala didok do: Naeng ahu manopot jolmangku tu bilut, hape ndang diloas ama ni parompuan i ibana bongot.

15:2 Ai ninna amana do: Na hurimpu do naung magigi ho mida ibana, jadi nunga hupamuli ibana tu pedanmu; alai nda ummuli do anggina i sian ibana, ua i ma di ho singkatna.

15:3 Dung i ninna si Simson ma tu nasida: Lidang do ahu anggo sahalion moradophon halak Palistim, molo hubahen hamagoan tu nasida.

15:4 Dung i laho ma si Simson manangkup tolu ratus antuasu, jala dibuat angka tulbu, dipadomu ma ihur tu ihur, jala dibahen tulbu sada tu holangholang ni na dua antuasu i.

15:5 Dung i dinahiti ma angka tulbu i, jala dipalua angka antuasu i tu eme ni halak Palistim na jongjong, gabe gor angka tibalan ro di eme na jongjong dohot hau anggur, nang hau Jetun.

15:6 Jadi ninna halak Palistim ma: Ise do ulaning mambahensa? Dung i didok halak ma: Si Simson, hela ni halak Timna i do, ala na binuatna jolmana, jala dipalangkuphon tu pedanna. Jadi nangkok ma halak Palistim, laos dimosokkon nasida ma boruboru i rap dohot amana di bagasan api.

15:7 Alai ninna si Simson ma tu nasida: Molo dibahen hamu songon i; ndang na pasohotonku, nda jolo hutubolhon tu hamu.

15:8 Jadi diompongi ma marponggolan haehae dohot gontingnasida marhite sian hataluan bolon. Jadi tuat ma ibana, laos maringan di liang batu Etham.

15:9 Dung i borhat ma halak Palistim, jala marserak nasida di Juda, jala marseak sahat ro di Lehi.

15:10 Alai ninna halak Juda ma: Boasa tung nangkok hamu, naeng mamorangi hami? Jadi ninna nasida ma mangalusi: Naeng manali si Simson do hami, umbahen na nangkok hami, mambahen tu ibana songon naung binahenna i tu hami.

15:11 Jadi tuat ma tolu ribu halak sian Juda tu liang batu Etham, angka didok nasida ma tu si Simson: Ndang diboto ho na ginomgoman ni halak Palistim do hita? Boasa tung songon i bahenonmu tu hami? Gabe didok si Simson ma tu nasida: Suang songon na binahennasida tu ahu, hubahen tu nasida.

15:12 Dung i ninna nasida ma tu ibana: Naeng manali ho do umbahen na tuat hami, laho pasahathon ho tu tangan ni halak Palistim. Jadi ninna si Simson ma mangalusi nasida: Mangmangkon hamu ma tu ahu, paboa na so tupa todosonmuna ahu.

15:13 Dung i ninna nasida ma tu ibana songon on: Ndangana, asal naeng talionnami do ho, jala pasahathon tu tangannasida, ndang anggo bunuonnami ho. Jadi dibuat nasida ma dua jorat na imbaru manali ibana, manogihon ibana nangkok sian liang batu i.

15:14 Sahat ibana ro di Lehi, marsuraksurak ma halak Palistim mandapothon ibana, gabe songgop ma Tondi ni Jahowa tu ibana; ia jorat angka na di pargolanganna i, songon bonang na tinutung di bagasan api, metep boti angka tali i sian tanganna.

15:15 Dung i jumpang ibana ma sada osangosang ni halode na rata, laos dipatoltol tanganna manjomputsa, jala dipangalotakkon mambunu saribu halak.

15:16 Dung i ninna si Simson ma: Marhitehite osangosang ni halode dua parduan parangan, marhitehite osangosang ni halode saribu halak hubunu.

15:17 Jadi dung tolhas didok songon i, direongkon ma osangosang i sian tanganna, jala digoar hajongjonganna i: Ramat-Lehi.

15:18 Dung i mauas situtu ma ibana, gabe dijou ma Jahowa, ninna ma: Nunga dilehon Ho tua na sai godang marhitehite tangan ni naposomon, tung mate ma ahu nuaeng bahenon ni uas, jala madabu tubagasan tangan ni halak na marhulup.

15:19 Jadi dibola Debata ma dolok batu na di Lehi, gabe ruar sian i aek, jala dung diinum si Simson sumuang ma tondina i, jala mangolu. Ala ni do didok halak goarna: Pansur ni panjou na di Lehi rasirasa sadarion.

15:20 Dung i diparenta si Simson halak Israel uju di angka ari ni halak Palistim duapulu taon lelengna.

Panguhuman 16[patota | patota mualna]

16:1 Dung i laho ma si Simson tu Gaza, gabe diida disi sada boruboru sibabijalang, laos ditopot do.

16:2 Dung tarbortik barita i tu isi ni Gaza naung masuk si Simson tu huta i, gabe dihaliangi jala dionggop nasida ibana di lambung bahal ni huta i manipat sabornginna i; alai sip do nasida manipat sabornginna i, ninna ma: Manogot marhira torang ari ma itabunu ibana.

16:3 Alai modom do anggo si Simson ro di tonga borngin; tole tonga borngin i hehe ma ibana, ditangkup ma na dua pintu pargumbangan ni huta i, ro di tiangna na dua i, laos diumpat do ro di sordakna, jala diampehon tu abarana, jala diusung tu punsu ni dolok na di jolo ni Hebron.

16:4 Dung i di laonlaon ni ari solo ma rohana mida sada boruboru marjonokkon sunge Sorek, si Delila do goarna.

16:5 Dung i nangkok ma angka induk ni halak Palistim manopot parompuan i, angka ninna ma tu ibana: Sai hata i ma ibana, jala sulingkit manang dia parhitean ni hagogoonna na godang i, jala marhitehite aha tarpatunduk hita ibana, asa dapot hita ibana talionta laho paporsukporsukkon; ganup pe hami mangalehon tu ho saribusaratus rupia.

16:6 Jadi ninna si Delila ma tu si Simson: Ua paboa tu ahu manang dia parhitean ni gogom na godang i, jala manang beha panalina di ho laho paporsukporsukkon ho?

16:7 Dung i ninna si Simson ma tu ibana: Tung sura ditali ho ahu dohot pitu jorat angka na imbaru, angka na so pate hiang dope, tunduk ma ahu, gabe songon jolma sileban.

16:8 Jadi diboan angka induk ni halak Palistim ma tu ibana pitu jorat angka na imbaru angka na so pate hiang dope, laos ditali parompuan i ibana marhite sian i.

16:9 Alai juguk do di lambungna di bagasan bilut i angka pangonggop; dung i didok parompuan i ma tu ibana: Halak Palistim naeng mangarampok ho, ale Simson! Gabe dirapui ibana angka jorat i, songon tali bonang sada na metep binahen ni api; gabe ndang dapot diboto parhitean ni gogona.

16:10 Dung i ninna si Delila ma tu si Simson: Ida ma, na dipaotooto ho do ahu, jala gabus do na pinaboam tu ahu; on pe sai paboa ma di ahu, manang marhitehite aha ho dapot talion.

16:11 Dung i ninna si Simson ma tu ibana: Tung sura ditali nasida ahu mansai momos dohot jorat na imbaru, angka na so dung dope pinangke tu ulaon, tunduk ma ahu, gabe songon jolma sileban.

16:12 Dung i dibuat si Delila ma jorat angka na imbaru, laos ditali ibana marhite sian i, jala didok tu ibana: Halak Palistim naeng mangarampok ho, ale Simson! Alai juguk di bagasan bilut i hian anggo angka pangonggop; jadi dirapui si Simson angka jorat i sian tanganna, songon tali bonang.

16:13 Dung i ninna si Delila ma tu si Simson: Rasirasa nuaeng sai dipaotooto ho do ahu, jala gabus do na pinaboam tu ahu; sai paboa ma tu ahu manang marhitehite aha ho dapot talion. Jadi ninna si Simson ma tu ibana: Tung sura didandani ho na pitu jengjeng buhit ni obuk ni ulungku rap dohot tali papaut.

16:14 Laos dilabangkon muse dope tu dorpi, dung i ninna ma tu ibana: Halak Palistim naeng mangarampok ho, ale Simson! Jadi tarsunggul ma ibana sian na modom i, gabe dienet ma na pitu jengjeng buhitna nidandanan i rap dohot labang dohot tali papaut.

16:15 Dung i ninna parompuan i ma tu ibana: Beha ma tardok ho holong rohangku di ho, hape ndang tu ahu rohami? Patoluhali on ma dipaotooto ho ahu, jala ndang dipaboa ho tu ahu manang dia parhitean ni gogom na godang i.

16:16 Alai dung sai disulingkit parompuan i ibana ariari jala disosaksosak, gabe marpandelean ma rohana mangido mate.

16:17 Dung i dipaboa ma tu ibana sandok sibunian ni rohana, ninna ma: Ndang dung hona raut parnabung ulungku, ai halak na pinapulik di Debata do ahu sian bortian ni dainang dope; tung sura tarnabung ulungku, sumurut ma gogongku sian ahu, jala tunduk ahu, gabe songon jolma sileban.

16:18 Jadi dung diida si Delila, naung sandok sibunian ni rohana pinapatarna tu ibana, gabe disuru ma manjou angka induk ni halak Palistim mandok tu nasida: Sai nangkok dope hamu sahalion, ai nunga tung sandok sibunian ni rohana dipaboa tu ahu. Jadi nangkok ma mangulahi angka induk ni halak Palistim mandapothon parompuan i, laos diboan hepeng i di bagasan tangannasida.

16:19 Jadi dung nok mata ni si Simson di ampuan ni si Delila, dijou ma sada baoa, asa dinabung na pitu jengjeng buhit ni uluna, dung i dipungka ma patunduk ibana, hape nunga sumurut gogona sian ibana.

16:20 Dung i ninna si Delila ma: Halak Palistim naeng mangarampok ho, ale Simson! Jadi tarsunggul ma ibana na modom i, jala ninna rohana: Ruar ma ahu songon na somal na sai laon, mangarunta ma ahu, hape ndang diboto naung sumurut Jahowa sian ibana.

16:21 Dung i ditangkup halak Palistim ma ibana, jala dipulsikkon matana, jala dipatuat ibana tu Gaza, laos dirante ibana dohot dua rante tombaga, jala ingkon manduda ibana di bagasan bagas hurungan i.

16:22 Dung i di laonlaon ni ari mamungka martumbur mangulahi obuk ni uluna, suang songon na jolo tagan so tarnabung.

16:23 Dung i marluhut ma angka induk ni halak Palistim, naeng mamelehon sada pelean na bolon tu Dagon, debatanasida i, jala marhariburon, gabe didok nasida ma: Nunga dipasahat debatanta si Simson musunta i, tu bagasan tanganta.

16:24 Jadi dung diida situan na torop i ibana, dipapujipuji nasida ma debatanasida i, ai angka ninna do: Nunga dipasahat debatanta tu bagasan tanganta musunta i, ai mangago tanonta i, jala torop hita on binununa.

16:25 Jadi andorang marlas ni roha nasida, angka ninna ma: Itajou ma si Simson, asa riburan hita dibahen; jadi didokkon nasida ma mangalapi si Simson sian bagas hurungan i, gabe manontori ibana di jolonasida, dipajongjong nasida ma ibana di holangholang ni angka tiang partunggul.

16:26 Dung i didok si Simson ma tu dakdanak, na manogunogu tanganna: Loas ahu asa hujama angka tiang partunggul, ojahan ni bagas i, asa mangunsande ahu tusi.

16:27 Alai gok baoa dohot parompuan bagas i, disi do nang sude induk ni halak Palistim, gari di atas emper i adong do arga tolu ribu halak baoa dohot parompuan, angka na manonduri si Simson manontori.

16:28 Dung i joujou ma si Simson tu Jahowa, ninna ma: Ale Tuhan Jahowa! Sai ingot ma ahu, jala pargogo i ahu nanggo sahalion dope, ale Debata, asa hutubolhon sahalinari matangku na dua i tu halak Palistim.

16:29 Dung i dihaol si Simson ma tiang partunggul na dua i di tongatonga, ojahan ni bagas i, laos diaithon, sada di siamunna, jala sada di sihambirangna.

16:30 Dung i didok si Simson ma: Mate ma hosangku rap dohot halak Palistim! Laos digogo ma mangonjar, gabe runggang ma bagas i, manipa angka induk i ro di luhut halak angka na di bagasan; gabe tumorop angka na mate binununa di hamamatena i sian angka na binununa tagan di ngoluna.

16:31 Dung i tuat ma angka hahaanggina ro di sandok pinompar ni amana, dihindat nasida ma ibana, laos diboan ibana nangkok, asa tanomonna ibana di holangholang ni Zora dohot Estaol, di parbandaan ni si Manoa, amana i. Alai duapulu taon do lelengna ibana manguhum Israel.

Panguhuman 17[patota | patota mualna]

17:1 Dung i adong ma sada baoa sian dolok Epraim, na margoar si Mika.

17:2 Ro ma hatana mandok tu inana: Ia na saribusaratus rupia, naung mago sian ho, pola naung mamburai ho dohot tu pinggolhon hata i didok ho, ida ma, di ahu do hepeng i, ai ahu do mambuatsa. Jadi didok inana ma: Sai dipasupasu Jahowa ma ho, ale anaha!

17:3 Dung i dipaulak ma rupia sisaribu saratus i tu inana, alai ninna inana i ma: Nunga husombasombahon hian hepeng i tu Jahowa marhite sian tanganku di anakku, asa dipauli sian i sada ganaganaan na niuhir dohot na tinuang, on pe mulak ma i tu ho hulehon.

17:4 Alai dipaulak ibana muse hepeng i tu inana, gabe dibuat inana i dua ratus rupia, jala dilehon tu panopa, na mambahen sian i sada ganaganaan na niuhir dohot na tinuang; laos di jabu ni si Mika do i musengani.

17:5 I ma dalanna umbahen adong sada joro ni debata hapunjungan ni si Mika, dung i dibahen ma sada baju epod dohot terapim, laos diurasi sada sian angka anakna pabangkithon gabe malimna.

17:6 Di angka ari uju i ndang adong raja gumomgom Israel, ganup masibahen lomo ni rohana be.

17:7 Alai adong ma sada dolidoli sian Betlehem Juda, na hinomit di marga Juda, jala halak Lepi do ibana, jala manompang ibana disi.

17:8 Naung jalang do baoa i sian huta Betlehem Juda, asa manompang manang didia ibana sangkot; jadi dung ro ibana tu dolok Epraim sahat tu bagas ni si Mika, naeng manulus dalanna nian.

17:9 Jadi ro ma hata ni si Mika tu ibana: Sian dia ho ro? Gabe didok ibana ma mangalusi: halak Lepi do ahu sian Betlehem Juda, jala na mardalani do ahu naeng manompang manang didia ahu sangkot.

17:10 Dung i ninna si Mika ma tu ibana: Tading di lambungkon ma ho! Asa gabe ama dohot malim di ahu; lehononku ma tu ho sampulu rupia sataon, jala singkop pangkean dohot bohalmu, gabe dioloi halak Lepi i ma rap dohot ibana.

17:11 Jadi lomo ma roha ni halak Lepi i maringan di lambung ni baoa i, jala doshon sada sian angka anakna sandiri dolidoli i dibahen.

17:12 Dung i dipabangkit si Mika ma halak Lepi i, bahen malimna dolidoli i, laos maringan ibana di jabu ni si Mika.

17:13 Dung i didok si Mika ma: Nuaeng pe tangkas huboto, sai tumpahan ni Jahowa do ahu, ala naung halak Lepi gabe malim di ahu.

Panguhuman 18[patota | patota mualna]

18:1 Di angka ari uju i ndang adong raja di Israel; laos di angka ari uju i mangalului partalian marga Dan bahen ingananna, ai rasirasa sadarina i ndang maruli partalian nasida di tongatonga ni angka marga ni Israel.

18:2 Dung i dipaborhat halak Dan ma lima halak angka na begu marsuhusuhu sian Zora dohot Estaol laho mangkahapi tano i diordioranna, angka ditonahon ma nasida: Laho ma hamu mandiordiori tano i: Jadi tolhas ma nasida tu dolok Epraim, tu bagas ni si Mika, laos marborngin disi.

18:3 Mardonokkon bagas ni si Mika, ditanda nasida ma suara ni halak Lepi na bajar i, laos tuli nasida sian i angka ninna ma mandok ibana: Ise do na mamboan ho tuson? Aha do na binahenmu dison? Jala marhua ho dison?

18:4 Dung i didok ibana ma mangalusi nasida: Songon on songon on do na binahen ni si Mika tu ahu, pola marupa ahu dibahen, asa gabe malim di ibana.

18:5 Dung i ninna nasida ma tu ibana: Ua sungkunhon ma tu Debata, asa tung huboto hami manang na manjadi dalannami, na hudalani hami nuaeng?

18:6 Jadi didok malim i ma tu nasida: Laho ma hamu mardamedame! Di jolo ni Jahowa do dalan na nidalananmuna i.

18:7 Dung i laho ma na lima halak i, gabe tolhas nasida tu Lais, jala diida marsonangsonang situtu do isi ni huta i, mangihuthon uhum ni halak Sidon, hohom jala nalom, jala ndang marjujungan tano i na mangarupa nasida, jala holang do nasida sian halak Sidon i, jala ndang adong parsaorannasida tu jolma na asing.

18:8 Jadi dung mulak na lima halak i tu hahaangginasida i tu Zora dohot Estaol, ninna angka hahaangginasida i ma tu nasida: Barita dia diboan hamu?

18:9 Jadi ninna nasida ma: Borhat ma hita laho mandopang nasida! Ai nunga huida hami tano i, jala ida ma, na uli situtu do i, hape sai hohom do anggo hamu; unang bangkol hamu borhat laho manoluk tano i bahen partalianmu.

18:10 Molo dung sahat hamu tusi, dapotonmuna ma disi sada bangso na marsonangsonang boti, lambas dohot tano i; ai nunga dipasahat Debata tano i tu tanganmuna; i ma sada inganan na so hurangan di agia aha na masa di tano on.

18:11 Jadi hehe ma sian i, sian Zora dohot sian Estaol, onom ratus halak marga Dan, angka na marsinjata be laho porang.

18:12 Dung i nangkok ma nasida, jala marsaro di Kiriat Jearim di Juda; ala ni do umbahen targoar inganan i parsaroan Dan rasirasa sadarion, i ma tungkan hasundutan sian Kiriat Jearim.

18:13 Dung i mardalan nasida sian i sahat tu dolok Epraim, boti tu bagas ni si Mika.

18:14 Dung i marboaboa ma na lima halak, angka na borhat mangkahapi tano Lais i, ninna nasida ma tu angka hahaangginasida i: Atehe, diboto hamu do adong di angka bagasan sada baju epod dohot terapim dohot sada ganaganaan na niuhir jala na tinuang? On pe timbang hamu ma manang aha sibahenonmuna.

18:15 Jadi tuli ma nasida tusi, gabe tolhas nasida tu bagas ni halak Lepi na bajar i, tu bagas ni si Mika, jala dipauso manang na sonang ibana.

18:16 Ia na onom ratus halak sian pinompar ni si Dan, angka na marsinjata be laho marporang, jongjong do di lambung bahal.

18:17 Alai anggo na lima halak, angka na borhat mangkahapi tano i, bongot tu bagasan, dipambuat ma ganaganaan na niuhir dohot baju epod dohot terapim dohot ganaganaan na tinuang; jongjong do ianggo malim i di lambung bahal rap dohot na onom ratus halak, angka na marsinjata be laho marporang.

18:18 Jadi dung bongot nasida tu jabu ni si Mika, jala dung dipambuat ganaganaan na niuhir, baju epod dohot terapim. Ro di ganaganaan na tinuang, ninna malim i ma tu nasida: Aha do na binahenmuna i?

18:19 Jadi ninna nasida ma tu ibana: Sip ho! Bahen tanganmu tu pamanganmu, jala dongani hami mardalan, gabe ama dohot malim ma ho di hami, tung tagonan ma ho malim holan di jabu ni sada halak, manang malim ho di sada marga ni Israel?

18:20 Jadi las ma roha ni malim i, gabe dibuat ma baju epod dohot terapim dohot ganaganaan na niuhir, laos diboan tu tongatonga ni halak na torop i.

18:21 Dung i mamedu ma nasida laos mardalan; alai tu jolonasida do dibahen angka dakdanak, dohot pinahan ro di artanasida angka na ummarga.

18:22 Jadi dung holang nasida sian bagas ni si Mika, marluhut ma baoa angka na di jabu hombarhon bagas ni si Mika, laos dieahi halak Dan i.

18:23 Dung i dijoui nasida ma halak Dan i, laos humusor halak Dan i, angka didok ma tu si Mika: Aha di ho umbahen sai oruk ho?

18:24 Dung i ninna ibana ma: Nunga dibuat hamu debatangku, angka na hupauli i rap dohot malim i, gabe laho hamu; ba aha be di ahu? Lam didok hamu dope tu ahu: Aha di ho?

18:25 Alai ninna halak Dan ma tu ibana: Unang be tarbege suaram di hami, atik beha ditorpai halak parateate na garang hamu maon, gabe putus bahenonna hosam dohot hosa ni isi ni bagasmu.

18:26 Dung i ditulus halak Dan ma dalannasida i. Jadi dung diida si Mika tumang nasida sian ibana, humusor ma ibana, laos mulak tu jabuna.

18:27 Dung i dibuat nasida ma na pinauli ni si Mika dohot malim na di lambungna i, dirampok nasida ma Lais, sada bangso na hohom, jala na nalom. Laos ditampuli nasida dohot podang, jala disurbu huta i dohot api.

18:28 Ndang adong manang ise na paluahon nasida, ai holang do huta i sian Sidon, jala ndang adong parsaorannasida tu halak na asing, tole di rura do huta i mardonokkon Betrehob. Dung i dipauli nasida muse huta i, laos maringanan disi.

18:29 Jala dibahen goar ni huta i Dan, mangihuthon goar ni si Dan ompunasida i na tinubuhon ni si Israel; Lais do goar ni huta i ianggo di na robi.

18:30 Dung i dipatindang halak Dan ma ganaganaan na niuhir i di nasida, jala si Jonatan, anak ni si Gerson, tubu ni si Musa, ibana gabe malim di marga Dan ro di pinomparna rasirasa di ari habubuang ni isi ni luat i.

18:31 Jadi dipatindang nasida di tongatonganasida ganaganaan na binahen ni si Mika, saleleng undungundung ni Debata di Silo.

Panguhuman 19[patota | patota mualna]

19:1 Dung i di angka ari i, uju na so adong raja di Israel, adong ma sada halak Lepi mardagangdagang di bona ni dolok Epraim, gabe dibuat ma sada parompuan sibabijalang sian Betlehem Juda, bahen imbang ni jolmana.

19:2 Dung i marlangka pilit ma parompuan i, laos laho sian lambungna mulak tu jabu ni amana, tu Betlehem Juda, laos disi nasida arga opat bulan lelengna.

19:3 Dung i borhat ma sinondukna i mangihuthon nasida, mangapoi rohana boanonna mulak, holan naposona dohot halode sapasang donganna; dung i ditogihon parompuan i ibana tu bagasan jabu ni amana; jadi dung diida ama ni parompuan i ibana, las ma rohana manjangkon ibana.

19:4 Dung i ditiopi simatuana doli, ama ni parompuan naposo i ma ibana, gabe tinggal ibana di lambungna tolu ari lelengna, rap mangan minum dohot marborngin nasida disi.

19:5 Tole paopatarihon, dipasogot nasida ma manogotna i hehe, borhat naeng mardalan nian, gabe didok ama ni parompuan i ma tu helana i: Patogar ma jolo roham dohot roti sanseat, dung ipe asa mardalan hamu.

19:6 Dung i hundul ma nasida jala rap mangan minum nasida duansa. Dung i ninna ama ni parompuan i ma tu baoa i, ua oloi ma laos marborngin, jala palas ma roham.

19:7 Alai hehe ma baoa i naeng mardalan nian, gabe diapoi simatuana doli ma ibana, jadi mulak ibana laos marborngin muse disi.

19:8 Tole muse palimaarihon, dipasogot ma manogotna i naeng mardalan, gabe didok ama ni parompuan i muse: Ua pasonang jolo roham! Gabe togang nasida maradu manihir ari, jala mangan nasida duansa.

19:9 Dung i hehe ma baoa i naeng mardalan, ibana dohot jolmana dohot naposona; alai ninna simatuana doli, ama ni parompuan i ma tu ibana: Ida ma, nunga pola manihir ari, na bot ne ma ari, marborngin ma ho dison, jala pasonang roham, pasogot hamu pe manogot hehe manulus dalanmuna, asa laho ho tu undungundungmu.

19:10 Alai ndang olo baoa i marborngin, lam borhat do ibana mardalan, gabe sahat ibana ro di tondong ni Jebus, i ma Jerusalem, udur ibana dohot halode sapasang, na marpalano, jolmana pe di lambungna do.

19:11 Jadi dung mardonokkon Jebus nasida, sundut ne ma mata ni ari, gabe didok naposo i ma tu tuanna: Ua tuli ma hita sian huta ni halak Jebusi on, laos marborngin disi.

19:12 Dung i ninna tuanna i ma tu ibana: Ndang ture hita tuli sian huta na pulik, na so halak Israel nampunasa, talaluhon ma tagonan sahat tu Gibea.

19:13 Dung i ninna muse tu naposona i: Padoras ma langkam mandapothon sada huta, asa marborngin hita di Gibea manang di Rama.

19:14 Jadi didatdati nasida ma mardalan, gabe mate mata ni ari marjonokkon Gibea, na masuk tu Benjamin.

19:15 Dung i mamedu ma nasida laho tusi, naeng marborngin di Gibea. Alai dung masuk tu huta i, gabe hundulhundul ibana di alaman ni huta i, ai ndang adong manang ise na olo manjangkon nasida tu jabuna marborngin.

19:16 Jadi ida ma, ro sada halak na tuatua sian ulaonna di ladang botarina i, laos sian dolok Epraim do ibana, jala maisolat di Gibea; alai halak Benjamin do anggo isi ni huta i.

19:17 Dung i manaili ma ibana, gabe diida ma halak pardalan i di alaman ni huta i, laos ninna halak na tuatua i ma: Naeng laho tudia do ho? Jala sian dia do ho ro?

19:18 Dung i ninna ma mangalusi ibana: Halak pardalandalan do hami sian Betlehem Juda, na di bona ni dolok Epraim, bona ni pinasangki; dung i mardalani ahu sahat tu Betlehem Juda, na mardalani di bagas ni Jahowa ahu nian, hape ndang adong manang ise na manjangkon ahu tu jabuna.

19:19 Adong do nian durame dohot gagaton di halodenami, roti pe dohot anggur di ahu dohot di naposom boruboru dohot di dolidoli dongan ni naposomon, ndang hurangan hami di agia aha tahe.

19:20 Dung i ninna halak na tuatua i ma: Dame ma di ho! Manang aha na hurang di ho, ahu do na sari disi, asal unang di alaman on ho marborngin.

19:21 Jadi ditogihon ma ibana tu jabuna, jala dilehon gagaton tu angka halode i, diburi, nasida huhut patnasida i, jala mangan minum do nasida.

19:22 Ipe sonang rohanasida, ida ma, ro ma halak isi ni huta i, angka na jahat situtu marroha, mangkaliangi bagas i, dipurpari nasida ma pintu i, angka didok ma tu baoa na tuatua i nampuna bagas i songon on: Togihon ma tu ruar baoa na sorang i tu jabum, asa hutanda hami ibana.

19:23 Jadi ruar ma mandapothon nasida baoa nampuna bagas i, jala ninna ma mandok nasida: Unang ale angka donganku! Unang bahen hamu na jat, ala dung masuk baoa on tu jabungku, unang bahen hamu haurahon sisongon i.

19:24 Ida ma, borungku na marbaju i dohot jolma ni baoa i, i ma hutogihon ruar, nasida ma gogoi hamu, tu nasida ma bahen hamu guru lomo ni rohamuna; alai anggo tu baoa i, unang bahen hamu haurahon sisongon i.

19:25 Alai ndang olo angka baoa i tumangihon hatana, jadi ditangkup baoa i ma jolmana, jala ditogihon ruar tu balian di nasida, gabe digogoi nasida boruboru i, jala diparmainani manipat sabornginna i, sahat ro di torang ari; dung pe buha siang ari asa dipalua.

19:26 Marhira torang ari pe ro parompuan i, laos tinggang do di lambung pintu ni bagas ni baoa i, sorangan ni harajaanna i, peak disi do paima torang ari.

19:27 Jadi manogotna i dung hehe harajaanna i, diungkap ma pintu ni bagas i, jala ruar naeng manulus dalanna i nian, hape ida ma, peak di lambung pintu ni bagas i do jolmana, jala ampe tanganna duansa di lobulobu.

19:28 Dung i ninna ibana ma tu parompuan i: Hehe ma ho, asa mardalan hita; hape ndang mangalusi be. Jadi diampehon ma nasida tu atas ni halode, gabe borhat ma baoa i, laos mardalan tumopot ingananna.

19:29 Jadi dung sahat ibana tu jabuna, dibuat ma sada raut, ditangkup ma jolmana i, laos disahei holiholina sampulu dua ponggol, jala dipantongoshon do i tu saluhut luat ni Israel.

19:30 Jadi nasa na marnidasa, ninna be do: Na so uhum on, ndang dung masa manang dumatang songon i, olat ni ari haruruar ni halak Israel sian tano Misir rasirasa sadarion. Antong parateatehon hamu ma pambahenannaon, martutup ma hamu, dung i paboa hamu ma.

Panguhuman 20[patota | patota mualna]

20:1 Dung i santibalatuk ma sandok Israel borhat, jala marluhut huria i hira sada halak olat ni Dan sahat ro di Beerseba dohot tano Gilead tu jolo ni Jahowa di Mispa.

20:2 Jala angka induk ni sandok bangso Israel marmargamarga, tindang di tongatonga ni huria ni bangso ni Debata, opat ratus ribu halak bilanganna, mardalan pat angka sisintak podang.

20:3 Jadi dung dibege halak Benjamin barita ni hananangkok ni halak Israel tu Mispa, gabe didok halak Israel ma: Paboa hamu ma manang songon dia pangalaho ni jea on!

20:4 Jadi ro ma alus ni halak Lepi, sinonduk ni parompuan na binununa i, ninna ma: Sahat do ahu dohot jolmangki tu Gibea di Benjamin, naeng marborngin nian disi.

20:5 Dung i hehe ma angka isi ni Gibea dompak ahu, jala dihaliangi nasida bagas parbornginanki, ditahi rohanasida naeng bunuonna ahu, jala jolmangki parmainannasida nasida do pola mate.

20:6 Jadi hutangkup ma antong jolmangki, jala husahei, jala hupantongoshon tu saluhut luat partalian ni Israel, ai tung na so uhum dohot haotoon do na niulanasida di Israel.

20:7 Ida ma, saluhut hamu halak Israel, martahi ma hamu mandok hata dohot tuptupan dison.

20:8 Jadi hehe ma sandok bangso i, hira sada halak mandok: Sandok na so jadi laho manang ise tumopot undungundungna, manang muli tu jabuna.

20:9 On pe, taringot tu uhum sibahenonta tu Gibea, marruji ma hita.

20:10 Itabuat ma sampulu halak sian na saratus sian sandok marga ni Israel, jala saratus sian na saribu, jala saribu sian na saloksa, angka na pasarisari bohal di halak situan na torop i, asa molo sahat nasida tu Gibea-Benjamin, tubolhononna tusi hombar tu saluhut haotoon na binahenna di Israel.

20:11 Dung i santibalatuk ma sandok baoa ni Israel dompak huta i, marsatahi nasida hira sada halak.

20:12 Dung i disuru angka marga ni Israel ma suruanna tu marga Benjamin marsuhusuhu, mandok songon on: Hajahaton dia do i na masa di tongatongamuna?

20:13 Antong lehon hamu ma baoa, angka na jahat situtu marroha di Gibea, asa hubunu hami nasida, laho umpurpurhon sapata ni jea sisongon i sian Israel. Hape ndang olo halak Benjamin tumangihon suara ni halak Israel hahanasida i.

20:14 Lam marpungu tahe halak Benjamin sian angka huta i tu Gibea, laho borhat marmusu dompak halak Israel.

20:15 Jadi tarbilang halak Benjamin sadarina i sian angka huta i: Duapulu onom ribu halak baoa, angka sisintak podang, so padohot isi ni Gibea dibilang pituratus baoa angka na pinillit.

20:16 Sian saluhut halak na torop i, adong pitu ratus baoa na pinillit, angka panjaluk, saluhutna i pande mangambalangkon batu, mangkonahon obuk sada, jala ndang pilit.

20:17 Alai angka halak Israel, so padohot Benjamin opat ratus ribu baoa dibilang, angka sisintak podang, halak na somal marmusu do luhutna.

20:18 Dung i borhat ma halak Israel nangkok tu Betel, manungkun tu Debata, angka ninna nasida ma: Ise do sian hami manguluhon laho marmusu dompak halak Benjamin? Gabe didok Jahowa ma: Juda do parjolo.

20:19 Jadi manogotna i borhat ma halak Israel, jala marsaro tondong ni Gibea.

20:20 Rim ma halak Israel ruar laho marmusu dompak Benjamin, jala patutur be halak Israel jongjong marmusu dompak Gibea.

20:21 Dung i ruar ma halak Benjamin sian Gibea, gabe marragean sadarina i duapulu dua ribu halak Israel dibunu nasida.

20:22 Alai manggusar ma muse halak Israel, diulahi nasida patutur marmusu, laos di hajongjongannasida di ari parjolo i.

20:23 Dung i nangkok ma halak Israel tumatangis di adopan ni Jahowa sahat ro di bodari, huhut manungkunhon tu Jahowa, ninna do: Jadi dope ulahannami turtar marmusu dompak halak Benjamin, angginami i? Jadi ninna Jahowa ma: Nangkok ma hamu mandopang nasida!

20:24 Jadi marsogotna i didapothon halak Israel ma halak Benjamin.

20:25 Gabe ruar muse Benjamin sian Gibea manjumpangkon nasida di ari paduahon i, marragean muse ma halak Israel sampulu ualuribu halak, angka sisintak podang sude dibunu nasida.

20:26 Dung i nangkok ma sude halak Israel ro di sandok bangso i laho tu Betel tumatangis be, laos hundulhundul disi di adopan ni Jahowa, huhut marpuasa sadarina i sahat ro di bot ari, jala mamelehon pelean situtungon dohot pelean hamauliateon di adopan ni Jahowa.

20:27 Dung i manungkun muse halak Israel tu Jahowa, ai disi do poti parpadanan ni Debata uju i.

20:28 Jala si Pinehas, anak ni si Eleasar, tubu ni si Aron jongjong uju i di adopanna, ninna nasida ma: Jadi dope ulahannami borhat marmusu dompak halak Benjamin, angginami i, manang pasohoton na ma? Jadi ninna Jahowa ma: Nangkok ma hamu, ai marsogot pasahatonku ma nasida tu tanganmu.

20:29 Dung i dibahen halak Israel ma angka paronggopan humaliang Gibea.

20:30 Jadi nangkok ma halak Israel patoluarihon dompak halak Benjamin, jala patutur nasida jongjong mandopang Gibea, suang songon na dua hali i.

20:31 Jadi ruar muse halak Benjamin manjumpangkon bangso i, dung sirang nasida sian huta i, dipungka nasida muse mambunu i deba sian halak Israel arga tolupulu halak, suang songon na dua hali i, di dalan sirpang laho nangkok tu Betel na sada, tu ladang ni Gibea na sadanari.

20:32 Jadi ninna halak Benjamin ma: Nunga marragean nasida maralohon hita, songon na jolo i. Alai ninna halak Israel ma: Maporus ma hita, asa itasirang nasida sian huta i tu angka dalan na bolon.

20:33 Dung i hehe ma luhut baoa ni Israel sian hajongjonganna be, jala jongjong patutur di Baal-Tamar; hehe ma dohot halak Israel pangonggopi sian pangonggopanna, sian adaran Gibea.

20:34 Jadi sahat ma tu Gibea sampulu ribu halak, angka na pinillit sian sandok Israel, gabe sobu situtu tongtangan i. Alai ndang mamoto halak Benjamin mangonai tu nasida jea i.

20:35 Asa ditaluhon Jahowa ma halak Benjamin maralohon halak Israel, gabe marragean sadarina i, duapulu lima ribu saratus halak Benjamin, angka sisintak podang sude, dibunu halak Israel.

20:36 Ai dirimpu halak Benjamin naung talu halak Israel, ala naung maporus halak Israel moradophon Benjamin, ai marhaposan do nasida tu parbajo, angka na pinaonggophonnasida di lambung ni Gibea.

20:37 Dung i disiluhon parbajo i mangarampok Gibea, laos ditaban ma, jala ditampuli sude isi ni huta i dohot podang.

20:38 Jala nunga marpadan hian halak Israel dohot angka parbajo i: Mortimpul tu ginjang bahenonnasida timus sian huta i.

20:39 Jadi marbalik ma halak Israel di tongtangan i, nunga nian dipungka halak Benjamin mangonjar dohot mambunu halak Israel, arga tolupulu halak mate, ai ninna rohanasida do: Nunga talu situtu nasida muse moradophon hita, suang songon di tongtangan parjolo i.

20:40 Hape dung mamungka martimpul tu ginjang timus sian huta i, manaili tu pudi ma halak Benjamin, gabe ida ma, tung sandok huta i marsigorgor dompak langit.

20:41 Jadi dung marbalik halak Israel, tarhatotong ma halak Benjamin, ai nunga diida manginona tu nasida jea i.

20:42 Dung i mamedu ma nasida moradophon halak Israel tu dalan tungkan halongonan, alai sai dilotongi parporang i do nasida, tole huhut jolma, angka na ro sian angka huta humaliang mambunu angka na di tongatongana.

20:43 Dung i dihaliangi nasida ma halak Benjamin, dilotongi nasida, jala mura nasida diluntakluntak, sahat ro di tondong ni Gibea tungkan habinsaran.

20:44 Jadi marragean ma sian halak Benjamin, sampuluualu ribu halak, angka na begu marmusu luhutna.

20:45 Dung i mamedu ma nasida, jala maporus tungkan halongonan, sahat ro di dolok batu Rimmon, jala diragehon di dalan i lima ribu halak, jala dieak nasida sahat ro di Gideom, jala dibunu sian nasida duaribu halak.

20:46 Asa luhut jolma angka na rage sian Benjamin sadarina i duapulu lima ribu halak do, angka sisintak podang, jala luhutna i halak na begu marmusu.

20:47 Ia angka na mamedu, jala maporus tu halongonan, sahat tu dolok batu Rimmon onom ratus halak toropna, laos maringan di dolok batu Rimmon opat bulan lelengna.

20:48 Dung i mulak ma halak Israel tu halak Benjamin, jala ditampuli dohot podang saluhutna ro di pinahan, ro di sude na dapot nasida, disurbu huhut sude huta, angka na dapotsa dohot api.

Panguhuman 21[patota | patota mualna]

21:1 Alai nunga pola marmangmang hian halak Israel di Mispa songon on: Na so tupa lehonon ni manang ise sian hita on boruna bahen jolma ni halak Benjamin.

21:2 Dung i tolhas ma bangso i tu Betel, laos tading disi sahat ro di bodari di adopan ni Debata, jala dipangiar be suarana mangangguk badar.

21:3 Angka ninna nasida ma: Ale Jahowa, Debata ni Israel, boasa tung masa songon i di Israel, pola tung moru sadarion sada marga sian Israel?

21:4 Dung i manogotna i dipasogot bangso i ma hehe, jala dipauli disi sada langgatan, jala dipelehon angka pelean situtungon dohot pelean hamauliateon.

21:5 Dung i ninna halak Israel ma: Nda tung adong manang ise sian saluhut angka marga ni Israel, na so nangkok ro tu luhutan manopot Jahowa? Ai tung marsumpa bolon do nasida, ganup na so nangkok tumopot Jahowa tu Mispa, ingkon marutang hosa ibana didok.

21:6 Dung i tarsolsol bagi ma halak Israel taringot tu Benjamin, angginasida i, angka ninna ma: Tung siap do hape sadarion sada marga sian Israel.

21:7 Beha nama itabahen tu nasida angka na teba i, asa marjolma be? Ai nunga pola marmangmang hita tu Jahowa, na so tupa lehononta tu nasida ianggo borunta bahen jolmanasida.

21:8 Ala ni do umbahen didok nasida: Adong do ulaning sada sian angka marga ni Israel na so nangkok tu Mispa tumopot Jahowa? Jadi ida ma, ndang adong agia ise ro tu parsaroan i sian Jabes di Gilead tumopot luhutan i.

21:9 Ai di na binilangna bangso i, ida ma nanggo sada ndang adong disi baoa sian isi ni Jabes di Gilead.

21:10 Jadi dipaborhat huria i ma tusi sampulu dua ribu halak angka na begu marmusu ditonahon ma tu nasida songon on: Laho ma hamu, jala tampuli hamu isi ni Jabes di Gilead dohot podang, ro di inaina dohot posoposo.

21:11 Songon on do bahenonmuna: Nasa baoa dohot inaina, angka naung niangkupan ni baoa modom, ingkon siaphononhon do.

21:12 Jadi jumpang nasida ma sian isi ni Jabes di Gilead opat ratus boruboru na marbaju, angka na so dung niangkupan ni baoa modom, jala diboan nasida tu parsaroan i tu Silo, na di tano Kanaan.

21:13 Dung i disuru sandok huria i ma suruanna mandok hata tu halak Benjamin, angka na di dolok batu Rimmon, maningtingkon pardemahan tu nasida.

21:14 Jadi uju i ma mulak halak Benjamin, gabe tu nasida dilehon boruboru, angka na pinangolu sian angka boruboru isi ni Jabes di Gilead; alai tahe ndang singkop di nasida.

21:15 Jadi asi ma roha ni bangso i mida Benjamin, ala naung binahen ni Jahowa hataluan di angka marga ni Israel.

21:16 Dung i ninna angka sintua ni huria i ma: Beha nama bahenonta, asa marjolma dohot angka na teba i? Ai nunga tung siap parompuan sian Benjamin.

21:17 Angkup ni ninna nasida: Angka na malua i ma nampuna partalian ni Benjamin, asa unang laos pidom sada marga sian Israel.

21:18 Alai anggo hita, ndang tarlehon hita borunta bahen jolmanasida, ai nunga pola marmangmang halak Israel songon on: Hona bura ma manang ise na mangalehon boru tu halak Benjamin.

21:19 Dung i ninna nasida muse: Ida ma; masa do ganup taon ari raya di Jahowa di Silo, na tungkan utara sian Betel, tungkan habinsaran ni dalan na laho nangkok sian Betel tu Sikem, jala tungkan dangsina sian Lebona.

21:20 Dung i ditonahon nasida ma tu halak Benjamin songon on: Laho ma hamu mangonggop di angka porlak anggur.

21:21 Dung i matahon hamu ma, molo ruar angka boruboru sian Silo laho manontor marhoronhoron, jadi ruar ma hamu sian angka porlak anggur i, jala ganup hamu mangaluahon sada be sian angka boru ni Silo bahen jolmana, laos boan hamu tu tano Benjamin.

21:22 Dung i molo ro amanasida manang ibotonasida manonjol hami, gabe dohononnami ma tu nasida: Basabasahon hamu ma nasida tu hami! Ai ndang hubuat hami di ganup jolmana marhite sian porang; hamu pe ndada hamu mangalehon nasida tu nasida; dibahen i sandok na so marsala do hamu disi.

21:23 Jadi dibahen halak Benjamin ma songon i, angka dipambuat be ma boru marguru tu bilangannasida sian panontori, angka na nilaumnasida, laos laho nasida mulak tu partaliannasida, jala dipauli angka hutana, laos maringan disi.

21:24 Halak Israel pe mardalan do uju i sian i mulak be tu margana dohot tu bangsona, jala borhat be nasida sian i mulak tu partalianna be.

21:25 Di angka ari uju i ndang adong raja di Israel, ganup mambahen lomo ni rohana be.