Buku Ulaon ni Apostel

Ulaon ni Apostel ᯥᯞᯀᯉᯬ᯲ ᯉᯪ ᯀᯇᯘᯬ᯲ᯖᯞᯩ᯲ 1

1:1 Nunga sidung nian hubahen, ale Teopilus, barita na parjolo i, taringot tu saluhut ulaon dohot poda na pinungka ni Jesus, ᯉᯮᯝ ᯘᯪᯑᯮᯰ ᯉᯪᯀᯉ᯲ ᯂᯮᯅᯂᯉᯩ᯲ ᯀᯞᯩ ᯖᯩᯀᯪᯇᯪᯞᯘᯮ᯲ ᯅᯒᯪᯖ ᯉ ᯇᯒ᯲ᯐᯬᯞᯬ ᯤ ᯖᯒᯪᯝᯖᯬ᯲ ᯖᯮ ᯘᯞᯮᯂᯖᯮ᯲ ᯥᯞᯀᯉᯬ᯲ ᯑᯬᯂᯖᯬ᯲ ᯇᯬᯑ ᯉ ᯇᯪᯉᯮᯰᯄ᯦ ᯉᯪ ᯐᯩᯘᯘᯮ᯲

1:2 sahat ro di ari hahihinsatna, dung jolo dipatihi Ibana marhitehite Tondi Parbadia angka apostel na pinillitna i.

1:3 Dung salpu haporsuhon na tinaonna i, dipatandaphon do dirina mangolu tu nasida marhitehite lan tanda, i ma na pinataridahonna dirina tu nasida leleng ni opatpulu ari, dohot mangkatahon taringot tu harajaon ni Debata.

1:4 Jadi di na domu Ibana dohot nasida, dipatihi ma, na so jadi meret nasida sian Jerusalem, so jolo dipaima bagabaga ni Ama i, na binegemuna i sian Ahu, ninna.

1:5 Ai aek do dididihon si Johannes i; alai Tondi Parbadia do didihononhon tu hamu, ndang pola piga ari nari!

1:6 Laos disungkun angka na pungu i ma Ibana, angka ninna ma: Pajongjongonmu ma saonari, ale Tuhan, Harajaon i di Israel?

1:7 Alai ninna ma mandok nasida: Ndang ro di hamu i, umboto taonna manang ombasna; na binuhul ni Ama i guru di huasona sambing.

1:8 Alai jaloonmuna do hagogoon ni Tondi Parbadia na songgop tu hamu, gabe sitindangingku ma hamu di Jerusalem dohot di sandok Judea dohot di Samaria, sahat ro di ujung ni tano on.

1:9 Jadi dung didok songon i, tarhinsat ma Ibana dipanotnoti nasida: Dung i diholipi ombun i ma Ibana sian jolo ni matanasida.

1:10 Di na tinuluthon nasida dope Ibana na laho i tu ginjang, nunga jongjong di lambungnasida dua halak parulos na marlinanglinang.

1:11 Angka na mandok: O hamu halak Galilea, aha ma sai jongjong hamu mamerengi dompak ginjang? Anggo Jesus i, na tarhinsat sian lambungmuna tu banua ginjang i, na ro do Ibana sogot, songon na niidamuna Ibana laho dompak banua ginjang i.

1:12 Dung i mulak ma nasida tu huta Jerusalem sian dolok na margoar dolok Jetun, na jonok tu Jerusalem; na hadalanan di ari Sabbat do daona.

1:13 Jadi dung sahat, nangkok ma nasida tu bilut parginjang, parmianannasida, i ma si Petrus, si Johannes, si Jakobus dohot si Andreas, si Pilippus dohot si Tomas, si Bartolomeus dohot si Mateus, si Jakobus, anak ni si Alpeus, dohot si Simon Silotes, dohot si Judas, anak ni si Jakobus.

1:14 Angka i do saluhutna mandatdati martangiang sian sada ni rohanasida, rap dohot angka parompuan dohot si Maria, ina ni Jesus, ro di angka anggina i.

1:15 Uju i hehe ma si Petrus di tongatonga ni angka donganna (ia torop ni nasida na pungu i, arga saratus duapulu halak do), ninna ma:

1:16 Hamu angka dongan hahaanggi, ingkon saut do na nidok ni surat na nilumbahon ni Tondi Parbadia marhitehite soara ni si Daud taringot tu si Judas, naung gabe partogi ni angka na manangkup Jesus.

1:17 Ai tarrajum do nian ibana tu hami, jala parjambar do ibana di tohonan i.

1:18 Onpe, ladang do dituhor sian upa ni hageduhon i; jadi di na tungkap ibana madabu, mapultak ma dagingna, gabe sabur ma nasa raoanna.

1:19 Saluhut pangisi ni huta Jerusalem do umbotosa, umbahen na digoari ladang i di hatanasida Akeldamak, astuanna: Tano mudar.

1:20 Ai tarsurat do di buku ni angka Psalmen: "Sai tarulang ma parmiananna i, unang ma adong na manginganisa!" angkup ni i: "Jaloon ni na asing ma tohonanna!"

1:21 Antong, ingkon gabe dongannami sihatindangkon haheheon ni Tuhan Jesus ma sada sian angka na mandongani hami, saleleng Ibana marmeangmuli di hita on.

1:22 Olat ni pandidion ni si Johannes ro di ari hahihinsatna i sian hita.

1:23 Dung i dipajongjong nasida dua halak, si Josep na margoar si Barsabas, na marimbang goar Titius Justus, dohot si Matias.

1:24 Jadi martangiang ma nasida: Ale Tuhan, sidodo roha ni saluhutna, patandahon ma, manang ise sian na dua on dipillit Ho,

1:25 gabe sijalo tohap di ulaon on dohot tohonan apostel, na tinadingkon ni si Judas, naung laho manopot sitopotonna i!

1:26 Laos marsijomput na sinurat ma nasida, jadi dapot ma si Matias, gabe tarrajum ma ibana dongan ni apostel na sampulusada i.

Ulaon ni Apostel 2

2:1 Jadi dung jumpang ari palimapuluhon i (Pentakoste), pungu ma nasida saluhutna di sada inganan.

2:2 Jadi masa ma tompu soara sian ginjang songon parngongos ni alogo na gogo mamolus, gabe digohi ma sandok bagas hundulannasida i.

2:3 Jadi tarida ma di nasida suman tu dila ni api na marjillamjillam, disonggopi ma ganup nasida. Look up X 2:4 Gabe gok Tondi Parbadia ma nasida saluhutna, jadi mamungka look up acts in the Bible marpangkuling na asing ma nasida, marguru tu pangalehon ni Tondi i tu nasida mangkatahonsa.

2:5 Alai adong ma angka Jahudi na maringan di Jerusalem, halak na daulat sian saluhutna bangso na ditoru ni langit.

2:6 Alai di na masa soara i, marpungu ma natorop i; jadi tarhalomong ma nasida, ai ganup umbege nasida mangkatahon di hatana be.

2:7 Jadi tarmali ma nasida saluhutna jala longang, angka ninna ma: Nda halak Galilea saluhut nasida na mangkatai i?

2:8 Boasa ganup hita umbege di hata hasomalanta be?

2:9 Halak Partia dohot Media dohot Elamit dohot angka na maringanan di Mesopotamia, di Judea dohot di Kappadosia, di Pontus dohot di Asia.

2:10 Di Prigia dohot di Pampilia, di tano Misir dohot di angka luat Libia na tungkan Kirene dohot halak Rom na maringanan dison, angka halak Jahudi ro di angka parguru,

2:11 angka halak Kreta dohot halak Arab; di hatanta be do itabege dihatahon nasida angka ulaon habalgaon ni Debata!

2:12 Jadi tarhalomong ma nasida saluhutna, jut be ma rohana, angka ninna ma sama nasida: Na marhua do i ulaning?

2:13 Alai manginsahi do na deba, angka ninna ma: Gok anggur na tonggi do nasida.

2:14 Jadi hehe ma si Petrus rap dohot na sampulusada i, dipagogo ma soarana, dipanghulingi ma nasida: Hamu halak Jahudi jala sude hamu na maringanan di Jerusalem, boto hamu ma on, jala pasiat hamu ma hatangkon tu pinggolmuna!

2:15 Ai apala na mabuk hami on, songon na tinuhashonmuna, ai pungkul sia dope nuaeng.

2:16 Na hinatahon ni panurirang Joel do tahe na masa on; ai ninna do:

2:17 "Di angka ari parpudi, ninna Debata, usehononku ma sian Tondingku, tu nasa na mardaging, gabe manurirangi ma angka anak dohot borumuna, maralatan ma angka dolidolimuna, jala marnipi ma angka natuatuamuna."

2:18 "Tu angka naposongku baoa dohot boruboru pe usehononku ma sian Tondingku di angka ari i, asa manurirangi nasida."

2:19 "Dung i patupaonku ma angka halongangan di ginjang di langit, angka tanda di toru, di tano i, i ma mudar dohot api dohot timus na marhalimontang."

2:20 "Muba ma mata ni ari gabe mangkolom, dohot bulan i gabe songon mudar, patujolo ni haroro ni ari ni Tuhan i, na balga i."

2:21 "Jadi disi ma malua ganup na manjou Goar ni Tuhan i."

2:22 Hamu angka halak Israel, tangihon hamu ma hata on: Dipatandaphon Debata do tu hamu Jesus na sian Nasaret i, hinorhon ni hagogoon, halongangan dohot tanda, angka na pinatupa ni Debata di tongatongamuna, songon naung binotomuna i.

2:23 Marhite sian tangan ni na so marpatik i digantungkon jala dipusa hamu Ibana, dung dipasahat Debata sian tahina na hot i dohot sian pamotoanna hian.

2:24 Ibana do dipahehe Debata, dung diharhari bernit ni hamatean, ai ndada na hatiopan hamatean i Ibana.

2:25 Ai marhahonaan tu Ibana do pandok ni si Daud: "Tongtong do huida Tuhanki di jolongku, ai di siamunhu do Ibana, asa unang

2:26 "Ala ni i las do rohangku jala marolopolop soarangku; dagingku pe maradian do huhut mangkirim."

2:27 "Ai ndang pasombuonmu diringku di banua toru jala ndang loasonmu na badiami marnida habusukon."

2:28 "Nunga dipabotohon Ho tu ahu angka dalan hangoluan, gohanmu do ahu halalas ni roha di adopanmi!"

2:29 Hamu angka dongan, na jadi ma ahu marhiras ni roha mandok tu hamu: Ia ompunta si Daud, na mate do ibana jala tartanom; di hita on do tanomanna rasirasa sadari on.

2:30 Antong, panurirang do ibana jala diboto do, naung diuarihon Debata tu ibana, pabangkitonna do pomparanna tu atas habangsana i.

2:31 Asa sian pamotoanna hian dilumbahon ibana disi haheheon ni Kristus i, paboa na so pasombuon Ibana di banua toru jala na so idaon ni dagingna i habusukon.

2:32 I ma Jesus, naung pinahehe ni Debata; saluhut do hami mangkatindangkonsa.

2:33 Asa dung dipatimbul Debata Ibana tu siamunna, dijalo ma sian Ama i Tondi Parbadia na pinarbagabaga i, gabe diusehon ma i, songon naung niida jala binegemuna i.

2:34 Ai ndada si Daud i nangkok tu banua ginjang, alai didok ibana: "Ninna Tuhan i do mandok Tuhanku: Hundul ma Ho tu siamunhon,"

2:35 "paima hupatunduk angka musum, bahen sidegedegean ni patmu!"

2:36 Antong, tangkas situtu ma diboto sandok bangso Israel: Jesus na pinarsilangkonmuna, i ma bangkit Tuhan jala Kristus dibahen Debata!

2:37 Jadi umbege i, ditorushon ma rohanasida, dung i didok nasida ma tu si Petrus dohot tu angka donganna apostel: Aha nama sibahenonnami, ale angka dongan?

2:38 Alai didok si Petrus ma tu nasida: Pauba hamu ma rohamuna, dung i padidihon hamu ma ganup hamu tubagasan Goar ni Jesus Kristus, bahen hasesaan ni dosamuna, asa dijalo hamu silehonlehon i, i ma Tondi Parbadia i.

2:39 Ai di hamu do bagabaga i dohot di angka anakkonmuna ro di saluhut angka na dao, manang piga na naeng jouon ni Tuhan Debatanta dope.

2:40 Lan dope hata na asing dihatindangkon ibana, laho mangapoi nasida, ninna do: Sai olo ma hamu malua sian bangso na geduk on!

2:41 Asa tardidi ma angka na manjangkon hatana i, gabe arga toluribu ma torop ni halak na manamba di na sadari i.

2:42 Alai marsihohot do nasida di poda ni angka apostel marparsaoran, marulaon na badia jala martangiang.

2:43 Alai songgop ma biar tu roha ni saluhutna; masa ma lan halongangan dohot tanda di Jerusalem, dipatupa angka apostel i.

2:44 Alai sai domu do saluhut angka na porsea i, jala songon hatopan dirajumi nasida saluhut artanasida.

2:45 Tupa digadisi nasida arta dohot ugasannasida, disagihon ma tu saluhutna marguru tu haseana di ganup.

2:46 Ganup ari do nasida tongtong saroha di bagas joro i, jala jojor jabu do nasida marulaon na badia, marlas jala marbulus ni roha nasida marsipanganon.

2:47 Huhut mamuji Debata jala lomo do roha ni nasa natorop mida nasida. Alai ganup ari do ditambai Debata tu na sahuria i angka na dapotan haluaon.

Ulaon ni Apostel 3

3:1 Dung i rap nangkok ma si Petrus dohot si Johannes tu bagas joro, di pungkul tolu di tingki partangiangan.

3:2 Jadi diusung na mangusung ma sahalak na pangpang sian hatutubuna; ganup ari do ditaruhon nasida ibana tu lambung pintu ni bagas joro na margoar na uli, asa dipangido asiasi sian angka na bongot tu bagas joro i.

3:3 Jadi di na niidana si Petrus dohot si Johannes, naeng bongot tu bagas joro i, dipangido ma asiasi.

3:4 Alai dipanotnoti si Petrus dohot si Johannes ma ibana, ninna ma: Bereng dompak hami!

3:5 Dung i dibereng ma nasida, dihirim rohana jaloonna manang aha sian nasida.

3:6 Alai ninna si Petrus ma: Anggo perak dohot sere ndang adong di ahu; alai na adong di ahu, hulehon ma tu ho: Marhitehite Goar ni Jesus Kristus na sian Nasaret i, mardalani ma ho!

3:7 Laos ditangkup ma tanganna siamun pahehe ibana, jadi pintor hot ma haehaena dohot totna.

3:8 Dung i manigor hehe ma ibana, jongjong ma huhut mardalan, dung i bongot ma ibana rap dohot nasida tu bagas joro i mardalan jala mirjahirjak huhut mamuji Debata.

3:9 Jadi diida natorop saluhutna do ibana mardalani dohot mamuji Debata.

3:10 Alai diboto nasida, ibana do i, na hundul nasailaon mangidoido di lambung pintu na uli na di bagas joro i; jadi mansai longang ma rohanasida jala tarhalomong mida na masa tu ibana i.

3:11 Alai dung sai udur ibana dohot si Petrus dohot si Johannes, marrongoman ma saluhut halak tu nasida, tu inganan na margoar emper ni si Salomo, dibahen songgot ni rohanasida.

3:12 Alai marnida i si Petrus, ninna ma mandok natorop i: Hamu, halak Israel, boasa longang rohamu mida on, boasa hami diberengi hamu, songon na hira gogonami sandiri manang hadaulatonnami mambahen mardalan halak on?

3:13 Na dipasangap Debata ni si Abraham, si Isak dohot si Jakkob, Debata ni angka amanta i do Jesus naposona i, na pinasahat jala na sinoadahonmuna di jolo ni si Latus na mandok uhumna, paluaon Ibana nian.

3:14 Alai disoadahon hamu do na badia jala partigor i; dipangido hamu do, lehonon tu hamu pamunu i.

3:15 Alai dipusa hamu do partogi tu hangoluan. I ma dipahehe Debata sian na mate; hami do angka sitindangi ni i!

3:16 Asa ala ni haporseaon di Goarna do dipargogoi Goarna halak on na niida jala na tinandamuna, gabe dilehon haporseaon na sian Tuhan i do hahisaron tu ibana di jolomuna saluhutna.

3:17 Onpe, hamu ale angka dongan, huhilala, na hurang boto do hamu, umbahen na diulahon hamu i, songon i do nang angka sintuamuna.

3:18 Alai dipasaut Debata do disi na pinaboana hian marhitehite hata ni saluhutna panurirang, mandok: Sitaon na bernit do anggo Kristusna.

3:19 Antong, pauba jala paulak hamu ma rohamuna, asa tarsesa dosamuna,

3:20 asa anggiat ro angka ari hahilasan sian adopan ni Tuhan i jala asa disuru tu hamu Jesus Kristus, songon naung tinahina i hian.

3:21 Dijangkon banua ginjang do Ibana jolo, paima ro tingki hasosonggop ni nasa na hinatahon ni Debata di na robi marhite sian hata ni angka panurirangna na badia i.

3:22 Ai didok si Musa do: "Paheheon ni Tuhan Debatanta do panurirang sada sian angka hahaanggimuna i songon ahu on; Ibana do sitangihononmuna di saluhut sidohononna tu hamu.

3:23 Alai sirotongkononhon ma disi sian bangso i nasa na so tumangihon panurirang i!"

3:24 Alai nasa panurirang angka na manurirangi, mamungka sian si Samuel ro di angka na sian pudina i, angka ari on do dibaritahon nasida.

3:25 Hamu do anak ni angka panurirang i jala partohap di padan na binahen ni Debata tu angka amanta i, uju na nidokna i tu si Abraham: "Dapotan pasupasu ma saluhut bangso ni tano on marhite sian Pomparanmi!"

3:26 Jumolo do di hamu dipahehe Debata Naposona i, disuru do Ibana mamasumasu hamu, angka na mulak sian hajahatonmuna be.

Ulaon ni Apostel 4

4:1 Alai di na manjamitai natorop i nasida, ditahopi angka malim i dohot sintua ni bagas joro i rap dohot angka Saduse ma nasida.

4:2 Muruk ma i, ala diajari nasida natorop i jala dibaritahon haheheon sian na mate marhite sian Jesus.

4:3 Jadi ditangkup ma nasida, didabu ma nasida saborngin i tu hurungan, ai nunga bot ari.

4:4 Alai gabe porsea do torop sian angka naung umbege jamita i, pola gok limaribu torop ni angka baoa.

4:5 Alai di torang ni arina i marpungu ma di Jerusalem angka pangituai nang angka sintua ro di angka sibotosurat,

4:6 rap dohot si Hannas, sintua ni malim i, dohot si Kayapas, si Johannes dohot si Aleksander ro di sude sisolhot ni sintua ni malim i.

4:7 Jadi dipajongjong ma nasida tu tongatonga, dipamanat ma: Gogo ni ise manang goar ni ise dipangasahon hamu patupahon i?

4:8 Dung i gok Tondi Parbadia ma si Petrus, didok ma tu nasida: Hamu angka na sangap ni bangso on jala pangituai!

4:9 Molo pola tangkasan hami sadari on ala ni denggan basa i na tu sada halak na hansitan, manang marhite sian ise ibana malum,

4:10 boto hamu ma saluhutna ro di sude bangso Israel: Jongjong pe halak on hisar di jolomuna, sandok marhitehite Goar ni Jesus Kristus na sian Nasaret i do, na pinarsilangkonmuna, na pinangolu ni Debata sian na mate!

4:11 Ibana do "batu na binolongkon ni hamu angka pande bagas i, naung gabe batu parsuhisuhi."

4:12 Asa ndang adong haluaon di bagasan manang ise na asing; ai ndang adong goar na asing ditoru ni langit dilehon tu jolma, parhiteanta tu haluaon.

4:13 Ia nasida, longang do marnida hiras ni roha ni si Petrus dohot si Johannes i, ai torang do diboto, na so sijama surat jala na so marsiajar nasida; ditanda do, nasida dongan ni Jesus najolo.

4:14 Alai diida do jongjong disi rap dohot nasida halak naung malum i, jadi ndang dapotsa be manang aha sidohononna.

4:15 Gabe disuru nama nasida tu balian ni parrapotan i, dung i masitungkaran pingkiran ma nasida, angka ninna ma:

4:16 Dia ma bahenonta tu angka halak on? Ai tandap do tanda na pinamasanasida on; saluhut pangisi ni huta Jerusalem do umbotosa jala ndang tarsoadahon hita.

4:17 Alai asa unang lam rarat tu natorop i, gogo ma nasida taasupi, asa sandok unang be marjamita nasida tu halak mangasahon Goar i.

4:18 Dung i dijou ma nasida, dirarang ma, sandok na so tupa be nasida marjamita manang mangajari mangasahon Goar ni Jesus.

4:19 Alai ninna si Petrus dohot si Johannes ma mangalusi: Hamu ma manimbang, manang na tigor i di roha ni Debata, molo tangian hami di hamu asa di Debata.

4:20 Ai ndang tarbahen hami so mangkatahon naung huida jala hubege hami.

4:21 Alai lam diasupi ma nasida, dung i dipalua ma, ala so jumpang nasida dalan manguhumi nasida dibahen natorop i, ai saluhut do mamuji Debata marningot na masa i.

4:22 Ai lobi opatpulu taon do umur ni jolma na pinamalum i.

4:23 Alai dung malua nasida, didapothon ma angka dongannasida, jadi dibaritahon ma sude na nidok ni angka sintua ni malim dohot angka pangituai tu nasida.

4:24 Jadi dung dibege nasida i, sasoara ma nasida mandok tu Debata: O ale Tuhan, Ho do manjadihon langit dohot tano dohot laut ro di nasa isina i!

4:25 Hinorhon ni Tondi Parbadia dihatahon Ho do marhite sian soara ni amanami, si Daud naposomu, songon on: "Boasa ogaoga halak parbegu jala na so marniula dipingkiri angka bangso?"

4:26 "Na hehe do angka raja ni tano on jala marpungu do angka panggomgomi laho mangalo Tuhan Kristusna i."

4:27 Ai tutu ma naung marpungu di huta on si Herodes dohot Pontius Latus rap dohot halak parbegu dohot bangso Israel maralohon Jesus, naposom na badia i, na miniahanmi,

4:28 laho pasauthon hasosonggop ni na tiningki ni tanganmu dohot roham hian.

4:29 Onpe, ale Tuhan, bereng ma asupasupnasida, jala lehon tu angka naposomon hiras ni roha situtu, laho mangkatahon hatam!

4:30 Huhut surdukkon ma tanganmu, laho patupahon hahisaron ro di angka tanda dohot halongangan marhitehite Goar ni Jesus, naposom na badia i!

4:31 Jadi dung martangiang nasida, humuntal ma inganan parpunguannasida jala gok Tondi Parbadia ma nasida saluhutna, gabe marhiras ni roha ma nasida mangkatahon hata ni Debata.

4:32 Alai saroha saoloan do angka na porsea na sapunguan i; jala ndang adong nanggo sada sian angka paradongan na mandok: Hapunjunganna artana i, hatopan do i saluhutna dietong.

4:33 Jadi marhagogoon situtu ma angka apostel i, mangkatindangkon haheheon ni Tuhan Jesus i, jala tung lomo situtu do roha ni halak mida sude nasida.

4:34 Ai ndang adong manang ise nasida hurangan; ai ia adong pe sian nasida parhauma manang parjabu, digadisi do i, dung i diboan ma tuhor ni na ginadisna i.

4:35 Dipeakkon ma i tujolo ni angka apostel, dung i disagihon nasida ma i tu angka na hurangan.

4:36 Jadi adong ma sahalak Lepi sian pulo Siprus, i ma si Josep, na ginoar ni angka apostel si Barnabas (mandok: Anak ni pangapulon).

4:37 Digadis ma hauma golatna, diboan ma hepeng i, laos dipeakkon ma tujolo ni angka apostel i.

Ulaon ni Apostel 5

5:1 Adong ma uju i sahalak na margoar si Ananias rap dohot dongan saripena si Sapira, na manggadis tanona.

5:2 Mardos ni roha ibana dohot dongan saripena, manamondingkon tuhorna i deba; diboan ma na deba nari, dipeakkon ma tujolo ni angka apostel.

5:3 Alai ninna si Petrus ma: Oe Ananias, naung digohi sibolis i do hape roham, laho manggabusi Tondi Parbadia i dohot mamorso deba tuhor ni tano i.

5:4 Ia ditiop ho i, nda gong di ho; digadis ho pe i, nda laos tong guru di ho? Dia do umbahen na tubu roham, mambahen songon i! Ndada jolma na ginabusanmi disi, Debata do!

5:5 Alai disi dibege si Ananias hata ondeng, runggang ma ibana, laos tos hosana. Jadi biahaton situtu ma sude na umbegesa.

5:6 Jadi hehe ma angka na umposo, disaputi ma bangkena, diusung ma tu balian laho mananom.

5:7 Alai salpu arga tolu jom ro ma dongan saripena i, ndang dope diboto na masa i.

5:8 Jala dipanghulingi si Petrus ma ibana: Paboa ma tu ahu: Na sa on do digadis hamu tano i? Olo, na sa i do, ninna.

5:9 Alai ninna si Petrus ma mandok ibana: Boasa tung saroha hamu mangunjuni Tondi ni Tuhan i? Tagam ma, na mandok masuk ma angka naung mananom dongan saripem; usungonnasida ma nang ho tu balian!

5:10 Dung i pintor runggang ma ibana tu jolona, laos tos hosana. Jadi di na bongot i angka na umposo i, nunga mate ibana didapot jala diusung ma bangkena tu balian, ditanom ma tulambung ni dongan saripena i.

5:11 Jadi hatahutan situtu ma sude na sahuria i ro di nasa na umbegesa.

5:12 Alai masa do godang angka tanda dohot halongangan marhite sian tangan ni angka apostel i tu natorop; saroha do nasida saluhutna, marpungu do nasida tu emper ni si Salomo.

5:13 Alai sian na leban i ndang adong na hum rohana pasaorhon dirina tu nasida; diparsangapi natorop i do nasida tahe.

5:14 Alai lam tamba ma angka na porsea di Tuhan i, torop baoa nang boruboru.

5:15 Pola dipamboan halak do angka na hansitan tu alaman, dipeakkon ma tu podoman dohot tu amak, asa anggiat hona halinu ni si Petrus i deba sian nasida, jumpa ro ibana.

5:16 Alai dohot do torop halak sian angka huta humaliang ro tu Jerusalem, mamboan angka na marsahit dohot angka na niarsahan ni tondi na hodar, gabe malum ma nasida saluhutna.

5:17 Alai hehe ma sintua ni malim i dohot saluhut angka donganna, i ma horong ni halak Saduse, gok rimas rohanasida.

5:18 Jadi dilaluhon ma tangannasida tu angka apostel i, didabu ma nasida tu hurungan hatopan.

5:19 Alai bornginna i diungkap surusuruan ni Tuhan i ma angka pintu ni hurungan i, ditogihon ma nasida tu balian, didok ma:

5:20 Laho ma hamu; di bagas joro ma hamu jongjong, mangkatahon tu natorop i saluhut hata hangoluan i!

5:21 Jadi dung dibege nasida i, sogot ma nasida laho tu bagas joro laho mangajari. Alai ro ma sintua ni malim i dohot angka donganna, dipapungu ma rapot godang dohot saluhut sintua ni angka anak Israel; dung i disuru ma tu hurungan mangalap nasida.

5:22 Alai dung sahat ro disi angka naposo i, ndang jumpangsa nasida di hurungan i, jadi mulak ma nasida paboahonsa, ninna ma:

5:23 Momos do nian hurungan i hudapot hami, angka parjaga pe jongjong di jolo ni angka pintu i; alai dung huungkap hami, ndang jumpang hami manang ise di bagasan.

5:24 Asa dung dibege sintua ni bagas joro i dohot angka sintua ni malim boaboa i, jut ma rohanasida mamingkiri, manang dia astuan ni i.

5:25 Alai ro ma na mamaritahon tu nasida: Dibagas joro do hape jongjong nasida na hinurungkonmuna i, mamodai natorop i.

5:26 Dung i laho ma sintua i rap dohot angka naposo mangalap nasida; alai ndada gogo dibahen, ai mabiar do nasida mida natorop, aik boha didangguri nasida maon.

5:27 Asa dung diboan, dipajongjong ma nasida tujolo ni rapot godang, dung i dipamanat sintua ni malim i ma nasida, ninna ma:

5:28 Gomos situtu do nian hatanami mangorai hamu, na so jadi be hamu mangajari mangasahon Goar i, hape lam digohi hamu do huta Jerusalem podamuna i; na naeng parsapatahononmuna mudar ni Halak i tu hami?

5:29 Dung i ninna si Petrus dohot angka apostel i ma mangalusi: Ingkon oloan do iba di Debata asa di jolma!

5:30 Dipahehe Debata ni angka amanta do Jesus, na pinusamuna, uju digantung hamu Ibana tu hau.

5:31 Tu siamunna do dipabangkit Debata Ibana gabe Partogi jala Sipalua, laho mangalehon tu halak Israel hamubaon ni roha dohot hasesaan ni dosa.

5:32 Hami do panindangi di hata on dohot Tondi Parbadia, na nilehon ni Debata tu angka na mangoloi Ibana.

5:33 Alai umbege i nasida, digotapi ma rohanasida jadi diputushon ma, sipusaon do nasida.

5:34 Alai hehe ma di rapot i sahalak Parise, na margoar Gamaliel, sibotopatik, na sangap do ibana di roha ni natorop i, didokkon ma paruaron nasida satongkin.

5:35 Dung i didok ma tu nasida: Hamu halak Israel, manat ma hamu di sibahenonmuna tu angka jolma on!

5:36 Hehe do najolo si Teudas, dipabalga dirina, pola arga opatratus halak mangihuthon ibana, gabe tarbunu do ibana, marserak do saluhutna na mangihuthon ibana, gabe soada be.

5:37 Di pudina hehe muse si Judas, halak Galilea i, di na tarsurat i saluhut halak, jadi torop do dibolabola ditogihon; alai dohot do ibana lengse, gabe marserak sudena na mangihuthon ibana.

5:38 Asa on ma hatangku: Unang hahua hamu be angka halak i, pasombu hamu ma nasida; ai molo sian jolma tahi dohot ulaon on, na laho sega ma i.

5:39 Alai molo sian Debata, ndang taragohon hamu nasida; so tung gabe tardapot hamu maon angka sialo Debata!

5:40 Dioloi nasida ma ibana, dijou ma angka apostel i, dilinsingi ma nasida jadi diorai ma mangkatahon mangasahon Goar ni Jesus, dung i dipalua ma.

5:41 Alai las do rohanasida, laho ruar sian jolo ni rapot i, ala tau nasida dirajumi Debata manaon lealea humongkop Goar i.

5:42 Jadi ndang mansohot nasida ariari di bagas joro nang jojor jabu pe, mangajarhon dohot mamaritahon Kristus Jesus i.

Ulaon ni Apostel 6

6:1 Alai di angka ari i lam manamba ma torop ni sisean i, jadi marmungutmungut ma halak Junani dompak halak Heber, ala tartading angka parompuan na mabalu sian nasida di pangurupion ariari.

6:2 Jadi diparia na sampuludua i ma sandok huria i, didok ma: Ndang denggan hupapudi hami hata ni Debata, laho paturehon angka asiasi.

6:3 Onpe, ale angka dongan, diori hamu ma sian tongatongamuna pitu halak na denggan baritana, angka na gok Tondi jala na pantas marroha, sipabangkitonta tu ulaon i.

6:4 Alai anggo hami, tangiang dohot ulaon jamita i ma tong huhapadothon hami.

6:5 Jadi lomo ma roha ni na sahuria i di hata i; dipillit ma si Stepanus, sada halak na gok haporseaon dohot Tondi Parbadia, dung i si Pilippus, si Prokorus, si Nikanor, si Timon dohot si Parmenas, angkup ni i si Nikolaus, sada parguru sian Antiokia.

6:6 Angka i ma dipajongjong tujolo ni angka apostel i, jala martangiang ma huhut mangampehon tangan tu nasida.

6:7 Jadi lam rarat ma hata ni Debata, ganda situtu ma torop ni angka sisean di Jerusalem; angka malim pe, torop do mangoloi porsea.

6:8 Alai na gok asi ni roha dohot hagogoon si Stepanus, dipatupa do halongangan dohot tanda angka na balga di adopan ni natorop i.

6:9 Gabe hehe ma deba angka na sian parguruan na margoar Libertini dohot sian Kirene dohot sian Aleksanderia dohot angka na sian Kilikia dohot sian Asia marsual dohot si Stepanus.

6:10 Alai ndang taralo nasida hapistaranna dohot Tondi i na mangajari ibana.

6:11 Gabe dipajuju nasida ma deba halak na mandok: Hubege hami do ibana mandok hata barangsi mangapasi si Musa dohot Debata.

6:12 Jadi digintali nasida ma natorop i ro di angka sintua dohot angka sibotosurat, laos hehe ma nasida, ditangkup ma ibana, diboan ma tujolo ni rapot godang.

6:13 Dung i dipajongjong nasida ma angka sitindangi gapgap na mandok: Ndang na mansadi halak on mangkata inganan na badia i nang patik i.

6:14 Ai hubege hami do ibana mandok: Lohaan ni Jesus sian Nasaret i ma joro i, paubaonna ma adat na tajalo sian si Musa.

6:15 Jadi dipanotnoti saluhut parrapot i ma ibana, jala songon bohi ni surusuruan ni Debata do bohina diida nasida.

Ulaon ni Apostel 7

7:1 Dung i didok sintua ni malim i ma: Atehe, na tutu do i?

7:2 Jadi dialusi ma: Hamu angka hahaanggi dohot angka damang, tangihon hamu jolo! Dipataridahon Debata na marsangap i do Ibana tu amanta si Abraham, uju di Mesopotamia ibana, andorang so maringan di huta Haran dope.

7:3 Ninna ma mandok ibana: Bungkas ma ho sian tanomi dohot sian donganmu sabutuha; topot ma tano sipatuduhononku tu ho!

7:4 Jadi laho ma ibana sian tano Kasdim maringan tu huta Haran; dung i sian i muse, dung mate amana i, dipaunsat do ibana tu tano niingananmuna on nuaeng.

7:5 Ndang dope dilehon anggo golat tu ibana disi, nanggo na santopap, jadi diparbagabaga do, lehononna tu ibana tano i, asa ibana nampunasa ro di pomparanna, andorang so adong dope anakna.

7:6 Alai songon on do didok Debata: "Gabe na hinomit ma pomparanmu di tano na leban; parhatobanon jala paporsukporsukkon ni halak do nasida leleng ni opatratus taon".

7:7 "Dung i uhumonku ma bangso na nioloannasida i, ninna Debata; i pe asa bungkas nasida sian i, dung i sombaonnasida ma Ahu di inganan on."

7:8 Laos dilehon ma tu ibana padan parsunaton. Dung songon i, ditubuhon ma si Isak, disunat ma ibana di ari paualuhon; jadi disunat si Isak ma muse si Jakkob; laos songon i dibahen si Jakkob tu ompunta na sampuludua i.

7:9 Dung i dilatei angka ompunta i ma si Josep, digadis ma ibana tu tano Misir; alai didongani Debata do ibana.

7:10 Jala dipalua do ibana sian saluhutna haporsuhonna, gabe dilehon tu ibana asi ni roha dohot hapistaran di jolo ni Firaun, raja ni Misir i, na mamampe ibana gabe pangarajai di tano Misir ro di saluhut na di bagasna i.

7:11 Dung i songgop ma haleon tu liat tano Misir dohot tu tano Kanaan, gabe porsuk ma diae, jadi ndang jumpangan sipanganon be angka amanta i.

7:12 Alai dibege si Jakkob ma, adong sipanganon di tano Misir, jadi dipaborhat ma angka amanta i tusi parjolo sahali.

7:13 Dung i di na paduahalihon i dipatandahon si Josep ma ibana tu hahaanggina, laos torang ma di raja Firaun i partubu ni si Josep.

7:14 Alai disuru si Josep ma na manjou amana i, si Jakkob, rap dohot saluhutna donganna sabutuha; pitupulu lima do toropnasida.

7:15 Asa tuat ma si Jakkob tu tano Misir, dung i mate ma ibana nang angka amanta i.

7:16 Dung i ditaruhon ma nasida tu Sikem, dipeakkon ma tu tanoman, na tinuhor ni si Abraham sian angka anak ni si Hemor disi.

7:17 Alai dung lam jonok tingki na pinarbagabaga ni Debata, na niuarihonna tu si Abraham i, lam sopar ma bangso i jadi matorop mabue ma nasida di tano Misir i.

7:18 Paima pampe raja na asing, na so umboto si Josep i.

7:19 Jadi bisuk ma dibahen mangago bangsonta, dijahati do angka amanta, gabe dibolongkon posoposonasida, asa unang mangolu.

7:20 Jadi di tingki i ma tubu si Musa, jala lomo do roha ni Debata mida ibana. Leleng ni tolu bulan do ibana diparmudumudu di bagas ni amana i.

7:21 Dung i ditaruhon nama tu balian, alai dijangkon boru ni raja Firaun ma ibana, dipagodanggodang ma jala diain.

7:22 Dipodahon ma tu ibana nasa hapistaran ni halak Misir, gabe malo ma ibana di hata nang di ulaon pe.

7:23 Alai dung dapot umurna opatpulu taon, tubu ma rohana mandulo angka donganna sabutuha, i ma halak Israel i.

7:24 Jala marnida sahalak na nirupa, mangalo ma ibana; diluluhon ma na nirupa i, dipusa ma halak Misir i.

7:25 Na dihirim rohana do, antoan ni angka donganna ma, na naeng patupaon ni Debata haluaon di nasida marhite sian tanganna; hape ndang dianto nasida.

7:26 Dung i marsogotna i ro muse ma ibana, tongon di na marbadai nasida, gabe disosoi ma nasida mardame, ninna ma: Na marhahamaranggi do hamu, ale angka amang; boasa masialoan hamu?

7:27 Alai ditulak parsala i ma ibana, didok ma: Ai ise mamampe ho gabe pangarajai dohot panguhum di hami?

7:28 Nda tung naeng pusaonmu ahu songon naung pinusam nantoari halak Misir i?

7:29 Dung i maporus ma si Musa, umbege hata i; laos mahiandu ma ibana di tano Midian, ditubuhon ma disi dua anak.

7:30 Jadi dung gok opatpulu taon, diida ibana ma surusuruan ni Debata di halongonan, di dolok Sinai, di bagasan api na marsigorgor di ramba sampulguk.

7:31 Longang ma roha ni si Musa, dung diida na niidana i, jadi didapothon ma manangkasi; alai tarbege ma soara ni Tuhan:

7:32 "Ahu do Debata ni angka amangmu, Debata ni si Abraham, si Isak dohot si Jakkob." Jadi angka dotdot ma si Musa, ndang hum be rohana manangkasi.

7:33 Alai ninna Tuhan i ma mandok ibana: "Tanggali sipatu sian patmu, ai tano na badia do inganan hajongjonganmi!

7:34 Nunga tangkas huida haporsuhon tinaon ni bangsongki di tano Misir, jala nunga hubege hoihoinasida, asa nunga tuat Ahu paluahon nasida; onpe, ro ma ho, asa husuru ho tu tano Misir!"

7:35 I ma si Musa i na jinuanasida, pola didok nasida: Ise na mamampe ho gabe pangarajai dohot panguhum? Apala ibana ma disuru Debata gabe pangarajai dohot sipalua marhite sian tangan ni surusuruan na niidana di ramba na sampulguk i.

7:36 Ibana do manogihon nasida bungkas, dipatupa do angka halongangan dohot tanda di tano Misir i, di laut rara dohot di parhorsihan, leleng ni opatpulu taon.

7:37 I ma si Musa, na mandok tu angka halak Israel: "Paheheon ni Debata do panurirang sada di hamu sian angka hahaanggimuna songon ahu on!"

7:38 Ibana ma i na di huria na di halongonan i rap dohot surusuruan, na mangkatai di dolok Sinai dohot ibana dohot angka amanta i; dijalo do hata na mangolu, silehononna tu hita.

7:39 Na so tinangihon ni angka amanta i, ai ditulak nasida do ibana, jadi mulak ma rohanasida marningot tano Misir.

7:40 Ai didok nasida tu si Aron: Pauli di hita angka debata, na mardalan di jolonta; ai ndang taboto, manang aha masa di si Musa, naung manogihon hita ruar sian tano Misir.

7:41 Jadi digana nasida ma lombu uju i, laos dipele ma ganaganaan i, gabe dihalashon nasida hapandean ni tangannasida.

7:42 Alai ditundali Debata ma nasida, dipasahat ma mangoloi angka na pinardebatanasida na di langit i, songon na tarsurat di pustaha ni angka panurirang i: "Ai adong disombahon hamu, bangso Israel, tu Ahu angka pelean dohot silehonlehon, uju na di halongonan i hamu leleng ni opatpulu taon?

7:43 Dihunti hamu do balebale ni Molok dohot bintang ni debata Repan ro di angka gombaran na pinaulimuna bahen sisombaonmuna. Tu balik ni Babel dope buangkononku hamu!"

7:44 Di angka amanta di halongonan i do undungundung panindangion i, na suman tu na niaturhon ni Debata na mangkatai dohot si Musa i, asa bahenonna tudos tu tiruan na niidana i.

7:45 I ma dijalo angka amanta i, laos diboan rap dohot si Josua, laho mamuhar angka bangso na pinabali ni Debata sian jolo ni angka amanta i ro di angka ari ni si Daud.

7:46 Ibana ma na niasian ni Debata, gabe dipangido ma, naeng adong inganan ni Debata ni si Jakkob.

7:47 Alai si Salomo ma paulihon inganan di Ibana.

7:48 Alai ndang mian Natumimbul i di bagasan inganan na pinandean ni tangan, songon na nidok ni panurirang i:

7:49 "Langit i do habangsangku, jala ondolan ni pathu do tano i; bagas dia ma i na naeng paulionmuna di Ahu, ninna Tuhan i; tung dia ma inganan pangulonanki?

7:50 Nda tanganku do paulihon saluhutna i?"

7:51 O hamu na jogal rungkung, angka na so tarsunat rohamu nang pinggolmu, tongtong do dialo hamu Tondi Parbadia i; songon angka amamuna, suang songon i do nang hamu!

7:52 Ise ma sian angka panurirang i, na so pinaburuburu ni angka amamuna? Pola dipusa nasida do angka na sumurirangkon haroro ni Partigor i; Ibana pe dipasahat jala dipusa hamu do!

7:53 Dijalo hamu do patik i, na pinatolhas ni angka surusuruan i; hape ndang diradoti hamu i.

7:54 Umbege i, digotap ma rohanasida jala patungosngoson ma iponnasida dompak ibana.

7:55 Alai gok Tondi Parbadia ma si Stepanus mamereng tu ginjang, jadi diida ma hasangapon ni Debata dohot Jesus jongjong di siamunna.

7:56 Jadi didok ma: Ida ma, mungkap do langit i huida, jala Anak ni jolma i jongjong tungkan siamun ni Debata!

7:57 Alai marsoara na gogo ma nasida marsurahi huhut disongsongi pinggolnasida be, jadi rap ma nasida manahopi ibana.

7:58 Disarat nasida ma ibana tu balian ni huta i, dung i dipantinggangkon ma batu tu ibana. Ia angka sitindangi i, dipampeakkon do ulosnasida tujolo ni dolidoli na margoar Saulus.

7:59 Asa dipantinggangkon nasida ma batu tu si Stepanus; gabe manjoujou do ibana mandok: Ale Tuhan Jesus, jalo ma tondingku!

7:60 Alai na marsinggang ma ibana, huhut dipagogo ma soarana mandok: Ale Tuhan, unang jujur dosanasida i! Jadi dung didok songon i, monding ma ibana.

Ulaon ni Apostel 8

8:1 Alai dihalomohon si Saulus do pamununasida di si Stepanus. Jala masa ma olat ni na sadari i pangaleleon bolon dompak huria na di huta Jerusalem, gabe marserak ma nasida saluhutna, so padohot angka apostel, tu luat Judea dohot Samaria.

8:2 Alai ditanom angka halak na daulat roha ma si Stepanus, jala na nia lelengna ditatangisi nasida ibana.

8:3 Alai dipaporsukporsuk si Saulus do nasida na sahuria i: Dibongoti angka jabu, disarat sian i baoa nang boruboru, laho pasahathon tu hurungan.

8:4 Madangadang do angka na marserak i huhut mamaritahon hata i.

8:5 Laos tuat ma anggo si Pilippus tu huta Samaria, dijamitahon ma tu nasida Kristus i.

8:6 Jadi dung dibege natorop i jamita ni si Pilippus jala diida angka tanda na pinatupana, saroha ma nasida marateatehonsa.

8:7 Ai ruar do angka tondi na hodar, marsoara na balga sian torop halak na sinonggopanna i; godang do nang na sarion dohot na lumpuon dipamalum.

8:8 Jadi mansai las ma roha ni nasida na sahuta i.

8:9 Alai adong do di huta i hian sada halak na margoar si Simon, parsibalik mata na mangaliluhon roha ni halak Samaria i, ai na sumurung do ibana didok.

8:10 Jadi saluhut halak, angka na metmet dohot na magodang, mangihuthon ibana, angka didok ma: On ma hagogoon ni Debata apala na balga!

8:11 Alai umbahen na dipaihutihut nasida ibana na sai leleng, ala lilu nasida dibahen hapandeanna i.

8:12 Alai gabe tardidi ma angka baoa nang boruboru, dung porsea nasida di na binaritahon ni si Pilippus na taringot tu harajaon ni Debata dohot Goar ni Jesus Kristus.

8:13 Dung i gabe porsea ma nang si Simon ondeng jala tardidi ma, laos dipaihutihut ma si Pilippus; jadi mansai longang ma rohana marnida tanda dohot hagogoon na balga, angka na masa i.

8:14 Alai dung dibege angka apostel na di Jerusalem, naung dijalo halak Samaria i hata ni Debata, disuru nasida ma si Petrus dohot si Johannes manopot nasida.

8:15 Tuat ma nasida, ditangiangkon ma angka dongan i, asa dijalo Tondi Parbadia.

8:16 Ai ndang dope songgop Tondi i manang tu ise nasida, asal tardidi do nasida tubagasan Goar ni Tuhan Jesus.

8:17 Jadi mangampehon tangan ma apostel i tu nasida, gabe dijalo ma Tondi Parbadia.

8:18 Alai dung diida si Simon angka apostel i mangalehon Tondi Parbadia marhite sian na mangampehon tangan, ro ma ibana mamboan hepeng tu nasida.

8:19 Didok ma: Lehon hamu ma huaso sisongon i nang tu ahu, asa manjalo Tondi Parbadia halak, ia huampehon tanganku tu ibana.

8:20 Alai didok si Petrus ma mandok ibana: Mago ma ho rap dohot perakmi; ai dirimpu ho, tartuhor silehonlehon ni Debata marhitehite hepeng!

8:21 Ndang parjambar manang partohap ho di hata on, ai ndang na bonar roham maradophon Debata.

8:22 Ipe pauba ma roham sian hajahatonmi; dung i pangido ma tu Tuhan i, anggiat tarsesa tahitahi ni roham!

8:23 Ai huida do roham di bagasan pogu na paet, niihotan ni hageduhon.

8:24 Alai ninna si Simon i ma mangalusi: Tangiangkon hamu ma ahu tu Tuhan i, asa unang songgop tu ahu na nidokmuna i.

8:25 Asa dung dihatindangkon jala dihatahon hata ni Tuhan i, mulak ma anggo nasida tu Jerusalem; laos dibaritahon dope barita na uli i di torop huta na di luat Samaria.

8:26 Alai dipanghulingi surusuruan ni Tuhan i ma si Pilippus: Hehe ma ho, laho ma dompak dangsina tu dalan na langlang i, na tuat sian Jerusalem tu huta Gasa!

8:27 Jadi hehe ma ibana laho tusi. Jala adong ma disi sada halak Etiopia, parpangkat na balga, siramoti saluhutna arta ni si Kandake, raja ni halak Etiopia; i ma naung ro sian Jerusalem, dung martangiang disi.

8:28 Jadi hundul ma ibana di huretana laho mulak, huhut manjahai surat ni panurirang Jesaya.

8:29 Alai ninna Tondi i ma mandok si Pilippus: Laho ma ho tusi, hombari ma hureta i!

8:30 Jadi marlojong ma si Pilippus tusi, gabe dibege ma ibana manjaha surat ni panurirang Jesaya; dung i ninna ma: Atehe, diantusi ho do na jinahami?

8:31 Alai ninna ma: Songon dia ma haantusan ahu i, anggo so adong na mamodai ahu? Laos disosoi ma si Pilippus manaek, asa hundul tu lambungna.

8:32 Alai anggo hata ni surat na jinahana i on do: "Ditogu do Ibana songon birubiru tu pamotongan jala songon birubiru na hohom di jolo ni panggustingi; songon i do nang Ibana, ndang tarbege soarana."

8:33 "Di hametmetonna i marujung uhum na tu Ibana. Ise ma manjujur sundutna i, ai tarhinsat do hosana sian tano on?"

8:34 Dung i ninna parpangkat i ma mangkuling i si Pilippus: Raja ho, ise do na nidok ni panurirang disi? Ibana sandiri do manang halak na leban?

8:35 Dung i mangkuling ma si Pilippus, dibaritahon ma Jesus tu Ibana, marbingkas sian hata ni surat ondeng.

8:36 Alai laho manulus dalan i, jumpang nasida ma aek, jadi ro ma parpangkat i: Ndi on ma aek! Adong dope ambatna, unang ahu tardidi?

8:37 Dung i didok si Pilippus ma: Anggo na porsea ho dohot nasa roham, jadi do i! Gabe ninna ma mangalusi: Ahu porsea. Anak ni Debata do Jesus Kristus!

8:38 Laos didokkon ma maradian hureta i; dung i mijur ma nasida, si Pilippus dohot parpangkat i tu aek i, dipandidihon ma ibana.

8:39 Alai di na nangkok i nasida sian aek i, diluahon Tondi ni Tuhan i ma si Pilippus, jadi ndang be diida parpangkat i ibana; marlas ni roha ma didatdati sidalananna i.

8:40 Alai anggo si Pilippus, di Asdod do ibana jumpang; dibolus ma angka huta i sude sahat ro di Kaesarea, huhut mamaritahon barita na uli i.

Ulaon ni Apostel 9

9:1 Alai sai tong dope diondamhon si Saulus asupasup dohot pamunuon dompak sisean ni Tuhan i.

9:2 Ditopot ma sintua ni malim i mangido surat mandapothon angka parguruan na di huta Damaskus, asa ihotanna jala boanonna tu Jerusalem baoa nang boruboru pe, nasa na jumpangsa angka na mangihuthon agama i.

9:3 Alai uju di tongandalan ibana, mardonokkon huta Damaskus, tompu ma sumillam sondang sian ginjang humaliang ibana.

9:4 Jadi tinggang ma ibana tu tano, dung i dibege ma soara na mandok tu ibana: Saulus, Saulus! Boasa leleanmu Ahu?

9:5 Alai didok ma: Ise do Ho, Tuhan? Jadi didok Ibana: Jesus do Ahu, na nileleanmi! (Susa ma ho manandahi turatura!)

9:6 Angka hitir jala tarhalomong ibana mandok: Dia ma bahenonku, Tuhan, dipangido roham? Hata ni Tuhan i tu ibana: Hehe ma ho, bongoti ma huta i; disi ma paboaon tu ho sibahenonmu.

9:7 Alai tarhatotong do anggo angka donganna sauduran i, ai dibege nasida do soara i, alai ndang diida manang ise.

9:8 Jadi hehe ma si Saulus sian tano i; alai dung diungkap matana, sandok ndang marnida be; laos ditiop nasida nama tanganna, manogu ibana tu huta Damaskus.

9:9 Asa tolu ari lelengna ndang marnida matana jala ndang mangan manang minum ibana.

9:10 Jadi adong ma di huta Damaskus i sada sisean na margoar Ananias; dipataridahon Tuhan i ma dirina tu ibana, didok ma: Ale Ananias! Dung i dialusi ma: Dison do ahu, Tuhan!

9:11 Jadi didok Tuhan i ma mandok ibana: Hehe ma ho, laho ma tu alaman na margoar sitigor; tu bagas ni si Juda i ma pausoi halak Tarsus na margoar Saulus, ai na martangiang do ibana.

9:12 Gabe diida ibana, bongot sada halak na margoar Ananias mangampehon tangan tu ibana, asa sumuang marnida.

9:13 Alai ninna si Ananias ma mangalusi: Ale Tuhan, nunga sian lan halak hubege taringot tu godang ni na jahat na binahen ni halak i di huta Jerusalem tu angka na badiami.

9:14 Dison pe marhuaso do ibana sian angka sintua ni malim i, mangihoti saluhutna na manjou Goarmu.

9:15 Alai didok Tuhan i ma tu ibana: Laho ma ho, ai hupillit do ibana ulaulangku, asa diboan Goarhu tujolo ni angka bangso, nang tujolo ni angka raja dohot tujolo ni angka anak Israel.

9:16 Ai patuduhononku pe tu ibana godang ni sitaononna ala ni Goarhu.

9:17 Jadi hehe ma si Ananias, dibongoti ma bagas i, diampehon ma tanganna tu ibana, huhut didok: O Saulus, anggia, disuru Tuhan i do ahu, i ma Jesus na niidami di pardalananmu ro tuson, asa sumuang marnida huhut gok Tondi Parbadia ho.

9:18 Dung i pintor peut ma hapitungon i sian matana gabe sumuang marnida: Dung i hehe ma ibana gabe tardidi.

9:19 Laos di jolo ma sipanganon jadi suang ma gogona. Dung i na nia do lelengna diangkupi ibana angka sisean na di huta Damaskus i.

9:20 Manigor marjamita ma ibana di bagasan angka parguruan i, dihatindangkon ma Jesus, paboa Anak ni Debata Ibana.

9:21 Gabe muningan ma roha ni saluhutna na umbegesa, angka ninna ma: Nda ibana i, na mangalele di Jerusalem saluhutna angka na manjou Goar i; nang langkana tuson, nda laho mangihoti jala manogu nasida nian tujolo ni angka sintua ni malim?

9:22 Alai lam marsigomos ma si Saulus, pola jut do roha ni angka Jahudi na maringanan di huta Damaskus i dibahen, ai dipatorang do, Jesus i do Kristus.

9:23 Asa dung na nia lelengna, martahi ma angka Jahudi mamusa ibana.

9:24 Alai tarbortik ma tuptupnasida tu pinggol ni si Saulus. Pola do angka harbangan diingani nasida arian nang borngin, asa dapot ibana bunuonnasida.

9:25 Alai diboan angka sisean i ma ibana borngin i; sian parik ma ditantan nasida ibana di bagasan hirang.

9:26 Asa dung sahat ibana tu Jerusalem, naeng ma pasaoronna dirina tu angka sisean i; alai saluhut nasida mabiar mida ibana, ai ndang porsea nasida, naung gabe sisean ibana.

9:27 Si Barnabas do manjangkon ibana, ditogihon ma tu angka apostel i, laos dipajojor ma tu nasida, naung diida si Saulus Tuhan i di pardalananna dohot pangkataionnasida ro di pangkatindangkonna di Goar ni Jesus, uju na di huta Damaskus.

9:28 Dung i sai rap ma ibana dohot nasida mardalani di Jerusalem; marhiras ni roha do ibana mangkatahon Goar ni Tuhan i.

9:29 Pola dipanghulingi jala disuali angka Hellenist; alai dipatahitahi nasida do mambunu ibana.

9:30 Alai diboto angka dongan ma i, dipataru ma ibana tuat tu Kaesarea, laos disuru ma ibana tu huta Tarsus.

9:31 Asa mardamedame ma huria i di liat luat Judea dohot Galilea ro di Samaria, jala lam tu toguna ma huhut mamarangehon hatahuton mida Tuhan i, jala lam tu toropna nasida hinorhon ni pangapoion ni Tondi Parbadia.

9:32 Alai diebati si Petrus ma nasida saluhutna, jala tuat ma ibana manopot angka na badia na maringanan di Lidda.

9:33 Jadi jumpangsa ma disi sada halak na margoar Eneas, na sarion, naung peak di podomanna, leleng ni ualu taon.

9:34 Jadi didok si Petrus ma mandok ibana: Eneas, dipamalum Jesus Kristus do ho; hehe ma ho, duduk ma podomanmi! Jadi manigor hehe ma ibana.

9:35 Jadi diida sude pangisi ni huta Lidda dohot Saron ibana, gabe didompakkon ma Tuhan i.

9:36 Dung i adong ma di Joppe parompuan sada na porsea, na margoar Tabita, astuanna hije (Dorkas), na sumurung mangulahon na denggan dohot mambahen asi ni roha.

9:37 Tongon ma di angka ari i marsahit ibana laos mate, jadi diburi ma ibana, dipeakkon ma tu bilut parginjang.

9:38 Alai jonok do huta Lidda tu huta Joppe; jadi tarbege ma tu angka dongan, si Petrus disi, gabe disuru ma dua halak manopot ibana mangapoi, asa humatop ibana ro tumopot nasida.

9:39 Jadi hehe ma si Petrus mandongani nasida. Asa dung sahat, ditogihon ma ibana tu bilut parginjang; jadi ro ma mandapothon ibana saluhut boruboru na mabalu angka na tumatangis, dipatuduhon tu ibana ulos dohot abit angka na pinauli ni si Tabita, andorang rap dope dohot nasida.

9:40 Alai dipalaho si Petrus ma nasida saluhutna, dung i marsinggang ma ibana martangiang, didompakkon ma bangke i, didok ma: O Tabita, hehe ma ho! Jadi dipabidok ma matana; dung i di na niidana si Petrus i, hundul ma ibana.

9:41 Jadi disurdukkon ma tanganna, pahehehon ibana; dung i dijou ma angka na badia i ro di angka boruboru na mabalu, dipajongjong ma ibana mangolu di jolonasida.

9:42 Dung i sar ma i diboto saluhut pangisi ni huta Joppe, jadi torop do gabe porsea di Tuhan i.

9:43 Alai na nia do lelengna ibana mian di huta Joppe, sorang di sada halak na margoar Simon, sipauli hulingkuling.

Ulaon ni Apostel 10

10:1 Alai adong ma di Kaesarea sada halak na margoar Kornelius, letnan do ibana, masuk horong Italia.

10:2 Na daulat do ibana jala mangkabiari Debata rap dohot sandok isi ni bagasna; godang do asiasina diparlehon tu bangso i jala ondop do ibana martangiang tu Debata.

10:3 Jadi torang ma diida di bagasan tondina tar di pungkul tolu arian i, ro surusuruan ni Debata manopot ibana, didok ma tu ibana: O Kornelius!

10:4 Alai marnida i ibana, biar ma rohana, huhut ma didok: Ai aha, Tuhan? Gabe ninna ma: Nunga sahat tu parningotan di jolo ni Debata angka tangiangmi ro di angka asiasimi.

10:5 Onpe, suru ma halak tu Joppe, mangalap si Simon na margoar Petrus.

10:6 Na sorang di si Simon sipauli hulingkuling, parjabu di topilaut.

10:7 Asa disi laho surusuruan na mangkatai dohot ibana, dijou ma naposona dua halak dohot soldadu sada na daulat roha sian angka na di lambungna.

10:8 Dipajojor ma saluhutna i tu nasida, laos disuru ma nasida tu Joppe.

10:9 Alai marsogotna i, uju di tongandalan dope nasida ondeng laho mandapothon huta i, manaek ma si Petrus tu bilut parginjang martangiang di hos ni ari.

10:10 Gabe male ma ibana, naeng ma mangan. Jadi tagan marhobasi nasida di ibana, adong ma niidana di bagasan tondina:

10:11 Diida ma mungkap langit, dung i mijur ma sian i sada inganan na songon dagangan na bidang, na martali di suhisuhina na opat i, ditantan tu toru.

10:12 Di bagasan ni i adong ma ragam ni siopatpat dohot angka na manjirir di tano ro di angka pidong na martongatonga langit.

10:13 Dung i tarbege ma soara, na mandok tu ibana: Hehe ma ho, Petrus; seseati ma, pangan ma!

10:14 Alai ninna si Petrus ma: Tongka, Tuhan! Ai ndang dung hupangan na ramun manang na so ias.

10:15 Dung i ro muse ma soara paduahalihon mandok tu ibana: Unang ramun dok naung niiasan ni Debata!

10:16 Tolu hali ma masa songon i, dung i mamintor ma tarhindat dagangan i tu ginjang.

10:17 Bohabohaon dope roha ni si Petrus, manang dia lapatan ni na niidana i, nunga jongjong di jolo pintu i na sinuru ni si Kornelius i, dung dipausoi nasida bagas ni si Simon i.

10:18 Jadi joujou ma nasida manungkun, manang na sorang disi si Simon na margoar Petrus.

10:19 Alai di na marhusari dope roha ni si Petrus taringot tu na niidana i, ninna Tondi i ma mandok ibana: Adong do na mangalului ho!

10:20 Hehe ma ho, mijur ma, dongani nasida; unang ganggu roham, ai Ahu do marsuru nasida!

10:21 Jadi mijur ma si Petrus mandapothon halak i, ninna ma: Ahu do na niluluanmuna! Dia do alana, umbahen na ro hamu?

10:22 Dung i didok nasida ma: Ia si Kornelius, i ma sada letnan, halak na tigor roha na mangkabiari Debata, na uli baritana di saluhut halak Jahudi; dapot parenta do sian surusuruan na badia; suruonna, ninna, mangalap ho tu jabuna, tumangihon hata sian ho.

10:23 Jadi diarahon ma nasida tu bagas, ditamuei ma. Manogotna i borhat ma ibana rap dohot nasida; dohot ma deba sian angka dongan na sian Joppe mandongani ibana.

10:24 Marsogotna i muse sahat ma nasida tu Kaesarea. Alai nunga maimaima hian si Kornelius, jala nunga dipapungu angka donganna samarga dohot angka alealena na sumolhot.

10:25 Asa di na bongot i si Petrus, ditomu si Kornelius ma ibana, marsinggang ma huhut sumomba ibana.

10:26 Alai dipahehe si Petrus do ibana, ninna ma: Hehe ma ho; jolma do nang ahu!

10:27 Dung i mangkatai ma nasida laho bongot, jadi torop ma pungu disi didapot.

10:28 Dung i didok ma tu nasida: Diboto hamu do, subang bolon do i di halak Jahudi mandongani manang manopot halak na sian bangso na asing. Alai diajari Debata do ahu, na so jadi goaron jolma dia pe ramun manang so ias.

10:29 Ala ni i umbahen na so manjua ahu ro, di na taralap i ahu. Antong, na manungkun ma ahu nuaeng: Ala ni hata dia do umbahen na dialap hamu ahu?

10:30 Jadi didok si Kornelius ma: Opat ari ma nuaeng, boho songon on ari, di pungkul tolu, martangiang ahu di bagashon, jadi jongjong ma di jolongku sahalak parulos na marlinanglinang.

10:31 Na mandok: Ale Kornelius, ditangihon Debata do tangiangmi, laos diingot do angka asiasimi.

10:32 Antong, suru ma tu huta Joppe na manjou si Simon na margoar Petrus, na sorang di jabu ni si Simon, sipauli hulingkuling na di topilaut, ninna.

10:33 Jadi mamintor ma ahu marsuru mangalap ho; denggan do antong dibahen ho, ala ro ho. Nuaeng pe, nunga pungu hami saluhutna dison di jolo ni Debata, tumangihon saluhutna na nidokkon ni Tuhan i tu ho.

10:34 Dung i mangkuling ma si Petrus, ninna ma: Nunga tangkas dapot rohangku, na so siida bohi Debata!

10:35 Sian ganup bangso do tahe jangkononna angka na mangkabiari Ibana jala mangulahon hatigoran.

10:36 Ditongos Ibana do hatana tu angka anak Israel, laho mamaritahon dame marhite sian Jesus Kristus; Ibana do Tuhan ni saluhutna.

10:37 Diboto hamu do hata na masa di liat tano Judea na mamungka sian luat Galilea, dung salpu pandidion na binaritahon ni si Johannes i.

10:38 I ma taringot tu Jesus na sian Nasaret, na miniahan ni Debata marhitehite Tondi Parbadia dohot hagogoon; na mardalani do Ibana mambahen na denggan jala pahisarhon sude angka na pinatunduk ni sibolis, ai didongani Debata do Ibana.

10:39 Hami do mangkatindangkon saluhut pambahenanna i di tano Jahudi dohot di Jerusalem; dipusa nasida Ibana, digantungkon do tu hau.

10:40 Dipahehe Debata do Ibana di ari patoluhon, dilehon do Ibana tu hapataron,

10:41 ndang apala tu saluhut halak, tu angka sitindangi do na pinillit ni Debata sian nahinan; i ma hami, angka na mangan jala minum rap dohot Ibana, dung hehe Ibana sian na mate.

10:42 Jala didokkon do hami manjamitahon dohot mangkatindangkon tu natorop, paboa Ibana do i, na tinodo ni Debata hian gabe panguhum di angka na mangolu ro di angka na mate.

10:43 Saluhut panurirang i mangkatindangkon taringot tu Ibana: Jaloon ni ganup na porsea di Ibana hasesaan ni dosa marhite sian Goarna.

10:44 Jadi andorang dihatahon si Petrus hata ondeng, songgop ma Tondi Parbadia tu saluhut nasida na umbege hata i.

10:45 Jadi longang ma roha ni angka na porsea, halak Jahudi hian, dongan ni si Petrus i, ala diusehon silehonlehon ni Debata, i ma Tondi Parbadia i, nang tu halak sipelebegu.

10:46 Ai dibege do nasida mangkatahon di hata na asing dohot mamuji Debata.

10:47 Jadi didok si Petrus ma: Hum ma roha mangorai didion nasida on, angka naung manjalo Tondi Parbadia i songon hami?

10:48 Gabe didokkon ma didion nasida marhitehite Goar ni Tuhan Jesus Kristus. Dung i dielehelek ma ibana, asa olo ibana jolo mian di nasida.

Ulaon ni Apostel 11

11:1 Alai dibege angka apostel dohot angka dongan na di Judea i ma, naung dohot do hape halak sipelebegu manjangkon hata ni Debata.

11:2 Gabe dibadai angka na porsea sian Jahudi i ma si Petrus, dung nangkok ibana tu Jerusalem, angka ninna ma:

11:3 Bongot do ho hape tu angka halak na so tarsunat, jala rap mangan do ho dohot nasida!

11:4 Alai jojor sian mulana ma dipatorang si Petrus na masa i, ninna ma:

11:5 Uju na martangiang ahu di huta Joppe, huida ma di bagasan tondingku, mijur sada inganan na bidang na maropatsuhi, tartantan sian ginjang ro di jolongku.

11:6 Dung i di na hupanotnoti i, huida ma disi angka siopatpat na di tano, angka binatang dohot angka na manjirir ro di angka pidong na martongatonga langit.

11:7 Jadi hubege ma soara na mandok tu ahu: Hehe ma ho, Petrus; seseati ma, pangan ma!

11:8 Alai ningku ma: Tongka, Tuhan! Ai ndang dung hudai na ramun manang na so ias.

11:9 Alai mangalusi ma soara i paduahalihon sian ginjang: Unang ramun dok naung niiasan ni Debata!

11:10 Ro di tolu hali do masa songon i dung i ditait ma saluhutna i muse tu ginjang.

11:11 Dung i tongon di na satongkin i jongjong ma tolu halak di jolo ni jabu inganannami, angka na disuru sian Kaesarea mandapothon ahu.

11:12 Alai didok Tondi i ma tu ahu, na so jadi ganggu rohangku mandongani nasida. Alai angkuphu do dongan na onom on, jadi hubongoti hami ma jabu ni halak i.

11:13 Dibaritahon ma tu hami, naung niidana surusuruan i jongjong di bagasan jabuna, na mandok tu ibana: Suru ma tu huta Joppe, manjou si Simon na margoar Petrus!

11:14 Hatahonon ni i do tu ho hata na tau paluahon ho ro di sandok isi ni jabum!

11:15 Alai mamungka dope ahu marjamita disi, gabe songgop ma Tondi Parbadia tu nasida, songon na tu hita di mulana i.

11:16 Disi ma huingot hata ni Tuhan i na nidokna i: "Aek do dididihon si Johannes, alai Tondi Parbadia do didihononhon tu hamu!"

11:17 Antong, tung margogo ma ahu mangambat Debata, anggo dos do hape silua na binasabasahon ni Debata tu nasida, songon na tu hita, angka naung gabe porsea di Tuhan Jesus Kristus?

11:18 Dung dibege nasida hata i, hohom be ma, gabe dipuji ma Debata, angka ninna ma: Asa dohot do hape tu halak sipelebegu dilehon Debata hamubaon ni roha asa mangolu!

11:19 Alai anggo angka na marserak i hinorhon ni pangaleleon siala si Stepanus, torus ma didalani luat Penisia sahat ro di pulo Siprus dohot Antiokia; alai holan tu Jahudi sambing dope dibaritahon nasida hata i.

11:20 Alai adong do tahe deba sian nasida, halak Siprus dohot Kirene, na sahat ro tu Antiokia, gabe dibaritahon Tuhan Jesus disi nang tu halak Junani.

11:21 Jadi didongani tangan ni Tuhan i nasida: Jala na nia toropnasida gabe porsea, angka na mandompakkon Tuhan i.

11:22 Pola tarbege baritanasida tu huria na di Jerusalem i, gabe disuru nasida ma si Barnabas tu Antiokia.

11:23 Tolhas ma ibana tusi, jadi diida ma asi ni roha ni Debata, gabe las ma rohana; laos diapoi ma sasude, asa marsihohot rohanasida mian di Tuhan i.

11:24 Ai tung halak na denggan roha do ibana, gok Tondi Parbadia dohot haporseaon, gabe ganda ma torop halak tartogu tu Tuhan i.

11:25 Dung i borhat ma ibana laho tu huta Tarsus mangalului si Saulus; jadi dung jumpangsa, ditogihon ma tu Antiokia.

11:26 Gabe rap ma nasida mian di huria i sataon lelengna, torop ma halak diajari disi; laos di Antiokia parjolo targoar angka sisean i halak Kristen.

11:27 Alai tuat ma uju i angka panurirang sian Jerusalem tu huta Antiokia.

11:28 Jadi hehe ma sada sian nasida na margoar Agabus, disurirangkon ma marhitehite Tondi i masa ni haleon potir tu liat portibi on; i ma na songgop uju hinarajahon ni si Klaudius.

11:29 Dung i dituptup angka sisean i ma manongos tumpak, marguru tu na tarpatupasa be, tu angka dongan na maringanan di Judea.

11:30 Saut ma i dibahen, ditongos ma i tu angka sintua i marhitehite tangan ni si Barnabas dohot si Saulus.

Ulaon ni Apostel 12

12:1 Tar di tingki i ma dilaluhon raja Herodes tanganna tu deba na sahuria i paporsukporsukkon nasida.

12:2 Podang do dibahen mambunu si Jakobus, dongan saama ni si Johannes i.

12:3 Jadi dung diida, lomo roha ni Jahudi disi, didatdati ma, ditangkup ma dohot si Petrus, tongon di angka ari ni pesta Paska i.

12:4 Jadi dung ditangkup, didabu ma ibana tu hurungan, dipasahat ma ibana tu opat hali opat soldadu panjaga; ditahi rohana, naeng togihononna ibana tujolo ni natorop, dung salpu pesta Paska i.

12:5 Asa dijaga nasida do si Petrus di hurungan i; alai sai didatdati huria i do tumangiangkon ibana tu Debata.

12:6 Dung i di na naeng togihonon ni Herodes si Petrus, modom do ibana borngin i di holangholang ni dua soldadu, tarihot dohot rante dua; di jolo pintu ni hurungan i pe adong do na manjaga.

12:7 Dung i tompu ma ro surusuruan ni Tuhan i jadi marsinondang ma sada panondang di bilut i, dituktuk ma lambung ni si Petrus manungguli ibana, huhut didok: Hatop ma ho hehe! Jadi marpeutan ma angka rante i sian tanganna.

12:8 Dung i didok surusuruan i ma tu ibana: Hohosi ma dagingmi, pasang ma sipatumi! Jadi dibahen ma songon i. Dung i didok ma tu ibana: Uloshon ulosmi; ihuthon ma ahu!

12:9 Dung i diihuthon ma ibana laho tu balian, jadi ndang diboto, manang na tutu do songon i masa tu ibana marhite sian surusuruan i; dirimpu do, di bagasan tondina diida i.

12:10 Alai dung dibolus nasida panjaga na parjolo dohot na paduahon i, sahat ma nasida tu harbangan bosi, dalan tu huta. Jadi mungkap boti ma i di jolonasida, gabe ruar ma nasida tu dalan di huta i, dung i pintor sirang ma surusuruan i sian ibana.

12:11 Jadi dung tarjolma si Petrus, ninna ma: I pe asa huboto situtu, naung disuru Tuhan i do surusuruanna mangaroro ahu sian tangan ni si Herodes dohot sian nasa na niarop ni bangso Jahudi.

12:12 Jadi dung tangkas i di ibana, laho ma ibana tu bagas ni si Maria, ina ni si Johannes na margoar huhut Markus; torop do disi marpungu martangiang.

12:13 Alai dung dituktuhi ibana pintu parduru, ro ma naposo boruboru na margoar Rode mananginangi.

12:14 Ditanda ma soara ni si Petrus alai ndang manigor diungkap pintu i dibahen las ni rohana; tu bagasan do ibana marlojong paboahon, naung jongjong do hape si Petrus di jolo pintu i.

12:15 Gabe didok nasida ma tu ibana: Na rintik do ho; alai sai diondolhon do hatana i, jadi didok nasida nama: Surusuruanna do i.

12:16 Alai sai didatdati si Petrus do manuktuhi; jala di na mangungkap i nasida, diida ma ibana, gabe tarhalomong ma rohanasida.

12:17 Alai dihiraphon ma tanganna tu nasida, asa sip; dung i dipajojor ma tu nasida pambahen ni Tuhan i, manogihon ibana ruar sian hurungan i, laos didok ma: Baritahon hamu ma i tu si Jakobus dohot tu angka dongan. Dung i laho ma ibana tumopot inganan na asing.

12:18 Alai dung torang ari, gaor situtu ma roha ni angka soldadu i taringot tu na masa di si Petrus i.

12:19 Alai dung so jumpang si Herodes ibana, atik pe dilului, diuhumi ma angka panjaga i, didokkon ma togihononhon nasida tu hamatean; laos bungkas ma anggo ibana sian Judea tu Kaesarea, jadi disi nama ibana na maringan.

12:20 Dung i marmusumusu ma ibana dompak isi ni Tirus dohot Sidon; alai saroha ma nasida manopot ibana, diellemellem ma si Blastus, naposo haposan ni raja i. Mangido mardame nasida, ala sian tano ni raja i bohal ni luatnasida.

12:21 Dung i di ari na tiniti dipangke Herodes ma ulos harajaonna jadi hundul ma di habangsana manariashon hatana tu nasida.

12:22 Gabe dijouhon natorop i ma: Soara ni Debata do i, ndada soara ni jolma!

12:23 Alai pintor dipastap surusuruan ni Debata ma ibana, ala so dilehon hasangapon tu Debata; jadi dipangan gulok ma ibana, laos mate.

12:24 Alai lam rarat ma anggo hata ni Debata.

12:25 Jadi mulak ma si Barnabas dohot si Saulus sian Jerusalem i, dung dipasahat, nasida asiasi i! Diboan ma si Johannes na margoar si Markus.

Ulaon ni Apostel 13

13:1 Alai adong ma di huria Antiokia i angka panurirang dohot angka guru, i ma si Barnabas dohot si Simeon na margoar Niger dohot si Lucius na sian Kirene dohot si Menahem, na rap magodang dohot raja Herodes, dohot si Saulus.

13:2 Jadi di na marulaon nasida tu Tuhan i huhut marpuasa, ninna Tondi Parbadia ma: Papulik hamu ma di Ahu si Barnabas dohot si Saulus tu ulaon, na hupatongon tu nasida.

13:3 Jadi marpuasa ma huria i jala martangiang, diampehon ma tanganna tu nasida, laho paborhathon.

13:4 Tuat ma nasida na sinuru ni Tondi Parbadia i tu huta Seloikia; sian i ma marparau nasida tu pulo Siprus.

13:5 Jadi dung sahat nasida tu huta Salamis, dibaritahon ma hata ni Debata di angka parguruan ni Jahudi; alai si Johannes do suruannasida.

13:6 Ditorusi nasida ma liat pulo i sahat ro di huta Papos, jadi jumpang nasida ma sada halak Jahudi, parsibalik mata jala panurirang pargapgap, na margoar Bar Jesus.

13:7 Na mian do ibana di panggomgomi Sergius Paulus halak na pantas marroha: I do manjou si Barnabas dohot si Saulus, naeng begeonna hata ni Debata.

13:8 Alai dialo parsibalik mata i, si Elimas, do nasida (ai i do astuan ni goarna i), naeng ambatonna panggomgomi i, unang porsea.

13:9 Alai anggo si Saulus, na margoar huhut Paulus, na gok Tondi Parbadia, dijonggor ma ibana.

13:10 Mandok: E ho, na gok saluhut ansiansi dohot ragam ni hajahaton, anak ni sibolis, alo ni nasa hatigoran, ndang pasohotonmu papeolhon dalan ni Tuhan angka na tigor i?

13:11 Tongkin on ma ho hona tangan ni Tuhan; mapitung ma ho, ndang idaonmu jolo mata ni ari i! Jadi pintor rambon, dung i holom ma diida; dadapdadap nama ibana mangalului partogina.

13:12 Jadi porsea ma panggomgomi i, marnida na masa i, jala longang rohana di poda ni Tuhan i.

13:13 Dung i marparau ma anggo si Paulus rap dohot angka donganna sian huta Papos i, gabe sahat ma nasida tu huta Perge na di Pampilia; alai ditadingkon si Johannes do nasida, mulak tu Jerusalem.

13:14 Alai didatdati nasida do mardalan sian Perge ro di huta Antiokia na di Pisidia, jadi jumpa ari Sabbat i laho ma nasida hundul tubagasan parguruan.

13:15 Alai dung sidung dijaha disi patik i ro di surat ni angka panurirang i, disuru angka sintua ni parguruan i ma na mandok tu nasida: Ale angka dongan, molo adong di hamu hata sipaingot tu natorop on, dok hamu ma!

13:16 Dung i hehe ma si Paulus, dihiraphon ma tanganna, ninna ma: Hamu, angka halak Israel, dohot hamu angka na mangkabiari Debata, tangihon hamu ma!

13:17 Dipillit Debata ni hita bangso Israel do angka ompunta i, dipatimbul do bangso i, uju panginsua nasida di tano Misir, jala dipatoltol do tanganna manogihon nasida ruar sian i.

13:18 Leleng ni opatpulu taon dipaanjuanju do nasida, uju di parhorsihan.

13:19 Pitu bangso diparendep di tano Kanaan; tanona i dilehon teanonnasida.

13:20 Tar opatratus limapulu taon ma leleng ni i. Dung i dilehon ma tu nasida angka panguhum ro di panurirang Samuel.

13:21 Dung i dipangido nasida ma raja, jadi dilehon Debata ma tu nasida si Saulus, anak ni si Kis, marga Benjamin, leleng ni opatpulu taon.

13:22 Jadi dung dipaijur i, dipabangkit ma di nasida si Daud bahen rajanasida, na hinatindangkonna i di na nidokna: "Nunga jumpang Ahu si Daud, anak ni si Isai, halomoanki, sipasaut nasa na pinangido ni rohangku!"

13:23 Sian pinompar ni i ma diparo Debata di halak Israel Jesus, i ma Sipalua na pinarbagabagana i.

13:24 Patujolo ni harorona dibaritahon si Johannes tu sandok bangso Israel pandidion mandokkon paubahon roha.

13:25 Mareak ujung ni langkana didok si Johannes i: Ndada ahu na niarop ni rohamuna; di pudingku do Ibana ro. Na hurang tama do ahu mananggali sipatuna.

13:26 Hamu ale angka dongan, na sian pomparan ni si Abraham, dohot hamu na mangkabiari Debata! Tu hita do ditongos hata haluaon on.

13:27 Ai ndang na ditanda angka pangisi ni Jerusalem dohot angka sintuanasida Ibana; alai diuhumi nasida do Ibana, pasauthon pandok ni angka panurirang i, na jinaha ganup ari Sabbat.

13:28 Dipangido nasida do tu si Latus, bunuon Ibana, atik pe so adong jumpang nasida alana mambahen marutang hosa.

13:29 Asa dung dipatulus nasida saluhut na tarsurat hian taringot tu Ibana, dipaijur ma Ibana sian hau i, dipeakkon ma tu tanoman.

13:30 Alai disungguli Debata do Ibana sian na mate.

13:31 Na nia do lelengna dipataridahon dirina tu angka na rap nangkok dohot Ibana sian Galilea tu Jerusalem; angka i do nuaeng sitindangi on tu bangso i.

13:32 Jadi barita las ni roha on huboan hami tu jolomuna: Bagabaga na tu angka ompunta i, nunga dipasaut Debata i tu angka anakta, di na pinahehena i Jesus.

13:33 Songon na tarsurat huhut di ende Psalmen dua: "Anakku do Ho; sadari on do Ho hutubuhon!"

13:34 Dilumbahon hian, paheheonna Ibana sian na mate, jala na so tupa be Ibana mandapothon habusukon, ai didok do: "Lehononku ma tu hamu angka asiasi na sintong na di si Daud!"

13:35 Laos didok do di ende na asing: "Ndang na loasonmu idaon ni na badiami habusukon!"

13:36 Ai anggo si Daud, dung dipatulus lomo ni Debata saleleng di ngoluna, monding do, laos tartanom tu lambung ni angka amana, gabe diida do habusukon.

13:37 Alai anggo na pinangolu ni Debata, ndang adong diida I habusukon.

13:38 Asa boto hamu ma, ale angka dongan: Binaritahon do tu hamu hasesaan ni dosa marhitehite Ibana.

13:39 Pintoranna do ganup na porsea, dung so tarbahen pintor hamu sian saluhut dosa i, pintoran ni patik ni si Musa.

13:40 Antong, jaga ma hamu, unang manginona tu hamu na hinatahon ni angka panurirang i:

13:41 "Pamanat hamu ma, hamu angka parhu ni roha; marseto ma rohamuna, laos marjea, ai Ahu patupahon sada ulaon di arimuna. Ndang tagamon parhatutuonmuna i, nang adong na pajojorhon i tu hamu!"

13:42 Asa di na laho ruar i nasida, dipangido ma, naeng ma hatahononhon tu nasida angka hata i basa Sabbat i.

13:43 Alai dung muli sian parguruan i, torop ma sian angka Jahudi dohot sian angka parguru na daulat roha mangihuthon si Paulus dohot si Barnabas, gabe dijamitai jala diapoi ma nasida, asa mian di bagasan asi ni roha ni Debata.

13:44 Alai di ari Sabbat na ro i sude ne pangisi ni huta i marpungu, naeng begeonna hata ni Tuhan i.

13:45 Alai dung diida angka Jahudi torop ni jolma i, gok pangiburuon ma rohanasida, gabe dialo jala diinsahi ma jamita ni si Paulus i.

13:46 Dung i marhiras ni roha ma si Paulus dohot si Barnabas mandok: Tama nian tu hamu parjolo jamitahononhon hata ni Debata; alai ditulakkon hamu do i, jala ndang tau hamu parjambar di hangoluan sisalelenglelengna ditimbang hamu: Antong, sipelebegu i ma hudompakkon hami.

13:47 Ai songon on do ditonahon Tuhan i tu hami: "Na hupadiri do ho bahen panondang di angka sipelebegu, bahen haluaon ro di ujung ni tano on!"

13:48 Umbege i angka sipelebegu i, las ma rohanasida, dipuji ma hata ni Tuhan i, jadi gabe porsea ma nasa naung pinarade tu hangoluan sisalelenglelengna.

13:49 Jadi dipararat ma hata ni Tuhan i tu sandok luat i.

13:50 Alai digintali angka Jahudi ma angka parompuan na sangap, na daulat roha dohot angka pangituai ni huta i, jadi dipatubu ma pangaleleon dompak si Paulus dohot si Barnabas, laos dipabali ma nasida sian luat i.

13:51 Alai dipaspas apostel i do orbuk na lohot di patna dompak nasida, dung i ro ma nasida tu Ikonium.

13:52 Alai gok halalas ni roha dohot Tondi Parbadia ma roha ni angka sisean i.

Ulaon ni Apostel 14

14:1 Ia di Ikonium suang ditopot nasida parguruan ni Jahudi, jadi hinorhon ni jamitanasida gabe porsea ma mansai torop Jahudi dohot halak Junani.

14:2 Alai dijujui jala dipamohop angka Jahudi na so porsea i ma roha ni angka sipelebegu dompak angka sisean.

14:3 Alai na nia do laonna nasida mian disi; hiras do rohanasida marjamita huhut mangasahon Tuhan i. Angka tanda dohot halongangan dilehon Tuhan i patupaonnasida, laho mangondolhon hata asi ni rohana i.

14:4 Alai mardua ma roha ni pangisi ni huta i: Na deba mandongani halak Jahudi, na deba mandongani angka apostel.

14:5 Alai naeng hehe ma halak sipelebegu dohot Jahudi rap dohot angka induknasida manggosa dohot mandangguri nasida.

14:6 Dung tarbortik i, maporus ma nasida tu angka huta na di luat Likaonia, i ma huta Listra dohot Derbe ro di huta angka na humaliang i.

14:7 Jadi dibaritahon nasida ma barita na uli disi.

14:8 Jadi adong ma di huta Listra sada halak na hundulhundul, ndang margogo patna, na pangpang sian hatutubuna; ndang dung mardalan.

14:9 Gabe dibege ibana ma si Paulus marjamita. Jadi dibereng si Paulus ma ibana jala diida ma, na porsea do ibana, tarbahen malum sahitna.

14:10 Jadi dipagogo ma soarana mandok: Tingkos ma ojakkon patmi! Manigor hehe ma ibana huhut mardalani.

14:11 Alai dung diida natorop i na binahen ni si Paulus i, marsuraksurak ma nasida, angka ninna ma di hata Likaonia: Nunga marrupahon rupa ni jolma do angka debata, gabe tuat tu hita on!

14:12 Jadi digoar ma si Barnabas: Zeus, si Paulus: Hermes, ala ibana pangkatai.

14:13 Laos diboan malim ni debata Zeus, na dibalian ni huta i, ma angka horbo tunggal dohot ramerame tu bahal i, naeng mamele rap dohot natorop i.

14:14 Umbege i angka apostel, si Barnabas dohot si Paulus, diribakkon ma ulosnasida, laos maringkat ma mandapothon natorop i.

14:15 Joujou ma nasida mandok: O hamu, ale angka dongan, aha do na binahenmu? Jolma do nang hami na marparniahapan songon hamu; barita na uli do huboan hami tu hamu, asa mulak hamu sian angka debatamuna na soada i tu Debata na mangolu, ai Ibana do manompa langit dohot tano dohot laut ro di nasa isina.

14:16 Na dipasombu do di angka sundut na salpu i saluhut bangso tumopot dalanna be.

14:17 Alai songon i pe i, ndatung na so dihatindangkon dirina marhitehite ulaon dengganbasa, ai dilehon do tu hamu udan sian ginjang dohot partaonan hadumaon; angkup ni i dipasabam do rohamuna marhitehite sipanganon dohot las ni roha.

14:18 Nang songon i hatana, tung na maol do diambat nasida natorop i, unang saut nasida dipele.

14:19 Alai ro ma angka Jahudi sian Antiokia dohot na sian Ikonium tusi, dihatai ma natorop i, gabe didangguri ma si Paulus, disarat ma ibana tu balian ni huta i, pola dirimpu naung mate ibana.

14:20 Alai dung dihaliangi angka sisean i ibana, hehe ma ibana mulak tu huta i. Dung i torang ni arina i borhat ma ibana rap dohot si Barnabas tu huta Derbe.

14:21 Dibaritahon nasida ma barita na uli i di huta i jala na nia diajari nasida gabe sisean. Jadi mulak ma nasida sian Listra ondeng dohot Ikonium tu Antiokia.

14:22 Dipatogu nasida ma roha ni angka sisean i, diapoi ma nasida, asa marsihohot marhaporseaon, ninna ma: Ingkon bolusonta do lan haporsuhon, laho bongot tu harajaon ni Debata.

14:23 Alai dipillit ma angka sintua di nasida di ganup huria; mardongan tangiang dohot na marpuasa dipasahat ma nasida tu Tuhan naung hinaporseaannasida.

14:24 Dung i dibolus nasida ma luat Pisidia, gabe sahat ma tu luat Pampilia.

14:25 Dihatahon ma hata i di huta Perge, dung i tuat ma nasida tu huta Atalia.

14:26 Sian i ma marparau nasida tu Antiokia, ai disi do dipasahat nasida najolo tu asi ni roha ni Debata, laho mangula ulaon naung pinasidungnasida i.

14:27 Jadi dung sahat nasida, dipapungu ma huria i, dibaritahon ma nasa na pinatupa ni Debata marhitehite nasida, pola diungkap pintu ni haporseaon i nang di halak sipelebegu.

14:28 Dung i na nia do lelengna nasida disi mandongani angka sisean i.

Ulaon ni Apostel 15

15:1 Jadi adong ma na tuat sian luat Judea; songon on do dipodahon tu angka dongan i: Molo so tarsunat hamu mangihuthon agama ni si Musa, ndang tarbahen hamu gabe malua.

15:2 Jadi guntur ma huria i, pola gogo do nasida dialo si Paulus dohot si Barnabas. Dung i disuru ma si Paulus dohot si Barnabas rap dohot dongan deba nari sian nasida nangkok tu Jerusalem manopot angka apostel dohot angka pangituai, patorangkon salisi i.

15:3 Dibolus nasida na pinaborhat ni huria i ma tano Penisia dohot Samaria, dipajojor ma disi hamumuba ni roha ni angka sipelebegu, gabe las situtu ma roha ni sude angka dongan i dibahen.

15:4 Jadi dung sahat nasida tu Jerusalem, dijangkon na sahuria i dohot angka apostel ro di angka pangituai ma nasida, jadi dibaritahon nasida na ro i ma godang ni na niula ni Debata marhite sian nasida.

15:5 Dung i hehe ma na deba sian rongkanan ni halak Parise, angka naung gabe porsea, mandok: Ingkon sunaton do nasida jala apoan, mangaradoti patik ni si Musa.

15:6 Dung i marpungu ma angka apostel i ro di angka pangituai, sumulu hata i.

15:7 Alai dung leleng marsual, hehe ma si Petrus, ninna ma mandok nasida: Hamu angka hahaanggi! Diboto hamu do, naung tibu dipillit Debata ahu di tongatongamuna, laho patubegehon tu halak sipelebegu barita na uli i, asa porsea nasida.

15:8 Debata sitanda roha i sandiri do sitindangi di nasida, marhite sian na nilehonna i Tondi Parbadia i tu nasida songon na tu hita.

15:9 Ndang dia imbarna hita dohot nasida dibahen Debata, dung dipaias rohanasida hinorhon ni haporseaon i.

15:10 Antong, boasa ma unjunanmuna Debata nuaeng, laho mangampehon auga tu rungkung ni angka sisean, na so tarusung angka amanta i nang hita pe.

15:11 Marhite sian asi ni roha ni Tuhan Jesus do tahe, umbahen na malua hita dihaporseai rohanta; nasida pe songon i do.

15:12 Dung i hohom ma sude natorop i tumangihon hata ni si Barnabas dohot si Paulus, na pajojorhon godang ni tanda dohot halongangan angka na niula ni Debata di tongatonga ni angka sipelebegu marhite sian nasida.

15:13 Asa dung marujung hatanasida, mangalusi ma si Jakobus, ninna ma: Hamu angka hahaanggi, tangihon hamu ma hatangkon!

15:14 Nunga dipajojor si Simon taringot tu panatap ni Debata apala parjolo sahali, manjangkon tu Goarna bangsona sian angka sipelebegu.

15:15 Jala mardomu do i tu hata ni angka panurirang i, songon na tarsurat:

15:16 "Dung salpu i, mulak ma Ahu, laho paulihon muse undungundung ni si Daud naung marumpak i; ulahanku ma paulihon naung maloha i, laho pajongjongkon.

15:17 Asa dilului angka halak na tading i ma Tuhan i, ro di saluhut sipelebegu, angka na manjujung Goarhu,"

15:18 ninna Tuhan i, na pabotohon angka i hian sian na robi.

15:19 Dibahen i hutimbang, ndang sisusaan be nasida, angka na ro sian sipelebegu mandompakkon Debata.

15:20 Alai nirodi ma nasida, sumubangkon pardebataon na leban, parmainanon, na mate so sineat ro di mudar i, angka na mangaramuni.

15:21 Ai sian na robi adong do di ganup huta angka na manjamitahon si Musa; ai dijaha do suratna ganup ari Sabbat di angka parguruan.

15:22 Denggan ma didok roha ni angka apostel dohot angka pangituai ro di sandok huria i: Pinillit ma sian nasida dongan sisuruon tu Antiokia mandongani si Paulus dohot si Barnabas, i ma si Judas na margoar si Barnabas dohot si Silas, angka sintua di tongatonga ni donganna.

15:23 Ia surat siboanonnasida on do: Hami angka donganmuna, angka apostel dohot angka sintua, manongos tabi di angka dongan na sian sipelebegu na di huta Antiokia, di luat Siria dohot Kilikia.

15:24 Hubege hami, naung ro deba sian hami an, na manggaori hamu marhitehite hatanasida mangaliluhon rohamuna; tung na so hudokkon hami do nasida.

15:25 Sada do rohanami, mamillit sisuruon on tu hamuna rap dohot si Barnabas dohot si Paulus, angka haholongan ni rohanami.

15:26 Naung diseahon nasida do hosanasida ala ni Goar ni Tuhanta Jesus Kristus.

15:27 Asa husuru hami do si Judas dohot si Silas, asa dohot nasida paboahon hata i tu hamu.

15:28 Ai denggan do di roha ni Tondi Parbadia nang di rohanami: Unang be niampehon tu hamu na dokdok, dungkon ni na ringkot on:

15:29 Parsubangkon hamu ma pelean na tu begu dohot mudar dohot na mate so sineat, angkup ni i parmainanon i; denggan ma dipasiding hamu angka i. Hipas ma hamu!

15:30 Jadi dung dipaborhat, tuat ma nasida tu Antiokia; jadi dipapungu ma natorop i, laho pasahathon surat i.

15:31 Alai dung dijaha nasida surat i, las ma rohanasida jala tarapul.

15:32 Alai si Judas dohot si Silas, panurirang do nasida huhut, jala godang do jamitanasida mangapoi angka dongan i dohot patoguhon rohanasida.

15:33 Alai dung na nia lelengna nasida disi, dipaborhat angka dongan i ma nasida di bagasan dame, mulak tu na marsuru nasida.

15:34 Anggo si Silas, lomo do rohana tading disi.

15:35 Alai mian di Antiokia jolo si Paulus dohot si Barnabas dohot torop angka na asing, mangajarhon dohot mamaritahon hata ni Tuhan i.

15:36 Alai di laonlaon ni ari ninna si Paulus ma mandok si Barnabas: Beta ma hita mangulahi marnida angka donganta i tu ganup huta, naung tajamitai najolo, manang beha pangalahonasida!

15:37 Alai ditahi roha ni si Barnabas do, naeng ma togihononhon dohot si Johannes na margoar si Markus.

15:38 Alai anggo di roha ni si Paulus, ndang tama togihononhon ibana, ala naung ditadingkon nasida di Pampilia jala ndang didongani nasida tu ulaon i.

15:39 Jadi marbada ma nasida, pola sirang; gabe ditogihon si Barnabas ma si Markus marparau tu pulo Siprus.

15:40 Alai dipillit si Paulus ma si Silas bahen donganna; jadi borhat ma ibana, dung dipasahat angka dongan i ibana tu asi ni roha ni Tuhan i.

15:41 Jadi diliati ma tano Siria dohot Kilikia, patoguhon angka huria i.

Ulaon ni Apostel 16

16:1 Tolhas ma ibana sahat ro di huta Derbe dohot Listra; jadi adong ma disi sada sisean na margoar si Timoteus, anak ni boru Jahudi na porsea, alai halak Junani do anggo amana.

16:2 Denggan do baritana, dihatindangkon angka dongan na di Listra dohot Ikonium.

16:3 Jadi dipangido roha ni si Paulus ma ibana donganna borhat, jala ditogihon ma; disunat ma ibana ala ni halak Jahudi na di luat i, ai diboto be, halak Junani do amana.

16:4 Alai di na mangaliati angka huta i nasida, dipasahat ma patik na pinaputus ni angka apostel dohot sintua na di Jerusalem, siradotannasida.

16:5 Gabe lam togu ma haporseaon ni angka huria i, jala lam ganda toropnasida ganup ari.

16:6 Alai dibolus nasida do luat Prigia dohot Galatia, ala diambat Tondi Parbadia nasida mangkatahon hata i di Asia.

16:7 Jadi sahat ma nasida tungkan luat Misia, dung i diuji nasida ma mardalan tu Bitinia; alai ndang diloas Tondi ni Jesus nasida.

16:8 Asa diarbis nasida ma luat Misia i, jadi tuat ma tu huta Troas.

16:9 Dung i diida si Paulus ma borngin i di bagasan tondina: Jongjong sada halak Makedonia mangelehelek ibana, ia hatana: Taripar ma ho tu Makedonia, mangurupi hami!

16:10 Alai dung diida na niidana i, pintor disangkap rohanami ma borhat tu luat Makedonia; ai ditimbang rohanami do, naung didokkon Debata hami tusi, mamaritahon barita na uli tu nasida.

16:11 Dung i marparau ma hami sian Troas, mamintor tu Samotrake, dung i sadarina i tu Neapolis.

16:12 Sian i tu Pilippi, i ma huta sabungan ni Makedonia jala ojahan ni panggomgomi Rom. Disi ma hami manang piga ari.

16:13 Jadi di ari Sabbat ruar ma hami tu balian ni huta i, tu topi ni batang aek, tu partangiangan na niarop ni rohanami; disi ma hami hundulhundul mangkatai dohot angka parompuan naung pungu disi.

16:14 Jadi adong ma sada parompuan na mananginangi, na margoar si Lidia, sian huta Tiatira, partigatiga abit hasumba, na daulat roha tu Debata; jadi dibungka i Tuhan i ma rohana, gabe diparateatehon ma angka na hinatahon ni si Paulus i.

16:15 Asa dung tardidi ibana dohot donganna sajabu, diapoi ma hami, ninna ma: Molo na tutu ahu porsea di Tuhan i di rohamuna, sorang ma hamu tu jabungku; pola disosoi hami.

16:16 Jadi laho tu partangiangan i, pajumpang ma hami dohot sada naposo boruboru pangarunding; godang do laba ni induk somangna sian pangarundingonna i.

16:17 Dipaihutihut ibana ma si Paulus dohot hami, huhut manjoujou: Angka naposo ni Debata na tumimbul i do halak on, na paboahon dalan tu haluaon di hamuna!

16:18 Jadi songon i ma dibahen ibana ariari. Alai sogo do roha ni si Paulus disi, jadi humusor ma ibana, mandok tu tondi i: Marhitehite Goar ni Jesus Kristus do hudokkon ho ruar sian ibana. Jadi ruar ma ibana di na satongkin i.

16:19 Alai dung diida induk somangna i, na so adong be pangomoan sihirimon sian parompuan i, ditangkup nasida ma si Paulus dohot si Silas, disarat ma tu onan, tujolo ni angka pangarajai.

16:20 Jadi ditogihon ma nasida tujolo ni angka panguhum i, ninna ma: Na manggunturi hutanta on do angka halak on; Jahudi do nasida!

16:21 Dibaritahon do adat na so jadi jaloon manang ihuthononnami, ai halak Rom do hami.

16:22 Jadi hehe ma natorop i dompak nasida, dung i didokkon angka panguhum i ma sintahon ulosnasida, asa dilinsingi.

16:23 Jadi dung leleng dilinsingi, didabu ma nasida tu hurungan, didokkon ma sijaga hurungan i mangaramoti nasida situtu.

16:24 Mangihuthon parenta na jinalona i, didabu ma nasida tu hurungan parbagasan, momos ma patnasida dibeangkon.

16:25 Alai mareak tonga borngin i martangiang ma si Paulus dohot si Silas mamuji Debata, dipatangitangi angka na tarhurung i.

16:26 Alai tompu ma masa lalo bolon, pola lalolalo ojahan ni hurungan i; pintor mungkap do saluhut pintu, tanggal ma nang rantenasida saluhutna.

16:27 Gabe tarsunggul ma sijaga hurungan i; jala dung diida, talak do hape angka pintu ni hurungan i, disintak ma podangna, naeng maningkot; ai dirimpu, naung maporus angka na tarhurung i.

16:28 Alai dipagogo Paulus ma soarana, ninna ma: Unang bahen jea tu ho, ai dison do hami saluhutna!

16:29 Jadi dipangido ma palito, dung i marlojong ma ibana tubagasan, manungkap tujolo ni si Paulus dohot si Silas, huhut angka dotdot.

16:30 Ditogihon ma nasida haruar, ninna ma: Hamu angka tuan, aha ma bahenonku, asa malua ahu?

16:31 Jadi didok nasida ma: Haporseai ma Tuhan Jesus, asa malua ho dohot isi ni bagasmi!

16:32 Laos dipaboa nasida ma hata ni Tuhan i tu ibana dohot tu saluhut donganna sabagas.

16:33 Jadi manigor dialap ma nasida borngin i, diburii ma bogas ni linsinglinsing i, dung i pintor tardidi ma ibana ro di sude nasida na saripe.

16:34 Ditogihon ma nasida tu bagasna, dihobas ma sipanganon; dung i las ma rohana dohot sude isi ni bagasna, ala naung porsea ibana di Debata.

16:35 Jadi dung torang ari, disuru angka panguhum i ma angka opas mandokkon: Palua ma angka halak i!

16:36 Jadi dibaritahon sijaga hurungan i ma hata i tu si Paulus: Nunga disuru angka panguhum i, asa malua hamu. Antong, ruar ma hamu; mardame ma hamu laho!

16:37 Alai didok si Paulus ma tu nasida: Halak Rom do hami, gabe di hapataran do dilinsingi nasida hami, so jolo dipamanat; didabu do hami tu hurungan. Tung marsibuni ma nasida nuaeng paluahon hami? Ndang songon i; ingkon nasida do ro manogihon hami ruar sian on!

16:38 Dung i dipaboa angka opas i ma hata i tu angka panguhum; jadi mabiar ma nasida, dung dibege, halak Rom do hape nasida.

16:39 Jadi ro ma nasida, diapoapoi ma apostel i; jadi dung ditogihon tu balian, dielehelek ma, asa ditadingkon huta i.

16:40 Alai dung ruar nasida sian hurungan i, laho ma nasida manopot si Lidia. Jadi dung diida angka dongan i, jala dung diapuli, borhat ma nasida.

Ulaon ni Apostel 17

17:1 Alai dung dibolus nasida huta Ampipolis dohot Apolonia, sahat ma nasida tu huta Tessalonik, jala adong ma disi sada parguruan ni Jahudi.

17:2 Mangihuthon somalna ditopot si Paulus ma nasida tusi; tolu ari Sabbat padodot ma dipajojor tu nasida hata ni Surat i.

17:3 Dibuhai ma i laho patorangkon, ingkon marsitaonon Kristus i jala hehe muse sian na mate; jala Jesus i naung hubaritahon tu hamu, i do Kristus i, ninna.

17:4 Deba sian nasida mangoloi, gabe domu tu si Paulus dohot si Silas, songon i torop situtu halak Junani angka na daulat tu Debata, nang parompuan na sangap pe na nia do.

17:5 Alai mangiburui ma angka Jahudi, diarahon ma deba na jahat roha sian halak gambalgambal, digintali jala digunturi ma na sahuta i, jadi ditahopi ma bagas ni si Jason, dipangido ma, naeng boanon nasida tujolo ni natorop.

17:6 Alai dung so jumpangsa nasida, disarat ma si Jason dohot angka dongan i deba tujolo ni na manggomgom huta i, huhut manjoujou: Nunga ro nang tu hita on angka sigunturi liat portibi on!

17:7 Si Jason do manjangkon nasida. Sude nasida mangalo patik ni Kesar i; ai didok do, adong raja na asing, i ma Jesus i.

17:8 Gabe digaori nasida ma roha ni natorop i dohot roha ni na manggomgom huta i, angka na umbegesa.

17:9 Dung pe dijalo nasida tahan sian si Jason dohot angka dongan i, asa dipalua.

17:10 Alai mamintor dipaborhat angka dongan i ma si Paulus dohot si Silas borngin i tu Berea: Jadi dung sahat ro disi, laho ma nasida tu parguruan ni Jahudi.

17:11 Umburju hian do nasida asa pangisi ni huta Tessalonik, ai girgir situtu do rohanasida manjangkon hata i, jala ganup ari ditangkasi Surat i, manang na domu tusi.

17:12 Asa tung torop sian nasida gabe porsea, na nia do nang halak Junani, angka parompuan na sangap nang baoa pe.

17:13 Alai dung diboto angka Jahudi na di Tessalonik i, naung dibaritahon si Paulus hata ni Debata di Berea, ro ma nasida tusi, manggintali dohot manggunturi natorop i.

17:14 Alai pintor dipaborhat angka dongan i ma si Paulus laho dompak laut: Tading ma anggo si Silas dohot si Timoteus disi.

17:15 Alai dipataru nasida ma si Paulus sahat ro di huta Aten, jadi mulak ma nasida, dung dijalo tonana tu si Silas dohot si Timoteus, mandokkon nasida humatop ro tusi.

17:16 Andorang dipaimaima si Paulus nasida di huta Aten, targitik do rohana di bagasan marnida godang ni ganaganaan na di huta i.

17:17 Jadi sai dipanghulingi ma di parguruan angka Jahudi ro di angka na mangkabiari Debata, songon i di onan ariari angka na ro tusi.

17:18 Alai marsual ma deba sian parpoda Epikurus nang Stoa dohot ibana, jadi adong ma na mandok: Aha ma naeng dohonon ni sijubajabi on? Alai na deba mandok: Rupa dihatahon do angka debata na leban; ai dibaritahon do Jesus dohot haheheon sian na mate.

17:19 Jadi dialap nasida ma ibana, ditogihon ma tu Areopagus, angka ninna ma: Ai jadi do botoonnami, manang poda na imbaru dia do na hinatahonmi?

17:20 Ai songon na muba do hata na binoanmi tu hami, gabe naeng ma botoonnami pangalaho ni i.

17:21 Alai saluhut pangisi ni huta Aten ro di angka na leban pe, na mebat tusi, giot mangkatahon dohot mamaritahon barita na imbaru, apala i do na rumingkot di rohanasida.

17:22 Asa jongjong ma si Paulus di parsitongaan ni Areopagus i, ninna ma: Hamu angka halak Aten, sandok huida, mabiar situtu hamu mida angka na pinardebatamuna i.

17:23 Ai di na mardalani ahu, mamerengi angka sisombaonmuna, gabe jumpang ahu ma langgatan sada na sinuratan: Tu Debata na so tinanda! Antong, na sinombamuna na so tinandamuna, i do na hubaritahon tu hamu.

17:24 Ia Debata na tumompa hasiangan on ro di saluhut isina, i ma Tuhan ni langit dohot tano, ndang maringanan Ibana di angka joro na pinauli ni tangan.

17:25 Ndang hurangan Ibana, umbahen pola sihobasan ni tangan ni jolma di Ibana, ai tung Ibana do mangalehon di sudena hangoluan dohot hosa ro di saluhutna i.

17:26 Sian sada jolma do dipatupa Ibana saluhut bangso ni manisia, asa diingani liat sisik ni tano on, dibuhul hian do tingki ni angka bangso i ro di parbalohan ni siinganannasida,

17:27 asa luluannasida Debata, anggiat tung hadadapan nasida Ibana jala jumpang, ai ndang na dao Ibana sian ganup hita on.

17:28 Ai di bagasan Ibana do hita mangolu, manggulmit jala humosa, songon na nidok ni deba parendemuna: "Sabangso do hita dohot Ibana!"

17:29 Antong, anggo sabangso hita dohot Debata, unang ma dirimpu rohanta, suman tu sere Debata, manang tu perak, manang tu batu na pinandean jala piningkiran ni roha ni jolma.

17:30 Naung dibolushon pamereng ni Debata do angka taon haotoon; alai anggo nuaeng dibaritahon do tu hajolmaon: Ingkon sandok sude paubahon rohana.

17:31 Ai nunga di tingki Ibana sada ari paruhuman tu portibi on di bagasan hatigoran, marhite sian sada halak na pinillitna i; ai diungkap do dalan tu haporseaon di saluhut jolma, dung dipahehe Ibana sian na mate.

17:32 Alai umbege hatana na taringot tu haheheon sian na mate, manurahi ma na deba; alai na deba mandok: Naeng begeonnami dope hatam sahali nari taringot tusi.

17:33 Dung songon i, laho ma si Paulus sian tongatonganasida.

17:34 Alai adong do deba na mangihuthon ibana, gabe porsea, songon si Dionisius na sian Areopagus i, nang parompuan sada na margoar Damaris dohot deba nari donganna.

Ulaon ni Apostel 18

18:1 Dung i borhat ma si Paulus sian huta Aten, laho tu huta Korint.

18:2 Jadi jumpangsa ma disi sada halak Jahudi na margoar Akuila, na tubu di luat Pontus, dohot donganna saripe si Priskilla, angka nambura ro sian Italia, ala diparentahon raja Klaudius, ingkon saluhut halak Jahudi di bungkas sian huta Rom.

18:3 Nasida ma ditopot, laos mian disi jala rap mulaulaon do, ala sahapandean nasida, i ma partonunon.

18:4 Alai marjamita do ibana ganup ari Sabbat di parguruan; ditupuk do roha ni halak Jahudi nang Junani.

18:5 Asa dung ro si Silas dohot si Timoteus sian Makedonia, digogo si Paulus do marjamita, laho mangkatindangkon tu angka Jahudi, Jesus i do Kristus.

18:6 Alai dibahen na mangalo nasida jala manginsahi, dipaspas si Paulus ma ulosna, didok ma tu nasida: Marsapata tu hamu ma mudarmuna, lias do anggo ahu; olat ni on ma ahu laho tu halak sipelebegu!

18:7 Laos meret ibana sian i tu bagas ni sada halak na margoar Titius Justus na mangkabiari Debata; hombarhon bagas parguruan i do jabuna.

18:8 Alai na gabe porsea di Tuhan i do si Krispus, sintua ni parguruan i, ro di saluhutna isi ni jabuna; jala torop sian halak Korint, dung dibege i, gabe porsea jala tardidi.

18:9 Alai borngin i diida si Paulus di bagasan tondina ma Tuhan i na mandok tu Ibana: Unang ma ho mabiar; hatahon ma, unang ma ho mauhom!

18:10 Ai hudongani pe ho, ndang tarhahua manang ise ho, laho mangago; ai torop do halak di Ahu di huta on!

18:11 Asa mian ma ibana disi sataon onom bulan lelengna, mangajarhon hata ni Debata tu nasida.

18:12 Alai uju si Gallio panggomgomi di Akaya rap hehe ma halak Jahudi dompak si Paulus, ditogihon ma ibana tu paruhuman.

18:13 Angka ninna ma: Dihatahatai on do angka jolma i mangoloi Debata maralohon patik i.

18:14 Jadi di na naeng mangkuling si Paulus, ninna si Gallio ma mandok angka Jahudi: O hamu halak Jahudi! Aut ala ni pambahenan hageduhon manang hajahaton, patut antong antoanku hamu.

18:15 Alai anggo parsalisian siala podapoda dohot goargoar dohot patikmuna, rohamuna ma disi; ai ndang olo ahu manguhumi sisongon i.

18:16 Jadi dipalaho ma nasida sian paruhuman i.

18:17 Gabe ditangkup nasida saluhutna ma si Sostenes, sintua ni parguruan, dibalbali ma ibana di jolo ni paruhuman i; ndang diantoi si Gallio.

18:18 Jadi na nia dope lelengna si Paulus disi, asa martinading hata tu angka dongan i. Dung i marparau ma ibana tu Siria rap dohot si Priskilla dohot si Akuila. Di huta Kenkrea digusting obukna, ai adong do bagabagana.

18:19 Dung i rap sahat ma tu huta Epesus jadi ditadingkon ma nasida disi; laho do anggo ibana tu parguruan mangkatai dohot halak Jahudi.

18:20 Alai ndang dioloi pangidoannasida, naeng mian ibana lumeleng disi.

18:21 Martinading hata nama ibana, ninna ma: Huulaki pe manopot hamu, molo diloas Debata. Dung i marparau ma ibana, borhat sian Epesus.

18:22 Sahat ma ibana tu huta Kaesarea, dung i nangkok ma, ditabi huria i. Dung i tuat ma ibana tu huta Antiokia.

18:23 Asa dung na nia lelengna ibana disi, borhat ma ibana; jojor ma dibolus luat Galatia dohot Prigia, patoguhon roha ni saluhut sisean i.

18:24 Alai ro ma tu huta Epesus sada halak Jahudi na margoar Apollos, na tubu di Aleksanderia; halak na pistar do ibana, na torang umboto Surat i.

18:25 Nunga diajarhon tu ibana dalan ni Tuhan i jala na hiras do rohana, mangkatahon, torang do pamodaionna taringot tu Jesus; alai holan pandidion ni si Johannes do diboto.

18:26 Dipungka ibana ma marjamita di parguruan i sian roha na hiras; dibege si Akuila dohot si Priskilla jamitana, gabe ditogihon ma, dipajojor ma dalan ni Debata tumangkas tu ibana.

18:27 Alai di na naeng laho ibana tu Akaya, manolopi do angka dongan i, disurathon ma tu angka sisean i, asa dijangkon ibana. Jadi dung sahat ibana ro disi, godang ma panumpakna di angka na porsea i, dibahen asi ni roha ni Debata.

18:28 Ai mansai torang do jamitana; ditaluhon do angka Jahudi di na patar, ai dipatorang sian angka surat i, Jesus i do Kristus.

Ulaon ni Apostel 19

19:1 Alai uju di huta Korint si Apollos, didalani si Paulus ma angka luat na tungkan dolok sahat ro di huta Epesus, jadi jumpangsa ma disi deba sisean.

19:2 Dung i ninna ma mandok nasida: Naung dijalo hamu do Tondi Parbadia, di na gabe porsea hamu? Alai ninna nasida ma mandok ibana: So hea hubege hami, adong Tondi Parbadia!

19:3 Dung i ninna ma: Ai pandidion dia do dijalo hamu? Jadi didok nasida ma: Pandidion ni si Johannes do.

19:4 Dung i didok si Paulus ma: Ia pandidion ni si Johannes, na mandokkon paubahon roha do; ai diapoi do natorop i mangkaporseai na naeng ro sian pudina, i ma Jesus.

19:5 Umbege i nasida, dipadidihon be ma dirina tubagasan Goar ni Tuhan Jesus.

19:6 Jadi di na mangampehon tanganna si Paulus tu nasida, songgop ma Tondi Parbadia tu nasida, jadi mangkatahon di hata na asing ma nasida dohot manurirangi.

19:7 Alai intap sampuludua halak do nasida pungu.

19:8 Dung i laho ma ibana tubagasan parguruan, hiras ma rohana marjamita disi leleng ni tolu bulan; dipatorang jala dipasingothon pangalaho ni harajaon ni Debata.

19:9 Alai dipajogal na deba do rohana jala ndang mangoloi huhut dope manginsahi agama i di jolo ni natorop i, jala ditadingkon ibana ma nasida; dipapulik ma angka sisean i, jadi di sikola ni si Tiranus ma ibana marjamita ganup ari.

19:10 Leleng ni dua taon ma sai songon i gabe sange ma dibege saluhut pangisi ni luat Asia hata ni Tuhan i, nang Jahudi nang Junani pe.

19:11 Jala angka hagogoon na sumurung do diula Debata marhite sian tangan ni si Paulus.

19:12 Pola do dipamboan halak angka sekka dohot sampesampe na sian dagingna tu angka na hansitan i, gabe munsat do angka sahit sian nasida, ruar do nang angka tondi na hodar.

19:13 Jadi adong ma deba Jahudi na maotaot, angka sipabali begu, na manguji mangkatahon Goar ni Tuhan Jesus tu angka partondi na hodar i, angka ninna ma: Mangasahon Jesus, na binaritahon ni si Paulus i, hupabali ma hamu!

19:14 Angka anak ni si Sikewa, sada malim ni Jahudi, pitu halak do na mambahensa.

19:15 Alai ninna tondi na hodar i ma mangalusi nasida: Na hutanda do anggo Jesus i, si Paulus pe huboto do; alai anggo hamu, ise do hamu?

19:16 Laos ditahopi jolma partondi na hodar i ma nasida, dipatunduk ma nasida duansa, digosagosa, pola marsaemara jala mabugang nasida maporus sian jabu i.

19:17 Jadi diboto saluhut halak Jahudi ma i ro di halak Junani na maringanan di huta Epesus, gabe songgop ma biar tu rohanasida saluhut, jadi tongam ma Goar ni Tuhan Jesus.

19:18 Jadi torop sian angka naung gabe porsea ro manopoti jala paboahon bahenbahenannasida.

19:19 Jala lan do sian angka mangulahon hadatuon najolo palunggukkon angka pustaha i, disoksohi ma i di jolo ni saluhutna; dung i diasam ma argana, jadi dapot ma limapulu ribu rupia.

19:20 Songon i ma lam rarat jala lam hot hata i hombar tu hagogoon ni Tuhan i.

19:21 Salpu i, ditahi roha ni si Paulus ma, naeng mardalan tu huta Jerusalem, mamolus sian luat Makedonia dohot Akaya; ai ninna ma: Ia dung sian i ahu, ingkon dohot ma huta Rom idaonku.

19:22 Jadi disuru ma dua halak parhobasna, i ma si Timoteus dohot si Erastus, tu luat Makedonia; alai anggo ibana mangulon dope jolo di Asia.

19:23 Alai tubu ma uju i guntur bolon siala agama i.

19:24 Ai adong ma sahalak tungkang perak na margoar Demetrius, sipauli angka bagas joro perak ni debata Artemis; na nia do pangomoan dipatongon tu angka pande i.

19:25 Dipapungu ibana ma angka pande i ro di angka pangulanasida, didok ma: Diboto hamu do, ale, sian ulaon on do sinadonganta.

19:26 Diida jala dibege hamu do, ndada holan di Epesus on, tung hira di sandok luat Asia dihatahatai jala dipabalik si Paulus on do torop halak, didok do: Ndang na tutu Debata, ia angka na pinauli ni tangan.

19:27 Jala ndada holan pandaramanta on tarmara laho mago; dohot do tahe debata Artemis na balga i, na sinomba ni liat Asia i dohot isi ni portibi on, gabe lea jorona jala ambolong hamuliaonna.

19:28 Alai umbege hata i, gok rimas ma rohanasida, jala gogo ma dijoujouhon: Na balga do Artemis ni halak Epesus!

19:29 Jadi guntur situtu ma nasida na sahuta i: Ria ma nasida manahopi bagas painonduran, laos disarat ma tusi si Gayus dohot si Aristarkus, halak Makedonia, dongan ni si Paulus i.

19:30 Jadi naeng ma laho si Paulus tu tongatonga ni halak i; alai ndang diloas angka sisean i.

19:31 Pola dohot do deba sian angka pangituai sian luat Asia, alealena i, marsuru mangelehelek ibana, unang laho tu painonduran i.

19:32 Alai asingasing be do dipanjoujouhon nasida; ai tung na gaor do na pungu i, jala godangan do na so umboto, manang ala ni aha umbahen na marpungu.

19:33 Alai sian tongatonga ni natorop i dipajolo angka Jahudi ma si Aleksander, dung jolo diajari. Jadi dihiraphon ma tanganna, laho manariashon hatana tu natorop i.

19:34 Alai dung diboto nasida, halak Jahudi ibana, sada nama soara ni saluhutna, hira dua jom do lelengna dipanjoujouhon: Balga do Artemis ni halak Epesus!

19:35 Alai dipasonang juaratulis i ma natorop i, ninna ma: Hamu halak Epesus! Halak dia ma na so umboto, huta Epesus do parhalado di Artemis na balga i, nang di gombaranna na madabu sian ginjang!

19:36 Ndang na targaga i antong; dibahen i tama sonang hamu, unang pola tarsomong mambahen manang aha.

19:37 Ditogihon hamu do angka halak on tuson, so manang sisoro ugasan ni bagas joro manang panginsahi di debatanta i nasida.

19:38 Alai molo tung adong alualu ni si Demetrius dohot angka donganna pande dompak manang ise, adong do angka panguhuman dohot angka panggomgomi; disi ma nasida masialusan.

19:39 Alai molo na asing dilului hamu, di parluhutan i ma pinaputus i!

19:40 Atik beha dialuhon hita maon, ala ni guntur sisadari on; so haru adong paralaan na mambahen lias hita taringot tu na guntur on.

19:41 Songon i ma hatana, pamulihon na pungu i.

Ulaon ni Apostel 20

20:1 Asa dung montok na gaor i, dijou si Paulus ma angka sisean i tu jolona, laho martinading hata tu nasida, dung i borhat ma ibana tu Makedonia.

20:2 Didalani ma angka luat i, buas jamitana mangapoi nasida; laos tolhas ma tu tano Junani.

20:3 Tolu bulan lelengna mangulon ibana disi, jala laho marparau hian tu tano Siria, gabe dionggopi angka Jahudi ma ibana; jadi dipaputus ma rohana, mulak sian Makedonia.

20:4 Alai donganna do si Sopater, anak ni si Pirus na sian Berea, si Aristarkus dohot si Sekundus, halak Tessalonik, si Gayus sian huta Derbe dohot si Timoteus, si Tikikus, dohot si Tropimus na sian Asia.

20:5 Jumolo do anggo nasida, gabe dipaima do hami di Troas.

20:6 Salpu pesta Paska i marparau ma hami borhat sian Pilippi, jadi palimaarihon pajumpang ma hami dohot nasida di Troas; disi ma hami mangulon pitu ari lelengna.

20:7 Alai marsogot ni ari Sabbat i, uju marpungu hami laho marulaon na badia, marjamita ma si Paulus tu nasida jala dipaganjang ma jamitana pola ro di tonga borngin, ala na naeng borhat ibana manogotna i.

20:8 Alai torop do palito di bilut parginjang, di parpunguannami i.

20:9 Jadi adong ma dolidoli sahalak, na margoar Eutikus, na hundulhundul di jandela; tarlalap ma ibana di na mandatdati si Paulus mangkatai; jadi nok ma matana, gabe madabu ma ibana sian tindi patoluhon tu toru, jadi nunga mate dihindat.

20:10 Gabe mijur ma si Paulus, ditahopi ma ibana jala dihaol, ninna ma: Unang hamu gaor, di bagasan ibana do tondina!

20:11 Dung i mulak ma ibana tu ginjang, diponggoli ma roti i, laos mangan ma; dung i na nia dope dihatahon sahat ro di na mareak torang ari, jadi songon i ma ibana borhat.

20:12 Alai mangolu do dolidoli i ditogihon nasida; jadi tarapul situtu ma rohanasida.

20:13 Dung i jumolo ma hami bongot tu parau i marlayar tu Asos, asa disi jaloonnami si Paulus hombar tu na niaturhonna, ai na naeng mandarat do ibana.

20:14 Jumpangsa ma hami di Asos jala jinangkon ma ibana, dung i sahat ma hami tu Metilene.

20:15 Jadi dung marlayar hami sian i, sahat ma hami torang ni arina i tungkan tondong ni Kios jala marsogotna i mandapothon pulo Samos ma hami, dung i marsogotna i muse sahat ma hami tu Miletus.

20:16 Ai naeng laosan do huta Epesus di roha ni si Paulus, asa unang ginetean tingkina mangulon di Asia; ai mangkudus do ibana, anggiat sanga marari Pentakoste tu huta Jerusalem.

20:17 Alai disuru do sian Miletus tu Epesus manjou angka sintua ni huria i.

20:18 Jadi di na ro i nasida mandapothon ibana, ninna ma mandok nasida: Diboto hamu do pangalahongku, saleleng ahu rap dohot hamu olat ni ari parjolo, dung hudege Asia.

20:19 Ai huoloi do Tuhan i sian nasa serep ni roha huhut mariluilu manaon pangunjunan, angka na tahop tu ahu dibahen tahi ni halak Jahudi.

20:20 Ndang na hutabunihon manang aha na marguna, na so haru jinamitahon manang pinodahon tu hamu di hatoropan, nang marsasajabu pe.

20:21 Tongtong do huhatindangkon tu halak Jahudi nang tu halak Junani hamumuba ni roha tu Debata dohot haporseaon di Tuhanta Jesus Kristus.

20:22 Anggo saonari, songon na diihoti Tondi i do ahu, laho tu Jerusalem; so adong huboto, manang dia na naeng masa tu ahu disi.

20:23 Holan on: Hira di ganup huta dilumbahon Tondi Parbadia, tali dohot na porsuk do sitagamonku disi.

20:24 Alai ndang pola arga hurajumi hosangku, asal ma hupaujung langkangki dohot ulaon naung hujalo sian Tuhan Jesus, i ma na mangkatindangkon barita na uli taringot tu asi ni roha ni Debata.

20:25 Nuaeng pe, huboto do, ndang be idaonmuna bohingku, saluhut hamu na hutopot i paboahon Harajaon i.

20:26 Dibahen i huhatindangkon tu hamu sadari on: Naung lias do ahu sian sapata ni mudar ni saluhut hamu.

20:27 Ai ndang adong hubuati agia aha; tung sahat do hupabotohon tu hamu nasa tahi ni Debata.

20:28 Antong, ramoti hamu ma dirimu ro di sandok panggungan i, ai dipatindang Tondi Parbadia i do hamu gabe simatamatai, asa diparmahani hamu huria ni Tuhan i, na tinobusna marhite sian mudarna sandiri.

20:29 Ai huboto do: Ia dung laho ahu, bongot ma tu hamu, babiat panoro, angka na so mangolani na pinarmahan i.

20:30 Gari sian tongatongamuna sandiri hehe ma halak angka na mamodahon na lipe, mangelaela angka sisean i mangihuthon nasida.

20:31 Dibahen i, dungo ma hamu; ingot hamu ma, na so marpansadian ahu arian dohot borngin tolu taon lelengna paingothon ganup hamu mardongan iluilu.

20:32 Onpe, hupasahat ma hamu nuaeng tu Debata dohot tu hata asi ni rohana. Ibana do na margogo patoguhon roha jala mangalehon siteanon i tu saluhut na badia i.

20:33 Ndang dung ditodo rohangku sian manang ise perak, manang sere, manang ulos.

20:34 Diboto hamu do, tangankon do pangalugai di na hasea di ahu nang di angka na mandongani ahu.

20:35 Sandok hupatuduhon tu hamu, ingkon songon i do iba mulaulaon laho mangurupi angka na so margellok, marningot hata ni Tuhan Jesus, ai Ibana do mandok: "Martuaan do na mangalehon sian na manjalo!"

20:36 Jadi dung didok songon i, marsinggang ma ibana jala rap martangiang nasida saluhutna.

20:37 Alai tangis situtu ma nasida saluhutna jala dihaol nasida si Paulus huhut diumma.

20:38 Apala hatana ondeng ma gumodang diarsakkon nasida, na so idaonnasida be bohina. Laos dipataru nasida ma ibana tu parau i.

Ulaon ni Apostel 21

21:1 Asa dung sirang hami sian nasida, marlayar ma hami manumpol tu pulo Kos, jala torang ni arina i tu Rodos, sian i tu Patara.

21:2 Jadi jumpang hami ma sada parau, naeng taripar tu Penisia, i ma hubongoti hami laos marlayar.

21:3 Dung hutatap hami pulo Siprus, hulaosi hami ma i tungkan sihambirang laho manuju dompak Siria, jadi tardarat ma hami di Tirus, ai tusi do hasahatan ni muatan ni parau i.

21:4 Hutopot hami ma angka sisean i jala mangulon disi pitu ari lelengna. Hinorhon ni Tondi i dipalumba nasida do si Paulus, unang nangkok tu Jerusalem.

21:5 Alai dung salpu ariarinami disi, hehe ma hami laho borhat muse, jadi dipataru nasida saluhutna padohot angka ina ro di angka dakdanak ma hami tu balian ni huta i, jadi marsinggang ma hami martangiang di topilaut.

21:6 Dung masijalangan bongot ma hami tu parau; mulak do anggo nasida tu ingananna be.

21:7 Marujung ma parparauonnami, ai sian Tirus sahat ma hami tu Ptolemais; jadi hujalang hami ma angka dongan, laos mangulon do di nasida sadari.

21:8 Alai marsogotna i borhat ma hami, gabe sahat ma tu Kaesarea, jadi laho ma hami tu bagas ni si Pilippus parjamita i, sada sian na pitu i, jadi sorang di ibana ma hami.

21:9 Alai adong ma opat boruna na marbaju, angka na manurirangi.

21:10 Jadi andorang lumeleng mangulon hami disi, tuat ma sian Judea sada panurirang na margoar Agabus.

21:11 Didapothon ma hami, dibuat ma hohos ni si Paulus, dirahuthon ma tu tanganna dohot tu patna, huhut ma didok: On do hata ni Tondi Parbadia: Songon on ma ihoton ni angka Jahudi di Jerusalem nampuna hohos on, pasahatonnasida do ibana tu tangan ni sipelebegu.

21:12 Umbege hata i, huelehelek hami rap dohot ma maringanan disi ma ibana, unang nangkok tu Jerusalem.

21:13 Alai ninna si Paulus ma mangalusi: Dia do na binahenmuna, na tumatangis i dohot na mangalalai rohangku? Hobas do ahu, ihoton nang bunuon pe di Jerusalem ala ni Goar ni Tuhan Jesus!

21:14 Dung so olo ibana apoan, hohom sambing hami, gabe hudok hami ma: Sai saut ma lomo ni roha ni Tuhan i!

21:15 Asa dung salpu angka ari i, marhobas ma hami, laho nangkok tu Jerusalem.

21:16 Alai dohot sisean deba na sian Kaesarea mandongani hami, ditogihon ma hami sorang tu si Manason sian Siprus, naung leleng sisean.

21:17 Di na sahat hami tu Jerusalem, las do roha ni angka dongan i manjangkon hami.

21:18 Jala torang ni arina i laho ma si Paulus rap dohot hami manopot si Jakobus, gabe ro ma tusi angka sintua saluhutna.

21:19 Jadi dung dijalang ibana nasida, jojor ma dihatahon tu nasida na binahen ni Debata tu halak sipelebegu marhitehite ulaonna i.

21:20 Umbege hatana i, dipuji nasida ma Debata; dung i didok nasida ma tu ibana: Diida ho do, anggia, marriburibu do halak Jahudi angka naung gabe porsea, jala saluhut do nasida mangkapadothon patik i.

21:21 Dibege nasida, dipodai ho do halak Jahudi saluhutna, na di tongatonga ni halak sipelebegu, asa sirang sian si Musa, jala didok ho do, na so jadi sunatonnasida angka anakkonna, jala ndang pola radotannasida adat i, ninna.

21:22 Antong, beha nama? Ai begeonnasida do, naung ro ho.

21:23 Onpe, bahen ma na hudok hami on di ho! Adong do di hami opat halak, na marutang bagabaga.

21:24 Togihon ma nasida, urasi ma dirim rap dohot nasida, harugihon ma tu nasida, asa dipagustingkon obukna, gabe botoon ni saluhutna, na so tutu do hape barita i, na taringot tu ho, naung dohot do ho tahe pangaradoti di patik.

21:25 Alai taringot tu angka sipelebegu, naung gabe porsea, nunga pinatikkon hian tu nasida, ingkon dijaga dirina be maralohon pelean na tu begu, dohot mudar, songon i na mate so sineat, ro di parmainanon.

21:26 Jadi marsogotna i diarahon si Paulus ma angka baoa i, diurasi ma dirina rap dohot nasida, laho tu bagas joro, paboahon na naeng gohanna angka ari pangurasan i, paima sahat pelean sian ganup nasida.

21:27 Alai di na mandok marujung na pitu ari i, diida angka Jahudi na sian Asia ma ibana di bagas joro, gabe digunturi ma saluhut natorop i, ditangkup ma ibana.

21:28 Huhut ma dijouhon: O hamu halak Israel, urupi hami! On do jolma i, na sai mangajari saluhut halak maralohon bangsonta dohot patik i ro di inganan on. Dohot do halak Junani hape ditogihon tu bagas joro on; diramuni do inganan na badia on!

21:29 Ai naung diida nasida do si Tropimus na sian huta Epesus rap dohot ibana di huta i, gabe dirimpu, naung ditogihon si Paulus ibana tu bagas joro i.

21:30 Jadi guntur ma sandok huta i, marpungu ma sude natorop, disoro ma si Paulus, disarat ma tu balian ni joro i; dung i pintor ditutup ma angka pintu.

21:31 Alai di na naeng pusaonnasida ibana, sahat ma tu kapiten barita i, naung guntur do sandok Jerusalem.

21:32 Jadi pintor ditogihon ibana ma angka soldadu ro di angka letnan manahopi nasida; asa disi diida nasida kapiten i dohot angka soldaduna, dipasohot ma na mambalbali si Paulus.

21:33 Gabe ro ma kapiten i, ditangkup ma si Paulus, didokkon ma ihoton ibana dohot dua rante, dung i dipatangkas ma, manang halak dia ibana ro di na binahenna.

21:34 Alai sai masipansorohon hatana do natorop i; asa dung so jumpangsa hata na sintong dibahen na guntur i, didokkon ma togihononhon ibana tu tangsi.

21:35 Alai di na sahat i ibana tu tangga, diusung angka soldadu nama ibana dibahen panahopi ni natorop i.

21:36 Ai na mangihut do natorop i huhut manjoujou: Pinusa ma ibana!

21:37 Jadi di na naeng togihononnasida si Paulus tubagasan tangsi i, didok ma tu kapiten i: Jadi do dohononku hata tu ho? Gabe didok ma: Diboto ho do hape hata Junani?

21:38 Asa ndada ho halak Misir i, na manggunturi naengan on dohot manogihon na opatribu panamun tu parhorsihan?

21:39 Dung i didok si Paulus ma: Jahudi do ahu, raja huta do ahu di Tarsus, huta na tarbarita di luat Kilikia. Raja ho, loas ahu jolo mangkatai tu natorop i!

21:40 Jadi dung diloas, jongjong ma si Paulus di tangga i, dihiraphon ma tanganna tu natorop i. Jadi dung hohom be, marhata Heber ma ibana, ninna ma:

Ulaon ni Apostel 22

22:1 Hamu angka hahaanggi dohot ama, tangihon hamu ma pangalusionkon na tu hamu!

22:2 Asa dung dibege nasida, marhata Heber ibana tu nasida, lam hohom be ma, gabe ninna ma:

22:3 Halak Jahudi do ahu, na tubu di Tarsus na di luat Kilikia, alai magodang do di huta on; di parsikolaan ni si Gamaliel do ahu diajari mangihuthon patik ni angka amanta i timpas, gabe hupapusuhon mangoloi Debata, songon sude hamu sadari on.

22:4 Hupaburuburu do parugama on maradu mate nasida, ai huihoti do angka baoa dohot boruboru laho pasahathon tu hurungan.

22:5 Sintua ni malim i ro di angka sintua do panindangi di ahu, ai sian nasida do hujalo surat tu angka dongan i, di na laho i ahu tu huta Damaskus, manogihon dohot tarihot nang angka na disini tu Jerusalem, asa hona uhum nasida.

22:6 Alai masa ma, di na di tongandalan i ahu mardonokkon huta Damaskus, tar di hos ni ari, tompu ma sumillam sian ginjang humaliang ahu sondang na tiur situtu.

22:7 Pola tinggang do ahu tu tano, dung i hubege ma sada soara na mandok tu ahu: Saulus!, Saulus! Boasa leleanmu Ahu?

22:8 Jadi ningku ma mangalusi: Ise do Ho, Tuhan? Jadi ninna ma mandok ahu: Jesus do Ahu, na sian Nasaret, na nileleanmi!

22:9 Diida angka donganku do nian sondang i, alai ndang dibege nasida soara ni na mangkatai dohot ahu.

22:10 Gabe ningku ma: Dia ma sibahenonku, Tuhan? Jadi didok Tuhan i ma tu ahu: Hehe ma ho, laho ma tu Damaskus: Disi do paboaon tu ho saluhut na patut ulaonmu.

22:11 Alai ndang marnida be ahu dibahen sillam ni sondang i, gabe ditogu angka donganki nama tanganku sahat tu Damaskus.

22:12 Dung i adong ma disi sahalak na margoar Ananias, halak na daulat roha marningot patik i; na denggan do baritana di saluhut Jahudi na maringan disi.

22:13 I do na ro manopot ahu, ninna ma: Ale Saulus, anggia; marnida ma ho! Jadi manigor saut ma huida ibana.

22:14 Dung i ninna ma: Nunga dipillit Debata ni angka amanta hian do ho, asa tandaonmu lomo ni rohana, jala idaonmu Partigor i jala begeonmu soarana sandiri,

22:15 asa gabe sitindangina ho tu sude jolma taringot tu na niida dohot na binegem i.

22:16 Onpe, boasa sulonsulonon roham? Hehe ma ho, padidihon ma ho jala paburihon ma dosam, dung dijou ho Goarna i!

22:17 Alai jumpang ma di ahu, dung mulak ahu tu Jerusalem, marhatiuron ma tondingku, di na martangiang i ahu di bagas joro.

22:18 Ai huida do Ibana; didok do tu ahu: Humatop ma ho laho sian Jerusalem on, ai ndang jaloonnasida pangkatindangkonmi na taringot tu Ahu.

22:19 Dung i ningku ma: Diboto nasida do, ale Tuhan, ahu do na mangkurungkon dohot mangalinsingi di angka parguruan angka na porsea di Ho.

22:20 Jala di na durus mudar ni si Stepanus sitindangimi, disi do ahu jala hinalomohon do i, jala ahu do mangaramoti ulos ni angka na mamusa ibana.

22:21 Jadi didok ma mandok ahu: Laho ma ne ho; ai tu halak sipelebegu, tu na dao naeng suruonku ho!

22:22 Jadi sintap ni hata ondeng nama dipatangitangi nasida ibana, gabe dipangiar be ma soarana, mandok: Padao ma halak on sian tano on, ai ndang tama mangolu ibana!

22:23 Alai sai tole do nasida manjoujou, ditimpalhon do ulosnasida, jala disangkophon orbuk i dompak ginjang.

22:24 Jadi didokkon kapiten i ma togihononhon ibana tubagasan tangsi; disuru ma na mangalinsingi ibana laho manangkasi, asa binoto alana, umbahen na songon i panjouonnasida dompak ibana.

22:25 Alai di na naeng tambatonnasida ibana dohot tali pasa, ninna si Paulus ma mandok letnan na jongjong disi: Na jadi do linsinganmuna halak Rom, nang so jolo niuhuman?

22:26 Umbege hata ondeng letnan i, ditopot ma kapiten paboahonsa, ninna ma: Aha naeng bahenonmu? Halak Rom do halak i!

22:27 Jadi ditopot kapiten ma ibana, ninna ma: Paboa tu ahu, halak Rom do ho? Jadi didok ma: I do!

22:28 Dung i mangalusi ma kapiten i: Ia ahu, godang do huharugihon manuhor uhum Rom. Jadi didok si Paulus ma: Alai anggo ahu, na sian partubungku do songon i.

22:29 Jadi pintor sumurut ma angka na naeng manangkasi ibana; ai mabiar do kapiten i, dung diboto halak Rom do hape si Paulus, naung didokkon talion.

22:30 Torang ni arina i naeng ma tangkas botoonna alana, umbahen na dialuhon angka Jahudi i ibana, jala dipalua ma ibana, didokkon ma marpungu angka sintua ni malim dohot rapot godang i, ditogu ma si Paulus tu tongatonganasida.

Ulaon ni Apostel 23

23:1 Alai dibereng si Paulus ma rapot i, ninna ma: Hamu, angka hahaanggi, na marparange do ahu sian nasa burju ni rohangku mangoloi Debata ro di sadari on.

23:2 Alai didokkon sintua ni malim Ananias ma angka na jongjong disi mamastap ibana.

23:3 Dung i didok si Paulus ma mandok ibana: Pastapon ni Debata ma ho, dorpi na hinapur! Na hundul do ho manguhumi ahu marguru tu patik, hape didokkon ho pastapon ahu maralohon patik i!

23:4 Dung i didok na jongjong disi: Ai insahanmu sintua ni malim ni Debata?

23:5 Gabe didok si Paulus ma: Ndang na huboto, ale dongan, ibana sintua ni malim i; ai tarsurat do: "Ndang jadi insahanmu sintua ni bangsom!"

23:6 Alai diboto si Paulus ma, deba sian nasida Saduse, na deba halak Parise, gabe dijouhon ma di rapot i: Hamu angka hahaanggi! Halak Parise do ahu jala anak ni Parise. Ala ni pangkirimon ni roha dohot ala ni haheheon sian na mate, umbahen na tu paruhuman on ahu.

23:7 Alai dung didok songon i, marsalisi ma angka Parise dohot Saduse, gabe mardua roha ma na pungu i.

23:8 Ai disoadahon angka Saduse do haheheon nang surusuruan nang tondi; alai anggo Parise, diparhatutu do duansa.

23:9 Jala mansai guntur ma; alai hehe ma deba sibotosurat sian horong ni angka Parise mangalo, ninna ma: Ndang adong na jahat jumpang hami di halak on. Atik naung tutu dipanghulingi Tondi manang surusuruan ni Debata ibana.

23:10 Alai lam balga ma bada i, jala mabiar ma kapiten i, aik boha diparsisiga nasida si Paulus, gabe didokkon ma tuat soldadu i mangaroro ibana sian tongatonganasida, manogihon tu tangsi.

23:11 Alai bornginna i jongjong ma Tuhan i di lambungna, didok ma: Pos ma roham! Songon naung hinatindangkonmi Ahu di Jerusalem on, ingkon songon i do ho mangkatindangkon nang di huta Rom!

23:12 Alai dung torang ari, marbulan ma deba sian angka Jahudi, dipambuburahon ma dirina, mandok na so tupa mangan manang minum nasida, saleleng so dipusa si Paulus.

23:13 Lobi opatpulu do torop ni na marbulan songon i.

23:14 Jadi ro ma nasida, manopot angka sintua ni malim ro di angka pangituai, didok ma: Nunga hupambuburahon hami dirinami, na so jadi daionnami agia aha, saleleng so hupusa hami si Paulus.

23:15 Antong, rap ma hamu dohot rapot i mangidohon tu kapiten i, asa ditogihon ibana tu jolomuna, songon na laho patangkashon tumorang hata i; alai hobas do hami mamusa ibana, tagan di tongandalan dope.

23:16 Alai tarbege do tahi i tu ibebere ni si Paulus, jadi laho ma ibana tu tangsi i paboahonsa tu si Paulus.

23:17 Jadi dijou si Paulus ma sada letnan tu lambungna, didok ma: Togihon dolidoli on tu kapiten i, ai adong do sipaboaonna tu ibana.

23:18 Jadi diarahon ma ibana, ditogihon ma tu kapiten, ninna ma: Na dijou si Paulus na tarhurung i do ahu; dipangido tu ahu, togihononhon dolidoli on tu jolom, ala adong sidohononna tu ho.

23:19 Ditiop kapiten ma tanganna manogihon ibana tu na soding, disise ma: Ai aha do sipaboaonmu tu ahu?

23:20 Jadi didok ma: Na martuptup do angka Jahudi mangidohon sian ho, naeng togihononmu marsogot si Paulus tujolo ni rapot, songon na naeng dope patangkasonnasida hata i.

23:21 Onpe, unang oloi nasida, ai lobi opatpulu halak sian nasida mangonggopi ibana, angka naung mambuburahon dirina, na so tupa mangan manang minum, saleleng so dipusa ibana; nunga hobas nasida nuaeng, holan hata sian ho nama dipaima.

23:22 Dung i dipamuli kapiten ma dolidoli i, dipopai ma, na so jadi paboaonna naung pinatolhasna i tu ibana.

23:23 Gabe dijou ma dua letnan tu jolona, didok ma: Padiri hamu ma duaratus soldadu laho tu Kaesarea, rap dohot pitupulu halak parsihundul, angkup ni i dua ratus pandongani, pungkul sia borngin.

23:24 Pinadiri huhut hoda hundulan ni si Paulus, mangaluahon ibana tu panggomgomi Feliks.

23:25 Laos dibahen ma surat songon on:

23:26 Na manongos tabi do si Klaudius Lisias tu na pinarsangapan Panggomgomi Feliks.

23:27 Na ditangkup angka Jahudi do halak on; jadi di na naeng pusaonnasida ibana, ro do ahu dohot angka soldadu mangarampas ibana, dung huboto, halak Rom do ibana.

23:28 Alai di na naeng botoonku alana, umbahen na disalahon nasida ibana, hutogihon ma ibana tujolo ni rapotnasida.

23:29 Gabe dapot ahu ma: Siala parsalisian taringot tu patiknasida do dialuhon nasida ibana; ndang adong hata dompak ibana, umbahen na patut marutang hosa manang tu hurungan ibana.

23:30 Alai adong ma na paboahon tu ahu tahinasida dompak halak on, jadi manigor ma husuru ibana tu ho, jadi hudok tu angka pangalu, asa tu ho diandehon sidohononna i.

23:31 Asa diboan angka soldadu i ma si Paulus mangihuthon parenta i, ditogihon ma di na saborngin i tu Antipatris.

23:32 Alai marsogotna i disuru nasida ma angka parsihundul i mamboan ibana; na mulak tu tangsi i do anggo nasida.

23:33 Jadi tolhas ma nasida tu Kaesarea, dipasahat ma surat i tu panggomgomi, ditogihon ma si Paulus tu jolona.

23:34 Jadi dung dijaha surat i, disungkun ma, manang sian luat dia ibana. Jadi dung diboto, na sian Kilikia ibana, ninna ma:

23:35 Hutangkasi pe hatami, dung ro angka na mangaluhon ho. Dung i didokkon ma na mangkurungkon ibana tu bagas paruhuman na di raja Herodes.

Ulaon ni Apostel 24

24:1 Asa dung salpu lima ari, tuat ma si Ananias, sintua ni malim i, rap dohot deba sintua dohot sada halak parhata, si Tertullus, mangadap tujolo ni panggomgomi, mangaluhon si Paulus.

24:2 Alai dung taralap ibana, dibungka si Tertullus ma pangaluanna i, ninna ma:

24:3 Na taruli dame godang do hami binahenmi, jala marhite sian panarihon ni roham ganda do pangabahan ni bangso on; sandok mardongan hamauliateon ni roha godang huhalashon hami saluhutna i, ale Feliks na pinarsangapan!

24:4 Alai asa unang malelengku hutogang ho, hupangido ma tu ho: Tangihon hami jolo satongkin hombar tu basam!

24:5 Dapot hami do halak on pangago jala panggunturi di saluhut halak Jahudi di liat portibi on, partogi ni halak Nasarani.

24:6 Diuji do pasamakkon bagas joro i, gabe hutangkup hami ma ibana.

24:7 Saluhutna i, umbahen na hualuhon hami ibana, dapot botoonmu sian ibana, molo ditangkasi ho.

24:8 Jadi dohot ma angka Jahudi manolopi, mandok: Tutu do songon i!

24:9 Alai dihilap panggomgomi i ma si Paulus mandokkon mangkuling, jadi ninna ma mangalusi:

24:10 Dibahen na huboto, naung leleng ho panguhum di bangso on, hiras do rohangku manariashon hatangkon.

24:11 Ai hatangkasan ho do: Sampuludua ari dope salpu, dung nangkok ahu tu Jerusalem martangiang.

24:12 Ndang jumpang nasida ahu mangkatai di bagasan joro i dohot halak, manang mambahen guntur natorop, nang di parguruan manang di huta pe.

24:13 Jala ndang na tarhajongjongkon nasida nanggo sada na pinartuhashonnasida nuaeng dompak ahu.

24:14 Na mangoloi Debata ni angka daompung do ahu, mangihuthon agama na songon haliluon di rohanasida, laho mangkaporseai saluhut na tarsurat di buku patik dohot di angka panurirang; i do sitopotanku tu ho!

24:15 Na mangkirim do rohangku tu Debata, mulak mangolu sogot angka na tigor dohot angka na geduk, songon na hinirim ni rohanasida pe.

24:16 Ala ni i do umbahen na huhaburjuhon, asa marroha na ias ahu tongtong maradophon Debata nang maradophon jolma.

24:17 Alai dung salpu manang piga taon, ro ma ahu mamboan asiasi tu bangsongku dohot pelean.

24:18 Disi jumpang nasida ahu mangurasi diringku di bagas joro, alai ndada mardongan natorop manang di bagasan na guntur.

24:19 Alai naeng ma dison nian di jolomon, Jahudi deba na sian Asia mangalualu, molo tung adong diboto manang dia hasalaanku.

24:20 Nang nasida on pe dihatahon ma, manang dia gedukku dapot nasida, di na jongjong i ahu di adopan ni rapot i.

24:21 Holan hata on na hujouhon i huhut jongjong di tongatonganasida: Ala ni haheheon ni angka na mate on, umbahen na diuhumi hamu ahu sadari on!

24:22 Alai dipalalaplalap si Feliks ma nasida, ala mansai tangkas diboto agama i, ninna ma: Dung pe tuat kapiten Lisias, patangkasonku ma angka hata na sian hamu i.

24:23 Didokkon ma letnan i mangaramoti si Paulus, alai lumumbang; na so jadi ambaton manang ise donganna, na giot marhobasi di ibana.

24:24 Alai dung salpu deba ari, ro ma si Feliks dohot dongan saripena, si Drusila, boru Jahudi, disuru ma na mangalap si Paulus, naeng begeonna hatana taringot tu haporseaon di Kristus Jesus.

24:25 Alai di na hinatahonna taringot tu hatigoran dohot hatomanon dohot uhum sogot tarsonggot ma si Feliks, ninna ma mangalusi: Antong, songon i ma jolo! Molo sadihari ahu suruonku do na manjou ho.

24:26 Alai huhut do dihirim rohana, lehonon ni si Paulus hepeng tu ibana; dibahen i jotjot do disurui mangalap si Paulus, mangkatahatai dohot ibana.

24:27 Alai dung gok dua taon, ro ma si Perkius Festus mangganti si Feliks; jadi naeng do si Feliks pajongjongkon basana tu halak Jahudi, ditadingkon ma si Paulus tarhurung.

Ulaon ni Apostel 25

25:1 Asa dung tolu ari dijujung si Festus tohonanna i, nangkok ma ibana sian huta Kaesarea tu Jerusalem.

25:2 Gabe ro ma tu jolona angka sintua ni malim dohot angka panungganei ni Jahudi mangaluhon si Paulus, diparhurajai ma ibana:

25:3 Mangido asi ni roha, asa disuru si Paulus tu Jerusalem, asa bahenonnasida pangonggopon mamusa ibana di tongandalan.

25:4 Alai ninna si Festus ma mangalusi: Naung niramotan do si Paulus di Kaesarea; alai anggo ahu tibu nama mulak tusi, ninna.

25:5 Antong, rap tuat ma angka na sangapmuna jala dialuhon ma baoa i, anggo adong diula na jahat.

25:6 Asa dung mian di nasida ualu ro di sampulu borngin, tuat ma ibana tu Kaesarea; dung i marsogotna i dihunduli ma habangsa paruhuman i, didokkon ma togihononhon si Paulus tu jolona.

25:7 Asa dung ro, dihaliangi angka Jahudi naung tuat sian Jerusalem ma ibana, dipanghatahatahon ma godang pangaluan angka na dokdok, na so tarhajongjongkon nasida.

25:8 Ai ditariashon si Paulus ma: Ndang na mardosa ahu manang dompak patik ni Jahudi, nang dompak bagas joro i, nang dompak raja Kesar pe.

25:9 Alai laho mambuat roha ni angka Jahudi i, ninna si Festus ma mangalusi si Paulus: Na olo do ho nangkok tu Jerusalem, asa huuhumi ho disi taringot tu angka ondeng?

25:10 Jadi didok si Paulus ma: Na jongjong do ahu di jolo ni paruhuman ni raja Kesar; disi do ahu patut uhumon. Ndang adong hajahaton huula dompak Jahudi; tangkas situtu do diboto ho i.

25:11 Nuaeng pe, ia adong huulahon na jahat, na tama mambahen ahu marutang hosa, ndang manjua ahu mate; alai anggo so tutu na tinuhashonnasida tu ahu, ndang tarpasahat manang ise ahu tu nasida. Raja Kesar i do pangondianku!

25:12 Jala martuptup ma si Festus dohot angka donganna paruhum, gabe ninna ma mangalusi: Raja Kesar do digoar ho pangondianmu; tu raja Kesar ma ho borhat!

25:13 Alai dung salpu deba ari, ro ma raja Agrippa dohot Bernike tu Kaesarea mangkormat si Festus.

25:14 Jala di na mangulon nasida disi deba ari, dipajojor si Festus ma tu raja i angka na taringot tu si Paulus, ninna ma: Adong do dison sada halak tarhurung, ditinggalhon si Feliks.

25:15 Uju di Jerusalem ahu, mangadap do angka sintua ni malim ro di sintua ni halak Jahudi tu jolongku, mangido naeng hona uhum ibana.

25:16 Jadi ningku ma mangalusi nasida: Ndang adat i di halak Rom, pasahaton sada halak, ia so jolo pinatumpol na tartuhas dohot angka pangalu, asa haalusansa pangaluan i.

25:17 Jadi dung pungu nasida dison, ndang hupalalaplalap be; marsogotna i ma huhunduli paruhuman i, hudokkon ma togihononhon baoa i.

25:18 Hehe pe angka na mangaluhon i, ndang adong nanggo sada salana tarhajongjongkon nasida, songon na niagam ni rohangku.

25:19 Alai adong do angka parsalisiannasida taringot tu pardebataon na di nasida dohot taringot tu sada halak Jesus, naung mate gabe mangolu, ninna si Paulus.

25:20 Alai di na tarsosak i ahu siala parhataan i, husungkun ma ibana, manang na olo laho tu Jerusalem, asa disi ibana diuhumi taringot tusi.

25:21 Alai dipangido si Paulus do, naeng ramotan ibana, asa tu paruhuman ni na marmulia i; jadi hudokkon ma ramotan ibana, paima husuru tu raja Kesar.

25:22 Alai ninna si Agrippa ma mandok si Festus: Naeng ma di rohangku begeonku pandok ni baoa i. Jadi didok ma: Antong, marsogot ma begeonmu!

25:23 Dung i marsogotna i ro ma Agrippa dohot Bernike marhasangapon godang, jadi bongot ma tubagasan bilut paruhuman rap dohot angka kapiten ro di angka na mora ni huta i; dung i didokkon si Festus ma togihononhon si Paulus.

25:24 Gabe didok si Festus ma: Ale raja Agrippa, dohot hamu saluhut dongan na ro rap dohot hami! Ida hamu ma halak on! Ala ni ibana do dipatopottopot saluhut halak Jahudi ahu tu Jerusalem nang dison, dipanjoujouhon, na so patut be mangolu ibana.

25:25 Alai tangkas do huboto, na so adong diula na tama mambahen ibana marutang hosa; alai ala digoar ibana na marmulia i pangondianna, huuhumi nama, suruon ibana tusi.

25:26 Ndang adong manang aha na tangkas surathononku tu tuan i taringot tu ibana; ala ni i do umbahen na hutogihon ibana tu jolomuna, alai jumolo do tahe tu ho, raja Agrippa, asa adong sisurathononku, dung tinangkasan.

25:27 Ai haduk do di rohangku, suruon halak na tarhurung, so pinaboa hasalaanna.

Ulaon ni Apostel 26

26:1 Dung i didok si Agrippa ma tu si Paulus: Na jadi ma tariashononmu hatam! Gabe dihatahon si Paulus ma, huhut mangkiraphon tanganna:

26:2 Na martua do ahu, dirajumi rohangku, raja Agrippa, ala na jadi alusanku ho sadari on taringot tu saluhut na tinuhashon ni angka Jahudi tu ahu.

26:3 Ala sumurung panandaonmu di sude adat ro di parsalisian ni halak Jahudi, umbahen na mangido ahu tu ho: Pabenget ma roham tumangihon hatangkon!

26:4 Diboto saluhut halak Jahudi do parangengku na sian sietehetehonku, sian mulana di tongatonga ni bangsongki di Jerusalem.

26:5 Ai ditanda do ahu sian najolo, namun olo nasida mangkatindangkon, paboa na huihuthon rongkanan Parise i ma na rumisik di agamanta i.

26:6 Na jongjong do ahu nuaeng di paruhuman siala pangkirimon ni roha di angka bagabaga na nilehon ni Debata tu angka amanta i.

26:7 Naeng sahat tusi do dihirim roha ni na sampuludua marganta, umbahen na dioloi nasida Debata borngin dohot arian sian nasa gogonasida. Ala ni pangkirimon ni roha i do, rajanami, umbahen na dialuhon halak Jahudi ahu.

26:8 Atehe, tung so tarparhatutu rohamuna do, Debata pangoluhon angka na mate?

26:9 Alai nang ahu pe antong, hurimpu do jolo, ingkon godang do patupaonku mangalo Goar ni Jesus na sian Nasaret.

26:10 Tulus ma antong hubahen songon i di Jerusalem: Torop sian angka na badia i hupasahat tu hurungan, dung hujalo huaso sian angka sintua ni malim i, jadi martolop do ahu, di na tarbunu i nasida.

26:11 Jala jotjot do hupaporsukporsuk nasida di saluhut parguruan manosoi nasida manginsahi; tung na tarlobi do lalaen ni rohangku, mangalele nasida sahat ro di angka huta na dumao.

26:12 Laos songon i do tu Damaskus ahu borhat marhuaso, pinaborhat ni angka sintua ni malim.

26:13 Jala di tongandalan i, rajanami, di hos ni ari huida ma sondang na tumiur sian mata ni ari ro sian ginjang, sumondangi ahu ro di angka donganku sauduran.

26:14 Gabe martinggangan hami saluhutna tu tano jala hubege ma sada soara na mandok tu ahu di hata Heber: Saulus, Saulus! Boasa leleanmu Ahu? Susa ma ho manandahi turatura!

26:15 Alai ningku ma: Ai ise do Ho, Tuhan? Jadi didok Tuhan i ma: Jesus do Ahu na nileleanmi!

26:16 Alai hehe ma ho, jongjong ma! Ai hupataridahon pe Ahu tu ho, na laho mamillit ho, gabe suruan dohot sitindangi ni na niidam dohot di na naeng pataridahononku dope tu ho.

26:17 Hupapulik ma ho sian bangso i dohot sian halak sipelebegu, ai tusi do naeng suruonku ho,

26:18 laho mamuhai matanasida, asa mulak nasida sian na holom i tu na tiur, sian gomgoman ni sibolis i tu Debata, asa dijalo nasida hasesaan ni dosa dohot tohapna rap dohot angka naung gabe badia hinorhon ni haporseaon di Ahu.

26:19 Dibahen i, ale raja Agrippa, mangoloi do ahu di na huida sian banua ginjang i.

26:20 Ai hujamitai do jumolo angka na di Damaskus, dung i angka na di Jerusalem, songon i saluhut na di luat Judea ro di halak sipelebegu, asa dipauba rohanasida jala mulak tu Debata mamarangehon na tama di roha naung muba.

26:21 Ala ni i do ditangkup angka Jahudi ahu di bagas joro, naeng pusaonna ahu.

26:22 Alai diurupi Debata do ahu ro di sadari on, umbahen na jongjong dope ahu manjamitai angka na metmet dohot na magodang, jala ndang adong huhatahon na so domu tu na sinurirangkon ni angka panurirang i dohot si Musa.

26:23 Na mandok, sitaon na bernit do Kristus, jala Ibana do parjolo hehe sian angka na mate, mamaritahon hatiuron tu bangso i nang tu halak sipelebegu.

26:24 Alai dung songon i panariashonna i, dipagogo si Festus ma soarana, didok ma: Na lalaen do ho, Paulus! Parbinotoanmu na godang i do mambahen ho lalaen!

26:25 Alai ro ma si Paulus: Ndang na lalaen ahu, ale Festus na pinarsangapan; hata na tutu jala na torang hutariashon!

26:26 Na marbinoto do raja i disi, umbahen na hiras rohangku mangkuling i ibana; ai didok rohangku, ndang adong agia sada sian angka i na holip sian jolona, ai ndada na masa i di na suhi.

26:27 Porsea do ho, raja Agrippa, di angka panurirang? Huboto, na porsea do ho!

26:28 Alai ninna Agrippa ma mandok si Paulus: Otik nari nama so dihatai ho ahu, asa gabe Kristen ahu!

26:29 Jadi ninna si Paulus ma: Dipangido rohangku tu Debata, manang na hurang otik nari manang godang naeng ma nang ho, nang saluhut nasida na umbege ahu sadari on, gabe doshon ahu on, so padohot rante on.

26:30 Jadi hehe ma raja i dohot panggomgomi i dohot Bernike ro di angka donganna.

26:31 Dipaholang dirina otik jala masipandohan ma songon on: Ndang diula halak on na tau mambahen ibana marutang hosa manang tu hurungan pe.

26:32 Laos ninna Agrippa ma mandok si Festus: Na tarpalua do nian halak i, aut unang Kesar i digoar pangondianna.

Ulaon ni Apostel 27

27:1 Alai dung diuhum, ingkon marparau nama hami tu Italia, dipasahat ma si Paulus rap dohot deba donganna na tarhurung tu sada letnan na margoar Julius, na sian parangan ni Kesar Augustus.

27:2 Hubongoti hami sada parau Adramitium, na marlayar tu angka luat na di Asia; dung i borhat ma hami si Aristarkus, halak Makedonia sian Tessalonik, do dongannami.

27:3 Marsogotna i tardarat ma hami di Sidon; na basar do pangalaho ni si Julius maradophon si Paulus, diloas do ibana laho manopot angka dongan, asa ditamuei nasida ibana.

27:4 Sian i ma marlayar hami manopinopi pulo Siprus, ala mangalo alogo i.

27:5 Jadi dung binolus laut na di lambung Kilikia dohot Pampilia, sahat ma hami tu Mirra na di Likia.

27:6 Disi ma jumpang letnan i sada parau Aleksanderia, na naeng marlayar tu Italia; jadi dipabongot ma hami tusi.

27:7 Na nia lelengna ngernger do parparauonnami jala maol nama hami sahat tu Knidus; alai ndang diloas alogo i hami manulus jadi manopinopi pulo Kreta nama hami marlayar manondong Salmone.

27:8 Jadi loja do hami manalpui i, gabe sahat ma hami tu sada inganan, na margoar Muara na uli, mardonokkon huta Lasea.

27:9 Nunga na nia salpu tingkina gabe mamungka marmara ma parparauon, ai nunga salpu tingki puasa; ala ni i dipaingot si Paulus ma nasida, ninna ma:

27:10 Hamu angka dongan, ia parparauonta on mantat hasusaan dohot harugian godang huida, ndada holan tu muatan ro di parau i, dohot do hosanta tarmara.

27:11 Alai porseaan do letnan i di juaramudi dohot di induk ni parau i, asa di hata ni si Paulus.

27:12 Alai dibahen na hurang denggan muara i pasalpuhon taon ngali disi, naeng ma marlayar sian i di roha ni na tumorop, anggiat tarbahen sahat tu Penike martaon ngali, i ma sada muara na di Kreta, na tartungkan nariti dohot manabia.

27:13 Jadi ala ngernger alogo i sian dangsina, dirimpu nasida ma, tarpasautsa tinahi ni rohana, jadi ditait ma sao i mangkorisi pulo Kreta.

27:14 Alai ndang pola sadia leleng ro ma sian pulo i habahaba siappalautus, na margoar habahaba siirisanna.

27:15 Diluahon ma parau i, ndang tardompakkonsa alogo i; jadi hupasombu hami nama, diboan ma hami maupaup.

27:16 Jadi di na maupaup hami sian topi ni sada pulo na margoar Klauda, maol nama hupegang hami parau na metmet i.

27:17 I ma dihindat, dipangke nasida ma nasa na tau pangurupi mangaliliti parau i; alai dibahen na mabiar nasida taronjar tu Sirtis, dipaijur ma layar i, jadi maupaup nama hami songon i.

27:18 Alai di na tarsosak situtu hami dibahen ari i, dibolongkon nasida ma marsogotna i muatan ni parau i.

27:19 Dung i di ari patoluhon dibolongkon tangannami ma nang parhohas ni parau i.

27:20 Alai dibahen nunga na nia lelengna so tarida manang mata ni ari manang bintang pe, jala gogo do panosak ni ari i di hami, gabe saep ma hirim ni rohanami di hosanami.

27:21 Jadi dung leleng so mangan nasida, hehe ma si Paulus di tongatonganasida, ninna ma: Ale angka dongan, aut ditangihon hamu nian iba, unang munsat sian Kreta, pasiding hasusaan dohot harugian on!

27:22 Ipe, huapoi ma hamu marhiras ni roha, ai ndang adong na agoan hosa sian hamu; holan parau i do na laho mago!

27:23 Ai na jongjong do di lambungku na borngin surusuruan ni Debatangku na huoloi,

27:24 ninna ma: Unang ho mabiar, ale Paulus; ingkon tujolo ni raja Kesar ho jongjong, jala nunga dibasabasahon Debata tu ho saluhut donganmu na saparau.

27:25 Dibahen i, hiras ma rohamuna, ale angka dongan; ai na porsea do ahu di Debata, ingkon jumpang do songon na nidokna i tu ahu.

27:26 Alai ingkon tarsanggal do hita tu sada pulo.

27:27 Pasampuluopatbornginhon hami na maupaup di laut Adria, di na tonga borngin i, dianto roha ni angka parparau i, na jonok nama darat.

27:28 Gabe didabu ma tali donda, jadi dapot nasida ma duapulu dopa; jala saotik nari dumao sian i diulakkon didodo, jadi dapot ma sampululima dopa.

27:29 Biar ma rohanasida, atik beha tombom hami tu batu; jadi opat sao ma didabu sian pudi ni parau i, paimahon torang ni ari.

27:30 Dung i naeng lintun ma sian parau angka anak parau i; ditantan ma solu i tu laut, diparsidalianhon naeng dabuonnasida tali sao sian ulu ni parau i.

27:31 Jadi didok si Paulus ma tu letnan i dohot tu angka soldadu: Molo so tinggal nasida di parau on, ndang tarbahen hamu malua.

27:32 Dung i digotap angka soldadu i ma angka tali ni solu i, dipasombu ma madabu.

27:33 Alai paima mamungka torang ari, disosoi si Paulus ma nasida saluhutna marsipanganon, ninna ma: Pasampuluopatarihon ma sadari on hamu na bebenesan, laos so mangan; ndang agia aha dipangan hamu.

27:34 Dibahen i huapoi ma hamu mambuat sipanganon, tau panumpak do i, asa malua hamu; ai na so tupa marurus nanggo obuk sada sian ulumuna.

27:35 Jadi dung didok songon i, dibuat ma roti i, didok ma mauliate tu Debata di jolonasida saluhutna, diponggoli ma, dipungka ma manganhon.

27:36 Jadi hiras ma rohanasida saluhutna, laos dibuat ma sipanganon i.

27:37 Alai toropnami na di parau i: Duaratus pitupulu onom halak do.

27:38 Dung bosur nasida, didabu ma bohal i tu laut, laho paneangkon parau i.

27:39 Dung torang ari, ndang ditanda nasida darat i; alai ditatap nasida ma sada solok na marpasir, naeng tusi ma patongononnasida parau i, namun tarbahen.

27:40 Jadi digotap nasida ma angka tali sao i, pasombuhonsa di laut, huhut diharhari ma angka ihot ni amudi i dipatongon ma layar i tu alogo mareakkon pasir i.

27:41 Alai ambal ma nasida tu sada tuktuk, jadi diloas ma parau i tombom tusi, gabe tarsanggal ma ulu ni parau i, laos hot ma disi: Alai maloha ma pudipudi ni parau i dibahen gogo ni umbak.

27:42 Dung i ditahi angka soldadu ma mambunu angka sitarapan i, asa unang marlange nasida laho malua.

27:43 Alai naeng do pangoluon ni letnan i si Paulus jadi disundati ma tahi ni rohanasida, didokkon ma angka na malo marlange jumolo manimbung laho tu darat i.

27:44 Na deba marlampuhon papan-papan, na deba marlampuhon angka ponggolponggol ni parau i, gabe songon i ma saluhut nasida malua tu darat.

Ulaon ni Apostel 28

28:1 Dung tardarat hami, binege ma goar ni pulo i Malta.

28:2 Alai na basar situtu do pangisi ni pulo i maradophon hami, dipagalak do api, ditogihon ma hami saluhutna tusi, ala ni por ni udan dohot ngali ni ari.

28:3 Jadi di na pagugunhon rambaramba si Paulus, laho mambahen tu api, ruar ma sian i ulok dari dibahen mohopna, dipargut ma tanganna.

28:4 Jadi dung diida jolma i ulok i gaunggaung di tanganna, masipandohan ma nasida: Sandok pamunu do halak on; ndang diloas uhum i ibana mangolu, atik pe malua sian laut.

28:5 Alai dipirpirhon ma ulok i tubagasan api, ndang pola mahua ibana.

28:6 Alai ditagam nasida, naeng magurbak ma, manang runggang mate satongkin ibana; alai dung leleng dipaimaima nasida, so manang mahua ibana diida, martungkar ma rohanasida; didok ma, debata ibana.

28:7 Alai adong ma mardonokkon tusi ladang ni sada halak na sumangap di pulo i, na margoar Publius; dijangkon do hami, denggan do hami ditamuei tolu ari lelengna.

28:8 Alai peak ma uju i ama ni si Publius i panepaneon huhut barobunion, gabe masuk ma si Paulus manopot ibana; jadi dung martangiang, diampehon ma tanganna tu ibana, gabe malum ma.

28:9 Dung songon i, ro ma angka na asing na marsahit di pulo i, jadi malum be ma.

28:10 Gabe sangap situtu do hami dibahen nasida; jala di na borhat i hami marlayar, dipadiri nasida do na hasea di hami.

28:11 Alai dung salpu tolu bulan, borhat ma hami marlayar di sada parau Aleksanderia, na marpartanda linduat, naung pasalpuhon taon ngali di pulo i.

28:12 Jadi dung tardarat hami di Sirakus, mangulon ma hami disi tolu ari.

28:13 Sian i ma hami mangaliat, jala sahat ma hami tu Regium; jadi marsogotna i ro ma alogo sian dangsina, jadi sahat ma hami tu Potioli di ari paduahon i.

28:14 Disi pajumpang hami dohot angka dongan na mangapoi hami, mangulon di nasida pitu ari, dung i borhat ma hami tu huta Rom.

28:15 Sian i ma ro angka dongan, dung dibege baritanami, ditomutomu ma hami sahat ro di Appiporum dohot Tres Taberne. Marnida nasida, mandok mauliate ma si Paulus tu Debata; lam pos ma antong rohana.

28:16 Alai dung tolhas hami tu huta Rom, diloas do anggo si Paulus maringan di lomo ni rohana rap dohot soldadu sada na manjagai ibana.

28:17 Jadi dung salpu tolu ari, dijou si Paulus ma angka panungganei ni halak Jahudi. Dung pungu nasida, ninna ma mandok nasida: Hamu angka dongan! Ia ahu, ndang adong hubahen manang aha dompak bangsonta manang dompak adat na sian angka ompu, gabe diihoti ahu di Jerusalem jala dipasahat ahu tu tangan ni halak Rom.

28:18 Jadi naeng paluaonna do ahu, dung ditangkasi ahu, ala so dapot salangku na tama mambahen ahu marutang hosa.

28:19 Alai dibahen sai mangalo angka Jahudi i, ndang tarjua ahu so hugoar raja Kesar pangondianku; ndang adong sialuhononku sala ni bangsongku.

28:20 I do antong alana, umbahen na hujou hamu, asa huida jala hupangkulingi hamu, ai ala ni pangkirimon ni halak Israel do umbahen na dirantei ahu.

28:21 Dung i ninna nasida ma mandok ibana: Ndang adong hujalo hami surat sian Judea taringot tu ho, jala ndang adong manang ise sian angka dongan i, naung ro tuson paboahon barita na jahat taringot tu ho.

28:22 Alai tama do di rohanami begeon sian ho parrohaonmi; ai taringot tu agama on huboto hami do, na nialo ni halak do i di liat portibi on.

28:23 Asa dung digondit nasida ari di ibana, ro ma nasida torop manopot ibana tu parmiananna, jadi marjamita ma ibana mangkatindangkon harajaon ni Debata: Dipajojor ma tu nasida barita ni Jesus sian patik ni si Musa dohot sian angka panurirang i, olat ni manogotna ro di bot ni ari.

28:24 Jadi deba ma marhatutuhon na hinatahonna i; alai deba ndang porsea.

28:25 Gabe marsalisi ma nasida sama nasida jadi laho be ma, dung jolo didok si Paulus hata on tu nasida: Sintong ma na nidok ni Tondi Parbadia marhitehite panurirang Jesaya tu angka amamuna najolo.

28:26 Ai ninna do: "Laho ma ho paboahon tu bangso on: Marhite sian parbinegeanmuna do begeonmuna i, gabe ndang dapot rohamuna; jala di na marnida i hamu, idaonmuna i, gabe ndang mananda.

28:27 Ai nunga pir roha ni bangso on, nunga maol marbinege pinggolnasida; nunga ditutup matanasida, asa unang marnida matanasida, unang marbinege pinggolnasida, unang marbinoto rohanasida, unang muba rohanasida, unang tarpamalum Ahu nasida!"

28:28 Antong, boto hamu ma, nunga ditongos Debata haluaon on tu halak sipelebegu; tangihononnasida do i.

28:29 Asa dung dihatahon ibana i, laho ma angka Jahudi sian i; godang do parsualonnasida sama nasida.

28:30 Alai dua taon ma si Paulus maringan di bagas na sineoana i; dijangkon do nasa na ro manopot ibana.

28:31 Marhiras ni roha situtu do ibana mamaritahon harajaon ni Debata jala mangajarhon barita ni Tuhan Jesus; ndang adong na mangambat.