Porlak Nasional Batang Gadis

Porlak Nasional Batang Gadis, manang dalam Bahasa Indonesia didok Taman Nasional Batang Gadis (TNBG), ima sada porlak nasional na adong di Kabupaten Mandailing Natal, Sumatera Utara. Porlak on ima sada sian piga-piga porlak nasional na adong di Sumatera Utara angkup ni Porlak Nasional Gunung Leuser^[1]. Marojahan tu Haputuson Menteri Kehutanan No. 126/Kpts-II/2004, tanggal 29 April 2004, TNBG ditontuhon gabe Porlak Nasional. Habitat ni porlak nasional on marragam ekosistem, adong mai harangan ambar dataran timbo, lahan na matonu, sunge, harangan batu kapur, harangan dolok dataran na pendek sahat tu harangan na mar dolok-dolok^[2]. TNBG manggohi 26% sian saluhut bidang ni Kabupaten Mandailing Natal jala maringanan di ginjang 300 sahat tu 2.145 meter di ginjang parmuaraan laut (mdpl). Puncakna maringanan di 99° 12' 45" Bujur Timur dohot 99° 47' 10" dohot 0° 27' 15" sahat 1° 01' 57" Lintang Utara. TNBG dihaliangi 68 desa di 13 kecamatan Kabupaten Mandailing Natal. Goar ni taman nasional on sian sunge batang gadis, sunge utama na mambola Kabupaten Mandailing Natal^[3]. Bidang na parjolo sahali TNBG on ima 108.000 hektar. Alai, marhite Haputuson Departemen Kehutanan No. 121 taon 2012, diorui ma bidangna gabe 72.803,75 hektar. Di bagasan luatna, adong 15.700 ha harangan na dijaga dohot 20.462 ha hutan produksi terbatas na dipangke. Harangan di bagasanna ima sian dua formasi: Formasi Air Bangis – Singkil di Bukit Barisan Barat (300-1000 mdpl) dohot ekosistem montane di Bukit Barisan (1000-1800 mdpl). Formasi Air Bangis – Singkil ganup mai satonga ni TNBG on.^[2]

Ondolan ni Uhum

Lapatan dipajongjong taman nasional ima laho paluahon angka dorbia dohot inganan ni alam. Umbahen i, adong ma ondolan ni uhum taringot tu hajongjongan ni porlak on. Haputuson Menteri Kehutanan Nomor 126/Menhut-II/2004, na dipalua tanggal 29 April 2004, paubahon laba jala ditontuhon ma harangan lindung, harangan produksi terbatas dohot harangan produksi tetap di Kabupaten Mandailing Natal, Provinsi Sumatera Utara, gabe luat laho tu pelestarian Alam TNBG. Asing ni i, marojahan tu Keputusan ni Menteri Lingkungan Hidup dohot Kehutanan Nomor SK.169/Menlhk-II/2015, Unit Pelaksanaan Teknis Porlak Nasional na ditontuhon TNBG adong mai sian harangan produksi na hot, harangan produksi terbatas dohot hutan lindung. 101.500 ha harangan lindung terkonversi, ima harangan 4 Batang Gadis I, Haranagan 5 Batang Gadis II komp I dan II, harangan 27 Batang Natal I, harangan 28 Batang Natal II, harangan 29 Banlahan Hulu, dohot harangan 30 Batang Parlampuan I, ditontuhon gabe hutan lindung di tingki panggomgomion ni Bolanda sian taon 1921 sahat tu taon 1924. Alai, luat harangan produksi na dipindahon i tarmasuk ma na parjolo i HPH PT. Gruti na bidangna 5.500 ha dohot PT. Aek Gadis Timber na bidangna 1.000 ha. Hinorhon ni haputusan ni Mahkamah Agung RI Nomor 29P/HUM/2OO4 tanggal 17 September 2008 taringot tu PT. Pertambangan Sorikmas taringot tu hak peninjauan bahan, luas ni TNBG diorui di taon 2012 sian ±108.000 ha gabe ±72.150 ha. 72.803,75 ha, TNBG diparhatopot marhite Haputuson Menteri Kehutanan RI Nomor : SK.3973/Menhut-VII/KUH/2014 dung ditontuhon batas-batasna.

Hasegaon harangan

Nungga adong 3,8 juta ha per tahun sega harangan di porla on, mardomu data sian Departemen Kehutanan di taon 2003. Sian taon 1985 dohot 1998, hasegaan harangan di Sumatera Utara sahat do 76 ribu ha per tahun. Sahat tu akhir November 2004, hasegaan harangan di Sumatera Utara alani illegal logging dohot hagoran ni harangan sahat do 694.295 ha. Sian godangna, 207.575 ha harangan lindung, 32.500 ha harangan konservasi, 54 220 ha harangan bakau, jala hira-hira 400.000 ha harangan produksi. Ala ni i, dibahen masyarakat ma songon kebijaksanaan lokal laho mambahen luat harangan lindung di luat on^[4].

Topografi

Harangan di TNBG adong mai songon dolok-dolok, adong muse dolok-dolok na marragam timbona, jala eleng hira-hira lobi tingon 40%^[5]. Timbo ni inganan on di ginjang ni parmuaraan laut isarana sian 300 meter sahat tu 2.145 mdpl^[3], jala pusuk na tumimbo adong di punsu ni Gunung Sorik Marapi. Adong do sampuran di porlak on alana topografi ni pe songon patahan do. Di porlak on, udan na jotjot ro, eleng na dominan lobi sian 40%, kondisi topografi na ima dolok-dolok, dohot luat i daerah vulkanik na aktif do, umbahen i kondisi geologis di luat on gabe labil.

Habitat ni ubat Tradisional.

Di TNBG adong do suan-suanan na dipake masyarakat setempat (suku Mandailing) laho mambaen ubat tradisional. Taringot tu panalitian taon 2019 na diuluhon Aswarina dohot donganna, suansuanan na jotjot ipake tu parubatan tradisional di halak Suku Mandailing ima 81 spesies na tarmasuk tu 38 keluarga. Spesies na paling bahat ima Compositae (11 spesies). Adong 41 jenis kategori sahit na boi diobati. Kategori sahit na boi diobati mamangke suansuanan na marubat ima: hansit butuha (14 jenis), demam (10 jenis), giak-giakon (9 jenis), luka (9 jenis), ombuombun (8 jenis) dohot tu pangubatan na asing mamangke 1 sahat tu 7 jenis suansuanan. Pamangkeon ni Suku Mandailing gabe obat patuduhon naung adong do parbinotoan ni nasida taringot tu pangkeon ni nasida secara empiris tu suan-suanan na marlapatan^[6].

Dorbia dohot Suansuanan

Inganan on bahat spesies dorbia dohot suansuanan na ilindungi, isarana tapir (tapirus indicus), Beruang Madu (Helarctos malayanus), Siamang (Hylobates syndactylus), hambing hutan (Naemorhedus sumatrae), kijang (Cervus unicolor), rusa (Muntiacus muntjak), kucing emas (Catopuma temminckii), landak (Hystrix brachyura), dohot macan tutul na marhabong (Neofelis nebulos). TNBG pe gabe inganan ni 247 jenis pidong, 47 sian i dilindungi. sia jenis pidong terancam punah, jala sampulu dua spesies na asing hampir terancam punah. Pidong na marpat sirip dohot pidong aili pe adong do di porlak on. Godangan jenis unggas ima Bucerotidae (8 jenis), Capitonidae (5 jenis), Picidae (12 jenis), dot Trogonidae (3 jenis). Tagan nai, tu flora, saonnari adong dua jenis na ilindungi, songon bunga Rafflesia dohot Kantong Semar.^[3]

Objek wisata

Wisata Kabupaten Mandailing Natal fokus do tu huta-huta na adong di luat TNBG on, khususna Huta Pastap Julu dohot Huta Sibanggor Julu. Huta Sibanggor Julu mangalehon dalan laho nakkok tu Gunung Sorik Marapi, na timbona 2.145 meter^[7]. Adong muse do inganan paradianan di Sopotinjak na boi pangkeon laho maradi dohot mambahen penelitian taringot tu bunga rafflesia.

Masala

Luat harangan na adong di luat Tor Sihayo (harangan) na dibahen gabe parjabuan nungga mardalan sian ujung taon 1970-an, tarlumobi sian angka pangaranto Nias na bongot tu luat on secara sporadis. Sahat tu taon 2008, hira-hira godang ni angka na tinggal di luat harangan na dilindungi dohot bagian-bagian ni porlak nasional nunga sahat tu hira-hira 200 keluarga dohot perkiraan godang ni pangisina sahat tu hira-hira 1000 halak lobi, jala mangingani luas lobi sian 500 hektar. Akka jolma ni huta na humaliang pe mambuka balian di harangan na diondoi i. Angka pangaranto Nias mambungka harangan jala mangganti gabe hauma marhite na manuan suansuanan sipanganon, jala adong do na manuan kakao, gambiri, jala adong do na manuan karet. Tagan ni i, halak setempat somalna mangula suan-suanan kakao dohot gambiri . Secara ekonomi, hadirion ni pangaranto Nias di luat Tor Sihayo nunga mangalehon kontribusi na ringkot jala mambuka peluang usaha na imbaru tu halak setempat, khususna di huta Muara Batang Angkola. Di na asing, adong do potensi parbadaan ni pangisi ni huta-huta na humaliang Tor Sihayo. Duansa adong klaim turian tu luat hutan. Huta Muara Batang Angkola, Hutagodang Muda dan Tangga Bosi II mangarihon tumpang tindih klaim kendali tu luat harangan na sonnari na nunga dihunduli angka pangaranto Nias. Godang do haringkotan ni pangisi ni huta na tolu on, ala dihilala terbatas do lahan pertanian na boi dope diakses nasida, umbahen I diida nasida angka luat harangan na diondion i songon sumber daya na boi dipakke nasida, na secara tradisional diklaim nasida songon tano komunal nasida, jala nasida pe secara resmi manghirim asa boi pamarenta paluahon nasida sian status luat harangan asa boi dipangke laho paturehon kesejahteraan masyarakat. Ala ni i, adong do potensi konflik horisontal di tongatonga ni angka pangaranto Nias dohot halak setempat songon i nang di tongatonga ni halak setempat sian huta na marasing. Di na asing, sude halak na mengklaim kendali tu tano i pe ingkon mangadopi pamarenta na marhuaso mangatur luat harangan on^[8]

Pustaha

[1] Porlak Nasional Gunung Leuser

[:0-2] 2.0 ^2.1 https://medan.kompas.com/read/2022/02/22/140805278/taman-nasional-batang-gadis-sejarah-dan-paket-wisata-di-dalamnya?page=all

[:1-3] 3.0 ^3.1 ^3.2 https://kids.grid.id/read/473883788/15-fakta-menarik-taman-nasional-batang-gadis-yang-berada-di-pegunungan-bukit-barisan?page=all#google_vignette

[4] ttps://ksdae.menlhk.go.id/berita/9401/pemberdayaan-masyarakat-di-taman-nasional-batang-gadis.html

[5] ttps://www.goodnewsfromindonesia.id/2022/02/02/ragam-kegiatan-ekowisata-di-taman-nasional-batang-gadis

[6] ttps://scholar.archive.org/work/kkvbfbd2djhfvpda2m6tbpcmam/access/wayback/http://ejurnal.bppt.go.id/index.php/JBBI/article/download/2772/pdf_1

[7] ttps://www.triptrus.com/destination/545/taman-nasional-batang-gadis

[8] ttps://www.academia.edu/download/37941801/Kajian_Konflik_Komunitas_Lokal_Atas_Pemanfaatan_Sumberdaya_Alam_Kawasan_Taman_Nasional_Batang_Gadis.pdf

[1]

[2]

[3]

[4]

[5]

[6]

[7]

[8]