Sigale Gale
Sigale Gale manang Si Gale-Gale sangape Sigalegale ima sada patung hau martompa manisia na dipangke ritual halak Batak Toba tingki mangubur jolma na mate di Samosir, propinsi Sumatra Utara, Indonesia. Hata Sigale Gale on rina sian hata “gale” astuanna ima "gale, heu, lepe" (lemah, lesu, lunglai).[1] Sigale Gale on tarbarita do tu angka turis sian ruar negeri.
Adat Batak di Samosir[patota | patota mualna]
Sigale gale on ima songon boneka nadipature jala dibahen marbahan hau, tompana suman songon manisia. Adong tali dipudi sigale gale naboi mandasdasna asa boi humusor-usor. Tali nai dipadomu di bagian simanjujungna dohot botohonna, dungi adong ma jolma dipudina na mangusor sigale gale on. Saonari, Sigale gale gabe sada opera di Samosir mangihut manarik angka wisatawan ro tu Samosir gabe pamajuhon pariwisata di Samosir. Alai, opera sigale gale sasahli do boi dijumpangi, ima di paradaton lumobi adong namate di Samosir.[2]
Turiturian[patota | patota mualna]
Sigale-gale ima sada patung hau tompana songon manisia, na adong diadat halak Batak Toba, somalna na maringanan di Samosir. Hata Sigale gale rona sian hata “gale”, astuanna ima "lemah" molo di hata Indonesia. Adong angka sarita di halak Batak Toba, mulani adong patung sigale gale on.[3]
Diangka sarita na jotjot dihataon, mulana ima sian hangoluan ni sada natua-tua (orang tua) najolo. Ditingki nasalpu, adong natua-tua nungga marpulu taon mangolu, alai dang adong dope anak manang gellengna baoa (laki-laki). Anak baoa dijou Raja do tingki i. Di halak Batak, ingkon baoa do naboi patorushon marga. Alani dang adong gellengna baoa, gabe lungunma hangoluanna dihatobangan nai.[3]
Dung i, adongma sada pamingkiran dinatua-tua i, asa adong naboi mandongani nasida. Ima pamingkiranna naeng mambahen sada patung sian hau, tompana suman tu ibana. Jala lao ma natua-tua i tu binanga manang sunge, markassa ma di binanga i nasida. Dibahen nasida ma patung suman songon nasida, digorga ma patung sigale gale naingkon gabe donganna haduan.[3]
Pustaha[patota | patota mualna]
- ↑ Mengeal Sigale Gale, Boneka Kayu Asal Samosir, Ada Sejak 400 Tahun Lalua, www.regional.kompas.com, Diakses tanggal 22 Januari 2022
- ↑ Si Gale Gale, www.petabudaya.belajar.kemdikbud.go.id, Diakses tanggal 22 Januari 2022
- ↑ 3.0 3.1 3.2 Lumbantobing, Jeremia S.T. (13 Nopember 2019). Mengenal Sigale Gale, www.academia.edu, Pematangsiantar, Diakses tanggal 22 Januari 2022