Sihali Aek

Sihali Aek manang jotjot digoari "marsirimpa sihali aek", ima sada hasomalan di huta Tipang na tontong dope diulahon pangisina rodi sadarion. Ia hasomalan naminaksud di son rupani, diulahon sian taon tu taon dang mansadi.

Lapatan ni Goar

Sihali Aek dijouhon mai tu akka ama manang baoa na matoras, na mangulahon manghali aek asa adong dalan ni aek tu huta Tipang. Molo di luat na deba, digoari ma i "raja bondar", sada manang piga-piga baoa namagodang nadilehon tohonan mangaradoti bondar (dalan ni aek) asa mabaor aek i dohot denggan di huta nasida.

Boasa Tong Diulahon Sahat tu Saonari?

Songon naung pinatorang di ginjang i, laho mangaradoti dalan ni aek asa anggiat tontong mardalan manang mamolus aek di sada-sada huta. Aek do mula ni hangoluan dung hosa. Adong ni aek do adong ni hangoluon di sada luat. Molo dang adong Sihali Aek di huta Tipang, tontu dang adong aek. Molo dang adong aek di huta Tipang, tontu maol ma parngoluon di Tipang. Ido umbahen dan tarunsat hasomalan manghali aek i sian huta Tipang.

Pardalanan ni Sihali Aek

Sihali Aek sasintongna sada ulaon na balga naung lohot di ganup ngolu ni pangisi huta Tipang. Mulai sian manabur boni sahat tu na manggotil (panen), saluhut na i sasintongna termasuk urutanni Sihali Aek. Puncak ni acara Sihali Aek ima manghali aek, nasomalna diulahon di bulan Oktober. Andorang so manghali aek, adong sada hasomalan nasotarlupahon jala tarlobi do ringgas ni roha ni pangini ni huta Tipang mangulahonsa, ima "manganton indahan siporhis".

Tikki Mangan Indahan Siporhis, di si ma boi taida raja jolo ni tiap-tiap turpuk maradean pollung (saling memberkati lewat umpasa/pepatah).