Siraja Batak

Di bagasan masarakat adat Batak Toba, Siraja Batak (Batak Toba: ᯘᯪᯒᯐᯅᯖᯂ᯲) ima eponim, hata na dibahen gabe panjou goar ni ompung na parjolo sian halak Batak (bangso Batak). Di siganup tarombo ni halak Batak, hata on do gabe goar ni ompung sijolo-jolo tubu ni halak Batak. Molo dienet sian turiturian ni masarakat Batak, Siraja Batak ro sian Sianjur Mulamula, Samosir. Siraja Batak dihaposi gabe pardomuan ni sude marga-marga Batak na adong di di hasiangan on.

Asal

Si Boru Deak Parujar, boru ni Batara Guru, dipatoho tu anak ni Mangala Bulan, ima Raja Odapodap. Alai ditulak Si Boru Deak Parujar. Diulahon ma sada sarat asa gabe sundat hasohotannai, i ma ala ibana naeng pasaehon pitu tonun ni bonang. Di ujung ni ari, Si Boru Deak Parujar, na mangolu di bagasan hapunjungon, manolopi parbagason tu Raja Odapodap. Nasida dibasabasahon linduat, sada baoa ima na margoar Raja Ihat Manisia jala sada boru ima na margoar Boru Itam Manisia. Ia nasida dibasabasahon tolu anak, ima Si Raja Miokmiok, Si Patundal Nabegu, dohot Si Aji Lampaslampas.

Siraja Miokmiok dipangoli tu Si Boru Mansur Purnama jala dibasabasahon tu nasida sada anak na digoari Eng Banua. Eng Banua mangalap Boru Siuman jala dibasabasahon tolu anak ima, Siraja Ujung, Siraja Jau, dohot Siraja Bonangbonang. Siraja Bonangbonang di ujung ni ari marianakkon sada anak na margoar Siraja Tantan Debata. Siraja Tantan Debata i ma na gabe natoras ni Siraja Batak.