Buku 1 Musa

Buku 1 Musa (hata Junani: Γένεσις, Génesis; hata Heber ni Bibel:בְּרֵאשִׁית‎, romanisasi: Bərēʾšīṯ, lapatanna i ma 'parmulaan') i ma buku na patujolo ni Bibel.

1 Musa ᯔᯮᯘ 1

1:1 Di mula ni mulana ditompa Debata langit dohot tano on. ᯑᯪ ᯔᯮᯞ ᯉᯪ ᯔᯮᯞᯉ ᯑᯪᯖᯔᯬ᯲ᯇ ᯑᯩᯅᯖ ᯞᯝᯖᯪ᯲ ᯑᯬᯂᯖᯬ᯲ ᯖᯉᯬ ᯀᯉᯬ᯲

1:2 Dung i tarulang ma tano i gabe halongonan jala holom di atas lung i, dung i mangareapreap ma Tondi ni Debata di atas ni angka aek. ᯑᯮᯰ ᯤ ᯖᯒᯮᯞᯰ ᯔ ᯖᯉᯬ ᯤ ᯎᯅᯩ ᯂᯞᯬᯝᯬᯉᯉ᯲ ᯐᯞ ᯂᯬᯞᯔᯬ᯲ ᯑᯪ ᯀᯖᯘ᯲ ᯞᯮᯰ ᯤ, ᯑᯮᯰ ᯤ ᯔᯝᯒᯩᯀᯇ᯲ᯒᯩᯀᯇ᯲ ᯔ ᯖᯉᯬ᯲ᯑᯪ ᯉᯪ ᯑᯩᯅᯖ ᯑᯪ ᯀᯖᯘ᯲ ᯉᯪ ᯀᯰᯄ᯦ ᯀᯀᯄᯩ᯦᯲

1:3 Dung i mangkuling ma Debata ninna: Jadi ma ho na tiur! Jadi tiur ma tutu. ᯑᯯᯮ ᯤ ᯔᯰᯄ᯦ᯮᯞᯰᯪ ᯔ ᯑᯩᯅᯖ ᯉᯉᯪ᯲ᯉ ᯐᯑᯪ ᯔ ᯂᯬ ᯉ ᯖᯪᯀᯒᯮ᯲ ᯐᯑᯪ ᯖᯪᯀᯒᯮ᯲ ᯔ ᯖᯮᯖᯮ

1:4 Nunga denggan na tiur i diida Debata, jadi dibahen Debata ma parsirangan ni na tiur sian na holom. ᯉᯮᯝ ᯑᯩᯯᯎᯉ᯲ ᯉ ᯖᯪᯀᯒᯮ᯲ ᯤ ᯑᯪᯤᯑ ᯑᯩᯅᯖ ᯐᯑᯪ ᯑᯪᯅᯂᯉᯩ᯲ ᯑᯩᯅᯖ ᯔ ᯇᯒ᯲ᯘᯪᯒᯝᯉ᯲ ᯉᯪ ᯉ ᯖᯪᯀᯒᯮ᯲ ᯘᯪᯀᯉ᯲ ᯉ ᯂᯬᯞᯔᯬ᯲

1:5 Dung i digoar Debata ma na tiur i arian, goar ni na holom i borngin. Dung i bot ma ari, torang ma ari muse, i ma ari parjolo. ᯑᯮᯰ ᯤ ᯑᯪᯎᯬᯀᯒ᯲ ᯑᯩᯅᯖ ᯔ ᯉ ᯖᯪᯀᯒᯮ᯲ ᯤ ᯀᯒᯪᯀᯉ᯲ ᯎᯬᯀᯒ᯲ ᯉᯪ ᯉ ᯂᯬᯞᯔᯬ᯲ ᯤ ᯅᯒᯬ᯲ᯝᯉᯪ᯲ ᯑᯮᯰ ᯤ ᯅᯖᯬ᯲ ᯔ ᯀᯒᯪ ᯖᯬᯒᯰ ᯔ ᯀᯒᯪ ᯔᯮᯘᯩ ᯤ ᯔ ᯀᯒᯪ ᯇᯒ᯲ᯐᯬᯞᯬ

1:6 Dung i mangkuling muse ma Debata: Jadi ma ho hajangkajang di parsitongaan ni angka aek bahen parsirangan ni aek tu aek. ᯑᯮᯰ ᯤ ᯔᯰᯂᯮᯞᯪᯰ ᯔᯮᯘᯩ ᯔ ᯑᯩᯅᯖ ᯐᯑᯪ ᯔ ᯂᯬ ᯂᯐᯰᯄ᯦ᯐᯰ ᯑᯪ ᯇᯒ᯲ᯘᯪᯖᯬᯝᯀᯉ᯲ ᯉᯪ ᯀᯰᯄ᯦ ᯀᯀᯄᯩ᯦᯲ ᯅᯂᯉᯩᯩ᯲ ᯇᯒ᯲ᯘᯪᯒᯝᯉ᯲ ᯉᯪ ᯀᯀᯄᯩ᯦᯲ ᯖᯮ ᯀᯀᯄᯩ᯦᯲

1:7 Jadi dipauli Debata ma hajangkajang i, asa disirang aek angka na di toru ni hajangkajang sian aek angka na di ginjang ni hajangkajang i, gabe manjadi ma songon i. ᯐᯑᯪ ᯑᯪᯇᯥᯞᯪ ᯑᯩᯅᯖ ᯔ ᯂᯐᯰᯄ᯦ᯐᯰ ᯤ ᯀᯘ ᯑᯪᯘᯪᯒᯰ ᯀᯀᯄᯩ᯦᯲ ᯀᯰᯄ᯦ ᯉ ᯑᯪ ᯖᯬᯒᯮ ᯉᯪ ᯂᯐᯰᯄ᯦ᯐᯰ ᯘᯪᯀᯉ᯲ ᯀᯀᯄᯩ᯦᯲ ᯀᯰᯄ᯦ ᯉ ᯑᯪ ᯎᯉᯪ᯲ᯐᯰ ᯉᯪ ᯂᯐᯰᯄ᯦ᯐᯰ ᯤ ᯎᯅᯩ ᯔᯉ᯲ᯐᯑᯪ ᯔ ᯘᯬᯝᯉᯬ᯲ ᯤ

1:8 Dung i digoar Debata ma hajangkajang i langit. Dung i bot ma ari, torang ma ari muse, i ma ari paduahon. ᯑᯮᯰ ᯤ ᯑᯪᯎᯬᯀᯒ᯲ ᯑᯩᯅᯖ ᯔ ᯂᯐᯰᯄ᯦ᯐᯰ ᯤ ᯞᯝᯖᯪ᯲ ᯑᯮᯰ ᯤ ᯅᯖᯬ᯲ ᯔ ᯀᯒᯪ ᯖᯬᯒᯰ ᯔ ᯀᯒᯪ ᯔᯮᯘᯩ ᯤ ᯔ ᯀᯒᯪ ᯇᯑᯮᯀᯂᯉᯬ᯲

1:9 Dung i ninna Debata ma: Marpungu ma hamu aek, angka na di toru ni langit i tu sada inganan, asa tarida na mahiang! Gabe manjadi ma songon i. ᯑᯮᯰ ᯤ ᯉᯉᯪ᯲ᯉ ᯑᯩᯅᯖ ᯔ ᯔᯒ᯲ᯇᯮᯝᯮ ᯔ ᯂᯔᯮ ᯀᯀᯄᯩ᯦᯲ ᯀᯰᯄ᯦ ᯉ ᯑᯪ ᯖᯬᯒᯮ ᯉᯪ ᯞᯝᯖᯪ᯲ ᯤ ᯖᯮ ᯘᯑ ᯤᯝᯉᯉ᯲ ᯀᯘ ᯖᯒᯪᯑ ᯉ ᯔᯂᯪᯀᯰ ᯎᯅᯩ ᯔᯉ᯲ᯐᯑᯪ ᯔ ᯘᯬᯝᯉᯬ᯲ ᯤ

1:10 Dung i digoar Debata ma na mahiang i tano, ia parpunguan ni angka aek laut digoar. Jadi nunga denggan diida Debata. ᯑᯮᯰ ᯤ ᯑᯪᯎᯬᯀᯒ᯲ ᯑᯩᯅᯖ ᯔ ᯉ ᯔᯂᯪᯀᯰ ᯤ ᯖᯉᯬ ᯤᯀ ᯇᯒ᯲ᯇᯮᯝᯮᯀᯉ᯲ ᯉᯪ ᯀᯰᯄ᯦ ᯀᯀᯄᯩ᯦᯲ ᯞᯀᯖᯮ᯲ ᯑᯪᯎᯬᯀᯒ᯲ ᯐᯑᯪ ᯉᯮᯝ ᯑᯰᯩᯎᯉ᯲ ᯑᯪᯤᯑ ᯑᯩᯅᯖ

1:11 Dung i ninna Debata ma: Dipantumburhon tano i ma duhutduhut dohot suansuanan, na marparbuehon boni, hau angka na marparbuehon bonina di bagasan tudos tu mansamna be di tano on, gabe manjadi ma songon i. ᯑᯮᯰ ᯤ ᯉᯉᯪ᯲ᯉ ᯑᯩᯅᯖ ᯔ ᯑᯪᯇᯉ᯲ᯖᯔᯮ᯲ᯅᯒᯮ᯲ᯂᯉᯬ᯲ ᯖᯉᯬ ᯤ ᯔ ᯑᯮᯂᯖᯮ᯲ᯑᯮᯂᯖᯮ᯲ ᯑᯬᯂᯖᯬ᯲ ᯘᯮᯀᯉ᯲ᯘᯮᯀᯉᯉ᯲ ᯉ ᯔᯒ᯲ᯇᯒ᯲ᯅᯮᯀᯩᯂᯉᯬ᯲ ᯅᯬᯉᯪ ᯂᯥ ᯀᯰᯄ᯦ ᯉ ᯔᯒ᯲ᯇᯒ᯲ᯅᯮᯀᯩᯂᯉᯬ᯲ ᯅᯬᯉᯪᯉ ᯑᯪ ᯅᯎᯘᯉ᯲ ᯖᯮᯑᯘᯬ᯲ ᯖᯮ ᯔᯉ᯲ᯘᯔ᯲ᯉ ᯅᯩ ᯑᯪ ᯖᯉᯬ ᯀᯉᯬ᯲ ᯎᯅᯧ ᯔᯉ᯲ᯐᯑᯪ ᯔ ᯘᯬᯝᯉᯬ᯲ ᯤ

1:12 Jadi dipantubuhon tano i ma duhutduhut dohot suansuanan, na marparbuehon bonina tudos tu mansamna dohot hau na marparbuehon bonina di bagasan, tudos tu mansamna. Dung i nunga denggan diida Debata. ᯐᯑᯪ ᯑᯪᯇᯉ᯲ᯖᯮᯅᯮᯂᯉᯬ᯲ ᯖᯉᯬ ᯤ ᯔ ᯑᯮᯂᯖᯮ᯲ᯑᯮᯂᯖᯮ᯲ ᯑᯬᯂᯖᯬ᯲ ᯘᯮᯀᯉ᯲ᯘᯮᯀᯉᯉ᯲ ᯉ ᯔᯒ᯲ᯇᯒ᯲ᯅᯮᯀᯩᯂᯉᯬ᯲ ᯅᯬᯉᯪᯉ ᯖᯮᯑᯘᯬ᯲ ᯖᯮ ᯔᯉ᯲ᯘᯔ᯲ᯉ ᯑᯬᯂᯖᯬ᯲ ᯂᯥ ᯉ ᯔᯒ᯲ᯇᯒ᯲ᯅᯮᯀᯩᯂᯉᯬ᯲ ᯅᯬᯉᯪᯉ ᯑᯪ ᯅᯎᯘᯉ᯲ ᯖᯮᯑᯘᯬ᯲ ᯖᯮ ᯔᯉ᯲ᯘᯔ᯲ᯉ ᯑᯮᯰ ᯤ ᯉᯮᯝ ᯑᯰᯩᯎᯉ᯲ ᯑᯪᯤᯑ ᯑᯩᯅᯖ

1:13 Jadi bot ma ari, torang ma ari muse, i ma ari patoluhon. ᯐᯑᯪ ᯅᯖᯬ᯲ ᯔ ᯀᯒᯪ ᯖᯬᯒᯰ ᯔ ᯀᯒᯪ ᯔᯮᯘᯩ ᯤ ᯔ ᯀᯒᯪ ᯇᯖᯬᯞᯮᯂᯉᯬ᯲

1:14 Dung i mangkuling muse ma Debata: Jadi ma hamu angka panondang di hajangkajang ni langit i, bahen parsirangan ni arian sian borngin, gabe tanda paboa titik ni padan dohot angka ari dohot angka taon. ᯑᯰᯮ ᯤ ᯔᯰᯄ᯦ᯮᯞᯰᯪ ᯔᯮᯘᯩ ᯔ ᯑᯩᯅᯖ  ; ᯐᯑᯪ ᯔ ᯂᯔᯮ ᯀᯰᯄ᯦ ᯇᯉᯉᯬ᯲ᯑᯰ ᯑᯪ ᯂᯐᯰᯄ᯦ᯐᯰ ᯉᯪ ᯞᯝᯖᯪ᯲ ᯤ ᯅᯂᯉᯩ᯲ ᯇᯒ᯲ᯘᯪᯒᯝᯉ᯲ ᯉᯪ ᯀᯒᯪᯀᯉ᯲ ᯘᯪᯀᯉ᯲ ᯅᯒᯬ᯲ᯝᯉᯪ᯲ ᯎᯅᯩ ᯖᯉ᯲ᯑ ᯇᯅᯬᯀ ᯖᯪᯖᯄ᯦ᯪ᯲ ᯉᯪ ᯇᯑᯉ᯲ ᯑᯬᯂᯖᯬ᯲ ᯀᯰᯄ᯦ ᯀᯒᯪ ᯑᯬᯂᯖᯬ᯲ ᯀᯰᯄ᯦ ᯖᯀᯉᯬ᯲

1:15 Jala gabe panondang angka i di hajangkajang ni langit i, asa dipatiur tano on; dung i manjadi ma songon i. ᯐᯞ ᯎᯅᯩ ᯇᯉᯉᯬ᯲ᯑᯰ ᯀᯰᯄ᯦ ᯤ ᯑᯪ ᯂᯐᯰᯄ᯦ᯐᯰ ᯉᯪ ᯞᯝᯖᯪ᯲ ᯤ ᯀᯘ ᯑᯪᯇᯖᯪᯀᯒᯮ᯲ ᯖᯉᯬ ᯀᯉᯬ᯲ ᯑᯰᯮ ᯤ ᯔᯉ᯲ᯐᯑᯪ ᯔ ᯘᯬᯝᯉᯬ᯲ ᯤ

1:16 Dung i dipauli Debata ma dua panondang angka na bolon; panondang na bolon, pangguruan ni arian, dohot panondang na metmet, pangguruan ni borngin, ro di angka bintang. ᯑᯰᯮ ᯤ ᯑᯪᯇᯥᯞᯪ ᯑᯩᯅᯖ ᯔ ᯑᯮᯀ ᯇᯉᯉᯬ᯲ᯑᯰ ᯀᯰᯄ᯦ ᯉ ᯅᯬᯞᯉᯬ᯲ ᯇᯉᯉᯬ᯲ᯑᯰ ᯉ ᯅᯬᯞᯉᯬ᯲ ᯇᯰᯎᯮᯒᯮᯀᯉ᯲ ᯉᯪ ᯀᯒᯪᯀᯉ᯲ ᯑᯬᯂᯖᯬ᯲ ᯇᯉᯉᯬ᯲ᯑᯰ ᯉ ᯔᯖᯩ᯲ᯔᯖᯩ᯲ ᯇᯰᯎᯮᯒᯮᯀᯉ᯲ ᯉᯪ ᯅᯒᯬ᯲ᯝᯉᯪ᯲ ᯒᯬ ᯑᯪ ᯀᯰᯄ᯦ ᯅᯉᯪ᯲ᯖᯰ

1:17 Dung i dibahen Debata ma nasida tu hajangkajang ni langit i, asa disondangi tano on. ᯑᯰᯮ ᯤ ᯑᯪᯅᯂᯉᯩ᯲ ᯑᯩᯅᯖ ᯔ ᯉᯘᯪᯑ ᯖᯮ ᯂᯐᯰᯄ᯦ᯐᯰ ᯉᯪ ᯞᯝᯖᯪ᯲ ᯤ ᯀᯘ ᯑᯪᯘᯉᯬ᯲ᯑᯝᯪ ᯖᯉᯬ ᯀᯉᯬ᯲

1:18 Jala manggomgomi arian dohot borngin, jala bahen parsirangan ni na tiur sian na holom. Dung i nunga denggan diida Debata. ᯐᯞ ᯔᯰᯎᯔᯬ᯲ᯎᯬᯔᯪ ᯀᯒᯪᯀᯉ᯲ ᯑᯬᯂᯖᯬ᯲ ᯅᯒᯬ᯲ᯝᯉᯪ᯲ ᯐᯞ ᯅᯂᯉᯩ᯲ ᯇᯒ᯲ᯘᯪᯒᯝᯉ᯲ ᯉᯪ ᯉ ᯖᯪᯀᯒᯮ᯲ ᯘᯪᯀᯉ᯲ ᯉ ᯂᯬᯞᯔᯬ᯲ ᯑᯰᯮ ᯤ ᯉᯮᯝ ᯑᯰᯩᯎᯉ᯲ ᯑᯪᯤᯑ ᯑᯩᯅᯖ

1:19 Jadi bot ma ari, torang ma ari muse, i ma ari paopathon. ᯐᯑᯪ ᯅᯖᯬ᯲ ᯔ ᯀᯒᯪ ᯖᯬᯒᯰ ᯔ ᯀᯒᯪ ᯔᯮᯘᯩ ᯤ ᯔ ᯀᯒᯪ ᯇᯀᯬᯇᯖ᯲ᯂᯉᯬ᯲

1:20 Dung i mangkuling muse ma Debata: Dipantubuhon angka aek i ma gulokgulok na marhosa, angka na manjirir, jala marhabangan ma angka pidong di atas tano on martongatonga langit. ᯑᯰᯮ ᯤ ᯔᯰᯄ᯦ᯮᯞᯰᯪ ᯔᯮᯘᯩ ᯔ ᯑᯩᯅᯖ ᯑᯪᯇᯉ᯲ᯖᯮᯅᯮᯂᯉᯬ᯲ ᯀᯰᯄ᯦ ᯀᯀᯄ᯦ᯩ᯲ ᯤ ᯔ ᯎᯮᯞᯄ᯦ᯬ᯲ᯎᯮᯞᯄ᯦ᯬ᯲ ᯉ ᯔᯒ᯲ᯂᯬᯘ ᯀᯰᯄ᯦ ᯉ ᯔᯉ᯲ᯐᯪᯒᯒᯪ᯲ ᯐᯞ ᯔᯒ᯲ᯂᯅᯝᯉ᯲ ᯔ ᯀᯰᯄ᯦ ᯇᯪᯑᯰᯬ ᯑᯪ ᯀᯖᯘ᯲ ᯖᯉᯬ ᯀᯉᯬ᯲ ᯔᯒ᯲ᯖᯬᯝᯖᯬᯝ ᯞᯝᯖᯪ᯲

1:21 Dung i ditompa Debata ma angka dengke na balga dohot nasa na marhosa, angka na manjiriri di bagasan aek, masiboan mansamna ro di nasa pidong angka na masiboan mansamna. Jadi nunga denggan diida Debata. ᯑᯰᯮ ᯤ ᯑᯪᯖᯔᯬ᯲ᯇ ᯑᯩᯅᯖ ᯔ ᯀᯰᯄ᯦ ᯑᯰᯩᯄᯩ᯦ ᯉ ᯅᯞ᯲ᯎ ᯑᯬᯂᯖᯬ᯲ ᯉᯘ ᯉ ᯔᯒ᯲ᯂᯬᯘ ᯀᯰᯄ᯦ ᯉ ᯔᯉ᯲ᯐᯪᯒᯪᯒᯪ ᯑᯪ ᯅᯎᯘᯉ᯲ ᯀᯀᯄᯩ᯦᯲ ᯔᯘᯪᯅᯬᯀᯉ᯲ ᯔᯉ᯲ᯘᯔ᯲ᯉ ᯒᯬ ᯑᯪ ᯉᯘ ᯇᯪᯑᯰᯬ ᯀᯰᯄ᯦ ᯉ ᯔᯘᯪᯅᯬᯀᯉ᯲ ᯔᯉ᯲ᯘᯔ᯲ᯉ ᯐᯑᯪ ᯉᯮᯝ ᯑᯰᯩᯎᯉ᯲ ᯑᯪᯤᯑ ᯑᯩᯅᯖ

1:22 Dung i dipasupasu Debata ma nasida, ninna ma: Marpinompari ma hamu, asa lam torop jala gohi hamu ma angka aek ni laut, lam torop ma dohot angka pidong di atas tano on. ᯑᯰᯮ ᯤ ᯑᯪᯇᯘᯮᯇᯘᯮ ᯑᯩᯅᯖ ᯔ ᯉᯘᯪᯑ ᯉᯉᯪ᯲ᯉ ᯔ ᯔᯒ᯲ᯇᯪᯉᯔᯬ᯲ᯇᯒᯪ ᯔ ᯂᯔᯮ ᯀᯘ ᯞᯔ᯲ ᯖᯬᯒᯇᯬ᯲ ᯐᯞ ᯎᯬᯂᯪ ᯂᯔᯮ ᯔ ᯀᯰᯄ᯦ ᯀᯀᯄᯩ᯦᯲ ᯉᯪ ᯞᯀᯖᯮ᯲ ᯞᯔ᯲ ᯖᯬᯒᯇᯬ᯲ ᯔ ᯑᯬᯂᯖᯬ᯲ ᯀᯰᯄ᯦ ᯇᯪᯑᯰᯬ ᯑᯪ ᯀᯖᯘ᯲ ᯖᯉᯬ ᯀᯉᯬ᯲

1:23 Jadi bot ma ari, torang ma ari muse; i ma ari palimahon. ᯐᯑᯪ ᯅᯖᯬ᯲ ᯔ ᯀᯒᯪ, ᯖᯬᯒᯰ ᯔ ᯀᯒᯪ ᯔᯮᯘᯩ : ᯤ ᯔ ᯀᯒᯪ ᯇᯞᯪᯔᯂᯉᯬ᯲

1:24 Dung i mangkuling muse ma Debata: Dipantubuhon tano i ma hosa angka na mangolu masiboan mansamna: Angka dorbia dohot gulokgulok dohot binatang masiboan mansamna, gabe manjadi ma songon i. ᯑᯰᯮ ᯤ ᯔᯰᯄᯱᯮᯞᯰᯪ ᯔᯮᯘᯩ ᯔ ᯑᯩᯅᯖ ; ᯑᯪᯇᯉ᯲ᯖᯮᯅᯮᯂᯉᯬ᯲ ᯖᯉᯬ ᯤ ᯔ ᯂᯬᯘ ᯀᯰᯄ᯦ ᯉ ᯔᯝᯬᯞᯮ ᯔᯘᯪᯅᯬᯀᯉ᯲ ᯔᯉ᯲ᯘᯔ᯲ᯉ ; ᯀᯰᯄᯱ ᯑᯒᯬ᯲ᯅᯪᯀ ᯑᯬᯂᯖᯬ᯲ ᯎᯮᯞᯄᯱᯬ᯲ᯎᯮᯞᯄᯱᯬ᯲ ᯑᯬᯂᯖᯬ᯲ ᯅᯪᯉᯖᯰ ᯔᯘᯪᯅᯬᯀᯉ᯲ ᯔᯉ᯲ᯘᯔ᯲ᯉ, ᯎᯅᯩ ᯔᯉ᯲ᯐᯑᯪ ᯔ ᯘᯬᯝᯉᯬ᯲ ᯤ

1:25 Dung i dipauli Debata ma angka binatang ni tano on masiboan mansamna, dohot angka dorbia masiboan mansamna, dohot gulokgulok ni tano on masiboan mansamna. Jadi nunga denggan diida Debata. ᯑᯰᯮ ᯤ ᯑᯪᯇᯥᯞᯪ ᯑᯩᯅᯖ ᯔ ᯀᯰᯄ᯦ ᯅᯪᯉᯖᯰ ᯉᯪ ᯖᯉᯬ ᯀᯉᯬ᯲ ᯔᯘᯪᯅᯬᯀᯉ᯲ ᯔᯉ᯲ᯘᯔ᯲ᯉ, ᯑᯬᯂᯖᯬ᯲ ᯀᯰᯄᯱ ᯑᯒᯬ᯲ᯅᯪᯀ ᯔᯘᯪᯅᯬᯀᯉ᯲ ᯔᯉ᯲ᯘᯔ᯲ᯉ,  ᯑᯬᯂᯖᯬ᯲ ᯎᯮᯞᯄᯱᯬ᯲ᯎᯮᯞᯄᯱᯬ᯲ ᯉᯪ ᯖᯉᯬ ᯀᯉᯬ᯲ ᯔᯘᯪᯅᯬᯀᯉ᯲ ᯔᯉ᯲ᯘᯔ᯲ᯉ. ᯐᯑᯪ ᯉᯮᯝ ᯑᯰᯩᯎᯉ᯲ ᯑᯪᯤᯑ ᯑᯩᯅᯖ

1:26 Dung i mangkuling muse ma Debata: Tole ma, itatompa ma jolma, tumiru rupanta, tudos tu pangalahonta, asa dirajai dengke angka na di laut, dohot pidong angka na martongatonga langit, dohot angka dorbia, ro di sandok tano on nang sude gulokgulok, angka na manjirir di atas tano on. ᯑᯰᯮ ᯤ ᯔᯰᯄᯰᯮᯞᯰᯪ ᯔᯮᯘᯩ  ᯔ ᯑᯩᯅᯖ ; ᯖᯬᯞᯩ ᯔ, ᯤᯖᯖᯔᯬ᯲ᯇ ᯔ ᯐᯞᯬ᯲ᯔ, ᯖᯮᯔᯪᯒᯮ ᯒᯮᯇᯉ᯲ᯖ, ᯖᯮᯑᯘᯬ᯲ ᯖᯮ ᯇᯝᯞᯂᯉᯬ᯲ᯖ, ᯀᯘ ᯑᯪᯒᯐᯤ ᯑᯰᯩᯄᯱᯩ ᯀᯰᯄ᯦ ᯉ ᯑᯪ ᯞᯀᯖᯮ᯲, ᯑᯬᯂᯖᯬ᯲ ᯇᯪᯑᯰᯬ ᯀᯰᯄᯱ ᯉ ᯔᯒ᯲ᯖᯬᯝᯖᯬᯝ ᯞᯝᯖᯪ᯲, ᯑᯬᯂᯖᯬ᯲ ᯀᯰᯄᯱ ᯑᯒᯬ᯲ᯅᯪᯀ, ᯒᯬ ᯑᯪ ᯘᯉ᯲ᯑᯄᯱᯬ᯲ ᯖᯉᯬ ᯀᯉᯬ᯲ ᯉᯰ ᯘᯮᯑᯩ ᯎᯮᯞᯄᯱᯬ᯲ᯎᯮᯞᯄᯱᯬ᯲, ᯀᯰᯄᯱ ᯉ ᯔᯉ᯲ᯐᯪᯒᯒᯪ᯲ ᯑᯪ ᯀᯖᯘ᯲ ᯖᯉᯬ ᯀᯉᯬ᯲

1:27 Jadi ditompa Debata ma jolma i tumiru rupana, rupana ditiruanhon Debata laho manompa ibana, baoa dohot boruboru nasida ditompa. ᯐᯑᯪ ᯑᯪᯖᯔᯬ᯲ᯇ ᯑᯩᯅᯖ ᯔ ᯐᯞᯬ᯲ᯔ ᯤ ᯖᯮᯔᯪᯒᯮ ᯒᯮᯇᯉ, ᯒᯮᯇᯉ ᯑᯪᯖᯪᯒᯮᯀᯉ᯲ᯂᯉᯬ᯲ ᯑᯩᯅᯖ ᯞᯂᯬ ᯔᯉᯔᯬ᯲ᯇ ᯤᯅᯉ, ᯅᯀᯬᯀ ᯑᯬᯂᯖᯬ᯲ ᯅᯬᯒᯮᯅᯬᯒᯮ ᯉᯘᯪᯑ ᯑᯪᯖᯔᯬ᯲ᯇ

1:28 Dung i dipasupasu Debata ma nasida, ninna Debata ma tu nasida: Marpinompari ma hamu, asa sopar hamu, jala gohi hamu sandok tano on, jala patunduk hamu; jala raja i hamu dengke angka na di laut dohot pidong angka na martongatonga langit ro di sude binatang, angka na manjirir di atas tano on. ᯑᯰᯮ ᯤ ᯑᯪᯇᯘᯮᯇᯘᯮ ᯑᯩᯅᯖ ᯔ ᯉᯘᯪᯑ, ᯉᯉᯪ᯲ᯉ ᯑᯩᯅᯖ ᯔ ᯖᯮ ᯉᯘᯪᯑ ; ᯔᯒ᯲ᯇᯪᯉᯔᯬ᯲ᯇᯒᯪ ᯔ ᯂᯔᯮ, ᯀᯘ ᯘᯬᯇᯒ᯲ ᯂᯔᯮ, ᯐᯞ ᯎᯬᯂᯪ ᯂᯔᯮ ᯔ ᯘᯉ᯲ᯑᯄᯱᯬ᯲ ᯖᯉᯬ ᯀᯉᯬ᯲, ᯐᯞ ᯇᯖᯉᯮ᯲ᯑᯄᯱᯮ᯲ ᯂᯔᯮ ; ᯐᯞ ᯒᯐᯤ ᯂᯔᯮ ᯑᯰᯩᯄᯱᯩ ᯀᯰᯄᯱ ᯉ ᯑᯪ ᯞᯀᯖᯮ᯲ ᯑᯬᯂᯖᯬ᯲ ᯇᯪᯑᯰᯬ ᯀᯰᯄᯱ  ᯉ ᯔᯒ᯲ᯖᯬᯝᯖᯬᯝ ᯞᯝᯖᯪ᯲ ᯒᯬ ᯑᯪ ᯘᯮᯑᯩ ᯅᯪᯉᯖᯰ, ᯀᯰᯄᯱ ᯉ ᯔᯉ᯲ᯐᯪᯒᯒᯪ᯲ ᯑᯪ ᯀᯖᯘ᯲ ᯖᯉᯬ ᯀᯉᯬ᯲

1:29 Dung i ninna Debata ma: Boti ma i, nunga hulehon tu hamu nasa suansuanan na marparbuehon boni di sandok tano on, ro di sude hau angka na marparbue sisuanon, bahen panganonmuna ma i. ᯑᯰᯮ ᯤ ᯉᯉᯪ᯲ᯉ ᯑᯩᯅᯖ ᯔ ; ᯅᯬᯖᯪ ᯔ ᯤ, ᯉᯮᯝ ᯂᯮᯞᯩᯂᯉᯬ᯲ ᯖᯮ ᯂᯔᯮ ᯉᯘ ᯘᯮᯀᯉ᯲ᯘᯮᯀᯉᯉ᯲ ᯉ ᯔᯒ᯲ᯇᯒ᯲ᯅᯮᯀᯩᯂᯉᯬ᯲ ᯅᯬᯉᯪ ᯑᯪ ᯘᯉ᯲ᯑᯄᯱᯬ᯲ ᯖᯉᯬ ᯀᯉᯬ᯲,  ᯒᯬ ᯑᯪ ᯘᯮᯑᯩ ᯂᯥ ᯀᯰᯄᯱ ᯉ ᯔᯒ᯲ᯇᯒ᯲ᯅᯮᯀᯩ ᯘᯪᯘᯮᯀᯉᯉᯬ᯲, ᯅᯂᯉᯩ᯲ ᯇᯝᯉᯉᯬ᯲ᯔᯮᯉ ᯔ ᯤ

1:30 Alai anggo tu sude angka binatang ni tano on dohot tu angka pidong na martongatonga langit, ro di sude na manjirir di atas tano on, angka na marhosa di bagasan: Bulung ni angka suansuanan (hulehon) bahen panganonna, gabe manjadi ma songon i. ᯀᯞᯤ ᯀᯰᯎᯬ ᯖᯮ ᯘᯮᯑᯩ ᯀᯰᯄᯱ ᯅᯪᯉᯖᯰ ᯉᯪ ᯖᯉᯬ ᯀᯉᯬ᯲ ᯑᯬᯂᯖᯬ᯲ ᯖᯮ ᯀᯰᯄᯱ ᯇᯪᯑᯰᯬ ᯉ ᯔᯒ᯲ᯖᯬᯝᯖᯬᯝ ᯞᯝᯖᯪ᯲, ᯒᯬ ᯑᯪ ᯘᯮᯑᯩ ᯀᯰᯄᯱ ᯉ ᯔᯉ᯲ᯐᯪᯒᯒᯪ᯲ ᯑᯪ ᯀᯖᯘ᯲ ᯖᯉᯬ ᯀᯉᯬ᯲, ᯀᯰᯄᯱ ᯉ ᯔᯒ᯲ᯂᯬᯘ ᯑᯪ ᯅᯎᯘᯉ᯲; ᯅᯮᯞᯰᯮ ᯉᯪ ᯀᯰᯄᯱ ᯘᯮᯀᯉ᯲ᯘᯮᯀᯉᯉ᯲ (ᯂᯮᯞᯩᯂᯉᯬ᯲) ᯅᯂᯉᯩ᯲ ᯇᯝᯉᯉᯬ᯲ᯉ, ᯎᯅᯩ ᯔᯉ᯲ᯐᯑᯪ ᯔ ᯘᯬᯝᯉᯬ᯲ ᯤ

1:31 Dung i ditilik Debata ma sude na tinompana i, jadi nunga denggan situtu. Dung i bot ma ari, torang ma ari muse, i ma ari paonomhon. ᯑᯰᯮ ᯤ ᯑᯪᯖᯪᯞᯄᯱᯪ᯲ ᯑᯩᯅᯖ ᯔ ᯘᯮᯑᯩ ᯉ ᯖᯪᯉᯔᯬ᯲ᯇᯉ ᯤ, ᯐᯑᯪ ᯉᯮᯝ ᯑᯰᯩᯎᯉ᯲ ᯘᯪᯖᯮᯖᯮ. ᯑᯰᯮ ᯤ ᯅᯖᯬ᯲ ᯔ ᯀᯒᯪ, ᯖᯬᯒᯰ ᯔ ᯀᯒᯪ ᯔᯮᯘᯩ, ᯤ ᯔ ᯀᯒᯪ ᯇᯀᯬᯉᯔᯬ᯲ᯂᯉᯬ᯲

1 Musa ᯔᯮᯘ 2

2:1 Asa sun ma langit dohot tano on ro di isina sudena.

ᯀᯘ ᯘᯉᯮ᯲ ᯔ ᯞᯝᯖᯪ᯲ ᯑᯬᯂᯖᯬ᯲ ᯖᯉᯬ ᯀᯉᯬ᯲ ᯒᯬ ᯑᯪ ᯤᯘᯪᯉ ᯘᯘᯮᯑᯩᯉ

2:2 Jadi dung sun dibahen Debata jadijadianna i di ari papituhon, maradian ma Ibana di ari papituhon sian nasa ulaonna, na binahenna i.

ᯐᯑᯪ ᯑᯰᯮ ᯘᯉᯮ᯲ ᯑᯪᯅᯂᯉᯩ᯲ ᯑᯩᯅᯖ ᯐᯑᯪᯐᯑᯪᯀᯉ᯲ᯉ ᯤ ᯑᯪ ᯀᯒᯪ ᯇᯇᯪᯖᯮᯂᯉᯬ᯲, ᯔᯒᯑᯪᯀᯉ᯲ ᯔ ᯤᯅᯉ ᯑᯪ ᯀᯒᯪ ᯇᯇᯪᯖᯮᯂᯉᯬ᯲ ᯘᯪᯀᯉ᯲ ᯉᯘ ᯥᯞᯀᯉᯬ᯲ᯉ, ᯉ ᯅᯪᯉᯂᯉᯩ᯲ᯉ ᯤ

2:3 Dung i dipasupasu Debata ma ari papituhon i, jala diparbadiai, ala na maradian Ibana disi sian nasa jadijadianna, na tinompa ni Debata laho pasunhon.

ᯑᯰᯮ ᯤ ᯑᯪᯇᯘᯮᯇᯘᯮ ᯑᯩᯅᯖ ᯔ ᯀᯒᯪ ᯇᯇᯪᯖᯮᯂᯉᯬ᯲ ᯤ, ᯐᯞ ᯑᯪᯇᯒ᯲ᯅᯑᯪᯀᯤ, ᯀᯞ ᯉ ᯔᯒᯑᯪᯀᯉ᯲ ᯤᯅᯉ ᯑᯪᯘᯪ ᯘᯪᯀᯉ᯲ ᯉᯘ ᯐᯑᯪᯐᯑᯪᯀᯉ᯲ᯉ, ᯉ ᯖᯪᯉᯔᯬ᯲ ᯉᯪ ᯑᯩᯅᯖ ᯞᯂᯬ ᯇᯘᯉᯮ᯲ᯂᯉᯬ᯲

2:4 Songon i ma panjadijadi ni langit dohot tano, di na tartompa angka i, di ari panompaon ni Debata Jahowa di tano dohot langit.

ᯘᯬᯝᯉᯬ᯲ ᯤ ᯔ ᯇᯉ᯲ᯐᯑᯪᯐᯑᯪ ᯉᯪ ᯞᯝᯖᯪ᯲ ᯑᯬᯂᯖᯬ᯲ ᯖᯉᯬ, ᯑᯪ ᯉ ᯖᯒ᯲ᯖᯔᯬ᯲ᯇ ᯀᯰᯄᯱ ᯤ, ᯑᯪ ᯀᯒᯪ ᯇᯉᯔᯬ᯲ᯇᯀᯉᯬ᯲ ᯉᯪ ᯑᯩᯅᯖ ᯐᯂᯬᯋ ᯑᯪ ᯖᯉᯬ ᯑᯬᯂᯖᯬ᯲ ᯞᯝᯖᯪ᯲.

2:5 Tagan so adong dope di tano on nasa ramba, jala tagan so martumbur dope nasa bulungbulung di ladang, ai ndang dope diparo Debata Jahowa udan tu tano on, jala ndang adong dope jolma na mangula tano i.

ᯖᯎᯉ᯲ ᯘᯬ ᯀᯑᯰᯬ ᯑᯬᯇᯩ ᯑᯪ ᯖᯉᯬ ᯀᯉᯬ᯲ ᯉᯘ ᯒᯔ᯲ᯅ, ᯐᯞ ᯖᯎᯉ᯲ ᯘᯬ ᯔᯒ᯲ᯖᯔᯮ᯲ᯅᯒᯮ᯲ ᯑᯬᯇᯩ  ᯉᯘ ᯅᯮᯞᯰᯮᯅᯮᯞᯰᯮ ᯑᯪ ᯞᯑᯰ, ᯀᯤ ᯉ᯲ᯑᯰ ᯀᯑᯰᯬ ᯑᯬᯇᯩ ᯑᯪᯇᯒᯬ ᯑᯩᯅᯖ ᯐᯂᯬᯋ ᯥᯑᯉ᯲ ᯖᯮ ᯖᯉᯬ ᯀᯉᯬ᯲ ᯐᯞ ᯉᯑᯰ ᯀᯑᯰᯬ ᯪᯇᯩ ᯐᯞᯬ᯲ᯔ ᯉ ᯔᯝᯮᯞ ᯖᯉᯬ ᯤ

2:6 Alai martimpul ma uap sian tano on, gabe dibornohi sandok sisik ni tano on.

ᯀᯞᯤ ᯔᯒ᯲ᯖᯔᯪ᯲ᯇᯞᯮ᯲ ᯔ ᯥᯀᯇ᯲ ᯘᯪᯀᯉ᯲ ᯖᯉᯬ ᯀᯉᯬ᯲, ᯎᯅᯩ ᯑᯪᯅᯒᯬ᯲ᯉᯬᯂᯪ ᯘᯉ᯲ᯑᯂᯬ᯲ ᯘᯪᯘᯄᯱᯪ᯲ ᯉᯪ ᯖᯉᯬ ᯀᯉᯬ

2:7 Dung i dijadihon Debata Jahowa ma jolma i sian orbuk ni tano on jala diullushon tu bagasan bungbung ni igungna hosa hangoluan i, gabe martondi na mangolu jolma i.

ᯑᯰᯮ  ᯤ ᯑᯪᯐᯑᯪᯂᯉᯬ᯲ ᯑᯩᯅᯖ ᯐᯂᯬᯋ ᯔ ᯐᯞᯬ᯲ᯔ ᯤ ᯘᯪᯀᯉ᯲ ᯀᯒᯬ᯲ᯅᯄᯱᯮ᯲ ᯉᯪ ᯖᯉᯬ ᯀᯉᯬ᯲ ᯐᯞ ᯑᯪᯀᯞᯮ᯲ᯞᯘᯮ᯲ᯂᯉᯬ᯲ ᯖᯮ ᯅᯎᯘᯉ᯲ ᯅᯰᯮᯅᯰᯮ  ᯉᯪ ᯤᯎᯰᯮᯉ ᯂᯬᯘ ᯂᯝᯬᯞᯮᯀᯉ᯲ ᯤ, ᯎᯅᯩ ᯔᯒ᯲ᯖᯉᯬ᯲ᯑᯪ ᯉ ᯔᯝᯬᯞᯮ ᯐᯞᯬ᯲ᯔ ᯤ.

2:8 Dung i dipungka Debata Jahowa ma sada porlak di Eden tartungkan habinsaran, jadi tusi ma dibahen jolma na jinadihonna i.

ᯑᯰᯮ ᯤ ᯑᯪᯇᯰᯮᯄᯱ ᯑᯩᯅᯖ ᯐᯂᯬᯋ ᯔ ᯘᯑ ᯇᯒᯬ᯲ᯞᯄᯱ᯲ ᯑᯪ ᯀᯩᯑᯉᯩ᯲ ᯖᯒ᯲ᯖᯰᯮᯄᯱᯉ᯲ ᯂᯅᯉᯪ᯲ᯘᯒᯉ᯲, ᯐᯑᯮᯪ ᯖᯮᯘᯪ ᯔ ᯑᯪᯅᯂᯉᯩ᯲ ᯐᯞᯬ᯲ᯔ ᯉ ᯐᯪᯉᯑᯪᯂᯉᯬ᯲ᯉ ᯤ

2:9 Dung i dipantubuhon Debata Jahowa ma sian tano i nasa hau, angka na denggan idaon, jala tabo panganon, ro di hau hangoluan na di parsitongaan ni porlak i, nang hau parbinotoan ni na denggan dohot na roa.

ᯑᯰᯮ ᯤ ᯑᯪᯇᯉ᯲ᯖᯮᯅᯮᯂᯉᯬ᯲ ᯑᯩᯅᯖ ᯐᯂᯬᯋ ᯔ ᯘᯪᯀᯉ᯲ ᯖᯉᯬ ᯤ ᯉᯘ ᯂᯥ, ᯀᯰᯄᯱ ᯉ ᯑᯰᯩᯎᯉ᯲ ᯤᯑᯀᯉᯬ᯲, ᯐᯞ ᯖᯅᯬ ᯇᯝᯉᯉᯬ᯲, ᯒᯬ ᯑᯪ ᯂᯥ ᯂᯝᯬᯞᯮᯀᯉ᯲ ᯉ ᯑᯪ ᯇᯒ᯲ᯘᯪᯖᯬᯝᯀᯉ᯲ ᯉᯪ ᯇᯒᯬ᯲ᯞᯄᯱ᯲ ᯤ, ᯉᯰ  ᯂᯥ ᯇᯒ᯲ᯅᯪᯉᯬᯖᯬᯀᯉ᯲ ᯉᯪ ᯉ ᯑᯰᯩᯎᯉ᯲ ᯑᯬᯂᯖᯬ᯲ ᯉ ᯒᯬᯀ.

2:10 Dung i ruar ma sada batang aek sian Eden i, asa dibornohi porlak i, manirpang ma sian i gabe opat batang aek bolon.

ᯑᯰᯮ ᯤ ᯒᯮᯀᯒ᯲ ᯔ ᯘᯑ ᯅᯖᯰ ᯀᯀᯄᯱᯩ᯲ ᯘᯪᯀᯉ᯲ ᯀᯩᯑᯉᯩ᯲ ᯤ, ᯀᯘ ᯑᯪᯅᯒᯬ᯲ᯉᯬᯂᯪ ᯇᯒᯬ᯲ᯞᯄᯱ᯲ ᯤ, ᯔᯉᯒᯪ᯲ᯇᯰ ᯔ ᯘᯪᯀᯉ᯲ ᯤ ᯎᯅᯩ ᯀᯬᯇᯖ᯲ ᯅᯖᯰ ᯀᯀᯄᯱᯩ᯲ ᯅᯬᯞᯉᯬ᯲

2:11 Goar ni parjolo: Pison, na mangaliati sandok tano Hevila, panombangan sere disi.

ᯎᯬᯀᯒ᯲ ᯉᯪ ᯇᯒ᯲ᯐᯬᯞᯬ ; ᯇᯪᯘᯉᯬ᯲, ᯉ ᯔᯝᯞᯪᯀᯖᯪ ᯘᯉ᯲ᯑᯄᯱᯬ᯲ ᯖᯉᯬ ᯂᯩᯇᯪᯞ, ᯇᯉᯔᯬ᯲ᯅᯝᯉ᯲ ᯘᯩᯒᯩ ᯑᯪᯘᯪ

2:12 Jala meram situtu sere ni na saluat i. Jumpang do huhut disi landus dohot batu soham.

ᯐᯞ ᯔᯩᯖᯔ᯲ ᯘᯪᯖᯮᯖᯮ ᯘᯩᯒᯩ ᯉᯪ ᯉ ᯘᯞᯮᯀᯖ᯲ ᯤ, ᯐᯔᯮ᯲ᯇᯰ ᯑᯬ ᯂᯮᯂᯖᯮ᯲ ᯑᯪᯘᯪ ᯞᯉ᯲ᯑᯘᯮ᯲ ᯑᯬᯂᯖᯬ᯲ ᯅᯖᯮ ᯘᯬᯂᯔ᯲

2:13 Ia goar ni batang aek paduahon: Gihon, na mangaliati sandok tano Kus.

ᯤᯀ ᯎᯬᯀᯒ᯲ ᯉᯪ ᯅᯖᯰ ᯀᯀᯄᯰᯩ᯲ ᯇᯑᯀᯂᯉᯬ᯲ ; ᯎᯪᯂᯉᯬ᯲, ᯉ ᯔᯝᯞᯪᯀᯖᯪ ᯘᯉ᯲ᯑᯄᯱᯬ᯲ ᯖᯉᯬ ᯄᯱᯘᯮ᯲

2:14 Ia goar ni batang aek patoluhon: Hidekel (Tigris), na mamolus tungkan habinsaran sian Assur. Ia batang aek paopathon, i ma Euprat.

ᯤᯀ ᯎᯬᯀᯒ᯲ ᯉᯪ ᯅᯖᯰ ᯯ ᯀᯀᯄᯰᯩ᯲ ᯇᯖᯬᯞᯮᯂᯉᯬ᯲ ; ᯂᯪᯑᯩᯄᯱᯞᯩ᯲ (ᯖᯪᯎ᯲ᯒᯘᯪ᯲), ᯉ ᯔᯔᯬᯞᯘᯮ᯲ ᯖᯰᯮᯄᯱᯉ᯲ ᯂᯅᯉᯪ᯲ᯘᯒᯉ᯲ ᯘᯪᯀᯉ᯲ ᯀᯘ᯲ᯘᯒᯮ᯲, ᯤᯀ ᯅᯖᯰ ᯀᯀᯄᯰᯩ᯲ ᯇᯀᯬᯇᯖ᯲ᯂᯉᯬ᯲, ᯤ ᯔ ᯀᯩᯥᯇ᯲ᯒᯖ᯲.

2:15 Dung i ditogihon Debata Jahowa ma jolma i paojakkon ibana tu porlak Eden i, asa dipaulaula jala diramoti.

ᯑᯰᯮ ᯤ ᯑᯪᯖᯬᯎᯪᯂᯉᯬ᯲ ᯑᯩᯅᯖ ᯐᯂᯬᯋ ᯔ ᯐᯞᯬ᯲ᯔ ᯤ ᯇᯀᯬᯐᯄᯱ᯲ᯂᯉᯬ᯲ ᯤᯅᯉ ᯖᯮ ᯇᯒᯬ᯲ᯞᯄᯱ᯲ ᯀᯩᯑᯉᯩ᯲ ᯤ, ᯀᯘ ᯑᯪᯇᯥᯞᯥᯞ ᯐᯞ ᯑᯪᯒᯔᯬᯖᯪ

2:16 Dung i dipatik Debata Jahowa ma jolma i, ninna ma: Jadi do panganonmu sian nasa hau di bagasan porlak on.

ᯑᯰᯮ ᯤ ᯝᯪᯇᯖᯄᯱᯪ᯲ ᯑᯩᯅᯖ ᯐᯂᯬᯋ ᯔ ᯐᯞᯬ᯲ᯔ ᯤ, ᯉᯉᯪ᯲ᯉ ᯔ ; ᯐᯑᯪ ᯑᯬ  ᯇᯝᯉᯉᯬ᯲ᯔᯮ ᯘᯪᯀᯉ᯲ ᯉᯘ ᯂᯥ ᯑᯪ ᯅᯎᯘᯉ᯲ ᯇᯒᯬ᯲ᯞᯄᯱ᯲ ᯀᯉᯬ᯲

2:17 Alai anggo sian hau parbinotoan ni na denggan dohot na roa, ndang jadi panganonmu; ai sadari dipangan ho sian i, sai na mate do ho.

ᯀᯞᯤ ᯀᯰᯎᯬ ᯘᯪᯀᯉ᯲ ᯂᯥ ᯇᯒ᯲ᯅᯪᯉᯬᯖᯬᯀᯉ᯲ ᯉᯪ ᯉ ᯑᯰᯩᯎᯉ᯲ ᯑᯬᯂᯖᯬ᯲ ᯉ ᯒᯬᯀ, ᯉ᯲ᯑᯰ ᯐᯑᯪ ᯇᯝᯉᯉᯬ᯲ᯔᯮ ; ᯀᯤ ᯘᯑᯒᯪ ᯑᯪᯇᯝᯉ᯲ ᯂᯬ ᯘᯪᯀᯉ᯲ ᯤ, ᯘᯤ ᯉ ᯔᯖᯩ ᯑᯬ ᯂᯬ

2:18 Dung i ninna Debata Jahowa ma: Ndang jadi punjung jolma i; hubahen ma di ibana sada pangurupina bahen donganna.

ᯑᯰᯮ ᯤ ᯉᯉᯪ᯲ᯉ ᯑᯩᯅᯖ ᯐᯂᯬᯋ ᯔ; ᯉ᯲ᯑᯰ ᯐᯑᯪ ᯇᯉᯮ᯲ᯐᯰᯮ ᯐᯞᯬ᯲ᯔ ᯤ : ᯂᯮᯅᯂᯉᯩ᯲ ᯔ ᯑᯪ ᯤᯅᯉ ᯘᯑ ᯇᯝᯮᯒᯮᯇᯪᯉ ᯅᯂᯉᯩ᯲ ᯑᯬᯝᯉ᯲ᯉ

2:19 Ai dung sun dijadihon Debata Jahowa sian tano i nasa binatang di ladang ro di sude pidong angka na martongatonga langit, ditogihon ma i tu si Adam, asa diida manang beha goaranna; jala ia i dibahen si Adam goar ni nasa na marhosa laos i do goarna.

ᯀᯤ ᯑᯰᯮ ᯘᯉᯮ᯲ ᯑᯪᯐᯑᯪᯂᯉᯬ᯲ ᯑᯩᯅᯖ ᯐᯂᯬᯋ ᯘᯪᯀᯉ᯲ ᯖᯉᯬ ᯤ ᯉᯘ ᯅᯪᯉᯖᯰ ᯑᯪ ᯞᯑᯰ ᯒᯬ  ᯑᯪ ᯘᯮᯑᯩ ᯇᯪᯑᯰᯬ ᯀᯰᯄᯱ  ᯉ ᯔᯒ᯲ᯖᯬᯝᯖᯬᯝ ᯞᯝᯖᯪ᯲, ᯑᯪᯖᯬᯎᯪᯂᯉᯬ᯲ ᯔ ᯤ ᯖᯮ ᯘᯪ ᯀᯑᯔ᯲, ᯀᯘ ᯑᯪᯤᯑ ᯔᯉᯰ ᯅᯩᯂ ᯎᯬᯀᯒᯉ᯲ᯉ ; ᯐᯞ ᯤᯀ ᯤ ᯑᯪᯅᯂᯉᯩ᯲ ᯘᯪ ᯀᯑᯔ᯲ ᯎᯬᯀᯒ᯲ ᯉᯪ ᯉᯘ ᯉ ᯔᯒ᯲ᯂᯬᯘ ᯞᯀᯘᯬ᯲ ᯤ ᯑᯬ ᯎᯬᯀᯒ᯲ᯉ

2:20 Jadi dibahen si Adam ma goar ni nasa pahanpahanan ro di pidong angka na martongatonga langit dohot nasa na manggulmit di tano on. Alai anggo di si Adam ndang adong jumpang pangurupi bahen donganna.

ᯐᯑᯪ ᯑᯪᯅᯂᯉᯩ᯲ ᯘᯪ ᯀᯑᯔ᯲ ᯔ ᯎᯬᯀᯒ᯲ ᯉᯪ ᯉᯘ ᯇᯂᯉ᯲ᯇᯂᯉᯉ᯲ ᯒᯬ ᯑᯪ ᯇᯪᯑᯰᯬ ᯀᯰᯄᯱ ᯉ ᯔᯒ᯲ᯖᯬᯝᯖᯬᯝ ᯞᯝᯖᯪ᯲ ᯑᯬᯂᯖᯬ᯲ ᯉᯘ ᯉ ᯔᯰᯎᯞᯮ᯲ᯔᯖᯪ᯲ ᯑᯪ ᯖᯉᯬ ᯀᯉᯬ᯲. ᯀᯞᯤ ᯀᯰᯎᯬ ᯑᯪ ᯘᯪ ᯀᯑᯔ᯲ ᯉ᯲ᯑᯰ ᯀᯑᯰᯬ ᯐᯔᯮ᯲ᯇᯰ ᯇᯝᯮᯒᯮᯇᯪ ᯅᯂᯉᯩ᯲ ᯑᯬᯝᯉ᯲ᯉ

2:21 Dung i tarlalap modom ma si Adam dibahen Debata Jahowa, jadi dienet ma sada sian rusukna, jala dilangkophon sibuk tu pambuatanna i.

ᯑᯰᯮ ᯤ ᯖᯒ᯲ᯞᯞᯇ᯲ ᯔᯬᯑᯔᯬ᯲ ᯔ ᯘᯪ ᯀᯑᯔ᯲ ᯑᯪᯅᯂᯉᯩ᯲  ᯑᯩᯅᯖ ᯐᯂᯬᯋ, ᯐᯑᯪ ᯑᯪᯀᯩᯉᯖᯩ᯲ ᯔ ᯘᯑ ᯘᯪᯀᯉ᯲ ᯒᯮᯘᯄᯱᯮ᯲ᯉ, ᯐᯞ ᯑᯪᯞᯰᯄᯱᯇᯬ᯲ᯂᯉᯬ᯲ ᯘᯪᯅᯄᯱᯮ᯲ ᯖᯮ ᯇᯔ᯲ᯅᯮᯀᯖᯉ᯲ᯉ ᯤ

2:22 Dung i dipauli Debata Jahowa rusuk na binuatna i sian si Adam, bahen boruboru, jala ditogu ibana tu si Adam.

ᯑᯰᯮ ᯤ ᯑᯪᯇᯥᯞᯪ ᯑᯩᯅᯖ ᯐᯂᯬᯋ ᯒᯮᯘᯄᯱᯮ᯲ ᯉ ᯅᯪᯉᯮᯀᯖ᯲ᯉ ᯤ ᯘᯪᯀᯉ᯲ ᯘᯪ ᯀᯑᯔ᯲, ᯅᯂᯉᯩ᯲ ᯅᯬᯒᯮᯅᯬᯒᯮ, ᯐᯞ ᯑᯪᯖᯬᯎᯮ ᯤᯅᯉ ᯖᯮ ᯘᯪ ᯀᯑᯔ᯲

2:23 Dung i ninna si Adam ma: On do sahali holiholi sian angka holiholingku, jala sibuk sian sibukku; goaron ma ibana: Jolma ni baoa, ala sian baoa ibana binuat.

ᯑᯰᯮ ᯤ ᯉᯉᯪ᯲ᯉ ᯘᯪ ᯀᯑᯔ᯲ ᯔ ; ᯀᯉᯬ᯲ ᯑᯬ ᯘᯂᯞᯪ ᯂᯬᯞᯪᯂᯬᯞᯪ ᯘᯪᯀᯉ᯲ ᯂᯬᯞᯪᯂᯬᯞᯰᯪᯄᯱᯮ, ᯐᯞ ᯘᯪᯅᯄᯱᯮ᯲ ᯘᯪᯀᯉ᯲ ᯘᯪᯅᯄᯱᯮ᯲ᯄᯱᯮ ; ᯎᯬᯀᯒᯉᯬ᯲ ᯔ ᯤᯅᯉ ; ᯐᯞᯬ᯲ᯔ ᯉᯪ ᯅᯀᯬᯀ, ᯀᯞ ᯘᯪᯀᯉ᯲ ᯤᯅᯉ ᯅᯪᯉᯮᯀᯖ᯲

2:24 Dibahen i tadingkonon ni baoa do amana dohot inana mandongani jolmana, jadi sada sibuk nasida.

ᯑᯪᯅᯂᯉᯩ᯲ ᯤ ᯖᯑᯰᯪᯄᯱᯬᯉᯉᯬ᯲ ᯉᯪ ᯅᯀᯬᯀ ᯑᯬ ᯀᯔᯉ ᯑᯬᯂᯖᯬ᯲ ᯤᯉᯉ ᯔᯉ᯲ᯑᯬᯝᯉᯪ ᯐᯞᯬ᯲ᯔᯉ, ᯐᯑᯪ ᯘᯑ ᯘᯪᯅᯄᯱᯮ᯲ ᯉᯘᯪᯑ

2:25 Marsaemara do nasida duansa, si Adam dohot jolmana i, jala ndang maila nasida.

ᯔᯒ᯲ᯘᯀᯩᯔᯒ ᯑᯬ ᯉᯘᯪᯑ ᯑᯮᯀᯉ᯲ᯘ, ᯘᯪ ᯀᯑᯔ᯲ ᯑᯬᯂᯖᯬ᯲ ᯐᯞᯬ᯲ᯔᯉ ᯤ, ᯐᯞ ᯉ᯲ᯑᯰ ᯔᯤᯞ ᯉᯘᯪᯑ

1 Musa ᯔᯮᯘ 3

3:1 Alai ulok do na umbisuk sian nasa na manggulmit di ladang, angka na jinadihon ni Debata Jahowa, jadi didok ma mandok boruboru i: Atehe tongon do didok Debata, na so jadi panganonmuna sian saluhut hau angka na di porlak on? ᯀᯞᯤ ᯥᯞᯄᯱᯬ᯲ ᯑᯬ ᯉ ᯀᯔᯮ᯲ᯅᯪᯘᯄᯱᯮ᯲ ᯘᯪᯀᯉ᯲ ᯉᯘ ᯉ ᯔᯰᯎᯞᯮ᯲ᯔᯖᯪ᯲ ᯑᯪ ᯞᯑᯰ, ᯀᯰᯄᯱ ᯉ ᯐᯪᯉᯑᯪᯂᯉᯬ᯲ ᯉᯪ ᯑᯩᯅᯖ ᯐᯂᯬᯋ, ᯐᯑᯪ ᯑᯪᯑᯄᯱᯬ᯲ ᯔ ᯔᯉ᯲ᯑᯄᯱᯬ᯲  ᯅᯬᯒᯮᯅᯬᯒᯮ ᯤ: ᯀᯖᯩᯂᯩ ᯖᯬᯝᯉᯬ᯲ ᯑᯬ ᯑᯪᯑᯄᯱᯬ᯲ ᯑᯩᯅᯖ, ᯉᯘᯬ ᯐᯑᯪ ᯇᯝᯉᯉᯬ᯲ᯔᯮᯉ ᯘᯪᯀᯉ᯲ ᯘᯞᯮᯂᯖᯮ᯲ ᯂᯥ ᯀᯰᯄᯱ ᯉ ᯑᯪ ᯇᯒᯬ᯲ᯞᯄᯱ᯲ ᯀᯉᯬ᯲?

3:2 Dung i ninna boruboru i ma mandok ulok i: Jadi do panganonnami sian parbue ni hau angka na di porlak on.

3:3 Alai anggo sian parbue ni hau, na di parsitongaan ni porlak i didok Debata do: Unang pangan hamu sian i, jala unang jama hamu, asa unang mate hamu.

3:4 Dung i ninna ulok i ma mandok boruboru i: Ndang na tutu hamu mate.

3:5 Ai diboto Debata do, sadari dipangan hamu sian i, tonggor ma matamuna, gabe doshon Debata hamu umboto na denggan dohot na roa.

3:6 Dung i sai dipanotnoti boruboru i ma parbue ni hau i dibahen dengganna panganon jala pia matana marnida, jala tau manunggul roha tu hapistaran hau i, jadi diputikkon sian parbuena i jala dipangan, dilehon ma dohot tu sinondukna sian i, gabe dipangan.

3:7 Dung i tonggor ma matanasida na dua, diboto ma na marsaemara nasida, gabe disomoti ma bulung ni hau ara bahen sabuknasida.

ᯑᯰᯮ ᯤ ᯖᯰᯬᯎᯒᯬ᯲ ᯔ ᯔᯖᯉᯘᯪᯑ ᯉ ᯑᯮᯀ ᯑᯪᯅᯬᯖᯬ ᯔ ᯉ ᯔᯒ᯲ᯘᯀᯩᯔᯒ ᯉᯘᯪᯑ ᯎᯅᯩ ᯑᯪᯘᯬᯔᯬᯖᯪ ᯔ ᯅᯮᯞᯰᯮ ᯉᯪ ᯂᯥ ᯀᯒ ᯅᯂᯉᯩ᯲ ᯘᯅᯄᯱᯮ᯲ᯉᯘᯪᯑ

3:8 Dung i dibege nasida ma soara ni Debata Jahowa, na medangedang di porlak i di haroro ni alogo mareak bot ari, gabe martabuni ma si Adam dohot jolmana i di holangkolang ni hau angka na di porlak i maradophon bohi ni Debata Jahowa.

ᯑᯰᯮ ᯤ ᯑᯪᯅᯩᯎᯩ ᯉᯘᯪᯑ ᯔ ᯘᯬᯀᯒ ᯉᯪ ᯑᯩᯅᯖ ᯐᯂᯬᯋ ᯉ ᯔᯩᯑᯰ ᯀᯩᯑᯰ ᯑᯪ ᯇᯒᯬ᯲ᯞᯄᯱ᯲ ᯤ ᯑᯪ ᯂᯒᯬᯒᯬ ᯉᯪ ᯀᯞᯬᯎᯬ ᯔᯒᯩᯀᯄᯱ᯲ ᯅᯖᯬ᯲ ᯀᯒᯪ ᯎᯅᯩ ᯔᯒ᯲ᯖᯅᯮᯉᯪ ᯔ ᯘᯪ ᯀᯑᯔ᯲ ᯑᯬᯂᯖᯬ᯲ ᯐᯞᯬ᯲ᯔᯉ ᯤ ᯑᯪ ᯂᯬᯞᯰᯂᯬᯞᯰ ᯉᯪ ᯂᯥ ᯀᯰᯄᯱ ᯉ ᯑᯪ ᯇᯒᯬ᯲ᯞᯄᯱ᯲ ᯤ ᯔᯒᯑᯇᯬ᯲ᯂᯉᯬ᯲ ᯅᯬᯂᯪ ᯉᯪ ᯑᯩᯅᯖ ᯐᯂᯬᯋ

3:9 Dung i joujou ma Debata Jahowa di si Adam, ninna ma mandok ibana: Didia do ho?

ᯑᯰᯮ ᯤ ᯐᯬᯥᯐᯬᯥ ᯔ ᯑᯩᯅᯖ ᯐᯂᯬᯋ ᯑᯪ ᯘᯪ ᯀᯑᯔ᯲, ᯉᯉᯪ᯲ᯉ ᯔ ᯔᯉ᯲ᯑᯄᯱᯬ᯲ ᯤᯅᯉ; ᯑᯪᯑᯪᯀ ᯑᯬ ᯂᯬ?

3:10 Jadi ninna si Adam ma: Hubege nian suaram di porlak i, gabe mabiar ahu, ai marsaemara do ahu, umbahen na martabuni ahu.

ᯐᯑᯪ ᯉᯉᯪ᯲ᯉ ᯘᯪ ᯀᯑᯔ᯲ ᯔ ; ᯂᯮᯅᯩᯎᯩ ᯉᯪᯀᯉ᯲ ᯘᯮᯀᯒᯔ᯲ ᯑᯪ ᯇᯒᯬ᯲ᯞᯄᯱ᯲ ᯤ, ᯎᯅᯩ ᯔᯅᯪᯀᯒ᯲ ᯀᯂᯮ, ᯀᯤ ᯔᯒ᯲ᯘᯀᯩᯔᯒ ᯑᯬ ᯀᯂᯮ, ᯀᯔᯮ᯲ᯅᯂᯉᯩ᯲ ᯉ ᯔᯒ᯲ᯖᯅᯮᯉᯪ ᯀᯂᯮ.

3:11 Dung i ninna Debata ma: Ise na paboahon tu ho, na marsaemara i ho? Nda tung dipangan ho sian hau na hupatikkon i mangorai panganonmu?

ᯑᯰᯮ ᯤ ᯉᯉᯪ᯲ᯉ ᯑᯩᯅᯖ ᯔ ; ᯤᯘᯩ ᯉ ᯇᯅᯬᯀᯂᯉᯬ᯲ ᯖᯮ ᯂᯬ, ᯉ ᯔᯒ᯲ᯘᯀᯩᯔᯒ ᯤ ᯂᯬ? ᯉ᯲ᯑ ᯖᯰᯮ ᯑᯪᯇᯝᯉ᯲ ᯂᯬ ᯘᯪᯀᯉ᯲ ᯂᯥ ᯉ ᯂᯮᯇᯖᯄᯱᯪ᯲ᯄᯱᯉᯬ᯲ ᯤ ᯔᯝᯬᯒᯤ ᯇᯝᯉᯉᯬ᯲ᯔᯮ?

3:12 Dung i ninna si Adam ma: Boruboru na nilehonmu bahen donganku, i do na mangalehon tu ahu sian hau i, gabe hupangan.

ᯑᯰᯮ ᯤ ᯉᯉᯪ᯲ᯉ ᯘᯪ ᯀᯑᯔ᯲ ᯔ ; ᯅᯬᯒᯮᯅᯬᯒᯮ ᯉ ᯉᯪᯞᯩᯂᯉᯬ᯲ᯔᯮ ᯅᯂᯉᯩ᯲ ᯑᯬᯝᯉ᯲ᯄᯱᯮ ᯤ ᯑᯬ ᯉ ᯔᯝᯞᯩᯂᯉᯬ᯲ ᯖᯮ ᯀᯂᯮ ᯘᯪᯀᯉ᯲ ᯂᯥ ᯤ ᯎᯅᯩ ᯂᯮᯇᯝᯉ᯲

3:13 Dung i ninna Debata Jahowa ma tu boruboru i: Boasa songon i bahenonmu? Jadi ninna boruboru i ma: Ulok i do paotooto ahu, gabe hupangan.

ᯑᯰᯮ ᯤ ᯉᯉᯪ᯲ᯉ ᯑᯩᯅᯖ ᯐᯂᯬᯋ  ᯔ ᯖᯮ ᯅᯬᯒᯮᯅᯬᯒᯮ ᯤ : ᯅᯬᯀᯘ ᯘᯬᯝᯉᯬ᯲ ᯤ ᯅᯂᯩᯉᯉᯬ᯲ᯔᯮ? ᯐᯑᯪ ᯉᯉᯪ᯲ᯉ ᯅᯬᯒᯮᯅᯬᯒᯮ ᯤ ᯔ ; ᯥᯞᯄᯱᯬ᯲ ᯤ ᯑᯬ ᯇᯀᯬᯖᯬᯀᯬᯖᯬ ᯀᯂᯮ, ᯎᯅᯩ ᯂᯮᯇᯝᯉ᯲.

3:14 Dung i ninna Debata Jahowa ma tu ulok i: Ala dibahen ho songon i gumodang ma torungku tu ho sian tu nasa pahanpahanan dohot sian tu nasa na manggulmit di ladang. Butuham na ma jururhononmu, jala orbuk panganonmu saleleng di ngolum.

ᯑᯰᯮ ᯤ ᯉᯉᯪ᯲ᯉ ᯑᯩᯅᯖ ᯐᯂᯬᯋ ᯔ ᯖᯮ ᯥᯞᯄᯱᯬ᯲ ᯤ : ᯀᯞ ᯑᯪᯅᯂᯉᯰ᯲ ᯂᯬ ᯘᯬᯝᯉᯬ᯲ ᯤ ᯎᯮᯔᯬᯑᯰ ᯔ ᯖᯬᯒᯰᯮᯄᯱᯮ ᯖᯮ ᯂᯬ ᯘᯪᯀᯉ᯲ ᯖᯮ ᯉᯘ  ᯇᯂᯉ᯲ᯇᯂᯉᯉ᯲ ᯑᯬᯂᯖᯬ᯲ ᯘᯪᯀᯉ᯲ ᯖᯮ ᯉᯘ ᯉ ᯔᯰᯎᯞᯮ᯲ᯔᯖᯪ᯲ ᯑᯪ ᯞᯑᯰ.  ᯅᯮᯖᯮᯂᯔ᯲ ᯉ ᯔ ᯐᯮᯒᯒᯮ᯲ᯂᯬᯉᯉᯬ᯲ᯔᯮ ᯘᯞᯩᯞᯰᯩ ᯑᯪ ᯝᯬᯞᯔᯮ᯲.

3:15 Jala bahenonku ma parbadaanmu dohot boruboru i, ro di pinomparmu tu Pinomparna. Ibana mangalisathon ulum, gabe pargutonmu tambihulna.

ᯐᯞ ᯅᯂᯩᯉᯉᯬ᯲ᯄᯱᯮ ᯔ ᯇᯒ᯲ᯅᯑᯀᯉ᯲ᯔᯮ ᯑᯬᯂᯖᯬ᯲ ᯅᯬᯒᯮᯅᯬᯒᯮ ᯤ. ᯒᯬ ᯑᯪ ᯇᯪᯉᯔᯬ᯲ᯇᯒ᯲ᯔᯮ ᯖᯮ ᯇᯪᯉᯔᯬ᯲ᯇᯒ᯲ᯉ. ᯤᯅᯉ ᯔᯝᯞᯪᯘᯖ᯲ᯂᯉᯬ᯲ ᯥᯞᯔᯮ᯲, ᯎᯅᯩ ᯇᯒ᯲ᯎᯮᯖᯉᯬ᯲ᯔᯮ ᯖᯔ᯲ᯅᯪᯂᯞᯧ᯲ᯉ.

3:16 Dung i ninna ma mandok boruboru i: Ganda situtu bahenonku parniahapanmu saleleng gabegabean ho; bernit taononmu laho manubuhon anakkonmu, sinondukmu na ma ihutanmu, jala ibana mangarajai ho.

ᯑᯰᯮ ᯤ ᯉᯉᯪ᯲ᯉ ᯔ ᯔᯉ᯲ᯑᯄᯱᯬ᯲  ᯅᯬᯒᯮᯅᯬᯒᯮ ᯤ : ᯎᯉ᯲ᯑ ᯘᯪᯖᯮᯖᯮ ᯅᯂᯩᯉᯉᯬ᯲ᯄᯱᯮ ᯇᯒ᯲ᯉᯪᯀᯂᯇᯉ᯲ᯔᯮ ᯘᯞᯩᯞᯰᯩ ᯎᯅᯩᯎᯅᯩᯀᯉ᯲ ᯂᯬ ; ᯅᯒᯩ᯲ᯉᯖᯪ᯲ ᯖᯀᯬᯉᯉᯬ᯲ᯔᯮ ᯞᯂᯬ ᯔᯉᯮᯅᯮᯂᯉᯬ᯲ ᯀᯉᯄᯱ᯲ᯄᯱᯉᯬ᯲ᯔᯮ, ᯘᯪᯉᯉᯬ᯲ᯑᯄᯱᯮ᯲ᯔᯮ ᯉ ᯔ ᯤᯂᯮᯖᯉ᯲ᯔᯮ, ᯐᯞ ᯤᯅᯉ ᯔᯝᯒᯐᯤ ᯂᯬ.

3:17 Jala didok ma tu si Adam: Ala ditangihon ho soara ni jolmam, gabe dipangan ho sian hau na hupatikkon i, mandok: Unang pangan sian i, hona torungku ma tano on ala ho, porsuk ma ahaponmu manganhon gogona saleleng di ngolum.

ᯐᯞ ᯑᯪᯑᯄᯱᯬ᯲ ᯔ ᯖᯮ ᯘᯪ ᯀᯑᯔ᯲ ; ᯀᯞ ᯑᯪᯖᯝᯪᯂᯉᯬ᯲ ᯂᯬ ᯘᯬᯀᯒ ᯉᯪ ᯐᯞᯬ᯲ᯔᯔ᯲, ᯎᯅᯩ ᯑᯪᯇᯝᯉ᯲ ᯂᯬ ᯘᯪᯀᯉ᯲ ᯂᯥ ᯉ ᯂᯮᯇᯖᯄᯱᯪ᯲ᯄᯱᯉᯬ᯲ ᯤ, ᯔᯉ᯲ᯑᯄᯱᯬ᯲ ; ᯥᯉᯰ ᯇᯝᯉ᯲ ᯘᯪᯀᯉ᯲ ᯤ, ᯂᯬᯉ ᯖᯬᯒᯰᯮᯄᯱᯮ ᯔ ᯖᯉᯬ ᯀᯉᯬ᯲ ᯀᯞ ᯉᯪ ᯂᯬ, ᯇᯒᯬ᯲ᯘᯄᯱᯮ᯲ ᯔ ᯀᯂᯇᯉᯬ᯲ᯔᯮ ᯔᯝᯉ᯲ᯂᯉᯬ᯲ ᯎᯬᯎᯬᯉ ᯘᯞᯩᯞᯰᯩ ᯑᯪ ᯝᯬᯞᯔᯮ.

3:18 Pantubuhononna ma huhut di ho angka duriduri dohot duhutduhut na marsuga, angka ingkau rata ni ladang i na ma panganonmu.

ᯇᯉ᯲ᯖᯮᯅᯮᯂᯬᯉᯉᯬ᯲ᯉ ᯔ ᯂᯮᯂᯖᯮ᯲ ᯑᯪ ᯂᯬ ᯀᯰᯄᯱ ᯑᯮᯒᯪᯑᯮᯒᯪ ᯑᯬᯂᯖᯬ᯲ ᯑᯮᯂᯖᯮ᯲ᯑᯮᯂᯖᯮ᯲ ᯉ ᯔᯒ᯲ᯘᯮᯎ,  ᯀᯰᯄᯱ ᯀᯰᯪᯄᯱᯥ ᯒᯖ ᯉᯪ ᯞᯑᯰ ᯤ ᯉ ᯔ ᯇᯝᯉᯉᯬ᯲ᯔᯮ.

3:19 Ingkon hir hodokmu manganhon sipanganonmu, paima mulak ho gabe tano, pambuatanmu hian, ai tano do ho, jala tu tano do ho mulak sogot.

ᯀᯰᯪᯄᯱᯉᯬ᯲ ᯂᯒᯪ᯲ ᯂᯬᯑᯄᯱᯬ᯲ᯔᯮ ᯔᯝᯉ᯲ᯂᯉᯬ᯲ ᯘᯪᯇᯝᯉᯉᯬ᯲ᯔᯮ,  ᯇᯤᯔ ᯔᯮᯞᯄᯱ᯲ ᯂᯬ ᯎᯅᯩ ᯖᯉᯬ, ᯇᯔ᯲ᯅᯮᯀᯖᯉ᯲ᯔᯮ ᯂᯪᯀᯉ᯲, ᯀᯤ ᯖᯉᯬ ᯑᯬ ᯂᯬ, ᯐᯞ ᯖᯮ ᯖᯉᯬ ᯑᯬ ᯂᯬ ᯔᯮᯞᯄᯱ᯲ ᯘᯬᯎᯖᯬ᯲.

3:20 Dung i dibahen si Adam ma goar ni jolmana i: Hawa (hangoluan), ala ibana ina ni nasa na mangolu.

ᯑᯰᯮ ᯤ ᯑᯪᯅᯂᯉᯩ᯲ ᯘᯪ ᯀᯑᯔ᯲ ᯔ ᯎᯬᯀᯒ᯲ ᯉᯪ ᯐᯞᯬ᯲ᯔ ᯉ ᯤ : ᯂᯋ  (ᯂᯝᯬᯞᯮᯀᯉ), ᯀᯞ ᯤᯅᯉ ᯤᯉ ᯉᯪ ᯉᯘ ᯉ ᯔᯝᯬᯞᯮ.

3:21 Dung i dipauli Debata Jahowa ma bobak bahen abit ni si Adam dohot jolmana i, jala dialithon tu nasida.

ᯑᯰᯮ ᯤ ᯑᯪᯇᯥᯞᯪ ᯑᯩᯅᯖ ᯐᯂᯬᯋ ᯔ ᯅᯬᯅᯄᯱ᯲ ᯅᯂᯉᯩ᯲ ᯀᯅᯖᯪ᯲ ᯉᯪ ᯘᯪ ᯀᯑᯔ᯲ ᯑᯬᯂᯖᯬ᯲ ᯐᯞᯬ᯲ᯔᯉ ᯤ, ᯐᯞ ᯑᯪᯀᯞᯖᯪ᯲ᯂᯉᯬ᯲ ᯖᯮ ᯉᯘᯪᯑ.

3:22 Dung i ninna Debata Jahowa ma: Ida ma, nunga doshon Sada sian Hami si Adam, umboto na denggan dohot na roa. On pe, asa unang didungdungkon tanganna mamutikkon huhut sian hau hangoluan jala dipangan gabe mangolu salelenglelengna.

ᯑᯰᯮ ᯤ ᯉᯉᯪ᯲ᯉ ᯑᯩᯅᯖ ᯐᯂᯬᯋ ᯔ ; ᯤᯑ ᯔ, ᯉᯮᯝ ᯑᯘᯬ᯲ᯂᯉᯬ᯲ ᯘᯑ ᯘᯪᯀᯉ᯲ ᯂᯔᯪ ᯘᯪ ᯀᯑᯔ᯲, ᯀᯔᯮ᯲ᯅᯬᯖᯬ ᯉ ᯑᯰᯩᯎᯉ᯲ ᯑᯬᯂᯖᯬ᯲ ᯉ ᯒᯬᯀ. ᯀᯉᯬ᯲ ᯇᯩ ᯀᯘ ᯥᯉᯰ ᯑᯪᯑᯰᯮᯑᯰᯮᯄᯱᯉᯬ᯲ ᯖᯝᯉ᯲ᯉ , ᯔᯔᯮᯖᯄᯱᯪ᯲ᯄᯱᯉᯬ᯲ ᯂᯮᯂᯖᯮ᯲ ᯘᯪᯀᯉ᯲ ᯂᯥ ᯂᯝᯬᯞᯮᯘᯉ᯲ ᯐᯞ ᯑᯪᯇᯝᯉ᯲ ᯎᯅᯩ ᯔᯝᯬᯞᯮ ᯘᯞᯩᯞᯰᯩᯞᯩᯞᯰᯩᯉ.

3:23 Jadi dipabali Debata Jahowa ibana sian porlak Eden, asa diula tano pambuatanna i.

ᯐᯑᯪ ᯑᯪᯇᯅᯞᯪ ᯝᯩᯅᯖ ᯐᯂᯬᯋ ᯤᯅᯉ ᯘᯪᯀᯉ᯲ ᯇᯒᯬ᯲ᯞᯄᯱ᯲ ᯀᯩᯑᯉᯩ᯲, ᯀᯘ ᯑᯪᯥᯞ ᯖᯉᯬ ᯇᯔ᯲ᯅᯮᯀᯖᯉ᯲ᯉ ᯤ.

3:24 Jadi dilele ma si Adam i, jala dipaipahon angka kerubim tungkan habinsaran ni porlak Eden i marpodang sidua baba marjimburjimbur, asa dijaga dalan tu hau hangoluan.

ᯐᯑᯪ ᯑᯪᯞᯩᯞᯩ ᯔ ᯘᯪ ᯀᯑᯔ᯲ ᯤ, ᯐᯞ ᯑᯪᯇᯤᯇᯂᯉᯬ᯲ ᯀᯰᯄᯱ ᯄᯱᯩᯒᯮᯅᯔᯪ᯲ ᯖᯰᯮᯄᯱᯉ᯲ ᯂᯅᯉᯪ᯲ᯘᯒᯉ᯲ ᯉᯪ ᯇᯒᯬ᯲ᯞᯄᯱ ᯀᯩᯑᯉᯩ᯲ ᯤ  ᯔᯒ᯲ᯇᯬᯑᯰ ᯘᯪᯑᯮᯀ ᯅᯅ ᯔᯒ᯲ᯐᯔᯪ᯲ᯅᯒᯮ᯲ᯐᯔᯪ᯲ᯅᯒᯮ᯲, ᯀᯘ ᯑᯪᯐᯎ ᯑᯞᯉ᯲ ᯖᯮ ᯂᯥ ᯂᯝᯬᯞᯮᯀᯉ᯲.

1 Musa ᯔᯮᯘ 4

4:1 Dung i sampur ma si Adam dohot si Hawa, jolmana i, jadi gabegabean ma ibana, ditubuhon ma si Kain, jala ninna ma: Nunga maruli ahu sada baoa sian Jahowa.

ᯑᯰᯮ ᯤ ᯘᯔ᯲ᯇᯒᯮ᯲ ᯔ ᯘᯪ ᯀᯑᯔ᯲ ᯑᯬᯂᯖᯬ᯲ ᯘᯪ ᯂᯋ ᯐᯞᯬ᯲ᯔᯉ  ᯤ.  ᯐᯑᯪ ᯎᯅᯩᯎᯅᯩᯀᯉ᯲ ᯔ ᯤᯅᯉ,  ᯑᯪᯖᯮᯅᯮᯂᯉᯬ᯲ ᯔ ᯘᯪ ᯄ᯦ᯀᯉᯪ᯲ ᯐᯞ ᯉᯉᯪ᯲ᯉ  ᯔ  ᯉᯮᯝ ᯔᯒᯮᯞᯪ  ᯀᯂᯮ  ᯘᯑ  ᯅᯀᯬᯀ ᯘᯪᯀᯉ᯲  ᯐᯂᯬᯋ

4:2 Dung i diulahi ma manubuhon si Abel anggina i; gabe parmahan birubiru ma si Abel, alai siula hauma anggo si Kain. ᯑᯰᯮ ᯤ ᯑᯪᯥᯞᯂᯪ  ᯔ ᯔᯉᯮᯅᯮᯂᯉᯬ᯲ ᯘᯪ ᯀᯅᯞᯩ᯲  ᯀᯰᯎᯪᯉ  ᯤ  ᯎᯅᯩ  ᯇᯒ᯲ᯔᯂᯉ᯲ ᯅᯪᯒᯮᯅᯪᯒᯮ ᯔ  ᯘᯪ  ᯀᯅᯞᯩ᯲  ᯀᯞᯤ  ᯘᯪᯥᯞ ᯂᯥᯔ  ᯀᯰᯎᯬ  ᯘᯪ  ᯄ᯦ᯀᯉᯪ᯲

4:3 Dung i di laonlaon ni ari, diboan si Kain ma sian parbue ni haumana bahen pelean tu Jahowa. ᯑᯰᯮ ᯤ ᯑᯪ ᯞᯀᯉᯬ᯲ᯞᯀᯉᯬ᯲ ᯉᯪ ᯀᯒᯪ ᯑᯪ ᯅᯬᯀᯉ᯲ ᯘᯪ ᯄ᯦ᯀᯉᯪ᯲ ᯔ ᯘᯪᯀᯉ᯲ ᯇᯒ᯲ ᯅᯮᯀᯩ ᯉᯪ ᯂᯥᯔᯉ  ᯅᯂᯉᯩ᯲ ᯇᯩᯞᯩᯀᯉ᯲ ᯖᯮ ᯐᯂᯬᯋ

4:4 Jadi dohot ma si Abel mamboan sian buhabaju ni birubiruna dohot sian tabotabona. Jadi lomo ma roha ni Jahowa mamereng si Abel dohot na pinelehonna i. ᯐᯑᯪ  ᯑᯬᯂᯖᯬ᯲  ᯔ  ᯘᯪ  ᯀᯅᯞᯩ᯲  ᯔᯔ᯲ᯅᯬᯀᯉ᯲  ᯘᯪᯀᯉ᯲  ᯅᯮᯂᯅᯐᯮ ᯉᯪ ᯅᯪᯒᯮᯅᯪᯒᯮᯉ  ᯑᯬᯂᯖᯬ᯲  ᯘᯪᯀᯉ᯲  ᯖᯅᯬᯖᯅᯬᯉ.  ᯐᯑᯪ   ᯞᯬᯔᯬ  ᯔ  ᯒᯬᯂ  ᯉᯪ  ᯐᯂᯬᯋ  ᯔᯔᯩᯒᯰᯩ  ᯘᯪ  ᯀᯅᯞᯩ᯲  ᯑᯬᯂᯖᯬ᯲  ᯉ ᯇᯪᯉᯩᯞᯩᯂᯉᯬ᯲ᯉ  ᯤ.

4:5 Alai anggo si Kain dohot na pinelehonna i, ndang dibereng. Jadi pusu ma roha ni si Kain jala rupi bohina. ᯀᯞᯤ  ᯀᯰᯎᯬ  ᯘᯪ  ᯄ᯦ᯀᯉᯪ᯲  ᯑᯬᯂᯖᯬ᯲  ᯉ  ᯇᯪᯉᯩᯞᯩᯂᯉᯬ᯲ᯉ   ᯤ  ᯉ᯲ᯑᯰ  ᯑᯪᯅᯩᯒᯰᯩ.  ᯐᯑᯪ  ᯇᯮᯘᯮ  ᯔ  ᯒᯬᯂ  ᯉᯪ  ᯘᯪ  ᯄ᯦ᯀᯉᯪ᯲  ᯐᯞ  ᯒᯮᯇᯪ  ᯅᯬᯂᯪᯉ

4:6 Dung i ninna Jahowa ma mandok si Kain: Boasa tung pusu roham, jala boasa rupi bohim? ᯑᯰᯮ  ᯤ  ᯉᯉᯪ᯲ᯉ  ᯐᯂᯬᯋ  ᯔ  ᯔᯉ᯲ᯑᯄ᯦ᯬ᯲  ᯘᯪ  ᯄ᯦ᯀᯉᯪ᯲  ᯅᯬᯀᯘ  ᯖᯰᯮ  ᯇᯮᯘᯮ  ᯒᯬᯂᯔ᯲  ᯐᯞ  ᯅᯬᯀᯘ  ᯒᯮᯇᯪ  ᯅᯬᯂᯔᯪ᯲

4:7 Nda songon on do? Molo na denggan diula ho i ma hadirgakon ni bohi; alai molo so diula ho na denggan, mangonggop dosa i di lambung pintu mangkalungunhon ho, alai ingkon ho mangarajaisa. ᯉ᯲ᯑ  ᯘᯬᯝᯉᯬ᯲   ᯀᯉᯬ᯲  ᯑᯬ ? ᯔᯬᯞᯬ ᯉ ᯑᯰᯩᯎᯉ᯲ ᯑᯪ ᯥᯞ ᯂᯬ ᯤ ᯔ ᯂᯑᯒᯪ᯲ᯎᯄ᯦ᯉᯬ᯲ ᯉᯪ ᯅᯬᯂᯪ ; ᯀᯞᯤ ᯔᯬᯞᯬ ᯘᯬ ᯑᯪᯥᯞ ᯂᯬᯉ ᯑᯰᯩᯎᯉ᯲, ᯔᯝᯰᯬᯎᯇᯬ᯲ ᯑᯬᯘ  ᯤ ᯑᯪ ᯞᯔ᯲ᯅᯰᯮ ᯇᯉᯪ᯲ᯖᯮ ᯔᯰᯂᯞᯮᯝᯉᯮ᯲ᯂᯉᯬ᯲ ᯂᯬ,ᯀᯞᯤ ᯀᯰᯪᯄ᯦ᯉᯬ᯲ ᯂᯬ ᯔᯝᯒᯐᯤᯘ

4:8 Dung i mangkatai ma si Kain dohot si Abel, anggina i. Alai dung ro di hauma nasida, hehe ma si Kain dompak si Abel anggina i, jala dibunu ibana.

ᯑᯰᯮ ᯤ ᯔᯰᯄ᯦ᯖᯤ ᯔ ᯘᯪ ᯄ᯦ᯀᯉᯪ᯲ ᯑᯬᯂᯖᯬ᯲ ᯘᯪ ᯀᯅᯞᯩ᯲, ᯀᯰᯎᯪᯉ ᯤ. ᯀᯞᯤ ᯑᯰᯮ ᯒᯬ ᯑᯪ ᯂᯥᯔ ᯉᯘᯪᯑ ᯂᯩᯂᯩ ᯔ ᯘᯪ ᯄ᯦ᯀᯉᯪ᯲ ᯑᯔᯬ᯲ᯇᯄ᯦᯲ ᯘᯪ ᯀᯅᯞᯩ᯲ ᯀᯰᯎᯪᯉ ᯤ ᯐᯞ ᯑᯪᯅᯉᯮ ᯤᯅᯉ

4:9 Jadi ninna Jahowa ma tu si Kain: Didia do si Abel anggim i? Ndang huboto, ninna, tung ahu ma siparorot anggingki?

ᯐᯑᯪ ᯉᯉᯪ᯲ᯉ ᯐᯂᯬᯋ ᯔ ᯖᯮ ᯘᯪ ᯄ᯦ᯀᯉᯪ᯲ ; ᯑᯪᯑᯪᯀ ᯑᯬ ᯘᯪ ᯀᯅᯞᯩ᯲ ᯀᯰᯎᯪᯔᯪ ? ᯉ᯲ᯑᯰ ᯂᯮᯅᯬᯖᯬ ᯉᯉᯪ᯲ᯉ, ᯖᯰᯮ ᯀᯂᯮ ᯔ ᯘᯪᯇᯒᯬᯒᯖᯬ᯲ ᯀᯰᯎᯰᯪᯄ᯦ᯪ ?

4:10 Alai ninna Jahowa ma: Aha do na binahenmi? Maungaung do sian tano i mudar ni anggim sahat tu Ahu.

ᯀᯞᯤ ᯉᯉᯪ᯲ᯉ ᯂᯬᯋ ᯔ ; ᯀᯂ ᯑᯬ ᯉ ᯅᯪᯉᯂᯉᯩ᯲ᯔᯪ ? ᯔᯀᯰᯮᯀᯀᯰᯮ ᯑᯬ ᯘᯪᯀᯉ᯲ ᯖᯉᯬ ᯤ ᯔᯮᯑᯒ᯲ ᯉᯪ ᯀᯰᯎᯔᯪ᯲ ᯘᯂᯖ᯲ ᯖᯮ ᯀᯂᯮ

4:11 Onpe gumodang ma torungku tu ho asa tu tano i, na pangangang babana jumalo mudar ni anggim sian tanganmi.

ᯀᯉᯬ᯲ ᯇᯩ ᯎᯮᯔᯬᯑᯰ ᯔ ᯖᯬᯒᯰᯮᯄ᯦ᯮ ᯖᯮ ᯂᯬ ᯀᯘ ᯖᯮ ᯖᯉᯬ ᯤ, ᯉ ᯇᯝᯝᯰ ᯅᯅᯉ ᯐᯮᯔᯞᯬ ᯔᯮᯑᯒ᯲ ᯉᯪ ᯀᯰᯎᯔᯪ᯲ ᯘᯪᯀᯉ᯲ ᯖᯝᯉ᯲ᯔᯪ

4:12 Molo diula ho tano i, ndang be lehononna gogona tu ho, mompasompas jala madoado na ma ho di tano on. ᯔᯬᯞᯬ  ᯑᯪᯥᯞ  ᯂᯬ  ᯖᯉᯬ  ᯤ , ᯉ᯲ᯑᯰ ᯅᯩ ᯞᯩᯂᯬᯉᯉᯬ᯲ᯉ  ᯎᯬᯎᯬᯉ  ᯖᯮ  ᯂᯬ,  ᯔᯔᯬ᯲ᯇᯘ᯲ᯀᯔᯬ᯲ᯇᯘ᯲ ᯐᯞ ᯔᯑᯬᯀᯑᯬ  ᯉ ᯔ ᯂᯬ ᯑᯪ ᯖᯉᯬ ᯀᯉᯬ᯲

4:13 Dung i ninna si Kain ma mandok Jahowa: Ndang be tarsesa dosangki dibahen balgana. ᯑᯰᯮ ᯤ  ᯉᯉᯪ᯲ᯉ   ᯘᯪ  ᯄ᯦ᯀᯉᯪ᯲  ᯔ  ᯔᯉ᯲ᯑᯄ᯦ᯬ᯲  ᯐᯂᯬᯋ ; ᯉ᯲ᯑᯰ  ᯅᯩ  ᯖᯒ᯲ᯘᯩᯘ  ᯑᯬᯘᯰᯄ᯦ᯪ ᯑᯪᯅᯂᯉᯩ᯲  ᯅᯞ᯲ᯎᯉ

4:14 Ndi, nunga dipabali Ho ahu sadari on sian tano on, jadi martabuni na ma ahu maradophon Bohim, gabe mompasompas jala madoado na ma ahu di tano on. Jadi manang ise na jumpangan ahu, bunuonna ma ahu. ᯉ᯲ᯑᯪ ᯉᯮᯝ  ᯑᯪᯇᯅᯞᯪ  ᯂᯬ  ᯀᯂᯮ  ᯘᯑᯒᯪ  ᯀᯉᯬ᯲  ᯘᯪᯀᯉ᯲  ᯖᯉᯬ  ᯀᯉᯬ᯲, ᯐᯑᯪ  ᯔᯒ᯲ᯖᯅᯮᯉᯪ  ᯉ ᯔ  ᯀᯂᯮ  ᯔᯒᯑᯇᯬ᯲ᯂᯉᯬ᯲  ᯅᯬᯂᯔᯪ᯲,  ᯎᯅᯩ ᯔᯔᯬ᯲ᯇᯘ᯲ᯀᯔᯬ᯲ᯇᯘ᯲  ᯐᯞ ᯔᯑᯬᯀᯑᯬ ᯉ ᯔ ᯀᯂᯮ ᯑᯪ ᯖᯉᯬ ᯀᯉᯬ᯲. ᯐᯑᯪ  ᯔᯉᯰ ᯤᯘᯩ ᯉ ᯐᯔᯮ᯲ᯇᯝᯉ᯲ ᯀᯂᯮ, ᯅᯮᯉᯮᯀᯉᯬ᯲ᯉ ᯔ ᯀᯂᯮ.

4:15 Alai ninna Jahowa ma mandok ibana: Antong manang ise pe na mambunu si Kain, pitu lompit abulonna. Dung i dibahen Jahowa ma sada tanda tu si Kain, asa unang dibunu manang ise na jumpangan ibana. ᯀᯞᯤ ᯉᯉᯪ᯲ᯉ ᯐᯂᯬᯋ ᯔ  ᯔᯉ᯲ᯑᯄ᯦ᯬ᯲  ᯤᯅᯉ ; ᯀᯉ᯲ᯖᯰᯬ ᯔᯉᯰ ᯤᯘᯩ  ᯇᯩ  ᯉ  ᯔᯔ᯲ᯅᯮᯉᯮ  ᯘᯪ  ᯄ᯦ᯀᯉᯪ᯲, ᯇᯪᯖᯮ  ᯞᯔᯬ᯲ᯇᯖᯪ᯲  ᯀᯅᯮᯞᯉᯬ᯲ᯉ. ᯑᯰᯮ ᯤ ᯑᯪᯅᯂᯉᯩ᯲  ᯐᯂᯬᯋ  ᯔ ᯘᯑ ᯖᯉ᯲ᯑ ᯖᯮ ᯘᯪ ᯄ᯦ᯀᯉᯪ᯲,  ᯀᯘ  ᯥᯉᯰ  ᯑᯪᯅᯮᯉᯮ ᯔᯉᯰ ᯤᯘᯩ  ᯉ  ᯐᯔᯮ᯲ᯇᯝᯉ᯲  ᯤᯅᯉ

4:16 Dung i manginsurut ma si Kain sian Bohi ni Jahowa laho maringan tu tano Nod, na tungkan habinsaran sian porlak Eden. ᯑᯰᯮ ᯤ ᯔᯝᯉᯪ᯲ᯘᯮᯒᯖᯮ᯲ ᯔ ᯘᯪ ᯄ᯦ᯀᯉᯪ᯲ ᯘᯪᯀᯉ᯲  ᯅᯬᯂᯪ  ᯉᯪ  ᯐᯂᯬᯋ  ᯞᯂᯬ  ᯔᯒᯪᯝᯉᯉ᯲  ᯖᯮ  ᯖᯉᯬ  ᯉᯑᯬ᯲,  ᯉ ᯖᯰᯮᯄ᯦ᯉ᯲  ᯂᯅᯉᯪ᯲ᯘᯒᯉ᯲ ᯘᯪᯀᯉ᯲  ᯇᯒᯬ᯲ᯞᯄ᯦᯲ ᯀᯩᯑᯉᯩ᯲

4:17 Dung i sampur ma si Kain dohot jolmana, jadi gabegabean ma ibana, jala ditubuhon si Hanok. Dung i dipungka ma sada sosor dibahen ma goar ni sosor i Hanok, mangihuthon goar ni anakna i. ᯑᯰᯮ ᯤ ᯘᯔ᯲ᯇᯒᯮ᯲ ᯔ ᯘᯪ ᯄ᯦ᯀᯉᯪ᯲ ᯑᯬᯂᯖᯬ᯲ ᯐᯞᯬ᯲ᯔᯉ, ᯐᯑᯪ ᯎᯅᯩᯎᯅᯩᯀᯉ᯲ ᯔ ᯤᯅᯉ, ᯐᯞ ᯑᯪᯖᯮᯅᯮᯂᯉᯬ᯲ ᯘᯪ ᯂᯉᯄ᯦ᯬ᯲. ᯑᯰᯮ ᯤ ᯑᯪᯇᯰᯮᯄ᯦  ᯔ ᯘᯑ ᯘᯬᯘᯒᯬ᯲ ᯑᯪᯅᯂᯉᯩ᯲ ᯔ ᯎᯬᯀᯒ᯲ ᯉᯪ ᯘᯬᯘᯒᯬ᯲ ᯤ ᯂᯉᯄ᯦ᯬ᯲,  ᯔᯝᯪᯂᯖᯮ᯲ᯂᯉᯬ᯲ ᯎᯬᯀᯒ᯲ ᯉᯪ  ᯀᯉᯄ᯦᯲ᯉ  ᯤ

4:18 Dung i ditubuhon si Hanok ma si Irad; si Irad manubuhon si Mehuyael; si Mehuyael manubuhon si Metusael; si Metusael manubuhon si Lamek. ᯑᯰᯮ ᯤ ᯑᯪᯖᯮᯅᯮᯂᯉᯬ᯲ ᯘᯪ ᯂᯉᯄ᯦ᯬ᯲ ᯔ ᯘᯪ ᯤᯒᯑ᯲ ; ᯘᯪ ᯤᯒᯑ᯲ ᯔᯉᯮᯅᯮᯂᯉᯬ᯲ ᯘᯪ ᯔᯩᯂᯮᯛᯀᯞᯩ᯲ ; ᯘᯪ ᯔᯩᯂᯮᯛᯀᯞᯩ᯲ ᯔᯉᯮᯅᯮᯂᯉᯬ᯲ ᯘᯪ ᯔᯩᯖᯮᯘᯀᯞᯩ᯲ ; ᯘᯪ ᯔᯩᯖᯮᯘᯀᯞᯩ᯲ ᯔᯉᯮᯅᯮᯂᯉᯬ᯲ ᯘᯪ ᯞᯔᯄ᯦ᯩ᯲

4:19 Alai anggo si Lamek dua do jolmana dibuat, goar ni na sada si Ada, goar ni paduahon si Zilla. ᯀᯞᯤ ᯀᯰᯎᯬ ᯘᯪ ᯞᯔᯄ᯦ᯩ᯲ ᯑᯮᯀ ᯑᯬ ᯐᯞᯬ᯲ᯔᯉ ᯑᯪᯅᯮᯀᯖ᯲, ᯎᯬᯀᯒ᯲ ᯉᯪ ᯉ ᯘᯑ ᯘᯪ ᯀᯑ, ᯎᯬᯀᯒ᯲ ᯉᯪ ᯇᯑᯮᯀᯂᯉᯬ᯲ ᯘᯪ ᯐᯞᯪ᯲ᯞ

4:20 Dung i ditubuhon si Ada ma si Jabal, ibana do ompu ni sude angka na mangingani undungundung dohot na marpinahan. ᯑᯰᯮ ᯤ ᯑᯪᯖᯮᯅᯮᯂᯉᯬ᯲ ᯘᯪ ᯀᯑ ᯔ ᯘᯪ ᯐᯅᯞ᯲, ᯤᯅᯉ ᯑᯬ ᯀᯔᯬ᯲ᯇᯮ ᯉᯪ ᯘᯮᯑᯩ ᯀᯰᯄ᯦ ᯉ ᯔᯝᯪᯝᯉᯪ ᯀᯉᯮ᯲ᯑᯰᯮᯀᯉᯮ᯲ᯑᯰᯮ ᯑᯬᯂᯖᯬ᯲ ᯉ ᯔᯒ᯲ᯇᯪᯉᯂᯉ᯲

4:21 Ia goar ni anggina i si Jubal, ibana do ompu ni sude angka sipiltik hasapi dohot sordam. ᯤᯀ ᯎᯬᯀᯒ᯲ ᯉᯪ ᯀᯰᯎᯪᯉ ᯤ ᯘᯪ ᯐᯮᯅᯞ᯲, ᯤᯅᯉ ᯑᯬ ᯀᯔᯬ᯲ᯇᯮ ᯉᯪ ᯘᯮᯑᯩ ᯀᯰᯄ᯦ ᯘᯪᯇᯞᯪ᯲ᯖᯄ᯦ᯪ᯲ ᯂᯘᯇᯪ ᯑᯬᯂᯖᯬ᯲ ᯘᯒᯬ᯲ᯑᯔ᯲

4:22 Si Zilla pe ditubuhon do si Tubal Kain, pande ni sude angka sipauli tombaga dohot bosi; ia iboto ni si Tubal Kain si Naema do. ᯘᯪ ᯐᯞᯪ᯲ᯞ ᯇᯩ ᯑᯪᯖᯮᯅᯮᯂᯉᯬ᯲ ᯑᯬ ᯘᯪ ᯖᯮᯅᯞ᯲ ᯄ᯦ᯀᯉᯪ᯲, ᯇᯉ᯲ᯑᯩ ᯉᯪ ᯘᯮᯑᯩ ᯀᯰᯄ᯦ ᯘᯪᯇᯥᯞᯪ ᯖᯔᯬ᯲ᯅᯎ ᯑᯬᯂᯖᯬ᯲ ᯅᯬᯘᯪ; ᯤᯀ ᯤᯅᯬᯖᯬ ᯉᯪ ᯘᯪ ᯖᯮᯅᯞ᯲ ᯄ᯦ᯀᯉᯪ᯲ ᯘᯪ ᯉᯀᯩᯔ ᯑᯬ

4:23 Dung i ninna si Lamek ma tu jolmana na dua i, si Ada dohot si Zilla: Bege hamu ma soarangku, hamu ale jolma ni si Lamek! Pinggol hamu ma torsangkon! Sai na bunuonku do sada baoa ala ni bugangki, jala sada dolidoli ala ni bosarhon. ᯑᯰᯮ ᯤ ᯉᯉᯪ᯲ᯉ ᯘᯪ ᯞᯔᯄ᯦ᯩ᯲ ᯔ ᯖᯮ ᯐᯞᯬ᯲ᯔᯉ ᯉ ᯑᯮᯀ ᯤ,  ᯘᯪ ᯀᯑ ᯑᯬᯂᯖᯬ᯲ ᯘᯪ ᯐᯞᯪ᯲ᯞ ; ᯅᯩᯎᯩ ᯂᯔᯮ ᯔ ᯘᯬᯀᯒᯰᯄ᯦ᯮ, ᯂᯔᯮ ᯀᯞᯩ ᯐᯞᯬ᯲ᯔ ᯉᯪ ᯘᯪ ᯞᯔᯄᯩ᯦᯲! ᯇᯰᯪᯎᯞᯬ᯲ ᯂᯔᯮ ᯔ ᯖᯒᯬ᯲ᯘᯰᯄ᯦ᯉᯬ᯲! ᯘᯤ ᯉ ᯅᯮᯉᯮᯀᯉᯬ᯲ᯄ᯦ᯮ ᯑᯬ ᯘᯑ ᯅᯀᯬᯀ ᯀᯞ ᯉᯪ ᯅᯮᯎᯰᯄ᯦ᯪ, ᯐᯞ ᯘᯑ ᯑᯬᯞᯪᯑᯬᯞᯪ ᯀᯞ ᯉᯪ ᯅᯬᯘᯒ᯲ᯂᯉᯬ᯲

4:24 Ai molo pitu hali abulon ia si Kain, ingkon pitupulu hali pitu abulon anggo si Lamek. ᯀᯤ ᯔᯬᯞᯬ ᯇᯪᯖᯮ ᯂᯞᯪ ᯀᯅᯮᯞᯉᯬ᯲ ᯤᯀ ᯘᯪ ᯄ᯦ᯀᯉᯪ᯲, ᯀᯰᯪᯄ᯦ᯉᯬ᯲ ᯇᯪᯖᯮᯇᯮᯞᯮ ᯂᯞᯪ ᯇᯪᯖᯮ ᯀᯅᯮᯞᯉᯬ᯲ ᯀᯰᯎᯬ ᯘᯪ ᯞᯔᯄ᯦ᯩ᯲

4:25 Dung i sampur ma si Adam muse dohot jolmana i, jadi ditubuhon ma anak sada, dibahen ma goarna si Set, ai nunga disolukkon Debata tu ahu sada tubu na asing, singkat ni si Abel, na binunu ni si Kain, ninna. ᯑᯰᯮ ᯤ ᯘᯔ᯲ᯇᯒᯮ᯲ ᯔ ᯘᯪ ᯀᯑᯔ᯲ ᯔᯮᯘᯩ ᯑᯬᯂᯖᯬ᯲ ᯐᯞᯬ᯲ᯔᯉ ᯤ, ᯐᯑᯪ ᯑᯪᯖᯮᯅᯮᯂᯉᯬ᯲ ᯔ ᯀᯉᯄ᯦᯲ ᯘᯑ, ᯑᯪᯅᯂᯉᯩ᯲ ᯔ ᯎᯬᯀᯒ᯲ᯉ ᯘᯪ ᯘᯖᯩ᯲,ᯀᯤ  ᯉᯮᯝ ᯑᯪᯘᯬᯞᯄ᯦ᯮ᯲ᯄ᯦ᯉᯬ᯲ ᯑᯩᯅᯖ ᯖᯮ ᯀᯂᯮ ᯘᯑ ᯖᯮᯅᯮ ᯉ ᯀᯘᯰᯪ, ᯘᯰᯪᯄ᯦ᯖ᯲ ᯉᯪ ᯘᯪ ᯀᯅᯞᯩ᯲, ᯉ ᯅᯪᯉᯮᯉᯮ ᯉᯪ ᯘᯪ ᯄ᯦ᯀᯉᯪ᯲, ᯉᯉᯪ᯲ᯉ

4:26 Tubu ma dohot anak ni si Set sada, dibahen ma goarna si Enos. Uju i ma dipungka halak pajoujou goar ni Jahowa. ᯖᯮᯅᯮ ᯔ ᯑᯬᯂᯖᯬ᯲ ᯀᯉᯄ᯦᯲ ᯉᯪ ᯘᯪ ᯘᯖᯩ᯲ ᯘᯑ, ᯑᯪᯅᯂᯉᯩ᯲ ᯔ ᯎᯬᯀᯒ᯲ᯉ ᯘᯪ ᯀᯩᯉᯘᯬ᯲. ᯥᯐᯮ  ᯤ ᯔ  ᯑᯪᯇᯰᯮᯄ᯦  ᯂᯞᯄ᯦᯲  ᯇᯐᯬᯥᯐᯬᯥ ᯎᯬᯀᯒ᯲ ᯉᯪ ᯐᯂᯬᯋ

1 Musa ᯔᯮᯘ 5

5:1 On ma buku ni angka sundut ni si Adam, di ari panompaon ni Debata di si Adam, tudos tu rupa ni Debata ibana ditompa. ᯀᯬᯉ᯲ ᯔ ᯅᯮᯄ᯦ᯮ ᯉᯪ ᯀᯰᯄ᯦ ᯘᯉᯮ᯲ᯑᯖ᯲ ᯉᯪ ᯘᯪ ᯀᯑᯔ᯲, ᯑᯪ ᯀᯒᯪ ᯇᯉᯔᯬ᯲ᯇᯉᯬ᯲ ᯉᯪ ᯑᯩᯅᯖ ᯑᯪ ᯘᯪ ᯀᯑᯔ᯲, ᯖᯮᯑᯘᯬ᯲ ᯖᯮ ᯒᯮᯇ ᯉᯪ ᯑᯩᯅᯖ ᯤᯅᯉ ᯑᯪᯖᯔᯬ᯲ᯇ

5:2 Baoa dohot boruboru nasida ditompa, jala dipasupasu nasida, jala dibahen goarnasida jolma, di ari panompaonnasida i. ᯅᯀᯬᯀ ᯑᯬᯂᯖᯬ᯲ ᯅᯬᯒᯮᯅᯬᯒᯮ ᯉᯘᯪᯑ ᯑᯪᯖᯔᯬᯇ, ᯐᯞ ᯑᯪᯇᯘᯮᯇᯘᯮ ᯉᯘᯪᯑ, ᯐᯞ ᯑᯪᯅᯂᯉᯩ᯲ ᯎᯬᯀᯒ᯲ᯉᯘᯪᯑ ᯐᯞᯬ᯲ᯔ, ᯑᯪ ᯀᯒᯪ ᯇᯉᯔᯬ᯲ᯇᯀᯉ᯲ ᯉᯘᯪᯑ ᯤ

5:3 Jadi dung saratus tolupulu taon mangolu si Adam, tubu ma anakna, tudos tu rupana, songon pangalahona, dibahen ma goarna si Set. ᯐᯑᯪ ᯑᯮᯰ ᯘᯒᯖᯘᯮ᯲ ᯖᯬᯞᯮᯇᯮᯞᯮ ᯖᯀᯉᯬ᯲ ᯔᯝᯬᯞᯮ ᯘᯪ ᯀᯑᯔ᯲, ᯖᯮᯅᯮ ᯔ ᯀᯉᯄ᯦᯲ᯉ, ᯖᯮᯑᯘᯬ᯲ ᯖᯮ ᯒᯮᯇᯉ, ᯘᯬᯝᯉᯬ᯲ ᯇᯝᯞᯂᯬᯉ, ᯑᯪᯅᯂᯉᯩ᯲ ᯔ ᯎᯬᯀᯒ᯲ᯉ ᯘᯪ ᯘᯖᯩ᯲

5:4 Ia umur ni si Adam, dungkonsa ditubuhon si Set ualu ratus taon do, jala ditubuhon anak dohot boru. ᯤᯀ ᯥᯔᯒᯮ᯲ ᯉᯪ ᯘᯪ ᯀᯑᯔ᯲, ᯑᯮᯰᯄ᯦ᯉᯬ᯲ᯘ ᯑᯪᯖᯮᯅᯮᯂᯉᯬ᯲ ᯘᯪᯘᯖᯩ᯲ ᯥᯀᯞᯮ ᯒᯖᯘᯮ᯲ ᯖᯀᯉᯬ᯲ ᯑᯬ, ᯐᯞᯑᯪᯖᯮᯅᯮᯂᯉᯬ᯲ ᯀᯉᯂ᯲ ᯑᯬᯂᯖᯬ᯲ ᯅᯬᯒᯮ.

5:5 Jadi sia ratus tolupulu taon ma sandok umur ni si Adam mangolu, dung i mate ma ibana. ᯐᯑᯪ ᯘᯪᯀ ᯒᯖᯘᯮ᯲ ᯖᯬᯞᯮᯇᯮᯞᯮ ᯖᯀᯉᯬ᯲ ᯔ ᯘᯉ᯲ᯑᯄ᯦ᯬ᯲ ᯥᯔᯒᯮ᯲ ᯉᯪ ᯘᯪ ᯀᯑᯔ᯲ ᯔᯝᯬᯞᯮ,ᯑᯮᯰ ᯤ ᯔᯖᯩ ᯔ ᯤᯅᯉ.

5:6 Dung saratus lima taon leleng ni si Set mangolu, ditubuhon ma si Enos. ᯑᯮᯰ ᯘᯒᯖᯘᯮ᯲ ᯞᯪᯔ ᯖᯀᯉᯬ᯲ ᯞᯩᯞᯰᯩ ᯉᯪ ᯘᯪ ᯘᯩᯖᯩ᯲ ᯔᯝᯬᯞᯮ, ᯑᯪᯖᯮᯅᯮᯂᯉᯬ᯲ ᯔ ᯘᯪ ᯀᯩᯉᯘᯬ᯲

5:7 Ia leleng ni si Set mangolu, dung ditubuhon si Enos, ualu ratus pitu taon do, jala ditubuhon anak dohot boru. ᯤᯀ ᯞᯩᯞᯰᯩ ᯉᯪ ᯘᯪ ᯘᯖᯩ᯲ ᯔᯝᯬᯞᯮ, ᯑᯮᯰ ᯑᯪᯖᯮᯅᯮᯂᯉᯬ᯲ ᯘᯪ ᯀᯩᯉᯘᯬ᯲, ᯥᯀᯞᯮ ᯒᯖᯘᯮ᯲ ᯇᯪᯖᯮ ᯖᯀᯉᯬ᯲ ᯑᯬ, ᯐᯞ ᯑᯪᯖᯮᯅᯮᯂᯉᯬ᯲ ᯀᯉᯄ᯦᯲ ᯑᯬᯂᯖᯬ᯲ ᯅᯬᯒᯮ.

5:8 Jadi sia ratus sampulu dua taon ma sandok umur ni si Set, dung i mate ma ibana. ᯐᯑᯪ ᯘᯪᯀ ᯒᯖᯘᯮ᯲ ᯘᯔ᯲ᯇᯮᯞᯮ ᯑᯮᯀ ᯖᯀᯉᯬ᯲ ᯔ ᯘᯉ᯲ᯑᯂᯬ᯲ ᯥᯔᯒᯮ᯲ ᯉᯪ ᯘᯪ ᯘᯖᯩ᯲, ᯑᯮᯰ ᯤ ᯔᯖᯩ ᯔ ᯤᯅᯉ

5:9 Dung siapulu taon leleng ni si Enos mangolu, ditubuhon ma si Kenan. ᯑᯮᯰ ᯘᯪᯀᯇᯮᯞᯮ ᯖᯀᯉᯬ᯲ ᯞᯩᯞᯰᯩ ᯉᯪ ᯘᯪ ᯀᯩᯉᯘᯬ᯲ ᯔᯝᯬᯞᯮ, ᯑᯪᯖᯮᯅᯮᯂᯉᯬ᯲ ᯔ ᯘᯪ ᯄᯩ᯦ᯉᯉ᯲

5:10 Ia leleng ni si Enos mangolu, dung ditubuhon si Kenan, ualu ratus sampulu lima taon do, jala ditubuhon anak dohot boru. ᯤᯀ ᯞᯩᯞᯰᯩ ᯉᯪ ᯘᯪ ᯀᯩᯉᯘᯬ᯲ ᯔᯝᯬᯞᯮ, ᯑᯮᯰ ᯑᯪᯖᯮᯅᯮᯂᯉᯬ᯲ ᯘᯪ ᯄᯩ᯦ᯉᯉ᯲, ᯥᯀᯞᯮ ᯒᯖᯘᯮ᯲ ᯘᯔ᯲ᯇᯮᯞᯮ ᯞᯪᯔ ᯖᯀᯉᯬ᯲ ᯑᯬ, ᯐᯞ ᯑᯪᯖᯮᯅᯮᯂᯉᯬ᯲ ᯀᯉᯄ᯦᯲ ᯑᯬᯂᯖᯬ᯲ ᯅᯬᯒᯮ

5:11 Jadi sia ratus lima taon sandok umur ni si Enos, dung i mate ma ibana. ᯐᯑᯪ ᯘᯪᯀ ᯒᯖᯘᯮ᯲ ᯞᯪᯔ ᯖᯀᯉᯬ᯲ ᯘᯉ᯲ᯑᯂᯬ᯲ ᯥᯔᯒᯮ᯲ ᯉᯪ ᯘᯪ ᯀᯩᯉᯘᯬ᯲ ,ᯑᯮᯰ ᯤ ᯔᯖᯩ ᯔ ᯤᯅᯉ

5:12 Dung pitupulu taon leleng ni si Kenan mangolu, ditubuhon ma si Mahalaleel. ᯑᯮᯰ ᯇᯪᯖᯮᯇᯮᯞᯮ ᯖᯀᯉᯬ᯲ ᯞᯩᯞᯰᯩ ᯉᯪ ᯘᯪ ᯄᯩ᯦ᯉᯉ᯲ ᯔᯝᯬᯞᯮ, ᯑᯪᯖᯮᯅᯮᯂᯉᯬ᯲ ᯔ ᯘᯪ ᯔᯂᯞᯞᯩᯀᯞᯩ᯲.

5:13 Ia leleng ni si Kenan mangolu dung ditubuhon si Mahalaleel ualu ratus opatpulu taon do, jala ditubuhon anak dohot boru. ᯤᯀ ᯞᯩᯞᯰᯩ ᯉᯪ ᯘᯪ ᯄᯩ᯦ᯉᯉ᯲ ᯔᯝᯬᯞᯮ ᯑᯮᯰ ᯑᯪᯖᯮᯅᯮᯂᯉᯬ᯲ ᯘᯪ ᯔᯂᯞᯞᯩᯀᯞᯩ᯲ ᯥᯀᯞᯮ ᯒᯖᯘᯮ᯲ ᯀᯬᯇᯖ᯲ᯇᯮᯞᯮ ᯖᯀᯉᯬ᯲ ᯑᯬ, ᯐᯞ ᯑᯪᯖᯮᯅᯮᯂᯉᯬ᯲ ᯀᯉᯄ᯦᯲ ᯑᯬᯂᯖᯬ᯲ ᯅᯬᯒᯮ

5:14 Jadi sia ratus sampulu taon ma sandok umur ni si Kenan, dung i mate ma ibana. ᯐᯑᯪ ᯘᯪᯀ ᯒᯖᯘᯮ᯲ ᯘᯔ᯲ᯇᯮᯞᯮ ᯖᯀᯉᯬ᯲ ᯔ ᯘᯉ᯲ᯑᯂᯬ᯲ ᯥᯔᯒᯮ᯲ ᯉᯪ ᯘᯪ ᯄᯩ᯦ ᯉᯉ᯲,ᯑᯮᯰ ᯤᯔᯖᯩ ᯔ ᯤᯅᯉ

5:15 Dung onompulu lima taon leleng ni si Mahalaleel mangolu, ditubuhon ma si Jared. ᯑᯮᯰ ᯀᯬᯉᯔᯬ᯲ᯇᯮᯞᯮ ᯞᯪᯔ ᯖᯀᯉᯬ᯲ ᯞᯩᯞᯰᯩ ᯉᯪ ᯘᯪ ᯔᯂᯞᯞᯩᯀᯞᯩ᯲ ᯔᯝᯬᯞᯮ, ᯑᯪᯖᯮᯅᯮᯂᯉᯬ᯲ ᯔ ᯘᯪ ᯐᯒᯑᯩ᯲

5:16 Ia leleng ni si Mahalaleel mangolu, dung ditubuhon si Jared, ualu ratus tolupulu taon, jala ditubuhon anak dohot boru. ᯤᯀ ᯞᯩᯞᯰᯩ ᯉᯪ ᯘᯪ ᯔᯂᯞᯞᯩᯀᯞᯩ᯲ ᯔᯝᯬᯞᯮ, ᯑᯮᯰ ᯑᯪᯖᯮᯅᯮᯂᯉᯬ᯲ ᯘᯪ ᯐᯒᯑᯩ᯲, ᯥᯀᯞᯮ ᯒᯖᯘᯮ᯲ ᯖᯬᯞᯮᯇᯮᯞᯮ ᯖᯀᯉᯬ᯲, ᯐᯞ ᯑᯪᯖᯮᯅᯮᯂᯉᯬ᯲ ᯀᯉᯄ᯦᯲ ᯑᯬᯂᯖᯬ᯲ ᯅᯬᯒᯮ

5:17 Jadi ualu ratus siapulu lima taon sandok umur ni si Mahalaleel, dung i mate ma ibana. ᯐᯑᯪ ᯥᯀᯞᯮ ᯒᯖᯘᯮ᯲ ᯘᯪᯀᯇᯮᯞᯮ ᯞᯪᯔ ᯖᯀᯉᯬ᯲ ᯘᯉ᯲ᯑᯄ᯦ᯬ᯲ ᯥᯔᯒᯮ᯲ ᯉᯪ ᯘᯪ ᯔᯂᯞᯞᯩᯀᯞᯩ᯲, ᯑᯮᯰ ᯤ ᯔᯖᯩ ᯔ ᯤᯅᯉ.

5:18 Dung saratus onompulu dua taon leleng ni si Jared mangolu, ditubuhon ma si Henok. ᯑᯮᯰ ᯘᯒᯖᯘᯮ᯲ ᯀᯬᯉᯔᯬ᯲ᯇᯮᯞᯮ ᯑᯮᯀ ᯖᯀᯉᯬ᯲ ᯞᯩᯞᯰᯩ ᯉᯪ ᯘᯪ ᯐᯒᯑᯩ᯲ ᯔᯝᯬᯞᯮ, ᯑᯪᯖᯮᯅᯮᯂᯉᯬ᯲ ᯔ ᯘᯪ ᯂᯩᯉᯂᯬ᯲

5:19 Ia leleng ni si Jared mangolu, dung ditubuhon si Henok, ualu ratus taon, jala ditubuhon anak dohot boru. ᯤᯀ ᯞᯩᯞᯰᯩ ᯉᯪ ᯘᯪ ᯐᯒᯑᯩ᯲ ᯔᯝᯬᯞᯮ, ᯑᯮᯰ ᯑᯪᯖᯮᯅᯮᯂᯉᯬ᯲ ᯘᯪ ᯂᯩᯉᯄ᯦ᯬ᯲, ᯥᯀᯞᯮ ᯒᯖᯘᯮ᯲ ᯖᯀᯉᯬ᯲, ᯐᯞ ᯑᯪᯖᯮᯅᯮᯂᯉᯬ᯲ ᯀᯉᯄ᯦᯲ ᯑᯬᯂᯖᯬ᯲ ᯅᯬᯒᯮ

5:20 Jadi sia ratus onompulu dua taon sandok umur ni si Jared, dung i mate ma ibana. ᯐᯑᯪ ᯘᯪᯀ ᯒᯖᯘᯮ᯲ ᯀᯬᯉᯔᯬ᯲ᯇᯮᯞᯮ ᯑᯮᯀ ᯖᯀᯉᯬ᯲ ᯘᯉ᯲ᯑᯂᯬ᯲ ᯥᯔᯒᯮ᯲ ᯉᯪ ᯘᯪ ᯐᯒᯑᯩ᯲ ,ᯑᯮᯰ ᯤ ᯔᯖᯩ ᯔ ᯤᯅᯉ

5:21 Dung onompulu lima taon leleng ni si Henok mangolu, ditubuhon ma si Metusalah. ᯑᯮᯰ ᯀᯬᯉᯔᯬ᯲ᯇᯮᯞᯮ ᯞᯪᯔ ᯖᯀᯉᯬ᯲ ᯞᯩᯞᯰᯩ ᯉᯪ ᯘᯪ ᯂᯩᯉᯄ᯦ᯬ᯲ ᯔᯝᯬᯞᯮ, ᯑᯪᯖᯮᯅᯮᯂᯉᯬ᯲ ᯔ ᯘᯪ ᯔᯩᯖᯮᯘᯞᯂ᯲

5:22 Jadi dung ditubuhon si Metusalah i, sai marparange, mardonganhon Debata ma si Henok tolu ratus taon lelengna, jala ditubuhon anak dohot boru. ᯐᯑᯪ ᯑᯮᯰ ᯑᯪᯖᯮᯅᯮᯂᯉᯬ᯲ ᯘᯪ ᯔᯩᯖᯮᯘᯞᯂ᯲ ᯤ, ᯘᯤ ᯔᯒ᯲ᯇᯒᯝᯩ, ᯔᯒ᯲ᯑᯬᯝᯉ᯲ᯂᯉᯬ᯲ ᯑᯩᯅᯖ ᯔ ᯘᯪ ᯂᯩᯉᯄ᯦ᯬ᯲ ᯖᯬᯞᯮ ᯒᯖᯘᯮ᯲ ᯖᯀᯉᯬ ᯞᯩᯞᯰᯩᯉ, ᯐᯞ ᯑᯪᯖᯮᯅᯮᯂᯉᯬ᯲ ᯀᯉᯄ᯦᯲ ᯑᯬᯂᯖᯬ᯲ ᯅᯬᯒᯮ.

5:23 Jadi tolu ratus onompulu lima taon sandok umur ni si Henok. ᯐᯑᯪ ᯖᯬᯞᯮ ᯒᯖᯘᯮ᯲ ᯀᯬᯉᯔᯬ᯲ᯇᯮᯞᯮ ᯞᯪᯔ ᯖᯀᯉᯬ᯲ ᯘᯉ᯲ᯑᯄ᯦ᯬ᯲ ᯥᯔᯒᯮ᯲ ᯉᯪ ᯘᯪ ᯂᯩᯉᯂᯬ᯲.

5:24 Jala sai marparange, mardonganhon Debata ma si Henok, dung i ndang disi be ibana, ai dialap Debata do ibana. ᯐᯞ ᯘᯤ ᯔᯒ᯲ᯇᯒᯝᯩ, ᯔᯒ᯲ᯑᯬᯝᯉ᯲ᯂᯉᯬ᯲ ᯑᯩᯅᯖ ᯔ ᯘᯪ ᯂᯩᯉᯄ᯦ᯬ᯲, ᯑᯮᯰ ᯤ ᯉ᯲ᯑᯰ ᯑᯪᯘᯪ ᯅᯩ ᯤᯅᯉ, ᯀᯤ ᯑᯪᯀᯞᯇ᯲ ᯑᯩᯅᯖ ᯑᯬ ᯤᯅᯉ.

5:25 Dung saratus ualupulu pitu taon leleng ni si Metusalah mangolu, ditubuhon ma si Lamek. ᯑᯮᯰ ᯘᯒᯖᯘᯮ᯲ ᯥᯀᯞᯮᯇᯮᯞᯮ ᯇᯪᯖᯮ ᯖᯀᯉᯬ᯲ ᯞᯩᯞᯰᯩ ᯉᯪ ᯘᯪ ᯔᯩᯖᯮᯘᯞᯂ᯲ ᯔᯝᯬᯞᯮ, ᯑᯪᯖᯮᯅᯮᯂᯉᯬ᯲ ᯔ ᯘᯪ ᯞᯔᯄᯩ᯦᯲.

5:26 Ia leleng ni si Metusalah mangolu, dung ditubuhon si Lamek, pitu ratus ualupulu dua taon do, jala ditubuhon anak dohot boru. ᯤᯀ ᯞᯩᯞᯰᯩ ᯉᯪ ᯘᯪ ᯔᯩᯖᯮᯘᯞᯂ᯲ ᯔᯝᯬᯞᯮ, ᯑᯮᯰ ᯑᯪᯖᯮᯅᯮᯂᯉᯬ᯲ ᯘᯪ ᯞᯔᯄᯩ᯦᯲, ᯇᯪᯖᯮ ᯒᯖᯘᯮ᯲ ᯥᯀᯞᯮᯇᯮᯞᯮ ᯑᯮᯀ ᯖᯀᯉᯬ᯲ ᯑᯬ, ᯐᯞ ᯑᯪᯖᯮᯅᯮᯂᯉᯬ᯲ ᯀᯉᯄ᯦᯲ ᯑᯬᯂᯖᯬ᯲ ᯅᯬᯒᯮ.

5:27 Jadi sia ratus onompulu sia taon sandok umur ni si Metusalah, dung i mate ma ibana. ᯐᯑᯪ ᯘᯪᯀ ᯒᯖᯘᯮ᯲ ᯀᯬᯉᯔᯬ᯲ᯇᯮᯞᯮ ᯘᯪᯀ ᯖᯀᯉᯬ᯲ ᯘᯉ᯲ᯑᯂᯬ᯲ ᯥᯔᯒᯮ᯲ ᯉᯪ ᯘᯪᯔᯩᯖᯮᯘᯞᯂ᯲, ᯑᯮᯰ ᯤ ᯔᯖᯩ ᯔ ᯤᯅᯉ

5:28 Dung saratus ualupulu dua taon leleng ni si Lamek mangolu, ditubuhon ma sada anak. ᯑᯮᯰ ᯘᯒᯖᯘᯮ᯲ ᯥᯀᯞᯮᯇᯮᯞᯮ ᯑᯮᯀ ᯖᯀᯉᯬ᯲ ᯞᯩᯞᯰᯩ ᯉᯪ ᯘᯪ ᯞᯔᯄᯩ᯦ ᯔᯝᯬᯞᯮ,ᯑᯪᯖᯮᯅᯮᯂᯉᯬ᯲ ᯔ ᯘᯑ ᯀᯉᯄ᯦᯲.

5:29 Dung i dibahen ma goarna si Noak, ninna ma: On ma mangapul hita di ulaonta dohot di haloloja ni tanganta di tano on, na hona toru ni Jahowa. ᯑᯮᯰ ᯤ ᯑᯪᯅᯂᯉᯩ᯲ ᯔ ᯎᯬᯀᯒ᯲ᯉ ᯘᯪ ᯉᯬᯀᯄ᯦᯲, ᯉᯉᯪ᯲ᯉ ᯔ: ᯀᯉᯬ᯲ ᯔ ᯔᯝᯇᯞᯮ᯲ ᯂᯪᯖ ᯑᯪ ᯥᯞᯀᯉᯬ᯲ᯖ ᯑᯬᯂᯖᯬ᯲ ᯑᯪ ᯂᯞᯬᯞᯬᯐ ᯉᯪ ᯖᯝᯉ᯲ᯖ ᯑᯪ ᯖᯉᯬ ᯀᯉᯬ᯲, ᯉ ᯂᯬᯉ ᯖᯬᯒᯮ ᯉᯪ ᯐᯂᯬᯋ.

5:30 Ia leleng ni si Lamek mangolu, dung ditubuhon si Noak, lima ratus siapulu lima taon do, jala ditubuhon anak dohot boru. ᯤᯀ ᯞᯩᯞᯰᯩ ᯉᯪ ᯘᯪ ᯞᯔᯄᯩ᯦᯲ ᯔᯝᯬᯞᯮ, ᯑᯮᯰ ᯑᯪᯖᯮᯅᯮᯂᯉᯬ᯲ ᯘᯪ ᯉᯬᯀᯄ᯦᯲, ᯞᯪᯔ ᯒᯖᯘᯮ᯲ ᯘᯪᯀᯇᯮᯞᯮ ᯞᯪᯔ ᯖᯀᯉᯬ᯲ ᯑᯬ, ᯐᯞ ᯑᯪᯖᯮᯅᯮᯂᯉᯬ᯲ ᯀᯉᯄ᯦᯲ ᯑᯬᯂᯖᯬ᯲ ᯅᯬᯒᯮ.

5:31 Jadi pitu ratus pitupulu pitu taon sandok umur ni si Lamek, dung i mate ma ibana. ᯐᯑᯪ ᯇᯪᯖᯮ ᯒᯖᯘᯮ᯲ ᯇᯪᯖᯮᯇᯮᯞᯮ ᯇᯪᯖᯮ ᯖᯀᯉᯬ᯲ ᯘᯉ᯲ᯑᯂᯬ᯲ ᯥᯔᯒᯮ᯲ ᯉᯪ ᯘᯪ ᯞᯔᯄᯩ᯦᯲, ᯑᯮᯰ ᯤ ᯔᯖᯩ ᯔ ᯤᯅᯉ

5:32 Dung lima ratus taon umur ni si Noak, ditubuhon ma si Sem, si Ham dohot si Japet. ᯑᯮᯰ ᯞᯪᯔ ᯒᯖᯘᯮ᯲ ᯖᯀᯉᯬ᯲ ᯥᯔᯒᯮ᯲ ᯉᯪ ᯘᯪ ᯉᯬᯀᯄ᯦᯲, ᯑᯪᯖᯮᯅᯮᯂᯉᯬ᯲ ᯔ ᯘᯪ ᯘᯔᯩ᯲, ᯘᯪ ᯂᯔ᯲ ᯑᯬᯂᯖᯬ᯲ ᯘᯪ ᯐᯇᯖᯩ᯲.

1 Musa ᯔᯮᯘ 6

6:1 Jadi dung mamungka lam torop jolma i di tano on, jala tubuan boru nasida. ᯐᯑᯪ ᯑᯮᯰ ᯔᯔᯮᯰᯄ᯦ ᯞᯔ᯲ ᯖᯬᯒᯇᯬ᯲ ᯐᯞᯬ᯲ᯔ ᯤ ᯑᯪ ᯖᯉᯬ ᯀᯉᯬ᯲, ᯐᯞ ᯖᯮᯅᯮᯀᯉ᯲ ᯅᯬᯒᯮ ᯉᯘᯪᯑ.

6:2 Diririt angka anak ni Debata ma boru ni jolma, ala na uli do nasida, jala dibuat bahen jolmanasida guru pamillitnasida. ᯑᯪᯒᯪᯒᯖᯪ᯲ ᯀᯰᯄᯰ᯦ ᯀᯉᯄ᯦᯲ ᯉᯪ ᯑᯩᯅᯖ ᯔ ᯅᯬᯒᯮ ᯉᯪ ᯐᯞᯬ᯲ᯔ, ᯀᯞ ᯉ ᯥᯞᯪ ᯑᯬ ᯉᯘᯪᯑ, ᯐᯞ ᯑᯪᯅᯮᯀᯖ᯲ ᯅᯂᯉᯩ᯲ ᯐᯞᯬ᯲ᯔᯉᯘᯪᯑ ᯎᯮᯒᯮ ᯇᯔᯞᯪ᯲ᯞᯖᯪ᯲ᯉᯘᯪᯑ.

6:3 Jadi ninna Jahowa ma: Ndang be uhumon ni Tondingku jolma i di haliluonnasida, ai roha daging do ibana, jala saratus duapulu taon na ma umurna. ᯐᯑᯪ ᯉᯉ᯲ᯉ ᯐᯂᯬᯋ ᯔ: ᯉ᯲ᯑᯰ ᯅᯩ ᯥᯂᯮᯔᯉᯬ᯲ ᯉᯪ ᯖᯉᯪᯑᯰᯪᯄ᯦ᯮ ᯐᯞᯬ᯲ᯔ ᯤ ᯑᯪᯂᯞᯪᯞᯮᯀᯉᯬ᯲ᯉᯘᯪᯑ, ᯀᯤ ᯒᯬᯂ ᯑᯎᯰᯪ ᯑᯬ ᯤᯅᯉ, ᯐᯞ ᯘᯒᯖᯘᯮ᯲ ᯑᯮᯀᯇᯮᯞᯮ ᯖᯀᯉ᯲ ᯉ ᯔ ᯥᯔᯒᯮᯉ

6:4 Adong ma uju i angka Nepilim (pandobo) di tano on. Ai dung ditopot angka anak ni Debata angka boru ni jolma, adong ma huhut tubunasida, i ma angka na begu, angka baoa na tarbarita sian na robi. ᯀᯑᯰᯬ ᯔ ᯥᯐᯮ ᯤ ᯀᯰᯄ᯦ ᯉᯩᯇᯪᯞᯔᯪ᯲ (ᯇᯉ᯲ᯑᯬᯅᯬ) ᯑᯪ ᯖᯉᯬ ᯀᯉᯬ᯲. ᯀᯤ ᯑᯮᯰ ᯑᯪᯖᯬᯇᯖᯬ᯲ ᯀᯰᯄ᯦ ᯀᯉᯄ᯦᯲ ᯉᯪ ᯑᯩᯅᯖ ᯀᯰᯄ᯦ ᯅᯬᯒᯮ ᯉᯪ ᯐᯞᯬ᯲ᯔ, ᯀᯑᯰᯬ ᯔ ᯂᯮᯂᯖᯮ᯲ ᯖᯮᯅᯮᯉᯘᯪᯑ, ᯤ ᯔ ᯀᯰᯄ᯦ ᯉ ᯅᯩᯎᯮ, ᯀᯰᯄ᯦ ᯅᯀᯬᯀ ᯉ ᯖᯒ᯲ᯅᯒᯪᯖ ᯘᯪᯀᯉ᯲ ᯉ ᯒᯬᯅᯪ.

6:5 Alai dung diida Jahowa, nunga lam deak hajahaton ni jolma di tano on, jala sai na jat na ma sude tubutubu dohot pingkiran ni rohanasida gonop ari. ᯀᯞᯤ ᯑᯮᯰ ᯑᯪᯤᯑ ᯐᯂᯬᯋ, ᯉᯮᯝ ᯞᯔ᯲ ᯑᯩᯀᯄ᯦᯲ ᯂᯐᯂᯖᯉᯬ᯲ ᯉᯪ ᯐᯞᯬ᯲ᯔ ᯑᯪ ᯖᯉᯬ ᯀᯉᯬ᯲, ᯐᯞ ᯘᯤ ᯉ ᯐᯖ᯲ ᯉ ᯔ ᯘᯮᯑᯩ ᯖᯮᯅᯮᯖᯮᯅᯮ ᯑᯬᯂᯖᯬ᯲ ᯇᯰᯪᯄ᯦ᯪᯒᯉ᯲ ᯉᯪ ᯒᯬᯂᯉᯘᯪᯑ ᯎᯬᯉᯇᯬ᯲ ᯀᯒᯪ.

6:6 Jadi disolsoli Jahowa ma rohana, ala tinompana i jolma di tano on, jala lungun rohana. ᯐᯑᯪ ᯑᯪᯘᯞᯬ᯲ᯘᯬᯞᯪ ᯐᯂᯬᯋ ᯔ ᯒᯬᯂᯉ, ᯀᯞ ᯖᯪᯉᯔᯬ᯲ᯇᯉ ᯤ ᯐᯞᯬ᯲ᯔ ᯑᯪ ᯖᯉᯬ ᯀᯉᯬ᯲, ᯐᯞ ᯞᯮᯝᯉᯮ᯲ ᯒᯬᯂᯉ

6:7 Dung i ninna Jahowa ma: Ripashononku ma sian tano on jolma na hutompa i, ro di pinahan dohot na manjirir, ro di pidong angka na martongatonga langit, ai nunga husolsoli bagingku ala na hutompa i nasida. ᯑᯮᯰ ᯤ ᯉᯉᯪ᯲ᯉ ᯐᯂᯬᯋ ᯔ: ᯒᯪᯇᯘ᯲ᯂᯬᯉᯉᯬ᯲ᯄ᯦ᯮ ᯔ ᯘᯪᯀᯉ᯲ ᯖᯉᯬ ᯀᯉᯬ᯲ ᯐᯞᯬ᯲ᯔ ᯉ ᯂᯮᯖᯔᯬ᯲ᯇ ᯤ, ᯒᯬ ᯑᯪ ᯇᯪᯉᯂᯉ᯲ ᯑᯬᯂᯖᯬ᯲ ᯉ ᯔᯉ᯲ᯐᯪᯒᯒᯪ᯲, ᯒᯬ ᯑᯪ ᯇᯪᯑᯰᯬ᯲ ᯀᯰᯄ᯦ ᯉ ᯔᯒ᯲ᯖᯬᯝᯖᯬᯝ ᯞᯝᯖᯪ᯲, ᯀᯤ ᯉᯮᯝ ᯂᯮᯘᯞᯬ᯲ᯘᯬᯞᯪ ᯅᯎᯰᯪᯄ᯦ᯮ ᯀᯞ ᯉ ᯂᯮᯖᯔᯬ᯲ᯇ ᯤ ᯉᯘᯪᯑ

6:8 Alai asi do roha ni Jahowa ianggo marnida si Noak. ᯀᯞᯤ ᯀᯘᯪ ᯑᯬ ᯒᯬᯂ ᯉᯪ ᯐᯂᯬᯋ ᯤᯀᯰᯎᯬ ᯔᯒ᯲ᯉᯪᯑ ᯘᯪ ᯉᯬᯀᯄ᯦᯲

6:9 On ma pinompar ni si Noak: Jolma na bonar jala na daulat roha do si Noak i maradophon donganna magodang, sai marparange mardonganhon Debata do si Noak i. ᯀᯉᯬ᯲ ᯔ ᯇᯪᯉᯔᯬ᯲ᯇᯒ᯲ ᯉᯪ ᯘᯪ ᯉᯬᯀᯄ᯦᯲: ᯐᯞᯬ᯲ᯔ ᯉ ᯅᯬᯉᯒ᯲ ᯐᯞ ᯉ ᯑᯥᯞᯖ᯲ ᯒᯬᯂ ᯑᯬ ᯘᯪ ᯉᯬᯀᯄ᯦᯲ ᯤ ᯔᯒᯑᯇᯬ᯲ᯂᯉᯬ᯲ ᯑᯬᯝᯉ᯲ᯉ ᯔᯎᯬᯑᯰ, ᯘᯤ ᯔᯒ᯲ᯇᯒᯝᯩ ᯔᯒ᯲ᯑᯬᯝᯉ᯲ᯂᯉᯬ᯲ ᯑᯩᯅᯖ ᯑᯬ ᯘᯪ ᯉᯬᯀᯂ᯲ ᯤ.

6:10 Dung i ditubuhon si Noak ma anak tolu, si Sem, si Ham dohot si Japet. ᯑᯮᯰ ᯤ ᯑᯪᯖᯮᯅᯮᯂᯉᯬ᯲ ᯘᯪᯉᯬᯀᯄ᯦᯲ ᯔ ᯀᯉᯄ᯦᯲ ᯖᯬᯞᯮ, ᯘᯪ ᯘᯔᯩ᯲, ᯘᯪ ᯂᯔ᯲ ᯑᯬᯂᯖᯬ᯲ ᯘᯪ ᯐᯇᯖᯩ᯲.

6:11 Alai nunga marjea ianggo tano i maradophon Debata, jala nunga gok hajahaton tano i. ᯀᯞᯤ ᯉᯮᯝ ᯔᯒ᯲ᯐᯩᯀ ᯤᯀᯰᯎᯬ ᯖᯉᯬ ᯤ ᯔᯒᯑᯇᯬ᯲ᯂᯉᯬ᯲ ᯑᯩᯅᯖ, ᯐᯞ ᯉᯮᯝ ᯎᯄ᯦ᯬ᯲ ᯂᯐᯂᯖᯉᯬ᯲ ᯖᯉᯬ ᯤ.

6:12 Dung i ditingkir Debata ma tano i, jala ida ma, nunga marjea: Ai tung saluhut na mardaging paroa pangalahona di tano i. ᯑᯮᯰ ᯤ ᯑᯪᯖᯰᯪᯂᯒᯪ᯲ ᯑᯩᯅᯖ ᯔ ᯖᯉᯬ ᯤ, ᯐᯞ ᯤᯑ ᯔ, ᯉᯮᯝ ᯔᯒ᯲ᯐᯩᯀ: ᯀᯤ ᯖᯰᯮ ᯘᯞᯮᯂᯖᯮ᯲ ᯉ ᯔᯒ᯲ᯑᯎᯰᯪ ᯇᯒᯬᯀ ᯇᯝᯞᯂᯬᯉ ᯑᯪ ᯖᯉᯬ ᯤ

6:13 Jadi ninna Debata ma tu si Noak: Nunga ro ajal ni nasa na mardaging maradophon Ahu, ai nunga gok hajahaton tano on dibahen nasida. Onpe ripashononku ma nasida rap dohot tano on. ᯐᯑᯪ ᯉᯉᯪ᯲ᯉ ᯑᯩᯅᯖ ᯔ ᯖᯮ ᯘᯪ ᯉᯬᯀᯄ᯦᯲: ᯉᯮᯝ ᯒᯬ ᯀᯐᯞ᯲ ᯉᯪ ᯉᯘ ᯉᯔᯒ᯲ᯑᯎᯰᯪ ᯔᯒᯑᯇᯬ᯲ᯂᯉᯬ᯲ ᯀᯂᯮ, ᯀᯤ ᯉᯮᯝ ᯎᯄ᯦ᯬ᯲ ᯂᯐᯂᯖᯉᯬ᯲ ᯖᯉᯬ ᯀᯉᯬ᯲ ᯑᯪᯅᯂᯉᯩ᯲ ᯉᯘᯪᯑ. ᯀᯉᯬ᯲ ᯇᯩ ᯒᯪᯇᯘ᯲ᯂᯬᯉᯉᯬ᯲ᯄ᯦ᯮ ᯔ ᯉᯘᯪᯑ ᯒᯇ᯲ ᯑᯬᯂᯖᯬ᯲ ᯖᯉᯬ ᯀᯉᯬ᯲

6:14 Bahen ma di ho sada parau sian hau goper (marantibane), bahen ma marbilut parau i jala puli sian bagasan dohot sian balian. ᯅᯂᯉᯩ᯲ ᯔ ᯑᯪ ᯂᯬ ᯘᯑ ᯇᯒᯥ ᯘᯪᯀᯉ᯲ ᯂᯥ ᯎᯬᯇᯒᯩ᯲ (ᯔᯒᯉ᯲ᯖᯪᯅᯉᯩ), ᯅᯂᯉᯩ᯲ ᯔ ᯔᯒ᯲ᯅᯪᯞᯖᯮ᯲ ᯇᯒᯥ ᯤ ᯐᯞ ᯇᯮᯞᯪ ᯘᯪᯀᯉ᯲ ᯅᯎᯘᯉ᯲ ᯑᯬᯂᯖᯬ᯲ ᯘᯪᯀᯉ᯲ ᯅᯞᯪᯀᯉ᯲

6:15 Songon on ma singana bahenonmu: Tolu ratus elak unjur ni parau i, limapulu elak bohangna, jala tolupulu elak timbona. ᯘᯬᯝᯉᯬ᯲ ᯀᯉᯬ᯲ ᯔ ᯘᯪᯝᯉ ᯅᯂᯩᯉᯉᯬ᯲ᯔᯮ: ᯖᯬᯞᯮ ᯒᯖᯘᯮ᯲ ᯀᯩᯞᯄ᯦᯲ ᯀᯉᯮ᯲ᯐᯒᯮ᯲ ᯉᯪ ᯇᯒᯥ ᯤ, ᯞᯪᯔᯇᯮᯞᯮ ᯀᯩᯞᯄ᯦᯲ ᯅᯬᯂᯰᯉ, ᯐᯞ ᯖᯬᯞᯮᯇᯮᯞᯮ ᯀᯩᯞ᯦ᯄ᯦᯲ ᯖᯔᯪ᯲ᯅᯬᯉ.

6:16 Bahen tartungkan ginjang sada pandiloan ni parau i, saelak timbona: Alai anggo pintu ni parau i tu lambungna bahen, jala tolu lampis bilutna bahen, sada di toru, sada di tongatonga, jala sada di ginjang. ᯅᯂᯉᯩ᯲ ᯖᯒ᯲ᯖᯰᯮᯄ᯦ᯉ᯲ ᯎᯉᯪ᯲ᯐᯰ ᯘᯑ ᯇᯉ᯲ᯑᯪᯞᯬᯀᯉ᯲ ᯉᯪ ᯇᯒᯥ ᯤ, ᯘᯀᯩᯞᯄ᯦᯲ ᯖᯔᯪ᯲ᯅᯬᯉ: ᯀᯞᯤ ᯀᯰᯎᯬ ᯇᯉᯪ᯲ᯖᯮ ᯉᯪ ᯇᯒᯥ ᯤ ᯖᯮ ᯞᯔ᯲ᯅᯰᯮᯉ ᯅᯂᯉᯩ᯲, ᯐᯞ ᯖᯬᯞᯮ ᯞᯔ᯲ᯇᯘᯪ᯲ ᯅᯪᯞᯖᯮ᯲ᯉ ᯅᯂᯉᯩ᯲, ᯘᯑ ᯑᯪ ᯖᯬᯒᯮ, ᯘᯑ ᯑᯪ ᯖᯬᯝᯖᯬᯝ, ᯐᯞ ᯘᯑ ᯑᯪ ᯎᯉᯪ᯲ᯐᯰ.

6:17 Ai ida, paroonku ma tu tano on aek na sumar laho mangaripashon nasa na mardaging, na marhosa hangoluan di bagasan, angka na di toru ni langit, asa tos hosa ni saluhut na di tano on. ᯀᯤ ᯤᯑ, ᯇᯒᯬᯀᯉᯬ᯲ᯄ᯦ᯮ ᯔ ᯖᯮ ᯖᯉᯬ ᯀᯉᯬ᯲ ᯀᯀᯄᯩ᯦᯲ ᯉ ᯘᯮᯔᯒ᯲ ᯞᯂᯬ ᯔᯝᯒᯪᯇᯘ᯲ᯂᯉᯬ᯲ ᯉᯘ ᯉ ᯔᯒ᯲ᯑᯎᯰᯪ, ᯉ ᯔᯒ᯲ᯂᯬᯘ ᯂᯝᯬᯞᯮᯀᯉ᯲ ᯑᯪ ᯅᯎᯘᯉ᯲, ᯀᯰᯄ᯦ ᯉ ᯑᯪ ᯖᯬᯒᯮ ᯉᯪ ᯞᯝᯖᯪ᯲, ᯀᯘ ᯖᯘᯬ᯲ ᯂᯬᯘ ᯉᯪ ᯘᯞᯮᯂᯖᯮ᯲ ᯉ ᯑᯪ ᯖᯉᯬ ᯀᯉᯬ᯲

6:18 Alai pajongjongonku ma padanhu dohot ho, bongotanmu ma parau i, ho dohot angka anakmu dohot jolmam dohot jolma ni angka anakmi rap dohot ho. ᯀᯞᯤ ᯇᯐᯰᯬᯐᯬᯝᯉᯬ᯲ᯄ᯦ᯮ ᯔ ᯇᯑᯉ᯲ᯄ᯦ᯮ ᯑᯬᯂᯖᯬ᯲ ᯂᯬ, ᯅᯬᯝᯬᯖᯉ᯲ᯔᯮ ᯔ ᯇᯒᯥ ᯤ, ᯂᯬ ᯑᯬᯂᯖᯬ᯲ ᯀᯰᯄ᯦ ᯀᯉᯄ᯦᯲ᯔᯮ ᯑᯬᯂᯖᯬ᯲ ᯐᯞᯬ᯲ᯔᯔ᯲ ᯑᯬᯂᯖᯬ᯲ ᯐᯞᯬ᯲ᯔ ᯉᯪ ᯀᯰᯄ᯦ ᯀᯉᯄ᯦᯲ᯔᯪ ᯒᯇ᯲ ᯑᯬᯂᯖᯬ᯲ ᯂᯬ

6:19 Jala pamasuk ma tu bagasan parau i sapasang be sian nasa na mangolu, sian nasa na mardaging, tunggal dohot boruboru, asa mangolu rap dohot ho. ᯐᯞᯇᯔᯘᯮᯂ᯲ᯔᯖᯮᯅᯎᯘᯉ᯲ᯇᯒᯥᯤᯘᯇᯘᯰᯅᯩᯘᯪᯀᯉ᯲ᯉᯘᯉᯔᯝᯬᯞᯮ,ᯘᯪᯀᯉ᯲ᯉᯘᯉᯔᯒ᯲ᯑᯎᯪᯰ,ᯎᯮᯰᯎᯞ᯲ᯑᯬᯂᯬᯖ᯲ᯅᯬᯒᯮᯅᯬᯒᯮ,ᯀᯘᯔᯝᯬᯞᯮᯒᯇ᯲ᯑᯬᯂᯬᯖ᯲ᯂᯬ.

6:20 Sian pidong masiboan mansamna, sian pinahan pe masiboan mansamna, sian nasa na manjirir di tano i, masiboan mansamna; sapasang be sian luhutna ro tu ho, asa mangolu. ᯘᯪᯀᯉ᯲ ᯇᯪᯑᯰᯬ ᯔᯘᯪᯅᯬᯀᯉ᯲ ᯔᯉ᯲ᯘᯔ᯲ᯉ, ᯘᯪᯀᯉ᯲ ᯇᯪᯉᯂᯉ᯲ ᯇᯩ ᯔᯘᯪᯅᯬᯀᯉ᯲ ᯔᯉ᯲ᯘᯔ᯲ᯉ, ᯘᯪᯀᯉ᯲ ᯉᯘ ᯉ ᯔᯉ᯲ᯐᯪᯒᯒᯪ᯲ ᯑᯪ ᯖᯉᯬ ᯤ, ᯔᯘᯪᯅᯬᯀᯉ᯲ ᯔᯉ᯲ᯘᯔ᯲ᯉ; ᯘᯇᯘᯰ ᯅᯩ ᯘᯪᯀᯉ᯲ ᯞᯮᯂᯖᯮ᯲ᯉ ᯒᯬ ᯖᯮ ᯂᯬ, ᯀᯘ ᯔᯝᯬᯞᯮ

6:21 Alai buat di ho sian nasa sipanganon, angka na tarpangan, jala papungu tu ho bahen bohalmu dohot bohalnasida. ᯀᯞᯤ ᯅᯮᯀᯖ᯲ ᯑᯪ ᯂᯬ ᯘᯪᯀᯉ᯲ ᯉᯘ ᯘᯪᯇᯝᯉᯉᯬ᯲, ᯀᯰᯄ᯦ ᯉ ᯖᯒ᯲ᯇᯝᯉ᯲, ᯐᯞ ᯇᯇᯮᯝᯮ ᯖᯮ ᯂᯬ ᯅᯂᯉᯩ᯲ ᯅᯬᯂᯞ᯲ᯔᯮ ᯑᯬᯂᯖᯬ᯲ ᯅᯬᯂᯞ᯲ᯉᯘᯪᯑ

6:22 Dung i dibahen si Noak ma sude, songon na tinonahon ni Debata tu ibana, songon i dibahen. ᯑᯮᯰ ᯤ ᯑᯪᯅᯂᯉᯩ᯲ ᯘᯪ ᯉᯬᯀᯄ᯦᯲ ᯔ ᯘᯮᯑᯩ, ᯘᯬᯝᯉᯬ᯲ ᯉ ᯖᯪᯉᯬᯉᯂᯉᯬ᯲ ᯉᯪ ᯑᯩᯅᯖ ᯖᯮ ᯤᯅᯉ, ᯘᯬᯝᯉᯬ᯲ ᯤ ᯑᯪᯅᯂᯉᯩ᯲

1 Musa ᯔᯮᯘ 7

7:1 Dung i ninna Jahowa ma tu si Noak: Bongot i ma parau i, ho dohot sude isi ni bagasmu, ai ho do huida na bonar maradophon Ahu di na sansundut on.

7:2 Buat ma di ho pitu pasang be, tunggal dohot boruboruna sian nasa pinahan na ganjing; alai anggo sian pinahan na so ganjing sapasang be, tunggal dohot boruboruna.

7:3 Sian pidong pe, angka na martonga langit, pitu pasang be, tunggal dohot boruboruna, asa adong tinggal boni mangolu di sandok tano on.

7:4 Ai pitu ari nari paroonku ma udan tu tano on opatpulu ari opatpulu borngin lelengna, asa huripashon sian tano on nasa na mangolu, na hutompa i.

7:5 Jadi dibahen si Noak ma sude, songon na tinonahon ni Jahowa tu ibana.

7:6 Alai onom ratus taon ma umur ni si Noak di na ro i aek na sumar i tu tano on.

7:7 Dung i dibongoti si Noak ma parau i rap dohot anakna dohot jolmana, ro di jolma ni angka anakna i di jolo ni aek na sumar i.

7:8 Sian pinahan angka na ganjing dohot sian pinahan na so ganjing dohot sian pidong dohot sian nasa na manjirir di tano on.

7:9 Angka ro be marpasangpasang mandapothon si Noak, tu bagasan parau i, tunggal dohot boruboru, songon na tinonahon ni Debata tu si Noak i.

7:10 Jadi dung salpu na pitu ari i, ro ma aek na sumar tu tano on.

7:11 Paonomratus taonhon di ngolu ni si Noak i, di bulan sipahadua di ari sampulupitu, apala di na sadari i marbuhalbuhal ma sude angka mual ni lung godang, mungkap ma dohot angka pandiloan ni langit.

7:12 Jadi masa ma udan tipotipo tu tano on opatpulu ari opatpulu borngin lelengna.

7:13 Apala di na sadari i do bongot si Noak tu parau i rap dohot angka anakna, si Sem, si Ham dohot si Japet, dohot jolmana dohot na tolu jolma ni angka anakna i.

7:14 Nasida dohot binatang marragam masiboan mansamna, dohot angka pinahan masiboan mansamna dohot sude angka na manjirir di tano on masiboan mansamna, dohot sude angka pidong masiboan mansamna, sude pidong na marende dohot na marhabong.

7:15 Angka ro be marpasangpasang tu si Noak, tu bagasan parau i, sian nasa na mardaging, angka na marhosa hangoluan di bagasan.

7:16 Angka na bongot i, sai marpasang be do ro sian nasa na mardaging, songon na tinonahon ni Debata tu ibana. Dung i dihinsu Jahowa ma sian pudina.

7:17 Jadi ro ma aek na sumar tu tano on opatpulu ari, gabe lam binsat ma aek i, jala dihindathon parau i sian tano on tu ginjang.

7:18 Dung i lam mangalantap ma aek i jala sumar situtu di tano on, gabe meapeap parau i di atas aek i.

7:19 Jadi lam binsat situtu ma aek i di tano on gabe disalpui sude dolok, angka na timbo na di toru ni sandok langit i.

7:20 Sampululima elak aek i tumimbo sian dolok, angka na sinalpuanna.

7:21 Jadi tos ma hosa ni nasa na mardaging, na manjirir di tano on, ro di pidong dohot pinahan dohot binatang, ro di sude na manggulmit di tano on, ro di jolma sudena.

7:22 Mate ma sude na marhosa hangoluan di bagasan igungna, sian sude angka na di darat.

7:23 Jadi ripas ma nasa na adong di tano on, sian jolma ro di pinahan, ro di gulokgulok ro di pidong na martongatonga langit, ripas do saluhutna sian tano on; holan si Noak tading angkup ni na rap dohot ibana di bagasan parau i.

7:24 Dung i sai mangalantap ma aek i di tano on maningtingi saratus limapulu ari lelengna.

1 Musa ᯔᯮᯘ 8

8:1 Dung i diingot Debata ma si Noak dohot sude binatang ro di sude pinahan, angka na rap dohot ibana di bagasan parau i. Jadi dipabolushon Debata ma alogo tu tano i, asa moru aek i.

8:2 Dipolpol ma dohot angka mual ni lung i dohot angka pandiloan ni langit, jala dihomat udan tipotipo sian langit i.

8:3 Jadi lam moru ma aek i sian tano on, salpu saratus limapulu borngin, nunga lam moru angka aek i.

8:4 Asa dung jumpang ari sampulu pitu di bulan sipahapitu, sangkot ma parau i di punsu ni dolok Ararat.

8:5 Dung i sai lam tu moruna aek i ro di bulan sipahasampulu; di artia di bulan sipahasampulu tarida ma angka punsu ni dolok.

8:6 Salpu muse opatpulu borngin, diungkap si Noak ma pandiloan ni parau na binahenna i.

8:7 Dipalua ma sada sigak, sai mulahulak do i, paima marsik aek i sian tano on.

8:8 Dung i dipalua ma sian ibana sada darapati, asa diida manang naung marsik aek i sian sisik ni tano on.

8:9 Alai ndang jumpang darapati hasonggopan ni palak ni patna, jadi mulak ma tu ibana, tu bagasan parau i, ai mangalantap dope aek i di sisik ni sandok tano on. Jadi disurdukkon si Noak ma tanganna, jala ditangkup darapati i manait tu ibana, tu bagasan parau i.

8:10 Dung i dipaima pitu borngin nari, diulahi ma paluahon sada darapati sian parau i.

8:11 Mareak bot ari mulak ma darapati i tu ibana, jala ida ma, sada bulung ni hau jetun na rata di tuktukna. Jadi diboto si Noak ma naung marsik aek i sian tano on.

8:12 Dung i dipaima pitu borngin nari, asa dipalua muse sada darapati, alai ndang be mulak tu ibana.

8:13 Dung i paonomratussadataonhon, di artia di bulan sipahasada, marsik situtu ma aek i sian tano on. Jadi diungkap si Noak ma tarup ni parau i, gabe diida ma naung mahiang sisik ni tano on.

8:14 Jumpang ari duapulu pitu di bulan sipahadua, mahiang ma tano i.

8:15 Jadi ninna Debata ma mandok si Noak:

8:16 Ruar ma ho sian parau i, ho dohot jolmam dohot angka anakmu dohot jolma ni anakmu rap dohot ho.

8:17 Paruar ma rap dohot ho nasa binatang sian nasa na mardaging, angka pidong dohot pinahan dohot nasa na manjirir di tano i, asa rodot nasida, jala lam torop di tano on.

8:18 Jadi ruar ma si Noak rap dohot anakna dohot jolmana dohot jolma ni angka anakna i.

8:19 Ruar ma sian parau i dohot sude binatang, sude gulokgulok dohot sude pidong, sude na manjirir di tano on masiboan mansamna be.

8:20 Dung i dipajok si Noak ma sada langgatan di Jahowa, jala dibuat sian nasa pinahan na ganjing dohot sian nasa pidong na ganjing bahen pelean situtungon, pelehononna di langgatan i.

8:21 Jadi dung dianggo Jahowa uap na hushus i, ninna Jahowa ma di bagasan rohana: Ndang be ulahanku manorui tano on ala jolma i, ai na jat do pingkiran ni roha ni jolma sian sietehetehonna; jala ndang be ulahanku mangaragehon nasa na mangolu, songon na hubahen i.

8:22 Onpe, saleleng adong tano on, ndang jadi mansohot saburon dohot gotilon, ari ngali dohot ari las, ari logo dohot rondo ni ari, arian dohot borngin.

1 Musa ᯔᯮᯘ 9

9:1 Dung i dipasupasu Debata ma si Noak dohot angka anakna, ninna ma mandok nasida: Gabe ma hamu, asa sopar, jala gohi hamu ma tano on.

9:2 Marhabiaran jala jimbolangon ma marnida hamu sude binatang di tano on, ro di sude pidong angka na martongatonga langit dohot nasa na manjirir di tano on, ro di dengke ni laut sudena, sahat tu tanganmu ma nasida.

9:3 Nasa na manggulmit, na mangolu bahen panganonmuna, sahat tu hamu ma i sudena hulehon, songon bulung rata.

9:4 Alai unang pangan hamu juhut, molo di bagasan dope hosana, mandok mudarna i.

9:5 Tongon do, sai luluhononku do mudarmuna marguru tu hosamuna i; sai luluhononku do sian tangan ni nasa binatang dohot sian tangan ni jolma; sian tangan ni baoa donganna i luluhononku hosa ni jolma i.

9:6 Manang ise na mandurushon mudar ni jolma, durushonon ni jolma ma mudarna; ai tudos tu rupa ni Debata jolma i ditompa Debata.

9:7 Alai gabe ma anggo hamu asa sopar, lam rarat ma hamu di tano on, jala lam sopar disi.

9:8 Dung i ninna Debata ma mandok si Noak dohot tu anakna angka na rap dohot ibana, botima i:

9:9 Ida ma anggo Ahu, pahotonku ma padanhu tu hamu ro di pinomparmuna sogot.

9:10 Dohot tu nasa na marhosa na mangolu angka na rap dohot hamu, angka pidong, pinahan dohot nasa binatang ni tano on, angka na rap dohot hamu, sian luhut angka na ruar sian parau ro di sude pahanpahanan ni tano on.

9:11 Pahotonku ma padanhu dohot hamu, paboa na so jadi be ripashonon ni aek na sumar nasa na mardaging, huhut paboa na so masa be aek na sumar i mangaripashon tano on.

9:12 Dung i ninna Debata ma: On ma tanda ni padan na hubahen i tu hamu dohot tu nasa na marhosa na mangolu, angka na rap dohot hamu ro di salelenglelengna:

9:13 Halibutonganki, na hubahen i di ombun, i ma tanda ni padanhu dohot tano on.

9:14 Onpe, molo huparo ombun tu tano on, sai tarida ma halibutongan i di ombun.

9:15 Jadi ingotonku ma padan na hubahen i tu hamu dohot tu nasa na marhosa na mangolu, ro di sude na mardaging, paboa na so pamasaonku be aek na sumar i mangaripashon nasa na mardaging.

9:16 Sai bahenonku do halibutongan i tu ombun, asa hubereng ibana marningot padan salelenglelengna binahen ni Debata tu nasa na marhosa na mangolu, tu nasa na mardaging, na di tano on.

9:17 Dung i ninna Debata ma tu si Noak: On ma tanda ni padan na hupahot tu nasa na mardaging, na di tano on.

9:18 Ianggo anak ni si Noak, angka na ruar sian parau i, on do: Si Sem, si Ham dohot si Japet. Alai anggo si Ham ama ni si Kanaan do i.

9:19 Na tolu i do anak ni si Noak, jala sian nasida do rarat jolma i tu sandok tano on.

9:20 Dung i dipungka si Noak ma sada porlak anggur, ai paruma do ibana.

9:21 Dung i diinum ma deba anggur i jadi mabuk, gabe dipasalang ibana di tongatonga ni undungundungna.

9:22 Jadi diida si Ham, ama ni si Kanaan, parsaemaraon ni amana, gabe dipaboa ma tu hahana na dua i na di balian.

9:23 Dung i dibuat si Sem dohot si Japet sada ulos, jala diampehon tu abaranasida na dua, dung i mardalan pudi ma nasida laho manghungkupi parsaemaraon ni amanasida, bohinasida pe tundal do, asa unang diida parsaemaraon ni amanasida i.

9:24 Dung tarjolma si Noak sian mabukna jala diboto na binahen ni anakna sianggian i tu ibana.

9:25 Jadi ninna ma: Hona bura ma si Kanaan, jampurut ni angka naposo ni angka hahana ma ibana.

9:26 Angkup ni didok ma: Pinuji ma Jahowa, Debata ni si Sem, jala naposona ma anggo si Kanaan.

9:27 Dipararat Debata ma ia si Japet, asa maringan ibana di bagasan undungundung ni si Sem, jala naposona ma anggo si Kanaan i.

9:28 Ia leleng ni si Noak mangolu, dung aek na sumar i tolu ratus limapulu taon do.

9:29 Jadi sia ratus limapulu taon ma sandok umur ni si Noak, dung i mate ma ibana.

1 Musa ᯔᯮᯘ 10

10:1 On do angka sundut ni anak ni si Noak: Si Sem, si Ham dohot si Japet jala tubuan anak be do nasida, dungkonsa aek na sumar i.

10:2 Angka anak ni si Japet: Si Gomer, si Magog, si Madai, si Javan, si Tubal, si Mesek dohot si Tiras.

10:3 Ia anak ni si Gomer i: Si Askenas, si Ripat dohot si Togarma.

10:4 Ia anak ni si Javan i: Si Elisa, si Tarsis, si Kittim dohot si Dodanim.

10:5 Sian nasida rarat angka bangso tu pulopulo mangihuthon luatna be dohot pangkulingna dohot margana dohot bangsona.

10:6 Ia anak ni si Ham: Si Kus, si Mizraim, Put dohot si Kanaan.

10:7 Ia anak ni si Kus i: Si Seba, Hevila, Sapta, Raama dohot Saptika. Ia anak ni si Raama i: Si Seba dohot si Dedan.

10:8 Alai ia si Kus manubuhon si Nimrod, na mamungka marsiajar ulubalang di tano on.

10:9 Parburu na begu ibana maradophon Jahowa. Ala ni do didok halak: Parburu na begu maradophon Jahowa, doshon si Nimrod.

10:10 Ia mula ni harajaonna i, i ma Babel, Erik, Akkad dohot Kabne, angka na di luat Sinear.

10:11 Sian luat i borhat muse si Assur, jala dipungka huta Ninive dohot Rehobot Ir dohot Kala.

10:12 Angkup ni Resen, di holangkolang ni Ninive dohot Kala, i ma huta na bolon.

10:13 Dung i ditubuhon si Mizraim ma halak Lud, halak Anam, halak Lehab dohot halak Naptu.

10:14 Dohot halak Patrus, dohot halak Kaslu, haroroan ni halak Palistim dohot Kaptor.

10:15 Ia si Kanaan ditubuhon ma si Sidon, anak buhabajuna i dohot si Het.

10:16 Dohot si Jebusi, si Amori, si Girgasi.

10:17 Dohot si Hevi, si Arki dohot si Sini.

10:18 Dohot si Arvadi, si Zemari, si Hamati, dung salpu i marserak ma angka marga ni halak Kanaan.

10:19 Ia parbolatan ni halak Kanaan, olat ni Sidon ro di Gerar tolhas tu Gaza, ro di Sodom dohot Gomorra dohot Adma dohot Zeboim, tolhas tu Lasa.

10:20 I ma anak ni si Ham mangihuthon margana dohot pangkulingna, di angka luatna dohot bangsonasida be.

10:21 Jadi tubuan anak ma dohot si Sem, ibana do ama ni sude anak ni si Heber, anggi ni si Japet, hahana i.

10:22 Ia anak ni si Sem: Si Elam, si Assur, si Arpaksad, si Lud dohot si Ram.

10:23 Ia anak ni si Ram i: Si Us, si Hul, si Geter dohot si Mas.

10:24 Ia si Arpaksad manubuhon si Sela; ia si Sela manubuhon si Heber.

10:25 Ia di si Heber tubu dua anak; goar ni na sada Peleg, ala di angka arina sirang tano on; ia goar ni anggina i si Joktan.

10:26 Ia si Joktan manubuhon si Almodad, si Salep, si Hazarmavet, si Jerah.

10:27 Dohot si Hadoram, si Usal, si Dikla.

10:28 Dohot si Hobal, si Abimael, si Seba.

10:29 Dohot si Opir, si Hevila dohot si Jobab. I ma sude anak ni si Joktan.

10:30 Ia inganannasida olat ni Mesa sahat ro di Separ, tu dolok na tungkan habinsaran.

10:31 I ma angka anak ni si Sem mangihuthon margana dohot pangkulingna di angka luatna dohot bangsonasida be.

10:32 I ma pinompar ni anak ni si Noak mangihuthon marganasida di bangsona be; jala sian nasida marserak angka bangso di tano on, dungkonsa aek na sumar i.

1 Musa ᯔᯮᯘ 11

11:1 Saragam do pangkuling masa di sandok tano on jala sada do hata.

11:2 Jadi di na marbungkasan nasida sian habinsaran, jumpang nasida ma tano pea di luat Sinear, gabe maringan nasida disi.

11:3 Dung i masipandohan ma nasida: Tole, tatopa ma tano bahen tano takko, jala masak situtu itatutung i. Jadi tano na minasakna i dipangke bahen batu jala barerang dipangke nasida bahen rapot.

11:4 Dung i angka dipandok nasida ma: Tole, tapungka ma sada hutanta, jala tapajokkon sada tungkup, sungkot ro di langit punsuna, tabahen ma baritanta, asa unang marserak hita tu liat portibi on.

11:5 Jadi tuat ma Jahowa marnida huta dohot tungkup i, na pinauli ni angka anak ni jolma.

11:6 Dung i ninna Jahowa ma: Ida ma sada do bangso jala sada pangkuling di nasida sude, jala nunga dipungka nasida paulihon angka i. Onpe tung so hasundatan nasida paulihon saluhut na sinangkapnasida i.

11:7 Tole, tuat ma Hita jala tagaor pangkulingnasida disi, asa unang be diantusi sahalak pangkuling ni donganna.

11:8 Jadi dipaserak Jahowa ma nasida sian i tu liat portibi on, gabe mansohot nasida paulihon huta i.

11:9 Dibahen i didok goarna Babel, ala disi do digaor Jahowa pangkuling ni sandok isi ni tano on, jala sian i dipaserak Jahowa nasida tu liat portibi on.

11:10 On do angka sundut ni si Sem. Marumur saratus taon ma si Sem, jadi ditubuhon ma si Arpaksad, dua taon dung salpu aek na sumar i.

11:11 Ia leleng ni si Sem mangolu, dung ditubuhon si Arpaksad i lima ratus taon do, jala ditubuhon anak dohot boru.

11:12 Marumur tolupulu lima taon si Arpaksad, jadi ditubuhon ma si Sela.

11:13 Ia leleng ni si Arpaksad mangolu, dung ditubuhon si Sela opat ratus tolu taon do, jala ditubuhon anak dohot boru.

11:14 Marumur tolupulu taon si Sela, jadi ditubuhon ma si Heber.

11:15 Jadi dung ditubuhon si Heber, mangolu dope si Sela opat ratus tolu taon, jadi ditubuhon anak dohot boru.

11:16 Marumur tolupulu opat taon si Heber, jadi ditubuhon ma si Peleg.

11:17 Jadi dung ditubuhon si Peleg mangolu dope si Heber opat ratus tolupulu taon, jala ditubuhon anak dohot boru.

11:18 Marumur tolupulu taon si Peleg, jadi ditubuhon ma si Reu.

11:19 Jadi dung ditubuhon si Reu mangolu dope si Peleg dua ratus sia taon, jala ditubuhon anak dohot boru.

11:20 Marumur tolupulu dua taon si Reu, jadi ditubuhon ma si Serug.

11:21 Jadi dung ditubuhon si Serug, mangolu dope si Reu dua ratus pitu taon, jala ditubuhon anak dohot boru.

11:22 Marumur tolupulu taon si Serug, jadi ditubuhon ma si Nahor.

11:23 Jadi dung ditubuhon si Nahor, mangolu dope si Serug dua ratus taon, jala ditubuhon anak dohot boru.

11:24 Marumur duapulu sia taon si Nahor, jadi ditubuhon ma si Tara.

11:25 Jadi dung ditubuhon si Tara mangolu dope si Nahor saratus sampulu sia taon, jala ditubuhon anak dohot boru.

11:26 Marumur pitupulu taon si Tara, jadi ditubuhon ma si Abram, si Nahor dohot si Haran.

11:27 On do angka sundut ni si Tara: Ditubuhon si Tara do si Abram, si Nahor dohot si Haran. Alai si Haran manubuhon si Lot.

11:28 Alai mate do si Haran jumolo sian si Tara amana i, di tano hatubuanna i, di Ur di luat Kasdim.

11:29 Dung i mambuat boru ma si Abram dohot si Nahor; goar ni jolma ni si Abram si Sarai, ia goar ni jolma ni si Nahor si Milka, boru ni si Haran, ama ni si Milka dohot si Jiska.

11:30 Alai na hol do anggo si Sarai, ndang adong tubuna.

11:31 Dung i diarahon si Tara ma si Abram, anakna i dohot si Lot, anak ni si Haran, pahompuna i, dohot si Sarai, parumaenna, jolma ni si Abram anakna i, jadi bungkas ma nasida sian Ur di luat Kasdim, asa laho tu tano Kanaan, jadi sahat ma nasida tu Haran, laos maringan disi.

11:32 Jadi dung dua ratus lima taon umur ni si Tara, mate ma ibana di Haran.

1 Musa ᯔᯮᯘ12

12:1 Dung i ninna Jahowa ma mandok si Abram: Bungkas ma ho sian tano hagodanganmu dohot sian hatubuanmu dohot sian bagas ni amam tu tano sipatuduhononku tu ho.

12:2 Hubahen pe ho gabe bangso na bolon, jala pasupasuonku ma ho, jala pabalgaonku goarmu, asa gabe pasupasu ho.

12:3 Jala pasupasuonku angka na mamasumasu ho, jala toruanku angka na mamburai ho, jala dapotan pasupasu marhitehite ho saluhut angka bangso ni tano on.

12:4 Jadi bungkas ma si Abram, songon na nidok ni Jahowa tu ibana, bungkas ma dohot si Lot udur dohot ibana. Marumur pitupulu lima taon si Abram, di na bungkas i ibana sian Haran.

12:5 Dung i diarahon si Abram ma si Sarai, jolmana i dohot si Lot, anak ni hahana i ro di sude na sinamotsamotnasida, dohot jolma, angka na tinuhornasida di Haran, jadi bungkas ma nasida laho tu tano Kanaan. Jadi dung tolhas nasida ro di tano Kanaan.

12:6 Diliati si Abram ma tano i sahat tu inganan ni si Sikem, ro di tombak More, nunga di tano i hian halak Kanaan i, didapot.

12:7 Dung i ro ma Jahowa, diida si Abram, didok ma: Tu pinomparmu ma lehononku tano on. Jadi dipajok disi sada langgatan di Jahowa na niidana i.

12:8 Dung i borhat ma ibana sian i tu sada dolok na tungkan habinsaran ni Betel, jala dipagohon undungundungna, tungkan hasundutan ni Betel, jala tungkan habinsaran ni Ai; jadi dipauli ma disi sada langgatan di Jahowa, jala dipajoujou goar ni Jahowa.

12:9 Dung i bungkas muse si Abram laho dompak dangsina.

12:10 Alai masa ma haleon di tano i, jadi tuat ma si Abram tu tano Misir, asa maisolat ibana disi, ai haleon potir do di tano i.

12:11 Jadi mandapothon tano Misir i ibana, ninna ma mandok si Sarai, jolmana i: Huboto do, boruboru na uli rupa do ho.

12:12 Onpe, molo diida halak Misir ho, dohononnasida ma: Jolmana do on, gabe bunuonnasida ahu, ianggo ho pangoluonnasida do.

12:13 Ua dok ma, ibotongku ho, asa sonang ahu ala ho, jala mangolu hosangku ala ho.

12:14 Jadi dung tolhas si Abram ro di tano Misir, dipaberengbereng halak Misir ma boruboru i, ai na uli situtu do ibana.

12:15 Dohot angka panuturi ni raja Firaun paberengbereng ibana, jala dipapujipuji ibana tu raja Firaun; jadi diboan ma boruboru i tu bagas ni raja Firaun.

12:16 Dipadenggan ma uhumna tu si Abram, ala ni angkora i, gabe adong ma di ibana angka birubiru, lombu, halode, angka naposo baoa dohot boruboru, dohot halode boruboru dohot angka unto.

12:17 Alai dihonahon Jahowa ma angka haporsuhon bolon tu raja Firaun dohot tu donganna sajabu ala hata ni si Sarai, jolma ni si Abram i.

12:18 Jadi dijou raja Firaun ma si Abram, didok ma; dia do na binahenmi tu ahu? Boasa so dipaboa ho tu ahu jolmam ibana hape?

12:19 Boasa dohononmu: Ibotongku ibana? Jadi naeng buatonku ibana bahen jolmangku. On pe, na, jolmam, buat ma, dung i laho ma ho.

12:20 Dung i didokkon raja Firaun ma angka naposona bahen donganna pataruhon ibana dohot jolmana dohot sude na di ibana i.

1 Musa ᯔᯮᯘ 13

13:1 Jadi nangkok ma si Abram sian Misir, ibana dohot jolmana dohot sude na di ibana rap dohot si Lot tu Kanaan pardangsina.

13:2 Alai mamora situtu do si Abram di pinahan, perak dohot di sere.

13:3 Dung i didatdati ma dalanna sian dangsina sahat ro di Betel, ro di hajongjongan ni undungundungna di mulana, di holangkolang ni Betel dohot Ai.

13:4 Tu hajongjongan ni langgatan na binahenna disi parjolo, jala dipajoujou si Abram disi goar ni Jahowa.

13:5 Alai si Lot pe, na udur mardalan dohot si Abram, marbirubiru do, jala marlombu jala marundungundung.

13:6 Jadi ndang tarparmudu tano i nasida, ianggo tung tampak maringan, ai tung na godang do artanasida, jadi ndang tarbahen be top nasida maringan.

13:7 Dung i sai adong bada di tongatonga ni sipormahan pinahan ni si Abram dohot sipormahan pinahan ni si Lot. Halak Kanaan i pe dohot halak Perisi maringan uju i di tano i.

13:8 Jadi ninna si Abram ma tu si Lot: Ua unang adong bada di tongatonganta dohot di tongatonga ni parmahan ni pinahanta be, ai na sabutuha do hita.

13:9 Nda di jolom do sandok tano on? Ua sirang ma ho sian ahu! Ia tu hambirang ho, tu siamun ahu; ia tu siamun ho tu hambirang ahu.

13:10 Jadi manatapnatap ma si Lot manangkasi sude angka luat humaliang Jordan, ai angka tano tangkasan do i luhut, tagan so diripashon Jahowa dope Sodom dohot Gomorra, sobokkon porlak ni Jahowa, sobokkon tano Misir tolhas ro di Zoar.

13:11 Jadi dipillit si Lot ma di ibana sude angka luat humaliang Jordan, borhat ma ibana tungkan habinsaran. Asa sirang ma nasida na marsabutuha i.

13:12 Si Abram maringan di tano Kanaan, ianggo si Lot maringan di angka huta ni luat i, jala dibahen undungundungna tolhas ro di Sodom.

13:13 Alai halak na jahat jala pardosa situtu isi ni Sodom i maradophon Jahowa.

13:14 Jadi ninna Jahowa ma mandok si Abram, dung sirang si Lot i sian ibana: Ua tatap ma sian ingananmon dompak utara dohot dompak dangsina dohot dompak habinsaran dohot dompak hasundutan.

13:15 Ai sandok tano na tinatapmi lehononku ma tu ho dohot tu pinomparmu ro di salelenglelengna.

13:16 Jala bahenonku do pinomparmu sobokkon orbuk ni tano toropna, molo tung habilangan jolma orbuk ni tano on, habilangansa ma dohot pinomparmi.

13:17 Borhat ma ho, liati ma tano i mangihuthon unjurna dohot bohangna, ai tu ho do lehononku.

13:18 Jadi dipaunsat si Abram ma undungundungna laho ma ibana maringan tu tombak Mamre na di Hebron, jala dipajokkon disi sada langgatan di Jahowa.

1 Musa ᯔᯮᯘ 14

14:1 Dung i di angka ari uju si Amrapel raja ni Sinear, Ariok raja ni Ellasar, Kedor-Laomor raja ni Elam dohot Tidal raja ni angka bangso parbegu.

14:2 Dipungka nasida ma hamusuon tu si Bera raja ni Sodom, dohot tu si Birsa raja ni Gomorra, si Sinab raja ni Adma, dohot tu si Semeber raja ni Zeboim, dohot tu raja sian Bela, i ma Zoar.

14:3 Mardomu ma nasida luhut tu rura Siddim, i ma laut sira nuaeng.

14:4 Nunga pola sampulu dua taon lelengna dioloi nasida patu tu si Kedor-Laomor, alai pasampulutolutaonhon mangose ma nasida.

14:5 Jadi pasampuluopattaonhon ro ma si Kedor-Laomor dohot angka raja donganna i dipantaluhon ma halak Repaim di luat Asterot-Karnaim, dohot halak Susim di luat Ham dohot halak Emim, na di adaran Kiriataim.

14:6 Dohot halak Hori di Seir doloknasida tolhas ro di adaran Elaparan, na marbalokkon halongonan.

14:7 Dung i mulak ma nasida ro di mual Eumispat, i ma Kades, jala dipapatu sandok luat ni halak Amalek ro di halak Amori, na maringan di Hazezon-Tamar.

14:8 Dung i borhat ma raja ni Sodom dohot raja ni Gomorra dohot raja ni Adma dohot raja ni Zeboim dohot raja ni Bela, i ma Zoar, marodor be ma nasida laho marmusu di rura Siddim.

14:9 Dompak si Kedor-Laomor, raja ni Elam, dohot si Tidal, raja ni angka bangso parbegu, dohot si Amrapel raja ni Sinear, dohot si Ariok raja ni Ellasar; opat raja alo ni na lima i.

14:10 Alai mansai lan do angka lupaklupak barerang di rura Siddim i. Jadi maporus ma raja ni Sodom dohot Gomorra, angka margunopan ma tusi, ianggo angka na teba i maporus do tu dolok.

14:11 Jadi dibuat nasida ma sandok ugasan ni Sodom dohot Gomorra, ro di sude sipanganonna, laho ma nasida.

14:12 Diboan nasida ma dohot si Lot, anak ni haha ni si Abram, ro di ugasanna, ai di Sodom do ibana maringan, laos laho ma nasida.

14:13 Dung i ro sada halak na maporus i, dipaboa ma barita i tu si Abram, halak Heber i, na maringan di tombak Mamre, ginomgom ni si Amori anggi ni si Eskol dohot Aner, angka janji ni si Abram do nasida.

14:14 Jadi dung dibege si Abram barita i naung tarboan anakna i, diparsinjatai ma naposona, angka na somal, tolu ratus sampulu ualu halak, angka na tubu di bagasan jabuna, dieak ma musu i tolhas ro di Dan.

14:15 Dung i disagi ma angka naposona mangarampok musu i bornginna i, jala ditaluhon nasida dung i dilele nasida tolhas ro di Hoba, na tungkan hambirang ni Damaskus.

14:16 Jadi mulak ma diboan saluhut ugasan, dohot do si Lot anakna i, ro di ugasanna, angka boruboru dohot halak na torop i mulak diboan.

14:17 Jadi dung mulak si Abram sian na marporang i dompak si Kedor-Laomor dohot angka raja donganna i, ruar ma raja ni Sodom manomunomu ibana tu rura Sawe i ma rura ni raja i.

14:18 Alai anggo si Melkisedek, raja ni Salem diboan sagusagu dohot anggur; malim ni Debata na mamunjungi do ibana.

14:19 Dung i dipasupasu ma si Abram, ninna ma: Na pinasupasu do ho, ale Abram, ditumpak Debata na mamunjungi, sigomgom langit dohot tano on.

14:20 Jala pinuji ma Debata na mamunjungi, na pasahathon angka musum tu tanganmu, jadi dilehon si Abram ma tu ibana saparsampulu sian luhutna.

14:21 Dung i ninna raja ni Sodom i ma mandok si Abram: Nanggo jolma i lehon di ahu, ianggo ugasan i buat ma di ho!

14:22 Alai ninna si Abram ma tu raja ni Sodom i: Nunga pola maruari ahu tu Jahowa, Debata na mamunjungi, sigomgom langit dohot tano on:

14:23 Molo tung hubuat sian nasa na di ho nanggo sada tali ro di ihot ni sipatu, asa unang tardok ho sogot: Ahu do pamora si Abram.

14:24 Holan na pinangan ni angka dolidoli dohot jambar ni si Aner Eskol dohot Mamre, angka na mandongani ahu, itenang dibuat nasida turpuknasida i.

1 Musa ᯔᯮᯘ 15

15:1 Dung salpu angka jamita ondeng ro ma hata ni Jahowa tu si Abram marhitehite alatan, ninna ma: Unang ho mabiar ale Abram. Ahu do lombulombum, upam mansai balga.

15:2 Alai ninna si Abram ma: Oe ale Tuhan Jahowa, aha ma lehononmu di ahu? Sai na punu do ahu, si Elieser na sian Damaskus na ma sitean bagashu.

15:3 Angkup ni ninna si Abram: Ndi, ndang adong pinomparhu dilehon ho, jala ida, anak na tubu di bagasan jabungku na ma sitean ahu.

15:4 Dung i ro ma hata ni Jahowa mandok tu ibana: Ndang ibana tumean ho, na ruar sian butuham, ibana tumean ho.

15:5 Dung i ditogihon Tuhan i ibana ruar tu balian, jala ninna: Ua tailihon ma dompak langit i jala bilangi angka bintang, molo habilangan ho angka i. Dung i didok muse tu ibana: Songon i ma pinomparmu sogot.

15:6 Jadi porsea ma si Abram di Jahowa, gabe hatigoranna do i dietong Jahowa.

15:7 Dung i didok ma tu ibana: Ahu do Jahowa, na paruarhon ho sian Ur ni halak Kasdim, mangalehon tu ho tano on bahen teanteananmu.

15:8 Alai ninna si Abram ma: Ale Tuhan Jahowa, di aha ma tandaonku paboa ahu tumeansa.

15:9 Dung i ninna Tuhan i ma mandok ibana: Buat ma di Ahu sada lombu na marumur tolu taon dohot sada hambing na marumur tolu taon dohot sada birubiru tunggal na marumur tolu taon dohot anduhur sada dohot anak ni darapati sada.

15:10 Jadi diboan ma i sude di Tuhan i, angka dipardostonga ma i, dung i martoradan be ma dibahen; alai anggo pidong i ndang dibola.

15:11 Dung i marsonggopan ma angka pidong panoro tu angka juhut pelean i, alai diosikkon si Abram ma angka pidong i.

15:12 Jadi dung manihir mata ni ari, tarnenep modom ma si Abram, gabe songgop ma tu ibana hasonggoton dohot haholomon bolon.

15:13 Dung i ninna ma mandok si Abram: Unang so diboto ho, paisolat do sogot pinomparmi di tano na so golatna, jala parhatobanonna nasida, jala paporsukporsuhonna arga opat ratus taon.

15:14 Alai bangso na marhatobanhon nasida pe uhumonku do; dung i ruar ma nasida mantat ugasan godang.

15:15 Ianggo ho topotonmu do angka ompum mardamedame, tanomon do ho dung sarimatua.

15:16 Dung i paopatsunduthon mulak ma nasida, ai ndang dope sun hinajahat ni halak Amori.

15:17 Jadi dung mate mata ni ari, jala holom marimpotimpot, ida ma, martimus ma sada pamurunan, jala disola sada sipusipu na gara holangkolang ni angka tanggotanggo.

15:18 Di ari na sasada i marpadan ma Jahowa dohot si Abram, ninna ma: Tu pinomparmu do lehononku tano on olat ni batang aek Misir sahat ro di batang aek na bolon, i ma batang aek Euprat.

15:19 Tano na niinganan ni halak Keni dohot halak Kenizi dohot halak Kadmoni.

15:20 Dohot halak Het dohot halak Perisi dohot halak Repaim.

15:21 Dohot halak Amori dohot halak Kanaan i dohot halak Girgasi dohot halak Jebusi.

1 Musa ᯔᯮᯘ 16

16:1 Alai anggo si Sarai, jolma ni si Abram, ndang adong ditubuhon di ibana; alai adong do sada hatobanna, boru Misir, na margoar si Hagar.

16:2 Dung i ninna si Sarai ma mandok si Abram, boti ma i: Nunga disundati Jahowa ahu mangintubu, ua topot ma hatobanku, anggiat maruli ahu sian ibana. Jadi ditangihon si Abram ma soara ni si Sarai.

16:3 Dung i dibuat si Sarai, jolma ni si Abram i, si Hagar boru Misir i, dilehon ma tu si Abram, sinondukna i bahen jolmana, dung diingani si Abram tano Kanaan i sampulu taon lelengna.

16:4 Dung i ditopot ma si Hagar i, jadi gabegabean ma ibana. Dung diida naung gabegabean ibana, tingka ma rohana mida soranganna i.

16:5 Dung i ninna si Sarai ma tu si Abram: Marsapata tu ho do ahu! Hulehon hatobanku parjolmaonmu, hape dung diida naung gabegabean ibana, gabe pis matana mida ahu. Jahowa ma manguhum hita.

16:6 Alai ninna si Abram ma mandok si Sarai: Ida ma, guru di ho do hatobanmu, lomo ni roham bahen tu ibana. Jadi dipaposi si Sarai uhumna tu hatobanna i, gabe laho lintun sian jolona.

16:7 Alai jumpang suruan ni Jahowa ibana di lambung ni sada mual di halongonan, di lambung mual di dalan laho tu Sur.

16:8 Didok suruan i ma: Sian dia ho, jala tu dia ho ale Hagar, hatoban ni si Sarai? Na lintun do ahu sian jolo ni si Sarai, soranganki, ninna.

16:9 Dung i ninna suruan ni Jahowa ma mandok ibana: Mulak ma ho tu soranganmu, paunduk ma roham mangoloi ibana.

16:10 Angkup ni didok suruan ni Jahowa tu ibana: Patoroponku situtu ma pinomparmu, gabe ndang habilangan sogot dibahen hinatoropna.

16:11 Dung i ninna suruan ni Jahowa muse tu ibana: Ida ma, naung gabegabean ho, jala tubuan anak ho, bahenonmu ma goarna si Ismael, ai nunga ditangihon Jahowa hinadangolmu.

16:12 Jala jolma sobokkon hije ibana sogot. Tanganna mangalo sude jolma jala tangan ni sude jolma mangalo ibana; jala marpagaran ibana di jolo ni angka donganna sabutuha sasudena.

16:13 Jadi dibahen si Hagar ma goar ni Jahowa, na mangkatai dohot ibana: Ho do Debata na manatap ahu, ai ninna do: Marnida dope ahu tagamon, dung huida Ibana?

16:14 Ala ni digoar ma sumur i: Sumur Lakhai-Roi, na di holangkolang ni Kades dohot Bared.

16:15 Dung i ditubuhon si Hagar ma anak sada di si Abram, jadi dibahen si Abram ma goar ni anakna, na tinubuhon ni si Hagar i, Ismael.

16:16 Marumur ualupulu onom taon si Abram di na tinubuhon ni si Hagar si Ismael i di si Abram.

1 Musa ᯔᯮᯘ 17

17:1 Jadi dung marumur siapulu sia taon si Abram, diida ma ro Jahowa na mandok tu ibana: Ahu do Debata, na sun hinagogo; sai marparange di jolongku ma ho, jala daulat roham!

17:2 Asa hupahot padanhu dohot ho, jala hupatorop situtu ho.

17:3 Jadi manungkap ma si Abram. Dung i mangkatai Debata muse dohot ibana:

17:4 Ianggo Ahu, ida ma, nunga hot padanhu dohot ho, jala torop angka bangso marompu tu ho sogot.

17:5 Ala ni ndang be si Abram goarmu dohonon, si Abraham ma goarmu, ai nunga hupabangkit ho gabe ompu ni torop angka bangso.

17:6 Jala sopar situtu ho tumpahanku, jala pabangkitonku ho gabe ompu parsadaan ni angka bangso, jala marroan sian ho angka raja.

17:7 Sai pahotonku do padanhu tu ho dohot tu pinomparmu sogot marsundutsundut, gabe padan salelenglelengna, paboa Ahu gabe Debatam dohot Debata ni pinomparmu sogot.

17:8 Jala lehononku tu ho dohot tu pinomparmu sogot tano paisolatanmu nuaeng, i ma sandok tano Kanaan bahen partohapan salelenglelengna, jala Debatanasida Ahu.

17:9 Angkup ni didok Debata tu si Abraham: Ho pe, sai ingot ma padan na hubahen i, ho dohot pinomparmu sogot marsundutsundut.

17:10 On do padan siingotonmuna, na hubahen i tu ho dohot tu pinomparmu sogot: Ingkon sunaton do nasa baoa sian hamu.

17:11 Ingkon sunatonmuna do sibuk ni sibursiburmuna bahen tanda ni padanhu dohot hamu.

17:12 Ia anak sunatonmuna ma molo marumur ualu borngin, nasa baoa pinomparmuna na tubu di jabum dohot na tinuhor ni hepeng sian nasa halak sileban na so sian pinomparmu.

17:13 Ingkon sunaton do na tubu di jabum dohot na tinuhor ni hepengmu, asa padan na salelengnilelengna do padanhu na di sibukmuna i.

17:14 Ia baoa parhulup, na so tarsunat sibuk ni sibursiburna ripashononhon do ibana sian bangsona, ala diose padanhu.

17:15 Dung i didok Debata muse tu si Abraham: Ndang be si Sarai dohononmu goar ni jolmam, si Sarah ma goarna.

17:16 Ai pasupasuonku ibana, jala lehononku ma di ho anak sada nang sian ibana, jala pasupasuonku ibana gabe angka bangso; gari raja ni angka bangso marroan sian ibana sogot.

17:17 Jadi manungkap ma si Abraham jala mengkel, didok ma di bagasan rohana: Tung tubuan anak ma jolma sisaratus taon jala manubuhon ma tagamon si Sarah, na marumur siapulu taon?

17:18 Dung i ninna si Abraham ma tu Debata: Asal mangolu si Ismael maradophon Ho!

17:19 Jadi ninna Debata ma: Tongon do, ingkon tubuhonon ni si Sarah, jolmam anak sada di ho, bahen ma goarna si Isak; pahotonku do padanhu dohot ibana, padan na salelenglelengna, ro di pinomparna sogot.

17:20 Taringot tu si Ismael pe, nunga hutangihon ho, ida ma, nunga hupasupasu ibana, tumpahanku ma ibana gabe, asa torop situtu ibana. Sampulu dua raja tubuna, jala bangso na bolon ibana bahenonku.

17:21 Alai anggo padanhu pahotonku dohot si Isak, situbuhonon ni si Sarah di ho, taon i songon on.

17:22 Jadi dung sun Debata mangkatai dohot ibana, manaek ma Debata sian si Abraham.

17:23 Dung i dibuat si Abraham ma si Ismael, anakna i dohot sude anak angka na tubu di jabuna ro di sude na tinuhor ni hepengna, nasa baoa, pangisi ni jabu ni si Abraham, jala disunati sibuk ni sibursiburnasida, laos di ari pangkataianna, songon na nidok ni Debata tu ibana.

17:24 Ia umur ni si Abraham di na tarsunat i sibuk ni sibursiburna i siapulu sia taon do.

17:25 Alai anggo umur ni si Ismael, anakna i, sampulu tolu taon do, di na tarsunat i sibuk ni sibursiburna i.

17:26 Laos di ari na sasada i do tarsunat si Abraham dohot si Ismael anakna i.

17:27 Ro di nasa baoa, pangisi ni jabuna, na tubu di jabuna dohot na tinuhor ni hepeng sian halak sileban, tarsunat do i rap dohot ibana.

1 Musa ᯔᯮᯘ 18

18:1 Dung i diida si Abraham ma Jahowa di tombak Mamre, tongon hundul ibana di baba pintu ni undungundungna, di parngiar ni ari.

18:2 Dung i manaili ma ibana, gabe diida ma tolu halak jongjong di jolona. Jadi dung diida marlojong ma ibana manomunomu nasida sian baba pintu ni undungundungna, jala dipatungki tu tano.

18:3 Dung i ninna ma: Molo asi roham marnida ahu, ale Tuhanku, sai unang laos i naposomon.

18:4 Ua binoan aek i otik, asa diburi hamu totmuna, jala mangunsande hamu di toru ni hau on.

18:5 Asa huboan sagusagu santopik, gabe togar rohamuna, dung i tulus hamu, ai ala ni do umbahen na ro hamu tu lambung ni naposomuna on. Jadi ninna nasida ma: Bahen ma songon na nidokmu.

18:6 Dung i humalaput ma si Abraham tu undungundungna, mandapothon si Sarah, ninna ma: Halaputi ma ne niitak arga tolu bale, dogili bahen sagusagu!

18:7 Marlojong ma ianggo si Abraham manopot inganan ni lombu, jala dibuat anak ni lombu sada na mokmok, jala na uli, dilehon ma tu naposo, na humalaput paulihon i.

18:8 Dung i diboan si Abraham ma susu na nialhotan dohot susu na tata dohot anak ni lombu na pinauli i, jala dipampeakkon tu jolonasida; jongjong ma ianggo ibana di lambungnasida, di toru ni hau i, jadi mangan ma nasida.

18:9 Dung i ninna nasida ma tu ibana: Didia do si Sarah, jolmami? Di undungundung indi do, ninna.

18:10 Dung i didok ma: Sai na mulak do Ahu tu ho taon i songon on, ida adong ma anak ni si Sarah, jolmami. Dohot ma si Sarah umbegesa sian balik ni pintu ni undungundung, hajongjonganna i.

18:11 Alai nunga pola sarimatua be si Abraham dohot si Sarah, nunga pola montok si Sarah marningot hasomalan ni boruboru hian.

18:12 Jadi mengkel ma si Sarah di bagasan rohana, ninna ma: Dung matua pe ahu hape, asa adong di ahu silas ni roha, ubanon dohot rajangku?

18:13 Dung i ninna Jahowa ma tu si Abraham: Boasa ma tung parengkelan ni si Sarah hatangki ninna do: Tung na tutu ma ulaning ahu manubuhon, dung matua ahu?

18:14 Adong do huroha, na so tarpatupa Jahowa? Sai na mulak do Ahu manopot ho taon i songon on, jala adong ma anak sada di si Sarah.

18:15 Jadi ninna si Sarah ma mansoadahon: Ndang na mengkel ahu, ai na mabiar do ibana; alai ninna Jahowa ma: Ndangana, ai na mengkel do ho tutu.

18:16 Dung i hehe ma sian i na tolu baoa i, ditondong ma dompak Sodom; jadi dipataru si Abraham ma nasida.

18:17 Dung i ninna Jahowa ma: Tung pamorso ma Ahu maradophon si Abraham taringot tu na naeng bahenonku?

18:18 Sai na gabe bangso na balga jala na sangap do si Abraham sogot, jala dapotan pasupasu marhitehite ibana nasa bangso di tano on.

18:19 Ai hutanda do ibana, sai na tonaanna muse angka anakna dohot pinomparna di pudina, asa diingot nasida dalan ni Jahowa mangulahon hatigoran dohot uhum, asa dipatolhas Jahowa tu si Abraham na pinarbagabagana tu ibana.

18:20 Dung i didok Jahowa ma: Maungaung do angguhangguk badar sian Sodom dohot Gomorra, ai manahatang do dosanasida i.

18:21 Na tuat ma Ahu, asa huida manang na sun hinajahat ni na niulanasida i, hombar tu angguhangguk na tolhas i tu Ahu, molo ndang, gabe huboto.

18:22 Dung i manirpang ma sian i na dua baoa i mardalan dompak Sodom; alai jongjong dope ianggo si Abraham di jolo ni Jahowa.

18:23 Dung i dipajonok si Abraham, jala ninna ma: Tung ripashononmu ma na tigor rap dohot parjahat?

18:24 Atek tung adong limapulu halak, angka na tigor di bagasan huta i, tung ripashononmu ma i, ndang olananmu huta i ala na limapulu na tigor i, angka na di bagasan i.

18:25 Dao ma i sian Ho mangulahon sisongon i: mambunu na tigor rap dohot parjahat; tung sobokkon parjahat ma na tigor i? Palias ma i sian Ho, tung na so uhum ma bahenon ni Siuhumi liat portibi on?

18:26 Jadi ninna Jahowa ma: Molo tung jumpang Ahu di bagasan huta Sodom limapulu halak, angka na tigor, sai ma olanangku na saluat i ala nasida.

18:27 Dung i ninna si Abraham ma mangalusi: Sombangku ale Tuhan, nunga sapala hum ahu mamungka mangkatai dohot Ho; atek pe orbuk jala sirabun ahu.

18:28 Ua tung moru lima halak sian na limapulu angka na pintor i, tung ripashononmu ma luhut huta i ala ni na lima i? Jadi ninna ma: Ndang ripashononku molo tung jumpang Ahu disi opatpulu lima.

18:29 Dung i diulahi si Abraham muse dope mandok tu Ibana, ninna ma: Ua tung opatpulu jumpang disi! Jadi ninna Jahowa ma: Ndang hahuaonku nasida ala ni na opatpulu i.

18:30 Dung i ninna si Abraham ma: Ua unang tung tarrimas Ho, ale Tuhan, ala hudatdati mandok: Atek tung jumpang disi tolupulu! Jadi ninna Jahowa ma: Ndang hahuaonku nasida, molo tung jumpang Ahu tolupulu disi.

18:31 Dung i ninna si Abraham ma: Ida ma, nunga sapala hum ahu mamungka mandok tu Tuhanki: Ua tung jumpang disi duapulu. Jadi ninna Jahowa ma: Ndang ripashononku ala ni na duapulu i.

18:32 Jadi ninna si Abraham ma: Unang tung tarrimas Ho, ale Tuhanki, ala na mandok ahu dope holan sahali on: Atek tung jumpang disi sampulu? Jadi ninna Jahowa ma: Ndang ripashononku nasida ala ni na sampulu i.

18:33 Jadi dung sun Jahowa mangkatai dohot si Abraham, laho ma Ibana, mulak ma dohot si Abraham tu ingananna.

1 Musa ᯔᯮᯘ 19

19:1 Ianggo surusuruan na dua halak i tolhas ma bodarina i tu huta Sodom; alai hundulhundul di harbangan ni Sodom i si Lot. Jadi dung diida si Lot nasida, hehe ma ibana manomunomu nasida, dipatungkap ma bohina tu tano.

19:2 Dung i ninna ma: Ua tuli ma hamu angka tuangku tu bagas ni naposomuna on, marborngin ma hamu jala buri hamu patmuna, sogot pe manogot i tulusi hamu dalanmuna i. Alai ninna nasida ma: Ndangana, sai marborngin di alaman on do hami.

19:3 Dung i sai diparajarajai si Lot ma nasida, jadi tuli ma nasida sian ibana, dibongoti ma bagasna. Dung i dipauli ma sipanganonnasida, dilompa ma dohot sagusagu na so niigaran, jadi mangan nasida.

19:4 Alai ndang dope laho modom nasida, nunga dihaliangi pangisi ni huta Sodom jabu i, tole dakdanak ro di na matua, tung tumpu do nasida sude.

19:5 Sai joujou nasida mandok tu si Lot: Didia do baoa i angka na ro tu ho saborngin on? Togihon nasida ruar tu hami on, asa hutanda hami nasida.

19:6 Dung i ruar ma si Lot mandapothon nasida tu balian pintu, jala dihinsu pintu i di pudina.

19:7 Dung i ninna ma: Sombangku di hamu, ale angka dongan, unang bahen hamu na so uhum.

19:8 Ida ma adong do dua borungku, angka na so habubuhan dope, ua i ma hutogihon tu ruar, hulehon tu hamu, bahen hamu ma tu nasida lomo ni rohamuna, asal unang dibahen hamu manang aha tu halak on, ai ala ni do umbahen na marlinggom nasida tu bagashu.

19:9 Alai ninna nasida ma: Pajonok ma tuson! Angkup ni didok nasida ma: Sasada ibana do na ro maisolat, jala sai naeng manguhumi ibana. On pe, umposi ma bahenonnami tu ho, asa tu nasida. Jadi dionjar nasida ma halak si Lot i, ditahopi ma naeng mangaloha pintu i.

19:10 Jadi disurdukkon angka baoa i tangannasida manait si Lot i tu nasida, masuk tu jabu, jala dihinsu ma pintu i.

19:11 Ianggo baoa angka na di jolo pintu ni bagas i, dipapitung surusuruan i do, tole dakdanak ro di na magodang, gabe loja nasida mandadapi pintu i.

19:12 Dung i ninna na dua baoa i ma mandok si Lot: Adong dope dison manang ise helam, manang anakmu, manang borum? Manang na songon diham di huta on, togihon ma nasida ruar sian inganan on.

19:13 Ai naeng mangaripashon huta on do hami, ala na gogo angguhangguknasida tu jolo ni Jahowa, jala disuru Jahowa do hami mangaripashon huta i.

19:14 Jadi ruar ma si Lot i, asa mangkatai dohot helana i, angka na mangoro boruna i, ninna ma: Hehe ma hamu ruar sian huta on, ai ripashonon ni Jahowa ma huta on. Alai diengkelengkel angka helana i do ibana.

19:15 Dung i mamungka buhabuha ijuk ari manogot i, didasdasi angka suruan i ma si Lot, ninna ma: Hehe ma ho, boan ma jolmam dohot borum na dua i naung disi, asa unang ripas dohot ho binahen ni hajahaton ni huta on.

19:16 Alai sai dipagelegele langkana, jadi ditangkup baoa i ma tanganna dohot tangan ni jolmana dohot tangan ni boruna na dua i dibahen pangolanion ni Jahowa di ibana, ditogihon nasida ma ibana jala dipaulon tu balian ni huta i.

19:17 Jadi dung ro di balian tinogihonnasida i, ninna na sahalak ma: Palua ma hosam, unang bereng dompak pudim, jala unang ngongong ho di sandok rura on, tu dolok ma ho maporus, asa unang ripas ho.

19:18 Alai ninna si Lot ma mandok nasida: Ndangana, manomba ahu di Ho ale Tuhanku.

19:19 Ida ma, nunga sapala jumpangan asi ni roha naposomon maradophon Ho, sai pagodang ma asi ni roham na binahenmu tu ahu laho pangoluhon hosangku. Alai ndang tarbahen ahu malua ianggo tung tu dolok an, atek tung dapot hamagoan i ahu, tung mate ahu maon.

19:20 Ua bereng, jonok do huta an bahen haporusan, jala metmet do; ua tusi ma ahu loas maporus, nda na metmet do i nian? Asal mangolu hosangkon.

19:21 Dung i ninna suruan i ma mandok ibana: Taringot tu hata ondeng pe tataponku do ho, ndang ripashononku huta na nidokmi.

19:22 Halaputi ma ne maporus tusi, ai ndang tarbahen Ahu mambahen manang dia, paima tolhas ho tusi. Ala ni do umbahen Zoar huta i digoar halak.

19:23 Nunga pola binsar mata ni ari di tano on, di na sahat i si Lot tu Zoar.

19:24 Dung i diparo Jahowa ma udan barerang dohot api tu Sodom dohot tu Gomorra, sian Jahowa, sian banua ginjang.

19:25 Jadi dipabalik Tuhan i ma angka huta i dohot na saluat i humaliang, ro di sude pangisi ni angka huta i dohot suansuanan ni tano i.

19:26 Dung i manaili ma jolmana i dompak pudi, gabe batu sira ibana.

19:27 Alai borhat do anggo si Abraham sogot manogot i tumopot hajongjonganna i di jolo ni Jahowa.

19:28 Dung i ditatap ma dompak Sodom dohot Gomorra dohot dompak sude tano na humaliang i. Jadi diida ma martimpul timus sian tano i, songon timus ni pamurunan.

19:29 Dung i laho mangaripashon Debata di angka huta ni rura i, diingot Debata ma si Abraham, ditogihon ma si Lot sian parsitongaan ni hamagoan laho mangago angka huta na niinganan ni si Lot najolo.

19:30 Dung i nangkok ma si Lot sian Zoar laho maringan tu dolok rap dohot boruna na dua i, ai mabiar do ibana maringan di Zoar, gabe diingani ma sada liang, ibana dohot boruna na dua i.

19:31 Dung i ninna boruna sihahaan i mandok sianggian i: Nunga matua amanta, jala ndang adong be baoa di tano on na ro tu hita, songon hasomalan di liat portibi on.

19:32 Tole, tapainumhon ma anggur tu amanta, jala taparangkupi ibana modom, asa tapangolu pinompar sian amanta.

19:33 Jadi dipainumhon nasida ma anggur tu amanasida i di na saborngin i. Dung i ro sihahaan i diparangkupi ma amana i, ndang pamotoanna laho modom dohot laho hehe boruna i.

19:34 Manogotna i ninna sihahaan i ma tu sianggian i: Nunga huparangkupi damang i na borngin, talehon ma dohot saborngin on anggur inumonna, asa laho ho mangangkupi ibana, asa tapangolu pinompar sian amanta.

19:35 Jadi dilehon nasida ma di na saborngin i anggur inumon ni amanasida. Dung i hehe ma sianggian i diparangkupi ma ibana, ndang pamotoanna laho modom dohot laho hehe boruna i.

19:36 Jadi gabegabean be ma boru ni si Lot i duansa sian amanasida.

19:37 Dung i ditubuhon sihahaan i ma anak sada, dibahen ma goarna Moab, ibana do ompu ni halak Moab rasirasa nuaeng.

19:38 Dohot sianggian i manubuhon anak sada, dibahen ma goarna Ben-Ammi, ibana do ompu ni halak Amon rasirasa nuaeng.

1 Musa ᯔᯮᯘ 20

20:1 Dung i bungkas ma si Abraham sian i tu tano na tungkan dangsina laho maringan tu holangkolang ni Kades dohot Sur, gabe maisolat ibana di Gerar.

20:2 Jadi didok si Abraham ma taringot tu si Sarah, jolmana i: Ibotongku ibana. Jadi disuru si Abimelek, raja ni Gerar i mangalap si Sarah.

20:3 Alai ro ma Debata paipihon tu si Abimelek bornginna i, ninna ma tu ibana: Ida ma, marutang hosa ma ho ala boruboru na binuatmi, ai naung marharajaan do ibana.

20:4 Alai ndang dope jumonok si Abimelek tu ibana, jadi ninna ma: Ale Tuhan, tung bunuonmu ma dohot halak na tigor?

20:5 Nda didok ibana do tu ahu: Ibotongku boruboru i? Boruboru ipe didok do: Ibotongku ibana. Asa ia hubahen pe songon i, tobok ni rohangku do, jala bontor ni tanganku.

20:6 Dung i ninna Debata ma paipihon tu ibana: Ahu pe, huboto do sian tobok ni roham do dibahen ho songon i, umbahen huambat ho antong unang mardosa dompak Ahu; ala ni do umbahen so huloas ho jumama boruboru i.

20:7 On pe, paulak ma jolma ni baoa i, ai panurirang do ibana, jala tangiangkononna do ho, asa mangolu ho. Ala molo so dipaulak ho, boto ma, sai na mate do ho dohot sude na di ho i.

20:8 Jadi dipasogot si Abimelek ma hehe manogotna i, dijou ma sude angka naposona, jala dipajojor ma sude hata ondeng tu pinggolnasida, jadi mabiar situtu ma angka jolma i.

20:9 Dung i dijou si Abimelek ma si Abraham i, ninna ma tu ibana: Aha do na binahenmu tu hami, jala aha dosangku tu ho, umbahen diparo ho dosa bolon tu ahu dohot tu na hugomgomi? Angka pambahenan, na so jadi bahenon, dibahen ho tu ahu.

20:10 Angkup ni didok si Abimelek tu si Abraham: Aha ma diida ho, ala dibahen ho songon i?

20:11 Jadi ninna si Abraham ma: Ala ninna rohangku do, atek tung so adong biar mida Debata di huta on, gabe bunuonnasida ahu maon ala hata jolmangki.

20:12 Jala tongon huhut ibotongku ibana, boru ni damang, alai ndada tubu ni dainang, gabe jolmangku ibana.

20:13 Alai dung sai maotaot ahu sian bagas ni damang, didokkon Debata, jadi hudok ma tu ibana: On ma tanda ni holong ni roham, sibahenonmu tu ahu: Manang tu dia pe hita sahat, dok ma taringot tu ahu: Ibotongku ibana.

20:14 Jadi dipambuat si Abimelek ma birubiru dohot lombu dohot angka naposo baoa dohot boruboru, jala diparlehon tu si Abraham, dipaulak tu ibana dohot si Sarah, jolmana i.

20:15 Dung i ninna si Abimelek ma: Ida ma tanongki di jolomi, ingani ma lomo ni roham!

20:16 Alai anggo tu si Sarah ninna do: Ida ma nunga hulehon tu ibotom saribu rupia, i ma pardengganan tu ho dohot tu sude donganmu, asa lias ho maradophon sudena i.

20:17 Dung i martangiang ma si Abraham tu Debata. Jadi dipamalum Debata ma si Abimelek dohot jolmana dohot angka naposona boruboru, gabe tubuan anak ma nasida.

20:18 Ai tarhinsu situtu dibahen Jahowa bortian ni isi ni bagas ni si Abimelek sudena, ala hata si Sarah jolma ni si Abraham.

1 Musa ᯔᯮᯘ 21

21:1 Dung i ditatap Jahowa ma si Sarah, songon na nidokna i, jala dibahen Jahowa tu si Sarah songon na pinarbagana i.

21:2 Ai gabegabean ma si Sarah, jala ditubuhon anak sada di si Abraham, di hatutuana i, tongon di tingki, na nidok ni Debata tu ibana.

21:3 Dung i dibahen si Abraham ma goar ni anakna i, na tubu di ibana, tinubuhon ni si Sarah, si Isak.

21:4 Dung i paualubornginhon, disunat si Abraham ma si Isak, anakna i, songon na tinonahon ni Debata tu ibana.

21:5 Marumur saratus taon do si Abraham di na tubu i si Isak anakna i.

21:6 Jadi ninna si Sarah ma: Siparengkelon do dibahen Debata tu ahu; nasa na umbegesa parengkelanna do ahu.

21:7 Angkup ni didok do: Tung ise ma na hum marbagahon di si Abraham, si Sarah pasusuhon anak? Ai nunga hutubuhon anak sada di hatutuana i.

21:8 Jadi dung lam balga posoposo i, jala sirang susu, marharoan bolon ma si Abraham, di ari na sirang susu i si Isak.

21:9 Dung i sai diida si Sarah ma anak ni si Hagar, boru Misir i, na tinubuhonna di si Abraham, mangarehei.

21:10 Jadi didok ma tu si Abraham: Pabali ma hatoban on rap dohot anakna i, ai ndang manean anak ni hatoban on rap dohot si Isak anakki.

21:11 Alai sogo situtu do roha ni si Abraham di hata i, ala ni anakna i.

21:12 Alai ninna Debata ma tu si Abraham: Unang sogo roham taringot tu dakdanak i dohot taringot tu hatobanmu; tangihon ma sude na nidok ni soara ni si Sarah tu ho, ai marhitehite si Isak do targoar di ho pinompar.

21:13 Anak ni hatobanmi pe bahenonku do gabe bangso, ala pinomparmu ibana.

21:14 Jadi dipasogot si Abraham ma manogotna i hehe, dibuat ma sagusagu dohot aek satabutabu, dilehon ma i tu si Hagar, dipasandangkon ma tu abarana, dung i dipalaho ibana rap dohot dakdanak i. Jadi laho ma ibana, hape lilu do di halongonan Berseba.

21:15 Jadi dung suda aek sian tabutabu i dipapeak ma dakdanak i tu toru ni ramba metmet.

21:16 Dung i dipaholang ibana laho hundul arga sansinior sian i, ai ninna do: Ndang tarpaidaida ahu dakdanak i laho mate. Jadi sai hundul ibana tondong sian i, huhut dipangiar soarana jala tumatangis.

21:17 Jadi ditangihon Debata ma soara ni dakdanak i, joujou ma suruan ni Debata sian banua ginjang di si Hagar, ninna ma mandok ibana; aha di ho ale Hagar? Unang ho mabiar, ai nunga ditangihon Debata soara ni dakdanak i sian hapeahanna i.

21:18 Hehe ma ho, pahehe ma dakdanak i jala togu ibana dohot tanganmu ai bahenonku do ibana gabe bangso na bolon.

21:19 Dung i dipatonggor Debata ma mata ni si Hagar, gabe diida ma sada mual. Jadi laho ma ibana manggohi tabutabu i dohot aek, jala dipainum dakdanak i.

21:20 Dung i ditumpak Debata ma dakdanak i magodang, laos maringan ibana di halongonan, diula ma parsioron.

21:21 Jadi maringan ibana di halongonan Elaparan, gabe dibuat inana i ma sada boru Misir bahen jolmana.

21:22 Dung i ro ma uju i hata ni si Abimelek dohot si Pikol, partogi ni angka paranganna i mandok tu si Abraham: Sai didongani Debata do ho di sude na niulam.

21:23 On pe, mangmangkon ma dison tu Debata: Molo tung marmihimmihim ho tu ahu, manang tu angka anakku, ro di pinomparhu sogot! Nda maruhum na denggan ho tu ahu dohot tu tano paisolatanmu, marningot uhum na denggan na hubahen i tu ho.

21:24 Jadi ninna si Abraham ma: Humangmangkon pe.

21:25 Alai disarita si Abraham do si Abimelek ala sumur, na nirampas ni angka naposo ni si Abimelek.

21:26 Dung i ninna si Abimelek ma: Ndang pamotoanku manang ise na mambahen songon i; ho pe antong, ndang dialualuhon ho tu ahu, jala ndang dung hubege, nda sadari on.

21:27 Jadi dipambuat si Abraham ma birubiru dohot lombu, jala di parlehon tu si Abimelek, jadi marbulan be ma nasida na dua.

21:28 Dung i dipapulik si Abraham ma pitu anak ni birubiru.

21:29 Jadi ninna si Abimelek ma tu si Abraham: Tu aha ma anak ni birubiru na pitu on, angka na pinapulikmon?

21:30 Dung i ninna si Abraham ma: Sai jalo ma na pitu anak ni birubiru on sian tanganku bahen sitindangingku, paboa ahu sihali sumur on.

21:31 Ala ni do umbahen margoar Berseba (sumur parbulanan) huta i, ala disi marbulan nasida na dua i.

21:32 Asa marpadan ma nasida di Berseba. Dung i hehe ma si Abimelek dohot si Pikol, partogi ni paranganna i, asa mulak nasida tu tano ni halak Palistim.

21:33 Dung i disuan si Abraham ma angka hau ara di Berseba, jala dipajoujou disi goar ni Jahowa, Debata saleleng ni lelengna.

21:34 Jadi na nia leleng si Abraham maisolat di tano ni halak Palistim.

1 Musa ᯔᯮᯘ 22

22:1 Jadi dung salpu angka jamita ondeng, diunjuni Debata ma si Abraham, ninna ma mandok ibana: Jo Abraham! Dison do ahu, ninna.

22:2 Dung i ninna ma: Buat ma anakmu na sasada i, haholongan ni roham, si Isak i, jala togihon ibana tu tano Moria, jala pelehon ibana disi bahen pelean situtungon tu sada dolok, sipaboaonku tu ho.

22:3 Jadi dipasogot si Abraham ma hehe manogotna i, dipalanoi halodena, jala diarahon dua halak naposona rap dohot si Isak, anakna i, jala ditahai soban manutungi pelean i, dung i borhat ma ibana laho tu dolok, na nidok ni Debata tu ibana.

22:4 Patoluarihon manaili ma si Abraham, jadi ditatap ma dolok i.

22:5 Dung i ninna si Abraham ma tu angka naposona i: Dison ma hamu mangulon rap dohot halode i, alai anggo ahu dohot dakdanak i, laho ma hami tu sadu i, jala ia dung martangiang hami, mulak hami tu hamu on.

22:6 Jadi dibuat si Abraham ma soban tu pelean situtungon i diampehon ma tu si Isak, anakna i. Alai ibana do maniop api dohot raut sada, jadi rap mardalan ma nasida na dua i.

22:7 Dung i ninna si Isak ma tu si Abraham amana i: Atehe, ale amang, ninna! Dison do ahu ale anaha, ninna. Dung i ninna si Isak ma: Nunga dison api dohot soban, alai didia do birubiru bahen pelean situtungon i?

22:8 Jadi ninna si Abraham ma: Sai pilliton ni Debata di Ibana sada birubiru bahen pelean situtungon, ale anaha. Jadi rap mardalan ma nasida na dua i.

22:9 Jadi dung sahat nasida tu dolok, na nidok ni Debata tu ibana, dipauli si Abraham ma disi sada langgatan, jala disusun soban i, ditali dohot si Isak anakna i, jala diampehon ibana tu ginjang ni langgatan i, tu atas soban i.

22:10 Dung i dipatoltol si Abraham ma tanganna mambuat raut i laho maneat anakna i.

22:11 Dung i dijou suruan ni Jahowa ma ibana sian banua ginjang, ninna ma: Jo Abraham, Abraham! Dison do ahu, ninna.

22:12 Jadi ninna suruan i ma: Unang laho tanganmu tu dakdanak i, jala unang bahen manang aha tu ibana, ai nunga huboto dihabiari ho do Debata, jala ndang diolani ho anakmu na sasada i maradophon Ahu.

22:13 Jadi manaili ma si Abraham, gabe diida ma birubiru tunggal sada di pudina, rais tandukna di dangka dupang ni hau metmet; jadi laho ma si Abraham dibuat ma birubiru tunggal i, jala dipelehon bahen pelean situtungon, singkat ni anakna i.

22:14 Dung i dibahen si Abraham ma goar ni pamelean i: Jahowa Jireh (Jahowa manatap); ala ni didok halak rasirasa nuaeng: Di dolok ni Jahowa tataponna.

22:15 Dung i dijou suruan ni Jahowa ma si Abraham paduahalihon sian banua ginjang.

22:16 Didok ma: Nunga pola huuarihon diringku, ninna Jahowa, ala dibahen ho songon i, jala ndang diolani ho anakmu na sasada i:

22:17 Sai pasupasuonku ma ho, jala patoroponku situtu pinomparmu, sobokkon bintang angka na di langit, jala sobokkon rihit, angka na di topi ni laut, jala teanon ni pinomparmu sogot huta ni angka musuna.

22:18 Jala martua sogot saluhut bangso ni tano on marhitehite pinomparmu, ala ditangihon ho soarangku.

22:19 Dung i mulak ma si Abraham tu angka naposona, jadi borhat ma nasida, asa tampak laho tu Berseba, ai maringan di Berseba do si Abraham.

22:20 Jadi dung salpu angka jamita ondeng, ro ma barita mandok tu si Abraham: Ida ma, nunga tubuan anak dohot si Milka di si Nahor, anggim i.

22:21 Si Us, buhabajuna dohot si Bus anggina i dohot si Kemuel, ompu ni halak Ram.

22:22 Dohot si Kesed dohot si Haso dohot si Pildas dohot si Jidlap dohot si Betuel.

22:23 Alai anggo si Betuel tumubuhon si Rebekka. Na ualu halak i do ditubuhon si Milka di si Nahor, anggi ni si Abraham i.

22:24 Dohot hatobanna, pinarjolmana i, na margoar si Reuma do tubuan anak: Si Teba, Gaham, Tahas dohot Maaka.

1 Musa ᯔᯮᯘ 23

23:1 Ia umur ni si Sarah saratus duapulu pitu taon do, i ma leleng ni si Sarah mangolu.

23:2 Dung i mate ma si Sarah di Kiryat-Arba, i ma Hebron di tano Kanaan. Jadi ro ma si Abraham mangandungi si Sarah, jala ditatangisi.

23:3 Dung i hehe ma si Abraham sian na paadopadop na matena i, dipangkulingi ma angka anak ni si Het ninna:

23:4 Halak na hinomit jala paisolat do ahu di tongatongamuna on, sai lehon hamu ma di ahu parbandaan hapunjungan di tongatongamuna on, asa hutanom na matengki, na hupaadopadop on.

23:5 Jadi ninna angka anak ni si Het ma mangalusi si Abraham:

23:6 Tangihon ma hatanami on, ale tuan, raja na pinabangkit ni Debata do ho di tongatonganami on, tanom ma na matem tu parbandaannami, tinodo ni roham. Ndang adong manang ise hami on na mangorai ho mananom na matem tu parbandaanna.

23:7 Dung i hehe ma si Abraham, jala disomba bangso ni luat i, i ma angka anak ni si Het.

23:8 Jadi mangkatai ma ibana dohot nasida, ninna ma: Molo lomo rohamuna tanomonku na matengku, na hupaadopadop i, tangihon hamu ma hatangkon, jala ondihon hamu ahu tu si Epron, anak ni si Zohar.

23:9 Asa dilehon tu ahu liangna Makpelah na di duru ni haumana, sai dilehon ma i tu ahu manang sadia pe argana, bahen parbandaan hapunjungan di tongatongamuna on.

23:10 Ai maringan di tongatonga ni angka anak ni si Het do si Epron i. Jadi ninna si Epron, marga Het i ma mangalusi si Abraham, patubegehon tu angka anak ni si Het i, tu sude angka na marmeang muli sian bahal ni hutana i, botima:

23:11 Ndang songon i, ale tuangku, tangihon ma hatangkon: Hulehon ma tu ho hauma i ro di liang na di bagasan, tu ho ma hulehon maradophon angka anak ni bangsongku hulehon tu ho; tanom ma na matem tusi.

23:12 Jadi marsomba ma si Abraham maradophon isi ni luat i.

23:13 Dung i ninna ma tu si Epron, dibege angka isi ni luat i: Aut ni olo ho tumangihon hatangkon, sai jalo ma sian ahu hepeng silehononku tuhor ni hauma i, asa hutanom tusi na matengku.

23:14 Alai ninna si Epron ma mangalusi si Abraham:

23:15 Sai tangihon ma hatangkon, ale tuangku: Hauma paropatratus ringgitan, sadia ma i di hita? Sai tanom ma na matem tusi.

23:16 Jadi ditangihon si Abraham ma si Epron i, didasingkon ma hepeng na nidok ni si Epron i, binege ni angka anak ni si Het, siopatratus ringgit hian.

23:17 Jadi saut ma hauma ni si Epron, na di Makpelah, tondong ni Mamre, hauma i dohot liang i di bagasan ro di sude hau, angka na di hauma i, angka na hinangkamna i humaliang.

23:18 Gabe si Abraham nampunasa di jolo ni angka anak ni si Het ro di sude angka na marmeang muli sian bahal ni hutana i.

23:19 Dung i ditanom si Abraham ma si Sarah, jolmana i tu liang ni hauma Makpelah, tondong ni Mamre, i ma Hebron na di tano Kanaan.

23:20 Asa sahat ma tu si Abraham hauma i dohot liang na di bagasan bahen parbandaan hapunjungan sian angka anak ni si Het.

1 Musa ᯔᯮᯘ 24

24:1 Alai nunga ubanon si Abraham, nunga sahat sarimatua ibana, jala na pinasupasu ni Jahowa do si Abraham di sasudena i.

24:2 Dung i didok si Abraham ma mandok naposona, sintua ni bagasna i, siramoti sasude na di ibana: Ua ampehon ma tanganmu tu toru ni gontingkon.

24:3 Asa hupamangmangkon ho tu Jahowa, Debata sigomgom langit dohot tano on, paboa na so tupa buatonmu sian boru ni halak Kanaan, na humomit ahu bahen jolma ni anakki.

24:4 Ingkon laho ho tu tano hagodanganki dohot hatubuanki mangaririt bahen jolma ni anakki, si Isak.

24:5 Jadi ninna naposona i ma mandok ibana: Beha ia so ra boruboru i mangihuthon ahu tu tano on, jadi do togihononku anakmi mulak tu tano, tininggalhonmi?

24:6 Dung i didok si Abraham ma mandok ibana; jaga ho, so tung ditogihon ho anakki mulak tusi.

24:7 Sai suruon ni Jahowa, Debata, sigomgom langit i suruanna tu jolom laho tusi mangaririt bahen jolma ni anakki, ai Ibana do manogihon ahu ruar sian bagas ni damang dohot sian tano hatubuanki, jala didok mandok ahu, pola diuarihon tu ahu, ninna: Tu pinomparmi do lehononku tano on.

24:8 Alai molo tung so ra boruboru i mangihuthon ho, malua do ho sian uarimon na tu ahu i, asal unang ditogihon ho anakki mulak tusi.

24:9 Jadi diampehon naposo i ma tanganna tu toru gonting ni si Abraham, indukna i, jala dimangmangkon hata i tu ibana.

24:10 Dung i dibuat naposo i ma sampulu unto sian unto ni rajana i, jala laho ibana; diboan dohot ugasan ni rajana i marragamragam di na borhat i ibana laho tu Mesopotamia tu huta ni si Nahor.

24:11 Dung i dipaulon ma angka unto i di balian ni huta i, di lambung ni sada sumur mareak bodari, di tingki haroro ni angka partuaek.

24:12 Jadi ninna ma: Ale Jahowa Debata ni si Abraham, indukhi, sai tomutomuhon ma tu ahu sadari on, sai bahen ma asi roha tu si Abraham, indukhi.

24:13 Ida ma, jongjong do ahu di lambung sumur on, jala ruar ma angka boru ni isi ni huta on laho manahui aek.

24:14 Onpe, ia hudok mandok sada boruboru i: Ua paeleng hudonmi, asa minum ahu, gabe dohononna: Inum ma na, hupasobur pe dohot angka untom, i ma nian na tinurpukkonmu tu naposom si Isak, asa hutanda disi, paboa naung dibahen Ho asi ni roha tu rajangki.

24:15 Jadi ndang dope tolhas hatana i didok, ida ma nunga ruar si Rebekka, tubu ni si Betuel, anak ni si Milka, jolma ni si Nahor, haha ni si Abraham, jala sumandang panguhatanna.

24:16 Jala na uli utus rupa ni boruboru i, namarbaju, jala na so dung tumanda baoa; mijur ma ibana tu sumur i manggohi panguhatanna, dung i nangkok ibana.

24:17 Jadi marlojong ma naposo i mandapothon ibana, ninna ma: Ua lehon aek i otik inumonku sian panguhatanmu.

24:18 Jadi didok boruboru i ma: Inum ma, ale rajanami na! Dung i humalaput ma ibana paijurhon panguhutanna i tu tanganna, painumhon ibana.

24:19 Jadi dung sun ibana dipainum, ninna ma: Hutahui pe dohot di angka untom, paima sombu uasna.

24:20 Jadi humalaput ma ibana mangusehon panguhatanna i tu parsoburan i, jala diulahi marlojong tu sumur i manahui singkop, di sude angka untona i ditahui.

24:21 Alai longang ma bajoi mida ibana, sai sip do, paima ditanda manang na ditumpak Jahowa langkana i, manang ndang.

24:22 Jadi dung sun marsobur angka unto i, dibuat bajoi ma sada tintin sere, satonga hati dokdokna, jala dua leang sere tu tanganna parsampulutailan.

24:23 Dung i didok ma: Atehe, boru ni ise do ho? Ua paboa di ahu; siat do hami di bagas ni amanta i marborngin?

24:24 Jadi ninna ma mandok ibana: Boru ni si Betuel do ahu, anak ni si Milka, tinubuhonna i di si Nahor.

24:25 Angkup ni didok boruboru i tu ibana: Galagala ni eme pe dohot gagaton, godang do di hami, parbornginan pe adong do.

24:26 Jadi dipaunduk bajoi ma ibana, huhut marsomba tu Jahowa.

24:27 Jala ninna ma: Pinuji ma Jahowa, Debata ni si Abraham, rajangki, ndang dialang asina dohot hasongtion ni rohana tu rajangki; Jahowa do tongon manogihon ahu di dalan tu bagas ni haha ni rajangki.

24:28 Dung i maringkat ma boruboru i laho paboahon angka hata ondeng tu bagas ni inana.

24:29 Adong do huhut sada iboto ni si Rebekka, si Laban goarna. Jadi marlojong ma si Laban tu balian manjumpangkon bajoi tu sumur i.

24:30 Dung diida tintin i dohot leang angka na di pargolangan ni ibotona i, jala dung dibege angka hata ni si Rebekka, ibotona i, na mandok: Songon on do hata ni bajoi tu ahu, jadi tolhas ma ibana tu bajoi, ida ma jongjong dope ibana di lambung ni angka unto, mardonokkon sumur i.

24:31 Dung i didok ma: Beta hita muli, ho na pinasupasu ni Jahowa, boasa tung jongjong di balian on ho? Nunga pola hupadiri bagas i bahen inganan ni angka unto i.

24:32 Jadi ditogihon ma bajoi tu jabu, diharhari ma hohos ni angka unto i, jala dilehon galagala ni eme dohot gagaton tu angka unto i, dohot aek pamuri ni patna dohot pat ni angka donganna i.

24:33 Dung i dibahen ma sipanganon tu jolona. Alai ninna ibana ma: Ndang na mangan ahu, nda jolo tolhas hudok angka hatangkon. Antong dok ma, ninna.

24:34 Jadi ninna ma: Naposo ni si Abraham do ahu.

24:35 Jala mansai ditumpak Jahowa rajangki, gabe timbul ibana, jala dilehon tu ibana birubiru dohot lombu, perak dohot sere, naposo baoa dohot naposo boruboru, angka unto dohot halode.

24:36 Angkup ni ditubuhon si Sarah, jolma ni rajangki sada anak di ibana di hatutuanasida i, tusi do dilehon sude na di ibana i.

24:37 Dung i moruari ahu dibahen rajangki, ninna do: Ndang na jadi buatonmu sian boru ni halak Kanaan, na humomit ahu, bahen jolma ni anakki.

24:38 Ingkon laho ho tu bagas ni damang, tumopot donganku samarga, mambuat jolma ni anakki.

24:39 Alai ningku do nian tu rajangki: Beha ia so olo boruboru i mangihuthon ahu?

24:40 Jadi ninna ibana mandok ahu: Sai suruon ni Jahowa, na hupaolooloi i suruanna mandongani ho manumpak langkam, asa dialap ho jolma ni anakki sian donganku dohot sian bagas ni damang.

24:41 Ia dung tolhas ho tu donganki, hape ndang olo nasida mangalehon boruboru i tu ho, disi pe asa malua ho sian na niuarihonmu tu ahu.

24:42 Jadi tolhas ma ahu sadari on tu sumur on, gabe hudok ma: Ale Jahowa, Debata ni rajangki, si Abraham, aut ni olo Ho manumpak langkangkon, na hulangkahon i!

24:43 Ida ma ahu na jongjong di lambung sumur on, patupa ma songon on: Ia ruar sada namarbaju manahui, gabe hudok mandok ibana: Ua lehon di ahu otik aek inumonku sian panguhatanmu.

24:44 Jadi didok ibana nian tu ahu: Inum ma na, dohot pe di untom hutahui, i ma nian jolma na tinurpukkon ni Jahowa tu anak ni rajangki.

24:45 Ndang dope tolhas hudok hata i di bagasan rohangku, ida ma, nunga ruar si Rebekka sumandang panguhatanna, jala mijur ibana tu sumur i manahui, jadi hudok ma tu ibana: Ua lehon ahu minum.

24:46 Jadi humalaput ma ibana paijurhon panguhatanna i, sian abarana, ninna ma: Minum ma ho, hupasobur pe dohot angka untomon. Asa minum ma ahu, jala dohot do angka unto i dipasobur.

24:47 Dung i, husungkun ma ibana, ningku do: Atehe boru ni ise do ho? Jadi ninna ibana ma: Boru ni si Betuel do, anak ni si Nahor, tinubuhon ni si Milka di ibana. Dung i hubahen ma sada tintin tu igungna dohot angka leang tu pargolanganna.

24:48 Dung i hupaunduk ahu marsomba tu Jahowa, jala hupuji Jahowa, Debata ni si Abraham, rajangki, na patongonhon langkangkon laho mambuat boru ni haha ni rajangki di anakna i.

24:49 Onpe molo olo hamu mambahen asi dohot burju ni roha tu rajangki, ba, paboa hamu di ahu, molo ndang, antong paboa hamu di ahu, asa hutondong tu siamun manang tu hambirang.

24:50 Jadi ninna si Laban dohot si Betuel ma mangalusi: Na ro sian Jahowa do hata i, ndang tardok hami tu ho na roa manang na denggan.

24:51 Ndi, di jolomi do si Rebekka i, buat ma ibana jala langka, asa gabe jolma ni anak ni rajam ibana, songon na nidok ni Jahowa.

24:52 Jadi dung dibege naposo ni si Abraham hatanasida i, marsomba ma ibana tu Jahowa.

24:53 Dung i diparungkar naposo i ma angka ugasan perak dohot sere dohot angka ulos, jala diparlehon tu si Rebekka, tu ibotona dohot tu inana i pe dilehon do angka ugasan na arga.

24:54 Dung i mangan jala minum nasida, ibana rap dohot angka donganna sauduran, jala marborngin nasida. Dung i hehe ma nasida manogotna i, jala ninna ibana ma: Paborhat hamu ma ahu tu rajangki.

24:55 Alai ninna ibotona dohot inana i ma: Ua tading nian si betet i di hami, arga sampulu borngin nari, salpu ni jadi ho mardalan.

24:56 Jadi ninna ibana ma tu nasida: Unang tiopi hamu ahu, nunga ditumpak Jahowa langkangku; paborhat hamu ahu, asa laho ahu tumopot rajangki.

24:57 Dung i ninna nasida ma: Antong hujou hami ma si betet i, asa itasungkun hatana i.

24:58 Jadi dijou nasida ma si Rebekka, didok ma tu ibana: Atehe olo do ho mandongani bayo on? Jadi ninna ibana ma: Laho pe ahu.

24:59 Asa dipaborhat nasida ma si Rebekka, ibotonasida i rap dohot na parorot ibana dohot naposo ni si Abraham, ro di angka donganna sauduran.

24:60 Jadi dipasupasu nasida ma si Rebekka, jala didok tu ibana: Gabe ma ho ale ito marriburibu loksa, jala mandapot di pinomparmu ma bahal ni angka musuna.

24:61 Dung i borhat ma si Rebekka dohot angka radingna, marsihundul be ma nasida di unto mangihuthon baoa i. Asa laho ma naposo i mamboan si Rebekka.

24:62 Alai ro muli do ianggo si Isak sian na manopot sumur Lakhai-Roi, ai tano na tungkan dangsina do diingani.

24:63 Dung i marhira bodari ruar do si Isak tu ladang martangiang, gabe manatapnatap ibana, jadi diida ma ro angka unto.

24:64 Manatapnatap ma dohot si Rebekka, jadi diida ma si Isak, gabe manimbung ibana sian unto i.

24:65 Dung i ninna ma mandok naposo i: Ise do halak an na mardalandalan di ladang i manjumpangkon hita? I ma rajangki, ninna naposo i. Jadi dibuat nasida ma tujungtujung manghungkupi bohina i.

24:66 Dung i dipajojor naposo i ma tu si Isak sude hata angka na niulana i.

24:67 Jadi ditogihon si Isak ma si Rebekka tu undungundung ni si Sarah, inana i, dibuat ma si Rebekka bahen jolmana, jala holong rohana di ibana. Jadi sabam ma roha ni si Isak di panading ni inana i.

1 Musa ᯔᯮᯘ 25

25:1 Dung i diulakkon si Abraham ma mambuat boru, na margoar si Ketura.

25:2 Na manubuhon di ibana: Si Zimran dohot si Joksan dohot si Medan dohot si Midian, si Isbak dohot si Sua.

25:3 Ia si Joksan manubuhon: Si Seba dohot si Dedan. Alai anggo angka anak ni si Dedan: halak Assusim dohot si Letusim dohot si Leummim.

25:4 Ia angka anak ni si Midian: Si Epah, si Eper, si Hanok, si Abida dohot si Elda. I ma angka anak ni si Ketura sudena.

25:5 Dung i dilehon si Abraham ma sude na di ibana i tu si Isak.

25:6 Alai anggo tu angka anak ni jolmana panoroni i, dilehon si Abraham angka silehonlehon, dung i dipajae nasida sian si Isak anakna i tu tano na tungkan habinsaran, tagan mangolu dope ibana.

25:7 Ia leleng ni si Abraham mangolu saratus pitupulu lima taon do.

25:8 Dung i tos ma hosana, jala mate sarimatua si Abraham, dung mahap rohana di hangoluan on, jadi dipapungu ibana tu angka ompuna.

25:9 Dung i ditanom si Isak dohot si Ismael, angka anakna i, ibana tu liang Makpelah, tu hauma ni si Epron, anak ni si Zohar, marga Het, na tungkan habinsaran ni Mamre.

25:10 Tu hauma, na tinuhor ni si Abraham sian angka anak ni si Het; disi do tartanom si Abraham dohot si Sarah jolmana i.

25:11 Jadi dung mate si Abraham, dipasupasu Debata ma si Isak, anakna i; alai maringan di lambung sumur Lakhai-Roi do si Isak i.

25:12 Angka on do pinompar ni si Ismael, anak ni si Abraham, tinubuhon ni si Hagar, boru Misir, hatoban ni si Sarah, di si Abraham:

25:13 Jala on do goar ni angka anak ni si Ismael mangihuthon partubunasida: Nabaiot buhabaju ni si Ismael, dung i Kedar, Abdeel, Mibsam.

25:14 Misma, Duma, Masa.

25:15 Hadad, Tema, Jetur, Napis dohot Kademah.

25:16 I ma angka anak ni si Ismael, jala i ma angka goarnasida mangihuthon hutana dohot parsaroanna be, sampulu dua raja, parserahan ni marganasida.

25:17 Ia leleng ni si Ismael mangolu saratus tolupulu pitu taon do, dung i tos ma hosana, jala mate ibana, jadi dipapungu ma ibana tu angka ompuna.

25:18 Olat ni huta Hevila sahat ro di Sur na marbalokkon Misir dohot Assur diingani nasida; tungkan habinsaran ni angka donganna i ibana ojak.

25:19 On ma angka pinompar ni si Isak, anak ni si Abraham. Si Abraham tumubuhon si Isak.

25:20 Jala marumur opatpulu taon si Isak di na binuatna i si Rebekka, boru ni si Betuel, isi ni Ram i, iboto ni si Laban, isi ni Ram i, bahen jolmana.

25:21 Dung i digogo si Isak ma tumangiangkon jolmana i tu Jahowa, ai na hol do ibana; jadi ditangihon Jahowa tangiangna, gabegabean ma si Rebekka jolmana i.

25:22 Dung i masitunjangan ma posoposo i di bortianna. Jadi ninna si Rebekka ma: Molo songon i hape boasa songon on ahu? Dung i laho ma ibana manungkunhonsa tu Jahowa.

25:23 Jadi ninna Jahowa ma tu ibana: Dua do bangso di bortianmi, jala dua marga sirang sian boltokmi, jala gumogo na samarga martimbangkon na sada nari, jala mandapot di siampudan do sihahaan i.

25:24 Jadi dung jumpang hasasangana i manubuhon, ida ma, linduat do di boltokna i.

25:25 Jadi ruar ma na parjolo i, rara do ibana, hira na marulos imbulu sandok dagingna i, jadi dibahen ma goarna si Esau.

25:26 Dung songon i, ruar ma anggina i, ditiop ma tambihul ni si Esau, jadi dibahen ma goarna si Jakkob. Onompulu taon ma umur ni si Isak di na tubu i nasida.

25:27 Jadi dung balga dakdanak i, marsiajar parburuon dohot parumaon ia si Esau; alai anggo si Jakkob jolma na daulat marroha do, maringan di angka undungundung.

25:28 Dihasiani si Isak do si Esau i, ala giot pamanganna mangan na binuru; alai hasian ni si Rebekka do ianggo si Jakkob.

25:29 Dung i mangalompa sipanganon ma si Jakkob, jadi ro ma si Esau, sian harangan, jala mansai loja ibana.

25:30 Jadi ninna si Esau ma mandok si Jakkob: Ua husohali ma sian na rara i, ai nunga mansai loja ahu. Ala ni do umbahen margoar Edom ibana.

25:31 Alai ninna si Jakkob ma: Gadis ma tu ahu sadari on sahala sihahaan!

25:32 Jadi ninna si Esau ma: Antong na laho mate na ma ahu, tu dihangku sahala sihahaan i?

25:33 Dung i ninna si Jakkob ma: Antong mangmangkon ma tu ahu sadari on! Jadi dimangmangkon tu ibana; jala digadis sahalana sihahaan i tu si Jakkob.

25:34 Dung i dilehon si Jakkob ma tu si Esau sagusagu dohot hadio na nilompana i; jadi mangan jala minum ibana, dung i hehe ma ibana laho muli. Asa marsineang ma roha ni si Esau di sahala sihahaan i.

1 Musa ᯔᯮᯘ 26

26:1 Dung i masa ma muse haleon di tano i, di balik ni haleon parjolo i, na masa uju di ngolu ni si Abraham, jadi bungkas ma si Isak tu Gerar mandapothon si Abimelek, raja ni halak Palistim.

26:2 Dung i ditopot Jahowa ma ibana, didok ma: Unang ho tuat tu tano Misir, sai ingani ma tano sipaboaonku tu ho.

26:3 Maisolat ma ho di tano on, asa hudongani ho, jala hupasupasu ho; ai tu ho dohot tu pinomparmu lehononku sogot sandok tano on, jala pahotonku ma uari, na huuarihon i tu si Abraham, amami.

26:4 Jala patoroponku do pinomparmi, songon bintang angka na di langit, jala lehononku ma tu pinomparmi sandok tano on, jala dapotan pasupasu sogot saluhut bangso ni tano on marhitehite Pinomparmi.

26:5 Ala na tinangihon ni si Abraham soarangki, jala diradoti uhumhu, angka tonangku, angka patikku dohot podangku.

26:6 Asa maringan di Gerar ma si Isak i.

26:7 Alai ia usouso halak, isi ni luat i taringot tu jolmana, gabe didok ma: Ibotongku do ibana, ai mabiar do ibana mandok, jolmangku do i, asa unang dibunu isi ni luat i ibana, ala ni si Rebekka, ai na uli rupa do ibana.

26:8 Hape dung na nia leleng ibana disi, mandulo ma si Abimelek, raja ni halak Palistim sian pandiloan, gabe diida ma si Isak margait dohot si Rebekka jolmana i.

26:9 Jadi dijou si Abimelek ma si Isak, ninna ma: Antong jolmam do ibana hape, boasa ma tung dohononmu: Ibotongku ibana? Jadi ninna si Isak ma mandok ibana: Atek tung mate ahu maon humongkop ibana, ninna rohangku.

26:10 Dung i ninna si Abimelek ma: Boasa ma tung songon i bahenonmu tu hami? Otikan nari diparangkupi sada sian bangso i jolmam modom, gabe parohon dosa ho tu hami.

26:11 Dung i ditingtingkon si Abimelek ma tu saluhut parripena i, ninna ma: Manang ise na mangkaori bayo on dohot jolmana i, ingkon marutang hosa ibana.

26:12 Dung i mangordang ma si Isak di tano i, jadi jumpangsa ma di na sataon i lompit saratus, ai dipasupasu Jahowa do ibana.

26:13 Jadi jolma na sangap ibana, gabe lam timbul situtu.

26:14 Torop ma birubiruna dohot lombuna, torop dohot naposona. Jadi mangiburu ma halak Palistim mida ibana.

26:15 Disosopi halak Palistim ma sude sumur, angka na hinali ni naposo ni amana, di ngolu ni si Abraham, amana i, jala digohi dohot tano.

26:16 Pola dohot si Abimelek mandok tu si Isak: Bungkas ma ho sian lambungnami on, ai sumangap situtu do ho sian hami.

26:17 Jadi bungkas ma si Isak sian i, mangulon ma ibana di rura Gerar, laos disi ibana maringan.

26:18 Dung i diulahi si Isak mangkali sumur angka na hinali uju di ngolu ni si Abraham, amana i, angka na sinosopan ni halak Palistim, dung mate si Abraham, jala dibahen goarna mangihuthon goar, angka na binahen ni amana i nahinan.

26:19 Mangkali dohot angka naposo ni si Isak di rura i, gabe jumpang nasida disi sada sumur (aek mual) na mangolu.

26:20 Alai dibadai angka parmahan na sian Gerar ma angka parmahan ni si Isak, ninna ma: Hami do nampuna aek on. Jadi dibahen ma goar ni Sumur i: Esek (parbadaan), ala na dibadai nasida ibana disi.

26:21 Dung i dihali nasida ma sada sumur na asing, ipe diguluti nasida do, jala dibahen ma goarna Sitna (pargulutan).

26:22 Jadi bungkas ma ibana sian i, dihali muse sada sumur na asing, ndang marbadai nasida ala ni, jadi dibahen ma goarna Rehobot (inganan na lambas), ai nunga dipalambas Jahowa di hita ninna, jala sopar hita di tano on tumpahanna.

26:23 Dung i bungkas ibana sian i nangkok tu Berseba.

26:24 Bornginna i ro ma Jahowa manopot ibana, didok ma: Ahu do Debata ni si Abraham, amami, unang ho mabiar, ai dongananku jala pasupasuonku do ho, jala patoroponku pinomparmu ala ni si Abraham naposongki.

26:25 Jadi dipauli ma disi sada langgatan, jala dipajoujou goar ni Jahowa, dipahembang ma disi undungundungna, jala dihali naposo ni si Isak disi sada sumur.

26:26 Dung i diebati si Abimelek ibana sian Gerar dohot si Ahuzat, alealena i dohot si Pikol, partogi ni paranganna.

26:27 Alai ninna si Isak ma mandok nasida: Boasa ro hamu manopot ahu, hasomoran ni rohamuna, jala dipabungkas hamu ahu sian lambungmuna i.

26:28 Jadi ninna nasida ma: Tandap do huida hami, didongani Jahowa ho, dibahen i hudok hami: Ua marbulan be ma hita, tabahen ma janjinta.

26:29 Na so tupa bahenonmu tu hami na jat, songon hami, ndang huhahua hami ho, holan uhum na denggan hubahen hami tu ho, jala mardamedame ho bungkas hupasombu hami. On pe na pinasupasu ni Jahowa do ho nuaeng.

26:30 Dung i dihobas si Isak ma panganonnasida, jadi mangan jala minum nasida.

26:31 Dung i manogotna i sogot be ma nasida hehe, jala masipabulanan nasida. Dung i dipaborhat si Isak ma nasida, gabe laho ma nasida mardamedame.

26:32 Sadarina i ro ma angka naposo ni si Isak paboahon tu ibana taringot tu sumur na hinalinasida i, angka ninna ma tu ibana: Nunga jumpangan aek hami.

26:33 Jadi dibahen ma goarna: Seba (parbulanan), ala ni do umbahen margoar huta i Berseba (sumur parbulanan) rasirasa nuaeng.

26:34 Jadi dung marumur opatpulu taon si Esau, dibuat ma si Judit, boru ni si Beeri, marga Het dohot si Basemat, boru ni si Elon marga Het, bahen jolmana.

26:35 Alai marsak do roha ni si Isak dohot si Rebekka dibahen nasida.

1 Musa ᯔᯮᯘ 27

27:1 Jadi dung lam matua si Isak, rambon na matana, gabe dijou ma si Esau, anakna sihahaan i, ninna ma mandok ibana: Ale amang! Dison do ahu, ninna mangalusi ibana.

27:2 Dung i ninna si Isak ma: Ida ma, nunga matua ahu, ndang huboto ari hamamatengku.

27:3 On pe, buat ma ulaulam, parnangkatanmu dohot siormu, jala laho ma ho tu harangan, buru ma di ahu sada juhut ramba.

27:4 Jala pauli di ahu tipak sipanganon lomo ni rohangki, dung i boan tu ahu, asa hupangan, asa dipasupasu tondingku ho, tagan so mate dope ahu.

27:5 Alai dibege si Rebekka do pandok ni si Isak tu si Esau anakna i. Jadi borhat ma si Esau tu harangan marburu juhut ramba, siboanonna.

27:6 Dung i ninna si Rebekka ma tu si Jakkob anakna i: Boti ma i, nunga hubege pandok ni amam tu si Esau, hahami, ninna do:

27:7 Boan di ahu sada juhut ramba, jala pauli tipak sipanganon lomo ni rohangki, asa hupangan, asa hupasupasu ho di jolo ni Jahowa, tagan so mate dope ahu.

27:8 On pe, ale amang, tangihon ma soarangkon taringot tu na hudokkon tu ho.

27:9 Laho ma ne ho tu jampalan ni birubiru, jala alap di ahu sian i anak ni hambing tunggal dua, angka na halaeanna, asa hupauli bahen sipanganon ni amam, silomo ni rohana.

27:10 Ho ma mamboan i tu amam, asa dipangan, asa ho dipasupasu, tagan so mate dope ibana.

27:11 Alai ninna si Jakkob ma tu si Rebekka, inana i: Ida ma, rabuton do dahahang, si Esau i, ianggo ahu jolma na limus do.

27:12 Atek tung dijama damang ahu maon, jadi songon na paotootohon ibana ahu di rohana, gabe parohon torutoru ahu tu ahu, ndada pasupasu.

27:13 Dung i ninna inana i ma mandok ibana: Tu ahu pe torutoru na tu ho i, ale amang, asal ditangihon ho soarangki, laho ma ho, sai alap ma di ahu.

27:14 Jadi laho ma ibana mangalap, jala diboan tu inana i. Dung i dipauli inana i ma sipanganon, silomo ni roha ni amana i.

27:15 Dung i dipambuat si Rebekka ma angka ulos ni si Esau, anakna sihahaan i, angka na ummuli, angka na pineopna di jabu, jala diuloshon tu si Jakkob, anakna siampudan i.

27:16 Alai anggo tu tanganna dohot tu rungkungna, na so mapol i, dilangkophon do bobak ni anak ni hambing tunggal i.

27:17 Dung i dilehon ma sipanganon na tabo i dohot sagusagu na pinaulina i tipak tu tangan ni si Jakkob, anakna i.

27:18 Jadi ditopot ma amana i, didok ma: O ba, ale amang! Dison do ahu ninna. Ise do ho ale anaha?

27:19 Dung i ninna si Jakkob ma mandok amana i: Ahu ma si Esau, buhabajum, nunga hupauli songon na nidokmi tu ahu; ua hehe ma ho hundul, jala pangan sian na huburu on, asa ditumpak tondim ahu.

27:20 Alai ninna si Isak ma mandok anakna i: Beha do pambahenmi, ale anaha, umbahen na sai tibu dapotan ho? Jahowa Debatam do manjumpangkon i tu ahu, ninna.

27:21 Jadi ninna si Isak ma mandok si Jakkob: Pajonok ma tuson, ale anaha, asa hudadapi ho, manang na tutu anakku si Esau ho, manang ndang.

27:22 Dung i dipajonok si Jakkob ma tu si Isak amana i. Jadi dung dijama ibana, didok ma: Ianggo soara i, soara ni Jakkob do, alai anggo tangan i, tangan ni si Esau do.

27:23 Laos so ditanda do ibana, ai jabuton do tanganna i, songon tangan ni si Esau, hahana i, jadi dipasupasu ma ibana.

27:24 Dung i ninna si Isak ma: Ho do tutu anakku, si Esau i? Ahu ma tutu, ninna.

27:25 Dung i ninna si Isak ma: Antong boan ma tu lambungkon, ale anaha, asa hupangan sian na binurum, asa ditumpak tondingku ho. Jadi dipajonok ma tu lambungna, gabe mangan ibana, diboan dohot anggur tu ibana, gabe diinum.

27:26 Dung i ninna si Isak, amana i ma mandok ibana: Ua pajonok ma, jala umma ahu, ale anaha!

27:27 Jadi dipajonok ma, jala diumma amana i; jadi dianggo si Isak ma uap ni angka ulosna i, jala dipasupasu ibana, ninna ma: Ida ma, sobokkon uap ni jampalan na pinasupasu ni Jahowa, uap ni anakki.

27:28 Sai dilehon Debata ma tu ho nambur na sian banua ginjang, dohot tano na marmiak, asa godang emem dohot anggur.

27:29 Ingkon mangoloi tu ho ma angka bangso jala marsomba tu ho angka marga. Sai ho ma raja ni angka haham, jala marsomba tu ho angka anak ni inam. Hona bura ma angka na mamburai ho, jala dapotan pasupasu angka na mamasumasu ho.

27:30 Jadi dung sun si Isak mamasumasu si Jakkob i, jala ipe ruar ibana sian lambung ni si Isak, amana i, ro ma soluk si Esau hahana i sian parburuonna.

27:31 Ibana pe, tipak ma dipauli sipanganon, jala diboan tu amana, jala didok mandok amana i: Hehe ma ho, ale amang, jala pangan sian na binuru ni anakmi, asa ditumpak tondim ahu.

27:32 Jadi ninna si Isak, amana i ma mandok ibana: Ise do ho? Si Esau, anak buhabajum do ahu, ninna.

27:33 Jadi tarsonggot situtu ma si Isak, didok ma: Antong ise do parburu ondeng, na mamboan binuruna i tu ahu, gabe hupangan i, tagan so ro ho, jala nunga hupasupasu ibana? Nunga sahat tu ibana pasupasu i.

27:34 Jadi dung dibege si Esau angka hata ni amana i, dipangiar ma soarana mangangguk badar, jala habot situtu rohana, didok ma mandok amana i: Sai pasupasu ma dohot ahu, ale amang!

27:35 Alai ninna amana i ma: Nunga ro anggim, angkal dibahen mambuat pasupasum.

27:36 Leak ma dibahen goarna si Jakkob, ai nunga dua hali ahu dirupa: Nunga dibuat hian sahalangku sihahaan, pasupasu na di ahu hian pe, nunga dibuat. Dung i didok ma: Beha, ndang adong be dipeop ho pasupasu di ahu?

27:37 Dung i ninna si Isak ma mangalusi si Esau: Ida ma, nunga hupabangkit ibana gabe rajam, jala nunga hupadapot tu ibana sude angka hahana bahen naposona; nunga hutumpakhon eme dohot anggur tu ibana. Aha dope bahenonku tu ho, ale amang?

27:38 Dung i ninna si Esau ma mandok amana i: Ai holan sasada i do pasupasum, ale amang? Sai pasupasu ma dohot ahu, ale amang! Jadi dipangiar si Esau ma soarana tumatangis.

27:39 Dung i ninna si Isak, amana i ma mangalusi ibana: Antong, ndang marmiak tano ingananmi sogot, jala ndang dapotan nambur sian banua ginjang.

27:40 Jala podangmu hangoluhononmu, jala mandapot di anggim ho. Alai molo sai marungkil ho, sai na runtunonmu do augana sian rungkungmu sogot.

27:41 Dung i sogo situtu ma roha ni si Esau mida si Jakkob i, ala pasupasu, na pinasupasuhon ni amana i tu ibana, gabe ninna si Esau ma di bagasan rohana: Lam jonok na ma angka ari parandungan ni damang, ai bunuonku ma anggingku, si Jakkob i.

27:42 Hape tarbortik ma tu si Rebekka angka hata ni si Esau, anakna sihahaan i, jadi disuru ma manjou si Jakkob, anakna siampudan i, ninna ma mandok ibana: Ida ma, nunga ditahi haham si Esau i martubolhon pambahenmi, naeng bunuonna ho.

27:43 On pe, ale anaha, sai tangihon ma soarangkon: Borhat ma ho laho lintun tu Haran, manopot si Laban, ibotongki.

27:44 Sorang tu ibana ma ho manang piga ari on lelengna, paima mombun rimas ni haham.

27:45 Paima mulak rohana mida ho, jala dihalupahon na binahenmi tu ibana; dung i husuru pe mangalapi ho sian i. Boasa ma tung agoan sinuantunas na dua simardung ahu di na sadari?

27:46 Dung i ninna si Rebekka ma mandok si Isak: Marmahapmahap ahu di hangoluan, dibahen angka boru Het i; molo dohot muse si Jakkob mambuat sian angka boru Het i bahen jolmana, songon angka indi on, boru ni isi ni tano on, boasa ingkon di hangoluan on be ahu?

1 Musa ᯔᯮᯘ 28

28:1 Dung i dijou si Isak ma si Jakkob, jala dipasupasu ibana, didok ma manonai ibana: Unang buat sian angka boru Kanaan bahen jolmam.

28:2 Borhat ma ho laho tu Padang-Aram, tu jabu ni si Betuel, ama ni inam, sian i ma buat bahen jolmam, sian angka boru ni si Laban, iboto ni inam.

28:3 Sai gabe ma ho jala torop dipasupasu Debata na sun hinagogo i, asa torop bangso marompu tu ho.

28:4 Sai dilehon ma tu ho dohot tu pinomparmu pasupasu na tu si Abraham i, asa ho manean tano paisolatanmu, na nilehon ni Debata tu si Abraham i.

28:5 Jadi diparbohat si Isak ma si Jakkob i, asa laho ibana tu Padang-Aram, tu si Laban, anak ni si Betuel, halak Ram i, iboto ni si Rebekka, ina ni si Jakkob dohot si Esau.

28:6 Jadi dung diida si Esau, naung dipasupasu si Isak si Jakkob i, jala dipaborhat ibana tu Padang-Aram, mangalap jolmana sian i, jala na nioraanna i, di na pinasupasuna i ibana, mambuat sian boru Kanaan, bahen jolmana.

28:7 Jala naung ditangihon si Jakkob hata ni amana dohot inana laho tu Padang-Aram.

28:8 Diida si Esau huhut sogo do roha ni si Isak, amana i mida boru Kanaan.

28:9 Jadi laho ma si Esau tumopot si Ismael, jala dibuat si Mahalat, boru ni si Ismael, anak ni si Abraham, iboto ni si Nabaiot bahen jolmana, imbang ni angka jolmana hian.

28:10 Alai borhat do anggo si Jakkob sian Berseba laho tu Haran.

28:11 Jadi tolhas ma ibana tu sada parbornginan, gabe marborngin ibana disi, ai nunga mate mata ni ari. Dung i dipambuat ma angka batu na disini bahen halang ni uluna, laos modom ibana disi.

28:12 Dung i marnipi ma ibana, diida ma sada tangga, na pinagohon tu tano, tolhas ro di langit ia ujungna, jadi ida ma, sai marnaek mijur sian i angka surusuruan ni Debata.

28:13 Jongjong di ginjangna anggo Jahowa, jala ninna do: Ahu do Jahowa, Debata ni ompum si Abraham dohot Debata ni si Isak, ia tano pinodomanmon lehononku ma tu ho dohot tu pinomparmu.

28:14 Jala sobokkon orbuk ni tano on sogot torop ni pinomparmu, jala angka rarat ma hamu tu hasundutan dohot tu habinsaran dohot tu utara dohot tu dangsina, jala dapotan pasupasu sogot nasa marga na di tano on marhitehite ho do pinomparmi.

28:15 Ida ma, sai dongananku jala ramotanku do ho manang tu dia pe ho mangalangka, jala togihononku do ho mulak tu tano on; ai ndang tadingkononku ho, nda jolo sahat hubahen na huparbaga i tu ho.

28:16 Dung i tarsunggul ma si Jakkob sian na modom i, jadi didok ma: Inganan ni Jahowa do on hape, so pamotoanku.

28:17 Jadi mabiar ma ibana, ninna ma: Na songkal situtu do inganan on, ndang tarbahen so on bagas ni Debata, jala baba pintu ni langit.

28:18 Dung i hehe ma si Jakkob sogot manogotna i, dibuat ma batu pinarhalanguluna i, jala dipajongjong bahen partinandaan, jala diusehon miak tu ginjangna.

28:19 Dung i dibahen ma goar ni inganan i Betel (bagas ni Debata), Lus do goar ni huta i anggo na sai laon.

28:20 Dung i marbagabaga ma si Jakkob, ninna do: Molo didongani jala diramoti Debata ahu di dalan na hudalani on, jala dilehon di ahu sagusagu sipanganon dohot ulos siporuloshononhon.

28:21 Jala marsonangsonang ahu mulak ditogihon tu bagas ni damang, sai Jahowa ma Debatangku.

28:22 Jala batu na hupajongjong on bahen partinandaan, i ma gabe bagas ni Debata, jala sude na nilehonmu tu ahu parsampuluonku ma i tu Ho.

1 Musa ᯔᯮᯘ 29

29:1 Dung i dilangkahon si Jakkob ma patna laho tu tano ni halak habinsaran.

29:2 Dung i manatapnatap ma ibana, gabe diida ma sada sumur di jampalan, jala mangulon di lambungna angka birubiru tolu parduan, ai sian sumur i do dipasobur halak angka birubiru i. Alai batu bolon langkop ni sumur i.

29:3 Sai marpungu tusi somal sude angka parduan i, asa digulang nasida batu langkop ni sumur i pasoburhon angka birubiru i, dung i dipasuang muse batu i tu baba ni sumur i.

29:4 Dung i ninna si Jakkob ma mandok nasida: Sian dia hamu, ale dongan? Jadi ninna nasida ma: Sian Haran do hami.

29:5 Dung i didok ma mandok nasida: Ditanda hamu do si Laban, anak ni si Nahor? Hutanda hami do, ninna nasida.

29:6 Dung i ninna ibana mandok nasida: Mardamedame do ibana? Jadi ninna nasida ma: Marsonangsonang do; jala ida. Si Rahel, boruna i ma na mangadu birubiru an.

29:7 Dung i didok si Jakkob ma: Ida ma, ginjang dope ari, ndang dope jumpang tingki papunguhon pinahan; pasobur hamu birubiru i, dung i aduadu hamu pajampalhonsa.

29:8 Jadi ninna nasida ma: Nda jolo marpungu sude angka parduan i, ndang tarbahen hami manggulang batu, langkop ni sumur i laho pasoburhon birubiru i.

29:9 Mangkatai dope ibana dohot nasida, nunga ro si Rahel mangadu birubiru ni amana i, ai ibana do parmahan.

29:10 Alai dung diida si Jakkob si Rahel i, boru ni si Laban, iboto ni inana i, ro di birubiru ni si Laban, tulangna i, dipajonok si Jakkob ma, jala digulang batu, langkop ni sumur i, dung i dipasobur birubiru ni tulangna i.

29:11 Dung i diumma si Jakkob ma si Rahel i, jala dipangiar soarana tumatangis.

29:12 Dung i dipaboa si Jakkob tu si Rahel, bere ni amana i ibana, anak ni si Rebekka. Jadi marlojong ma si Rahel paboahon tu amana.

29:13 Asa dung dibege si Laban barita ni si Jakkob, anak ni ibotona i, marlojong ma ibana manomunomu, dihaol ma ibana jala diumma, dung i ditogihon ibana tu jabuna. Jadi dipajojor si Jakkob ma tu si Laban sude angka hata ondeng.

29:14 Dung i ninna si Laban ma mandok ibana: Antong holiholingku jala sibukku do ho hape! Jadi disi ma ibana arga sabulan lelengna.

29:15 Dung i ninna si Laban ma mandok si Jakkob: Tung sibasabasam ma mangula di ahu, ala dung berengku ho? Paboa ma di ahu manang aha upam!

29:16 Alai dua do boru ni si Laban, goar ni sihahaan si Lea, goar ni sianggian si Rahel.

29:17 Alai odapon do mata ni si Lea, uli do anggo bohi dohot rupa ni si Rahel i.

29:18 Jadi solo ma roha ni si Jakkob mida si Rahel i, didok ma: Hupangulahon pe ho pitu taon on mambuat si Rahel, borum siampudan i.

29:19 Jadi ninna si Laban ma: Tagonan tu ho ibana hulehon, asa tu halak na asing, inganhon ma ahu.

29:20 Asa mangula ma si Jakkob pitu taon mambuat si Rahel, jala sobokkon pitu ari do i di rohana, dibahen holong ni rohana mida ibana.

29:21 Dung i ninna si Jakkob ma mandok si Laban: Lehon ma tu ahu jolmangki, ai nunga jumpang padanta i, asa hutopot ibana.

29:22 Jadi dipapungu si Laban ma sude isi ni huta i mangalehon mangan.

29:23 Alai dung bodari, dibuat ma boruna si Lea, jala diboan tu si Jakkob, gabe i ma ditopot.

29:24 Dung i dilehon si Laban ma tu ibana si Zilpa, naposona boruboru bahen rading ni si Lea boruna i.

29:25 Alai manogotna i, ida ma, si Lea do hape, jadi ninna si Jakkob mandok si Laban: Boasa tung songon i bahenonmu tu ahu? Nda si Rahel do na hubuat umbahen hupangulahon ho, boasa tung paotootoonmu ahu?

29:26 Jadi ninna si Laban ma: Ndang songon i hasomalan di luatnami on, tung jumolo pamulihon sianggian sian sihahaan.

29:27 Jabuhon maon pitu borngin on, asa hulehon di ho dohot sianggian i, molo dipangulahon ho ahu pitu taonnari.

29:28 Jadi dibahen si Jakkob ma songon i, dijabuhon ma pitu borngin. Dung i dilehon si Laban ma tu ibana boruna si Rahel i, bahen jolmana.

29:29 Dung i dilehon si Laban ma tu si Rahel, boruna i, si Bilha, naposona i, bahen radingna.

29:30 Dung i ditopot si Jakkob ma dohot si Rahel, jala humolong rohana di si Rahel, asa di si Lea, jala dipangulahon si Laban pitu taonnari.

29:31 Alai dung diida Jahowa, tung na so hahua si Lea i, marhangoluan ma ibana dibahen, alai na hol do anggo si Rahel i.

29:32 Jadi gabegabean ma si Lea, ditubuhon ma anak sada, dibahen ma goarna si Ruben; ai ninna do: Ala nunga ditatap Jahowa dangolhi, ai holong ma nuaeng roha ni sinondukki di ahu.

29:33 Dung i tumagam haroan muse ibana, jala ditubuhon anak sada, jala ninna: Ala naung ditangihon Jahowa, tung na so hahua ahu, dibahen jadi dilehon tu ahu dohot Anak on, gabe dibahen ma goarna si Simeon.

29:34 Dung i tumagam haroan muse ibana, jala ditubuhon anak sada, ninna ma: Bali tu ahu ma nuaeng sinondukki, ai nunga tolu anakna hutubuhon; ala ni dibahen ma goarna si Lepi.

29:35 Dung i tumagam haroan muse ibana, jala ditubuhon anak sada, gabe ninna ma: Pujionku ma Jahowa anggo sahali on; ala ni dibahen ma goarna si Juda (sipujion); dung i mansohot ma ibana mangintubu.

1 Musa ᯔᯮᯘ 30

30:1 Alai dung diida si Rahel, na so tubuan anak ibana di si Jakkob, mangiburu ma ibana di hahana i, didok ma tu si Jakkob: Patupa anak di ahu, molo so adong, mate ma ahu.

30:2 Jadi tarrimas ma si Jakkob mida si Rahel i, ai ahu do huroha singkat ni Debata, nda Ibana do tumiop parbue ni bortianmi?

30:3 Alai ninna si Rahel ma, ida ma, ndi radingku si Bilha, ibana ma topot, asa ditubuhon tu ampuanku, gabe maruli dohot ahu marhite sian ibana.

30:4 Jadi dilehon ma tu ibana si Bilha, radingna i, bahen jolmana, gabe ditopot si Jakkob ma.

30:5 Jadi gabegabean ma si Bilha, jala ditubuhon anak sada di si Jakkob.

30:6 Dung i ninna si Rahel ma nunga dapotan uhum ahu dibahen Debata, ditangihon dohot soarangki, jala dilehon di ahu anak sada; ala ni dibahen ma goarna si Dan.

30:7 Dung i tumagam haroan muse si Bilha, rading ni si Rahel i, jala ditubuhon anak paduahon di si Jakkob.

30:8 Jadi ninna si Rahel ma: Angka parsirangguton ni Debata huparsirangguthon dohot dahahang i, gabe monang ahu, jadi dibahen ma goarna si Naptali.

30:9 Jadi dung diida si Lea, naung mansohot ibana mangintubu, dibuat ma si Zilpa radingna i, mangalehon ibana tu si Jakkob bahen jolmana.

30:10 Asa ditubuhon si Zilpa, rading ni si Lea i anak sada di si Jakkob.

30:11 Dung i ninna si Lea ma: Nunga ro tua i, jadi dibahen ma goarna si Gad.

30:12 Dung i ditubuhon si Zilpa, rading ni si Lea i anak paduahon di si Jakkob.

30:13 Jadi ninna si Lea ma: Tuangki antong! Ai parhatuaon ni angka boruboru i ma ahu, jadi dibahen ma goarna si Aser.

30:14 Dung i di na masa gotilon laho ma si Ruben tu balian, gabe jumpangsa ma angka dudaim (bahen dorma) di tonga ni hauma, jala diboan tu si Lea inana i. Dung i ninna si Rahel ma mandok si Lea: Ua lehon ahu deba sian angka dudaim ni anakmu.

30:15 Jadi ninna si Lea ma mandok ibana: Na hurang dope huroha di roham binuatmi roha ni sinondukki, dohot do angka dudaim ni anakki naeng buatonmu? Jadi ninna si Rahel ma: Antong di lambungmu ma ibana modom saborngin on ali ni angka dudaim ni anakmi.

30:16 Jadi dung muli si Jakkob sian hauma bodarina i, ditomutomu si Lea ma ibana, ninna ma: Tu ahu do ho ro, ai nunga hutuhor ho ali ni angka dudaim ni anakki. Jadi rap modom nasida di na saborngin i.

30:17 Dung i ditangihon Debata ma si Lea, gabegabean ma ibana, jala ditubuhon anak palimahon di si Jakkob i.

30:18 Jadi ninna si Lea ma: Nunga dilehon Debata upangku, ala na hulehon i radingku tu sinondukki, jadi dibahen ma goarna si Isasar.

30:19 Dung i tumagam haroan muse si Lea i, jala ditubuhon anak paonomhon di si Jakkob.

30:20 Jadi ninna si Lea ma: Silua na denggan disiluahon Debata tu ahu. Inganhonon ni sinondukku ma ahu sahali on, ai nunga hutubuhon di ibana onom anak, jadi dibahen ma goarna si Zebulon.

30:21 Dung i ditubuhon ma boru sada, jala dibahen goarna si Dina.

30:22 Alai diingot Debata muse si Rahel, jala ditangihon pangidoanna, dibungka ma bortianna i.

30:23 Jadi tumagam haroan ibana, jala ditubuhon anak sada, ninna ma: Nunga didaek Debata haurahonku.

30:24 Jadi dibahen ma goarna si Josep, ninna ma: Sai ditambai Jahowa ma tu ahu anak sada nari!

30:25 Jadi dung ditubuhon si Rahel si Josep i, ninna si Jakkob ma mandok si Laban: Paborhat ma ahu, asa laho ahu tumopot ingananku dohot tanongku.

30:26 Lehon ma angka jolmangki dohot angka tubungku, angka na husamothon sian hamu, asa laho ahu, ai diboto hamu do parulangku, na hupangulahon i hamu.

30:27 Jadi ninna si Laban ma mandok ibana: Sai maruli ma ahu mangido asi ni roham! Ai patar do ditanda rohangku naung dipasupasu Jahowa ahu ala ho.

30:28 Bohoi tu ahu upam silehononku, ninna.

30:29 Dung i didok si Jakkob ma mandok ibana: Hamu pe, diboto hamu do parulangku di hamu dohot panjadi ni pinahanmuna saleleng ahu patureturehon.

30:30 Ai otik do adong di hamu, tagan so ro ahu, nunga manjarar gabe deak, jala dipasupasu Jahowa hamu marhite sian ahu. On pe, sadihari pe pangulahononku dohot isi ni bagashi?

30:31 Jadi ninna si Laban ma: Antong aha ma lehononku tu ho? Dung i ninna si Jakkob ma: Ndang manang aha lehononmu di ahu, molo dipatupa hamu hatangkon tu ahu, ulahanku ma marmahan pinahanmuna i.

30:32 Bolusonku ma sadari on sude punguan ni birubirumuna, ba papulik hamu ma sian i sude pinahan na marrintik dohot siganding, ro di sude na birong sian angka anak ni birubiru i; na marrintik dohot sibolang sian angka hambing pe, i ma gabe upangku.

30:33 Asa hatigoranki tumindangi ahu sogot, molo ro hamu tumingkir upangki: Sude na so marrintik, jala na so sibolang sian angka hambing i, jala na so birong sian angka anak ni birubiru i, na tinangko ma i molo di ahu.

30:34 Jadi ninna si Laban ma: Antong songon na nidokmi ma tutu!

30:35 Dung i dipapulik ma di na sadari i hambing tunggal angka na marrintik dohot angka sibolang, ro di sude hambing boruboru angka na marrintik dohot angka sibolang, sude angka na marsoar na bontar dohot sude na birong sian angka birubiru i, dung i dipasahat ma tu tangan ni angka anakna i.

30:36 Dung i dibahen si Laban ma partoluarian holangkolangna dohot si Jakkob. Asa diparmahan si Jakkob ma punguan birubiru ni si Laban angka na tading i.

30:37 Alai dibuat si Jakkob ma dangka ni hau meang dohot anturmangan dohot andulpak, jala dilangkati margollotgollot.

30:38 Dung i dipampeakkon ma dangka angka na nilangkatanna i tu parsoburan ni angka birubiru i, asa dipaadopadop, asa marbaringin nasida di na marsobur i.

30:39 Jadi marlambe ma angka birubiru maradophon angka dangka i, gabe ditubuhon ma na marrintik angka sibolang dohot siganding.

30:40 Dung i dipapulik si Jakkob ma angka anak ni birubiru i, jala didompakkon angka birubiru i tu na marrintik dohot na birong sian pinahan ni si Laban. Dung i pulik ma dibahen inganan ni pinahanna i, ndang be saor dibahen tu pinahan ni si Laban.

30:41 Alai molo rumogon birubiru, angka na umbolon i, dipampeakkon si Jakkob ma muse angka dangka i tu angka parsoburan i, gabe dipaadopadop laho marjantan.

30:42 Alai molo ro birubiru, angka na marpengpeng, ndang dibahen. Jadi di si Laban ma angka na marpengpeng i, alai angka na bolon i di si Jakkob do.

30:43 Jadi mamora bulung ma si Jakkob, torop ma angka birubiruna dohot naposona boruboru dohot baoa, angka unto dohot halode.

1 Musa ᯔᯮᯘ 31

31:1 Dung i tarbortik ma tu si Jakkob hatahata ni angka anak ni si Laban, angka na mandok: Nunga diahuti si Jakkob sinamot ni amanta sasudena, jala marharoroan sian na di amanta i do hamoraonna on sudena.

31:2 Bohi ni si Laban pe, ndang songon na sai laon be dompak ibana, diida si Jakkob.

31:3 Dung i ninna Jahowa ma mandok si Jakkob: Mulak ma ho tu tano ni angka ompum, tu tano hagodanganmu, hudongani pe ho.

31:4 Jadi disuru si Jakkob ma manjou si Rahel dohot si Lea tu panjampalan punguan ni birubiruna i.

31:5 Jala didok ma mandok nasida: Nunga huida bohi ni amanta i, ndang be songon na sai laon dompak ahu; alai didongani Debata ni damang i do ahu.

31:6 Jala diboto hamu do, nasa gogongku hubahen mangulahon amanta i.

31:7 Alai sai dipaotooto amanta i do ahu, jala sampulu hali diuba upangki; alai ndang diloas Debata ibana mangago ahu.

31:8 Molo didok ibana songon on: Angka na marrintik ma upam, jadi angka na marrintik i dipantubuhon sude birubiru i. Alai molo didok songon on: Angka sibolang i ma upam, jadi angka sibolang dipantubuhon, sude birubiru i.

31:9 Asa Debata do mangarampas sinamot ni amanta i, jala dilehon tu ahu.

31:10 Ai huida do di bagasan nipingku, di tingki harorongom ni angka pinahan i, angka tunggal na marrintik dohot sibolang dohot siganding mangangkati angka birubiru i.

31:11 Jadi didok surusuruan ni Debata ma mandok ahu di bagasan nipingku: Jo Jakkob! Dison do ahu, ningku.

31:12 Dung i ninna ibana ma: Ua pameong jolo matam jala ida, angka na marrintik, jala sibolang, jala siganding sude birubiru tunggal angka na mangangkati angka birubiru boruboru, ai nunga huida sude na binahen ni si Laban i tu ho.

31:13 Ahu do Debata uju na di Betel i, uju na miniahanmu disi partinandaan i, jala dibagabaga i ho Ahu. On pe, borhat ma ho, bungkas sian tano on, jala mulak tu tano hagodanganmi.

31:14 Dung i ninna si Rahel dohot si Lea ma mangalusi ibana: Apala adong be tagamon jambar, manang ugasan siteanonnami di jabu ni amanta i.

31:15 Nda sobokkon halak na pulik marga na ma hami di rohana? Ai digadis do hami, jala nunga sun dipangan dohot tuhornami.

31:16 Ai nasa hamoraon na nirampas ni Debata sian amanta i, hita dohot anakta i hian do nampunasa. On pe, bahen ma sude na tinonahon ni Debata tu ho.

31:17 Jadi hehe ma si Jakkob, dipahundul ma angka anakna dohot jolmana tu angka unto.

31:18 Diboan ma dohot pinahanna luhut ro di nasa ugasanna, na niomona i, pinahan hapunjunganna pe, na sinamotsamotna i di Padang-Aram laho tumopot si Isak, amana i tu tano Kanaan.

31:19 Alai laho manggustingi imput ni birubiruna i anggo si Laban, jadi ditangko si Rahel ma angka terapim (Debata hidup) ni amana i.

31:20 Asa dipalungun si Jakkob ma roha ni si Laban, halak Ram i, ala so dipaboa tu ibana na laho lintun i ibana.

31:21 Asa lintun ma si Jakkob, diboan dohot sude na di ibana i, borhat ma ibana laho manaripari batang aek i, dung i ditondong ma dompak dolok Gilead.

31:22 Patolubornginhon adong ma na mamaritahon tu si Laban naung lintun i si Jakkob.

31:23 Jadi diarahon si Laban ma angka hahaanggina i mangeahi ibana, parpituarian pe, asa dapotsa ibana di dolok Gilead.

31:24 Alai ro ma Debata bornginna i paipihon tu si Laban, halak Ram i, ninna ma mandok ibana: Jaga ho! So tung ditongkari ho si Jakkob i.

31:25 Asa dapot si Laban ma si Jakkob i, ai dipagohon si Jakkob do undungundungna di dolok i; si Laban pe dipagohon do undungundungna di dolok Gilead rap dohot angka hahaanggina i.

31:26 Dung i ninna si Laban ma mandok si Jakkob: Dia do na binahenmi? Tole dipalungun ho rohangki, tole diboan ho angka borungku, hira tabantaban do nasida na dapot podang?

31:27 Boasa tung marsibuni ho laho lintun, so martinading hata ho tu ahu, asa hupataru ho nian, hugondanggondangi hamu nian, paboa godang ni rohangku.

31:28 So manang diloas ho ahu mangumma angka pahompungku dohot angka borungku; asa na oto do pambahenmi.

31:29 Tuk do nian gogo ni tanganku mambahen uhum na roa tu hamu; alai na ro do na borngin nantuari hata ni Debata ni amamuna tu ahu, ninna do: Jaga ho! So tung ditongkari ho si Jakkob i.

31:30 On pe, ia na naeng laho ho ala na malungun ho di bagas ni amamu, boasa ma tung tangkoonmu angka debatangku?

31:31 Dung i ninna si Jakkob ma mangalusi si Laban: Dibahen na mabiar do ahu, ai ninna rohangku do: Atek tung rampasonmu maon angka borumi sian ahu.

31:32 Alai molo tung jumpang ho angka debatami, di manang ise, marutang hosa ma ibana; asa sungkapi hamu ma di jolo ni angka donganta on; molo adong manang aha ugasanmu di ahu, buat di ho. Alai ndang pamotoan ni si Jakkob na tinangko ni si Rahel do i hape.

31:33 Jadi dibongoti si Laban ma undungundung ni si Jakkob dohot undungundung ni si Lea dohot undungundung ni rading na dua i, alai ndang adong jumpangsa. Dung i ruar ma ibana sian undungundung ni si Lea mambongoti undungundung ni si Rahel.

31:34 Alai nunga dibuat si Rahel hian angka terapim i, jala dibahen tu toru ni palano ni unto, asa dihunduli. Jadi disungkapi si Laban ma undungundung i luhutna, hape ndang adong jumpangsa.

31:35 Jadi ninna si Rahel ma tu amana i: Unang tung tarrimas roha ni tuangku, ala so tarbahen ahu hehe maradophon ho, ai masa do di ahu hasomalan ni boruboru. Asa didiori pe, laos so jumpangsa angka terapim i.

31:36 Jadi tarrimas ma si Jakkob, dibadai ma si Laban i, ninna si Jakkob ma mangalusi si Laban i: Aha ma pangalaosingku, aha ma dosangku umbahen piripirion hamu mangeahi ahu?

31:37 Nunga disungkapi hami ugasanku saluhutna, aha ma jumpang hamu sian nasa ugasan ni jabum? Peakkon ma tu jolo ni angka donganki dohot donganmi, asa diuhumi nasida hita na dua.

31:38 Nunga pola duapulu taon, sai di lambungmu do ahu, ndang dung tarposo birubirumu, manang hambingmu, jala ndang dung hupangan hambing tunggal ni birubirumuna.

31:39 Ndang dung hutaruhon tu ho na sinoro ni binatang sai hualii do i; sai dipangido ho do sian ahu na tinangko ni halak nang arian nang borngin.

31:40 Ia arian las ni ari manganhon ahu, ia borngin ngali ni ari do, jala ndang tarnono matangku.

31:41 Na duapulu taon on sai di jabum do ahu mangulahon hamu, sampulu opat taon mangomo borum na dua i, jala onom taon mangomo angka pinahanmu; alai sampulu hali dipauba hamu upangki.

31:42 Aut unang didongani Debata ni damang i ahu, Debata ni si Abraham, jala na hinabiaran ni si Isak, ra tung palahoonmu boti ahu; alai ditatap Debata do pardangolanki dohot halojaon ni tanganku, gabe dipinsang hamu na borngin nantuari.

31:43 Jadi ninna si Laban ma mangalusi si Jakkob: Borungku do angka boruboru i, jala anakku do angka anak i, jala pinahanku angka pinahan i, jala sude na niidam, ahu nampunasa; asa hahuaonku ma sadari on angka borungkon, manang anaknasida, angka na tinubuhonnasida i.

31:44 On pe, tole tabahen ma padan, ahu dohot ho, i ma sitindanginta sogot.

31:45 Jadi dibuat si Jakkob ma sada batu, jala dipajongjong bahen partinandaan.

31:46 Dung i ninna si Jakkob ma mandok angka donganna i: Papungu hamu ma angka batu. Jadi dipambuat nasida ma angka batu mambahen punggupunggu, laos mangan nasida disi di atas punggupunggu i.

31:47 Dung i dibahen si Laban ma goarna: Jegar-Sahaduta; alai Galed goarna dibahen si Jakkob.

31:48 Dung i ninna si Laban ma: Punggupunggu on ma sitindanginta sadari on, ala ni do umbahen margoar Galed;

31:49 Dohot Mispa, ai ninna do: Sai ditatap Jahowa ma hita, ia dung sirang hita!

31:50 Molo diarsahi ho angka borungki, manang mambuat boru bahen imbang ni angka borungki, ndang adong jolma di lambungta, alai Debata do sitindanginta.

31:51 Angkup ni didok si Laban mandok si Jakkob: Ida ma, punggupunggu on dohot partinandaan on na huojakkon i parbolatanta.

31:52 Punggupunggu on dohot partinandaan on sitindangi, paboa na so jadi laosanku punggupunggu on mandapothon ho, hamu pe, ndang jadi laosanmu punggupunggu on dohot partinandaan on mandapothon ahu laho mangago.

31:53 Debata ni si Abraham dohot Debata ni si Nahor, Debata ni amanasida pe manguhum hita. Jadi marbulan ma si Jakkob tu Na hinabiaran ni amana si Isak i.

31:54 Dung i dipelehon si Jakkob ma sada pelean di dolok i, dipio ma dohot angka donganna i mangan sagusagu. Jadi dung sun nasida mangan sagusagu, laos marborngin di dolok i nasida.

31:55 Torang ni arina i dipasogot si Laban ma hehe, jala diumma angka pahompuna dohot angka boruna i, jala dipasupasu nasida; dung i laho muli ma si Laban tu ingananna hian.

1 Musa ᯔᯮᯘ 32

32:1 Alai si Jakkob pe ditulus ma dalanna, jadi dijumpangkon angka surusuruan ni Debata ibana.

32:2 Asa dung diida si Jakkob nasida, ninna ma: Parduan ni parangan ni Debata do on, jadi dibahen ma goar ni adian i Mahanaim.

32:3 Dung i disuru si Jakkob ma angka suruanna jumolo manopot si Esau, hahana i, tu tano Seir, tu luat Edom.

32:4 Ditonai ma nasida, ninna do: Songon on ma dok hamu tu rajangki. Si Esau i: Songon on do hata ni si Jakkob, naposomi: Na hinomit di lambung ni si Laban do ahu na sai laon rasirasa nuaeng.

32:5 Jadi marlombu ahu, marhalode, marbirubiru, jala marnaposo baoa dohot boruboru, gabe husuru paboahon i tu rajangki, asa asi roham marnida ahu.

32:6 Dung i mulak ma angka suruan i tu si Jakkob, angka didok ma: Nunga sahat hami tu haham, tu si Esau i, ibana pe, nunga ro manjumpangkon ho, jala opat ratus halak donganna.

32:7 Jadi mabiar situtu ma si Jakkob i, jala tahuton rohana, dibagi ma angka donganna i dohot angka birubiru i, angka lombu dohot angka halode mambahen dua parduan.

32:8 Ai ninna rohana do: Molo pajumpang si Esau dohot parduan na sada, jala dibunu, gabe malua parduan na tading i.

32:9 Dung i ninna si Jakkob ma: Iale Jahowa, Debata ni daompung si Abraham, dohot Debata ni damang si Isak! Didok Ho do mandok ahu: Mulak ma ho tu tano hatubuanmu, asa hutumpak ho.

32:10 Mametmethu do ahu nian manjalo sude angka asi ni roham dohot sude hasintongan, angka na binahenmi tu naposomon. Ai mardongan tungkothon hutaripari batang aek Jordan on na jolo, ia nuaeng nunga gabe dua parduan ahu.

32:11 Sai palua ma ahu sian tangan ni dahahang, si Esau i, ai mabiar do ahu mida ibana, atek tung ro ibana maon mambunu ahu, ina i ro di angka dakdanak.

32:12 Alai didok Ho do: Sai tumpahanku do ho jala sobokkon horsik ni laut bahenonku pinomparmu, angka na so habilangan dibahen hinadeakna.

32:13 Laos marborngin disi do ibana sabornginna i; dung i dipambuat ma nasa na dapot tanganna bahen sileanlean tu si Esau, hahana i:

32:14 Dua ratus hambing boruboru, jala duapulu hambing tunggal, dua ratus birubiru boruboru, jala duapulu birubiru tunggal.

32:15 Tolupulu unto panusuan rap dohot anakna, opatpulu lombu jala sampulu jonggi, duapulu halode boruboru rap dohot anakna sampulu.

32:16 Dung i dipasahat ma tu tangan ni angka naposona, pulik be saparduan, jala didok ma mandok angka naposona i: Pajolo hamu ma taripar, jala marholangkolang bahen hamu saparduan.

32:17 Dung i ditonai ma parjolo i, ninna: Molo pajumpang ho dohot dahahang si Esau i, jala disungkun ho, naposo ni ise do ho, jala tu dia ho laho, jala ise nampuna on angka na di jolomon?

32:18 Dohononmu ma: Si Jakkob naposomi do nampunasa, silehonlehonna do i, tinongosna tu rajangku, si Esau i, jala ida, ihut dohot ibana di pudinami.

32:19 Suang songon i ditonahon dohot tu na paduahon i dohot tu na patoluhon i dohot tu sude angka na mangadu angka parduan i, ninna ma: Hatangkon ondeng ma dok hamu tu si Esau, molo tung pajumpang hamu dohot ibana:

32:20 Ihut di pudinami dohot si Jakkob naposomi, i ma dok hamu! Ai ninna rohana do: Padengganonku do rohana marhitehite silehonlehon, na niadu di jolongku, dung i pe asa idaonku bohina, anggiat mira bohina marnida ahu.

32:21 Jadi taripar ma silehonlehon i di jolona; marborngin di parsaroan ianggo ibana sabornginna i.

32:22 Dung i hehe ma ibana bornginna i, dipangarahon ma jolmana na dua i dohot naposona boruboru na dua i dohot anakna na sampulu sada i, laho manaripari hatariparan Jabok.

32:23 Jadi ditogihon ma nasida patariparhon di batang aek i, dipataripar ma nasa na di ibana i.

32:24 Tading ma holan si Jakkob, jadi ro ma sada halak marsiranggut dohot ibana ro di buha siang ari.

32:25 Alai dung diida, ndang leak tunduksa si Jakkob, disoro ma soitna, jadi ngendul ma soit ni si Jakkob i dibahen parsiranggutonnasidai.

32:26 Dung i ninna Ibana ma: Palua ma Ahu, ai nunga buha siang ari. Alai ninna si Jakkob ma: Ndang hupalua Ho, nda jolo dipasupasu Ho ahu.

32:27 Dung i ninna Baoa i mandok Ibana: Ise do goarmu? Si Jakkob do, ninna.

32:28 Jadi ninna Baoa i ma: Ndang be si Jakkob dohonon goarmu, si Israel na ma, ai dialo ho do Debata dohot jolma, jala monang ho do.

32:29 Dung i manungkun ma si Jakkob, jala ninna: Ua paboa ma goarmu? Alai ninna Ibana ma: Boasa ma tung sungkunsungkunanmu goarhu? Dung i dipasupasu ibana disi.

32:30 Jadi dibahen si Jakkob ma goar ni parsiranggutan i Peniel; ai nunga tangkas huida apala Bohi ni Debata, jala malua tondingki.

32:31 Dung i di na sinalpuanna i Peniel i, binsar ma mata ni ari di ibana, hape mengkatengkat ibana dibahen soitna.

32:32 Ala ni do umbahen so dipangan halak Israel urat doldol rasirasa nuaeng, ala disoro pardomuan ni soit ni si Jakkob i.

1 Musa ᯔᯮᯘ 33

33:1 Dung i manatapnatap ma si Jakkob, jadi diida ma ro si Esau, jala opat ratus halak donganna sauduran. Jadi disagihon ma angka anakna tu si Lea dohot tu si Rahel dohot tu naposo boruboru na dua i.

33:2 Tu jolo ma dibahen boruboru na dua i rap dohot anaknasida i, tu pudinasida i si Lea dohot anakkonna, parpudi sahali anggo si Rahel rap dohot si Josep.

33:3 Dung i mardalan di jolonasida ma anggo ibana, jala dipatungkaptungkap ibana tu tano pitu hali, paima tolhas ibana tu hahana i.

33:4 Dung i marlojong ma si Esau manjumpangkon ibana, dihaol ma rungkungna i, jala diumma ibana, jadi tangis be nasida.

33:5 Dung i manaili ma si Esau, gabe diida ma angka ina i rap dohot angka dakdanak i, gabe didok ma: Ise do angka donganmu an? I ma angka dakdanak, angka na niasihon ni Debata tu naposomon, ninna.

33:6 Dung i jumonok ma naposo boruboru na dua i, nasida dohot angka anakkonnasida, manungkapnungkap ma nasida marsomba.

33:7 Jumonok ma dohot si Lea rap dohot anakkonna i angka na marsomba be; dung i jumonok ma si Josep dohot si Rahel marsomba be.

33:8 Dung i ninna si Esau ma: Tu aha bahenonmu sude punguan angka na jumpang ahu nangkin? Mangalap asi ni roha ni rajangku do i tu ahu, ninna.

33:9 Alai ninna si Esau ma: Godang do anggo i di ahu, ale anggia, di ho ma na di ho hian.

33:10 Dung i ninna si Jakkob ma: Ndangana, molo sapala asi roham mida ahu, sai jalo ma silehonlehonki sian tanganku; ai songon na marnida bohi ni Debata do ahu, na marnida bohim ahu, jala sorta ho tu ahu.

33:11 Sai jalo ma pasupasungku, na binoan i tu ho, ai asi do roha ni Debata di ahu, jala singkop do sude di ahu. Jadi dung sai dielehelekkon tu ibana, gabe dijalo ma.

33:12 Dung i didok si Esau ma: Beta ma hita mardalan, ahu pe di jolom.

33:13 Alai ninna si Jakkob ma mandok ibana: Diboto rajangku do, mardongan posoposo dohot birubiru dohot lombu angka panusuan ahu, molo mahudushu binahen, nanggo sadari, angka mate ma sude pinahan i.

33:14 Sai jumolo ma rajangku mardalan Sian naposona on; ianggo ahu, hupanangetnanget pe marguru tu pangalangka ni pinahan angka na di jolongki dohot marguru tu langka ni angka dakdanak i, paima tolhas ahu tu Seir tumopot rajangki.

33:15 Jadi ninna si Esau ma: Beha ia hutadingkon deba sian angka dongankon bahen donganmu? Alai ninna si Jakkob ma: Tu aha ma i pola? Asal jumpangan asi ni roha ahu, ale rajanami.

33:16 Jadi mulak ma si Esau di na sadari i tu Seir.

33:17 Alai anggo si Jakkob borhat laho tu Sukot, dipauli ma jabuna sada, jala dibahen angka bara ni pinahanna, ala ni do umbahen margoar Sukot adian i.

33:18 Jadi tolhas ma si Jakkob mardamedame tu huta Sikem, na di tano Kanaan, di na ro i ibana sian Padang-Aram, di adopan ni huta i ibana marsaro.

33:19 Dung i dituhor ma hauma santurpuk, hajongjongan ni undungundungna i, sian angka anak ni si Hemor, ama ni si Sikem mararga saratus rupia.

33:20 Dung i dipajongjong disi langgatan sada, dibahen ma goarna: Di Debata ni halak Israel na gogo i.

1 Musa ᯔᯮᯘ 34

34:1 Alai laho ma ianggo si Dina, boru ni si Lea, na tinubuhonna di si Jakkob, martandang tu angka boru, isi ni banua i.

34:2 Jadi diida si Sikem, anak ni si Hemor, marga Hevi, raja ni luat i ibana, jala digogoi.

34:3 Solo situtu rohana di si Dina, boru ni si Jakkob i, jala lomo rohana mida boruboru na bajar i, gabe didok ma hatana mambuat roha ni boruboru na bajar i.

34:4 Dung i ninna si Sikem na mandok si Hemor, amana i: Sai buat ma di ahu namarbaju on bahen jolmangku.

34:5 Dung i tarbortik ma tu si Jakkob, naung pinarotakrotak ni si Sikem si Dina, boruna i, jala di ladang angka anakna i marmahan pinahanna, jadi sip ma si Jakkob, paima ro nasida.

34:6 Dung i ruar ma si Hemor, ama ni si Sikem i tumopot si Jakkob, naeng mangkatai dohot ibana.

34:7 Ro ma dohot angka anak ni si Jakkob sian ladang. Jadi marsak jala tarrimas situtu angka baoa i, dung dibege nasida barita ni haurahon, binahen ni si Sikem tu Israel, naung pinarotakrotakna i boru ni si Jakkob, tung na so jadi do bahenon songon i.

34:8 Dung i mangkatai ma si Hemor dohot nasida, ninna ma: Solo do roha ni anakku, si Sikem di borumuna i; ua lehon hamu nasida tu ibana bahen jolmana!

34:9 Martondong ma hita: Lehon hamu borumuna di hami, borunami pe buat hamu di hamu.

34:10 Di lambungnami on ma hamu maringanan; guru di hamu ma tano na di jolomuna i; ingani jala liati hamu marboniaga mambuat laba di hamu.

34:11 Dung i didok si Sikem ma mandok ama ni si Dina dohot tu angka ibotona i: Sai asi ma rohamuna di ahu hulehon pe gurudokmuna.

34:12 Gumodang pe pangido hamu tuhorna dohot silehonlehon, sai na lehononku do, gurudokmuna i, asal dilehon hamu boru i tu ahu bahen jolmangku.

34:13 Jadi tanding ma dibahen angka anak ni si Jakkob mangalusi si Sikem dohot si Hemor amana i, ala na pinarotakrotakna i si Dina, ibotonasida i.

34:14 Didok nasida ma mandok ibana: Ndang haoloan hami hata i, mangalehon ibotonami tu halak na marhulup, ai haurahon do i di hami.

34:15 Alai huoloi hami pe hamu, molo olo hamu sunaton nasa baoa di hamu, songon hami.

34:16 Hulehon hami pe borunami tu hamu, hubuat hami pe dohot borumuna di hami, gabe tampak ingananta, jala sada bangso hita.

34:17 Alai molo so diunduk hamu hatanami, mangoloi sunaton, buatonnami ma borunami, dung i bungkas hami.

34:18 Jadi lomo ma roha ni si Hemor dohot si Sikem, anakna i umbege hatanasida i.

34:19 Ndang pola marpaimaan dolidoli i patupahon hata i, ai solo do rohana di boru ni si Jakkob, jala ibana na sumangap sian sude pinompar ni amana.

34:20 Jadi ditopot si Hemor dohot si Sikem anakna i partungkoan ni hutanasida i, asa marhata dohot angka baoa, isi ni hutanasida i, ninna ma:

34:21 Naeng maraleale angka halak on dohot hita italoas ma nasida mangingani tano on, asa diliati marboniaga, ai lambas do tano i di jolonasida humaliang; tabuat pe borunasida bahen jolmanta, talehon dohot borunta di nasida.

34:22 Alai ingkon marsunat hita nasa baoa, songon nasida angka na tarsunat be, asa olo nasida maringan di lambungta on, jala sada bangso dohot hita.

34:23 Nda guru di hita ma pinahan dohot sude sinamotnasida i? Antong sai itaoloi ma pinangido ni rohanasida i, asa maringan nasida di lambungta on.

34:24 Jadi diunduk nasida ma hata ni si Hemor dohot si Sikem, anakna i, sude nasida angka na marmeang muli sian bahal ni hutana i; marsunat ma sude baoa, isi ni huta i.

34:25 Dung i patoluarihon, di na bernit i diae nasida, masiboan podangna ma na dua anak ni si Jakkob, si Simeon dohot si Lepi, iboto ni si Dina i, dirampok ma huta i na so pangkiriman, jala dibunui nasa baoa.

34:26 Dibunu ma dohot si Hemor dohot si Sikem, anakna i, ditampuli dohot podang, dung i diboan ma si Dina sian bagas ni si Sikem, jadi laho nasida.

34:27 Dung i ditahopi angka anak ni si Jakkob ma angka na tartihami, jala ditaban duduk huta i, ala na pinarotakrotakna i ibotonasida i.

34:28 Didaek ma angka birubiru dohot lombu dohot halodenasida i ro di sude na di bagasan huta dohot na di balian.

34:29 Ro di sude ugasannasida dohot sude posoposo, tole jolmanasida diboan, jala dipupusi nasa ugasan na di bagasan jabu.

34:30 Dung i didok si Jakkob ma mandok si Simeon dohot si Lepi: Dilitohi hamu ma antong parnidaanku pabauhon baritangku tu isi ni tano on, tu halak Kanaan dohot Perisi, so manang piga bilanganta; molo marhara nasida di donganna mangalo hita, gabe bunuonna ma ahu, jadi ripur ahu dohot na hupompar.

34:31 Alai ninna nasida ma: Tung tama ma doshon sibabijalang ibotonami bahenonna?

1 Musa ᯔᯮᯘ 35

35:1 Dung i ninna Debata ma mandok si Jakkob: Borhat ma ho laho nangkok tu Betel, ingani ma disi, jala pauli disi sada langgatan di Debata, na niidam, di na maporus i ho maradophon si Esau, hahami.

35:2 Jadi didok si Jakkob ma mandok donganna sabagas dohot tu sude donganna i: Pambolongkon hamu ma debata sileban, angka na pineopmuna i, manguras ma hamu jala salini hamu ulosmuna i.

35:3 Beta ma hita nangkok tu Betel, asa hupauli disi sada langgatan di Debata, na mangalusi ahu di ari hagogotanki, jala didongani ahu di dalan na hudalani i.

35:4 Jadi diparlehon be ma tu si Jakkob sude debata sileban, angka na di tangannasida i, ro di antinganting angka na di pinggolnasida i, dung i ditabunihon si Jakkob ma i tu toru ni hau ara na di lambung ni Sikem.

35:5 Dung i borhat ma nasida, ditahuti Debata ma angka huta na humaliang nasida i, asa unang dilele angka anak ni si Jakkob.

35:6 Jadi tolhas ma si Jakkob tu huta Lus na di tano Kanaan i, i ma Betel i, ibana dohot sude donganna sauduran.

35:7 Dung i dipauli ma disi langgatan sada, dibahen ma goar ni hajongjonganna: Elbetel, ala na niidana i disi Debata, di na maporus i ibana maradophon hahana i.

35:8 Dung i mate ma si Debora panarusan ni si Rebekka na jolo; jadi ditanom ma ibana di toru ni hariara, tungkan dangsina ni Betel, gabe dibahen ma goarna; hariara Bahut (parandungan).

35:9 Dung i diulahi Debata pataridahon Ibana tu si Jakkob, dung ro ibana sian Padang-Aram, jala dipasupasu ibana.

35:10 Jadi didok Debata ma mandok ibana: Si Jakkob do goarmu, alai ndang be si Jakkob, si Israel na ma dohonon goarmu. Jadi margoar si Israel na ma ibana.

35:11 Dung i ninna Debata ma mandok ibana: Ahu do Debata, pargogo na so hatudosan! Gabe ma ho jala matorop mabue; bangso sada, jala parluhutan ni angka bangso marharoroan sian ho, jala angka raja ruar sian gontingmu.

35:12 Jala tano naung hulehon tu si Abraham dohot tu si Isak, lehononku ma tu ho dohot tu pinomparmu sogot lehononku tano i.

35:13 Dung i manaek ma Debata sian lambungna, sian inganan pangkataianna i dohot si Jakkob.

35:14 Jadi dipajongjong si Jakkob ma sada partinandaan sian batu di inganan pangkataianna i dohot Debata, diusehon ma tu atasna pelean siinumon, diusehon dohot miak tu ginjangna.

35:15 Dung i dibahen si Jakkob ma goar ni inganan pangkataianna i dohot Debata, Betel.

35:16 Dung i borhat ma nasida sian Betel, adong dope arga sangombasnari mardalan asa sahat tu Eprata, mangintubu ma disi si Rahel, mansai maol ibana mangintubu.

35:17 Jadi di na maol i ibana mangintubu, ninna sibaso i ma mandok ibana: Unang ho mabiar, ai sai gomgomonmu do nang anakmon.

35:18 Alai di na laho tos hosana, ai mate do ibana, dibahen ma goarna Benoni; alai anggo amana manggoar ibana si Benjamin.

35:19 Asa mate ma si Rahel, jala tartanom di dalan laho tu Eprata, i ma Betlehem.

35:20 Dung i dipajongjong si Jakkob ma partinandaan sada di atas tanomanna i. I ma partinandaan di tanoman ni si Rahel rasirasa nuaeng.

35:21 Dung i borhat ma si Israel, jala dipahembang undungundungna i di bariba ni Migdol-Eder.

35:22 Jadi dung diingani si Israel tano i, laho ma si Ruben marjolmahon si Bilha, jolma ni amana i, jala tarbortik do i tu si Israel. Alai sampulu dua do anak ni si Jakkob.

35:23 Ia anak ni si Lea: Si Ruben, buhabaju ni Jakkob, si Simeon, si Lepi, si Juda, si Isasar dohot si Zebulon.

35:24 Ia anak ni si Rahel: Si Josep dohot si Benjamin.

35:25 Ia anak ni si Bilha, rading ni si Rahel: Si Dan dohot si Naptali.

35:26 Ia anak ni si Zilpa, rading ni si Lea: Si Gad dohot si Aser. I ma anak ni si Jakkob, angka na tubu di ibana di Padang-Aram.

35:27 Dung i sahat ma si Jakkob tu si Isak, amana i, tu Mamre, tu Kiryat-Arba, i ma Hebron, paisolatan ni si Abraham dohot si Isak.

35:28 Ia umur ni si Isak saratus ualupulu taon do.

35:29 Dung i tos ma hosa ni si Isak, jala mate ibana saur matua, jala mahap di hangoluan on, gabe dipapungu ma ibana tu angka ompuna jala ditanom si Esau dohot si Jakkob, angka anakna i, ibana.

1 Musa ᯔᯮᯘ 36

36:1 On ma angka pinompar ni si Esau, i ma si Edom.

36:2 Dibuat si Esau ma angka jolmana sian boru Kanaan: Si Ada, boru ni si Elon, marga Het dohot si Aholibama, boru ni si Ana, pahompu ni si Zibeon, marga Hevi.

36:3 Dohot si Basemat, boru ni si Ismael, iboto ni si Nabaiot.

36:4 Dung i ditubuhon si Ada ma di si Esau si Elipas, ia si Basemat manubuhon si Reguel.

36:5 Ditubuhon si Aholibama ma si Jehus, si Jalam dohot si Kora. I ma anak ni si Esau, angka na tubu di ibana di tano Kanaan.

36:6 Dung i diboan si Esau ma angka jolmana, angka anakna dohot angka boruna dohot sude isi ni bagasna i ro di sude ugasanna dohot pinahanna dohot sinamotna, angka na sinamotsamotna i di tano Kanaan, gabe bungkas ibana tu sada tano paholangkon sian si Jakkob anggina i.

36:7 Ai magodangku do sinamotnasida i, ianggo tung tampak nasida maringan, jala ndang tarparmudu tano paisolatanna i nasida, dibahen hinadeak ni pinahannasida.

36:8 Jadi maringan di dolok Seir ia si Esau, i ma si Edom.

36:9 On ma angka pinompar ni si Esau, ompu ni halak Edom di dolok Seir.

36:10 On ma goar ni angka anak ni si Esau: Elipas, anak ni si Ada, jolma ni si Esau; Reguel, anak ni si Basemat, jolma ni si Esau.

36:11 Ia angka anak ni si Elipas, on ma: Teman, Omar, Zepo, Gatam dohot si Kenas.

36:12 Dohot do si Timna diparjolma si Elipas, anak ni si Esau i, gabe ditubuhon ma si Amalek di si Elipas. I ma angka anak ni si Ada, jolma ni si Esau.

36:13 Alai angka anak ni si Reguel on do: Si Nahat, si Zerah, si Samma dohot si Missa. I ma angka anak ni si Basemat, jolma ni si Esau.

36:14 Ia angka anak ni si Aholibama, boru ni si Ana, pahompu ni si Zibeon, jolma ni si Esau, angka na tinubuhonna di si Esau: Si Jehus, si Jalam dohot si Kora.

36:15 On do angka induk sian angka anak ni si Esau. Sian angka anak ni si Elipas, buhabaju ni si Esau: Induk Teman, induk Omar, induk Zepo, induk Kenas.

36:16 Induk Kora, induk Gatam, induk Amalek. I ma angka induk sian si Elipas di tano Edom, i ma angka anak ni si Ada.

36:17 Jala on ma angka anak ni si Reguel, anak ni si Esau: Induk Nahat, induk Zerah, induk Samma, induk Missa. I ma angka induk sian si Reguel di tano Edom. I ma angka anak ni si Basemat, jolma ni si Esau.

36:18 On ma angka anak ni si Aholibama, jolma ni si Esau: induk Jehus, induk Jalam, induk Kora. I ma angka induk sian Aholibama, boru ni si Ana, jolma ni si Esau i.

36:19 I ma angka anak ni si Esau, jala i ma angka induknasida. Ibana ma Edom i.

36:20 On ma angka anak ni si Seir, marga Hori, angka isi ni tano i hian: Si Lotan, si Sobal, si Zibeon, si Ana.

36:21 Si Dison, si Ezer dohot si Disan. I ma angka induk ni halak Hori, angka anak ni si Seir ni tano Edom.

36:22 Alai angka anak ni si Lotan, on do: Si Hori dohot si Heman; ia iboto ni si Lotan si Timna do.

36:23 Jala on do angka anak ni si Sobal: Alpan, Manahat, Ebal, Sepo dohot si Onam.

36:24 Ia angka anak ni si Zibeon, on do: Aia dohot Ana. I ma si Ana, na jumpangan angka mual aek rangat di halongonan, di na pinarmahanna i angka halode ni si Zibeon, amana i.

36:25 Jala on do angka anak ni si Ana: Si Dison dohot si Aholibama, boru ni si Ana.

36:26 Jala on do angka anak ni si Dison: Hemdan, Esban, Itran dohot Heran.

36:27 Ia angka anak ni si Ezer on do: Bilhan, Sapan dohot Akan.

36:28 Ia angka anak ni si Disan, on do: Us dohot Aran.

36:29 I ma angka induk ni halak Hori: Induk Lotan, induk Sobal, induk Zibeon, induk Ana.

36:30 Induk Dison, induk Ezer, induk Disan. I ma angka induk ni halak Hori, mangihuthon hainduhonnasida be di tano Seir.

36:31 Jala on do angka raja, na mangarajai di tano Edom, tagan so adong dope raja na gumomgom halak Israel:

36:32 Si Bela, anak ni si Beor gumomgom Edom, ia goar ni hutana Dinhaba.

36:33 Jadi dung mate si Bela, bangkit raja singkatna si Jobab, anak ni si Zerah sian Bozra.

36:34 Jadi dung mate si Jobab, bangkit raja singkatna si Husam sian tano ni halak Teman i.

36:35 Jadi dung mate si Husam soluk ma mangarajai si Hadad, anak ni Bedad, na manaluhon halak Midian di ladang Midian ni halak Moab, ia goar ni hutana Apit.

36:36 Jadi dung mate si Hadad, soluk ma raja singkatna si Samla sian huta Masreka.

36:37 Jadi dung mate si Samla, soluk ma raja singkatna si Saul sian Rehobot, na martopihon batang aek i.

36:38 Jadi dung mate si Saul, soluk ma raja singkatna si Baal-Hanan, anak ni si Akbor.

36:39 Jadi dung mate si Baal-Hanan, anak ni si Akbor i, soluk ma raja singkatna si Hadad, ia goar ni hutana Pahu, ia goar ni jolmana Mehetabel, boru ni si Matret, tubu ni si Mezahap.

36:40 Jala on do goar ni angka induk sian si Esau mangihuthon sundutnasida dohot inganannasida dohot goarnasida: induk Timna, induk Alpa, induk Jete.

36:41 Induk Aholibama, induk Ela, induk Pinon.

36:42 Induk Kenas, induk Teman, induk Mibzar.

36:43 Induk Magdiel, induk Iram. I ma angka induk ni halak Edom mangihuthon inganannasida di tano ginomgomnasida i. I ma si Esau ompu ni halak Edom.

1 Musa ᯔᯮᯘ 37

37:1 Alai anggo si Jakkob maringan di tano, paisolatan ni amana na jolo, di tano Kanaan i.

37:2 On do angka jamita ni pinompar ni si Jakkob: Marumur sampulu pitu taon si Josep, asa paihutihut pinahan ibana rap dohot angka hahana i, sai dongan ni angka anak ni si Bilha dohot si Zilpa, angka jolma ni amana i dolidoli i, sai dipatolhas si Josep do baritanasida angka na roa tu amanasida i.

37:3 Alai holongan do roha ni si Israel di si Josep, asa di angka anakna sasudena, ai dung pe matua ibana, asa ditubuhon, jala dibahen di ibana sada baju sampuborna na ganjang.

37:4 Jadi dung diida angka hahana i, holongan do hape roha ni amanasida mida ibana, asa mida sude angka hahana i, jadi sogo rohanasida mida ibana, ndang apala basar be pangkulingnasida tu ibana.

37:5 Angkup ni marnipi ma si Josep, jala dipaboa nipina i tu angka hahana i; jadi lam ganda sogo ni rohanasida i mida ibana.

37:6 Ai didok si Josep do mandok nasida; ua tangihon hamu jolo nipingkon:

37:7 Huipi mangarahuti tibalan hita di tonga ni hauma, jadi hehe ma tibalanku, laos jongjong, jomba be do angka tibalanmuna humaliang marsomba tu tibalanku.

37:8 Jadi ninna angka hahana i mandok ibana: Tung ho ma bangkit rajanami di roham, mangarajai hami? Jadi lam tamba muse sogo ni rohanasida i mida ibana, ala ni nipina dohot ala ni hatana i.

37:9 Dung i diipi muse sada nipi na asing, ipe dipaboa do tu angka hahana i, ninna ma: Ida ma, huipi dope sada nipinari; ai ida ma, mata ni ari dohot bulan dohot bintang sampulu sada marsomba tu ahu.

37:10 Alai dung dipaboa nipina tu amana dohot tu angka hahana i, hona hata ma ibana dibahen amana, ninna ma mandok ibana: Nipi aha ma nipimi? Ingkon ro ahu dohot inam dohot angka haham, manungkap tu tano marsomba tu ho, di roham?

37:11 Jadi hosom ma roha ni angka hahana i mida ibana; alai anggo amana i sai dipeop rohana do hata i.

37:12 Dung i laho ma angka hahana i marmahan birubiru ni amanasida i di lambung Sikem.

37:13 Jadi ninna si Israel ma tu si Josep: Nda di lambung ni Sikem do angka hahami marmahan? Ro ma ho, asa husuru ho manopot nasida. Jadi ninna si Josep ma: Dison do ahu.

37:14 Dung i didok si Jakkob ma mandok ibana: Antong laho ma ho maningkir angka hahami manang na sonang nasida, sonang dohot angka pinahan i, dung i mulak ho mamboan barita i tu ahu. Jadi disuru si Jakkob ma ibana sian rura Hebron, asa ditopot tu Sikem.

37:15 Jadi jumpang na sahalak ma ibana, di na lilu ibana di ladang, gabe disungkun baoa i ibana, ninna ma: Aha do na niluluanmu?

37:16 Angka dahahang i do na hulului, ninna; ua paboa di ahu, manang didia nasida marmahan!

37:17 Jadi ninna baoa i ma: Nunga munsat nasida sian on, ai hubege hatanasida: Beta ma hita laho tu Dotan. Jadi diihuthon si Josep ma angka hahana i, gabe jumpangsa nasida di Dotan.

37:18 Jadi dung ditatap nasida ibana, tagan so sahat dope ibana tu nasida, nunga martuptup hian nasida, mambunu ibana.

37:19 Asa masipandohan ma nasida: Ida hamu ma, nunga ro indi an, pangguruan ni angka nipi.

37:20 On pe, beta ma hita, asa itabunu ibana, dung i itadabu ibana tu godung sada, tadok pe, binatang manoro ibana, asa taida lapatan ni angka nipina i.

37:21 Alai dung dibege si Ruben hata i, dipalua ma ibana sian tangannasida, ninna ma: Unang ma tabunu hosana.

37:22 Angkup ni ninna si Ruben mandok nasida: Unang durushon hamu mudar, dabu hamu ibana tagonan tu godung, na di halongonan on, unang mangonai tangan hamu tu ibana. Alai naeng paluaonna ibana sian tangannasida, asa dipaulak ibana tu amana.

37:23 Jadi dung tolhas si Josep tu lambung ni angka hahana i, diosari nasida ma bajuna, baju sampuborna na ganjang i, na pinangkena i.

37:24 Dung i ditangkup nasida ibana, jala didabu ibana tu godung, alai rumar godung i ndang marisi aek.

37:25 Dung i hundul ma anggo nasida mangan sagusagu. Dung i manatapnatap ma nasida, gabe diida ma marudurudur halak Ismael ro sian Gilead rap dohot untonasida, angka na mangusung pamurpuri, miak na hushus dohot haminjon, angka na laho tuat tu tano Misir palangkahonsa.

37:26 Jadi ninna si Juda ma tu angka hahaanggina i: Aha ma labanta, molo itabunu angginta i, jala itaporso mudarna i?

37:27 Beta, itagadis ma ibana tu halak Ismael an, asa unang mangonai tangan hita tu ibana, ai angginta jala sibukta ibana, jadi ditangihon angka hahaanggina ibana.

37:28 Dung i di na mamolus angka partigatiga, halak Midian i, dienet nasida ma si Josep sian godung i tu ginjang, jala digadis si Josep arga duapulu rupia tu halak Ismael, angka na mamboan si Josep tu tano Misir.

37:29 Dung i mulak ma si Ruben tu godung i, hape ndang be di bagasan godung i didapot si Josep, jadi disansani ma angka ulosna.

37:30 Dung i mulak ma ibana tu angka anggina i, ninna ma: Ndang be disi dakdanak i, tu dia na ma ahu?

37:31 Dung i dibuat nasida ma baju ni si Josep i, diseat nasida ma sada hambing tunggal, jala diguluhon bajubaju i tu mudar i.

37:32 Dung i ditongoshon ma baju sampuborna na ganjang i, asa diboan tu amanasida, angka ninna ma manonahon: Na jumpang hami do on, ua tanda, manang baju ni anakmu do i, manang ndang.

37:33 Alai ditanda ibana ma i, gabe didok ma: Baju ni anakku do i! Nunga dipolgak binatang ibana, nunga tutu disoro si Josep i.

37:34 Dung i disansani si Jakkob ma angka ulosna i, jala dibahen ulos hori tu gontingna, sai tumatangis ibana sipatsipat ni ari marningot anakna i.

37:35 Dung i hehe be ma sude angka anakna dohot boruna, mangapul ibana nian; alai ndang olo ibana apulon nasida, ninna ma: Na laho na ma ahu manurun tumopot anakki tu Sheol (parbeguan) ala ni arsakkon; jadi sai ditatangisi amana i ibana.

37:36 Alai digadis halak Midian i do ibana tu tano Misir, tu si Potipar, naposo ni si Firaun, sintua ni angka hupas.

1 Musa ᯔᯮᯘ 38

38:1 Tuat ma uju i si Juda tumadingkon angka hahaanggina i, dipagohon ma undungundungna i jonok tu lambung ni sada halak Adullam margoar si Hira.

38:2 Jadi diida si Juda ma disi sada boru ni halak Kanaan, si Sua goarna, dibuat ma i jala ditopot.

38:3 Jadi marhangoluan ma ibana, jala ditubuhon anak sada, dibahen ma goarna si Er.

38:4 Dung i gabegabean muse ibana, jala ditubuhon anak sada, dibahen ma goarna si Onan.

38:5 Dung i gabegabean muse ibana jala ditubuhon anak sada, dibahen ma goarna si Sela. Alai di huta Aksib do si Juda di hatutubuna i.

38:6 Dung i dibuat si Juda ma boru bahen jolma ni si Er, buhabajuna i, si Tamar do goarna.

38:7 Alai na jahat do si Er, buhabaju ni si Juda i, maradophon Jahowa, jadi dibunu Jahowa ibana.

38:8 Dung i ninna si Juda ma mandok si Onan: Topot ma jolma ni haham, jala pagodang, mambahen rindang di haham.

38:9 Alai dung diboto si Onan, ndada ibana nampuna pinompar, ia ditopot pe jolma ni hahana i, jadi tu tano ma gogo ni dagingna dibolongkon, asa unang marrindang hahana i dibahen.

38:10 Alai sogo do roha ni Jahowa di pambahenna i, jadi dibunu ma dohot ibana.

38:11 Dung i didok si Juda ma tu si Tamar, parumaenna i: Songon i ma hamu mabalu tinggal di bagas ni amanta, paima magodang anakku, si Sela i, ai ninna rohana do, atek tung mate dohot ibana, songon angka hahana i. Jadi laho ma si Tamar, jala diingani bagas ni amana i.

38:12 Dung i di laonlaon ni ari, mate ma boru ni si Sua, jolma ni si Juda. Jadi dung sabam roha ni si Juda, nangkok ma ibana tumopot angka sigusting imbulu ni birubiruna, tu Timna, ibana dohot si Hira alealena sian Adullam.

38:13 Jadi dibaritahon halak ma tu si Tamar, ninna do: Ida ma, na laho do simatuam doli nangkok tu Timna manggusting imbulu ni birubiruna.

38:14 Dung i diosari boruboru i ma angka ulos habaluonna i, disaongsaongkon ma abit tujung i laho hundul tu harbangan ni huta Enaim, na di lambung dalan tu Timna, ai nunga balga diida si Sela, hape ndang dilehon ibana tu si Sela bahen jolmana.

38:15 Jadi dung diida si Juda ibana, diambang ma boruboru sibabijalang ibana, ai disaongsaongi do bohina.

38:16 Dung i didapothon si Juda ma boruboru i tu pinggol ni dalan i, ninna ma: Ua loas ma ahu ro tu ho, ai ndang diboto parumaenna hape nasida. Jadi ninna nasida ma: Aha ma ugasanmu lehononmu tu ahu, asa ro ho tu ahu?

38:17 Jadi ninna ibana ma: Hutongos pe di ho sada hambing tunggal sian pagaran. Antong lehon ma tu on sindorna, paima ditongos ho, ninna nasida.

38:18 Jadi ninna ibana ma: Aha ma sindor lehononku tu ho? Jadi ninna nasida ma: Ba, tintin pijormi dohot horungkorungmi dohot tungkot na di tanganmi. Jadi dilehon ma i tu nasida, dung i ditopot ma nasida, jadi gabegabean ma nasida sian ibana.

38:19 Dung i hehe ma nasida laho muli, dipasae ma abit tujung i, jala dialithon muse angka ulos habaluonna i.

38:20 Dung i ditongoshon si Juda ma hambing tunggal i marhite sian alealena, halak Adullam i, tumobus sindor sian tangan ni boruboru i, hape ndang didapot disi.

38:21 Jadi disungkuni ma isi ni luat i: Atehe hamu, didia do boruboru sibabijalang i, na hundulhundul di Enaim, di pinggol ni dalan i? Alai ninna nasida ma: Ndang adong boruboru sibabijalang, huida hami dison.

38:22 Dung i mulak ma ibana tu si Juda, ninna ma: Ndang jumpang ahu nasida; jala didok angka isi ni luat i huhut: Ndang adong dison boruboru sibabijalang.

38:23 Jadi ninna si Juda ma: Di ibana ma i tusi, asal unang gabe haurahonta; ida ma, hutongos do nian hambing tunggal on, alai ndang jumpang ho angkora i.

38:24 Hape salpu arga tolu bulan, tarbortik ma tu si Juda: Tardege pinggol ni dalan do si Tamar, parumaenmi, nunga pola gabegabean ibana dibahen sibabijalangonna i. Jadi didok si Juda ma: Boan hamu nasida tu on, asa sinoksohan nasida.

38:25 Jadi dung diboan halak nasida, marsuruan ma nasida manopot simatuana doli mandok: Sian baoa, nampuna angka indi on ahu gabegabean, ua tanda hamu, manang ise nampuna tintin pijor on dohot horungkorung on dohot tungkot on!

38:26 Jadi ditanda si Juda ma ugasan i, gabe didok ma: Pintoran do hape nasida, asa ahu; ai ala na so hulehon i nasida tu si Sela, anakki. Alai ndang be diparjolma ibana nasida.

38:27 Jadi dung jumpang hatotoras ni emena, gabe linduat do di bortianna.

38:28 Tole manubuhon nasida, surduk na sada tangan, gabe ditangkup sibaso i, jala dirahuti dohot bonang na rara, ninna ma: On do na parjolo ruar.

38:29 Hape dung ditait tanganna i mulak, ruar ma anggina i; jadi didok sibaso i ma: Boasa ma tung songon i pamuntasmu? Jadi dibahen ma goarna si Peres.

38:30 Dung i ruar ma anggina i, na martali bonang na rara i di tanganna, jadi dibahen ma goarna si Zerah.

1 Musa ᯔᯮᯘ 39

39:1 Alai anggo si Josep tarboan do tuat tu Misir, gabe ro ma si Potipar, wakil ni raja Firaun, sirajai angka naposona halak Misir, manuhor ibana sian halak Ismael, angka na patuathon ibana tusi.

39:2 Sai didongani Jahowa do si Josep i, gabe jolma na martua ibana, sai di bagas ni rajana, halak Misir i ibana.

39:3 Jadi dung diida rajana i na nidonganan ni Jahowa ibana, jala ditumpak Jahowa sude mula ni tanganna i.

39:4 Jadi lomo ma roha ni rajana i mida si Josep, gabe parhaladona ibana; jala dipabangkit ibana gabe siramoti jabuna, jala sude na di ibana i, dipasahat do tu tangan ni si Josep.

39:5 Jadi olat ni na pinabangkitna i ibana bahen siramoti jabuna, ro di sude na di ibana i, dipasupasu Jahowa ma bagas ni halak Misir i ala ni si Josep, manjadi do ditumpak Jahowa sasude na di ibana i, di jabu dohot di balian.

39:6 Tung sude na di ibana i dipasahat do tu tangan ni si Josep, agia aha pe ndang dipabotoboto rohana, nda holan sagusagu na pinanganna i. Alai uli do anggo rupa dohot bohi ni si Josep i.

39:7 Jadi dung salpu angka jamita ondeng solo ma roha ni jolma ni rajana i mida si Josep, didok ma: Angkupi ma ahu modom.

39:8 Alai manjua ma si Josep, didok ma mandok jolma ni rajana i: Ida ma, ndang agia aha dibotoboto rajangku di jabu on, dungkon ni ahu, jala sude na di ibana i, tu tanganku do dipasahat.

39:9 Ndang adong manang ise na umbalga di jabu on sian ahu, jala ndang adong na so dipadapot tu ahu, dungkon ni ho, ala jolmana ho; tung olo ma ahu mambahen jea na sai godang, asa mardosa ahu maradophon Debata?

39:10 Alai sai songon i do hatana tu si Josep ariari, na so ditangihon ibana do modom di lambungna manang rap dohot nasida.

39:11 Hape laho ma si Josep di na sadari tu jabu mangula ulaonna, tongon ndang adong manang ise isi ni jabu i disi.

39:12 Jadi disoro boruboru i ma ulosna i, ninna ma: Angkupi ma ahu modom! Alai ditadingkon si Josep ma ulosna di tangannasida, laos maporus ibana tu balian.

39:13 Jadi dung diida nasida naung tinadingkonna ulosna di tangannasida laos maporus ibana tu balian.

39:14 Gabe dijou nasida ma angka isi ni bagasna i, ninna ma mandok angka nasida: Ida hamu ma, diboan ibana do halak Heber i tu hita, mambahen haurahon di hita. Ro do ibana tu ahu, naeng angkupanna ahu modom, gabe hupangiar soarangku joujou.

39:15 Jadi dung dibege ibana, hupangiar soarangku joujou, gabe ditadingkon ma ulosna i di lambungki, laho maporus ibana tu balian.

39:16 Dung i dipasombu nasida ma ulos ni si Josep di lambungnasida, paima ro rajana i muli.

39:17 Dung i dihatahon ma hatanasida ondeng tu ibana, ninna ma: Ro do nangkin tu ahu hatoban halak Heber i, na binoanmi tu hami naeng mambahen haurahon di ahu.

39:18 Alai dung hupangiar soarangki joujou, gabe ditadingkon ma ulosna i di lambungki, jala maporus ibana tu balian.

39:19 Jadi dung dibege raja ni si Josep hata, ni jolmana i, angka na pinaboana i tu ibana mandok: Songon na hudok i dibahen naposom tu ahu, gabe tarrimas situtu ma ibana.

39:20 Jadi ditangkup raja ni si Josep i ma ibana, dipasahat ma ibana tu bagas hurungan ni angka na hinurungkon ni raja i, asa laos di hurungan i ibana.

39:21 Alai didongani Jahowa do si Josep i, jala asi rohana mida ibana, dipadenggan dohot roha ni siramoti hurungan i mida ibana.

39:22 Dipasahat siramoti hurungan i ma tu tangan ni si Josep sasude angka na tarhurung di bagas hurungan i, ro di sude sibahenon disi, ingkon si Josep paturehon.

39:23 Ndang agia aha be diradoti siramoti hurungan i, naung pinasahatna i tu tangan ni si Josep, ala didongani Jahowa ibana, jala ditumpak manjadi na niulana i.

1 Musa ᯔᯮᯘ 40

40:1 Jadi dung salpu angka jamita ondeng, mardosa ma sitahu anggur ni raja ni Misir i dohot silompa sagusagu dompak tuannasida, raja ni Misir i.

40:2 Jadi muruk situtu raja Firaun mida naposona na dua i, mida sintua ni angka sitahu anggur dohot mida sintua ni angka silompa sagusagu.

40:3 Gabe dipasahat nasida tu hurungan, tu jabu ni sintua ni angka hupas pangaramoti, tu hurungan panahatan ni si Josep.

40:4 Dung i dipasahat sintua ni angka hupas i ma nasida tu si Josep, asa diramoti nasida.

40:5 Jadi dung na nia leleng nasida di hurungan i, marnipi ma nasida duansa di na saborngin, pulik be do nipinasida i; marlapatan be do nipinasida i, nipi ni sitahu anggur dohot silompa sagusagu ni raja ni Misir i, angka na di hurungan i.

40:6 Dung i manogotna i ditopot si Josep ma nasida, gabe diida ma nasida margondok ni roha.

40:7 Jadi disungkun si Josep ma naposo ni raja Firaun i, angka na rap dohot ibana di hurungan di jabu ni indukna i, ninna ma: Boasa songon na surbit bohimuna idaon sadari on?

40:8 Jadi ninna nasida ma tu ibana: Marnipi do hami, hape ndang adong sijujursa. Jadi ninna si Josep ma tu nasida: Nda mandapot di Debata do angka panjujuron? Ua pajojor hamu ma tu ahu.

40:9 Dung i dipajojor sintua ni angka sitahu anggur nipina i tu si Josep, ninna mandok ibana: Huida di bagasan nipingku, hau anggur sangkambona di jolongku.

40:10 Tolu do ranting ni na sangkambona i, angka na martunas i, jala mangerbangi bungana, matoras dohot parbuena.

40:11 Jala di tanganku do panginuman ni raja Firaun i, jala hupambuat angka parbue i, jala huporoi tu panginuman ni raja Firaun, dung i hulehon panginuman i tu tangan ni raja i.

40:12 Jadi ninna si Josep ma tu ibana: On do lapatanna: Na tolu ranting i, tolu ari do i.

40:13 Di bagasan tolu ari on dope, pabangkiton ni raja Firaun ho, jala pasuongonna ho tu tohonanmi hian, jala lehononmu muse panginuman i tu tangan ni raja i, songon na somal na jolo uju sitahu anggurna ho.

40:14 Alai ia dung sonang ho sai ingot ahu, asi roham di ahu, taringothon ahu tu raja Firaun, asa diparuar ahu sian bagas on.

40:15 Ai na tarpangus do ahu sian tano ni halak Heber, jala dison pe, ndang adong hubahen agia aha, alana umbahen dabuhononna ahu tu hurungan on.

40:16 Jadi dung diida sintua ni angka silompa sagusagu, denggan do panjujurna i, gabe didok ma tu si Josep: Ahu pe, huhunti do di bagasan nipingku tolu hirang martinditindi marisi sagusagu di atas ulungku.

40:17 Ianggo hirang parginjang i marisi ragamragam ni sipanganon ni raja Firaun, pinajadijadi ni pangalompa, hape ro angka pidong manurbingi sian hirang na di atas ulungki.

40:18 Jadi ninna si Josep ma mangalusi: On do lapatanna: Na tolu hirang i, tolu ari do i.

40:19 Di bagasan tolu ari on dope, pisikkonon ni raja Firaun ma ulum sian ho, jala gantungonna badanmu tu hau, gabe panganon ni angka pidong sibukmu sian ho.

40:20 Tole patoluarihon, jumpang ma ari hatutubu ni raja Firaun, gabe dibahen ma sipanganon di saluhut naposona, dipanangkok ma ulu ni sintua ni angka sitahu anggur dohot ulu ni sintua ni angka silompa sagusagu tu tongatonga ni angka naposona i.

40:21 Jadi dipasuang ma sintua ni angka sitahu anggur tu ulaonna hian, asa dilehon muse panginuman i tu tangan ni raja Firaun.

40:22 Alai anggo sintua ni angka silompa sagusagu, digantung do, songon na jinujur ni si Josep tu nasida.

40:23 Alai ndang diingot sintua ni angka sitahu anggur i be si Josep, tung dihalupahon do ibana.

1 Musa ᯔᯮᯘ 41

41:1 Jadi dung salpu boho dua taon, marnipi ma raja Firaun jongjong ibana di pasir ni batang aek.

41:2 Dung i diida ma nangkok sian batang aek i pitu lombu, angka na uli rupa jala na mokmok, angka na manjampali di arung.

41:3 Dung i soluk ma nangkok pitu lombu na asing sian batang aek i, angka na roa rupa, jala na marniang, didapothon ma tu lambung ni lombu, angka na di pasir ni batang aek i.

41:4 Dung i dipolgak lombu angka na roa rupa, jala na marniang i ma na pitu lombu angka na uli rupa, jala na mokmok i. Dung i tarsunggul ma raja Firaun i.

41:5 Dung i tarnono muse matana, gabe marnipi paduahalihon, diida ma tubu pitu kambiur sangkambona, angka na porngis jala na denggan.

41:6 Dung i soluk ma diida tubu pitu kambiur angka na lambang, jala antinganoon dibahen alogo sian habinsaran.

41:7 Jadi dipolgak kambiur angka na lambang i ma na pitu kambiur, angka na balga, jala na porngis i. Jadi tarsunggul ma raja Firaun i, jala diida ma, nipi do i hape.

41:8 Manogotna i holso situtu ma rohana i. Jadi disuru ma mangalapi saluhut pangarunding dohot paralamat angka na di tano Misir i; dung i diaturhon raja Firaun ma nipina i tu nasida: Alai ndang adong sian nasida na malo manjujursa di raja Firaun i.

41:9 Dung i mangkuling ma sintua ni angka sitahu anggur, ninna ma mandok raja Firaun i: Marningot ma ahu sadari on di dosangku.

41:10 Uju na tarrimas i raja Firaun mida hami naposona, gabe dipasahat ahu rap dohot sintua ni angka silompa sagusagu tu hurungan, na di jabu ni sintua angka hupas.

41:11 Jadi marnipi ma hami di na saborngin, ahu dohot ibana, pulik be do lapatan ni nipinami.

41:12 Jadi adong ma disi dongannami sada dolidoli, marga Heber, naposo ni sintua ni angka hupas i, tu ibana ma huaturhon hami, gabe dijujur ma nipinami be, marguru tu nipinami be lapatanna.

41:13 Jadi ia songon i panjujurna tu hami, laos songon i do songgop: Ia ahu mulak tu tohonanku hian, targantung do anggo donganku.

41:14 Dung i disuru raja Firaun ma mangalapi si Josep, jadi hatop ma dipalua nasida ibana sian hurungan i, dinabung ma misena, jala disingkati angka ulosna, gabe ditopot ma raja Firaun i.

41:15 Dung i ninna raja Firaun ma mandok si Josep: Adong do sada nipingku, hape ndang adong sijujursa. Alai hubege baritam, didok halak: Ia adong dibege ho nipi, malo do ho manjujursa.

41:16 Dung i ninna si Josep ma mangalusi raja Firaun: Ndada ahu nian, Debata do paboahon hasonangan tu raja Firaun i!

41:17 Dung i ninna raja Firaun ma mandok si Josep: Ida ma, huipi do, ahu jongjong di pasir ni batang aek i.

41:18 Jadi huida ma rungkar sian batang aek i pitu lombu, angka na mokmok, jala na uli rupa, angka na manggagat tu arung.

41:19 Dung i soluk ma rungkar huida pitu lombu na asing, angka na marniang jala na roa rupa situtu, ndang adong tudosan ni roana i huida di sandok tano Misir.

41:20 Dung i dipolgak na pitu lombu angka na marniang jala na roa i ma na pitu lombu parjolo, angka na mokmok i.

41:21 Sahat pe angka i tu butuhana i dipolgak, laos so tanda do naung ro di butuhana i, laos roa do rupanasida, songon na di mulana i. Jadi tarsunggul ma ahu.

41:22 Dung i huida muse di bagasan nipingku, tubu pitu kambiur sangkambona, angka na porngis jala na denggan.

41:23 Dung i soluk ma tubu huida pitu kambiur na asing angka na lambang, jala na rohor dibahen alogo sian purba.

41:24 Jadi dipolgak na pitu kambiur, angka na lambang i ma na pitu kambiur angka na denggan i. Nunga nian hupaboa luhutna tu angka pangarunding, alai ndang adong nanggo sada na malo manjujur di ahu.

41:25 Dung i ninna si Josep ma tu raja Firaun: Sada do pandok ni na dua nipi ni raja Firaun; dipaboa Debata do tu raja Firaun, na naeng pamasaonna.

41:26 Na pitu lombu angka na denggan i, pitu taon do i; na pitu kambiur, angka na denggan i, laos pitu taon do i; sada do tahe lapatan ni nipi i.

41:27 Na pitu lombu angka na marniang, jala na roa i, angka na rungkar i ihut tu bongka ondeng, pitu taon do i; na pitu kambiur, angka na lambang jala na rohor binahen ni alogo sian purba, boaboa ni pitu taon haleon do i.

41:28 I ma hata na hupaboa i tu raja Firaun: Dipalumba Debata do tu raja Firaun, na naeng pamasaonna.

41:29 Ida ma, masa ma pitu taon hadumaon bolon di sandok tano Misir.

41:30 Ihut ma tusi muse masa pitu taon haleon, gabe lupa ma sude hadumaon i di tano Misir; jadi pansing ma tano i bahenon ni haleon i.

41:31 Ndang be botoon ni halak hadumaon ni tano i bahenon ni haleon na soluk i, ai tung na pitor situtu do i.

41:32 Angkup ni, umbahen na pola dua hali marnipi raja Firaun, paboa gomos ni boaboa na sian Debata, jala tibuna pamasaon ni Debata.

41:33 On pe, didiori raja Firaun ma sada halak na pantas jala na pistar marroha, sipabangkitonna patotahon tano Misir i.

41:34 Didokkon raja i ma ibana pabangkithon angka sintua di tano i mangidohon saparlima sian tano Misir di na pitu taon hadumaon i.

41:35 Asa dipapungu nasida sude sipanganon saleleng angka taon hadumaon, angka na ro on, asa dipagukguk hian eme marpandapotan tu raja Firaun, pajopon ni angka huta bahen sipanganon sogot.

41:36 Asa adong hian bahen bohal ni tano i tumagam na pitu taon haleon i, angka na songgop sogot tu tano Misir, asa unang mate so mangan, isi ni tano i.

41:37 Denggan ma hata i di roha ni raja Firaun dohot di roha ni angka naposona sudena.

41:38 Jadi ninna raja Firaun ma mandok angka naposona i: Tung tagamon ma jumpang hita jolma songon ibana, na niinganan ni Tondi ni Debata?

41:39 Dung i didok raja Firaun ma tu si Josep: Dung dipabotohon Debata tu ho sudena i, ndang adong jolma na umpantas marroha jala na umpistar sian ho.

41:40 Sahat tu ho ma bagashu, guru dokmu ma sandok bangsongki; holan habangsa harajaon i ma husurunganku sian ho.

41:41 Angkup ni ninna raja Firaun mandok si Josep: Ida ma, nunga hupasahat tu ho sandok tano Misir on.

41:42 Dung i diumpat raja Firaun ma tintinna sian tanganna, jala disolukkon tu tangan ni si Josep, dilehon dohot surta na bontar bahen abitna dohot sampesampena, dibahen dohot horungkorung sere tu rungkungna.

41:43 Dung i dipahundul ibana tu huretana paidua huhut martingting i di jolona: Marsomba ma hamu! Asa sahat tu ibana ma sandok tano Misir.

41:44 Dung i ninna raja Firaun ma mandok si Josep: Ahu do nian raja Firaun, alai ndang na jadi hindaton ni manang ise tanganna manang patna di sandok tano Misir, nda lomo roham.

41:45 Jadi dibahen raja Firaun ma goar ni si Josep: Zopenat Paneah (sipangolu portibi on), jala dilehon tu ibana si Asnat, boru ni si Potipera, malim di huta On, bahen jolmana. Dung i borhat ma si Josep mangaliati tano Misir i.

41:46 Tolupulu taon do umur ni si Josep di na jongjong i ibana di jolo ni si Firaun, raja ni Misir i. Asa borhat sian jolo ni raja Firaun ma si Josep i, laho mangaliati sandok tano Misir.

41:47 Jadi mansai gukguk parbue ni tano i di na pitu taon hadumaon i.

41:48 Dung i dipapungu si Josep ma nasa goargoar ni sipanganon ni na pitu taon i, angka na di tano Misir i, jala disimpan sipanganon i tu angka huta, gogo ni hauma na humaliang ganup huta, dibahen tu bagasan.

41:49 Jadi sobokkon rihit na di pasir ni laut hagogodang ni eme na pinagukguk ni si Josep i, pola dipasohot muse mamilangi, ai ndang be habilangansa.

41:50 Dung i tubu ma dua anak di si Josep, tagan so ro dope taon haleon i, angka na tinubuhon ni si Asnat, boru ni si Potipera, malim di huta On.

41:51 Dibahen si Josep ma goar ni buhabajuna i: Si Manasse, ai lupa do ahu, dibahen Debata di sude pardangolanki, ro di bagas ni damang i sudena, ninna.

41:52 Dibahen goar ni na paduahon i: Si Epraim: Ai gabe do ahu ditumpak Debata di tano pardangolanki, ninna.

41:53 Jadi dung salpu na pitu taon hadumaon i di tano Misir.

41:54 Mamungka ma ro na pitu taon haleon, songon na nidok ni si Josep hian, gabe haleonon ma saluhut luat ni halak; alai anggo di sandok tano Misir, adong do sipanganon.

41:55 Dung i haleonon ma muse dohot sandok tano Misir i, jadi mangalualu tu raja Firaun ma na torop i mangido sipanganon. Alai ninna si Firaun ma mandok sude isi ni Misir: Si Josep ma topot hamu, na nidokna i ma bahen hamu.

41:56 Jadi dung haleonon saluhut luat ni halak, diungkap si Josep ma sude sopo parpeopan eme, digadisi ma i tu halak Misir, ai tung na potir situtu do haleon i di tano Misir.

41:57 Dung i angka ro ma isi ni sude luat tu tano Misir, manuhori sipanganon sian si Josep; ai tung na potir situtu do haleon i di sandok tano on.

1 Musa ᯔᯮᯘ 42

42:1 Alai dung diida si Jakkob, adong eme di tano Misir, ninna ma mandok angka anakna i: Boasa sai masiberengan hamu?

42:2 Dung i didok ma: Adong hubege eme di tano Misir, tuat ma hamu tusi margalas di hita sian i, asa mangolu hita, gabe unang mate.

42:3 Jadi tuat ma angka haha ni si Josep na sampulu halak i laho margalas eme sian tano Misir.

42:4 Alai anggo si Benjamin, anggi ni si Josep i, ndang dipaborhat si Jakkob rap dohot angka hahana i, ai ninna do: Atek tung beha adong marana.

42:5 Dung i sahat ma angka anak ni si Israel margalas rap dohot angka pargalas na asing, ai di tano Kanaan pe nunga masa haleon.

42:6 Alai si Josep do pangarajai di luat i, ibana do sigadisi eme tu sude isi ni tano i. Asa dung sahat angka haha ni si Josep i, manungkap ma nasida tu tano, marsomba tu ibana.

42:7 Jadi dung diida si Josep angka hahana i, gabe ditanda ma nasida, alai mangindung ma ibana maradophon nasida, jala didok hata na horas tu nasida, ninna ma mandok nasida: Sian dia hamu ro? Jadi didok nasida ma: Sian tano Kanaan do, naeng manuhor sipanganon.

42:8 Asa ditanda si Josep do angka hahana i, alai anggo ibana ndang ditanda nasida.

42:9 Jadi diingot si Josep ma nipi, angka na niipina taringot tu nasida, gabe didok ma mandok nasida: Pangkahap do hamu naeng mangarigop bungbung ni tano on; umbahen na ro hamu.

42:10 Alai ninna nasida ma mandok ibana: Ndangana ale rajanami! Na ro manuhor sipanganon do angka naposomon.

42:11 Anak ni sahalak do hami sudena, na burju do hami, ndang dung pangkahap angka naposomon.

42:12 Alai ninna si Josep ma mandok nasida: Ndangana, naeng mangarigop bungbung ni tano on do hamu umbahen na ro.

42:13 Jadi ninna nasida ma: Sampulu dua do nian hami angka naposomon, angka na martinodohon, anak ni sada halak di tano Kanaan, tading di lambung ni amanta ianggo siampudan i sadari on, alai anggo na sada ndang disi be.

42:14 Dung i ninna si Josep ma mandok nasida: I ma na hudok i tu hamu: Pangkahap do hamu!

42:15 On ma pangujianku tu hamu: Songon sintongna mangolu raja Firaun, molo tagamon meret hamu sian on, nda jolo ro anggimuna siampudan i tuson.

42:16 Suru hamu ma sahalak sian hamu, mangalap anggimuna i, tu hurungan ma anggo hamu, asa huuji hatamuna i, manang na adong haburjuon di hamu; alai molo soada i, songon sintongna mangolu raja Firaun, pangkahap do hamu.

42:17 Jadi dipatop ma nasida tu sada hurungan tolu ari lelengna.

42:18 Alai jumpang patoluarihon, ninna si Josep ma mandok nasida: Boti ma bahen hamu, asa mangolu hamu, ai huhabiari do Debata.

42:19 Molo halak na burju hamu, sahalak ma sian hamu tading tarhurung di hurunganmuna on, laho ma ianggo hamu, manaruhon eme i, sipanganon ni hamu na sapanganan.

42:20 Dung i boan hamu ma anggimuna siampudan i tu ahu, asa hinahaporseaan hatamuna i, jala unang mate hamu. Jadi dibahen nasida ma songon i.

42:21 Alai masisolsolan ma nasida: Tongon do, pardosa do hita tu angginta i, ai itaida do ponjot ni rohana i, uju diparajarajai hita, alai ndada itatangihon; ala ni do umbahen na ro tu hita hagogotan on.

42:22 Jadi ninna si Ruben ma mangalusi nasida: Nda hudok hian do tu hamu: Unang mardosa hamu tu dakdanak i, alai ndang ditangihon hamu hatangki; asa sapata ni mudarna i huhut manginona tu hita.

42:23 Alai ndang diboto nasida tung diantusi si Josep hata i, ai marsipadas hata do si Josep mangangkupi nasida.

42:24 Dung i mangkatai ditundali si Josep ma nasida, laos tangis diulahi muse mandompakkon nasida, mangkulingkon nasida, ditangkup ma sian nasida si Simeon marningot ibana di adopannasida.

42:25 Dung i didokkon si Josep ma ision panuhuhannasida i dohot eme, jala paulahon peraknasida tu panuhuhanna be, jala lehonon tu nasida bohal di dalan, jadi dibahen ma songon i tu nasida.

42:26 Dung i dipampeakkon nasida ma emenasida i tu halodenasida i, jadi borhat ma nasida sian i.

42:27 Hape diungkap na sahalak ma panuhuhanna di parbornginan mangalehon gagaton tu halodena, gabe diida ma perakna i, talpe di siboanonna i.

42:28 Jadi didok ma mandok angka donganna i: Mulak do hepengku, ida hamu ma huhut di siboanonkon, gabe marseto ma rohanasida jala mabiar situtu, angka didok be ma tu donganna: Aha do on ulaning, na binahen ni Debata tu hita.

42:29 Dung i tolhas ma nasida tu tano Kanaan, tu si Jakkob, amanasida i, dialualuhon ma tu ibana luhutna na masa i tu nasida, angka ninna ma:

42:30 Poran di pangkuling ni raja ni tano i tu hami, songon pangkahap mangkahapi tano i hami, di rohana.

42:31 Alai na burju do hami, i do hudok hami tu ibana, ndang dung pangkahap hami.

42:32 Sampulu dua do hami, anak ni amanta, angka na martinodohon; ndang disi be ianggo na sada, di lambung ni amanta dope ianggo siampudan i, di tano Kanaan.

42:33 Jadi didok raja ni tano i ma mandok hami: Botima i, asa huboto manang na burju hamu: Tading ma sada sian hamu di lambungkon, boan hamu ma panganon ni na di huta, mardalan ma hamu!

42:34 Dung i boan hamu ma anggimuna siampudan i tu ahu, asa huboto, ndada pangkahap hamu, na burju do hamu hape; hulehon pe donganmuna on tu hamu, datdati hamu margalasi tu tano on.

42:35 Tole nasida mangarungkari panuhuhannasida i, gabe diida be ma puro parhepenganna di panuhuhanna be. Jadi dung diida nasida dohot amanasida i angka parhepengannasida i, mabiar ma nasida.

42:36 Dung i ninna si Jakkob, amanasida i, mandok nasida: Na punu ma ahu bahenonmuna! Si Josep ndang be disi, si Simeon pe, ndang be disi, dohot do si Benjamin naeng buatonmuna! Luhutna i marpungu tu ahu.

42:37 Alai ninna si Ruben ma mandok amana i: Anakku na dua i ma bunu, molo tung so mulak ibana huboan tu ho; tu tanganku ma ibana pasahat, sai na mulak ibana tu ho boanonku.

42:38 Alai ninna ibana ma: Ndang jadi tuat anakku rap dohot hamu, ai nunga mate hahana i, sasada ibana na ma tading; atek tung beha adong parmaraanna di dalan sibolusonmuna i, jadi tu toru ni situmandok na ma ahu na ubanon on taruhononmuna, bahenon ni dokdok ni roha.

42:39 Alai lam marpotir ma haleon di tano i.

1 Musa ᯔᯮᯘ 43

43:1 Jadi dung suda dipangan nasida eme, na binoannasida i sian tano Misir, mangkuling ma amanasida mandok tu nasida: Sai ulahi hamu ma margalas di hita otik sipanganon.

43:2 Jadi ninna si Juda ma mangalusi ibana: Mansai gomos situtu do hata ni raja i tu hami: Na so tupa idaonmuna be bohingkon, nda udur hamu dohot anggimuna i, ninna.

43:3 Asa ia dipaborhat ho angginami rap dohot hami, tuat pe hami margalas sipanganon di ho.

43:4 Alai molo so dipaborhat ho ibana, ndang tuat hami, ai nunga pola didok raja i mandok hami: Na so tupa idaonmuna be bohingkon, nda udur anggimuna i dohot hamu.

43:5 Dung i ninna si Israel ma: Boasa dibahen hamu na roa tu ahu, pola paboaonmuna tu raja i, adong dope anggimuna i?

43:6 Jadi didok nasida ma: Sai disungkunsungkuni raja i do taringot tu hami dohot taringot tu pomparannami, ninna do: Mangolu dope amamuna? Adong dope anggimuna i? Jadi hupajojor hami tu ibana, marguru tu panungkunna i; sian dia do botoonnami dohononna boanonnami angginami tuat?

43:7 Dung i ninna si Juda ma mandok si Israel amana i: Loas ma dakdanak i borhat rap dohot ahu, asa borhat hami mardalan, jala mangolu hita, unang mate, nang hami, nang ho, nang angka anakkonnami.

43:8 Ahu ma mangkangkungi ibana, sian tanganku pangidoonmu ibana; marsapata tu ahu ma ho saleleng ahu mangolu, molo tung so mulak ibana huboan tu ho, jala hupajongjong tu jolom.

43:9 Ai unang togang hami, nunga pola mulak hami dua hali tagamon.

43:10 Dung i ninna si Israel, amanasida i, mandok nasida: Molo boti, bahen hamu songon on: Buat hamu ma parbue angka na ummarga, tubu ni tano on mambahen tu panuhuhanmuna, bahen silehonlehon tu raja i: Saotik miak na hushus, dohot situak ni loba saotik dohot pamurpuri dohot haminjon dohot barangan dohot tapus.

43:11 Silompit dua ma boan hamu ianggo hepeng i, padohot hepeng na peak talpe di siboanonmuna i: Atek tung beha lilu ibana.

43:12 Boan hamu ma dohot anggimuna i, borhat ma hamu mangulahi manopot raja i.

43:13 Sai asi ma roha ni Debata, pargogo na so hatudosan i di hamu maradophon raja i, asa diloas borhat hahamuna na tading i dohot si Benjamin rap dohot hamu. Alai anggo ahu, songon halak na punu na ma ahu.

43:14 Asa dibuat nasida ma angka silua ondeng dohot hepeng i silompit, angkup ni si Benjamin; dung i borhat ma nasida laho tuat tu tano Misir manopot tu jolo ni si Josep.

43:15 Jadi dung diida si Josep udur do nasida dohot si Benjamin, gabe didokkon ma siramoti bagasna i: Togihon ma halak i tu bagas, jala potongi sipotongon i, jala hobas i, ai ingkon mangan halak on rap dohot ahu di hos ni ari.

43:16 Dung i dipatupa naposo i ma, songon na nidok ni si Josep i, ditogihon ma halak i tu jabu ni si Josep.

43:17 Alai mabiar ma halak i, ala tinogihonna i nasida tu jabu ni si Josep, angka ninna ma: Hata hepeng, na tarihut tu siboanonta na jolo do ulaning, umbahen ditogihon hita tu jabu on, asa manggiling hata tu hita dohot mandobo hita, marhatobanhon hita dohot mambuat halodenta i.

43:18 Dung i dipajonok nasida ma tu baoa siramoti bagas ni si Josep i, angka dipangkulingi nasida ma ibana di baba pintu ni bagas i.

43:19 Angka ninna nasida ma: Santabi ale rajanami, na tuat do hami nenganon margalas sipanganon.

43:20 Hape dung sahat hami tu parbornginan, jala huungkap hami siboanonnami, gabe disi do sintong hepengnami be, talpe di ginjang, jadi mulak do i huboan hami.

43:21 Huboan hami dohot hepeng na asing manuhor sipanganon; ndang huboto hami manang ise na mambahen hepengnami tu siboanonnami.

43:22 Alai ninna baoa i ma: Dame ma di hamu, unang hamu mabiar! Debatamuna dohot Debata ni amamuna mangalehon arta na buni tu siboanonmuna i; sahat tu ahu do hepengmuna i. Dung i diparuar ma si Simeon tu nasida.

43:23 Dung i ditogihon ma nasida tu jabu ni si Josep, dilehon ma dohot aek, asa diburi nasida patnasida i, jala didabu gagaton tu halodenasida i.

43:24 Dung i diparade nasida ma silehonlehon i tumagam haroro ni si Josep di hos ni ari, ai nunga tarbortik tu nasida, mangan sagusagu nasida disi.

43:25 Jadi dung ro si Josep tu bagas, diboan nasida ma tu ibana silehonlehon na di tangannasida i tu jabu, manungkap ma nasida tu tano, marsomba ibana.

43:26 Dung i disungkun si Josep ma manang na sonang do nasida, jala ninna ma: Hipas do amanta, na matua i, na nidokmuna i? Mangolu dope ibana?

43:27 Jadi didok nasida ma: Hipas do naposom, amanta i, mangolu dope ibana. Jadi manungkap ma nasida marsomba ibana.

43:28 Dung i manaili ma si Josep, gabe diida ma si Benjamin, anggina i, donganna saina, didok ma: On do anggimuna siampudan na nidokmuna i tu ahu? Dung i ninna si Josep muse: Asi ma roha ni Debata di ho, ale anaha!

43:29 Dung i humalaput ma si Josep laho, dibahen sihol ni rohana mida anggina i, jadi marhor ma iluna, gabe laho ma ibana tu bilutna, asa tangis disi.

43:30 Dung marsuap ibana, ruar ma ibana muse dipatomos ma rohana, didok ma: Boan hamu ma sagusagu i!

43:31 Dung i diboan nasida ma pulik be di ibana dohot di nasida, dohot di halak Misir, angka na mangan rap dohot ibana. Ai ndang na jadi mangan sagusagu halak Misir rap dohot halak Heber, ai pantang do i di halak Misir.

43:32 Dung i dipatording ma parhundulnasida di adopan ni si Josep, asa tanda sihahaan dohot siampudan, gabe longang be ma nasida.

43:33 Dung i dihindati parhobas i ma angka sipanganon hasurungan sian jolo ni si Josep tu jolonasida. Alai lima hali nasa jambar ni donganna sudena, jambar ni si Benjamin, jadi minum ma nasida, jala bosur rap dohot ibana.

1 Musa ᯔᯮᯘ 44

44:1 Dung i didokkon si Josep ma siramoti bagasna i, ninna ma: Gohi ma panuhuhan ni angka halak on dohot sipanganon, marguru tu na tarusung nasida jala bahen ma hepeng nasida be, talpe tu bibir ni panuhuhanna be.

44:2 Jala bahen ma panginumanki, panginuman perak i, talpe di panuhuhan ni siampudan i rap dohot hepeng tuhor ni eme i. Jadi dibahen ma, songon na nidok ni si Josep.

44:3 Torang ari manogotna i, dipaborhat ma nasida rap dohot halodenasida i.

44:4 Jadi dung ruar nasida sian huta i, ndang sadia holang dope nasida, gabe didok si Josep ma mandok siramoti bagasna i: Borhat ma ho, haru eahi ma ne halak ondeng, jala ia dung dapot ho nasida, dok ma tu nasida: Boasa tung dibahen hamu na jat balos ni na denggan?

44:5 Nda dibuat hamu panginuman dohot partondungan ni tuangku? Na roa do na binahenmuna i.

44:6 Jadi dung dapotsa nasida, gabe dipandok ma tu nasida angka hata ondeng.

44:7 Jadi ninna nasida ma mandok ibana: Boasa ma tung songon i angka pangkulingmi, ale rajanami? Sitongka do ianggo di angka naposomon mangulahon, songon na nidokmu ondeng.

44:8 Ida ma, gari hepeng na jumpang hami, talpe di bibir ni panuhuhannami, huboan hami do mulak tu ho sian tano Kanaan; songon dia ma antong panangkonami di perak manang sere sian bagas ni rajanta i?

44:9 Ia tung jumpang panginuman di manang ise sian angka naposomon, ingkon mate ibana; angkup ni, dohot do hami gabe hatoban ni raja i.

44:10 Alai ninna ibana ma: Antong songon na nidokmuna i ma tutu: Ia tung jumpang di manang ise, i ma gabe hatobanhu, alai lias do ianggo hamu.

44:11 Jadi hapogan ma nasida paijurhon siboanonna be tu tano, asa diungkap be siboanonna.

44:12 Dung i didiori ma, mamungka di sihahaan, jojor sahat ro di sianggian; gabe jumpang ma panginuman i di siboanon ni si Benjamin.

44:13 Jadi diparribak nasida ma ulosnasida i, dipausungkon be ma harungna tu halodena i, asa mulak nasida tu huta.

44:14 Dung i ditopot si Juda dohot angka hahaanggina i tu bagas ni si Josep, ai disi dope ibana, jadi manungkap be ma nasida tu tano di jolona.

44:15 Alai ninna si Josep ma mandok nasida: Apala dia do na binahenmuna on? Nda diboto hamu hian na malo martondung do jolma songon ahu on.

44:16 Jadi didok si Juda ma: Aha ma dohononnami di ho, ale rajanami? Beha ma pandoknami, mamintori dirinami? Nunga jumpang Debata hajahaton ni angka naposomon. Ida ma, hatoban ni raja i na ma hami luhutna, hami ro di sibuat panginuman i.

44:17 Alai ninna si Josep ma: Sitongka do di ahu mangulahon sisongon i; baoa sibuat panginuman i, i ma hatobanku; ianggo hamu, nangkok ma hamu tu amamuna mardamedame.

44:18 Dung i jumonok ma si Juda tu lambungna, didok ma: Sombangku di ho, ala rajanami, loas ma naposomon mandok hata sada tu pinggol ni raja i, sai unang marpiarpiar rimasmu tu naposom, ai doshon raja Firaun i do ho!

44:19 Sungkunsungkun do raja i tu angka naposom, didok do: Adong dope amamuna, manang dongan sabutuha.

44:20 Jadi hudok hami ma tongon tu raja i: Adong dope amanami naung matua, jala sada anak siampudanna, tubuna dung matua, jala nunga mate hahana i, jala sasadasa tinggal na saina, jala haholongan ni amana ibana.

44:21 Dung i nimmu do mandok angka naposom: Boan hamu ma ibana tuat tu ahu, asa dinolnol matangku ibana.

44:22 Jadi hudok hami do nian tu raja i: Ra ndang tartadingkon dakdanak i amana i: Atek tung mate amana maon, tung sura ditadingkon.

44:23 Alai nimmu do mandok angka naposom: Molo so tuat anggimuna siampudan i, rap dohot hamu, ndang be jadi idaonmuna bohingkon.

44:24 Jadi nangkok ma hami tu naposom, damang i, gabe hupaboa hami ma tu ibana angka hata ni raja i.

44:25 Dung i ninna damang ma: Ulahi hamu ma margalas otik sipanganonta.

44:26 Alai hudok hami ma: Ndang tarbahen hami tuat; alai molo angginami siampudan i dongannami, tuat pe hami; ai ndang tarbereng hami bohi ni raja i, molo so angginami siampudan i dongannami.

44:27 Jadi ninna naposom, damang i, mandok hami: Diboto hamu do, dua do tubu ni jolmangku.

44:28 Ruar do anggo na sada sian ahu, gabe hudok: Tongon tahe nunga diparsisiga binatang ibana, jala rasirasa nuaeng, ndang huida ibana.

44:29 Molo dibuat hamu dohot on annon sian jolongku, gabe adong marana, jadi tu toru ni situmandok na ma ahu na ubanon i taruhononmuna, bahenon ni hinamago.

44:30 On pe, molo sahat ahu tu naposom, damang i, hape ndang dohot dakdanak i, jala sisadari do hosanasida na dua i.

44:31 Tongon tahe molo diida, ndang disi dakdanak i, mate ma ibana; alai hami angka naposomon do patuathon naposom, amanta na ubanon i, tu toru ni situmandok, bahenon ni dokdok ni roha.

44:32 Ai ahu naposomon do mangkangkungi dakdanak i tu damang i, ningku do: Molo so hupaulak ibana tu ho, sai mardosa ma ahu tu damang i saleleng mangolu.

44:33 On pe, ua ahu, naposomon ma tading dison, gabe hatoban ni raja i, singkat ni dakdanak i, asa nangkok dakdanak i, rap dohot angka hahana i.

44:34 Ai beha ma pambahenku nangkok tu damang i, so udur dohot dakdanak i? Ndang hapanotnotan ahu hinamago na songgop tu damang i.

1 Musa ᯔᯮᯘ 45

45:1 Jadi ndang tartaon si Josep be sihol ni rohana maradophon sude angka na jongjong di lambungna, gabe dijouhon ma: Paruar hamu ma sude halak sian lambungkon! Jadi ndang adong manang ise na jongjong di lambungna, di na pinatandahon ni si Josep ibana tu angka hahana i.

45:2 Dung i dipangiar ma soarana tumatangis, pola dibege halak Misir, ro di isi ni bagas ni raja Firaun umbegesa.

45:3 Dung i ninna si Josep ma mandok angka hahana i: Ahu do si Josep, mangolu dope amanta i? Jadi ndang haalusan angka hahana i ibana, ai tarhatotong do rohanasida mida bohina i.

45:4 Dung i ninna si Josep ma mandok angka hahana i: Ua pajonok hamu ma tu lambungkon; gabe dipajonok nasida ma. Jadi ninna ibana ma: Ahu do si Josep, anggimuna, na ginadismuna i tu tano Misir.

45:5 On pe, unang mabiar hamu, jala unang serbeng matamuna, ala ginadismuna i ahu tuson, ai mangarade hangoluanmuna, umbahen disuru Debata ahu parjolomuna.

45:6 Ai padua taon on dope masa haleon di tano on, alai lima taonnari dope na so masa saburon manang gotilon.

45:7 Alai disuru Debata do ahu parjolomuna, pajophon di hamu ebaeba di tano on dohot pangoluhon hamu, mambahen haluaon bolon.

45:8 On pe, ndada hamu marsuru ahu tuson, Debata do, dipabangkit do ahu gabe ama ni raja Firaun, dohot gabe induk ni sandok bagasna, jala pangarajai di sandok tano Misir.

45:9 Asa pahatop hamu ma ne nangkok tu damang i, paboa hamu ma tu ibana: Songon on do tona ni anakmu, si Josep: Dipabangkit Debata do ahu gabe raja ni sandok tano Misir; tuat ma ho mandapothon ahu, unang togangtogangon.

45:10 Maringan di tano Gosen ma ho, asa jonok di lambungku, ho dohot anakmu dohot angka pahompum, ro di birubirum dohot lombum dohot nasa na di ho.

45:11 Ahu do marmuduhon ho disi, ai lima taonnari dope haleon on, asa unang raparan ho dohot isi ni bagasmu, ro di sude na di ho.

45:12 Antong matamuna dohot mata ni anggingki, si Benjamin i, marnidasa, paboa apala pamanganku manonahon hata i tu hamu.

45:13 Paboa hamu ma tu damang i sude hasangaponku di tano Misir, ro di sude na niidamuna i. Pahatop hamu ma ne tuat tuson rap dohot amanta.

45:14 Dung i dihaol ma rungkung ni si Benjamin, anggina i huhut tangis, si Benjamin i pe, sai tumatangis do mangkaol rungkungna.

45:15 Dung i diumma si Josep ma sude angka hahana i huhut tumatangis be; dung pe salpu i, asa mangkatai angka hahana i dohot ibana.

45:16 Dung i tarbortik ma barita i tu bagas ni raja Firaun, angka ninna do: Nunga ro angka haha ni si Josep; jadi denggan ma roha ni raja Firaun dohot angka naposona i.

45:17 Dung i ninna raja Firaun ma mandok si Josep: Dok ma tu angka hahami, songon on ma bahen hamu: Sorati hamu ma angka halodemuna i, borhat ma hamu, asa gira sahat hamu tu tano Kanaan.

45:18 Dung i boan hamu ma amamuna dohot ripemuna mandapothon ahu, asa hulehon tu hamu na dumenggan di tano Misir, asa dipangan hamu miak ni tano on.

45:19 Antong sahat tu ho ma i, bahen hamu ma songon on: Buat hamu ma sian tano Misir angka hureta hundulan ni anakkonmuna dohot jolmamuna i, boan hamu dohot amamuna ro tuson.

45:20 Jala unang habot rohamuna mida ugasanmuna i, ai gok di hamu do na denggan ni sandok tano Misir on.

45:21 Jadi dibahen angka anak ni si Israel ma songon i, diparlehon si Josep ma angka hureta tu nasida marningot pandok ni raja Firaun, dilehon tu nasida dohot bohal di dalan.

45:22 Diganupi nasida abit sasalin be, alai anggo tu si Benjamin tolu ratus rupia dohot lima salin abit dilehon.

45:23 Ditongoshon ma angkup ni di amana i sorat sampulu halode tunggal, angka na mangusung na dumenggan i sian tano Misir, dohot sampulu halode boruboru, angka siusung eme, sagusagu dohot sipanganon di amana i di tongan dalan.

45:24 Asa dipaborhat ma angka hahana i, gabe laho nasida; alai ninna do mandok nasida: Unang marbadai hamu di tongan dalan.

45:25 Jadi nangkok ma nasida sian tano Misir, gabe sahat nasida tu tano Kanaan, tu si Jakkob, amanasida i.

45:26 Jadi dibaritahon nasida ma tu ibana, angka ninna ma: Mangolu dope si Josep, jala ibana do sigomgom saluhut tano Misir; alai diparotootoi roha ni si Jakkob do i, ai ndang dihaporseai hatanasida i.

45:27 Alai dung dihatahon nasida tu ibana sude hata ni si Josep, angka na tinonahonna i tu nasida, diida dohot hureta, angka na tinongoshon ni si Josep mangusung ibana, gabe tarhilas ma tondi ni si Jakkob, amanasida i.

45:28 Dung i ninna si Israel ma: Taho ma i, mangolu dope hape si Josep anakki! Borhat ma ahu, asa huida ibana, tagan so mate dope ahu.

1 Musa ᯔᯮᯘ 46

46:1 Asa borhat ma si Israel dohot sude na di ibana i. Jadi dung sahat ibana ro di Berseba, gabe dipelehon ma angka pelean tu Debata ni amana si Isak i.

46:2 Dung i didok Debata ma tu si Israel marhitehite pangungkapon bornginna i, ninna ma: Jo, ale Jakkob, Jakkob! Dison do ahu ninna ibana.

46:3 Dung i ninna ma: Ahu do Debata. Debata ni amam, unang ho mabiar tuat tu tano Misir; ai gabe bangso na bolon do ho tumpahanku disi.

46:4 Hudongani pe ho tuat tu tano Misir, jala sai na togihononku do ho nangkok sogot, ingkon si Josep do mangampehon tanganna tu matam.

46:5 Dung i borhat ma si Jakkob sian Berseba, jala ditogihon angka anak ni si Israel ma si Jakkob, amanasida i, dohot angka anakkonnasida ro di jolmanasida, di hureta, angka na tinongos ni raja Firaun mamboan ibana.

46:6 Diboan ma dohot pinahannasida, ro di sinamotnasida, angka na sinamotsamotnasida i di tano Kanaan, jadi sahat ma nasida tu tano Misir. Si Jakkob ro di sude pinomparna i.

46:7 Angka anakna dohot angka pahompuna, angka boruna dohot angka pahompuna boruboru, ro di sude pinomparna, diboan tu tano Misir rap dohot ibana.

46:8 Jala on ma angka goar ni anak ni si Israel, angka na tolhas tu tano Misir i: Si Jakkob dohot angka anakna i: Buhabaju ni si Jakkob, i ma si Ruben.

46:9 Angka anak ni si Ruben: Si Hanok, si Pallu, si Hezron dohot si Karmi.

46:10 Angka anak ni si Simeon: Si Jemuel, si Jamin, si Ohad, si Jakin, si Zohar dohot si Saul, tubu ni boru Kanaan.

46:11 Angka anak ni si Lepi: Si Gerson, si Kohat dohot si Merari.

46:12 Angka anak ni si Juda: Si Er, si Onan, si Sela, si Peres dohot si Jara. Alai anggo si Er dohot si Onan mate do di tano Kanaan. Ia anak ni si Peres: Si Hezron dohot si Hamul.

46:13 Angka anak ni si Isasar: Si Tola, si Pua, si Job dohot si Simron.

46:14 Angka anak ni si Zebulon: Si Sered, si Elon dohot si Jalel.

46:15 I ma pinompar ni si Lea, angka na tinubuhonna di si Jakkob di Padang-Aram, angkup ni si Dina, boruna i. Sude nasida, angka anakna dohot boruna, tolupulu tolu halak do.

46:16 Angka anak ni si Gad: Si Sipion, si Haggi, si Suni, si Esbon, si Eri, si Arodi dohot si Areli.

46:17 Angka anak ni si Aser: Si Innah, si Isha, si Ishi, si Beeria dohot si Jara, ibotonasida i; ia angka anak ni si Beeria: Si Heber dohot si Malkiel.

46:18 I ma pinompar ni si Zilpa, na nilehon ni si Laban tu si Lea, boruna i, asa na sampulu onom halak i do ditubuhon ibana di si Jakkob.

46:19 Angka anak ni si Rahel, jolma ni si Jakkob: Si Josep dohot si Benjamin.

46:20 Ia tubu ni si Josep di tano Misir, angka na tinubuhon ni si Asnat, boru ni si Potipera, malim di huta On di ibana: Si Manasse dohot si Epraim.

46:21 Angka anak ni si Benjamin: Si Bela, si Beker, si Asbel, si Gera, si Naaman, si Ehi, si Roseh, si Muppin, si Hupim dohot si Ared.

46:22 I ma pinompar ni si Rahel, angka na tinubuhonna di si Jakkob, sampulu opat halak saluhutna.

46:23 Ia anak ni si Dan: Si Husim.

46:24 Angka anak ni si Naptali: Si Jazeel, si Guni, si Jeser dohot si Shillem.

46:25 I ma pinompar ni si Bilha, na nilehon ni si Laban tu si Rahel, boruna i, asa na pitu halak i tinubuhonna di si Jakkob.

46:26 Sude jolma, angka na tolhas tu tano Misir rap dohot si Jakkob, angka na ruar sian gontingna, so padohot jolma ni angka anak ni si Jakkob, onompulu onom halak saluhutna.

46:27 Ia anak ni si Josep angka na tubu di ibana di tano Misir, dua halak do, asa boho pitupulu halak pinompar ni si Jakkob saluhut, angka na tolhas i tu tano Misir.

46:28 Dung i disuru si Jakkob ma si Juda pajolohon manopot si Josep, asa didokkon ro tu Gosen; jadi tolhas ma nasida tu tano Gosen.

46:29 Dung i dipasang si Josep ma huretana laho nangkok tu Gosen manjumpangkon si Israel, amana i. Jadi dung masipaidaan nasida, dihaol si Josep ma rungkungna, huhut sai tumatangis.

46:30 Dung i ninna si Israel ma mandok si Josep: Agia tung nuaeng ahu mate, asal dung huida bohim, laos mangolu dope ho hape.

46:31 Alai ninna si Josep ma mandok angka hahana i dohot tu isi ni bagas ni amana i: Nangkok ma ahu paboahonsa tu raja Firaun, jala dohononku ma tu ibana: Nunga ro angka hahaanggingku dohot isi ni bagas ni damang i, na di tano Kanaan na sai laon, mandapoti ahu.

46:32 Angka halak sipormahan birubiru do nasida, ai pardorbiaon do diula nasida, jala diboan nasida do birubirunasida dohot lombunasida, ro di sude na di nasida i.

46:33 On pe, molo dijou raja Firaun i hamu, jala didok: Aha do ulaonmuna i?

46:34 Songon on ma dok hamu: Halak pardorbia do angka naposomon sian sietehetehonnami rasirasa nuaeng, songon i hami, nang ompunami, asa anggiat dipaian hamu di tano Gosen, ai marbiasbias do halak Misir mida halak sipormahan birubiru.

1 Musa ᯔᯮᯘ 47

47:1 Dung i laho ma si Josep mamaritahon tu raja Firaun, ninna ma: Nunga ro damang dohot angka hahaanggingku, ro di birubiru dohot lombunasida, ro di sude na di nasida i sian tano Kanaan, nunga pola sahat nasida di tano Gosen.

47:2 Dung i diarahon si Josep ma lima halak sian hahaanggina i, tu jolo ni raja Firaun.

47:3 Jadi didok raja Firaun i ma mandok hahaanggina i: Aha do ulaonmuna i? Jadi ninna nasida ma mandok raja Firaun: Siparmahan birubiru do angka naposomon, songon i hami, nang sian ompunami.

47:4 Angkup ni, didok nasida tu raja Firaun: Naeng maisolat hami di tano on, umbahen na ro, ai ndang adong jampalan ni birubiru ni angka naposom, ala posi ni haleon di tano Kanaan. On pe, sai loas ma angka naposom mian di tano Gosen.

47:5 Jadi ninna raja Firaun ma mandok si Josep: Nunga ro hape amanta dohot hahaanggim mandapoti ho.

47:6 Di jolomi do tano Misir on, di tano na dumenggan i ma paojak amanta dohot angka hahaanggim; di tano Gosen ma nasida mian. Ia adong diboto ho sian nasida jolma na pantas, pabangkit ma nasida gabe induk ni angka siramoti pinahanku sudena.

47:7 Dung i diarahon si Josep ma si Jakkob, amana i, mamboan ibana tujolo ni raja Firaun, jadi dipasupasu si Jakkob ma raja Firaun i.

47:8 Dung i ninna raja Firaun i ma mandok si Jakkob: Piga taon ma lelengmu mangolu?

47:9 Jadi ninna si Jakkob ma mandok raja Firaun: Saratus tolupulu taon ma leleng ni paisolatanki. Otik jala porsuk do ariari ni ngolungku, jala ndang dieak ariari ni ngolu ni angka daompung, di paisolatannasida i.

47:10 Dung i dipasupasu si Jakkob ma raja Firaun i, dung i ruar ma ibana sian jolo ni raja i.

47:11 Dung i dipahot si Josep ma inganan ni amana dohot angka hahana i, jala dilehon partaliannasida di tano Misir, di tano na dumenggan sahali di luat Ramses, songon na tinonahon ni raja Firaun i.

47:12 Jadi diparmudu si Josep ma amana dohot angka hahana i ro di sude pangisi ni bagas ni amana i, marguru tu torop ni anakkonna be.

47:13 Alai ndang adong sipanganon di sandok tano i, ai na potir situtu do haleon i, malas be do isi ni tano Misir dohot tano Kanaan, dibahen haleon i.

47:14 Asa dipagukguk si Josep ma nasa hepeng na jumpang ni tano Misir dohot ni tano Kanaan, tuhor ni eme, na ginalasnasida i; dung i ditaruhon si Josep ma hepeng i tu bagas ni raja Firaun.

47:15 Jadi dung suda hepeng di tano Misir dohot di tano Kanaan, ro be ma sude isi ni Misir manopot si Josep, angka ninna ma: Nia sipanganon di hami on! Boasa ma tagonan mate hami di jolomon, ala naung suda hepeng?

47:16 Jadi ninna si Josep ma: Boan hamu ma pahanpahananmuna tuson, asa hulehon tu hamu eme ali ni pinahanmuna i, molo naung suda hepeng i.

47:17 Jadi dipamboan nasida ma pinahannasida i tu si Josep, gabe dilehon si Josep ma tu nasida sipanganon ali ni angka hoda dohot birubiru dohot lombu dohot halode. Asa diparmudu ibana nasida na sataon i, ali ni saluhut pinahannasida i.

47:18 Jadi dung salpu na sataon i, ro ma nasida tu ibana paduataonhon angka ninna ma mandok ibana: Ndang tarporso hami tu ho ale rajanami, ndada holan perak i naung suda, pinahannami pe, nunga sahat ro di raja i sudena, ndang adong be tading, nda holan dagingnami dohot golatnami.

47:19 Boasa na tagonan mate hami paidaidaonmu, hami dohot golatnami? Ambati ma hami sandiri dohot golatnami ali ni sipanganon, asa mangadop di raja Firaun hami dohot golatnami, jala lehon boni, asa mangolu hami, unang mate, jala unang tarulang tano i.

47:20 Asa dituhor si Josep ma sandok tano Misir di raja Firaun, ai digadisi halak Misir do haumana be, dibahen potir ni haleon i, gabe raja Firaun ma nampuna tano i.

47:21 Dung i disagihon ma angka situan natorop i tu angka huta sian partalpahan ni tano Misir na sada tu na sada nari.

47:22 Holan hauma ni angka malim, ndang dituhor ibana, ai partalian ni malim do i sian raja Firaun, asa mangan nasida sian partaliannasida, na nilehon ni raja Firaun tu nasida; ala ni do umbahen so targadis nasida golatnasida i.

47:23 Dung i ninna si Josep ma mandok angka na torop i: Ida ma, nunga huambat hamu dohot golatmuna i sadari on di raja Firaun; na! Boni on di hamu, bonihon hamu ma i tu tano i.

47:24 Alai songon on ma taringot tu gogona i: Lehon hamu ma saparlima di raja Firaun, na opat bagian nari ma di hamu, bahen boni tu hauma i dohot bahen panganonmuna, ro di angka isi ni jabumuna, bahen sipanganon ni anakkonmuna huhut.

47:25 Jadi ninna nasida ma: Ho do na pangolu hami, sai asi ma roham, ale rajanami, marnida hami, sai hatoban ni raja Firaun i ma hami luhutna.

47:26 Laos patik ma i, dibahen si Josep rasirasa nuaeng, taringot tu tano ni halak Misir, saparlima di raja Firaun; holan tano ni angka malim sambing na so raja Firaun nampunasa.

47:27 Asa maringan di tano Misir ma Israel, di luat Gosen, mandapot di nasida ma i, jadi marpinompari ma nasida, gabe sopar situtu.

47:28 Dung i mangolu si Jakkob sampulu pitu taonnari di tano Misir, asa saratus opatpulu pitu taon ma umur ni si Jakkob.

47:29 Jadi dung marhira jumpang ajal ni si Israel, ditonahon ma anakna. Si Josep, ninna ma mandok ibana: Molo asi roham mida ahu ampehon ma tanganmu tu toru ni soithon, paboa na olo ho mambahen asi ni roha dohot hasintongan tu ahu, na so tupa tanomonmu ahu di tano Misir on.

47:30 Ingkon rap ahu modom dohot angka daompung, dibahen i ingkon boanonmu ahu sian tano Misir on, jala tanomonmu ahu di porbandaannasida. Jadi ninna si Josep ma: Hubahen pe songon na nidokmi.

47:31 Alai ninna ibana ma: Antong uarihon ma tu ahu! Jadi diuarihon ma tu ibana. Dung i marsomba ma si Israel dompak julu on ni podomanna i.

1 Musa ᯔᯮᯘ 48

48:1 Jadi dung salpu angka jamita ondeng, tarbortik ma tu si Josep: Ida ma, marsahit do amanta. Jadi diarahon ma anakna na dua i: Si Manasse dohot si Epraim.

48:2 Jadi dung tarbortik tu si Jakkob, adong na mandok: Ida ma, nunga ro anakmu si Josep manopot ho, gabe dipatogar si Israel ma dirina, hundul ma ibana di podomanna.

48:3 Dung i ninna si Jakkob ma mandok si Josep, boti ma i: Huida do Debata, pargogo na so hatudosan di huta Lus, di tano Kanaan, jala dipasupasu ahu.

48:4 Jala ninna do mandok ahu: Ida ma, hutumpahi pe ho marpinompar, jala hupatorop pe ho, hubahen pe ho gabe abalan ni angka bangso, jala lehononku do tano on tu pinomparmu sogot, bahen partohapannasida salelenglelengna.

48:5 Nuaeng pe, anakmu na dua i, na tubu di ho di tano Misir, tagan so ro dope ahu mandapoti ho tu tano Misir on: Si Epraim dohot si Manasse, ahu ma nampuna nasida, sobokkon si Ruben dohot si Simeon.

48:6 Alai anakmu angka na tubu dungkon ni, ho ma nampunasa, goar ni angka hahanasida i ma panggoarhononna di partaliannasida.

48:7 Ai di na ro i ahu sian Padang-Aram, mate do si Rahel di tano Kanaan, di dalan mardonokkon huta Eprata, laos hutanom do ibana disi, di dalan laho tu Eprata, i ma Betlehem.

48:8 Dung i dibereng si Israel ma angka anak ni si Josep, jala didok ma: Ise do angka nasida on?

48:9 Jadi ninna si Josep ma mandok amana i; anakku do nasida, angka na nilehon ni Debata di ahu dison. Jadi didok si Jakkob ma: Ua togu nasida tu lambungkon, asa hupasupasu nasida.

48:10 Ai nunga rambon mata ni si Israel dibahen torasna, ndang be torang ibana marnida. Jadi dipajonok ma na dua i tu ibana, gabe diumma ma nasida, jala dihaol.

48:11 Dung i ninna si Israel ma mandok si Josep: Nunga huida bohim, so hirimhirim ni rohangku jala ida ma, dohot do pinomparmu dipaidahon Debata tu ahu.

48:12 Dung i ditogu si Josep ma nasida sian ampuanna, jala manungkap ibana tu tano di jolona.

48:13 Dung i dibuat si Josep ma nasida duansa, si Epraim di siamunna, tondong ni sihambirang ni si Israel, jala si Manasse di sihambirangna, tondong ni siamun ni si Israel, jala dipajonok nasida tu ibana.

48:14 Alai dipatoltol si Israel ma tanganna siamun laho mangampehon tu ulu ni si Epraim, atek pe ibana siampudan, jala tanganna sihambirang tu ulu ni si Manasse, dituntun rohana do mambahen songon i tanganna i, atek pe si Manasse sihahaan.

48:15 Dung i dipasupasu si Israel ma si Josep, ninna ma: Debata, ni hinabiaran ni angka daompung, si Abraham dohot si Isak, angka na marparange di jolona, Debata siparmahan ahu saleleng ahu adong rasirasa sadari on.

48:16 Suruan, na palua ahu sian nasa parmaraan, i ma mamasumasu dakdanak na dua on, sai tarbarita ma goarhu marhitehite nasida, ro di goar ni angka daompung si Abraham dohot si Isak, sai sobokkon dengke ma hinadeaknasida di pusoran ni tano on.

48:17 Alai dung diida si Josep, na niampehon ni amana tanganna siamun i tu ulu ni si Epraim, sogo ma rohana marnida, gabe ditiop ma tangan ni amana i paunsathon sian ulu ni si Epraim tu ulu ni si Manasse.

48:18 Jadi didok si Josep ma mandok amana i: Ndang songon i, ale amang, ai on do sihahaan, ampehon ma tanganmu siamun tu uluna.

48:19 Alai manjua do amana i, ninna ma: Tangkas do i huboto, ale anaha! Ibana pe gabe bangso do sogot, balga do nang ibana; alai sai na umbalga do anggina i sogot sian ibana, jala pinomparna i sogot abalan ni angka bangso.

48:20 Jadi dipasupasu ma nasida di na sadari i, ninna ma: Marhitehite ho do mamasumasu si Israel, dohonon ni halak ma: Dibahen Debata ma ho, songon si Epraim dohot songon si Manasse! Jadi jumolo ma si Epraim dibahen maradophon si Manasse.

48:21 Dung i ninna si Israel ma mandok si Josep: Ida ma, na mate ma anggo ahu, alai sai donganan ni Debata do hamu, sai pasuangonna do hamu tu tano ni ompumuna.

48:22 Ianggo ahu, nunga hulehon di ho tano i santurpuk hasurunganmu sian angka haham, na hubuat sian halak Amori marhitehite podangku dohot siorhu.

1 Musa ᯔᯮᯘ 49

49:1 Dung i dijou si Jakkob ma angka anakna i, ninna ma: Marluhut ma hamu, asa hupaboa tu hamu na masa sogotsogot ni ari tu hamu.

49:2 Sange ma hamu marpungu, jala tangihon hamu ma, ale angka anak ni si Jakkob! Tangihon hamu ma hata ni si Israel, amamuna i.

49:3 Ale Ruben, ho do buhabajungku, gogongku jala bungabunga ni hagabeonku, parhasurungan di hamuliaon dohot parhasurungan di gogo nian.

49:4 Alai songon parbullak ni aek do ho ala ni; ndang be marhasurungan ho, ai dipanaek ho do podoman ni amam, diramuni ho do i uju na pinanaekmi tongon podomanki.

49:5 Ale Simeon dohot Lepi, angka na martinodohon; sinjata hajungkaton do podangnasida i.

49:6 Sai unang ma saor rohangku tu tahitahinasida, sai unang sauduran hasahalonku (tondingku) tu parluhutannasida i; ai mangasahon piripirinasida dibunui do angka jolma i, jala ditangkai angka lombu mangasahon jungkat ni rohanasida.

49:7 Marjea ma muruknasida i, ala mambahen uhum gogo dohot piripirina, ala jorbutna. Saginonku ma nasida tu tongatonga ni pinompar ni Jakkob, jala paserahonku nasida tu tongatonga ni pinompar ni Israel.

49:8 Ale Juda, ho do tongon sipujion ni angka hahaanggim! Pampe tu tangkuhuk ni angka musum sogot tanganmu, marsomba tu ho do angka anak ni amam.

49:9 Anak ni singa do si Juda. Manaek binahen ni sorosoro do ho ale anaha! Manggompang do ibana jala dipapodom, songon singa tunggal dohot songon singa boruboru; tung ise ma na hum manunggul ibana?

49:10 Ndang na meret tungkot harajaon sian si Juda, manang paruhum sian holangkolang ni patna paima ro si Shilo, jala Ibana do ihuthonon ni angka bangso.

49:11 Tambatonna ma halodena i tu bona ni hau anggur dohot anak ni halodena boruboru tu ranting ni hau anggur na denggan; taptaponna ma ulosna tu anggur, jala tu gota ni hau anggur sampesampena.

49:12 Rumara sian anggur do matana, jala sumaksak sian susu ia ngingina.

49:13 Ianggo si Zebulon, di topi laut do ibana maringan, di labuan ni angka parau, marbalokkon Sidon.

49:14 Ianggo si Isasar halode sipir holiholi do, na manggompang tu holangkolang ni angka parduan.

49:15 Dung diida denggan do hape pangulonan i jala lomak tano gabe dipaunduk ma abarana laho mamorsan, jadi halak parrodi ma ibana.

49:16 Ianggo si Dan manguhum bangsona sogot, sobokkon marga ni Israel i sadasada.

49:17 Doshon ulok di pinggol ni dalan do si Dan sogot, doshon ulok dari tahe di topi ni dalan balobung, mamarguti angka tambihul ni hoda, asa tunggaling tu pudi jolma na mangkunduli.

49:18 Hatuaonmi do na huhalungunhon, ale Jahowa!

49:19 Ianggo si Gad onjaron ni sapanggungan parbajo sogot, alai leleonna do nasida muse.

49:20 Sian si Aser ro sagusagu hataboanna, jala ibana mangalehon sipanganon hasoloan ni raja.

49:21 Ursa tini na gompis ianggo si Naptali, na mangalehon bagabaga na denggan.

49:22 Anak ni hau na marparbue ianggo si Josep, anak ni hau na marparbue di topi mual, dijangkit angka rantingna do dorpi.

49:23 Digitihi angka partembak ibana, jala disiorhon angka sumbia dompak ibana, jala dipaburuburu ibana.

49:24 Alai sai toltol do anggo siorna i, jala gogo do botohon ni tanganna i, pinargogo ni tangan ni Ulubalang ni si Jakkob, marhitehite goar ni Sipormahan, Partanobatoan ni si Israel.

49:25 Sian Debata ni amam, sai tumpahanna do ho, jala sian Pargogo na so hatudosan, sai pasupasuonna do ho, marhitehite pasupasu sian banua ginjang, marhitehite pasupasu sian lung, na gistang di toru, marhitehite pasupasu sian bagot panusuan dohot hagabeon ni bortian.

49:26 Disalpui angka pasupasu ni amam do angka pasupasu ni angka daompung sian na robi sahat ro di partalpahan ni angka dolokdolok sian mulamula; sai songgop ma angka i tu ulu ni si Josep dohot tu sisigatan ni Nasir (na pinillit) ni angka hahaanggina.

49:27 Tudoshon gompul panoro do ianggo si Benjamin; manganhon sorosoro ibana manogotna i, jala marbagi tabantaban ibana bodarina i.

49:28 I ma sude marga ni Israel na sampulu dua i, jala i do na pinaboa ni amanasida tu nasida laho mamasumasu nasida; pulik be do pamasumasuna i laho mamasumasu nasida be.

49:29 Dung i martona ma ibana, didok ma mandok nasida: Papunguon tu bangsongku nama anggo ahu; tanom hamu ma ahu tu lambung ni angka daompung, tu liang na di hauma ni si Epron, marga Het i.

49:30 Tu liang na di hauma Makpelah, tondong ni Mamre di tano Kanaan, na tinuhor ni si Abraham rap dohot hauma na sian si Epron, marga Het i, bahen parbandaan hapunjungan.

49:31 Tusi do tartanom si Abraham dohot si Sarah, jolmana i; tusi do tartanom si Isak dohot si Rebekka, jolmana i; jala tusi do hutanom dohot si Lea.

49:32 Hauma i dohot liang i na di bagasan, na tinuhor do i sian anak ni si Het.

49:33 Jadi dung sahat angka tona ni si Jakkob tu angka anakna i, dipapungu ma patna tu podomanna i, jadi tos ma hosana, gabe pinapungu ibana tu bangsona.

1 Musa ᯔᯮᯘ 50

50:1 Dung i tinggang ma si Josep tu bohi ni amana i, sai ditatangisi ibana huhut diumma.

50:2 Dung i ditonai si Josep ma angka naposona, angka datu i, asa dihapuri amana i. Jadi dihapuri angka datu i ma si Israel.

50:3 Jadi opatpulu ari ma lelengna diula nasida, ai na sai leleng do somal ariari pangkapuron. Jadi sai ditatangisi halak Misir ibana pitupulu borngin lelengna.

50:4 Jadi dung salpu angka ari pangandunganna i gabe didok si Josep ma tu isi ni bagas ni raja Firaun: Molo tung asi rohamuna mida ahu, sai patolhas hamu ma hatangkon tu pinggol ni raja Firaun:

50:5 Dipatolon damang i do ahu, ninna: Ida ma, na mate ma anggo ahu; ingkon di tanoman, na huhali di ahu, di tano Kanaan i, tusi ma tanomonmu ahu. On pe, loas nangkok, asa hutanom damang, dung i mulak ahu.

50:6 Dung i ninna raja Firaun ma: Nangkok ma ho, tanom ma amanta i, songon naung niuarihonmu.

50:7 Jadi nangkok ma si Josep laho mananom amana i; nangkok dohot sude naposo ni raja Firaun rap dohot ibana, ro di sintua ni bagasna i dohot sude angka sintua ni tano Misir i.

50:8 Ro di sude isi ni bagas ni si Josep dohot angka hahaanggina i, ro di isi ni bagas ni amana i; holan angka anakkonnasida dohot birubirunasida dohot lombunasida tading di tano Gosen.

50:9 Nangkok ma udur dohot ibana nang angka hureta, nang angka parsihundul, tung na torop situtu do nasida na sauduran i.

50:10 Jadi dung sahat nasida ro di pardegean Atad, na di bariba ni Jordan, digogo nasida ma disi mangondasi, arga pitu borngin lelengna diandungi si Josep amana i.

50:11 Jadi dung diida isi ni tano i, halak Kanaan i, pangondason na di pardegean Atad i, angka ninna ma: Hinamago bolon maon di halak Misir. Ala ni do umbahen Abel Misraim goar ni pangulonan i didok halak, na di bariba ni Jordan.

50:12 Dung i dipatupa angka anak ni si Israel ma tu ibana, songon naung tinonahonna i tu nasida.

50:13 Diusung angka anakna i ma ibana tu tano Kanaan, jala ditanom ibana di liang ni hauma Makpelah, tondong ni Mamre, na tinuhor ni si Abraham rap dohot hauma i sian si Epron, marga Het i, bahen parbandaan hapunjungan.

50:14 Jadi dung ditanom nasida amana i, mulak ma si Josep tu tano Misir, ibana dohot angka hahaanggina i, dohot sude angka na nangkok rap dohot ibana mananom amana i.

50:15 Alai mabiar do angka hahaanggi ni si Josep, dung mate amanasida i, angka ninna nasida ma: Atek tung beha dihosom si Josep hita maon, gabe dipasudol tu hita sude na roa, na itabahen i tu ibana.

50:16 Jadi martona ma nasida tu si Josep, ninna: Hata ni amanta tu hami, tagan so mate dope ibana:

50:17 Songon on ma dok hamu tu si Josep: Sai marpamuati ma roham di hajahaton ni hahaanggim dohot di dosanasida i, ai tung na roa do na binahennasida i tu ho; on pe, sai marpamuati ma roham di hajahaton ni angka naposo ni Debata ni amanta i! Alai tangis do anggo si Josep, dung didok nasida songon i tu ibana.

50:18 Dung i laho dohot angka hahaanggina i, marsinggang ma nasida tu jolona, angka ninna ma: Ida ma hami on, naposom ma hami.

50:19 Dung i ninna si Josep ma mandok nasida: Unang hamu mabiar, ai nda guru di Debata do nang ahu?

50:20 Na jat do nian tutu tahi ni rohamuna dompak ahu, alai na denggan do hapatean ni dibahen Debata, patupahon songon na niidamuna sadari on, laho pangoluhon bangso na bolon.

50:21 On pe, unang mabiar hamu, ahu ma marmuduhon hamu dohot anakkonmuna i. Dung i diapul ma nasida pasabamhon rohanasida.

50:22 Jadi maringan di tano Misir ma si Josep, ibana dohot isi ni jabu ni amana i, jala mangolu si Josep saratus sampulu taon lelengna.

50:23 Jadi sanga diida si Josep pinompar ni si Epraim ro di sundut patoluhon; angka anak ni si Mahir pe, tubu ni si Manasse, tu ampuan ni si Josep do ditubuhon.

50:24 Dung i didok si Josep ma tu angka hahaanggina i: Na mate ma anggo ahu, alai sai tingkiron ni Debata do hamu sogot, jala togihononna hamu ruar sian tano on tu tano na niuarihonna i tu si Abraham, si Isak dohot tu si Jakkob.

50:25 Dung i dipatolon si Josep ma angka anak ni si Israel, ninna ma: Sai na tingkiron ni Debata do hamu sogot, ingkon boanonmu ma dohot holiholingku sian on!

50:26 Jadi mate ma si Josep marumur saratus sampulu taon, gabe dihapuri nasida ibana, jala dipamasuk ibana tu bagasan batang di tano Misir.