HKBP Sipirok

Gareja HKBP Sipirok, Tapanuli Selatan ima gareja HKBP parjolo na adong di Tano Batak. Gareja on maringanan di Jalan Rumah Sakit, Kecamatan Sipirok, Tapanuli Selatan.^[1] Hajongjongan ni gareja on ima parbue ni pikkiran missionaris sian Bolanda, Gerrit Van Asselt, ima panditia na disuru sian Badan Zending Ermelo asa ro tu Tano Batak di taon 1857. Jala ibana ma pandita parjolo na mangalehon pandidion tu halak batak.^[2] Gareja on dipajongjong di taon 1864 jala nungga mandapot renovasi piga hali. Atik pe hajongjongan na sian parbue ni pikkiran halak bolanda, gareja on pe mandapot inona do sian akka pandita na sian Jerman na mangalehon kontribusi tu lam balgana ugamo Kristen di Tano Batak.^[1] Bidang ni kompleks gareja on ima 7 Ha, adongma disi gareja, udean akka missionaris, jabu pandita, balian nampuna ni gareja, jala adong do tugu parningotan hajongjongan ni gareja i. Di kompleks on pe hea do jongjong Balai Kesehatan ni HKBP, sonnari nungga dibahen pamarenta gabe RSUD Sipirok.

Bona Hajongjongan

Bona hajongjogan gareja on ima ditikki rapot parhobasan di Sipirok na didohoti opat missionaris sian Eropa, ima Pdt. Heine, Pdt. Klemmer, Pdt. Betz, dohot Pdt. Van Asselt.^[3] Rapot I dipature di tanggal 7 Oktober 1861 taringot to parbagian luat parbaritaan nauli di Tapanuli.^[4] Tanggal i ma dibahen HKBP gabe tanggal hatubuon ni HKBP. Parbue ni rapot i mambahen jongjong ma gareja HKBP Sipirok di bulan Mei 1864, jala gabe gareja HKBP na parjolo ma di portibi on.

Tugu di Jolo Gareja

Tugu na adong di jolo gareja ima tugu pesta Jubileum parjolo HKBP tanggal 7 Oktober 1936, ima parningotan 75 taon HKBP. Tugu on dipajongjong taringot tu alana HKBP Sipirok gabe sada inganan na ringkot dimula ni parbaritaan nauli di Tano Batak. Rheinische Mission Geselschafh (RMG) di bulan Mei 1864 meresmihon gareja on. Pandita Klammer ma gabe pandita parjolo di Sipirok tikki i.

Kondisi Saonnari

Nang pe nungga marumur piga ratus taon, godung on bagak dope parjongjongna jala dipake dope gabe inganan parmingguan songon na somal tu halak Kristen. Gareja on ima huria sabungan di resort Sipirok, jala ganupma pagaranna 13 huria. Gareja on nungga dipajadi pamarenta gabe inganan cagar budaya Propinsi Sumatera Utara.^[5]^[6]

Pustaha

[:0-1] 1.0 ^1.1 https://www.merdeka.com/sumut/menengok-sejarah-gereja-sipirok-di-tapanuli-selatan-dibangun-missionaris-belanda.html

[2] ttps://dongants.wordpress.com/2010/07/15/parau-sorat-sipirok-betlehem-nya-hkbp-yang-dilupakan/

[3] ttps://hkbp.or.id/article/kunjungan-biro-tik-hkbp-ke-hkbp-sipirok

[4] ttps://www.timesumut.com/daerah/105212418726/mengungkap-sejarah-gemilang-hkbp-sipirok-gereja-tertua-di-tanah-batak-163-tahun-berdiri-kokoh-di-tapanuli-selatan-sumatera-utara

[5] ttps://www.antaranews.com/video/3526689/dua-tempat-ibadah-tua-yang-jadi-simbol-kerukunan-di-tapanuli-selatan

[6] ttps://raufm.com/perayaan-natal-di-tapsel-bupati-berharap-jadikan-sebagai-bentuk-perwujudan-kasih-sesama-umat/

[1]

[2]

[3]

[4]

[5]

[6]