Huta Siallagan
Huta Siallagan i ma sada huta na adong di topian Tao Toba Samosir, propinsi Sumatra Utara, Indonesia. Saonari, huta on gabe inganan pariwisata paninggalan abahan Batak Toba. Di huta on adong Jabu Bolon. Huta Siallagan adong di Ambarita, Kecamatan Simanindo, Kabupaten Samosir, Propinsi Sumatra Utara. Tanggal 2 Pebruari 2020, Huta Siallagan ditabalhon Presiden Indonesia Joko Widodo, dung sae dipature.[1] Huta Siallagan ditanda angka wisatawan i ma alani Batu Pangarapotion (Batu Persidangan) paninggalan najolo na adong di huta on.[2]
Astuan goar
[patota | patota mualna]Dibagasan hata Batak Toba, Huta astuan desa molo di hata Indonesia manang permukiman inganan ni manisia. Maka, Huta Siallagan diastuan gabe Desa Siallagan.[3] Siallagan ima marga manang klan Batak Toba, pomparan ni Raja Naimbaton na mangihuthon horong ni Raja Isumbaon, ima anak pudaahon ni Raja Batak.[3]
Turiturian
[patota | patota mualna]
Naung leleng adong Huta Siallagan, alai andorangsona dang adong dope pambangunan modern di huta on sahat tu 2019. Dung i, taon 2019, presiden Indonesia Joko Widodo dohot pardijabuna Iriana Joko Widodo, ro mardalandalan tu Huta Siallagan on. Dung salpu i, Joko Widodo mandok tu Menteri PUPR, Basuki Hadimuljono, asa paturehon manang revitalisasi huta Siallagan.[4] Tingki paturehon Huta Siallagan on, topet sarupo dohot paturehon Kampung Ulos Huta Raja di Pangururan.[4]
Huta Siallagan naung dibangun tingki pamarinta raja parjolo di huta on, ima Raja Laga Siallagan. Dung i, dipatorusma angka pomparanna ima Raja Hendrik Siallagan, sahat tu pomparanna Raja Ompu Batu Ginjang Siallagan. Saonari, angka pomparan ni Raja Siallagan adong dope maringanan di huta Saillagan, lumobi di Ambarita. Kuburan ompu ni Siallagan boi dope dibereng di Huta Siallagan.[3]
Batu Pangarapotion
[patota | patota mualna]
Bidangni Huta Siallagan hira-hira 11.000 meter persegi dihaliangi tembok batu marungukuran 1,5 sahat tu 2 meter. Tembok nai manang dindingna dibahen sian batu nadisusun denggan. Najolo, di tembok na on adong bulu pinsur (bambu runcing) nadipangke lao jumaga huta sian halak naasing sanga pe sian musu.[3]
Di bagasan Huta Siallagan, adong jabu Batak Jabu Bolon marjejer. Namambahen Huta Siallagan dihasudunghon ima alania adong punguan angka bangku batu manghalinagi meja batu. Digoari ma i Batu Parsidangan, astuan na “Batu untuk Pertemuan dan Ujian”. Batu-batu on naung marumur hira-hira 200 taon lelengna. Di tonga-tonga ni Huta Siallagan hombar tu Batu Persidangan, adong tubu hau Hariara, hau on gabe dinahamat parbadia angka halak Batak na maringanan di Huta Siallagan.[3]
Pranala ruar
[patota | patota mualna]Pustaha
[patota | patota mualna]- ↑ Prasetyo, Andhika. (2 Pebruari 2022) Resmikan Penataan Huta Siallagan, Presiden: Tertata Rapi dan Berkelas, www.mediaindonesia.com, Diakses tanggal 11 Pebruari 2022
- ↑ Prihatin, Intan Umbari. (2 Pebruari 2022) Jokowi Resmikan Penataan Huta Siallagan: Kita Harap Jadi Destinasi Wisata, www.merdeka.com, Diakses tanggal 11 Pebruari 2022
- ↑ 3.0 3.1 3.2 3.3 3.4 Huta Siallagan: Ancient Batak Village on Samosir Island, www.indonesia.travel (hata Inggeris), Diakses tanggal 11 Pebruari 2022
- ↑ 4.0 4.1 Maulana, Sapri. (3 Pebruari 2022) Jokowi Resmikan Huta Siallagan - Kampung Ulos Huta Raja, Telan Biaya Rp 55,8 M, www.nasional.tempo.co, Diakses tanggal 11 Pebruari 2022