Komodo

Gombar ni Komodo, sian Kobun Binatang Ragunan, Jakarta Dangsina, Indonesia

Komodo (Surat Batak:ᯂᯬᯔᯬᯑᯬ, di hata Indonesia sipata didok biawak komodo, bahasa Latin: Varanus komodoensis), ima sada binatang ragam ni Lobar nabalga na adong mangolu di pulo Komodo, pulo Rinca, Plores, Gili Motang, dohot Gili Dasami di Propinsi Nusa Anggoni Purba (Nusa Tenggara Timur), Indonesia. Molo di Nusa Anggoni Purba, halak di pulo Komodo manjou Komodo ima ora.

Komodo ima pinahan sian tondong ni Varanidae umbalga an. Tungpe tondong ni Ilik naumbalgaan di portibi, ganjang ni Komodo hira-hira 2-3 meter boratna boi sahat tu 100 kg. Komodo ima pinahan panoro di pusuk di habitatna, alana dang adong dope binatang karnipora na asingna di bariba pulo hangoluan ni angka Komodo.

Partinandaan ni Komodo

Sisik ni komodo.

Pat dohot ihur ni komodo.

Komodo na marjomur.

Komodo riar naung matobang, borat pamatangna boi sahat tu 70 kg, alai molo komodo nadipahani songon di kobun binatang, boratna boi umboratan. Ganjang ni Komodo riar na hea didapot, ima 3,13 meter dohot boratna 166 kg. Ganjang ni ihur komodo, haira sarupo tu ganjang ni pamatangna. Komodo jantan umbalgaan sian komodo pamuean. Uarna sisik ni jantan tar hulabu golap sahat tu uarna narara batu bata, molo komodo pamuean uarna ijo tar bara, dohot adong tanda uarna nahuning gelleng di aruaruna. Umbahatan uarna ni komodo naposo, sian na huning, ijo, bontar, dohot na birong.

Di bagasan baba ni komodo na matobang, ingkon adong 60 ipon margarigi tajam ganjangna 2,5 cm. Ipon nai jotjot tading. Dila ni Komodo somalna ganjang, maruarna huning tar bara saotik, jala mardangka. Aek ijur ni komodo gabe na jotjot dihatai jolma, alana dirimpu bahat jolma, molo ijur ni Komodo sanga Ilik, sarupo rasunna dohot rasun ni ulok sanga Ilik namarbisa. Tungpe sogoni, angka napistar di bidang binatang, totop marbeda panapot tontang parmaraan alani ijur ni Komodo.

Pamatang ni Komodo

Komodo di Rinca.

Komodo naposo di Rinca mangallang horbo.

Mata ni Komodo boi mamereng daona sahat 300 m, alai pemerenganna dang denggan molo borngin, dibahen retina gelleng. Komodo boi paimbarhon angka uarna, alai dang boi maimbarhon angka barang naso humusor. Dung i, Komodo pe dang boi marbinege, tungpe adong lubang ni pinggolna.

Molo naeng managkup mangsa na, Komodo somalna mamangke dila, songon somalna tondon ni Squamata. Dila ni komodo boi manangkup angka bau di alogo, dung i, angir sian alogo i masuk tu langit-langit ni baba na, hata ilmiahna dijou ma organ Jacobson, mananda sude na adong di jonok ni komodo i. Alogo i ma na mangurupi komodo mangulului sipanganon. Molo komodo mamereng tu siambirang sanga tu siamun, artina komodo naeng manandahon adong bau di lambung na. Angka bangke, boi ditanda komodo sahat tu 4—9.5 km daona. Lubang igung ni komodo gunana holan marhosa, dang mangumma na angir. Komodo pe dang adong pangaro ni dilana, holan saotik sajo diujung ni aruaruna.

Pangalaho

Hepeng koin Rupiah Indonesia margombar komodo.

Dua komodo di Pulo Komodo.

Komodo riar holan boi dibereng di Indonesia topetna di propinsi Nusa Tenggara Timur, di pulo Komodo, pulo Rinca dohot adong di marpiga di pulo jonok tu pulo utama, dohot di pesisir pastima pulo Flores. Habitat komodo ima di padang rumput tarbuka (sabana) dohot harangan, sipata sahat tu pesisir pantai. Somalna komodo holan humusir di siangni ari sahat tu sore ari, alai totop marlinggom molo milas mataniari.